ناس الافراج المؤقت .. نصيحة هامة جدا .. بدون مقابل

06:39 AM Dec, 28 2015

سودانيز اون لاين
ابوحراز-
مكتبتى
رابط مختصر

أصبروا شوية على النصيحة .. لكن لماذا قلت بدون مقابل ؟؟؟

زرت اقارب لي باحد احياء الخرطوم
طرقت الباب .. يبدو انهم رحلوا حيث يسكنون بالايجار
اقرب تصرف ان اطرق على باب جيرانهم
خرج لي جارهم وقال لي انهم رحلوا وليس ببعيد من هنا
طلبت منه ان يوصف لي المنزل
لكن الرجل اصر على ان يوصلني { طبعاً شهامة لمن تصل حد العوارة } !!!
وماهي رمشة عين الا ونجد انفسنا امام منزلهم
فطرق الباب هو
واتت قريبتي
واصر صاحبنا ان يرجع
بينما اصريت ان ارجعه واعود للمنزل
فحلف الرجل بالطلاق ان يمشي كداري لان البيت قريب
وحينما هممت بوداعه قال لي
جيب ياعمك { 20 الف } !!!

قال ياعمك قال
تقول انا مواليد الحرب العالمية الثانية !!!

اسالكم بالله
كل من ينوي الذهاب افراج مؤقت ان يحافظ على امواله
ودم قلبه
وما اعنيه هنا ما صرفه من مبالغ على السيارة
فهناك مشكلة كبيرة الاحظها في كل مرة اذهب فيها السودان
هذه المشكلة يقع فيها الكثير من اصحاب سيارات الافراج
ولا ادري هل هي عن جهل بالقوانين
ام ان بعضهم يتعمد ذلك ؟؟؟؟

،
،
،
سلام أبو حراز ولعلك طيب

جئت جاري وعاضي جلابيتي وتوشك
لان هذا الشهر لي فيه نفقه مستمره

الناس في السودان اتغيرت كثير وقل ان يخدمك احد بدون مقابل
وأصبحت الصورة مقلوبه تماماً

اتفق معك في ان ينتبه اصحاب الإفراج المؤقت لتعاملهم مع الناس هناك في
السودان والله لي سنتين ونص كل يوم احس بان السطور تزيد
وكل يوم فاطي سطر جديد

قول يا لطيف
،
،
،
،
،
،

Quote: سلام أبو حراز ولعلك طيبجئت جاري وعاضي جلابيتي وتوشكلان هذا الشهر لي فيه نفقه مستمرهالناس في السودان اتغيرت كثير وقل ان يخدمك احد بدون مقابلوأصبحت الصورة مقلوبه تماماًاتفق معك في ان ينتبه اصحاب الإفراج المؤقت لتعاملهم مع الناس هناك فيالسودان والله لي سنتين ونص كل يوم احس بان السطور تزيدوكل يوم فاطي سطر جديد

تحياتي أخي بشير حسن بشير يبدو انك من زبائن الافراج المؤقت ما الاحظه ان الاجراءات في كل عام تكون أكثر تعقيدا من العام السابق والمدهش هذه المرة أن اجراءات المغادرة كانت اكثر صعوبة أكثر من 8 ساعات انهاء اجراءات للعودة للسعودية وطاقم الباخرة المصرية سيء جدا ويتعامل بطريقة سيئة جدا مع الركاب غرفة بالباخرة تحوي سريرين اما ان تدفع 100 ريال لكل سريراو تدفع 500 الف جنيه سوداني ولايسلمونك مفتاح الغرفة الا بعد ساعة من دفع المبلغ مما يؤدي الى تكدس اصحاب الغرف بجوار غرفة الاستقبال والمؤسف بعد ان يقوم بتسليمك مفتاح الغرفة يطلب بقشيش !!!
الطريف في الأمر انه يجلس معك في نفي الغرفة على كرسي
وما اعنيه هنا طالب البقشيش
يسبق ذلك مقدمة باسهاب عن ان الشعب السوداني طيب جدا
ومن ثم وجه سؤاله لمرافقي وقال له انت من الخرطوم
ومرافقي كان لامع بينما كنت انا اغبش
واجابه على الفور .. ايوة من الخرطوم { 3 }
وتوجه لي عارضا نفس السؤال
فقلت له : { انا من الضهاري }
تصوروا قال لأول مرة يسمع بهذه المدينة في السودان
كان مفروض الواحد يتعاور معه أكثر
ويقول ليهو انا من { الضهاري اللفة } !!!

حينما تستلم سيارتك من الباخرة
وتذهب بها الى التفتيش
تكون السيارة بدون اي اوراق
هي بالطبع قد أخذت مسبقا
حيث ان هناك مخلصين لاداعي لهم اساسا
فهم يعقدون الشغل اكثر مما يجعلونه سهلا
ولكن ليس امامك الا الخضوع للمخلص
ومن ثم البحث عنه
فهم يتشابهون كالأرانب
وحينما تكون واقفا في انتظار دورك للدخول لجهاز التفتيش
ياتيك احدهم
وحينما يذكر لك اسمك كاملا
حينها لابد ان تعرف ان ها هو صاحبك الذي سينهي اوراقك
اجمل ما فيهم انهم يبتسمون
لكن هذه الابتسامة ستتحول الى مأساة ان لم تتفق معهم منذ البداية
ومهما اوتيت من قوة وكاريزما ودبلوماسية لتعرف قيمة التخليص
فلن يعطيك اجابة نهائيا
بل سيقول لك { بالنية }
وهذه النية ستكون نية السواد !!!!

انتبهوا جيداً ...
المخلص بعد ان ياخذ اوراقك
ياتيك مرة أخرى ليسالك هذا السؤال الغريب
وفي كل المرات التي سافرت فيها يتم سؤالي
السؤال هو : كم قيمة السيارة ؟؟؟؟؟؟؟

كان معي توسان 2015 { اقساط الراجحي }
اخذت قسط من بنك الراجحي وتوووووووووش على المعرض
سالني المخلص عن قيمة السيارة
لأنه على ضوء القيمة سيتم تحديد قيمة التامين لمدة شهرين او شهر
تفاجأ المخلص حينما قلت له ان سعر السيارة يترواح ما بين { 360 الى 400 مليون } !!!
وكان في كل مرة ياتيني ويقول لي
التامين ح يطلع كتير جدا
قلت له انا الذي ادفع المبلغ وليس انت

طلع التامين مبلغ { مليون وسبعمائة وسبعون الف } لمدة شهر واحد
ولا ادري كيفية حساب القيمة
اي قيمة التأمين من القيمة الحقيقية للسيارة
في حاجات كده في الايصال مابتكون واضحة


بعد ذلك ذهبنا لعمل الاجراء الأخير
وهو تصريح المرور
كان يقف امامي سبعة اشخاص افراج بالطبع كلهم
سياراتهم 2016 واثنان منهم 2015
حينما قرات قيمة التامين وجدتها كالتالي
بعضهم 700 الف فقط
والبعض الآخر مليون
وحينما سالتهم وجدت احدهم قد كتب قيمة السيارة 2016 بمبلغ 80 مليون
وآخر كاتب 120 مليون
وهكذا
وهذا شيء مؤسف ان يتصرف صاحب سيارة قيمتها فوق الأربعمائة مليون
ليكتب سعرها 80 مليون
لأجل ان يخفض قيمة التأمين
وحيتما هذا الشخص يقف بكل احاسيسه مع شركات التأمين
بينما لاقدر الله لو حدث مكروه للسيارة فسوف يواجه مشكلة كبيرة جداً
والطريق وما ادراك ما الطريق ما بين هيا عطبرة
حجارة في الطريق
بقايا كفرات
حمير تتبرطع بكل مزاج
والمدهش ان تجد احدهم محكر وقاعد في نصف الطريق 00 آآآآي والله !!!!

كل ما اتمناه من أخوتي الذين يذهبون افراج مؤقت ان يكتبوا القيمة الحقيقية للسيارة
اي القيمة السوقية لها
لاتكتب سعر السيارة بالسعودية وتنس الجمارك
اكتب القيمة كاملة
فهذا سيكون مفيدا لك لو حصل اي شيء لاقدر الله للسيارة
وساعطيكم بعض الأمثلة لاحقا باذن الله
ولكن لو كانت سيارتك قيمتها مليار اكتب مليار
حتى لو ارتفعت القيمة التأمينية التي ستدفعها في سواكن
فلن تندم مطلقا على ذلك
بل ستندم شركة التأمين لأنك [قمت بالتامين عن طريقهم /red]

أول مشكلة قابلتني
بعد وصولي السودان والمكوث 15 يوما كنت على طريق مدني الخرطوم
اسير وراء قلاب مكشوف
والمسافة التي بيني وبينه تسع شاحنتين من الحجم العائلي
توقف القلاب فجأة وكان محملا بالصخور
سقط احدها
تناثر جزء منه على زجاج السيارة
وعلى الرغم من قوة الضربة فقد تاثر الزجاج لكنه لم ينكسر { الزجاج اصلي }
والأدهى ان هناك حجرا آخر سقط
وأحدث احتكاك في علبة العادم
{ وكما نقول بالدارجي { انطفقت } !!!!
اما سائق القلاب فقد واصل سيره وكأن شيئاً لم يكن
وقفت على يمين الطريق
واخرجت الحجر من الطريق
ثم ادخلت يدي في درج السيارة لأنني لا اعرف اسم شركة التأمين
وقد ركزت في الايصال على قراءة المبلغ
ويبدو لي انها شركة واحدة محتكرة هذا العمل من شركة المهاجر
لأنني حينما قرات الاسم كان هو نفس اسم الشركة في زيارتي السابقة

لحسن الحظ كان للشركة فرع بالحصاحيصا ورقم هاتف
اتصلت عليهم فاخبروني انهم بجوار المرور
وحينما قابلتهم وشرحت ماحدث قالوا انهم هنا ليس لهم صلاحية التعويض
انما التعويض يتم في الشركة الأم بالخرطوم
وهذا يتطلب فتح بلاغ بالشرطة
ومن ثم مراجعة الشركة

البلاغ عند وكيل النيابة سالني سؤال
اين وقع الحادث رغم ان الاجابة بالعريضة
لكن لم يحيرني السؤال بقدر ما حيرني سؤاله الثاني بعد اجابتي
فحينما قلت له بطريق مدني الخرطوم قريب من تقاطع السكة حديد بالحصاحيصا
قال لي : قول { والله } !!!!! ي
عني احتمال لو اسهبنا في الشرح كان قال لي { قول علي بالطلاق } !!!!
المهم من وكيل النيابة الى الشرطة
وكان امامي اكثر من 30 شخص ينتظرون التحري
المتحري واحد مواليد الحرب العالمية الثانية
واحيانا يدخل له عساكر بملفات ويخرجون ولاتعرف ماذا يدور
وانا انتظر دوري وفي كل مرة ياتي احد معارفي ويسلم ويقول كفارة يازول
طبعا ماشاء الله الجرائم عجيبة
شيء حمل
وشيء زنا
وشيء سرقات
واسطوانات غاز مفقودة من ستات الشاي
وشيء شتائم
والمدهش معي في الصف صحفيين منصوب عليهم من شركات الاتصال الوهمية
ناس حول لي رصيد ..
احدهم غضب مني حينما طلبت منه ان يكون شجاعا ويذهب لتسليم البطاقة الصحفية لاتحاد الصحفيين
فهذا الشخص مناط به توعية الآخرين من الوقوع في مثل هذه الجرائم
واذا به يقع هو في نفس الفخ !!!!!

أكثر من ساعتين امضيتها بالشرطة
حتى وصلنا المرحلة الأخيرة وهي تسديد رسوم فتح البلاغ
فإذا بهم يطلبون من الجميع التوجه لبنك الادخار لتسديد المبلغ هناك
واضح ان برنامج التحصيل الالكتروني لم يتم تفعيله
اما في بنك الادخار فالصفوف كانت طويلة
ولكن استلمنا الايصال
ولم يكن الدوام قد انتهى
ومن ثم استلمت بلاغ الحادث
وتوجهت في اليوم التالي الى الخرطوم لمراجعة شركة التأمين
مع العلم انه قد تبقى اقل من 12 يوم على انتهاء وثيقة التأمين
واي تاخير ربما يتسبب في مشكلة اخرى [/URL]

متابعة للسرد الجميل ...
كسرة ...الظروف الاقتصادية في السودان اصبحت صعبة والانسان السوداني ليس ملاكا فلابد ان يتغير ليعيش ..
الناس لاتعطي القيمة الحقيقية للسيارة لانهم لايثقون في التعويض من التامين ..الموضوع كلو بطلع كسور وبواقي وفي كل الاحوال ومهما كان الحادث لن تحصل علي تعويض مجزي ........

فعلا ..الخوف من عدم التعويض وفي تجارب كتيرة
يعني حصلت حوادث ولما طالبوا شركة التأمين ...لا حياة لمن تنادى والموضوع طول لغاية الإجارة خلصت ومافي قروش اندفعت

تجربتي يا هندسة ... تدفع أقل حاجة كتأمين عشان تتخارج من الديناصورات ديل



تحياتي

`في اليوم التالي كنت اول زبون يصل الى شركة التأمين
ومعي كل الأوراق حتى { قسيمة الزواج } !!!
لكن مشكلة على { قول توفيق عيسى مكي } زول الضهاري !!!
وصلت الثامنة الا ربع ولم يكن بجوار الشركة الا ستات الشاي
وبائع كركدي متجول ولكن ذو طعم ونكهة لامثيل لها
وبالطبع بتاعين الأورنيش
ومن ثم بائع الجرائد
وكل هؤلاء يشكلون لوحة جميلة جدا
تجعلك تنتظر ريثما تفتح الشركة
وكنت اول من يقدم اوراق اعتماده
لكن الطريف طلبوا مني تصوير الأوراق
ولو عرفتم اين يتم تصوير الأوراق لأصابتكم الدهشة !!!!!!

حينما سالت احدهم يجلس على رصيف مجاور للشركة
سالته ان يدلني على مكان لتصوير اوراقي
فاذا به يشير الى مبنى قريب طالبا مني ان ادلف للداخل لتصوير الأوراق
قرات اللوحة المكتوبة باللغتين
وشعرت كان الموضوع عبارة عن كاميرا خفية
فاللوحة تخص سفارة دولة افريقية
توكلت على الحي الذي لايموت
وقلت لو واجهتني مشكلة ساستخدم بطاقتي الصحفية
لزوم تكسير الثلج
وسالني موظف الاستقبال عن وجهتي
وحيث لم تكن لي اي وجهة غير التصوير
ذكرت له على استحياء انني اريد ان اصور بعض الأوراق
فقام احدهم وذهبت وراءه
ودخلنا مكتب رسمي
وصورنا الأوراق
وسالته من مبلغ التصوير وقال لي 4 جنيه
وكان معي خمسة جنيهات وبالطبع لم تكن معه فكة
واصر ان يذهب لست الشاي ليعطيني الجنيه
فرفضت واخذت اوراقي وانا مصاب بالدهشة
تذكرت لحظتها القنصلية الأمريكية بجدة وكيف انه من المستحيل ان ترى ما بداخلها
فهي يحيطيها سور اعتى من سور الصين العظيم
وقلت لو وجدت متسعا من الوقت سادخل للملحق الثقافي لأناقش معه الموضوع
واطلب منه ان تكون للسفارة هيبتها ..
بالله عليكم الله دي ما قلة شغلة مني وضياع الزمن
يازول صور اوراقك واتخارج وامشي
بلا ثقافي بلا زراعي !!!!

ماشاء الله عليك يا ابوحراز

سرد قصصي رائع، تأخذنا من مدن لمدن وتدلف بنا لحوارات شيقة، ترسم صور من الواقع المُعاش وتميل بنا على ستات الشاي وبتاعين الورنيش وتلهب ذاكرتنا وعواطفنا

لك التحية

في انتظار البقية...

بتاع محكمة الحصاحيصا حرق روحي عشان كونو قاليكم تسددو من بنك الادخار
في اللول حنيت عليك لكن تاني ما حنيت عليك لمن اذكرتك ماشي بالعربية
عشان نحن العروب ديل لمن اقوليك امش سدد في البنك داير ليك ضحوة كاملة عشان تصل البنك في عضمو
وتجيهو صاد بكرة طلعت الشمش
.
.
احتفظ لك بصورة نمطية من نسج خيالي بعيدة كل البعد من انك تكون حتى راكب في التندة
تقوم تقول لي تايسون وما تيسون فقد جهجهت نسج خيالي مرة واحدة
.
.
قال داير استلم التعويض قال
وَنٍس

Quote: بتاع محكمة الحصاحيصا حرق روحي عشان كونو قاليكم تسددو من بنك الادخار في اللول حنيت عليك لكن تاني ما حنيت عليك لمن اذكرتك ماشي بالعربية عشان نحن العروب ديل لمن اقوليك امش سدد في البنك داير ليك ضحوة كاملة عشان تصل البنك في عضمو وتجيهو صاد بكرة طلعت الشمش . . احتفظ لك بصورة نمطية من نسج خيالي بعيدة كل البعد من انك تكون حتى راكب في التندة تقوم تقول لي تايسون وما تيسون فقد جهجهت نسج خيالي مرة واحدة . . قال داير استلم التعويض قال وَنٍس

كيف حالك ود البوش
بيدوك ورقة فيها المبلغ ويقولوا ليك امشي بيها البنك
قلة شغلة مني قلبت الورقة من الجهة التانية والله قعدت اضحك ونسيت مشكلتي ذاتا
مكتوب فبها : وصية هنادي
كريم اللؤلؤ
قرفة
كيسين حنة التاج
باكنغ بودر
واشياء أخرى لاتصلح للنشر
ركبوا معاي جماعة ومشينا كلنا البنك
لكن الناس المشت بي كرعيها لم بكملوا اجراءاتهم في نفس اليوم

طبعا عمك ابوحراز عامل فيها بتاع تخطيط ونظريات ؟؟ ماصدقنا ادارتنا وافقت على قروض من الراجحي
وتسمع الجماعة يقولوا ليك اشتري سيارة
وبيعها في السودان
بتربح ليها اقل شيء 50 الى 60 مليون
ومشكلة تخطيطنا كثيرا ما يكون مضروبا في جهة ما

اول ما وصلت عرضناها للبيع
لكن ست النفر واولادها قالوا الا يركبوا فيها ويستمتعوا ان شاء الله لمدة اسبوعين
وطبعا ماشاء الله الناس كلها تتكلم { عثمان } معاهو عربية جميلة

في حين ان سيارة الافراج المؤقت دي ماسووورة كبيرة
فالناس يرونك انك راكب سيارة
لكن والله انت لاتركب سيارتك
بل تركب سيارة الحكومة
لأن 80% من قيمة السيارة ليست لك
بل لإدارة الجمارك
فكل الذين يريدون شراء السيارة يطلبون منك ان تجمركها اولا
ومن ثم يشترون
وهم عليك امان الله لامغتربين ولايحزنون
ناس بيع برسيم وبصل وطلح ونعاج

تصور الجمارك 219 مليون بدون حق المخلص لتصل الى 231 مليون
في حين ان سعرها كان 68 الف ريال سعودي
وكانت تساوي 170 مليون
وهنا ليس امامك الا الرجوع بها وبيعها بالسعودية بخسارة ايضا
لكن افادتنا كثيرا في الاجازة ..
واتمنى ان يتقبل الله ذلك فلم نترك مريضا ولا حامل ولا محتاج الا واوصلناه الى جهته
واذكر من الطرائف انني وجدت شفع صغار بتاعين اورنيش يقفون عند مدخل كبري الفتيحاب
ومن جهة بنك السودان
وقفت لهم وقدر ماحاولت ان يركبوا كانوا مترددين
ونزلت من السيارة وداعبتهم وركبوا معي حتى محطة سراج
حيث كانوا يعملون في تلكم المواقع
والله تطور الأمر وتحول الى صداقة
وادركت حينها اننا يمكن ان نقضي على ازمة المواصلات
ليس بتخطيط ودراسات معقدة وحوارات وتوصيات ومؤتمرات وتاصيل
بل ان يحمل كل صاحب سيارة شخصين ليس الا

Quote: ماشاء الله عليك يا ابوحراز سرد قصصي رائع، تأخذنا من مدن لمدن وتدلف بنا لحوارات شيقة، ترسم صور من الواقع المُعاش وتميل بنا على ستات الشاي وبتاعين الورنيش وتلهب ذاكرتنا وعواطفنا لك التحية في انتظار البقية...

آخي Mutaz Diab

شكرا لك على هذا الثناء الذي لا استحقه
وفي نفس الوقت كم يسعد الانسان حينما يشعر بان حروفه المتواضعة قد لامست اوتار الآخرين
وطرقت على ايقونات الاحساس
اللوحة لاتكون جميلة الا اذا كانت مليئة بفسيفساء الألوان
لهذا تجدني احاول قدر الامكان ان اجعل هناك تناسقا ما بين الألوان ومساحة اللوحة
والانتقال من المدن للقرى
والدخول في الأسواق
والاقتراب من الشارع والناس اكثر
كل ذلك يخلق نكهة وطعم للكتابة

بالشركة مجموعة بنات جميلات ماشاء الله
تمنيت ان لاتخرج اي واحدة منهن معي لكتابة التقرير
خاصة وانا قادم للتو من { السعودية الضكر }
أو السعودية بنين كما يحلو للبعض الآخر !!
وبالتالي ممكن تغمز ليك
وحينها ح تنسى التوسان وكوريا الجنوبية وكوريا النووية
وتشيلك الهاشمية
وتحلف بالطلاق وتقول ليها
علي بالطلاق التصليح تخلوهو علينا !!!!

وذلك على طريقة الحلاق المصري بالطائف
والذي سلمته راسي للحلاقة
وكل الونسة كانت عن النيل والزراعة والسودانيين ناس طيبين
وحينما انتهى وقال لي نعيماً
أخرجت له عشرة ريالات فاقع لونها تسر الناظرين
طوالي قال : ما تخليها علينا يا ابن النيل !!!
طوالي ارجعت القروش في جيبي
ولم اعطيه اي فرصة ليتنفس وخرجت
وسمعته يقول { دا انت خربت بيتنا } !!


واحمد الله فقد تحققت أمنيتي
خرج معي مهندس خريج معهد الكليات التكنولوجية في الستينات
زول قديم وخبرة
قلت الحمد لله دا زولي
نظر وبدقة للزجاج
لم يترك شاردة ولا واردة الا وسجلها
ونبهته للأختام التي على الزجاج حتى لايعطوني زجاج من بوركينا فاسو
فقال لي لقد سجلت الرقم المتسلسل للزجاج ونوعه
قام بتسجيل حتى الخدوش
ومن ثم تم رفع السيارة لرؤية علبة العادم وكتب تقريره عنها
طبعا توقعت التعويض ح يتم مباشرة بعد التقرير ولكن ........
كما انني وعدت ناس البيت بخروف كامل الددسم بعد التعويض
وتوقعت ان يكون المبلغ ما بين 3 الى 4 مليون !!!!

أبو حراز

شكرا للتنوير
والحكي الجميل

في الحقيقة لم أمر بتجربة الإفراج المؤقت رغم تفكيري الدائم فيها
لكن كل مرة أسمع فيها قصص وحكاوي ... أصرف النظر
لكن نصائحك تستحق المذاكرة

واصل السرد الجميل


في انتظار التعويض

بعد انتهاء التقرير دخلت مع المهندس لمبنى الشركة
فوجئت بتوزيع الببسي والشوكولاتة داخل مبنى الشركة
اخد الموظفين رزق بمولود
لا اخفي عليكم
وحتى تلين قلوب موظفي شركة التأمين
وبغض النظر عن اي حسابات ومعادلات علمية ونسب مئوية
بدأت ادعو في الشيوخ
بان يكون مبلغ التعويض كبير
بدأت بالشيخ ابوحشيش القلب { العرقي } عيش
مرورا بفكي كابو
وحتى فكي الجكسي المحايتو ببسي !!!!
لكن أحد الموظفين قطع تفكيري حينما تم استدعائي

طلبوا مني الذهاب للمنطقة الصناعية لاحضار ثلاث تسعيرات من محلات مختلفة
ومنذ الثالثة وحتى السادسة مساء لم اتحصل على التسعيرة
فكل اصحاب المحلات يقولون انهم لايعرفون سعر علبة العادم
ولا حتى الزجاج الأصلي
ومن ثم راجعت الشركة في اليوم التالي واخبرتهم بالحاصل
وقلت لهم هل بامكاني احضار تسعيرة من الوكيل
ولم اكن اعرف الوكيل
وافقوا على طلبي وزودوني بخطاب لشركة حافظ البربري
واستلمت الخطاب
ومع السرعة لم اسالهم اين تقع الشركة
لأنني سبق وان رايتها بجوار شرطة مكافحة التهريب بسباق الخيل
وحينما وصلت الشركة قالوا لي ان التسعيرة ليست هنا
بل تذهب الى مقر الشركة في بحري
وهي بجوار شركة { سين للغلال }

حينما تدخل لشركة حافظ البربري ..
تشعر وكأنك داخل لشركة الناغي { وكيل هونداي بالسعودية }
بل لا ابالغ اذا قلت ان الترتيب بالشركة السودانية والتنظيم يفوق مالمسته في الناغي
الواجهة نسائية بحته
التعامل راقي جداً
الشركة خليط ما بين السودانيين والأجانب
المهندسين صغار في السن
ولكنهم بكفاءة عالية
القهوة مجاااااان بالشركة
والشاي مجااااان
وكذلك تصفح الجرائد
وشاشة تلفزيونية دسمة مع صالة انتظار ريثما ياتي دورك
والسيارة ياخذونها الى داخل الورشة ليتم الفحص عليها
وبعد الفحص السريري يتم اعطاؤك التقرير
التقرير ليس مجانا بالطبع
تدفع 150 الف جنيه قابلة للإسترداد في حال قمت باصلاح السيارة عندهم

أحب أن أنوه الى أن التسعيرة الصادرة من الوكيل لاتلتزم بها شركة التأمين
اي ان التسعيرة لو كانت مثلا خمسة مليون
فإن شركة التأمين لديها خصومات

لكنني لاحظت كم الدهشة الصادرة من مهنس البربري
وكم الدهشة الصادرة من وجوه مهندسي شركة التأمين
كلهم كانوا متفقين على ان حالتي لم تمر عليهم كثيرا
وقد اقر لي احد موظفي شركة التأمين بذلك
وذكر لي ان 99% من سيارات الافراج المؤقت لاتاتي بقيمتها الحقيقية
مما يدل على ان المبلغ المحدد للسيارة الخاصة بي قد اربكهم

استلمت التسعيرة من مهندس شركة البربري
هل تعلمون كم كانت ؟؟؟؟ اثنا عشر مليون وتسعمائة الف جنيه
وحينما سلمتها للشركة قالوا لي ان مبلغ السيارة عالي
وعلي ان اراجعهم بعد اسبوع

وبعد اسبوع استلمت شيك التعويض
وكان بقيمة تسعة مليون وسبعمائة الف جنيه !!!!!!!!!!!!!!!!!!

يا الله استلمت القروش مالك . استلامك للقروش أنهت القصة وكنا عايزنك تواصل ويكون استلام القروش في الإجازة القادمة

Quote: يا الله استلمت القروش مالك . استلامك للقروش أنهت القصة وكنا عايزنك تواصل ويكون استلام القروش في الإجازة القادمة

تحياتي نهار
القروش تم استلامها بعد معاناة
ولديهم حساب في بنك اسمه { بنك الشمال الاسلامي
والله حينما دخلته لأول مرة افتكرت اني ضليت الطريق ودخلت الجااااااااااااااااااااااااااااااامع
اول مرة ادخل بنك في السودان ويكون مافيه نسوان !!!!
قلت ليهم المرة الجاية الواحد لو عاوز يفتح حساب عندكم
لازم يجيكم مغتسل وعلى وضوء !!!

[URL] واصل السرد الجميل


في انتظار التعويض[/URL]

لك تحياتي أخي ذواليد سليمان مصطفى
وشكرا لمشاعرك الرقيقة
يبدو لي ان التعويض هو { الجميل }
وقد غلب التعويض السرد 8 صفر

Quote: أبو حراز شكرا للتنوير والحكي الجميل في الحقيقة لم أمر بتجربة الإفراج المؤقت رغم تفكيري الدائم فيها لكن كل مرة أسمع فيها قصص وحكاوي ... أصرف النظر لكن نصائحك تستحق المذاكرة

تحياتي أخي جعفر
حاول ذااااكر ولكن بشروط
الافراج المؤقت غير مجدي اذا كانت اجازتك شهر واحد
وكلما كانت الاجازة من شهرين الى ثلاثة اشهر أكيد بتستفيد
وذلك مع الوضع في الاعتبار ان السفر في كل الأحوال يكلفك 4 الف ريال بالسيارة
سواءا كانت اجازتك شهر
او اربعة اشهر

ثاني شيء اذا كان لديك سيارة بالسودان فلا انصحك بالمذاكرة نهائيا
الأشخاص الذين يسافرون افراج ولديهم عفش كتير
ولا اعني هنا الملابس والملايات
بل الذين شرعوا في بناء منازل لهم
بامكانهم اخذ كل ما يتعلق بالكهرباء والسباكة

Quote: فعلا ..الخوف من عدم التعويض وفي تجارب كتيرة يعني حصلت حوادث ولما طالبوا شركة التأمين ...لا حياة لمن تنادى والموضوع طول لغاية الإجارة خلصت ومافي قروش اندفعت تجربتي يا هندسة ... تدفع أقل حاجة كتأمين عشان تتخارج من الديناصورات ديل تحياتي

تحياتي اخي ادريس البدري
غايتو انا ماعارف عدم التعويض
لكن الأمور مشت معاي كويس جداً
يمكن تختلف شركات التأمين
لكن ما لاحظته ان شركة التامين الخاصة بالمغتربين واحدة لم تتغير منذ فترة
شخصيا افضل الدفع بالقيمة الحقيقية للسيارة
حتى يمكنني ان اطالب بكل ما اريد

الديناصورات تجدها في السودان في كل المواقع
لكن يبدو لي ان التحصيل الالكتروني قد قلل منها الى حد ما
والله مشيت لتجديد الرخصة كرهت اليوم الذي ذهبت به
ذهبت وفي جيبي الرخصة القديمة والرقم الوطني
والله رجعت وجيوبي كلها اوراق وايصالات
شيء فحص عيون
وشيء فحص { ضهر }
وأكاديمية مرور
ورسوم تجديد
وايصالات هبطرش

أكاديمية المرور دي طبعا حاجة تانية خالص
التوعية المرورية ضرورية جدا
لكن لايسمح لك بدخول المحاضرة الا بعد ان تدفع الرسوم
ولو عملت فيها شاااااااااااااااطر ولم تدخل المحاضرة فلن تكمل اجراءات التجديد

قلنا نعيد ايام المحاضرات ودخلنا تقريبا الساعة 11
برضو ماشاء الله كلهم { رجااااااااااااااااااااااال } تقول نحن في صيوان بكاء
عمكم او محدثكم ابوحراز قعد في الكنبة الأمامية
والله خلفي سواق تاكسي تقول عمره 79 سنة ولابس نضارة سميكة ومربوطة بي حبل
ومما شفتو قلت ليهم دا لو في كباية قدامو بدقشها !!!

المحاضر احضر فلاش وعلى شاشة عملاقة بدا فيلم خاص بالحوادث المرورية
وتركنا لمدة عشر دقائق هي مدة الفيلم
ومن ثم دخل ليسالنا عن راينا 00 والجميع قالوا تمام لأنهم يريدون ان يتخارجو
انا الفيلم لم يعجبني نهائيا لأن الطرق في الفيلم ليست لنا
الشاحنات المتصادمة ليست لنا
التخطيط على الطرق واشارات المرور ولون السائقين { وعيونهم الخدر } والبيئة النظيفة كلها ماحقتنا
بعدين اغلب اسباب الاصطدام كانت نتيجة التزحلق على الجليد
ونحن { الثلج } حتى في رمضان ماكان متوفر عندنا

قلت للمحاضر فيلمك ماااااااااااااااااسورة كبيرة
يا اخوي عندك ركشات
عندك دفارات
عندك لواري ترااااااب
عندك بقرة قاطعة الشارع
عندك قلابات فيات ماشة مشتحة في الشارع

الجماعة طبعا ماتوا بالضحك بما فيهم المحاضر
وتم تغيير الفيلم
بعد شوية نشوف ليك دفااااار طاير وركشة قاطعة الشارع بالعرض
عليك امان الله الركشة اتقسمت على اتنين لكن الجماعة نطو منها
قلت للمحاضر كده نحن ح نستفيد فهؤلاء ناسنا !!!

Quote: متابعة للسرد الجميل ... كسرة ...الظروف الاقتصادية في السودان اصبحت صعبة والانسان السوداني ليس ملاكا فلابد ان يتغير ليعيش .. الناس لاتعطي القيمة الحقيقية للسيارة لانهم لايثقون في التعويض من التامين ..الموضوع كلو بطلع كسور وبواقي وفي كل الاحوال ومهما كان الحادث لن تحصل علي تعويض مجزي ........

تحياتي Mohd Ibrahim
وشكرا كاملة الدسم لرفع المعنويات
وثناءك على سردي المتواضع
والواحد أحياناً يتملكه الخوف بان يكون اسلوبه غير محبب
لأنني شخصيا حينما أكتب فإنني اعتبر نفسي ليس صاحب النص
انما القاريء هو الكاتب الثاني لـ { النص }
كما أنني أخرج كثيرا عن { النص }
وأمارس اسلوب التفحيط في الكتابة
لأنني اكره ان اقوقع نفسي في شرنقة واحدة
لهذا تجدني انقلك فجأة من كرسي وثير على طائرة ايرباص
الى اقاصي الضهاري لتركب كارو حماار وانت مرتاح البال

نرجع لموضوع الافراج وكما قلت بالفعل يتخوف الناس
ولكن يبدو لي ان الشيوخ قد نجدونا وافزعونا
فهذا ماحدث معي
واخذت التعويض كاملا
وحينما قارنته بما دفعته لشركة التأمين اتضح لي انني الرابح
الموضوع يحتاج الى متابعة وشوية صبر
والكارثة الكبرى أننا لانعرف حقوقنا جيدا
لهذا نضيع وسط الزحمة
وتضيع حقوقنا
وآمالنا وأحلامنا !!!

سرد جميل

تحياتي لكل المشاركين في هذا البوست { الضكر } !!!
والله الواحد لو ما يخاف الكضب يقول دا ماسودانيز اون لاين
بس كأنك في المنطقة الصناعية
وللا جامعة ام درمان الاسلامية !!!
ياكافي البلاء ولا { مرة } حايمة في البوست مافي
لا ناس الاسكيرت والبلوزة وفير آند لفلي
ولا المشلخات
ولا حتى ناس { لواري الترااااب } !!!
شكرا لإثراء البوست
فمشاركتهم منحته الوصفة السرية
وجعلت له الف معنى ومعنى
ساعود باذن الله للرد عليكم 00 وللقصة بقية
لكن القروش هي بطل الفيلم !!!!

Quote: وللقصة بقية لكن القروش هي بطل الفيلم !!!!

كدا يا داب القصة بدت وحلت للدعس
تعال ورينا بالتفصيل الممل شعورك وانت تستلم الشيك هل كنت تترقط ول قلبت الهوبة
وأيضا كذلك شعور ست النفر مهم جدا
وكيف صرفتها قرش قرش وتعريفة تعريفة
والفات دا كلو مناظر ساكت
وهنا البداية او مربط الفرس او كما قال الراوي سيادتي آنساتس سادتي
فانكم موعودون بالفيلم العربجي الكبير
ليلة القبض على الملايين والعشاء شعيرية ولقيمات
انه ابوحراز حيث لايمل ولا تقدر تفط حرف واحد
ابوحراز المحارب الجكس
ابوحراز الثانوية بنين
ابوحراز يا جدي الشيخ يوسف ابوشرا

Quote: فوجئت بتوزيع الببسي والشوكولاتة داخل مبنى الشركة احد الموظفين رزق بمولود

أكثر ما يعجبني ويدخل السرور الى نفسي عند عودتي للسودان ..
أن الناس يتكاثرون وبسرعة
دون ادنى اهتمام للأحوال الاقتصادية والاجتماعية
وبالكاد لاتمر بشارع او زقاق في قرية
الا وتقابلك إمراة حااااااااااااامل
وأكثر الزبائن في العيادات
هم زوار النساء والتوليد
والغريب هؤلاء الرجال حينما تراهم وهم راجعون من عملهم الرابعة عصرا
وكل واحد صار وشو ومادي بوزو
تجزم بأن اي احد منهم حينما ياتي المساء سوف يحرد ويقبل على الحيطة
ولكن اتضح لي المغشوشين والله نحن المغتربين

تعافر مرات 7 سنوات عشان تجيب ليك شافع !!!
وياويلك لو جيت اجازة شهرين ...
شهر كامل فواتح ومستشفيات
مرات لو صحيت نص الليل بس عاوز تطقطق ظهرك
فجأة 6 شفع يصحو من النوم
نحن كنا زمان ننوم في الديوان
وحتى في ايامن الأولى مما يمسحوك المغرب تاني ماتصحى الا الصباح
بعدين ياويلك لو فتحت معاك المدام موضوع { عدة وملايات } بعد الساعة 11 بالليل
فليس امامك اي اجابات سوى آآآآآآي وحاضر ونعم
لأنك لو ضللت الطريق
وكانت الاجابات بالرفض في هذا الليل البهيم
فسيتم قطع الموية والنور من سعادتكم
ولو قبلت المدام على الحيطة
والله تاني ناس المطافيء ما يحلوك منها
قال ملايات قال !!! ملايات نص الليل ؟؟؟؟



هجمة مرتدة
أحد معارفي متزوج سنة 1986 ومغترب معنا بالسعودية بنين
ومعه واحد مشاركه في الحواشة تزوج معه في نفس العام
صاحبنا بتاع السعودية عنده ولد وبنت
طبعا كل اجازة ماشين الدكتور
شيء التهابات
وشيء قناة فالوب
وشيء بروستاتا
وشييء مبايض !!!
هسي المدام عمرها 49 سنة وعمك اصبح منتهي الصلاحية بسبب موية التحلية !!!!
اها زولنا بتاع الحواشة عنده { 11 } ماشاء الله !!!!

قال { فالوب } قال !!!!

Quote: أن الناس يتكاثرون وبسرعة دون ادنى اهتمام للأحوال الاقتصادية والاجتماعية وبالكاد لاتمر بشارع او زقاق في قرية الا وتقابلك إمراة حااااااااااااامل

علاقة الفقر بالتكاثر علاقة طردية
عشان كونو مافي رفاهية الا العيتنوبة دي وقلبان الهوبة من غيبة الشمش
وحكمة الله الناس ديل الكمدة بالرمدة وزرعتم ما بتقع واطا
اها انجهن
قال بروستاتا قال
ولا سمعوا بيها ذاتو
قت لي قبضت كم ؟
تلقاكم شبعتو في الشعيرية والباسطة

Quote: تحياتي لكل المشاركين في هذا البوست { الضكر } !!! والله الواحد لو ما يخاف الكضب يقول دا ماسودانيز اون لاين بس كأنك في المنطقة الصناعية وللا جامعة ام درمان الاسلامية !!! ياكافي البلاء ولا { مرة } حايمة في البوست مافي لا ناس الاسكيرت والبلوزة وفير آند لفلي ولا المشلخات ولا حتى ناس { لواري الترااااب } !!! شكرا لإثراء البوست فمشاركتهم منحته الوصفة السرية وجعلت له الف معنى ومعنى ساعود باذن الله للرد عليكم 00 وللقصة بقية لكن القروش هي بطل الفيلم !!!!

ابوحراز سلام
المفترع كلو بوليس وحوادث ومنطقه صناعيه بعد دا عايز البلوم اجيك مبااااااااااااالغة

Quote: ابوحراز سلام المفترع كلو بوليس وحوادث ومنطقه صناعيه بعد دا عايز البلوم اجيك مبااااااااااااالغة

تحياتي اخي عباس وكيف هم اهل الدسيس عساهم بخير
يقال أن الشوارع التي ترفل فيها النساء غالبا ماتكون مستوية ولاتحتاج الى سفلتة
عشان كده دايما ماتجد شوارع المنطقة الصناعية مكسرة

ولم اندم على قرار في حياتي الا حينما اشتريت مجموعة من البناطلين والأقمصة الفخمة
لزوم { الكشخة } كما يقول السعوديون
وذلك حينما كنت ذاهبا لأول مرة لكلية الزراعة
خاصة وان الجكس في زمننا كان من الصعوبة بمكان
ولهذا يحتاج الى المزيد من المحفزات { ومن ضمن ذلك المظهر }

وأذكر أنني وصلت الحادية عشر صباحا
وقابلني بالقرب من البوابة ثلاثة رجال ملتحين
وحينما رايتهم قادمون نحوي توقعت انني ضللت الطريق
ودخلت بالخطأ لكلية { أصول الدين }
فرجعت لأقرأ اللوحة مرة أخرى لأجدها كلية الزراعة والموارد الطبيعية !!!!!
سلمت عليهم وسالتهم هل هذه كلية الزراعة ؟؟
فردوا بالايجاب وقال لي احدهم وبنبرة صوت عالية : تقدم بضع خطوات وستجد مباني الكلية
لأتفاجأ بان الكلية كلها { جمع مذكر سالم } !!!!!!!
أما البنات فهن قلة ويعملن بمعامل الكلية
قال { كشخة قال } !!!!

Quote: علاقة الفقر بالتكاثر علاقة طردية عشان كونو مافي رفاهية الا العيتنوبة دي وقلبان الهوبة من غيبة الشمش وحكمة الله الناس ديل الكمدة بالرمدة وزرعتم ما بتقع واطا اها انجهن قال بروستاتا قال ولا سمعوا بيها ذاتو قت لي قبضت كم ؟ تلقاكم شبعتو في الشعيرية والباسطة

أخي ود البوش تحياتي
الواحد مرات بيكون في كاب الجداد
فجأة يلقى نفسه في { أم ضريوة }

هسي بالله الشغلانية من افراج مؤقت وشعيرية وشيكات تامين
شوف مشت لولادة الشفع !!!!

بالاضافة الى العلاقة الطردية ما بين الفقر والتكاثر
فمن مشاهداتي ان الاستقرار له دور كبير في التكاثر
وخاصة الاستقرار النفسي
المغترب يكون { مخلوع } منذ حضوره وحتى عودته
فهو دائم التفكير في حياة السودان وكذلك كيفية العودة للعمل
وما بين هذا وذاك يضيع عشرات الأطفال الذين كان من المفترض ان يروا النور

آباؤنا كانوا أكثر حظاً في الحياة الزوجية
فوالدي واعمامي وجدودي لم يغتربوا
ولم اراهم مرة واحدة وقد باتوا خارج البيت

لدي احد الأعمام منذ اربعين سنة لاتنام زوجته الا بعد ان ياتي المنزل
لو ذهب الى مناسبة عزاء خارج القرية وتاخر فهي تنتظره مستيقظة
هسي عليك امان الله انت جايي من النادي الساعة 9 مساء
اول شيء تسمعو وانت داخل { الشخير } !!!

Quote: كدا يا داب القصة بدت وحلت للدعس تعال ورينا بالتفصيل الممل شعورك وانت تستلم الشيك هل كنت تترقط ول قلبت الهوبة وأيضا كذلك شعور ست النفر مهم جدا وكيف صرفتها قرش قرش وتعريفة تعريفة والفات دا كلو مناظر ساكت وهنا البداية او مربط الفرس او كما قال الراوي سيادتي آنساتس سادتي فانكم موعودون بالفيلم العربجي الكبير ليلة القبض على الملايين والعشاء شعيرية ولقيمات انه ابوحراز حيث لايمل ولا تقدر تفط حرف واحد ابوحراز المحارب الجكس ابوحراز الثانوية بنين ابوحراز يا جدي الشيخ يوسف ابوشرا

عارف يا ود البوش كنت اتمنى ان تكون تسعيرة البربري مغلقة
لأنني حينما رأيت المبلغ والله لم اصدق
وانا راجع من بحري الى الفتيحاب رحت من الشارع 3 مرات
الا ان اوقفت احدهم وكان حبشي له 37 سنة بالسودان
ركب معي ومسكني الطريق

قال شعيرية قال .. الجماعة في البيت ارتفع سقف طموحاتهم
وقالوا مادام الشيك بالطريقة دي الا اسوقهم الخرطوم
وننزل في شقة يومين ونرفه شوية كيتاً على توفيق عيسى مكي
وقلنا للمهندسين جووك اهل العوض
كمان جاء معانا ود اخت ست النفر { من اهل بلة } النيل الأبيض طبعا
الشفع كالعادة مشوا الحدائق
وكيتا على الدنيا دي اخذت ست النفر
ومشينا اجمل محل لبيع الايسكريم في بحري
ماشاء الله ناس الفير آند لفلي هبطرش
واسكيرتات وبلوزات حايمات بس مما تشوف الا تقرا الصلاة على النبي
في الكرسي الجمبنا عمك من مواليد سنة الجمكسين
ومعاه بت زي الصيدة
طوالي ست النفر قالت : سجمي .. عليك الله شوف الراجل المابخجل دا
دي نهائي ما بتكون مرتو
قلت ليها الناس القاعدين هنا ديل كلهن ديل ما نسوانم الا انتي !!
انتي من الله خلقك شفت ليك راجل سوداني عاقل سايق مرتو عشان تاكل ىيسكريم ؟؟ !!
قالت : قسما عظما تاني ما اخليك تجي الخرطوم براااااك
كراعي مع كراعك
قلت ليها والله تكتري كلامك
تاني بس اوديك مطاعم صالحة والكلاكلة اللفة !!

قال سجمي قال !!

Quote: سرد جميل

بل .. أنت الأجمل
انا لم اقدم شيء سواء المواد الخام
واتى القراء من بعدي ليشكلوا البوست ليصل الى هذه الصورة
فتغيرت نكهته وطعمه ولونه
شكرا لك ولكل من مر من هنا

ابو حراز ... سلام ..

يااخ انتاا حكاااي خلاث ( يعني نضمك سنين )
حسي شوف انتا ضيعت كم يوم من اجازتك .. تمشي وتجي .. وجرجره ..
مش كان احسن ليك تستأجر عربية هناك ... وتريح راسك ؟؟ ولو حسبتها بتكون اوفر ليك ...
انا مره من زات المراريط .. نزلت بسيارة كرت .. ومسكت طريق بورسودان القضارف ..
وقبل القضارف بشويه .. طلعت لي غنماية من وسط الاشجار ...
وكنت مسرع ومافي اي طريقة ازوغ منها ..
وللاسف دقشتها .. ومشيت .. قلت لو قفت العرب ديل بكتلوني ..
( هي زاتااا ما جاتاا حاجه قامت تاني جرت )
طبعا لا اشتغلت بشركة تامين ولا يحزنون .. عشان عارف التلتله حقتهم ..
وكانت التلفيات بسيطه .. مجرد خفجه خفيفة في الصدام الامامي ..

تحياتي ,,

أسلوبك جميل ومشوق
انت ذاتك تستاهل
البوديك بي عربية إفراج مؤقت ممكن يؤجر لك عربية هناك .. وجلداً مو جلدك تجر فوقا الشوك ..
الحمد لله ما نزلت بي عربية ولا عندي نية
ومعتمد على كرعي في المشاوير والمواصلات
المرة دي واحد من أهلي أداني هايلوكس قعد معاي أسبوعين كدي

لكن الملاحظة بتاعة الزول الوصلك وقال لك جيب 20 جنيه دي مرا بي موقف أكثر طرافة
مشيت البحر داير لي صارقيل .. حد ما فتشت ما لقيت
سألت شباب كدي قاعدين تحت شجرة
قالوا لي أمش الجدول داك بتلقى فيهو صارقيل
فعلا مشيت وجيت
لمان جيت ماري بي جنبهم قت ليهم شكراً يا شباب
واحد فيهم قال لي يا عمك .. أدينا حق الفطور .. الصارقيل دا نحن مربينو

تحياتي للجميع
وكل عام وانتم بخير بمناسبة اعياد.الاستقلال
وكم نتمنى ان نشهد الاستقلال الحقيقي
والمتمثل في توفير قفة الملاح للمواطن البسيط
وتوفير المدارس للذين يدرسون في العراء
وان نرى هذا الشعب المكافح يعيش في امن واستقرار

مرحبا ابوحراز وضيوفك الكرام
سرد قصصي ممتع
الحمدلله على سلامتك
إجراءات الإفراج المؤقت ما زالت متعبة وليس فيها جانب تشجيعي ،
التأمين سابقا كان إجباري لمدة عام تقريبا أو ستة أشهر دون إعتبار لمدة الإجازة،
أتمنى أن تكون هنالك سياسات جديدة للإفراج المؤقت لصالح الوطن والمواطن القادم بسيارته لأهله ووطنه،
وأن يكون التأمين إختياري وغير محتكر وتقدمه عدة شركات مختلفة ،
وأن يتم تنفيذ جميع المعاملات بصورة فردية ذاتية دون الحاجة للموظفين والأفراد الذين يوهموك بأنهم يقومون بخدمتك ومساعدتك وعيونهم في جيبك ،

والأهم من ذلك أن يكون لنا ناقل وطني بحري يمتلك سفن صالحة للإستخدام البشري لتساهم في اقتصادنا الوطني .

وللجميع تحياتي

شركة المهاجر هي الوحيده التي يمكن أن تستخرج منها الـtrip ticket أو تقوم بتأمين سيارتك لديها لو جايي من برة
وطبعا شركة كيزانيه بحته

Quote: بو أحمد أبو أحمد · جامعة السودان للعلوم والتكنولوجيا انتو يا ناس الضهاري، قايلين الجداد براهو البودي الكوشة، دحين يوم علموكم السواقة في الوانيتات (البرنسات) ماقلولكم لا تباري الشاحنة ولا تخلي الشاحنة تباريك، وما قالولكم ما تباروا التكاسي. _______________________________ واحد ضهاري

هذه مشاركة قيمة من ضهاري الفيس بوك
شكرا احمد أبوأحمد على المشاركة
بالله انت من زمن البرينسات .. زمان واحد قريبنا كان مركب فيها جهاز فرامل
وبيصدر صوت زي صوت الدجاج
اها عندنا واحد بحب تربية الدجاج
ومهووس بيها
عمك السواق بقول ليهو الرينسة دي مليانة جداد
ولو وقع منها اي شيء ليك
وبقوم يشغل ليهو الجهاز
وصاحبنا يجري لحدت مانفسه ينقطع
وفي النهاية السواق يقول ليهو { خم وصر }

عارف ياعمك انا حافلة ماقاعد امشي وراها
والفيات { البمشي مشتح } في الشارع ماقاعد امشي وراهو
واي سواق تاكسي تلقاهو لابس نظارة سميكة ورابطها بي حبل وماسك اقصى اليسار
ماقاعد امشي لا وراهو
ولا بجواره
وهنا في السعودية في { حرمة } عجوز بتسوق سيارة
انا مما اشوفها بفك ليها الشارع
لنها بتقطع الاشارات وبتعكس الشارع
ولو في بتاع مرور اتكلم معاها يبقى في الطريقة التخارجو

ابو حراز اخوى سيد الحكى الطاعم

كل عام وانت وست النفر والجهال بخير وتامين ولامين ان شاء الله

عارف اول مرة ندخل تجربة الافراج المؤقت

العربية فورد اكسبيديشن قديمة لكن ريحتنا من الايجار

اسع كايسين طريقة نحللها ونخليها معانا فى امسودان على قول اخونا كبر

انده لينا شيوخك ياب حراز يشوفوا لينا طريقة تحلل ولا شن رايك آخوى

تحياتى

Quote: بو حراز اخوى سيد الحكى الطاعم كل عام وانت وست النفر والجهال بخير وتامين ولامين ان شاء الله عارف اول مرة ندخل تجربة الافراج المؤقت العربية فورد اكسبيديشن قديمة لكن ريحتنا من الايجار اسع كايسين طريقة نحللها ونخليها معانا فى امسودان على قول اخونا كبر انده لينا شيوخك ياب حراز يشوفوا لينا طريقة تحلل ولا شن رايك آخوى تحياتى

تحياتي لك دكتورة مهيرة
وتحياتي لأسرتك الكريمة
ست النفر والأبناء جميعهم بخير وعافية
وانا سعيد بان تكوني اول المشاركات من قدامى المحاربات في سودانيز اون لاين
تراجي الله يحفظها كانت تشارك كثيرا في بوستاتي
ولكنها مشغولة بالحوار .. تحياتنا لها من على البعد
واتمنى لها حياة سعيدة وموفقة في وطنها وبين اهلها ومحبيها

اكيد تجربة الافراج المؤقت رغم ما بها من معاناة
لكن بها الكثير من المتعة
بل سرعان ما تتحول حبات العرق الى بلورات من اللؤلؤ حينما تعانق الأهل !!!

حسب ما اعرف فمن الصعب ان تتركي السيارة بالسودان ان كانت من الموديلات القديمة
فالجمارك للموديلات المتقدمة
بعد ذلك الا خروج نهائي مسموح خمس موديلات فقط
والسيارة الخاصة بكم امريكية
واذا كانت جيب ستكون جماركها كثيرة جدا
وكما ذكرت سابقا فان احدهم اتى خروج نهائي
ومعه هونداي آكسنت موديل 2011 دفع جمارك اربعة وتسعون مليون
في حين ان قيمة السيارة هنا بالسعودية..
تتراوح ما بين 16 الف الى 18 الف ريال

اخونا ابو حراز والاخوة المتدخلين ..
سلام وتحياتي ليكم جميعا ..

والله حكي طاعم ونضمي سمح ..
ياخي انا لي يومين ازازي بي هنا اشوفك كاتب شنو ، اقراهو واضحك براي ..
عليك الله ما توقف حكي ..

احكي ياخ احكي ، لا اسكت الله لك حساً ..

شكراً أبو حراز على السرد الشيق والأسلوب السهل الممتع

Quote: تفاجأ المخلص حينما قلت له ان سعر السيارة يترواح ما بين { 360 الى 400 مليون } !!!

وأنا كمان إتفاجأت بالسعر لأنو دا سعر عربية مدفوعة الجمارك
فالمفروض شركة التأمين تؤمن على العربة بسعرها في الخارج فقط لأنو بالطريقة دي شركة التأمين هي الخاسرة

Quote: شكراً أبو حراز على السرد الشيق والأسلوب السهل الممتع Quote: تفاجأ المخلص حينما قلت له ان سعر السيارة يترواح ما بين { 360 الى 400 مليون } !!! وأنا كمان إتفاجأت بالسعر لأنو دا سعر عربية مدفوعة الجمارك فالمفروض شركة التأمين تؤمن على العربة بسعرها في الخارج فقط لأنو بالطريقة دي شركة التأمين هي الخاسرة

تحياتي اخي سفيان قريضة
وشكرا لك على ثنائك على السرد المتواضع
وكم يتمنى المرء حينما يكتب ان تلامس كلماته الآخرين

ملاحظتك في مكانها
وكنت اتوقع ان يرجع المخلص ويخبرني بان الشركة رفضت التامين على السيارة بهذا المبلغ
مما يدل على عدم وجود آلية علمية للتعامل في مثل هذه الظروف
بل كتبوا المبلغ 360 مليون
وعلى ضوئه تم اخذ النسبة المقررة للتامين
ويبدو لي ان المحصلين لقيمة التامين في سواكن ليس لديهم خلفية علمية كافية عن التأمين
والا لماذا اقتنعوا بالمبلغ وهو { اي المبلغ } يشمل قيمة الجمارك
لهذا حينما راجعت الشركة نفسها فرع الحصاحيصا كانوا مستغربين في القيمة
وكذلك اندهش فرع الشركة بمدني
والاندهاش الأكبر كان بالمقر الرئيسي للشركة

لكن ربما هذا البوست والمداخلات الثرة للأخوة هنا قد تدفع شركة التأمين الى ضوابط جديدة
وهذه الضوابط بالطبع لن تكون في صالح المؤمن له !!!!

Quote: خونا ابو حراز والاخوة المتدخلين .. سلام وتحياتي ليكم جميعا .. والله حكي طاعم ونضمي سمح .. ياخي انا لي يومين ازازي بي هنا اشوفك كاتب شنو ، اقراهو واضحك براي .. عليك الله ما توقف حكي .. احكي ياخ احكي ، لا اسكت الله لك حساً

تحاتي أخي هشام عبادي
بالمناسبة ابني البكر اسمه { هشام } طالب بكلية الطب
وتسميته فيها الكثير من الدكتاتورية
حيث ان والدته كان لها راي آخر في الاسم
بينما اخترت الاسم هشام
ولكن في النهاية احتكمنا للديمقراطية
وكتبت قصة قصيرة نشرتها مجلة الشرق الأوسط تسمى { زوج ديمقراطي جدا }
كما كتبت قصة اخرى عن هشام نشرت في نهاية التسعينات بعنوان { الرحلة الماسية }

اشكرك كتير على اعجابك بسردي المتواضع
فكثيرا ما احب ان انقل صورة الشارع العادي
صورة البساطة والايقاع اليومي لبيتي واهلي واصدقائي ووطني
التحية لك ولكل القراء الذين مروا من هنا

Quote: شركة المهاجر هي الوحيده التي يمكن أن تستخرج منها الـtrip ticket أو تقوم بتأمين سيارتك لديها لو جايي من برة وطبعا شركة كيزانيه بحته

تحياتي اخي عمر
فعلا شركة المهاجر هي المسئولة عن سيارات الافراج
لكن يبدو لي ان شركة التامين التي قامت بتامين سياراتنا متعاقدة مع شركة المهاجر
طبعا وجود اكثر من شركة يوجد الكثير من المنافسة
وبالتالي تقديم خدمة راقية وباسعار مقبولة

Quote: مرحبا ابوحراز وضيوفك الكرام سرد قصصي ممتع الحمدلله على سلامتك إجراءات الإفراج المؤقت ما زالت متعبة وليس فيها جانب تشجيعي ، التأمين سابقا كان إجباري لمدة عام تقريبا أو ستة أشهر دون إعتبار لمدة الإجازة، أتمنى أن تكون هنالك سياسات جديدة للإفراج المؤقت لصالح الوطن والمواطن القادم بسيارته لأهله ووطنه، وأن يكون التأمين إختياري وغير محتكر وتقدمه عدة شركات مختلفة ، وأن يتم تنفيذ جميع المعاملات بصورة فردية ذاتية دون الحاجة للموظفين والأفراد الذين يوهموك بأنهم يقومون بخدمتك ومساعدتك وعيونهم في جيبك ، والأهم من ذلك أن يكون لنا ناقل وطني بحري يمتلك سفن صالحة للإستخدام البشري لتساهم في اقتصادنا الوطني . وللجميع تحياتي

تحياتي اخي صلاخ احمد وشكرا لمشاعرك النقية
كل ما ذكرته صحيح .. اجراءات الافراج المؤقت معقدة جدا
بل في كل مرة تكون اكثر تعقيدا من ذي قبل
الفقرة الخاصة بالتامين الان قد تغيرت
فالتامين لايتم لمدة عام وهو ليس تامين اجباري
بل تامين شامل
احيانا حسب الرغبة فان طلبت شهرين يمنحوك شهرين
وكثيرون يدفعون تامين لمدة شهر واحد ومن ثم يعمل تامين اجباري مدته سنة
وهو بمبلغ 115 الف فقط يعني في حدود 50 ريال في العام
التامين السنوي الشامل للتوسان بمبلغ 9 مليون يتم تقسيطها كما ذكروا على ثلاث دفعات
سياسات جديدة دي عاوزة ليها { سجارة بنقو اصلية } خاصة ان كانت متعلقة بمصلحة المغترب
فمعظم السياسات هي في الضد
كذلك انهاء جميع المعاملات بصورة فردية لن يتم بسهولة الا اذا تم خصخصة الميناء
وتسليمه لشركة اجنبية
رغم هذا وذاك بعض المغتربين يكملون اجراءاتهم عبر نوافذ خلفية
وجميع الضباط يعلمون ذلك


هجمة مرتدة
وصلنا في رمضان العاشرة مساءا
وانا ادرك جيدا ان الاجراءات لن تنتهي الا الخامسة او السابعة صباحا
اول شيء فعلته قفلت السيارة وركبت تاكسي ومشيت السوق للعشاء تقريبا كانت الساعة 11 مساءا
زحمة في المطاعم لاتتصورها
تسال بتاع المطعم في عشاء ؟؟ يقول ليك العشاء رااااااااااااااااااقد لكن عيش مافي !!!!!!
كان الحصول على { عيشة } اشبه بالحصول على الجرين كارد !!!!
وبعد معاناة تحصلت على عيشة بطريقة غير مباشرة
وحينما اخذت العيشة وجدت الشية انتهت ولكن تبقى الفول
على كل حال كنت افضل كثيرا من الذين اتوا معي
وبالطبع اصبحوا جالدين رمضااااااان !!!!

Quote: أسلوبك جميل ومشوق انت ذاتك تستاهل البوديك بي عربية إفراج مؤقت ممكن يؤجر لك عربية هناك .. وجلداً مو جلدك تجر فوقا الشوك .. الحمد لله ما نزلت بي عربية ولا عندي نية ومعتمد على كرعي في المشاوير والمواصلات المرة دي واحد من أهلي أداني هايلوكس قعد معاي أسبوعين كدي لكن الملاحظة بتاعة الزول الوصلك وقال لك جيب 20 جنيه دي مرا بي موقف أكثر طرافة مشيت البحر داير لي صارقيل .. حد ما فتشت ما لقيت سألت شباب كدي قاعدين تحت شجرة قالوا لي أمش الجدول داك بتلقى فيهو صارقيل فعلا مشيت وجيت لمان جيت ماري بي جنبهم قت ليهم شكراً يا شباب واحد فيهم قال لي يا عمك .. أدينا حق الفطور .. الصارقيل دا نحن مربينو

تــحــياتي أخي بدر الدين .. وشكرا عميقا لرفع المعنويات
بعيدا عن الافراج
والتأجير والمشي الكداري
اعجبني كثيرا { سماسرة } الصارقيل

وأذكر في احدى البوستات الطريفة هنا في سودانيز اون لاين ..
تحدثت في هذا البوست عن أسوأ ثلاث وظائف في العالم
وكانت به مشاركات كثيرة وتجارب ثرة
من ضمنها ان احدهم كما قال يعمل بهولندا بمسلخ دواجن
وكانت وظيفته ان يقول { الله أكبر } كلما مر المقص لقطع رقبة الدجاجة
وذلك في محاولة من الهولنديين على ان يكون الذبح على الطريقة الاسلامية
والذي نشاهده الآن في بث مباشر
لكن ليس مع الدجاج والحمام وطيور السمان
بل مع البشر والأطفال والنساء
حتى أنني مازحته قائلا : ايهما تقصد { الله أكبر الجديدة أم الله أكبر القديمة }
الله أكبر الجديدة طبعا هي تبع الانقاذيين !!!
والذين يقولونها حتى لو أتوا لافتتاح مجرى ماء من داخل الحوش الى الشارع

لكن الأطرف من صاحبنا بتاع الله اكبر صديق آخر من امريكا
وقال ان وظيفته هي { قبض الصارقيل } !!!!
وذكر انه يبيعه بالكيلو
لكن لمن يبيع الصارقيل ؟؟؟ لشركات المكياج والمساحيق
ومن يومها انتهى عندي ذلك اللغز العجيب عن سر رائحة المساحيق
فكنت كلما اقترب من الأدوات الخاصة للمدام القى ريحتها سمك سمك !!!

طيب انت قاعد تعمل شنو بالصارقيل
ماتقول لي بتبيعو لي ناس { فير آند لفلي } ؟؟؟ !!!!

Quote: ابو حراز ... سلام .. يااخ انتاا حكاااي خلاث ( يعني نضمك سنين ) حسي شوف انتا ضيعت كم يوم من اجازتك .. تمشي وتجي .. وجرجره .. مش كان احسن ليك تستأجر عربية هناك ... وتريح راسك ؟؟ ولو حسبتها بتكون اوفر ليك ... انا مره من زات المراريط .. نزلت بسيارة كرت .. ومسكت طريق بورسودان القضارف .. وقبل القضارف بشويه .. طلعت لي غنماية من وسط الاشجار ... وكنت مسرع ومافي اي طريقة ازوغ منها .. وللاسف دقشتها .. ومشيت .. قلت لو قفت العرب ديل بكتلوني .. ( هي زاتااا ما جاتاا حاجه قامت تاني جرت ) طبعا لا اشتغلت بشركة تامين ولا يحزنون .. عشان عارف التلتله حقتهم .. وكانت التلفيات بسيطه .. مجرد خفجه خفيفة في الصدام الامامي .. تحياتي ,,

تحياتي مجيدو وشكرا كثيرا لرفع المعنويات
فعلا مشيت الخرطوم أكثر من 3 مرات
لكن اكثر مرحلة ازعجتني هي الوقوف في صفوف التحري
واذكر ان التي كانت تقف في الصف خلفي إمراة قاهرة
كانت تتحدث مع أحدهم بالتلفون بشتائم مقززة جدا
واثناء حديثها تصادف أن مر احد العساكر
فمسكته من يده وقالت له : تمشي وتجي فيني عامل فيها مابتعرفني
زولك نطط عيونه وكأنه صبت فيهو مطرة وكان معاه ملف قال ليها اوصل الملف وارجع ليك
تاني عليك أمان الله لحد الساعة 2 ماشفناه !!!!

الغنماية بتكون مخلوعة سااااي
لكن بعد فترة بتشعر بقوة الصدمة وبعد ذلك الغنماية مابتفرز التيس من الخروف

عندنا قريبنا برضو جاتو دقشة خفيفة جدا
الزول كان طبيعي وبعد 10 ساعات بدأ كلامه يتغير
وبقى يشوت ضفاري ويقول كلام بذيء جدا
مشينا المستشفى وتم الفحص عليه وقالوا في دم بسيط في الراس
وزولك ماشاء الله شغال كلام تقيل
بعد شوية دخلت دكتورة سبحان الله ماشاء الله { جمال مبالغة }
اها قلنا ليهو عرفت دي ؟؟
بكل بساطة رد لينا { دي حلوم مرتي } حلوم دي دلع حليمة !!!
وحليمة دي لو شفتها من شناتها تخت جلابيتك في خشمك وتقوم جاري صوووووووووف !!!!!
والله اوشكنا ان ندخل في غيبوبة من الضحك !!
وأكثر من ماااااات من الضحك حلوم نفسها !!
وردت عليه قائلة : هو انا لو بشبه دي بعرسك انت يا ابو القدح !!!!

هجمة مرتدة
عليكم الله ياجماعة من خلال هذا المشهد ..
بالله شوفوا بساطة هذا الشعب السوداني
وهذا الاندياح العجيب ما بين الرجل السوداني وزوجته حتى وهو في غيبوبة
وكيف اننا من اعماق الحزن والألم يصنع هذا الشعب النكتة البريئة ؟؟؟؟

ما شاء الله عليك يا ابو حراز
ياخ انت زول حكاي و حكي ليه نكهة خاصة
والحكي ذاته مع خفة دمه مفيد جدا ومرتب
لك التحية ولي ضيوفك

Quote: ما شاء الله عليك يا ابو حراز ياخ انت زول حكاي و حكي ليه نكهة خاصة والحكي ذاته مع خفة دمه مفيد جدا ومرتب لك التحية ولي ضيوفك

شكرا عميقا اخي درار
نبذل قصارى جهدنا بان يتم تفصيل الكلمات على مقاس الايقونة السودانية البسيطة
شكرا لهذا الاطراء الذي لا استحه
واتمنى ان يكون في حروفي ما يخرجكم ولو مؤقتا من عصب الحياة ومعاناتها

يا شاب ... اقعد محل غربتك وما تجي لو حتشيل حال الناس كدا

تحياتي العميقة أخي { Hani Arabi Mohamed }
أحترم رايك كثيرا واشكرك عليه
فربما رايك قد دق على مكامن معينة وايجابية دون ان انتبه لها في هذا البوست
ولك ولكل الشعب السوداني اعتذر بشدة إن كان في كلماتي مايمس الآخرين
واعتذر لكل قطعة في الوطن إن جرحت كلماتنا أو افسدت ولو ذرة من ترابه
صدقني :: أنا حاولت قدر استطاعتي ان اطرق على ايقونة الحياة العادية
والوقائع اليومية لحركة الناس
والعزف العادي للإنسان في اي مكان
حاولت ان انقل الصورة كما هي دون مونتاج
ودون اي اضافات
حتى مايحدث في بيتي
وحينما انتقد تصرف ما ابدأ بنفسي اولا
ومن ثم انطلق للآخرين
ربما هناك الكثير من النقاط السوداء التي نقلتها عدستي البسيطة
لكن كل هذه النقاط يمكن ان تتحول الى بقع وأودية من الضوء
وبعض النقاط اتطرق اليها في عجالة
وذلك حتى يشارك القاريء والجميع في حل المشكلة
فكل احد منا يعرف الزاوية المناسبة التي يمكن ان يوجه عدسته لها
ليس هناك اي اشياء في قلبي اقسم لك بالله غير حب الوطن وحب شعبي وأمتي
لكنني احاول قدر الامكان ان اعطي صورة كاراكتورية لأجل ان يتم علاج الخلل
ونمنح وطناً معافاً للأجيال القادمة
ومرة اخرى اعتذاري لكل من خدشته كلماتي
او عكرت صفوه

هجمة مرتدة

تواجدنا بالغربة لن يحقق لك حلمك الكبير وحلم الوطن الكبير وحلمنا الكبير
طالما أن حلمك : أن يعيش الكلّ سعيداً

.
.
بعض الاشراقات من { رحلة الافراج المؤقت } !!!!!
على الرغم من المعاناة والآلام التي تصاحب هذه الرحلة
خاصة اذا كانت في الأيام الأخيرة من رمضان
حيث تبدأ المعاناة من بعض وكالات السفر التي يديرها ابناء جلدتنا
فالكثير من الوهام والأكاذيب والوعود الزائفة تجدها منهم
واجمل لحظة صدق هي حينما يستقبلونك لأول مرة
وبعد استلام الجوازات
ورسوم الافراج والتذاكر
تبدأ بعدها دراما عجيبة جدا او ما يسمى بالتراجيديا والكوميديا السوداء
وكثيرا ماتؤدي هذه المماطلات الى تخلف بعض المسافرين بجدة
وبدلا من ان يكون العيد وسط الأهل والأقارب
تجبرك الظروف على العيد في كيلو { 8 }
او التسكع بين ازقة باب شريف الضيقة !!!!
خسارة مادية بالطبع
وخسارة معنوية ونفسية
وزوجة تنتظرك على احر من الجمر
واطفال تموت فرحتهم وتذهب الى مثواها الأخير !!!!
يتبع ..

Quote: amed Eisa Abaker · جامعة باتراس رحلة الافراج ممتعة خاصة لما تطلع من الميناء متجها نحو الخرطوم عبر الفيافي مع انو مافي لا محطات ولا خدمات -بس المتعة في انك داخل بيتك اقل ليك شيء يا استاذ ابو حراز سيجارتك قوية

أخونا محمد عيسى تحية وتقدير { مشاركة من ضهاري الفيس بوك }
فعلا ممتعة جدا
واجمل لحظات الاستمتاع حينما تجد نفسك وجها لوجه امام اسرتك
وتدخل في موقف صعب جدا
خاصة اذا اتاك اطفالك وام عيالك في وقت واحد
لاتدري ايهما تضم أولاً ؟؟؟؟

ضغوط الحياة ومعاناتها ولدت من الشعب السوداني اجمل النكات
لدرجة انك تتوقع ان كل الشعب مسطوووول
وليست سطلة عادية
بل سطلة من ذلك النوع الأصلي الحايز على شهادة الآيزو !!!!

حضرت محاكمة تعاطي احدهم للبنقو بمحكمة ام درمان جنوب في التسعينات
واحضر القاضي المعروضات وكانت عبارة عن قندول بنقو
ومن ثم تم احضار المتهم وتم عرض المعروضات عليه
فغضب كثيرا وكاد ان يحطم السياج والحاجز الموضوع داخله
واستنكر القاضي ذلك
وقال له لما تصرخ
دا انت
ودا البنقو بتاعك
فقال للقاضي : لايمكن ان تستفزني بهذه الطريقة
فانا اشرب بنقو منذ 30 عاما
ولكن لايمكن ان اشرب تفل شاي
فهذا النوع المعروض من البنقو ليس للمحترفين
استغرب القاضي وقال له : يعني دا ما البنقو حقك
فرد عليه : والله لو تديني معاه 100 مليون فلن ادخن مثل هذا البنقو
رفعت الجلسة
وبدأ تحقيق آخر
حيث اتضح ان بعض العساكر قد استبدلوا البنقو ذو الجودة العالية
بهذا النوع الرديء !!!!

اخونا ابو حراز
والله انتا زول جميل وحكاياتك دائما ما تخفف عنا رهق الغربة
ودائما ما تنقل لنا الصور الواقعية من خلال سردك اللطيف والممتع

وتجربتك دي اكيد فيها فايدة لكتير من الناس

سنة 2006 اتوكلت علي الله وركبت الشارع من الدوحة ( بعد تردد كتير اكتر من 10 سنوات ) لانه الاجازة طويلة وفيها بنيان ومناسبات ومعاي اتنين من رفقاء الدرب والامور مشت تمام لغاية ما نزلنا من الباخرة ومرينا بكل الاجراءات المعروفة كان العيد باقي ليهو 3 ايام

طلعنا من الميناء والتعب حاصل قلتا للرفاق نريح في الميناء والصباح رباح .ومعانا واحد من ناس ضهاري رفاعة هههههه راسو الف وسيفو الا نمشي طوالي عايز يلحقق البنطون المهم جبرنا بخاطرو واوكلنا وهم جاري قدامنا جري شديد المهم وصلنا قبل هيا بشوية وصاحبنا كان مخرم من تريلا النوع الطويل وفجاة تظهر ليهو عربية من الاتجاه المعاكس وبقي في نص المسافة وخاف من التريلا وبدون تفكير ضغط فرملة ويجي صاحبنا التالت من وراء يسلمو الضهرية في كتفه وبستر الله ولطفه ما جاتهم عوجة وربك لطف وتعال شوف الجرجرة والبوليس يجيك من هيا والضابط ما بجي الا الصباح عشان الضمانة ولازم تبيتو في الحراسة كله بسبب الشفقة

المهم اصحابي الاتنين قضو نص اجازتهم جارين وراء التامين والمنطقة الصناعية وضاعت احلام الاجازة

تاني ما كررت التجربة ولا مفكر وبعدين ناس السودان امورهم بقت طيبة عادي تمشي تتسلف منهم عربية لفترة الاجازة

.
.
أخي ابوبكر عباس علي
شكرا كتير ..
وكم يسعد الانسان حينما تلامس كلماته ايقونات وأكواد الغربة المعقدة
وتحيل الألم الى فرح
نعم .. نعيش الكثير من المعاناة هنا في الغربة
وهذا يتطلب أن نتلمس دروب الفرح حتى نقتل رهق الغربة


لاانصح نهائيا بالسفر ليلا في جميع الطرق الا للضرورة القصوى
بل حتى لو كان السفر نهارا
فالأفضل لو معك عائلة ان تسافر بالبص
هناك اسباب كثيرة بعدم اقتناعي بالسفر ليلا
* بعض اصحاب الشاحنات حينما يتعطلون يضعون حجارة خلف الشاحنة
وحينما يتم اصلاح الخلل يترك الحجاة في مكانها
وهي حجارة ضخمة كافية لانقلاب السيارة او تدميرها

لاتوجد اضاءة ولا عواكس ليلية بالطرق مما يؤدي احيانا الى الانحراف من الطريق

توجد مجاري بسبب الشاحنات وحمولتها خاصة في الاتجاه الأيمن المتجه للخرطوم
حيث ان 90% من الشاحنات المتجهة للخرطوم تكون حمولتها ثقيلة
واتمنى من مهندسي الطرق مراعاة ذلك في التصميم والأوزان

من الصعب ايجاد محطة بنزين تعمل بالليل وكذلك الخدمات الأخرى
مثل الأكل والبقالات والبناشر

هناك بقايا كفرات شاحنات كبيرة كثيرا ماتفاجئك في منتصف الطريق

وجود حيوانات سائبة تقطع الشارع في اي لحظة
ورغم انني اطلع الرابعة والنصف صباحا او بعد صلاة الفجر ورغم هذا قابلني رجل محكر في نصف الشارع
قاعد زهجااان

تقاطعات السكك الحديدية خطيرة جدا واحيانا لاترى اللوحة التحذيرية
لكل هذا لا انصح نهائيا بالسفر ليلا واتمنى ان تحافظوا على سلامتكم قدر الامكان
وتسافروا بعد صلاة الفجر مباشرة
وبعد وصولكم الى هيا ..
تذكروا تعبئة السيارة بالبنزين ودون تردد لعدم وجود محطة قريبة

من المفارقات العجيبة جدا
والتي قد تحدث للكثيرين
أنك يمكن ان تقطع التذكرة وتدفع قيمتها مع غرفة خاصة
ولكن حينما تاتي لاستقبال الباخرة تتفاجأ بان التذكرة لاتشمل غرفة
وهنا ماعليك الا ان تقطع تذكرة اخرى لحجز الغرفة

وقد حدث معي الموقف مرتين
فاصبحت اقطع من الوكالة تذكرة فقط
وحينما اركب على الباخرة احجز غرفة وان كانت الأخيرة غير مضمونة
حيث يتأسد ويتنمر ساعتها طاقم الباخرة
والذي سنفرد له مداخلة خاصة باذن الله

واذكر في احدى سفراتي والتي اعتبرها من السفرات المميزة جدا
كنا مجموعة حاجزين غرف من الوكالات
وحينما حضرنا تفاجأنا بعدم وجود غرف اصلا
وحيث اننا كنا عصبة
لهذا سيطرنا على مكتب الاستقبال ورفضنا مغادرته ريثما يتم حل المشكلة
وكان ذلك في نهاية رمضان
مما ادخل طاقم الباخرة في حرج شديد
ومن ثم ادخلونا لصالون كبير مكتوب عليه { القوات النظامية }
وهؤلاء أتوا عمرة وجميعهم بالشرطة ورتب عالية ومعهم عوائلهم
ويشهد الله ان هؤلاء الناس حينما يكونوا باللباس المدني تتملكهم كوميديا عجيبة جدا
ولديهم من النكات والمواقف مايجعلك لاتمل الرحلة نهائيا
والطريف أن نساؤهم كن يعملن السندوتشات لأطفالهم
ومن ثم سندوتشات اخرى للأطفال اصحاب الشوارب { رجالهم }
جميعهم كانوا جالدين رمضااااان !!!!
والمدهش ان النسوان جميعهن كن صائمااااات !!!!

وقد استمتعنا معهم بالرحلة وكذلك الخدمات المقدمة
ووصل الاستمتاع الى ذروته حينما وصلنا الى سواكن
فقد وجدنا سياراتهم تنتظرهم مع السائقين
ومن باب الباخرة الى باب الفندق مباشرة

جمعة سعيدة على الجميع
لا اجد راحة نهائيا ايام الجمعة والسبت رغم انهما اجازة رسمية
ولكن عملي مرتبط ببعض الشركات بجدة
والتي تعمل يوم السبت
لهذا كثيرا ما اكون على سفر يوم الجمعة
والرجوع مساء السبت باذن الله
والسفر مرهق بلا شك
وكثيرا حينما اخرج واتجه غربا اتخيل انني مسافر الى السودان
عل ذلك الحلم يخفف من وعثاء السفر
طريق الهدا الشاهق الارتفاع تتوارى عنه الشمس
وادخنة وضباب تاتيك مابين الحين والآخر
لتتشكل واحدة من اجمل اللوخات التي يراها الانسان على الطبيعة
ساعود باذن الله لاعطاء بعض النصائح والمواقف التي مررت بها
والتي آمل ان لاتحدث للآخرين
وكم اتمنى ان تكون بهذا البوست اضاءة تساعد الراغبين في هذه التجربة

في كل رحلاتي عن طريق الباخرة هناك مشكلة كبيرة
مشكلة نفتعلها نحن السودانيون المسافرون
اجراءات المغادلرة أمام ضابط الجوازات لاتستغرق اكثر من 30 ثانية
لكن تكمن المشكلة في كيفية الوصول الى ضابط الجوازات نفسه
فكثيرون يحملون عفشاً في اياديهم يفوق التصور والخيال
يعني مثال ان تجد احدهم يحمل { كوريك } ماعرفت صيغة الجمع لهذا كتبتها مفرد
وهو بالطبع يكون قد حمل على كتفه 10 منها
بعضهم تجده يحمل { اباريق } بلاستيك
اما شاشات البلازما .. فلا تعليق !!!!
عدد قطع العفش المحمولة مع الركاب هي ثلاثة او اربعة اضعاف الركاب انفسهم
وهذا مايعيق الحركة في صالة الجوازات
وكذلك يعيق حركة الدخول والخروج من الباخرة
وهي مأساة حقيقية بكل ماتحمله الكلمة من معاني
وأكثر ما يعجبني في هذه الرحلة ان كل النسوان يلبن العبايات السوداء
ويحتفظن بثيابهن الجميلة
ولايلبسنها الا بعد الركوب في البص المتجه من سواكن الى الخرطوم
فالجميع يدرك تماما نوع { البشتنة والبهدلة } التي ستحدث



هجمة مرتدة
الهدف من انتقاد هذه الصور
هو ان نرتقي الى حلول افضل
تعكس ولو مثقال ذرة من وجهنا المشرق

سأترك مايحدث داخل الباخرة
واعرج لبعض الصور المشرقة حينما يصل المسافر الى السودان
هذه الصورة المشرقة تقابلك من بعض رجال المرور في الطريق
خاصة ما بين سواكن وهيا
فهم حينما يوقفونك
يقولون لك حمدا لله على السلامة
ومن ثم يقولون منك اعمل حسابك فالطريق به بعض المفاجآت
ويطلبون منك لو ان النعاس غلبك
حاول باقرب استراحة او قهوة ان تاخذ راحتك
ويكررون عليك عشرات المرات ان تقود بتريث وتأني
ثقافة رائعة في عالم المرور
لكن هل ح تستمر حتى نهاية الرحلة ؟؟؟

ما أسطره الآن لم يحدث معي مرة واحدة
بل مرتان وثلاث
وأكاد اجزم بان جميع ساكني الغرف قد مروا بما مررت به
والمدهش ان احدهم فعلها معي مرتين لكنه ربما نسي شكلي
لهذا تورط في المرة الثانية
المشكلة مع طاقم الباخرة 00 المسئولين عن الغرف
فبعد ان يسلمك المفتاح
ويحييك بحرارة تحسد عليها
ومن ثم تكسير ثلج من شاكلة انتوا شعب طيب
ومن ثم يسالك هل انت من الخرطوم ؟؟
واذا اردت ان ترد لابد ان تقرأ آيات التلفت
عسى ولعل ان لايكون توفيق عيسى مكي بجوارك
المهم بعد المقدمة المستفيضة يطلب حقه منك
هنا بالريال السعودي ومن السودان بالجنيه السوداني
واقل مبلغ يحصل عليه منك لو كنت عكليتة في حدود 10 ريال أ
ما اذا تظارفت وعملت فيها من ناس ابوفاطنة
فسيخرج منك بعشرين او ثلاثين ريالا
على الرغم من انهم لم يتركوا لك ريالا واحدا حينما تحجز منهم
هذا المعتوه يجمع من السودانيين الطيبين بالغرف مالايقل عن 4000 ريال
ومن السودان ما لايقل عن 10 مليون في الرحلة يتبع ..
لنحكي لكم ماحدث معي

اخى / ابو حراز

تحياتى لك

بصراحة سرد جميل وممتع وواقعى وانا خضت هذه التجربة مرتين 2005م و 2009م

وكل ما قلته صحيح بالتمام و الكمال

ونتابع

Quote: أخى / ابو حراز تحياتى لك بصراحة سرد جميل وممتع وواقعى وانا خضت هذه التجربة مرتين 2005م و 2009م وكل ما قلته صحيح بالتمام و الكمال ونتابع

تحياتي العميقة أخي زمرواي
شكرا ليك كتير على رفع المعنويات واعجابك بسردي المتواضع
وجميل جدا ان تجد من يتفق معك
ويشهد على التجربة
هي تجربة ممتعة ومتعبة ومؤلمة في نفس الوقت
لكن تكمن العبرة في النهايات السعيدة لهذه الرحلة حينما يطل الفرح بكل اجنحته
وتلتقي اهلك
واحبابك
وتتسكع في كل ازقة ذكرياتك

..
في الباخرة الكثير من الصور الجميلة
اذا استثنينا تعامل بعض افراد الطاقم حيث فيه الكثير من الخشونة
وكذلك الاستثناء الثاني مستوى الطعام الذي يقدم للركاب
سيء بكل ماتحمله الكلمة من معاني
والذين تعودوا على السفر كثيرا
تراهم يحملون زادهم معهم
في داخل الباخرة تحدث الكثير من الصداقات والتعارف
وكذلك النقاشات الجميلة
تفتح بوستات على الهواء مباشرة
وحقا تضيف لحاضرها الكثير من الاضاءات
حينما تلوح سواكن في الأفق ..
تشعر بانك قد بدات تتحرر من كل القيود
تشعر بنسمات حنين دافئة تصفعك على استحياء
ويراودك شعور غريب .. شعور لايصدق وانت ترى الوطن
هذا الشعور يجبرك على ان تفرك عينيك
لتعرف إن كنت في حلم
أو انك بين احضان الوطن حقاً ؟؟؟؟

..
.
التغيير الوحيد الذي لمسته في اجراءات الافراج في سواكن ..
الكشف على العفش بالليزر
خلافاً لتلك الطريقة العقيمة السابقة
بان يقوم صاحب السيارة بانزال كل العفشه
ومن ثم تفتيشه
وتربيطه مرة اخرى واعادته للسيارة
وكانت هذه العملية مرهقة ماديا وجسمانيا
خلاف الوقت المهدر
الآن التفتيش بطريقة سريعة
الا اذا ساورهم الشك في ان العفش ليس كما ينبغي
لكن الاجراءات الادارية لازالت عقيمة وبطيئة ومتخلفة جدا
والمخلص الذي ياخذ اوراقك هو مجرد عامل { توصيل طلبات } !!!
وما يدهشني اكثر ان هناك بعض الملفات التي تم الانتهاء من اجراءاتها
لكن تصر بعض العقليات على الانتهاء من جميع الملفات
ومن ثم توزيعها
المكاتب التي يتم فيها تخليص الاجراءات ضيقة جيدة وغير مرتبة
ولاتوجد استراحة للإنتظار فيها هذا الزمن المضني
كما لاتوجد دورات مياه في اماكن التخليص
ولا اماكن للصلاة
ولامياه شرب .. مجرد حفاظة كلما ناتي نجدها فاضية
كما لاتوجد اي خدمات كافتيريا وشاي وعصائر
الاجراءات تاخذ اربع او خمس ساعات
وفي بعض الأحيان اكثر من ذلك
ولاتندهش ان لم تجد دفتر الافراج نفسه ولا حتى استمارة السيارة
هذا شيء طبيعي جداً
اما اذا قلت عاوز تكون زول رسمي وتبحث عن الاستمارة
فان اجازتك ستنتهي في سواكن
كل مكتب
وكل مسؤؤؤول يرمي بك للثاني
تغيير الاجراءات الادارية وتطويرها مطلوب

..عطورك التي ستفتها في اعماق الشنطة شيء
ورائحة الوطن شيء آخر !!!!

ربما هذه واحدة من اقصر مداخلاتي هنا
ولا اريد ان ازيد !!!

تحياتي لكم بعد غياب عن هذا البوست
واتمنى للجميع رحلة موفقة
وامنياتي لكل المغتربين ان يلتقوا بابنائهم واهلهم فهذه اللحظات لاتقدر بثمن
واكاد اجزم أن %90 من المغتربين قد عاشوا شتى أنواع الحرمان
وبعضهم خرج من السودان وهو اخضر وفي عز شبابه ونضارته
كثيرون منهم شاخوا في الغربة
وكثيرون ترهلت اجسادهم
وآخرون غادروا هذه الحياة وهم في عز عطائهم
وكثير من الحالات المؤلمة
ان تجد احدهم قد نزف الكثير من العرق لأجل بناء بيته
وساهر الليالي الطوال لأجل ذلك
ولكنه لم يدخله
ولم يهنأ به
بالطبع لاننظر للغربة من الثقب الضيق
فهناك الكثير من الايجابيات
ولكنها ايجابيات وراءها تضحيات جسام
وثمن غالي
بل غالي جداً

.
.
لدي مقولة يضحك الناس منها كثيرا
لكن والله ساعدتني على انجاز الكثير من الأمور
وكذلك عدم الوقوع في المئات من المواقف المحرجة التي كانت يجب ان تحدث

يأتينا بعض الأحوة السودانيين للمساعدة في نقل كفالة او غيره
خاصة اذا كان كفلاؤهم يعملون معنا بنفس الوزارة
وحينما يوفقنا الله باقناع الكفيل
اقول لصاحبي السوداني
الآن اترك كل شيء وااتي بالاقامة واوراقك ورسوم نقل الكفالة وجميع ما يلزم
لأن كثير من الاشخاص حينما يخرج من مكتبك ربما يغير رأيه
وهذه تذكرني بالحكمة أو المثل الذي يقول
{ اضرب على الحديد وهو ساخن } !!!

أما مقولتي فهي غريبة حقاً
فلا اقول لأي احد في الغربة هنا حينما يريد قضاء امر ما
لا اقول له اضرب على الحديد وهو ساخن
فهذه اعتبرها ماااااسورة قديمة جداً

بل اقول له :
{ ياحبيبي في الغربة هنا اذا وجدت حتى فرصة حميمية مع زوجتك اليوم فلا تؤجلها ليوم غد }
لأن يوم غد هذا يمكن ان تحدث فيه الكثير من الأشياء
اشياء قد تحرمك من اليابس والأخضر
نقاش في ملايات او عدة او ثياب
صندوق
واحدة عاينت فيك
وهلم جرا على قول عمنا الصادق المهدي


وانت عزيزي المسافر افراج انصحك بهذه الحكمة
{ اذا وجدت اي فرصة لصب بنزين على السيارة فلا تؤجلها }
يعني حتى ولو سيارتك شبه مليئة
فان وجدت محطة أملأها مرة أخرى !!!

فوق .. لتعم الفائدة.. خاصةً والبوست مفيد ودسم ومن
المتابعين له.
الشكر أجزله لـ صاحبه ( أبو حراز) وضيفوفه الكرام.

Quote: اها قلنا ليهو عرفت دي ؟؟ بكل بساطة رد لينا { دي حلوم مرتي } حلوم دي دلع حليمة !!! وحليمة دي لو شفتها من شناتها تخت جلابيتك في خشمك وتقوم جاري صوووووووووف !!!!! والله اوشكنا ان ندخل في غيبوبة من الضحك !! وأكثر من ماااااات من الضحك حلوم نفسها !! وردت عليه قائلة : هو انا لو بشبه دي بعرسك انت يا ابو القدح !!!!

هههههههههههههههههههههههههههههها

والله ياابو حراز اتفق مع الجميع انو نضميك سمح تب

اما فيما يخص كلامك عن الافراج المؤقت

وحات الله اكان أأجر لي عجلة اقضي بيها اجازتي مابخش في تجربة زي دي

بس الواحد قبلما يتحرك بسيارة افراج مؤقت يسال نفسو

هل هو فعلا محتاج لسيارة بهذه المعاناة خلال فترة اجازتو؟؟؟؟؟

فوق .. لتعم الفائدة.. خاصةً والبوست مفيد ودسم ومن
المتابعين له.
الشكر أجزله لـ صاحبه ( أبو حراز) وضيفوفه الكرام.

..تحياتي أخي : Mirghani Taitawi
اشكرك كثيرا على وجهة نظرك المتعلقة بفائدة البوست
واتمنى ان يكون قد طرق على جوانب مهمة وحساسة
تفيد كل الذين يودون خوض هذه التجربة
وهي تجربة مؤلمة ومتعبة وممتعة في آآآن

Quote: ههههههههههههههههههههههههههههههاوالله ياابو حراز اتفق مع الجميع انو نضميك سمح تباما فيما يخص كلامك عن الافراج المؤقتوحات الله اكان أأجر لي عجلة اقضي بيها اجازتي مابخش في تجربة زي ديبس الواحد قبلما يتحرك بسيارة افراج مؤقت يسال نفسوهل هو فعلا محتاج لسيارة بهذه المعاناة خلال فترة اجازتو؟؟؟؟؟

..

.تحياتي اخي عمر عثمان عبد الوهاب .
وشكرا على مشاعرك تجاه ما أكتب
وكان هذا لوني او بعض لون منذ ان ولجت الى ضفاف المنتدى
وهو الكتابة في الأمور الاجتماعية وبسخرية لاذعة أحيانا
وكل القصد من وراء ذلك معالجة بعض الاشكاليات حتى لايقع فيها الآخرون
وكما تعلم فان الغربة ذات طعم مرير
وانا من كثرة ما عاني فاني لا اضحك الا في آخر الشهر
يوم ان تدخل بطاقتك في الصراف الآلي وتجد راتبك بشحمه ولحمه قد نزل
وقد تبسم النبي سليمان ضاحكا من قولها .. أي النملة
ونحن لانبتسم مما تحمله لنا البطاقة فحسب
بل نقهقه وبصوت عال جدا
وتستمر الضحكة يومان
او ثلاث بالأكثر
ومن بعد ذلك يصيبك شد عضلي في الفكين السفلي والعلوي !!!

لا انصح بتجربة الافراج ان كان لديك سيارة بالسودان
وبرضو لو ان الاجازة قصيرة فلا داعي لها الا في حال انك ستاخذ معك اشياء مهمة
وهي بالطبع لاتعني الكرور والبوبار والملابس التي نحملها
بل ادوات الكهرباء والسباكة وامور ذات عمق في مستقبل الأسرة

.
.
.
سلام عثمان ابو حراز

هنالك قانون أغرب من الغريب ذاتو يطبق علي المغتربين ناس الإفراج المؤقت أمثالنا

والله قدرما فكرت في الهدف منه شنو غلبني عديل كده
طبعاً اخوك صاحب تجربه كبيره وآخرها في شهر واحد ده النحن فيهو

القانون يقول اي مغترب ينزل بعربيه للسودان اذا قضي ٥ شهور في السودان
بعربيته ورجع بها الي السعوديه مثلا لايحق له ادخال هذه العربه الا بعدما ان
تقضي مده في السعوديه مماثله لما قضته في السودان يعني لو عايز يرجع السودان
تاني بنفس العربيه لا يستطيع الا بعد مضي ٥ شهور المده التي قضتها العربيه
في السودان
يعني لو عايز انزل مره اخري للسودان بعد شهر او اقل من ٥ اشهر تحجز
العربه في سواكن وتتحمل مصاريف لا حول ولا قوه لها وارضيات الي ان تسفرها
من الميناء في سواكن مره اخري

مع العلم ان دفتر التربتيك مدته سنه كامله من تاريخ استخراجه ويتعامل معه العالم
كله علي هذا الاساس يعني تدخل وتخرج من اي دوله لاي دوله اخري بعدد صفحات
الدفتر

هاك ده من واقع تجربتي مع ناس سواكن

صادف اني جئت بعربه مرسيديس موديل ١٩٩٦ من الامارات لونها فضي وقضيت بها
خمسه شهور ونص في السودان وارجعتها للامارات في نهاية شهر ١٢ من العام الفائت
٢٠١٥
العربه موجوده حتي الآن في الإمارات وقررت ان ارجع للسودان بعربه اخري غيرها
ونسبة لتعلقي وشغفي بالمرسيديس اشتريت سياره اخري موديلها ١٩٩٩ م لونها
احمر يسر الناظرين ونزلت بها للسودان ولو تذكر اتصلت عليك تلفونياً من داخل السعوديه
هذا غير رفعة يدي لك محيياً في لفة الخرمه بعد المويه الجديد

المهم علي قول اخونا تبارك وصلت لسواكن بالسلامه ووقفنا في صف التربتيك
صادف انه احد المخلصين الجمركيين تعرف علي وسألني إنت مش نزلت بعربيه
مرسيديس قبل ٢٥ يوم
قلت له ساخرا نعم نفس العربيه قال لي بس ده حمراء وعربيتك الفاتت كانت
فضيه قلت له غيرت لون البويه وغي ت اللوحات كمان
هذا الحوار كان مزاحاً من الغلب والتعب الذي نقابله في سواكن

قوم يا المخلص امش ادخل للمكاتب وفك خبر العربيه المرسيديس اللونها كان فضي
وقلبوها لأحمر وغيروا اللوحات كمان عملية تزوير في العربيه بالكامل
لكن ده بتمشي فينا يا وهم يا بشير حسن الليله ارجي الراجيك

تلاته ساعات يا ابو حرار افهم فيهم من العقيد لاصغر عسكري ومافي فايده
طيب يا جماعه الدفتر بتاع التربتيك جديد
بالله ده علينا نحن كوس غيرها
طيب يا جماعه رقم الهيكل قارنوه مع بعض
بالله الحاجات ده اسهل حاجه تغيرها بره
يعني انت قايل ناس بره ديل افهم مننا

يا جماعه كان الكلام مزاح وهظار بس
علي الطلاق بالتلاته العربيه ده غير ديك
شوفوا الصور يا جماعه


تعرف انتهي الموضوع بالرجوع لرقم الهيكل السابق
والموجود في العربه الجديده واتضح الفرق

آخر حاجه كانت من واحد ملازم اول قالي تاني ما تنزل
للسودان بمرسيديس يعني شوف ليك كومر ول موريس ١١٠٠
عشان ما تلخبطنا

مع التحيات الزاكيات
.
.
..
.

Quote: وانت عزيزي المسافر افراج انصحك بهذه الحكمة { اذا وجدت اي فرصة لصب بنزين على السيارة فلا تؤجلها } يعني حتى ولو سيارتك شبه مليئة فان وجدت محطة أملأها مرة أخرى !!!

سلامات يا حاج متابع حكي رائع والله .. الجميل الردود بلون والسرد بلون بدون اي لخبتة هههه

القاعده الاولي في الغربة دائما ما اقولها للراكبين معاي توقف في اقرب باركن تلقاو دا كان لقيتو :) حتي لو علي بعد كيلو من مكانك الانت قاصدو لانو تاني ما بتلقاو .. كع

تحياتي

تحياتي وشكري اخ ابوحراز على سلاسة السرد وعظيم الفائدة ..
تمنيت أن تضيف للفائدة بتلخيصك الرائع خطوات الافراج المؤقت من دخول جدة وحتى وصولها من جديد ..
على الأقل نعرف حجم التكاليف والعراقيل ..
ثم هل تختلف الإجراءات باختلاف أنواع السيارات وموديلاتها ..
وهل يواجه المغترب مشكله في حالة شحن سيارة عائلية بأدوات (كهربائية أو صحية مثلا) ..

مساء الخير على الجميع
وأودعكم باذن الله بمواصلة السرد في هذا البوست
وحتى رحلة العودة باذن الله


يوجد صديق من ضهاري لفيس بووك
له التحية والتقدير
كلما أدخل لأقتبس مشاركته وارد عليها
أجده اخذ { عدته وكورته } وخرج
اتمنى ان لا يكون تاخيري في الرد سببا في انسحابه

كما اقدم شكري وتقديري لكل من اتصل مبديا اعجابه بالبوست
وقد تعرفت من خلال هذا البوست على الكثيرين
من خلال الاتصالات
وسبحان الله بعضهم طلع معرفة
وتجمعنا قواسم مشتركة
رغم اننا لم نلتق نهائيا

Quote: تحياتي وشكري اخ ابوحراز على سلاسة السرد وعظيم الفائدة .. تمنيت أن تضيف للفائدة بتلخيصك الرائع خطوات الافراج المؤقت من دخول جدة وحتى وصولها من جديد .. على الأقل نعرف حجم التكاليف والعراقيل .. ثم هل تختلف الإجراءات باختلاف أنواع السيارات وموديلاتها .. وهل يواجه المغترب مشكله في حالة شحن سيارة عائلية بأدوات (كهربائية أو صحية مثلا)

..
تحياتي أخي عمر التاج وشكرا لثنائك على البوست
واتابع باهتمام بوست مهنية الشرطة
أول شيء 90% من الوكالات التي يديرها سودانيون متشابهة
متشابهة في كل شيء وكانها توائم سيامية
ستجد استقبالا مبالغا فيه
ويبسط لك الاجراءات لدرجة ان يظهر اليك بيتكم فجأة
وكأنك ستصل السودان بعد قليل
ولو كان لديك عفش اكثر من اللازم فليهم نصيحة جميلة
يطلبون منك ان تشحنه منفردا
وهم جاهزون بالطبع لتصميم صندوق خشبي وخلافه
بل من الممكن ان يعطوك عنوان المخلص ومواصفاته الملائكية
ويقولون لك ان الصندوق سيصل قبل ان تصل انت
وسيقوم المخلص بشحنه لك
بل يطلب مدير الوكالة عنوانك في السودان ليتم شحن الصندوق
ومن ثم تصل لتجده امامك بالبيت
وثق تماما لو ان اجازتك 45 يوما
فلن يصل الصندوق حتى نهاية الاجازة
كثيرون من العاملين بالوكالات يتعاملون بهذا الاسلوب
وكثير من الأخوة الذي شحنوا بهذه الطريقة لم تصل شحنتهم حتى انتهت اجازتهم
التكلفة تقريبا في حدود 3000 ريال
قابلة بالطبع للزيادة وليس للنقصان
تحتاج تذكرة للسيارة
ودفتر تربتك
وتذكرة لك انت
والأفضل ان تقطع التذاكرة ذهابا فقط
لاتترك اي اشياء صغيرة في السيارة وفي متناول اليد
فلاشات او شواحن او اي شيء من هذا القبيل
كن مستعدا انك يمكن ان تذهب للباخرة وتجد الحجز لم يتم
او ان السيارة ليست بالمنفستو
وربما تسافر السيارة وانت تتخلف .. عادي يحدث ذلك بسبب اخطاء الوكالات
لهذا لابد ان يكون جوازك معك وكل اوراقك المهمة 00 يتبع

Quote: سلامات يا حاج متابع حكي رائع والله .. الجميل الردود بلون والسرد بلون بدون اي لخبتة هههه القاعده الاولي في الغربة دائما ما اقولها للراكبين معاي توقف في اقرب باركن تلقاو دا كان لقيتو :) حتي لو علي بعد كيلو من مكانك الانت قاصدو لانو تاني ما بتلقاو .. كع تحياتي

أخي الطيب عباس تحياتي وعذراً للتأخير
الحااااااااااااااااج { تاااااااااااااااني } !!!!
هذه الصفة هي التي أحدثت الكثير من المناكفات في بيتنا
فحتى وقت قريب كنت مكتوبا بالموبايل الخاص بالمدام { حبيب الرووووح }
وأحيانا على سبيل التغيير ورفع المعنويات اكثر { توأم الروووح }
ولكن بقدرة قادر وبدون اي مقدمات تحولت في الفترة الخيرة
وفي نفس الموبايل الى { الحااااااااااااااااااااج } !!!!!!

ومن ثم فتحت الأسماء في الموبايل الخاص بي
لأغير الاسم الى { الحااااااااااااااااااااجة } !!!!
على طريقة كما تدين تدان
والباديء اظلم

واثناء عملية التفتيش اليومية التي تقوم بها وزارة الداخلية
اذ اسمع صوتا صادرا من الغرفة { سجمي } !!!
وبدات تسال في ابنتها ابوووووووووووووك وين يابت
في الصالون
معقولة الحاجة دي انا ؟؟؟؟؟

ايوة انتي
ليه ؟؟ عملت شنو ؟؟
طيب انا شايفاني لابس احرامي وقاعد في مزدلفة ؟؟؟

قال الحاج قال !!!!

المواقف خاصة في مكة وجدة صعبة جدا
وجدة بالذات في منطقة البلد اصبحت صعبة جدا
كل المواقف بقروش
ولو وقفت لمدة خمس دقائق ولم تدفع فلن تجد سيارتك

Quote: سلام عثمان ابو حراز هنالك قانون أغرب من الغريب ذاتو يطبق علي المغتربين ناس الإفراج المؤقت أمثالنا والله قدرما فكرت في الهدف منه شنو غلبني عديل كد

أخي بشير حسن بشير
تحياتي واشواقي
وحمدا لله على السلامة بوصولك الى السودان
ساعود باذن الله على الرد على مداخلتك القيمة
وكذلك تجربة الدخول بسيارة واحدة لمرتين في العام
وهو قرار غريب حقا
منذ يوم امس ونحن ندخل الى المنبر والحزن يملأ كل جوانحنا
صحفية ماتت في عز شباباها
وصديق اعلامي وصحفي وبيطري وانسان رائع هو دكتور سجيماان
رحل هو الآخر مبكرا
نال الله لهم الرحمة والمغفرة
يوم امس لم انام ليلا
حيث بدا شريط الذكريات مع دكتور سجيمان يمر من امامي
ولم انس مطلقا تلك الرحلة التي دمعتنا
وقفشاته وتعبيره الصادق

،
،
،
،
رحمة الله عليك يا دكتور عادل سجيمان

انت احد من حببنا في هذه الدار

كنت ادخل لسودانيز لاسباب كثيره وكان اقواها

أحسن الله عزاءكم أخي عثمان

وإنا لله وإنا إليه راجعون
،
،
،
،
،
،
،
،

Quote: سلام عثمان ابو حراز هنالك قانون أغرب من الغريب ذاتو يطبق علي المغتربين ناس الإفراج المؤقت أمثالنا والله قدرما فكرت في الهدف منه شنو غلبني عديل كده طبعاً اخوك صاحب تجربه كبيره وآخرها في شهر واحد ده النحن فيهو القانون يقول اي مغترب ينزل بعربيه للسودان اذا قضي ٥ شهور في السودان بعربيته ورجع بها الي السعوديه مثلا لايحق له ادخال هذه العربه الا بعدما ان تقضي مده في السعوديه مماثله لما قضته في السودان يعني لو عايز يرجع السودان تاني بنفس العربيه لا يستطيع الا بعد مضي ٥ شهور المده التي قضتها العربيه في السودان يعني لو عايز انزل مره اخري للسودان بعد شهر او اقل من ٥ اشهر تحجز العربه في سواكن وتتحمل مصاريف لا حول ولا قوه لها وارضيات الي ان تسفرها من الميناء في سواكن مره اخري مع العلم ان دفتر التربتيك مدته سنه كامله من تاريخ استخراجه ويتعامل معه العالم كله علي هذا الاساس يعني تدخل وتخرج من اي دوله لاي دوله اخري بعدد صفحات الدفتر هاك ده من واقع تجربتي مع ناس سواكن صادف اني جئت بعربه مرسيديس موديل ١٩٩٦ من الامارات لونها فضي وقضيت بها خمسه شهور ونص في السودان وارجعتها للامارات في نهاية شهر ١٢ من العام الفائت ٢٠١٥ العربه موجوده حتي الآن في الإمارات وقررت ان ارجع للسودان بعربه اخري غيرها ونسبة لتعلقي وشغفي بالمرسيديس اشتريت سياره اخري موديلها ١٩٩٩ م لونها احمر يسر الناظرين ونزلت بها للسودان ولو تذكر اتصلت عليك تلفونياً من داخل السعوديه هذا غير رفعة يدي لك محيياً في لفة الخرمه بعد المويه الجديد المهم علي قول اخونا تبارك وصلت لسواكن بالسلامه ووقفنا في صف التربتيك صادف انه احد المخلصين الجمركيين تعرف علي وسألني إنت مش نزلت بعربيه مرسيديس قبل ٢٥ يوم قلت له ساخرا نعم نفس العربيه قال لي بس ده حمراء وعربيتك الفاتت كانت فضيه قلت له غيرت لون البويه وغي ت اللوحات كمان هذا الحوار كان مزاحاً من الغلب والتعب الذي نقابله في سواكن قوم يا المخلص امش ادخل للمكاتب وفك خبر العربيه المرسيديس اللونها كان فضي وقلبوها لأحمر وغيروا اللوحات كمان عملية تزوير في العربيه بالكامل لكن ده بتمشي فينا يا وهم يا بشير حسن الليله ارجي الراجيك تلاته ساعات يا ابو حرار افهم فيهم من العقيد لاصغر عسكري ومافي فايده طيب يا جماعه الدفتر بتاع التربتيك جديد بالله ده علينا نحن كوس غيرها طيب يا جماعه رقم الهيكل قارنوه مع بعض بالله الحاجات ده اسهل حاجه تغيرها بره يعني انت قايل ناس بره ديل افهم مننا يا جماعه كان الكلام مزاح وهظار بس علي الطلاق بالتلاته العربيه ده غير ديك شوفوا الصور يا جماعه تعرف انتهي الموضوع بالرجوع لرقم الهيكل السابق والموجود في العربه الجديده واتضح الفرق آخر حاجه كانت من واحد ملازم اول قالي تاني ما تنزل للسودان بمرسيديس يعني شوف ليك كومر ول موريس ١١٠٠ عشان ما تلخبطنا مع التحيات الزاكيات . .

تحياتي اخي بشير
وكيف وجدت صالحة وسكانها ؟؟؟
الى حد قريب كانت القطعة في صالحة بمبلغ 500 الف بالقديم
وقد اشترى اخي قطعة رغم انه لم يكن مقتنع
قبل ايام باع 200 متر من نفس القطعة بمبلغ 110 مليون
وكثيرا ما كنت أمازح ابن اختي بان الشراء في صالحة يخلق الاطمئنان
وذلك غلى خلفية اننا حينما كنا نتجول فيها لم اشاهد اي مقابر
وقلت له بالمرة الواحد يوصيكم بالدفن في المنشية والمعمورة والرياض
وجدي كانت له اراضي كثيرة بالفتيحاب
وهبها كلها واتى ليموت في الجزيرة حيث دفن مع احد الشيوخ
وكثيرا ما سالت والدي عن المغزى من هذه المغامرة
فكان رده ان هؤلاء ناس آخرة
وأنتم ناس دنيا !!!
وسار والدي عليه الرحمة على نفس الطريق
حيث منحه الشريف الصديق الهندي وأخوانه 2000 متر اراضي في مواقع ممتازة
ولكنه رفضها وطلب الفااااااتحة من الشيخ
وبعد مرور عشرات السنوات على هذا الموقف
ياتينا أحد الحيران من اهلنا
ويطلب مني الذهاب معه الى الشريف
وحينما سالته لماذا نذهب
قال لي : عشان يشيل لينا الفااااتحة
فقلت له : تاااااااني فاتحة !!!!!
ياعمك لو في اراضي 00 بيوت 00 او حتى دراهم معدودة فلا مانع

ااسف ان خرجت عن النص
وحتما ساعود باذن الله للحديث عن عقبات ومعاناة الافراج

..تحياتي لكم جميعا بعد غياب
ظروف عمل مضنية وسفر الى جدة لانهاء بعض الأعمال
ونهاية شهر عربي كما تعلمون
ننتظره بفارغ الصبر
ونحن نيمم شطرنا نحو الصراف الآلي
حينما تدخل بطاقتك ومن ثم تبتسم
وربما لاتتكرر هذه الابتسامة الا في الرابع والعشرين من الشهر القادم
وبعد ان تسحب كل الراتب من الصراف الآلي
والذي لايجتامل ابدا ان كان مترتب عليك اقساط شهرية
فهو ياخذ حقه اولا
ومن ثم يرمي لك بالباقي
والباقي نفسه عليك أن تذهب به للبيت
وتضعه على شكل كيمان
متناسيا كل النظريات الرياضية والحسابية والهندسية
والتي جميعها تتضاءل امام هذا الراتب
وتصبح مجرد مواسير وحنفيات صدئة
لاتستطيع هذه النظريات ان توزع لك الراتب بحيث يغطي كل الالتزامات
ولايستطيع ابليس ان يوزعه الا بقسمة ضيزى !!!
كما لايستطيع وزير الكسرة السابق ان يقسمه لك
ولاوزير الغاز والشطحات الحالي قادر على ذلك
كل مافي الأمر عليك ان تنحت مخك جيدا
وتوزع راتبك حسب الضرورة القصوى ريثما ياتي الشهر القادم
او بالأحرى الراتب القادم
ساعود للإفراج بعد هذه التداعيات
والتي هي ترجمة للأنفاس الحارة المتبقية بعد التوزيع الغير عادل للسلطة والثروة
والمعني هنا الثروة المضنية التي تاتي على استحياء كل آخر شهر
تاتي بطيئة مثل ابو القدح
وتذهب سريعا كما تذهب الأرنب !!!!

Quote: هنالك قانون أغرب من الغريب ذاتو يطبق علي المغتربين ناس الإفراج المؤقت أمثالنا والله قدرما فكرت في الهدف منه شنو غلبني عديل كده طبعاً اخوك صاحب تجربه كبيره وآخرها في شهر واحد ده النحن فيهو القانون يقول اي مغترب ينزل بعربيه للسودان اذا قضي ٥ شهور في السودان بعربيته ورجع بها الي السعوديه مثلا لايحق له ادخال هذه العربه الا بعدما ان تقضي مده في السعوديه مماثله لما قضته في السودان يعني لو عايز يرجع السودان تاني بنفس العربيه لا يستطيع الا بعد مضي ٥ شهور المده التي قضتها العربيه في السودان يعني لو عايز انزل مره اخري للسودان بعد شهر او اقل من ٥ اشهر تحجز العربه في سواكن وتتحمل مصاريف لا حول ولا قوه لها وارضيات الي ان تسفرها من الميناء في سواكن مره اخري

..
بعض القوانين المتهالكة في السودان كالصخرة الصماء
وحتى هذه الصخرة يمكن ان تتشقق ليخرج منها الماء
والحجر في فلسطين فعل ما لم يفعله القلم
وأنا من الناس الذين يكرهون صمت الحجارة
ورغم هذا اتلذذ كثيرا بهيبتها
وحينما رايت احدى الجبال الشاهقة في منطقة المفازة
أدركت حينها ان هذه الحبال يمكن ان تتحاور
لأنني شاهدتها بعيني ...
وهي تسمح لجذوع الأشجار الوارفة ...
بان تتدخل في أدق تفاصيلها !!!!
لنترك الجبال وشموخها وصمتها المدهش
ونرجع لهذا القانون العقيم جدا
ليس هو فحسب
بل كثير من القوانين تحتاج الى إخصاب
أو بالأحرى الى المزيد من حبوب اللقاح
حتى تكون قوانين منتجة وفاعلة وفيها انفاس وروووح
وكنت أود ان انزل السودان بنفس السيارة
ولم أكن وقتها قد اكملت فترة الستة اشهر
لكن احدهم قال لي بامكانك ان ترسل خطابا لوزارة التجارة
هذا الخطاب يحمل اسمك ووظيفتك ونوع السيارة ومودلها ورقم الهيكل
وقال لي صاحبي وبكل براءة السودانيين المعهودة ارسله بالبريد
وسبق ان ارسلت خطابا بالبريد لوالدي اخبره فيه بان مصاريف الدراسة قد انتهت
وكنت حينها في اولى ثانوي
لم يصل الخطاب حتى اليوم
ارسلته عن طريق صندوق بوستة يحمل اسم مكتب من مكاتب مشروع الجزيرة
المكتب لاوجود له الآن
والمشروع يمشي على كرسي متحرك منذ عشرات السنين
وأدخل الى العناية المكثفة عشرات المرات
فيخرج على هذه الكرسي
وهو يجر باحدى يديه قسطرته !!!
وباليد الأخرى يحمل كيس الأدوية المنقذة للحياة !!
قلت يا ابوحراز { لايلدغ المؤمن من صندوق البريد مرتين }
وارسلت الخطاب الذي اطلب فيه السماح بالدخول بنفس السيارة
وذهب صديق لي وسلمه لوزارة التجارة
بل خدمني اكثر حينما بعث لي اصل الموافقة
وبعث بصورة منها الى ميناء سواكن
وتوكلت على الحي الذي لايموت
ودخلت وتمت الاجراءات بكل سهولة 00 ياسبحان الله
والله حينما انتهت الاجراءات كنت كمن يحضر فيلما من افلام الخيال العلمي
لم اصدق نهائيا ماحدث
ولكن بالطبع ربما تتغير او تغيرت القوانين الآن
مشكلتنا نحن ان القوانين والأنظمة تتغير بتغير الأشخاص وهذه كارثة حقا
لماذا لاتنظر الجمارك من منظور اقتصادي لدخول نفس السيارة
ليس في العام مرة واحدة
بل ان شاء الله في العام 10 مرات ان لم تكن هناك قوانين ومواثيق دولية تمنع ذلك
دخول السيارة في العام اربع او خمس مرات يعني زيادة في النمو الاقتصادي للوطن
هذا اذا ماعرفنا ان هذه السيارة ستخدم الكثيرين بدخولها عدة مرات
فالنجعل القوانين تسمو لرفعة الأوطان والناس
وليس للرجوع للوراء عشرات الخطوات

سرد جميل .. مع بهدله شديده ساعدتنا في العدول بالذهاب بالسياره

أبو حراز...سلام وشوق كتير.. الجري وراء المعايش لم يترك لنا وقتا للتواصل...صادق الود

..اعتذر كثيراعن التاخير لكل الذين لم ارد عليهم
تحياتي لكم
وساعود باذن الله لأبادلكم العزف على هذا البوست

.
.
معليش خلونا نحرز هدف تسلل شوية
دخلنا الى السعودية ونحن شفع صغار
وسيمين ونضيفين
وكان الجكس قبل السفر للسعودية يتقاطر علينا زرافات ووحدانا
عليك امان الله هسي الواحدة تشوفك تقوم جارية منك صووف

عندي صورة جميلة قديمة
لكن قلنا احسن الواحد ينزل الصورة اليابانية الأصلية
مشاهدة ممتعة ان شاء الله

Quote: مشاهدة ممتعة ان شاء الله

بين وبينك كده ماممتعه نهائي

هههههههههههههههههها
ياها الدنيا وعمل السنين ياصاحبي
بس برضو لسع فيك الروح

ربنا يديك الصحة والعافية

احسن حاجة صور مرحلة الشباب دي الواحد يحرقه بي جاز
ويريح نفسو من المغسة الكتلت سيده

لكن برضو تحمد الله ماشاءالله ياعثمان لانضاره لا صلعه

ومن شكلك كده والله اعلم ماعندك سكري

الدغت والكلسترول وباقي الجرور يعلمبهن الله

امد الله في عمرك ومتعك بالصحة والعافية

يبدو لي ان جهاز اللاب توب الذي اشتريته حديثا قد اصيب بعين
او ان المتصفح الذي استخدمه ماسوورة
اجهزتي القديمة تعمل بكفاءة عالية
ولكن دخول الصين من اوسع الابواب
وحشر انفها في لي شيء
هو من جعل الاعطال تكثر يوما بعد يوم
ولدينا توصيلة كهرباء ايطالية ..
لها اكثر من 18 عام
وهي لازالت بحالة جيدة
بعدها اشترينا مالايقل عن 50 وصلة صينية
كلها راحت في خبر كان !!!
من يومين والعلاقة شبه متوترة
مابين جهازي وموقع سودانيز
لايفتح الموقع بسهولة
وتطل الكثير من الاعلانات التجارية
لهذا تاخرت في الرد
والان يقوم الجالاكسي بالمهمة
ريثما تعود المياه
وتنتهي الحالة النفسية لجهازي
اوتخف قليلا

Quote: لكن برضو تحمد الله ماشاءالله ياعثمان لانضاره لا صلعه ومن شكلك كده والله اعلم ماعندك سكري الدغت والكلسترول وباقي الجرور يعلمبهن الله امد الله في عمرك ومتعك بالصحة والعافية

..
تحياتي مرة ثانية اخي عبد الوهاب
لا اعتقد ان هناك مغترب بلا ضغط وبلا سكري
لايمكن ان يصلك تلفون من السودان
الا وتجد بعدها ان ضغطك 341 درجة
وحبوب الضغط هنا في السعودية لاتصلح لن تبلعها على شكل جرعات
بل لابد ان تضعها امامك في جردل وتقرش منها كلما دعت الحاجة لذلك
المابرفع ضغطك هنا شنو
تقوم من النوم تلقى السفنجات كلها شمال
تمشي تشيل المعجون تلقاهو معصور من النص
تفتح الثلاجة عشان تشرب موية تلقاها فاضية
ومرات تلقى فيها غتاية حلة تجيك واقعة
والحلة ذاتا مافي
فجاة يظهر ليك ايجار البيت في السعودية
تدفعه بشق الأنفس
شوية ايجار البيت في السودان
بعد شوية استمارة السيارة
تجددها وتجدد معاها التامين
وتنتهي الاقامة وينتهي الجواز
هذا طبعا غير رسوم المدارس
وحفلات التخريج
وحنة الشمس المشرقة

وهذا كله كوووم ويكون ساكن معاك واحد مواليد الخمسينات كوووم تاني
قصص قديمة بالليل من زمن عنقريب { القد }
نضارة سميكة كل مرة تلقاهو يفتش ليها
تديهو شاي الحليب يخلي الكباية في محلها
بعد شوية يقوم يشوتها ليك يوصلها المغسلة
اها المابجيب السكري والضغط والصلعة شنو ؟؟؟تنتهي الرخصة

Quote: Ali Bob بوست جميل جدا جدا شكرا ابوحراز

..شكرا اخي علي من ضهاري الفيس بوك
اشكرك مرة اخرى على الاعجاب
وكما تعلم فان كل المعجبين بكاتاباتي هم من { الرجاااااااال } للأسف !!! { وش مدردق من الضحك }
وهذه الصورة من الاعجاب تحز في النفس كثيرا !!
وسعيد جدا بان تنضم الى هؤلاء !!!


هذا البوست هو البوست الضكر بلا منازع !!!!

Quote: بين وبينك كده ماممتعه نهائي هههههههههههههههههها ياها الدنيا وعمل السنين ياصاحبي بس برضو لسع فيك الروح ربنا يديك الصحة والعافية احسن حاجة صور مرحلة الشباب دي الواحد يحرقه بي جاز ويريح نفسو من المغسة الكتلت سيده

..
تحياتي العميقة أخي { ع . ع . ع } عمر عبد الوهاب عثمان
يشهد الله في مرة من المرات سالت الوالدة من صورة
وقلت لها دا منو ؟؟
وقالت لي دا انت !!!!!!
الصورة في رابعة ابتدائي او ثالث على ما اذكر
الجلابية مافيها ولا { زرارة }
الشعر جزء في ام ضريوة
وجزء في عد الغنم
سفنجة عجيبة جدا
وتشوف الوش تقول الشافع دا كشطو كف قبل شوية
لم اصدق نهائيا انها صورتي
وانا الان ابحث عن هذه الصورة وباي ثمن
لا ادري اين ذهبت ؟؟

وفي الثانوي حينما كنا باولي ثانوي
ايام الحب الجميل والبريء والأصيل
حب الجوابات والرسائل الملتهبة
والذي رغم طعمه الرائع والمدهش فقد كنا نعاني فيه كثيرا مع الحبيبة
يعني عادي ممكن تكتب الجواب
ويقعد في جيبك 25 يوم
ويتقطع
وتكتب مرة ثانية
لن ملاقاة الحبيبة لم تكن بالشيء السهل
وليس كما نراه الآن
مجرد مس كووول وتلقى كل شيء امامك بلحمه وشحمه وكامل قواه العقلية
وجدنا واحدة غبيانة في احدى المجلات وهي تطلب التعارف
وقد كتبت عنوانها وصندوق البريد
واخبرت صديقي بهذا الكنز بطريقة فيها نوع من العباطة والهبالة
وذكرت له انني سارسل صورتي لها
والمدهش انه ذهب معي لبوستة المدرسة آنذاك
ورمينا الجواب
ولم يدر بخلدي ان صديقي قد ارسلت لذات الفتاة
بل ارسل صورته ايضا
والمدهش ان الرد اتانا سريعا وفي يوم واحد
وفتحت رسالتي بلهفة
فاذا بي اجدها وقد { قددت عيوني بالصورة بمسمار حاااد }
اما صديقي فقد قطعت له راسه تماما
ولم تترك له الا زراير القميص !!!!!

قال تعارف قال !!!!

الأخ الظريف أبو حراز
الحمد هذا الموضوع لا ناقة لي فيه ولا جمل.
لا بعرف اسوق ولا داير اعرف عشان المشاكل الزي دي بالرغم من ان عدم السواقة مكلف للغاية. يا خي ما عندك حل للناس البمشو كداري .؟ برضو ديل عندهم مشاكل بالكوم وبحتاجو لتقديم بعض النصائح.
خالص التحية
منتظرنك بهناك، من التلجة البتحتل وتقلع في كباية العصير وعيييك.

الأخ الظريف أبو حراز
الحمد هذا الموضوع لا ناقة لي فيه ولا جمل.
لا بعرف اسوق ولا داير اعرف عشان المشاكل الزي دي بالرغم من ان عدم السواقة مكلف للغاية. يا خي ما عندك حل للناس البمشو كداري .؟ برضو ديل عندهم مشاكل بالكوم وبحتاجو لتقديم بعض النصائح.
خالص التحية
منتظرنك بهناك، من التلجة البتحتل وتقلع في كباية العصير وعيييك.

Quote: الأخ الظريف أبو حراز الحمد هذا الموضوع لا ناقة لي فيه ولا جمل. لا بعرف اسوق ولا داير اعرف عشان المشاكل الزي دي بالرغم من ان عدم السواقة مكلف للغاية. يا خي ما عندك حل للناس البمشو كداري .؟ برضو ديل عندهم مشاكل بالكوم وبحتاجو لتقديم بعض النصائح. خالص التحية منتظرنك بهناك، من التلجة البتحتل وتقلع في كباية العصير وعيييك.

تحياتي العميقة أخي اسحاق وشكرا من الأعماق
يوم امس الجمعة كان الكثير من اهلي حضورا بفداسي الحليماب
وذلك لزواج ابنة خالتي والخال عبد المطلب خوجلي
أو ما يطلق عليهم بـ { الدفعلاب } !!!!
المشي بالأقدام فيه الكثير من المتعة
وقد جربناه ايام الدراسة حينما كنا نمشي كثيرا
هل تصدق احيانا في الخريف كنا نمشي كداري من ودربيعة الى مدني
وأكاد اجزم ان الله كان ينزل علينا جندا من السماء آنذاك
والا كيف قطعنا كل هذه المسافة الطويلة
والله مرات تكون ماشي المدرسة الثانوية
وتكون الأمطار قد فعلت فعلتها
لهذا تحمل شنطتك الحديدية على راسك
وتتوكل على الله
ومن ثم تذهب
وسرعان ماتجد نفسك امام حوش المدرسة
الآن حينما اقطع هذه المسافة وبسيارة موديل 2015 اقطعها بشق الأنفس
في السودان اعشق المواصلات أكثر من السيارة الخاصة
وان كانت الأخيرة تساعدك على قضاء مآربك وحوائجك بكل سهولة
لكن المواصلات تفتح اآفاقك الى عوالم أخرى
حكاوي الناس
وبساطتهم
وتصرفاتهم
وخلافاتهم مع الكمساري
والشتائم التي تصدر ما بين الحين والآخر للسائق
خاصة حينما يتجاوز في منطقة خطرة
او ظهور شاحنة حجم عائلي من الجانب الآخر
تدخل الحافلة على هيئة راكب عادي
وتخرج وانت على هيئة كتاب
كتاب مليء بشتى انواع المعرفة الانسانية
وكثيرا ما تكون مثل هذه السفرات مشروع مقال جديد

سلامي لابوحراز
والله انا من المعجبين بطريقتك في السرد وخفة دمك وكل ما اقراء ليك مداخلة اضحك لما الناس بسالوني مالك مالك..

علي حال انت ممتع وانا جاري ورا مواضيعك منذو انا خارج البورد
شكرا علي نشر الفرح في انصاف الليالي

Quote: سلامي لابوحراز والله انا من المعجبين بطريقتك في السرد وخفة دمك وكل ما اقراء ليك مداخلة اضحك لما الناس بسالوني مالك مالك.. علي حال انت ممتع وانا جاري ورا مواضيعك منذو انا خارج البورد شكرا علي نشر الفرح في انصاف الليالي

وسلامي لك ايضا اخي الكريم {Suleiman Todi}

اليوم باستطاعتنا ان نقول أن أحد المعجبين الرجال قد انضم لقائمة الاعجاب

اي ما اسميها قائمة الاعجاب { الضكر }

فالبوست يستحق ان ياخذ شهادة الأوسكار على نوعية المتداخلين

فكلهم ما شاء الله رجااااااااااال

ويندر جدا ان تجد بوست عدد قراؤه فاق الأحد عشر الف

وأكثر من مائة مداخلة

كلها مداخلات رجالية بامتياز

يعني نقدر ان نقول انه لايوجد اي اسكريت حائم هنا

ولا اي ثوب مشجر !!!!

شكرا لإعجابك

ولاتنس ان الكاتب حينما يحس بان فكرته وصلت للقاريء

يشعر حينها بمزيج من السعادة والغبطة

ان تلامس احاسيس الآخرين

وان تمنحهم الدهشة والابتسامة فهذه قطرة من محيط وادوات الكتابة

وهذا الشيء يدفع الانسان ليفكر مليا

بان يحيل هذه الكتابات في شكل { بخرات }

علها تساعد في علاج الاكتئاب

وتمنحنا بعدا آخر للحياة

قال توب { مشجر } قال !!!!

بوست جميل ابو حراز

تشرفت بمتابعته فهو سلس ودمه خفيف

واصل

واصل

بليز

بوست جميل ابو حراز تشرفت بمتابعته فهو سلس ودمه خفيف واصل واصل بليز

تحياتي أخي محمد يوسف
ويؤسفني جدا تاخير الرد نسبة لاستخدام الموبايل
وبعد غياب طويل استخدم اللاب اليوم
شكرا لمشاعرك الرقيقة
وشكرا مثلها لرفع المعنويات
سأواصل باذن الله البوست
والذي كما ترى انني احيانا اخرج عن النص
واحيانا اخرى لا التزم بالمسار الأيمن كما تفعل الشاحنات
وانما البوست فيه الكثير من التفحيط

صديقي أبوحراز
تحياتي
قلت عليك صديقي نظرا للحب من طرف واحد ( طبعا أنا) بقرأ لك وأحببتك من كتابات السمحة....
المهم اليومين دي أنا مشغول شوية وحتى هذا الخيط ما قريت فيه التكتح لكني محتاج رقم
جوال بوردابي من ناس جدة وهو المحامي عصام دهب فلو عندك أجدعه لي رجاء ولا أمرا...

Quote: بو حراز...سلام وشوق كتير.. الجري وراء المعايش لم يترك لنا وقتا للتواصل...صادق الود

أخي نايل الجميل كما النيل
كما البحار
كما المحيطات
كما الأمطار ةكما الغمام !!!!
فترة طويلة لم نلتق
وانت اول من نشرت لي في المنتديات
واحتضنت قلمي
وتركت له ثقوبا من الضوء يطل منها
وافسحت لي الكثير من الدروب في منتديات النيلين
لك التحية 00 اين انت الان
وهل لازلت تصارع في حلبة الغربة
ام استقر بك المطاف في الوطن ؟؟

Quote: وذلك على طريقة الحلاق المصري بالطائف والذي سلمته راسي للحلاقة وكل الونسة كانت عن النيل والزراعة والسودانيين ناس طيبين وحينما انتهى وقال لي نعيماً أخرجت له عشرة ريالات فاقع لونها تسر الناظرين طوالي قال : ما تخليها علينا يا ابن النيل !!! طوالي ارجعت القروش في جيبي ولم اعطيه اي فرصة ليتنفس وخرجت وسمعته يقول { دا انت خربت بيتنا } !!

ههههههههههههههههههههههههههه
بالغت يا ايو حراز
المصري تلقاه 3 يوم صايم عشان يعوض الـ 10 ريال دي

Quote: ههههههههههههههههههههههههههه بالغت يا ايو حراز المصري تلقاه 3 يوم صايم عشان يعوض الـ 10 ريال دي

تحياتي أخي عماد الدين

عارف الوست بقى زي سوق أم دفسو

شيء حلاقة

وشيء جمارك

وشيء اقاشي

وبمناسبة الحلاقة دي فانا استمتع كثيرا حينما اذهب لسوق المدينة عرب

وهو ايام الثلاثاء والسبت

وأذكر ان حوارا اتى الينا وقال :

{{ من رآى شيخنا ايام السبت والثلاثاء } دخل الجنة !!!!!!

قتلني الضحك وقتها وقلت تاريهو سوق المدينة عرب مابراهو !!!!!

يا اخي سوق المدينة عرب من أجمل اللوحات التشكيلية المتحركة التي رأيتها في حياتي !!!

فسيفساء عجيبة من الألوان والناس

وكثيرا ما يعجبني سوق الحمير

والحلاقة على الهواء مباشرة

اي حلاقة في بث مباشر دون اي ترتيبات

كرسي

ومرايا معلقة في عووووود على قول الفلاتي !!!!

وضع لي الرجل الفوطة وبدأ يحلق

وانا في قمة الاستمتاع

صالون الحلاقة الذي اجلس فيه عادي يمكن يجيك حمار جاري

غنماية جارية

امراة

شفع متشاكلين

كديس ساكي كديسة

كل هذه المناظر يمكن ان تراها

لكن الشيء الذي لم اكن اتوقعه ان الحلاق بعد ان بدأ في راسي

فجاة قام جاري ومعاهو العدة

تركنا انا والفوطة والكرسي

ولم تنتهي دهشتي اذ قال لي احدهم { دي كشة الخدمة الالزامية جات السوق } !!!!

هجمة مرتدة

واحد حلفاوي ومعاهو واحد من اجماعتنا هل العوض

لقو ليهم خشبة وقعدوا يتغالطوا فيها

الحلفاوي يقول دي { هشبة }

بتاع اهل العوض يقول ليهو يازول دي اسمها خشبة

اها قابلوا فلاتي واحتكموا ليهو

الفلاتي قال ليهم { دا اسمو أووووووود } !!!!!

أتمنى من أخي بكري ان لايغضب مني

ولكن سبحان الله هناك اشياء غريبة في الحياة

لاتعرف هل هي مصادفات

أم أنها أقدار

والقصة وما فيها ان أحد قراء سودانيز أون لاين اتصل مبديا اعجابه بهذا البوست المتواضع

وذكر انه يواصل قراءة البوست حتى المداخلة 114

وتحدثنا في امور كثيرة جدا تتعلق بسودانيز اون لاين

والاستقرار بالسودان

والغربة

ودراسة الأبناء

والمذهل ان لديه قطعة ارض رقمها { 114 }

وهي في حي الجامعة { أم درمان الاسلامية } درجة أولى

وفي الحقيقة اخذت الأوراق عن طريق الواتس وارسلتها للوكالة لعرضها هناك

ووعدته ان اعرضها على المقربين مني هنا في السعودية

وانا استاذنت من الوكالة لمدة ثلاثة ايام بان يكون لي الحق في التصرف فيها

ولو رغب ايا من اعضاء سودانيز اون لاين فيشهد الله لانريد سوى الأجر

وسوف اوصلكم بصاحب القطعة مباشرة ايام الثلاثاء الأربعاء الخميس ان شاء الله

ومن بعد ذلك من يرغب فيها بامكانه ارسال اي احد من الذين يثق فيهم للوكالة العقارية

مع تمنياتي التوفيق للجميع

واعتذاري مقدما للأخ بكري ابوبكر

ولكل متابعي بوست الافراج المؤقت

00966507063205

واحدة من فوائد الافراج أن السيارة في السودان ذات اهمية كبيرة جداً

لدرجة أننا أحيانا نجهز افطارنا في رمضان في الحصاحيصا

ونذهب لنفطر مع الوالدة في ودربيعة

ومن ثم ارجع مرة اخرى للذهاب لنادي النيل الحصاحيصا

والمسافة تقريبا 70 كيلو

كل مشاورينا انجزناها بكل سهولة

اضافة الى طلاق الأسرة للركشة لمدة قاربت الـ 75 يوماً

ولم نغفل جوانب الترفيه مطلقا

فكلما يتسلل الملل نذهب في رحلة

قد تصل في بعض الأحيان لزيارة الابن ابراهيم في كلية الطب بكسلا

في حين اننا لم نتمكن من زيارة شقيقه الأكبر بكلية الطب دنقلا

نسبة لبعد المسافة

وزحمة برنامج الاجازة

السيارة تضعك بين نارين

إما أن تستمتع بها على حساب اشياء أخرى أكثر أهمية

واما ان تبيعها وترجع العرجاء لي مراحا

لهذا في الأيام الأخيرة للإجازة تتشابك على راسك ملائيين الأسئلة

لكن المفاجأة حينما وصلنا لقرار البيع كانت الجمارك طامة كبرى

فمعظم المشتريين يطلبون منك سيارة مجمركة

والجمارك 200 مليون فاكثر قد تصل الى 231 مليون

وحاولنا المستحيل لبيعها بدون جمارك

على ان يتحمل المشتري دفع الجمارك

ومن ثم خصمها من المبلغ المتفق عليه

ولكن لم نوفق في البيع

ولم نوفق في الحصول على مبلغ الجمارك

لهذا قررت الحضور بها لبيعها بالسعودية

واجهتني ثلاث مشاكل مع إدارة المرور ..

سواء المرور الثابت أو المتحرك

المشكلة الأولى { تصريح المرور }

وهو ان لم تخني الذاكرة يتم اعطاؤك له في سواكن بناء على فترة التأمين ..

يعني لو التأمين شهر يتم التصريح لك لمدة شهر واحد

واقصى تصريح هو ما يتفق مع المدة الممنوحة من شرطة مكافحة التهريب وهي 3 شهور ..

لهذا لايتجاوز ناس المرور هذه الفترة

لأن الفترة حينما تنتهي تتطلب تجديدا من شرطة مكافحة التهريب

والأدهى والأمر ان هذا التصريح حينما ينتهي لايتم تجديده الا في ادارات محددة

فمثلا مرور الحصاحيصا لايقوم بتجديده

وحينها عليك الذهاب الى الا مرور ولاية الجزيرة في مدني

وحتى في الخرطوم الكثير من ادارات المرور لاتجدد هذا التصريح

وبالطبع يتم تجديده بدفع رسوم لذلك

وانتهى يوم كامل في الاجازة بسبب انتهاء هذا التصريح

حيث لنني حينما ذهبت لادارة المرور في مدني لم اجد المحاسبة وهي موظفة مدنية

وانتظرت فترة طويلة ليتضح انها مع { سيد العدة المصري } !!!

واتت داخلة وهي تحمل الصحون واطقم الكبابي والملاعق ..

وبعد ان دخلت اتلمن كل نسوان المرور

وانا واقف زي ابو القدح زول واحد سالني مافي

وبدأت تحكي لهن ويسالنها

والمدهش كلهن يتكلمن في وقت واحد

والبطلة ترد على الجميع .. سبحان الله !!!

دي بكم الكباية دي والله لكن الصينية دي حلوة !!!!

وبعد شوية تفرقت { العدة } بين القبائل اللطيفة

واحدة ماسكة صحن والثانية براد والأخرى كفتيرة !!!! للحديث بقية !!!

متابعة للسرد للجميل

Quote: متابعة للسرد للجميل

. شكرا من الأعماق أخي محمد درار
واتمنى ان يكون القراء والأشخاص المعنيين قد وجدوا الفائدة المرجوة في هذا البوست
والله تقلوا ادبكم الا اقول ليكم
{ أنا افضل اعلامي يكتب عن الافراج المؤقت 00 لاغرو 00 وماصاحبكم بمجنون } !!!!


عندنا مرة واحد قريبنا
الحكم احتسب عليهو ضربة جزاء
وعمك زعل لكن الحكم خاله اخو امه
قام قال للحكم : والله لو ما انت خالي
وانا بحترمك كان هسي سببيت ليك دين !!!!!!
خاله قال ليهو : عليك الله هسي خليت شنو في الدين ؟؟؟؟

المشكلة الثانية { الضربة التي بسببها تم اخذ التأمين }
وهي تهشيم على الزجاج
ولأن اجراءات الشيك تاخرت بسبب مبلغ التامين المرتفع
لهذا حرروا لي اكثر من مخالفة لعدم وجود بلاغ بالحادث
رغم انني اخبرتهم اكثر من مرة بانه تم البلاغ
وان الاوراق الخاصة بذلك تحت الاجراء ولكن لاحياة لمن تنادي
ولأن اصل البلاغ كان مع الأوراق لدى شركة التأمين
لهذا اضررت للذهاب للشركة مرة اخرى لأخذ صورة من البلاغ
من هنا نصح الجميع بالاحتفاظ بصورة البلاغ
لتقديمها لادارات المرور السريع حتى لايتم تحرير مخالفة بذلك

المشكلة الثالثة هي السرعة
كل مخالفات السرعة التي تم تسجيلها لم تتجاوز سرعتي فيها 94 كلم / الساعة
في حين ان طبلون السيارة 240 كلم
وحتى هذه الـ 94 تاتي حينما تضطر ان تتجاوز او تجد الزمن والمكان مناسبين لزيادة السرعة
لكن الغير مناسب هو وضع الراداد في ذات المكان الذي ظننت انا انه مناسب
والأفضل ان يكون هناك زيادة 10% عن السرعة المحددة
يعني ممكن بعد ال 99 كلم/الساعة يتم اعطاء المخالفة
هذا مع الوضع في الاعتبار سوء الطرق والشاحنات الطويلة

أكثر الأشياء التي كانت تدهشني في رحلة العودة ..
وخاصة ان الوقت كان نهاية لموسم الأمطار ..
مناظر الخضرة التي تمتد بامتداد البصر ..
خضرة ومياه واغنام تأخذ طعامها بكل حرية ..
وفي مساحات شاسعة ومريحة للنفس الانسانية ..
وكانت تتملكني الحيرة ..
كيف يصل سعر الخروف في عيد الأضحى قرابة الـ 2 مليون جنيه
ونحن نستمتع بهذه الطبيعة التي تمنح الغذاء مجانا !!!
والخضرة احياناً لاتجد لها مكاناً شاغراً بالأرض
فاجدها تتسلق الجبال في غاية التطرف من الجمال !!
وشطح بي خيالي بعيداً وانا اسمع في الطير المهاجر
ومنديل صلاح احمد ابراهيم العجيب
والنيل الذي يغازل كل من يجده أمامه !!!!
شطحت وقررت وقتها لو كنت وزيرا للمالية ..
لأصدرت قرارا لبنك السودان لصالح جميع المغتربين
بان كل من يحول 50 الف ريال عن طريق البنك يمنح 5 فدان مجاناً لإستثمارها والاستفادة منها
وتقديرا لما عاناه في غربته واكراما لكل سنت رفد به الاقتصاد السوداني
اعتقد ليس من الصعوبة بمكان اصدار مثل هذه القرارات
فهل هناك مشكلة من اقتطاع مليون فدان صالحة للزراعة لهذا الغرض كتجربة اولى ؟؟؟؟
ويطيب لي في هذا السياق أن أحيي مديري في مؤسسة الرهد الزراعية الدكتور عثمان بليل
وهوشقيق الجراح الشهير الدكتور عمر بليلة
فالفترة التي عملت بها بمؤسسة الرهد الزراعية وكنت قريبا منه
وذلك بعد ان استعان بخبراتي المتواضعة في ادارة العلاقات العامة والاعلام ..
مع { اعمامي } لا اريد ان اقول زملائي حتى لاتعتبروني من عجايز سودانيز
فقد كنت صغيرا والله وقتها ووسيما
اما الآن جضوم وترهل وكرمشة وصرة وش تقطع الرزق !!!
اعمامي كامل عبد الماجد ومحمد عبد القادر ابوشورة
وقد اتخذ قرارا بعد أن تقدم بعض الزراعيين الجدد للعمل بالمؤسسة
ولم تكن هناك وظائف شاغرة واراد ان يستثمر حماسهم ورغبتهم الأكيدة في العمل
فطرح على قدامى الزراعيين الاستقالة مقابل 20 فدان تمنح لكل واحد منهم
ترددوا في البداية ولكنهم اتخذوا القرار
ليتحولوا لرجال اعمال كبار الآن
واصطاد بليل عشرات العصافير بحجر واحد
فهل ياترى يتم تفصيل السياسات والقرارات لأجل حقن الاقتصاد المتهالك
ومن ثم ضمان تدفق العملة الصعبة في جسد هذا الاقتصاد ؟؟؟؟
إنها اضغاث أحلام
من يدري ربما تتحقق يوما ما مثلما رفع يوسف ابويه على العرش { وخروا له سّجداً}

.حينما اغلقت كل الطرق التي تؤدي لبيع السيارة بالسودان
اصبح لاخيار ثالث الا بالرجوع بها للسعودية وبيعها هناك
وقلت سوف اجرب المعرض الذي اشتريت به عن طريق التقسيط
ومن ثم ان لم يشتريها اعرضها على جهات أخرى
يوم ان تقرر الرجوع مرة اخرى هذا اشبه بشخص سيتم الذهاب به بعد قليل لمقصلة الاعدام
تتشابك الكثير من الأسئلة على راسك
وتبدأ تتعمق في النظر الى اطفالك
وان كل تلك الأيام الجميلة ستتحول الى ايام قاحلة بدونهم
وتتحسن العلاقات بينك وحكومتكم الرشيدة في الأيام الأخيرة
لدرجة انك ممكن تقول ان البيت مسكوووون !!!
وتكثر كلمات على شاكلة ياروحي ياحبي !!!
طبعا ضهرية وشنطة السيارة يتم حجزها مبكراً ..
شيء صواني راجعة السعودية
وشيء مباخر
وشيء ازيار وقلل
وكنش
وكمشة
وحنة الدامر
وشيء مقاشيش رغم ان البيت سراميك !!!
اما ريحة الدكوة فهي تلازمك حتى وصولك لسواكن
بجانب الحرجل والكركدي والويكة والقنقوليس والعرديب والفول السوداني وسكسكانية نوبو
ليه السعودية مافيها سكسكانية ؟؟؟؟؟؟؟
رحلة العودة من البيت الى سواكن مرهقة جدا
وليس كرحلة الوصول
فهذه الأخيرة يقلص مسافتها وزمنها لشوق لرؤية اهلك
يعني المسافة من سواكن الى الحصاحيصا تقريبا 945 كلم
لكن المسافة من الحصاحيصا الى سواكن تزيد على الألف وخمسمائة كلم
الميزة الوحيدة انه بامكانك ان تكسب اجر وتجد بعض الواقفين في الطريق
فتحملهم معك
ولكن حينما وصلت سواكن اتضح لي ان شحن السيارة من الخرطوم الى جدة افضل
فكثير من اصحاب الوكالات يستغلون ظروفك
ويرفعون اسعار التذاكر ويتحججون بان الباخرة مليئة بالكامل
كما ان هناك مشكلة اخرى
بعضهم يقول لك ان مادفعته يشمل كل شيء
ويطلبون منك ان تذهب مباشرة لعمل تاشيرة المغادرة والدخول للباخرة
ولكن بعد ان تدخل الميناء تتفاجأ بالعديد من الرسوم التي تكون في انتظارك حيث انهم لم يسددوها اطلاقا !!!

دلفت ليلة أمس الى هذا البوست ...
وذلك لإكمال ما تبقى من هذه الرحلة
بعد ان بدات معكم رحلة العودة في المداخلة السابقة
وكنت قبلها قد شاهدت مقطع فيديو حينما كنت ابحث في اغنية قديمة لعثمان حسين
لاتسالها كم تعانقنا على ضفة لحن !!!
هذه الأغنية تفجر في دواخلي الكثير من البراكين الخامدة
وتحيلها الى ينابيع
وتحدث ثقوبا وندوبا في اعماق الجينات
وهي من الأغاني التي كنت اسمعها على ضوء القمر
وانا ارمي بسريري بعيدا في الحيشان الواسعة آنذاك ..
والتي كانت تضم بداخل اضلعها الأربعة عشرات الأسر !!!!
الآن .. وما ادراك ما الآن .....
نفس هذا الحوش
ونفس هذه المساحة ليس باستطاعتها ان تحمل أسرتين
فهل ياترى تقلصت مساحة الحيشان والنفاجات
أم تقلصت مساحة القلوب ؟؟؟؟؟؟؟

Quote: وكنت قبلها قد شاهدت مقطع فيديو حينما كنت ابحث في اغنية قديمة لعثمان حسين

فات علي ان اتحدث عن موضوع هذا الفيديو ..
وهو في نادي الاعترافات ..
وكان مع بلة الغائب ..
طبعاً لو كان ما يقوله صحيحاً فهذه والله كارثة كبيرة جدا
وتكمن الكارثة في ان بعض حكامنا يديرون السودان كله بتنبوءات واقاويل بلة وغيره
فالرجل ذكر انه صديق شخصي للمرحوم نميري
وانه يدخل القصر الجمهوري كما يدخل ديوانه
وان النميري يزوره في بيته
وقد حذر الرئيس السابق من عدم السفر الى امريكا
متحججا كما قال بانه سيفقد كرسيه
ومما يدل على ان العلاقة بينه والقصر الجمهوري في اندياح تام
ولاحواجز بينه وبين المسئولين
قال انه تفاجأ بمغادرة نميري البلاد في الرحلة التي حذره منها
وذهب مباشرة الى عمر محمد الطيب وهو يشتاط غضبا من الرئيس
لأنه لم يسمع كلامه على حد قوله ..
فرد عليه الطيب : نحن مابنسدها ؟؟؟؟؟؟؟؟؟؟؟؟
أما العلاقة بينه والحكومة الحالية كما ذكر سمن على عسل فيما معناه
بل لم توقفه الحدود عن التدخل في أكبر مصانع القرار
فذهب بعيدا الى مصر وحذر مبارك من ثورة عارمة
وليس المغرب ببعيدة عنه فقد اهداه ملك المغرب بيتا في مساحة 4000 م2 يعني فدان الا شوية
وهو يستقبل في المغرب استقبال الأبطال
وتربطه علاقة وطيدة بالملك الراحل
انا ماعارف لماذا لانستعين بالعلماء في الاقتصاد والعلوم والطب والتكنولوجيا
والزراعة والتربية وشتى انواع العلوم والمعرفة الانسانية
اليس هؤلاء درسوا عشرات السنين من اجل حل مشاكلنا وقضايانا
والله حقيقة اذا كانت حكوماتنا تدار بهذه الطريقة
فالنقول للجميع
ا
ل
ف
ا
ت
ح
ة !!!!!!!!!!!!!!!!!!!!!!!!!!!!!!!!

50 الف جنيه بالقديم ليس بالشيء السهل
خاصة حينما تكون على سفر
بعد ان تغديت بسواكن
كان على يميني مباشرة كشك به ست شاي اثيوبية
وكان الكشك مكتظاً عن آخره
لدرجة انك لو قررت ان تشرب قهوة في ذات المحل
فلابد ان تقف قبل ان يقوم احدهم من مقامه
ويبدو لي انه لن يقوم بسهولة
فما رأيته ان كثيرون منهم لاشاي ولاقهوة امامهم
وحينما قادني فضولي اليهم
قام احدهم مشكورا وقال لي تعال ياخال
فجلست مكانه
وكانت الأثيوبية الجميلة تمرر عليهم ورقة انجليزية
رايت كل واحد يرمي بها للثاني
وحينما وصلتني تنفست الصعداء بعد قراءتها
وكانت نتيجة فحص طبي
ولحسن الحظ النتيجة سالبة
وكانت عن فايروس Human Immune-deficiency Virus
أو ما يعرف اختصارا بـ {HIV}
,ويبدو لي ان النتيجة لو كانت ايجابية يتم الحجز على المريض
على كل حال نرجع لموضوع الخمسين الف
والتي كانت بجيبي واعطيتها لست الشاي
وكباية الشاي كانت بجنيهين والقهوة 3 جنيهات
يعني المتبقي لي 45 جنيه
ولكن جلست اكثر من نصف ساعة ولم ترجع لي الباقي
وحينما طلبت باقي المبلغ
قامت بازاحة الطرحة من صدرها
فقلت لها يا ابنتي انا بقيت زول بامية مفروكة
وتعبئة اسطوانة غاز وشراء الكهرباء وحنة التاج
اديني الباقي
فاخذته وسط ذهول الشباب المتواجدين ونظراتهم العجيبة
تذكرت ابن خالتي
وقد غلبته اليوم بتصرفي هذا { 8 صفر }
فقد شربنا شاي سويا
وطلبت ست الشاي مبلغ بالزيادة فقال لها :
نحن ما اتونسنا معاك
ولا كنا قاعدين نعاين ليك !!!!!

السلام عليكم بعد غياب
طبعا نحن في حالة طواريء منذ اكثر من اسبوعين
بسبب السيول والفيضانات
والتي احدثت الكثير من الخسائر رغم جمالها وبريقها الأخاذ
وقد ساعدت السيول هنا في محافظة الطائف
في انخفاض اسعار المياه
فقد اشتريت وايت { او تانكر } كما يسمونه قبل ثلاثة اسابيع بمبلغ 270 ريال
اي مايعادل قرابة المليون بالقديم
وكانت السماء تمطر آنذاك
وقلت لصاحب الوايت الا ترى السماء تمطر ؟؟
ومن المفترض ان يكون السعر في حدود 100 ريال
فرد ساخراً : اذهب للسماء لتعطيك بالمائة
اليوم وايت الماء انخفض من 300 ريال الى 30 ريالاً !!!
ويتوقع أن ينخفض اكثر من ذلك
مع تقلبات الطقس
وتقلبات الأسعار .. تذكرت انحناء الجنيه السوداني بكل وقار امام الدولار
واطلعت قبل قليل على عدد قراء هذا البوست { 14066 }
واتمنى ان ينتعش اقتصاد السودان ولايصل الدولار الى هذا الرقم !!

هجمة مرتدة
ذكر لي ابن اختي ان اسعار السيخ زادت بنسبة عالية جدا
حيث ان الطن الذي كان بـ 6500
اربتفع الى 9 مليون !!

مئات من سيارات الافراج تقف بجوار الفنادق بسواكن ..
كثيرون منهم في طريقهم للعودة لبلد الاغتراب ..
في السفرات الماضية بمجرد ان تصل الى سواكن ..
ياتيك كثيرون من اصحاب الوكالات وهم يعرضون الحجز لك وللسيارة ..
هذه المرة لم يتكرر هذا المشهد المألوف ..
وعليك أن تأخذ جوازك واوراق سفرك وتذهب لهم في عقر دارهم ..
وهناك تسمع آلاف الاعتذارات على شاكلة لاتوجد باخرة ..
ولايوجد حجز الا بعد يومين او ثلاثة ..
بل أن بعضهم يعقد موضوع السفر اكثر من اللازم ..
ويحبطك بان البواخر محجوزة لمدة اسبوع
وان هناك باخرة معطلة في جدة
وأخرى احتجزتها الشعب المرجانية !!!!
هذا السيناريو المرعب يجعلك تتحسس جيبك
وتدفع الأسعار مضاعفة حتى لاتتعطل بسواكن
والمدهش اننا جميعاً سافرنا وبنفس الباخرة وفي اليوم التالي مباشرة لوصولنا
وأجمل ما في الموضوع أن قصصنا جميعا مع اصحاب الوكالات متشابهة حد التوأمة
وكأن الكاتب
والسينارست
والمخرج
والممثلون
والكومبارس .. كلهم وااااااااحد !!!!




هجمة مرتدة
بالفندق الذي نزلت فيه يوجد 16 جوز سفنجات بجوار دورات المياه
جديدة كارت كما يقولون
ولكن كل السفنجات مقطوعة من امام اي بعد سير الأصبع الأمامي مباشرة
اخذت صورة لها وادهشني المنظر بكثير من الاستغراب !!!
سالت موظف الاستقبال عن هذه المذبحة التي حلت بالسفنجات
فصدمت أكثر حينما قال لي ان بعضهم ياخذ السفنجة معه !!!!!!!

كنت أود تخصيص هذه المداخلة لما حدث قبل ركوب الباخرة ..
واثناء صعودنا الباخرة ..
وكمية المعاناة التي حدثت ..
والتعامل بفوقية وغطرسة غريبة جدا ..
لكنني ساتوقف قليلا تضامنا مع كل الذين سقطوا في الاحتجاجات الأخيرة بالسودان ..
وكم يؤسفني
أننا في كل يوم نفقد ثروة قومية في غاية الثراء
ليس بالطبع هي البترول او الصادرات والمنتجات السودانية
بل هي الانسان
الانسان الأخضر الذي سيبني الوطن ويجعله يقف على اقدامه
طلقة تطفيء نورا من العلم
ربما سيكون مهندسا او طبيبا او عالماً بيولوجيا
وقد ذكر لي ابني العام الماضي ان طالبا زميله بكلية الطب قد قتل
لم يقتل برصاصة ولا بسم الزرنيخ
بل بسيخة !!!!!!
طالبا على وشك التخرج كان بامكانه ان يدير مركزا صحيا
وفي قرية نائية
يتم وأده في غمضة عين




إندياح حزين جداً
وتحطم الباستيل تحطم
وتحطم الباستيل وانهارت قلاع الظالمين
وتهاوت الأسوار واندكت اساطير المجون
ما السجن ؟؟ ما الباستيل ؟؟ ما القيد اللعين ؟؟؟
في سجن كوبر .. كان الشعب والنصر المبين
يا ما أحيلا الشعب يقتحم المعاقل والحصون
يا ما احيلاه وهو بقلب السجن لايخشى المنون
وهتافه ينساب .. برغم السجان يحتضن السجين !!!!

لأول مرة ي سودانيز ..
جانب من القصيدة التي اشتركت بها في الدورة المدرسية
والغيت باوامر من نظام نميري قبل تقديمها بيومين !!!!!!

{{ الحلقة ما قبل الأخيرة في هذا البوست الضكر }}
حينما كنا نعيش داخل أروقة قبيلة العزوبية عليها الرحمة والمغفرة
كان معنا احدهم يكره يوم الميز لدرجة لايتصورها عقل
ولهذا اشترى { حلة } كبيرة جدا
لأجل ان يطبخ طبيخا يمكث فترة طويلة جداً ..
قد تصل في الكثير من الأحيان الى مرور الدورة الثانية من ميز صاحبنا
واذكر انه اتى بكمية فاصوليا كثيرة
و2 كيلو لحمة وكمية من البصل والطماطم
وطبخ هذه الوصفة الاستثنائية
والتي تستحق ان تدخل موسوعة جينيس للأرقام القياسية
استمرت هذه الحلة قرابة العشرين يوما
فاأخذنا حميتنا وحاجتنا من البروتينات ربما لمدة عام كامل
وأطلقنا على صاحبنا من يومها لقب { أوشين } !!!!!!
وأوشين لمن لا يعرفه مسلسل ياباني ربما تجاوزت حلقاته الـ 300 حلقة !
لدرجة ان طبيخ الفاصوليا نفسه اصبح فيما بعد يعرف لدينا بطبيخ أوشين !!!!!!


أتمنى ان لايكون هذا البوست قد لحق باوشين
واصبح فيه الكثير من الملل
شكري لكل من مر من هنا
ولكل من نثر الضوء في ارجاء هذا البوست فجعله مشرقاً
واعتذاري لكل من خدشته كلمة
او موقف
او ارهقه حديثي
وساتحدث في الحلقة الأخيرة عن ركوب الباخرة
والعودة الى جدة متمنياً للجميع رحلة سعيدة

.{{1}} أكد علينا اصحاب الوكالات بالذهاب مبكراً للميناء
وذلك بحجة أنه يمكن ان ترجع بعض السيارات
ومن ثم ينتظر اصحابها حتى مغادرة الرحلة الأخرى
اي انتظار يومين
ومن ثم تسافر
شخصياً لم أهتم كثيرا بالموضوع وغادر كثيرون الفنادق منذ الثانية عشر
وان لم تتغدى او تفطر بالأحرى فذهابك للميناء يعني مشكلة كبيرة
الأكل سيء جداً في كافتيريا الميناء
والأسوأ منه الأكل المقدم في الباخرة
تحركت الساعة الثانية والنصف
لأتفاجأ بأرتال من سيارات الافراج العائدة للسعودية
لتدخل التفتيش مرة أخرى
هذه المشاهد لم تكن مألوفة من قبل
وكالعادة يدخل المخلصين كطرف ثالث في العملية
ولم تنته الاجراءات المعقدة هذه الا عند السادسة مساءا
وحينما سالت عن سبب هذه التعقيدات ذكروا لنا أن بعض المغتربين يقومون بتغيير السيارات
مثال المكينة والهيكل وخلاف ذلك 00
المهم توجهنا الى الباخرة وتم استلام السيارات
طلب العسكري المنتعل للسفنجة ان نقف في صفين
وقفنا بكل احترام
واتى نفس العسكري بعد وقوفنا ليطلب تغيير الصفوف
بحيث يقف المقيمين في صف واحد ويذهب المعتمرين ليقفوا في صف آخر
وجاطت الصفوف وكأننا في حرب داحس والغبراء
وقفنا نحن المقيمين على اليسار بينما ذهب المعتمرين ليقفوا على اليمين
واتى عسكري آخر ليطلب من المقيمين ان يقفوا يمينا ويذهب المعتمرين مكانهم
{{{ كل ما حدث هذا كلام فارغ وليس له اي معنى }}}
وبعد هذه الهمجية تحسست اوراقي والحمد لله وجدت قسيمة الزواج ضمن الأوراق
فاصبحت جاهزا للعسكري الأول والذي كان متجهاً نحونا
وأدركت تماما انه في هذه المرة سيطالب بفصل المتزوجون عن العزاب
ليقف كل منهما في صف !!!! يتبع ..

{{ 2 }} المغادرة ..
طاقم الباخرة سيء جدا
خاصة اولئك الذين تعاملنا معهم مباشرة
وعملية الدخول للباخرة محزنة
وفيها الكثير من الاهانة
وقد تعرض احد الطاقم للشتم والضرب اكثر من مرة
وهو مناط به استلام الجوازات والتي يتم وضعها على كرتونة بسكويت !!!!
وهذا المخلوق الأهبل يصيح في الركاب بطريقة مزعجة جداً
وقد تجرأ بطرد احد عسكر الشرطة طالباً منه الخروج
ولكن جاء الغيث من أحد الوقوف بالصفوف
طالباً من الشرطي عدم تنفيذ الأوامر والا ............ ؟؟؟؟
آنذاك هدأت الأمور وبدانا الدخول
ووقفت عند الاستقبال طالباً غرفة لي ولصديقي
لأتفاجأ بان الغرف لن يتم توزيعها الآن
وعلينا الانتظار ساعتين ريثما ياتي الشخص المسؤول
واصبحنا تحت رحمة هؤلاء العباد
حتى مضت الساعتين
وطلب منا اما دفع 200 ريال للزنزانة ذات السريرين
أو خمسمائة الف
وبعد ان دفعنا لم نستلم الغرفة الا بشق الأنفس
ثم دخلنا ووضعنا ما نحمله من امتعة شخصية
دخل علينا احدهم { مضيف بالباخرة } ليسالنا من اي المدن نحن في السودان !!!!
أجاب زميلي بانه من الكلاكلة فبدا يمدح في اهل الكلاكلة
وسالني من وين انت ؟؟ فقلت له من { الحشرو عباس } !!!
فقال لي دي في دارفور ؟؟ فاجبته بانها بجوار كافوري !!!!
ومن ثم طلب حق الحلاوة معللا ذلك بدخولنا للباخرة بسلام !!!!!!!
وبعد ان استلم المبلغ حدثت مشادة كبيرة بيننا
مما اضطره لاغلاق الغرفة بالداخل ومن ثم قام بارجاع المبلغ في الحال
واذا اعتبرنا ان هناك 200 غرفة فقط
يمكن لهذا الشخص ان يكون قد جمع اربعة مليون جنيه بالقديم !!!!!
هناك تفاصيل كثيرة بالرحلة
ولكن ساكتفي بهذا السرد المتواضع الذي اتمنى ان يكون قد اوصل الرسالة
المهم وصلنا بالسلامة
ولأول مرة كانت الاجراءات بالسعودية بطيئة جدا
سابقا كانت لاتستغرق اكثر من ساعة
ولكن استمرت الاجراءات لأكثر من 4 ساعات
واعني بها اجراءات تخليص السيارات واستلامها
السؤال : هل سيتم تكرار التجربة مرة اخرى ؟؟؟
متمنيا للجميع السلامة
واتمنى ان تكونوا قد وجدتم الفائدة المرجوة من هذا البوست

Quote: حكي طاعم

Quote: إمعاناً في ضكورية البوست .. سرد ممتع }

.
الأخ انور الأسد تحياتي لك
ولكل قرى الحلاويين الراقدة على صدر الجزيرة
تلكم القرى التي تتسكع انفاسها في شوارع وازقة الحصاحيصا
فتمنحها لمسة أخرى من الألق والجمال


الأخ {Tayeb} تحياتي لك من يمين القلب الى شماله
{ إمعاناً } دي تذكرني { كيتاً }
البوست ضكر بكل ماتحمله هذه الكلمة من معاني
رغم اننا حشرنا فيه الأثيوبيات ونانسي عجرم وهيفاء وكيم كاردشيان
ولكن كل ذلك لم يشفع له الا وان يكون ضكراً بامتياز !!
من يدري .. ربما في اللحظات الأخيرة
رغم ان البوست يحتضر الآن
ربما تاتي عصفورة
او فراشة تكسر روتين الشوارب الحايمة هنا دي !

.
.
.
سلام يا عثمان ابو حراز


حبيت امر واسلم

من المتابعين ليك ولبوستك هذا

سلام لناس الخرمه ابتداء من سعيد النمير

وحتي اولادكم اولاد ود ربيعه
.
.
.
.
.
.
شعب عملاق يتزعمه اقزام
.
.

الأخ ابوحراز وضيوفك الكرام
السلام عليكم ورحمة الله وبركاته،

سرد رائع ومعلومات مفيدة ،
سؤال : هل هنالك بواخر جديدة أم الحال كما هو ، البواخر من دولة الصين الشقيقة أخبارها شـــــنو؟
في ظل غياب الخطوط البحرية السودانية وإحتكار شركة نما لخط جدة بورتسودان يظل السفر الى السودان عبر البحر الأحمر به كثير من المخاطر،
وعلى الذين يرغبون في السفر بحراً عليهم عدم اصطحاب أسرهم وأطفالهم والتأكد من صلاحية اقامتهم لفترة لا تقل عن ستة أشهر ،
لأن إنتظارهم سوف يطول في ولاية البحر الأحمر،

اللهم اصلح حالنا وحال بلادنا ،

،

Quote: لأخ ابوحراز وضيوفك الكرام السلام عليكم ورحمة الله وبركاته، سرد رائع ومعلومات مفيدة ، سؤال : هل هنالك بواخر جديدة أم الحال كما هو ، البواخر من دولة الصين الشقيقة أخبارها شـــــنو؟ في ظل غياب الخطوط البحرية السودانية وإحتكار شركة نما لخط جدة بورتسودان يظل السفر الى السودان عبر البحر الأحمر به كثير من المخاطر، وعلى الذين يرغبون في السفر بحراً عليهم عدم اصطحاب أسرهم وأطفالهم والتأكد من صلاحية اقامتهم لفترة لا تقل عن ستة أشهر ، لأن إنتظارهم سوف يطول في ولاية البحر اللهم اصلح حالنا وحال بلادنا ،

تحياتي أخي صلاح حمد
لاتوجد بواخر جديدة انما هي المتعارف عليها
وحتى هذه المتعارف عليها قديمة الصنع
ولو رزقك الله بأن تقرأ تاريخ صنعها لما ركبت عليها
كما لاتوجد بواخر لا من الصين ولا من بوركينا فاسو
ونسمع كثيرا ان هناك باخرة سودانية في الصين
ويبدو لي ان الصين قد لحقت بولندا في صناعة السفن !!!
عدم وجود باخرة سودانية على هذا الخط الغني جدا شيء يدعو للدهشة
ويجب على المسئولين قدر الامكان الاستفادة من هذا الخط
حتى يعود ريعه للوطن ويرفد الاقتصاد السوداني

نصيحتك بعدم اصطحاب الأسرة نصيحة في محلها
وكثير من السيارات التي تحمل العوائل احيانا تتعطل ما بين سواكن وعطبرة
لهذا حتى لو سافرت العائلة معك عن طريق الباخرة
فالأفضل ان يستقلوا البصات السياحية للخرطوم
وتذهب انت برفقة احد الأصدقاء لو امكن او في شكل كنفوي

مع تمنياتي للجميع بالسلامة

Quote: سلام يا عثمان ابو حراز حبيت امر واسلم من المتابعين ليك ولبوستك هذا سلام لناس الخرمه ابتداء من سعيد النمير وحتي اولادكم اولاد ود ربيعه

.وعليكم السلام أخي بشير
سعيد جدا بطلتك مرة أخرى عبر هذا البوست
وسعيد اكثر باتصالك حينما عبرت من المياه الاقليمية لنا هنا بالطائف
هل توفقت في رحلة الافراج الأخيرة ؟؟

طبعا رمضان على الأبواب وكذلك العيد
وكثير من الناس يشد رحاله في هذه الأيام للعودة للوطن
أتمنى ان يكون هناك تسهيل للإجراءات
وان تكون هناك محفزات للمغتربين
تساعد ولو على حين غفلة في انعاش الاقتصاد السوداني
وتحقنه بالجرعة المطلوبة لينهض

ولكنني كثيرا ما الاحظ ان الاجراءات
وفي الكثير من جهات الاختصاص تذهب نحو عنق الزجاجة
تحياتي لك ولكل من معك
وتقبل تحيات اهالي الخرمة
وودربيعة الأنثى الراقدة دائما على ضفاف الخلايا
من هو سعيد النمير ؟؟؟

تحياتي لكم جميعا بعد غياب
معقول لسه البوست يمارس ضكوريته العجيبة
تحياتي لكم من السودان
الان لاشمس بالهرطوم
سحب كثيفة
وامطار
ورائحة البن التي تنفذ من كل المسامات
مياه على مد البصر
وخضرة بلاحدود
وغيوم.تقتل كل البكتيريا الضارة
ونساء يجلبن الرزق
وطن مليء بالموارد
ولايحتاج من ابنائه ان يتغربوا
وان يهاجروا
لكنه للاسف مليء بالفساد
السماء تعطي بلا حدود
وكذلك الارض
لكن الوطن لازال في حاجة الى تخطيط
والى كفاءات مليئة بحب الانتماء
طبعا تاني سافرت افراج
تكتك لعين فاقع لونه صدم السيارة من الخلف
واستلمت يوم الاربعاء الشيك
من شركة التامين
تحياتي لكم مرة اخرى
ولازلت اوصيكم واوصي نفسي
بان تكتبوا القيمة الحقيقية للسيارة
وهي قيمة السيارة زائد القيمة الجمركية
حتى لاتضيع حقوقكم وحقوق ابنائكم
متمنيا رحلة سعيدة للجميع

تحياتي لكم
وكل عام وانتم بخير
لازلت استمتع باجازتي بالسودان
حيث الموارد بلا حدود
والفساد الحكومي بلا حدود ايضا
الخرفان هذه الايام تمتد من الماء الى الماء
وكذلك الخضرة والجمال والطيبة
كل يجد متكا له في هذا البلد الجميل
الجميل في كل شيء
حتى في المفارقات
في شارع الهواء كما يسمونه لوحة كبيرة
مكتوب عليها خراف الاضاحي بالوزن
والكيلو 40 جنيه
تركب الركشة
وكلما تحاول ان تعرف السعر
يصر سايقها على سعر غريب جدا
وهو لايوجد في عالم الاسعار في كل بلدان العالم
كم المشوار؟؟
فيرد عليك بالنية ياخااال
سالته مرة اخرى
النية دي يعني كم ؟؟
فاجاب النية يعني بالنية
المهم وصلت مقصدي
وادخلت يدي في جيبي
واخرجت له جنيه حديد فاقع لونه
وحينما نظر اليه قال
لكن كده ماعصرت علينا ياخااال
فقلت له انا ماعصرت عليك
النية هي العصرت عليك
وزعل الرجل
لكن سرعان ماناولته 10 جنيهات
حينها تبسم ضاحكا تقول انا نملة
وقال تصبح على خير ياخاال
قال بالنية قال

وكان العيد يداهمنا كما الخريف
خبيز للمناسبات قبل العيد بيوم
غسيل الملابس قبل العيد بيوم
احذية تحتلج الى خياطة قبل العيد بيوم
ومثلها ملابس مفتوقة
رغم انه لايتم استعمالها في العيد
الدخول للسوق قبل العيد بيوم
وشراء الملابس والاحذية وادوات المكياج متلازمة نفسية
وفي لمة الصندوق لكل واحدة حكاية مع السوق
حكاية بكل تفاصيلها الدقيقة
مع زيادة في البهارات والتوابل
تضفي على الحكاية ملمح اخر
الخروف نفسه قبل العيد بساعات
رغم انني قد قمت بشراء الفرار
والسكين
والفحم قبل العيد باسبوع
رف مكسور بالدولاب منذ شهر
لم يتم اصلاحه الا قبل العيد بيوم
الخرفان على مد البصر
بل وان بعضها بائر
رغم هذا فاسعارها خرافية
صفيحة الفحم 60 الف
وهو مبلغ كان يكفي لشراء كل غابات النيل الازرق
صلاة العيد بدات في الثامنة
وبعدها الخطبة التي كانت غير واضحة
وغير مفهومة وتقليدية جدا
والامام ينقلك من واد في جهنم الى واد في سعر
وكل الاودية متشابهة
ياليت لو يتم اعادة النظر في هذه الخطب
بحيث تكون اكثر فاعلية وفائدة
جهزنا الفرار كما ذكرت لكم
وكذلك السكين
وكل ادوات داااعش
ولكن واجهتنا مشكلةفي الجزار نفسه
وتم الحصول عليه بعد بحث مضني
وبمبلغ 120 الف
رايت الفرح في عيون كل النساء والاطفال
ولكن هناك مسحة حزن على الكثير من الرجال
ربما هم خارجون للتو من مجزرة الطلبات
وربما وربما وربما
لكن حينما يرخي الليل استاره الجميع يبتسم!
العيد مع الاهل ممتع
بل ممتع جدا
ولوحة العيد مليئة بفسيفساء الالوان
وانسجام تام في تفاصيل اللوحة
كل عام وانتم بخير

هجمةمرتدة
فسيفساء دي كتبتها 10 مرات ومسحتها
وهي من الكلمات التي تعقدني جدا عند الكتابة
ومثلها القسطنطينية
ومعهد للعلوم والتكنولوجيا والموسيقي في امريكا كله تاءات و سينات
ومن الصعب،كتابته بالعربي ( ماسيوشيتسس )
وكل ما الواحد يكتبه
ياتقيف ليك سين في حلقك وتخنقك
ياتكون فطيت ليك فيهو 14 حرف

،
،
،
،كل عام وانتم بخير أخونا في الله أبو حراز

والتحايا موصوله لكل أهل ود ربيعه

خلينا نقابلك ونشوفك طالما انك في السودان

تلفوني : 0912123756

أخوك / بشير حسن
امدرمان / صالحه
،
،
،
،
،
،

تحياتي اخي بشير
الغريبة كنت متواجد بوكالة حي الجامعة
مربع 24
الوكالة جوار الطلمبة الثانية وانت قادم من الفتيحاب
قبالة كلية الهندسة
ولكن اتيت للعيد بالجزيرة
وكنت اود العيد بالخرطوم
ولكن خفت من اخونا بتاع الضهاري
صاحب الرايات الاربعة توفيق عيسى مكي
قلت يازول،احترم نفسك
وشوف اهل العوض وين
لكن ما اجمله من عيد
ان شاء الله نتقابل
ولو وصلت الوكالة في اي وقت يكون طيب
توجد عروض ذات مستقبل جيد في مخطط قدامى المحاربين
خاصة مربع 1 ومربع 2
وهذا المخطط سيكون مربح لمن يريد ان يبيع
ولكن الا في حال الانتهاء من الكبري الجاري تشييده الان
حيث سيكون هناك طريق اسفلت من بداية الكبري
يربط مابين الودي والعقيدات
وصولا الى مخطط المحاربين
وهذه القراءة ستكون صحيحة
ان جرت الامور على حسب التخطيط العلمي
ولكن ان تدخل فايروس الفساد
فعليه العوض ومنه العوض
انا شخصيا اشتريت قطعة منه

على غرار قندهار
وسوق الناقة
انتشرت بالعاصمة الكثير من محلات الشية
والتي غالبا ماتحمل عدة انشطة
مثال ملحمة وشواية سلوى بنت الابيض

ومن ينظر لهذه المحلات
والكمية الكبيرة من مرتاديها
يكاد يجزم بان الوضع الاقتصادي على مايرام
ولكن حقيقة خدمات هؤلاء النسوة
افضل بكثير من خدمات المطاعم
واكثر مالفت نظري نظافة المحل
وتقديم الشية مع الكثير من الملحقات
اي تلك التي تفتح الشهية
والمشروع يبدو انه ناجح بكل المقاييس
وعلى ما اذكر انني طلبت من الجزار اللحمة
وكنامجموعة زملاء
وفاجاني بان العمل متوقف
ريثما تنتهي السيدة من فطورها
وكان ذلك الساعة الواحدة ظهرا
وكانت التعليمات مشددة للجزار
بحيث لايمكنه ان يتجاوزها
والا لذهب للشارع في اليوم التالي
ذكرني الاستثمار في هذه المحلات
وانتشارها بكثرة
في الثقافة التي تلازمنا كثيرا نحن السودانيين
وهي الاستثمار في الشيء نفسه
حتى يفقد قيمته
فقد انتشرت في فترة ما محلات الاتصالات
ثم الكليات والدراسات الخاصة
لدرجة ان احدهم كان لديه مخزن علف
واخرج العلف
وعلق لوحة على المحل
مكتوب عليها .. معهد الشانزليزيه لتعليم الفندقة والسياحة
ثم ظهرت الامجادات
لتذهب بالتاكسي الاصفر الى مثواه الاخير
ومن بعدها الهايسات
ثم الركشات اطال الله في عمرها
واذكران لقاء تلفزيونيا اجري مع احد وزراء المالية
وقد داعبه مقدم البرنامج قائلا
الا تفكر في الاستثمار لابنائك ؟
فقال له لدي مشروع افكر في تنفيذه
ولكن قبل اجابة سعادة الوزير
قرر المخرج الدخول في فاصل اعلاني
ووجدناها فرصة نحن العزابة لعمل مسابقة في معرفة فكرة الوزير
فمنهم من قال المشروع بص سياحي
اخرون قالوا امجاد
وكثر ناس الهايس
وبعضهم قال الوزير عاوز يستثمر في الركشات
ليفاجيء الوزير الجميع بعد نهاية الفاصل
ويعلن عن مشروعه لابنائه
بان مشروعه مجرد
ب
ن
ك
قال اتصالات قال !!

انتهت الاجازة للاسف منذ اكثر من اسبوعين
لكنني اثرت الانتظار قليلا
فهناك الكثير من الملفات التي كنت اتوقع انجازها
مازال الكثير منها مغلق
وبعضها تم حذفه
وملفات في طور الانجاز
السودان جميل وممتع ومدهش
ولا اعني بالطبع سودان الانقاذ
والخارطة الممزقة للوطن
والرصاصات الطائشة
والتي بثمنها يمكن ان تحمي الاف الجوعى
وتسد رمقهم ولو الى حين
ما اعنيه السودان الوطن
والناس البسطاء
واللوحات الجميلة التي نراها في كل صباح
والخضرة المدهشة
والممتدة بلا حدود
مناسبات اجتماعية لاتنقطع
اعراس
وقاعات احتفالات جميلة جدا
تفتح الشهية للزواج مرة اخرى
خاصة ان لم ترافقك وزارة الداخلية
وعلى النقيض من ذلك تماما حينما تراجع اقسام الحوادث بالمستشفيات
عشرات الجنائز تخرج في وقت واحد
ويبدا اهل الميت في البحث عن اسعاف
العشرات ينتحبون
واخرون يربتون على اكتافهم
ويمسحون دموعهم
وجميعهم لايتعارفون
جمعتهم هذه الجنازة
ما اعظم هذا البلد
وما اجمله
بل ما اروعه
في المقابل هناك ارتفاع ملحوظ في الاسعار
والزيادات لاتتوقف
وكل يغني على ليلاه
نصف الدجاجة المشوية في بعض المحلات ب 30 الف
وبعضها 35 الف
وبجواره تجد مطعما يبيعها ب 40 الف
وبعضهم يبيعها ب 45 الف
وجميعها بنفس الطعم والنكهة
ولافروقات الا في الديكور
حفلات التخريج لم تتوقف
والعمارات الشاهقة في ازدياد
والسودانيات هنا يلبسن افضل بكثير من المغتربات
الثياب هنا اجمل
والاسكيرتات والكارينات
اما الاحذية النسائية احلى بكثير مما رايت بالسعودية
المراة هنا اكثر انوثة
لكن اكثر ما حيرني
تلكم الوصية التي توصيها النساء هنا لزوجات المغتربين
هوووووي يا ( مرة ) فتحي عينك كويس على راجلك
المغتربين عينهم طايرة
سبحان الله
مرات يقولوا ليك تطير في السماء اللحمر
ومرات يقولوا ليك عينك طايرة
وماتعرف ذاتوا طاير انت وللا طايرة عينك ؟
لهذا يامغتربين اوصيكم واوصي نفسي
لو اتيت الى السودان
ومرتك في كل مرة تقول ليك ماشي وين
بتجي متين
عندك شنو في الخرطوم
اتاخرت مالك ياراجل
لاتستغرب من هذه الفوبيا
واعتبرها اسئلة مشروعة

Quote: تذكرت لحظتها القنصلية الأمريكية بجدة وكيف انه من المستحيل ان ترى ما بداخلها فهي يحيطيها سور اعتى من سور الصين العظيم وقلت لو وجدت متسعا من الوقت سادخل للملحق الثقافي لأناقش معه الموضوع واطلب منه ان تكون للسفارة هيبتها ..

الأخ أبو حراز, موضوع الإفراج المؤقت, والبواخر المصرية وميناء سواكن وسواكن نفسها والطريق إلي الخرطوم ده موضوع صعب ومعقد شديد ومليئ بالمآسي. كتابتك شيقة جدا وممتعة.

إنت عارف لو قلت ليهم داير أصور تصوير ملون كان أخدوك للملحق الثقافي مباشرة أو السفير أو القنصل.

التحية لجميع المشاركين في بوست الافراج الضكر بامتياز
ساعود للرد عليكم تباعا باذن الله
الكتابة هنا من الموبايل
وفيها مشقة كبيرة
خاصة لمن وصل سن الكوامر
وهي على مايبدو قريبة جدا من مرحلة الحمار
ولكن نحمد الله
حتى الان لم نلبس تلك النظارة السميكة المربوطة بحبل في اغلب الاحيان
كما ان نقتنا في البيت ولله الحمد
لم تصل الى تلك الدرجة التي يرمون لك فيها بباقي الاكل
وهي المرحلة التي تسبق مرحلة القرد كما تعلمون
ساكتب باذن الله انطباعاتي عن مول الواحة
واحذروا ان هذه المداخلة ليس لاصحاب القلوب الضعيفة والمترهلة
فان كان قلبك مثل حديد الاسعد
اهلا وسهلا بك في مول الواحة
وان كنت قريبا من المراحيم
فعليك ان تتوسد صالحة ودار السلام ومرزوق وام ضبيبينة

تعودت كثيرا على المطاعم الشعبية
في كل من صالحة والشقلة
وهي لعمري حينما تدخلها
تخرج منها على هيئة كتاب
صور جميلة
ولوحات لاناس بسطاء
واخرون ساخرون يتهكمون من الحكومة وفعائلها

لكن ان تقفز فجاة
وبلا مقدمات
من الشقلة الى مول الواحة بالخرطوم
فهذه هي الصدمة ذاتها
هذا المول لايعطيك اي احساس بانك في السودان
تبريد على مستوى عال جدا
اشكال الناس
الرجال
والنساء
والبائعين
والمتسوقين
والشحادين
كل ذلك ليس كالذي عندنا في صالحة والشقلة والقيعة وجادين
طلبت بيتزا
لاني احب كل شيء له علاقة بالخضار والشطة
فاتتني الشافعة البايعة ببيتزا كلها سكر وعسل
ومعها عشرات الملاعق بشوكاتها وعدة اخرى ليس لها معنى
يابت الحلال دي بيتزا وللا فطيرة ؟
فردت لي بصوت متغنج
عمو انت قلت عاوز بيتزا
قلت ليها عمو يطير في السماء اللحمر
وانت تطيري معاهو
وبدلا من ان تقول سجمي
ردت لي اووه ماااي قووود !!!!
البيتزا كلها 6قطع ممكن تاكلها كلها في لقمة واحدة
سعرها 65 الف
العصير علي بالطلاق ياهو عصير صالحة نفسه
والسعر 25 الف
لاشيء زايد الا المصاصة
اعداد مهولة من الاجانب يرتادون هذا المكان
ومثلهم اعداد مهولة من السودانيين العاديين
والجميع يدفع
يعني عاوز تفطر او تتغداء ومعاك زميل 500 الف لاتكفي
بينما ربع هذا المبلغ يكفي لتناول وجبة دسمة جدا في قندهار

يا الله ياخ ..
من البوستات الجميله البترجعنا تاني المنبر .
ونتحكر ما نفارق السرد الجميل والمفيد ..

تسلم..

يا الله ياخ ..
من البوستات الجميله البترجعنا تاني المنبر .
ونتحكر ما نفارق السرد الجميل والمفيد ..

تسلم..

صحن فول وجردل حمام
قبل كم يوم بالليل مريت بالشقلة
لفتني كمية الناس بالمطعم
اغلبهم ياكلون فووول
ولم اكن متغدي
قلت بالمرة خليها غداء وعشاء فول
والمشكلة السيارة بتجيب الهواء
بتاع المطعم نفسه لمن طلبت فول كان غير مقتنع
وعلى الرغم من انني احب الحمير كثيرا
لانها احيانا تتصرف احسن من بعض الناس
لكن منذ قرات عن بيع لحوم الحمير
فارقت اللحوم بالمطاعم والى الابد
المهم طلبت فول واتوا به سريعا
بعدها تفاجات بعامل المطعم
وهو يحمل جردل استيل كبير جدا
ويضعه بالتربيزة لي
فقلت له
اها ح تجيبوا لينا البشكير والصابونة والليفة متين ؟؟؟
والله الجردل فيهو موية تكفيك
لحمام عيد الفطر
وعيد الاضحى
وعيد الاستقلال
وعيد الثورة برضو
عشان ناس عمو بكري مايزعلوا
المطعم بجوار المواصلات
بعد شوية اشوف ليك عشرة شفع
واحد منهم مسك الكوز وقعد يشرب
تاني جوهم خمسة
وقعد كل واحد يشرب
ويشيل ويغرف للي بعده
طبعا ولا اذن ولايحزنون
عليك امان الله بعد شوية
لا لقيت الموية
ولا لقيت الكوز
لكن جردل الحمام قاعد ام فكو
فاااااضي كما ولدته امه
يا اخوانا
والله هذا الشعب جميل
ربما .. لن يحدث مثل هذا المشهد في كل العالم ..

وبعد اسبوع استلمت شيك التعويض
وكان بقيمة تسعة مليون وسبعمائة الف جنيه !!!!!!!!!!!!!!!!!


كم دي بالدولار ؟
اوع يكون دا سعر الزجاج ؟؟؟؟؟

تحية وتقدير بعد غياب
اليوم وصلت الى مقر عملي بعد غياب 3 شهور
من الحصاحيصا الى سواكن مباشرة
تحركت الرابعة صباحا
واستراحة قصيرة بالطريق
ومن ثم واصلت هذا المشوار المرهق جدا
بنزين ب 500 الف بالقديم حتى وصلت سواكن
وحمدت الله انني ملات التانكي ليلا
فكل المحطات التي مررت بها بعد الرابعة صباحا
كانت في نوم عميق لدرجة الشخير
تذكرة السيارة والراكب واشياء اخرى غير مفهومة 3300
ثلاثة مليون،وثلاثمائة الف
والغرفة بالباخرة 300 الف للسرير
السلطات السودانية في جميع مراحل الاجراءات لاتسال من تاشيرة السعودية
بينما طاقم الباخرة المصرية يقوم بارجاع الراكب فورا
في حال عدم اصطحابه برنت من التاشيرة
ساواصل تفاصيل الرحلة ان شاء الله

Quote: تحية وتقدير بعد غياب اليوم وصلت الى مقر عملي بعد غياب 3 شهور من الحصاحيصا الى سواكن مباشرة تحركت الرابعة صباحا واستراحة قصيرة بالطريق ومن ثم واصلت هذا المشوار المرهق جدا

****
الأخ أبوحراز
حمدلله ألف ألف على السلامة
والحمدلله مرتين
ـ لعودتك لمضمون البوست
ـ ولعودتك بالسلامة
و
بوست جميل ومفيد خاصةً لنا نحن (مُدمِني) السفر بحراً
تقريباً منذ العام 2002م كل سنتين ومرات سنوياً
سفرنا عبر البحر افراج مؤقت ومرات تصدير
و
الآن يهمنا رحلة الذهاب والعودة (الحديثة) خاصة هناك رسوم وعتاوات جديدة هنا وهناك ووسط البحر

.**** الأخ أبوحراز حمدلله ألف ألف على السلامة
والحمدلله مرتين ـ لعودتك لمضمون البوست ـ ولعودتك بالسلامة
و بوست جميل ومفيد خاصةً لنا نحن (مُدمِني) السفر بحراً
تقريباً منذ العام 2002م كل سنتين
ومرات سنوياً سفرنا عبر البحر افراج مؤقت
ومرات تصدير
و الآن يهمنا رحلة الذهاب والعودة (الحديثة)
خاصة هناك رسوم وعتاوات جديدة هنا وهناك ووسط البحر

. تحياتي أخي محمد فضل ابراهيم
وشكرا لمرورك الكريم وشكرا مثلها لإطرائك على البوست
واتمنى ان تكون قد وجدت فيه ما يفيدك
انا استفدت من الرحلة في طريق الذهاب ..
خاصة لأن العائلة كانت معي
وان كنت لا احبذ ان تسافر معي العائلة افراج مؤقت لظروف الطريق الكثيرة
ولأن اجازتي قد تاخرت هذه المرة لهذا سافرنا سويا
وكنت في الغالب ارسلهم بالطائرة ومن ثم الحق بهم
وفعلاً عانينا الكثير جدا خاصة وان الرحلة في نهاية رمضان
الفائدة كانت في قيمة التذاكر
ولكن المشوار نفسه مع العائلة والصيام فيه صعوبة
وكما تعلم حينما تسافر معك وزارة الداخلية فانها تاخذ كل ماتجده امامها
فللا احبذ الانتظار في سواكن مطلقا
ولكن هذه المرة انتظرنا يومين كاملين بسبب براميل { العدة } !!!
لم نترك كباية في السعودية ولا حلة ولا كورة ولا صحن الا واخذناه معنا
وأكاد أجزم أنها ستكفينا حتى انتخاب الرئيس الـ 90 للولايات المتحدة
وكان الميناء فاتح يوم الجمعة فتركنا الصغار بالفندق { فندق الذاكرين طبعاً }
وعلى الرغم من انني اشتريت سبحة حينما قرأت لوحة الفندق
ولكن لم أجد بداخله لاذاكرين ولاذاكرات !!!!
المهم .. ذهبنا من السادسة صباحا برفقة وزارة الداخلية
رغم انني حذرتها بان النهار سيكون ناار والصمود على الصيام سيصبح مشكلة
ولكنها اصرت على ان تساعدني في المهمة وتشد من أزري وتخوض معي الصعاب
المدهش ان السيارة الافراج لايتركوها تدخل للميناء مرة اخرى بل يحجزوها في نقطة التفتييش
وعليك ان تستاجر تاكسي للوصول للميناء
اتمنى ان ياتي ابليس ليشرح لنا غرابة هذا القرار !!!!
ماذا يحدث لو تركت سيارتي خارج بوابة الميناء ودخلت لاستلام عفشي ؟؟؟؟
ساكمل لك ماحدث في مداخلة أخرى ان شاء الله كدي نشوف اخونا ترامب عمل شنو مع هيلاري

Quote: . تحياتي أخي محمد فضل ابراهيم وشكرا لمرورك الكريم وشكرا مثلها لإطرائك على البوست واتمنى ان تكون قد وجدت فيه ما يفيدك انا استفدت من الرحلة في طريق الذهاب .. خاصة لأن العائلة كانت معي وان كنت لا احبذ ان تسافر معي العائلة افراج مؤقت لظروف الطريق الكثيرة ولأن اجازتي قد تاخرت هذه المرة لهذا سافرنا سويا وكنت في الغالب ارسلهم بالطائرة ومن ثم الحق بهم وفعلاً عانينا الكثير جدا خاصة وان الرحلة في نهاية رمضان الفائدة كانت في قيمة التذاكر ولكن المشوار نفسه مع العائلة والصيام فيه صعوبة وكما تعلم حينما تسافر معك وزارة الداخلية فانها تاخذ كل ماتجده امامها فللا احبذ الانتظار في سواكن مطلقا ولكن هذه المرة انتظرنا يومين كاملين بسبب براميل { العدة } !!! لم نترك كباية في السعودية ولا حلة ولا كورة ولا صحن الا واخذناه معنا وأكاد أجزم أنها ستكفينا حتى انتخاب الرئيس الـ 90 للولايات المتحدة وكان الميناء فاتح يوم الجمعة فتركنا الصغار بالفندق { فندق الذاكرين طبعاً } وعلى الرغم من انني اشتريت سبحة حينما قرأت لوحة الفندق ولكن لم أجد بداخله لاذاكرين ولاذاكرات !!!! المهم .. ذهبنا من السادسة صباحا برفقة وزارة الداخلية رغم انني حذرتها بان النهار سيكون ناار والصمود على الصيام سيصبح مشكلة ولكنها اصرت على ان تساعدني في المهمة وتشد من أزري وتخوض معي الصعاب المدهش ان السيارة الافراج لايتركوها تدخل للميناء مرة اخرى بل يحجزوها في نقطة التفتييش وعليك ان تستاجر تاكسي للوصول للميناء اتمنى ان ياتي ابليس ليشرح لنا غرابة هذا القرار !!!! ماذا يحدث لو تركت سيارتي خارج بوابة الميناء ودخلت لاستلام عفشي ؟؟؟؟ ساكمل لك ماحدث في مداخلة أخرى ان شاء الله كدي نشوف اخونا ترامب عمل شنو مع هيلاري

تحياتي مرة أخرى
وقد اقتبست مداخلتي لإكمال ماتبقى من سرد
وتوقفت كغيري قلة شغلة ساااي لمتابعة الانتخابات الامريكية
والتي ادت الى دخول هذا الرئيس الغريب الأطوار للبيت الأبيض
بينما ذهبت هيلاري الى المطبخ مرة أخرى
والحسرة على ميشيل اوباما صاحبة الكاريزما المدهشة
والتي ستودع الأبيض دون رجعة

اعود لموضوع { العدة والبراميل }
الميناء كان يفتح الشهية
وعلى الرغم من ان رمضان في الرمق الأخير
الا ان سندوتشات الهامبرقر والقهوة والشاي والعصائر كانت تفرض نفسها بقوة
في جميع الاتجاهات تلقى ناس ياكلون
وعلي بالطلاق الواحد رقبته لايقطعها حتى السيف
وقد سال لعابي اكثر من مرة
لكن قلت يا ابوحراز ما { تنفزر } خليك راجل واكرب بطنك !!!!
قال راجل قال !!! والله رجالة في الفاضي ساااي وما ليها أي معنى !!!!
ونحن في انتظار ان تفتح البوابة
وجيش من الناس ومثله من العفش كلهم في الانتظار
دون ان يكون هناك أي تنظيم لعملية الدخول
والأمر فقط يتوقف على استعراض القوة
وفي هذه الزهجة التي بلغت ذروتها اتفاجأ بان حكومتنا تمسك بزجاجة عصير برتقالية فاقع لوناه
وتقوم بشفطها سريعا !!!
ومن بعدها القهوة والشاي
بينما ظللت انا ابوالقدح في الرجالة الخاوية على عروشها وقررت اكمال اليوم
لم تفتح ابوابة لنا الا الثانية ظهرا
حيث كان العتالي على مرمى حجر من البوابة
ولكن لم يستطع الدخول للزحمة التي امامه
بعدها اغلقت مرة اخرى
وانتظرنا قرابة الساعة والنصف لندخل بعدها الى صالة التفتيش بعد معاناة رهيبة جدا

تحياتي وتقديري { Muhib }

http://وبعدhttp://وبعد اسبوع استلمت شيك التعويض وكان بقيمة تسعة مليون وسبعمائة الف جنيه !!!!!!!!!!!!!!!!! كم دي بالدولار ؟ اوع يكون دا سعر الزجاج ؟؟؟؟؟.

.تأمين السيارة بقيمتها الحقيقية يربك شركات التأمين ..
وفي نفس الوقت فان تامين السيارة بقيمة ضعيفة يؤثر سلبا على مالك السيارة ..
السيارة ملك لك ولأولادك .. وليس ملكاً لشركات التأمين !!!
فليس من المعقول ان تقوم بتامين جيب قيمته الحقيقية 460 مليون جنيه بالقديم ..
تجد الواحد كاتب السعر 50 مليون ..
هنا تكون خدمت شركة التأمين اكثر مما تخدم نفسك ..
وجدت الكثير من الحالات في شركة التأمين وهم في حيرة شديدة بعد حوادث حصلت لهم بالسودان
انا صدمني تكتك في نهاية الباب الخلفي
ونتج عن ذلك خدش في الزجاج
قابلت الشركة وطلبت ان اذهب للوكيل لاحضار فاتورة الاصلاح
قيمة الزجاج لوحده كانت 4 مليون من شركة البربري الهندسية
وشركات التأمين لاتفضل التعامل مع الوكلاء اطلاقاً ..
حيث ترتفع تكاليف الاصلاح وقطع الغيار
والفاتورة طلعت مرتفعة ولكن شركة التامين لاتعطيك كل المبلغ
وتم تعويضي مبلغ 000 700 9 جنيه بالقديم

يا الله ياخ .. من البوستات الجميله البترجعنا تاني المنبر . ونتحكر ما نفارق السرد الجميل والمفيد .. تسلم..

تحياتي الأخت عفاف الصادق
والله مفروض نعزف ليك النشيد الوطني ..
فالبوست كان ضكرا بامتياز ..
ويمكن لم يسبقه اي بوست آخر في هذا السبق الغريب جداً ..
لم تشارك ولا اي امراة ياكافي البلاء ..
واصبح اشبه بصيوان العزاء ..
واذكر ان احد الأصدقاء اتصل وقال لي البوست الضكر دا لسه شغال ؟؟؟
فقلت له ابشرك يا اخي وكيتاً عليك { أن الجنس الناعم قد نزل بكل ثقله }
فقال لي مازحا بتكون عفاف دي مهكرة !!!!
اشكرك كتير والله على رفع المعنويات ..
واتمنى ان يكون البوست قد لامس بعض الأشياء التي تعيد البسمة المفقودة في هذا الزمن الأغبر ..
الغريب والمدهش انه طيلة فترة سفري افراج وعلى مدى طويل جداً ..
لم تقابلني امراة سايقة سيارة افراج من سواكن للخرطوم !!!
وكذلك كثيرا ما { احلم } في النوم وانا طائر في الهواء ..
يقابلني كثيرا من الرجال الطائرون وبقوة ..
وحينما احكي لزوجتي ذلك فاول سؤال يتبادر الى ذهننها ..
اها في نسوان قاعدين يقابلوك في السماء اللحمر دا ؟؟؟؟

ابنتي نون الصغيرة كانوا معي بالسعودية هنا
ونحن من اهل العوض ونفخر كثيرا بذلك { كيتاً عليك ياتوفيق بتاع الرايات الأربعة }
المهم في السعودية بنين دي مابتشوف ليك { مرة } سايقة
والله زولتي مما دخلنا الخرطوم وشافت جماعة فير آند لفلي سايقات السيارات الفارهة
قعدت تكورك
ابوي شوف دي بت سايقة
ابوووي شوف { المرة } دي سايقة
فجأة نسمع ليك { نهرة } قوية من وزارة الداخلية
يابت ياعربية ابوووووك سايق ماتشغليه
طبعا عشان تاني ماتعاين يا ابو القدح

الأخ أبو حراز, موضوع الإفراج المؤقت, والبواخر المصرية وميناء سواكن وسواكن نفسها
والطريق إلي الخرطوم ده موضوع صعب ومعقد شديد ومليئ بالمآسي.
كتابتك شيقة جدا وممتعة. إنت عارف لو قلت ليهم داير أصور تصوير ملون كان أخدوك للملحق الثقافي مباشرة أو السفير أو القنصل.

aosman تحياتي وتقديري
شكرا لك على اعجابك بكتاباتي المتواضعة جدا
وربما الامتاع نتيجة انك عشت نفس هذه المشاهد فتلاقحت الذكريات
فعلا الرحلة رغم ما فيها من متعة خاصة عند القدوم للسودان والأهل بعد غياب
لكن هناك مشقة كبيرة في الرحلة
وسرعان ماتتحول هذه المشقة الى فرح غامر حينما ترى اطفالك وهم يخرجون لاستقبالك
أما { وزارة الداخلية } فعلى الرغم من شوقها الملتهب لكنها تنتظرك داخل البيت غتاتة سااااااي منها !!!!!!

موضوع التصوير ظريف
ولكن الآن يوجد احدهم يتكيء على حائط القنصلية
ومعه مكينة تصوير صغيرة
تحياتي لك وشكرا للمشاركة والتفاعل الجميل

.
الأخ الجميل ابو حراز
التحية والتقدير
.
إذا قُدر لأموري أن تتم كما أود ... فسأتوكل على الحي الذي لا يموت
وأركب شارع سلوي ( الشارع ) .. للمرة الثامنة وعلى الحدود .. ...
وشارع سلوى حتى لا أُفهم غلط ، هو الشارع الجميل الذي يخرج من
منتصف الدوحة ليرافقك أو ترافقه حتى الحدود السعودية.
أنا أستمتع بالسفر الطويل .. ومن أكبر مكاسبي أداء العمرة في الذهاب
والإياب ( يعني منشار ..طالع ياكل ، نازل ياكل ).
حتى لو خلصت إجراءات سواكن وخرجت من الميناء الساعة الثانية
عشرة منتصف النهار لن اركب الشارع في اتجاه عطبرة ( طبعاً كنت
من زباين الشارع المقوس سواكن ، هيا ، كسلا ، القضارف ، مدني ،
وندخل الخرطوم من قعرها ) .
أتوجه مباشرة لبورتسودان وإلى فندق بلاس بتاع ناس بعشر ، فبيني
وبينه ود قديم وعُشرة حيث أقضي ليلتي وأركب الشارع بعد صلاة
الصبح .
أتحرك من الدوحة بخطة , حيث أغادر المنزل في الحادية عشر ليلاً
حتى أدخل السعودية في أول ساعة من يومي الأول من أيام المرور
الثلاثة ... ولأن لدي صبراً على القيادة نهاراً ، فبكون في ( الميقات )
قبل أوبعد صلاة المغرب ، حيث الراحة الكبرى بالنسبة لي .. وأغادر
الميقات في الحادية عشر ليلاً حتى أتمكن من إيجاد موقف بالقرب من
الحرم ، ومباشرة لآداء العمرة وانتظار صلاة الصبح لأغادر بعدها
لجدة فيكون لدي يومين متبقيين من أيام المرور الثلاثة .
طبعاُ قبل مغادرتي الدوحة بكون ظبطت أموري بالتلفون مع بعض
الإخوة في المكاتب التي تعمل في الحجز حتى يوافق يومي الثالث يوم
مغادرة الباخرة ليلاً لسواكن.
.
وسلامتكم

..زيادة الانتاج .. وليس زيادة الأسعار ..
لا افهم كثيرا في علم الاقتصاد الجاف ..
ولا حتى اعتى فطاحلة الاقتصاد في السودان بامكانهم قراة مايحدث ..
لأن الكثير من الأمور هي قرارات ارتجالية وليس قرارات علمية مدروسة ..
كامل تضامني في هذا البوست مع الفقراء والمطحونين ..
وعلى صناع القرار ان ينزلوا الى الشارع ويركبوا المواصلات..
ليدركوا الازمة الحقيقية التي يعيشها المواطن المغلوب على أمره ..
يسال الكثير من المواطنين عن ما يسمى بالبرنامج الثلاثي والرباعي والخماسي..
وهي شفرات واكواد ليست مفهومة للانسان العادي ..
فلا قيمة لأي برنامج مالم يلامس المواطنين في قفة الملاح وروشة الدواء..
فصل الجنوب كان من أكبر الأخطاء التي ارتكبتها الحكومة ..
ومع كامل الحق في ان يكون لأهلنا في الجنوب وطن خاص بهم ..
ولكن تضامننا سويا كان سينعش الاقتصاد في الشمال والجنوب..
فالآن الشمال مقعد
والجنوب مقعد !!!!
* هل هناك مشكلة في زيادة الانتاج من أجل زيادة الصادرات ورفد الخزينة العامة بالعملة الصعبة ؟؟؟
* هل هناك مشكلة مفي زيادة انتاج صادرات المواشي بتصديرها لحوم وليس مواشي حية ؟؟؟؟
* هل هنلك مشكلة في فتح استيراد السيارات للمغتربين مقابل دفع الجمارك بالعملة الصعبة ؟؟؟؟ *
وهل هناك مشكلة في تحفيز المغتربين بخمسة فدان لكل من يحول عن طريق البنوك بسقف ىتحدده الجهات المختصة ؟؟؟
* وهل هناك مشكلة في وقف هذه الحروب التي استنزفت اليابس والأخضر لأجل اعطاء فرصة للتنمية ؟؟؟؟
* وهل هناك مشكلة في علاج الترهل الدستوري والاداري وتوجيه نفقاته نحو التنمية ؟؟؟
* وهل هناك مشكلة في انسيابية التجارة ما بين الشمال والجنوب لأجل خدمة المصالح المشتركة ؟؟؟
* يشهد الله هناك ما يسمى بالمجالس التشريعية لو تم تحويل مبانيها لمدارس متوسطة أو ثانوية لاستفاد منها الوطن كثيرا
* 3 وزراء في كل ولاية يكفي *
و 7 اعضاء برلمان عن كل ولاية *
ودمج بعض الوزارات المركزية *
وتقليص الدبلوماسيين في الممثليات الخارجية *
والأهم من كل ذلك زيادة الرقابة على ما ينفق للجهات الأمنية من امن ومخابرات وجيش وشرطة *
وتوجيه جزء من مخصصات هذه الأجهزة للبحث العلمي !!!
ومن ثم ارفعوا الأسعار كما تودود
اعتقد لن تكون حوجة لرفع اسعار

.تحاشيت كثيراً أن لايكون هذا البوست في الصفحة الأولى ..
حتى يمكننا أن نعطي مساحة لبوستات العصيان المدني ..
العصيان لأجل التغيير الشامل الذي ينشده السودانيين في كل أرجاء المعمورة ..
ولكنني آثرت أن احيي فيه أم كبس وأخواتها من الماجدات الشامخات
والضي ورفاقه ..
وكل الذين ينزفون العرق ..
لأجل أن يسطروا أجمل ملاحم التاريخ ..
التحية لكل من يــنــبــض الوطن في عروقه ..
شكراً لهذه الملحمة الأسطورية ..
وفي رأيي المتواضع ..
بل والمتواضع جداً .. ليس شرطاً أن يكون عنوان النجاح الدخول للقصر ..
ويكفي ان النجاح تمثل في مصادرة الصحف ..
ويكفي ان النجاح تمثل في ان يكون السودانيون الذين ينشدون التغيير قوة واحدة ..
ويكفي ان مئات المواقع والقروبات قد افردت الكثير من مساحاتها للعصيان المدني ..
ويكفي تجاوب الكثير من ابناء الشعوب العربية في هذا العصيان ..
ويكفي اننا اضفنا { مفردة جديدة } للعالم في محاربة الظلم ..
ويكفي هذه الايقونة الجديدة التي دخلت لكل بيت ولكل شارع ..
كم نتمنى أن تكون نهاية الاعتصامات سودان للجميع ..
سودان بلا فساد اداري ..
وبلا قبلية وبلا عنصرية ولا محسوبية ..
سودان للرخاء والتنمية في كل ارجائه ..
سودان للسلام والمحبة بين كل الأديان والأعراق ..
وطن كبير في مساحته وفي سماحته

كالعاده ابو حراز الساخر وكتابته السهله الممتعه .

Quote: كالعاده ابو حراز الساخر وكتابته السهله الممتعه

الخالة دوما
هكذا عودتينا أن نناديك
وهي لعمري تخرج من اعماق الروح
وتستريح قليلا على زوايا الشرايين ومن ثم تاتيك

هسي لو دي تراجي تشب ليك في حلقك وتقول ليك ما خالتك ولا بعرفك { وش مدردق من الضحك }
تحياتي للعزيزة تراجي بعد الشريعة !!!!!

الفنان عبد الله البعيو اعتزل الغناء لفترة من الفترات
وعمل ليهو لحية وفلقة صلاة تقرب تقد الجبهة بتاعتو
بعد شوية ظروفه المادية بقت صعبة
وقال العرجاء لي مراحا
ورجع حلق اللحية وعمل شريط جديد سماه { البعيو بعد الشريعة }
هسي تراجي بعد الشريعة بقت ماقاعدة تسلم علينا !!!!
تحياتي لك ولأم حازم وكيتا عليها بقول ليها انا ح أظل من ناس { الله أكبر القديمة } !!!
الكتابة الساخرة اصبحت ضرورية
لتغسل عنا هموم ورهق الحياة
شكرا من الأعماق

Quote: الأخ الجميل ابو حراز التحية والتقدير . إذا قُدر لأموري أن تتم كما أود ... فسأتوكل على الحي الذي لا يموت وأركب شارع سلوي ( الشارع ) .. للمرة الثامنة وعلى الحدود .. ... وشارع سلوى حتى لا أُفهم غلط ، هو الشارع الجميل الذي يخرج من منتصف الدوحة ليرافقك أو ترافقه حتى الحدود السعودية. أنا أستمتع بالسفر الطويل .. ومن أكبر مكاسبي أداء العمرة في الذهاب والإياب ( يعني منشار ..طالع ياكل ، نازل ياكل ). حتى لو خلصت إجراءات سواكن وخرجت من الميناء الساعة الثانية عشرة منتصف النهار لن اركب الشارع في اتجاه عطبرة ( طبعاً كنت من زباين الشارع المقوس سواكن ، هيا ، كسلا ، القضارف ، مدني ، وندخل الخرطوم من قعرها ) . أتوجه مباشرة لبورتسودان وإلى فندق بلاس بتاع ناس بعشر ، فبيني وبينه ود قديم وعُشرة حيث أقضي ليلتي وأركب الشارع بعد صلاة الصبح . أتحرك من الدوحة بخطة , حيث أغادر المنزل في الحادية عشر ليلاً حتى أدخل السعودية في أول ساعة من يومي الأول من أيام المرور الثلاثة ... ولأن لدي صبراً على القيادة نهاراً ، فبكون في ( الميقات ) قبل أوبعد صلاة المغرب ، حيث الراحة الكبرى بالنسبة لي .. وأغادر الميقات في الحادية عشر ليلاً حتى أتمكن من إيجاد موقف بالقرب من الحرم ، ومباشرة لآداء العمرة وانتظار صلاة الصبح لأغادر بعدها لجدة فيكون لدي يومين متبقيين من أيام المرور الثلاثة . طبعاُ قبل مغادرتي الدوحة بكون ظبطت أموري بالتلفون مع بعض الإخوة في المكاتب التي تعمل في الحجز حتى يوافق يومي الثالث يوم مغادرة الباخرة ليلاً لسواكن. . وسلامتكم

تحية وتقدير أخي محمد فضل الله المكي
وعذرا للتاخير
والذي اوقفت فيه البوست احتراما لمولود ثورة الصمت { العصيان }
آثرت أن اعطي فرصة لهذا المولود بان يترعرع وينمو ويظل شامخاً
ساعود للرد على مداخلتك الجميلة والدسمة
واتمنى لك اجازة سعيدة وموفقة بالسودان
والتهنئة الحارة لك ولكل الزملاء بسودانيز بمناسبة اعياد الاستقلال المجيد