عيب ياخ

06:37 AM November, 21 2016

سودانيز اون لاين
عبدالحفيظ ابوسن-no where
مكتبتى
رابط مختصر

وفاة متهم بسرقة موبايلات بالجزيرة .. بنفق عفراء بعد مطاردته بواسطة مباحث الجزيرة بالتنسيق مع مباحث ولاية الخرطوم و هروبا من المطاردة اوقع بنفسه من اعلي نفق عفراء ليلاقي حتفه بسيارة اكسنت كانت تسير في طريقها بوضع طبيعي أسفل النفق قامت الشرطةبإجراء اللازم ..
هذا مالزم توضيحه ..

مع تحيات اعلام ولاية الخرطوم

له الرحمه والمغفرة

🌐 Sudan Now Network

عيب التشهير بالموتي

تحياتي عبدالحفيظ

التشهير دا سببو انو في شكوك حول أسباب المطاردة

هل كان المرحوم من ضمن المتظاهرين في شارع المطار

فطاردته الأجهزة الأمنية ام كان حرامي كما ورد في اخبار الولاية

انا بكل امانة ما عندي ولا ذرة ثقة في اعلام ولاية الخرطوم لانو موجه

والكل يعلم ذلك ، على ما اظن ان الراي الثاني هو الأرجح

واعلام ولاية الخرطوم او ناس الامن يحاول دغمسة الحقيقة كالعادة

واهو الأيام الجاية اكيد حا تكشف حقيقة الموضوع

نسال الله له الرحمة ولآله الصبر والسلوان


تحياتي

مرحب هيثم
وحبابك
القاعدة القانونية المتهم برئ حتي تثبت ادانته
فليقولوا لم يكن متظاهرا او محتجا
وتطارده الشرطة
فول استوب
احكي ليك قصة كنت شاهدا عليها

ساكنين جمب السوق . المنطقة الصناعية و موقف المواصلات جمبنا
بدري الكلام دة ونحن اطفال
واحد نزل آخر محطة . وطالب بي باقي عشرة ج . الكمساري غالطو .
المبلغ ماهين والكمساري داير ياكلو منو
حصلت مشادة
الكمساري كورك فيهو
حرامي .. حرامي
واتلموا ناس الموقف والزول حاول يشرح موقفو ما ادوهو فرصة . ضرب وكفت ونبذ
كترو عليهو قام جاري جهة الحلة والناس تكورك حرامي حرامي
وصل المنطقة واحد جدع فيهو حديدة كسرت راسو مات
ماكل مطارد مجرم
لعله برئ

ربنا يرحمه ويغفر له
يا غالي مش فقط موضوع التظاهرأول ما طلع الخبر كان مصحوب برواية انه مات منتحرا, لذا التوضيح من الجهات الرسمية كان لابد منه فقط كان من الذوق عدم التفصيل بهذا الشكل الفج كان يكفي الحديث عن مطاردة المباحث للاشتباه مثلا
بالنسبة لموضوع المظاهرات ارجح انه فبركة لبعد موقع المظاهرة و كذلك لإختلاف التوقيت و الله أعلم

نعم ود البشري
صدقت
وهذا ما قصدته
لعل له اسرة تضررت كثيرا من هذا التصريح الرسمي
لاحظ
حرامي موبابلات
مش مشتبه فيه
انا لو في محل اسرتو بحددها معاهم

يا عبد الحفيظ سلامات
القبح الملأ البلد كتير و ضعاف التأهيل و الخبرة هم الماسكبن زمام الأمور
زي منصب الزول البيصرح عن الشرطة ده ، المفروض يكون لبق و يتخير مفردات خطابو بعناية شديدة
لكن نقول شنو
ربنا يرحمو و يغفر ليهو و يصبر أهله

يا كمال في صورة محضر تحري لافه في الواتس
مكتوب فيها
تفوح من فمه رائحة الخمر والميسر

كل امرء في السودان
يحتل
غير
مكانه

الحبيب ودابوسن
بيان الشرطة ده رد فعل لما تناقلته وسائل ان المرحوم مات منتحرا ولولا هذه لما شاهدت بيان الشرطة
فالموت عندنا بالمجاني والانسان ارخص
ولكن لدي قناعة ربما يشاركني فيها معظم السودانيين ان المرحوم رجل شريف بامتياز وليس لديه
علاقة باللصوصية فاعلام النظام يجب قراءتة في الاتجاة المعاكس
والشواهد كثيره اخرها بيان النظام حول احداث القطينه
رحم الله المرحوم