بالله شوفوا قسم الله ود عثمان ود العباس كتب شنو

02:34 PM December, 14 2016

سودانيز اون لاين
زهير عثمان حمد-السودان الخرطوم
مكتبتى
رابط مختصر

من بين سطوره تكتشف أنه شاب يانع ولكنه يحمل عقلا يفوق عقل من يحكم السودان إن كان له في الأصل عقل :
سيدي الرئيس
مللنا من الفيس والواتس ,هل ممكن تفتح لنا التلفزيون والاذاعة والميادين العامة والندوات. سمعنا امتعاضك عن المتوسبين , وعفوا اذا ازعجناك بس لكن نعمل شنو ,قفلت في وشنا كل القنوات والاعلام وجعلتهم حكرا لشلتك وناس نافع والتمرجي. انا دا شخصيا متشوق لمقابلتك او حتى مناظرتك او احد جماعتك في قناة سودانية , وبجيك عديل بس افتح البلف - عفوا - الباب ونزل الزجاج .
وهذا يعني ان رسائلنا وصلتك سوا بالفيس او بغيره , ليست مهمة الوسيلة بقدر ما يهم المضمون
ام بخصوص دعوتك لنا بالتحدي والحرب ودخول الغابة نعتزر عنها ,فوطننا لا يتحمل المزيد من الدماء .
سيدي الرئيس انا مواطن عادي ولا مسلح ولا مشلخ ولا منتمي لحزب , في مشكلة لو عبرت عن رأي باي وسيلة ,مجرد راي وسلمي جدا ,انا ضد الحرب وضد التخريب والحريق , بس ما عاجبني طريقة حكم , هل هذا حرام ؟؟ ويستحق الشتيمة واننا عملاء ومرتزقة وبنقبض بالدولار , وهو البقبض بالدولار شوية , بالمناسبة ناس الادوية القبضوا الدولارات عملتو ليهم شنو ؟؟؟
سيدي رئيس ليس كل من يعترض على سياستك عميل (معلومة جديدة )
سيدي الرئيس والله العظيم بنحب بلدنا وما عازين نشوفا بتتخرب , لكن ما اديتنا فرصة ولا حاربت الفساد , اها نعمل شنو يعني , نقعد نتفرج ؟؟؟ دي هي الوطنية عندكم ؟؟؟ لالالالا دي ما بنسويها ولا تربينا عليها .
سيدي الرئيس كان الفساد دا غلبك ياخ زح خليها في غيرك بقدر وبحاول , حواء والدة
كفاك حاولت 27 سنة عمر جيل كامل ما قصرت تب , ابقى مارق وتعال جاور الحرم ياخ اختم عمرك جنب الحرم , ما في زول بسألك في الحرم دا اقتراخ من اخوك البسيط دا ,نسيت ما اقول ليك بالمناسبة دي والله انا كنت في البداية بحبك عديل وتوسمت فيك الصلاح ,لكن تغيرت ياخ ,لالالالا دا ما انت لما جيت في البداية وكلمونا انك بتصلي الصبح مرة في الحاج يوسف ومرة في امبدة وزول متواضع كنت , اسي ما عارف مالك بقيت تشتمنا بسبب وبدون سبب , شذاذ افاق , والحسو كوعكم , والدايرنا اجي يقلعنا , والدايرنا يجينا عديل ؟؟؟ عديل كيفن يا سيدي الرئيس ,يعني دواس وحرب ,لالالالا دا ما كلام رئيس ولا خطاب دولة ,نحن شعبك ومواطننك عاوز تداوسنا ,ليه , انت جيت بالباب - عفوا- بالدبابة - اطلع بالباب ,اخوي واخوك , امساك بمعروف او تطليق باحسان .
والله سيدي الرئيس انت في نفسك تعبت وكبرت , يا خ ما ترتاح مالك والهم والغم , فكها ليهم ,بلا يبليهم , شوف مزرعتك وحياتك وحريمك وصلاتك , والله كريم عليك ومخير.
صدقني اسي اليوم لو طلعت وخطبت في الجماهير واعتزرت لهم وطلبت الغفران واعتزلت الحكم , صدقني شعبنا دا طيب (دقوا واعتزر ليهو ), ما شفت نميري حرق ودنوباوي والجزيرة ابا في زول هبشوا , ياخ شعبنا دا لسه بحن للاستعمار رغم انو قتل الالاف من المواطنين , دا شعب طيب خلاص , والله كما طيب ما كان خلاك جلست 27 سنة ,شي حروب وشي فقر , ورفع دعم.
سيدي الرئيس سؤال بسيط كيف تتواصل وتعبر عن رايك بعد ازاحتك عن الحكم , هل عن طريق الواتس والفيس ام تدخل الغابة , ام تتفرغ لادارة مزرعتك واملاكك وطظ في الوطن .
مع فائق احترامي وتقديري , محبكم / قسم الله ود عثمان ود العباس
مواطن غلبان

هذه عينة بائسة من خطاب التذلل والهوان دبجه من أطلق على نفسه لقب المواطن الغلبان المقيم خارج السودان يتوسل فيه الطاغية عمر البشير ان يعتزل الحكم. ويغريه بالتفرغ لشئون مزرعته وكأنها من ميراث أبيه!.

كان التذلل واستعطاف المحكومين للحكام سمة مميزة لمذكرات أعيان السودان للسلطة على عهد الاستعمار. وظل هذا النوع من الأدب المخزي هو طابع تلك المرحلة في تاريخنا الوطني حتى ظهر الاشاوس في حزب الجمهوريون والشيوعيون باسم الحبهة المعادية للاستعمار والذين اقتحموا ساحة النضال الوطني بالروح المقدامة والجباه المرفوعة والخطاب المصادم.

(ادين فيما كتبته هنا لاشراقات ذهن الشيوعي العطبراوي عبد الله القطي وهو احد المعلمين غير الرسميين في حياتي. تقتصر اضافتي الخاصة على ذكر الجمهوريين . )