Post: #1
Title: كده عيب ياخ
Author: الجنيد حمد
Date: 07-20-2016, 05:44 PM
05:44 PM July, 20 2016 سودانيز اون لاين
الجنيد حمد-قريب من هنا
مكتبتى
رابط مختصر
من بعض المواقف التي تحدث في الغربة وربما تحدث في الداخل
في محطة المواصلات وياداب سنة اولى اغتراب
لمحت لي زول لابس عمة وجلابية ومعاه واحد تاني من بعيد وبقيت بعاين يارب الناس ديل يجوا قريب
سبحان الله الدعوة صادفت ياريت لو دعيت بحاجة تانية وبباقي شوق السودان
مشيت سلمت عليهم وقعدنا في انتظار البص
الشاب سالني شكلك جديد في البلد دي
اي والله لي عشرة يوم . في سري قلت بالله انا مغبش ولا مشاتر ولا الزول ده عرفني كيف
عمنا ابوجلابية من ياتو قبيلة
اول مرة تقريبا يتم سؤالي عن السؤال ده وما متذكر اصلا سالوني ليه في السودان
كمشت وشي وقلت ليه سوداني دي ما كافية ياخ ومسحتها ببسمة كده لزوم اللياقة واللياقة .
قبل على صاحبو والكلام لي هسي انا بفتخر اني من قبيلة .... وصاحبي ده من قبيلة ....
اي زول بنكر قبيلتو ده معناه فيه عيب وكشحها بزيت ايماني وربنا قال ( انا خلقناكم شعوبا وقبائل لتعارفوا...)
غلبني الجواب ورضيت بما يظن وقلت ليه الناس اللافة دي كلها بتشوفنا سودانيين بس يعني قصة قبيلتي وقبيلتك دي
ما عندها معنى ولزوم فش الغبينة قلت ليه شكلك ياحاج انت من زمن اتحاد الدولة ما رجعت البلد
سؤال القبيلة عشان تبني عليه معرفة زول عيب ياخ
|
Post: #2
Title: Re: كده عيب ياخ
Author: الجنيد حمد
Date: 07-20-2016, 06:03 PM
Parent: #1
شخصية اخرى في موقف اخر ولحسن الحظ تواصلت علاقاتنا حتى تاريخه
وكلما اذكره بما حدث يضحك ويقول انا مرات حشري والله
...........................
لم يكن بيننا سابق معرفة دخل الى مكان العمل بغرض تخليص بعض الاجراءات
ما شاء الله المنطقة عمرت تصدق شارع العين ده زمان كان تراب ساي
في سري قلت ده زول زي صاحبي بتاع تاسيس الدولة الزمان داك
ولزوم اتخارج منو سريع لولحت راسي .
ليك كم سنة هنا ياولد
ولد نمشيها ... لي سنة
ظاهر عليك . البلد دي طيبة وناسها طيبين بس مد حبل الصبر السودانيين ضيقين
ان شاء الله
نحنا رسلنا نميري الله يرحمه وبعدها ثبتونا هنا وكل اولادي اتولدوا هنا
بتي الكبيرة اتخرجت واتزوجت واخوها عرس قبل شهر والله اتخرج بجاي عقدت ليه طوالي على بت اخوي
و عند اخر بت دي بتقراء في جامعة .......
ما شاء الله ربنا يحفظهم
الله يخليك اها انت ان شاء الله متزوج
لا والله لسة
ليه ؟؟؟؟؟؟؟؟
ربك ما سهل
يازول ماف حاجة اسمها كدي ربنا ده بسهل ليك بس انت ما جادي
في سري ياجماعة دي وقعة شنو دي الزول ده قراء معاي ولا قريبي وانا ما عارف
ضحكت وقلت ليه الزواج ده على قول حبوباتنا قسمة اها متى ما ربك قسم بنخش
يازول ده كلام فارغ تتوكل وتعرس بس وتبطل النظريات ووووووو
طوالي جاني رد تاديبي قلت ليه ياحاج طيب بما انك مهتم بزواجي كدي
انا داير بتك البتقراء في الجامعة دي وما عندي مانع تواصل قرايتها
والعقد الجمعة الجاية طبعا ده بعد تشاور العروس
بتي انا ثم اخد قطعة وتمتمة طويلة كدي هي لكن هي ما صغيرة لسة
وقبل ما ارد خمش اوراقه وطلع من غير وداع
................................
ياخ الاسئلة الخاصة دي عيب والله
مالك ومال الزول معرس ولا لا خليك في حالك
|
Post: #3
Title: Re: كده عيب ياخ
Author: Mirghani Taitawi
Date: 07-20-2016, 06:06 PM
Parent: #2
| Quote: سؤال القبيلة عشان تبني عليه معرفة زول عيب ياخ |
فعلاً.
|
Post: #4
Title: Re: كده عيب ياخ
Author: الجنيد حمد
Date: 07-20-2016, 06:22 PM
Parent: #3
طبيعتنا كسودانيين اتساع العلاقات والزيارات وان لم نجتمع على قدح عصيدة
اجتمعنا في عشرة وست (رغم اني كيشة وبتسيك وانا مسمي مربوطة لكن برضو بحرس الطربيزة اول زول )
مضت السنين وكثر الاخوان والمعارف في بلاد الغربة وكانوا خير انيس
نجتمع كل خميس في بيت العزابة او القهوة او المطعم وكل يتصل بصديقه
تبدأ الجلسة باربعة وتنتهي بعشرة او اكثر لم يكن بينهم سابق معرفة ولكنهم بعد قيم الوست
او حجر الشيشة اصبحوا اقارب .
ذات موقف مشابه لما سبقه وما لحقه زارنا صديق يعمل في مكتب استشارات هندسية
ولسؤ حظه كان بيننا من هم فوق الاربعين (ديل ياهم نفس النسخة الفي السودان البتغسل ليه بالابريق ويشبكك
ات ود منو يافالح بتقراء في سنة كم . مالك ما حالق شعرك )
دخل صديقنا وقال
السلام عليكم ياشباب
وعليكم السلام (لبيع الضهر ده لازم طبعا )
اخونا فلان وده فلان وفلان وفلان وعمنا فلان ودكتور فلان (طبعا في ناس لو ما رقعتوا باللقب ده بزعل شديد )
ويبدأ الاستجواب
معظم الشباب لا يسالونك من وين في البلد او قبيلتك شنو او قريت شنو
كل البهمهم ساكن وين عشان تربع الكشتينة لو قريب منهم
اما اعمامنا ديل بعصروك عصر التقول مقدم للكلية الحربية
زيارة ولا اقامة
اقامة والله
انت درست شنو
هندسة
هندسة مدنية ولا معمار (التقول ماف قسم غيرهم)
معمار
ياتو جامعة
الخرطوم
طبعا لو مدنية فرصك هنا كتيرة ( ولو قال مدنية بقولوا ليه لو معمار فرصك كبيرة تغيير في التاء فقط )
شغال في ياتو شركة
والله في مكتب استشارات في دبي
قدمت من هناك ولا بعد جيت هنا
قدمت عن طريق قريبي شغال في نفس المكتب
طبعا الاسئلة الفوق دي كلها وفي اول لقاء ما ليها معنى
نجي للسؤال الكارثة
اها بدوك كم
..........................................
يعني داير تقاسموا مثلا ولا لو راتبوا ضعيف حتقوم تديه حاجة شهرية
سؤال الراتب ده عيب كبير ياخ
|
Post: #5
Title: Re: كده عيب ياخ
Author: الجنيد حمد
Date: 07-20-2016, 06:27 PM
Parent: #4
الحبيب الفاضل ميرغني تيتاوي
اسعد الله ايامك بكل خير
ناس الخليج عموم لو منهم فائدة واحدة بس بتكون ياها قصة توحيد السودانيين في الغربة
شرق او غرب او جنوب او شمال بختوك في كلمة زول بس
الزولات زينين
الزولات والنعم فيه
الزولات ما عليهم زود
يعني قصة انا اصلي وانت تقليد ما منها فائدة حتى في السودان الناس اتجاوزتها ( على المستوى الشعبي اقلاها )
وده ما بنفي حدوثها لكن بقت محصورة بشكل كبيرة لكن للاسف (بعض ناس الحرس القديم بحاول يبعثوها من جديد )
|
|