مصطفى سيد احمد - لو منى مستنى الملام كلمات الشاعر عبد الوهاب هلاوى -------------------------- لومني مستني الملام ياسلام عليك ياسلام يا حلو السكوت مرات كلام وعدم الملام هو كمان ملام ياسلام عليك ياسلام انا يا غرامي وصلت بيك في الدنيا لي حد الغرام ولقيت ملامي علي عينيك يا سيدي زي الما ملام يا سلام عليك يا سلام الورده لو خانها الفراش ما اظن تلومو مع الندي وما بتجرح احساسو الجميل والريده يا حنين كدا يا سلام عليك يا سلام
Post: #2 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 06:04 AM Parent: #1
اليوم من الصبح معلق في الاغنية دي ... ما عارف السبب شنو .. وبالذات لمن اوصل المقطع ( انا يا غرامي وصلت بيك في الدنيا لي حد الغرام)... بتجيني خمة نفس وقلبي بتزيد دقاتو ... دا شنو يا أهل الغرام والهوى؟؟؟؟ افتوني ولكم الجنة 😄😄😄
Post: #3 Title: Re: لو مني مستني الملام ... يا سلام عليك يا سلام Author: عبدالحفيظ ابوسن Date: 01-09-2017, 06:12 AM Parent: #2
صباح الحب شفت السحسحة في الغبش شترا شترا نقول صباح الحب ونحن مندفسين في كبسيبة البلد ونلاقط ملاقطة في رزقنا انا يا غرامي وصلت بيك في الريدة لي حد الغرام ولقيت ملامة علي عينيك يا سيدي زي الما ملام انا لله !! الغنية دي مقطعاني جد ومقطعني اكتر تماهي صوت مصطفي معاها رقة ودفء في الصوت وتحس بتوسل المحب ولوعته دووبك اتا !؟ معلقة فيني زمن .. زمن دي سنوات اكتر من العشرين ولا مية سنة ما عارف شوف الحب دة الوردة لو خانها الفراش مالك يا علي ياخ قوم شوف ديسكيك وين ما تهيج علي وجع القلب
Post: #4 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 06:34 AM Parent: #3
أما سمعت يا صديقي القول المأثور (تسحسحوا فإن الغبشة ملحوقة😂😂). فعلا الاغنية دي فيها تماهي وهارموني واحساس عميق... شكرا يا صديقي على مداخلتك .. بس ما جاوبتني على اندفاقتي دي ههههه صباح الحب والاخوة الصادقة ..علي الحلف نحب ونطرب ونغني ونمارس كااافة الوان الفرح غصبا للظروف والحال الحرن...
Post: #5 Title: Re: لو مني مستني الملام ... يا سلام عليك يا سلام Author: عبدالحفيظ ابوسن Date: 01-09-2017, 07:08 AM Parent: #4
الاستمتاع بقصيدة حب لا يوقف عجلة الثورة يا صديقي . بل يُسرع بها كون اننا نزداد تفاؤلاً ورغبةً في الحياة اغني لوطني ومين يمنعني واغني لقلبي إذا لوعني اصلنا ملوعين يا صاحب
Post: #6 Title: Re: لو مني مستني الملام ... يا سلام عليك يا سلام Author: محمد عبد الله الحسين Date: 01-09-2017, 07:29 AM Parent: #5
الأخ علي دفع الله أنا ما قايلك بتاع رومانسيات كده( عذرا للدخول عليك توووش، أرجو أن لا يكون دخول خشن . لكن ما مشكلة أول مرة أدخل معاك لكن الشجعني شايفك بتاع مشاغلات و كده قلت النشاغلك شوية) عامل عمتك المغلوظة بالجنب كده..فاجعتني. أولا شكرك ليك ..العنوان جذبني و جيت داخل. و قريت كلمات الأغنية و رغم بساطتها لقيتها تفيض بالشجن و العتاب و الاستسلام و الريد.. الغريبة الأغنية دي أصلا ما قعدت سمعتها.لكن كان عاجبني من بعيد المقطع البدندن فيه مصطفى سيداحمد ............ ...............و يكرر يا سلاام عليك..لأنه يا سلام عليك دي براااها قصيدة و تحمل ألف معنى. شكرا ليك و أرجو أن تقبل دخولي الخشن ده..ممكن تعتبره فاول ما مشلك’ لك ودي
Post: #7 Title: Re: لو مني مستني الملام ... يا سلام عليك يا سلام Author: عبد الباقي الجيلي Date: 01-09-2017, 08:14 AM Parent: #6
أخوي علي
أغاني مصطفى تدعوك دائماً لسوحها الرحبة ...
ده ما شيء غريب ...
أما لماذا الآن ...
ضرس ..... وتاور يا علي أخوي ... ..
بث ....
ههههههههههههههه
دم بعافية ......
Post: #8 Title: Re: لو مني مستني الملام ... يا سلام عليك يا سلام Author: محمد عبد العظيم فرح Date: 01-09-2017, 08:20 AM Parent: #7
يا سلام عليك ... يا سلام عليك ايها الاغبش المتسحس ههههههههههههه رووووووعه ياخ
Post: #14 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 10:26 AM Parent: #8
هلا محمد فرح شايفك ويييين ما عارف بس زي البعرفك كدة ... دعنا يا صديقي نترومس ونتسحسح واهو محل ما ترسى تمسى .. مودة يا جميل ..
Post: #12 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 09:33 AM Parent: #7
مرحبا الاخ عبد الباقي الجيلي من ناحية ضرس وتاور ههههه مافي شك .. يا اخي انا عندي رغبة جامحة من جموح امارس الهوى هههههه بس كيف ما عارف خايف عدييييل يا اخي البنات السغار ديل سمحن سماح مبالغة.. تحياتي يا صديق..
Post: #10 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 09:19 AM Parent: #6
الاخ محمد عبد الله يا صاحب صباح الخير.. يا اخي انا رومانتيك خاااالص وحات ابدرعين الما بقول الشين كنت حباب حب وبشوف قوس قزح والغروب هههه بس الدنيا بت غلفة خلتنا نساسق من الفجر للمرواح وياريت كلو يجيب مريسة تام زينو ... يا اخي دخولك ما خشن ولا حاجة دخلتك ترد الروح.. مودتي يا دوك ...
Post: #18 Title: Re: لو مني مستني الملام ... يا سلام عليك يا سلام Author: محمد كابيلا Date: 01-09-2017, 11:04 AM Parent: #2
علي دفع الله
تحياتي ...
اليوم من الصبح معلق في الاغنية دي ... ما عارف السبب شنو ..
جميل أن تشحن أعصابكـ بالغناء
والأجمل أن يكون من غناء مصطفي سيد أحمد
كن بألف خير ...
Post: #24 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 05:50 AM Parent: #18
Quote: جميل ان تشحن أعصابك بالغناء والاجمل ان يكون من غناء مصطفى
كابيلا يا صديقي يا اخي كلامك دا زاتو محفز لحب الحياة .. تسلم يا عزيزي
Post: #39 Title: Re: لو مني مستني الملام ... يا سلام عليك يا سلام Author: عبدالله محمد أحمد Date: 02-12-2017, 07:21 PM Parent: #2
علي دفع الله تحياتي و معاك حق. انا ذاتي زيك.
Post: #9 Title: Re: لو مني مستني الملام ... يا سلام عليك يا سلام Author: عماد الدين الطيب عمر Date: 01-09-2017, 08:34 AM Parent: #1
ابو ادم سحسحتك راقية و الحمد لله الجات منك يا ود سيد احمد
Post: #11 Title: Re: لو مني مستني الملام ... يا سلام عليك يا سلام Author: محمد عبد الله الحسين Date: 01-09-2017, 09:27 AM Parent: #9
شكرا يا حلو أنا طبعا حاولت أكسر الحاجز و الجليد من أول (نظرة)هههه أقصد من أول مرة لأنه شعرت إنه عندك روح فكاهة و مُملحة .و مرات الواحد بيني و بينك بيكون عايز مودMOOD يطلعه شوية من الجدية و يفكك الضلوع شوية ( و الزراير كمان) فلما يلقى اغنية من إياهم بتقوم تستدعي لذاكرته كل المشاعر الحلوة التي اتنست أو اختفت أو كادت مع مكابدة الحياة و مع تراكم و تكاثر القبح من حولنا. لا زلت أذكر و أنا في شرخ الصبا الباكر كيف تحملني أغنية و مصطفى سيد أحمد (والله نحن مع الطيور) و نحلق فوووق مع الطيور و لا جواز و لا جمارك و لا يحزنزن.. ياخي كفاية بوح و شكرا يا جميل
Post: #13 Title: Re: لو مني مستني الملام ... يا سلام عليك يا سلام Author: محمد عبد العظيم فرح Date: 01-09-2017, 09:40 AM Parent: #11
و يفكك الضلوع شوية ( و الزراير كمان)
ــــــــــــــــــــــــــــــــــــــــــــــــــــــــــــــــــــ فعلا محتاجه كده فى الزمن الاغبر دا تحياتى
Post: #15 Title: Re: لو مني مستني الملام ... يا سلام عليك يا سلام Author: بدر الدين الأمير Date: 01-09-2017, 10:29 AM Parent: #13
على دفع الله وضيوفة لكم الود والتقدير بس اضيف ان اغنية الملام من الحان الاستاذ/محمد سراج الدين
Post: #25 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:00 AM Parent: #15
Quote: بس اضيف إن اغنية الملام من الحان الاستاذ محمد سراج الدين
شكرا يا بدر الدين امير اربجي لإضافة المعلومة .. بصراحة انا اعلم في مكنونك حاجات كتيييرة ما اتقالت عن مصطفى اتمنى تجي اللحظة عشان تروي كل هذه المواقف في حياة الانسان مصطفى واتمنى انك تبادر للتوثيق دا .. مودتي يا استاذ
Post: #50 Title: Re: لو مني مستني الملام ... يا سلام عليك يا سلام Author: Ahmed El Gasim Date: 02-15-2017, 12:56 PM Parent: #15
الاخ بدرالدين الامير تحياتي عندي شك انو الاغنية دي كان بغنيها او مفروض يغنيها الفنان المحتجب ود جيرانا عبد التواب عبد الله وقد اهداها لصديقه الراحل ولهذه الاغنية قصة . تحياتي لكم ومصطفي هو الذي اعطي الغناء طاقة لم تكن موجودة فتلقفتها الاجيال من بعده له الرحمة...
Post: #16 Title: Re: لو مني مستني الملام ... يا سلام عليك يا سلام Author: معاوية المدير Date: 01-09-2017, 10:32 AM Parent: #13
علوّب يا صديق، يا زول إسحسح وأدينا نحن زاتنا نِسحسح معاك. والله لي زي كم يوم كدي تنتهي وارجعِا تاني طوّل اليوم. يا سلآم عليك ياخ يا سلآم...
Post: #17 Title: Re: لو مني مستني الملام ... يا سلام عليك يا سلام Author: درديري كباشي Date: 01-09-2017, 10:41 AM Parent: #16
دي الريدة يا حنين كدا
أحلى حتى في الغنية
وبتفسر حالتك يا ابو علوة وتشرح لك سببب السحسحة
وبالمناسبة يا ود المدير أهلنا في الشمالية زمان بيقولوا للسفنجة ( السحسوح )
صاح ولا مو هيك ههههههههههههههه
Post: #19 Title: Re: لو مني مستني الملام ... يا سلام عليك يا سلام Author: محمد عبد العظيم فرح Date: 01-09-2017, 11:08 AM Parent: #17
Post: #20 Title: Re: لو مني مستني الملام ... يا سلام عليك يا سلام Author: د.محمد بابكر Date: 01-09-2017, 11:08 AM Parent: #17
يا سلام عليك انت يا على .. و التحية عبرك لعبدالوهاب هلاوى و الرحمة و المغفرة لمصطفى فى عليائه.
Post: #21 Title: Re: لو مني مستني الملام ... يا سلام عليك يا سلام Author: علي دفع الله Date: 01-09-2017, 08:19 PM Parent: #20
الاخوة الاعزاء :-
عماد الطيب محمد كابيلا بدر الدين الامير معاوية المدير درديري كباشي د.محمد بابكر
تحياتي لكم جميعا وشاكر اندياحكم .. مع عميق مودتي
Post: #22 Title: Re: لو مني مستني الملام ... يا سلام عليك يا سلام Author: Hamid Elsawi Date: 01-09-2017, 09:25 PM Parent: #21
الورده لو خانها الفراش ما اظن تلومو مع الندي وما بتجرح احساسو الجميل والريده يا حنين كدا يا سلام عليك يا سلام
لاحظ يا علي مصطفي في التسجيل النزلو معاويه قال الوردة لو فاتها الفراش و لم يقول خانها اظنو تحسس ان يصف الفراش بالخيانه و دي قمة الانسانية بالرغم من اني سمعتومرة بقول خانها الفراش ... هل التعديل مقصود منتظرين بدر الدين الامير في هذا الخصوص لك علي و لجميع ضيوف البوست الف تحية و ركز في كلام العزيز محمد كابيلا ال قال
جميل أن تشحن أعصابكـ بالغناء والأجمل أن يكون من غناء مصطفي سيد أحمد كن بألف خير
Post: #29 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:23 AM Parent: #22
صديقي حامد الصاوي ملاحظتك في محلها ومصطفى التعديل في كلمات الاغاني وعلى طول بكون متناسق وجميل ..لو تتذكر في قصيدة عاطف خيري فيها حتة (زوجناك الشهدا اولاد الكلبب ..الماتوا عشان الشعب)مصطفى بدل كلمة الكلبب بي بكلمة الكد زادات الاغنية بهاء وجمال... ونتمنى نسمع من الجميل بدر الدين الامير في هذا الخصوص. تحياتي يا صديقي
Post: #28 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:16 AM Parent: #20
Quote: يا سلام عليك يا علي
ويا سلام عليك انت يا دكتور محمد بابكر
تحياتي يا صديقي
Post: #27 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:12 AM Parent: #17
Quote: الريدة يا حنين كداؤ احسن حتة في الغنية و بتفسر حالتك
درديري يا صديقي وانا حالي ظااااهر ترم ترم . والله حالي اليومين ديل في قمة سعادتي لحاجات كتيييرة وربنا يديم السعادة ليك انت برضو ولجميع الاصدقاء .. مودتي يا أديب..
Post: #26 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:06 AM Parent: #16
Quote: والله لي زي كم يوم تنتهي وارجعا تاني طول اليوم
اولا اشكرك يا ود المدير لارفاق الاغنية تاني شيء سعيد بتوارد الخواطر . شيء جميل .. سعيد بي غشيتك .. مودتي يا صديقي
Post: #23 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 05:33 AM Parent: #9
Quote: سحسحتك راقية الحمد لله الجات منك يا ود سيد احمد
عمدة يا صديقي مصطفى بصراحة بخلي الواحد ملان أمل لانو كان مشروع عريض للتفاؤل ... كن كما اود يا عماد ابو الطيب واتمنى خلاص نلت صحتك ورجلك جبرت ..
Post: #30 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 06:28 AM Parent: #23
نداء في شكل وصية لمعالي السيد بكري ابو بكر المحترم اتمنى لمن اموت وتجي تنعيني هنا في البورد ارفع البوست دا فقط مع النعي لانو بالجد انا شايفو هو الوحيد الاكثر حميمية وفيه روح ملانة محبة .. مع وافر حبي للكل ..
Post: #31 Title: Re: لو مني مستني الملام ... يا سلام عليك يا سلام Author: ابراهيم عبد الوهاب Date: 01-10-2017, 06:46 AM Parent: #30
ههههههههه نتمني ليك حياة مديدة وسعيدة زكرتني بي النكته بتاعت البنت الفاتها قطار الزواج وقامت وصت ابوها انها لو ماتت يشيلوها المقابر بسرير دبل
Post: #32 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 09:58 AM Parent: #31
Quote: انها لو ماتت يشيلوها المقابر بسرير دبل
هههههههههه حلوة يا ابراهيم وانا نفس الكذلك...
Post: #33 Title: Re: لو مني مستني الملام ... يا سلام عليك يا سلام Author: Haytham Ghaly Date: 01-10-2017, 02:14 PM Parent: #32
ههههههه دا ياهو الحب في زمن الكوليرا زاااتو الكوليرا تُقرأ الكيزان
حب يا فردة واغرق لي شوشتك زاتو
ايه الدنيا غير لمة ناس في خير او ساعة حزن
خلينا نتلم في الخير فترنا من الحزن الله يقطع دابرو
تحياتي يا رومانسي
Post: #34 Title: Re: لو مني مستني الملام ... يا سلام عليك يا سلام Author: علي دفع الله Date: 01-10-2017, 03:58 PM Parent: #33
هيثم يا غالي .. الحب في زمن الكوليرااااا ههههههه ذكرتني فلم عادل امام بتاع السفارة في العمارة ... انت عارف يا صديقي لو لا تصيد الفرص لصنع الفرح كان الواحد مات على طولو ..مية منظر ومية محنة ومليار حاجة تكدرك وسط هذا الجو الملان كآبة لو لقيت ليك فرقة اصنع الفرح والبهجة صناعة ..ودا البنعمل فيه .. مودتي يا غالينا ..
Post: #35 Title: Re: لو مني مستني الملام ... يا سلام عليك يا سلام Author: علي دفع الله Date: 01-17-2017, 07:24 AM Parent: #34
ياخ مشتاقين وانا جادي معاك انا فاقدك بس... ما عارف كيف أشرح ليك حاسيهو فراغ.. بعدك عني ما عارف كيف.. عارفك جمبي بس كنت بفتش.... ما عنك.. لكن عني... انا ضائع لسة .. وما لقيتني يا ربي اكون انا قاعد وين..؟؟؟
ما ممكن اكون قاعد جواك ؟؟ ياخ اتذكر؟؟
ما آخر مرة انا كنت معاك
فاكر شارع الريد الماشي علي ساحة الأشواق.. الماري علي ابواب الحن.. دا الفيه حدائق العشاق مش كنت لمحتك بالصدفة... وناديتك جواي إتفضل.. ادخل بي باب الإلفة.. اتفضل بيتك ما تخجل.. ودي كانت حركات منك ما انا عارفك كان جنك تخجل انا غايتو عشان ماتستعجل انا يوت بتعشم لقياك.. (منقول) ----------
17_يناير ذكرى رحليك يا انسان#
Post: #36 Title: Re: لو مني مستني الملام ... يا سلام عليك يا سلام Author: فرح الطاهر ابو روضة Date: 01-17-2017, 07:42 AM Parent: #35
Post: #37 Title: Re: لو مني مستني الملام ... يا سلام عليك يا سلام Author: بله محمد الفاضل Date: 01-17-2017, 07:49 AM Parent: #36
أنت يا علي الإقرار بالحب فضيلة فأقر أقر الله روحك بأنثى تفتتها وتعيد رسم شوارعها وأزقتها وبيوتها قال الحاصل شنو ههههههههه
Post: #38 Title: Re: لو مني مستني الملام ... يا سلام عليك يا سلام Author: علي دفع الله Date: 02-12-2017, 09:30 AM Parent: #37
يا بلة م ف يا صديقي تاني الوجع تاورني برغم غتامة المشهد الحزين المغطية المنبر بالسواد ..
Post: #40 Title: Re: لو مني مستني الملام ... يا سلام عليك يا سلام Author: علي دفع الله Date: 02-14-2017, 06:30 AM Parent: #38
عبد الله محمد يا صديقي والله فتشت مداخلتك لقيتا بعد سل روح ههههه
كل عيد حب وانت طيب ههههه Happy Valmetine
اااااي فالنتاين الواحد دا لو يرضو او يابو السلفتوت .. بس خايف من محمد جلال يجي ويقول لي انت يا بتاع الضهاري كمان وشك على الفالنتاين شنو هههههههههه
Post: #41 Title: Re: لو مني مستني الملام ... يا سلام عليك يا سلام Author: بله محمد الفاضل Date: 02-14-2017, 07:11 AM Parent: #38
كل الحياة سواد في سواد يا علي لكنا رغم ذلك رغمها نحتفي بكل ما يستحق الاحتفاء وننتزعه انتزاعا
لو مني مستنى الملام
Post: #42 Title: Re: لو مني مستني الملام ... يا سلام عليك يا سلام Author: ahmedona Date: 02-14-2017, 07:26 AM Parent: #41
Quote: وبالذات لمن اوصل المقطع ( انا يا غرامي وصلت بيك في الدنيا لي حد الغرام)... بتجيني خمة
مدشدش -- يا كوهين...
افتح صفحة جديدة....
Post: #43 Title: Re: لو مني مستني الملام ... يا سلام عليك يا سلام Author: عمر أبوعاقلة Date: 02-14-2017, 08:14 AM Parent: #1
قلت لي الليلة شنو في الأيام .. قعدت تبحّت في المنبر وتنكت في البكائيات كمان .. قام عليك الضرس تاني ؟
المهم: نحن يا علي شعب حبنا دا زااااتو عيد .. أبداها من المطايبة والسلام .. والحن .. والالفة من قولة خال وعمة وأبوي .. وعييييييك
كل شي ياخ .. كل شي عندنا فلانتاين الا بس كاتمة ساااااي كاتمة بس يا علي
مودتي
Post: #44 Title: Re: لو مني مستني الملام ... يا سلام عليك يا سلام Author: aydaroos Date: 02-14-2017, 08:17 AM Parent: #43
والريده يا حنيِن كده
عيد حب سعيد يا علي دفع الله وللمشاركين
Post: #45 Title: Re: لو مني مستني الملام ... يا سلام عليك يا سلام Author: علي دفع الله Date: 02-14-2017, 04:22 PM Parent: #44
صديقي الشاعر الجميل بلة م.ف صديقي السلفتوتي اللذيذ احمدونا صديقي عمر ابو عاقلة صديقي عيدروس
يا سلام عليكم يا سلام وهابي فالنتاين .. كل عام وانتوا الحب احمدونا اقطع التهنية دي في سرك واحتسب😂😂😂
Post: #46 Title: Re: لو مني مستني الملام ... يا سلام عليك يا سلام Author: ود الباوقة Date: 02-14-2017, 04:42 PM Parent: #45
علاوي
تصدق انا بي عمتك دي كنت فاكرك زول رميات
ايقاع دليب
وشكرا
Post: #47 Title: Re: لو مني مستني الملام ... يا سلام عليك يا سلام Author: Haytham Ghaly Date: 02-14-2017, 06:03 PM Parent: #46
ود الباوقة انت طبعاً اغاني الحب والانسانية دي ما بتنفع معاك
انت زول جلالات سااااي
ناس امريكا روسيا قد دنا عذابها
ويا نفس ان لا تقتلي تموتي
الله يقطعكم
ابو علوة سلامات وكل عام وانت وضيوفك والبورداب من جم بخير
والسودان بخير ومليان حُب بعد ما ستفوهو الجماعة اياهم قبحاً وكراهية
وhappy valentine لكم جمييعاً
تحياتي
Post: #48 Title: Re: لو مني مستني الملام ... يا سلام عليك يا سلام Author: ود الباوقة Date: 02-14-2017, 06:12 PM Parent: #47
انت يا هيثم شكلك
من قوارض الشعر الجاهلي
وشكرا
Post: #49 Title: Re: لو مني مستني الملام ... يا سلام عليك يا سلام Author: محمد بشير عبادى Date: 02-14-2017, 06:30 PM Parent: #1
يا سلام عليك يا سلام .. تحية خالصة عبرك يا ابو علوة لابو الهل حبيبنا فقد عملنا سويا في التلفزيون القومي خاصة في الايام المفتوحة ..الرجل ابداع يمشي على قدميه
Post: #51 Title: Re: لو مني مستني الملام ... يا سلام عليك يا سلام Author: علي دفع الله Date: 02-15-2017, 03:52 PM Parent: #49
الاصدقاء احمد القاسم هيثم غالي ود الباوقة م.ب.عبادي تحياتي لكم وانت يا باوقة خليك مع دخولوها وصقيرا حام زي ما قال غالينا هيثم .. نسيت اقول ليك اختشي😃
Post: #52 Title: Re: لو مني مستني الملام ... يا سلام عليك يا سلام Author: علي دفع الله Date: 08-24-2017, 07:37 AM Parent: #51
فوووووق بمناسبة الجو الجميل والخضراء والنيل الهايج يمين جو يخلي الواحد قرب يبقى شاعر..
Post: #53 Title: Re: لو مني مستني الملام ... يا سلام عليك يا سلام Author: عمر أبوعاقلة Date: 08-24-2017, 08:28 AM Parent: #52
خضراء عديييييل كدا .. شكيت محنك
Quote: والخضراء
أما على صعيد الأغنية فقد شكلت لنا وجداناً خاصاً منذ زمن بعيد يا علي وحتى اللحظة أسمعها وكأني لم أسمعها من قبل والشئ الغريب والذي لم أستطع فهمه أنني كلما سمعتها أحس وكأن أبو سامر يغنيها لي وحدي .. وحدي فقط أي والله
على العموم نديك فرصة تغير الكلمة الفوق دي قبال يجوك الجماعة وأظنك تقصد (الخضرة) كاجتهاد مني ساااااي
مودة مطبوقة
Post: #54 Title: Re: لو مني مستني الملام ... يا سلام عليك يا سلام Author: Zakaria Fadel Date: 08-24-2017, 08:45 AM Parent: #53
خالص التحايا للجميع
الاخ الكريم بدر الدين الامير في إعتقادي ان الاغنية من الحان يوسف السماني (بتاع شال هم فرقتك قلبي...) وله فيلم مشهور مع الراحل مصطفى و حمد الريح في الاغنية الاخيرة
Post: #55 Title: Re: لو مني مستني الملام ... يا سلام عليك يا سلام Author: علي دفع الله Date: 08-24-2017, 09:25 AM Parent: #54
زكريا فاضل يا مبدع تحياتي ابو عاقلة يا صديقي يا ها زاااتها هههههه بس وحات النبي ما قاصدها اقصد الخضرة
Post: #56 Title: Re: لو مني مستني الملام ... يا سلام عليك يا سلام Author: Asim Ali Date: 08-24-2017, 02:17 PM Parent: #55
الاخ على وضيوفه - سلامات الاحساس لما اسمع اصوات الراحلين زيدان ومصطفى سيد احمد دائما تحملنى للحظات اكون فيها ممدد على العنقريب فى طرف بعيد فى الحوش والقمره متجمله يهيه وصوت احدهما ياتى شجيا محمولا على اكتاف النسيم واحيانا من الراديو مسبوق بشعر او تقديم عمر الجزلى او ليلى المغربى.. نفس الاحساس حسيتو وانا بقرا فى كلمات الاغنيه فى بدايه البوست . شكرا جزيلا على النافذه الجميله فى هذا الزمان .
Post: #60 Title: Re: لو مني مستني الملام ... يا سلام عليك يا سلام Author: علي دفع الله Date: 08-25-2017, 06:06 AM Parent: #56
عاصم علي يا صديقي فعلا احساس الاشياء الجميلة واسترجاعها ليه طعم خاص ..
Post: #57 Title: Re: لو مني مستني الملام ... يا سلام عليك يا سلام Author: محمد حيدر المشرف Date: 08-24-2017, 03:41 PM Parent: #1
على دفع الله سلامُ في العاشقين عليك
المهم انا في يوم سألت مصطفى .. ايوا عااادي كده سألت مصطفى .. سألتو عن "زوجناك الشهدا اولاد الكلب (اللام سايلنت) .. وزي كلامك واحد قلت ليهو انت غيرتها لاولاد الكد .. قام قال لي ابدا ما غيرتها .. هي فعلا اولاد الكلب (اللام سايلانت).. وبعدها استرسل في ضرورة قراية الصورة الشعرية من بداياتها وحدد مفطع محدد لبداية الصورة الفيها المعنى بتاع اولاد الكلب (مافي داعي اكتب انو اللام سايلن) ..
المهم لمن قريت كلامك اتذكرت انو كان في اعتقاد جازم ايام جامعتنا (وشكلنا دفعة واحدة وكده) انو مصطفى بغنيها اولاد الكد !!
فليخاصرك البرتقال والبنفسج يا صديقي :)
Post: #58 Title: Re: لو مني مستني الملام ... يا سلام عليك يا سلام Author: عبدالحفيظ ابوسن Date: 08-24-2017, 04:22 PM Parent: #57
جابني تعبير فليخاصرك البرتقال والبنفسج دي بلكلك فيها مدة ازيك مشرف
Post: #59 Title: Re: لو مني مستني الملام ... يا سلام عليك يا سلام Author: علاء سيداحمد Date: 08-24-2017, 04:25 PM Parent: #57
على دفع الله اتاريك بتاع رميات جانبية مدهشة ( اظهر وبان وعليك الامان )
Quote: وبالذات لمن اوصل المقطع ( انا يا غرامي وصلت بيك في الدنيا لي حد الغرام)... بتجيني خمة نفس وقلبي بتزيد دقاتو ... دا شنو يا أهل الغرام والهوى؟؟؟؟افتوني ولكم الجنة
Post: #62 Title: Re: لو مني مستني الملام ... يا سلام عليك يا سلام Author: علي دفع الله Date: 08-25-2017, 09:19 AM Parent: #59
حبيبي وصديقي ابسن فعلا فاليحاصرك البرتغال والبنفسج فعلا جملة تستاهل يقبفو فيها .. صديقي علاء لو لا الرميات دي كان قطرنا صفر ههههه مودتي
Post: #61 Title: Re: لو مني مستني الملام ... يا سلام عليك يا سلام Author: علي دفع الله Date: 08-25-2017, 06:22 AM Parent: #57
مشرف يا صديقي تحياتي فعلا يا دوك في فترة دراستنا مصطفى وجميع الشعراء المطاليق ***شكلو لينا حاجة عظيمة وعميقة في حياتنا .. في ديوان عاطف خيري قريتها اولاد الكلب على ما اظن لكن وحات النبي لليوم بسمعها اولاد الكد وبرانا اقنعنا نفسنا انها اولاد الكد لكن مصطفى ان قال صدق . دا اولا الظروف حضرتني تأبين مصطفى في الحصاحيصا وكان لينا الشرف نكون في عدة لجان بحماس الشباب وكان مهيب .برضك حضرت تشييع وتابين محجوب شريف وامنا فاطنة . تتصور يا مشرف بحاول اجمع لكن غلبني اكتب يا اخي الناس البترحل وجواها حلم وامل ما اتحقق دينها بكون كتير على رقابنا . ------------ مشرف فتحت نفاج يمكن اواصل فيه *** الشعراء المطاليق كما اطلق عليهم صديقي حجاج هم قدال حميد تجاني سعيد قاسم ابزيد الصادق الرضي عاطف خيري .. مودتي
Post: #63 Title: Re: لو مني مستني الملام ... يا سلام عليك يا سلام Author: عبدالحفيظ ابوسن Date: 08-25-2017, 09:25 AM Parent: #61
يخاصرك يا علي الا مشرف يقول مافي نقطة واظنها برتقالة ود المكي وبنفسجة مظفر النواب او برتكانة عركي
Post: #64 Title: Re: لو مني مستني الملام ... يا سلام عليك يا سلام Author: علي دفع الله Date: 08-25-2017, 09:41 AM Parent: #63
طيب خلينا ننتظر المشرف هل هي بي نقطة ولا بدون نقطة هههههههه يعني شنو يخاصرك هههه دي من خصر ولا شنو 😃
Post: #65 Title: Re: لو مني مستني الملام ... يا سلام عليك يا سلام Author: اخلاص عبدالرحمن المشرف Date: 08-25-2017, 10:00 AM Parent: #64
السلام عليكم تعريف مصطلحات الريده بعد أول شكلة بتكجنو الحب ...حبيتو ما حباني. تبقي شاكوش الهوي جهجهة السنين وتسأول مع ابو داود بالله يا اهل الهوي العشق من أول ترس عاضي بيطير الغرام يسأل عنه ناس ود دفع الله
مصطفي سيداحمد زي ما قال الجعلي ابشر ااااب شنب
Post: #67 Title: Re: لو مني مستني الملام ... يا سلام عليك يا سلام Author: Asim Ali Date: 08-25-2017, 11:31 AM Parent: #64
الاخ على المخاصره وارده كحاله من حالات العناق والانسجام وتدفق المشاعر مع الحبيب. وتظهر معبره (ضمن) الرقص الزوجى المعبر عن الانسجام وتناغم الروح والاحساس بين الزوجين. . مالقيت حاجه سودانيه فى الموضوع دا
Post: #66 Title: Re: لو مني مستني الملام ... يا سلام عليك يا سلام Author: محمد حيدر المشرف Date: 08-25-2017, 11:19 AM Parent: #1
وأما البرتقال فمعروف واما البنفسج فكما قال ود ابو سن .. وأما المخاصرة فتلك مما قال عنه عركي "شيتن كتر" يا علي ..
ونعم تشكلنا بالشعر آنذاك .. حبينا بي مصطفى وعاطف خيري زي الترتيب وكأجمل ما يكون.. وكنا كلما مرقنا على المطر ونحن حفاة وعراة الا من العشق .. وجدناهن و الرزاز مدخل
انعل ابو الجمكسين ظاتو ياخ ..
Post: #68 Title: Re: لو مني مستني الملام ... يا سلام عليك يا سلام Author: Nasereddin Mohamed Date: 08-25-2017, 12:14 PM Parent: #66
تحياتي اخي علي دفع الله والأخوة.. الأغنية من كلمات هلاوي وألحان يوسف السماني والأخير ترك هذا المجال الي الرياضة،كما لم يغني بعدها لهلاوي بسبب بعض وشايات من الذين كانوا طارئين علي الفن ورسالتة،وهي من الأغنيات العاطفية المباشرة،اتجه بعدها مصطفي سيد احمد بحس الشاعر والفنان لما عرف ب (أغنية النص)،ذلك المشروع الذي نقل الغناء ك هم ثقافي يتمدد في -الحبيبة والوطن وقضاياه-وهومشروع بدأت ارهاصاته مع الخليل مرورا بالدوش ثم مصطفي الذي دعا الي:أقيفي معاي نشيل كتف الغنا الميل،لا دعوة لتلك( الكبرتوك)-رغم أهمية ذلك بالمعقول،ان تصبح هي الاخري تحمل هذا الهم الثقافي....كل ما صدح به مصطفي يدندن حول هذا الهم...عدا القليل من كلمات تخاطب العاطفة في سموها(صلاح حاج سعيد-عبد العال السيد)،وقد تراجع عن غناء غدار دموعك والبدايات الاولي.... رحم الله خاتم المغنين:رهن الاصابع ومنفلت/فالت اذا كنت الجنوح/وحدك منادي ومتلفت..... شكرا لك أخي علي... جاييك بي بوست عن سنار...كن بعافية...
Post: #69 Title: Re: لو مني مستني الملام ... يا سلام عليك يا سلام Author: اخلاص عبدالرحمن المشرف Date: 08-25-2017, 02:24 PM Parent: #68
انصحك يا علي ود دفع الله بالمساسقة ما بين الحاردلو وعاطف خيري و لن يصيبك بعدها سقم ولا بلادة احساس يا خالق الوجود انا قلبي كاتم سرو
Post: #70 Title: Re: لو مني مستني الملام ... يا سلام عليك يا سلام Author: ombadda Date: 08-25-2017, 04:22 PM Parent: #69
ياحلو دا السكوت مرات كلام وعدم الكلام هو كمان ملام
Post: #71 Title: Re: لو مني مستني الملام ... يا سلام عليك يا سلام Author: najma Date: 08-25-2017, 05:52 PM Parent: #70
يا سلام
Post: #72 Title: Re: لو مني مستني الملام ... يا سلام عليك يا سلام Author: عبدالحفيظ ابوسن Date: 08-25-2017, 05:56 PM Parent: #71
يا بت المشرف لقد ضيقتي واسعا في الشعر متسعا يتجاوز الحصر تضطرم وتتصادم الابيات في رأسي والاسماء لو روقت بجيك
Post: #73 Title: Re: لو مني مستني الملام ... يا سلام عليك يا سلام Author: اخلاص عبدالرحمن المشرف Date: 08-25-2017, 06:25 PM Parent: #72
لا يا حفيظ واحد حسي والتاني رمزي ده القصد
Post: #74 Title: Re: لو مني مستني الملام ... يا سلام عليك يا سلام Author: علي دفع الله Date: 08-26-2017, 08:31 PM Parent: #73
تحياتي لكم جميعا الجميلين علا سيد احمد نصر الدين محمد نجمة امبدة اخلاص المشرف دوك المشرف ابسن عاصم علي
تحياتي ومودتي لكم جميعا
Post: #75 Title: Re: لو مني مستني الملام ... يا سلام عليك يا سلام Author: عمر مصطفى مضوي Date: 08-26-2017, 08:55 PM Parent: #74
الاخ / علي دفع الله يوما ما علقت هذه الاغنية برأسي فكتبت هذا النص اهديك اياه مع خالص التحية ...
ومني مستني الملام يا سلام عليك يا سلام يا حلو السكوت مرات كلام وعدم الملام هو كمان ملام يا سلام عليك يا سلام انا يا غرامي وصلت بيك في الدنيا لي حد الغرام ولقيت ملامي علي عينيك يا سيدي زي الما ملام يا سلام عليك يا سلام الوردة لو خانها الفراش ما اظن تلومو مع الندي وما بتجرح احساسه الجميل والريدة يا حنين كدا يا سلام عليك يا سلام عندما يمسى الكون لحنا . او مفردة عذبة في جوف اغنية . او مغربية . او مشوار مطرز بالشوق والحنين . او لقيا مسروقة من دفتر الزمن . او لحظات منداحه من شفق المغيب . او تكون الدنيا رضية . و تتنفس مسامك الريدة . وتتجمل دواخلك بلحظات الحضور . وتعبي دواخلك عوارض المستحيل . جلست امام الشيخ في لحظة ضعف ما . شكوت له حالي فسقاني المحاية وقرا على راسي ما تيسر ونفخ من روحه في اذني . وهمهم وتمتم ثم توضأ وصلى وأقراني السلام . واودع في قلبي ثيمة السفر ثم قال لي سافر يا بني هنا ليس مكانك . استلقيت على ظهري اتأمل صورة الشيخ عبد الباقي ازرق طيبة التي تزين جدران غرفة جدي وبجانبها أية الكرسي . قيل لي أن من يطيل النظر الى صورة هذا الرجل لن يمسه الضر . وستتحقق كل امانيه. في الناحية الاخرى من الجدار علقت بعض التمائم من ضمنها تميمة ضد الرعد . اشبه بالج رذ المعلق من رجليه . ثم تبروقه الصلاة المصنوعة من جلد الخراف . وابريق من النحاس لماء الوضوء والصلاة . جدي كان صبورا جدا وهميما حين الصلاة يترك كل شيء حتى الطعام ليصلي . قررت ان اسافر ليلا و القمر بدرا . لتكتمل في ذهني لحظات الخروج . كان السفر قدرا كالموت . كنت اعرف أنني لن اعود قريبا . او ان عدت فلن اجد هذه الاشياء . قررت ان آخذ معي ما تيسر ومالم يتيسر . اغنيات مصطفى سيد احمد ولو مني مستني الملام . تلك المغربية التي اسافر فيها الى حدود الانسانية . زخم المسيد وطعم المحاية . وحبات الرمل التي احكمت امي ربطها في صرة اودعتها قعر الشنطة ثم قالت ( بركة المغارب وملك الله الزارب ربي يهون عليك والدنيا ما تقاسيك بركة الشيخ يوسف ابشرا الكاب وضرا المابتلدو مرا تلقى في المرادك . بركة راجل البنية وود المغربية والشيخ حسن ود حسونة الاحيا بقارة الخير قدامك ويلاقيك ) صورة الشيخ عبد الباقي ازرق طيبة و واية الكرسي وتبروقة الصلاة وماء الابريق والحصن الحصين . وتلك الرائحة ، رائحة جدي والمكان . عطر امي (السوار باريس الازرق) النقي كقلبها ما زلت اشتريه كشيء خاص جدا . استنشقه وقت الوجع ووقت ان احتاج الى حضنها . رفع شيخي كلتا يديه وفرق ما بينهما ثم جمعهما ومسح على صدري . وخبأ دموعه بين الفرح المصنوع من سفري . وغادرني كما الوطن وككل الاشياء الحميمة التي تصنع الحياة . المسيد كان هو العالم الذي يسكنني . حلقات التحفيظ ، صوت المؤذن , بروش الصلاة ، أقداح الطعام . وتلك الانسانية التي تظلل الجميع كغيمة ربانية تخص هذا المكان . الخروج من عالمها دون عودة . صخب العاصمة والبحث عن ملاذ آمن من شتاء يناير . الدفء الذي في عينيها كان مكان اختباءنا وحنين مناجاتنا . الشاي المنكه بالنعناع وحبات السكر على سطح الاناء مشتتة كما الودعات . ونبوءة الرحيل وسفر ود الصرة الى المكان الفلاني . والدموع في عينيها عوالم من التأمل . كل دمعة عالم قائم بذاته . قصة عن شيء ما . حدث بحجم الكون . لم نكن نعي وقتها معنى السفر . خليط من الخوف والفرح والدهشة . والحزن القابع في ركن قصى من اركان الذات . يتبدى حضوره شيئا فشيئا . حتى عم كل ارجاءها . . كانت مأساة جيل بأكمله ليس فقط جيل بل وطن . مرض معدي اجتاحنا جميعا لم يبقي للوطن ولم يذر . ثم استمرأنا السفر واستطالت غربتنا . وكل هذا الوقت وانا اردد لومني مستني الملام يا سلام عليك يا سلام الهزيمة كانت اسمها السفر . يوم ان قررنا ذلك كان حريا بنا ان نعلم اننا نغادر كل تلك الاشياء .
Post: #76 Title: Re: لو مني مستني الملام ... يا سلام عليك يا سلام Author: علي دفع الله Date: 08-27-2017, 07:50 PM Parent: #75
صديقي عمر مصطفى يا اخي اشهد انك كتاب كتاب دا شنو دا يا زول الاندياح البخش جوة الوجدان تتصور قريتا اكتر من مرة والله حرام تكون مداخلة في بوست علي الحلف مفروض يفتح بيها بوست وتتعلق فوق .. يا اخي عليك النبي اكتب اكتب وبطل بخل يا اخي البورد في ناس بكتبو بوست عنوان فقط اروع تلاتة يوم في الواغ واغ واول البوست نقطة .. حبابك وحباب حروفك وسعيد جدا بمداخلتك الغنية شكرا
