أقرأ - السودان .. قصة زواج أسطورية بسبب اتصال خاطئ

10:52 AM December, 17 2016

سودانيز اون لاين
زهير عثمان حمد-السودان الخرطوم
مكتبتى
رابط مختصر

رن جرس الهاتف لديه .. فتح الخط مرحبا ليتلقی سيلا من الشتائم والسباب .. الهام لم تعطه حتی فرصة او مجالا للرد ووقعت فيهو بری شديد .. يا عديم الأصل .. يا تافه .. يا منحط .. يا مرمى … دی عملية تعملها .. انت ما دام ماراجل جايينی ليه … وكلما حاول عثمان أن يفتح فمه القمته حجرا … وكل مرة تزداد دهشته وحيرته وانفعاله … نبذ السواد والرماد .. البت ما خلت ليهو صفحة يرقد عليها … هيجان وثورة شديدة ترغی وتزيد … ثم انفجرت تبكي .. فالتقط عثمان الكلام وسالها هسی الشتيمة دی كلها انا سويت شنو ؟؟؟
فردت عليه وهي تتنهد وبحرقة والم شديدين … والله صحيح الاختشوا ماتوا … تقول لي ماشی تجيب أهلك وتمشی وما تجی وتخلينی انا أكلم اهلی .. وتختنی فی موقف بايخ زي ده وكمان تقول لي شتيمة .. يا عواليق يا جبان يا ما مربی .. انت ما عندك أخوات ..
بالذمة لو عندك ذمة بترضی الحصل لي ده يحصل لی واحده من اخواتك …..
فعرف الرجل أن الاتصال خطأ والرقم ليس هو الرقم المطلوب وأنه لم يكن الشخص المقصود
… فرد عليها قائلا وقد انفعل مع الشتيمة والسباب وبكاء ودموع البنت : شوفی انا ما الزول القاصداهو انا ما بشير ..
\انا عثمان وانا زول متزوج وبی اولادی ولا شفتك ولا بعرفك .. لكن على الطلاق الليلة الدايراهو بتمو ليك .. الا كان تابی انتی
.. النوريك الرجالة وفراسة أهلك الشكرية ….
فصمتت الهام برهة ثم أخذت تعتذر وتروی لعثمان الحصل من بشير ..
وقبل أن تنتهی المكالمة الخاطئة قبلت الهام التحدی ووافقت وتم الاتفاق بين الهام وعثمان علی الزواج ووصفت له الهام المدينة التی تقيم فيها ورقم المنزل واسم العایلة ولم يخيب عثمان ظنها وسافر والتقی بأهلها ووجدها من أسرة محترمة وبنت رجال فعلا وفاتح أهلها فی الموضوع فوافقوا بشرط واحد فقط أن يحضر أهله وقبل أن يغادر تودعه الهام وتقدم إليه كرتونة مليانة بالقروش وتقول له انا لا أعلم كيف ظروفك هذا هو مهری قدمه لاهلی عندما تعود .. ويذهب عثمان ويعود بمعية أهله ويتم الزواج والفرح والآن تمضی الحياة بينهما فی سعادة وهناء وسرور
.. بسبب اتصال علی رقم خطأ وتتحول الإساءة والشتيمة والسباب الی ألفة ومودة وسكن
… ويا ريت كل الإتصالات الخاطئة تطلع زي كده وتثمر عن وفاق ولقاء وزواج .+

قصة حقيقية .. والمصدر جار وقريب الأسرة مباشرة .
بقلم
أحمد بطران

واحد بعرفه كويس واشتغلت معاهو فترة لي هسة بتذكر ضحكو علي لمن حكى لي قصة زواجه
عندو قريبته عزمته لقعدة عاملينها بمناسبة التخرج .. مشى الحفلة وهو من شكرية البطانة وجيه وطويل وشعرو ناعم مسدل في جبهته
واحدة من الخريجات كسر فيها ضلعة ولااااا صدقت نادتو بي جمبة وقالت ليه ياخي انت عجبتني عدييييل كدة وشاحداك شحدة تعرسني حاسة بي إنك انت الحتسعدني
قال ليها انتي مادام ختيتي فيني ثقة زي دي أصلو ما بخذلك هسة اعتبريني خطبتك وفي أقل من اسبوع أهلي بجوكم

القصة دي حكاها لي وهو متزوج من 5 سنين وبي اولاده عشان كدة ما أخدت راحتي في الاستجواب
لكن بتذكر إني أقوم واقعد واقول ليه يا ود الناس هسة انت اتأكدت من اخلاقها واسرتها كيف قبل ما توافق ؟ قال لي ولا اتأكدت من أي حاجة بس حسيت بي صدق واطمئنان في كلامها ورجالة ساي مني تميت الموضوع بدون تردد .. وبعد عرستها أصلها ما خذلتني طلعت زولة أصيلة

انا عثمان وانا زول متزوج وبی اولادی

غايتو يا زهير 2017 دي لازم نعرس ليك

انا عثمان وانا زول متزوج وبی اولادی

انا عثمان وانا زول متزوج وبی اولادی
والحمد لله شرعنا الحنيف ادانا حق الزواج من اربعة،
سوف أبرك بواحدة وليس من شروط الزواج التاني موافقة الزوجة الأولى والأولاد
عجبها عجبها
ما عجبها خليها تتصل برقمي خطأ، يمكن تلقى ليهو واحد أشهم مني متزوج يحل ليها مشكلتها

اسوا ما في القصة ..
الكرتونة المليانة قروش
الشكرية برجالتهم المعهودة وكرمهم الفياض
لا اعتقد انهم يقبلون ذلك
لو اخذ الكرتونة حقا معناها شكري ( صيني )

كول دا...
و زوجته و أولاده ما عندهم رأى..
و لا عندهم خبر..
ولا ليهم أى قيمة فى القصة..
هو أصلو الرجالة دى شنو ؟

ابو حراز
الله يخزي شيطان عقلك...
كتلتنا بالضحك ونحن في الهم والغم...
وبنفكر في ١٩....واضحك الله سنك..
..شكري صيني..دي ما سبقك عليها زول..
you make our day yoday
والله يديك الصحة والعافية

وزي ما قالت نور...الزول ده ما دام متزوج وعنده اولاد
وبدون ما يشاور زوجته واولاده...عاوز يظهر رجالته....
...فعلا شكري صيني ودنماركي ونرويجي وسويدي في نفس
الوقت..

تشكر يا زهير على الاتحاف وترطيب الجو
لكن فضلا على إضافة الأخوات وألاخوان .

لو كان جاب ليها أخوه أو ولده مثلا

وحلف عليه أنه ما يخزله وما حا يندم ..

مع أستبعاد حكاية الكرتونة كما ذكر أبو حراز

كان تكون أروع

يعاد النَص إلى المؤلف لتحسينه وتلافى الأخطاء وجعله قابلاً للتصديق

انا عثمان وانا زول متزوج وبی اولادی
ولا عزاء للسيدات.
طيب ياخي رجالتو دي ما يسويها مع مرتو واولادو.

فعلا مرة عثمان دى مالها قاعدة حيطة بس
ياخ ولا بشاوروها معقولة حماسة ساى كدا

والقصة التانية القالت عجبتني وتم الموضوع غايتو قهارة عجيبة على قول المثل دا ياهو العرس البقا قهارة بنات وفلاحة امهات

Quote: الشكرية برجالتهم المعهودة وكرمهم الفياضلا اعتقد انهم يقبلون ذلك

شكرى سرحان سااااكت....

أنا ضد تعدد الزوجات
للترف و ارضاء فلان وعلان
أو لعقاب الزوجة الاولي كما هو شائع الان
دي مسخرة و احتقار للمرأة.
نعم لزوجة ثانية بالاتفاق اذا كانت لا تستطيع الانجاب مثلاً
أو اي سبب آخر بشرط أكرر بشرط ان توافق علية
محكمة عليا و يمنح تصديق رسمي لذلك.
لكن اي وحد يشوف ليه واحدة تعجبوا طوالي يفكر في الزواج
دي مسخرة. و عدم رجوله و عدم احترام ل مكانت الاسرة في المجتمع
و لنناضل مع النساء من أجل تقييد حق تعدد الزوجات
فالعلاقة الزوجية ليست سرير و خُمرة و صندلية و حنة
بل هي أكبر و أسمي وأنبل من ذلك.

نعم لزوجة تانية مهما كانت الأسباب يا حامد الصاوي، يا كندي، بناقض قسمك بالالتزام بالقوانين الكندية التي تقر المساواة بين الرجل والمرأة.
أرجو أن تقوم بتسليم الجواز لوزارة الداخلية الكندية لو كنت مصر على رايك.

رن هاتفي ومع فتح الخط اذا بوابل من الشتائم تنهال على اذني
اه يا واطي يا منحط يا جزمة يا دون انا تعمل معاي كدة يا فسل يا مقطع يا دون يا جعان
يا دون (اتكررت اكتر من ستة مرات) ويا ماعارف شنو .. و انت ماعندك اخوات بنات
وانا مخلوع وما ادتني فرصة اقول ليها مالك يا بت الناس انتي منو ؟
المهم بعد ان انقطع نفسها او كاد الرصيد ان ينقطع قلت ليها انا ما القاصداهو
وبدات تاني: تخذلني وتحرجني يا كضاب يا دون وانهالت في بكاء مر يقطع القلب وانا اصلا قلبي رهيف
المهم قلت ليها انا علي الطلاق عشان بكاك دا الا اجي ارفع ليك راسك دا ... ارفعي راسك يابت وخلي البكاء دا
كمال بتاع الساعة كم ؟ علي الطلاق ماعاش الببكيك وبخذلك .. انا ومعاها ( هييييييع)
انتي الله ما ليك ولا شنو كمال بتاعك دا جبان وجعان ودون زي ما بتقولي لكن انا على الحرام وعلي الطلاق اوريكي الرجالة
وفعلا طيبت خاطرها بكلمات ليست كالكلمات
واخدت عنوان البيت والموعد وفي الوقت المحدد وانا بلبس المدام بتقول لي على وين الليلة
انت قاشر كدة ماشي تعرس ولا شنو ومعاها ضحكة تهكمية (التقول فكي) قلت ليها هو معقول
بعدك انتي في زول بعرس الا يكون واطي ودون وابن لزينا
انتي علي الحرام اتنين منك مافي .. انا بس عندي شغل مهم جدا
واتوكلت على الله ومشيت والعروس بتقول لي اتاخر شوية عشان خيلاني جايين من السفر ولسع ما جوا
واتاخرت زي ما طلبت مني بس خوفتا الريحة الانا كابيها دي تتبخر
ومشيت ..والغريبة ما لاحظت أي ملامح للفرح ولا أي دلائل تشير ان في هذا الحي خطوبة او حتى قولة خير
وخبطت على الباب والعروس بنفسها فتحت الباب اتفضل يا حمادة
دخلت وقعدت في الصالون وبرضو مافي أي زول جاني او رحب بي
الا راجل عجوز نايم بعيد شوية كدة وانا قلبي بقى يضرب واتوجست خيفة
وكدت ان اولّى هربا ولم اعقب ووقفت على حيلي قلت احسن اتخارج سريع من الورطة دي
يمكن دي مجنونة البتشتم دي .. وبقيت اعاين ناحية باب الشارع
وفجأة القى ليك مرتي واتنين من اخواتها امامي ... حسيت بالدنيا تلف وتلف
وقلت انا بعد شوية حاقع مغمى علي ... واذا بالشتائم السابقة اصبخت حقيقة وهي تخرج من المدام واخواتها الاتنين
انا مع ادعائي الذكاء الخارق امام المدام لم يخطر على بالي ولو للحظة ان هذا امتحان عسير وانا سقطت فيه بمزاج

طيب لو اتصلت بيه واحدة تانية وبقصة محزنة اكتر من ال ذكرتها
هه ود الشكرية يدق صدره تانى وتالت غايتو جنس قصص

حامد الصاوي..
ياخي انت زولا سمح بالحيل..
والله ينصرك....ويا بخت شريكة حياتك....
..في تونس الخضراء ، ومن زمن الرئيس الحبيب
بورقيبة ،هناك قانون يمنع تعدد الزوجات...
والله يديك الصحة والعافية...

والله يا جماعة المفروض نشجع تعدد الزوجات حتى نحل مشكلة العنوسة في السودان ..

فالتقارير الرسمية وغير الرسمية تؤكد أن هنالك عدد كبير من البنات غير المتزوجات ..

فخير ألف مرة لأي بنت أن تعيش كزوجة ثانية بدلا أن تعيش مدة حياتها عانسة من دون زوج ..