Post: #1
Title: قائمة مجلس الهلال الجديد
Author: Maawya Hussein
Date: 09-02-2010, 08:37 PM
Parent: #0
يوسف أحمد يوسف رئيسا
علي قاقرين نائب للرئيس
مالك جعفر سر الختم الامين العام
كرار التهامي امين للمال
|
Post: #2
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:39 PM
Parent: #1
المجلس الجديد سيتولي مهام الادارة في فريق الهلال لمدة 6 اشهر يتم بعدها انتخاب مجلس عبر الجمعيه العموميه
|
Post: #3
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:44 PM
Parent: #2
يوسف محمد يوسف رئيسا
علي قاقرين نائبا
مالك جعفر امين عاما
كرار التهامي امين مال
البلوله عضوا
عبد الله البشير عضوا
ابومرين عضوا
حاتم ابو القاسم عضوا
عبد الله الفاضل الجراري عضوا
احمد محمد احمد الكاروري عضوا
طارق حمزه زين العابدين عضوا
صلاح احمد رضا فريد عضوا
معتز كبير قدامي اللاعبين
|
Post: #4
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:49 PM
Parent: #3
مجلس مميز جدا فجمع بين المال والسلطة والخبره والشباب ..اتمني ان يجد الجو المعافي لكي يعطي للهلال ويقدم كل ما يملكه ..وربنا يبعد عنهم سماسرة الصحف والمتطفلين والمتسلقين واصحاب الغرض
|
Post: #5
Title: Re: قائمة مجلس الهلال الجديد
Author: khaleel
Date: 09-02-2010, 08:51 PM
Parent: #3
واين الكوارتي يا معاوية
|
Post: #6
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:54 PM
Parent: #5
الكوارتي الارباب اعترض عليهو شالوهو بره ..شكلو دا مجلس تحت رعاية صلاح ادريس
|
Post: #7
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:55 PM
Parent: #6
اهم حاجه ربنا خارجنا من الكاردينال ..دا كان بودينا التوج
|
Post: #10
Title: Re: قائمة مجلس الهلال الجديد
Author: Maawya Hussein
Date: 09-02-2010, 08:59 PM
Parent: #7
كنت اتمني دخول المهذب محمود جبارة السادة بديلا لمعتز كبير فهو اكثر خبره ودرايه بامور الهلال
|
Post: #11
Title: Re: قائمة مجلس الهلال الجديد
Author: Ahmed musa
Date: 09-02-2010, 09:01 PM
Parent: #7
Quote: اهم حاجه ربنا خارجنا من الكاردينال ..دا كان بودينا التوج
|
التوج ؟؟؟
والله يا معاوية
مع كاردينال الشيكات المتقاطعة ده كان إتمنينا نقيف في التوج
الحمدلله
ربنا رؤوف بعباده
|
Post: #14
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:08 PM
Parent: #11
الكاردينال صناعه اعلاميه يا احمد موسي لم يجد تاييدا لا من الوزارة ولا جمهور الهلال ولا لاعبي الهلال ..الاعلام الرياضي حاول يفرض الاكاردينال علي الهلال وجمهور الهلال واستغل وضع الهلال المادي ..لكن الحمد لله ربك لطف
|
Post: #8
Title: Re: قائمة مجلس الهلال الجديد
Author: الفاتح الصادق حامد
Date: 09-02-2010, 08:57 PM
Parent: #5
Quote: يوسف أحمد يوسف رئيسا
علي قاقرين نائب للرئيس
مالك جعفر سر الختم الامين العام
كرار التهامي امين للمال |
معاوية - رمضان كريم
يعنى مالك جعفر سر الختم قاعد لاخوه رئيس الاتحاد الجديد فى حلقو .. اى فرفرة
نتمنى ان يبعد الله عنهم العوارض
|
Post: #12
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:02 PM
Parent: #8
رمضان كريم يا الفاتح
مالك جعفر هلالي عتيق وهو صاحب شركه با جعفر للاعلان وشقيق معتصم جعفر رئيس الاتحاد العام ..وما متاكد عبد الله البشير دا ياهو شقيق الرئيس ولا عبد الله البشير عضو مجلس الهلال ايام سر الختم
|
Post: #9
Title: Re: قائمة مجلس الهلال الجديد
Author: أمين محمد سليمان
Date: 09-02-2010, 08:58 PM
Parent: #3
سلام يا معاويهQuote: كرار التهامي امين مال
|
غايتو لو ده كرار التهامي بتاع المغتربين ، تبقي مشكله !!!
زول مسؤل من شؤن المغتربين - و هم أكتر من مواطني الداخل - ما مفروض يكون عندو وقت للكلام ده .
بعدين خلاص يعني عقمت نساء السودان يجيبو أمين خزينه للهلال عشان يعينو زول مفروض يكون عندو مشغوليات أهم مليون مره من أمانة خزينة الهلال .
| Quote: عبد الله البشير عضوا |
بعدين لو ده أخو الرئيس ، معناتو هو الرئيس !!!
|
Post: #13
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:05 PM
Parent: #9
سلام يا امين
ما متاكد الزول دا في منصب شؤون المغتربين لسه ..لاني قريت ايام الترشيحات انو وزير سابق ..لكن علي العموم قبل كدا سليمان محمد سليمان وعبد الرخمن سر الختم كانوا ولاة ورؤساء للهلال في نفس الوقت
|
Post: #15
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:19 PM
Parent: #13
نص قرار التعيين الصادر من الوزاره
قرارا رقم 41 لسنه 2010 بحل مجلس الهلال وتعيين لجنة تسيير لمدة 6 اشهر
عملا باحكام المادة53 من دستور ولاية الخرطوم لسنة 2005 والمادة 9 فقرة 21 من قانون الشباب والرياضة من سنة 2007 يحل مجلس الهلال ويعين لجنة تسييري لمدة 6 اشهر من تاريخ التوقيع من الاتية اسمائهم:-
مهندس يوسف احمد يوسف رئيساً
على قاقرين نائب للرئيس
مالك جعفر اميناً عاما
د كرار التهامي اميناً للمال
عبد الله البشير عضواً
عميد حاتم ابو القاسم عضواً
عبد الرحمن ابومرين عضواً
عبدالله الفاضل الجراري عضواً
طارق حمزة زين العابدين عضواً
معتز كبير عضواً
محمد احمد البلولة عضواً
احمد محمد الصادق الكاروري عضواً
صلاح احمد رضا فريد عضواً
|
Post: #16
Title: Re: قائمة مجلس الهلال الجديد
Author: محمد البشرى الخضر
Date: 09-02-2010, 09:41 PM
Parent: #15
معاوية سلام
شكلوا فعلا الارباب عندو راي لأنو شايف فوزي المرضي برضو اتشال من القائمة الأولى
|
Post: #19
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:45 PM
Parent: #16
سلام يا ود البشري
برضو معتز كبير (من ابناء شندي ) وعبد الله البشير (من ابناء شندي )بالتاكيد بيكونو تزكيه من صلاح ادريس ..
|
Post: #17
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:42 PM
Parent: #15
اتمني ان يهتم المجلس الجديد بالجانب الاعلامي للفريق ويقوم بتاسيس موقع الهلال علي الشبكه العنكبوتيه وصحيفة الهلال الورقيه ..فكل الفرق الكبيرة تمتلك مواقعها الاعلاميه علي شبكه الانترنت وتكون لسانها التي تنطق بة والمصدر الاول لوسائل الاعلام الاخري عند نقل الاخبار ..ففي وقتنا الحالي اصبحت كل وسائل الاعلام العالميه ووكالات الانباء تستقي اخبارها من مواقع الفرق الرسميه علي شبكة الانترنت ..
|
Post: #18
Title: Re: قائمة مجلس الهلال الجديد
Author: محمد خليل ساني
Date: 09-02-2010, 09:44 PM
Parent: #15
تسلم يا معاوية على الخبر والردود المنطقية
تعرف فعلا ربنا خارجنا من الكاردينال ده
ياخ ده كان راح يعوقنا بشكل
ويادووووووووووب الهلال ممكن يستقر فى وجود مالك جعفر
زول رزين ومثقف ومليان كوره عشان كده هو المناسب للمنصب ده
وما عارف بس يا معاوية وصاية صلاح إدريس على المجلس حدها وين
ولآ ده تكتيك عشان يرجع فى الإنتخابات القادمة بعد 6 شهور
|
Post: #20
Title: Re: قائمة مجلس الهلال الجديد
Author: Maawya Hussein
Date: 09-02-2010, 09:51 PM
Parent: #18
سلام يا ساني
ما عندي شك في انو صلاح ادريس من اكتر الرؤساء المخلصين المروا علي فريق الهلال ..زولا بالجد قلبو علي الهلال واعطي كتير من الوقت والمال للهلال وهو الصانع الاول لفريق الهلال الحالي لكن صلاح ادريس شكلو ما مرغوب من السلطه عشان كدا فارق الرئاسه مكرها ولكن فرض شروطه علي المجلس الذي ستولي زمام الامور بعده فكان شديد الاعتراض علي تعيين الكاردينال وارغم السلطه علي اقناع رجل الاعمال يوسف احمد يوسف بتولي الرئاسه خلفا له
|
Post: #25
Title: Re: قائمة مجلس الهلال الجديد
Author: محمد خليل ساني
Date: 09-02-2010, 10:18 PM
Parent: #20
جيتك تاني يا حبيب
| Quote: ما عندي شك في انو صلاح ادريس من اكتر الرؤساء المخلصين المروا علي فريق الهلال ..زولا بالجد قلبو علي الهلال واعطي كتير من الوقت والمال للهلال وهو الصانع الاول لفريق الهلال الحالي لكن صلاح ادريس شكلو ما مرغوب من السلطه عشان كدا فارق الرئاسه مكرها ولكن فرض شروطه علي المجلس الذي ستولي زمام الامور بعده فكان شديد الاعتراض علي تعيين الكاردينال وارغم السلطه علي اقناع رجل الاعمال يوسف احمد يوسف بتولي الرئاسه خلفا له |
تصدق أنا ما مختلف معاك فى رأيك ده
بس عاوز أعرف إن ده تكتيك ولآ لاااااااااااا
عشان نطمئن إن صلاح إدريس راجع لرئاسة الهلال تاني
زول كسب الكثير من المعارك مع مجلس الإتحاد العام السابق
ومسيّر الأمور على أحلى ما يكون مع وجود بعض الهنات التى لا تنكر
بس المناوشات اللى كانت بتحصل من سعد العمده كانت هي السبب
وإن شاء الله نشهد الإستقرار فى عهد مجلس التسيير ده
ومن بعده إن شاء الله مجلس الديموقراطية والإنتخابات
|
Post: #26
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:26 PM
Parent: #25
ما ظنيت يا ساني الارباب حا يبتعد عن الهلال واتوقع انو يكون الرئيس الغير معلن للمجلس الحالي فمن السيرة الذاتيه ليوسف احمد يوسف الرئيس الجديد ما ظنيت انو يكون مفرغ تماما للهلال فامور كتيره حا تكون بيد الارباب خاصه ملفات التدريب والمحترفين والتسجيلات
دا مجرد راي غايتو
|
Post: #30
Title: Re: قائمة مجلس الهلال الجديد
Author: محمد خليل ساني
Date: 09-02-2010, 10:33 PM
Quote: ما ظنيت يا ساني الارباب حا يبتعد عن الهلال واتوقع انو يكون الرئيس الغير معلن للمجلس الحالي فمن السيرة الذاتيه ليوسف احمد يوسف الرئيس الجديد ما ظنيت انو يكون مفرغ تماما للهلال فامور كتيره حا تكون بيد الارباب خاصه ملفات التدريب والمحترفين والتسجيلات
دا مجرد راي غايتو |
أتمني ذلك يا معاوية
وممكن دي تكون خطوة عشان يتخلصوا من الأصوات النشاذ فى المجلس السابق
وياريت الأرباب يهتم بالملفين ديل ،،، التدريب والمحترفين
|
Post: #21
Title: Re: قائمة مجلس الهلال الجديد
Author: طارق الكوتش
Date: 09-02-2010, 09:59 PM
Parent: #18
يا خلو
| Quote: طارق حمزة زين العابدين عضواً |
اظنك طشيت شبكه من الاخ و الصديق وود الدفعه 87 >> طارق حمزه
..........
معاويه رمضان كريم
|
Post: #22
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:05 PM
Parent: #21
سلام يا كوتش
طارق حمزه هو المدير التنفيذي لشركه سوداني للاتصالات ..ياخ المجلس دا حكومه راسا عديييييييييل ..وزير نفط ووزير اتصالات ووزير خارجيه ووزير اعلام ووزير تجارة ووزير رياضه ..الطيشاب راحت عليهم
|
Post: #23
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:14 PM
Parent: #22
حاولت صحيفة حبيب البلد المدعومة من الكاردينال وبكل خبث اليوم التشكيك في شخصية يوسف احمد يوسف ووصفتة بالمريخي الهوي وتناست ان ذاكرة جماهير الهلال تعرف جيدا ان يوسف احمد يوسف كان ضمن كتيبة مجلس عبد الرحمن سر الختم في عام 2004 ..وكان قائدا من قواد الهلال قبل ان يظهر هذا الكاردينال علي سطح شهرة الاعلام الرياضي المدفوعه ..الصحيفة راهنت علي خداع الجماهير للثورة علي الرئيس الجديد لمصلحة الكاردينال ولكن والحمد لله خاب ظنها ..
|
Post: #29
Title: Re: قائمة مجلس الهلال الجديد
Author: عبدالله ابوشوارب
Date: 09-02-2010, 10:33 PM
Parent: #23
الاخ معاوية والاخوة المتداخلون
تحية طيبة
اختيار اكثر من موفق ، تذكروا دائما انه
لايمكن ارضاء الكل ، اعتقد ان هؤلاء هم الانسب في الساحة حاليا
اختيار الاخ مالك جعفر سرالختم ضربة معلم من كل الجهات
هذا المجلس يستطيع ان يسير امر جمهورية لا نادي الهلال فحسب
اتمني الا يتحول اعضاء المجلس السابق ومريديهم الي معارضة هدامة
لو اضاع الهلال فرصة الفوز بالكونفدرالية هذا العام
بهذا العقد من اللاعبين وهذه الدرر من مجلس الادارة
فانه لن يفوز بها ابد الدهر
|
Post: #32
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:56 PM
Parent: #29
سلام يا عبد الله
غايتو الاحداث الاخيرة دي اثبتت انو اوراق كتيره في الهلال بيد هيثم مصطفي ..هيثم مصطفي حاليا اكبر من كابتن ولا عب للفريق ..
|
Post: #24
Title: Re: قائمة مجلس الهلال الجديد
Author: طارق الكوتش
Date: 09-02-2010, 10:17 PM
Parent: #22
نعم طارق حمزه هو المدير التنفيذى لسودانى
وكان يعمل فى امريكا
رجع السودان قبل تقريبا سنه
زميل و صديق دراسة
لنا كثير من الذكريات خصوصا هلال 87
راجل هلالابى موووووووووووووووووووت
ويعشق الهلال بشكل خرافى
اتمنى له التوفيق رغم حداثة تجربته فى ادارة الانديه ..
والتى كنت اتمنى اعضاء مجلس الهلال المعين يكون نسيج من
- الخبره
- المال
- الفكر
واتمنى ان يبعد المجلس المعين فريق الهلال و جمهوره من اى نوع من انواع التدخلات السياسيه او الاستقطاب السياسى ...
>>> بس برضو بتمنى من جميع الهلالاب فى جميع بقاع الارض الحرص على استخراج العضويه
لتحدد هذه العضويه فقط من يحكم الهلال بعد فترة ال 60 يوم
|
Post: #27
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:28 PM
Parent: #24
يا كوتش طالما الزول دا طلع دفعه خليهو يحرك لينا ملف موقع الهلال الاكتروني عشان يريحنا من ناس قون وحبيب البلد وكفر ووتر والمشاهد وبقية المشاتل الحايمه
|
Post: #28
Title: Re: قائمة مجلس الهلال الجديد
Author: Maawya Hussein
Date: 09-02-2010, 10:32 PM
Parent: #27
اول ظهور لطارق حمزه وقاقرين بعد التعيين
|
Post: #31
Title: Re: قائمة مجلس الهلال الجديد
Author: طارق الكوتش
Date: 09-02-2010, 10:39 PM
Parent: #28
| Quote: يا كوتش طالما الزول دا طلع دفعه خليهو يحرك لينا ملف موقع الهلال الاكتروني عشان يريحنا من ناس قون وحبيب البلد وكفر ووتر والمشاهد وبقية المشاتل الحايمه |
والعضويه برضك مهمه شديد يا معاويه ويجب ان تكون متاحه لكل الهلالاب فى كل بقاع الارض وده بتم بالتشجيع من مجلس الادارة مع السهوله فى الاجراء
|
Post: #33
Title: Re: قائمة مجلس الهلال الجديد
Author: معتصم عبدالرحيم
Date: 09-02-2010, 11:01 PM
Parent: #31
مالك جعــــفر فعلا ضربة معلم
رجل خبر الهلال وخبره الهلالاب
وفعلا ياكوتش العضوية يجب ان تفعل بشكل جيد وسهل
|
|