خاطر السوداني “معتز” بحياته وهاجر عن طريق البحر إلى أوربا ورغم حصوله على اللجوء في ألمانيا إلا أنه وجه رسالة شديدة اللهجة لبني جلدته يحذرهم من الهجرة. وقال اللاجئ (اوجه رسالة للشباب في السودان الوضع في أوربا ليس كما تتخيلون، وهذه البلاد ليست نعيم وجنة ودنيا حلوة، هذه البلد غير القرف والخمر لا يوجد فيها شئ جديد، وأفضل لكم أن تعيشون في السودان ومباصرة الأمور). وأضاف معتز بحسب مشاهدة محرر موقع النيلين للفيديو المرفق (وإذا خرجت من السودان غير الذل والهوان لن ترى شئ، أنا حالياُ في أوربا فلس وقرف ولا يوجد عمل تتعلم لغة وبعد ذلك لا تجد شغل لأن أوربا تعاني من الإرهاب وركود في الإقتصاد). وأضاف معتز أن نظرة الأوربيين للاجئين نظرة الكلب (والكلب هنا يقيم أفضل من البشر، ولو شاهدوا أفريقي وكلب سيطعمون الكلب ويتجاهلون الأفريقي، الناس ديل هنا الكفر على أصوله). وقال معتز موجهاً حديثه للذين يودون الهجرة بالمخاطرة وركوب البحر (أحسن ليه يعيش في السودان عشان ما يدخل في جنون ونفسيات، ونحن مسكنا الماسورة ولا نريد لإخوانا السودانيين أن يحدث لهم مثلنا، اللهم قد بلغت فأشهد). وقال معتز بحسب مشاهدة محرر موقع النيلين للفيديو المرفق(ما أراه هنا شغل شواطين ودنيا ولا علاقة له بالأخرة وهنا لا يوجد مستقبل، ورغم منحنا سكن ومصاريف إالا الفراغ يجعلنا نشرب البيرة، والخواجات شغلهم حار ولا توجد قروش، أفضل السعودية). وقال رفيقه الذي ظهر في الفيديو (بلدكم فيه كل شئ لماذا تهاجروا، الخير في السودان ونحن رفضنا النعمة في السودان لقلة أدبنا وسفاهتنا والله يهدي كل سوداني). وأضاف معتز وهو من سكان ضاحية الأزهري بالعاصمة الخرطوم قبل هجرته (أي زول شفت وعامل فيها راسطة أحسن ليه يقعد في السودان، الشفاتة هم من يعيشون في السودان أم المهاجرين ناس فارات دايرين الذلة والإهانة ويريدون الدنيا والسكر والزنا، فهولاء مرحب بيهم معانا لأنه بلدها هنا، أما إذا كنت تريد المال وبناء مستقبل وتتزوج وتكوين أسرة فالسودان هو الذي ينفعك). نقلاً عن موقع النيلين
الخواجات الكفار ديل ومن شغلهم الحار دا والإعترفت بيهو إنت بذات نفسك طلعوا قروش عشان يوفروا ليك سكن ومعيشة والباقي تشرب بيها البيرة ثم لم يجبروك علي أن تشتغل شغلهم الحار دا بيقدروا عليه براهم (وما آووك إنت براك بل ملايين من اللاجئين من كل بلاد المسلمين)
ثم أنظر ماذا فعل بك حكامك "المسلمين " ممكن الواحد يبني قصر تاني غير القصر الجمهوري والزيك كدا "ومسلمين والحمد لله" بينوموا في مجاري تبعد عن القصر 10 أمتار الرئيس ممكن يشتري لنفسه يخت رئاسي بمبلغ وقدره وأكثر من نصف طلبة المدارس في الخرطوم "وبإعتراف الحكومة نفسها" ما لاقين فطور والجلوس علي كرسي ودرج في مدرسة من الكماليات في عرفهم
الرئيس "الإسلامي" بيصرف من أموالك وأموال الغلابة 16 في المية من ميزانية الدولة علي قصره الجمهوري ولا يصرف أكثر من1 في المية علي كل تعليم السودان ولا يصرف أكثر من 1 في المية علي كل صحة السودان القصر الجمهور عنده 16 طيارة والخطوط الجوية السودانية طيارة ما فيها
وما تقول رئيسك مفلس رئيسك الإسلامي يتبرع للفريق المصري كل واحد سيارة جديدة ويتبرع لجيبوتي بمستشفي كامل ولافريقا الوسطي بعربات إسعاف غير الكرم بإيواء كل إرهابي العالم والصرف عيهم ومنحهم جوازات سودانية
تفتكر يا مهاجر لو أي من الشباب الضحوا بحياتهم عشان يصلوا أوربا لو أن أي منهم وفروا له عملا يوفر له سكنا وقروش يسكت بيها شياطيين الجوع (وخليك من شراب البيرة ) تفتكر كان هاجر؟؟؟؟؟؟
يا أيها المهاجر السوداني أختشي وما تعضي اليد التي أنقذتك من غياهب البحر ثم آوتك وأطعمتك أختشي علي دمك وأطلع إشتغل والشغل راقد لكن حار لكن أشرف من أن تنفق إعانتهم في شرب البيرة وتنزل فيهم شتائم
Post: #20 Title: Re: مهاجر سوداني: الأوربيون يعاملون الكلاب اف Author: عماد الدين الطيب عمر Date: 02-16-2017, 11:45 AM Parent: #6
كلام سليم يا نصر مافي حاجة بتجبره يرجع السودان و بشة ح يكون في استقباله في المطار
الأخ ناصر كلامك سليم لكن في مشكلة مع مجموعة كبيرة من المهاجرين قبلوا ما يمشوا أوربا بتخيلوا ماشين الجنة يعني مافي شغل خالص والقروش تراب والرفاهية في أي مكان, والواحد بتخيل لو أدوهو قروش وهو عاطل بكون جميل, لكن ما متخيلين أن العطالة كارثة مهما كان سبل الحياة متوفرة مجانا.
بالضبط يا عثمان "بتخيلوا ماشين الجنة يعني مافي شغل خالص والقروش تراب والرفاهية في أي مكان" أها جنة الإيواء وقروش البيرة ولقوها بعد داك ؟؟؟؟؟ لو الواحد داير يطور نفسه شغل وقراية ممكن آي الشغل حار لكن أحسن من العطالة والفراغ البيخليهم يعضوا الأيد الأطعمتهم
مشكلة كثير من الشباب السوداني أنهم بيكرهوا الشغل خاصة العمل اليدوي وعندهم أن عدم الشغل هو السعادة
أها لو ما إتجازوا المحطة دي وعرفوا السعادة الكامنة في العمل (وإنه الزول السعيد يآكل من عرق جبينه) لو قعدوا في السودان ولا مشوا أوربا نفس التعاسة ونفس الإحباط
Post: #9 Title: Re: مهاجر سوداني: الأوربيون يعاملون الكلاب اف Author: سيف النصر محي الدين Date: 02-15-2017, 10:43 PM Parent: #8
لو كان من دارفور و هرب لان قريته تعرضت للدمار و قريباته للاغتصاب او من جبال النوبة و هرب من الجحيم النازل على رأسه و رؤوس أهله يوميا من طائرات الانتونوف الاسلامية ما كان قال كلامه ده. أصلا اللجوء الاقتصادي غير مرحب به في أوروبا و فعلا كان أحسن ليهو ضاحية الأزهري التي خرج منها دي. زول عينو للكيزان يقدلون بحقه و يتحكمون في معيشته و يحصرون الوظائف لأسرهم و محاسيبهم يجي ينّظر تنظيره الفارغ ده. كان من الاولى ان يخاطب الشباب بضرورة الثورة و التغيير بدل الكلام المجاني.
Post: #15 Title: Re: مهاجر سوداني: الأوربيون يعاملون الكلاب اف Author: ابراهيم عبد الوهاب Date: 02-16-2017, 08:01 AM Parent: #9
بمناسبة الحيوانات عندي صحبي قال شغال (مفسح كلاب) كل يوم بسوق الكلاب بفسحها في الحدائق قال لي قرووووش صااااح قلت ليهو خلاص شوف لي طريقة معاك
من البديهي أي دولة جيتا دارس وعندك شهادات أو درستا فيها وطورت من نفسك حتشتغل شغل محترم ومريح حتي الناس البتمشي الخليج والسعودية فرق شاسع بين شخص يمشي مؤهل وبشهادات وبين شخص يمشي بي يديهو ساي . جماعتك ديل الواحد جاي يد وراء ويد قدام عاوزين الالمان يشغلوهم مدراء بنوك ولا طيارين ؟؟؟ عشتا في اوربا دي أكثر من نصف عمري بتدخل أي معاينة لوظيفة الا تظلمك شهاداتك ومؤهلاتك كان قطاع حكومي او قطاع خاص والله تكون مؤهل ويقدم معاك من اهل البلد مائتين شخص يشيلوك أنت لا بيعرفو دا أسود ولا دا ابيض ولا دا مسلم ولا دا مسيحي .
أي شخص يحضر لاجيء في أي دولة اوربية لازم يمشي المدرسة يتعلم لغة البلد وبرنامج الاندماج مع المجتمع وبعدها يحدد هو عاوز شنو لو عندو شهادات وعاوز يواصل الباب مفتوح ليهو ، عاوز يأخذ كورسات في عمل معين برضو يدهم ممدودا ليك يبقي العيب في منو ؟؟ ناسك ديل الواحد ماصدق وصل أوربا واعطوهو بيت ومصاريف في حسابو طوالي عاوز يدور هلس و بيرة في نص النهار والله الخواجات ديل الا ما ندر ااي بيشربو البيرة او الكحول فقط نهاية الاسبوع في الويكند يجي يقول ليك دي بلاد الكفار يأخ الكفار ديل سكنوك وبيصرفو عليك أتحداهو انا ملتزم اقطع ليك تذكرة الرجوع للسودان خليهو يمشي القصر الجمهوري يقول ليهم جيعان عشان يعرف الفرق بينو وبين الكلب شنو وفي بلدو .
اوربا العاوز يطور من نفسو ويبني مستقبل ليهو بيلاقي الف باب وباب انفتح ليهو ومليون يد ويد إتمدت ليهو والعاوز يباري شراب الكحول والهلس والنوم ما يجي يبكي ويشتكي وتاني بكرر الشباب الظهرو في الفيديو ديل ما دام عيشة الكفار ديل ما عاجباهم أنا علي استعداد اقطع ليهم التذاكر First class وخليهم يرجعو لامير المؤمنين عمر البشير عشان يعرفو الذل العلي اصولو.
الواضح إنو الراجل تفكيرو محدود وبسيط لدرجة مرعبة و النقلة الحصلت ليهو أكيد هو ما جاهز ليها ابدا وفوق كل ذلك تركيب الشخصية إنهزامي ومنكسر ومحبط لأبعد الحدود إذا لا غرابه فيما قاله والغريب إعترافه بكل بساطة بأن الكفار الفجرة ديل وفروا ليهو أى حاجة لكن حياتهم صعبة وشغلهم حااااار!!!!!!!!!! أففووووو يا السوداني!!!!!!! ووضحت سطحية تفكيره ومحدودية الأشياء عنده بالكلام عن السكر والبيرة والنسوان والشيطان!!!!!!!!!
دي مصيبة جزء كبير من هذا الجيل ,, ملى بالتناقضات ومفاهيمهم مغلوطة ونظرتهم للحياة دائما من زوايا غريبة جدا لا سمعو بمن كد وجد ولا سمعوا وما نيل المطالب بالتمنى حتى الموجودين داخل البلد منتظر فجأة يركب عربية ويمتلك ما يمتلك ويبحث عن أقصر الطرق لذلك بغض النظر عن أي معيار أو أخلاق,,,فقط لأنو الحاكمين ركبوا ليهم هذه المفاهيم المتعفنة تركيب وعلموهم أن الوصول لأي مكان يمكن أن يكون صدفة وفجأة وعبر الطرق المختصرة, واإجتهادهم يجب أن يكون في ذاك الإتجاه!!!
اخونا دا يرجع الضل سريع وإلا سيحدث ما لا يحمد عقباه ,, الزول كابى جرسة شينه خلاص,,
تحياتى
Post: #14 Title: Re: مهاجر سوداني: الأوربيون يعاملون الكلاب اف Author: Nasr Date: 02-16-2017, 07:41 AM Parent: #11
لاجئين ألمانيا ديل أنا شفتهم وشفت سكنهم وخبرت معيشتهم وضع يحسدهم عليه أي مواطن في العالم زي وضعهم دا بيتعب فيه الناس عندنا هنا ساعات عمل طويلة عشان يحققوه كتيرين من لاجئ أوربا الشفتهم بيتعلموا وبيشتغلوا بيساعدوا أهلهم وبيطوروا في أنفسهم وبعضهم زي الفي الفيديو ديل صياعة وسكر ورمتلة علي الآخر (وشايفين يا شباب كيف يقدم هؤلاء "المسلمين" أمثلة سيئة للكفار ؟؟؟؟ ما أظن في واحد من كفار اوربا ديل بيسلم بعد رؤيته لهم )
هم نسوا أو تناسوا قول الحق عز وجل "وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ ۖ وَلَئِن كَفَرْتُمْ إِنَّ عَذَابِي لَشَدِيدٌ"
Post: #12 Title: Re: مهاجر سوداني: الأوربيون يعاملون الكلاب اف Author: طارق عبد الله Date: 02-16-2017, 07:17 AM Parent: #1
جزء كبير من الشباب السوداني ما مهيأ للهجرة أصلاً ولاعنده تصور حيعمل شنو ولا أهدافه شنو والقصة بالنسبة ليهم أنو بس تطلع من السودان وخلاص، وفعلا زي ماذكر الأخوان من أكبر عيوب قطاع واسع من السودانيين هو التطلع المفرط للثراء السريع حتى عن طريق الفهلوة والنصب والاستهبال بدون جهد وصبر وعمل واعتبارها شفتنة وتفتيحة ووووو بس المشكلة أن الطريقة دي مابتنفع برة السودان لأن هناك مافي زول مجبور عليك والفيصل هو شهاداتك وقدراتك مع اعترافنا بأن التزكية والمعارف قد تساعدك إلى حد ما.
Post: #16 Title: Re: مهاجر سوداني: الأوربيون يعاملون الكلاب اف Author: MOHAMMED ELSHEIKH Date: 02-16-2017, 08:09 AM Parent: #12
الزول دا كان رجع وقال كلامو دا من الأزهري بكون مبلوع لكن يشرب في البيرة الصااااقطة دي ويجي يتفاصح .... غير مقبول
الاخ الاستاذ العبادى و ضيوفه .. تحياتى و تقديرى ..
فى تقديرى .. ان دول الغرب هى سلاح ذو حدين .. و هى بلاد فيها " الحشاش يملاء شبكته " فكثير ممن هاجروا من شباب الدول الافريقية و غيرها نجحوا نجاحا كبيرا فى التعليم و التاهيل الى غير ذلك ..
و منهم من غرف فى الملذات و ضاع ضياعا من بعده ضياع ..
فالامر يحتاج الى عزيمة و اصرار و رؤية و خطة ..
فمن خرج من السودان بصرف النظر عن سبب او دافعه الى الخروج .. كان من دار فور و أو من عطبرة .. فالامر امر .. امر عزيمة و اجتهاد و خطة .. و الامثلة كثيرة لا حصر لها ..
Post: #18 Title: Re: مهاجر سوداني: الأوربيون يعاملون الكلاب اف Author: محمد البشرى الخضر Date: 02-16-2017, 08:24 AM Parent: #17
نفسي اعرف مفهومه شنو للشغل الحار؟؟ إذا اصعب وظيفة ممكن تشتغلها في ألمانيا كل الشروط الأساسية لسلامتك متوفرة و حقوقك وساعات عملك و راحتك والأجر الإضافي مكفولة بالقانون وبعد دا تاخد تأهيل وتتدرب عليها بل وممكن تترقى و تاخد علاوات تعال شوف الشغل في السودان الحار جد جد ولا ساعات راحة ولا سلامة ولا حتى راتب زي الناس بعد دا
مشكلة الشباب الزي ده دائما بكون مغررين من بعض الشباب الفاشل والعاطل في الغرب, بدوهم صورة وردية عن الغرب وأنه هم عاطلين وبصرفوا مرتبات وساكنين سكن ممتاز وجميل وووو وكلام كتير وده كله عشان يغطوا على فشلهم وبخلوهم يجازفوا بأنفسهم عن طريق البحر ويمشوا الغرب ولمن يصلوا هناك بتفاجأوا بأنه الحياة ليست سهلة وبتحتاج صبر وكد وإجتهاد وهم دايرين يصلوا بأسرع وقت وبدون أي معاناة وفي الأخير بنصدموا بي واقع مرير.
يخيل لي انو الشباب ديل غير إنو تكلموا بما يرغب فيه من عمل الفيديوهات لكن برضو بي يعانو من غربة ثقافية إجتماعية قاهرة، ودي بي تحصل لكل من لم يتصور حجم التحدي المفروض يقابلو الثقافة الغربية والمؤسسات المدنية والحكومية هناك ضاغطة في سعيها لتشكيل وعي كل من يهاجر لها وما بتدي براح لي التصورات المختلفة وبالذات السلفية شديد تتحرك هناك. دا زيادة لي غربة اللغة والتراث المشترك البتخليك ممكن تحكي لي خواجة نكتة ويضحك معاك.
صعب أنك تمشي بهناك بي كل حمولتك السلفية الذكورية العنصرية الأبوية وتحاول تعيش معاهم، سيتم قمعك، لازم تكون لحدما متجاوز لي الثقافة السائدة عندنا وبعد داك في تحيزات الغرب ضدنا موجودة في تصوراتهم عن المسلم العربي الافريقي.
قابلتا صديق شيوعي سابق هاجر بمبادئه للحريات والحقوق لي امريكا فراراً من الإنقاذ قال لي جيت من هناك عشان استقر، افتكرتو جاء عشان يساهم في النضال من اجل ديمقراطية وتحديث السودان رد علي قائلاً "بتي كبرت" نان يا الاخو بتك الامريكية جايبا لي إضطهاد المرأة الشردتا منو في السودان؟!!!
هناك مثل أفريقي يقول: الحشرة الجات سايعة للنور ما إمكن تكون هاربة من الظلام هناك آلاف من الاسباب الحقيقية أو المتوهمة للهجرة من السودان (أو أفريقيا، الدول العربية ..ألخ) في إتجاه أوربا أو أمريكا
دا ما الموضوع المهم بعد ما أنقذوك من البحر وسكنوك سكن محترم (شفتو بعيني ما قالوا لي) وأدوك إعاشة محترمة (من الإعاشة دي في ناس برسلوا لأهلهم ) حتعمل بحياتك شنو.....؟؟؟؟؟ (وبالنسبة لي مجرد يوفر ليك سكن وإعاشة دي الجنة ذاتها... داير شنو تاني؟؟؟)
الناس المن صغار متعودين يساعدوا أهلهم كان في زراعة ولا ورشة ولا دكان الشغل ما صعب عليهم وبواصلوا شغل (حيكون في شغل أصعب من الزراعة والمباني وورش الحديد في السودان؟) وبواصلوا قراية وامثلة النجاح بالآلاف
أما الناس الفي السودان بينوموا لحدي الساعة حداشر يباروا الضللة يجروا ليها السرير الواحد أخته سخنت ليه الشاي ثلاتة أربع مرات أول ما قام شكلة مع أخته لأنها ما غسلت أو كوت ليهو هدومه وشكلة مع أمه عشان يشيل منها حق الصعلكة الزي ديل الشغل ما في برنامجهم نهائي وأهلهم يصرفوا عليهم دم قلبهم يقروهم بقروش ويتخرجوا ليواصلوا في نفس البرنامج
ديل لا في السودان نافعين ولا في الخليج ولا السعودية ولا أوربا زيهم كتير لافي في جدة القريبة دي رمتلة وصعلكة وسكر ومخدرات ما عارفين دايرين من الدنيا دي شنو ولا عندهم أحلام ولا طموحات
لحدي ما العمل في حد ذاته يبقي فضيلة مش عيب مشاكلنا حتكون كتيرة حنشوف بنغالة ومصريين وحبش بيهاجروا عشان يشتغلوا في السودان وأولادنا يهاجروا عشان يترمتلوا في أوربا
Post: #23 Title: Re: مهاجر سوداني: الأوربيون يعاملون الكلاب اف Author: عبد الصمد محمد Date: 02-16-2017, 07:19 PM Parent: #22
يا أستاذ الفاضل عباس (ناصر) انت زول كتّاب شديد..., ياخ عندك أي كتب في الأسواق، وكيف ممكن الحصول عليها وبالعدم كيف يمكن الحصول على كل مقالاتك ولو قلت لا بقول ليك قصرت في حقنا وفي حق نفسك
شكراً لكل الأخوة المتداخلين الذين أثروا البوست بآرائهم القيمة ... شكراً: aosman Nasr عماد الدين الطيب عمر سيف النصر محي الدين ابراهيم عبد الوهاب عادل الباهي عبدالرازق Hatim Alhwary أيمن الطيب طارق عبد الله MOHAMMED ELSHEIKH الطيب رحمه قريمان محمد البشرى الخضر aydaroos بس عندي إضافة بسيطة وهي مسألة التطبع مع المجتمع الغربي.. ده طبعاًهاجس كبير للجالية السودانية هناك بل لكل مسلم يعيش في بلاد الغرب ، صحيح قد يجد الفرد هناك الرفاهية التي يفتقدها في بلاده ولكن بالمقابل يفقد القيم التي تربى عليها في وطنه فما هو مباح هناك وبنص القانون محرم هنا وانت لا تستطيع منع ابنائك من التعليم ومن الاختلاط باقرانهم هناك اي لا يمكنك حبسهم في (غرفة معقمة) وكذلك لا تستطيع (بلع) ما يغترفه أبنائك من سلوكيات واتجاهات قد تشكل لك صدمة كبرى تحس بعدها بالندم على قدومك الى تلكم البلاد
الأخ ناصر الحياة ليست سكن وأكل وشراب فقط, الحياة أكبر من ذلك بكثير, قد تنظر إليها بأنها جنة لكن صدقني إذا عشت حياة فيها سكن وأكل وشراب فقط حتجيك نفسيات, الحياة فيها جوانب إجتماعية وروحانية وهي مهمة جدا لتغذية الروح البشرية. أي حياة جديدة لابد للشخص أن يتألق معها, معظم شباب كما تفضلت ذكره تعود على حياة الرمتلة في السودان ولمن يمشي أروبا يتفاجأ بحياة مختلفة تماما. أنا عشت فترة من حياتي في أوربا في فترة دراسة وعمل وفي الأخير لم أتمكن من التأقلم مع الحياة والجو وخرجت منها.
يا عبادي للمعلومية اسوأ جالية في اوربا هي الجالية المسلمة دا للمعلومية وحا اجيك للتفصيل عشان اوريك مستوي المسلمين في اوربا !!!!! ده طبعاًهاجس كبير للجالية السودانية هناك بل لكل مسلم يعيش في بلاد الغرب ، صحيح قد يجد الفرد هناك الرفاهية التي يفتقدها في بلاده ولكن بالمقابل يفقد القيم التي تربى عليها في وطن وبتمني قبال ما تواصل في كلام القيم دا تعرف جيدآ المسلمين الهنا جوا بعاداتهم المربين عليها من بلدهم من كذب ولف ودوران وحب النفس وحب المال حبآ جما !! والخصال دي كلها معدومة عند الخواجات يعني اولادك كان داير تربيهم تربية سليمة ومضمونة خليهم يمشوا مع اولاد الخواجات عشان فقط يربو ليك علي الصدق والامانة ودا مربط الفرس عشان ولدك لما يعمل اي شئ ما يكذب عليك لو سالته لانه بكون اتعلم الصدق وعدم الكذب من الخواجات لانها دا سلوكهم ودي اخلاقياتهم المعروفين ومشهورين بيها . ولو المسلمين كانوا مربين زي الخواجات ما كان دا حالنا ولا كان هم بقوا اسياد العالم .
ولي عودة عشان اوريك عمائل المسلمين والعياذة بالله !
Post: #27 Title: Re: مهاجر سوداني: الأوربيون يعاملون الكلاب اف Author: Nasr Date: 02-17-2017, 02:35 AM Parent: #26
يا عثمان "الحياة ليست سكن وأكل وشراب فقط, الحياة أكبر من ذلك بكثير" هم وفروا ليك الجزء الأكبر والاهم (وفي ذلك تتدافر البشرية في أركان الأرض الاربعة) والباقي دا عليك إنت المعاهد والجامعات والمكتبات العامة والمراكز الثقافية والمتاحف والملاعب الرياضية علي قفا من يشيل ما في حاجة تشغل بيها نفسك وفي نفس الوقت تطورها غير الشغل والقراية وتم الباقي رياضة وهوايات وسياحة