حاجة غريبة في شوارع الخرطوم !!

حاجة غريبة في شوارع الخرطوم !!


16-11-2008, 08:34 AM


  » http://sudaneseonline.com/cgi-bin/sdb/2bb.cgi?seq=msg&board=475&msg=1255491364&rn=25


Post: #1
Title: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 08:34 AM
Parent: #0

كل ما تتلفت تلقي امجاد باللون (الازرق) او جياد باللون (الابيض) !!!

Post: #2
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 08:36 AM
Parent: #1

... وبعد كل (3) امجادات (زرقاء)
يلاقيك تاكسي (اصفر) واحد ...

ياربي يكون السبب شنو ؟؟

Post: #3
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 08:38 AM
Parent: #2

... واحد من (اسياد البلد) قال دا مؤشر لنتيجة القمة









مع اني ما كنت قاصد حاجة !!!!





انتو يا ود الصايم الالوان عندكم كيف ؟؟؟

Post: #4
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 08:41 AM
Parent: #3

Quote: الديربي (السادس) !!
رغم الأحداث الجسام والقضايا الكبيرة التي يشهدها الوطن هذه الايام فان كرة القدم استطاعت ان تستقطب الاهتمام الأكبر في الشارع السوداني .. وتزداد وتيرة الاهتمام تصاعدا ساعة بعد ساعة وهي تقترب من موعد لقاء القمة الكروية السودانية بين الهلال والمريخ في نهائي بطولة الدوري الممتاز... وكانت الصحف الرياضية في السابق تطلق علي مثل هذه المباراة بين قطبي الكرة السودانية (لقاء السحاب) ذلك انه كان من الصعوبة ان يلتقي الفريقان في موعد متقارب .. واليوم أصبح لقب اللقاء هو (الديربي السوداني) وذلك مع انتشار وسائط الاعلام الفضائي والالكتروني الذي نقل لنا هذه المسميات من الدوري الأوروبي .
وغدا تتوجه الانظار الي ملعب استاد الهلال الذي استعصي علي قمة الأندية العربية والأفريقية الفوز فيه علي صاحب الملعب حتي أطلق عليه جمهور الهلال (مقبرة الخصوم) .. وقبل أن تتوجه جماهير القمة نحو الاستاد عليها أن تتذكر بان هذه المباراة لا تعني الناديان وحدهما ولا تعنيهما فقط بل ان هذا اللقاء يعتبر محط انظار المتابعين في كثير من الدول والجمهور الرياضي في افريقيا والوطن العربي وذلك من واقع النتائج التي حققتها كرة القدم السودانية علي مستوي بطولات الاندية او المنتخب الوطني .. ونقل احداث المباراة عبر الفضائية الرياضية العربية يضع علي كاهل اللاعبين في ساحة الملعب والجمهور في المدرجات مسئولية كبيرة لتقديم وجه مشرق للكورة السودانية والرياضة الاكثر شعبية في العالم . ينتظر العالم أن يشهد حقيقة تطور المستوي الكروي في السودان وينتظر ان يشهد بعينيه تفرغ المشجعين لمؤازرة فريقهم المفضل دون خروج عن الروح الرياضي القويم أو تحول المداعبات بين الطرفين الي خطوات تطيح بالمباراة في الملعب ... لذلك فان جمهور القمة السودانية يعتبر أمام امتحان حقيقي غدا باستاد الهلال .
ورياضة كرة القدم فيها الفوز وفيها الخسارة وهذه المباراة تحديدا لا تحتمل الطريق الثالث (التعادل) لأن التعادل نفسه يمثل فوز للمريخ وخسارة للهلال ... لذلك نقول ان (الديربي السوداني) مساء الاثنين فوز أوخسارة فقط .. فالمطلوب من جمهور القمة الكروية أن يطلق لمشاعره العنان بالتفاعل مع أي واحدة من الحالتين .. ولكن دون المساس بالطرف الآخر ... فان الفرح بالفوز الازرق لا يعني اطلاقا الاساءة للخاسر بل يجب أيضا احترام مشاعر الحزن وان امتزجت بلون الدم (!!).
وأجمل ما يزين علاقات الجمهور الرياضي في السودان هو مواساة الفريق الذي يخسر بعبارة (هاردلك) كما ان هذا اللقاء ليس نهاية المطاف في الموسم حيث انه وبعد حوالي اسبوعين تتجدد المواجهة مرة اخري في نهائي منافسات كاس السودان ويمكن لمن يخسر غدا العمل علي التعويض في ذلك اللقاء .. ومن منطلق شخصي فانني ارفع الأكف لله رب العرش العظيم أن يكتب النصرغدا لهلال الملايين لمواصلة مسيرة المحافظة علي بطولة الممتازالمحببة له وللعام السادس علي التوالي ولتشمل روح الفرح الأغلبية العظمي من أبناء هذا البلد الحبيب .


المقال الذي نشرته اليوم في زاويتي الصحفية (بأخبار اليوم)
معليش يا المسلمي (بعد التسكين) بنزلو في البوست التوثيقي بتاعك

Post: #5
Title: Re: حاجة غريبة في شوارع الخرطوم !!
Author: محي الدين جبريل
Date: 16-11-2008, 08:47 AM
Parent: #4

لزوم المرور والتحايا


أصى بشجع ساردية شندى


بلا هلال بلا مريخ بلا لمة


كفاية كسير قزاز عرباتنا فى شارع القماير

Post: #20
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:01 PM
Parent: #5

الصديق الاستاذ
محي الدين
سلام
Quote: أصلى بشجع ساردية شندى


مافي مشكلة (شندي) برضو حبايبنا ... أهل الأرباب !!!


دا نظام تخزين مشجعين !!!

وبعدين يا صديقي ما ممكن (أطنشك) ... حاشا وكلا ،،، بس كنت خارج المكتب
وهذه اول مداخلة للرد علي الزملاء هنا .... يعني مافيش زعل يا حبيب !!

Post: #6
Title: Re: حاجة غريبة في شوارع الخرطوم !!
Author: محمد عبد الماجد الصايم
Date: 16-11-2008, 09:22 AM
Parent: #1

Quote: انتو يا ود الصايم الالوان عندكم كيف








تعرف يا عمكـ
التكسي الأصفر دا عندنا لمن تشوفو تشرب ببسي عدييييل
الليموزين هنا أبيض يا عمكـ

بس المشكلة .. اللوحات فيها خط بالأصفر!



عربيتي بيضاء
عربية تمبس زرقاء
عربية حميدة خدرا (دايما مشاتر)
داش بيضاء
عم حمزاوي بيجي بالليموزين (يعني أبيض برضو)


ديل الشفتهم غايتو!

Post: #7
Title: Re: حاجة غريبة في شوارع الخرطوم !!
Author: Adam Mousa
Date: 16-11-2008, 09:37 AM
Parent: #6

Quote: (يعني أبيض برضو)


الله يستر كان طلعت بيضاء(درون) يعنى برضو حنفقد الدورى...
يا اخى فال الله ولا فالك يا كاروشه..

Post: #22
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:12 PM
Parent: #7

الاخ آدم موسي
سلام
Quote: الله يستر كان طلعت بيضاء(درون) يعنى برضو حنفقد الدورى...


نسألك اللهم نصرا هلاليا لا نحزن بعده أبدا
اللهم انصر هلال الملايين وأجعل الفرحة في قلوب الأهلة

Post: #21
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:08 PM
Parent: #6

Quote: تعرف يا عمكـ
التكسي الأصفر دا عندنا لمن تشوفو تشرب ببسي عدييييل
الليموزين هنا أبيض يا عمكـ

بس المشكلة .. اللوحات فيها خط بالأصفر!



عربيتي بيضاء
عربية تمبس زرقاء
عربية حميدة خدرا (دايما مشاتر)
داش بيضاء
عم حمزاوي بيجي بالليموزين (يعني أبيض برضو)


ديل الشفتهم غايتو!


Quote: ود الصايم يا عمكـ خليك مع الأبيض تكسب

Post: #8
Title: Re: حاجة غريبة في شوارع الخرطوم !!
Author: almulaomar
Date: 16-11-2008, 09:47 AM
Parent: #1

يا عبود الجماعه حالفين ليكم شيلو شيلتكم وأمجاد الزرقاء وأخواتها من ركشات بحري ربما لا تنفع ، أنا بميل ميلاً بيناً للهلال لكين هذا لا ينفي خوفي الشديد من العجب وأخوانه يوم بكره سألنا وداعية وفكي أها الإثنين إتفقوا على أن الهلال يا مهزوم يا درون وفي الحالتين بطير الدوري. وأخيراً مشيت سألت ست الشاي القاعده قدام البوستة بحري قالت لي الشاي أحمر والكركدي أحمر والتوت أحمر والبرتقال أصفر والله يستركم ساكت لكين أقول ليك الكورة مدورة ويمكن تقلبوا التوقعات وتغلبوا أها لمن قالت لي كده فرحت لمن إشتريت تلاته شاي وواحد حلبه وقهوة وكلها شربتها. والخوف كل الخوف نشرب المقلب ويفوزوا الجماعه بالدوري ويشمتوا فينا خلق الله ، لأنه حتي لو قلنا يا الله درون ما في فايده. أقول ليك حاجه الهلال حا يفوز

Post: #23
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:15 PM
Parent: #8

الاخ
الملا عمر
يا خوي نحن غايتو خلينا شراب الشاي الأحمر

Quote: أقول ليك حاجه الهلال حا يفوز


دا الكلام .... خلينا من الوداعية وست الشاي الاحمر ...
كافي البلا شاي أخضر مافي ؟؟؟

Post: #9
Title: Re: حاجة غريبة في شوارع الخرطوم !!
Author: Tabaldina
Date: 16-11-2008, 10:16 AM
Parent: #1

..
.
يل عبود
بالجد انت ما لاحظت الحاجة الغريبة
عارف شنو

اى ركشة فى الخرطوم لونها اصفر بابيض

واى ركشة فى بحرى لونها احمر داكن ( كبدى ) بكحلى

واى ركشة فى امدرمان _ اظنها _ ازرق بلبنى ..

يعنى مريخ - هلال - موردة

الود صاحب الرقشة جارنا قال لى ناس المرور يعكشوك
يودوك لواحد مصرى متعاقد معاهو يجلبطها ليك اصفر .. وتدفع ليهم كمان
75 غصبا عنك ..
او تختصر الطريق وتديها اللون بمزاج ..
يعنى شوف الناس دى ما فضل ليها الا الهواء ما تاجرت فيهو
ركشات ممنوعة وما ببترخص وغصبا عنك تديها اللون بمزاجهم وتدفع ليهم

_________

الملا عمر مشتاقين ..
هناك صديق مشترك يسمى ( بت قضيم ) يبلغك التحايا

Post: #24
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:20 PM
Parent: #9

الاخ تبلدينا
سلام
Quote: واى ركشة فى امدرمان _ اظنها _ ازرق بلبنى ..


بالله ؟؟ ... وانا أقول دائما في ام درمان مشاويري بالركشات ليه؟؟ !!

Quote: يجلبطها ليك اصفر .. وتدفع ليهم كمان
75 غصبا عنك ..


مسكين ... انا لو صاحب ركشة أدفع المبلغ مضاعف (6) مرات ولا أقبل تتجلط بالأصفر !!!

غايتو جنس غايتو !!

Post: #10
Title: Re: حاجة غريبة في شوارع الخرطوم !!
Author: العوض المسلمي
Date: 16-11-2008, 11:04 AM
Parent: #1

سلام عبود

يشهد الله حتي في التجارة اللون الاصفر زول دائره مافي ,,
وكان وقعت في عربيه حمراء ,,الا يحلك منها الحله بله ,,,,

سلام صاحبي

Post: #11
Title: Re: حاجة غريبة في شوارع الخرطوم !!
Author: almulaomar
Date: 16-11-2008, 11:35 AM
Parent: #10

العوض يا أخوي يبدو إنك طولت من البلد بالحيل الحكاية ما إتغيرت والفكر إتبدل الناس الزمن ده راكبه مورانو فل أوبشن وجير أتوماتيك واللون برتقالي كمان تقول لي حمرا وصفرا أصحى للون يا العوض ، ويعني نشتري عربية زرقاء ولا البلد كلها تبقى يا عديله يا بيضاء ، المهم صافرة الحكم بإعلان نهاية المباراة هو البحل من الشبك دي وما تنسي الجماعه قاعدين في ضل النيمه ومن الآن بيقولوا درون نكسب غالبين نكسب.

Post: #26
Title: Re: حاجة غريبة في شوارع الخرطوم !!
Author: العوض المسلمي
Date: 16-11-2008, 02:31 PM
Parent: #11

الملا عمر سلام


Quote: العوض يا أخوي يبدو إنك طولت من البلد بالحيل الحكاية ما إتغيرت والفكر إتبدل الناس الزمن ده راكبه مورانو فل أوبشن وجير أتوماتيك واللون برتقالي


وين ده يا الملا ؟؟؟ قاعدين في شوارع الخرطوم كلام زي ده ماشفنا ,,
اي فل اوتوماتيك بس برتقالي !!!يكون شفت عربيه واحده حائمه اليوم كله ,,يمكن ليموزين
ياصاحبي ,,


Quote: المهم صافرة الحكم بإعلان نهاية المباراة هو البحل من الشبك دي وما تنسي الجماعه قاعدين في ضل النيمه ومن الآن بيقولوا درون نكسب غالبين نكسب.


الدرون بحل الناس كلهم ,,, هلال مريخ كاس برااااااااااااها ,,



______________________________________
وين ماظاهر ؟؟

Post: #12
Title: Re: حاجة غريبة في شوارع الخرطوم !!
Author: عمر صديق
Date: 16-11-2008, 12:05 PM
Parent: #10

Quote: أصى بشجع ساردية شندى



الاخ عبود تحياتي


الليلة كان واصلتو اخفاقات الارباب كلنا زي ماقال الاخ محي الدين بنبقي علي ساردية

Post: #13
Title: Re: حاجة غريبة في شوارع الخرطوم !!
Author: abuguta
Date: 16-11-2008, 12:52 PM
Parent: #12


عبود

انا ما بحب اللون الاصفر الا فى فنايل البرازيل
وما بحب الاحمر الا عند ليفربووووول

لكن زول اسود ولابس ليه فنلة حمراء او صفراء والله شينة شناء
لكن تعال شوف يوسف محمد قشرة بالازرق ,,وشوف كرنقو روعة على طول تذكر
جيلسى ( اسيان ودوروقبا)

امس مشينا اسواق بنتى اندرعت فى لعبة صفراء وجزمة حمراء,,
مع انو ما ماتشن مع لبستها لكن نقول شنو لون بفرح الاطفال,,,


هل تعلم ان السيارة التى كسبها هارون دياب,,لونها احمر

اخر فكى ( من اصل تنزانى والاب هندى) قال لى الفايز من
مباراة اليوم هو الفايز فى مبارة غدا
طبعا بقصد الللون...يعنى القطن والاهلى المصرى
فالقطن لونه ازرق والاهلى احمر
لكن ياعبود لو الهلال شال التوالى..فالمريخ وصيف طوالى
الى اللقاء

Post: #14
Title: Re: حاجة غريبة في شوارع الخرطوم !!
Author: محي الدين جبريل
Date: 16-11-2008, 01:00 PM
Parent: #13

مادام عبود مطنشنى


خلونى أفرش بضاعتى هنى

بلا هلال بلا مريخ بلا بطيخ ... وأنا ماشى أشترى عكاز ....




التعديل لأخطاء طباعية

Post: #29
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 05:24 PM
Parent: #13

الاخ الهلالي
ابوقوته
سلام
يكفينا هذا اللون الذي يزين كتاباتك

Quote: لكن ياعبود لو الهلال شال التوالى..فالمريخ وصيف طوالى


نسأل الله ان يتحقق ذلك
اللهم انصر الهلال غدا

Post: #28
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:38 PM
Parent: #12

الاخ الكريم
عمر صديق

Quote: الليلة كان واصلتو اخفاقات الارباب كلنا زي ماقال الاخ محي الدين بنبقي علي ساردية


يل اخوي ساردية شنو ؟؟؟ ان شاء الله غدا فائزين ...

Post: #27
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 02:34 PM
Parent: #10

المسلمي يا حبيبنا
سلام

Quote: يشهد الله حتي في التجارة اللون الاصفر زول دائره مافي ,,
وكان وقعت في عربيه حمراء ,,الا يحلك منها الحله بله ,,,,


ياخ انت ما شفت طمبل عربيتو زرقاء جميلة وحلوة

لا اصفر
ولا احمر




ازرق بس !!

Post: #15
Title: Re: حاجة غريبة في شوارع الخرطوم !!
Author: طلحة عبدالله
Date: 16-11-2008, 01:01 PM
Parent: #1

والنعمة حيرتونا في رأسنا دا يا رشاشات
شنو الليلة حكاية عربتي وعربيتك وتبشتي وتبشتك الماسكين لينا فيها دي ..
الكورة قلبت سباق عربات واللا شنو ..؟

Post: #17
Title: Re: حاجة غريبة في شوارع الخرطوم !!
Author: abuguta
Date: 16-11-2008, 01:23 PM
Parent: #15

Quote: والنعمة حيرتونا في رأسنا دا يا رشاشات



ياطلحة الزول اب عربية دا مو هلالابى

شكلو مريخابى خايف...لانه ذكر مباراة التاريخ
بين العلملاقين الاوحدين الافريقين
الهلال والاهلى....

مو قاصد الهلال والبعيو

لكن بكرة الضبح بالمشقة...اشرها لاخونا ابعربية دا

ياخى ما تخلى عربيتك بكرة فى بيتك...خلى الناس تفرح

ولا شنو ياطلحة ما دام التعادل بخلى مزمل يبيع صحيفتو لدهر كامل

Post: #30
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 05:30 PM
Parent: #15

غايتو يا طلحة انا ماعندي عربية
وبركب المواصلات ... وجني جن تاكسي الخرطوم (الاصفر) !!!

عشان كدا الليلة مرتاح لان (الاصفر) كاد يختفي من شوارع الخرطوم






وبس !!!

Post: #16
Title: Re: حاجة غريبة في شوارع الخرطوم !!
Author: elfadl abdellatif
Date: 16-11-2008, 01:20 PM
Parent: #1

صديقي عبود
تحياتي لك ولي ناس القمة
ما غريبة ولا حاجة يا عبود .. اللون الابيض مستخدم في السيارات لاسباب تجارية .. اما الازرق فهو في العدد زيو زي الاحمر تقريبا .. بعدين الحاجة لما تكتر دة دليل على رخصتها .. ولا مش كدة ?? مع العلم انا لا هلال لا مريخ .. وهو تحليل رياضي من الرياضيات وليس الرياضة ..
وانت براك قلتها الناس في شنو وناس الكورة في شنو
جايز اللونين الاحمر والاصفر ما مستعملات نسبة لندرتها
بعدين يا عبود احلى البطيخة البيضا ولا الحمرا
عفوا صديقي عبود انت عرف انا ما ليش في الكورة .. لكن بحب اناكف .. يعني طول عمري المريخاب مفتكرني هلالابي والهلالاب مفتكرني مريخابي لاني دايما اتبنى الرأي الاخر ..

Post: #31
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 05:34 PM
Parent: #16

الاخ الصحفي المهاجر
الفضل عبد اللطيف
مرحب بوجودك معنا
Quote: بعدين يا عبود احلى البطيخة البيضا ولا الحمرا

البيضاء طبعا .... كدي غالطني !!

Post: #18
Title: Re: حاجة غريبة في شوارع الخرطوم !!
Author: طلحة عبدالله
Date: 16-11-2008, 01:36 PM
Parent: #1

أبقوتة سلام
لا بالجد كدا حكاية عربيتي دي جديدة خالص
ما لاقتنا قبل كدا في كور مريخ هلال ..

Post: #19
Title: Re: حاجة غريبة في شوارع الخرطوم !!
Author: عبود عبد الرحيم
Date: 16-11-2008, 01:55 PM
Parent: #18

شكرا لكل الشباب الذين سجلوا حضورا هنا
هلالاب اسياد بلد
او
مريخاب العرضة جنوب
او حتي
ناس ساردية




راجع ليكم

Post: #25
Title: Re: حاجة غريبة في شوارع الخرطوم !!
Author: بخاري عثمان الامين
Date: 16-11-2008, 02:30 PM
Parent: #1

انا رصدت حقيقة 90% من الركشات لونها لبني
واي صندوق ورنيش برضو ...
قلت والله صحي لبني الملايين

Post: #32
Title: Re: حاجة غريبة في شوارع الخرطوم !!
Author: عماد الشبلي
Date: 16-11-2008, 09:28 PM



حاجه غريبه
حاجه عجيبه

زي العجب دا ؟؟؟

Post: #33
Title: Re: حاجة غريبة في شوارع الخرطوم !!
Author: elfadl abdellatif
Date: 17-11-2008, 09:19 AM
Parent: #1

Quote: البيضاء طبعا .... كدي غالطني !!


تصدق يا عبود فعلا في البطيخ البيضا احلى ... لانو حسب تجربتي الشخصية لما اضطريت اكل بطيخ ابيض كانت قيمته بالنسبة لي غالية جدا في منطقة شحيحة المياه زي كردفان .. حيث ينمو البطيخ الابيض بكثرة ..
لكن في العرضة البطيخ الاحمر رااااااااااااقد