هل كان البورد زمان جنة الله في أرضه قبل أن تزحف عليه جحافل العوام من أمثالنا؟؟؟؟

لاحظت-مجرد ملاحظة- عندما تعصف بالبورد أحداث "دامية" كفصل أحد الأعضاء أو تعرضه لهجوم لفظي حاد من عضو آخر أو من شلة من شلل البورد و لاسيما إذا كان هذا العضو من الأعضاء القدامى..يقوم أحدهم بفتح بوست للمناصرة أو تطييب الخاطر أو لمطالبة بكري بإعادة العضوية لمن تم فصله..

أقول في حالة ما يعرف بالأعضاء القدامى حملة ال"nick names"
يتحول البوست لحالة من الرثاء لما آلت إليه الأحوال في البورد و يتدافع الجماعة أصحاب الأسماء الرومانسية و الثورية و التراثية للتباكي على البورد و هاك يا لطم و عويل. فيقول أبو جلمبو مثلا للبطل المغوار :فاكر أيام زمان كان اختلافنا راقي كيف فيرد البطل المغوار :ديك أيام ما بتتعوض. المنبر امتلاء الآن بالبلطجية و أرباب السجون..و تدخل أم أربعة و أربعين على الخط لتتسأل عن الكيفية التي يمنح فيها الناس العضوية هذه الأيام و هل يعقل أن كل من هبّ و دبّ يمنح باس ويرد بهذه السهولة. و يتداخل مسافر زاده الخيال لينهنه طويلا مجترا ذكريات الأيام الخوالي عندما كان البورد متنفسا له بعد يوم عمل شاق يتحفه بالقصائد الرقيقة و المجاملات اللطيفة فيثير لوعة الشاعرة الحالمة التي توضح في مداخلتها أن البورد هذه الأيام أصبح لا يطاق و ليس فيه ذرة من الرقة و الرومانسية..

أنا من المتابعين لهذا البورد منذ زمان بعيد بل و كنت عضوا ب"nick name" لم أستخدمه لظروفي الخاصة و قد قمت بعد فترة بمخاطبة بكري اسأله إعادة تزويدي بكلمة المرور ففعل و لكن بالأسم الحقيقي...و رأيي أن هذا البورد بخير و هو لا يختلف عن زمان إلا في كونه قد أصبح أكثر حيوية..و فيه متسع للجميع حسب أذواقهم و ميولهم فكفوا عن جلدنا كل صباح يا ....حرس يا قديم


ملاحظة:أزعم أن 99% من معارك البورد اطرافها غالبا من القدامى.

Quote: أقول في حالة ما يعرف بالأعضاء القدامى حملة ال"nick names" أنا من المتابعين لهذا البورد منذ زمان بعيد بل و كنت عضوا ب"nick name" لم أستخدمه لظروفي الخاصة ملاحظة:أزعم أن 99% من معارك البورد اطرافها غالبا من القدامى.

حكمة اليوم
ومن الحقد ما قتل

سيف النصر ..

Quote: لاحظت-مجرد ملاحظة- عندما تعصف بالبورد أحداث "دامية" كفصل أحد الأعضاء أو تعرضه لهجوم لفظي حاد من عضو آخر أو من شلة من شلل البورد و لاسيما إذا كان هذا العضو من الأعضاء القدامى..يقوم أحدهم بفتح بوست للمناصرة أو تطييب الخاطر أو لمطالبة بكري بإعادة العضوية لمن تم فصله.. أقول في حالة ما يعرف بالأعضاء القدامى حملة ال"nick names" يتحول البوست لحالة من الرثاء لما آلت إليه الأحوال في البورد و يتدافع الجماعة أصحاب الأسماء الرومانسية و الثورية و التراثية للتباكي على البورد و هاك يا لطم و عويل. فيقول أبو جلمبو مثلا للبطل المغوار :فاكر أيام زمان كان اختلافنا راقي كيف فيرد البطل المغوار :ديك أيام ما بتتعوض. المنبر امتلاء الآن بالبلطجية و أرباب السجون..و تدخل أم أربعة و أربعين على الخط لتتسأل عن الكيفية التي يمنح فيها الناس العضوية هذه الأيام و هل يعقل أن كل من هبّ و دبّ يمنح باس ويرد بهذه السهولة. و يتداخل مسافر زاده الخيال لينهنه طويلا مجترا ذكريات الأيام الخوالي عندما كان البورد متنفسا له بعد يوم عمل شاق يتحفه بالقصائد الرقيقة و المجاملات اللطيفة فيثير لوعة الشاعرة الحالمة التي توضح في مداخلتها أن البورد هذه الأيام أصبح لا يطاق و ليس فيه ذرة من الرقة و الرومانسية..

والله ما قلت إلا الحق ..

انا شايف يا سيف النصر ان الحرس القديم عندهم حق يجلدوكم كل صباح عشان بعض المواضيع بتحمل عبارات تفور الدم ومع انى عضو جديد لكن انا بتصفح البورد منذ انشائه وكنت فعلا بقرا مواضيع هادفه جدا وشعر وطنى ورومانسى رائع ومعارضة موزونة ومنطقية وبادلة واضحة وبدون نبذ شخصى ولكن الان الحرب الكلامية بدت تزيد وبقينا نفقد اعضاء مهمين زى فضيلى جماع ..وفعلا زى ما انت قلت ان البورد بقى اكثر حيوية ونشاط ولكن نرجو الابتعاد عن التنابذ بالالقاب والتجريح الشخصى عشان ناس الحرس القديم ما يجلدوكم كل صباح

سيف:

غريبة (هنا غير مقرونة بصلاح أوفساد)!!!.

لقد كانت تمر بي بعض أفكار هذا البوست التي طرحتها أنت بسخريتك الهادئة بينما أتمعن في بوست فضيلي جماع الأخير.

سيف النصر + ناذر

سلاماات

النت فيه كمية من البوردات السودانية ... لكن البورد الاشهر هو هذا البورد ... تعرف ليه ... لانه البورد ده كان اسسوه مجموعة من الرائعين الخلوقين .. وكانوا بيكتبوا فيه كلام مفيد ... مما جعل السودانييت يقبلون عليه من جميع المواقع الاخري ...واتحولت ليه محموعة كبيرة من السودانيين الاصيلين من بورد اخر ... لظروف محددة في وقتها ... ولانه وجدوا في هذا البورد اعضاء محترمين ورائعين ... صحيح كان في اختلافات ... لكن بادب واحترام للغير ... نشأت مودة واحترام بين الاعضاء القدام بعضهم البعض ... ودخلنا في صداقات وبزنس وزواج وعلاقات اسرية ...كان اللي يلقي برنامج مفيد او موضوع ممكن يفيد اخوانه يروح جايبه لينا ... وكمان بالشرح

بعد ده كله ما دايرنا نحن لايام البورد الخوالي

اول ما تفتح البورد تلقي ليك رسالة جميلة في المسنجر تفتح ليك نفسك .. هذا المسنجر نفسه اللي بقوا يستخدموه بعض الاعضاء الجدد في ارسال كميه مهولة من الرسائل لاغراض سياسية وتحريضية ... كان سبب في تطوير العلاقات والروابط بين الاعضاء القدامي

بعد ده كله ما دايرنا نحن لايام البورد الخوالي

لكن من سنة او سنتين تقريبا وانت طالع ... بقينا نفتح الصفحة الاولي ونتمني مافي زول يكون واقف ورانا عشان العناوين البذيئة اللي بقت تتكتب.. والشتايم بين الاعضاء .. جايي تقول لي البورد ما تغير ... شتايم في بعض ... الفاظ تحير ...وواحد جايي يستلم الصفحة الاولي براه ...

بعد ده كله ما دايرنا نحن لايام البورد الخوالي

Quote: ملاحظة:أزعم أن 99% من معارك البورد اطرافها غالبا من القدامى.

ما تزعم ياخ ..

تعرف اول زول اتشطب من سودانيز اونلاين منو وسبب الشطب شنو ؟

تعرف الزول دا لو كان الي الان متابع او مسجل بي اسم تاني
بكون كل ما يفتح المنبر بضحك علي السبب الشطبوهو بيهو
لانو مفروض نص المنبر دا يتشطب ..
او ازعم ذلك ..

كلامك صح يا سيف

الأخوة ناذر و السر عبد الله


الموضوع طبعا مطروح لتبادل و جهات النظر و هي وجهات نظر مقدرة في كل الأحوال..ناذر


حسبما أرى واحد من الراصدين الجيدين لحركة البورد و أتجهاته و إذا وافقني في ما


أقول فده معناه أنني لم أقل إلا حقا.

عبده

Quote: بعد ده كله ما دايرنا نحن لايام البورد الخوالي

حنوا بس بالراحة علينا...


عبد الحميد البرنس:

ياخ حبايبنا "المصريين" مش بيقولوا القلوب عند بعضيها

عمك تنقو

Quote: او ازعم ذلك ..

إيه رأيك بدل ما أزعم و تزعم نورد بعض الأدلة بس بشرط تبداء أنت الأول..



والي الدين الفكي


شكرا يا زميل..

********

Quote: بس بشرط تبداء أنت الأول..

معقولة بس يا سيف يعني مافي تقدير للاقدمية ولا للسنيرة ؟

خلي بالك انت مستهون بالناس القدام ديل ..

اخي في الفضاء السايبيري سيف النصر محي الدين محمد أحمد
قالت حبوبتنا الحاجة بنونه عليها الرحمة "إرضاء الناس غاية لا تدرك" طبعاً ما قلتها بهذه الكيفية وإلا لكانت Miss Banona وكانت نافست Miss Lebanon أو Miss Venezuela وحتى جكس البرازيل في الكرة الطائرة الشاطئية والتي تفقدني التركيز على المتابعة وما بكون عارف بعاين للشبكة ولا الكورة ولا الجمهور.
أها يا سيف يا أخوي البورد و منتدانا هذا زي السودان كل قبيلة شايفه نفسها الأعلون ، ولمن تجي مواضيع تنادي بالإنفصال يعني زي كل زول يشيل حقو ويفرتق تظهر الوطنية والديمقراطية والوحدة ومربع سته ، والسودان واحد وما دايرين إنفصال ، وكلو من باب لا بريدك لا بحمل بلاك ، وبلاك هنا زي ما إنت عارف براك بنطق القبائل التي ضربت خياماً خارج قري وأمصار أهل العوض وليس المقصود بها بلاك المشي من بايرن ميونخ لي تشيلسي والتكتح دي ما سواها ليهم لي هسع. المهم يا سيف قدامي الأعضاء فيهم الطيب وفيهم دون ذلك وكذا الحال بالنسبة للجدد. وقوانين المنبر برضو بحاجة إلى مراجعة وتحديث من فترة لفترة وفي ناس كتيرين رفدوهم وسودو أسماءهم ساكت بلا سبب منطقي أو معقول.
وأكيد كان الله مد في الأيام يا سيف يا أخوي الجديد ببقي قديم والقديم يا إتلحس يا عمل عمره أو جدد ، وفي كمية بتاعت سرعة ردود في هذا المنتدى زيها وزي الأتاري ، أتاري ما أن تنزل ليك موضوع كده إلا وتلقي كمية بتاعت ردود نازله عليك في نفس اللحظة وده يمكن تفسيره يا إما أن يكون المتداخلين على دراية تامه بالموضوع المطروح حتى قبل طرحه وهو ما يعرف بكشف المستور وقراءة الطالع ربما والنازل كمان ده غير توارد خواطر وشبهينا وإتلاقينا وإما أن يكون إستيعابنا وسرعة كتابتنا على الكيبورد تفوق سرعة الصوت.
المنتدي طبعاً في ناس شايفنو ضياع وقت وضياع زمن
وفي ناس شايفنو منبر من لا منبر له ووطن من لا وطن له
وفي ناس شايفنو بحل الكتير من المشاكل على الصعيد السياسي وتصل من خلاله أصوات المهمشين إلى لجان حقوق الإنسان والأمم المتحدة والحكومة والمعارضة
وفي ناس شايفنو دافوري
وفي ناس شايفنو ركن إجتماع يمكن من خلاله طرح الكثير من المشاكل الإجتماعية والمعضلات ومناقشتها وحلها من خلال المنتدي
وفي ناس ما شايفين أى شئ من أصلو
وفي ناس شايفين طشاش
وفي ناس بتعاين بي عيونها
وفي ناس بتعاين بي مكبر
وفي ناس بتعاين بي نظارة سوداء
وفي ناس بتعاين بي خرم الباب
وفي ناس بتعاين عكس الشمس
المهم النظرات متباينه والآراء متباينه

..
.
سلام يا دوكـ
رغم انك لست من العوام ولكن صدقنى
انه كان كذلك..
وكما تكرم احد القدامى واوضح بانه كان وطن من لا وطن له
كان هو الملتقي وهو الخبر وهو البيت السوداني ..
ولكن الان حاله صار كحال السودان ..
هل تذكر مرة يا سيف انك فكرت فى الدافورى ما هى قبيلة فلان
او خطر ببالك فى الحى او االجامعة ماهى قبيلة فلان او الى اى طائفة ينتمى !!
بلا شك لا ..
هكذا كان بلا شلليات ولا نعرات عنصرية ولا احقاد او ضغائن شخصية
تغير السودان وتشكل وصار مسمى القبيلة ضمن فورمات التعيين
وتشرزم القوم وتكلت القبائل وازدات الجهوية والعنصرية
وتلقائياً انتقلت هذه الثقافة العوجاء الى هنا..
فقد هذا المنبر قوميته ووطنيته وصار التنابذ بالالقاب والتكتل القبلي
والعرقي والسياسي هو السائد .. شاملاً اغتيال الشخصية والاساءات الاخرى..
وهكذا نحن الشعب الوحيد الذى يأسف على الماضى ويتحسر - حليل جوز الحمام تلاته
وحليل ايام الجنية ب4 دولار وحليل الخرطوم لمن كانت فاضية وحليل قعدة اللستك
وحجر صابرين وحليل الخطوبة من فوق الصريف وحليل الحاول يخفى نفسه ... وحليل ...
وحليل .. وحليل .. وحليل شليل ..

دعنى قبل ان اغادر ان القي التحية ايضاً على بعض القدامى
المتواجدين ..بلير/ عبدو / عمك تنقو / الملا عمر
ولا انسي البرنس بحكم الزمالة القديمة ايضاً
وناذر بحكم عشرة الخرطوم ...
ومنو تانى ..

تحياتى؛

Quote: معقولة بس يا سيف يعني مافي تقدير للاقدمية ولا للسنيرة ؟ خلي بالك انت مستهون بالناس القدام ديل ..

عمك تنقو



إيه رأيك المسألة بتاعت الأقدمية دي تتقنن لائحيا يعني تبقو زي الذين سبقونا بالأيمان و

يبقى توقيركم فرض بحكم اللائحة و البستهون بيكم بعد داك ما يلوم إلا نفسو؟

Quote: وفي ناس ما شايفين أى شئ من أصلو وفي ناس شايفين طشاش وفي ناس بتعاين بي عيونها وفي ناس بتعاين بي مكبر وفي ناس بتعاين بي نظارة سوداء وفي ناس بتعاين بي خرم الباب وفي ناس بتعاين عكس الشمس المهم النظرات متباينه والآراء متباينه

مولانا الملا عمر

المشكلة أنو في ناس مشغولة بتصنيف الآخرين و لو ختوك مع الناس البتعاين بي مكبر

يقوموا التانيين يصروا إنك من الناس البتعاين عكس الشمس ..و هلمجرا مع أنو الطريقة

البتعاين بيها مفروض يكون حق مكفول و كل واحد يعاين على كيفو.....


المهم أنا قررت أكون مع البعاينو بخرم الباب.

Quote: وهكذا نحن الشعب الوحيد الذى يأسف على الماضى ويتحسر - حليل جوز الحمام تلاته وحليل ايام الجنية ب4 دولار وحليل الخرطوم لمن كانت فاضية وحليل قعدة اللستك وحجر صابرين وحليل الخطوبة من فوق الصريف وحليل الحاول يخفى نفسه ... وحليل ... وحليل .. وحليل .. وحليل شليل

سلامات يا تبلدينا

كدي خليني النواصل معاك شوية ..حليل شارع القومية و المساكن الشعبية و حليل كوان

دور وحدوته و حليل الناس الحلوين المروا على الزقازيق كلهم..


إذا البورد حاله من حال السودان فده-في رأيي- مؤشر جيد و يعني أنو الناس هنا همومهم

هي نفس هموم شعبهم بس ياريت يتخلصوا من الأمراض السودانية المزمنة و يبشروا على الأقل

بثقافة مختلفة فيما يخص أدب الخلاف و أحترام الآخر المختلف..

عبدو ...

Quote: بعد ده كله ما دايرنا نحن لايام البورد الخوالي

حنينكم دا زي كلام العجايز البيقولو (حليل زمن الخروف بي جنيه وجوز الجمام فيهو تلاتة حمامات) !!
طبعا حنينكم حنين مشروع لكن إتذكر غنو الزمن ماااشي وما في شي بيبقى على اصلو ..

اها انا اقول ليك حاجة ..

أنا شايف هسي المنبر دا أحسن كتير من زمان .. وهسي يادوب ممكن يتسمى (المنبر الوطن) طالما فيهو تمثيل لي جميع الناس بمختلف توجيهاتم وأثنياتم ..


صنفرة :

دايما بقول المنبر عبارة عن سوق كبير الداير يبيع يبيع والداير يشتري يشتري والداير يتفرج يتفرج ، وفي السوق دا أي شي متوقع وأي ألفاظ ممكن تلاقيها ..

ناذر
أنا مع الصنفرة

Quote: دايما بقول المنبر عبارة عن سوق كبير الداير يبيع يبيع والداير يشتري يشتري والداير يتفرج يتفرج ، وفي السوق دا أي شي متوقع وأي ألفاظ ممكن تلاقيها ..

بس في حاجات تانيه أغفلتها عمداً أو سهواً ، فالسوق أكيد زيو وزي أى حاجة في المجتمع مرات بيتطور ومرات بيتدهور ومرات بيقفل - يعني نظام إحتجاج وإضراب وكده - وبرضو بين البشتري والببيع والبتفرج في البنشل والبعاكس والما عارف جاي السوق ليه. بعدين الفرجه مش مرات بتخلي الواحد يشتري يعني حسب نوع وطريقة العرض ومرات بتخلي العايز يشتري يشتت ويبطل يشتري ، وفي طبعاً سوق الجداد وسوق السمك وسوق الكرشة وسوق الخضار وسوق القش وسوق الفواكه وسوق العناقريب غايتو إنت بصراحة شخصت الحال من وجهة نظرك وأنا بصراحة أتفق معك فيها.
وأرجو أن يكون التقييم هنا مش زمان والآن بإعتبار زمان التاريخي ، لازم يكون في منطق زمان أحسن ليه نوع المواضيع مثلاً المطروحة لغة الحوار الرأي والرأي الآخر فطنة الكاتب والقارئ والتعقيب على المقالات ، زمان بي خيرو وشرو في كل شئ وكذا الحال بالآني والمنطق يفترض في أن يكون الحال أفضل من الماضي ،
يقولو ليك زمان بيليه كان جوهرة ولاعب كبير ، ما قلنا شئ بس بي مقاييس عصره الآن روناليدينو وتيري هنري ووغيرهم وقس على ذلك الفن والمسرح وكل شئ ، زمان كنا لمن نسافر من الخرطوم بحري إلى قريتنا التي تبعد حوالي 40 فرسخاً إلى الشمال من بقعة المهدي كنا نتزود بالطعام والشراب وما أن نصل حتى تظهر علينا وعثاء السفر وكآبة المنظر من طول المشوار عطفاً على وعورة الطريق ، الآن قبل أن تكمل الأيسكريم تكون وصلت قريتنا الكائنة يعني أصبحت فركة كعب عديل كده.

إضاءة:
أيسكريم شعلة يا شباب الزي القرطاس داك إذا خرمت البسكويته من تحت حا تكون مصنقع يا لمن تكمل الإيسكريم يا لمن تصل قريتنا

Quote: دايما بقول المنبر عبارة عن سوق كبير الداير يبيع يبيع والداير يشتري يشتري والداير يتفرج يتفرج ، وفي السوق دا أي شي متوقع وأي ألفاظ ممكن تلاقيها ..

ناذر

الحمد لله أنو البورد ده ما زي بعض المنتديات التي يتبادل فيها الأعضاء كلمات مسهوكه

حتى وصلت درجة الأبتذال..يعني الواحد فيهم يبداء كلامو للتاني بالرائع فلان أو الرائعة

حد الدهشة فلانة أو المدهش حد الروعة علان و هكذا لمن يمسخوها...

الاخ سيف

المشاكل نفسها فقط تغييرت الاساليب واللغة .

لكن لا ادري لماذا حولت النقاش كأنها صراع بين القديم والحديث ، كانت هناك مشاكل في الماضي

كما هي الآن ، واعتقد ان الخلاف - وما يصل اليه - هي طبيعه بشرية في الانسان ، انا مسجل منذاعوام (لا اريد ان ادخل نفسي في هذا التصنيف) ، وكتبت كثيرا في هذا البورد ، قد اقول بانني كنت من اصحاب اكثر البوستات في هذا البورد يتقدمني مجموعه بسيطة علي رأسهم ود عازه ، واساسي ورومانسى والموصلي وآخرين )

اقول ان البورد زمان والبورد الآن ان هناك حميمية كانت موجودة زمان اصبحت مفقودة الآن ، وهذا نتاج طبيعي لان عضوية البورد توسعت . وبالتالى فقدت العلاقات الاجتماعية (اري ان من آفات هذا البورد هذه العلاقات الاجتماعية ،لانها جعلت الحكم علي الاعضاء مبينا علي العلاقة الشخصية)

اما لماذا تتردد عبارة (حليل البورد ايام زمان ) اقولها لك ان داخل هذه الجملة حسرة الي ماآلت احوال هؤلاء الاعضاء فقد كانوا يوما مهمين ونجوم ، واصبحوا اليوم عااااااااديييين .

الاخ المحترم سيف النصر..

Quote: يتحول البوست لحالة من الرثاء لما آلت إليه الأحوال في البورد و يتدافع الجماعة أصحاب الأسماء الرومانسية و الثورية و التراثية للتباكي على البورد و هاك يا لطم و عويل. فيقول أبو جلمبو مثلا للبطل المغوار :فاكر أيام زمان كان اختلافنا راقي كيف فيرد البطل المغوار :ديك أيام ما بتتعوض. المنبر امتلاء الآن بالبلطجية و أرباب السجون..و تدخل أم أربعة و أربعين على الخط لتتسأل عن الكيفية التي يمنح فيها الناس العضوية هذه الأيام و هل يعقل أن كل من هبّ و دبّ يمنح باس ويرد بهذه السهولة. و يتداخل مسافر زاده الخيال لينهنه طويلا مجترا ذكريات الأيام الخوالي عندما كان البورد متنفسا له بعد يوم عمل شاق يتحفه بالقصائد الرقيقة و المجاملات اللطيفة فيثير لوعة الشاعرة الحالمة التي توضح في مداخلتها أن البورد هذه الأيام أصبح لا يطاق و ليس فيه ذرة من الرقة و الرومانسية..

أهمية المنبر العام فى رأيى..

وسبب تحملى لاشياء لم أتوقع أن أقابلها فى حياتى..

هى أن المنبر يعتبر انعكاسا صارخا.

لحال المثقفين وأشباه المثقفين السودانيين اليوم..

وبقدر الاقلام الجادة..

والحس الوطنى الصادق..

والهم الاكيد بالشأن السودانى..

والوعى التام بكيفية توصيل المعلومة..

والدفاع عنها باستاذية رفيعة..

نقابل..

أنماطا من السودانيين والسودانيات من نوع غريب..

النوعية التى تحاول أن تقنع نفسها بأن العنف والصلف والغرور والبذاءة والمكائد..الخ

هم اقصر الطرق الى تحرير السودان من ربقة التخلف والعنف والدمار..

..

فى هذا المنبر..

تتفاعل كل انماط الشخصيات السودانية المعاصرة.

حتى ينزوى من هم أكثر حساسية ورقة..

أو يلوذون بالفرار الى منابر أخرى.

تحفظ لهم كرامتهم..

وتتفاعل مع ما يكتبون..

..

لذلك..

المنبر يعج بالصالح (النادر جدا)..

والطالح المنتشر فى طول البورد وعرضه..

بشكل لا يملك الا أن يحرك فيك كوامن الشفقة..

والحسرة عليهم/ن..

وعلى السودان بشكل عام..

..

لذلك المتباكون على المنبر ..

فى حالة انفلات (الامن)!..

هم أنما يتباكون على نفر قليل.

استانسوا بآرائهم.

واحبوا طرحهم..

ولكنهم غادروا..

..

ولكن تأكد..

أن الغليان الذى يحدث فى هذا المكان.

موجود دائما وابدا..

يتصاعد..

وينحسر..

ولكنه مستمر..

شئنا أم ابينا..

لان هذا هو حال الوطن اليوم..