فنجان جبنة ولمة ناس حلوين

فنجان جبنة ولمة ناس حلوين


10-09-2015, 11:10 PM


  » http://sudaneseonline.com/cgi-bin/sdb/2bb.cgi?seq=msg&board=480&msg=1441923043&rn=0


Post: #1
Title: فنجان جبنة ولمة ناس حلوين
Author: عبدالعزيز الفاضلابى
Date: 10-09-2015, 11:10 PM

11:10 PM Sep, 11 2015
سودانيز اون لاين
عبدالعزيز الفاضلابى-Brooklyn, NY
مكتبتى فى سودانيزاونلاين



بوست نريده طارد للملل
ناس حوش اللميرة جت(المك ودالمنسى
ود شيقوق ,, ودالبوش ودابسن ابوسنينة ,, ود القوز ,, ودالعبيد وبقية العقد الفريد )
ناس الكورة
الناس الـ غابَتْ
عبدالماجد ودالصايم
حسن حماد ,, عبدالرحيم منصور
اشرف الباقر
سلمى الشيخ ,,
ألق
الشعراء بنين وبنات
الناس الضاربة الهم بالفرح
تعالوا نشرب فنجان جبنة فى ضل العصرية

Post: #2
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 10-09-2015, 11:18 PM
Parent: #1

بوست نحس فيهو بإنسانيتنا
نظهر الجانب المُشرق فينا
عسى ان يبقر به غيرنا
فإنى رأيت كثرة النقد
توغر الصدر وتأتى بنتائج عكسية

Post: #3
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 10-09-2015, 11:20 PM
Parent: #2


Post: #4
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 00:09 AM
Parent: #3

أيّهذا الشّـــاكي وما بك داء كيـــف تغدو اذا غـــدوت عليلا؟
انّ شرّ الجناة في الأرض نفس تتوقّى، قبل الرّحيل ، الرّحيلا
وترى الشّوك في الورود ، وتعمى أن ترى فوقها النّدى إكليلا
هو عبء عـــلى الحياة ثقـــيل مـــن يظنّ الحياة عـــبئا ثـــقيلا
والـــذي نفسه بغير جمال لا يرى في الوجـــود شيئا جـــميلا
لـــيس أشقى مّمن يـــرى العيش مرا ويظنّ اللّذات فيه فضولا
أحـــكم النّـــاس في الحياة أناس عـــللّوها فأحـــسنوا التّـــعليلا
فتـــمتّع بالصّبـــح ما دمت فيه لا تخف أن يزول حتى يزولا
وإذا ما أظـــلّ رأسك هـــمّ قصّـــر البحث فـــيه كيلا يـــطولا
أدركـــت كنهها طيور الرّوابي فـــمن العـــار أن تظل جهولا
ا ما تـــراها والحقل مـــلك ســـواها اتخذت فيه مسرحا ومقيلا
تتــغنّى، والصّقر قد مــلك الــجوّ علــيها ، والصائدون السّبيلا
تــتغنّى، وقــد رأت بعــضها يــؤخذ حيّا والبعض يقضي قتيلا
تتــغنّى ، وعمرها بــعض عــام أفــتبكي وقــد تعيش طويلا؟
فــهي فوق الغصون فــي الفجر تتلو سور الوجد والهوى ترتيلا
وهــي طــورا عــلى الثرى واقعات تلقط الحبّ أو تجرّ الذيولا
كــلّما أمــسك الغصون سكــون صفّــقت للغصون حــتى تميلا
فـاذا ذهّب الأصيل عنِ الـرّوابي وقــفت فــوقها تنـاجي الأصـيلا
فأطــلب اللّــهو مثلــما تطلب الأطــيار عند الهجير ظــلاّ ظليلا
وتعــلّم حــبّ الطبيعة مــنها واتــرك الــقال للــورى والــقــيلا
فالـذي يتّــقي العــواذل يـلــقى كــلّ حين في كلّ شخص عذولا
أنــت للأرض أولا وأخــيرا كنــت ملــكا أو كــنت عــبدا ذليلا
لا خـلــود تحــت السّمــاء لــحيّ فلــماذا تــراود الــمستحيلا ؟..
كــلّ نــجم إلــى الأفــول ولكــنّ آفــة النّجم أن يخاف الأفــولا
غــاية الــورد في الرّيــاض ذبول كن حكيما واسبق إليه الذبولا
وإذا مــا وجــدت في الأرض ظــلاّ فتفيّأ بــه إلــى أن يــحــولا
وتــوقّع ، إذا السّــمــاء اكــفــهرّت مــطرا يــحــيي الســــهولا
قــل لــقوم يستنزفــون المــآقي هــل شــفيتم مــع البكاء غليلا؟
مــا أتــينا إلــى الحياة لنشقى فأريحوا ، أهل العقول، العــقــولا
كــلّ مــن يجــمع الهــموم علــيه أخــذته الــهموم أخــذا وبيلا
كــن هــزارا في عــشّه يتــغنّى ومع الكــبل لا يــبالي الكبولا
لا غــرابا يطارد الدّود في الأرض ويوما في اللّيل يبكي الطّلولا
كــن غــديرا يسير في الأرض رقراقا فيسقي من جانبيه الحقولا
تستــحم النّــجوم فيــه ويلــقى كــلّ شــخص وكــلّ شيء مــثيلا
لا وعــاء يقيّــد المــاء حتــى تســتحل المــياه فــيه وحــــــولا
كــن مــع الفجــر نسمة تــوسع الأزهار شــمّا وتــارة تــقبــيلا
لا ســموما مــن السّوافي اللّواتي تملأ الأرض في الظّلام عويلا
ومــع اللّــيل كــوكبا يؤنــس الغــابات والنّهر والرّبى والسّهولا
لا دجــى يكــره العــوالم والنّــاس فيلــقي علــى الجــميع سدولا
أيّهــذا الشّــاكي ومــا بــك داء كن جــميلا تــر الوجــود جميلا

Post: #5
Title: Re: فنجان جبنة ولمة ناس حلوين
Author: الفاتح ميرغني
Date: 11-09-2015, 02:24 AM
Parent: #4

http://http
"والفنجرية تقوم
تقهوج الحجاج"

تحية لك ولضيوفك والمحتفى بهم.

محبتي

Post: #6
Title: Re: فنجان جبنة ولمة ناس حلوين
Author: فردوس جامع
Date: 11-09-2015, 03:24 AM
Parent: #5

البوست ده جميل يعلم الله
و فيه ريحة مطرة و قهوة خريفية في القضارف
قهوة كااااربة و معاها و داعية ونااااااسة...
غايتو ذكرتني أيام خلت كانت جميلة و يا نعة
يتلموا الجارات في قهوة ضهرية و أكتر حاجة كانت عاجباني
قصص الودّاعيات... و بحبهن في الله
الله يطراهم بالخير.
مرة من ذات المرات و نحن مُحلقين حول الجبنة جاتنا الوداعية جارتنا
أها كان معانا صاحبتي و هي " حِجِيرية" قامت الوداعية شبكتها ليك
نجحتي يا بتي و فرحتي وكلام كتير كده و صاحبتي الوقت داك كانت في الجامعة
أها قالت ليها يا خالتي شوفي لي أخبار العريس شنو الجامعة دي دخلناها
غايتو قربت الوداعية تزعل منها و تاني ما تجينا...و أنا بقيت الغلطانة و ما كلمتها أصول ونسة الودع هههه
شكراً على المساحة الوارفة دي

أها قهوتك دي فيها وداعية
و البخور جاولي و لا عدني

و ست الودع لي كشكشي

Post: #7
Title: Re: فنجان جبنة ولمة ناس حلوين
Author: فردوس جامع
Date: 11-09-2015, 03:29 AM
Parent: #6


Post: #8
Title: Re: فنجان جبنة ولمة ناس حلوين
Author: اميرة السيد
Date: 11-09-2015, 02:21 PM
Parent: #7

عزيزي ود الفاضلابي
تحية طيبة

يا ريت الناس السمحين كلهم يتلموا هنا ونشرب فنجان القهوة وزي ما قلت نعيد بعض ا لصفاء
الى القلوب لنبعد عنها شبح الكآبة والاحباط... واكيد اذا جانا ود ابوسن حيديك افكار لامعة وبراقة
وانيقة ..
وكمان انا بوجه الدعوة للشاعرة الرقيقة رقية وراق تنضم هنا ونسمع منها روائعها وهي معزومة على فنحان قهوة..
واقرأوا معي ما قالتها الشاعرة المبدعة رقية وراق.. وكنت اتابع كتاباتها الانيقة حتى من قبل ان اكون عضوة في
هذا المنبر .. ولكن الشاعرة رقيقة وراق اختفت لمدة طويلة .. ويا ريت ترجع عشان يعود للمنبر بهائه ورونقه . ويا ريت
كمان تقبل دعوة ود الفاضلابي وتكون عودتها للمنبر من خلال هذا البوست..
.. وطبعا المسنوحة بسمات حتختفي من المنبر لفترة بعد ان غرقت بين الاوراق والهوم ويرك من اول يوم..
والله يديك الصحة والعافية..

( هذه من روائع الشاعرة الرقيقة رقية وراق)
هدأت المنازل
سكنت الأوراق
وخلدت الأقلام الى الرقاد..
طرد الصمت ضجيج الشوارع،
وفي الحدائق غمر الظلام،
آثار مئات الأقدام الصغيرة..
والأيادي التي لم ترتح للحظة
خلال ساعات النهار..
انتهت ـ مؤقتا ـ مهمة الكبار
في الحث والنهي والتشجيع
فارقت الأبواب اصطفاقاتها
والنوافذ أصواتها الحادة..
انتهى تحضير عشرات الوجبات الصغيرة
توقف الشجار حول كل شئ..
وانتهت ـ الى حين ـ قائمة الطلبات الطويلة..

ششش .. ششش،
كل تلك التفاصيل
أمور..
سيغيظ عدم حدوثها..
الأطفال الساكنين الآن برقة..
عند اكتشافهم ،
لعبة النوم الماكرة..
في صباح اليوم الجديد .


Post: #9
Title: Re: فنجان جبنة ولمة ناس حلوين
Author: عبدالحفيظ ابوسن
Date: 11-09-2015, 02:51 PM
Parent: #8

الفاضلابي وضيوفه وضيفاته
تعرف يا صاحب انا مكجن شيتين فوق الونسة مع الصحاب الفيديوهات شان ما بشوفها والكلام المنقول الطوال
اها حد ونستي فوق البطرق اضاني
وتب جيتك

Post: #10
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 04:19 PM
Parent: #9

Quote: "والفنجرية تقوم
تقهوج الحجاج"
تحية لك ولضيوفك والمحتفى بهم.
محبتي

هلا بالحبوب الفاتح ميرغنى
أدخل ماك غريب الدار ,, أُخُدْلَك فنجان بِكرى
من بنتنا فردوس ,, واكْرُفْلَك قَلْية بُن حبشى مُو مَسرى

Post: #11
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 04:34 PM
Parent: #10

Quote: نحن مُحلقين حول الجبنة جاتنا الوداعية جارتنا
أها كان معانا صاحبتي و هي " حِجِيرية" قامت الوداعية شبكتها ليك
نجحتي يا بتي و فرحتي وكلام كتير كده

هلا بالفردوس ــ بنبرك بينَّا اتوهَطى وهِبى الجمر خلى البن يغلِى
واديهو كشحة زنجبيل ,, اللّجرى أجيب البركاوى ,, وراجين عبدالمنعم جنا سيد احمد يرص الفناجين.
كنا سْغار يافردوس ـ فى ساقية جدى ود الكباشى (محل وِلدونا) وكان بعد ابَّهاتنا يتعبوا من العمل فى الزراعة يجو الضهرية
يَقَيِّلوا تِحت النخل ,, واُمَّاتنا يسوَّن الجبنة وكت الضهرية ,, والمرأة ست الودع تجى ترمى الودع ,, اها ود عماً لينا مسَلَّط
قال لها ارمى لى الودع اها رمتو وقالت ليهو ,, الويحيد مرق قدامك سفر ,, قام بقى يكشح الودع هو ,, وكل مرة تنجر ليهو كلام
خلاها غفلت ولم يغير رمية الودع وقال ليها اها شوفى لى ده ,, على طول نجرت ليهو كلام غير الاولانى وضحكنا فكالت هى له من الدعاء عليه
مالم يتجاوز شفتيها الى قلبها وتفرقنا لنكمل لهونا المباح

Post: #12
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 04:58 PM
Parent: #11

Quote: سيغيظ عدم حدوثا..
الأطفال الساكنين الآن برقة..
عند اكتشافهم ،
لعبة النوم الماكرة..
في صباح اليوم الجديد

ياسلام ياللميرة ,, انت زولة عَزَّالة بِلحيل الكلام المقتبس من مداخلتك دى حدث معى
امس القريب ويحدث معى كل ليلة تقريباً ولدى الارباب عمره سنة وتلاتة شهور
ومع ذلك نامن يجى ميعاد النوم ده تلقيهو يغالب فى النوم التقول إذا نام بدفِّعوه قروش
وتلقيهو مصنقر فى سريره يراقب حركات اخوانه ,, خاصة عبدالرحمن (سبعة سنوات)
والغريبة نامن خلاس يغلبه النوم يقعد يبكى ويتلولو فى السرير أمه تقول لى خلاس داير ينوم ,,
اقول ليها طيب زول داير ينوم ببكى ليه؟ نحن النوم كايسِنُّو بالقروش ,,, أها اقوم اشيله واغنّى ليهو
أغانى شئ قاطعو من راسى وشئ من الحكايات القديمة ,,
أمس غنيت ليهو يا أم احمد دقى المحلب فوق توب احمد ,, لكن اللعبة
الماكرة ما فاتت عليه ,, كان ينظر الى بابتسامة ماكرة وكل مرة يفتح عويناتو
وكأنه يقول لى العب غيرها ,, وكت عذّبنى بقيت ارتّل ليهو
الفاتحة وآية الكرسى والاخلاص والمعوذتين ,, فى ثوانى زولك عييك
.

Post: #13
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 05:44 PM
Parent: #12

Quote: تعرف يا صاحب انا مكجن شيتين فوق الونسة مع الصحاب الفيديوهات شان ما بشوفها والكلام المنقول الطوال
اها حد ونستي فوق البطرق اضاني
وتب جيتك

أوووو شيخ العرب الشايل فوق الـ دَبَرْ ,, ياخ ونسةً بلاك شِن طعما
العين بصيرة واللِّيد قصيرة ياودابسن ,, علا قلنا فوق كلام ابوماضى ده
مانرميهو اللَّرِض ,, وقدر قُدرتك أجْغملك معانا فنجان فنجانين ,, وهسعتى
ربعك يجوا تحلو القعدة ,, والعجب كان قليتلَنا قرقور قرقورين من نواحيكُن.
حد ينده ود البوش
ود شيقوق ,, بت معسيب
ود العبيد ,, ودالقوز ,, رضا
المسنوحة وضاحة ,, ودالصايم
ودالمك ,, وكل الناس الحلوين

Post: #14
Title: Re: فنجان جبنة ولمة ناس حلوين
Author: عبدالحفيظ ابوسن
Date: 11-09-2015, 07:31 PM
Parent: #13

جبنة بت حليمة .. وبت حليمة دي امي فاطنة بت حليمة شالت اسم امها دون اخواتها .. وهي امرأة صالحة بما رأينه منها شخصيا .. رحمها الله
لوعزمتك جبنة تشربها بس .. وكل من رفض جبنتها تعكس طريقو
حتي صار كل ضيف يأتينا مستعجل يا يطلب الجبنة قبل السلام او يطلب الاذن بعدم تخسيمو للجبنة . وماذلك الا بتكرار التجارب المتفرقة
فالجبنة واللبن عند اسرتي بتعدل الطريق وعن جبنة امي حكيت سابقا هنا وكان دايرين بحكي ليكم عنها وعن هبرة صاج عواستها
ف شراب الجبنة مما اورثتني له حبوبتي بت حليمة وبنتها بحصل في اليوم 7 جبنات ..وجبنة السوق ميني جبنة فيها 3 فناجيل . اها بجو الاخوان بعزمهم جبنة وبشرب معاهم دناوة مني . مرات الفرقة بينهم دقايق
وساعدني في ذلك ولد ضعيف العقل خلقيا ويعجبه مرسالي وما بجيب الا جبنة . ولازم القروش تكون قدر الجبنة . ما تديهو وتقول ليهو جيب جبنتين والباقي

Post: #15
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 07:32 PM
Parent: #13

بابور هَرْبى بى ديشُو
بابور هَربى ماشى تَوَّالى

Post: #18
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 07:42 PM
Parent: #15

Quote: وعن جبنة امي حكيت سابقا هنا وكان دايرين بحكي ليكم عنها وعن هبرة صاج عواستها

أحكيها مرة ومرتين ياخ ,, قصص زى دى لا تُمَل.

Quote: ولازم القروش تكون قدر الجبنة . ما تديهو وتقول ليهو جيب جبنتين والباقي

هههههه
قلت لى كان قلت ليهو والباقى ,, تلخبتو؟
ده النوع الـ بخُت الواحد ويطلع بالصفر يطلِّعك خسران.
ودعمنا مدرِّس قَوَّم الطالب قال ليهو: ٩ X ٥ الشافع قال ليهو ٥٤ ياستاذ
قال ليهو : ليك حق ياولدى تزيدها لإنو اى شى فى البلد دى زاد علا جداول الضرِب.

Post: #16
Title: Re: فنجان جبنة ولمة ناس حلوين
Author: عبدالحفيظ ابوسن
Date: 11-09-2015, 07:33 PM
Parent: #13

جبنة بت حليمة .. وبت حليمة دي امي فاطنة بت حليمة شالت اسم امها دون اخواتها .. وهي امرأة صالحة بما رأينه منها شخصيا .. رحمها الله
لوعزمتك جبنة تشربها بس .. وكل من رفض جبنتها تعكس طريقو
حتي صار كل ضيف يأتينا مستعجل يا يطلب الجبنة قبل السلام او يطلب الاذن بعدم تخسيمو للجبنة . وماذلك الا بتكرار التجارب المتفرقة
فالجبنة واللبن عند اسرتي بتعدل الطريق وعن جبنة امي حكيت سابقا هنا وكان دايرين بحكي ليكم عنها وعن هبرة صاج عواستها
ف شراب الجبنة مما اورثتني له حبوبتي بت حليمة وبنتها بحصل في اليوم 7 جبنات ..وجبنة السوق ميني جبنة فيها 3 فناجيل . اها بجو الاخوان بعزمهم جبنة وبشرب معاهم دناوة مني . مرات الفرقة بينهم دقايق
وساعدني في ذلك ولد ضعيف العقل خلقيا ويعجبه مرسالي وما بجيب الا جبنة . ولازم القروش تكون قدر الجبنة . ما تديهو وتقول ليهو جيب جبنتين والباقي

Post: #17
Title: Re: فنجان جبنة ولمة ناس حلوين
Author: عبدالحفيظ ابوسن
Date: 11-09-2015, 07:33 PM
Parent: #13

جبنة بت حليمة .. وبت حليمة دي امي فاطنة بت حليمة شالت اسم امها دون اخواتها .. وهي امرأة صالحة بما رأينه منها شخصيا .. رحمها الله
لوعزمتك جبنة تشربها بس .. وكل من رفض جبنتها تعكس طريقو
حتي صار كل ضيف يأتينا مستعجل يا يطلب الجبنة قبل السلام او يطلب الاذن بعدم تخسيمو للجبنة . وماذلك الا بتكرار التجارب المتفرقة
فالجبنة واللبن عند اسرتي بتعدل الطريق وعن جبنة امي حكيت سابقا هنا وكان دايرين بحكي ليكم عنها وعن هبرة صاج عواستها
ف شراب الجبنة مما اورثتني له حبوبتي بت حليمة وبنتها بحصل في اليوم 7 جبنات ..وجبنة السوق ميني جبنة فيها 3 فناجيل . اها بجو الاخوان بعزمهم جبنة وبشرب معاهم دناوة مني . مرات الفرقة بينهم دقايق
وساعدني في ذلك ولد ضعيف العقل خلقيا ويعجبه مرسالي وما بجيب الا جبنة . ولازم القروش تكون قدر الجبنة . ما تديهو وتقول ليهو جيب جبنتين والباقي

Post: #19
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 08:35 PM
Parent: #17

Quote: فإنى رأيت كثرة النقد
توغر الصدر وتأتى بنتائج عكسية

وكترة الوصية كذلك ,, عبدالرحمن زول مشاغب فى المدرسة يومى الـلَّوصيهو ,, المدرسة تضرب لى عبدالرحمن سوَّا وعبدالرحمن ترك ,,
السنة دى ماوصيِّتو ,, غايتو لغاية الآن كويسين.

إذَّكر زمان يرسلونا دكان الخير ود احمد رحمة الله عليه ,, ياولد امش جيبلنا رطل سكر ووقية شاى وكروسة كبريت ,, الواحد ماشى
على الدكان ,, خايف من كلب بت النصيح ,, وخايف ينسى الحاجات المرَسَّل ليها ,, البحر من خلفكم وحرَّاس (كلب بت النصيح) امامكم ,, اها نقعد نردد ,,
سكَّر وشاى وكروسة كبريت ,,, سكَّر وشاى وكروسة كبريت نامن تصل دكان الخير كرعينك يكونن عرقانات من الخوف من كلب بت النصيح ,,
تاخد نفسك وتقول للخير أمى قالتلك ادَّنا ملح وبصل والتالتة تكون طارت من راسك ,, تجى شايِلِن وراجع ,, إن بقيت محظوظ تجَلِّى
من حرَّاس لكن قطعاً لن تجلى من محْطَة محْطَتين بالحنقوق ,, وإن بقيت محظوظ تكون امك ما جنبها شئ فشنو تخت الحاجات وتقوم جارى وسفنجات امك وراك ,, بس طيارة بدون طيار
.

Post: #20
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 08:52 PM
Parent: #19

Quote: .. وطبعا المسنوحة بسمات حتختفي من المنبر لفترة بعد ان غرقت بين الاوراق والهوم ويرك من اول يوم..

مو مشكلة يا أميرة دى بت حلتنا ,, بنعمل ليها هوم ديليفرى

ود حلتنا العمدة ( الشبلى) معيِّد فى اتبرا ,, خلوا الجبنة مدوِّرة نامن يجى

Post: #21
Title: Re: فنجان جبنة ولمة ناس حلوين
Author: عبد المنعم سيد احمد
Date: 11-09-2015, 09:32 PM
Parent: #19

عبد العزيز الفاضلابى
لك التحية ولضيوفك الكرام
السمحين وطيبين وزينين..وفنجريين
الله يديك الصحة..والعافى
التبقالك هدم وسروال ونعليين.
النحكيلكم بخصوص الوداعيه..
سافرت اسرتى والدتى واخى الاصغر واخواتى
للشمالى قرية الباسا
لتقضى بعضا من سنين
بقينا انا واخى الاكبر مع الوالد فى الخرطوم
جات اللجازى..شلنا تساريحنا..وركبنا
قطر كريمى وادلينا مع عمى للبلد
مفروض نقضى اللجازى ونجى راجعين للبندر
لمن اللجازى قربت تخلص..جاءت وداعية
تونس فى الحاجة وجارتنا..الزمن داك انا
فى تالتة ابتدائى..قعدت فى البرنده الوداعيه
صلحت الرملة وختتولها البياض شلن وبقت ترمى
وانا قاعد اسمع..قالتلها كلام كتير البتذكرو تماما
بدات توصف مشهد صورتة بدقة متناهية
حدث بعد اسبوعين تقريبا
ناتى للمشهد الدرامى الاخر..فقد كنت بطله الاوحد
والله يااخوانا الحااحكيهو حصل زى ماهو
رميت ودعها وقالت للوالده اولادك ابوهن برسلهم
التساريح عشان يسافروا
بعد شوية وهى بترمى قالت..تانى ابوهن برسل
يقول الكبير يجى والصغير يقعد
طبعا كنت فرحان انو حاسافر بعد الاجازة للخرطوم
جارنا خالد عجوبة..عندو لورى سفرى
بسافر مرتين فى الاسبوع للخرطوم
المهم بعد ايام..طبعا اولاد البلد بعفرو
اللورى من حسو من بعيد فى الرمال
عشان الكوز القعد يسوهو الكماسرة ديلك
وقف اللورى..واتلمينا شفع الحلة..ادانى
الطرد الليلنا..شلتو وجرى على البيت
فتحت الجواب فوقو التساريح حقتنا..عشان
نرجعبها بى قطر كريمى
فرحت لى فرح
بعد كم يوم..نسمع فى صوت لورى خالد عجوبة
جريت لاقيتو ..ادانى جواب..جيت البيت فتحتو
لقيت الوالد كاتب بعد السلام..على يسافر يجى
وعبد المنعم يقعد عشان اخوانه صغار
والله القعده الياها
درست..رابعة وخامسة وسادسة بمدرسة الغريبة الابتدائية
واولى ثانوي عام بمدرسة امبكول الثانوية
فيكم واحد لاقتو وداعية زى دى
ههههههههههه



Post: #22
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 11-09-2015, 10:08 PM
Parent: #21

Quote: بعد شوية وهى بترمى قالت..تانى ابوهن برسل
يقول الكبير يجى والصغير يقعد

تعرف يامنعم ودِّاعيتك دى كان لقوها ناس الهلال كان جابت ليهن خبر كورة سموحة من عصرا بدرى ,,
(كذب المنجمون)
تلقاهو شيطان سمع ابوك قال الكلام ده قام لفحو وصَّلوا للودَّاعية
ياخ ديل كانوا بلفحوا الكلام من باب السماء مايلفحوهو من خشم ابوك؟
تحياتى يارجل ياطيب وابقى قاعد وزَين لينا القعدة دى بفناجين الجبنة والبركاوى

Post: #23
Title: Re: فنجان جبنة ولمة ناس حلوين
Author: عبد المنعم سيد احمد
Date: 11-09-2015, 10:24 PM
Parent: #22

11709562_943958589000708_5403385312384970691_n3.jpg Hosting at Sudaneseonline.com

Post: #24
Title: Re: فنجان جبنة ولمة ناس حلوين
Author: عبد المنعم سيد احمد
Date: 11-09-2015, 10:44 PM
Parent: #23

wade3195.jpg Hosting at Sudaneseonline.com


والله ياالفاضلابى
الزولة..دى المشهد الاول الوصفتو
حدث كما هو..
اكان جبت كاتب سناريو..ومخرج سينمائى
لايستطيعون ان ينقلوا ..ماوصفته تلك الراعية الوداعية
شىء يفوق الوصف
واكثر درامية مماحكيتو
هههههه
الا يكون..بشوفلها ملكم زاتو بى زاتو
كتر خيرك..اللميتنا..فى الناس السمحين ديل



Post: #25
Title: Re: فنجان جبنة ولمة ناس حلوين
Author: جلالدونا
Date: 12-09-2015, 00:26 AM
Parent: #24



السلام ليك يا فاضلابى و لى المتودعين و المتقهوجين معاك
عليك الله شوف جنس حميمية القعدة دى

Post: #26
Title: Re: فنجان جبنة ولمة ناس حلوين
Author: طلحة عبدالله
Date: 12-09-2015, 08:16 AM
Parent: #25

والله يا فاضلابي اللمة سمحة بالحيل ..
إلا الناس الجابوا لينا ناس شرف الفحيل والحاجات دي عصروا علينا
شديد حرم .
ليك وليهم التقدير يا زول سمح .

Post: #27
Title: Re: فنجان جبنة ولمة ناس حلوين
Author: عبيد الطيب
Date: 12-09-2015, 09:22 AM
Parent: #26

الفاضلابي الوهيط زولا سمح قولو
سلاااام ومعزة صادقة لك وللمتداخلين
يا سلاااام الأُنس الجميل مع البجَّاحة، والناس السَّمحين
أرح أدّينا من بُنِّك المعسول
وفنجان واحِد يسكُن في الدُّماغ ل الحول
وللقهوة الكثير من النَّفَل السَّمِح ،حتي أنَّهم ، عندما يقدمون لك فُنجان بُن ، يقولون :معروض النَّبي الما بِنَّبي..
ومن عبقها كانت عبقرية التَّاية الشاعرة الأديبة
ببطانة العِز والجمال والخير،التَّاية بِت قلبوس يقول الشاعر ودجمّاع:
برِّد يا أب شَنَقْ قرَّبت طريق التّاية بِت قلبوس
مشتولة القرير الترقنها القادوس
دَرعات العُلُو أم برقاً بِشيل حرقُوس
نور خدَّاده بشلَع في الضلام فانوس
وهي إمرأة كريمة خُلق وأرومة،و أديبة وشاعرة مُجيدة، وراوية محقّقة، زارها الأخ الأديب الأمين كاكوم ، وكتب عن أدبها وشعرها
وكل الجرارِق من الشعراءالفحول، نزَّلوا التَّاية هنالك بمرابع التَّاية، أمثال ودجمَّاع، وودشوراني وشيخ أحمد والصادق وآخرون
حيث كانت إستراحة الفنجرية،
"بخيتة بت عبد الغني"
"واجباتنا الليلة عند الفنجرية إتنين"
ومن عبق جبنة فاطنة السمحة...
ومابين صاقع، بكري وارد الحبشة، وتنتنة أيقاع الفُندق،/ك
ومسارقة النَّظر،مع الرعبوبة الوهنانة، وأُنس مخاليق مولانا الجميلين، تعرفت علي الشاعر الرائع مُحُمَّد ود المصايد العطوي الكباشي ،
وبالرغم أنَّه كان في السبعين من عُمرة ، ولكنه كان يتردّد كثيرا ، علي
"فاطنة أُم حجل" ، وكل يوم تُقدِّم له الجبنة، وهو ينظر لها بأريحية هاشا باشا، ويحدِّق ، ثم يرشف من فنجانه ،
وإذا تنحنح ،يمُد عنقه ،وبأهدابه التي شبل،عليها الشَّيب فصَّا من السوميت،يرنو نحو فاطمة باسما بقلبه،
لأن بها ملامِح من بت عمّه التي كان يريد الزواج بها، ولكنه عندما عاد من رحلة الجزو وجد عمّه زوجها إلي بدويّ آخر فقال:
لولا قبيل حِضرْت قبل الصُّفاح والعايِط
كنتا بحجنك آ عنْز الدُّباغ أم نايِط
نقدِّم شكوي يا الصُّورة الملانِي زبايِط
ونستَلْم القضيَّة ونبقي فيها عبايط
ياخ نشوق الروح دي عجيب، بسوِّي الهلاويس وفرَّارة القلب، بجيكم صاد ومعي فتاتين تكشكان لقلبي بودعها وحسن سجعهما
تحياتي للصديق ود أب سن ، وهو ودالصُرَّة الذي تنشُدة ودَّاعية المنبِر ، وتحياتي لبت السيِّد، فقد أستضافتنا، علي قهوة الأُنس المعافي،
في بيت شقاق ، يعبق في جوانبه نسيم صبا المحبة والأدب، ولا تغشاه نكباء الكراهية ودبور البغضاء
ومدَّت طنائب المحبة لمحلفنا وقتئذٍ ، ببوستها الأوَّل
يا الفاضلابي إنت زول وهيط ، ودليلي علي قولي، لا يحتفي بالأصدقاء إلا الفناجرة
معزتي ومحبتي للجميع

Post: #28
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 12-09-2015, 06:57 PM
Parent: #27

Quote:
السلام ليك يا فاضلابى و لى المتودعين و المتقهوجين معاك
عليك الله شوف جنس حميمية القعدة دى

هلا بالصفوة جلادونا ,, أدخل يازول ياحلو اتقهوج
وجيب سمح الكلام جيب ,, حبابك عشرة بلا كشرة
شايفك مربى الخفيف لاخوانا الرشاشات
ياقولك ديل بِقت عليهن حكايتنا مع كلب بت النصيح
كان مرقوا من المريخ يلاقيهم اتحاد الجزاير ,, قالوا الشقى
يلقى العضم فى الفشفاش

Post: #29
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 12-09-2015, 07:11 PM
Parent: #28

Quote: والله يا فاضلابي اللمة سمحة بالحيل ..

هلا بصفوة الصفوة طلحة ولد عبدالله
الليلة ياللميرة الجبنة محضورة طلحة وجلالدونا ودالعبيد
يلا نشهلَن إنتى واختك فردوس ولَحّْقَن اخوانكن ديل البِكرى
وكان دايرات مساعدة رسَّلى لاخواتك بت وراق وبت الشيخ سلامة
والملكة وضاحة ورشا بت بابكر ,, عبدالمنعم ود سيد احمد قلنالو
جيب البركاوى جابلنا مِشرِقى انا خايف يكون لاقاهو كلب بت النصيح
فوق الدرب صَوَّعُو ولَوَّعو ..
طلحة ناسك قالوا لاعبين مع اتحاد الجزاير ,, باقيلك بجيبوا كروسة
الكبريت ولا بنسوها فى الجزاير؟

Post: #30
Title: Re: فنجان جبنة ولمة ناس حلوين
Author: ahmedona
Date: 12-09-2015, 07:46 PM
Parent: #29



الفاضلابي والربع .... تحياتي

Post: #31
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 12-09-2015, 10:06 PM
Parent: #30

هلا بالاديب الاريب ,, ودالبطانة عبيد وَلْد الطيب
سماح ياخ كتبت اسمك ودالعبيد بدل ودالطيب
لكن ياكا المقصود فى قعدة الجبنة دى ,, والكبر حصل فاعف لينا
كلامك ده يخلى الزول يتمولص وياخدلو سيطان بطان مع ودالمنسى
اصلو عرريب الدندر داك زول قَنيص سااكت.
Quote: لولا قبيل حِضرْت قبل الصُّفاح والعايِط
كنتا بحجنك آ عنْز الدُّباغ أم نايِط
نقدِّم شكوي يا الصُّورة الملانِي زبايِط
ونستَلْم القضيَّة ونبقي فيها عبايط


شوف عليك الله جنس النضم ده ,, ده كلام لى ناس البنادر
طشاش ,, لكن لينا نحن الزول ده وَجَّب محبوبتو طااااااب
ودالطيب آخوى دابا الجبنة بتدخل النافوخ بعد كلامك ده

Post: #32
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 12-09-2015, 10:16 PM
Parent: #31

Quote:

Re: فنجان جبنة ولمة ناس حلوين (Re: عبدالعزيز الفاضلابى)

الفاضلابي والربع .... تحياتي

هلا بالحبيب الحبوب المحبوب احمدونا
لاتفوت تخلى القعدة الحلوة دى ,, واختف كراعك لى عِن شيخنا عماد
خلونا الـ نِتْبَرّك بى صحبة المشايخ ,, وتبقى اللمة محضورة
اها يا اميرة شِن قولك بُن وبركة فى احلى من كدى؟

Post: #33
Title: Re: فنجان جبنة ولمة ناس حلوين
Author: يحي قباني
Date: 12-09-2015, 11:54 PM
Parent: #32

يا فاضلابي ...

جبنتكم دي كوم ...

و الجبنة الشربناها انا و الزول السمح القاعد قدامي ده كوم تاني ...

الله اداهو سماحة الخلقة و الأخلاق ... و مسكه القلم و قال ليهو اكتب ...

فيجي يكتب براهوا ... و انا اقرأ زيكم واحد ... :)

و كانت لنا أيام ...

Post: #34
Title: Re: فنجان جبنة ولمة ناس حلوين
Author: Kabar
Date: 13-09-2015, 03:27 AM
Parent: #33

عارف يا الفاضلابي..
اللمة سمحة..والناس سمحين.. الإ الجبنة الواحد شكلو ح يتعقد منها ليوم الدين..!

شربت جبنة كتير خلاس في شهر اغسطس الماضي في امسودان..وكانت بتعجبني فكرة الودع وحكاويه..لمن فكرت اعمل اثنوغرافيا عن لمة الجبنة والودع..كظواهر ثقافية حميمة.. !

اها جيت داخل المنبر لقيت اخونا ابوبكر عباس فاتح بوست افتقاد عننا..وببواقي الجبنة بتاعة امسودان الواحد انداح وذكر ليهو اسمو وداعية لذيذة خلاس..وعينك ما تشوف الإ النور..!!!

غايتو سميتا (الجبنة ام دوشكات)..!

ليه الجبنة مربوطة بالودع والشاي لأ؟..يعني البرامكة بتاعين الشاي..ما عندهم فكرة ودع..في حين ناس الجبنة الودع بيكون جزء من الفكرة..!!

تحية لكل الحريفات والحــُرفا في البوست..وسلام ليهم جملة..

كبر

Post: #35
Title: Re: فنجان جبنة ولمة ناس حلوين
Author: طلحة عبدالله
Date: 13-09-2015, 06:34 AM
Parent: #34

عزيزي الفاضلابي
شكرا للترحيب الرقيق يا زين
جبنة في كوباية من غير جنزبيل مع معلقتين سكر محروق ..
( عارف نفسي ما بعرف أشرب الجبنة)

عزيزي كبر
كل سنة وانت طيب يا خوي
وين الغيبة ؟؟
تحياتي وتقديري للجميع

Post: #36
Title: Re: فنجان جبنة ولمة ناس حلوين
Author: إسحاق بله الأمين
Date: 13-09-2015, 08:43 AM
Parent: #1

أخوي الفاضلابي وأخوانه وأخواته والضيوف الكرام
سلام وشوق ومحبة واحترام
شميت ريحة البن الحبشي وما قدرت أقاوم و"توش" جيتكم داخل بلا إستئذان فسامحوني على تطفلي يا الحبان والمسامح كريم

قال ليها:
أملي لي الفنجان يا شبيهة البسكي
وكبي لي التني والتلتاوي هاك مني أمسكي
يا أم نفسا فاق ريحة الجلاد والمسكي
فنجالك مقيم بقزازتين وسكي
يا ناس مسعولين من الخير وينو شيخ العرب حبيبنا ود شيقوق؟

* البسكي: البسكويت

Post: #37
Title: Re: فنجان جبنة ولمة ناس حلوين
Author: عفاف أبو حريرة
Date: 13-09-2015, 03:04 PM
Parent: #36

إني لأغبط جاركم لجواركم ... طوبى لمن أصبح أو أمسى لداركم جارا
ياليت جاركم باعني من داره شبرا ... فأعطيه مقابل شبره دارا

متابعين

Post: #38
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 13-09-2015, 09:32 PM
Parent: #37

Quote: يا فاضلابي ...
جبنتكم دي كوم ...

ود قبانى الرجل الساخر ,, حبابك ,,
جبنتنا دى بى ودَّاعيتا ,, تقعد معانا تتقهوج
وتشوف بخْتكْ ,, وتريح اعصابك واحتمال
لى قدام نجيبلنا فنانين ,, يعنى فرصة تاخدلك شبَّال

Post: #39
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 13-09-2015, 09:35 PM
Parent: #38

Quote:
ليه الجبنة مربوطة بالودع والشاي لأ؟..يعني البرامكة بتاعين الشاي..ما عندهم فكرة ودع..في حين ناس الجبنة الودع بيكون جزء من الفكرة..!!
تحية لكل الحريفات والحــُرفا في البوست..وسلام ليهم جملة..

الحبوب المحبوب كبر
انا يبقا لى عشان الشاى قعدتو ما بْتَطَوِْل زى قعدة الجبنة
الشاى ده الناس بِتَجْغمو سريع سريع على الماشى ,, بعدين
سواتو زاتا مابتاخد وكت زى سوات الجبنة ,, اما الجبنة دى
قَرْدَنَتا كتيرة ,, وفيها بِكْرى وتْنِى وشغل كتير خلاس.
حبابك فى انجامتنا ,, جبنتنا غير ,, زاد حبان وعفو وتسامح

Post: #40
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 13-09-2015, 09:37 PM
Parent: #39

Quote: جبنة في كوباية من غير جنزبيل مع معلقتين سكر محروق ..

ياطلحة جبنة زى الطلبتها دى علا تلقاها فى فى الكشك الـ قِدَّام
الهيئة القومية للكهرباء ,,

Post: #41
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 13-09-2015, 09:45 PM
Parent: #40

Quote: شميت ريحة البن الحبشي وما قدرت أقاوم و"توش" جيتكم داخل بلا إستئذان فسامحوني على تطفلي يا الحبان والمسامح كريم

اووو اسحاق وداللمين بى ذات نفسو؟ آآفو ياوداللمين كيف تقول
جيت بلا استئذان ياخ انت من اول الناس الرَّسلت ليهُن مرسال خسوسى
وكمان ,, تلقا دعوتك هنا :
Quote: ناس حوش اللميرة جت (المك ودالمنسى
ود شيقوق ,, ودالبوش ودابسن ابوسنينة ,, ود القوز ,, ودالعبيد وبقية العقد الفريد

كيف ياخ إنت تقعد فوق العنقريب الهبابى مو فوق بنبر .
ياخ ودشيقوق ده فارق علىْ بلحيل ,, عليكم الله زول يتِبْنو نعال مو ميرود؟

Post: #42
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 13-09-2015, 09:49 PM
Parent: #41

Quote: إني لأغبط جاركم لجواركم ... طوبى لمن أصبح أو أمسى لداركم جارا
ياليت جاركم باعني من داره شبرا ... فأعطيه مقابل شبره دارا
متابعين

بت ابوحريرة معانا هنا ,, ياللسعادة

مرحب بمن زارنا يطلب شبراً ,, فله هِبةً كل ماعندنا اشباراً وامتارا

علا يابت ابحريرة الزول القال الكلام ده ظنيتو كل يوم بِصلِّي
بى سورة الكافرون ,,

Post: #43
Title: Re: فنجان جبنة ولمة ناس حلوين
Author: معاوية المدير
Date: 14-09-2015, 00:04 AM
Parent: #42

Quote:
جبنة خالتي عآشآ بت أحمد...

منتصف النهار, الصمت يلف المكان حتى لكأنك تسمع ضجيجه يأتيك من جميع أنحاء الباوقة, فأشجار
النخيل ساهمة, والقماري مسترخية فوقها, والأغنام متفيئة ظلآلها تقصع جرتها من حين إلى آخر. بداء
يشق هذا الصمت صوت فندك بت أحمد وقد بدأت في دق البن الذي ما زال بعض منه في القلاية فوق
النار...
بدأت بت أحمد جالسة فوق البنبر وقد تدلت محفضتها حتى لآمست الأرض, وأمامها المنقد, وعلى
يمينها صفيحة ماء, وبجانبها الهبابة والشرغرغ على الأرض بجانب الصينية التي حوت الفناجين
تتوسطهن القداية بألوانها الزآهية, وصحن ينضح بعجوة ود لقاي مع عروق جنزبيل. توقفت بت أحمد
عن دق البن ليعود الصمت يلف المكان مرةً أخرى, وبدأت تحرك القلاية فوق النار, في هذه
اللحظة طارت قمريّة مصفقة جناحيها في الهواء ثمّ أستقرت على صبيطة تمر قوقت لفترة من
الزمن وصمتت. عاد الهدوء يعم المكان مرةً أخرى لتقطعه بت أحمد وقد بدات تحكي عن
زمن جميل مضى وهي توزع لنا فناجين الجبنة. قطع حكي بت أحمد, صوت حمارة في الخارج,
واتى صوت ود اللحمرمخترقاً الصمت: سلآم يا بت أحمد. كيف قيلتو؟.
بت أحمد: مرحب حبابك ود اللحمر. أدخل أشرب لك فنجان جبنة.
ود اللحمر: لا لا كتّر خيرك. سادر على الحواشات.
ثم تواصل بت أحمد الحكي وقلي البن وقد بدات حبيبات العرق تسيل في مجاري شلوخها
وهي تحكي وتبتسم بين الفينة والأُخرى, وتصب لنا الجبنة نحتسيها فيمازج طعمها حكاوي
بت أحمد الجميلة لتصبح عابقة في مكنون ذاكرتنا دوماً تذكرنا بت أحمد بعد أن رحلت
مع السمحين...
الآ رحم الله خالتي عآشا كما يحلو لأهلنا نطق الإسم على هذا النحو, ورحم
جميع من رحل من أهلنا الطيبين.
خواطر محزونة.


ود المدير...

Post: #44
Title: Re: فنجان جبنة ولمة ناس حلوين
Author: Kabar
Date: 14-09-2015, 05:18 AM
Parent: #43

ول ابا طلحة..حبابك يا صديقي

الغيبة نزلت البلد.. وقريت شوية من كتاب عيون اهلنا السمحين..و شربت الجبنة..

اتصورت مع مباراة المريخ ضد هلال الأبيض ..مرتين..!!

وجبت لي كم باكو حرجل..لغاية الليلة متصور معاهم حداشر مرة..!

لينا طولة يا قريبي..

كبر

Post: #45
Title: Re: فنجان جبنة ولمة ناس حلوين
Author: Kabar
Date: 14-09-2015, 05:20 AM
Parent: #44

الفاضلابي..حبابك يا صديقي

كتر خيرك..و العفو والتسامح خير الزاد..

فعلا الشاي مستعجل شوية..وزمان كان عندنا مجالس البرمكة..لكنها ما فيها تكتيك الجبنة..

مرات يتخيل لي انو الشاي (اسيوي) بعيد مننا ، لكن البن (حبشي) يعني قريبنا وكده..والقريب للقريب قريب..!

مرة كنت بقرا لي في كتاب عن تاريخ فكرة القهاوي في الشام..وضحكت شديد لمن اكتشفت انو الفقهاء كانوا بتغالطوا في موقف الجبنة من الحل والحرمة..وبعضهم حرمها تماما زيها وزي الخمر.. لكن لاحقا اكتشف انو القصة دي ما بتجيب تمنها..و اليوم الجبنة اصبحت المشروب الدولي رقم واحد..!

واحد من اهلنا الحبش..قام سوا ليهو مطعم هنا في كندا (مدينة ريجاينا)..اها ربنا هداهو على فكرة عجيبة.. انو يجيب قريباتو ويسونا الجبنة..و اهم حاجة قلي البن ويكون دخانو ضارب الجو..ياخي الخواجات تلقى الصف اطول من صفا السنما الوطنية طيبة الذكر..!
فعلا طقوسية البن بتخليهو مختلف عن كل الحاجات..!

الغايظني يا الفاضلابي.. جبالنا الكتيرة دي وما قاعدين نزرع البن..!

الواحد شكلو طبق..و ماشي على التلتاي..!

تحياتي للجميع..

كبر

Post: #46
Title: Re: فنجان جبنة ولمة ناس حلوين
Author: إسحاق بله الأمين
Date: 14-09-2015, 08:42 AM
Parent: #1

Quote: اووو اسحاق وداللمين بى ذات نفسو؟ آآفو ياوداللمين كيف تقول
جيت بلا استئذان ياخ انت من اول الناس الرَّسلت ليهُن مرسال خسوسى


عارفك ما بتقصر يا الفاضلابي أخوي ويانا كلنا من طينة واحدة ومتل اللمة الطاعمة دي ياها البتنسينا هموم الغربة اللئبمة.
بجيكم برواقة
تسلم يا الغالي

Post: #48
Title: Re: فنجان جبنة ولمة ناس حلوين
Author: عبدالحفيظ ابوسن
Date: 14-09-2015, 08:59 AM
Parent: #46

تحية للاصحاب هنا
وداللمين ليك وحشة حرم
العبيد .. طولة منك وشوق
البوست دة لم كل الذين احبهم

Post: #47
Title: Re: فنجان جبنة ولمة ناس حلوين
Author: إسحاق بله الأمين
Date: 14-09-2015, 08:52 AM
Parent: #1

Quote: جبنة خالتي عآشآ بت أحمد...

منتصف النهار, الصمت يلف المكان حتى لكأنك تسمع ضجيجه يأتيك من جميع أنحاء الباوقة, فأشجار
النخيل ساهمة, والقماري مسترخية فوقها, والأغنام متفيئة ظلآلها تقصع جرتها من حين إلى آخر. بداء
يشق هذا الصمت صوت فندك بت أحمد وقد بدأت في دق البن الذي ما زال بعض منه في القلاية فوق
النار...
بدأت بت أحمد جالسة فوق البنبر وقد تدلت محفضتها حتى لآمست الأرض, وأمامها المنقد, وعلى
يمينها صفيحة ماء, وبجانبها الهبابة والشرغرغ على الأرض بجانب الصينية التي حوت الفناجين
تتوسطهن القداية بألوانها الزآهية, وصحن ينضح بعجوة ود لقاي مع عروق جنزبيل. توقفت بت أحمد
عن دق البن ليعود الصمت يلف المكان مرةً أخرى, وبدأت تحرك القلاية فوق النار, في هذه
اللحظة طارت قمريّة مصفقة جناحيها في الهواء ثمّ أستقرت على صبيطة تمر قوقت لفترة من
الزمن وصمتت. عاد الهدوء يعم المكان مرةً أخرى لتقطعه بت أحمد وقد بدات تحكي عن
زمن جميل مضى وهي توزع لنا فناجين الجبنة. قطع حكي بت أحمد, صوت حمارة في الخارج,
واتى صوت ود اللحمرمخترقاً الصمت: سلآم يا بت أحمد. كيف قيلتو؟.
بت أحمد: مرحب حبابك ود اللحمر. أدخل أشرب لك فنجان جبنة.
ود اللحمر: لا لا كتّر خيرك. سادر على الحواشات.
ثم تواصل بت أحمد الحكي وقلي البن وقد بدات حبيبات العرق تسيل في مجاري شلوخها
وهي تحكي وتبتسم بين الفينة والأُخرى, وتصب لنا الجبنة نحتسيها فيمازج طعمها حكاوي
بت أحمد الجميلة لتصبح عابقة في مكنون ذاكرتنا دوماً تذكرنا بت أحمد بعد أن رحلت
مع السمحين...
الآ رحم الله خالتي عآشا كما يحلو لأهلنا نطق الإسم على هذا النحو, ورحم
جميع من رحل من أهلنا الطيبين.
خواطر محزونة.


ود المدير...


روعة يا ود المدير بالله زدينا كمان وكمان.
تسلم يا الحبيب

Post: #49
Title: Re: فنجان جبنة ولمة ناس حلوين
Author: إسحاق بله الأمين
Date: 14-09-2015, 09:10 AM
Parent: #1

Quote: تحية للاصحاب هنا
وداللمين ليك وحشة حرم
العبيد .. طولة منك وشوق
البوست دة لم كل الذين احبهم


مرحب حباب شيخ العرب حبيب الكل ود أبسن
نحنا مشتاقين لطلتك البهية وكلامك الكله حن

Post: #50
Title: Re: فنجان جبنة ولمة ناس حلوين
Author: فيصل محمد خليل
Date: 14-09-2015, 09:55 AM
Parent: #49

يبدو أن القهوة لم تعد مشروبًا يستمتع به الإنسان فقط من خلال تناوله في الصباح مع
اطلاعه على جريدة أو كتاب، فالإبداع

قد يأتي من القهوة نفسها التي تحولت بريشة فنان إلى مادة بديلة للحبر تغزل لوحة فنية.



Post: #51
Title: Re: فنجان جبنة ولمة ناس حلوين
Author: الطيب شيقوق
Date: 14-09-2015, 10:15 AM
Parent: #49

عووووووووك زحوا لي زحوا لي عيني وقعت في البوست العلالو عاكل في السماء دا هسه

سلام بت السيد و فردوس بت جامع

وليد الفاضلابي و وليد اب سن و وليد البلة و وليد ابوي الطيب و وليد كبر وليد قباني و طلحة وليد عبد الله و الفاتح وليد ميرغني و جلالدونا وفيصل وليد الخليل وليد سيد احمد وليد المدير و احمدونا

زحوا لي الله يمهلها عليكم دنيا واخرة

Post: #52
Title: Re: فنجان جبنة ولمة ناس حلوين
Author: إسحاق بله الأمين
Date: 14-09-2015, 12:56 PM
Parent: #1

Quote: عووووووووك زحوا لي زحوا لي عيني وقعت في البوست العلالو عاكل في السماء دا هسه


مولانا شيخ العرب ود شيقوق جاكم، يا الله يا أخوان وسعوا الجلسة وافسحوا لشيخ العرب وأكيد الجلسة حتحلو والزبائن حيكتروا، يا الله أم الخير كتري الجبنة وزيدي الفناجين وزودي الجنزبيل باقي شيخ العرب مل بحب الهبهان وكيفه ما بتم إلا بالجنزبيل والعجب لو كانت البتصب الجبنة فنجرية حبشية داب التسعطاشر سنة.

سلام وشوق يا مولانا ود شيقوق

Post: #53
Title: Re: فنجان جبنة ولمة ناس حلوين
Author: مني عمسيب
Date: 14-09-2015, 01:20 PM
Parent: #52

فنجان جبنة بي شمالو يسوا الدنيا باحالو,,


مسدرة بنكهة البن :
حلات اللمـــة والناس والونس والطيبـة
عن فاضلابي والمحرية موها غريبــــة
الناس العزاز الديمة لي حبيييييييييبيييية
سلام واشواق بنكهة جبنة طاعمة رهيبة

والله مشتاقييييييييييييييييييييييييييين .
ولا أقول ليكم بالمرة بحبكم ( هارت )


Post: #54
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 04:30 PM
Parent: #53

Quote: بداء
يشق هذا الصمت صوت فندك بت أحمد وقد بدأت في دق البن الذي ما زال بعض منه في القلاية فوق
النار...

يا اميرة ودالمدير ده كنت داير اقول ادوهو تِنِنى مابِكْرِى في شان جانا داخل بلا سلام لكن عشان ,, حكيهو الطاعم طعامة جبنتكن دى نديهو بكرى
ومعاهو كباية موية صااااااقطة من الزير ,, يبقا لى جاى دايخ من الحر عشان كدى نِسى يسلِّم ,,
ياود المدير ياقريبى ,, ياخ حكايتك دى ,, الواحد شمَّ منها قلية البن عديييل كدى ,,
ياخ انت التقول مولود فى وادى عبقر ,, خسَّمتك بالنبى ماتفوت تخلى اللمة الحلوة دى ,, وزى ماشايف كل الحلوين هنا,,

Post: #55
Title: Re: فنجان جبنة ولمة ناس حلوين
Author: عبد المنعم سيد احمد
Date: 14-09-2015, 05:22 PM
Parent: #54

وانا كمان..من هنا بدعولكم صديقتنا الرائعة
ست البنات
زوله وناسة وحديثا طاعم..
سكينة بت كمبال
وينك


Sukkary_date1.jpg Hosting at Sudaneseonline.com

Post: #56
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 05:32 PM
Parent: #55

هلا بالبرمكى كبر
Quote: وجبت لي كم باكو حرجل..لغاية الليلة متصور معاهم حداشر مرة..!


ياخ قطَّعت مصارينى بالضحك ,, قلت لى حداشر صورة
شفت الغربة دى بتغيِّر حاجاتنا كيف ياكبر؟
يعنى هسع كان كنت فى السودان وجاء زول يصوِّرك جنب حرجل
يمكن تضاريهو عشان مايطلع فى الصورة لكن ,, اقول مجاراة لقول الامام الشافعى حين قال:
ارْحَلْ بِنَفْسِكَ مِنْ أَرْضٍ تُضَامُ بِهَا وَلاَ تَكُنْ مِنْ فِرَاقِ الأَهْلِ فِي حُرَقِ
فالعنبرُ الخامُ روثٌ في مواطنهِ وَفِي التَّغَرُّبِ مَحْمُولٌ عَلَى الْعُنُقِ
والكحلُ نوعٌ منَ الأحجارِ تنظرهُ فِي أرضِهِ وَهْوَ مَرْمِيٌّ عَلَى الطُّرُقِ
لمَّا تغرَّبَ حازَ الفضلَ أجمعهُ فَصَـــارَ يُحْمَلُ بَيْنَ الْجَفْنِ وَالْـــحَدَقِ
ونقول:
والحرجل نوع من الكاويقَة تنظره فى السودان وهو مفروش فى الملجة
لمَّا تـــغرَّبَ حازَ الفـــضلَ أجمعهُ فَصَارَ يُحْـــمَلُ فى الصورة لا الدَّلَجة
Quote: ..وضحكت شديد لمن اكتشفت انو الفقهاء كانوا بتغالطوا في موقف الجبنة من الحل والحرمة..وبعضهم حرمها تماما زيها وزي الخمر..

يمكن الزول ده فكَّر انها زى قعدة الكوتشينة بتلهى عن ذكر الله

Post: #58
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 05:41 PM
Parent: #56

Quote: البوست دة لم كل الذين احبهم

وياريت ياشيخ العرب ,, يجى ودالبوش
المسنوح شيقا شرَّكنا ليهو بى فنجان بِكرى
غلبو يشْرُم ,, وتانى مابنفِكو الا نوصِّلو القلاَّية
يكرفلو ريحة قلية عشان يقعد بى عَدَلو

Post: #57
Title: Re: فنجان جبنة ولمة ناس حلوين
Author: اميرة السيد
Date: 14-09-2015, 05:33 PM
Parent: #55

والله يا عبد المنعم ود سيد احمد انت بالبلح الانت بتجيبو لينا هنا بتجوعنا وفي نفس الوقت كمان بتعطشنا
عشان الصورة الواضحة شديد دي بتخلينا كاننا فعلا اكلنا التمرات دي..
وانتو ما كلمتونا ان ست البنات هي سكينة بت كمبال... وانا بقول لود المنسي وينها سكينة بت كمبال وما شفناها
هنا في البوست..
ويا سكينة انتي بت كمبال صاحب الاجزخانات في الخرطوم.... ؟
ويا ود الفاضلاب انا شايفة اللمة فعلا بقت واسعة والناس السمحين بدأوا يحجزوا البنابر .. وان شاء الله
جاياكم برواقة ...
والله يديكم الصحة والعافية

Post: #59
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 05:48 PM
Parent: #57

Quote: يبدو أن القهوة لم تعد مشروبًا يستمتع به الإنسان فقط من خلال تناوله في الصباح مع
اطلاعه على جريدة أو كتاب، فالإبداع

انا ماقلت ليكم الجبنة دى سِرَّها باتع؟
تراها جابت ليكن فيصل خليل من اوروبا جبنة محضورة ,,
سلام ياصديقى ,,, اتمَهل ,, دار الحبايب تزدان بكم ياصاحب ,,

Post: #60
Title: Re: فنجان جبنة ولمة ناس حلوين
Author: عبد المنعم سيد احمد
Date: 14-09-2015, 05:59 PM
Parent: #59

اهلين بالرائعة الاميرة
سكينة بت كمبال..دى كسلاوية
وجزورها من تنقاسى..ونضمة
شايقى ضمة ضمة.
سكينة بت كمبال..باقى اخت
التشكيلية المعروفة..ام الخير كمبال
واخت الصحفى القامة..الراحل..عبد الواحد كمبال
وهى زولة صحفية واعلامية..وحكاية
التقينا بالقاهرة
فكانت نعم الاخت والصديقة
ياسكينة بت كمبال
الناس الحلويين ديل جت عليهم
باقى منتظرنك.



11701013_936687606394473_8173269767700724896_n2.jpg Hosting at Sudaneseonline.com

Post: #61
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 06:01 PM
Parent: #59

Quote: عووووووووك زحوا لي زحوا لي عيني وقعت في البوست العلالو عاكل في السماء دا هسه
زحوا لي الله يمهلها عليكم دنيا واخرة

اووووو شيقا ,,, شيقا
أخرجت الانترنت اثقالها ,,, ده كلام ده ياشيقا؟
ياخ الناس دى تسعل منك سعال الضهبان
فى البوست ده وغيره ,,, يعنى علا نشَرِّكلك
بى فنجان جبنة؟ شرَّكت ليك قبل ده بى صحن
موليتة ماجاجابتك قلنا يمكن العنكوليب مغير طعمها فى خشمك
اها قلنا الجبنة دى بتهضم ,,, الحمد لله شركنا قبض
كل سنة وانت والناس الحلوين الهنا والجاييين بخير وطيبين ولاميِّن.

Post: #62
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 07:22 PM
Parent: #61

Quote: مسدرة بنكهة البن :
حلات اللمـــة والناس والونس والطيبـة
عن فاضلابي والمحرية موها غريبــــة
الناس العزاز الديمة لي حبيييييييييبيييية
سلام واشواق بنكهة جبنة طاعمة رهيبة

والله مشتاقييييييييييييييييييييييييييين .
ولا أقول ليكم بالمرة بحبكم ( هارت )

هيييييع ابشرى بالخير
حلات اللمة والناس والونَسْ لمَّان تبقى إنتى قريبة
ياسِتِّهن الـ مكَمَّلة بالجمال واللِّهيج الحالى وْطِيبَة
يابِت العُزاز المحجَلين الغُرْ الـ ما بجيبو الريـــــبة
سلام واشواق بى نكهة النيل فى بلداً علينا حبيبة

Post: #63
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 07:32 PM
Parent: #62

Quote: اهلين بالرائعة الاميرة
سكينة بت كمبال..دى كسلاوية
وجزورها من تنقاسى..ونضمة
شايقى ضمة ضمة.

غايتو ياود سيد أحَمَدْ صورة العجوة دى زي ماقالت لك اميرة
جَرَّت ريقنا ,,, ياخ دى تنقِّط عسل ,,, انا غايتو عندى سكرى
لكن كان لقيت العجوة دى يمين البعا زى ما تجى تجى
ياخ مرحب ببت كمبال ومرحب بالشايقية بدون فرز

Post: #64
Title: Re: فنجان جبنة ولمة ناس حلوين
Author: Sudany Agouz
Date: 14-09-2015, 10:14 PM
Parent: #63

الأخ الحبيب والعزيز والفاضل ..
عبد العزيز الفاضلابى ..

يعنى بجبنتك دى .. داير تقلب علينا مواجع الذكريات ..
لكن معليش .. كلو يهون عشان خاطر قعدة الجبنة دى ..
واللمة السمحة ..

وبالرجوع الى تعليق بنتنا الحبيبة فردوس جامع ..
وذكريات القضارف .. أيضاً لى بعض الذكريات ..
و بالأخص فى قرية القريشة .. حيث كان والدى
ارجانوس جبران رحمه الله ناظر المدرسة الأولية ..

وكما قالت بتنا الحبيبة فردوس جامع ..

Quote: البوست ده جميل يعلم الله
و فيه ريحة مطرة و قهوة خريفية في القضارف
قهوة كااااربة و معاها و داعية ونااااااسة...
غايتو ذكرتني أيام خلت كانت جميلة و يا نعة
يتلموا الجارات في قهوة ضهرية و أكتر حاجة كانت عاجباني
قصص الودّاعيات... و بحبهن في الله
الله يطراهم بالخير.


وعشان كده .. نحب نسمع فى القعدة دى ..


وما أحلاها من ذكريات ..

والرب قادر .. يجمع الأحباب فى ساعة صفا ..
ويبارك فى الجميع ..
أخوكم وعمكم العجوز ..
ارنست
+++

Post: #65
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 14-09-2015, 10:42 PM
Parent: #64

Quote: و بالأخص فى قرية القريشة .. حيث كان والدى
ارجانوس جبران رحمه الله ناظر المدرسة الأولية

هلا هلا ,, الحبيب ايرنست جاء بى ذكرياتو
اكان كدى الجبنة دى بعد ماكانت جبنة عصراوية
شكلها حاتجر للمغربية ,, ايرنست ده حَكَّااااى
اطبُقيلو يافردوس ,, حبابك يازول ياسمح وسط السمحين
وكمان طلع ود بادية ماهو زول بنادر (القريشة)
علا يا ايرنست القريشة دى وين؟ هسع تلقاها من جخانيب
الجزيرة ,, اصلو اللَّسامى الغايسة دى علا من هناك
كاب الجداد والجداد غمَّد وشلَّعوها ,,,,,,

Post: #66
Title: Re: فنجان جبنة ولمة ناس حلوين
Author: عبد المنعم سيد احمد
Date: 15-09-2015, 01:30 AM
Parent: #65





مرحبا بعودة
كل الطيور المهاجرة

Post: #67
Title: Re: فنجان جبنة ولمة ناس حلوين
Author: Sudany Agouz
Date: 15-09-2015, 02:49 AM
Parent: #66

الأخ الحبيب عبد العزيز الفاضلابى ..
رداً على سؤالك .. عن موقع القريشة ..
Quote: علا يا ايرنست القريشة دى وين؟ هسع تلقاها من جخانيب
الجزيرة ,, اصلو اللَّسامى الغايسة دى علا من هناك


بالطبع .. هذه القرية " القريشة " عشنا بها تقريباً ثلاث سنوات ..
فى أوائل الستينات ..
وكنا نأخذ أحد اللوارى من القضارف .. حوالى 3 ساعات .. وهى تقع
على ما أذكر شمال شرق القضارف .. لأن هناك قرية
أخرى بعد " القريشة " تسمى " حلة حكومة " وحلة حكومة
هذه تقع على الحدود السودانية الأثيوبية ..

بالطبع .. الآن قد يكون الوضع قد اختلف تماماً ..

عمومياً شكراً لاستضافتكم .. وبالمناسبة الجبنة .. بالهبهان ..
كانت مظبطة .. وشرغرغا ... يقول يا ليل ..
دا كوم .. واللمة السمحة .. كوم تانى ..
بالله عليكم كتروا من القعدات السمحة دى ..

الله يبارك فيكم .. وفى حياتكم ..
أخوكم وعمكم العجوز ..
ارنست
+++

Post: #68
Title: Re: فنجان جبنة ولمة ناس حلوين
Author: الطيب شيقوق
Date: 15-09-2015, 05:43 AM
Parent: #67

Quote: والعجب لو كانت البتصب الجبنة فنجرية حبشية داب التسعطاشر سنة.



هههههههههههها وخاصة يا ود البلة اخوي كان زولتك عقلت كراع و مدت كراع واخدت ليها تكية مع مناولة الفنجان عاد ما تاني اخوك بيكونimmobilized عديل كدا علا ترشوهو بموية باردة

Post: #69
Title: Re: فنجان جبنة ولمة ناس حلوين
Author: رقية وراق
Date: 15-09-2015, 05:52 AM
Parent: #68

العزيز الفاضلابي والعزيزة أميرة والناس العزاز هنا،
سلام واهتمام واحترام.
أتابع وآتذوق وأقدر كثيرا.
سأعود.

Post: #71
Title: Re: فنجان جبنة ولمة ناس حلوين
Author: عبيد الطيب
Date: 15-09-2015, 06:15 AM
Parent: #69

ودي بمناسبة سِت الوَدِع وكشكشته البقوم معاها القلب...
في احدي الايام وذات اصيل والوقت خريف والوديان مخضرة والجداول جارية
والطيور تغرد وعلي امتداد البصر تري الارض اكتست بحلتها السندسية ارهفت السمع الي الفتاة (ام شوايل)
ومعها صديقتها تشدوان بهذه الاغنية بصوتٍ شجِّي حزينٍ ، وفيه شجن ،كأنهما قمريتان علي غصنٍ
ومن هسيس الجراري:
ياودْعِي الكَشْكَشتُو
والهدّاي عَطَشتُو
الصيد بايِتْ فتَّشْتُو
ونضرَك ما دَقَشْتُو
ونضرك ما دقشتو اي مثلك لم تر عيني......
واكاد اجزم، ان سمعت ،دقات قلبي ،وخفقانه، يكشكشان مع ودعهما، من جمال صوتهما ،وحسن سجعهما ،
وهنا تذكرت القصة التي تحكي، ان احد ولاة ،المدينة المنورة ،علي قمرها وصاحبها، افضل الصلاة والتسليم ،
مرِّ بطريقٍ من طرق المدينة ،فاذا جارية، تطحن برحاها، وتقول:
(وهويته من قبل قطع تمائمي متمايساً مثل القضيب النّاعمِ
وكأنِّ نور البدر سُنّة وجهه ينمي ويصعد في ذؤابة هاشمِ
فدقَّ عليها الباب ،فخرجت إليه فقال : ويلك احرة انت أمْ مملوكة؟ فقالت: بل مملوكة قال : فمَنْ هَوَيْت؟
فبكت ثمّ قالت: بحق الله عليك إلاّ انصرفت عنّي. قال: لا أريم ُ أو تعلميني. فقالت:
وانا التي لعب الغرام بقلبها فبكت لحُبِّ محمد بن القاسم
فسار الوالي الرّقيق ،الي المسجد ،فبعث الي مولاها ،فاشتراها منه، وبعث الي محمد بن القاسم بن جعفر بن ابي طالب،
وقال هؤلاء.... فتن الرجال،كم مات بهنَ من كريم ،وعطب عليهنّ من سليم)
وكانت مداهمتي لهُنَ مفاجئة ،وعلي غرّة من أمرهُنّ، لأن أشجار الوادي، كانت وارفة ،وكثيفة ،فتوقفن عن الشّدو وصحن بي قائلات :
اللَّفندي ما ختلتنا.... وفضحت امرنا... ..!
ثم تركتهن ،وعرجت علي مطيتي ،وذهبت لشأني ،وفي قلبي كشكشة ودعهنَّ وفي أذني ،صدي عذب شجوهن ،وكان من الرّيد اللّصم.

شفت كيف الوَدِع وفعايلو يا الفاضلابي
وقديما قالت شاعرة كباشية،تخاطب ودَّاعية، وتطلبها أن تَرمي الودِع، وتبحث عن حبيبها في رحلة النشوغ/ق
خطَّاطة خطِّي زيدِي
بَكْريكي ب مجيدي
شوفي لي حبيبي ....
في البلد البعيدي
*بكريكي أن أرشوكي وأعطيكي ، وهنا تعني مايسمي بالبَياض ..بفتح الباء والياء
ومجيدي تعني به الريال المجيدي... أبوعشرين قِرش ومجيدي منسوب للسلطان عبدالمجيد
وقيل ان الشاعر الشيخ محمد سعيد العباسي إستوحي من غنوة الكباشية إرجوزته
عرَّافة العربي زيدي ومن نداي أستزيدي
فكيف حال حبيب أمسي في القفر البعيدي
معزتي
تم التعديل للمطايبة علي رباعتي الزينين
الطيب ودشيقوق وإسحق وداللَّمين

Post: #70
Title: Re: فنجان جبنة ولمة ناس حلوين
Author: الطيب شيقوق
Date: 15-09-2015, 05:58 AM
Parent: #68


الفاضلابي

كيفك يا الرضعان فوق الخلال والله مشتاقين و بفتش لرقم تلفونك ما لاقيهو ياخ ارميهو لي في رسالة خاصة




Quote: يعنى علا نشَرِّكلك
بى فنجان جبنة؟ شرَّكت ليك قبل ده بى صحن
موليتة ماجاجابتك قلنا يمكن العنكوليب مغير طعمها فى خشمك
اها قلنا الجبنة دى بتهضم ,,, الحمد لله شركنا قبض
كل سنة وانت والناس الحلوين الهنا والجاييين بخير وطيبين ولاميِّن.


يا زول اخدني منكم قمري الوات ساب و الفيس انت فاكرني بفوت منكم بساهلة ساااااااااااااااااي كدا؟

وين الككو الفجغ الطين و المسنوحة الظهرت لينا من الصالحات القانتات ؟

Post: #72
Title: Re: فنجان جبنة ولمة ناس حلوين
Author: الطيب شيقوق
Date: 15-09-2015, 06:45 AM
Parent: #70

Quote: بكريكي أن أرشوكي وأعطيكي ، وهنا تعني مايسمي بالبَياض


ههههههههههها يجازي محنك يا و ابوي الطيب اللية إتلهمت البياض البعدل الطريق و الخاطر ؟

اسحاق ود البلة دا باقي لي ود فقراء و مربى مسايد ( جمع مسيد) بكون في طفولتو من النوع البجالس المشايخ و رامي بالو في الحاجات البدفسوها تحت التبروقة دي ههههههههههههههههه

الشيوخ الصالحون الجد جد - يا العبيد اخوي - من شدة العفة ما برفعوا التبروقة ابدا لمعرفة ما جادت به ايادي المحبين

لكن بيني وبينك مرات تلقى حوار مسينيح منتظر الشيخ يتنفض للصلاة و يعقبو بوراء عشان يخمش ليهو خمشة من تحت التبروقة

Post: #73
Title: Re: فنجان جبنة ولمة ناس حلوين
Author: عبدالله ود البوش
Date: 15-09-2015, 07:18 AM
Parent: #72

عوووووووووووووووووووووووووووووووووك
الناس الحلوين السمحين وقعتوا معاي

Post: #74
Title: Re: فنجان جبنة ولمة ناس حلوين
Author: الطيب شيقوق
Date: 15-09-2015, 07:31 AM
Parent: #73

عييييييييييييييييييييييييييك ود البوش جاكم متلب من فوووووووووق

حباب ود البوش دخري الحوبة

Post: #84
Title: Re: فنجان جبنة ولمة ناس حلوين
Author: خالد علي محجوب المنسي
Date: 15-09-2015, 01:09 PM
Parent: #59

حباب السمح الزين ود الفاضلابي
جيت بي رواق صاحبي المتمم كيفي
ود الفاضلابي اخوي مونة خريفي وصديقي
حبابةباقي اللمة من أبو سن لعندةاسغر زول ود شيقوق
حباب السمحات بناتنا.. حباب العجوز المتصابي
فيصل هليل.. حباب أسد الضرى ود ال بوش
حباب الزول الشفيف ود سيد احمد حباب ود البله اخوي
حباب ست الحوش الجمعنا زمن الأميرة حباب الغائب جلدونا حباب ود العبيد سلطان
زمانو حباب الكل ولحين ميسرة

Post: #121
Title: Re: فنجان جبنة ولمة ناس حلوين
Author: الطيب شيقوق
Date: 16-09-2015, 08:37 AM
Parent: #84

Quote: حباب السمح الزين ود الفاضلابي
جيت بي رواق صاحبي المتمم كيفي
ود الفاضلابي اخوي مونة خريفي وصديقي
حبابةباقي اللمة من أبو سن لعندةاسغر زول ود شيقوق
حباب السمحات بناتنا.. حباب العجوز المتصابي
فيصل هليل.. حباب أسد الضرى ود ال بوش
حباب الزول الشفيف ود سيد احمد حباب ود البله اخوي
حباب ست الحوش الجمعنا زمن الأميرة حباب الغائب جلدونا حباب ود العبيد سلطان
زمانو حباب الكل ولحين ميسرة

--------------------------------------------------------------------------------


هههههههههههههههها حباب الككو الفجغ الطين

ياخ منك طولة و الشوق ليكم قناطير

كتر خير الفاضلابي الجمع المسانيح و المسنوحات

وحباب بسمات والف مبروك ليها بالعضوية

Post: #75
Title: Re: فنجان جبنة ولمة ناس حلوين
Author: إسحاق بله الأمين
Date: 15-09-2015, 09:20 AM
Parent: #1

Quote: هههههههههههها وخاصة يا ود البلة اخوي كان زولتك عقلت كراع و مدت كراع واخدت ليها تكية مع مناولة الفنجان عاد ما تاني اخوك بيكونimmobilized عديل كدا علا ترشوهو بموية باردة

إت خابر يا مولانا ود شيقوق، الجماعة قالوا لي صاحبك دا غاتس وين يكون ما شم ريحة قلوة البن الحبشي دا؟؟
قلت ليهم صاحبي البن الحبشي ما زولو، زولي مكتول في الصيد والريم والغزال الحبشي، دا الطعم الوحيد البجيب الحوت. فعلا طعمي (الفنجرية الأمهرية) ما خذلني ومن أول رماي قبض الحوت من خياشيمه وجابو حي يفرفر.
تحياتي شيخ العرب مولانا ود شيقوق

Post: #76
Title: Re: فنجان جبنة ولمة ناس حلوين
Author: عفاف أبو حريرة
Date: 15-09-2015, 09:57 AM
Parent: #75

قيلتو عافيه

Post: #77
Title: Re: فنجان جبنة ولمة ناس حلوين
Author: الطيب شيقوق
Date: 15-09-2015, 10:16 AM
Parent: #76

Quote: إت خابر يا مولانا ود شيقوق، الجماعة قالوا لي صاحبك دا غاتس وين يكون ما شم ريحة قلوة البن الحبشي دا؟؟
قلت ليهم صاحبي البن الحبشي ما زولو، زولي مكتول في الصيد والريم والغزال الحبشي، دا الطعم الوحيد البجيب الحوت. فعلا طعمي (الفنجرية الأمهرية) ما خذلني ومن أول رماي قبض الحوت من خياشيمه وجابو حي يفرفر.
تحياتي شيخ العرب مولانا ود شيقوق


هههههههههههههههها والله عرفتوا لي عرفة اكان خليتني لصارقيل الفاضلابي كان تشموني قدحة

Post: #78
Title: Re: فنجان جبنة ولمة ناس حلوين
Author: اميرة السيد
Date: 15-09-2015, 11:07 AM
Parent: #77

والله يا ود الفاضلاب ما عارفين نشكرك كيفن..
انت لميت لينا كل الناس السمحة ..وفعلا حكاويكم
بتخلينا نضرب الهم بالفرح والاشراقة..
وبالنيابة عنكم كلكم نرحب بالضيفة العزيزة الشاعرة
الرقيقة والاديبة الاريبة الراقية رقية وراق...بالله زحوا
شوية وخلوها تقعد في وسطنا واكيد حتجينا بحكاوي
جميلة وانيقة..
وجاياكم برواقة
والله يديكم الصحة والعافية

Post: #79
Title: Re: فنجان جبنة ولمة ناس حلوين
Author: وضاحة
Date: 15-09-2015, 11:37 AM
Parent: #78




Post: #80
Title: Re: فنجان جبنة ولمة ناس حلوين
Author: عزالدين عباس الفحل
Date: 15-09-2015, 11:48 AM
Parent: #79


بصراحة دا بوست جميل ،
مترع بالفخامة ،
،،،،

.
..







عزالدين عباس الفحل
ابوظبي

.
..

Post: #81
Title: Re: فنجان جبنة ولمة ناس حلوين
Author: عبدالحفيظ ابوسن
Date: 15-09-2015, 11:56 AM
Parent: #80

خرف ام سعن .. صرفة وجراد
بوست قبض الطير كلو
ودشيقوق
ودالبوش
باقي الطيرة الفارة ديييك

Post: #82
Title: Re: فنجان جبنة ولمة ناس حلوين
Author: عصام الدين نصر ابراهيم
Date: 15-09-2015, 12:19 PM
Parent: #81

والله بجد بوست ممتاز سلمت اناملك

Post: #83
Title: Re: فنجان جبنة ولمة ناس حلوين
Author: ismeil abbas
Date: 15-09-2015, 01:02 PM
Parent: #79

أخى الفاضلابى سلام عليك وعلى المعاك....

هذا البوست دعوة للتسامح والمحبة ونبذ الفتنة والكراهية.......

قهوة عصرية وبنت فنجرية وعنقريب وعراقى وناساً سمحين متلكم,

فى يوم خريف والدنيا عصرية طالع من البيت ومجيه وماشى لصاحبى لاقتنى السارة زوجة ودعمى فى الشارع لشقاوتى اليوم داك...

حق الله بق الله ووين ماشى وأخباركم ..قالت لى دخلنى بيت خالك عيسى ده عندهم كلبة كعبة خلاص....طنطنت فى سرى وقلت يعنى بعدين نجرى أنا وهى أنا ذاتى الكلبة دى قبل كده هارشانى ...لكن الله يستر.....واركز يا ولد وأبنى على المفاجأت يمكن ربك يستر...السارة دى خوافة كان كشكشت وراها ورقة بتنط...

اها إتوكلت وعملت كل ألأحتياطيات ووضعت إستراجية لغزو بيت خالى والمضادات للكلبة.....الله إلعنها...

زقاق ناس خالى ده طويل وضيق لو زرتتنا الكلبة دى إلا ننط فوق الحيطة أها العمل؟

لقينا الباب متركش السارة من خشم الباب قبل ما نسمع صوت الكلبة كنكشت فى قميصى وكرفسته وأنا عامل فيها صامد وجواى رجفة وخوفة وأقول ربك يسهل...

المهم أديت نظرة من بعيد لقيت ليك الكلبة راقدة وكمان والده.....أمك أمانا ما إتفضح راجل الليلة...أركزيا يا الجابوك فزعة...

قلت للسارة أمشى عادى وفكى القميص الكلب ده قالو بعرف الزول الخايف وبجرى وراه ...قالت لى خلاص نرجع قلت ليها خصم ما أرجع الليلة كان يعضينا إنت عايزة تشيلى حالى...أفو أنا أخو البنات....

أها أدرجنا وإتقدمنا خطوات وسارة كلما نقرب للكلب تزداد قرباً من رقبتى....ولمه خلاص قربنا الكلب جره فينا جررررررررر....ما إشتغلت بيه وهو برضع فى جريواتو ...جرررررر ولا هببتو وسارة بقت فى الطرف الثانى عكس جهت الكلب عملتى حائط بشرى.....أها ربك رب الخير خالى جا مارق والكلبة بتهرش منو....وقف بينا وبينه وبعد ده الكلبة هوهت وأها السارة فكتنى ومسكت فى رقبة خالى وبشبشبة أطمجت فى المويه ورشتى ورشت خالى وجاطت الدنيا....أها خالى دخله وانا مشيت البيت أغير من ثانى وإنعل أبو الرجالة لو بتأخرنا.....كلام للونسة...وشكرا لهذا النفاج الذى أتاح لنا فرصة البوح....تقديرى للجميع.

Post: #85
Title: Re: فنجان جبنة ولمة ناس حلوين
Author: اميرة السيد
Date: 15-09-2015, 01:38 PM
Parent: #83

ود الفاضلاب
الف مبروك .. وبشهادة الجميع البوست بقى لينا استراحة رائعة للقليلولة في العصرية ونتونس
مع الناس السمحين ديل والقلوبهم مليانة صفاء ومحبة وود ... وانا شايفة ضيوف عزاز شرفوا
اللمة...
بس كمان ما شايفة منى بت عمسيب ,, ويا ريت تزين لينا البوست بوردة وزهرة برتقالية ولا زرقاء
ولا بألوان القوز قزح...
والله يديكم الصحة والعافية انتو البترسموا البسمة في وجوهنا رغم توترات الغربة العايشنها هنا..

Post: #86
Title: Re: فنجان جبنة ولمة ناس حلوين
Author: فردوس جامع
Date: 15-09-2015, 02:28 PM
Parent: #85

الأعزاء ناس حوش الجبنة و السماحة دون فرز لعلكم طيبين...

في سيرة ست الودع

الأخوان...
الفاضلابي, عبد المنعم, عبيد الطيب و كبر
ست الودع تغازل أحلام الحضور بي بشاشة و سبعة ودعات و بياض محبة...
تسفر الشاب وتنجح الممتحن و تعرس للشابات و تلبس الزوجة دهب و تبني ليها بيت لو ما عندها و آي يزول يلقى الفي مُرادهُ.
وهي طاقة إيجابية مرحة وبشوشة ,تتواصل مع الجميع بي حميمية دون زُلفى و لا تكلُّف...ترضي الجميع حتى الأطفال تَبَشِر أُمهاتهم بمستقبلهم الباهر!
و بعد شراب فناجين المحبة مع ودع الأحلام كل زول بيمشي و جواه طاقة أمل مفتوحة في شارع آمالهُ العريضة و زادهُ بياض الوداعية الحنينة و هِمَّتُه!
و الودع كان و لا أعلم إذا مازال واحد من أهم طقوس الجبنة الحميمة و الجميلة إضافة لي طقس القلي و تبخير الفناجين بالمستكة أو اللُبان...

يااااه كم أشتاق لي جبنة ضهرية في ضل شجرة أو قطية وحوش مرشوش إلفة و حنية!
هي النوستالجيا إذن...
لي عودة!

Post: #87
Title: Re: فنجان جبنة ولمة ناس حلوين
Author: فردوس جامع
Date: 15-09-2015, 03:17 PM
Parent: #86

Quote: يعنى بجبنتك دى .. داير تقلب علينا مواجع الذكريات

الأخ العزيز آرنست
هو قد فعل ...
أول ما شفت البوست و شُفت الصورة الجابها الأخ العزيز الفاتح جاتني جحافل من الشوق و تداعيات لي زمن جميل و حنين كُل حاجة
فيه جميلة...هو الزمن الجميل عندي بالرغم من بغض البعض لهُ (عصر التمكين)!
و بالرغم من صدحنا صباحا في طابور الأساس و نحن في الزي المُبرقع بي الله أكبر ياهُو دي دفاعنا الشعبي ياهو دي...
و انتبهت لحاجة مهمة ...
إنه الزمن الجميل هو عبارة عن محطة عُمرية لِكُلٍ منا تختلف ساعة حدوثها و قد يكون لدينا أزمان جميلة كثيرة نستدعيها وقتما داهمنا الحنين!
في الغالب هذه الأزمان ما إن برحناها لتباكينا عليها و اشتقنا لها!!!
Quote: وبالرجوع الى تعليق بنتنا الحبيبة فردوس جامع ..
وذكريات القضارف

ياااه ... قضارف السعد و بلد الخير
اليومين ديل مُشتاقة لي مطرة بي رعدة شديدة...هكذا قلت لي رفيق دربي قبل يومين و كانت عندنا مطرة حنينة و مافيها رعد
حتى لم تعد تلهج ألسنتنا معها بما حفظونا و نحن صغار و خايفين من الرعد ...
"سُبوح قدوس رب الملائكة و الروح"
"سبحان الذي يُسبح الرعد بحمده والملائكة من خيفته"
نطلع نلقى المطرة صابة أو صَبّتْ ... أمطار وديعة و كاتمة صوت!
مُشتاقة لي مطرة بي غُيوم مُلبدة سوداء تُنْبِئ بي قدومها و نحن نجري نلم المقشاشات أو المُكناسات و نلم الهدوم من الحبل عشان المطرة ما تدقهم و ندخل العناقريب
مطرة دُعاشها سابقها و جايي من ناحية الصعيد زي ما بقولوا في أحيان كُثُر و للآن ما عارفة الصعيد ده إتجاه ولا منطقة جغرافية ... المهم تكون جاية من الصعيد !
و بعد تمطر تحتفل الأرض و تمنحنا أجمل روائح الطبيعة ....
و العجب ريحة القطاطي بعد المطرة....يا سلاااام
Quote: قرية القريشة

أُختي كانت شغالة فيها أُستاذه بس نهاية التمانينات أعتقد...

و مشكور على سمسم القضارف
و هدية من إيدك مقبولة كما تغنى الخالد سيد خليفة عليه الرحمة
و مخاطرة لي أبوسن و طلحة ما جبت الفيديو...
أصلو كنت عاوزة أجيبها بي صوت فضل أيوب لكن خفت طلحة يمشي يصاحبه في الفيسبوك كمان

Post: #88
Title: Re: فنجان جبنة ولمة ناس حلوين
Author: عبد المنعم سيد احمد
Date: 15-09-2015, 03:20 PM
Parent: #86

11873738_986681944715156_382706709315230294_n.jpg Hosting at Sudaneseonline.com


دى ماياها..ام سبعتاشر
ياود شيقوق

..

Post: #89
Title: Re: فنجان جبنة ولمة ناس حلوين
Author: خالد علي محجوب المنسي
Date: 15-09-2015, 03:25 PM
Parent: #86

سلااام ويا سلام يا الفاضلابي
فعلاً بوست مترع
أنت مترع دي معناها بتكرع شة ما مليان
من وين أبدأ ووين أقيف
كدي في البداية أتقدم لك بالشكرعلى هذا الجمال قهوة ضحوية
في ضل الأوضة الجالوص
وتاني باشتان التحية والشكر للأخ أبوسن للتواصل الجميل
وكدي النحي الناس الحلوين ديل
أبدأ ظنّ و أخواتها
الأميرة أميرة ( وين أخيتك بسمات ) .. بت عمسيب و الورد .. بت وراق وأرجع أقول لي أميرة لك الشكر
لفت نظرنا لشاعرة في مقام بت وراق قرأت قصديتها يا سلام يا سلام
والسلام والتحية لسكينة بت كمبال
حباب بت عفاف .. سلام تعظيم للملكة وضاحة
اخوان البنات .. نبدا من وين خلينا نبد من الكبير لاصغرهم يعني من ود ابوسن لعند شيقوق أسغر زول
مرورا بي أسد الضرى ود البوش و الشفيف عبدالمنعم سيداحمد .. والحاضر في القلوب الغائب جلدونا
ود العبيد وود بلة وكبر وكلالأخوة الكرام تحية مبارك
ولحين ميسرة

Post: #90
Title: Re: فنجان جبنة ولمة ناس حلوين
Author: خالد علي محجوب المنسي
Date: 15-09-2015, 03:28 PM
Parent: #89

وسلااام قدر تراب البطان عفاف ابوحريرة
يا سلام والله دابوست جميل المرق بت ابوحريرة من وكرتها

Post: #92
Title: Re: فنجان جبنة ولمة ناس حلوين
Author: اميرة السيد
Date: 15-09-2015, 03:36 PM
Parent: #90

( وين أخيتك بسمات )

>>>>>>>>>>>>><<<<<<<<<<<

عزيزنا خالد ود المنسي
الاخية بسمات غرقانة وسط المراجع والهوم ويرك..
لكن وريتها البوست وكلمتها برضه بوصول الشاعرة الأديبة رقية وراق
واظنها ما حتستحمل الابتعاد كثير عن بوست السماحة وقيلولة العصرية واكيد حتطل للمتاوقة
وخاصة وانها ذواقة للشعر بكل انواعه..
والله يديك الصحة والعافية

Post: #91
Title: Re: فنجان جبنة ولمة ناس حلوين
Author: إسحاق بله الأمين
Date: 15-09-2015, 03:33 PM
Parent: #1

يحكى أن الشاعر الكبير الحاردلو حلً ضيفاً على أحد شيوخ البطانة ، ومن عادة أهل البطانة إستقبال الضيف وتقديم القهوة مع الترحيب الحار. أتت جارية جميلة جدا تحمل "الجبنة" في يدها ونسيت "الوقاية" التي توضع "الجبنة" عليها ، فسحبت حذاء "مركوب" الشاعر الحاردلو وقامت بوضع "الجبنة" عليه .
لم تكن المسكينة تعلم أنها في حضرة شاعر فحل، ولم تكن تعلم أن ما فعلته يعتبر إساءة بالغة وعدم تقدير لشاعر كبير.
نظر الحاردلو إليها بازدراء وسألها عن اسمها، فأجابته بعنجهية وكبرياء ووجه مقطب "مصرور": " سموني "مجيّهه" فرد عليها الحاردلو حالا :
سموك مجيهة
والجيهه ما استحقيتيها
ويا خسارة على الإسم
الأدوه لواحده سفيهه
ما طال الليل ودام النهار
تلقاها صارة وجيهه
وعاجبه الهضليم
الكابي فوق إضنيها
القاموس:
الهضليم: الشعر (بفتح الشين والعين)
الشرح دا يا ود شيقوق ماليك أنت وأصحابك الرضعانين مع البهم بالليل والذئآب تعوي عوووووووو.

Post: #93
Title: Re: فنجان جبنة ولمة ناس حلوين
Author: فردوس جامع
Date: 15-09-2015, 03:50 PM
Parent: #91

الأخ العزيز اسماعيل عباس
Quote: قلت للسارة أمشى عادى وفكى القميص الكلب ده قالو بعرف الزول الخايف وبجرى وراه

ذكرتني سك الكلاب في الحلة

في مرة من ذات المرات و نحن طالعين مداعي لي عرس أُختي دخلنا بيت جيراننا و الباب موارب ساي لزيناه و دخلنا و ماكُنا شايفين الكلب
غايتو اليوم داك كان يوم احتفال للكلب بس الحمدلله ما عضانا
جو ناس البيت أنقذونا منه و اتاخروا دقايق عشان كانوا في بيت الجيران لكن الدقايق دي كانت ساعات الله لا عادها...
وفي مرة تانية بيت حبوبتي بيتمشي بي شارعين في شارع قصير لكن فيه كلب و الطويل مافيه كلب أها يوم من أيام الشجاعة أنا وبنت خالي مشينا بي شارع الكلب غايتو مرقننا كرعينا أدانا سكة لا تُنسى...

و آخر سكة لي كانت من كلبة وديعة يسموها هنا في بال Chiwawa ,كلبة جارتنا و هي تتمشى و أنا كنت بتمشى و اليوم داك الكلبة
أتفكت منها أو كانت ما مربوطة بي ليش ...
قالت لي عاوزه تلعب معاك.
بي قلبي قلت ليها تلعب مع زول ما ساكنو كلاب قبل كده و مُعقدنه ....


و تحياتي و تقديري

Post: #94
Title: Re: فنجان جبنة ولمة ناس حلوين
Author: فردوس جامع
Date: 15-09-2015, 03:50 PM
Parent: #91

مكرر...

Post: #95
Title: Re: فنجان جبنة ولمة ناس حلوين
Author: khaleel
Date: 15-09-2015, 04:03 PM
Parent: #94

ممكن اشارك ود عمي وضيوفو



Post: #96
Title: Re: فنجان جبنة ولمة ناس حلوين
Author: عبد المنعم سيد احمد
Date: 15-09-2015, 04:15 PM
Parent: #95




اهداء
لفردوس جامع
ولاهل القضارف الكرماء

Post: #97
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 05:54 PM
Parent: #96

Quote: العزيز الفاضلابي والعزيزة أميرة والناس العزاز هنا،
سلام واهتمام واحترام.
أتابع وآتذوق وأقدر كثيرا.
سأعود.

سلام على الناس القلوبها صافية وونستهم تَدر العافية
والـ نبدأ ليكم ببت ورّاق باعتبارها محتفى بها وزينة اللمة الحلوة دى وزى ماعلّمونا اللمريكان ليديز فيرست ,,
مرة خواجة سعلنى قال لى انتوا فى افريقيا بتمشوا قِدام النسوان ليه؟ قلت ليهو عشان كان لاقنا اسد يشيل الراجل والمرأة تتخارج ,,
اها يابت ورَّاق حبابك فى دارك وزى ما شفتى الناس دى كووولهم فى رجاك ,,
وراجين كلامك الـ بِنَقِّط عسل زى عجوة ود سيد احمد الـ فوق دى
مرحب بيك مرة تانية ,, وحبابك ماغريبة دار.

Post: #98
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 06:17 PM
Parent: #97

Quote: خطَّاطة خطِّي زيدِي
بَكْريكي ب مجيدي
شوفي لي حبيبي ....
في البلد البعيدي

ياسلاااام ياولد الطيب
رجعتنا من مغرب الشمس الى مشارقها
من استاربَكس الى ام شوايل وصاحبتها
رجعتنا الى البداوة وعطر الحقول وزهرات
البَرَم صفراء فاقع لونها ,, والخُرِّيم وريحة الحراز والمطر
ياهٍ لدنيا فاتنا قطارها فلا نراه الا لمحة فى خواطركم الجميلة

Post: #99
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 07:16 PM
Parent: #98

Quote: يا زول اخدني منكم قمري الوات ساب و الفيس انت فاكرني بفوت منكم بساهلة ساااااااااااااااااي كدا؟

ههههه الله يجازى محنك ,, كويس الـ ما اخدك مننا باص الروصيرص
يازول الحمد لله الـ جمعتَ ,, انا الصارقيل البجيبك عارفو علا قلنا نسترك
المرة دى بنعَزِملَك فوق الشيخ فلاح عشان تهَجِس معانا فى قعدة الجبنة دى.

Post: #100
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 07:26 PM
Parent: #99

Quote: عوووووووووووووووووووووووووووووووووك
الناس الحلوين السمحين وقعتوا معاي

هييييع امانا ,, ماحِلَت القعدة ,, بس ياود البوش ماتحندقنا
وتفوت تخلينا ,, باقى مشواريك ملحوقة نحن مغرودين فيك
اتوهَّط يازول ياسمح ,,

Post: #104
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 08:15 PM
Parent: #100

Quote: حباب ست الحوش الجمعنا زمن الأميرة حباب الغائب جلدونا حباب ود العبيد سلطان
زمانو حباب الكل ولحين ميسرة

هييييع المك ياشيقوق كان غاتس زيَّك كدى علاَّ شَرَّكْتَلو بى دود قلعتو
من تحت سُنطَة قايمة فى جزيرة ام جَدِّق تالا الفاضلاب ,,
فعلاً يامك الفضل فى هذه اللمة الحلوة بعد ربنا يرجع لى اللميرة
ست الحوش الاصلى ,, ورجيناها تجى تسويلا نفير عشان نبنى
الحوش بالعون الذاتى عشان عارفين بلدية بكرى دى مابتعوض لها
زولا حوشو شالو السيل ,, زى والى الخرتوم يقول لك الخريف جانا فجعة.
وهى ـ اميرة ـ كمان سفرها كتير فقلنا نسوى الحوش ده ونسلّما المفاتيح
متين جات تلقاهو مفتوح ,

Post: #101
Title: Re: فنجان جبنة ولمة ناس حلوين
Author: ست البنات
Date: 15-09-2015, 07:38 PM
Parent: #99

وا مغايسي البنوت والبوطان كملوا الدفيق والصفوري عليي !

سلام للجميع ,
وبالاخص اخوي عبدالمنعم فيشان هو الكوركلي!
وسلام من هنا ولاعن فلسطين.
وسلام للفاضلابي الضابحلنا دا !
وبركة الليلي بس الشفنا خالد ود عمي محجوب !

نبدأ الونسي :

انا باقي بريد السفر وركوب الطيارة ( مع اني بخاف خوف الموت) خاصة بعد الطيران البقن يطشن ديل !!
اها بريد ركوب الطيارة عشان الحلاوة السمحة الطعمها ليمون ليمون ديك , تشبه حلاوة كرميللا الزمان يا حليلا !
لكن البارح لقيتلي دكان صينيين خاتنها بالاكياس !
اها باقيلي تاني ماب اسافر!!

2- وليدا لينا اتربى في امريكا ويخربو اسم العربي ,
مشى قعد في السودان سنة ولطشلو مصطلحات لكن ماهو موقعا سمح,
قام يصلي العشاء وبدأ يجعر بالقراية ,
لمان خلص امو قالتلو : العشاء دا ركعتين جهرأ وركعتين سرا . يعني مافي داعي للكواريك دي.
قام قالها : سرا يعنو شنو ؟
قبل ما تجاوبو اتذكر .
قام قالها عرفت سرا يعني اوسوس مش كدا؟
وبجيب ترمسة الشاي واجيكم.
ملحوظة:
يا عبد المنعم الدفيق دا خلا عيوني حوصن وريقي نشف !
تاني ما تجيبلك شيئ تختو لينا هيني تزهللنا بيهو .

ست البنات.

Post: #102
Title: Re: فنجان جبنة ولمة ناس حلوين
Author: Basamat Alsheikh
Date: 15-09-2015, 08:00 PM
Parent: #101

ا عبد المنعم الدفيق دا خلا عيوني حوصن وريقي نشف !
تاني ما تجيبلك شيئ تختو لينا هيني تزهللنا بيهو .

>>>>>> >>>>

وزي ما قالت ليك ست البنات البركاوي البتجي تحندقنا بيه ده خلن عيونا تحوصن وريقنا ينشف
.. ويا سلام الاحبة كلهم متلمين هنا وانا قعاد الكرسي ورم ساقي زي سيد الزلالي واقلب في الدفاتر
من صباحا بدري لامن تمسي...
وهسع اتذكرت شاعرنا ود بادي زهو يستلم جواب من امه والقال:"

" بت الخير يجيكي الخير وصل جوابك الكاتباهو للولد الحتالي
وكان الظن ترسلي لي هين هينين من البركاوي داك الطعمه حالي( زي بركاوي عبد المنعم ود سيد احمد)..
وتكتحي فيهو قبضات من نبق سدرتنا في بدل التسالي
سؤالك يا يمة عن احوالي كان شفتيها تغنيك عن سؤالي
انا اتوكرت في قلب البنادر زي غريق شرقان مدلدل في الدوالي
جات شايلاني حرة جوف وانا اتحديث مجالا مو مجالي
مصائب الجامعة اكبر من جميع الشفتو ولا سمعتو في ايامي الخوالي
وقعاد الكرسي كان شفتيهو ورم ساقي زي سيد الزلالي
اقلب في الدفاتر من صباحا بدري لامن تمسي ما بنسي انشغالي
اشوف الليل تحت ضوء الكهارب وديمة هارب من فراشي وهادو حالي
ده كله عشان اجيب نمرا انافس بيها واستر بيها حالي..

والوصف الوصفو ليكم ود بادي ده هو الخلاني انشغل عن هذا البوست الانيق
الرائع... وبجيكم راجعه بحكاوي حانافس بيها حكاوي فردوس واسحق ود بله
وقبال ما امشي عاوزة ارحب بالشاعرة المعروفة وصاحبة الكلمات الجزلة الاستاذة رقية وراق ومرحب بيها في حوش ود حلتنا
ود الفاضلاب..
واعذروني اذا غبت عنكم شوية والسبب مكتوب في البيت الاخير من ابيات الشاعر ود بادي المكتوبة فوق ..
ودمتم جميعا بالف خير وصحة وعافية


Post: #103
Title: Re: فنجان جبنة ولمة ناس حلوين
Author: ست البنات
Date: 15-09-2015, 08:10 PM
Parent: #102

يا جماعة الخير انتو وين ؟
يعني اكلتو الدفيقات وكمان خليتو الدار خلا !
اسع بلا بسمات جات تضلع قالت كرعيها ورمن من القعاد ,
هي ماها عارفاني انا اللاتي اتكن فيهن بالزيت من القعاد والزحيح فوق الكراسي !

البلاد دي القرايي فيها تقطع النفس!
يا حليل قرايتنا الهيني
شجري شجري شجر السدر!

ست البنات.

Post: #105
Title: Re: فنجان جبنة ولمة ناس حلوين
Author: Basamat Alsheikh
Date: 15-09-2015, 08:23 PM
Parent: #103

البلاد دي القرايي فيها تقطع النفس!
يا حليل قرايتنا الهيني
شجري شجري شجر السدر!
>>>>>
>>>>
>>>

يا ست البنات انتي قلتي الحقيقة
وفعلا القراي في بلاد العم سام بتقطع النفس
وانا عندي قريبتي بتقرا في جامعة الاحفاد ولمن امشي
ليها زيارة في الخرطوم ما بلقلها بتذاكر وتقول لي عندها امتحانات تاني يوم
ولمن اسألها تقول لي : وهو قراية الزمن ده عاوزة مذاكرة .. قرابتنا ساهلة وهينة
زي كلامك ده..
وقلت ليها يمكن عشان جامعتكم جامعة خاصة وبتدفعوا فيها فلوس..
لكنها اقحمتني وقالت لي :: وانتي يا الفالحة ما انتي كمان بتقري بفلوس في امريكا..
وما قدرت ارد عليها..
والله يديك الصحة والعافية

Post: #106
Title: Re: فنجان جبنة ولمة ناس حلوين
Author: اميرة السيد
Date: 15-09-2015, 08:40 PM
Parent: #105

عزيزي ود الفاضلاب
مفتاح الحوش ده لازمن يكون عندك لاني متل نضمك السمح ده ما بعرفوا الا يساعدوني
ناس فداسي العامراب وفداسي الحليماب... هسع عليك الله الكلام الكاتبو ود عبيد الطيب
بسمات يتقدر تفهم منها حاجة .. الا يعمل زي اسحق ود بلة ويكتب معاني الكلمات في القاموس

..
تخريمة للمسنوحة بسمات:
طولتي الغيبة .. انا جاياكي يوم الخميس .. وحضري جبنة استار بكس ... عشان فنجان جبنة لمة ود الفاضلاب
فنجان صغير.. عشان كدي حضري Extra large

Post: #107
Title: Re: فنجان جبنة ولمة ناس حلوين
Author: عبد المنعم سيد احمد
Date: 15-09-2015, 09:23 PM
Parent: #106

222644_599589093400442_220418713_n2.jpg Hosting at Sudaneseonline.com


222765_599588570067161_1634671695_n2.jpg Hosting at Sudaneseonline.com


مرحبتين حبابك ياست البنات
يابت كمبال..بعد تاخدى الماجستير
اختفى رجلك لحدى الدكتوارة..
ونجى فى لمة قهوة
فوق المكان الفوق ده
النادى الثقافى الاجتماعى
بتعرفى منو من اصحابنا الكانوا
معانا فى البكان ده
واسة معان فى حوش بكرى ده
سلمى بت الشيخ سلامة
احلام بت اسماعيل حسن
ويحى ود ابنعوف
عبد الله محمد عبد الله وكارلوس
حافظ البشارى ومحمد الاسباط
كمال قسم الله وعادل فيصل
وكان معانا مسعود
ولسة
شكرا لحضورك وتزينك هذا المكان ياصديقة.

Post: #108
Title: Re: فنجان جبنة ولمة ناس حلوين
Author: عبد المنعم سيد احمد
Date: 15-09-2015, 09:28 PM
Parent: #106



اهداء
الى بسمات بت الشيخ

Post: #109
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 09:36 PM
Parent: #108

Quote: قلت ليهم صاحبي البن الحبشي ما زولو، زولي مكتول في الصيد والريم والغزال الحبشي، دا الطعم الوحيد البجيب الحوت

تعرف ياود البلة ,, زولى المسنوح ده انا خابزو وعاجنو من زمن المحاكم
فى سنجة والسوكى ,, زول مطموس بلحيل ,, اكتر قضية عاجباهو قضية
نجمة ,, نازلة فى مجلة السوابق القضائية من شدة ما رايد القصة حافظا صم

Post: #110
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 09:55 PM
Parent: #109

Quote: قيلتو عافيه

حـــباب عفـــاف بت ابحـــريرة ســـت مِلِـــك مِيــــــها الأجيرة
جاتكُن بى واجِبَا الكريمة ام العريس الـ سّولو الضريرة
مبارك للوليد البار عجبنا ليكى وليهو صافى السريرة
حبابك بين اخوانك عزيزة عليهُن واخواتك يَغَنّلو السيرة

Post: #111
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 10:32 PM
Parent: #110

هييييع الملكة وضاحة بى جلالة قدرها هنا؟
ده بقى بوست مُلوكى ناقصو عمدة كلى
مك , وملكة واميرة ,, هيييع القومة ليكم

Post: #112
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 10:40 PM
Parent: #111

Quote: بصراحة دا بوست جميل ،
مترع بالفخامة ،

اووو الكلس ودالفحل ابـْضُراع
حبابك ولد العم انزل ,, ياولد رَيِّح الزِمِل
وات يا جنا جيب الموية لى عمك ودالفحل
فردوس الحقيهو بفنجان بِكْرِى
حبابك ابقى مِنجَم

Post: #113
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 10:46 PM
Parent: #112

Quote: خريف ام سعن .. صرفة وجراد
بوست قبض الطير كلو

هههههه ضحكتنى ياود ابسن اضحك الله سنك
قلت لى الشرك قبض الطير كلو؟ ده اسمو
شرك ام كَبَتَىْ زى مابقولوا اهلنا فى غرب السودان
شركاً قبض اسماعين وخليل ده شركاً بخيت

Post: #114
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 11:13 PM
Parent: #113

Quote: والله بجد بوست ممتاز سلمت اناملك

هلا وغلا بالحبيب الحبوب عصام
الإمتياز سبقتونا اليه بذوقكم الرفيع
لايعرف الجمال الا من كان جميلاً
الف مرحب بيك فى لمتنا وراجين سمح
الحكاوى والذكريات لتكون لنا زاداً فى غربتنا
عن وطن القمارى ,, والجمال.

Post: #115
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 11:36 PM
Parent: #114

Quote: هلا بالحبيب والزول السمح سماعين ودعباس ,, إنت عارف معزتك عندى
هذا البوست دعوة للتسامح والمحبة ونبذ الفتنة والكراهية.......

وهكذا انصرفت النية لننجم من شيلة ساس يسوس ومن المناقرة الما ليها داعى ,, عاوزين نكون اخوان
متحابين بدل المعارك الـ فى غير معتَرَك والعداوات الـ زى مابقولوا ناس الكورة كروت مجانيَّة ,,
ود كله فوق كم ؟ الزول أخير يطروهو بالسمح والزين لا بالكعب والشين.
Quote: فى يوم خريف والدنيا عصرية طالع من البيت ومجيه وماشى لصاحبى لاقتنى السارة زوجة ودعمى فى الشارع لشقاوتى اليوم داك...

ياه يا سماعين ,, تداعياتك دى عادت بى الى القرية قبال زمان الكهرباء والسكون الا من عواء كلب او ثقاء شاة ونقيق ضفدع فى ليلة خريفية
فرغم تلك الاصوات فلاتحس بالتوتر ,, فهى لاتتابع كضحيج المدينة.
عزمت عليك ان تعود وتترك العنان لذكرياتك ان تتداعى فقد استمتعت بحكاية كلبة خالك هذه ايما مُتعة!
Quote: عندهم كلبة كعبة خلاص ,,,
المهم أديت نظرة من بعيد لقيت ليك الكلبة راقدة وكمان والدهولمه خلاص قربنا الكلب جره فينا جررررررررر

هههههه تكونوا زَارِّين ابو ولادها فى طاحونة قالت تِسَّدا وتزركم فى بيت خالك ,,

Post: #116
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 11:47 PM
Parent: #115

Quote: بس كمان ما شايفة منى بت عمسيب ,, ويا ريت تزين لينا البوست بوردة وزهرة برتقالية ولا زرقاء
ولا بألوان القوز قزح...

هااا اللميرة إنتى بقيتى تسوقى بنمرة كم اعملى حسابك بِدُّوك تِكِتْ
بت معسيب حجزت بنبرا قبييييييييل واتوهطت واظنها بس غمرانة
من الفنجان اللَّدتو ليها فردوس باقى شربتو على الريق.

Post: #117
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 15-09-2015, 11:57 PM
Parent: #116

Quote: تسفر الشاب وتنجح الممتحن و تعرس للشابات و تلبس الزوجة دهب و تبني ليها بيت لو ما عندها و آي يزول يلقى الفي مُرادهُ.

الوداعية كانت زى قوقل فى زمَنا ده ,, يافردوس
فعلاً الودَّاعية تتمتع بذكاء فِطرى تلمح حاجة الزبون من
دردشة معه لايحس هو بمغزاها او من خلال معلومات تناقلتها
الشفاه فوصلت الى مسامعها

Post: #118
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 16-09-2015, 00:10 AM
Parent: #117

Quote: ممكن اشارك ود عمي وضيوفو

هلا وغلا بود عمى خليل ,, أأنت تستأذن لتشارك؟
ياخ انت الدعوة قُدِّمت ليك فى اول مداخلة
(ناس الكورة) وزى ماقال ود ابسن خريف ام سعن
انتو ياخليل لاقينَّكن وين ,, انتو زى الطيور المهاجرة
تنشافو فى الخريف بس ,,,

Post: #119
Title: Re: فنجان جبنة ولمة ناس حلوين
Author: عبدالله ود البوش
Date: 16-09-2015, 06:09 AM
Parent: #118

نصت نهار سكت عمي وفي ذلك الزمن البعيد كان وقت الجبنة وخت الودع
عمتي بتول بت الضريس تحلف تقول كان ما جاتك الطية يا بت الصرة بكسر وديعاتي ديل
وتنعدل بت الصرة المحمداها الطية وتبتسم وتفرد اصابعها وتجمعن للترحيب بالطية
بياضك يا بت الصرة كان ما جاتك الطية في العربية دي وتشير للودعة الواقفة سيفي كما العربية
وتحمد وتبشر واحيانا يبدو الحزن عليها خوفا ووجلا من مكروه قد يحدث
ودعوني ان انقل لكم منظر بديع مصاحب لخت الودع وشراب الجبنة بكري ومثنى وثلاث وبركة
في عتبة الباب تنتكي الكلبة جابنو وهي تعرف كل الناس الحولها وتبادلهم السلام والتحية
الجدادة الزرقاء الرقبانية مفقعة تلاتة سواسيو وتركض على خمسة بيضات ناقرات وواحدة ممزرة تجبلغ
الغوغاية في الركن القصي تجلس عليها بنية سمحة سماحة لمن خجلانة من سماحتا وتغوغي ولا خساها بالودع ولا ست الودع
لازمن تغوغي قطن مرتبة العيد حتين تقوم تسوي الجير
يدخل خلف الله العولاق مرددا لوحده سلام عليكم يا ناس البيت اهلا يا خلف الله اتفضل لا ماشي بقول كدا براه
وهي عادته المصاحبة لهو عند دخول كل البيوت لايتنظر منهم رد سلام ولا عزومة واعشق الخلف داي داي داي
واقرص فرملة في كراع جابنو فتعوص منه معلنة مضايقتها من خلف الله العولاق ولاتهتم به عارفاهو عولاق

Post: #120
Title: Re: فنجان جبنة ولمة ناس حلوين
Author: عبدالله ود البوش
Date: 16-09-2015, 06:16 AM
Parent: #119

حكاية اخونا السمح إسماعيل عباس حقت الكلبة ذكرتني نكتة
واحد بحكي لصاحبو قاليهو والله المرة هارشاني وقاطعة قلبي اعمل شنو ياخ ؟
قاليهو اسع تيا دي من قومتك مني تمشي البيت وتدفر الباب كوووووووووو بكراعك
المرة بتخاف وتاني ما بتهرشك
قاليهو سمح
أها بكرة صاحبو لاقاهو وعايز اطمئن على تنفيذ النصيحة
أها عملت بوصيتي ؟
قاليهو يا زول هوي اسكت ساهي
مالك الحصل شنو ؟
قاليهو زي كلامك مشيت شت الباب بكراعي
اسمع ليك المرة تقول تكككككككككككك
انا والغنماية جرينا

Post: #122
Title: Re: فنجان جبنة ولمة ناس حلوين
Author: الطيب شيقوق
Date: 16-09-2015, 08:50 AM
Parent: #99

Quote: الشرح دا يا ود شيقوق ماليك أنت وأصحابك الرضعانين مع البهم بالليل والذئآب تعوي عوووووووو.


هههههههههههههههههها

مسنوووووووووووووووووح ود البلة

Post: #123
Title: Re: فنجان جبنة ولمة ناس حلوين
Author: معاوية المدير
Date: 16-09-2015, 09:05 AM
Parent: #122

Quote: روعة يا ود المدير بالله زدينا كمان وكمان.
تسلم يا الحبيب


تسلم من كل شر وبلا يا اسحق أخوي،
والسلآم ليك ؤُللمعاك في البوستِ قاعدين .

عارف، الجبنة دي ليها تأثير عجيب جداً .
في وآحدة من أهلنا ديل اكانت مسويالآ لمّة جبنة نِهارية للنسوان، بيجن كل يوم
نُصّت نهار يشربن الجبنة ؤُ يِتمقلّن، ؤُ عندها عتوداً ليها ما بتبضع فيهو دِيّمة
رابطاهو جنبها في محل الجبنة . أها، مرّة غابتلها يومين برّا الحِلة في فراش
بكا، والعِتيد عقبا في اليومين ديل مرض بس بقا علي الموت، قدُر ما عالجوهو
ما عرفو فيهو شي . وكِت رجعت حزنت شديد ؤُ قنعت مِنو تب . أها، باكر
رفاقتا جنها للجبنة، ؤُ قالت كدي قلت بُنها وادتو كشكيشة في الهوا ؤُ ريحتو
قالت كدي عكلت في الجو، إنت يا العِتيّد قوووول كدي إتنفّض واقيف علي
حيلك !!!، اتاريهو كان راميهو البُن، تصدق ...

Post: #124
Title: Re: فنجان جبنة ولمة ناس حلوين
Author: ابو جهينة
Date: 16-09-2015, 09:24 AM
Parent: #123

jabana.jpg Hosting at Sudaneseonline.com


حليل زمان
سلام الفاضلابي وضيوفه الكرام

Post: #125
Title: Re: فنجان جبنة ولمة ناس حلوين
Author: Kabar
Date: 16-09-2015, 10:08 AM
Parent: #124

حباب الجميع يا اهلنا...




اها يا فاضلابي...

الجبنة ام بخور..تنزل الدستور..!

غايتو (الدستور) ما معانا ..لأنو ح يجيب اللوردات ناس ود شيقوق ويحي عبد الكريم وابوبكر قاسم..

تحياتي يا فردوس..و نقة الودع دي دايرة جكة براها..!

ونشوفكم..

كبر

Post: #141
Title: Re: فنجان جبنة ولمة ناس حلوين
Author: Abdelrahim Mansour
Date: 17-09-2015, 01:57 AM
Parent: #99


أول حاجة تحية و سلام لكل الناس الحلوين الملمومين عند جبنه أخونا و حبيبنا عبدالعزيز الفاضلابي صاحب المبادرات الرائعة، و حامل المسك الذي لا تجد منه إلا خير. و عسي الجميع بخير، و إن شاء الله دائما تامين، و لامين.

عبدالرحيم منصور
نيويورك
**
*

Post: #142
Title: Re: فنجان جبنة ولمة ناس حلوين
Author: Abdelrahim Mansour
Date: 17-09-2015, 01:59 AM
Parent: #141


قصة أعجبتني

قصة أخوين كانا متحابين كثيرا، يعيشان في توافق تام في مزرعتهما، يزرعان معا ويحصدان معا كل شي مشترك بينهما حتى جاء يوم شب خلاف بينهما، وبدأ بسوء تفاهم ولكن رويدا رويدا أتسعت الهوة واحتد النقاش، ثم اتبعه صمت أليم استمر عدة أسابيع حتى إتسعت الهوة بينهما، وانقطعت الصلة.

وذات يوم طرق شخص ما على باب الأخ الأكبر،
كان عاملا ماهرا يبحث عن عمل، نعم أجابه الأخ الأكبر، وأردف لدي عمل لك هل ترى في الجانب الآخر من النهر، يقطن أخي الأصغر لقد أساء إلي وأهانني وانقطعت كل صلة بيننا، سأريه أنني قادر على الانتقام.

* هل ترى قطع الحجارة التي بجوار المنزل ؟

* أريدك أن تبني بها سورا عاليا لأنني لا أرغب في رؤيته ثانية.

* أجابه العامل : نعم سأبني لك ما يسرُّك إن شاء الله.

أعطى الأخ الأكبر للعامل كل الأدوات اللازمة للعمل ثم سافر تاركا إياه أسبوعا كاملا، وعند عودته من المدينة كان العامل قد أنهى البناء ...

ولكن يا لها من مفاجئة !!

فبدل من إنشاء سور بني جسرا يجمع بين طرفي النهر .

في تلك اللحظة خرج الأخ الأصغر من منزله وجرى صوب أخيه قائلا :يا لك من أخ رائع !!

تبني جسرا بيننا برغم كل ما بدر مني !!

إنني حقا فخور بك ،،،،

وبينما الأخوان كانا يحتفلان بالصلح أخذ العامل يجمع أدواته استعدادا للرحيل ،،
قال له الأخوان بصوت واحد: لا تذهب !! إنتظر !!

( يوجد هنا عمل لك )

👍لكنه أجابهما، كنت أود البقاء معكما لكن يجب بناء جسور أخرى ..!!!!

👍 كونوا بناةً للجسور أبداً ،،
👍 لا تبنوا للتفريق جدارا ،،
👍 كونوا ممن يوحدون ويجمعون ولا يفرقون بين الناس ...

* شاركونا في بناء جسور الحب في الله
** ولنكن مفاتيح للخير مغاليق للشر ..

(اللهمَّ أصلح فساد قلوبنا و أصلح ذات بيننا)

👍 وجزي الله خيرا من التمس لنا العذر قبل أن نعتذر،
👍 وجزي الله خيرا من قدّر أوضاعنا قبل أن نشرحها،
👍 وجزي الله خيرا من أحبنا رغم عيُوبنا وتقصيرنا .

*
**

Post: #146
Title: Re: فنجان جبنة ولمة ناس حلوين
Author: Haytham Ghaly
Date: 17-09-2015, 10:11 AM
Parent: #99

نقلت المداخلة للاسفل

Post: #151
Title: Re: فنجان جبنة ولمة ناس حلوين
Author: عصام الدين نصر ابراهيم
Date: 17-09-2015, 12:55 PM
Parent: #99



الجبنة علي الطبيعة

Post: #186
Title: Re: فنجان جبنة ولمة ناس حلوين
Author: عفاف أبو حريرة
Date: 20-09-2015, 00:19 AM
Parent: #99

Quote:
وسلااام قدر تراب البطان عفاف ابوحريرة
يا سلام والله دابوست جميل المرق بت ابوحريرة من وكرتها


**
حبابو ابو احمد المطري مومنسي
سلام ليك قدر حبات المطر من الله خلق الكون
انت مهنتك القول السديد من قمتا
وهول ابواتك الجود والكرم والسمتا
ماشفناك في الشين والمزوبر حُمتا
مادق النحاس لي حارة وإتعسمتا
**
وماك البنكرب ويرجع ويفر من دارا
وماك البغلبو القول والتكتلو شرارا
ود الفي الشتاء بتضبح تشبع جارا
بدشر كان نضم هيبة وكلام وحرارا

Post: #281
Title: Re: فنجان جبنة ولمة ناس حلوين
Author: احمد سيد احمد
Date: 29-09-2015, 06:54 PM
Parent: #99


Post: #126
Title: Re: فنجان جبنة ولمة ناس حلوين
Author: إسحاق بله الأمين
Date: 16-09-2015, 10:57 AM
Parent: #1

Quote: عارف، الجبنة دي ليها تأثير عجيب جداً .
في وآحدة من أهلنا ديل اكانت مسويالآ لمّة جبنة نِهارية للنسوان، بيجن كل يوم
نُصّت نهار يشربن الجبنة ؤُ يِتمقلّن، ؤُ عندها عتوداً ليها ما بتبضع فيهو دِيّمة
رابطاهو جنبها في محل الجبنة . أها، مرّة غابتلها يومين برّا الحِلة في فراش
بكا، والعِتيد عقبا في اليومين ديل مرض بس بقا علي الموت، قدُر ما عالجوهو
ما عرفو فيهو شي . وكِت رجعت حزنت شديد ؤُ قنعت مِنو تب . أها، باكر
رفاقتا جنها للجبنة، ؤُ قالت كدي قلت بُنها وادتو كشكيشة في الهوا ؤُ ريحتو
قالت كدي عكلت في الجو، إنت يا العِتيّد قوووول كدي إتنفّض واقيف علي
حيلك !!!، اتاريهو كان راميهو البُن، تصدق ...


الزول السمح وعديل أخوي ود المدير
ياخي بالغت عديل كدا ، ده جبنة ولا وسكي
الشاعر إبراهيم ود الجودلية قال ليها:
يا أم نفسا فاق ريحة الجلاد والمسك
فنجانك مقيم بقزازتين وسكي
ياها ذاته جنس الجبنة دي الخلت العتيد يتنفض وتدب العافية في جسمه
كمان زيدنا وزيدنا من هذا الحكي الطاعم
تسلم يا غالي

Post: #127
Title: Re: فنجان جبنة ولمة ناس حلوين
Author: إسحاق بله الأمين
Date: 16-09-2015, 11:06 AM
Parent: #1

ياجماعة الخير لمتكم الظريفة دي فاقدة أختنا الأستاذة /منى خوجلي، غايبة ليها زمن طويل إن شاء الله المانع خير
هذه المشاركة اقتبستها من كتاباتها الجميلة في بوستها الشهير "لحظة من فضلك"
( قالت مخاطبة فاطمه بت الجيران الصغيره..
قومي جيبي مويه من الزير الازرق في الكوز الكبير..عطشت!
قالت ذلك وهي مستمره في تحريك "الهبابه" الملونه ليشتعل الفخم أكثر..

انتي يا سعديه..الهبابات السمحات ديلك ..الملونات..أم الحسن ماجابت منهن تاني؟؟

ردت سعديه وهي تمسج بطرف توبها المشجر العرق من وجهها ورقبتها..
والله يا خالتي بت احمد علا كان أصلا باكر واسألا..ما تراهاهبابتك ما في يدك سمحة؟

لم ترد بت احمد بل استمرت فيما كانت تعمله..
تناولت الشرقرق المصنوع من الصغيح من بين عدة الجبنه..ملئته حتي منتصفه بالماء ثم وصعته علي الكانون الصغير وهي تصلح من
وضع بعض الجمرات..ثم علقت في صوت خافت..
فحم الأيام دي بس يطقطق براه..بلا اليوم داك عن ناي أم الحسن طارت من جمرته شراره في توب نفيسه وحيرتها فيه..نسعل الله السلامه!
ناولتها فاطمه "كوز المياه" وهي تسألها..
أنا ماشيه الدكان ..دايره شي منه؟؟
ماشيه أجيب السكر لأمي..

آآآي..دقيقه..
من جلستها ومن أسفل طرف ملابسها رفعت مفحضتها المتدليه أمامها بيدها اليسري..ثم فتحت احد جيوبها..ثم كورتها قليلا وهزتها حتي تخرج القطعات المعدنيه الي أعلي ليسهل التقاطها..
تناولت احداهما ومدتها لها وهي تقول..

امشي فالحه اشتريلك بسكويت..الله يعدلهاعليك يابنيتي..
تناولتها فاطمة بسرعه فرح وجرت للخارج..
..................
..................

في مبخر بني تعتقت جوانبه بلون أغمق من باقيه بمرور الزمن..وضعت بت احمد حجرين صغيرين من الفحم المشتعل..
ثم تناولت من علبة حلوي قديمه حمراء اللون بعض من بخور التيمان..رشته بهدوء علي الفحم وهي تتمتم بدعواتها في صوت خافت..

ناس البيت..
بت احمد..جبنتك جاهزه؟؟

مرحب علويه أدخلي..

دخلت علويه وهي تتمتم بماشاء الله وتزيد بقولها..
غايتو جبنتك دي بقيت وقت تفوتني بس راسي يوجعني وروحي تشحتفني!
كيفنك طيبه؟؟
امس غلبني اجيك..محمد ولدي رجع من دكانه بدري وقال عنده صداع..قعدت حرسته..مره أمسد له راسه..مره اديه الكافنول..
ومره اشويله شاي تقيل..يسعلني الله لامن المغرب جه حتن فتح عويناتو!

بريه..أها الليلة أصبح كيفنه؟؟

الحمدلله شديد..قدر ما قوتله ارتاح ابي..قام مشي الزراعه وقال بعداك ماشي لناس سعيد ود عمه..جوهم ضيوف من الخرتوم!

بركه البقي كويس..قالت بت احمد وسعديه في نفس الوقت..

مضت بت احمد في اكمال تحضير الجبنه بينما رائحة البخور متزايده ..
غسلت للمره الثانيه عدد 5 فناجين..جففتهم بفوطه نظيفه تحتفظ بها مطبقة دائمه..
ثم فتحت علبة لبن الفورموست القديمة والتي تحتفظ فيها بالسكر ووضعت منه قليلا في كاس زجاجيه صغيره وهي تعلق..
ياحليلا سكريتي الحمرا العاجباني...بس وقعت انكسرت..
قلت للأولاد يشترو لي واحده ويجيبوها معاهم وقت يجو البلد..

صاحت علويه..
الرسول يا بت احمد ان كان ماكلمتيهم يجيبوا لي ويحيده معاهم..اصلها سكريتك الانكسرت دي كان عاجباني..
ويبقي ظاري ياهو الكسرها!
علقت سعديه..
هي قولي بسم الله ظار شنو كمان الدار تجيبيه!

فضلة خيرك يا علويه ..ماتجيبي سيرة الظار فوق الجبنه والبخور..يقوموا الجماعة يكتفونا!
عقبت بت احمد تعليقهاذلك بضحكة تجاوبت معها سعديه وعلويه..
وبدأ توزيع الدور البكري ومعه تساءلت بت احمد وهي تنظر تجاه الباب في قلق..
انتن الباقيات ديل مالهن اتاخرن؟؟

وكانت تقصد باقي الجارات التي يشاركنها قهوة الضحوية..

منى)

Post: #128
Title: Re: فنجان جبنة ولمة ناس حلوين
Author: MOHAMMED ELSHEIKH
Date: 16-09-2015, 11:17 AM
Parent: #127

سلام
ادونا فنكدن ندق ونديكن

Post: #129
Title: Re: فنجان جبنة ولمة ناس حلوين
Author: الطيب شيقوق
Date: 16-09-2015, 11:31 AM
Parent: #128

اللورد Kabar

Quote: غايتو (الدستور) ما معانا ..لأنو ح يجيب اللوردات ناس ود شيقوق ويحي عبد الكريم وابوبكر قاسم..


ياخ الله يطراك بالخير ذكرتنا اللورد يحيي شيخ العرب يا ريت يجينا متلب بجاي

كمان اسحاق فداسي جاب سيرة منى بت الخليفة الله يطراها بالخيل ( ام عروض) كما يحلو للاخ العبيد الطيب يا رييييييييت تشد الدحشة حقتا و تتلهمنا بجاي


ود الشيخ

الليل طراك دق الفنادك شنو ؟

ياخ انت من حفروا البحر؟

Post: #130
Title: Re: فنجان جبنة ولمة ناس حلوين
Author: MOHAMMED ELSHEIKH
Date: 16-09-2015, 11:33 AM
Parent: #129

يا ود شيقوق في جبنة بتتسوى بلا فنديك ؟
اوع تقول لي ستار بكس ووووو

Post: #131
Title: Re: فنجان جبنة ولمة ناس حلوين
Author: الطيب شيقوق
Date: 16-09-2015, 11:44 AM
Parent: #130

Quote: يا ود شيقوق في جبنة بتتسوى بلا فنديك ؟


و شمامة معاها تكرفة مع رفع القدوم فووووووووووووووق

زى ..... وكت يقطع السلبة ويكون ناوي يتلهم بت قضيم ......................


لقيتني كيف يا ود البلة ؟

Post: #132
Title: Re: فنجان جبنة ولمة ناس حلوين
Author: عزالدين عباس الفحل
Date: 16-09-2015, 12:37 PM
Parent: #131


امثلة من شعر وصف البطانة وما فيها من نعم وامطار:-
برز الحاردلو في انشاء الصور الجميلة ،
للبطانة عندما تهطل الامطار عليها
وتتزين الارض وتنتعش الانعام
والناس والطيور قال في ذلك:
الشم خوخت بردن ليالي الحرة
- - - - - - -ة -
والبراق برق من منه جاب القرة
شوف عيني الصغير بي جناحه كفت الفرة
تلقاها أم خدود الليلة مرقت برة
***
الخبر الأكيد قالوا البطانة اترشت
وسارية تبقبق با الصباح ما انفشت
هاج فحل أم صريصر والمنايح بشت
وبت أم ساق على حدب الجميل اتعشت
**
برق القبلة شال شالت معاه بروق
ختت له أم رويق عم السحاب من فوقو
العفرت رحل يبكي ويسوي القوق
والضحوي اتردف ليله ونهاره يسوق
***
البارح بشوف يشلع بريق النو
وحس رعاده يجرح في الضمير كوكو
داك طير القطا الدور مشارع الهو
وفرقان البطانة اتماسكت بالضو


***
المصدر :-
منتديات الكاهلي زيدان
،،،،

.
..







عزالدين عباس الفحل
ابوظبي

.
..

Post: #133
Title: Re: فنجان جبنة ولمة ناس حلوين
Author: عبد المنعم سيد احمد
Date: 16-09-2015, 02:32 PM
Parent: #132


Post: #134
Title: Re: فنجان جبنة ولمة ناس حلوين
Author: عبد المنعم سيد احمد
Date: 16-09-2015, 02:33 PM
Parent: #133


Post: #135
Title: Re: فنجان جبنة ولمة ناس حلوين
Author: عبد المنعم سيد احمد
Date: 16-09-2015, 02:37 PM
Parent: #134


Post: #136
Title: Re: فنجان جبنة ولمة ناس حلوين
Author: ismeil abbas
Date: 16-09-2015, 03:42 PM
Parent: #135

أختى الكريمة/فردوس التحايا مفعمة بكل الود عبر هذا البوست النقى وجميل مثل سيدو....


Quote: في مرة من ذات المرات و نحن طالعين مداعي لي عرس أُختي دخلنا بيت جيراننا و الباب موارب ساي لزيناه و دخلنا و ماكُنا شايفين الكلب
غايتو اليوم داك كان يوم احتفال للكلب بس الحمدلله ما عضانا
جو ناس البيت أنقذونا منه و اتاخروا دقايق عشان كانوا في بيت الجيران لكن الدقايق دي كانت ساعات الله لا عادها...
وفي مرة تانية بيت حبوبتي بيتمشي بي شارعين في شارع قصير لكن فيه كلب و الطويل مافيه كلب أها يوم من أيام الشجاعة أنا وبنت خالي مشينا بي شارع الكلب غايتو مرقننا كرعينا أدانا سكة لا تُنسى..


من كثرت سيرة الكلاب قربنا نهوهو..ضحكتينى لكن ربنا يجعلك فرحة دائماً......شكراً أخى ودالبوش على ألأشادة...والتحية للجميع....

Post: #137
Title: Re: فنجان جبنة ولمة ناس حلوين
Author: عزالدين عباس الفحل
Date: 16-09-2015, 05:57 PM
Parent: #136

يا إسماعيل ود عباس.
حياك وبيان
ياخي الكلاب في السودان بقت تعبانة وهزيلة.
ولي زمن الكلب الدنجوان البيسد الشارع.
ويحمي المرقة و الدخلة.
منقول من خواطر الكلاب الضالة .
أشواقي.


عزالدين عباس الفحل
ابوظبي.
***
مداخلة من الايفون.

Post: #138
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 16-09-2015, 09:01 PM
Parent: #137

Quote: وا مغايسي البنوت والبوطان كملوا الدفيق والصفوري عليي !
سلام للجميع
,
هَلَّا هَلَّا ,, حباب ست البنات لى حدِّهن ,,
الخير بااااسط وكان الصَّفورى حق عبدالمنعم كِمِل
نعمل ليك اوردر مخسوس من مِسَّاوى وجروف الساب
Quote: وبالاخص اخوي عبدالمنعم فيشان هو الكوركلي!

نان ياست البنات اخوك ولد سيد أَحَماد جهجهنا
مرة يقول ست البنات ومرة يقول بت كمبال
إنتى كمان بِدُّوريلك عزيمة ,, البيت بيتك ونحن ضيوفك ,,
تسلمى يانخلة من بلادى

Post: #139
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 16-09-2015, 09:29 PM
Parent: #138

هلا ببنت حلتنا بسمات ,, وسلام معطر بنسايم عطبرة الحلوة
الليام دى قالوا لى مزنوقة زنقة ترزى يوم الوقفة
ربنا يديك الـ فى مرادك ,, انت واخياتك المعاك
وقدر ماتنعسى من المذاكرة ادخلى ارشفى لك فنجان جبنة
من ايد اخواتك ديل ,,

Post: #140
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 16-09-2015, 11:46 PM
Parent: #139


Post: #143
Title: Re: فنجان جبنة ولمة ناس حلوين
Author: اميرة السيد
Date: 17-09-2015, 03:08 AM
Parent: #140

قصة الاخوين المتخاصمين يا عبد الرحيم ود منصور فيها
عظات وعبر كثيرة. ...ويا ريت كلنا نبني مثل هذه الجسور
جسور الحب والمودة بدلا من جدران الفرقة والخصام
والله يديك الصحة والعافية

يا ود البوش اضحك الله سنك ..والله لامن قريت حكاية اخونا الجرا وجرت معاه
الغنماية ضحكنا لامن قربنا نشرق....وان شاء الله تكون ايامك كلها فرحة وابتسامة
ولولاكم لما استطعنا ان نغالب متاعب الغربة القساية
والله يديك الصحة والعافية

Post: #144
Title: Re: فنجان جبنة ولمة ناس حلوين
Author: MOHAMMED ELSHEIKH
Date: 17-09-2015, 08:17 AM
Parent: #143

Quote: الليام دى قالوا لى مزنوقة زنقة ترزى يوم الوقفة



اها دي ذكرتني قصة جدنا بشير الترزي رحمه الله
في ليلة العيد كان مزنوووووق لمان بي هناك .
آخر جلابية كان شغال فيها لي بعد الفجر
انتهى منها قريب الشروق
طبعا قام اداها نفضة قوية!

الجيوب طارن في بلد
واليد اليمين فيبلد
واليد الشمال في بلد
واسكت ساكت

اتاريهو ناسي يملي الخيط بتاع الماكوك!

Post: #145
Title: Re: فنجان جبنة ولمة ناس حلوين
Author: عبدالحفيظ ابوسن
Date: 17-09-2015, 08:30 AM
Parent: #144

ذكرتني تعبير بشري الفاضل في قصته الممتعة
الغازات
ماحافظ التعبير لكن بجتهد
ممنوع البصق
عبارة مكتوبة داخل البص
قرأها نصف امي ممنوع البص فلم ينظر نحو جارته
وقرأها آخر كامل الامية .. ممنوع البص .. يعني هذا البص ممنوع فنزل
ف شنو
لغاية هسة من عرفت حكمة مشروعية هذا البوست
دي جات غلط هنا هههه

Post: #147
Title: Re: فنجان جبنة ولمة ناس حلوين
Author: Haytham Ghaly
Date: 17-09-2015, 10:17 AM
Parent: #145

عشانكم بعشق عشق عشاً عشقت معاشو
واعيش عيش اليعيش عشمانلو في عشباً معلى دعاشو
عايش في شعاب عشقي وعشيرتي العاشروني وعاشو
عاشق عشقو عاش وعاش معاشو اعاشو


سلام جاكم كلللكم بدون فرز

ماشي في دربي الا ريحة بنكم عجبتني بالحيل

اها دخل ولقيت كل الزينين والسمحين والـ بالكرم والجود والسلام موصوفين

وحلف ما امرق الا كان اشرب معاكم من جبنتكم السمحة دي

باقي راماني ليها زمن

Post: #148
Title: Re: فنجان جبنة ولمة ناس حلوين
Author: ست البنات
Date: 17-09-2015, 10:35 AM
Parent: #147

عليكم الله ما تكوركو لي طارق ود عمي جبرين !
قولولوا البوطان والبنوت كولهم هيني اليجي يشربلو كيبيباية شاي ,
وبالمرة ياكولو هيين الليل مدينيي من اللت عبدالمنعم دي قبال ما تكمل!
ويسويلنا نضمو السمح داك.

ست البنات.

Post: #149
Title: Re: فنجان جبنة ولمة ناس حلوين
Author: خالد المحرب
Date: 17-09-2015, 10:47 AM
Parent: #148

Quote: نصت نهار سكت عمي وفي ذلك الزمن البعيد كان وقت الجبنة وخت الودع
عمتي بتول بت الضريس تحلف تقول كان ما جاتك الطية يا بت الصرة بكسر وديعاتي ديل
وتنعدل بت الصرة المحمداها الطية وتبتسم وتفرد اصابعها وتجمعن للترحيب بالطية
بياضك يا بت الصرة كان ما جاتك الطية في العربية دي وتشير للودعة الواقفة سيفي كما العربية
وتحمد وتبشر واحيانا يبدو الحزن عليها خوفا ووجلا من مكروه قد يحدث
ودعوني ان انقل لكم منظر بديع مصاحب لخت الودع وشراب الجبنة بكري ومثنى وثلاث وبركة
في عتبة الباب تنتكي الكلبة جابنو وهي تعرف كل الناس الحولها وتبادلهم السلام والتحية
الجدادة الزرقاء الرقبانية مفقعة تلاتة سواسيو وتركض على خمسة بيضات ناقرات وواحدة ممزرة تجبلغ
الغوغاية في الركن القصي تجلس عليها بنية سمحة سماحة لمن خجلانة من سماحتا وتغوغي ولا خساها بالودع ولا ست الودع
لازمن تغوغي قطن مرتبة العيد حتين تقوم تسوي الجير
يدخل خلف الله العولاق مرددا لوحده سلام عليكم يا ناس البيت اهلا يا خلف الله اتفضل لا ماشي بقول كدا براه
وهي عادته المصاحبة لهو عند دخول كل البيوت لايتنظر منهم رد سلام ولا عزومة واعشق الخلف داي داي داي
واقرص فرملة في كراع جابنو فتعوص منه معلنة مضايقتها من خلف الله العولاق ولاتهتم به عارفاهو عولاق

الفاضلابى سلام عليكم وكل من جابو الدرب
ود البوش الكلام الفوق دا كلام ما يعرفو الا زول عاش هذه الاحداث المتشابهه جدا
نومة الكلبه الماده الرقبه وتغمد ومرات تفتح عين واحده لانها تعلم كل المرور من حولها
والله عندى كلام كتير لكن جيت فتران ..

Post: #150
Title: Re: فنجان جبنة ولمة ناس حلوين
Author: Osman Musa
Date: 17-09-2015, 12:12 PM
Parent: #149

سلامات ود العم
كنا ما فيشين في درب المعايش لاحدي ما فاتت علينا اللمة و الباسطة .
أرجو أن لا تفوت علينا بركة جبنة بتول بت الضريس ست الطين الخافس من المحاجر و لي خشم البحر .
تحياتي
وعليك الشيخ الجعلي حاول أكتب عن ديك الفجج اللامعة .
أكتب عن حمير البنطون الراجعة بعد رحلة بيع اللبن الصافي المو مطبوج .
وعن نتح مكنات الموية والدلاليك .

Post: #152
Title: Re: فنجان جبنة ولمة ناس حلوين
Author: Yousuf Taha
Date: 17-09-2015, 03:00 PM
Parent: #150

up
عشان الحكي الجميل واصحابه الاجمل في البوست دا

Post: #153
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 07:05 PM
Parent: #152

[B]سلام ياشباب ,, ياناس يافل
اعذرونى ماقادر الَحِّق عشان ارحِّب بكل زول بقيت زى ام العروس ,, ما شاء الله الحبايب متجمِّعين
فاحتياطياً كدى مرحب بكل الحبايب :
ابو جهينة ,, عبدالرحيم منصور ,, شايف اللميرة قامت بالواجب هيثم غالى ياغالى علينا ,, عصام الدين نصر ,, ويمين ياعصام
شرغرغ الجبنة الختيتو فوق ده انا قايلو ملاح شرموط ابيض وده ليهو قصة حلوة مع بت عمى احكيها ليكن حين ميسرة ومسرة ,,
محمد الشيخ ماعارف ليه عندى إحساس انك يا من العكد يا من الدامر ,, ود الخال ود المحرب معزة خاصة ,,
وقعدتك معانا دى يمين زى الجونى اهل امى المُرْغُماب ,, ودالعم عثمان موسى ,, ياجماعة عثمان موسى ده ودعمى بالدرب عديل ,, بركة بالشوفة ,,
يوسف ود طه ,, يِتْعَلَّى مقامك ويكترن ايامك ,, تِتبارك ماتِتْشارك ,, الدعوات كانت بتدعى لى بيهن امى اللهم تقبلها وابى فى الصالحين ,,
وكانت حبوبتى فاطنة بت الفكى برضها بتدعو لى وتقول لى : ضَكَر اللّوبا ,, الحِبِيبَة تبقا ويبة ,, واحسب ان دعوتها قد أستُجيب لها ولله الحمد والمنة.
مرحب بيكن جميعاً
,, وياست البنات بركة الـ طريتى ودجبرين الزول ده
عندو طعم خاص ,,, مابشبع من ونستو ,, وياود جبرين عليك سيدى الحسن ماتكسر بخاطرنا ارم الـ فى ايدك وتعالنا بى جاى
.

Post: #154
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 07:53 PM
Parent: #153

Quote: وعليك الشيخ الجعلي حاول أكتب عن ديك الفجج اللامعة .
أكتب عن حمير البنطون الراجعة بعد رحلة بيع اللبن الصافي المو مطبوج .
وعن نتح مكنات الموية والدلاليك .

ياااا ه ياعِتمان ,, أهجت فينا شجن الذكرى
اتنين من اهلنا كانوا فوق بنطون الفاضلاب بى يِتْبايَعو فى حـ مار
الشارى دخَّل اصابعينو فى خشم الـحـ مار عاوز يجِس سنونه عشان يعرف
عمره ,, فقال لسِيد الحمار: حمارك ده مو تِنى
سِيد الحمار مُصر إنو حماره تِنِى ,, قعدوا يتغالطو
سيد الحمار قال للشارى يازول كيفن بتغالطنى أنا الحمير مابعرفِن؟
أنا ود الحمير ,,,

Post: #155
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 08:45 PM
Parent: #154

Quote: عمتي بتول بت الضريس تحلف تقول كان ما جاتك الطية يا بت الصرة بكسر وديعاتي ديل
وتنعدل بت الصرة المحمداها الطية وتبتسم وتفرد اصابعها وتجمعن للترحيب بالطية

ياسلاااام ياودالبوش اتخيل حميمية قعدة زى بتاعة بت الضريس وبت الصرة ديل ,,
وقارنها بالزمن ده وسرعة ايقاعه والناس الجارية ورا المعايش كأنهم حُمر فرت من قسورة ,,
طبعاً ناس ود شيقوق القسورة دى بقولوا ليك الضيب ,,

Post: #156
Title: Re: فنجان جبنة ولمة ناس حلوين
Author: عماد الشبلي
Date: 17-09-2015, 09:00 PM
Parent: #155

طيب يا الفاضلبي

تعزم المسنوح ود شيقوق

وانا العطبراوي ما تعزمني

عاي الجبنة دي !!!!!

Post: #157
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:05 PM
Parent: #155

Quote: ياجماعة الخير لمتكم الظريفة دي فاقدة أختنا الأستاذة /منى خوجلي،

سلام ودالبلة ,, انتو زى ماقالت عليكم اميرة ناس سمحين الـ بِتفقدو بعض
وانا من هنا اضم صوتى لنداءك ونرجو ان تسمعنا العزيزة بت خوجلى
عشان تحلو الجبنة بها ومشكور ياود بلة ,,

Post: #158
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:15 PM
Parent: #157

Quote: طيب يا الفاضلبي
تعزم المسنوح ود شيقوق
وانا العطبراوي ما تعزمني
عاي الجبنة دي !!!!!

ياجماعة انا راضى ذمتكُن فى لوم العمدة لى ده
ياعمدة انا مابرضى علا تسجِّل لى حوش من حيشانكن
الـ فى المقرن وبالعدم ان شاء الله اربعمية متر فى الحلفا
تحت الكبرى القديم ناوى اسوى لى كافتريا هناك
ده كله بعد الناس ديل يشوفونى كان نسيتك بعد يقروا الكلام ده:

Quote: مو مشكلة يا أميرة دى بت حلتنا ,, بنعمل ليها هوم ديليفرى
ود حلتنا العمدة ( الشبلى) معيِّد فى اتبرا ,, خلوا الجبنة مدوِّرة نامن يجى

Post: #159
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:24 PM
Parent: #158

اها قبيل قلنا ده بوست ملوكى ,, ملكة واميرة ومك وهسع العمدة جمع
يلا خلونا نشكِّل حكومة البوست ,, غايتو بسمات بت السودنة دى
برشحها لوزارة الثقافة والاعلام.باقى بتقرا فى امريكا ادب انقليزى وقالو قاع تلايقو
مع ادب البطانة والدوبيت ,, طلَّعت ليك الخواجات اهل العوض الجابو الباغة ,,

Post: #160
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:29 PM
Parent: #159

ود شيقوق ده نعملو مدير الغابات

Post: #161
Title: Re: فنجان جبنة ولمة ناس حلوين
Author: عماد الشبلي
Date: 17-09-2015, 09:30 PM
Parent: #158

Quote:
Quote: مو مشكلة يا أميرة دى بت حلتنا ,, بنعمل ليها هوم ديليفرى
ود حلتنا العمدة ( الشبلى) معيِّد فى اتبرا ,, خلوا الجبنة مدوِّرة نامن يجى


والله انت فعلا رضعان فوق الخلال

وما بتتلام

تصدق ما شفتها

وبهذه المناسبة مولانا كمال الشبيلي

بسلم عليك

انا من امبارح شامي لي ريحة جبنة

ما قايلا فوق بوستيك دا

Post: #162
Title: Re: فنجان جبنة ولمة ناس حلوين
Author: عماد الشبلي
Date: 17-09-2015, 09:39 PM
Parent: #161

Quote: ود شيقوق ده نعملو مدير الغابات


لا احسن حاجة تعينو مدير برج ( الحمام )

بيديرو ليك كويس

ويكسبك منو دهب

Post: #163
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:51 PM
Parent: #162

Quote: لا احسن حاجة تعينو مدير برج ( الحمام )

هههههه المسنوح ده ياعمدة تديهو برج الحمام
يجى باص الروصيرص مارِّى يَقَهى فيهو الحمام كلو يطير

Post: #164
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 17-09-2015, 09:56 PM
Parent: #163

ود بله الشؤن الدينية والاوقاف
وود ابسن الطاقة ,, اصله الليامات
دى منشبك فى ناس الكهربا والموية
ودالبوش الثروة الحيوانية اصلو زول سعية

Post: #165
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 18-09-2015, 00:20 AM
Parent: #164

عليكم الله الـ ما استمع للقصيدة اللى القاها الشاعر خالد فى الفيديو
بتاع تكريم الشاعر على محجوب (الفيديو انزلته فى مداخلة من مداخلاتى اعلاه)
يستمع ليها تانى ,, مش حاتندموا.
كذلك القصيدة اللى القتها البنية نهى الكباشى ,, وان شاء الله ارجع
واعمل نسخ لقصيدة نهى واعلِّق عليها وعلى طريقة الإلقاء وشكراً
للحبوب كبر.

Post: #166
Title: Re: فنجان جبنة ولمة ناس حلوين
Author: جلالدونا
Date: 18-09-2015, 01:16 AM
Parent: #165

Quote:
Quote: ود شيقوق ده نعملو مدير الغابات



لا احسن حاجة تعينو مدير برج ( الحمام )

بيديرو ليك كويس

ويكسبك منو دهب

ود شيقوق ينفع وزير الهجرة و شئون الاجانب
ح يشتغل كويس و الدول المجاورة حتشكرنا و احتمال يرجّع الفشقة لى حضن البلد

Post: #167
Title: Re: فنجان جبنة ولمة ناس حلوين
Author: خالد المحرب
Date: 18-09-2015, 01:22 AM
Parent: #165

Quote: بت ابوحريرة معانا هنا ,, ياللسعادة

مرحب بمن زارنا يطلب شبراً ,, فله هِبةً كل ماعندنا اشباراً وامتارا



علا يابت ابحريرة الزول القال الكلام ده ظنيتو كل يوم بِصلِّي
بى سورة الكافرون ,,
ــــــــــــــــــــــــــــــــــــــــــــــــــــ

ههههههههه والله انتم ناس سمحين و قهوتكم لامه الحبان كلهم


قهوتك ياالفضلابي بالعافيه يوت مشروبه

وبي نقهة فرح والقعده في الراكوبه

تتوشح سرور والعافيه تلبس توبها

عين الكريم ترعاك وعين الحسود بالطوبه

منقول

Post: #168
Title: Re: فنجان جبنة ولمة ناس حلوين
Author: عفاف أبو حريرة
Date: 18-09-2015, 01:25 AM
Parent: #167

Quote: بت ابوحريرة معانا هنا ,, ياللسعادة

مرحب بمن زارنا يطلب شبراً ,, فله هِبةً كل ماعندنا اشباراً وامتارا



علا يابت ابحريرة الزول القال الكلام ده ظنيتو كل يوم بِصلِّي
بى سورة الكافرون ,,
ــــــــــــــــــــــــــــــــــــــــــــــــــــ

ههههههههه والله انتم ناس سمحين و قهوتكم لامه الحبان كلهم


قهوتك ياالفضلابي بالعافيه يوت مشروبه

وبي نقهة فرح والقعده في الراكوبه

تتوشح سرور والعافيه تلبس توبها

عين الكريم ترعاك وعين الحسود بالطوبه

منقول


يا جماعه انا والله يوم بندق دايما ادخل بي حساب خالد

Post: #169
Title: Re: فنجان جبنة ولمة ناس حلوين
Author: اميرة السيد
Date: 18-09-2015, 02:31 PM
Parent: #168

وين زهرة البستان المخصصة للاطباء والفنانين..
معقولة تكون في الخرطوم...ما شفناها قبال كده...
ويعني اشمعنى الاطباء والفنانين..وين المهندسين
وين الشعراء..وين الادباء..
..ويا ود الفاضلاب ..فعلا البوست بقى بوست ملوكي..
والله يديكم الصحة والعافية

Post: #170
Title: Re: فنجان جبنة ولمة ناس حلوين
Author: الفاتح ميرغني
Date: 18-09-2015, 03:12 PM
Parent: #169

لمة ناس في خير .
تحية كبيرة لعودة اللورد شيقا، ريحانة المنبر، وبقية اسراب النوارس.


محبتي

Post: #171
Title: Re: فنجان جبنة ولمة ناس حلوين
Author: عبد المنعم سيد احمد
Date: 18-09-2015, 07:54 PM
Parent: #170

222765_599588570067161_1634671695_n.jpg Hosting at Sudaneseonline.com


هلا بالاميرة
مقهى زهرة البستان..بجوار مقهى ريش
بالقاهرة
ملتقى للادباء والشعراء المصريين
استضافنا هذا المقهى الادبى
بكل اريحية ومحبة
توثقت عرى الصداقة ..والتواصل الانسانى
والثقافى.بيننا وبينهم
كان بيننا الاديب الصحفى الراحل سامى سالم
والبروف على عثمان محمد صالح
وعشرات الصحفيين والادباء..والمثقين.
لهم المحبة الصادقة..اينما كانوا
مابين السودان وهولندا
المانيا واستراليا
كندا وامريكا
المايك معاك..ياست البنات.

Post: #172
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 18-09-2015, 08:48 PM
Parent: #171

Quote: ح يشتغل كويس و الدول المجاورة حتشكرنا و احتمال يرجّع الفشقة لى حضن البلد

ههههههه ,, شُفت ياشيقا جلادونا ده حفر ليك كيفِن ,, اظنه خابزك وعاجنك
زيى كدى ,, حلوة ياجلادونا ,, باص زى ده ميسى ما يلعبو.
قلت لى الدول المجاورة والفشقة؟ إنت السودان ده مجاوراتَنُّو تمانية دول
اشمعنا مشيت للفشقة ؟ شفت يالطيب ,, اها تراكا وقعت فى شر اعمالك

Post: #173
Title: Re: فنجان جبنة ولمة ناس حلوين
Author: عبد المنعم سيد احمد
Date: 18-09-2015, 09:11 PM
Parent: #172

Quote: سلامات ود العم
كنا ما فيشين في درب المعايش لاحدي ما فاتت علينا اللمة و الباسطة .
أرجو أن لا تفوت علينا بركة جبنة بتول بت الضريس ست الطين الخافس من المحاجر و لي خشم البحر .
تحياتي
وعليك الشيخ الجعلي حاول أكتب عن ديك الفجج اللامعة .
أكتب عن حمير البنطون الراجعة بعد رحلة بيع اللبن الصافي المو مطبوج .
وعن نتح مكنات الموية والدلاليك .



اوووو..عثمان موسى
الحى بيك يازول..
ود عمك عرف كيفن يجيبك
ليك وحشة وشوق
اتفضل لا جوه.



11705149_868050859943989_7478647202197736881_n.jpg Hosting at Sudaneseonline.com

Post: #174
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 18-09-2015, 10:22 PM
Parent: #173

Quote: أكتب عن حمير البنطون الراجعة بعد رحلة بيع اللبن الصافي المو مطبوج

كويس ياودسيد احمد ذكَّرتنى طلب ودعمى عِتْمان
جدنا قرشى الشاويش ,, كان يبيع اللبن فى مدينة عطبرة وفى يوم لاكِع حمارو وشايل فوقو تُمَنْ اللبن يَجَلْبِغَن
لاحق البنطون ,, وكت خلاس بقى خطوات من البنطون ,, الريس شريف كان خواجة فى مواعيدو ,, عينو لى جدنا
قرشى لكن التزم بالمواعيد والبنطون سحب الى الوراء مايعنى ان جدنا قرشى إنقطع وتانى ماعندو حل يعَدِّى للبر الشرقى
لانو بنطون ستة ونُص (بنسميهو بنطون اللَّبانة ـ نسبة لبائعى اللبن) آخر بنطون من البر الغربى ,, فـ جدنا قرشى نزل من حمارو
وقعد يكورك للريس شريف ويداه مرفوعتان الى السماء كمن يشكوه وهو
يصيح: شريف اللبن ده اوديهو وين انا ,, أرَوِّبو؟

Post: #175
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 18-09-2015, 11:27 PM
Parent: #174

Quote: قهوتك ياالفضلابي بالعافيه يوت مشروبه

وبي نقهة فرح والقعده في الراكوبه

تتوشح سرور والعافيه تلبس توبها

عين الكريم ترعاك وعين الحسود بالطوبه


فــارس البطانة ســـند ام رُوبة ,, ودالخـال الخايلة فــــوقو القــدلة
الأَرْنيقَ ضُل الحنان الوارف ,, الكريم المابباشر ضيفو بالفَضلة
عشا البايتات عيب الاخوان ,, يَحَفِرلو غريييق ويوَسِّدو الـــــتُربة
الغيـــث العمــيم الــطــرد المــحل ,, خــلاَّهو مايــعرف درِب للــرجعة

ياود الخال ده من نظمى عشان المسنوح جنا شيقوق ده
يعرف انو انا وِرِثت من من حبوبتى شغبة ,, وبالمناسبة الرباعيات
الـ قلتها فى بت معسيب وبت ابـ حريرة برضها من نظمى.
اها شن قولك ياود الخال ورثنا ولا ماورثنا؟

Post: #176
Title: Re: فنجان جبنة ولمة ناس حلوين
Author: عفاف أبو حريرة
Date: 19-09-2015, 00:19 AM
Parent: #175

Quote: فــارس البطانة ســـند ام رُوبة ,, ودالخـال الخايلة فــــوقو القــدلة
الأَرْنيقَ ضُل الحنان الوارف ,, الكريم المابباشر ضيفو بالفَضلة
عشا البايتات عيب الاخوان ,, يَحَفِرلو غريييق ويوَسِّدو الـــــتُربة
الغيـــث العمــيم الــطــرد المــحل ,, خــلاَّهو مايــعرف درِب للــرجعة
ياود الخال ده من نظمى عشان المسنوح جنا شيقوق ده
يعرف انو انا وِرِثت من من حبوبتى شغبة ,, وبالمناسبة الرباعيات
الـ قلتها فى بت معسيب وبت ابـ حريرة برضها من نظمى.
اها شن قولك ياود الخال ورثنا ولا ماورثنا؟

الخيل تجقلب والشكره لي خالد كويس غناك ده بعفيني من الدقه
هههههههههههه
وانا عاوزه حقي حق خالد ما محسوب
كل زول بي خشم بيته الجايب الشبك جهازنا واحد

Post: #177
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 19-09-2015, 00:36 AM
Parent: #176

Quote: وانا عاوزه حقي حق خالد ما محسوب
هاااااا يابت ابحريرة إنت شاربة شاى بى لبن ولا شنو؟
آفو يابت ابحريرة حقك اخديتهو ومعاهو حق العريس كمان
انتى ماشفتى العمدة الشبلى اقَرَّ انا رضعان فوق الخلال
كدى قُصِّى الدرب حقك محَوَّط وحق حلال زول بشيلو مافى
وياهو ده بس انت اظنك ماشة فى البوست ده بلا بطارية

حـــباب عفـــاف بت ابحـــريرة ســـت مِلِـــك مِيــــــها الأجيرة
جاتكُن بى واجِبَا الكريمة ام العريس الـ سّولو الضريرة
مبارك للوليد البار عجبنا ليكى وليهو صافى السريرة
حبابك بين اخوانك عزيزة عليهُن واخواتك يَغَنّلو السيرة

Post: #178
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 19-09-2015, 00:41 AM
Parent: #177

Quote: ويمين ياعصام
شرغرغ الجبنة الختيتو فوق ده انا قايلو ملاح شرموط ابيض وده ليهو قصة حلوة مع بت عمى احكيها ليكن حين ميسرة ومسرة


عمنا عبد الله رجل سُكَّرة ,, لم اشاهده غضبان طلية حياته رحمه الله كان يعمل سائق تاكسى فى امدرمان وعادته ان يحضر وقت المغربية
ليستمتع مع بناته واولاده وزوجته واحياناً كثيرة القعدة تضم الجيران يتحَلَّقون حول التلفزيون ,, إنه وقت المسلسل فى زمن كان الوتساب
والفيسبوك والاندرويد فى رحم الغيب ,, بل لم توجد اصلاً فى رحم الخاطر. ذات مساء جاء عمى عبدالله كعادته تمدد على عنقريبه المفروش بمرتبة القطن
التى برد سطحها بفعل انخفاض الحرارة فى ذلك المساء الخريفى وهبت على السطح نسمات مشبعة بزخات مطر هطلت قبيل المغيب.
شعر عمى عبدالله وهو يخلع نعليه ويتمدد على الفراش براحةٍ وكأنما برودة المرتبة تطفئ حرارة الهواء التى تعرضت لها رجليه وساقيه
من ماكينة التاكسى القديم الذى يقوده سحابة نهاره ,, فتمدد وهو ينتظر بنته الوسطى التى لايذق طعماً للشاى باللبن المقنن الا من يديها ,,
ذلك المساء كانت الحلقة الاخيرة من المسلسل الذى ظل الجميع يتابعه زهاء الشهر ,, قامت البنت لاعداد الشاى وكانت فى عجلة من أمرها ,,
والمسلسل على وشك أن يبدأ وهى تخشى ان تفوتها الحلقة الأخيرة او شئ منها,, عمدت الى انية الشاى فقامت برصَّها بارتباك
جعل امها تسمع اصوات تطاقش كبابى الشاى فعلمت ان بنتها فى عجلة
من أمرها فصاحت لها ,, يابت بِشويشك بتكسِّرى الكبابى دى. لم تعر امها انتباهاً بل زادت ارتباكاً وبالها مع المسلسل
تريد ان تفرغ من اعداد الشاى لتأخذ مقعدها مع متابعى المسلسل ,, وهى فى عجلة من أمرها أخذت علبة تظنها علبة السكر
ودون انتباه سكبت منها على الشاى وقامت بتحريك الملعقة داخل البراد لتذيب السكر ,, وعلى عجل اخذت
صينية الشاى ووضعتها امام والدها عم عبدالله واخذت تصب الشاى
فاذا بالشاى ينزل من البراد خيوت خيوت ,, فقد كانت العلبة التى ظنتهاعلبة السكر هى علبة الويكة المسحونة ,,
عم عبدالله عاين ليها وقال لها ,, ما كَبِّيتيلو شرموط؟ فانفجرت ضحكاً وهو ايضاً فقد كان رجلا سمحاً رحمه الله
.

Post: #179
Title: Re: فنجان جبنة ولمة ناس حلوين
Author: عفاف أبو حريرة
Date: 19-09-2015, 01:14 AM
Parent: #177

Quote: هاااااا يابت ابحريرة إنت شاربة شاى بى لبن ولا شنو؟
آفو يابت ابحريرة حقك اخديتهو ومعاهو حق العريس كمان
انتى ماشفتى العمدة الشبلى اقَرَّ انا رضعان فوق الخلال
كدى قُصِّى الدرب حقك محَوَّط وحق حلال زول بشيلو مافى
وياهو ده بس انت اظنك ماشة فى البوست ده بلا بطارية


ههههههه والله يا الفضلابي زكرتني الجمعيه التعاونيه يعني مجامله نهايي
مافي الصرفه واحدي بس
ياخ انا دخلت بي حساب خالد وكتبت ليك مربوعه ولاحقتي لافحاها
كدي ارجع انت قص الدرب

Post: #180
Title: Re: فنجان جبنة ولمة ناس حلوين
Author: Abdelrahim Mansour
Date: 19-09-2015, 12:02 PM
Parent: #179



صور مع النجوم و القمم




*
**

Post: #181
Title: Re: فنجان جبنة ولمة ناس حلوين
Author: عبد المنعم سيد احمد
Date: 19-09-2015, 01:48 PM
Parent: #180




عنكوليب عنكوليب..علينا جاى

Post: #182
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 19-09-2015, 04:44 PM
Parent: #181

صباحكن زين
اها ياشباب ,, عبدالرحيم ودمنصور جابلكن الاكيدة الصور دى لى مع النجمين اللامعين الملك والبرنس
الجمعة قبل الماضية والماشافنى يجى يشوفنى ,, انا زى السلطان قابوس مابظهر كتير فى التلفزيون ,,
خلاس وكت عبدالرحيم جاب الملك كده تكون الحكاية تمت ,, بى ملكنا فيصل واميرنا هيثم وملكتنا وضاحة واميرتنا بت السيد ومكَّنا ودالمنسى عمدتنا الشبلى الناقص شنو؟
بت ابحريرة ,, الارباب احمد ,, غيران من الكمبيوتر بجيك صاد

Post: #183
Title: Re: فنجان جبنة ولمة ناس حلوين
Author: اميرة السيد
Date: 19-09-2015, 05:32 PM
Parent: #182

يا جماعة الخير والبركة
الشكر والعرفان والتقدير لكم جميعا فقد جعلتم حياتنا
اجمل وجعلتم اوقاتنا فرحة ومليئة بالبسمات وجعل
الله ايامكم كلها فرحة وابتسامات...
وكمان عاوزة انقل ليكم نكتة قريتها في بوست السوداني الرفض
مبلغ التعويض...وكتبها بدر المعارف..وقال:"
في مرة سمعت بان الملك السعودي منح كل مصاب في حادث الحرم مبلغ
٥٠٠الف ريال وضربت تلفون لزوجها الحاج وقالت ليه:"معقولة مافي اي حديدة
ضربتك في رويسك الكبير ده؟
فرد عليها وقال ليها؛"انا سمعت ان كل الناس الادوهم تعويضات راجعين يزوجوا مرة ثانية..
والزوجة ردت:-الحمد لله الماجاتك حاجة ..بري..بري..انت تبرى من السبخ والحجر

والله يديكم الصحة والعافية

Post: #184
Title: Re: فنجان جبنة ولمة ناس حلوين
Author: Abdelrahim Mansour
Date: 19-09-2015, 09:31 PM
Parent: #183


Dog.jpg Hosting at Sudaneseonline.com



الكلب الموجود فـي الصورة اسمه ( هاتشيكو ). سنة 1923 المواطن الياباني ( ايزابورا ) وجد الكلب ( هاتشيكو ) فى صندوق صغير داخل عربة من عربات القطار الذي كان يستقله يومياً لعمله و كان الكلب لا يزال جرو صغير . أخذه و رباه فـي بيته. تمر الأيام و يكبر ( هاتشيكو ) .. ( ايزابورا )كان يذهب للعمل كل يوم بالقطار و كان ( هاتشيكو ) معتاد أن يوصله للمحطة و يظل منتظره فـي المحطة حتى عودته بعدها بـ 10 ساعات تقريباً ! .. فـي يوم من أيام سنة 1925 أصيب ( ايزابورا ) بأزمة قلبية في عمله وتوفى على أثرها فوراً و لم يعد إلى المنزل ! .. ظل ( هاتشيكو ) منتظراً صاحبه على رصيف المحطة لمدة 10 أعوام كاملة حتى مات أيضاً ! .. تم تصميم تمثال له فى مدخل محطة ( شيبوي ) فى اليابان موجود حتى الآن


الوفاء كلمة أثقل من الجبال وأطول من الحبال .. معانيها كثيرة : حب، بذل، تضحية، صدق و عطاء بلا حدود.

قرأتها فأعجبتني، فأحببت مشاركتها

**
*

Post: #185
Title: Re: فنجان جبنة ولمة ناس حلوين
Author: اميرة السيد
Date: 19-09-2015, 11:11 PM
Parent: #184

اين يا ترى مثل هذا الوفاء النادر في هذا الزمن القمئ!!!
لقد قل الوفاء والاخلاص وقلت المشاعر واصبح كل شئ
يقاس بالمادة واصبحت المادة تسيطر على كافة الاحاسيس
والمشاعر.....ونتمنى ان يعود الوفاء ويعم الكون
والله يديكم الصحة والعافية

Post: #187
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 20-09-2015, 01:37 AM
Parent: #185

قالوا سودانيين كتار اتجمَّعوا قدام السفارة الأمريكية فى الخرطوم
السفير مرق ليهم وقال ليهم انتوا منو ودايرين شنو؟ قالوا ليهو:
نحن اهل احمد الـ عمل ليكن الساعة ... قالوا فى وفد من السودنة عطبرة
سمعوا بالحكاية دى راحو السفارة قالوا نحن اهل بسمات الـ بتقرا عندكم.

Post: #188
Title: Re: فنجان جبنة ولمة ناس حلوين
Author: اميرة السيد
Date: 20-09-2015, 03:57 AM
Parent: #187

هسع بسمات كان سمعت ان ناس السودنة مشوا قابلوا
السفير الامريكي ذات نفسه بيسالوا من بنتهم تاني ما حتسلم
علينا وحتقوم ترفع نخرتها وتتنفجر فوقنا..
لكن بيني وبينك ممكن ناس عطبرة يعملوها..انت ما شايف ناس عطبرة
في البوست الليلهم بيشكروا في بلدهم كيفن وبيحبوا ناسها كيفن..والله
عندهم وفاء وحب كبير لبلدهم..لامن حسدتهم...
واهل بسمات هسع ساكنين ما بعيدين من السفارة الامريكية ...ساكنين في الطائف
على بعد مرمى حجر منها..
والله يديك الصحة والعافية

Post: #189
Title: Re: فنجان جبنة ولمة ناس حلوين
Author: معاوية المدير
Date: 20-09-2015, 04:11 AM
Parent: #188

Quote: و شمامة معاها تكرفة مع رفع القدوم فووووووووووووووق

زى ..... وكت يقطع السلبة ويكون ناوي يتلهم بت قضيم ......................

لقيتني كيف يا ود البلة ؟


ود شيقوق امرق من هنا، تمرق بلآ نِعلآتك ...

Post: #190
Title: Re: فنجان جبنة ولمة ناس حلوين
Author: عبدالحفيظ ابوسن
Date: 20-09-2015, 04:47 AM
Parent: #189

سلام للاحباب والاصحاب هنا
ضكور واناتي
واخص القادمين والقادمات الجدد
بنات عما لي جنهن جبنة .. اها واحدة فيهن جات زايرة اختها . واختها خسمتها تشرب الجبنة . سوت الجبنة وجابتها معاها فنجانين .. ختتهن وخت الجبنة في الوقاية .. وقعدت
كبت لي نفسها فنجان اول وتاني وتالت ولا اشتغلت بي اختها العزومة والمعمول الجبنة عشانها شغلة .. واختها كرزت تب مغيوظة
اها البكري خلص .. واختها ماشه بيتها
وديك قالت ليها
الرسول اقعدي اشربي التني
ردت ليها بي غيظ
وهو انا بكريك شربتو
ماقعدتي فيهو شفطيهو براك
وقام الغلاط .. لكن الفنجان النضيف حق الضيفة حسم النقاش
واتعضرت ليها تسوي ليها جبنة تانية
وديك ابت قالت ليها
دايرة تشربيها تاني براك والاولي ما كفتك

Post: #191
Title: Re: فنجان جبنة ولمة ناس حلوين
Author: Abdelrahim Mansour
Date: 20-09-2015, 01:14 PM
Parent: #190


ﻧﻜﺘﺔ ﺍﻟﻀﺤﻴﺔ ....
ﻓﻲ ﻭﺍﺣﺪ ﺑﻌﺪ ﻋﻴﺪ ﺭﻣﻀﺎﻥ ﻣﺒﺎﺷﺮﻩ ﺍﺷﺘﺮﻯ ﺧﺮﻭﻑ الضحية ﺧﻮﻓﺎ ﻣﻦ ﻏﻼﺀﺍﻻﺳﻌﺎﺭ ﺑﻌﺪﻳﻦ ..
ﻗﺎﻡ ﺍﻟﺨﺮﻭﻑ ﺍﺗﻌﻮﺩ ﻟﻴﻚ ﻋﻠﻲ ﻧﺎﺱ ﺍﻟﺒﻴﺖ ﻭﺻﺎﺭ يأكل ﻣﻌﺎﻫﻢ ﻭ ﻳﻨﻮﻡ ﻣﻌﺎﻫﻢ ﻭ ﻳﻤﺸﻲ ﻭﻳﻠﻌﺐ ﻣﻊ ﺍﻻﻭﻻﺩ ﻭﺑﻘﻲ ﻛﺄﻧﻮ ﻭﺍﺣﺪ ﻣﻦ ﻧﺎﺱ ﺍﻟﺒﻴﺖ ..
ﺍﻟﻤﻬﻢ ﻓﻲ ﻳﻮﻡ ﺍﻟﻮﻗﻔﻪ ﺍﻟﺨﺮﻭﻑ ﺩﺍ ﻗﺮﺏ ﻳﺸﻘﻮ ﺍﻟﺒﻜﺎ ﻭﻳﺘﺪﺭﺩﻕ ﻓﻲ ﺍﻟﻮﺍﻃﺔ ..
ﺍﻻﻭﻻﺩ ﻛﻠﻤﻮ أبوهم ...
ﺍﻻﺏ ﺟﺎ ﻭﺳﺎﻝ ﺍﻟﺨﺮﻭﻑ : ﺑﺘﺒﻜﻲ ﻣﺎﻟﻚ ﻳﺎ ﻭﺩ ﺍﻟﺤﻼﻝ؟؟؟
ﻗﺎﻡ ﺍﻟﺨﺮﻭﻑ ﻗﺎﻝ ﻟﻴﻬﻮ : ﻧﺎﺱ الحلة ﻛﻠﻬﻢ ﺟﺎﺑﻮ ﻟﻴﻬﻢ ﺧﺮﻭﻑ ﺍﻟﻌﻴﺪ ﺍﻻ ﻧﺤﻨﺎ.


ذكرني ديك المسلمية

كل عام و انتم بخير :)

عبدالرحيم منصور
نيويورك
**

Post: #192
Title: Re: فنجان جبنة ولمة ناس حلوين
Author: الفاتح ميرغني
Date: 20-09-2015, 01:16 PM
Parent: #190

كتب الزميل/ Abdelrahim Mansour


الكلب الموجود فـي الصورة اسمه ( هاتشيكو ). سنة 1923 المواطن الياباني ( ايزابورا ) وجد الكلب ( هاتشيكو ) فى صندوق صغير داخل عربة من عربات القطار الذي كان يستقله يومياً لعمله و كان الكلب لا يزال جرو صغير . أخذه و رباه فـي بيته. تمر الأيام و يكبر ( هاتشيكو ) .. ( ايزابورا )كان يذهب للعمل كل يوم بالقطار و كان ( هاتشيكو ) معتاد أن يوصله للمحطة و يظل منتظره فـي المحطة حتى عودته بعدها بـ 10 ساعات تقريباً ! .. فـي يوم من أيام سنة 1925 أصيب ( ايزابورا ) بأزمة قلبية في عمله وتوفى على أثرها فوراً و لم يعد إلى المنزل ! .. ظل ( هاتشيكو ) منتظراً صاحبه على رصيف المحطة لمدة 10 أعوام كاملة حتى مات أيضاً ! .. تم تصميم تمثال له فى مدخل محطة ( شيبوي ) فى اليابان موجود حتى الآن
Dog2.jpg Hosting at Sudaneseonline.com

Post: #193
Title: Re: فنجان جبنة ولمة ناس حلوين
Author: الفاتح ميرغني
Date: 20-09-2015, 01:29 PM
Parent: #192

http://
امام تمثال الهاتشيكو مع البروفيسور على يوسف، استاذ الفيزياء بجامعة السلطان قابوس. خلال زيارته لليابان للمشاركة في الإجتماع السنوي للرابطة الدولية للفزيائيين.وهو عبارة عن إجتماع يهتم بقضايا الفيزياء وآخر النظريات والتطورات الجارية في هذا العلم الحيوي.


محبتي

Post: #194
Title: Re: فنجان جبنة ولمة ناس حلوين
Author: Abdelrahim Mansour
Date: 20-09-2015, 01:30 PM
Parent: #192


إن فقدت مكان بذورك التي بذرتها يوما ما..
سيخبرك المطر أين زرعتها ..
لذا إبذر الخير فوق أي أرض وتحت أي سماء ومع أي أحد..
فأنت لا تعلم أين تجده ومتى تجده؟!
إزرع جميلا ولو في غير موضعه ....
فلا يضيع جميلا أينما زرعا ..
فما أجمل العطاء...
فقد تجد جزاءه في الدنيا أو يكون لك ذخرا في الآخرة..
لا تسرق فرحة أحد ولا تقهر قلب أحد ..
أعمارنا قصيرة ..
فالبصمة الجميلة تبقى وإن غاب صاحبها"!!!

إهداء للرفقة الطيبة


inspire.jpg Hosting at Sudaneseonline.com


*
**

Post: #195
Title: Re: فنجان جبنة ولمة ناس حلوين
Author: الفاتح ميرغني
Date: 20-09-2015, 01:44 PM
Parent: #194

.

Post: #196
Title: Re: فنجان جبنة ولمة ناس حلوين
Author: اميرة السيد
Date: 20-09-2015, 02:05 PM
Parent: #195

تحياتي لكم عبد الرحيم ود منصور والفاتح ود ميرغني وكذاك للبروف علي يوسف
والله شوقوتونا نزور تمثال هذا الكلب الوفي المخلص هاتشيكو...مع اننا ما عارفين
اليابان البعيدة دي بيمشوا ليها كيفن....واللغة اليابانية وينها عشان نسال اليابانيين لمن
نصل عن مكان التمثال..
وفرحنا ان نعلم ان الاساتذة السودانيين منتشرين في انحاء الدنيا ينشرون العلم
والمعرفة وكمان في المواد الصعبة زي الفيزياء..
والله يديكم الصحة والعافية

Post: #197
Title: Re: فنجان جبنة ولمة ناس حلوين
Author: ست البنات
Date: 20-09-2015, 02:33 PM
Parent: #196

سلام للجميع,

ويا عبدالمنعم اخوي أكنها زهللة الدفيق والمدينيي مرقت مننا لامن تجيبنا الملاح الاخدر زي البوهية دا كمان تنشف ريقنا ؟؟!

عليك الله ما تجيب قنديلي ولا بركاوي يابس تعذبنا بيهن !

والله ديل بس الحاجات المشتهاهن لي زمن !

وطارق ود عمي جبرين لسه ما جاء ؟

نان هو يخلي اللواجا ليي منو ؟!

شايفاهو حايم بعند حوش الفيس بوك شايل حال الحجاج الليليننا !

شايلو طارة وينقر فيها الليل كلو !

ست البنات.

Post: #198
Title: Re: فنجان جبنة ولمة ناس حلوين
Author: عبد المنعم سيد احمد
Date: 20-09-2015, 03:02 PM
Parent: #197



ياست البنات
مااشتهيتى حش التمر..
لا تقولى وامغستى الليلى الما اندليت لى تنقاسى.
باقى الليام دى ايام حش التمر
ولمة الحبان
ياحليلم.

Post: #199
Title: Re: فنجان جبنة ولمة ناس حلوين
Author: Abdelrahim Mansour
Date: 20-09-2015, 03:15 PM
Parent: #198


اختنا الاميرة بت السيد

سلامات و صباحتك بيض

للاسف نحن البشر صرنا نحتفي و نبحث عن المشاعر في الحيونات.
و نبكي علي الاطلال عندما نتحدث الامانة و الاخلاص و الوفاء.
لا ادري هل هذه المشاعر صارت غريبة في مجتمعنا الذي طغت علية الماديات فصرنا آليين تبلدت في الاحاسيس و المشاعر، ام ماذا دهانا؟


عبدالرحيم منصور
نيويورك
**
*

Post: #200
Title: Re: فنجان جبنة ولمة ناس حلوين
Author: ست البنات
Date: 20-09-2015, 03:26 PM
Parent: #199

يا سلام يا عبدالمنعم !
تخيل دي الحاجة النفسي احضرها !
حش التمر دا باقيلي برنامج جميل وزيادة خير ,
يا حليلهم دا مجهود ومونة سنة كاملة - الله يقويهم ويفتح عليهم .

ست البنات.

Post: #201
Title: Re: فنجان جبنة ولمة ناس حلوين
Author: عبد المنعم سيد احمد
Date: 20-09-2015, 03:29 PM
Parent: #200

sudansudansudan-sudansudansudansudansudan2.jpg Hosting at Sudaneseonline.com

Post: #202
Title: Re: فنجان جبنة ولمة ناس حلوين
Author: عبد المنعم سيد احمد
Date: 20-09-2015, 03:31 PM
Parent: #201


Post: #203
Title: Re: فنجان جبنة ولمة ناس حلوين
Author: Abdelrahim Mansour
Date: 20-09-2015, 03:49 PM
Parent: #200


اخونا الاستاذ: الفاتح ميرغني

سلامات

شكرا علي الاضافة و الصورة الرائعة، حقيقة لي يومين مؤثرة فيني قصة هذا الكلب الوفي التي تزامنت مع مرور تجربة شخصية لصديق.

مع فائق الود و الاحترام و التقدير

عبدالرحيم منصور
نيويورك
**
*

Post: #204
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 20-09-2015, 03:57 PM
Parent: #203

سلام للجميع
الكلاب خشم بيوت وكلبك ده ياعبدالرحيم كلب بن كلب اصيل
يعنى هسع ياعبدالرحيم ,, كلبك ده كلب وحرَّاس كلب بت النصيح
وكلبة خال اسماعين وفردوس وكلبة ودالبوش الـ بِتْغَمِّد وتفتح ديل كلاب؟

Post: #205
Title: Re: فنجان جبنة ولمة ناس حلوين
Author: عبد المنعم سيد احمد
Date: 20-09-2015, 04:04 PM
Parent: #204

12032020_1002896103093740_3991411237526298032_n.jpg Hosting at Sudaneseonline.com




Post: #206
Title: Re: فنجان جبنة ولمة ناس حلوين
Author: عبد المنعم سيد احمد
Date: 20-09-2015, 04:05 PM
Parent: #205





12049434_507009419457325_4314786334610213163_n.jpg Hosting at Sudaneseonline.com

Post: #207
Title: Re: فنجان جبنة ولمة ناس حلوين
Author: الفاتح ميرغني
Date: 20-09-2015, 07:43 PM
Parent: #206

Quote: تحياتي لكم عبد الرحيم ود منصور والفاتح ود ميرغني وكذاك للبروف علي يوسف
والله شوقوتونا نزور تمثال هذا الكلب الوفي المخلص هاتشيكو...مع اننا ما عارفين
اليابان البعيدة دي بيمشوا ليها كيفن....واللغة اليابانية وينها عشان نسال اليابانيين لمن
نصل عن مكان التمثال..
وفرحنا ان نعلم ان الاساتذة السودانيين منتشرين في انحاء الدنيا ينشرون العلم
والمعرفة وكمان في المواد الصعبة زي الفيزياء..
والله يديكم الصحة والعافية

الأميرة بت السيد
تحياتي النواضر.
ياخ مرحب بيك في اليابان وفي أي وقت.
قبل كده وعدت تعلميني اللغة النوبية ودي فرصة نعمل مذكرة تعاون ثقافي ( Memorandum of Cultural Cooperation).
وانا على أهبة الاستعداد اعلمك اللغة اليابانية من الألف لي الياء.
البروفيسور علي يوسف من الشخصيات النوابغ وودودة، ومنذ الوهلة الأولى التي التقيته فيها شعرت اني أمام إنسان طري ، على قولة أهل الشام.

محبتي

Post: #208
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 20-09-2015, 08:05 PM
Parent: #207

Quote: وانا عاوزه حقي حق خالد ما محسوب
كل زول بي خشم بيته الجايب الشبك جهازنا واحد

Quote: ههههههه والله يا الفضلابي زكرتني الجمعيه التعاونيه يعني مجامله نهايي
مافي الصرفه واحدي بس






عفاف والعفاف توبِك ومسـتورابـــــــــو,, انـــت الكـــــــــــرم سِتو وابواتك اربابو
تموين الجمعية داب اهلو ممحوق ,, وانت زادك للجار ديــمة دافعــــابو
كرمــك طبعة مو تصنيع وشوفونى ,, كرمـــك سِـبـراً قــــديــم قـــادلابــــــــــــــــــو
الـبعرْفِك يفتخـــر بــــيك أَخــتاً لــيهو ,, ماولدتك أُمّو انت عِزُّو وسط اصحابو
اها يابت ابحريرة ,, لقيتنى كيف؟ ودالخال ده مالو ما جا يجادعنى
أوعى يكون بقا ودبنادر ونسى الشم خَوَّخت؟ تبقى عوجة.

Post: #209
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 20-09-2015, 08:20 PM
Parent: #208

ودالمدير نعينو عطشقى

Post: #210
Title: Re: فنجان جبنة ولمة ناس حلوين
Author: جلالدونا
Date: 20-09-2015, 10:29 PM
Parent: #209

صاحبى روميو هندى احمر متعود اشيلو لى مواعيدو مع الدكاترة و المستشفيات
يوم ضرب لى زمن مغربية كدى
- مستر عمر اى نيد يو ضرورى ممكن تجى حالا
دقايق و كنتا معاهو
-خير يا حبة مالك
- الكلب
- الكلب !!!! و انا دخلى شنو بالكلب ثم هو مالو ما هداك قاعد كويس
- زعلان ما عاوز يتفاهم معاى
مشيت على الكلب الذى قابلنى بترحيب حار واّخر تلصّق و دخول و مروق بين الكرعين
روميو حاول يستغل اللحظة الحلوة دى و يتقرب من كلبو
بالله الساعة القال نجرررررر ونط فوقو اشوف صاحبى زى القرد قاعد فوق راس الحيطة ويكورك امسك الف .. اب ده
- يازول امسك شنو انتا ما نصيح
هو فوق الحيطة و الكلب قاعد ليهو تحت مواصلا نباحه الغاضب
- اسمع معاك قروش
-عاوز كم
-عشرة دولار بس تعال بى برة و اقفل الباب وراك و ادينى ليها
و زى ما بقولو المصريين .. كنك رايح خاى .. فى لمح البصر كان وصل الدكان و جا راجع و فى ايدو كرتونة جعّة
- يازول ده شنو ده
_ خلى الكلام الكتيىر و امسك بس
مسكت الكرتونة
طلع فوق راس الحيطة .. ناولينى الكرتونة
ناولتو الكرتونة
و الكلب يهوهو ,, خش بى جوه و امسك منى الكرتونة
_ اشمعنى انتا سيد الكلب تخش بى فول الحيطة وانا الما عندى شغلة بيهو اخش بالباب
.... اذكرتا حلاة لق لق بتاعت اخونا ود المدير ...
- خش هو زعلان منى ما زعلان منك
اتحسبنت بى الله و خشيت اشوف ليك الكلب بدا يهدى و يهز فى ضنبو
مسكت الكرتونة و ختيتا فى الواطا _ يلا انزل
لالا ابن الكلب ده ما مضمون المهم فى باقة فى المطبخ امشى جيبا
مشيت جبتا الباقة .. الكلب صار اكثر توددا
_ افتح علبة و كبها ليهو فى الباقة
- يا زول انتا بى صحك .. الكلب يزداد تمسحا بى متل التكّنو مستعجل
- عمر سريع ياخى عاوز انتهى من الفيلم ده
مليت الباقة جعّة فأذا به يتمدد على الارض و اضعا الباقة بين كرعينو القدام و هاك يا لغف
بعد اللغفة التالتة تكل ليك راسو فوق كراعو اليمين و ضنبه يضرب الارض ضربات متتاليات و هاااادية
زى التكنّو نقرشة اصابع
_ خلاص صاحبك استمخا
_ استمخا شنو ده قاعد يفّكر اقوم اجيب ليهو المزّة
جاب ليهو حاجة زى البلّى و لونا بنى
رفع راسو لهط و لغف ثم نظر الينا .. احسست انه يبتسم
_ انا قايم ماشى يا حبة اشوفك باكر و اتحركت على الباب
قام معاى يوصلنى الباب فأذا بالكلب يقوم
اول مرة اشوف لى كلب ماشى سبعتين تمانيتين
عاينتا ليهو عاين لى
حسيت بيهو بقول لى
ماشى وين ... ما تخمّس معانا ياااخ

Post: #211
Title: Re: فنجان جبنة ولمة ناس حلوين
Author: عفاف أبو حريرة
Date: 21-09-2015, 01:29 AM
Parent: #210

Quote: عفاف والعفاف توبِك ومسـتورابـــــــــو,, انـــت الكـــــــــــرم سِتو وابواتك اربابو
تموين الجمعية داب اهلو ممحوق ,, وانت زادك للجار ديــمة دافعــــابو
كرمــك طبعة مو تصنيع وشوفونى ,, كرمـــك سِـبـراً قــــديــم قـــادلابــــــــــــــــــو
الـبعرْفِك يفتخـــر بــــيك أَخــتاً لــيهو ,, ماولدتك أُمّو انت عِزُّو وسط اصحابو
اها يابت ابحريرة ,, لقيتنى كيف؟ ودالخال ده مالو ما جا يجادعنى
أوعى يكون بقا ودبنادر ونسى الشم خَوَّخت؟ تبقى عوجة.

الفضلابي ابشر بالخير
والله ولا سال في ود شوراني زااته
لمتك دي زكرتني لمه في الفين وسبعه
كانت سبب في اني دخلت الحوش كانت لمة حبان وونسه حلوه
سماها مزرقن وريحة دعاشه ماليه المكان
سميه الحسن طلحه ومني خوجلي وفاروق حامد وودشيقوق
وابوبكر سيد احمد ونور الهادي
وناس سمحين تري زي سماحتكم دي
الله يسر بالك
دنيا واخره

Post: #212
Title: Re: فنجان جبنة ولمة ناس حلوين
Author: الفاتح ميرغني
Date: 21-09-2015, 02:36 AM
Parent: #211

Quote: اخونا الاستاذ: الفاتح ميرغني

سلامات

شكرا علي الاضافة و الصورة الرائعة، حقيقة لي يومين مؤثرة فيني قصة هذا الكلب الوفي التي تزامنت مع مرور تجربة شخصية لصديق.

مع فائق الود و الاحترام و التقدير

عبدالرحيم منصور
نيويورك

عزيزنا عبدالرحمن منصور
تحياتي الصوادح
فعلا قصة مؤثرة وما زال اليابانيون والسياح الاجانب يتوافدون على التمثال لأخذ الصور التذكارية امامه حيث اصبح أحد ابرز المعالم السياحية في اليابان ومنطقة شيبويا.
أتمنى لصديقك أن يتجاوز التجربة الشخصية، ايا كانت، بسلام.

محبتي

Post: #213
Title: Re: فنجان جبنة ولمة ناس حلوين
Author: معاوية المدير
Date: 21-09-2015, 02:54 AM
Parent: #212

Quote:
قبل ان ابدأ العمل اخذت قهوتي وبدأت احتسيها بمزاج وانا أستمع (للدِسبآتشر) وهي
توزع في (الكوّلآت). الكوّلآت جمع كوّل حسب مصطلحاتنا كسودانيين، فنحن نقوم
بتعريب اللغة الإنجليزيّة قدر الإمكان حتي تتناسب وظروف المهنة التي نؤديها، فالكوّل
هو تحديد الدِسباتشر لِمحل (التِرِب)، والدِسباتشر هي الموظفة القاعدة في سنتر الشركة
تتلقى الكوّلآت من الكستمر، وهم الزباين، والتِرِب هو الكوّل بعد وصوله للتكاسي من
الدِسباتشر عبر الراديو. في سودانيتنا نجمع التِرِب علي تِرِبآت، والكوّل علي كوّلآت، جمع
تكسير علي ما اظن، او جمع تيسير علي ما أعتقد.

المهم... يا قول تبارك.
فتحت الراديو، وبديت العمل بإعلآم الدِسباتشر بموقعي في المدينة، ورحت استمتع بقهوتي.
لم يمضي زمن طويل حتي ندهتني الدِسباتشر، وادتني كوّل في المستشفى. ذهب للمستشفى،
ولم إنتظر طويل حتي ظهرت الزبونة بنت الأصفر. تقدمت نحو العربيّة وفتحت الباب الخلفي.
ادخلتها و قفلت الباب، ثمّ فتحت الباب الأمامي وحيتني بإبتسامة رددت عليها بأحسن منها علي
نسق إذا حُييتم بتحيّة، ثمّ جلست في المقعد الأمامي.

طبعاً كجزء من المِهنة لآزم تدخل مع الكستمر في عشرة ونسة.
بديت الونسة مُتسآئلاً: مالكم، نعال ما عندكم عوجة؟؟؟... طبعاً السوداني عآدي ممكن يشوفكم
شايلين جنازة، ويسأل: مالكم، نعال ما عندكم عوجة؟؟؟!!!
ردّت الخوآجيّة: كان لابُدّ من مقابلة الدكتور، رغم إنها حالتها تحسّنت كتيّر من الأوّل.
سألتها من الأعراض التي تعتريها؟
قالت لي: بتكون نآيمة ومتعمّقة في النوم، فجاةً تصحى مخلوعة، وتقعد تِنكرش وتحكحِك في
جسمها، وتعضعض في نفسها. !!!
بيني وبين نفسي قلت: أُمّك، خلي بآلك دي جنها كلكي المطيّرة عِويناتا وصآمة خشُما دي !!!
يمرقني منها اللآ نآم، لآ أكل الطعآم...
قلت ليها: يمكن عندها نفسيآت !؟
قالت لي: إحتمال رغم إني مستبعدة حكاية النفسيآت دي. لكن ميّن عآرف؟؟؟
قلت ليها: الأكل كيف؟ بتسفسف كويّس؟
قالت لي: نعم، بتاكل كويّس، بس الشي المحيرني!!! إنها أصبحت ما عندها نفِس للشكولآتا البيضا،
رغم إنها كانت تموووووت فيها!!!.
بيني وبين نفسي قلت: مقدرة يا ناس المصارين البُيُض.
سألتها: عندكم مقابلة تانية مع الدكتور؟
قالت لي: نعم، وإحتمال يعملوا ليها صورة أشِعة. بس الصورة مُكلّفة جداً، وإذا حدد الدكتور إنها
تحتاج لعمليّة التكلفة حا تكون أكبر.
قلت ليها: علآقاتها الإجتماعية كيف، هل قاعدة تطلع تتفسح وكده؟
قالت لي: ما عندها مشكلة بتاعت إجتماعيات، بس أنا بخاف عليها شدييييد، وما بخليها تمرق براها.


وصلنا البيت... الخوآجيّة حاسبتني وادتني 3 دولارآت تِب. التِب هو المبلغ الذي يرفدك به الزبون
بعد المبلغ الفي العدآد، وبيدلعوهو التكاسة يقولوا ليهو (التبتبوني). مهم جداً بالمناسبة. شكرت
الخواجيّة، وقلت ليها: إن شاء الله ربنا يكتب سلآمتا، وتشوفي جديد وِلِيداتا.
شكرتني الخواجيّة، وقالت لي: من خشّمك ولبآب السما. عِم مِساءً.
نزلت بنت الأصفر. فتحت الباب الخلفي شالتا، وقبل أن تغادر إذا بها تفتح خشُما لأوّل مرّة
وتقول: نِيآو، نِيآو، نِيآو... !!!
ما عرفتها شكرتني، واللآ شتمتني !!!. في تلك اللحظة تذكرتَ أطفال بلآدي الذين يموتون بفقر
الدم، وسوء التغذية. أو نتيجة لإنعدآم حُقن الملآريا، والتي قد تكون موجودة أحياناً لكن وآلد
الطفل لا يستطيع دفع قيمتها، فتقتله الحسرة هو والأُم قبل أن يفارق فلذة كبدهما الحياة.
حينها، لعنت الظُلم والظالمين، وشعرت بأنني في حوجة لكوب قهوة آخر...[/QUOTE

دي بمناسبة الضوقي بتاعكم دا .

إنت يا جلالدونا الجعة يعني شنو ؟، جوعتنا يا اخ .

ود المدير العطشقي ...

Post: #214
Title: Re: فنجان جبنة ولمة ناس حلوين
Author: عبيد الطيب
Date: 21-09-2015, 06:09 AM
Parent: #213

Quote: سلام للجميع
الكلاب خشم بيوت وكلبك ده ياعبدالرحيم كلب بن كلب اصيل
يعنى هسع ياعبدالرحيم ,, كلبك ده كلب وحرَّاس كلب بت النصيح
وكلبة خال اسماعين وفردوس وكلبة ودالبوش الـ بِتْغَمِّد وتفتح ديل كلاب؟

بمناسبة الكلاب ،أهل البادية يحبونها جدا، بعضهم يدربها علي الصيد وحراسة البهائم، وقتل الذئاب وإبن آوي والضباع،
والبعض يكرهها، لأنها تنبح الطُرَّاد وتحول بينه وبين محبوبته، أو قد تُيقظ "الشايب" ،
أو العجوز التي بطبعها تسعَلُ آخر الليل..من السعال "القُحة"
ودي موضوع طويل ، أنوي أن أوثق له بكتابة مقاربات ومقارنات، بين الموروث العربي قديما وبين البوادي بالسودان،
ولوقتنا الممحوق والدنيا قبائل عيد، نورد بعض الطرف من بادية الكبابيش
صالح ود الدِّحيش الكباشي شاعر رائع ورجل صاحب طُرفة، كانت له اشعار رائعة عن كلاب حبيبته "أم قودة"
وإيقاظها للشايب أو العجوز
أتذكر منها:
كلاب ام قوده يا الفاتح سَعرهن طايــِب
يكتل إتنين يــِخَــلَّى الاصلو عادم النايب
الليل كلّــو يــــَبْ يـــبْ مِهوِسات الشايب
ودخلت بيتها كان ساكت معايا حبايب
*************************
كلاب ام قوده يا الفاتح ســّعرهــِن طايش
يكْتلْ اتنين يـــخَلــَّى الغير نوايب عايش
ماهمَّانى نبحان الضيولو عكايش
ودلّتْ بيتها عيل ساكِت بشوفها نبايش
اشعاره عن كلاب أم قودة كثيرة ولكن ذاكرتي اصبحت مع الإغتراب "قش حُمرة"
وعشان ودالصُّرَّة مايقول لي أشرح...
*أُم قودة يطلقها أهل البادية للمرأة بعيدة مهوي القرط، وفي خطوها تيه ، قد تكون هركولة ولكن أخمصها بالشوك غير منتعل..!
وأيضا يقولون أُم وريد
ولصالح ود الدِّحيش توية رائعة ، عن كلاب حراسة العذاري وهو رجل موهوب وصوته شجيّ ومن تويته عن كلاب الطُّرَّاد:
جَرْ يا كلبة ما تفوتِي
إن شاء الله تسعري تموتي
يوت باقيالي سافوتي
من الخاتمو يا قوتي
*والسافوتة للذين لا يعرفونها،هي خيط رفيع يبروم ، وإذا نام أحدهم، يدخلونه له في أنفه فيصحي مزعورا
أهااا ياخالد أخوي إن شاء الله خاتمك جمع...!؟
والقمر والكلب ، مريبان أيضا للعشاق قديما، وأهل الشيوم
قال الشاعر العربي قديما :
أراحني الله من أشياء أكرها منها العجور ومنها الكلب والقمر
هذا يبوح وهذا يستضاء به وهذه ضمرزة قوامة السّحر
*شُفت كيف يا الطيب أخوي القمر والعجوز والكلب، ديل يقابلهن ..والبَنْدَر فوانيسو البِيوقدن ماتَن.....!
شفت الزول دي كيف مسنوح، العجوز بتكُح والسعال مجنِّنها جن، "ضمرزة" ، لي شقَّة البوَّاح"السحر"،
وهو من سناحتو مو هام عليها ولا يشفق ، بل بالو غادي،
مسنوووووح!
ولكن هذه البدوية لها نظرة أُخري للكلب وصاحبه، فتقول ومن هسيس الجراري:
مُو أبو كليباً نبَّحْ
علي جارو ما إتقبَّح
حَلَب في فواقها إتصبَّح
وصاد في عقصة إتربَّح
*والفواق هو الحليب المحلوب لتوه ، وقد يكون غبوقا وهو حليب الليل، وقد يكون صبوحا وهو حليب الصباح،
وعقصة ، هي بقرة الوحش، وسائر الصيد ، وقالوا عقص لإلتواء قرونها، ولذكرها يقولون تيس أو ثور أعقص،
نسبة لإلتواء قرناه علي أُذنيه من خلفه
وقديما الشاعر إمرئ القيس، وصف ضفائر محبوبته قائلا:
غدائرة مستشزرات إلي العُلا تضل العقاص في مثني ومرسل
وأشهر كلاب عندنا في بادية الكبابيش كلاب الزعيم الراحل الشيخ المُر، ونحن صغار في الإبتدائي ،
أتذكر كلبه الذي قتله، عمَّال تاجر شهير، ولقد غضب الشيخ غضبا شديد، وكيف لا وهو يعتبر التعدي علي كلابه، تعدي علي حرمه،
ولكنه سامحهم لأن التاجر غريب ديارٍ، وقد كان الشيخ وفيا للغرباء يأويهم ويساندهم ويهب لهم الكثير ،
ولقد أرسل الشاعر الرائع يوسف عبدالماجد "كُريت" ،l كاسيت به مرثية طويلة يواسي الشيخ في كلبه ، وفيها طرفة ،
حيث يذكر صفات الكلب الجميلة ،بأسلوب شاعر جميل ،والشاعر يوسف عبدالماجد من دامر المجذوب،
لكنه عاش وسط الكبابيش وكواهلة الغرب، حيث كان تاجرا بأم بادر، وكان صديقا للناظر الهرديمي وللشيخ المر وللناس جميعا
معزتي وكل عام وأنتم بخير، وإن شاء الله ماينبحكم كلبا أبيض

Post: #215
Title: Re: فنجان جبنة ولمة ناس حلوين
Author: درديري كباشي
Date: 21-09-2015, 07:58 AM
Parent: #214

والله بوست باسطة بس

شكرا الفاضلابي وباقي الآفاضل

وشكرا أميره التي دعتنا لهذا الجمال المترع

وسنعود بعد ندوزن معكم

عشان ما نعرض خارج الحلبة

Post: #216
Title: Re: فنجان جبنة ولمة ناس حلوين
Author: معاوية المدير
Date: 21-09-2015, 08:21 AM
Parent: #215

Quote: *والفواق هو الحليب المحلوب لتوه


(وَمَا يَنْظُرُ هَٰؤُلَاءِ إِلَّا صَيْحَةً وَاحِدَةً مَا لَهَا مِنْ فَوَاقٍ)


ود المقدم حبابو ...

Post: #217
Title: Re: فنجان جبنة ولمة ناس حلوين
Author: عبدالحفيظ ابوسن
Date: 21-09-2015, 08:31 AM
Parent: #216

حباب العبيد
صاحبي المتمم كيفي
ودالمدير الايامات دي بقا امام جامع بكون داير يمشي الحجاز
ودالمنسي جرك عاجز
الفاضلابي ومن غيرك لهذا البوست
باقي المسانيح
البنوت علا زعلان من خيتي بت عمسيب ماها عاجباني

Post: #218
Title: Re: فنجان جبنة ولمة ناس حلوين
Author: عبيد الطيب
Date: 21-09-2015, 09:09 AM
Parent: #217

Quote: (وَمَا يَنْظُرُ هَٰؤُلَاءِ إِلَّا صَيْحَةً وَاحِدَةً مَا لَهَا مِنْ فَوَاقٍ)

ولله المثل الأعلي ، وربنا يبيِّض وجوهنا ووجوهكم يوم الما لها من فواق

ودالمدير سلااام ومعزة صادقة
يا ربيع الشاشاي والجالسة والهسيس والجابودي
هل تدري يا صديقي ،أن بالبادية الغربية، سمحين نافلة من ربوعكم هاتيك، بهم زانة باديتنا ، وطابت
أهل البادية يقولون : "الناقة فاقت" أو أبل فاقن ويخاطبون بعضهم قائلين :سرَّب الأناقيب ديل ...عشان يحلبوا.... قبل ألْبِل ما تغاوِر....!
شفت كيف
قال الشاعرة ومن ، من هسيس الجراري:
حِس بلاَّس وحِس طنَّا
والحاروك دي أهنَّا
فُواقِك من الشنَّة
الفوق النَّحل ونَّا
ولولا أريد ان أشرككم في جمال هذه الغوة ، لما شرحتها، فيقيني أن الشرح يفسدها
البلاَّس هو الفصيل من الإبل ، أي الحُوار، وسمي بلاس، لأنَّه بحنينه، يدُل الهمباتة والسارقين إلي مراح الإبل،
والحروك تعني الكثير من الإبل ، من حركة، وأهنَّا أي أهلنا، شفت كيف حليب النوق"الفواق" ، من ضرعها ، "شنَّا"،
والشَّن هي القربة القديمة، وماءها يكون باردا جدا،
وأيضا أهل الإبل ، يسكبون الحليب في سعون، وقرب شَن، ليصير قارص، به حموضة ،
اهاااا قال لبنها أحلي من عسل النَّحل "الفوقو النحل ونَّا"
الشاعرة أم عواني بت المك ود صباح، تخاطب شقيقا
الضَّي ودالمك، وهو في رحلة الجنوب مع إبله أو نوقه:
نَزل في شارع القَطَر
حلب في فواقْها وفطَر
الضَّي نجعهِّن بَطَر
لا برَّاق لا مطر
شفت الزول دي كيف بطران وإبلو مبطراهو، قالت
"نجعهن بطر" وهنا تقصد أن إبله سمان ماهن هزال
نجع إلي تلال الصعيد، حتي وصل سكة القطار"شارع" وهنا تقصد الجزء الجنوبي من غرب كردفان وشرق وجنوب دارفور
بعدين لأهل البادية، معزة خاصة لحليب النوق ، قالت إحداهُن ومن هسيس الجراري:
لبنك عافية ودوا
وسيدك مابّيت قوا
حنين أمُ زور في النَّوي
زي صاروخ الهوا
*شفت كيف حليبها دواء للكثير من أمراض البطن
وما ابدعها عندما شبهت حنين الإبل "أُم زور"، بصوت الصاروخ
ياودالمدير ياخ ماااالك علينا......!
ود أب سن يا جميل الدواخل،ربنا يجمعنا في ايَّام بيض

Post: #219
Title: Re: فنجان جبنة ولمة ناس حلوين
Author: عزالدين عباس الفحل
Date: 21-09-2015, 11:17 AM
Parent: #218


معاوية المدير ،
،،،،،،

.
..

أشهد أنو ود المدير ،
بيصلي صلاة الفجر حاضراً ،
أنسان عالي التقوة والصلاح ،
رغم المزاح ،
دعواتك يا ود المدير،
أشواقي ،
،،،،

.
..






عزالدين عباس الفحل
ابوظبي

.
..

Post: #220
Title: Re: فنجان جبنة ولمة ناس حلوين
Author: اميرة السيد
Date: 21-09-2015, 03:50 PM
Parent: #219

عزيزي درديري ود كباشي
بالنيابة عن صاحب البوست ود الفاضلابي نرحب بك
وفضل فنجان جبنة بالهبهان...
والله يديك الصحة والعافية

Post: #221
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 03:53 PM
Parent: #219

Quote: فعلا قصة مؤثرة وما زال اليابانيون والسياح الاجانب يتوافدون على التمثال لأخذ الصور التذكارية امامه حيث اصبح أحد ابرز المعالم السياحية في اليابان ومنطقة شيبويا.

سلام ود ميرغنى
قصة كلب عبدالرحيم ود منصور دى ذكّرتنى خبر جابتو الجزيرة قبل كم يوم ,, يتعلق بزرع خلايا لعلاج الصمم ,, وطبعاً التجربة اول شى بعملوها
على الفيران (يستاهلن البسو فيهن) اها جا واحد من الدكاترة قال طبعاً نحن مامُمكن نسعل الفار نقول ليهو انت بسمع ولا مابتسمع لكن بنعمل
اصوات عالية بعد مانعمل التجربة ,, واذا الفار نطَّ بنعرفو سِمِعْ
اها كلب عبدالرحيم ده منو القال لليابانيين ديل انو بِسُولِت على المحطة وفاء منه للزول اللى انقذه؟ ما يمكن تكون عادة.

Post: #222
Title: Re: فنجان جبنة ولمة ناس حلوين
Author: اميرة السيد
Date: 21-09-2015, 04:02 PM
Parent: #221

لا .. لا... يا ود الفاضلابي ومعقولة اليابانيين يغلطوا في دي...
ونحن بنعرف ان اليابانيين هم اذكى البشر .. وانت شوف براك التكنلوجيات البيصنعوها
كل يوم ...
وبعدين ود منصور بيقول ليك الكلب ده كانت بينتظر صاحبه كل يوم من سنة 1923م إلى 1925م
في المحطة .. ولمن غاب واصل الكلب في انتظاره 10 سنوات... وطبعا المعروف ان الكلب مشهور بالوفاء
وانا قريت قبل كده ان في كلب كان بيرقد امام قبر صاحبه حتى مات....
ونسالأ الله ان يعود مثل هذا الوفاء بين الناس... وهذا زمن قد قل فيه الوفاء
والله يديك الصحة والعافية

Post: #223
Title: Re: فنجان جبنة ولمة ناس حلوين
Author: عبدالحفيظ ابوسن
Date: 21-09-2015, 04:05 PM
Parent: #221

تحياتي عذالدين
وحبابك
لا والله لم يكن قولي قدحا في ود المدير ابدا .. ولم يدر بذهني تدينه او عدم تدينه .. بل هو مجرد مزاح محبة فيه وود
واعتذر ان كان قد نظر لقولي كما ردك
وانك من الذين اوادهم لكما المحبة

Post: #224
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 04:13 PM
Parent: #221

Quote: ـ خلاص صاحبك استمخا
ـ استمخا شنو ده قاعد يفّكر اقوم اجيب ليهو المزّة
جاب ليهو حاجة زى البلّى و لونا بنى

غايتو ياجلادونا ,, مسنوح سنحة ,, قصتك دى ذكَّرتنى صاحبى
عبدالله محجوب زول سُكَّرة ,, جاء من الشغل وجاب معاهو النَّوامة
حقتو ومعاها كيس فيهو جدادة محمَّرة والمزة ختَّاهِن فى اوضة الجلوس
ودخل الحمام ياخد دُش عشان يجى يقعد بمزاج ,, بعد طلع من الحَمَّام
جاء لقى جقر مانع طالع فى التربيزة وفرفر كيس الورق وبهدل الجدادة.
عبدالله عاين ليهو بيمغسة وقال ليهو: بِلَّاى شوف الـ مـ عفِّن ده ,, ماتقعد
تضرب معاى كاس؟

Post: #225
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 04:24 PM
Parent: #224

Quote: تحياتي عذالدين
وحبابك
لا والله لم يكن قولي قدحا في ود المدير ابدا .. ولم يدر بذهني تدينه او عدم تدينه .. بل هو مجرد مزاح محبة فيه وود
واعتذر ان كان قد نظر لقولي كما ردك
وانك من الذين اوادهم لكما المحبة

لا ابداً ياعبد الحفيض ,, ماتبقى زول حساس كدى الحساسية دى بتلحِّقك
الهاتيشكو بتاع عبدالرحيم ده ,, ود المدير ده زول محبوب زى ما انت قلت
ومهبوش فى نفس الوكت ,, وعزالدين عاوز يقول فيهو شهادة حق
من معزتو ليهو ,, فلقاها مناسبة ,, اصبر شوفو نامن يجى بقول شنو
كان ماخلاك تضحك نامن تبدو نواجذك شنب ودالمنسى ده يقوم فى
ضب عجين ,, كلامك واضح مادايرلو شرح وود المدير آخر زول يأوِّلو

Post: #226
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 04:31 PM
Parent: #225

Quote: لا .. لا... يا ود الفاضلابي ومعقولة اليابانيين يغلطوا في دي...

غايتو يا اميرة انا مانى عارف إنت صاح ولا لا ,, لكن غايتو
البعرفو الكلب ده ربنا رايدلو شهرة ,, يكون من سلالة كلب اهل الكهف؟

Post: #227
Title: Re: فنجان جبنة ولمة ناس حلوين
Author: عبدالحفيظ ابوسن
Date: 21-09-2015, 05:23 PM
Parent: #226

بعيدا من القهوة .. عندي عمي وقت شبابو بطشم وهو اصغر اعمامنا .. ابوي اجر ليهو مع جماعة ووصاهم عليهو .. اها ابوي بسألهم كيف فلان دة
قالو ليهو
ما شاء الله تبارك الله .. قدر ما نشوفو نلقاهو بصلي
وهو كان صحبي .. انا شافع صغير وهو عندو كارو حصان .. وانا عاجباني قصة اركب معاهو دي .. وبديني السرع اسوق مرات وهو يقنب يدوبي
اها سألتو
انت يا عمي حكاية صلاتك دي ما واقعة لي .. كنت مصلت وهو زول حلو
قال لي يا ولدي المعرصين ديل انا شايفهم بتاوقو لي بالحيطة وانا قدر ما اسمع حركتم بسوي لي ركعة
واها العرقي وين
خاتيهو في ابريقي

Post: #228
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 08:45 PM
Parent: #227

Quote: والله بوست باسطة بس

شكرا الفاضلابي وباقي الآفاضل

وشكرا أميره التي دعتنا لهذا الجمال المترع

وسنعود بعد ندوزن معكم

عشان ما نعرض خارج الحلبة

هلا وغلا بودالكباشى ,, (الكباشى ده My last name)
عليك الله كان ماجيت دوزنت معانا هنا ,, كلامك السمح الـ قاعِد
تكتبو فى بوستاتك داك كلو متابعينو بس مابنحب نتداخل عشان
مانخرب الرصة ,, فياخ تعال دوزن معانا ,, نحن هنا موسيقتنا
عفوية ما دايرالا علام ,, آلاتنا من كل بلد فى السودان تلقى عندنا
الطنبور والدلوكة والشتَم والوازاة وام كيكى والرق والطبلة والزمبارة
والقرع ,, الخ ,, بس انت تعال إن شاء الله تنقرش بى كبريتة.

Post: #229
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 09:04 PM
Parent: #228


هدية للفارس العبيد ودالطيب ,, وودالخال المحرب
غير كدى ياود العبيد مابنقدر نجازيك ,,

Post: #230
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 09:21 PM
Parent: #229

Quote: قبل ان ابدأ العمل اخذت قهوتي وبدأت احتسيها بمزاج وانا أستمع (للدِسبآتشر) وهي
توزع في (الكوّلآت). الكوّلآت جمع كوّل حسب مصطلحاتنا كسودانيين، فنحن نقوم
بتعريب اللغة الإنجليزيّة قدر الإمكان حتي تتناسب وظروف المهنة التي نؤديها،

البيبى سيتر بتاعة اولادى يمنية ,, مرة مشيت أجيبهم من عندها لقيتا عاملة شمطة مع الولد ,,
الحاصل شنو ياحاجة؟
قالت لى ها دا خالد قد جزَّع الأبواك ,, (جمع بوك)(Books)
مرة ام خالد كانت إجازة ومامشت جابت الولاد من اليمانية
لما انا رجعت من المكتب المساء ,, لقيت ليك اليمنية
زعلانة واتاريها عندها خبر انو ام الاولاد كانت إجازة
فقالت لى إنت امهم اليوم قد هى مأَوِّفة ,,(Was she off today )
تقول لى كولات ,, ياودالمدير؟ دى بس زى هورسى مى رايد يو
خرطوم بلاس بياستر تو ,, ده واحد عتَّلى بتكلم انجليزى مع خواجة

Post: #231
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 11:15 PM
Parent: #230


هييييع ودشيقوق اطرا باص الروصيرص ,, والعزازة وحريرى ,, والفزعة
فى خريفاً خُوادة وقعونجو يسوى الغوق غوق

Post: #232
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 21-09-2015, 11:25 PM
Parent: #231

ود بلة وشيقوق ود البوش غتسوا وين ,, ووين الككو الفجخ الطين؟

سميه الحسن طلحه ومني خوجلي وفاروق حامد وابوبكر سيد احمد ونور الهادي ,, ضيوفك يا بت ابحريرة ضيوفنا ,,
ومرحب بيهم وكان ماشالُن البوست نفتح ليهن ويب سايت مخسوس ,,

انتو بت عمسيب دى اوعكُن تكون خجلانة من الغزل القلناهو فيها فوق ده ,, عاد نكضِّب ده الصُّح قلناهو.

Post: #233
Title: Re: فنجان جبنة ولمة ناس حلوين
Author: معاوية المدير
Date: 21-09-2015, 11:36 PM
Parent: #232

يا ود الفحل عبد الحفيض دا أصلو ما عندو في عقيدة، لكن خلّو علي
اكان ما سختو ليك شنب ود المنسي يقوم في ضب عِفين، ضب العجين
الهيّن دا !، انا ولدك يا اب مدريس .


يا الفاضلآبي أمسك مني الجماعة ديل ...

Post: #234
Title: Re: فنجان جبنة ولمة ناس حلوين
Author: معاوية المدير
Date: 22-09-2015, 05:21 AM
Parent: #233

Quote: والشَّن هي القربة القديمة


Quote: معنى شَنَّ في المعجم الوسيط ـِ شَنًّا: يَبِسَ، وأَخْلَق. يقال: شَنَّت القِرْبَة،
وشَنَّ الجمل من العطش ونحوه. وـ الماء شنيناً، وتَشْناناً: تقاطر. وـ السائل ـُ شَنًّا:
صبّه متفرِّقاً، يقال: شنَّ الماء على الشراب، وشنَّت العين الدمْع. وـ الغارة على
عدوِّه: أغار عليه من كل ناحية.( أَشَنَّ ): شَنَّ.( شَنَّنَ ) السِّقاء أو الماء: شنّ.(


أها، شفت يا ود المقدم !، عشان كدي انا قُتلك سوقني معاك اللآخُد لي قعدة في البادية
كان لساني دا يطلُق . الرسول عليه أفضل الصلآة وأتمّ التسليم أرسله عمه إلي بادية
بني سعد بن بكر، والعرب كانوا يفعلون ذلك لفصاحة أهل البادية حتي ينشأوا فصيحين .
يا ود المقدم نحن ناس ضفاف النيل تمسكنا من اسوان لآمن تجي الخرتوم لغتنا ما عربية
فصيحة، لكن كان سألت من اللغة العربية الجد فهي في البادية، اتحسّر علي عمري إذ
أنني لم اقضى ولو بضع منه في البادية، فهنيئاً لك أخي .

قالوا في المقالة، أهلنا الرباطاب بيرسلو وِلآدُن الخلا عشان يتعلمو الوصف، والرباطاب
ناس وصافين كما هو معروف، والناس بيقولوا عليهم سحارين، اي عينُن حآرة . أها
قالوا الرباطابي ولدو وكِت وصل تسعة سنين لبسو جلآبية ؤُ لفالوا عِميمة، ؤُ مرقبو
موديهو الخلا، في اسنا ماهُن ماشين لآقتُن أُم دِريقة (ابو القدح) مدخلآ راسا ؤُ كرعيها
في جسما، أها الولد اوآت شافا قال لي ابوهو، يابا دِي شِني البلآ الكوريك العودو
ناصل ؟! . ابوهو طوالي رجعبو اب حمد . الجماعة قالولو، الجنا جِبتو صآد مالك ؟.
قالهم، علي اليمين دا يقعدلو يومين في الخلآ يعدمكم نفاخ النار ...

Post: #235
Title: Re: فنجان جبنة ولمة ناس حلوين
Author: الطيب شيقوق
Date: 22-09-2015, 05:37 AM
Parent: #234

سلام اهل اللمة الطاعمة

ود اب سن

Quote: بعيدا من القهوة .. عندي عمي وقت شبابو بطشم وهو اصغر اعمامنا .. ابوي اجر ليهو مع جماعة ووصاهم عليهو .. اها ابوي بسألهم كيف فلان دة
قالو ليهو
ما شاء الله تبارك الله .. قدر ما نشوفو نلقاهو بصلي
وهو كان صحبي .. انا شافع صغير وهو عندو كارو حصان .. وانا عاجباني قصة اركب معاهو دي .. وبديني السرع اسوق مرات وهو يقنب يدوبي
اها سألتو
انت يا عمي حكاية صلاتك دي ما واقعة لي .. كنت مصلت وهو زول حلو
قال لي يا ولدي المعرصين ديل انا شايفهم بتاوقو لي بالحيطة وانا قدر ما اسمع حركتم بسوي لي ركعة
واها العرقي وين
خاتيهو في ابريقي




هههههههههههههههههها مسنووووووووووووح تكون نجرتها من راسك دا



الفاضلابي

ياخ نزل لينا بنات بص الرصيرص

Post: #236
Title: Re: فنجان جبنة ولمة ناس حلوين
Author: عبدالحفيظ ابوسن
Date: 22-09-2015, 06:03 AM
Parent: #235

هههه
لا والله يا ود شيقوق
عمي دة زول نوادر وطرف ومزاج
حكيت ليكم عن سرعة بديهتو قبال كدة
قاعد مع ابوي في الدكان .. جاهو زبون رابط يدو اليمين بي طاب . ابوي سألو كعادة سودانية اصيلة
مال عدوك . يدك مالها
قال ليهو
جاني حرامي وقمت عليهو ضربني
عمي نط طوالي سألو
دحين الحرامي دة اعسر ؟
قال ليهو لا
سألو سكاك؟
قال ليهو لا
عمي قال ليهو
حرم انت الحرام ( كان يكثر من حليفة الطلاق .. مرة سألتو بطلق كم مرة في اليوم قال لي طلق مية )
حرم انت الحرامي .. تلبت لي ناس وسكوك وضربوك
ههههه العجيب في الامر الزول مرق فات بس

Post: #237
Title: Re: فنجان جبنة ولمة ناس حلوين
Author: درديري كباشي
Date: 22-09-2015, 07:04 AM
Parent: #236

حبيبة كلبي
خلاص مدام آخر موضوع مفتوح داير هو عن الكلاب أنا عندي حكايتين مع الكلاب ممكن أوردهم هنا بل حا أعيد صياغتهم بنفس لغة الحوار.
كنت في المرحلة المتوسطة مولع جدا بتربية الحيوانات ( المتاح منها طبعا ) لأنه الاغنام والآرانب تعد من القوارض المضرة في عرف الأسرة ..الارانب تحفر الأرض والأغنام تقرض الكسرة . أصبح الدجاج والبط والحمام .. وسمحت لي الاسرة بأقتناء كلب .. كان كلب شكله جميلة يبدو عليه من أصول أوروبية شعر كثيف لونه أقرب للبرتقالي مع بقع بيضاء .. دللته وأفرطت . حتى شب فأصبحت له هيبة وقدلة في الحي ..
في ذات الوقت كان عندنا جار ضابط جيش معاشي له هوايتين متناقضتين تماما هواية إقتناء الكلاب وكذلك هواية قتلها .. فهو عندما يتوق لأيام ضرب النار يحمل بندقيته الخرطوش ويجوب الحارة متهما بعض كلاب الحي بالسعر (بأعتبار أنه خبرة ) .. يا جماعة كلبكم دا ظهرت عليه علامة السعر لازم نبيده .. وطبعا الناس كل شئ ولا نوع هذه البلاوي يوافقون على قتل كلبهم يخرجوه له في الشارع فيصيبه بطلق في رأسه فيمضي القاتل مرتاحا الى أن تحين ( خرمة ) جديدة يكون ضحيتها كلب آخر .. لطالما تحرش بكلبي وحاول يقنع الوالد بأعراض سعره .ألا أن تصديت لمحاولاته بكل ما أملك من مقاومة .
بما أن بيتنا يقع في تقاطع شارعين رئيسيين فهو كان قرب محطة مواصلات استراتيجية .. يوم ما أنا وكلبي واقفين في الشارع . جات ( صبية ) يافعة ترتدي زي الكراتيه الأبيض زادها حسنا وقفت في ناصية البيت .. لا حظها الكلب مشى ناحيتها بكل خبث يلعب بزيله مرحبا لم يهاجمها أو ينبح .. تبسمت ورحبت به .وأصبحت تلاعبه . .ترفع يدها الى أعلى وهو يحاول اللحاق بها فتضحك بمتعة وتحس أن الكلب نفسه كان يضحك مستمتعا .. ووقفت من بعيد اراقب فقط واشاركهما الابتسامات .. الى أن أتت سيارة الترحيل وحملتها ملوحة للكلب الذي ودعها بدوره وعاد الي . ومن يومها أصبح برنامج العصرية للكلب يذهب وينتظرها في ناصية الشارع الى أن تأتي وتبدأ نمرة اللعب والمداعبة وتتخلها جريات قصيرة مع ضحك مموسقة تصيب كل من يشاهدهما بالنشوى .
زوج البط أفرخ عن تسعة فراخ جميلة بدأت باللون الأصفر ثم بدأت تكبر مكتسية اللون الآبيض .. وكانت تسير خلف والديها في موكب مهيب .. شغلني عن الكلب وصديقته .. فأصبح يخرج العصريات ينتظرها يقضي لحظاته ثم يعود ..
بعد فترة لاحظت أن فراخ البط بدأت تتناقص .. كل يوم أو يومين يختفي فرخ ما . سألت ناس البيت دورت لم أعرف السبب وأستبعدت السرقة لآنه أصلا لا يجرؤ أحد على سرقتنا في وجود ذاك الكلب .. يوم ما كنت مريض لم أذهب للمدرسة . مواعيد الأفطار سمعت صوت صراخ أسرة البط خرجت لآستقصي السبب أكتشفت أن الكلب (الخائن ) خطف أحدى الفرخات وجرى لم يعبأ بصرخات أمها الثكلى . .خرجت من باب الشارع أراقب تصرف الكلب وكاد الغضب أن يفجرني .. أخذ الفرخة وجرى بعيدا جدا .. وعاد بعد ساعة ..أذ أتضح أن هذا الكلب أبن الكلب كل يوم يفطر ببطة ولا أجعص عمدة في الصعيد ..دون أن أشاور أي أحد توجهت مباشرة لعمنا قاتل الكلاب .. طلبت منه الحضور لقتل هذا الكلب الخائن لم أشاور أحد من أهل البيت .. وهو ( ما صدق ) بسرعة دخل الى بيته وأحضر البندق الخرطوش .يبدو أنه خاف أن أغير رأيي حضر معي وطلب مني أحضاره الى مكب النفايات ( الكوشة ) .. رحت ناديته . الغريبة أن الكلب كان يكره قاتل الكلاب ويعرف نواياه وكان من أن يراه يشيعه بالنباح حتى يختفي .. لكن في ذاك اليوم بدأ مستسلما لم يحوجنا الى جره .. مشى معي حتى أعتلى كومة النفايات وأنتظر مصيره .. أكثر صورة أثرت في وكدت أن أغير رأيي رفع رأسه بكل شجاعة نظر الى كأنه يودعني ويعتذر .أصابه القاتل بطلقة في رأسه فسقط جثة هامده على مكب النفايات ..
عدت الى البيت تتنازعني مشاعر متباينة بين حزني على فراقه وراحتي في القصاص لحق البطات البريئات اللاتي رحن ضحية تحت شعار ( حاميها حراميها )
لم يلومني أحد من أهل البيت على قتله كذلك لم يواسيني أحد لآنهم شعروا بأن الموضوع بالنسبة لي لا يحتمل النقاش لا في سلبياته أو ايجابياته .. في النهاية العدل يجب أن يكون هو سيد الموقف يعلو ولا يعلى عليه .
في العصر خرجت لأرى رد فعل لاعبة الكراتيه .. حضرت ووقفت في الناصية وبدأت تتلفت تبحث عنه وفي عينيها أسئلة طرحتها في صمت وبنظرتها البريئة لم تجد مني سوى ابتسامة باهتة لم تلتمس منها الرد ولم تستطع أن تخفي حزني البائن . وكذلك تكرر النظرات المتسائلة في اليوم التالي والذي يليه تتلفت الى أن تركب في مركبتها التي كانت تنتظرها .. لم أبادر ولم أنطق وأقول لها أن صديقك ذهب الى حيث يجب أن يكون ولن يعود اليك أبدا . وكذلك لن يعد الي .. ترك فراغا لم يعبيه الا الشعور بأحقاق الحق وأنصاف المظلومين .. وهو كذلك لو كانوا يعلمون .

Post: #238
Title: Re: فنجان جبنة ولمة ناس حلوين
Author: عزالدين عباس الفحل
Date: 22-09-2015, 07:36 AM
Parent: #237


عبدالحفيظ ابوسن ،
،،،،،،

.
..

أحلي صباح .
إنت إنسان محترم ومهذب ،
القصة كلها مزاح برئ ،
من ود المدير
أشواقي ،
،،،،

.
..






عزالدين عباس الفحل
ابوظبي

.
..

Post: #239
Title: Re: فنجان جبنة ولمة ناس حلوين
Author: عزالدين عباس الفحل
Date: 22-09-2015, 07:40 AM
Parent: #237

معاوية المدير
،،،،،،

.
..

أحلي صباح .
عبدالحفيظ ابوسن ،
دا إنسان محترم ومهذب ،
ما تخاشن ساكت ،
من حسة قمت علي شراب الشربوت ،
قبل العيد ،
عالي الـ Concentration
أشواقي ،
،،،،

.
..






عزالدين عباس الفحل
ابوظبي

.
..

Post: #241
Title: Re: فنجان جبنة ولمة ناس حلوين
Author: الفاتح ميرغني
Date: 22-09-2015, 09:41 AM
Parent: #239

Quote: لا .. لا... يا ود الفاضلابي ومعقولة اليابانيين يغلطوا في دي...
ونحن بنعرف ان اليابانيين هم اذكى البشر .. وانت شوف براك التكنلوجيات البيصنعوها
كل يوم ...
وبعدين ود منصور بيقول ليك الكلب ده كانت بينتظر صاحبه كل يوم من سنة 1923م إلى 1925م
في المحطة .. ولمن غاب واصل الكلب في انتظاره 10 سنوات... وطبعا المعروف ان الكلب مشهور بالوفاء
وانا قريت قبل كده ان في كلب كان بيرقد امام قبر صاحبه حتى مات....
ونسالأ الله ان يعود مثل هذا الوفاء بين الناس... وهذا زمن قد قل فيه الوفاء
والله يديك الصحة والعافية

عزيزنا الفاضلابي اتفق مع المقتبس الفوق ده وابصم بالعشرة.
وابصم بالعشرة دي ذكّرتني قضاة المحكمة العليا زمان، كان لمن الواحد منهم يتفق مع رأى زميليه في الدائرة يقوم يكتب concur ، وكنا بنترجمها" ابصم بالعشرة"

ارجو مطالعة هذا الخبر الذي نشرته نشرته القدس العربي قبل يومين وهو بمثابة تاكيد لما ورد في المقتبس اعلاه:
Wowsudan.jpg Hosting at Sudaneseonline.com


محبتي

Post: #240
Title: Re: فنجان جبنة ولمة ناس حلوين
Author: الطيب شيقوق
Date: 22-09-2015, 09:19 AM
Parent: #200

://
Quote: امام تمثال الهاتشيكو مع البروفيسور على يوسف، استاذ الفيزياء بجامعة السلطان قابوس. خلال زيارته لليابان للمشاركة في الإجتماع السنوي للرابطة الدولية للفزيائيين.وهو عبارة عن إجتماع يهتم بقضايا الفيزياء وآخر النظريات والتطورات الجارية في هذا العلم الحيوي.


والله يا ود العم ميرغني دي فاتت عليك

ياخ كيف تخلى البروف يفوت منك بدون ان تجرى معه مقابلة صحفية ؟



Post: #242
Title: Re: فنجان جبنة ولمة ناس حلوين
Author: طارق جبريل
Date: 22-09-2015, 12:17 PM
Parent: #240

ازيكم آآآآآآناس

Post: #243
Title: Re: فنجان جبنة ولمة ناس حلوين
Author: عبد المنعم سيد احمد
Date: 22-09-2015, 02:32 PM
Parent: #242


Post: #244
Title: Re: فنجان جبنة ولمة ناس حلوين
Author: ست البنات
Date: 22-09-2015, 02:43 PM
Parent: #242

عليك الله يا طارق ود عمي جبرين مالك بقييت مسيخ كدي !

أسع من عامناول نكوركلك يعني دا سلامك لنا !

وينو نضمك داك السمح !

باقيللي جابتك القنديلة والشاي ! انت متين كوتا بيطيني أ طارق !!!

ان بقيت ما عندك حبر حللك ظهرة اكتبها !

ست البنات.

Post: #245
Title: Re: فنجان جبنة ولمة ناس حلوين
Author: عبد المنعم سيد احمد
Date: 22-09-2015, 03:36 PM
Parent: #244

والله ياود جبريل
بعد نضم ست البنات..ماعندك كلام تب
غير تغوص فى العميق..
وتمرقلنا بى قونديلتين تلاتى
ياهلا بيك
ابقى داخل لى جوه...
ود عمنا جى البلد
وباقى هو من بطان الخرطوم
عندنا قريبة لينا مرة مبروكه
رسلوه الصباح..يجيب منها الروب
بعد ملتلو بستلتو روب
قالها دايره كم
قالتو ماقعد نبيعو آولدى
ده قعد نديهو للحبان.



Post: #246
Title: Re: فنجان جبنة ولمة ناس حلوين
Author: عبد المنعم سيد احمد
Date: 22-09-2015, 03:39 PM
Parent: #245


Post: #247
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 22-09-2015, 04:15 PM
Parent: #246

Quote: ازيكم آآآآآآناس

غايتو ياود جبرين زى ماقالت لك ست البنات جنس مساخة
التقول ياقول ودالمدير جيت راكب قطر كريمة وكَرَمَكْ فى اب حَمَد
ياخ ,, تجى لاكع بى حمارتك لاتِدَّلى تشربلَك فنجان جبنة ,, لاتاكُلَّك
صفُّورى ,, ولاكوز موية من الزير حتى ,, امانا ما اتلَوَّمت ,, ياخ
انا لى كم شهر اشيل واشكِّر فى الشايقية وست البنات تشهد ,,
ياخ عليك ستى مريم كان مانزلت واخدتلك معانا خشم خشمين

Post: #248
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 22-09-2015, 04:17 PM
Parent: #247

ياخوانا وين ايرنست ,, الزول ده انا حاسى عندو حكى كتير

Post: #249
Title: Re: فنجان جبنة ولمة ناس حلوين
Author: Basamat Alsheikh
Date: 22-09-2015, 05:09 PM
Parent: #248

جينا نطل عليكم .. واليوم اجازة عشان نؤكد لود حلتنا ود الفاضلاب باننا متابعين معاكم الحكاوي السمحة
حتى مع زحمة الواجبات...
وشكرا عبد المنعم سيد احمد لقصيدة ود بادي .. والحقيقة د. ود بادي شاعر مترع بريحة الوطن وقصائده دائما
بترجعنا للوطن وتصيبنا بمرض النوستالجيا Nostalgia ( الحنين للوطن والبكاء على ذكريات الطفولة)..
وكمان يا ود الفاضلابي بقينا ما بنستسيغ قهوة الاستاربكس بعدما شمينا ريحة الجبنة بالهبهان
وانا شايفة ضيوف ما شفناهم قبل كدا ومعاهم حكاوي سمحة..
ودمتم بالف خير وصحة وعافية

Post: #250
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 22-09-2015, 08:10 PM
Parent: #249

Quote: ود شيقوق امرق من هنا، تمرق بلآ نِعلآتك ...

ياود المدير نقول شنو عاد ,, مجبورة خادم الفكى على الصلاة

Post: #251
Title: Re: فنجان جبنة ولمة ناس حلوين
Author: عفاف أبو حريرة
Date: 23-09-2015, 02:08 AM
Parent: #250

يا ناس اللمه سلام عليكم
وكل سنه وانتم طيبين

Post: #252
Title: Re: فنجان جبنة ولمة ناس حلوين
Author: Abdelrahim Mansour
Date: 23-09-2015, 03:51 AM
Parent: #251


ضبيحة حناكيش

المشهد (1)
الأم وهي تحدث ابنها.. تامر حبيبي: بابا ضرب قال ما جاي يعيد معانا... وقال لي خلي تامر يمشي يسوق معاه زول يجيب ليكم الحروف 🐑 🐑 🐑
تامر: اوه ياماما لكن ... حسي الداير خروف منو ؟
الام: معليش حبيبي بس بكرة العيد ولازم يكون في لحمة في الفطور كان جونا ناس جدك يفطروا معانا ... وبعدين عشان بابا يفرح انك كبرت وبقيت راجل 👳 بعد أتخرجت من الجامعة ..
تامر : بس يا ماما انا لا داير ابقى راجل ولا حاجة .. انا ونونا اختي دي بناكل هوت دوج 🍔🍔 واندومي وخلاس
نونا: اي يا ماما عليك الله ما دايرنو .. انتي عارفاني بخاف منو موت الخروف دا 👿👿 تامر : وانا ذاتي يا ماما بخاف منو 😈😈 مرة في عرس كوثر قريبة بابا ديك في العيلفون جيت داخل في حوش بيتهم .. لما قال لي ميييييييييييع لما حسيت قلبي وقف 💔💔 ...
نونا : ههه ها العوير دا ديك غنماية البتقول مييييع تامر : الخروف زاتو بقول مييييع ... انتي العرفك شنو ؟
الام: كان غنماية كان خروف قوم جيبو حبيبي قبل الدنيا تبقى حر ...
تامر : خلاس بضرب لي هيثم ود عمتو فافي يمشي معاي ...
وهكذا بعد الحمام ارتدى تامر تي شيرت نصف كم يبدو كانه مقاس اصغر من مقاس جسمه وبنطلون اسود وكذلك فعل هيثم وتشابها في كل شئ حتى في تلميع الشعر بالجل وتسريحه الاسبايكي الشبابية .👦👦
وفي عربة هيثم الفارهة والمكيفة 🚘
وموسيقى الراب تصدح وهما يتمايلان ويرقصان ويغنيان على انغامها ... كانا يشقان شوارع الخرطوم يسألان عن مكان بيع الخراف ... فكلاهما لا يعرفان اين تقع مثل تلك الاماكن ولم يسألا والدتيهما عنها ... وبعد جهد واستفسار عدد من الاشخاص وصلا الى زريبة" الخراف...

مشهد (2)
هيثم مندهشا 😮
بالله هي دي البسموها زريبة !!! انا كنتها قايلها زي المول ولا الهايبرماركت حسي ننزل كيف في الحتة الوسخانة دي ؟ بنتوسخ .
تامر :كدى ما ننزل ننادي لينا اي واحد من الرجال الوسخانين ديل يجيب لينا واحد ...... يا اونكل ... يا اونكل ... لو سمحت يا اونكل .. عايزين لينا واحد اسمارت كدا و استايل للعيد وحينما لم يرد عليهما احد ولم يفهمهما احد ... اقتنعا ان عليهما " كفكفة" بنطالينهم ووضع بعض مناديل الورق ككمامات ومغادرة السيارة 😷😷
وهكذا دخلا الزريبة كمن يدخل الى عالم الديجتال والدهشة تملاهما ... وتجمع حولهما العديد من بائعي الخراف كتجمع الاسود حول فريستها... وتعالت الاصوات و"الجرجرة" ... اهلا شباب تعالو لاجاي ...حبابكم الف .... اتفضلوا ...طلبكم عندي .. خروف واحد ولا عايزين كم خروف ؟
تعالو اناس النبايعكم ....وبين كل لحظة واخرى يعلو صوت تامر بانفعال... يا اونكل .. يا اونكل لو سمحت ما تلمسني ... انا براي جسمي مقشعر .. ما تلمسني بايديك دي وسخانة ... اووه لو سمحت اتكلم معاي ساكت ما تمسكني ... دا ما اسلوب خالص ... وهكذا بعد معاناة توقفا عند احد البائعين بعد ان اقنعهما بمعاينة ما يملكه من خراف انجليزية جميلة القوام ... وتأكيدا لجمالها احضر لهما احد الخراف ليفتح فمه امامهما عارضا لهما النظر الى اسنان الخروف قائلا ... شوفو حرم خروف صغير ورخص ما فيهو اي كلام ... شوفو سنونو دي كيفنها ... وتامر وهيثم يتحاشان النظر الى فم الخروف وابتسامته القصرية فيجيب تامر : خلاس خلاس عمو اقفل ليهو خشمو دا ... مخيف .... فيرد البائع مخاطبا هيثم : اجنا حرم عليك الله تعال جس الضنب دا شوف اللحم رخص زيكم كدا .... تعال انت يا جنا جسو ... ما تخاف ...
هيثم :ايخي يا اونكل انا امسكو من الحتة دي ... تامر .. ممكن يا عمو نصورو بموبايلي وارسلو لماما بالواتساب تشوفو لو عجبها بنشتريهو ... وبعد موافقة صاحب الخراف رغم عدم استيعابه لاي كلمة من كلمات تامر ... فقام تامر بتصوير الخروف وارسال صورته عبر الواتساب لامه ... وبعد الاتصال بها ومشاهدتها للصورة ابدت موافقتها ... قايلة برافو تامر حبيبي ذوقك حلو .....تامر ... اوكي يا اونكل خلاس ماما قالت كويس ... بس كدى اول خليني اقيف جنبو واتصور ... هيثم كدى تعال صورني جنبو عشان عايز انزلها بكره في الفيسبوك اعمل بيها big Surprise للقروب ... وبعد عدة لقطات حول الخروف ... قاما بدفع السعر خمسة مليون جنيه دون مفاصلة ودون مناقشة بطريقة اذهلت الخروف وبائع الخروف والسماسرة الحاضرين بالسوق ... وهكذا تم تحميل الخروف لهما في "ضهرية" العربية .... وقبل ان يغادرا "الزريبة" تذكرا معضلة اخرى لا تقل عن معضلة اختيار الخروف الا وهي كيفية انزال الخروف من السيارة لاحقا ومن الذي سيقوم بتلك المهمة ... فتامر يخاف ان يمسك بالخروف بيده ... وكذلك هيثم ... هيثم.. والحل يا تامر بعدين حنعمل شنو والبنزلو منو ...تامر ... انا بتذكر بابا زمان كان كل ما يجيب خروف بجيب معاهو جزار وسخان زي ناس الخرفان ديل وبشبههم .. بجي يضبحو ويدينا ليهو لحم بس ... كدى نكلم عمو اللي اشترينا منو دا يشوف لينا جزار يمشي معانا.... وهكذا تبرع احد الموجودين للذهاب معهم بعد الاتفاق على مبلغ 300 الف جنيه مقابل اداء المهمة المطلوبة ... وهكذا غادرا فرحين بنتيجة تلك المغامرة التي خاضاها ... ومن جديد صدحت بالسيارة اغاني الرابي الا لا يقطعها الا صوت الخروف من "ضهرية" السيارة ينادي "باااااااع" بايقاع يتماشي مع الاغنية ويصبح جزءا منها .. وصوت الجزار وقد اعجبه هواء المكيف وسرعة العربة هيييييييع


المشهد (3)
وما ان وصلا الى المنزل حتى هرول تامر الى المنزل فرحا متشوقا ليخبر امه عن مغامرته وتفوقه في اولى مهامه نحو الرجولة .. ولكنه لم يجدها بالمنزل ... فقال مخاطبا "الشغالة" : الماظ ماما وين ؟
الماظ : ماما ونونا قالو ماشين مشوار وجايين .... انت جبت الخروف ؟
تامر : ايوا جبتو ... شوفي في راجل برا ودي ليهو اكياس نايلون عشان يخلي فيها اللحم بتاع الخروف ... وبعد يخلص غسلي الحوش عشان انتي عارفة انا ونونا لو شفنا الدم بنخاف وتاني بالليل بتجينا احلام مخيفة .... وبعدين شوفي الماظ خليهو يشيل معاهو الراس.... والجلد.... والحاجات الجوة البطن دي كلها... والضنب.... بس يخلي لينا اللحمة ... ودي قروشو بعد ما يخلص اديهو ليها .... انا تعبان حاسس اني دايخ باخد لي رقدة ...وهكذا اندمج الجزار في تقطيع الخروف بمساعدة المالظ ... واستلقى تامر على السرير لاحساسه بالتعب والارهاق بعد ما عاناه خلال اليوم .... وهكذا عندما عادت الام ونونا من مشوارها وجدت تامر لا زال مستلقيا من شدة الارهاق والتعب ..الام: كر علي حبيبي .. الليلة تعبت من الشمس ... معليش حبيبي بخلي الماظ تعمل ليك عصير برتقال تقيل .. تعرف الخروف قبيل لما رسلت لي صورتو قمت طوالي رسلتها لابوك ... ما تتخيل فرح قدر شنو وقال هو proud منك .... الا الخروف ربطتوه وين لما دخلنا ما شفناه .. ما يكون البت الحبشية المطرطشة دي خلت الباب فاتح قام مرق
تامر : بانفعال رجولي ... يمرق شنو يا ماما عشان تعرفي ولدك بقى راجل ... جبت طوالي معاه جزار ....وقبيل ضبحو واللحمة ختتها الماظ في التلاجة ...الام : سجمي سجمي ضبحتو قبل العيد والصلاة؟
تامر ... يا ماما صلاة شنو .. عمو لما ضبحو ختاهو قال للقبلة وصلى عليه قال الله اكبر الله اكبر ... وبعدين مش قلتو بكرة دايرين لحمة ... اهو عندكم اللحمة ...الام: بحالة يأس واحباط ... يا نونا تعالي شوفي اخوك الضبح الخروف قبل العيد والصلاة ....نونا وقد حضرت مبدية اندهاشها واعجابها : wow يا تامر عملتها كيف دي ... amazing بقيت hero يا تامر ضبحت الخروف براك ... دي حا انزلها طوالي في الفيس ...وهكذا كانت صفحة نونا في الفيس في يوم العيد كلها تتحدث عن بطولة تامر في ذبح الخروف ... مع ابداء عدد من اللايكات والكومنتات من صاحبات وصديقات نونا ... بينما امتلات صفحت تامر والحالة الخاصة به بصورته مع الخروف وعدد من الكومينتات تشيد بشجاعة تامر وبسالته ...
رفعت راسنا ياتامر ...
ونفسي ابقى زيك ...
بطل يا تامر ....
رجل والرجال قليل
ولا زالت الام في حالة صدمة نفسية.

😄😄ضبيحة حناكيش 😄😄

🌹 كل عام و انتم بخير 🌹

*
**

Post: #253
Title: Re: فنجان جبنة ولمة ناس حلوين
Author: الفاتح ميرغني
Date: 23-09-2015, 01:10 PM
Parent: #252

Coffee.jpg Hosting at Sudaneseonline.com

Post: #254
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 23-09-2015, 07:47 PM
Parent: #253

اخ درديرى تحية طيبة ومرحب بيك مرة تانية
قصتك الدرامية مع كلبك والمصير الذى آل اليه
تذكرنى بـ هِرِّ ابي بكرٍ العلاَّف ورثائه ذلك الهِر
.
الحسن بن عليّ بن أحمد النهرواني، أبو بكر، ابن العلاف.شاعر عاش في بغداد،ونادم بعض الخلفاء، وكف بصره.
كان له هر يعيش في بيته.وكان الهر قد سطا علي حمام الجيران فظفروا به فقتلوه فرثاه ابن العلاف بهذه القصيدة.

يــــا هــــر فـارقـتـنــا ولـــــم تــعـــد وكــنـــت مــنـــا بـمــنــزل الـــولـــدِ
وكـيـف ننـفـك عــن هـــواك وقـــد كــنــت لــنــا عــــدة مــــن الــعــددِ
تـمـنــع عــنـــا الاذى وتـحـرسـنــا بالغـيـب مــن حـيـة ومـــن جـــرذ
وتـخــرج الـفــأر مــــن مكـامـنـهـا مـا بـيـن مفتوحـهـا الــى الـسـدد
يلـقـاك فــي البـيـت منـهـم عــدد وانــــــت تـلـقــاهــم بــــــلا عـــــــدد
لا تـرهـب الصـيـف عـنـد هـاجـرة ولا تـهـاب الشـتـاء فــي الـجـمـد
وكـــان يـجــري ولا ســــداد لــهــم امـــرك فـــي بيـتـنـا عـلــى ســـدد
حـتـى اعـتـقـدت الاذى لجيـرتـنـا ولـــــم تــكـــن لـــــلاذى بـمـعـتـقــد
وحـمـت حــول الــردى بظلـمـهـم ومــن يـحـم حــول حـوضـه يــرد
وكــــان قـلـبــي عـلـيــك مـرتــعــدا وانــــت تـنـســاب غــيــر مـرتــعــد
تــدخـــل بـــــرج الـحــمــام مـتــئــد وتــخـــرج الــفـــرخ غــيـــر مـتــئــد
وتطرح الريش في الطريق لهـم وتـبــلــع الـلــحــم بــلـــع مــــــزدرد
كــادوك دهــرا فـمـا وقـعـت وكـــم افلـت مـن كيـدهـم كـيـد مجتـهـد
حــتــى اذا خـاتـلــوك واجـتــهــدوا وسـاعــد الـنـفـس كـيــد مجـتـهـد
صـادوك غيظـا علـيـك وانتقـمـوا مـنـك وزادوا ومــن يـصـد يُـصــد
لم يرحموا صوتك الضعيف كما لـم تــرث منـهـا لصوتـهـا الـغـرد
اذاقــك الـمــوت مـــن اذاق كـمــا اذقـــــــت اطـــيــــاره يـــــــدا بــــيــــد
كــأنـــهـــم يــقــتــلــون طــاغـــيـــة كــــان لـطـاغـوتــه مـــــن الـعــبُــد
يــامـــن لــذيـــذ الــفـــراخ اوقــعـــه ويــحـــك هـــــلا قـنــعــت بـالــقــدد
لا بــــارك الله فــــي الـطـعــام اذا كـان هـلاك النفـوس فـي المـعـد
كــم اكـلـة داخـلـت حـشـا شــره ٍٍفـأخـرجـت روحـــه مـــن الـجـسـد
كـــأن عـيـنــي تــــراك مـضـطـربـا فـيــه وفـــي فــيــك رغــــوة الــزبــد
وقـد طلبـت الخـلاص مـنـه فـلـم تـقــدر عـلــى حـيـلـة ولـــم تـجــد
عـشـنـا بـخـيــر وكــنــت تـكـلـؤنـا ومـــات جـيـرانـنـا مــــن الـحـســد
قـد كنـت فـي نعمـة وفــي سـعـة مــن الملـيـك الميهـمـن الـصـمـد
قــد كـنـت بــددت شملـهـم زمـنــا فاجـتـمـعـوا بــعـــد ذلـــــك الــبـــدد
وفتتـوا الخبـز فـي السـلال فـكـم تــفــتــت لـلـعــيــال مـــــــن كـــبــــد
ومــزقـــوا مـــــن ثـيـابــنــا جــــــددا فـكـلـنــا فـــــي مـصــائــب جــــــدد
فاذهـب مـن البيـت خيـر مفتقـد واذهـب مــن الـبـرج شــر مفتـقـد
الــم تـخـف وثـبـة الـزمــان وقـــد وثـبـت فــي الـبـرج وثـبـة الاســد
عـاقـبــة الـبــغــي لا تــســـأم وان تـــأخـــرت مــــــدة مــــــن الـــمـــدد
مـن لـم يمـت يومـه يمـت غــدها و من لم يمـت فــي غــد فبـعـد غــد
والــحــمـــد لله لا شـــريــــك لـــــــه فـكــل شــــيء يــــرى الــــى امــــد

Post: #255
Title: Re: فنجان جبنة ولمة ناس حلوين
Author: Basamat Alsheikh
Date: 23-09-2015, 10:00 PM
Parent: #254

عزيزي الفاضل ود جيرانا ود الفاضلاب
برضي جيت هنا في بيتكم نشكرك عشان انت حميت حقوق الجار
في البوست التاني داك البخص الحاج الشنق نفسه...
وانت فعلا طبقت كلام اسماعيل حسن ...يخوضو النار
عشان حقوق الجار....
وانا بتذكر ان اميرة بت مصطفى دائما كانت بتقول ان ود البوش ده
لازمن ابوه شيخ قبيلة وود قبائل لانه مليان كرم وشهامة ومروءة وهي
جابت الكلام ده من قصة السوداني المسكين في السعودية والذي استنجد
بهم...
وهسع انا بقول ليك انت برضك مليان شهامة ومروءة ولازمن انت ود قبائل
وشهامتك شهامة شيوخ القبائل...
ودمت بالف خير وصحة وعافية
وطبعا المسنوحة بت مصطفى مختفية ومزنوقة بزحمة شغل
في الاسبوعين القادمين زنقة الترزي يوم الليلة ..يوم وقفة عرفات
ودمت بالف خير

Post: #256
Title: Re: فنجان جبنة ولمة ناس حلوين
Author: Basamat Alsheikh
Date: 24-09-2015, 05:47 PM
Parent: #255

كل عام وانتم جميعا بخير وصحة وعافية
وربنا يحقق جميع الامنيات,,
ولقد سمعنا صباح اليوم .. صباح هذا العيد بالخبر الأليم بوفاة
اكثر من 700 حاج في مشاعر منى بالمملكة العربية السعودية
ونسأل الله ان يتغمدهم جميعا برحمته وعفوه فقد توفوا ملبين دعوة الله
ومهللين ومكبرين ولقوا الله فرحين مستبشرين فنالوا حسن الختام
بسمات الشيخ عبد الرحيم
اميرة مصطفى السيد

Post: #257
Title: Re: فنجان جبنة ولمة ناس حلوين
Author: Osman Musa
Date: 24-09-2015, 06:23 PM
Parent: #256

يا ود العم سلام
والعيد مبارك عليك وعلي أهلك شرق غرب وعلي ضيوفك الكرام .
وكل عام وأنت بخير وعلي خير .. و تقبل سلام أولاد عمك في أمارة أم القيوين . دولة الامارات العربية .

Post: #258
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 24-09-2015, 07:04 PM
Parent: #257

الاحباب ,, من جَمْ
بسمات بت الشيخ ,, ودالعم عِتْمان
كل عام وانتم جميعاً بخير ,, وكل الامانى الحلوة لكم ومن حواه جمعكم العامر ,,
ونسأل الله لكم ولنا العافية فى الدنيا وفى الآخرة ,,
ويابسمات يابت اخوى ,, العيد يتبارك عليك وكان مفروض اوجه
ليكن الدعوة إنت واللميرة واخياتك المعاك تجو تعيدوا معانا لكن
والله ظروف قوية حالت دون اتمام هذه الدعوة لكن خيرها فى
غيرها إن شاء الله وربنا يديم علينا الايام الحلوة.

امسكوا فى الدعاء ده قوى:
اللهم إنى اعوذ بك من زوال نعمتك وتحَول عافيتك وفجاءة نِقمَتك
وجميع سخطك >

ملحوظة أى دعاء يُقَدَّم له بالاستغفار ,, والصلاة على النبى والحمد والثناء على الله.
والى اللقاء إن شاء الله

Post: #259
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 25-09-2015, 04:19 PM
Parent: #258

شعيب بن حرب
هو شعيب بن حرب المدائني أبوصالح ، نزيل مكة ، ثقة ، عابد مات سنة ١٩٧ هـ.
الحسن بن صالح قال: سمعت شعيب بن حرب يقول: لاتجلس الا مع احد رجلين:
رجلٌ جلستَ اليه يعلِّمكَ خيرا فتقبل منه ، أو رجُلٌ تعلمه خيراً فيقبل منك، والثالث اهرب منه
.

Post: #260
Title: Re: فنجان جبنة ولمة ناس حلوين
Author: جمال ود القوز
Date: 25-09-2015, 09:45 PM
Parent: #259


Quote: سمح ياود القوز يعنى ارسِّلك مرسال خسوسى
ونرَكِّبو حمارة جدى ودالمك الما بيديها الا لمشوار مهم
ونقولك تعال اشرب معانا الجبنة وماتجى؟ الـ فيك انعرفت
تحياتى يارجل ياطيب وكل عام وانتم بخير



كل عام وإنت والأسرة بخير وعافية ..
وأضحى مباركـ عليكم ..
ولكـ تقديري المقيم ..
يازول وريف ..

الأحلى والأجمل من قهوتكـ ..
هو هذه الروح الشفيفة التي تسكنكـ ..
والأرواح جنود ربي ..
ولافكاكـ من سلطانها ..

عارف مع إنو أنا زول بندراوي ساي لكني أحب الحمير جداً ..
واعتبرها من الحيوانات الجميلة والمفترى عليها ..
بعدين حمارنا الدنقلاوي غالي وعالي ومشهود له بالخفه والسرعة ..
وكان ما كنت زول نشيط قطع شكـ بيغلبكـ تعتلي صهوته ..
وقبل ماتركب بيكون هو اتحرك وفاتك مسااافة ..
بعدين لا داير يدقو بي سوط ولا خلافه ..
براهو بيمشي وقلبو حار ..

على ذكر حمار جدكـ المكـ والمشاوير المهمة ..
أحكي ليكـ قصة حقيقية حصلت ..
قريبنا زول مسخوت وبتاع ( شربه ) ..
وداسيها وحريص على سره وإنه مافي أي زول يطّلع عليهو ..
طبعاً كل زول في البيت عنده حمارته الخاصة ..
ومافي زول بيسوق حمارة زول .. الا ماندر ..
أها ربك رب الخير تنكسر كراع حمار أبوه ..
اللهو شيخ متدين وراجل صارم وصعب جداً ..
أها قام الأب سرّج حمار الولد اللي كان وقتها بره البيت ..
وطلع بيهو المغربية .. قبل مشوار الولد المسائي المعتاد ..
قوم ياحمار الجن ويامتعود على مشاوير المغارب في تلك الانحاء من البلد ..
قوم سوق الشيخ لي بيوت مشهود لها بانها (طرمبات) وبيوت مش ولابد ..
وفي تلات مرات الحمار يودي الأب لي بيت ماياهو .. ويقيف قدامو ..
كلما الأب يهشو تاااني يمشي ويقيف قدام بيت تاني ماياهو ..
واتعددت مشاوير الحمار لتفضح مغامرات صاحبنا المتعددة كذلكـ ..
رجع الأب من مشواره زعلان ومنفوخ وانتظر صاحبنا بي فارق الصبر لامن جاء ..
وزنقو ليك زنقة كلب في طاحونة .. ونهزرو ما خلى ليهو صفحة يرقد عليها ..
أها زولنا قدر ماحاول يقنع ابوهو إنه الحمار ده مطرطش وغلطان .. ماقدر ..
الأب قال ليهو الحمار مابيكضب ولابيعرف الكضب البتكضب وبلا خجلة إنت ده ..
صاحبنا قام من الصباح أدى الحمار علقة نضيفة ..
وكل شوية وهو راكبو يديهو بالسوط بين إضنينو ..
ويقول ليهو شوف تاني البياكلك الاكل السمح ويدلعك منو ..
ياخاين يامابتنفع فيك الحسنة ..
يافتان يامعفن ......




Post: #261
Title: Re: فنجان جبنة ولمة ناس حلوين
Author: إسحاق بله الأمين
Date: 27-09-2015, 10:51 AM
Parent: #1

العيد مبارك عليكم كلكم "جت"، عيدا يخدر ضرعاتكم وينجح وليداتكم
العفو لله والرسول، حتى إنتو اعفوا مني أنا عافي منكم وراضي عليكم

* ود شيقوق أخوي شربوتكم كيف؟ ولاّ فدرتو لحم العيد بـ "تمبارة"؟

Post: #262
Title: Re: فنجان جبنة ولمة ناس حلوين
Author: مني عمسيب
Date: 27-09-2015, 11:16 AM
Parent: #261

الكلس الفاضلابي .. لكم التحية والحب والشوق المالي المكان .

وكلووووووووووو عام وانتم بالف خير .. والله لاحفا لاجفا علا كل ما اجي داخلة
القي البنابر ملانة ههههههه ما شاء الله قت لي دريري ود عمي كباشي سلفني
بنبرك حدر لي وقال لي مو شايفاني مرزوع في ههههههههه اها شوف زي الرد دا!
خفت وجريت ههههههههه . ياخي احبكم كلكم يا احلي ناس . امشي اجيب الكعك واجي
صادة .

Post: #263
Title: Re: فنجان جبنة ولمة ناس حلوين
Author: الطيب شيقوق
Date: 27-09-2015, 11:22 AM
Parent: #261

كل عام إخوتي و أخواتي بألف بخير وعافية ..
وأضحى مباركـ عليكم ..


يا ود اللمين و الله الفلاني لحدى هسه يبغبغ في التلاجة

حباب الحبيب عثمان موسى و الله شرفت بالحيل لكن شايف الفاضلابي سجم الرماد ما مد ليك فنجان قهوة لحدى الان

وين العبيد ود ابوي الطيب ؟

Post: #264
Title: Re: فنجان جبنة ولمة ناس حلوين
Author: الفاتح ميرغني
Date: 27-09-2015, 02:47 PM
Parent: #263

Quote: والله يا ود العم ميرغني دي فاتت عليك

ياخ كيف تخلى البروف يفوت منك بدون ان تجرى معه مقابلة صحفية ؟

يا شيقا خت الملامة علي، على قول الراحل المبدع خوجلي عثمان.
طبعا عملت بروفايل خبري عن البروف في " بوست شخصيات مهمة جدا التقيت بها " وكتبت فيه:
البروفيسور على يوسف، استاذ الفيزياء بجامعة السلطان قابوس. خلال زيارة لليابان للمشاركة في الإجتماع السنوي للرابطة الدولية للفزيائيين.وهو عبارة عن إجتماع يهتم بقضايا الفيزياء وآخر النظريات والتطورات الجارية في هذا العلم الحيوي.انتابني إحساس بالفرح والحزن في آن، الفرح لتواجد سوداني متميز في مثل هذا المحفل
والحزن في أن السودان اصبح مصنفا ليس في عداد الدول الخائبة فحسب، بل الدولة الوحيدة التي لفظت جغرافيتها ومواردها البشرية!
شرفني البروفيسور على يوسف بتلبية الدعوة لحضور فعاليات اليوم الختامي لكأس الإمبراطور في مصارعة السومو اليابانية، والتي اشارك فيها بتقديم جائزة بإسم صاحب السمو الشيخ خليفة بن زايد آل نهيان، رئيس دولة الامارات العربية المتحدة.

Proff.Ali.Yusuf.jpg Hosting at Sudaneseonline.com
مع البروفيسور على يوسف في " يويوغي بارك " ، حيث الماء والخضرة والوجه الحسن!
يا فاضلابي سامحنا ياخ على المداخلات الاستيطانية دي لكن المسنوح شيقا ده لو ما عملنا ليهو Rebuttal بكشف حالنا ياخ!
محبتي

Post: #265
Title: Re: فنجان جبنة ولمة ناس حلوين
Author: عبد المنعم سيد احمد
Date: 27-09-2015, 02:55 PM
Parent: #264

انتو آناس نفتح بوست بالعيد..
زول يقولك الله ياجرك مافى
اها ابقو عشرة
وفتناكم بى عافية
والعفو والعافية
والحى بلاقى.


12049108_1022612187782964_5889633603601924373_n.jpg Hosting at Sudaneseonline.com

Post: #266
Title: Re: فنجان جبنة ولمة ناس حلوين
Author: Basamat Alsheikh
Date: 27-09-2015, 03:31 PM
Parent: #265

بس بالغت في الصورة دي واوباما بقى كييف جبنة اثيوبية..
والاثيوبيات ذاتن بالغن وقدرن يدخلن الجبنة والفناجين دي كلها في الابيض الابيض
ويعني مضيفة ود الفاضلابي زاروها الليلة الرؤساء

وكل سنة وانتو طيبين ولامين
ودمتم

Post: #267
Title: Re: فنجان جبنة ولمة ناس حلوين
Author: Basamat Alsheikh
Date: 27-09-2015, 07:43 PM
Parent: #266

لمن ما تكتبوا حكاوي جديدة برجع لورا واقرأ الصفحات الاولى والثانية واسترجع الحكاوي القديمة
نعالج بيها النوستالحيا... وقصصكم معظمها بيؤكد لينا الكرم والمروءة السودانية الخالصة..
واجمل ما قرات عن الكرم السوداني ما قرأته فب جريدة الشرق الاوسط التي صدرت خلال شهر رمضان
الماضي وفي صفحة كاملة تقريبا بعنوان:" رمضان في السودان بنكهة الماضي" وتقول كاتبة المقال سهام صالح:-
:" ان اهم ما يميز رمضان في السودان عادة الافطار الجماعي ما بين الجيران في الشوارع، وهي عادة ما زال أهل القرى يحتفظون بها وكذلك
بعض الاحياء الشعبية في العاصمة الخرطوم.

والافطار الجماعي في الشوارع يختلف في طريقته من القرية إلى المدينة .. ففي القرى يقوم السكان بقطع الشارع واعتراض البصات السفرية
وإجبار المسافرين على النزول وتناول الطعام وذلك عن طريق وضع العمامة السودانية في منتصف الطريق ثم يأتي رب الأسرة ليقوم بوجب
الترحيب بركاب البص والذين قد يبلغ عددهم 40 مسافراً ، فتدخل النساء للمنزل ويبقى الرجال امام المنزل لتناول فطور رمضان في الشارع.
حيث تمتد الموائد ..

وهذا الكرم الحاتمي( نسبة لحاتم الطائي) أدخل اسرتين في المحتكم ، حيث شهدت ولاية الجزيرة تسجيل أغرب بلاغ في التاريخ. فقد استقبلت محكمة قرية الكانلين
بلاغاً حول خلاف مواطنين حول من يكرم المسافرين على الطريق ويتشرف بخدمتهم اثناء وجبة الافطار . وقد ادعى احدهم في الشكوى ان الآخر
( يسرق) منه الضيوف ويسرع لسحب البصات والحافلات والعربات المسافرة على الطريق لمائدته دون انت يترك له مجالاً لإكرام بعضهم. وهو الأمر الذي
جعل القاضي يرفض النظر في الدعوى لكنه استعمل الحكمة وقدم محاضرة عن الكرم السوداني وتدخل فاعلي الخير ليتم تقسيم الضيوف على الموائد كافة
بحيث يشارك اهل القرية كلهم في اكرام الضيوف.
( وعليكم الله شنو رايكم في القصة دي.. هسع ممكن نقول في احسن من الشعب السوداني وفي اكرم من الشعب السوداني...
في ذلك الوقت حكيت لصديقة امريكية هذه القصة .. ولم تصدق .. فرويت لها قصص اخرى عن الكرم السوداني فلم تصدق... وقالت معقولة في ناس يدخلوا المحاكم
عشان يتسابقوا في تكريم الضيوف.. وقالت لا اظن ان هذا يخصل في اي منطقة في العالم... انتم شعب عظيم .. هنا الناس بتقتل بعضها لاخذ طعامك بالقوة وانتم
تتبارون لتقديم الطعام للضيوف.. فدعوتها لزيارة السودان كي تصدق وتشوف بنفسها.... ووعدتني ان تسافر للسودان الصيف القادم حتى تصدق..
( وعندي نية وبعد ما نوريها الافطار الجماعي في اتبرة .. نمشي نقيف في طريق مدني الخرطوم جنب الكاملين ونوريها ناس الكرم والشهامة بيعملوا شنو
عشان يكرموا الضيوف )..
واقروا مرة ثانية قصيدة اسماعيل حسن )

بلادي انا..
تشيل الناس ، كل الناس وساع بالحيل وليلا يسع
وتتدفق مياه النيل على الوديان
بياض الفضة في وهج الهجير بيشع
بلادي سهول، بلادي حقول ، بلادي الجنة للشافوها
بلادي بلاد وناسا كرام تكرم الضيف
وحتى الطير يجيها جعان ومن اطراف تقيها شبع

ودمتم بالف خير

Post: #268
Title: Re: فنجان جبنة ولمة ناس حلوين
Author: Abdelrahim Mansour
Date: 27-09-2015, 10:07 PM
Parent: #267





*
**

Post: #269
Title: Re: فنجان جبنة ولمة ناس حلوين
Author: إسحاق بله الأمين
Date: 28-09-2015, 08:29 AM
Parent: #1

Quote: واجمل ما قرات عن الكرم السوداني ما قرأته فب جريدة الشرق الاوسط التي صدرت خلال شهر رمضان
الماضي وفي صفحة كاملة تقريبا بعنوان:" رمضان في السودان بنكهة الماضي" وتقول كاتبة المقال سهام صالح:-
:" ان اهم ما يميز رمضان في السودان عادة الافطار الجماعي ما بين الجيران في الشوارع، وهي عادة ما زال أهل القرى يحتفظون بها وكذلك
بعض الاحياء الشعبية في العاصمة الخرطوم.

يا الله يا بسمات أختي تعالي شوفي كرم وشهامة أماتك وحبوباتك " أمات شلوخ" اللائي يرحبن بالضيوف ويحلفن بالطلاق على عابري السبيل حتى ينزلوا من على ظهور دوابهم ليفمن باستضافتهم وإكرامهم :
عليّ بحلفو
لم تكن أمه (آمنة) تفعل مع وليدها، كما تفعل قريناتها من نساء "الفريق". بل كانت تحتج على أختها عندما تهدهده للنوم قائلة:
" النوم تعال لي البلال .... النوم تعال لي سيد الرجال.
النوم تعال لي الخزين .... النوم تعال لي البسًٌــر العين.
النوم تعال لي الرزين .... النوم تعال لي البحل الدين.
كانت آمنة تظن أن ذلك الدلال سيفسد ولدها و وحيدها، الذي سمته بنفس اسم أبيه الذي رحل قبل ولادته بشهر واحد. كانت تعده ليصير مثل أبيه، فارسا مقداما، شجاعا وكريما. فهو من سيخلد اسمها واسم أبيه.
لم تألُ آمنة جهدا في تنشئة ابنها على كريم الخصال، حتى تفوق ً على أقرانه في كل شيء . عمل بالتجارة، فكان يحمل بضاعته، على جملين ويركب حماره يجر خطامي جمليه، ويتجول ببضاعته، من قرية إلى أخرى، دون كل ولا ملل. ويحمد الله على كل كسب يصيبه. طار صيته بين القرى، و أقبل الناس على بضاعته لصدقه وطيب أخلاقه وحكمته.
كان عبد الله كثيرا ما يتمتم بعبارة حفظها الناس عنه، ولم يسألوه عن مغزاها ولم يفسرها لهم ولكنه كان يتمتم بها:
" هلا هلا، الدنيا دي يا ما ورتنا، شفنا فيها الشجاع والجبان والكريم والبخيل."
خرج يوما ببضاعته، فأدركه غروب الشمس في إحدى القرى بشرق النيل. لم تكن هناك وسيلة لعبور النهر بعد الغروب فقصد القرية القريبة يطلب المأوى.
يقول عبد الله:
" قصدت بيتاً في طرف القرية. ولما اقتربت من البيت أبصرني صاحبه من بعيد فسارع بدخول داره و أغلق الباب وراءه. عرفت أنه رجل بخيل؛ رغم أنه رجل غني تعج حظيرته بالخراف والأبقار والشياه والجمال ، وجمال بيته المبني على أحدث طراز يشهد بذلك أيضا. في تلك اللحظة أقبلت زوجته من بيت الجيران، فرأتني قادماً صوب الدار. انتظرتني، وقد أسدلت ثوبها على وجهها، حتى وصلت فحيتني ببشر ولطف وقالت:
" حباب الضيف، أهلاً بالضيف. أتفضل ، (علي بحلفو) كان تنزل."
قال عبد الله نزلت من حماري وأنزلت البضاعة، من ظهر جمليَّ لأريحهما من تعب النهار، وقد انشرح صدري لترحيب المرأة الحار. أسرعت المرأة تشرع لي الباب ولا زالت تردد عبارات الترحيب. دخلت البيت ؛ فسقتني ماء باردا. قدمته لي بأدب جم ثم خرجت لتسقي البهائم وتعلفها، وأنا أراها من مكاني.
لم تمض لحظات حتى أحضرت لي الطعام، لحما بأنواعه، شواء و مقليا ونيئا (مرارة). شكرت المرأة ، على حسن ضيافتها وفائق كرمها وكريم أخلاقها. إلا أن موقف زوجها الجبان لم يعجبني وأفسد عليّ حفاوة زوجته. عزمت على أن ألقنه درساً لا ينساه ما دام حيا. دخلت الحظيرة فاخترت أكبر خروف وأخرجته خارج الحظيرة ثم بطحته أرضا. كبرت ثلاثاً ثم ذبحته.
سمع صاحب الدار شخير الخروف وهو يلفظ أنفاسه، وكان مختبئا خلف الباب يرقب ما يحدث خارج الدار . رأيته يسترق السمع محاولاً فتح الباب ببطء ، فلما رآني حاول صك الباب. ناديته وقلت له:
" الخايف منها بقت ، خليك راجل وتعال طالع لي بره" . فخرج الرجل منكسراً مطرقاً برأسه إلى الأرض. لم يستطع النظر إلي، فقلت له:
" تبقى مرتك أرجل منك، مرتك تحلف على الضيف بالطلاق (علي بحلفو)، وإنت قاعد مندسي جوه بيتك؟ الناقصك شنو؟. الحمد لله ربنا أداك وأغناك . زريبتك مليانة بالحلال. بدل ما تحمد الله وتشكره على نعمته، تقعد تتدسى من الضيوف. أعترف الرجل بخطئه و قال للضيف:
" ها زول والله إتلومت معاك عليك الله إن ما سامحتني ، المسامح كريم، الليلة أديتني درس في الأخلاق أعاهدك ما بنساه لامن أخش التراب.
قال له عبد الله:
" العفو يا أخوي ثم جلسا يتآنسان، ولم تنس زوجته أن تحضر لهما الشاي. أدركتهم صلاة العشاء، فصلياها جماعة وذهب كل منهما لمكان نومه.
وفي الصباح، قبل شاي الصباح، جاء صاحب الدار يحمل صينية الفطور التي كانت خالية من المرارة إلاّ أنها كانت عامرة بكبدة الإبل ولحم الجذور. فطرا سويا ثم شكره و شكر زوجته ، وانصرف راجلاً.
نادته المرأة قائلة:
" هي يا راجل نسيت حمارك وجمالك بي بضاعتهن؟"
التفت إليها عبد الله وقال:
" لا ، لا ، ما نسيتهن لكن حرّم ما يبرنّي وطلاق تلاتة كان عندك أخت، إلا أعرسها الليلة قبال باكر.
ثم تمتم بعبارته المشهورة:
" هلا هلا، الدنيا دي يا ما ورتنا، شفنا فيها الشجاع والجبان والكريم والبخيل."

Post: #270
Title: Re: فنجان جبنة ولمة ناس حلوين
Author: عبدالحفيظ ابوسن
Date: 28-09-2015, 09:21 AM
Parent: #269

عمنا يوسف ود داتر يسكن بري . وبفرش المراكيب في برندات السوق الافرنجي . زمن السوق العربي والافرنجي وشارع الجمهورية ..
اها ناس ابوي بمشو يبضعو اول . وبعد داك بيغشوهو العصر . لانو بقفل في اي وقت جوهو وبحلف ويمشو البيت
احمد اخوي دخل هندسة الخرطوم وبقا ابوي يسوق معاهو ولدو .. دليل ويستأنس به
بحكي لي احمد
قال لي
وصلناهو في السوق العصر . وقفل وجا معانا .. من خشينا .. عمنا يوسف استعجل للدخول علي بيت النسوان .. وابوي ناداهو وابا يتلفت عليهو .. قام قال لي
حصل عمك ما يضبح
قال لي احمد
عندو غنماية لبن واحدة
هو سالي سكينو من ضراعو . وجاري وهو جاري قدامي .. حصل الغنماية واقفة علي حيلها .. قبل احصلو ضبحها وهي واقفة

Post: #271
Title: Re: فنجان جبنة ولمة ناس حلوين
Author: Ahmed Yassin
Date: 28-09-2015, 12:54 PM
Parent: #270

نحن ناس عاديين بنتونس ونسمر ونسهر ﻻمن ديكنا يصيح فوق رؤسنا يتحكر
دا رد نقد لى غسان شربل
الله ....على طريقة كرومة ود مستورة بت عرضو
سمحة اللمة....كلكم حول الجبنة تحت شجرة النيمة وشمس ضحوية
ومن الرادي القديم يجي صوت منى الخير(اﻻلطو) الصريح
الورثتوا من شريفة بت بلال مرورا بى مهلة العبادية والى عشة الفلاتية
ويدخل قلوبكم بكل جمالياته "ياحمام يازاجل"
اللحنها علاء الدين حمزة ..وﻻول مرة اغنية فيها وقف وقطع
وللبعيدين منكم ارسلوا معاهو رسايل حب للبلد للحبان

Post: #272
Title: Re: فنجان جبنة ولمة ناس حلوين
Author: Basamat Alsheikh
Date: 28-09-2015, 02:11 PM
Parent: #271

عزيزي الفاضل اسحق بلة ود الامين
قبال ما اطلع للمحاضرات قريت القصة دي .. واتأخرت مخصوص وقلت
كان ما علقت على القصة الجميلة دي البتوري كرم اهل القرى ما بتحرك
.. وعاوزة اقول ليك كلام .. وكلامن صحي .. انا اتقدموا لي قبل كده ثلاث
شبان للزواج ورفضتهم .. وما رفضتهم عشان هم كعبين او اخلاقهم سيئة
لكن رفضت الزواج قبل التخرج من الجامعة .. لكن قصتك دي اذا قصة حقيقية
انا مستعدة هسع اخلي الجامعة واتزوج ولد عبد الله ده اذا كان عنده ولد .. بس
يكون عنده نفس اخلاق ابوه..
الحياة دي ما فيها غير الذكرى الطيبة ... ودائما بنسمع ان اهل القرى ما زالوا
محتفظين بالعادات السودانية السمحة والثقافات التي نعتز بها امام شعوب العالم..
.. وطبعا كل ناس منطقة بيشكروا منطقتهم.. وعندي زميلة صديقة من الجزيرة
ولما سمعت اني عازمة الصديقة الامريكية للسودان عشان اوريها كرم اهل السودان
نصحتني وقالت لي : عليك بقرى الجزيرة المنتشرة على جانبي شارع مدني الخرطوم
وهناك حتلقى ناس زي ناس عبد الله... وبت مصطفى بتقول امشى لقرى الشمالية النائية
في الشمال حتلقى اولاد البلد البيخلوا اشغالهم عشان يخدموك وضيوفك حتى كان قعدتي
معاهم سنة... وانا اعتقد ان كل اهل السودان كلهم ودون تمييز لهم ميزة هذه الشهامة والمروءة والكرم ..
ولكن هناك من تغلبهم الظروف الاقتصادية الصعبة وخاصة في المدن الكبيرة والتي تطحن
فيهم كل مروءة وتخليهم يندسوا من الضيوف زي زوج المرأة الكريمة القابلت عبد الله بهذا
الكرم الحاتمي...
ودمت بالف خير وصحة وعافية

Post: #273
Title: Re: فنجان جبنة ولمة ناس حلوين
Author: إسحاق بله الأمين
Date: 28-09-2015, 03:13 PM
Parent: #1

Quote: عزيزي الفاضل اسحق بلة ود الامين
قبال ما اطلع للمحاضرات قريت القصة دي .. واتأخرت مخصوص وقلت
كان ما علقت على القصة الجميلة دي البتوري كرم اهل القرى ما بتحرك
.. وعاوزة اقول ليك كلام .. وكلامن صحي .. انا اتقدموا لي قبل كده ثلاث
شبان للزواج ورفضتهم .. وما رفضتهم عشان هم كعبين او اخلاقهم سيئة
لكن رفضت الزواج قبل التخرج من الجامعة .. لكن قصتك دي اذا قصة حقيقية
انا مستعدة هسع اخلي الجامعة واتزوج ولد عبد الله ده اذا كان عنده ولد .. بس
يكون عنده نفس اخلاق ابوه..

عفارم عليك يا بسمات أختي وبلغة العلوج Bravo يا بت الأجاويد، واشهد بأنك فتاة عظيمة بت أصول وأنك كريمة ، المرأة البتخطب لنفسها ، دي امرأة عظيمة ونادرة. كونك تختاري لنفسك الزوج الكريم دليل على أنك بنت رجال أجاويد كرماء، أبشري بالخير أمانة ما يكترو خطابك بعد كلامك الجميل ده. عبد الله صاحب القصة لديه ولدان لكنهما متزوجين، ولو أخبرتهما بكلامك السمح دا، قطع شك ما بترددوا في خطوبتك كان إنتي رضيتي بالزواج برجل امرأة أخرى.

Post: #274
Title: Re: فنجان جبنة ولمة ناس حلوين
Author: درديري كباشي
Date: 28-09-2015, 03:51 PM
Parent: #273

الفاضلابي والضيوف الأفاضل
يا بسمات أنا لست من الجزيرة لكن لآني خريج جامعة الجزيرة أصبح لي ارتباط عميق بهذه البقعة العبقة من ربوع بلادنا الحبيبة .. زاملت وساكنت وخاويت نفر لازالت تربطني بهم صلات من أبناء الجزيرة .. تزاورنا سافروا معي للشرق وجبت معهم قراهم .. عندما كان المشروع خضرة بمد البصر والترع عبارة عن مساطر فضية عملاقة تتقاطع عبر الخضرة في خطوط مدهشة . قصة في شكل موقف كثير ما رويته ورويت منه النفوس العطشة للعبر والأخلاق والتربية القويمة والتربة الخصبة التي تنبت قطنا أبيضا وقلوبا أنصع بياضا .
أحد الزملاء من قرى شرق الجزيرة دعانا لزيارة قريتهم بشرق الجزيرة يوم الجمعة لكسر روتين حياة الداخليات وتناول الوجبات البلدية التي تاقت نفوسنا لها .. سبقنا هو يوم الخميس ويوم الجمعة ركبنا البص وتوجهنا ناحية قريتهم ونحن ثلاثة أصدقاء وزملاء دفعة .. وعندما وصلنا البيت طبعا بعد سؤال أول من قابلنا عنه قادنا حتى باب الدار .. حفاوة الاستقبال والفرح الفطري والابتسامات العريضة أذابت الشك والحياء في ثوان . ولجنا الى ( المضيفة ) أي صالونهم .. قابلنا أخوته ووالده بعد تعرف قصير .. عرفنا بأخوته كالتالي أخونا الأكبر عثمان والاصغر منه علي . وكلهم يرتدون العراقي البلدي والسروال .. وهم متزوجون و بصحبة أطفالهم .. أول مظاهر الحفاوة جلسوا جميعا في الآرض بصحبة والدهم .. وأصروا علينا أن نظل نحن الضيوف على الاسرة بفرشها الفخم .. عد اليوم ( تونسنا ) عن الجامعة وعن الدراسة وتخلل حديثنا العبارات الانجليزية كعادة طلبة الجامعات في ذاك الزمن .. حقيقة شعرنا بشئ من الغرور وعلو المكانة بعد تلك المكانة التي وضعنا فيها والحفاوة التي قوبلنا بها ..الى أن أذن الرحيل وقفنا لنودع هذه الأسرة الفاضلة ولكن كانت الدهشة أنه الأخ الأكبر عاد وعرفنا بنفسه أنه بروفيسور في الأبحاث الزراعية بود مدني ومن باب الخدمة فقط قال أذا أحتجتوا لمراجع من مكتبة الابحاث ما علينا الا زيارته في مكتبه ..قبل أن نفوق من الدهشة عرفنا الثاني بأنه طبيب في مستشفى ود مدني وكذلك مبديا عرض خدماته في المستشفى ..
أما نحن أصابنا الخرس لم نعلق لبعض حتى وصلنا الى الداخلية كل واحد تقوقع حول نفسه مراجعة ومحاسبة واندهاشا .. طيلة يوم كامل لم ينطق هؤلاء الأماجد ولو بكلمة أنجليزية واحدة تدل على منصبه أو مكانته العلمية الرفيعة .. بلبسلتهم الشعبية تلك لم يفتحوا مواضيع سوى التي يتناولها أهل القرية من هموم من نوع المطر الخريف والدرد والرعد الجناين الحواشات وغيرها . وحتى أعادة تعريفهم بأنفسهم كان من باب الكرم وتقديم خدمات فوق ضيافة هذا اليوم الذي لا زالت بصمته محفورة حفرا في ذاكرتي لم يفلح غبار الزمن في دفنه أو محوه .

Post: #275
Title: Re: فنجان جبنة ولمة ناس حلوين
Author: إسحاق بله الأمين
Date: 28-09-2015, 04:00 PM
Parent: #1

Quote: وعاوزة اقول ليك كلام .. وكلامن صحي .. انا اتقدموا لي قبل كده ثلاث
شبان للزواج ورفضتهم .. وما رفضتهم عشان هم كعبين او اخلاقهم سيئة
لكن رفضت الزواج قبل التخرج من الجامعة .. لكن قصتك دي اذا قصة حقيقية
انا مستعدة هسع اخلي الجامعة واتزوج ولد عبد الله ده اذا كان عنده ولد .. بس يكون عنده نفس اخلاق ابوه..


تعالي يا بسمات أختي شوفي عظمة المرأة السودانية ، شهامتها ،كرمها ، قوة شخصيتها ، ثقتها في نفسها وحسن تربيها لأولادها وبناتها وأنت امرأة عظيمة مثلها لحسن تربيتك وثقتك في نفسك :

شهامة امرأة سودانية - قصة حقيقية
قابلتها صدفة بمطار الملك عبد العزيز الدولي بجده. امرأة في العقد السابع من عمرها ،تحس من النظرة الأولى أنك في حضرة امرأة عظيمة: الوقار زينتها والحكمة كساؤها والهدوء طبعها. كانت عينها لا تزال مضمدة، بالقطن والشاش وكانت تضع نظارة طبية على عينيها، مما يدل على أن عملية أجريت لها حديثا. علمت من خلال حديثها، أنها جاءت إلى المملكة في زيارة بغرض العلاج، وكانت في رعاية ولدها. أعلن عن موعد إقلاع الطائرة المتوجهة إلى مطار الخرطوم. دخل المسافرون إلى الصالة الداخلية،لإنهاء إجراءات السفر. رفض موظف الخطوط أن يسمح لهذه السيدة المسنة بالدخول لأنها افتقدت بطاقة صعود الطائرة. بحثت معها عن هذه البطاقة ولم نجدها. فقلت للموظف محاولا إقناعه: إن سيدة في مثل هذه السن ، يتوقع منها أن تضيع بطاقة الصعود .
لم تنجح شفاعتي عند الموظف وأصر على منعها، وقد أعلن النداء الأخير للرحلة. فكرت فيما يمكن عمله للسيدة، وقد أزف موعد الإقلاع ، ولم يهن علي أن أترك هذه السيدة لوحدها . ناشدت بعض الإخوة المسافرين على هذه الرحلة، أن يساعدوا السيدة و أوضحت لهم الأمر.
هب نفر كريم من المسافرين و ناقشوا موظف الخطوط وأقنعوه. وقد أعجبته هذه الهبة الكريمة والنخوة التي اعتادها منهم والتي تميزهم عن غيرهم.
وصلنا مطار الخرطوم بالسلامة وقمت بالواجب تجاه هذه السيدة الأم جمعت حقائبها وساعدتها ، في صالة الجمارك. قدمت على السيدة مودعا، خارج صالة المطار، وكان ابنها في انتظارها. أصرت السيدة إصراراً شديداً، على أن أمضي تلك الليلة تحت ضيافتها بمنزلها ، بأم درمان ؛ بعد أن علمت أنني لست من سكان العاصمة. اعتذرت للسيدة بأن الوقت كان ليلاً وكان لزاماً علي السفر لأهلي لحضور مناسبة سعيدة تنتظرني. قبلت اعتذاري ولكن عدم الرضا كان ظاهرا على عينيها. وددت الانصراف ، ففاجأتني بسؤالها:
" يا ولدي إنت متزوج ولاّ عازب ؟" أجبتها بأني لم أتزوج بعد. فقالت بجدية لمستها في نبرات صوتها: "قاسمة ومتنضرة يا ولدي كان داير تعرس في باقي الليل ده أدخلك في بيتك" . صمتت المرأة برهة ثم أضافت:
"أنا بت بتتعرس ما عندي، لكن عندي البسمعو كلامي وما بعصو ليّ أمر" هزني كلامها ؛ إذ فهمت أنها تريد أن تزوجني إحدى حفيداتها.
أعجبتني جديتها وملأني كلامها فخراً (برجالتها وضكرنتها). ولو كنت رجلاً (ضكراناً) مثلها ؛ لما ترددت لحظةً في قبول طلبها. أن مصاهرة امرأة عظيمة كهذه شرف لا يناله إلاّ رجل مثلها. شكرتها واعتذرت لها بأسف بالغ وقلت لها باكيا:
" إن المناسبة السعيدة التي تنتظرني هي عقد قراني".

Post: #276
Title: Re: فنجان جبنة ولمة ناس حلوين
Author: Basamat Alsheikh
Date: 29-09-2015, 03:16 PM
Parent: #275

عزيزي الفاضل اسحق ود بلة الامين
شكرا على حسن الظن.. وان شاء الله نكون عند حسن الظن...
وطبعا مستحيل الواحدة تبني سعادتها فوق سعادة الآخرين.... فعندما تقبل
اي فتاة ان تكون زوجة ثانية لرجل متزوج فربما تكون قد هدمت سعادة
هذه الزوجة الاولى والتي ايضا ربما شاركته في السراء والضراء سنوات عدة...
والحالة الوحيدة التي يمكن فيها ان تقبل اي فتاة ان تكون زوجة ثانية هي في حالة
ان زوجة الرجل الأولى عقيمة ولا تنجب .. وجاءت هذه الزوجة بنفسها وبرضاء
كامل لتطلب من هذه الفتاة ان تتزوج زوجها عشان هي ما بتنجب.. وطبعا هذه الحالة
نادرة .. ولكن في زوجات يقبلن التضحية بسعادتهن في سبيل اسعاد الزوج وان تكون له ذرية..
ولكن المهم تحياتي لعبد الله، اذا كان حيا يرزق، وتحياتي لابنائه وقل لهم ان والدهم كان رجلا عظيما
وشهما وكريما ، ويسد عين الشمس... وتمنيت ان اكون منتمية لاسرة هذا الرجل..
.. والله يا اسحق قصصكم الرائعة بتطمنا ان السودان لا يزال بخير.. وعليك الله شوف كمان عم عبد الحفيظ
ابوسن السالي سكينو وجاري وضبح الغنماية وهي واقفة .. عشان مافي زول يوقفه ويقول ليه ما تضبح...لأن
الكرم والشهامة تسبقه ...
ودمت بالف خير وصحة وعافية

Post: #278
Title: Re: فنجان جبنة ولمة ناس حلوين
Author: Sudany Agouz
Date: 29-09-2015, 03:37 PM
Parent: #276

يا اخوانا سلام ..
بجد .. أنا جيت حايم بيجاى .. لقيت قعدة الجبنة لساته مدورة ..

وبعدين .. فكرت كده .. وقلت الجماعة ديل .. خشمم اتوجع من الكلام الكتير ..
أحسن طريقة .. أجيب ليهم فنان .. يحلى القعدة .. وأخليهم يوقفوا كلام شوية ..

واتذكرت حبيبنا الراحل المقيم .. فنانا المفضل .. محمد وردى .. أيام الزمن الجميل ..

وهو يغنى .. ما تخجلى يا السمحه قومى استعجلى ..
عطشتى قلبى .. كل يوم ..



يا اللا سماع ... هووووووسسسسسسسسسسسسسسسسس ...

ان شا الله تعجبكم وتكون مناسبة مع اللمة السمحة دى ..
أخوكم وعمكم العجوز ..
ارنست
+++

Post: #277
Title: Re: فنجان جبنة ولمة ناس حلوين
Author: إسحاق بله الأمين
Date: 29-09-2015, 03:22 PM
Parent: #1

ريحة "قلوة" البن الحبشي طاقة والبخور عاكل وشايف البنابر فاضية يا الفاضلابي أخوي.

Post: #279
Title: Re: فنجان جبنة ولمة ناس حلوين
Author: Basamat Alsheikh
Date: 29-09-2015, 04:40 PM
Parent: #277

عمنا الشاب ارنست
وبالنيابة عن صاحب الحوش ود الفاضلاب مرحب مرة اخرى
وعملت كويس جبت لينا فنان قامة من قامات الفن والذي كان يطرب
جميع اهل السودان.. وانا مفضية نفسي يومين ارحب بالضيوف عشان
صاحب الحوش اظنه مشغول شوية ولا يكون سافر للسودان يحضر جنى البلح
في الشمالية عند جيرانهم الشايقية.. والمسافة بين الفاضلاب وحدود الشايقية ما بعيدة
,,
ودمت بالف خير وصحة وعافية

Post: #280
Title: Re: فنجان جبنة ولمة ناس حلوين
Author: Sudany Agouz
Date: 29-09-2015, 05:16 PM
Parent: #279

الابنة الحبيبة بسمات ..
يا سلام يا بسمات .. تكفى كلماتك الرقيقة لعمك العجوز ..
Quote: عمنا الشاب ارنست
وبالنيابة عن صاحب الحوش ود الفاضلاب مرحب مرة اخرى
وعملت كويس جبت لينا فنان قامة من قامات الفن والذي كان يطرب
جميع اهل السودان.. وانا مفضية نفسي يومين ارحب بالضيوف عشان
صاحب الحوش اظنه مشغول شوية ولا يكون سافر للسودان يحضر جنى البلح
في الشمالية عند جيرانهم الشايقية.. والمسافة بين الفاضلاب وحدود الشايقية ما بعيدة
,,
ودمت بالف خير وصحة وعافية


وشكراً لك .. لرفع المعنويات .. وخصوصاً واحنا فى بلاد الغربة ..
وشكراً أيضاً يا بسمات عشان بقيتى الناطق الرسمى بدل صاحب الحوش
الغايب .. يلقط فى التمر .. تمر الشمالية .. أحسن تمر .. بجد ما قصرتى تب
يا بسمات ..
الرب يباركك .. ومرة تانية انا سعيد بهذا اللقاء ..
عمك الشاب .. أها .. كده كويس .. حكاية الشاب دى .. سمحه بالحيل ..
آى .. عمك الشاب .. أها .. الله يديك العافية ..
ارنست
+++

Post: #282
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 29-09-2015, 07:15 PM
Parent: #280

هلا بالحبيب ودالقوز ,, والله ماعارفين نباركلك العيد
ونديك عيدية ولا عودية؟ المهم ياصاحب قالوا كان
اخوك حلقوا ليه بِل راسك ,, علا الامل موجود
إن شاء الله ,, وزمان الشاعر قال:
ما أضيق العيش لولا فسحة الأمل
ما أحلى المناكفة معاك وإنت شايل فنجان الجبنة
Quote: على ذكر حمار جدكـ المكـ والمشاوير المهمة ..
أحكي ليكـ قصة حقيقية حصلت ..
قريبنا زول مسخوت وبتاع ( شربه )

عمك زول زُهجى ,, عندو حمارين يوم رابطهم جنب حيضان البرسيم قوم يالحمار اللزرق إنطلق ودَوِّر فى البرسيم معط ,,
عمك الزهجان جاء لقا الحمار اللزرق خرب نص البرسيم ,, اها وقع ليك الحمار اللبيض المربوط ,, وقع فيهو هَبِد ,,
واحد من ناس الحلة جاء مار لقى ليك الزول بهَبد فى الحمار المربوط ,, فقال ليهو يازول ده مالو شِن سَوَّى ؟
تدُقُّو هو ولا تدق الخرب البرسيم؟ عمك الزهجان قال ليهو ده إنت ماك عارفو ده كان انطلق أظرط من رفيقو.

Post: #283
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 30-09-2015, 00:21 AM
Parent: #282

Quote: انتو آناس نفتح بوست بالعيد..
زول يقولك الله ياجرك مافى
اها ابقو عشرة
وفتناكم بى عافية
والعفو والعافية
والحى بلاقى.

هوى ياجنا سيداحمد ,, العيد مَبَارَكْ عليك
ياخ بوستك ده يعمينى ماشفتو ,, مابتقصر
عارفينك ,, زول واجب ,, امسحا لى فى جلابية
ودالمنسى دى ,, ياخ كان فتَّنا ورُحت الجبنة بتبقى
مسيخة زى اللَّت السوق ,, حقك علينا ,,
بى مناسبة الجلابية دى ,, واحد قال هسع سيدنا يوسف
ده لو كان لابس جلابية انصارية كان موقف الشاهد حايكون شنو؟

Post: #284
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 30-09-2015, 00:40 AM
Parent: #283

بسمات ,, فى مرأة اسمها داليا (سودانية) عندها شعر
حاجة روعة رسَّلت لى بت اختى قصيدة ليها حاجة مبالغة
كان الله هَوَّن بجيبا ليكم ,, بس اخوكن خلاس مدرسة الولاد
فتحت ورجعنا للقراية ام دق ,,
ايرنست ,, ياخ انا عارف عندك ذكريات حلوة ,, اسرق ثوانى
من الزمن ورجعنا لى بلداً حنان اهلها ,,
اسحاق ود بلة ده ,, نجيهو راجعين بالمهلة قصصوا دى
حاتكون بداية لتداعيات جميلة ,, وإن شاء الله تمطر سماء البوست
بكل جميل شايف ودابسن زَيَّت الذاكرة والقادم احلى ان شاء الله.

Post: #285
Title: Re: فنجان جبنة ولمة ناس حلوين
Author: إسحاق بله الأمين
Date: 30-09-2015, 12:01 PM
Parent: #1

Quote: ولكن المهم تحياتي لعبد الله، اذا كان حيا يرزق، وتحياتي لابنائه وقل لهم ان والدهم كان رجلا عظيما
وشهما وكريما ، ويسد عين الشمس... وتمنيت ان اكون منتمية لاسرة هذا الرجل..

أختنا الفاضلة / بسمات
الخال عبد الله محمد عثمان الشهير "بود آمنة" توفي في عام 1980، ونيابة عن أسرته بشكرك الشكر الجزيل على كلامك الطيب عنه وإنه ليسعدنا ويشرفنا إنتمائك لهذه الأسرة البسيطة، فإن دلّ هذا إنما يدل على كرمك وأصالة معدنك ونبل صفاتك،مع خالص أمنياتي لك بالتوفيق في دراستك أولا ومن ثم بود الحلال الذي يهنئك ويسعدك.

Post: #286
Title: v]
Author: مجاهد أحمد محمد
Date: 30-09-2015, 12:26 PM
Parent: #1

لك التحية والتقدير .... وكل عام والجيع بخير
الواعي ما بوصو
من أمس الضحى
تورى أب زنود ساقو
يا مقنع ولياتو
********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق
*********
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال

Post: #287
Title: Re: v]
Author: Basamat Alsheikh
Date: 30-09-2015, 02:36 PM
Parent: #286

حفاوة الاستقبال والفرح الفطري والابتسامات العريضة أذابت الشك والحياء في ثوان . ولجنا الى ( المضيفة ) أي صالونهم .. قابلنا أخوته ووالده بعد تعرف قصير .. عرفنا بأخوته كالتالي أخونا الأكبر عثمان والاصغر منه علي . وكلهم يرتدون العراقي البلدي والسروال .. وهم متزوجون و بصحبة أطفالهم .. أول مظاهر الحفاوة جلسوا جميعا في الآرض بصحبة والدهم .. وأصروا علينا أن نظل نحن الضيوف على الاسرة بفرشها الفخم .. عد اليوم ( تونسنا ) عن الجامعة وعن الدراسة وتخلل حديثنا العبارات الانجليزية كعادة طلبة الجامعات في ذاك الزمن .. حقيقة شعرنا بشئ من الغرور وعلو المكانة بعد تلك المكانة التي وضعنا فيها والحفاوة التي قوبلنا بها ..الى أن أذن الرحيل وقفنا لنودع هذه الأسرة الفاضلة ولكن كانت الدهشة أنه الأخ الأكبر عاد وعرفنا بنفسه أنه بروفيسور في الأبحاث الزراعية بود مدني ومن باب الخدمة فقط قال أذا أحتجتوا لمراجع من مكتبة الابحاث ما علينا الا زيارته في مكتبه ..قبل أن نفوق من الدهشة عرفنا الثاني بأنه طبيب في مستشفى ود مدني وكذلك مبديا عرض خدماته في المستشفى ..
أما نحن أصابنا الخرس لم نعلق لبعض حتى وصلنا الى الداخلية كل واحد تقوقع حول نفسه مراجعة ومحاسبة واندهاشا .. طيلة يوم كامل لم ينطق هؤلاء الأماجد ولو بكلمة أنجليزية واحدة تدل على منصبه أو مكانته العلمية الرفيعة .. بلبسلتهم الشعبية تلك لم يفتحوا مواضيع سوى التي يتناولها أهل القرية من هموم من نوع المطر الخريف والدرد والرعد الجناين الحواشات وغيرها . وحتى أعادة تعريفهم بأنفسهم كان من باب الكرم وتقديم خدمات فوق ضيافة هذا اليوم الذي لا زالت بصمته محفورة حفرا في ذاكرتي لم يفلح غبار الزمن في دفنه أو محوه .


>>>>

>>>

عزيزي اسحق ود بلة
تحية طيبة
اولا الرحمة والمغفرة لخالك عبد الله ويجعله الله من اصحاب اليمين
والتحية لاسرته الكريمة....
واذا ما كان عندنا نصيب في احد اولاد عبد الله او احفاده.... فلا شك كل واحدة في الدنيا بتتمنى تتزوج
واحد من شاكلة الاشخاص الذين اشار اليهم درديري في هذه الفقرة..التميز بالتواضع الجم وحفاوة الاستقبال للضيوف
وعدم الفخفخة والفشخرة على الفاضي... وانت شوف بعض الناس يحبون الغرور والتعالي على الناس
وازدرائهم واذلالهم فقط لانهم متعلمين او عندهم اموال .. ولكن ايضا هناك الكثيرين الذين يمتازون
بالتواضع الجم .. مثل هؤلاء الذين استقبلوا ناس الدرديري واصدقاؤه ..حتى شوف ما وروهم هم شغالين شنو,,,
في بداية اللقاء..
والددريري كباشي والمعروف ان له ايضا جزالة العبارة زي ناس شاهين شاهين وصف تواضعهم بلغة
محببة وجميلة....
وعندي نية بعد ان اتفرغ شوية اكتب بوست جديد عن ماذا تريد معظم الفتيات من شريك المستقبل!!
ودمت بالف خير وصحة وعافية...

وتخريمة للفاضل مجاهد::
وين الترجمة على الشريط..
ودمت بالف خير

Post: #288
Title: Re: v]
Author: عبدالعزيز الفاضلابى
Date: 30-09-2015, 04:01 PM
Parent: #287

Quote: وصلناهو في السوق العصر . وقفل وجا معانا .. من خشينا .. عمنا يوسف استعجل للدخول علي بيت النسوان .. وابوي ناداهو وابا يتلفت عليهو .. قام قال لي
حصل عمك ما يضبح
قال لي احمد
عندو غنماية لبن واحدة

لا حولا يا ود ابسن ,, الغنماية فى صمَّة خشما اتلافاها بالسكين؟
روى لى من اثق بروايته أن أحد اثرياء الخرطوم وجذوره من شندى ,, له اخ يعيش فى شندى وبه رِقة حال وعِفة يعلمها اخوه الثرى هذا ,,
ولذلك كان دائماً مايتحايل على اخيه ليقبل بِرِّه ,, ولايعطيه مباشرة لانه لايقبل ان يتعطَّف الناس عليه ,, كان له ثَوْريين يحرث بهما ارضه الصغيرة التى يتكَسب منها ويعيش منها عياله ,,
نفق احد الثورين فعلم أخاه الثرى بذلك فبعث أحد ابنائه بمبلغ من المال يكفى لشراء ثور ويزيد ,, واوصاه أن يتلطَّف بعمِّه ويتحايل عليه ليقبل اخذ المال ,, والا يُشعر عمه بأن هذا
المال تعويضاً عن الثور الذى نفق ,, وصل الابن عصراً واستقبل فى ديوان عمه وتحلقت الاسرة حوله ,, عماته وخالاته وابناؤهن ودخلوا فى فيض من الونسة والسؤال عن ابيه وامه ,,
ولم يحس الجميع بمرور الوقت الا بعد أن دخل عليهم العم ليطلب من النساء بالذهاب لإعداد العشاء ,,, ليعلم ابن الاخ ان العشاء ماهو الا لحم الثور الآخر فأسقط فى يده
وافقدته المفاجأة اختيار الكلمات التى يقولها لعمه ,, فصاح وهو يضع يديه على رأسه:
ده شنو ياعمى تضبح لى التور الـ بتتعَيَّش منه؟ انا حالتى جاى اشترى ليك تور بدل المات ,, فاجابه العم إجابة القانع بالرضا بقضاء الله :
ياولدى ابوك كتَّر خيرو على السوَّاهو لكن انا مابحب العوض من زول ومابحب اسأل مخلوق ,, أنا اول ما الامام يسلِّم بكون اول زول يمرق من الجامع لأنى حتى ربنا مابدور اسأله قِدام الناس ,,
قول لابوك خير الله كتير.

Post: #289
Title: Re: v]
Author: عبدالعزيز الفاضلابى
Date: 30-09-2015, 04:52 PM
Parent: #288

Quote: ولم يهن علي أن أترك هذه السيدة لوحدها .

يا ود بلة إنت ذاتك نموذج للشهامة والمرؤة التى للاسف أخذ نجمها
يغور رويداً رويداً وشمسها توارت بالحجاب او كادت ,, ومثل قصصك
هذه والنماذج التى يوردها من حين لآخر ناس قعدة الَجبَنة ربما تكون
باعثاً لنجم وشمس المرؤة والشهامة فى مقبل ايامنا التى نرجوها مُشرقة بإذن الله ,,
والحكى الإيجابى هو عين مانوَّهنا به فى صدر هذا البوست
ولكم جميعاً التحية ,,

Post: #291
Title: Re: v]
Author: عبدالحفيظ ابوسن
Date: 30-09-2015, 05:15 PM
Parent: #289

الفاضلابي
طلقت حردت
اشيل واكتب زول شايفني مافي

Post: #292
Title: Re: v]
Author: عبدالحفيظ ابوسن
Date: 30-09-2015, 05:15 PM
Parent: #289

الفاضلابي
طلقت حردت
اشيل واكتب زول شايفني مافي

Post: #290
Title: Re: v]
Author: مامون عبدالله نور
Date: 30-09-2015, 05:11 PM
Parent: #288

ياخي أنا متصفح جيد وأحب العديد من كتاب هذا المفترع الجميل ولا أميل للأسف للتعليق كثيراً
لكن اجبرتني حلاوة البوست وقهوة الفاضلابي على الدخول ..مدمن لبوست اميرة السيد ود المنسي ود أوبوسن والفاصلابي ود شيقوق (ذاك المسكون برائحة الطيب والزراعة ) ودخلات
عمنا ود البوش (ود البوش ما تزعل من عمنا أسأ ل عبد اللطيف أحمد بتعرف إنك عمنا )
أنتو ناس اكثر من سمحين حكيكم طاعم بالحيل ....بتخلو الزول منقته رايقة حقيقي ...بضحك لمن أقع قفاي من بعض الردود والدخلات ...
عبد العزيز عثمان زول سمح إضاف للبوست جمال ورونق ......بت الشيخ إضافة حقيقة بشهادتكم .....انا مازول الله متابع ساي
عبيد الطيب قرات له كثيراً بالمنبر ...الزول ده جابينو من وين يعلم الله زولا ما ساهل تب وبريد كتاباته جد.....
أما يحيي قباني وود المدير ود الزبير والله بكتب لي في كلام ليه شهر فيهم ما قادر انزله الناس ديل ياهو الجمال زاتو
درديري ود الكباشي من سنتين بقرأ قصصه وكل يوم برجع أعيد فيها .. لمن نسختها عندي بدون إذن منه لكن حفظت ليه حقوقه وتاريخ كتاباته يطوع المفردة كيفما يشاء
عمنا إسحق بلة الأمين كاهن في محرابه القصصي ..أحسبه يمتع نفسه ثم يمتعنا باجود ما يكون من القصص
ووووو كثيرين احبكم كما انتم ...ناس طاعمين ناس جميلين من جوه ..ناس حكيكم ومزاحكم يريح البدن ويطيب الخاطر
عليكم الله ما تقيفوا من الحكي ...
فانا أقرأ ولا أعرف الكتابة عذرمقدم ..لكني متابع صباحا ومساءاً

ﻣﺎ ﻣﻬﻢ ﻛﻮﻧﻚ ﺗﻌـــﺎﻧﺪ
ﺍﻭ ﻳﺒـــــﻮﺡ ﺑﺎﻟﺮﻳــــﺪﻩ
ﻗﻠــــــﺒﻚ
ﺍﻟﻤﻬﻢ ﻳﺎ ﺯﻭﻝ ﺑﺮﻳـــــﺪﻙ
ﻭﺷﺎﻳﻠﻮ ﻓــــﻲ ﺟﻮﺍﻳﺎ
ﺣﺒــــﻚ ......
ﺍﺻﻠﻮ ﻗﺎﻟﻮ ﺍﻟﺮﻳﺪ ﻣﺮﺍﺣﻞ
ﺑﺒﺪﺍ ﺑﻴﻦ ﻟﺤﻈــــﻪ
ﻭﺩﻗﻴﻘـــــﻪ ...
ﻧﺎﺱ ﺑﺘﻌﺸﻖ ﻓﻲ ﺍﻟﺪﻭﺍﺧﻞ
ﻭﻛﻞ ﺯﻭﻝ ﺑﺨﺘﺎﺭ ﻃﺮﻳﻘــﻪ
ﻭﺍﻧﺖ ﺑﺘﺨﺒــﻲ ﺍﻟﻤﺸﺎﻋﺮ
ﻭﺍﻟﻌﻴــــﻮﻥ ﺑﻠﻤـــﻊ ﺑﺮﻳﻘــــﻪ
ﻓﻴﻬﺎ ﺍﻳﻪ ﻟﻮ ﻳﻮﻡ ﻋﺸﻘﺘﻚ
ﻭﺟﻴﺖ ﺍﺻﺎﺭﺣﻚ ﺑﺎﻟﺤﻘﻴﻘـﻪ
ﻧﺤﻦ ﺑﻨﺤــﺎﻭﻝ ﻧﻘـــــﺮﺏ
ﻭﺍﻧﺖ ﺑﺘﺰﻳــــــﺪ ﻓﻲ
ﺩﻻﻟـــــﻚ
ﻭﻛﻞ ﻟﺤﻈﻪ ﺗﻤﺮ . ﻋﻠﻴﻨــــﺎ
ﻓﻴﻬﺎ ﻧﺤﻠــــﻢ ﺑﻲ ﻭﺻـــــﺎﻟﻚ
ﻣﺮﻩ ﻧﻬﺪﻳﻚ ﺍﻟﻤﺸﺎﻋﺮ
ﻭﻣﺮﻩ ﻧﺴﺮﺡ ﻓﻲ ﺟﻤــــــﺎﻟﻚ
ﺑﺲ ﻋﺸﺎﻥ ﺧﺎﻃﺮ ﻋﻴﻮﻧﻚ
ﻛﻞ ﻗﺎﺳﻲ ﻳﻬﻮﻥ ﻋﺸﺎﻧﻚ

Post: #293
Title: Re: v]
Author: عبدالحفيظ ابوسن
Date: 30-09-2015, 05:25 PM
Parent: #290

حكي لي صديقي صلاح الحسن من قرية النوبة شرق شندي .. كم وتمانين الكلام وكنت زرتهم .. ود عمو شغال في الخرطوم .. ومقشط صادف ليهو مجموعة من اهلو في السوق .. حكاية يفوتهم فضيحة .. ومفلس . حلف عليهم دخلهممطع سمح وطلب ليهم
وقت شبعوا وشربوا البارد والجبنة نادا واحد منهم وقال ليهو
حرم تقوم تدفع الحساب

Post: #294
Title: Re: v]
Author: عبدالعزيز الفاضلابى
Date: 30-09-2015, 05:56 PM
Parent: #293

هلا وغلا ودالنور
مرحبتين حبابك ياحبوب ,, البكان بكانك جُر بنبرك واتوهَّط ,, بلحيل
الناس ديل هنا مافيهن زول بتقدر تفضِّلو على الباقين ,, ناس انا احب
اسميهم أخوان الصفا فمرحباً بك بينهم ,, وسعداء بأن زدنا بك ,,

Post: #295
Title: Re: v]
Author: عبدالعزيز الفاضلابى
Date: 30-09-2015, 05:58 PM
Parent: #294

Quote: وقت شبعوا وشربوا البارد والجبنة نادا واحد منهم وقال ليهو
حرم تقوم تدفع الحساب

هههه يا شيخ العرب إنت ماشى بعيد مالك .. اناالقدامك ده ,, لما كنا فى سنجة ,, كنت عزابى.
المسنوح شيقوق ده كان عنده قضية فى محكمة سنجة جا بَيَّت عندى عشان الدنيا خريف وعاوز يكون فى المحكمة بكره إنْتايم ,,
أها لقانى مفلِّس فقام اشترى العشا سمك والذى منه وكم قارورة عصير (كريستال بلح) عليك امان الله باكر شال حالى وسط المحامين والقضاة ,,
ها ,, سجم الرماد ده يمين جيتو فى بيتو علا عشِّيتو
,,, كانت ايام ياشيقا,,,,

Post: #296
Title: Re: v]
Author: Basamat Alsheikh
Date: 30-09-2015, 06:15 PM
Parent: #295


. والله يا اسحق قصصكم الرائعة بتطمنا ان السودان لا يزال بخير.. وعليك الله شوف كمان عم عبد الحفيظ
ابوسن السالي سكينو وجاري وضبح الغنماية وهي واقفة .. عشان مافي زول يوقفه ويقول ليه ما تضبح...لأن
الكرم والشهامة تسبقه ...
ودمت بالف خير وصحة وعافية

...

...


عزيزي الفاضل عبد الحفيظ ابو سن

كيفن ما شايفنك ياخي.. والفقرة الفوق دي جزء من ردي لاسحق ود بلة
وده بيوريك نحن بنقرأ كل حرف تكتبه هنا ولا في البوستات الثانية...
بس انت خليك مواصل واكتب واكتب.. ونحن بنقرأ ونقرأ .. وما بس اعضاء
المنبر العام هم البيقروا لكن الكل بيقرأ هذه الروائع...
ودمتم بالف خير وصحة وعافية

Post: #297
Title: Re: فنجان جبنة ولمة ناس حلوين
Author: مامون عبدالله نور
Date: 30-09-2015, 06:41 PM
Parent: #1

تسلم عزيزي وأستاذي الفاضلابي...ومشكور على الضيافة

قال رسول الله صلى الله عليه وآله وصحبه وسلم:" خياركم احسنكم اخلاقا الذين يألفون ويؤلفون".
وقال:" ما احدث عبد اخا في الله الا احدث له درجة في الجنة".
وقال:" ود المؤمن للمؤمن في الله اعظم شعب الايمان الا ومن احب في الله وابغض في الله واعطى في الله ومنع في الله فهو من اصفياء الله".
وقال ايضا:" من آخى اخا في الله رفعه الله درجة في الجنة لا ينالها بشيء من عمله".
وكلما كان الصديق اشد حبا ومودة لصديقه كان اعظم منزلة عند الله تعالى كما قال رسول الله صلى الله عليه وآله وصحبه وسلم:
" الا اخبركم بأشبهكم بي خلقا؟ قالوا بلى يا رسول الله .
قال: احسنكم خلقا واعظمكم حلما،وابركم بقرابته،
واشدكم حبا لاخوانه في ربه، واصبركم على الحق ،
واكظمكم للغيظ ، واحسنكم عفوا،واشدكم من نفسه انصافا ".

نحسبكم كذلك وظننا فيكم أكبر
دمتم ..مأمون-مكة المكرمة

Post: #298
Title: Re: فنجان جبنة ولمة ناس حلوين
Author: Basamat Alsheikh
Date: 30-09-2015, 08:55 PM
Parent: #297

لواعي ما بوصو
من أمس الضحى
تورى أب زنود ساقو
يا مقنع ولياتو
********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق
*********
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال

...

...

يعني الكلام القاله مجاهد احمد إلا يجي ود البوش وود شيقوق وود العبيد عشان عشان يختوا الترجمة على الشريط

وطبعال اذا جانا صاحب الحق مجاهد نفسه حيشرح لينا بالتفصيل معاني الكلمات والمعاني المقصودة..
ودمتم بالف خير

Post: #299
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 30-09-2015, 10:12 PM
Parent: #298

Quote: الواعي ما بوصو
من أمس الضحى
تورى أب زنود ساقو
يا مقنع ولياتو
********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق

هلا بالفارس مجاهد حبابك فى لمتنا
حكى لى المرحوم ميرغنى بليل من سكان سنجة ,, عمِل لفترة بكلية العلوم معيداً قال:
هنالك غُدة فى مؤخرة رأس الإنسان فى حجم حبة الذُرة ,, هذه الغدة تظَل خاملة طيلة حياة الإنسان ,,
ولاتعمل الا عند دنو الأجل فتفرز افرازات يشعر معها الإنسان بسكينة وانتشاء يصل أحيانا درجة اللذة
والبعض يُنزِل كما لو كان فى حالة جماع من فرط اللذة ,, كان الأستاذ بليل يُحدثنا ونحن فى معرض الحديث عن الرجل الذى قيلت فيه هذه القصيدة
التى اتى بها اخونا مجاهد ,, حيث نزل منه الماء وهو على حبل المشنقة
فأوَّلته الشاعرة على انه رجولة وشجاعة ذلك الرجل الفارس الذى لايهاب الموت ,, ومن شدة إستهزائه بقتلته ,, كان يُفكر فى متعة الجنس وامرأته
ولايعبأ بالحبل الذى لفَّه الأعداء حول عنقه .
بينما فسَّرها الاستاذ بليل انها رحمة الله بخلقه إذا خلق فيهم تلك الغدة وجعل لها تلك الوظيفة لتخفف سكرات الموت وقال هى مايسميه الناس بـ(فَجَّة الموت)
وتختلف درجة اللذة من إنسان لآخر. والله تعالى اعلم ونرجو من اهل العلم ان يؤكدوا او ينفوا لنا وجود هذه الغدة.

Post: #300
Title: Re: فنجان جبنة ولمة ناس حلوين
Author: عبدالحفيظ ابوسن
Date: 30-09-2015, 10:37 PM
Parent: #299

كتر خيركم فاضلابي وبسمات ومعليش فيني بعض جلافة ابت الا ان تخرج ف عذرا مرحبا مجاهد
بسمات
الواعي مابوصو من اجمل اغاني التراث كتبتها بت مسيمس في ودحبوبة .. وكانت الوالدة رحمها الله عاشقة لاغاني بادي محمد الطيب ..سمعتها وانا صبيا يافعا ..وحدثتنا عن شنق ودحبوبة في السوق .. اب كريك في السوق .. ومما اذكره من حديثها قال ليهم وصيتي بعد اموت تحلو سروالي وتدوهو بنات عمي لكي يعرفن انه لم يسلح او يتبول خوفا ..

غنيلو ﻳﺎ ﺑﻨﻴﻪ
ﻣﻦ ﻗﻮﻣﺔ ﺍﻟﺠﻬﻞ ﻣﺎ ﻗﺎﻣﻠﻮ ﺑﻰ ﻧﻴﻪ
ﻭﻛﺖ ﺍﻟﺸﻮﻑ ﺃﺷﻮﻑ ﻭﻗﻔﻮﻟﻮ ﺳﻠﻄﻴﻪ
ﺗﻌﺪﻯ ﻭﺭﻛﺰ ﻗﺎﻝ ﺍﺧﻮﻛﻰ ﻳﺎ ﺭﻗﻴﻪ

Post: #301
Title: Re: فنجان جبنة ولمة ناس حلوين
Author: درديري كباشي
Date: 01-10-2015, 10:21 AM
Parent: #300

Quote: درديري ود الكباشي من سنتين بقرأ قصصه وكل يوم برجع أعيد فيها .. لمن نسختها عندي بدون إذن منه لكن حفظت ليه حقوقه وتاريخ كتاباته يطوع المفردة كيفما يشاء


مشكور يا أستاذ النور على هذه الشهادة القيمة

ونهديك وجميع الحضور هذه القطعة الواقعية تماما وكما هي .

درس أنما أيه
في بداية حياتي العملية بالمنطقة الصناعية كسلا لم يكرمني الله بدابة بعد لا معدنية ولا حيوانية .. بما أنه المنطقة الصناعية لا تقع في خط المواصلات مباشرة .. تعودت أن أمر ( اشاشق ) بوسط الحي ( حي الترعة ) بظهر بيتنا بمحطة الحجر .. المشوار في البداية بدأ شاقا .. ثم تحول لروتيني معتاد بمرور الأيام .. كل صباح تقابل نفس الوجوه الطيبة .. عبارات السلام تحاول أن تغير فيها لتكسر ملل الروتين (أصبحت كيف يا حاجة خضرة .. الحمد لله يا ولدي أمك كيف .. بخير والحمد لله .. و السلام عليكم يا عم بله ) الله يسلمك يا بني .. أبوك كيف زمن ما جانا بجاي .. ؟ الحمد لله بخير .. سلم عليه .. الهي يسلمك يا عمنا ..
حتى الكلاب التي كانت تستقبلك بالنباح في بداية المشوار أصبح نباحها جزء من الروتين .. يخيل لي لو تأخرت قليلا لتغيرت نبرة النباح و فحواها سيكون ( شنو يا أخينا ما أتأخرت علينا وضيعت زمنا هو نحن ما في حد تاني ننبح فيه غيرك ؟.)
غنيمات الشارع وغزل التيس المفضوح وديك يطارد في دجاجة ..وأمرأة تملأ زير السبيل . وأخرى تكنس الشارع أمام بيتها. تتغير الوجوه وتنكمش المعرفة كلما ابتعدت عن الحي وأقتربت من مكان العمل فتصبح التحايا بدون صحبة أسماء .. السلام عليكم .. أهلا يا أخينا أتفضل أشرب شاي .. شاكر جدا سبقتكم والله .
يوم ما بذات المشوار مع خلو الشارع من المارة وندرتهم وجدت كوم رمل أمام أحد البيوت فيه طفلان يلعبان .. ولد وبنت أعمارهما بين ثلاث وخمس سنوات والولد أكبر .. ما أستوقفني منظر يتطلب الأغاثة العاجلة.. الولد يلقي أخته على كوم الرمل ويضرب فيها وهي تصرخ. انفعلت جدا وغضبت شديته عنها بعنف .. خاف الصغير لثورتي وجحظت عيناه رعبا .. لكني تفاجأت .. بالصغيرة أنتفضت فجأة و نفضت التراب عن ثيابها ومسحت دموعها بكفها .. ونهرتني بلكنتها ( اللجناء ) .. قائلة ( مالك وماله حليه يضلبني مش أحوي ) . .بصراحة أنا أتغظت منها وكدت أن أقول لها ( انشاء الله يطلع ... ) لكن كظمت غيظي منها وواصلت مشواري .. والمشوار لا زال طويل .. بت أفكر في تصرف هذه الصغيرة ( المفعوصة ) كيف عندما شعرت أن أخاها في خطر تجاوزت آلامها ونسيت ظلمه وهبت تدافع عنه بكل شجاعة أي درس هذا لقتني له تلك الصغيرة... وكلما مرة تطفو على سطح ذاكرتي هذه الحادثة كلما مر بي في الحياة موقف مشابه .. على مستوى السياسة أو الرياضة أو حتى الحياة بصفة عامة .. كم مرة أستغثنا بالغريب للجم أولى القربى وملكناهم زمام أمورنا .. وبتنا لا نعرف كيف نتخلص منهم .

Post: #302
Title: Re: فنجان جبنة ولمة ناس حلوين
Author: Basamat Alsheikh
Date: 01-10-2015, 09:38 PM
Parent: #301

لكني تفاجأت .. بالصغيرة أنتفضت فجأة و نفضت التراب عن ثيابها ومسحت دموعها بكفها .. ونهرتني بلكنتها ( اللجناء ) .. قائلة ( مالك وماله حليه يضلبني مش أحوي ) . .بصراحة أنا أتغظت منها وكدت أن أقول لها ( انشاء الله يطلع ... ) لكن كظمت غيظي منها وواصلت مشواري .. والمشوار لا زال طويل .. بت أفكر في تصرف هذه الصغيرة ( المفعوصة ) كيف عندما شعرت أن أخاها في خطر تجاوزت آلامها ونسيت ظلمه وهبت تدافع عنه بكل شجاعة أي درس هذا لقتني له تلك الصغيرة... QUOTE
>>> <<<<< >>>>>>>

انت ما سمعت بالمثل البيقول :" انا واخي على ابن عمي , وانا وابن عمي على الغريب..
اها الشافعة دي طبقت مثل انا واخوي على الغريب...
ودمت بالف خير

Post: #303
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 01-10-2015, 11:00 PM
Parent: #302

كما وعدتك يابسمات ,, احدى قصائد داليا الياس
وفى واحدة تانية اجمل ,, حتى حين ميسرة ان شاء الله

مُناي في الدنيا سُترة وبيت..

وأصل البيت حنان وأمان.. مودة وريد

محال البيت يكون بس طين.. وزنكي وحيط

ولا ممكن يكون سكر وصلصة وزيت

كلام البيت كلام تاني.. كلام إحساس مقدس وشرع رباني

وريد إنسان عزم وإختار

فتح باب قلبو لمّاني.. بني العش الصغير طمّني آواني

٭ ٭ ٭ ٭

بيوت الدنيا مختلفات وما كل البيوت واحد

في بيت داااافي.. وبيت باااارد

وبيت عمران هوى وتحنان.. وبيت جامد

بيوت مليانة فرحة وحب

وخير وأمان

بيوت عدمانة من الود..

زمن مسكونة بالأحزان

بيوت زااااهية.. وبيوت وااااهية

بيوت تديك سلام وأمان

عشان فيها النفوس صافية.. وفيها التقوى والإيمان

٭ ٭ ٭ ٭

بيوت متروسة مال وإثاث

وخالية من الأمل والناس

بيوت لا لمبة ولا بوتجاز

وناسا لُطاااااف حُنان ولُذاذ

في بيت عاااالي وحوشو كبير

وسيدو وزير خيرو وفير

وليهو غفير .. وبيت من طين

في راكوبتو بس فد زير

ورغم الساكنو زول مسكين

بس حقاني عندو ضمير.. بيوت البهجة عنوانا..

وطول اليوم ضحك وهزار

وبيوت طوالي حرقانة

مولعة زي تقول من نار

بيوت بتراعي حق الجار .. وفيه من الخيار أخيار

بيوت لا بتعرف الجيران..

ولا بتستطلع الأخبار

بيوت تمليك.. بيوت إيجار

وماااابتلقاها بالهين .. ولازم تكرم السمسار

وشوف في سكتك كم بيت .. وفي كل البيوت أسرار

٭ ٭ ٭ ٭

وفي بيت مسكون.. وبيت فاضي .. وبيت جاحد.. وبيت راضي

وبيت مشكلتو معروفة

ووصلت محكمة وقاضي.. عشان عُشرة سنين هانت

وكل واحد بقى في وادي.. وفي بيت حدادي مدادي

بس مافيهو غير إتنين.. وبيت ملياااان تقول نادي

٭ ٭ ٭ ٭

وفي بيت سكانو متآلفين.. على الحلوة وعلى المُرة

وبيت سكانو مختلفين.. ما بتفقوا بالمرّة

وبيت ستو مرة ضيفان.. مرة سُترة

ما بتستاهل الهجران.. ولا بتستاهل الضرة

بيت ستو دوام.. بتباري في النسوان

لا بتعرف تكرم الضيف.. ولا بتورِّق الخُدرة

٭ ٭ ٭ ٭

وفي بيت محروم من الأطفال

من ضحكة عيون حلوين

وكل يوم ناسو عند دكتوركبير.. أتعابو بالملايين

وبيت أطفالو زي عشرين .. ومحتاجين حق كراسة ما لاقين

وبس عايشين على الله.. ما قادرين يسدوا الدين

وناس تانيين.. مرتاحين.. وهَم في الدنيا ما شايلين

٭ ٭ ٭ ٭

وياما وياما تلقى بيوت .. بيوت صاخبة

وبيوت لا ليها حس ولا صوت .. وكل ناس البيوت بتموت

ويبقى البيت شبر واحد.. وبكرة تكون بيوتنا قبور

لا هم مويه لا هم نور .. ويبقى مُنانا في الجنة

وننسى حكاية السُترة.. وحكاية الريد

كأننا لحظة ما كنا.. ولا فتشنا يوم عن بيت

حليل البيت.. وهم البيت.. وناس البيت
حليل الدنيا بالفيها!! وكل الفيها لا ماليها ولا مكفيها

Post: #304
Title: Re: فنجان جبنة ولمة ناس حلوين
Author: عبد المنعم سيد احمد
Date: 02-10-2015, 02:12 PM
Parent: #303







كل سنة وانت بالف خير..عزيزى الفاضلابى
شكرا للمداخلة الراقية
تمنينا وجودكم من محبتنا لكم..ياعزيزى


Quote: هوى ياجنا سيداحمد ,, العيد مَبَارَكْ عليك
ياخ بوستك ده يعمينى ماشفتو ,, مابتقصر
عارفينك ,, زول واجب ,, امسحا لى فى جلابية
ودالمنسى دى ,, ياخ كان فتَّنا ورُحت الجبنة بتبقى
مسيخة زى اللَّت السوق ,, حقك علينا ,,
بى مناسبة الجلابية دى ,, واحد قال هسع سيدنا يوسف
ده لو كان لابس جلابية انصارية كان موقف الشاهد حايكون شنو؟

Post: #305
Title: Re: فنجان جبنة ولمة ناس حلوين
Author: عبد المنعم سيد احمد
Date: 02-10-2015, 02:15 PM
Parent: #304

عيدية..دائما من عواده.عيدية..دائما من عواده.

Post: #306
Title: Re: فنجان جبنة ولمة ناس حلوين
Author: Basamat Alsheikh
Date: 02-10-2015, 02:55 PM
Parent: #305

لانها غداً ستصبح ماضى فالاحسن الواحد ينساها الآن ,,
عشان ماتفسد الحاضر ,, لان المستقبل غيب ولاندرى ماالذى يحدث فيه ,,
ومن اليوم داك وانا بحاول اتمسك بحكمة تبيان.. نامن القى نفسى مدلدل فى مشكلة ,,,
وانتى زى ما قلت ليك مهمتك الاولى هى التركيز فى دروسك ,,, وما تخلِّى فرناغة بكرى دى تحجب الرؤيا لديك.
,,,,,,,,
,,,,,,,
,,,,,,,

نقلت الاقتباس ده من بوست فيصل خليل، ود حلة بت مصطفى
وقلت هحسن ارد هنا ، عشان كمان ما يقوم يزعل مننا اكثر من كده...( وش ضاحك)..
.. دي نصيحة غالية جدا وحأعمل بيها من اليوم .. وشكرا كتير كنير...
.. بس كلمة فرناغة دي إلا يجو ناس ود العبيد واسحق ود بلة وود شيقوق وود البوش يشرحوها
لينا...
ودمت بالف خير وصحة وعافية .. وان شاء الله يخلي ليك تبيان ونشوفها فيي المستقبل استاذة في جامعة هارفارد

Post: #307
Title: Re: فنجان جبنة ولمة ناس حلوين
Author: عبد المنعم سيد احمد
Date: 02-10-2015, 03:17 PM
Parent: #306

Quote: . بس كلمة فرناغة دي إلا يجو ناس ود العبيد واسحق ود بلة وود شيقوق وود البوش يشرحوها
لينا...



الفرناغة دى بت عم الكتاحة لزم
يابسمات
ماتقولى لى الكتاحة دى كمان شنو
ههههههههههه

Post: #308
Title: Re: فنجان جبنة ولمة ناس حلوين
Author: Basamat Alsheikh
Date: 02-10-2015, 03:30 PM
Parent: #307

لا.. لا.. كما ما للدرجة دي .... الكتاحة دي يا ما عمتنا في مدارس اتبرة.....
ومرات يوقفوا الحصص ويقولوا لينا ارجعو البيوت ونفرح ونشكر الكتاحة..
ودمت..

Post: #309
Title: Re: فنجان جبنة ولمة ناس حلوين
Author: خالد علي محجوب المنسي
Date: 02-10-2015, 06:00 PM
Parent: #308

الخلا ولع .........
والخريف بهل فوق صنقوع المحلِّ
ومرق الدبايب من جحورا
ظهر الدبيب ود شيقوق ......

وين الفنجري ود المقدم العبيد .... تعال آ زول اسمع جنس النضمي

وصف الخِنتيلة
جمال تاجوج ......
المافي متيلا
وهات يا زميل ......


وتيه و إتاكا ....
مُراض وصحاح مُقلُ الفتاكا
ظِبي الرام



Post: #310
Title: Re: فنجان جبنة ولمة ناس حلوين
Author: خالد علي محجوب المنسي
Date: 02-10-2015, 06:07 PM
Parent: #309

فنجان قهوة بي شمالو
يسوى الدُنيا بي حالو

سلااام علي حوشك ود الفاضلابي عبدالعزيز وفيه تحلو جلستنا
سمحة القراية أم دق وما لاقي مهلة أكون بينكم

آناس اليانكي في امريكا الاميرة و بسمات .... والصوت والنغم على طعم الجبنة أمانة ما حلو


Post: #311
Title: Re: فنجان جبنة ولمة ناس حلوين
Author: مني عمسيب
Date: 02-10-2015, 06:37 PM
Parent: #310

سلام يا ناس الجبنة المجيه ..

دي جيتي من حواشة الزهور الليلتي وكل واحد يشيل زي ما داير من ورود .

image-2015-09-3.jpg Hosting at Sudaneseonline.com

Post: #312
Title: Re: فنجان جبنة ولمة ناس حلوين
Author: خالد علي محجوب المنسي
Date: 02-10-2015, 07:28 PM
Parent: #311

جميلة الروح بت عمسيب
ولك التحية والمودة

والزهور والوردِ



Post: #313
Title: Re: فنجان جبنة ولمة ناس حلوين
Author: عبيد الطيب
Date: 03-10-2015, 06:52 AM
Parent: #312

مخاليق مولانا الجميلين جميعا ، وحادي نوقنا الفاضلابي
كل عام وأنتم ممهولين وبالكم رايق
الأستاذ مامون ودالنور
سلااام ومعزة، وشكرا لك للسماحة ،وإن نال مانكتبه إعجابك، ووقتك، تجدني فرحا بذلك، لأنك من مُداخلتك، والكاتب عنوانه المفردة،
ومن كتابتك،أنَّك من مخاليق مولانا الجميلين
الأخت بسمات ، تحيَّات نواضر
الفرْناغة دي إن شاء الله لاتلاقيكي ولا تمرِّي ب دربها، يشهد الله تقول الكتاحة أخير منها، كما قال الزول السمح عبدالمنعم
في منطقة ومشرع ومورد شهير ببادية الكبابيش إسمو
"الفرجي..الفرجة"، أها المُشرع دي فرناغة عجيبة، يعني الرَّي من الدِّكَّة أو الفرقان،حتي يصل "عِد الفرجة " آبار،
بكون من الفرناغة كل الوجوه إتغيرت من الغبار، وأصبحوا الواردين ، أشكالهم فرجة..!
أي يتفرج عليهم الناظر لهم..! من قبحهم من غبار الفرناغة...!
أها يا بسمات بت الشيخ، "الفرناغة" دي اساس هي مِيع أو ميعة أرض خليط من الرمل والطين، بتمسك ماء المطر في الخريف ،
لفترة قصيرة، وفي الصيف عندما تمر فوقها، حوافر الدَّواب،تخرج غبارا كثيفا، وغبارها خليط من الرَّمل الناعم والطين النَّاعم،
لذا يكون وقعه علي الوجوه صعبا
الصديق الترايمو الروح، وإتشاشي لي شوفتو خالدودالمنسي
سلااام ومعزة
ياخ يشهد الله القلوب شواهد، الناس الجميلين ديل تابعتهم بأذنٍ مرهفه لشدوهم ، وخاصة حسن محجوب وضياء
مرضيان سيادتك
وقاصدك عيادتك...
من نظرة خاطفة...وأقلَّ عاطفة...
ألااااامي تُشفي وحرارتي تُطفي..
ل فكري توحي
أدبي وطموحي.
الله..... لي روحي...أطلق سراحا..وأضمد جراحا
وأدِّيها راحا
قول فيها وصفه...
مع إبتسامتك الدنيا تصفه
ياخ الزول حسن محجوب دي يا خالد أخوي ،غنَّاي
وبغني من قلبو...! بعدين ، من الذين بعثوا في غنا الحقيبة الروح من جديد، بعد أن خربه مطوعين الطاري..!
ود أب سن ياشفيف الجلافة منِّك بعيد

Post: #314
Title: Re: فنجان جبنة ولمة ناس حلوين
Author: عبدالحفيظ ابوسن
Date: 03-10-2015, 07:46 AM
Parent: #313

تشكر العبيد اخوي
ودة من فرط محبتك ولك مثلها
اها الفرناغة ولا الفرنغاغة .. في خاطري التراب الناعم جدا ومنحل .. يعني كان ماشي فيهو كراعك تغطس جواهو .. ولامن يجبهو هواء علالتو بتربط .. عكس الارض العزازة
تعرف البطانة رملة خشنة .. مرة الدنيا صيف وانا لابس بنطلون قميص وقام هوا بي ورانا وجانا . عليك امان الله سيطان بتمحط فينا .. الرقبة والكرعين تحت .. لو جلابية الزول بتصرف

Post: #315
Title: Re: فنجان جبنة ولمة ناس حلوين
Author: درديري كباشي
Date: 03-10-2015, 08:17 AM
Parent: #314

يا سلام على هذا البوست
الذي أصبح كل ما يكبر يكبر
ود المنسي وود الطيب وود أبو سن وبت عمسيب
أضافة لأهل الدار بت الشيخ والفاضلابي وباقي عقد الورود
فأصبح البوست يشبه رائعة أستاذنا بشرى الفاضل
التي عبقها مصطفى بعبقريته اللحنية
الصحرا فى عينيا تتواثب جناين
ماخدة صوتـك مـن جـداول
وما خدة صورتك من كهـارب
مـولـداً ميـدانـو حـافـل
كـلـمــا يـصـبِّــح ...
تجيهـو الـنـاس جحـافـلْ
يـا سـلام .... يـا ســلام

ما نقولها كلها أحسن :

حلوة عينيك





نفسـى فـى داخلـك أعايـن
وأروى روحى وأشوف منابعك
يــــــا ســــــلام
الصحرا فى عينيا تتواثب جناين
ماخدة صوتـك مـن جـداول
وما خدة صورتك من كهـارب
مـولـداً ميـدانـو حـافـل
كـلـمــا يـصـبِّــح ...
تجيهـو الـنـاس جحـافـلْ
يـا سـلام .... يـا ســلام
***
لمّـا تعبـرى فـى الشـوارع
شوفى كيف النـاس تصـارع
ناس تطفِّـر .. ونـاس تدفِّـر
فى البشابـى علـى نجومـك
وفى البخبْ .. كايس تخومِـك
وكل زول من عِنْ سُلافـك ..
لا لا .. قـال دايرلُـو كـاسْ
***
مرّة طربان .. شلـت صوتـك
شــــان أغــنـــى..
قـلــت آه يـالـيـل .. وآه
إنتى أول .. وإنتـى تانـى ..
وإنتى تالت .. وإنتـى رابـع
نافـرة زى صـيـد الـخـلا
وصافيـة زى نبـع المنـابـع
وقلتى لى غنـاى .. خـلاص
***
حلـوة عينيـك زى صحابـى
عنيدة كيف ... تشبه شريحتين
مـــــن شـبــابــى
حلـوة عينيـك زى صحابـى
وزى عِنـب .. طـوّل معتّـق
فـــــى الـخــوابــى
وسمحة زى ما تقول ضيوفاً ..
دقّـــــوا بـــابـــى
.. فرحى بيهم سال .. مـلا ..
حــتـــى الـكـبـابــى

**************************
أجمل ما قرأت أو سمعت لا أذكر ومتعلق بالأغنية أعلاها رواها الراحل حميد .
قال عندما كان مصطفى يلحن في هذه الأغنية قاطعه حميد وقال
لو أستبدل بشرى الفاضل (وزى عِنـب .. طـوّل معتّـق
فـــــى الـخــوابــى ) ببلح لآنه نحن نعرف البلح ولا نعرف العنب .
قاطعه مصطفى ضاحكا وقال يا شايقي يا مغفل لم بلحك عليك دي بشرى الفاضل كتبها في واحدة روسية في موسكو .
هههههههههههههههه
يا سلام على الروح
وألخوة في الانسانية .

Post: #316
Title: Re: فنجان جبنة ولمة ناس حلوين
Author: عبيد الطيب
Date: 03-10-2015, 08:18 AM
Parent: #314

Quote: اها الفرناغة ولا الفرنغاغة .. في خاطري التراب الناعم جدا ومنحل .. يعني كان ماشي فيهو كراعك تغطس جواهو ..
ولامن يجبهو هواء علالتو بتربط .. عكس الارض العزازة
تعرف البطانة رملة خشنة .. مرة الدنيا صيف وانا لابس بنطلون قميص وقام هوا بي ورانا وجانا .
عليك امان الله سيطان بتمحط فينا .. الرقبة والكرعين تحت .. لو جلابية الزول بتصرف



ههههههههه
بس دي الفرناغة ...
وإن شاء الله بت الشيخ مولاها ما يداقشها بيها تب...!
قلت لي بنطلون السواااااد وقميصو بقن ليهن سيحان من دُك الفرناغة
اها بقيت فرجي ل العرب...!
زمان عندنا دمر درت إسمو الفرينيغة، أها في إجازتي الأخيرة لقيتو بقي مناجم دهب..!
شفت رحمة مولانا الناس الملاهن دُك... وصبروا علي علالتو وعجاجو ....
قبَّل ملاهُن دهب الناقِِرشفت كيف..!
وعن الدُّك وعجاجة الكرعين قال الشاعر الرائع ودقدَّال الكباشي:
هِياج الصَّيف والبول المعبِّس لُكُّو
قصدي إتسيبو والمُخ ب الزيادي تسكُّو
دوديبا مقاصر الوادي جنبو بحكُّو
باين لي بي جنقك بتطير دُكُّو
شفت كيف يا شيخ العرب ، الدوداب خاطم الوادي وملاصقو
أها بطيِّر علالتو ، وهو متوجه فرقان أُم عِروض
أها العلال دي ودالمنسي جاب خبرها زمان مع "سايق الفيت" للنادِر جدا الشاعرالعبَّادِي

Post: #317
Title: Re: فنجان جبنة ولمة ناس حلوين
Author: عبد المنعم سيد احمد
Date: 03-10-2015, 01:18 PM
Parent: #316



اهداء للرائع
الدرديرى

Post: #318
Title: Re: فنجان جبنة ولمة ناس حلوين
Author: عبد المنعم سيد احمد
Date: 03-10-2015, 01:21 PM
Parent: #317




اهداء للرائع
عبيد الطيب

Post: #319
Title: Re: فنجان جبنة ولمة ناس حلوين
Author: درديري كباشي
Date: 03-10-2015, 03:04 PM
Parent: #318

ويا سلام عليك أنت يا عبد المنعم يا فنان وأنت تصنع لنا يومنا بهذه الروائع الخالدة فينا

Post: #320
Title: Re: فنجان جبنة ولمة ناس حلوين
Author: خالد علي محجوب المنسي
Date: 03-10-2015, 08:32 PM
Parent: #319

الحبايب ود المقدم ود منعم
ود سيد أحمد .... العزيز الدرديري
والجميل ابوسن لكم المودة حبل سبحة

يا ود المقدم نبكي و ننوح ونصيح
لي الشوفتن بتريح



Post: #321
Title: Re: فنجان جبنة ولمة ناس حلوين
Author: خالد علي محجوب المنسي
Date: 03-10-2015, 08:57 PM
Parent: #320

خليل فرح كان معروف من الشعراء الذين ناهضوا الاستعمار بالكلمة
ومن قصائده المشهورة ( عزة في هواك )
وقد جراه في في القصيد الشاعر العبادي بقصيد ( عزة الفراق بي طال ) وقصيدة أخرى للشاعر مصطفى بطران ( عزة عزة وصالك )
وعزة هي زوجة المناضل علي عبد اللطيف ( رمزوا بها للسودان في غناهم )

لكن ما أجمل الكلام منظوم عندما عاد الشاعر الشاعر خليل فرح يذكر ايام حب له في مدني ( في شبابه )

مالوا عياهو النضال بدني
روحي ليه مشتهية ود مدني


ود مدني
الشاعر/ خليل فرح
ما له أعياهو النضال بدني
روحي ليه مشتهيه ود مدني
ليت حظي سمح واسعدني
طوفه فد يوم بي ربوع مدني
كنت أزورو أبويا ود مدني
واشكي ليه الحضري والمدني
آه علي حشاشتي ودجني
وا حنيني ولوعتي وشجنى
دار أبويا ومتعتي وعجني
يا سعادتي وثروتي ومجني
حين سألنا حاوي الوصب
من خمايل قرية القصب
قالوا جات سيرتك علي النصب
ونحن بين الروض والقصب
صنفتن بعدها قالن إن تصب
تربط الأحلام مع الخصب
كان حبيبنا وحاشا ما نُصبي
ومن زمان فارقنا وهو صبي
تاني ما سمعنا انقطع خبره
يا حليلم طشوا ما اتخبروا
واحدة فيهن قالت انجبروا
فقر ابونا وخدمة النبرو
الكنانة أكرمت نزلي
واغدقت من خيرها كل زلي
إن حييت أو مت في الأزل
ده مقدر طبعه في الازل
غايته بختم نفثتي الخطرت
بي تحية من حشاي شطرت
للتدور والطاريى والما طرت
وسلاما ما الغصون خضرت




Post: #322
Title: Re: فنجان جبنة ولمة ناس حلوين
Author: خالد علي محجوب المنسي
Date: 03-10-2015, 09:32 PM
Parent: #321

ود سيد أحمد منعك يا جميل
سمح الذوق
ولك سايق الفيات بوت كان سبب في شهرتها علي إبراهيم اللحو




من الأذاعة التسجيل


Post: #323
Title: Re: فنجان جبنة ولمة ناس حلوين
Author: Osman Musa
Date: 04-10-2015, 00:58 AM
Parent: #322

روحي ليه مشتا قة ود مدني .
يا سلام
دي بقت جبنة بي الباسطة عديل .
يا جماعة والله مافي أحلي من البوستات البتلم ناس جميلين زي ديل .
لكم التحية وأحد وأحد و وأحدة وأحدة .

Post: #324
Title: Re: فنجان جبنة ولمة ناس حلوين
Author: خالد علي محجوب المنسي
Date: 04-10-2015, 10:18 AM
Parent: #323

Quote: الشاعر/ خليل فرح
ما له أعياهو النضال بدني
روحي ليه مشتهيه ود مدني
ليت حظي سمح واسعدني
طوفه فد يوم بي ربوع مدني
كنت أزورو أبويا ود مدني
واشكي ليه الحضري والمدني


يا عثمان جنى موسى
فعلاً من عيون الشعر السوداني هذه الأغنية ( روحي ليه مشتهية ود مدني
الخليل اي خليل فرح معروف أمتاز بخلط العامية السودانية بالفصحى وله في ذلك باع طويل
في هذه القصيدة .زكنت كما يقال أستراحة محارب أعياه النضال ضد المستعمر بالكلمة ولفترة طويل
كانت الذكرى باعث هذه الشجون ...

تذكر المحبوبة في ديار مدني ... أيام الصبا .. وهم في حقول ومروج الجزيزة أم دوح
وكانت ضربة البداية
مالو .. اعياهو النضال بدني
روحي ليه مشتهية مدني
لا يريد الإنسحاب من ساحة النضال لذا يتساءل وهبت نفسي للنضال ضد المستعمر ما هذه الأفكار في عشف وحب الصبا طفرت للعقل مرة
أخر .. وما هذا الشوق الذي غمرني لتلك الديار ( ود مدني ) والشوق لم يكن للديار إنما لساكني الديار
وكان الطلب من الله دعاء
لو حقق الله الأمنية وزرت ديار المحبوبة .. طوفة ..و الطواف معروف فد يوم كل مناي في ربوع مدني
وليت الحظ يسعدني بهده الزيارة .. زيارة فيها أجتر الذكريات من صبا قبل الخوض في بحر النضال
ضد المستعمر .... نزرا أن أزور أبوي الشيخ ود مدني ( و هو مدني السني )
لما أشكي كم عانيت من في ديار الحضر والمدن ( البندر .. ويعني ما عناه من ضروة النضال )

Post: #325
Title: Re: فنجان جبنة ولمة ناس حلوين
Author: خالد علي محجوب المنسي
Date: 04-10-2015, 10:36 AM
Parent: #324

Quote: حين سألنا حاوي الوصب
من خمايل قرية القصب
قالوا جات سيرتك علي النصب
ونحن بين الروض والقصب
صنفتن بعدها قالن إن تصب
تربط الأحلام مع الخصب
كان حبيبنا وحاشا ما نُصبي
ومن زمان فارقنا وهو صبي


هيجتني الذكر
والذكر كامنة في الذاكر لكن تحتاج لمن يحركها للطفح للسطح
وكان اللقاء مع حاوي الوصب من عمال المشروع ( ايو مشروع الجزيرة ) ويظهر أن الشاعر كان ابوه يعمل في تلك الديار وشبَّ وترعرع هناك قبل الهجرة للبند أم در
ماذا قال حاوي الوصب الذي لازمه في أيام الصبا
القول كانبعد سؤال كيف الديار وساكني الديار ( المحبوبة )
قال : جات سيرتك على النصب ( النصب : شبه كومات القصب متساندة مع بعضها في شكل عمودي كأنها نصب ( كما النصب التذكاري )
من خمائل قرية القصب .. اي تلك الزارع التي فيها كان لقائنا بي الحسان ...
نحن بين الروض والقصب
فهمي لهذا البيت يعني به : عندما كانوا في عمر ترويض وغصب اي افعل هذا ولا تفقعل هذا والله أعلم والخليل أعمق من أنيكون يقصد المعني المباشر .. اي أيام كانوا يرتعون
بين الرياض وحقول القصب .. ومع أنه يمكن أن نحمل هذا المعنى .. لكن الأول اعمق
هناك جات سيرتك .. ووكت سيرتك إجيبوها أهلي كتير بريدوها
صنفت : اي سكت بره عندما جات السيرة عن الخليل ... ثم بعدها قالت ... إن تصبي .. اي يحالفها الصواب
كان حبيبنا وحاشا ما نُصُبي
اي حاشا لم يكن نصاب اي مخادع في مشاعره
ومن زمان فارقنا وهو صبي
كتب الله الفراق لنا عند هجر الديار متوجه للبند وكان أيامها صبي يافع

Post: #326
Title: Re: فنجان جبنة ولمة ناس حلوين
Author: عبدالله ود البوش
Date: 05-10-2015, 07:37 AM
Parent: #325

عووووووووووووووووووووك الناس العزاز وعزيزات سلام واحترام
اسع انا ابدا من سنة أولى ول اركب معاكم سنة رابعة واقوم سداري
دردق بي يا اللوري دردق بي

Post: #327
Title: Re: فنجان جبنة ولمة ناس حلوين
Author: درديري كباشي
Date: 05-10-2015, 08:06 AM
Parent: #326

أنا جايب لكم مسدار الحردلو بتاع البطانة

بس طبعا الترجمة واردة للضلعاء ود البوش وود المنسي وود الطيب طبعا أولهم ود أبو سن خلي يجي يفسر لنا كلام جده

" مسدار الصيد "
للشاعر الفحل الحاردلو
(أحمد عوض الكريم أبو سن)

الشم خوخت بردن ليالي الحرة
والبراق برق من منا جاب القرة
شوف عيني الصقير بي جناحو كفت الفرة
تلقاها ام خدود الليلة مرقت بره

تعرف لي مشاهد الرقاد والفرة
فلاخ المصب بيه بتبين تِتْورَّا
فوق حيا فوق محل من الصعيد منجرة
شاحد الله الكريم ما تلقي فيه مضرة

أب عراق فتق قرنو المبادر شرا
الباشندي عمت مهشيشب الدرة
من النقرة كل حين فوق عيلو منصرة
ها الايام محاريها القليعة ام غرة

قدمت من هنا وبي أضانا سمعت كرَّة
فوق كرتوت شخيتيراً تِخَيِّن خرَّ
قلاتو الوهاط بي لشغة قبل ام حرَّة
يا باسط النعم تسقيها في ها المرَّة

بت المن قرين مرقن على الجبال
في بية وبلوس ما برجن الوبال
صفراً درعتن تدلى لا البهال
وبيضة شاش قرابيبن تريع البال

مرقن يامجيب لي جملة السعال
شاحدك تجمعن من مطبق الحلال
ما ينقص حساب الدرج ولو بي عجال
ونحن نجيب لهن في كل يوم منوال

من بيلا الصباح اتسربقن همال
والدوف فوق حقايبهن كترته جمال
الخور العطيش بلدا عزاز ورمال
ومدروك ما هو من حر النهار بكمال

عقبن ود دعول بجرن شفاقة عدال
ختمن مقرح الحربة الجبالو طوال
قلت امات قرود وردنة بالقبال
خِلَقاً كيف برمولن دمير حبال؟

من امات رميلة متركشات لا شمال
سمعن هدري لا قدام كرير واضلال
اشرحط بريقن لاح يشيل ولوال
وتيسن زاعلن باكر مع الشهلال

خلاهن رتوع في بقيل وخرجة نال
لامن دور الوادي السِّري سيال
فوق قمزوز طلع شاف في ملينتو زوال
وقلعة كو حفيرها لقالو فيها نعال

مطامنات هناك لام نهارن زال
وشرفن كلهن شمن دعاش اتعال
مابيات البلد دايرات حقو السروال
وصفاً متع الغناي قدر ما قال

في عاقب نهار سونلهن مرحال
وعينيهن خلقهن زرق بلا كحال
من ريح الحويل بقين دحين في حال
وديل ليمن على الناس المتلنا محال

جاهن منقلب وقتاً عصير وشفاف
وكاسب ليلو بيهن من صدف ماخاف
ديل الطبعهن دايم الأبد عياف
وفي نايط السروج لقين بقيلاً جاف

حجار المزار المن بعيد بنشاف
جرَّن فوقو اللي التعفر عاف
من عند المضيق مرقن هناك بسناف
ديل قسين على القوي والمتلنا ضعاف

لونن من بعيد متل البليلي نضاف
حُرْد ومعصرات من شبة الأكتاف
لي الناس البغنولن يجروا القاف
ماليات الخشم من كامل الأوصاف

اتنفضن من الغبش اب صهيب ناموس
وجن بين القصيرة وبين فريع قلبوس
سدر المرمي لقين رده مو مانوس
وطاحن من حقيقيصو المعيز ارموس

خلالهن على حجر الصفية حبوس
ولقى في الدهسريب قمبار وعرق فقوس
في المخلوقة شن تشبه معيز ام روس
غير الفي وريدن شولقن مرصوص

تيسن لي مراتيعن تملي بكوس
وديمة بقِلْ على البرق البشيل حرقوص
كم زولاً رقد فوق دربهن ممغوس
ومنو اتخلسن ما صيدن جاموس

قامن منهن اتنين مضاكرة تيوس
ولقين في السمير ختاً وجيع مكبوس
دمجاً أزرق مشاهدو مو معفوص
وخَّرَن منو في الميع المقامو البوص

أخدن فيه سبوع دورين حسابن تام
من أوديد بزاول شرفهن قدام
طلعن قوز كديس جاهن سقيط نمنام
وصلن حد بطانة مركز العدام

الهبريم طلع جاب الميع حوام
من شهر النفاس فضلن لهن أيام
انقلبن على القوز المقامو تمام
لونن بشبه البفت الجديد والخام

ديل الطبعهن دايماً خفاف وهمام
وفي سمير ودحريري مضقلات كل عام
قربن لي مواليد الرخيص وبعام
ومن عين البعاين سورة الأنعام

نون بالنجيع يا سابل الأكمام
اسبل سترك السابل على النيام
تيسن جك مغرب وبي الملاين حام
وجاهن وعافطنو وحيل سدوهن قام

من دعت السراويل قبلن دارتان
علي العشنوق لقن زوزاي وبي فارات
عسكر خاف عليهن في ضرا ميعات
وجاهن زاعلن بعد النهار ما فات

ختمن شابلك العارق التلات شدرات
مرقن فوق عزاز حمريبة ام سوبات
داشن لي الصباح ما لقنلهن مرحات
لامن لينن باكر على الطلحات

خلاهن على رد الفروخ بايتان
وفي المكفي الورى ام ميمون لقى ختيتات
متماسك سدوهن وبي الحدوب شاتات
وجاهن وعافطنو وجنو منحتات

ديل الديمة من رد الأنيس ناجعات
وكل حين فوق عليون نابي منجمعات
تيسن دور الوادي الورا القلعات
ضمر خلقة مو من قل المعاش ضايعات

خلاهن علي رد الدموكيات
قلع الفار سليباتو اتلقن باردات
قربن حضرنبو ولي النفاس دانيات
وفي دردور شدير ومعاه حمريبات

انحلن جناهن في ضرا نالات
لامن رضعنو وجف من السبيات
كم فوقن دقوناً ولفن قافات
وقالن دوبا ليهن والزمان الفات

الحي في الوجود والقالو قبلنا مات
كله بلاهي بي لهج الطريفيات
شن ما قلنا فوق دغس العيون ساويات
قبلي ود ابشوارب جابلهن نمات

يا باسط الأراضي والسبع سماوات
كل البدبي فوقن حافي وابنعلات
دغس العين تنجيهن من الآفات
لامن وخرن بيلا المعيز جامعات

مرقن من مطيبقات الخوي اب دنان
وهكعن فوق معالق الوادي ابو ريحان
شافن في السمير زولة وحيامت انسان
ونطحن ها القليع المسمى بالنسوان

وكت ادردقن بي مطبق الوديان
كلبي الشارعو فيهن جا منقلب هقلان
واتحير قعد ساكت بقيت محنان
يكتب لي لماهن ربنا المنان

تيسن جا منقلب من الرحيح ضبلان
من قفر بلداً بعيد قسيان
اب سعنة الرشيد لقينو خورو ملان
بتفلَّت علي نعناعو ليهو زمان

من الفجخا هبر خلالهن
لامن دور امات رميلة وجاهن
عند المتنا في عاقباً جديد لماهن
ختمن بيلة، فوق قلع البقر دلاهن

المعزة البجازن ديمة فوق في خلاهن
بالغات النصاب انصاري ما زكاهن
من ود البصير جايب اذن بي غناهن
شوفن يالزبير في لساني كيف محلاهن

من عوج الوقت ما بتركن وانساهن
فوق حيا فوق محل دايماً بجرو غناهن
ناس ابن الذريح ضربو المثل بي جناهن
ومن كل السوام سيدي الحسن يبراهن

قطعن ود دعول وادن قليعو قفاهن
جفلن من زوال شوفاً بعيد باداهن
ملزوم بي مراتيعن وخبرة ماهن
وصلنو المصب واتوكرن في ضراهن.

Post: #328
Title: Re: فنجان جبنة ولمة ناس حلوين
Author: إسحاق بله الأمين
Date: 05-10-2015, 08:35 AM
Parent: #1

Quote: عمنا إسحق بلة الأمين كاهن في محرابه القصصي ..أحسبه يمتع نفسه ثم يمتعنا باجود ما يكون من القصص


الأخ الفاضل / مامون
سلام وشوق واحترام
كل عام وأنت أخي الفاضل بالف خير
ياخي ده لطف منك وأخوك زولا درويش ساكت يسمع ونسة وسواليف أهلنا الكبار ويحاول سردها في شكل حكاوي وقصص عفوا هكذا بدون تكلف.
صافي الود

Post: #329
Title: Re: فنجان جبنة ولمة ناس حلوين
Author: خالد علي محجوب المنسي
Date: 05-10-2015, 10:15 AM
Parent: #328

Quote: الشم خوخت بردن ليالي الحرة
والبراق برق من منا جاب القرة
شوف عيني الصقير بي جناحو كفت الفرة
تلقاها ام خدود الليلة مرقت بره



يا سلااام يا الحبيب ود كباشي درديري
حديث البطان له في المفردة عمق وأبعاد .... والتي لها فطاحلتها ناس ود المقدم وابوسن و وضاحة
نحن ناس حضر هههههههه
تأمل هذه المفردة خوخُّت
لم يقل مالت عليك الله شوف فصاحة العرب ديل
والشم : وهو تفخيم لا تصغير للشمس
تسلم يا يابا علي الأبيات السمحة لسيد شعراء البادية الحادلو

ها ناس وين بت مصطفى حت هي عندها أمتحان الشى شنو الله الامتحانات مطمورة فوق قوز بدر

Post: #330
Title: Re: فنجان جبنة ولمة ناس حلوين
Author: Basamat Alsheikh
Date: 05-10-2015, 02:31 PM
Parent: #329

بس طبعا الترجمة واردة للضلعاء ود البوش وود المنسي وود الطيب طبعا أولهم ود أبو سن خلي يجي يفسر لنا كلام جده

" مسدار الصيد "
للشاعر الفحل الحاردلو
(أحمد عوض الكريم أبو سن)
>>>>>>>
<<<<\

يعني يا ود ابوسن تراكا ما قاعد في الواطة...انت حفيد احمد عوض الكريم ابو سن وما تكلمنا..
هل انت بتعرف معلومات كافية عن ابو جدك عوض الكريم ابو سن...وهو من الشخصيات السودانية
المعروفة التي اثرت في مسار التاريخ السوداني المعاصر.. وطبعا انا عرفت المعلومات دي من
كراسات بت مصطفى التي تكتب عن الشخصيات البارزة في المجتمع السوداني والتي لها تاثير في مسار
التاريخ السوداني المعاصر .. وقرأت عنها الكثير عن ناظر عموم الشكرية عبد الله عوض الكريم ابوسن
وولده عوض الكريم الذي لزم اباه وتعلم منه فن نظم الإدارة وكان على درجة كبيرة من الاعتدال بالنفس وكان
يمتاز بالذكاء الحارق وكان مسؤولا عن ادارة قبائل الشكرية في كسلا والنيل الازرق .. كمتا كان عوض الكريم ابوسن
احد اعضاء الوفد السوداني الذي سافر الى انجلترا بعد نهايةى الحرب العاللمية الاولى نائبا عن والده الذي كان كبيرا في السن
وبعد ذلك اصبح ناظر عمزم الشكرية من عام 1923م وحتى وفاته عام 1942م .. وكان حاكما نزيها غفيفا ومحبوبا عند جميع الناس
وكذلك مهابا ومثالا صالحا للحكم الصالح ,, وتوجد معلومات كثيرة جدا عن هذا الرجل الشهير في كراسات بت مصطفى ..
وما دام يا ود ابوسن هو والد جدك لازمن تكون عندك معلومات اكثر وممكن تمد يت مصطفى بهذه المعلومات..
ودمت بالف خير وصحة وعافية
ودي صورة لزعيم قبائل الشكرية عوض الكريم ابو سن
( حاولت انزل ليك صورة والد جدك عوض الكريم ابو سن .. لكني فشلت..)

Post: #331
Title: Re: فنجان جبنة ولمة ناس حلوين
Author: عبد المنعم سيد احمد
Date: 05-10-2015, 03:05 PM
Parent: #330



اهداء للرائع
ود المنسى

Post: #332
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 07:27 PM
Parent: #331

Quote: الفرناغة دى بت عم الكتاحة لزم
يابسمات
ماتقولى لى الكتاحة دى كمان شنو

ههههههههههه
زى ماقال ودالبوش ,, هسع الزول يبدأ من وين ,, فتنا خليناكم ,, جاريين
وراء الهلال والمريخ ,, جابولنا (دَمْتَايِرْ) دى اسعلوا منها ودالبوش.
وفى قول آخر ياعبدالمنعم ,, الفرناغة دى ضَرَّة الدَّلَجة

Post: #333
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 08:32 PM
Parent: #332

Quote: وصف الخِنتيلة
جمال تاجوج ......
المافي متيلا
وهات يا زميل ......


وتيه و إتاكا ....
مُراض وصحاح مُقلُ الفتاكا
ظِبي الرام

هييييع عارفك بَكَّاى ,, هلَّا هلَّا ,, ياالمك ,,
يا قول ود شيقوق عارفك وكت تهز حجباتك
تبقى زى ريس المركب يجيب الهوا من قرونو
.

Quote: سمحة القراية أم دق وما لاقي مهلة أكون بينكم

ودالمك يابسمات بقران منك انتى واميرة وامتثال
بسوِّيلو فى ماجستير ,, ظنّيتو فى اللغة الانجليزية
اظنه داير يترجم للخواجات كلام العبيد ودالطيب
بس ماعارف الخنتيلة دى حايترجما كيف؟

* بقران دى مانى عارفها بالقاف ولا بالغين ,, تحول لودالبوش
للفتوى

Post: #334
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 08:36 PM
Parent: #333

Quote: دي جيتي من حواشة الزهور الليلتي وكل واحد يشيل زي ما داير من ورود

هييييع بت نفيسة جات من حواشتا ,, وبعد جدعت صُرَّة الزُّوادة
فوق النملية مشت اتمددت فى ديك البرندة الـ مِى خمج ,, وبعد
ارتاحت شوية دَعَكَت كرعينا حتحتت طين الحواشة ومشكتِن بى
زيت سمسم من الْنَتَحى من شِدَّة ما تعبت من العزيق ,,
والـشَّليخ ,, والـقبيب. وبعد شربت ديك الجبنة التعدل المخ ,, قامت
على اللابتوب ودخلت العولَمة

Post: #335
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 08:38 PM
Parent: #334

Quote: الفرْناغة دي إن شاء الله لاتلاقيكي ولا تمرِّي ب دربها، يشهد الله تقول الكتاحة أخير منها، كما قال الزول السمح عبدالمنعم
في منطقة ومشرع ومورد شهير ببادية الكبابيش إسمو

هلا بالعبيد ,, ياخوى النوق دى مافى شيتاً بعجبها ويخليها تَرقِل
فى صحراء التعب الا كلامك الجميل ده ,, أنا ماعارف ياود الطيب
الشعر السمح ده وقف عند الناس السمحين ديلاك ليه؟
البادية ياها البادية والنوق ياها النوق ,, وحياتنا ما اتغيرت كتير,,
تعرف يا ودالطيب مرة سمعت محاضرة فى الراديو للراحل المقيم
عليه رحمة الله البروفيسور عبدالله الطيب وكان يشرح فى كلمة
التَّمَدة وهى التى ينسب اليها البلح (بِتْ تَمُودَه) مكث اكثر من
حلقة ,, يشرح فى تلك الكلمة ,, ياخ الكلمات التى استخدمها اهلنا
هؤلاء لها وقع يمس القلب حتى ولو لم تدرك المعنى ,, واصل يازول
ياجميل ,,

بالمناسبة ياودالطيب كلامك عن بادية الكبابيش يجعلنى أخَمِّن انك تنتمى
إلى تلك البقاع ,, وهذا يقودنى إن كنت تعرف مولانا القاضى حسن المهل؟

Post: #336
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 08:42 PM
Parent: #335

Quote: تعرف البطانة رملة خشنة .. مرة الدنيا صيف وانا لابس بنطلون قميص وقام هوا بي ورانا وجانا . عليك امان الله سيطان بتمحط فينا .. الرقبة والكرعين تحت .. لو جلابية الزول بتصرف

شيخ العرب ودابسن ,, عوافى
جدنا لديه بنت كانت زميلتنا فى كلية القانون ,, جاءها صديقنا من كلية الاداب خاطباً وكان معه اهله جاؤنا فى الفاضلاب ,, وهم خرطوميين
فباتوا ليلتهم فى الفاضلاب ,, قومى يالكتاحة ام كُبْسة ديك أسْرِى ليلك كله فوق الفاضلاب وما جاورها ,, حتى أهل بسمات ديل بكون نالهم منها نصيب
ولى عِن ناس ودالمدير فى السيالة ,, المهم ما أطَوِّل عليكن
أخوان البت الزبير وعامر ناس مستهبلين خلاس صحو بدرى ومشوا يصحوا خطيب اختهم فى الحوش التانى ,,
لقوهو ليك مَكَندَّك بالغبار الناعم داك ,, غاتِس فى السَّفاية لى إضْنِينُو نوع السَّفاية ديك الـ نامِن
تقوم من الفراش تلقى خرطتك انطبعت فى اللحاف ,, زى نجاتيف الصورة
اها عامر عاين للزبير كِده وقال ليهو : الليييييييلة يالزبير الزول ده
لو صحيناهو بقول نحن كَتَّحناهو عشان ماعاوزينو يتزوج اختنا
.

Post: #337
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 08:47 PM
Parent: #336

Quote: مـولـداً ميـدانـو حـافـل
كـلـمــا يـصـبِّــح ...
تجيهـو الـنـاس جحـافـلْ
يـا سـلام .... يـا ســلام

لله درك ياودالكباشى ,, الفنجان ده مدَوِّر بى روائعكم
وجمال الروح الذى يسكنكم ,, ولولاكم لما اجتمع لنا عقد
ونرجو من كل الذين خفَّت زيارتهم ان يعودوا الينا
فهنا زُر غِبَّاً تزدد حُباً لامكان لها فى هذا الفنجان
هنا كلما زرتنا وجدتنا اكثر حباً لك ,, نتمنى على هؤلاء ان
يعاودوا:
طارق جبرين ,, بت وراق ,, اميرة السيد,, سماعين ودعباس
ودالمحرب ,, شيقا,, ست البنات ,, الشبلى ,, رشا بابكر
سلمى بت الشيخ ,, الفاتح ميرغنى ايرنست ,, فردوس ,, جلالدونا ,,
كبر,, طلحة الصفوة ,, وياريت ينادى لينا صاحبو جرجير ,, احمدونا ,,
ودقبانى ,, اسحاق ود بلة عشان جميل مُقِلْ ,, بت ابحريرة ,, العطبراوى العاشق ودالمدير ,,
فيسل هليل ,, وضاحة المحيَّا الملكة ,, مى عوايدا ,, ودالفحل ,, عصام ود نصر ,,
ودعمى خليل ,, نضرب الهم بالفرح ياخ ,, ابوجهينة ,, منصور عبدالرحيم ,, حسن حماد ,,,
اشرف الباقر,, هيثم غالى ,,, أحمد سيد احمد ,,, محمد الشيخ ,, ود عمى عِتمان ولد موسى اللِرجال خوسة ,,
يوسف ود طه ,,, ودالقوز ,,, احمد ياسين ,,, مجاهد احمد ,,, مامون ودالنور ,,
وكل من هو كيييف جبنة مرحب بيهو

Post: #338
Title: Re: فنجان جبنة ولمة ناس حلوين
Author: عبدالحفيظ ابوسن
Date: 05-10-2015, 09:24 PM
Parent: #337

تشكر درديري مسدار الخريف ومسدار المطيرق من اجمل ما كتبه الحردلو
و
نحكي ليكم حاجة عن عمي صديق
عمل ليهو طاحونة وشغال معاهو ولد صبي حجار .وعمي كان مسمنو عنتر مابخاف ولا بهاب الدواس .. اها الود الحجار عاجباهو روحو وقدر ما عمي ينضم معاهو يحمر ليهو
قال ليهو يا ولدبتحمر لي مالك
قال ليهو والله انا زول وشي شبر ما بخاف منو
عمي قال ليهو
طلق تلقاني بي الليل وشي دة قدر ما تعبرو ما تعرفو كم

Post: #339
Title: Re: فنجان جبنة ولمة ناس حلوين
Author: عبدالعزيز الفاضلابى
Date: 05-10-2015, 09:25 PM
Parent: #336

Quote: مـولـداً ميـدانـو حـافـل
كـلـمــا يـصـبِّــح ...
تجيهـو الـنـاس جحـافـلْ
يـا سـلام .... يـا ســلام

لله درك ياودالكباشى ,, الفنجان ده مدَوِّر بى روائعكم
وجمال الروح الذى يسكنكم ,, ولولاكم لما اجتمع لنا عقد
ونرجو من كل الذين خفَّت زيارتهم ان يعودوا الينا
فهنا زُر غِبَّاً تزدد حُباً لامكان لها فى هذا الفنجان
هنا كلما زرتنا وجدتنا اكثر حباً لك ,, نتمنى على هؤلاء ان
يعاودوا:
طارق جبرين ,, بت وراق ,, اميرة السيد,, سماعين ودعباس
ودالمحرب ,, شيقا,, ست البنات ,, الشبلى ,, رشا بابكر
سلمى بت الشيخ ,, الفاتح ميرغنى ايرنست ,, فردوس ,, جلالدونا ,,
كبر,, طلحة الصفوة ,, وياريت ينادى لينا صاحبو جرجير ,, احمدونا ,,
ودقبانى ,, اسحاق ود بلة عشان جميل مُقِلْ ,, بت ابحريرة ,, العطبراوى العاشق ودالمدير ,,
فيسل هليل ,, وضاحة المحيَّا الملكة ,, مى عوايدا ,, ودالفحل ,, عصام ود نصر ,,
ودعمى خليل ,, نضرب الهم بالفرح ياخ ,, ابوجهينة ,, منصور عبدالرحيم ,, حسن حماد ,,,
اشرف الباقر,, هيثم غالى ,,, أحمد سيد احمد ,,, محمد الشيخ ,, ود عمى عِتمان ولد موسى اللِرجال خوسة ,,
يوسف ود طه ,,, ودالقوز ,,, احمد ياسين ,,, مجاهد احمد ,,, مامون ودالنور ,,
وكل من هو كيييف جبنة مرحب بيهو

Post: #340
Title: Re: فنجان جبنة ولمة ناس حلوين
Author: عبدالعزيز الفاضلابى