Post: #1
Title: إضراب الأطباء أخلاقي ومشروع 100%
Author: أحمد عمر
Date: 10-08-2016, 04:25 PM
03:25 PM October, 08 2016 سودانيز اون لاين
أحمد عمر-
مكتبتى
رابط مختصر الأطباء قدموا شرحا وافيا وكافيا عن إضرابهم البطولي و المشروع
المقال أدناه منقول
------------------------
السلام عليكم
شباب..
(عشانك يامواطن )
سمعتو بالعنوان دا؟ اكيد لا طبعا
طيب وحده وحده
دا عنوان اضراب الاطباء الايام دي...... بتسالو اضراب شنو كمان ؟!
طيب عشان ماتبقو بعيدين الايام دي في السودان في اضراب عام شامل كل اغلب مستشفيات السودان.. بدا بي مستشفيات بحري
وام درمان وشمل في الوقت الحالي كل مستشفيات الولايات.
رد فعلكم كالاتي بالله شوف الدكاتره ديل لمن مايشتغلو الناس تموت ماعندهم انسانيه غايتو مفترين افتراء.. صح؟.. ولا انا
غلطت في رد الفعل؟
طيب ياسيد : عايز تعرف الدكاتره مضربين ليه؟
* كم جبت ابوك ولا اخوك ولا اختك المستشفي مضايق بالليل وما لقيت جهاز عشان الازمه فاضطريت
توديهو متوصف بره؟
* كم مره جيت المستشفي والدكاتره رسلوك تجيب شاش ولا قطن ولا درب بالشي الفلاني من الصيدليه البره؟
* بتعرف كم عيان مات بي سبب انو اسطوانات اكسجين ماف في المستشفي؟
كم مره اتشاكلت مع دكتور عشان خلا عيانك البنزف واتاخر في بنك الدم او يجيب الشفاط من العمليه او مشي
الصيدليه بره شال بالدين درب عشان يحصل بيهو عيانك ؟
* عرفت احساس الدكتور لمن يموت في يدو عيان هو كان قادر ينقذو لو كان اتوفرت عندو اقل الامكانيات؟
انتا بتنفعل وبتمد يدك علي الطبيب بس... لو حسيت بي احساس العجز البحس بيهو لمن مايقدر ينقذ العيان كان حتعزيهو
هو في مريضك وتواسيهو.
.
...اذا جاوبت ع الاسئله دي صدقني بتكون عرفت السبب انو الوضع الصحي في المستشفيات التابعه للوزاره سي جدا مافي
ادويه منقذه للحياه مافي دربات مافي اجهزه فنتولين كافيه لي عيانين الازمه مافي معدات بسيطه لانقاذ المرضه حتي
الاوكسجين العيانين بخمسو مع بعض زي السجاره كل واحدكم نفس. دا السبب الكبير البخلي الناس تضرب عشانك يامواطن
عرفت ليه. ...اي كالعاده حيجوك ناس ناطين يقول ليك الدكاتره مضربين عشان القروش... هههه طبعا لمن بسمع الجمله دي بنتقط عديل.
قروش عارف انك من تبدا امتياز بي 1300 لمن تبقي طبيب عمومي بي 1500 او نائب اخصائي بي الف و1500 والطامه في دا كلو
انك في سنينك كنائب اخصائي بتدفع 10 مليون اي والله عشره مليون جنيه سوداني كرسوم تدريب سنويا يعني 50 مليون في فتره تدريبك
غير رسوم الامتحان والبحث والكلام الفاضي
كدي خلينا في الطبيب العمومي
ابدو حسبو معاي انا عندي ع الاقل وجبتين في اليوم بره (في المستشفي كان مابقو تلاته) وفيها مواصلات ورصيد وبرضو عندي ناس البيت و
ملابس. وووو... كدي جيبو احرف جزار عشان يوزعا كيمان كمونيه ولسه يقولو ليك قروش
المهم زي ماقلتا ليكم انو بتدفع 10مليون سنوي رسوم تدريب وبعد دا المستشفيات مامهياه للتدريب غير انو مافيها امان يعني بعد الدفع والتضحيه
بي علاقاتك الاجتماعيه واحساس العجز لمن يموت منك عيان او ماتقدر تقدم ليهو شي وتلقي واحد من النظاميين بمد يدو عليك ويضربك ولا زول
جاي من بحاسبك علي اخطاء الوزاره بس هو ماقادر يواجهه فبجي بفرغ فيك.. والحمد لله
ما تتخيلو انو قرار الاضراب دا كان صعب قدر شنو.. بس دا الحل الوحيد وبعد المعط عرفتو الاضراب ليه
نلخصم
*توفير. الادويه المنقذه للحياه... ودي عشانك يامواطن
*توفير بيئه تدريب مناسبه.. ودي عشان يطلع دكتور كويس يقدم ليك خدمه كويسه
*توفير قانون رادع يحمي الاطبا
ودي حاجاتنا ليكم ادعمونا عشان نحنا المره دي واقفين عشانكم
#منقول
عشانك انتا وعشانك انتي وعشان ابوك اخوك وصحبك واختك وامك اغلي زول عندك وعشانكم انتو ياكم
اهلنا ودمتم.نرجو التعميم
#منقول
|
|