Post: #1
Title: منو القال الخرطوم وسخانة؟؟؟
Author: ياسر منصور عثمان
Date: 10-30-2016, 11:25 AM
10:25 AM October, 30 2016 سودانيز اون لاين
ياسر منصور عثمان-
مكتبتى
رابط مختصر الخرطوم اوسخ من وسخانة
جبال من الاوساخ والقاذورات تنتظر تكرم عربات نقل الاوساخ
يدفع المواطن رسوم النفايات ولا احد يقوم بجمعها ورميها في المكبات المخصصة
رغم ان المواطنين يقومون بوضعها امام المنازل
............
نسمع كل يوم ان الحكومة وجدت طريقةً سحرية لمعالجة الازمة
ثم لا نرى طحينا...
واخيراً
خرج علينا والي الخرطوم بأنهم عجزوا عن الحل
..........
والحل ابسط من بسيط..
لو تم ترك الملف للجان الاحياء
لتمت المعالجة بنسبة عالية..
.....................
خلونا نعمل حسبة بسيطة....
لو مسكنا احدى حارات الثورة مثلاً..
سنجد انها تتكون من حوالى الف منزل وكثير من المحلات التجارية..
البيت الواحد مفروض عليه 15 الف جنيه شهرياً (بالقديم طبعاً)..
كدة حصيلة البيوت حوالى 15 مليون
ولنفترض ان حصيلة المحلات التجارية 5 مليون..
كدة الحصيلة 20 مليون شهرياً...
..........
يمكن للجنة الحارة المعنية ان تتملك 4 مواتر نقل (تكتك) بالتمويل من هذه المبالغ..بضمان اي بنك..
ويتم السداد بالاقساط...
سعر الموتر حوالى 70 مليون جنيه
يعني 280 مليون جنيه...
تغيين 4 سواقين من ابناء الحارة بمرتب مجزي..
يتم تقسيم الحارة لاربعة مربعات ..
ويتولى كل موتر المرور على مربع محدد له....
................
تناقشت حول الفكرة مع احد رؤساء اللجان فقال لي (لن يوافقوا ..لأن الحكاية فيها لغف)....
|
Post: #2
Title: Re: منو القال الخرطوم وسخانة؟؟؟
Author: almulaomar
Date: 10-30-2016, 12:57 PM
Parent: #1
ياسر إنت زول بتفكر إبتداء وتجد حلول منطقية تالياً وفيك شئ من الوطنية ودي كلها لا تتوافق أو تتماشي مع المشروع الحضاري كان بي توك توك أو كداري.
يا أخي أصلاً الوالي ما قصر جاب عربات لمن تجي العربية بالله شاقه حلتنا بتذكرني معلقة إمرؤ القيس والتي جاء فيها:
مِـسِـحٍّ إِذَا مَـا الـسَّـابِـحَـاتُ عَـلَى الوَنى أَثَــرْنَ الـغُــبَــارَ بِــالـكَــدِيْــدِ الــمَــرَكَّلِ
أها في واحد من أولاد حلتنا وكلنا ذلك الرجل عمل فينا يوم عملية هجم النمر فأتي بصفارة ، وأداه تيييت تييييت تيييت ، والصفارة دي يا سادة يستخدمها الرجل الذي يسبق عربية الوساخة معلناً قدوم الفرج وقرب وصول العربية ويطلب من الجميع إتخااذ وضع الإستعداد لأنه لو العربية فاتت إلا تسكها بي كيس وساختك براك ، أها الحلة كلها كومت شوالات الزبالة عند الأبواب وأنتظرنا وبعيوننا المنى هالها المقلب فما عرفنا نرجع شوالاتنا داخل بيوتنا ولا نخليها ونحرسها من الكدايس بالرغم من أن محتوياتها غير جاذبة البته لا لكديس ولا لي بتاع الخرد.
التحية للزولة المحروقة شديد من الحاصل سامية آدم في الفيس بوك حيث قالت:
عجبوني الليلة جوا سرقوا البلد نضفوا
عجبوني يا ناس الكيزان
سرقوا الغنم والخرفان
لبسوا البدل والقمصان
ركبوا الكابرس والتوسان
سرقوا البلد من زمان
من نيالا لي ام درمان
رابط القصيدة :
https://www.facebook.com/bashirdiary/posts/401848779908027https://www.facebook.com/bashirdiary/posts/401848779908027
|
Post: #3
Title: Re: منو القال الخرطوم وسخانة؟؟؟
Author: ياسر منصور عثمان
Date: 10-30-2016, 01:36 PM
Parent: #2
تشكر يا حبيب على المرور الانيق
دي المشكلة الكبيرة
الشغلة كلها لغف في لغف
رغم ان الموضوع ما محتاج شطارة ولا ذكاء
لكن اللغف ما بريحنا
هههههههههههه
مع ودي
|
|