انتكاسات ازواج في بلاد الغربة

09:07 AM August, 16 2016

سودانيز اون لاين
عباس الدسيس-Saudia
مكتبتى
رابط مختصر

الحكاية بعيدة كل البعد عن العنصرية ما انط واحد حسب الموضة الماشة واشبكني عنصري.
الاحداث حقيقيه فإن تطابقت مع شخص لا يعني هذا بانه المقصود.
مرات الكتمة بتورط الزول خاصة لو متعود علي الانبهالة والانفكاكه.
هم اصدقاء كانو عايشين الحياة بالطول والعرض جكس وكتحه ومما جميعه ضاقت عليهم الايام والاغتراب اصبح المخرج جو بلاد الكتمة .
كانت لما تكتم معاهم بمشو دولة مجاوره وصلو لقناعة البلد هنا غير الزواج ما بتتقعد والبلد المجاوره عايزة قروش كثيرة .
وكما تقول الروايات رزقو بالذرية الصالحة وعاشو في هناء وثبات وانشغلو بمتطلبات الحياة.
وفي يوم من الايام النسوان قالن ماشات اجازة السودان مع الاولاد والطيارة قامت اريتها ما قامت اخوانا الضرس تاورهم
في واحد منهم فتح الباب كان بمشي ليهو لاسرة بتاعت ترطيبات بناتا زي القشطه اللون ابيض والشعر زي سواد الليل في ايدها دي الحنه خطوه بخطوه بروقه تتاني.
عشان تمشي تشرب الجبنه وتكحل عيونك لازم وانت داخل تشيل معاك جردل كنتاكي وفواكه الامور بعد كدا تتطور لي عطر باريسي وممكن تدخل بمرور الزمن الاحجار الكريمة والذهب.
الفتح الطريق كلم صاحبو وعملو كم زيارة عاطفيه بعدها وصلو مع الجكس مع دعوات غداء خارجيه في افخم المطاعم.
نجي لي حتت العنصريه الما عايزين زول انط لينا فيها الاصحاب واحد وسيم لونو فاتح شعرو سبيبي والتاني غامق لونو داكن شعرو قرقدي والبنات تقول ما سودانيات من لبنان او امريكان.
قاعدين في امانت الله اتغدو واكلو التحليلة والجلسه تتخللها عبارات الغزال والدردقه اتنفضو وقالو ماشين نزلو الانصاصير اريتم ما نزالو
واحد فيهم كحل ليك ناس الانضباط بتاعين البلد وقامت الجلجله والكبكبه والرجفه الشعرو قرقدي مال علي البت وقال ليها نغير الطريق الجماعه ديل ممكن اكاوشونا اقرب لفه زاغو ...
ناس الانضباط شركو ليهم بالبوابه بعد مطاردات بوليسيه وقعو في الشرك.
اقيف عندك يا زول كل واحد اطلع اثباتو!!!
بعد الفحص علاقتكم بالبنات شنو والجابكم هنا شنو ؟؟؟
الشعرو قرقدي: البنات ببقو لينا بنات خالتنا
الانضباط: يا راجل معقوله دي بت خالتك اتكلم كويس
الشعرو قرقدي يعني ما طوالي بت خالتي فيه لفه
الانضباط : فيها لفه و ل زوغه زي زوغتكم الحسي في المول
الشعرو قرقدي: امها بتبقي لي امي بت خالتها واحنا في بلدنا بنعز الام عشان كدا جينا هنا عزمناهم
بتاع الانضباط عاين للشعرو سبيبي وممسح نظرة فحص وقبل ما تكلم معاهو اتقول عارفو خواف....
نط الشعر سبيبي والله يا شيخنا البنات ديل لا ببقو لينا لا حاجة واليوم ذكري عيد الام واحنا متعودين في بلدنا نحتفل بيها مع الاهل والاقارب.
طيب ما تقولو كدا يلا اركبو.
نواصل..............

عبس يتجلى
غايتو يا عبس البيقع فيك بتنقي شعيرو ....... ههههههههه ...
واصل يا حبيب ومن غير فواصل بالله ..
غايتو انا بقيت اهم لو صدقة لاقيتك ودرب حلتنا جابك يوم .................... شايفك حايم في حلتنا قبل يومين

تحياتي : ياسر العيلفون ........

إذا كتب عباس الدسيس.. فانتظر المداخلة الأولى من الظريف ياسر العيلفون..
اصلك ما بتخيب الظن..
أحبكم الجوز..

الحبيب اللبيب ايمن دياب تشر على الملاحظة الجيده ولكن اشرح ليك السبب وهو انو الاخ عبس كما يحلو لي ان اناديه الموضوع يا ايمن انو اخونا عباس لما يلاقيك بيبدا يحكي ليك الحكاية وما بتمها ليك ولما ييفتح بوست بتجي تلقايهو بيحكي في الحكاية زاتها علشان كده بتلقى نفسك جيت جاري علشان تعرف نهاية الحكاية الما تمت المرة الفاتت ..

مع تحياتي لك ولصاحب البوست يا حبيب

ياسر العيلفون ,,,,,,,

Quote: مرات الكتمة بتورط الزول خاصة لو متعود علي الانبهالة والانفكاكه

هههههههههه دا حنك ناس العشير

Quote: عبس يتجلى غايتو يا عبس البيقع فيك بتنقي شعيرو ....... ههههههههه ... واصل يا حبيب ومن غير فواصل بالله .. غايتو انا بقيت اهم لو صدقة لاقيتك ودرب حلتنا جابك يوم .................... شايفك حايم في حلتنا قبل يومين تحياتي : ياسر العيلفون ........

Quote: إذا كتب عباس الدسيس.. فانتظر المداخلة الأولى من الظريف ياسر العيلفون.. اصلك ما بتخيب الظن.. أحبكم الجوز

صديقي العزيز ياسر الرجل الخلوق
حبيبنا ايمن دياب الكوارع وما يتبعها.....
ايمن عندي موقف مع ياسر حصل اول امس عارف انت المستشفي التخصصي بتاع ناس ياسر حكمة الله اكون ماشي المستشفي لازم اقابل ياسر
اها لتعترني المدام عندها ارتجاع مري وحصاوي في المراره مشينا نقابل الاخصائي بعد الفحصوات حددو لينا مواعيد لمقابلة الدكتور عشان العملية واحنا طالعين قابلنا حبيبنا ياسر.
سألني مالكم قلت ليهو مقابله مع دكتور ما كنت عايز اقول ليهو الحاصل شنو خايف احساس داخلي ياسر ممكن اشوت لي مع المدام كلمة تغطس حجري.
اها يا زول انا اشكر ليها في المستشفي ومقتنعه بيهو مليون في الميه مع الونسه قالت لي ياسر عايز اعمل عمليه اخونا ياسر انبهل ليك فيها ....
يازوله عملية شنو البتعمليها هنا الناس ديل انا شغال معاهم اصلو ما مقتنع بيهم دي مستشفي كلام فارغ وللاثباتات طلع ليها من جيبو روشتات لمستشفي تانية شايفا انا شغال معاهم وما بتعالج معاهم....
ياخ انا قعدته اتصبب من العرق ما لقيت طريقه اغمز ليهو اقرب منو اعفصو في كراعو مع السخانه قميصي رقد مويه واتوترت دخلت في ورطه عجيبه!!!
واحنا ماشين ختمها ليها ...بعد ما بعرفو حاجة كمان مستشفي غالي انتو وقت عندكم التامين جايين هنا ليه.
فارقناهو والشكله قامت الزوله قالت انا عايز اتخلص منها جايبها مستشفي زي دا ومسكت في كلام ياسر وتعال يا نقه ياخ انا قربت ادخل لي في بتاع كامري وهي تنق وتكورك
وانا اقول الله لا كسبك يا ياسر ما كنت ازوغ منك ولي حسي القيامة قايمة ...
اتذكرت زول الكوارع

يا عبس والله شعرت بيك لكن اليوم داك انا كنت ممغوس من ناس المستشفى ده مغسة شدييييدة خلاص عشان كده قلت اتفشى فيهم معاكم وبعد ما مشيت منك خطوتين والهل براااااي كده قلت الليلة انا ورطت عباس وطته شديده خلاص بي كلامي ده وحاولت اتصل عليك الطف الجو لكن لقت الجوال خارج التغطية لانو انا دخلت الباركنج والشبكة فيهو لا تعمل واتوكلت على الحي الدائم وقلت غايتو الله عبس بكون لي هسي يسب ويلعن في اليوم اللاقاني فيهو ده هههههههههههههههههه ... ويا عبس معليش ما كان القصد اشوت ضفاري لكن جات كده وانا عارفك بتلقى ليك مخرج يا حريف والمرة الجاية لو لاقيتك انا بزوغ طواااالي بكتل الملف بس ما تقول لي فوق الحلة دي انا تاني ما بجي ,,,,
تحياتي لكما الاثنان يا احباب ...

ياسر العيلفون ......

Quote: هههههههههه دا حنك ناس العشير

حبيبنا اسامة اخبارك والاسرة الكريمة
يا حليل ناس الدباغه والعشير وناس ود ام ديس الحكي دا ما بروح من الزول يا مونج

ههههههههههههههههههههه ورطه عدوك ــ

Quote: ومسكت في كلام ياسر وتعال يا نقه

متابعين واصل واوعك من سل الروح

تحياتي

حبيبنا العزيز .. عباس الدسيس وشركاؤه
السلام عليكم اجمعين
تعرف يا عباس اخوى .. قصتك مع اخونا الحبيب ياسر ود العيلفون .. ذكرتنى زماااااااااان كنت بحب المقالب جدا
وفى القريب ( مش قريب خالص يعنى ) عندنا واحد صاحبنا طبيب كان ساكن معانا عزّابى فى لندن ..
وكان مرضان بحاجة اسمها عرس المهم الراجل تزوّج وجاب العروس .. وبعد تلاتة شهور كدا كان عندو شنطة فيها باقى هديمات .. ايامو المعانا ..
قمنا زهجنا .. واتفقنا نعمل فيهو مقلب
المهم توليت الموضوع .. وقمت مشيت ليهو فى البيت وطبعا كان فى الشغل .. وخبّطت الباب ( كو .. كو .. كو ... )
جات المرة وقلت مين قلت ليها انا انور ..
قالت لى دقيقة وافتح الباب ..
قلت ليها معليش مستعجل شوية .. بس عندى شنطة بتاعة كمال ( هذا اسمو )
عليك الله لمن يجى قولى ليهو مرتو التانية قالت ليك دى باقى هدومك وتانى ماعندك حاجة عندى ؟؟؟!!!
بس تعال شوف الجرسة ... اوّل ما رجع من الشغل .. عينك ما تشوف الاّ النور .. المهم خليك من التفاصيل .. بس بعد صعوبة الموضوع اتحلّ .. .........
المهم .. انا نسيت انّو الجماعة قانصين لى ..
و قمنا جينا السعودية .. وفى يوم من الايام مشيت مع اختى السوق لانها رايحة السودان ... وانا ما عارف شافنا كيف ؟؟ رغم انى انا ما شفتو الشقى دا
وبعد يومين مشيت مع المدام السوق علشان عاوزة حاجات لاهلها .. وسبحان الله لقيتو جوّه واحد من المحلات .. ومعاهو ابنته .. ( اربعة سنوات )
.يا دكتور كيفك ؟؟ تمام ؟؟
انتهينا من السلام وفجأة قال لى : شنو حكايتك .. بتشترى شيلة للتالتة ولا شنو ؟
قلت ليه ياخى نحن لقينا التانية عشان نشوف التالتة ؟؟!!
قال لى كييييف ياخى .. قبل يومين شايفك مع واحدة بتشترو فى حاجات وقلت ما ازعجكم اخليكم براحتكم!!!
لا حول ولا قوّة الاّ بالله ..
المدام كانّو طقّتا عقرب ..
انور ممكن نرجع البيت ؟؟
لا خلينا نخلص من فيلم السوق دا بالله
ابدا انا عندى شوية صداع تانى ما بقدر الف معاك
طيب يلا البيت ..
ودّعت اخونا كمال ومشيت ..
وهو طبعا من الضحك جرى طلع من المحل .. لانو عارف نفسو عمل شنو !!
ركبنا العربية وطبعا الوليّة كضمت .. كضمة شينة ..
قلت لها ناخد عشاء ونمشى ؟؟
لا ما عاوزة اتسمم !!
امشى انت اتعشى مع التانية ...
ايوااااااااااااااااا يعنى الموضوع كدا ؟؟!!
آآآآآآآآيييى ..
ياخى انتى مصدّقة المجنون دا ؟؟
( طبعا قفلت قفلة نضيفة ) اسبوعين كلام مافى
وبقيت كل يوم ادق لصاحبنا تليفون وما يرد ..
اخيرا وبعد الاسبوعين .. حتى جاء وزوجته .. واقسم على ان الموضوع ( كما تدين تدان )
ويا ياسر عليك الله تانى ما تعمل كدا ... انا غايتو التوبة تانى هههههههههههه

تحياتى