Post: #1
Title: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 09:42 AM
08:42 AM December, 25 2016 سودانيز اون لاين
Arif Nashed-
مكتبتى
رابط مختصر
عطفاً على ما صرح به أحد منسوبي الحزب الحاكم (للآن) الذي قال فيه (ح نطلع زيت أي زول عاوز يخرب البلد) مشيراً إلى دعاة العصيان المدني المحتجين على الغلاء وسؤ الأحوال …
نطالب بإنشاء معاصر لزيوت المواطنين على أن تكون بالقرب من الأحياء ذات الكثافة الإعتصامية العالية تقليصاً لمصروفات الإنتاج نسبة للأعداد المتزايدة من دعاة العصيان يجب أن يكون المصنع على مساحة أقلها مليون متر مربع (ما نجي نلاقي نصو إتلحس) ..
نقترح إجراء عمليات فحص طبي للمواطن (قبل العصر) للتأكد بأن زيته سوف يكون مطابقاً للمواصفات .. عشان ما تتمقلبو ساكت .
يجب أن تلتزم الحكومة بتسليم رفاة وما تبقى من (تفل) المواطن المعصور إلى ذويه في علبة (مربى) لإتمام عملية الدفن .
إستثناء الأطفال وكبار السن والعجزة من (العصر) نسبة لتدني إنتاجيتهم مما يعد أهداراً لموارد الدولة .
نقترح أن يتم تصدير الزيت (فرز أول) إلى الخارج من أجل الحصول على مزيد من النقد الأجنبي بينما يتم إستخدام الزيت (فرز تاني) في (تزيييت) المواتر والبكاسي (المظللة) أي زيت يتم بيعه محليا أو تصديرة خارجيا يجب أن تتبع في إجراءات بيعهاللوائح المالية والمحاسبية منعا لأي هبر ولغف وكده .
يجب أن يتم العصر على الطريقة الإسلامية على أن تكون (العصارة) في إتجاه القبلة على أن يمنح المواطن المعصور فرصة للنطق بالشهادة .
(ذوات الزيت) من النساء يتم إنشاء معصرة خاصة بهن منعاً (للإختلاط) وإتباعا لتعاليم الشرع الحنيف وتمشيا مع مقاصد المشروع الحضاري .
يجب أن يتم (العصر) على يد (عصبة) متدربة حاذقة يتم إبتعاثها خصيصا لأحد مصانع الزيوت العالمية (ما برضو دي أرواح وكده) .
نناشد ولاة الأمر أن يكون (العصر) تحت التخدير (الكامل) يعني ما (موضعي) ولو إنو ظاهر من جنس الكلام ده إنو العصر ح يكون بدون بنج ذاااتو .
نقترح أن يكون يوم 10 ديسمبر من كل عام (يوم العصر العالمي) وإقامة إحتفال بالساحة الخضراء إبتهاجا بذلك .
نقترح علي الحكومة فتح مكاتب لإستقبال المواطنين العاوزين (يطلعو الزيت) ويخلصو من الموضوع عملاً بمبدأ (عصروك وللا جوك) .
سؤال * في حالة إنو الشعب الفضل كوووولو (إتعصر) والحكاية خلصت هل سيتم بيع المصنع في مزاد علني أم على موقع الدلالة الأليكتروني؟
سؤال * في حالة (المغتربين) هل سيتم جهاز لعصر المغتربين (العاصين) بالخارج؟ ولا ح تنتظروهم لحدت ما يجو؟
سؤال * هل ستساعد أحزاب الكرتون الموالية في (عصروطليع زيت المواطن) من مبدأ (حبيبي أعصر لي وأنا أعصر ليك)؟
نقترح إعفاء كبار السن (زي حلاتنا) من قصة (العصر دي) والإكتفاء بتحفيظهم جزء من القرءآن الكريم الذي يأمر بالإحسان !
نقترح على الحكومة إنشاء (بنك الزيت الوطني) لتجميع كل زيت المواطنين الطلع ومبادلته تجاريا من أجل شراء عربات دفع رباعي موديل السنة لنوام البرلمان .
• يجب أن تلتزم الحكومة بعدم (أهداء) أي زيت لأي من أقطار الجوار من مبدأ (الزيت لو ما كفى البيت يحرم على الجيران) .. مش تودوهو كوولو (جزر القمر)
كسرة : نقترح أن يسمي الزيت (زيت العاصي) ….لأنو زيت العاصي ذيو ماااافي !
• كسرة ثابتة (قديمة) :أخبار ملف خط هيثرو العند النائب العام شنو؟ 85 واو – (يعني ليها سبعة سنوات وشهر) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 44 واو (يعني ليها ثلاث سنوات وثمانية شهور)؟
|
Post: #2
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 09:44 AM
Parent: #1
ما يجينا واحد يقول لينا اتو طلعتوا زيتي من زمان دا مشروع وطني لازمن الناس كلها تتعصر وتشارك فيهو ..
|
Post: #3
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 09:45 AM
Parent: #2
* يستثني منسوبي المؤتمر الوثني والاسلامويين من العصر ..
|
Post: #4
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 09:47 AM
Parent: #3
ما يجينا كمان واحد ناطي يقول ليييييييه استثنيتو ناس المؤتمر الوثني والاسلامويين ..
استثنيناهم لانو الجماعة ديل لو عصرناهم بطلعوا سمن وهي سلعة غير مطلوبة في الاسواق العالمية لانها ضارة وتسبب الكلسترول وامراض الشرايين والقلب ..
لكن ممكن يكونوا ضمن المرحلة التالية بعد الانتهاء من عصركم ..
|
Post: #5
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 09:48 AM
Parent: #4
اما المغتربين بنسوي ليهم معاصر في السفارات بنظام نص عصرة يجينا كل سنة نعصروا يعني المغترب زيتو متجدد مش مرطب وبقدر يعوض زي نظام التبرع بالدم ..
|
Post: #6
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 10:00 AM
Parent: #5
بالنسبة للسفارات سنطرح عطاءات للمعاصر زي ما عملنا عطاءات البوفيهات ..
علي الراغبين مراجعة السفارات الملحق الاقتصادي ..
|
Post: #7
Title: Re: الفاتح جبرا __ زيت العاصي .. ذيو مافي
Author: الهادي الشغيل
Date: 12-25-2016, 10:57 AM
Parent: #6
إلى متى سيستمر الانقاذيون في شتم الشعب السوداني :
1. الحسوا كوعكم
2. شذاذ آفاق
3. شحاتين
من أراد الاطلاع على مزيد من الشتائم فليطلع على بوست في الراكوبة بعنوان :
أقوال وشتائم نظام الإنقاذ بحق الشعب السودانى والعالم
|
Post: #8
Title: Re: الفاتح جبرا __ زيت العاصي .. ذيو مافي
Author: Arif Nashed
Date: 12-25-2016, 05:14 PM
Parent: #7
Quote:
إلى متى سيستمر الانقاذيون في شتم الشعب السوداني :
1. الحسوا كوعكم
2. شذاذ آفاق
3. شحاتين
من أراد الاطلاع على مزيد من الشتائم فليطلع على بوست في الراكوبة بعنوان :
أقوال وشتائم نظام الإنقاذ بحق الشعب السودانى والعالم |
الناس ديل تخطوا الشتائم واستفزاز الشعب لمرحلة الانتاج والتصدير ..
زرعوا الفشل والدمار في كل مكان ..
حصدوا الغضب والرفض والعصيان ..
يجنون ما زرعوه (زيت العاصي .. ذيو مافي) ..
|
|