حتى الهوتميل والجيميل والماسنجر أضحت موضة قديمة ، الرويبضة أصبح الناطق الرسمي والمتكلم الاساسي في المجتمعات والمنابر (والمنتديات)* ، الأمة ولدت أم أمها زاتها ، و رويعي الغنم نصب رأسا ، وسفيه القوم قائدا ، و خبيثهم واعظا ، ومجرمهم أمينا * حتى عالم الجن ، وعلوم الطبيعة ( القوة والأرض والطاقة) فقدت معاييرها واختلت موازينها .. هذا التغيير وغيره أصبح من مسلمات عالم الانسان والعصر ومعطيات الواقع، لايهم. ولكن المحيرني فعلا هذا التغيير المخل الذي حدث في العالم الذي كنت استمد منه خيوط الحياة ومفاتيح شفراتها ، واقصد عالم الحيوان .. ماهذا الانقلاب الرهيب الذي حدث فيه من حيث الواجبات والمهام الطبيعية؟
الفار يسك الكديس ، الديك يعضي الكلب، الغنماية تاكل عشا الناقة ، الجاموس يطارد الاسد ، التيس ينطح الثور ، السوسيو يهرش الصقر .. الخ. * البوست اعزائي مفتوح للفيديوهات والصور الغريبة في عالم الحيوان . ولا علاقة له بالسياسة والمكواة والأمن القومي في السودان والدول المجاورة.
Post: #2 Title: Re: العالم بقى ما ياهو .. Author: محمد البشرى الخضر Date: 03-01-2017, 11:37 AM Parent: #1
هو يا عمر عالم الحيوان كان عادي ومستعدل و الأمور طيبة لغاية ما في يوم ما الغنماية راسها ضرب وقامت (حتّت اتو) أسد عجوز كدا! ومن ديك وعيييك
Post: #3 Title: Re: العالم بقى ما ياهو .. Author: مني عمسيب Date: 03-01-2017, 12:23 PM Parent: #2
اخوتي احبتي .. ود التاج وود البشري .
لكما عاطر السلام ..
لدرجة انا بقيت ما فاهمة اي شئ يا ابو عمير ! العالم بقى ما ياهو .. تصدق بعض مرات بتمني لو الانتحار ما كان جريمة . حقيقة العالم بقي غير صالح للعيش . لو ملاحظين العالم ضاق بالعالمين .
مصيبتنا نعزي نفسنا فيها !!!
Post: #4 Title: Re: العالم بقى ما ياهو .. Author: عمر التاج Date: 03-01-2017, 12:46 PM Parent: #3
سلامات ود البشرى ومرحبا بك في العَشرة دي .. و يا عمر عالم الحيوان كان عادي ومستعدل و الأمور طيبة لغاية ما في يوم ما الغنماية راسها ضرب وقامت (حتّت اتو) أسد عجوز كدا! ومن ديك وعيييك
الاسد عذرناه يا محمد ، عجوز وورقه كعب ، لكن الكديسة دي نقول عليها شنو؟ عمرنا كله يدرسوا فينا انه الفيران بخافن من ريحة الكديس ، أسع تشوف بعيونك الفار بتفرعن على القط ويساكك فيهو من جحر لاخر. كدي عاين متل المحل دي؟
Post: #5 Title: Re: العالم بقى ما ياهو .. Author: عمر التاج Date: 03-01-2017, 12:59 PM Parent: #4
Post: #6 Title: Re: العالم بقى ما ياهو .. Author: عمر التاج Date: 03-01-2017, 01:24 PM Parent: #5
حباب الصديقة منى ، ومرحبا بك في عالم الحيوان ههههه حقيقة العالم بقي غير صالح للعيش . لو ملاحظين العالم ضاق بالعالمين
حاشاك يا حبيبة من الانتحار ، القهر سيذهب لمستحقيه والقتل لمن كتب عليه .. أما حقيقة العالم وتبدل نواميسه فمن أفعالنا كبشر ، والله لايغير ما بقوم حتى يغيروا ما بانفسهم.. معقوله لكن ما نراه في الفيديوهات أعلاه .. Rat Vs Cat فأر يعض قط قط جلبوا له فئران فبقى يلعب معها ، يكون قايلن اخواته في الرضاعه ولا شنو؟ والأدهي كمان حكاوي الكلاب والقطط .. كديس يهرش له عشرة كلاب ده ما آخر زمن ؟ كدي تأملوا معي في هذه المشاهد:
Post: #7 Title: Re: العالم بقى ما ياهو .. Author: عمر التاج Date: 03-01-2017, 08:04 PM Parent: #6
الثور ياجماعة ، تور الله البنطح ده ، اصبح مثل الثورة السودانية ، يخاف من مجرد معزة.. ما مصدقين ؟ تأملوا هنا..
وهنا ..
Post: #8 Title: Re: العالم بقى ما ياهو .. Author: عمر التاج Date: 03-01-2017, 08:18 PM Parent: #7
لا وكمان ما شفتوا الكلب ، ماشفتوه (يا خلاني) جرقاس اللي كان لمن يكون في شارع ، ناس الحلة كلهم بخلو الشارع ده وبمشوا بالشارع التاني ، في عالم اليوم بقى جرقاس طلع بخاف من الاسد ، عفوا اقصد من الديك ، ديك العدة الواحد ده .. اتحسبنو يا جماعة ، واحتسبوا ثم شاهدوا ..
Post: #9 Title: Re: العالم بقى ما ياهو .. Author: Nasser Amin Date: 03-01-2017, 08:45 PM Parent: #8
سلامات الاخ عمر و الاخوة الاعزاء...ما نجي يدنا فاضية اسود و نمور اصبحوا ملطشة!!
Post: #11 Title: Re: العالم بقى ما ياهو .. Author: نعمات عماد Date: 03-01-2017, 08:46 PM Parent: #1
سلام عمر التاج و ود البشرى و منينة بت عمسيب
أول شئ يا الحبيبة منى ان شاءالله الزهجة عدت على خير ، هي الحياة ح تنتهي براها منها فيها ولا عايزة مساعدة مننا لذا مافي داعي للاستعجال .
و العالم من زمان بتمر عليهو أوقات صعبة وحروب ، بعدها الناس بتراجع أخطاءها و بتقوم من كبوتها لأن الأمل و ارادة الحياة أكبر من الاستسلام للموت .
شكرا ياعمر التاج على الفيديوهات ح أشوفها اذا تحسنت خدمة الانترنت هنا .
Post: #12 Title: Re: العالم بقى ما ياهو .. Author: عبدالعزيز الفاضلابى Date: 03-01-2017, 09:15 PM Parent: #11
سلام ياود عمى .. ويمين ماطالبنى حليفة ,, قبل رجوعك بكم يوم كنت داير افتح بوست افقدك ,, بعودتك يعود الألق للمنبر ,, وبغيابك يحن الجذع. أها بمناسبة كلامك ده:
Quote: ماهذا الانقلاب الرهيب الذي حدث فيه من حيث الواجبات والمهام الطبيعية؟
شوف الزول المسلَّط الشغَّل الطيرة كمسارى ده.
Post: #13 Title: Re: العالم بقى ما ياهو .. Author: عمر التاج Date: 03-01-2017, 10:13 PM Parent: #12
شكرا اصدقائي ، سأعود لمشاهداتكم ومداخلاتكم مع المزيد من الغرائب
Post: #14 Title: Re: العالم بقى ما ياهو .. Author: عمر التاج Date: 03-02-2017, 09:49 AM Parent: #13
صباح الخير اخونا ناصر امين ، احيك علي الفيديو الجميل .. ملك الغابة اصبح مسخرة يارجاااالة ، والنمر اخد علقة زي العلقة معقول لكن ياوحوش
نفس الفكرة نراها في الفيديو ادناه، قرد صغير يهزأ من النمور
Post: #15 Title: Re: العالم بقى ما ياهو .. Author: عمر التاج Date: 03-02-2017, 10:06 AM Parent: #14
مرحب بيك الصديقة نعمات ، و شكرا لدعمك للصديق مني.. وارجو ان تفسيرين معنا التغيير السلوكي العجيب لعالم الحيوان كما اوردناه
Post: #16 Title: Re: العالم بقى ما ياهو .. Author: عمر التاج Date: 03-02-2017, 11:21 AM Parent: #15
حبيبنا الفاضلابي ازيك يا صديق .. ليك وحشة وتوحشات وماتشوف شر ان شاء الله
Post: #17 Title: Re: العالم بقى ما ياهو .. Author: عمر التاج Date: 03-02-2017, 07:21 PM Parent: #16
أرنب في مواجهه صقر ، مقاومة وبسالة من قبل الارنب
Post: #18 Title: Re: العالم بقى ما ياهو .. Author: عمر التاج Date: 03-02-2017, 07:39 PM Parent: #17
الوضع الطبيعي ان تصاد الاسود الجواميس وتقتلها أما أن يقتل الجاموس الأسد فالأمر فعلا ما ياهو ..
Post: #19 Title: Re: العالم بقى ما ياهو .. Author: جلالدونا Date: 03-02-2017, 07:47 PM Parent: #17
يا اخوى العالم اتغيّر من زماااان الفيديو من سنة 1417 الكلام ده كمن الهسبند كان اسمو هارشلى
Post: #20 Title: Re: العالم بقى ما ياهو .. Author: عمر التاج Date: 03-03-2017, 09:07 AM Parent: #19
صديقنا جلالدونا تحيات انت كده جيتنا من الاخر .. مرحلة الحيوان والحيوان مراحلة اولية لخراب المجتمعات ومرحلة الانسان والحيوان دي مرحلة وسيطة أما مرحلة تبدل العلاقات بين الحيوان والمرأة فدي نهاية الكون فعلا.. والفيديو بتاعك معبر عن حيثيات تكون هذه العلاقة أما الفيديو التالي فهو خلاصة العلاقة .. يا اخ النسوان ديل عايزات يحب أسد .. أسد ياابو الجل..
Post: #21 Title: Re: العالم بقى ما ياهو .. Author: عمر التاج Date: 03-03-2017, 08:40 PM Parent: #20
*
Post: #22 Title: Re: العالم بقى ما ياهو .. Author: نعمات عماد Date: 03-03-2017, 09:45 PM Parent: #1
Quote: مرحب بيك الصديقة نعمات ، و شكرا لدعمك للصديق مني.. وارجو ان تفسيرين معنا التغيير السلوكي العجيب لعالم الحيوان كما اوردناه
الصديق عمر التاج
شكرا على السؤال مع ان المسؤول ليس بأعلم من السائل .
غايتو العارفاهو ان البنوآدم تعدوا على الحياة البرية و دخلوا الغابة ( أقصد التخييم ) فخرجت منها الحيوانات
أما الحيوانات الأليفة فهي تقلد الناس العايشة معاهم و تشاهد معهم التلفزيون و الأنترنت فتصبح أذكى منهم .
ملحوظة هامة : الكلام الفوق ليس على مسئوليتي .
Post: #23 Title: Re: العالم بقى ما ياهو .. Author: عبدالعزيز الفاضلابى Date: 03-04-2017, 01:00 AM Parent: #22
Quote: أما الحيوانات الأليفة فهي تقلد الناس العايشة معاهم و تشاهد معهم التلفزيون و الأنترنت فتصبح أذكى منهم .Quote] صدقتى يانعمات ,, بس الكلب ده شكلو رشاشة ,, كيةً فى ودالبشرى ,,
جلادونا جاييك راجع للنسوان الـشايلات فراريرن ديل
Post: #24 Title: Re: العالم بقى ما ياهو .. Author: عمر التاج Date: 03-04-2017, 04:25 PM Parent: #23
تحياتي مجددا الصديقة نعمات
Quote: غايتو العارفاهو ان البنوآدم تعدوا على الحياة البرية و دخلوا الغابة ( أقصد التخييم ) فخرجت منها الحيوانات أما الحيوانات الأليفة فهي تقلد الناس العايشة معاهم و تشاهد معهم التلفزيون و الأنترنت فتصبح أذكى منهم .
خلاصة في غاية الاهمية ، سنكتبها باسمك كبادرة جيدة ، ونتحمل تبعاتها القانونية والاجتماعية
كون انسان اليوم يعيش في غابة ، اصبح أمرا مثبتا ولكن هل يعيش حيوان اليوم حياة انسان زمان؟ هذه فرضية جديدة نبني عليها بحثنا عن حقيقية الياهو ماسنجر ، والماياهو.
Post: #25 Title: Re: العالم بقى ما ياهو .. Author: عمر التاج Date: 03-04-2017, 06:48 PM Parent: #24
مساءات الرفاهية والتنعم ابن عمي الفاضلابي الكلاب طبعا من اكثر المخلوقات التي تأنسنت ويبدو ان خوة الانسان للكلب ماضاعت سدي كدي بص للصورة دي .. والفيديوهات تحتها .. لكي تاااامن انه الكلاب ما ياها الكلاب ..
Post: #26 Title: Re: العالم بقى ما ياهو .. Author: Basamat Alsheikh Date: 03-04-2017, 08:16 PM Parent: #25
اظرف بوست واروع بوست... وحكاية الحاجات كلها بقت معكوسة...دي حكاية الكديسة تخاف من الفار والكلب يخاف من الديك والنمر يخاف من القرد... وعندها معنى واحد....علامة من علامات يوم القيامة...وما من العلامات الصغرى .ولكن العلامات الكبرى....هسع دي دنيا يعيشون فيها...بت نفيسة عند حق... وحكاية الراجل الشغل الطير كمساري يلم ليه القروش....دي حكاية ما بيصدقها العقل...والان امنا لا مستحيل تحت الشمس.. اما قصة اذكى كلب في العالم....دي قصة تانية.... ودمت بالف خير وصحة عافية
Post: #27 Title: Re: العالم بقى ما ياهو .. Author: عمر التاج Date: 03-05-2017, 10:23 AM Parent: #26
أنت الأروع يابسمات بعد التحية والتجلة لمرورك الكريم طبعا من ناحية اتصاف الفيديوهات بعلامات الساعة فهو خيار من الواقع والمستقبل، فانقلاب النواميس ينتظر ان تكون مع نهاية الكون وعالم الحيوان ليس نشاذا ، فالانسان هو من ابتكر الانقلابات ومنها اقتبس الحيوان تغيراته.. والانسان في عصرنا هذا يفكر في احداث الانقلاب قبل ان يولد وبعد ان يخرج يجعل من عالم الاطفال عالم غير الذي كنا نعرفه.. والدليل ما يفعله هؤلاء الاطفال..
Post: #28 Title: Re: العالم بقى ما ياهو .. Author: عمر التاج Date: 03-06-2017, 05:54 PM Parent: #27
نعود للانسان من بوابة الطفولة وشوفوا معي هذا الطفل المشوطن.. دي اطفال حقيقية ما ياها ..
Post: #29 Title: Re: العالم بقى ما ياهو .. Author: عمر التاج Date: 03-06-2017, 08:33 PM Parent: #28
نعود لعالم الحيوانات ونتامل البقر اكثر حيوانات ترتبط في مخيلتنا بالغباء فاذا قال لك اخوك انت بقرة فتحسس موقعك بين الحيوانات ولكن الابقار نفسها تحسست موقعها بين الناس والدليل ما نشاهده هنا..
Post: #30 Title: Re: العالم بقى ما ياهو .. Author: عمر التاج Date: 03-06-2017, 08:39 PM Parent: #29
لا والعجب الغنم الغنماية الواحدة دي.. تاني الواحد لما يقولو ليه انت غنماية مايزعل يتذكر الفيديوهات دي..
Post: #31 Title: Re: العالم بقى ما ياهو .. Author: عبدالعزيز الفاضلابى Date: 03-06-2017, 09:33 PM Parent: #30
Quote: ولكن الابقار نفسها تحسست موقعها بين الناس والدليل ما نشاهده هنا..
ودعمى سلام ,, بوستك ده رجعنا لى زمن كان البهايم الـ بقبضها غفير المشروع بيطبلها فى زريبة تُسمى (الحاصِل) ويجى صاحب البهايم المقبوضة يدفع مبلغ خمسة قروش على الراس ,, ونحن لما كنا صغار وكنا نغفل عن البهايم وياخدها الغفير للحاصل ,, ننتظر حتى وقت القيلولة حيث تسكن الدنيا ويكون لاطير ولابشر حايم برَّه ونمشى نكسر قفل الحاصل ونحرر البهايم عشان نتفادى علقة سخنة من الاهل. يعنى لو بهايمنا ديك كانت زى البهايم الـ فى الفيدوز دى كانت وفرت علينا كتير. أها ياعمر بمناسبة البهايم الشليقة دى كنا فى جامعة القاهرة الفرع وطبعاً الجامعة فى جوارها قشلاق البوليس وكانوا بِرَبُّو الغنم فى بيوتهم والغنم بتطلع من البيوت وبتجى الجامعة تسفسف السندوتشات البرموها الطلبة ,, يوم بعض اصحابنا كانوا ماشين على كلية التجارة فى مرأة فتحت الباب وقالت لواحد من ولادها كان يلعب فى الشارع: ياولد امش شوف الغنم جات من الجامعة؟ ياخ كان فى غنماية مافضل ليها الا تجيب دفترها وتجى تحضر معانا المحاضرات ,, الغنماية دى كانت عادى بترفع قزاز الببسى الـ فيهو بواقى وتصنقع لى فوق وترمى الفاضى ,,
Post: #32 Title: Re: العالم بقى ما ياهو .. Author: عمر التاج Date: 03-07-2017, 06:47 AM Parent: #31
صباحك فل عزيزي الفاضل الفاضلابي غنمايتكم دي الظاهر عليها هي صاحبة الفيديو الذي فاقت شهرته الافاق .. غايتو حظكم قريتو مع غنمايات مشهورة
Post: #33 Title: Re: العالم بقى ما ياهو .. Author: عمر التاج Date: 03-07-2017, 09:32 PM Parent: #32
نختم البوست بحكاية القرود الذكية ، دي حكاية تحير فعلا ، وهاكم بعض امثلة:
Post: #34 Title: Re: العالم بقى ما ياهو .. Author: عمر التاج Date: 03-08-2017, 07:54 PM Parent: #33
ولا ننسى كذلك هذا الكلب الذي فات الكبار والقدرو كلب يتكلم كالبشر لا وكمان يتكلم لغات ، خمسة لغات حية ويشارك في برنامج المواهب بتاع البني ادميين دي عالم ماياهو فعلا ..
Post: #35 Title: Re: العالم بقى ما ياهو .. Author: عمر التاج Date: 03-15-2017, 05:36 AM Parent: #34
أخيرا وليس آخرا حيوانات مؤنسنة ..
Post: #36 Title: Re: العالم بقى ما ياهو .. Author: عمر التاج Date: 03-28-2017, 06:18 PM Parent: #35
