إنتَ الفَرَح ..

بالله كيف قبلك أنا ..
شلتا الفرح جواى غُنا
وعشتَ الوهم طول السنين
مَديت خطاوى الشوق سكك
ومشيت دروب اللهفة ليل
ضحكت معاى لحظة حنين
ووقفت فى ليل الشجون
أسأل قمر ليلى البعيد
عن طيف بزاور فى الحلم
وملامحو مابتشبه وشييك
وبقيت أفتش للحنان
وانا واقفة فى هجعة سكون
فى سكة كيف ماتودى ليك
وبالله كيف قبلك أنا
شلت القلم أرسم خطوط
وألوان خريف
ورسمتَ كيف قطر الندى
سحر الورد
ولون الورد فى وجنتيك
وبقيت أفتش فى الدروب
عن خطوة ما بتشبه .. مشييك
عن بسمة فى نبض الشفاف
ونظرة حنان ما من عينيك
بالله كيف شلتَ الظنون
ومشيت أفتش للآمان
وانت الآمان لمسة ايديك
إنسان ملآن عزة وحنان
مغروس وسط زمنى العنيد
ولساى بفتش فى العيون
كان ألقىَ ليك فى الناس مثيل
بالله كيف قبلك أنا
عشتَ الصباح
وأصلو الصباح لحظة مجيك
أتوسم الخير البجى
والخير بلاك أملاً .. بعييد
أصلو الفرح لحظة مجيك
وكل الدروب سكة مشييك ..


هند محمد
2007

Quote: بالله كيف شلتَ الظنون ومشيت أفتش للآمان وانت الآمان لمسة ايديك

يقول أمل دنقل :
كان في جمبي . . لم أدر به
أويدري البحر قدر الؤلؤة

جمل أن تستدركي قبل فوات الأوان وجميل أن يكون البوح كالذي جئت به إلينا , أتمناك شاعرة ممن يلهمون الحيارى وتستريح القلوب على شواطيء كلماتهم.
فقط . . لا تتوقفي .

مشكور استاذ طارق على كلماتك الجميلة والمشجعه ..

قصيدتى هذه لها عشق خاص فى نفسى ولا آمل تردادها .. سبق ان نشرتها هنا فى سودانيز

وهانا الآن اعود نشرها لعمق حبى لها ..

مشكور على المرور العذب .. تسلم ويسلم لطفك .. شكراً جميلاً ..

انا واقفة بين فرحة مجيك
وبين اخفى شوقى اللى انفضح
بين خوفى من لحظة مشييك
واحساسى بى عمق الفرح
الدمعه لو هى السر مجييك
انا بعشق البكا والنواح
والقمرة كيف ما تشتهيك
تسأل عليك شمس الصباح
كل الدرورب فرحانه بيك
يوم جيتنى بالشوق والفرح ..