أها ... انحنا وقفنا وين ؟

04:11 PM January, 01 2017 سودانيز اون لاين
يحي قباني-فى الدنيا العجيبة
مكتبتى

علي ود ابكرم ولا ود ابكرن ما بتذكروا ... من شخصيات حلة حمد الكاريكاتورية ...

مرة داير اتشاكل مع زول في الحلة ... و هو لسانو طوله ...

ناس الحلة اتلموا على الشكلة ... وود الحلة كفتو بنية رماهو في الواطة ...

قبل ما يقوم ... الجماعة دخلوا ... باركوها باركوها ... و انتهت على كده ...

لكن شنو .؟ انتهت و علي مجدوع في الواطة ...

حرقته القصة نفض هدوموا و فات بيتهم ..

تان يوم فات للود الدقاهوا في البيت ...

دق الباب ... و رقد في الواطة ...

الود فتح الباب ... لقاهو مجدوع ...

علي رفع راسه .. وقال ليهو :

اها امس انحنا وقفنا هنا ؟ ...

قوماكا للشكلة حقتنا ...

__________________________

اها ... ناويين نجعل 2017 سنة توحد و اهتمام بقضايا اكبر ...

و لا نشوف رقبتنا وقفنا وين و نواصل ...

عامكم سعيد جميعاً ...

أخي الجليل المهندس قباني
تحياتي وكل عام وانت بعافية والعائلة بخير
تعرف قصة نحن وقفنا وين دي هي مرعبة وكمان سبب البلا وكمان في ناس عايزا الباطل يكون حق بالقوة والباطل يبقي حق خليك من كلو شيء في ناس هنا كان معارضة ولا مع النظام انت كانت كتبت أي كلام لا يتوافق مع أمزاجتهم انت غواصة ومارق و ضليل المهم مع دا كلو قلنا معليش نتعايش وديل أهلنا لكين ساقط القول والتجريح بلغ مبلغ عظيم لذلك أنت عايز منو من العقلاء يقدر يتجاسر علي المراجعات الاخلاقية والفكرية لينا هنا ويأمن من جماعات الرقابة كان سايسية ولا عقائدية في الحوش دا تدخل في صراع هوائي ما عندو قيمة تضيع وقتك وعمرك مع ناس كايسه الاختلاف للخلاف تعرف أنا في لحظة غضب قلت قضيت عشرة سنين في المنبر مشارك عاصرت جهابذة من كل أهل السودان كانوا قدوة ورائعيين وتركوا تراث في المنبر بالجد يعد مثال للمثقف السوداني الواعي اللي بمثل قيم أمة واسرة مش نفسو الان المنبر أختلف اللغة بقت لغة عادية يغلب عليها ما لايثلج الخاطر ولايرضيالعين ولا تقبله كحوار بين أنسانيين المهم يبقي الامل في أنو الناس تلحقوا قصة لغة الخطاب بين الاعضاء قبل مضاميين البوستات كان فكرية ولا أخبار ولا سجالية وبعدها نتصالح مع الكل كان من الضفة الاخري ولا من صفوف الاصدقاء والاصحاب والاهل هنا لو نحن مؤمنيين أنو المنبر دا مساحة راي تعكس نحن منو سودانيين حقيقيين بنعبر عن سودانا ومدي معرفتنا وكذلك دا مدي أسفيري لقيم أهل السودان وتأكيد لاننا أكثر أهل الارض قيم وقيمة أنسانية بدل العنصرية والاسراع بالتفكير والتجريم والسب وخليك من قصص الخاص والتراسل في الواتساب وعرض الفضايح للملا يا خي دي بقت متعة لكم هائل من الناس وخاصة السودانيين في كل الدنيا غير أنك تجد بعض المقاطع من لغتنا الهابطة في مواقع أخري تعرف نحن بالجد واقفينا علي أتعاب مفارقة حقيقية وأعتزال للمنبر ومصاحبة الفيس والتويتر والقوقل بلس ربك يهدي النفوس ويجعل الحوش حوش مودة وكل الناس علي الاقل تحترم بكل رحابة صدر بعض والراي الاخر بدل الفوضي دي أمكن أنا زاهد في الاستمرار بدوامة العبث لكين هنالك من يعز علينا فراقهم وهو أضحوا كالاشقاء وأصبح المنبر علاقة أنسانية عميقة وليس قصة قراية وكتابة ولي بين البورداب أخوة عظام لا حصر لهم في كل بقاع الدنيا وأنا أفخر بهم متعكم ربي بالعافية دا كلام كتير أمكن
مامفيد لكين في النهاية رائي
لك كل الود تحياتي للعجوز ود مجذوب

Quote: تعرف قصة نحن وقفنا وين دي هي مرعبة وكمان سبب البلا وكمان في ناس عايزا الباطل يكون حق بالقوة والباطل يبقي حق خليك من كلو شيء في ناس هنا كان معارضة ولا مع النظام انت كانت كتبت أي كلام لا يتوافق مع أمزاجتهم انت غواصة ومارق و ضليل المهم مع دا كلو قلنا معليش نتعايش وديل أهلنا لكين ساقط القول والتجريح بلغ مبلغ عظيم لذلك أنت عايز منو من العقلاء يقدر يتجاسر علي المراجعات الأخلاقية والفكرية لينا هنا ويأمن من جماعات الرقابة كان سايسية ولا عقائدية في الحوش دا تدخل في صراع هوائي ما عندو قيمة تضيع وقتك وعمرك مع ناس كايسه الاختلاف للخلاف

كلام من دهب يا أبو الزهراء يا جهبيز ...

ده السودان الجديد ...

ده ما سودانا و لا سودان حيدر البرشوتي هههههه

غايتوا الله يساعدنا بالصبر بس ...

يا هندسة
لكين أنت ما دبلوماسي معتق أتخارجت من القصة بهدوء أنت أخطر من برشوتي في معارك الليل الطويلة
والمهم نقول مقبولة منك يا صديقي
ولك كل الود

انا شايفة البداية بداية طيبة في اول يوم في عام ٢٠١٧م
في المنبر العام...وان الروح العامة السائدة في بوستات
مستهل العام الجديد توحي بان التوحد والاهتمام بقضايا
اكبر ستسود وان روح التسامح والبعد عن العداوات الشخصية
ستغلب....
والله يا ربي ناس نحن وقفنا وين حيغلبوا وترجع حليمة لقديمها
(والله يا ود قباني ان استخدمت المثل ده وما عارفة حليمة رجعت
لشنو وقديمها كان شنو!!)..
والمهم املنا كبير ان امنياتك تتحقق في عام ٢٠١٧م...
..وانا مترصدة منو اول واحد حيجي يرقد زي علي ويقول
"اها نحن وقفنا وين؟؟؟؟!!!)
وكل سنة وانت طيب والله يديك الصحة والعافية..

آه يا يحيي ....
القصة ظريفة جداً و عندها معاني عميقة جداً
نحن يا يحيي القاموس اللغوي بتاع اللغة العامية
بتاعتنا يفتقر الي عبارات الاعتذار و المُطايبة
و يَعِج بعبارات الشتيمة و التحقير و العنصرية

حتي الاعتذار ممارسته قاعدة تتم في جو تهديد

كم مرة و انا طفل تم إجباري للإعتذار ل فلان
أو فلان تحت التهديد و غالباً سوط عنج و يتم
الاعتذار و ينتقل التهديد للطرف الآخر و يطالبوه
ب انو قبل الاعتذار و يوافق تحت التهديد أو عشان
يرضي فلان أو علان لكن في الحقيقة
لا في اعتذار حقيقي و لا قبول حقيقي
الناس بتغش في روحها ساكت
لي متين ما عارف
و أسمح لي أخص الأخت أميرة و ضيوف البوست بالمداخلة القادمة
لاني قلتها ليك في بوست زماااان و آسف اذا في ناس سمعتها للمرة التانية
لكن الكلام جاب الكلام.

في عام 2009 ( و دي متأكد منها يا يحيي ما تجي المدام
و تطلب الطلاق لان القصة حصلت عام 2010 يا يحيي)
في ذلك العام يا أميرة ذهبت أُسرتي للسودان و عندي عمي
ظريف و لطيف و بحبه شديد و هو يبادلني نفس الشعور
قابل بنتي ريم و من شدة الشوق و اللهفه نَادَها بصوت عالي
ملئ بالشوق و المحنة و الحب قائلاً (( تعالي هنا يا بت الكـ ب
و يقصد الكلــ ب))
البنت 10 سنوات قامت جارية و ظلت طول الاجازة تتحاشاه
و قد حدثني انو أنا (و الضمير راجع لزوجتي) كرهتهم في أهلهم

(ده موضوع تاني ممكن نتكلم فيه لي قدام)

الخلاصة حتي تعبيرنا عن الحب بتم اخراجه في لغة جافة
قاسية عنيفة ..... الخ
و استحضر هنا المثل الشعبي الذي اعتقد انه رمادي جداً
(( ال ما رَادَكْ ما لامَكْ ))
هنا تقترن الريدة و المحبة ب اللوم
فتأمل زي ما بقول زميل البوست ملاسي

سلام يا هندسة .. وضيوفك
وكل عام وانتم بخير ,,

ونتمنى في هذا العام الجديد كل تقدم وازدهار للمنبر ولسوداننا الحبيب ...
يوجد كم نفر يعدو على اصابع اليد هم خميرة العكننة في هذا البورد ..
نتمنى منهم في هذه السنة الجديدة
ان يرتقوا بقلمهم الى الاحسن ويغيروا طريقتهم بما يواكب التحضر والرقي ...
واكثر شي مزعج ...ان تجد بوستات باسماء اعضاء ... لتصفية حسابات ...

الاخت الصغرى امير السيد ... كل سنة وانتي طيبه ..
قصة حليمة وعاداتها القديمة كما هي :

Quote: "حليمة" هي زوجة حاتم الطائي الذي اشتهر بالكرم، كما اشتهرت هي بالبخل،، فكانت إذا أرادت أن تضع سمناً في الطبخ، ارتجفت الملعقة في يدها، فأراد حاتم أن يعلمها الكرم فقال لها: إن الأقدمين كانوا يقولون أن المرأة كلما وضعت ملعقة من السمن في طنجرة الطبخ زاد الله بعمرها يوماً، فأخذت حليمة تزيد ملاعق السمن في الطبخ، حتى صار طعامها طيبًا وتعودت يدها على السخاء! ولما مات ابنها الوحيد الذي كانت تحبه أكثر من نفسها، جزعت حتى تمنت الموت، وأخذت لذلك تقلل من وضع السمن في الطبخ حتى ينقص عمرها وتموت فقال الناس: "عادت حليمة إلى عادتها القديمة".

واتا طيب
وضيوفك طيبين
تامين ولامين وزايدين
قالوا الزول لو قال ليك
طيبين
اعرف ام اهلو نقط نقط نقط
إلا يقول ليك
تامين وزايدين
بتاوق من قبل كم يوم في جمهورية سودانيز الديمقراطية اشوف لي فرقة انحشر فيها
ما لقيت
بقيت اتاوق
اجري واجيهو راجع
جمهورية سودانيز التي لها قضاياها التخصها وحدها وترفع فيها البوستات
ولا عزاء للوطن
يتراجع العام قصاد الخاص الاخص
عام قادم
ووطن خير ديمقراطي يسع الجميع
التحية للاصدقاء هنا
زهير السنة الجايلة وليدك يضاحكك
المسنوحة ازيك

عارف يا قباني أنا ما فيني أخلاق لفتح بوست ومتابعة ردود وكدة
لكن في اثنين بجي بفرش لحافي في بوستاتهم وانجدع بالعراقي زي الكأنه بيتنا : قباني واب سن
ما عارف ليه الاثنين ديل من دون مخاليق البورد .. يمكن عشان ما حصل هرشوني قبل كدة بإني خربت البوست ولا حاجة بالشكل دة
ود أب سن ما مفروض يكون من كتابي ولا اتابعو لأنه بشكل امتداد لشكل حياتي .. بحس فيه شوية تحفظ في الكلام بتخليه بمثل تيار البيئة المحافظة برغم يساريته المفترضة
قباني بمثل تيار غريب علي وبجذبني شديد لانه بتكلم عن حاجات بتعجبني بس ما عشتها .. بتلقاني متكيف لمن يتكلم عن الخمر والسينما والكسر يمين وبتاع .. زي البقرأ لي في رواية لماركيز .. والعجب كمان لما يتلم مع محمد المرتضى حامد ويكون الموضوع عن الجمال .. الأيام ديك بجيب معاي غياراتي وبسكن في البوست ومرات كتيرة ما بكتب ولا حرف بس بقرأ واتبسّم

داير اتكلم عن البورد بشكل عام
زماااان أول ما جيت البورد يوم كدة كنت في حي الدرجة مدني ومنه مشيت كداري للسوق الصغير قضيت أغراض وكداري برضو مشيت السوق الكبير ولاقيت صاحبي والاثنين مدبرسين وزهجانين شربنا القهوة عند ادروب ولفييييينا السوق الكبير من أقصاه لأقصاه عشان نفرق الزهجة وختمناها بحجر شيشة في حديقة وقيع الله رغم إنها ما كانت فاتحة بس حنسنا الولد عمل لينا حجر .. اتونسنا زييييين ومشيت دردق فتحت سودانيز اونلاين القى ليك كمية من العناوين على شاكلة مدني تحترق والثورة في مدني وبتاع
عديت شوية لقيت صور كمان .. اتصلت بصاحبي الكان معاي قلت ليه يا خوي انت مدني دي كان فيها مظاهرات بي ورانا ولا شنو! قعد يضحك قال لي أخوي مغترب ضرب لي متحمس قال لي قالوا حرقتو مباني الحكومة قلت ليه عليك الله امشي واصل حلمتك الحاجة الوحيدة الحرقناها حجر شيشة أنا واحمد

الفترة الفاتت جاني إحباط موش من فشل العصيان وإنما من عدم مقدرة الناس على استيعاب حقيقة حدوث الفشل
الفترة اللي سبقت يوم العصيان كان الطموحات اتعلقت حد السماء .. والناس لحدي هسة ما قادرة تتصالح مع حقيقة إنه الموضوع ما ظبط
لو جيت في البورد وقلت لأي واحد إنه العصيان على أرض الواقع وفي أماكن العمل ما نجح حيملاك صور وبوستات ويقولوا ليك ياخي الكيزان اعترفوا جاي انت يا غواصة يا بتاع تقول كدة!

يا ربي أعدل الفقرة الفوق دي واقول فلنفرض مجرد فرض إنه العصيان ما نجح !! اتخيل لي التعديل بحميني من تكفير المناضلين واهدار الدم .. مو كدي ؟!

رجوعاً للبوست وقفنا وين! وقفنا في محطة عدم قبول الناس للواقع بسبب واقع افتراضي عاشوهو حقيقة
هذا والله أعلم


_________
المداخلة بالكامل مجرد ثرثرة في لحظة قرف فما تشتغل بيها كتير عزيزي القارئ إذا ما عجبتك

عزيزي الفاضل حامد الصاوي
وفعلا زي ما قلت ثقافة الاعتذار معدومة عندنا في السودان...
وكثيرين بيعتبروا الاعتذار ضعف....وطبعا ده اكبر خطا...
اما التسامح والعفو عند الاساءة فقليلين جدا هم الذين يتميزون
بهذه الخصلة الحميدة جدا جدا...
لكن قصة ريم مع عمك الظريف قصة ظريفة وضحكتنا بالجد...تلقى
ريم لهسع بتلاوز من عمك وتجري منه....ياهو السودان كده حتى
عبارات الشوق والمحنة بنعبر عنها بلغة فظة شوية....
والله الكلمة الطيبة زيها مافي في الدنيا دي.....
والكلمة الطيبة بتذوب جبال الحقد والكراهية والحسد والغضب...
...تعالو ننشر ثقافة الحب وثقافة السلام والمودة (....وين انتي يا وضاحة يا قلب)..
والله يديك الصحة والعافية

محمد مجيدو
شكرا كتير على قصة حليمة الرجعت لقديمها...
وفي الحقيقة اول مرة اسمع قصة رائعة دي
بتشجع على الكرم والجود وترك البخل...
وان شاء الله السنة الجديدة دي تكون سنة جميلة
وسنة وئام وتسامح ....
عالم بطااااااااااالة...
والله يديك الصحة والعافية وكل سنة وانت طيب

...تعالو
ننشر ثقافة الحب وثقافة السلام والمودة
(....وين انتي يا وضاحة يا قلب)..
والله يديك الصحة والعافية

دي رساله سامية
لشعباً تساما
و فج الدنيا ياما
و طلع من زِحَما
زي بدر التمام

دي ثقة محجوب شريف
بالشعب السوداني

و طالما هذه الكلمات راسخة في وجداننا
فالقادم أجمل و أروع لا محاله

___________________

عزيزي الفاضل احمد محمد عمر.
.توقفت في جملتك الاولى البتقول فيها::"لكن في اثنين بجي بفرش لحافيفي بوستاتهم واتجدع بالعراقي زي الكانه بيتنا ..قباني وود ابو سن"".
.شوف انا عاوزة اقول ليك حاجة....كل يوم اي زول لازما لازما يتعلم حاجة جديدة ويعرف حاجة جديدة والما بيعرف حاجة جديدة كل يوم حيكون زيه وزي البهائم ....وانا كل يوم بتعلم حاجة جديدة في هذه الدنيا. سواء من كتاب او مجلة او من الاصدقاء او من حوش بكري الواسع الرائع.
د.وفي حاجة او قول تصرف حميد اتعلمته من المسنوح ود ابو سن.....هو كتم الغيظ عند الغضب وعدم ردالاساءة بمثلها...
...فهو لا يسب ولا يشتم بل انه يقول الكلام الطيب السمح لمن يسئ اليه...
الزول ده يا احمد عنده قدرة كبيرة على كتم الفضب.....لاني انا لمن اسمع اساءة او شتيمة مرارتي بتنفقع...
وشيئا فشيئا بديت اتعلم كتمان الغضب والغيظ والتسامح ...
.هسع هو ذكرني بحكاية الدكتور الانسان سيد احمد الخطيب الكتب قصته ود الشغيل العطبراوي في بوست التوثيق العطبراوي وكيف ان هذا الدكتور احسن الى من كان يعذبه في السجن عندما جاءه مريضا وفي حالة ضعف فاهتم به اهتماما شديدا ...
بل كمان ما نسى يدس ليه حاجة تحت المخدة....(يعني مساعدة مالية)..
اها يا احمد هسع زي الزول ده تقول فيه شنو!!
والله يديك الصحة والعافية

اوووووو معلم
اشكرك جدا احمد وتصريحك هذا اعتبره تقريظا اعتز به
اشكرك يا صاحب
المسنوحة اللميرة بت اللمير
تعرفي ود اب سن و فاطنة بت حليمة عليهما رحمة الله وغفرانه
كانا لا يملان من تكرار المثل الجاي لينا .. وكنت اسعد اخواني كون انني الوحيد الذي صحبتهم حتي مماتهم لم افارقهم ابدا
كانوا بقولوا
التدورو وتابا .. تفتش لي ليمو ما تلقا
و
الحسنة معطت شنب اللسد
الدنيا عمرها اقصر من غضبنا علي احدهم
ألزمت نفسي أن لا أرد مساءة بمساءة
امرق
امرق بس من النت حتي أكون قادرا علي تجاوز لحظة الغضب
بزعل والله
واتنفخ تيوة
لكن لنتجاوز من اجل انفسنا فنحن لا نستحق سوء الخلق
وزي ما بقول ود اب سن
في زول بعد ما مات قالوا حليلو النباذ

عقّدتنا يا ود أب سن

.شوف انا عاوزة اقول ليك حاجة....
كل يوم اي زول لازما لازما يتعلم حاجة جديدة ويعرف حاجة جديدة
والما بيعرف حاجة جديدة كل يوم حيكون زيه وزي البهائم ....
وانا كل يوم بتعلم حاجة جديدة في هذه الدنيا.
سواء من كتاب او مجلة او من الاصدقاء او من حوش بكري الواسع الرائع.

كلام زي الدهب يا أميرة
كل سنة و انت طيبه

ودالبشري يا صاحب
حبابك
كتبت ثم مسحت
وكتبت ثم مسحت
آي والله
كدي عاين
كم مرة كنت غاضبا علي احدهم .. وبحثت عنه لتتفشي فيهو
ولم يحالفك الحظ ولكنه حالفك ان لا تجده !!!
وزعلت ومر الوقت وحمدت الله انك لم تجده
الموضوع كان بقا ابكر
فلنحتفظ بغضبنا لأشياء اهم

يا اميرة ود اب سن مدرسة قائمة بذاتها .. جاء داخل المنبر باسلوب حقو براهو .. ما بقلد أي زول وما بتأثر بأي زول
ود اب سن تيبيكال سودانيز .. سوداني جد زي ما بقولوا عقد الجلاد .. عشان كدة قلت فوق مفروض كتابته ما تدهشني أو حتى أتابعها .. بديني احساس ود الحلة البلاقيهو كل يوم .. خالي حلال المشاكل .. أبو الشباب البيجي داخل مكان العرس وفي دقيقتين بتلقاهو واقف بين الطباخ والصيوان وبوجه في الشباب ودو الصينية للناس ديلك ويكورك للطباخ عليك الله صينتين سريعات وتلقى كل الناس بقت متابعة معاهو
كتابتو معطونة بعرق السودان الجد جد ما سودان الاونلاين

كل سنة وأنت بألف خير باشمهندس..
نتمنى أن تكون 2017 خير على البلد ونهاية لمعانة هذا الشعب الصبور

اها ... ناويين نجعل 2017 سنة توحد و اهتمام بقضايا اكبر ...
و لا نشوف رقبتنا وقفنا وين و نواصل ...
والله يا باشمهندس حاله المنبر بقت تحزن.. والبخوف أن ما يحدث في المنبر
يمكن أن يعطينا مؤشر لما يمكن أن يحدث إذا تم ما يتمناه الجميع. كيف يمكن
أن ينحدر مستوى الحوار إلى هذا الدرك بين مثقافين يفترض أن يؤرقهم
هم وطن بحالة ؟ أنظر إلى الصفحة الأولى تجدها كلها أو جُلهم تصفية حسابات
شخصية لا مجال فيها لتداخل أحد يخاف أن يطاله رزاز هذه المراشقات .
الاميرة تنمنى حبيبة أن تكون 2017 بشارة خير لعودة الأبن الضال إلى هموم وطنه.
ود اب سن سلام كل سنة وأنت كما تحب ونحب. وبقية المتداخلين

كل البورداب والعابرين
وخاصة الصاحب الواضح الشفيف ود أبو سن
متعكم ربي بالعافية
لقد حاولت التحرر من لعنة الكيبورد لو لساعات ولكنها أصبحت كتعلقي بالدخن لا فكاك منها وهنا نغضب وويكون الهياج اللحظي ونتخذ المواقف ونفصل الجهاز ونتصل
قائلين للاخر الملام نقول نتكلم ونهدد ولكن تبقي سيرة النفس الانسانية التي لا تعرف غير ممارسة الحرية والتحرر في حوش بكري بلا من أو أذي علهم يعلمون من فوائد
هذه المنابر أنها مدرسة لقوة الاحتمال وأن تعرف رجال وتختبر مدي صبرك علي الراي الاخر والجحود وكل ممارسات الاقصاء وأغتيال الشخصية في نهاية الامر نحن ذلكم
الرجل السوداني الذي يلف العمامة كفنا علي راسه ويحمل العصاة لكي يحمي نفسه من غوائل الدهر وكل مفترس ولكن مفترس الاسافير خبيث ويدخل النفس من خلال المزاح
وقد ينقلب لمرض وأقلها كدر وغضب قد يستمر ساعتئن ولدي الشباب يطول وبين النفوس هنالك نفس ما ولا داعي للتوصيف فأنا ليس لدي في علم الطبابة باع وهي تريد
أن تحاكم الجميع وتصدر أحكامها أن كانت منطقية أو تميل للتجريم لشيء ما تموت المشاعر السالبة بالرغم رهق اللحظة وغل الكلمات الجارحة ويبقي ضياء الحروف علما
وحكمة وحتي أن كان فيه من السفه والتسطيح الكثير يظل هذا الذي في عقول بعض منا حقائق جوفاء وتكرار ملل وبعض مغالطات السابلة أمام دكاكاين الاحياء قتلا للوقت وأحياء
لحضور قد يبدو لصاحبه قد مات ولكنه حي بقوة الدفع التي بذات نفسه تقول تميز حتي ان كان كفار بواح
ربي أني قد أسرفت فوضي وغرقت في متع الدنيا وأنت الغفور الرحيم أدرك عبدك الهالك بالعفو والرحيل الرحيم
وانتم مالكم غير الصبر علي نزق البعض وجنوني دوما وايضا العفو عني وأنتم أهلي الكرام
ود ابوسن وكل الكرام هنا لكم التحية والاجلال

الحبيبة فاطمة الحاج
كل سنة وانت طيبة..
ونتمنى الامنيات كلها تتحقق...وان شاء الله ما نرجع تاني ونقول
اها..نحنا كنا واقفين وين؟
قرات حكمة ادونيس المكتوبة ي بروفايلك والبتقول::""
انت لا تكرهني، انت تكره الصورة التي كونتها عني وهذه الصورة
لست انا ..انها انت"""
قول غاية في الروعة والمنطق...
فالكثيرين من اعضاء المنبر لا يعرفون بعضهم البعض الا من خلال
سطورهم يسطرونها هنا...ومن كتاباتهم يكونون صورة عن الشخصية
التي ربما يرون فقط صورتها في البروفايل...ومن خلال هذه الصورة
التي يكونها القارئ يبحث عن الكلمات التي يود ان يخاطب بها تلك
الشخصية...وانا متاكدة اذا قابل الشخصية في ارض الواقع لتغيرت
افكاره عن صاحب الشخصية ولاصبحا من اعز الاصدقاء...ولما خاطبه
باسلوب الجفاء والكراهية..
والله يديك الصحة والعافية

تسلموا فاطنة و زهير و
معلمي احمد
اعتذر لقباني عن حرف البوست
تعرفوا
كتير بقرا هنا ل بورداب اتلاقوا وجها لوجهة
والتعبير
فلان دة مختلف وعلي الطبيعة هو ورررر رش لكل الصفات الجيدة التي تناقض ما يكتبه هو عنه قبل معرفته
الحل في تقديري
ان نبذل انفسنا حين نكتب دون تزويق او خداع
ان نكتب ذاتنا
صحي مرات في حاجات الزول ما بصرح بيها لكن مانصرح بيها ما معناتو نكذب او ننافق
نسكت بس
نكرس
البورد دة في ناس قرايين واذكياء جدا .. بقروا وراء الحرف
بندهش لقدرتهم العالية علي الاستنباط
والتذكر
التذكر وان طال الامد
والتنقيب
ف شنو
بقبضوك ولو بعد حين

Quote: عارف يا قباني أنا ما فيني أخلاق لفتح بوست ومتابعة ردود وكدة لكن في اثنين بجي بفرش لحافي في بوستاتهم وانجدع بالعراقي زي الكأنه بيتنا : قباني واب سن ما عارف ليه الاثنين ديل من دون مخاليق البورد .. يمكن عشان ما حصل هرشوني قبل كدة بإني خربت البوست ولا حاجة بالشكل دة ود أب سن ما مفروض يكون من كتابي ولا اتابعو لأنه بشكل امتداد لشكل حياتي .. بحس فيه شوية تحفظ في الكلام بتخليه بمثل تيار البيئة المحافظة برغم يساريته المفترضة قباني بمثل تيار غريب علي وبجذبني شديد لانه بتكلم عن حاجات بتعجبني بس ما عشتها .. بتلقاني متكيف لمن يتكلم عن الخمر والسينما والكسر يمين وبتاع .. زي البقرأ لي في رواية لماركيز .. والعجب كمان لما يتلم مع محمد المرتضى حامد ويكون الموضوع عن الجمال .. الأيام ديك بجيب معاي غياراتي وبسكن في البوست ومرات كتيرة ما بكتب ولا حرف بس بقرأ واتبسّم †

يابوحميد ...
كتر الله خيرك و لا عدمناك يا رجل يا جميل ...

اديتني اكتر بكتير من ما استحق ...

اخوك ( او عمك شكلها ههه ) بالله دي طريقة دي ...

المهم اخوك عاش زمن اجمل بي كتير من زمن سودانيز اون لاين ده ...

زمن قال عنه كامل عبد الماجد فيما قال :

يا سلام انا من زمنا
الكان ينابيع من سرور
كانت الحاجات عديلة
ودوغري لا زيف لا قشور
الطيور كانت طيور
والعطور كانت عطور
والزهور كانت زهور
بي شذاها وبي نداها وبالعبير
الغني مجاور الفقير
والوزير صاحب الخفير
***
مجتمع كان من بساطة واحترام
لا تطاول لا تباهي
لا تجافي ولا ملام
تبدا يومك بي حبابك
وتنهي بي مرحب سلام
***
وكل زول حايم اخوكا
وان ختيت او يوم غلطت
في الكبار البزجروكا
والمعلم كان ابوكا
كنا نحترمو ونجلو
كانت الناس بي سلوكا
كان صحابك في المدارس
طول حياتم يذكروكا
لما تطلع فوق تشيلهم
ولما يطلعوا يرفعوكا
كنت تشتاق للحبايب
ولما تبعد يشتهوكا
والقطر كان ستة شوكة
الزمن ما فوضة روكة
بيهو للحبان نسافر
ولا هم حلوين يجوكا

زمن يا احمد لافيهو ترصد لا مساككة ...

زمن ما زي زمن يجيك زول يغالطك في معرفتك بالناس و يكيل ليك في شتايم و هو لا بعرفك لا بعرف اصلك من فصلك ...

يا سيدي ... ياما حنشوف ...

اما ود ابسن ده ...

فحكاية براهو ...

و انا و الله دفعت ليهو البوست ده محبة ساي في الله ... ههه

لانه بستحق و لانه زول عديل ...


و سامحونا يا من سبقتم احمد في المداخلات ...

لكن غلبني ارد عليو متأخر ...

كما تعودنا ...

عادت ريما ...

و رجعنا لي مكان وقفنا ...

و ابشري بطول سلامة يا حكومة البشير ...

يا فاضلابي و معاوية وود نواي ... قلتوا لي مشيتو وين ؟

قالوا يا قباني يا اخوي
زعلان السوق مين برضيهو
إلا ترضي براك
اياهو السوق
اياها الدفسيبة دي
لو مرقت ستعد خسارة لذات الجنبة الكنت واقف فيها
وستعد نجاح للجنبة التي تناهضها
ف شنو
مت وانت تحاول
تحاول ان تحدث فرقا
المهمة ليست سهلة ولكنها ليست مستحيلة
ستخصم منك ومن راحة بالك وبال اسرتك واعصابك
الامر يستحق

في شنو ؟...

Quote: في شنو ؟

المافي شنو ... يا ود المدير ؟ :)

Quote: قالوا يا قباني يا اخوي زعلان السوق مين برضيهو إلا ترضي براك اياهو السوق اياها الدفسيبة دي لو مرقت ستعد خسارة لذات الجنبة الكنت واقف فيها وستعد نجاح للجنبة التي تناهضها ف شنو مت وانت تحاول تحاول ان تحدث فرقا المهمة ليست سهلة ولكنها ليست مستحيلة ستخصم منك ومن راحة بالك وبال اسرتك واعصابك الامر يستحق

ود ابسن يا شقيق ...

شكرا لإحساسك الراقي ...

انا ماش وين؟ ...

قااااعد وحاتك لا بحرد لا بكل ...

و زمان قلت ... الفايروس الاسفيري ده ... الزول يصوم كم يوم ... يطلع السموم

و يجي راجع ... هههه