لماذا تذبحنا احزابنا بغير الطريقه الاسلاميه ؟!!

شروط الذبح علي الطريقه الاسلاميه :*

* يجب اولا التسمية عليها
* أهلية الذابح ويمكن أن يكون رجل أو أمرأة
* توجيه رأس الذبيحة باتجاه القبلة"قبلة المسلمين مكة
* النطق بالبسملة قبل الذبـح
* الذبح بسكين حادة
* قطع الحلقوم والمريء والودجين اللذين يقعان في عنق الحيوان من جهة الحلقوم





------
الشروط دي لافحها من قوقل قدس الله سره !!!

في أي صحراء نقاتل خوفنا
و ندق رايات العدالة ثم ندفن في البعيد هزائم الوعي الكثيرة
كل القوافل ساومتنا- فانشغلنا بالمياه- ولم نجد غير الهزائم في حقائبنا
فبعناها جميعا و انصرفنا مثل أطفال الملاجئ
لم نرتكب خطأ سوى التصفيق للتجار و الشرطة
و لكنا تواعدنا- ليالي الظلم- أن نبقى هجائيين- حتى يستفيق الحرف من حمى التآكل
لذلك إنبهمنا, نراقب موكب الحكام ينفذ من مسام الجلد يفلت من أصابعنا و يمضي
هكذا تمضي المواكب دائما- في حبل دهشتنا
و نحن الشاربون عصارة الخصي المعتق نبدأ بالغناء
ليصفق التأريخ , هذا الشاهد الرسمي في كل المحافل
هل كان في التأريخ ما يكفي من الثورات و النزف الصدوق كي نسير إلى البطولة ؟
هل كان في معنى البطولة ما يشد الناس نحو مجازر البارود و الموت البطيء على صدور الأغنيات ؟
هل كان في روح الغناء دلالة للوعي ؟ أم أن الغناء وسيلة مهزومة للبوح عن رفض تردد في الخروج مع الدماء ؟


-------------
تاج السر جعفر الخليفة

غايتو يا أمين دي فالحين فيها فلاحة شديدة:

Quote: * قطع الحلقوم والمريء والودجين اللذين يقعان في عنق الحيوان من جهة الحلقوم

قطع الودجين و الحلقوم و المريء و أضافوا عليها قطع القلب و فقع المرارة كمان.

أمين سلامات
ياخي ديل ذبحونا من الوريد للوريد
لكن بيني بينك الجماعة بعد انسحاب ياسر عرمان
تيقنوا تماماأن الرئيس القادم للسودان سيكون هو صاحب لقب
آخر رئيس لجمهورية السودان الموحدة
وأظنهم خافوا من عبء هذا اللقب وثقله .
معليش الجاتك في حلقومك سامحتك

العوض يا حبيبنا

Quote: غايتو يا أمين دي فالحين فيها فلاحة شديدة: Quote: * قطع الحلقوم والمريء والودجين اللذين يقعان في عنق الحيوان من جهة الحلقوم قطع الودجين و الحلقوم و المريء و أضافوا عليها قطع القلب و فقع المرارة كمان.

ما عندنا إعتراض علي الضبح ، السكاكين الميته لزومها شنو ؟!!

Quote: معليش الجاتك في حلقومك سامحتك

يا أبو الجعافر ، ياخي أنا متصدق بحلقومي للوطن !
و لعلمك حلقومي ده الحاجه الوحيده الشغاله صاح فيني !











--------

ما كان من الأول ، في داعي للبل ده كلو ؟!!

من أراد أن ينظر لعجزنا و فشلنا و خيبتنا فلينظر لاحزابنا !!
احزابنا ليس في حقائبها إلا الهزيمه !!

عجبت والله لنقد منسوبي هذه الأحزاب للحركه الشعبيه لسحبها ياسر عرمان !!
و منذ متي كانت للحركه إلتزام تجاه هذه الأحزاب ، و لماذا أصلا تلتزم الحركه لهذه الأحزاب أو غيرها !!
عجبت فالكل يعلم أن الحركه الشعبيه و حتي أيام معارضتها و عضويتها في التجمع كان تمشي وحدها ، تفاوض وحدها و تحقق - ما تراه مكاسب لها - وحدها .
بعد نيفاشا و بدون الدخول في أي تفاصيل : الحركه تتعامل مع الأحزاب بوشين مختلفين متساوين في المقدار و مختلفين في الاتجاه : وش قائد للمعارضه و وش شريك حقيقي و أصيل في الحكومه يكشف عنه ساعة زنقه الحكومه !!
و أنا هنا ما بلوم الحركه أبدا ، المسؤليات بتدرج ، و الحركه مسؤليتها الأساسيه تجاه من تمثلهم في الجنوب و ليس تجاه ما يحدث في الشمال ، خاصة و إنو سبب بلاوي الجنوب كلو هو هذا الشمال بحكوماتو المتعاقبه دكتاتوريه علي ديمقراطيه .
فلماذا تلوم احزابنا الحركه الشعبيه ؟

البطالب بالديمقراطيه في الأول اليطبقها في روحو :

الامام الصادق المهدي

السيد محمد عثمان الميرغني

السيد محمد إبراهيم نقد

السيد حسن عبدالله الترابي

ديل رؤساء الاحزاب منذ الاف السنين و استقالتهم تسلم لملك الموت و لا أحد سواه !!!
الحزبين الكبيرين مكاتبهم السياسيه ممكن تنعقد في صينية الغداء : غير اولادهم و بناتهم و أزواج بناتهم ما فيها زول ...
السيد محمد إبراهيم نقد بلغ سن التقاعد القانونيه قبل حوالي 15 سنه و ما تقاعد ولا ناوي ...
السيد حسن عبدالله الترابي ده جيش إحتلال في شكل بني أدم ، كونو في ندواتو بيطالب بالديمقراطيه ، دي براها سبه في حق الشعب السوداني الشقيق !!!

قبل ما تنتقدو الحركه الشعبيه ، صلحو احزابكم و خلو همها الوطن وحده لا شريك له !!!

أمين يا أخوي

وقفت في نفس هذا المكان
ونظرت من نفس هذه الزاوية
وحللت نفس هذا التحليل
وفكرت ثم فكرت
وأخيراً قررت


----------------
ندعو لك الله صادقين أن يسدد على طريق الحق خطاك

الشفيع يا حبيبنا سلام

Quote: وقفت في نفس هذا المكان ونظرت من نفس هذه الزاوية وحللت نفس هذا التحليل وفكرت ثم فكرت وأخيراً قررت ---------------- ندعو لك الله صادقين أن يسدد على طريق الحق خطاك

قررت انك تنضم لناس عذبو وشردو و يتمو الاف ؟ لناس فسادهم فات الوراء و القدام ؟!
يا الشفيع يا أخوي أخطاء و خطايا الأحزاب مجتمعه - بإستثناء حزب الترابي - لو وضعت في كفه و وضع ما فعلته الانقاذ ( في دارفور فقط ) في كفه ، لكفت الانقاذ و أوفت !!!
نقدي الشديد للاحزاب دي جاي من عشمي كمواطن موجوع من الحاصل في البلد و عايز الأحزاب دي تمرقنا من محل ما حشرتنا الانقاذ ..
مافي مبرر أخلاقي يا الشفيع للانضمام للانقاذ : لا الليله ، لا بكره لا بعدو !!!
مع خالص شكري و تقديري لحسن دعائك لي.







------
علقت لي في بوستي بتاع الشوعيين ، أنا سبت البوست في نص النقاش لانو بدا يتحول إلي غير ما فتح من أجلو .
حا أجيب كلامك هنا و أرد ليك عليهو إنشاء الله .

لا وقت للبكاء ....
ما حدث يمكن أن يكون بدايه لاصلاح مسيرة احزابنا .

Quote: لا وقت للبكاء ....

نعم

Quote: ما حدث يمكن أن يكون بدايه لاصلاح مسيرة احزابنا .

لا ، ما حدث هو بداية تشييع احزابنا لمثواها الاخير غير مأسوفاً عليها

فى الزحمه المجنونه دى , كويس انو القى زول عاقل اتونس معاهو
تعرف يا امين وقبل ما ادخل البوست ده .. ومن امبارح
مدور جواى مقطع لى تاج السر

( كذب هو التأريخ حين يصعد بالشعوب الى حواف الاشتعال .. ثم لا نجد الحريق )

دخلت بوست عبدالعاطى .. وكنت قررت التوقف تماما عن الكتابه حول الاحباط الحاصل
لقيتم بتكلموا صاح .. قلت اكتب كلمتين
رسلت الرد .. لقيتك برضو بتتكلم صاح .. فتشتك , لقيت بوستك ده
طوالى دخلت .. لاقانى وش تاج السر , فهتفت فى سري
ان المصائب تجمعن المصابينا ..
او نحو ذلك ..

___________

يا الله .. يا الله
ما جدوى ذلك الوطن

سلامات يا امين

في رايي المتواضع انو الحركة الشعبية او جناح السيد سلفاكير فيها بتدير معركتا بطريقة مثيرة للأعجاب ،

الجناح دا حدد هدفو من بدري في استقلال الجنوب وقيام دولتو المستقلة ،

دي ما حاجة بتسعدني لكن اعتقد انو الجنوبيين بيستحقوا دولتهم المستقلة في ظل الظلامات التاريخية اللحقت بيهم في الدولة السودانية منذ استقلالها وربما قبل ذلك ،

سلفاكير ح يجي اليوم اليتم تنصيبو واعتبارو كقائد حركة التحرير لدولة الاماتونج او ايا كان اسمها ،

بالنسبة لأحزابنا السياسية فهي فاقدة للبوصلة من زمن بعيد فيما بدا لي ،

واشارتك لغياب الديمقراطية داخلا في محلها تماما ،

اها بالنسبة لطريقة الذبح دي خليني اقول ليك حاجة : الناس هنا موضوع الانتخابات دا ما شغالة بيهو كتير زي الناس القاعدا بره او علي الاقل البيكتبوا في سودانيزاونلاين هنا ،

ناس كتار ما سجلوا اسماءهم من الاول وناس تانين ما جايبين خبر للموضوع ،

اهم حاجة عند ناس كتار هم الغالبية انو الموضوع دا يعدي بسلام ،

وهل في اجازة والا لا ومدتها كم !!!!!

Quote: ( كذب هو التأريخ حين يصعد بالشعوب الى حواف الاشتعال .. ثم لا نجد الحريق )

ما هو إنت و المشرف تجيدون الضبح يا أمين ..!!
و لا عزاء يا وطن ..


.........
( سبايا نحنُ في هذا الزمانٍ الرّخو ) .

Quote: فى الزحمه المجنونه دى , كويس انو القى زول عاقل اتونس معاهو تعرف يا امين وقبل ما ادخل البوست ده .. ومن امبارح مدور جواى مقطع لى تاج السر

في الزحمه المجنونه دي يا محمد حيدر الأحزاب واصلت إغتيال الأنسان فينا ، و صعبت المعادله الأصلها صعبه .
لينا خمسه سنين عارفين في إنتخابات ، إنتخابات الأحزاب دي ما دقت فيها حجر دغش : إنتخابات جابتها ليهم الحركه الشعبيه اللي بينتقدو دي !!
الحركه الشعبيه عندها حسابات تانيه لمصلحة شعبها و جماهيرها ، الأحزاب حسابات مصلحة شعبها و جماهيرها وين ؟!




--------
مزعلني احباطات الناس أكتر من الحصل ذاتو !!
--------
سلام علي تاج السر في العالمين .

سلام يا الوليد

Quote: في رايي المتواضع انو الحركة الشعبية او جناح السيد سلفاكير فيها بتدير معركتا بطريقة مثيرة للأعجاب ، الجناح دا حدد هدفو من بدري في استقلال الجنوب وقيام دولتو المستقلة ، دي ما حاجة بتسعدني لكن اعتقد انو الجنوبيين بيستحقوا دولتهم المستقلة في ظل الظلامات التاريخية اللحقت بيهم في الدولة السودانية منذ استقلالها وربما قبل ذلك ، سلفاكير ح يجي اليوم اليتم تنصيبو واعتبارو كقائد حركة التحرير لدولة الاماتونج او ايا كان اسمها ، بالنسبة لأحزابنا السياسية فهي فاقدة للبوصلة من زمن بعيد فيما بدا لي ، واشارتك لغياب الديمقراطية داخلا في محلها تماما ،

ده بالظبط و بالعربي الفصيح الداير أقولو من فتح البوست ده .

و يا دكتور المساله دي الحركه الشعبيه أصلا ما كانت داساها ، احزابنا بس الما كانت شايفه و ( إنها لا تعمى الأبصار ولكن تعمى القلوب التى فى الصدور )

الحركه الشعبيه من يوم ما بقت شريك في الحكم كانت و ما زالت شريك حقيقي شغاله و بتعمل لمصلحة شعبها و هو الانفصال في نظرهم !

يعني نحن في الشمال ممثلين في حكوماتنا منذ الاستقلال ماذا فعلنا لاهل الجنوب غير القتل و التدمير و التشريد و الأن ننتظر منهم التضحيه بمصلحتهم (حسب ما يرونها ) و الا فانهم خونه ؟!!





-------

يمر العام تلو العام لا الأحلام تصدق ، لا ركام الهم يسقط من حساباتي !!!

------

و سلام علي كجراي في العالمين !

Quote: و لا عزاء يا وطن ..

اها يا عمده بقيت تكضب كمان ؟!!
الوطن ده الناس كلها عزت فيه تقول لي (لا عزاء يا وطن ) ؟!! إنت كان ما عزيت بدربك ده أمشي عزي ،
راجين ناس سلفا يطفو النور و بعداك بيرفعو الفراش و تاني السودان الشقيق حا يبقي من (حلفا لكوستي) ، ذاتو من ناحيه رزيم اسمح من (من حلفا لنمولي ) !!!

يا امين سلام ياخى
والسلام مضى والسلامه على إثره
وصباح الندامه حلْ
كما قال حسن طلب
والله يا أمين محروقين حشا وحار بينا الدليل...
وزى ما قلت الناس عولت على الحركه
ومل كان ينبقى لها ....
لانو حسب وجة نظرى الحركة ما حزب سياسى
والحركة الان ما هى الحركه ايام قرنق
وسلفا ماعندو الافق السياسى البيخليهو يحسبها صاح
ولو حسبها صاح كان التاريخ خلدوا وسماه القائد الذى حفظ وحدة السودان
وزى ما قلت فى بوست عبدالحكيم

Quote: عبد الحكيم سلام نحن لم نكن أشد حوجه لإجماع وطنى أكثر من الآن... هذا الإنسحاب المتشظى يكسر قلوب الحادبين على مصلحة الوطن ويشمت الأعداء فينا تخيل لو جاء البيان كالآتى نحن الموقعين أدناه ...قوى مؤتمر جوبا نعلن إنسحابنا من الإنتخابات فى جميع مستوياتها..وذلك للأسباب التاليه.. 1 -.....عدم مصداقية التعداد السكانى 2 -......المخالفات الانتخابية فى مراحل التسجيل المختلفه 3 -....الصراع في دارفور 4 - ....تسخير أموال الدوله فى الحمله الإنتخابيه لصالح البشير 5 - ....توزيع الدوائر الإنتخابيه بصوره تخدم المؤتمر الوطنى 6 -....التلاعب وعدم الجديه فى تسجيل الناخبين فى دول المهجر مما أدى لضعف أعداد المسجلين 7 -...عدم النظر فى الطعون بشكل جاد 8 -...قانون الإنتخابات 9 -...عدم إلغاء القوانين المقيده للحريات 10 -...تسخير وسائل الإعلام فى الحمله الإنتخابيه لصالح مرشح المؤتمر ....الخ.....................................................

ورغم احترامى الشديد لباقان لكن باقان وياسر ما فى موقع قوه
والقرار ما فى ايديهم

الواحد ماعارف يقول شنو؟؟؟
نرجع لموضوع الديمقراطيه....
انا زى كتير من عضوية الأحزاب دى ...
كنا ضد الانتخابات من اساسها
لانها بتدى شرعيه للنظام فى الظروف التامه فيها
لو كانت الأحزاب سمعت صوت القواعد ما كان بقينا فى النحنا فيهو ده...!!!!!


لكن ..رغم كل ده ...دى!!!!...اصلو ما اتوقعتها....

أختنا إقبال ، سلام من المولي عليك و علي المعاك ...

Quote: والله يا أمين محروقين حشا وحار بينا الدليل... وزى ما قلت الناس عولت على الحركه ومل كان ينبقى لها .... لانو حسب وجة نظرى الحركة ما حزب سياسى والحركة الان ما هى الحركه ايام قرنق وسلفا ماعندو الافق السياسى البيخليهو يحسبها صاح ولو حسبها صاح كان التاريخ خلدوا وسماه القائد الذى حفظ وحدة السودان وزى ما قلت فى بوست عبدالحكيم

"البل" الحاصل للناس ده جزء من مستحقات انتمائنا للسودان الشقيق ، السوداني بتولد "مبلول" و يظل " مبلول" حتي قيام الساعه ، أي حاجه غير كده إستثناء !!
السودان بشكلو الحالي مات يوم موت قرنق ، قرنق كان أخر فرصه لتوحيد السودان .
مختلف معاك جدا في كلامك عن سلفا يا إقبال :
سلفا قائد لشعبو و لناسو القاعدين في بلدهم مواطنين درجه الف ، الماتو بالطرناطه و كتلوهم حكومات الشمال : الدكتاتوريه منهم و الديمقراطيه ، إذ ما توحدت سياسة حكوماتنا منذ الاستقلال في شئ غير في ظلم الجنوب و الجنوبيين ، لماذا إذن الاعتماد علي الحركه لانتشال الشمال الظالم من حكومتو الدكتاتوريه و لماذا التعويل علي الحركه لحفظ البلاد من الانفصال ؟

Quote: انا زى كتير من عضوية الأحزاب دى ... كنا ضد الانتخابات من اساسها لانها بتدى شرعيه للنظام فى الظروف التامه فيها لو كانت الأحزاب سمعت صوت القواعد ما كان بقينا فى النحنا فيهو ده...!!!!!

شرعية شنو يا إقبال ؟
الانقاذ ليها واحد و عشرين سنه حاكمه البلد لا شغالين بشرعيه ولا جنائيه ، حاكمين و قاعدين ظالمين لا خايفين من الله لا من زول . ليه لمن الناس تلقي فرصه تقلق منامهم يقولو ما دايرين ؟! ليه ما الاحزاب تشارك و تكشف التزوير ده ؟!
لو الأحزاب كلها توحدت و في كل دائره نزلت مرشح واحد بس ضد المؤتمر الوطني التزوير ما بحلهم ، لكن قادة الأحزاب ما ممكن يعملو كده ، لانهم عاجزين ضعييون و سلبيين أخر حاجه ممكن يفكرو فيها البلد و مصلحة ناسها !!

الناس المتهمين الحركه الشعبيه بالخيانه و بيع القضيه ، نهدي لهم كلام سيدنا أمل عليه من الله الرحمه و الرضوان ، علي لسان عنتره بن شداد :

سكت سنة فسنة لكي أنال فضلة الأمان
قيل لي اخرس
فخرست وعميت و ائتممت بالخصيان
ظللت في عبيد عبس أحرس القطعان
أجتز صوفها
أرد نوقها
أنام في حظائر النسيان
طعامي الكسرة والماء وبعض التمرات اليابسة
وها أنا في ساعة الطعان
ساعة أن تخاذل الكماة والرماة والفرسان
دعيت للميدان
أنا الذي ما ذقت لحم الضان
أنا الذي لا حول لي أو شأن
أنا الذي أقصيت عن مجالس الفتيان
أدعي الى الموت ولم أدعَ الى المجالسة

*****************

أسالو أنفسكم يا ساده :
متي ذاق الجنوبيون لحم الضان ؟
متي كان لهم حول أو شان ، متي دعو إلي مجالس الفتيان ؟
منذ الاستقلال يدعون إلي الموت فباي حق يدعون للميدان ؟!!

Quote: لا ، ما حدث هو بداية تشييع احزابنا لمثواها الاخير غير مأسوفاً عليها

الأحزاب ده بتمثل الشعب يا الشفيع ، و الشعوب لا تموت !!!
ما حدث سيكون بدايه لاصلاح الحال إن شاء الله ......

Quote: ما عندنا إعتراض علي الضبح ، السكاكين الميته لزومها شنو ؟!!

كلنا - بما فينا احزابنا العرجاء - نعلم ان :
الانتخابات معلنه منذ العام 2005
الانقاذ بكل قبحها معلنه منذ العام 1989
فما الذي تغير حتي تقاطع الأحزاب الانتخابات ؟!!!

.....

Quote: احزابنا ليس في حقائبها إلا الهزيمه

يا أمين كدى فتِّش كويس ، قطع شك


بتعتر ليك فى سكِّين وللا ( فرَّامة) مصدِّية









....

شكرا يا أبو بكر علي المرور

Quote: يا أمين كدى فتِّش كويس ، قطع شك بتعتر ليك فى سكِّين وللا ( فرَّامة) مصدِّية

الوليد يا حبيبنا ، مافي أي شي في الشنط دي غير الهزيمه !!!
السكاكين و الفرامات المصديه دي قاعده في الجيب الوراء ما في الشنط !!!

هذه بداية وعي جديد


شكرا لك يا أمين على قول المسكوت عنه والواضح بذاته مع ذلك..

Quote: هذه بداية وعي جديد شكرا لك يا أمين على قول المسكوت عنه والواضح بذاته مع ذلك..

شكرا يا عادل علي المرور و التعليق .
و حقيقه محير تماما أمر احزابنا و قادتها ، و محير أكثر أمر منسوبيها .

Quote: في أي صحراء نقاتل خوفنا و ندق رايات العدالة ثم ندفن في البعيد هزائم الوعي الكثيرة كل القوافل ساومتنا- فانشغلنا بالمياه- ولم نجد غير الهزائم في حقائبنا فبعناها جميعا و انصرفنا مثل أطفال الملاجئ

تسلم يا امين..
لخصت بهذه الاحرف الناصعة سفرا كاملا في حياة الدياسبورا
و واحلامها المؤودة..

بعض ما قلته في خطاب بيني وبين صديقي واستاذي عادل عبد العاطي يا امين محمد سليمان أرجو مراجعته :

فالحركة الشعبيـــة فاقت سوء الظن مهما حاول البعض تجميـــل موقفها وتاريخها مع احزاب المعارضة الاخري يشهد ...

Quote: رغم التوجس الذي قابل به اهل السودان الشمالي عموماً الحركات الجنوبية المسلحة منذ الانانيا ون والانانيا تو ووقر في ادبياتها على مختلف الانظمة التي مرت على السودان منذ الاستقلال واطلقت عليها اسم حركات تمرد وإنها عنصرية تستهدف الشماليين على اراضيها إلا انهم - اي اهل الشمال في معظهم - غيروا هذه النظرة السالبة تجاه الحركة الشعبية وقائدها الراحل دكتور جون قرنق مؤخراً وذلك على خلفية التحالف الذي تم بأسمرا بينها وبين التجمع الوطني الديمقراطي المعارض والذي كانت لاحزابه صراعات مع الحركة الشعبية سابقا عندما كان في السلطة ..

Quote: يعود السبب في ذلك لعدة اسباب منها ماهو عائد للحركة نفسها ومنها ما تسبب به نظام الجبهة الاسلامية القوميـــة ومنها ما يعود فضله لاحزاب التجمع الوطني الديمقراطي المعارض

Quote: بالنسبة لدور الحركة الشعبية .. فبعد بداياتها بقيادة الراحل جون قرنق والتي كانت تتمحور حول حقوق اهل الجنوب والتهميش الذي يعانون منه ومحاولة انتزاع حقوقهم عبر فوهة البندقية والتي كانت تُصور على انها حركة محصورة في في الاقليم الجنوبي فقط اصبحت ومنذ توقيع اتفاقية اسمرا تشهد تطور وتقدم في فكرها لتشمل جميع السودان وتبلورت اخيـــراً في مفهوم السودان الجديد الذي اطلقه دكتور جون قرنق لتجد دعم وتأييد من نخبة مقدرة من مثقفي الشمال وقادته مثالاص لهم منصور خالد والمرشح الذي سثحب ياسر عرمان وغيرهم .. هذا الفهم اجبر العديد من اهل السودان عامة للنظر للحركة الشعبية وقائدها الراحل جن قرنق نظرة مختلفة محملة بالامل ان ياتي التغيير على يديها ويكسر الدائرة الفارغة التي ظل يعيشها السودان منذ الاستقلال عبر طائفية حزبية ضيقة ثم حكم عسكري شمولي لطائفية وهكذا ..

نظام الجبهة الاسلامية كذلك اثر على هذه النظرة وذلك عند انقلابه على نظام ديمقراطي وليد جاء عبر انتفاضة شعبية على حكم شمولي جثم على صدر الوطن 16 سنة فجاءت الجبهة بنظام شمولي آخر انقلاباً على الشرعية الدستورية في وقت كانت الحركة الشعبية قاب قوسين او ادني من توقيع اتفاق الميرغني ..
وخلال سنوات التمكين الاولي للإنقاذ فعلت الجبهة الاسلامية ما وسع الشقة بينها وبين الشعب لما يدفعه حتي ولو للتحالف مع الشيطان من اجل اجتثاثها ..
فقتلت وشردت وفصلت الموظفين والعمال وفتحت بيوت الاشباح للمعارضين ثم حولت الحرب في الجنوب من حرب سياسية كانت تقوم على مظالم واقعة على اهل الجنوب الي حرب دينية جهادية شاملة قضت على الاخضر واليابس بالجنوب من ناحية وعلى ثروات مقدرة من الشباب واقتصاد البلد وتنميته من ناحية اخري ..
وما كان مطلب سياسي تحول بقدرة الجبهة الاسمية وعرابها الترابي الي تنصير وتكفير ومحاولة استعمار جديدة رأت حكومة الجبهة حينها ان مكافحتها تتم بقوات الدفاع الشعبي المُلزمة لكل عامل وموظف وطالب يريد ان يستمر في وظيفته ويتم سد النقص عبر كشات الخدمة الالزامية ومطاردة الشباب في الشوارع والمتاجر والمواصلات والاسواق .. وشهدت هذه العملية منالمآسي ما دفع العديدين للإنضمام لمعسكرات المعارضة بارتريا والشرق وهناك تواصلوا بصورة حقيقية مع قوات الحركة الشعبية والتي غيرت مفاهيمهم عنها بفكرها حول السودان الجديد غيـــر ما وفرته وسائل الاعلام عن التغير الفكري والتطور الذي طرحه دكتور جون قرنق في مختلف المحافل ..

التجمع الوطني الديمقراطي والذي ضم في مجموعه احزاب من اليسار واكبر حزبيين في السودان بناءا على آخر انتخابات تمت في نظام ديمقراطي هما حزب الامة والحزب الاتحادي الديمقراطي والتي تمتلك عضوية في كآفة ارجاء السودان واتي معظمهم اليها على خلفية دينية وينظرون لقادتها بشئ من القداسة لم تتواني ان تضع يدها في يد الحركة الشعبية وقائدها بأسمرا وتوقع معه اتفاق ينص على التحالف على اسقاط نظام الجبهة الاسلامية ..
هذه الاتفاقيـــة التي وقعها فيمن وقعها اثنين من اكبر الاحزاب الدينية في السودان بالتحالف مع حركة ظلّ اعلام الجبهة الاسلامية يصفها صباح مساء بانها حركة متمردة وحركة كنسية وحركة صهيونية ومخلب للاستعمار الغربي اليهودي ومدعومة من اسرائيل والكنائس ووووو... بالتاكيد تجعل اغلبية من اعضاء هذه الاحزاب ينظرون لها نظرة مختلفة فإذا كانت كما يروج لها اعلام الانقاذ فعلي الاقل هم يضمنون قياداتهم الدينية انهم لا يسقطوا في مثل هذه الفخ ومازاد الاقتناع انه حتي زعماؤهم وصفوا بالخيانة والتمرد ومعارضي الفاندق والبارات وخلافه .. فنشأ تلقائياً قبول وسطهم للقائد جون قرنق والحركة الشعبية كان من اسبابه هذا النفاج الذي فتحه التجمع الوطني الديمقراطي للحركة الشعبية للعبور الي الشمال عبر بوابة اذاعة المعارضة حينها وعبر تحالفها معهم وتقديمها للمواطن السوداني في الشمال ..

من الواضح للآن ان الحركة الشعبية إتخذت احزاب المعارضة حلفائها بالامس في اسمرا مطيّة لتحقيق اهدافها سواء كانت اهداف تتعلق برغبتها في الانفصال الذي لوحت به اكثر من مرة .. او تحسين وضعها وتقويته امام شريكها في الجرم الحالي المؤتمر الوطني بكسب المزيد من الاوراق التفاوضية ..

ثم لا ننسي ان الحركة الشعبية اليوم ليست هي نفس الحركة الشعبية عام 2005م والتي استقبل قائدها ملايين السودانيين بالخرطوم استقبال الابطال

Quote: بعتقد إنه عرمان تم إستخدامه كــ( أرنب ) سباق في الشمال حتي يجد الدعاية اللازمة من مجموعة مقدرة من المثقفين والديمقراطيين .. وارهصات ( ارنبته ) ظهرت بـعدم تدشين حملته في الجنوب بل ولا دعاية انتخابية له بالجنوب مافي وهي اشارة مهمة كان مفروض يلتقطها بقية الاحزاب .. لكنهم بعماهم واصلوا السعي واللهث خلف الارنب دا بدون اتفاق لمن يوديهم التوج ودا حا يتضح بعد ساعات في قرارهم الجاي .. اما هدف الحركة بسحب عرمان ففي تقديري انه مقدمة للإنفصال بصورة واضحة .. فالمؤتمر الوطني هدد بإنه في حالة سعي الحركة لتأجيل الانتخابات لن يكون هناك استفتاء وقال البشير انه تمت صفقة تحت تحت مع الحركة الشعبية .. يبقي الحركة الشعبية تعمل شنو ؟! تواصل إستحمارها للمعارضة من ناحية انها تسحب المرشح الرئاسي بتاعها بدعوي التزويرعشان تورطها بسحب مرشحينها .. وفي نفس الوقت تشارك في الانتخابات البرلمانية وإنتخابات الجنوب عشات تدي الانتخابات شرعية وتضمن انه الاستفتاء يقوم في مواعيدو .. إذا سحبت الاحزاب مرشحينها الرئاسيين والبرلمانيين فاكيد المرشحين المستقلين لن ينسحبو وسيواصلوا في إذفاء شريعة عليها خاصة وانه العديد من افراد المؤتمر الوطني والحركة الشعبية نازلين باسم مستقلين وكامل ادريس دا لو كان شنو وشنو ما بينسحب .. لذا برجح فرضية مقدمة للانفصال القادم بقوة وستتبعه دارفور

Quote: الحركة الشعبية كما قلت سابقا تغيرت صورتها كثيراً في الشمال عن الماضي الذي صورته اجهزة اعلام الجبهة الاسلامية وكانه غزو قادم من الجنوب يحركه مجلس الكنائيس العالمي .. وكانت في بداية التسعينات تستفز القبلية والعصبية بمقولات مثل - جون قرنق قال حالف الا يشرب جبنة في المتمة - وطلعت في المقولة دي قصائد واهازيج رغم انه في الاخير جاء جون قرنق الشمال وذهب حيث يشاء ويريد فيه بصفته نائب اول لرئيس الجمهورية وصاحب منصب دستوري .. ما يهم انه ما غير الكثير من افكار الشماليين عن الحركة هو اولاً الدعوة باسم السودان الجديد وثانياً والاهم انه الحرب التي كانت توصف بانها دينية يقودها عراب الانقاذ الترابي اصبحت بقدرة قادر حرب سياسية وبقوله هو نفسه - اي الترابي - والعديد من مفكري الجبهة الاسلامية كحسن مكي وغيره .. وصف الحرب سابقاً بانها جهاد ثم الاعتراف بسياسيتها بالتأكيد خلق نوع من البلبلة والنظر بعدم مصداقية لدعوات الحكومة خاصة لدي الشباب الذين لا ينتمون بصورة عقدية لفكر الجبهة الاسلامية كمثال لمن ذكرتهم .. والان اذا ساءت الاوضاع ورجعت الحركة للغابة مرة اخري وقامت حرب لأ اظن الجبهة الاسلامية بمقدروها تسيير حشد من الدبابيين كالسابق باسم الجهاد او الدين ...

Quote: تسلم يا امين.. لخصت بهذه الاحرف الناصعة سفرا كاملا في حياة الدياسبورا و واحلامها المؤودة..

يا حليمه ياخي كتر خيرك علي حسن الظن ، لكن أنا لو بعرف اكتب زي الكلام ده ، البقعدني شنو مع البسطاء و قليلي الثقافه الهنا ديل !!
الكلام ده كتبو الاستاذ / تاج السر جعفر الخليفة ، و تسلمي علي المرور .

الطريفي ياخي كتر خيرك علي إثراء هذا البوست بمداخلاتك العميقه دي و اللي بختلف معاك فيها بنسبه كبيره جدا لكن قادر أفهم كلامك تماما و إن اختلفنا .


رؤيتي لموضوع الحركه الشعبيه و مواقفها ممكن الخصها ليك كالاتي :
- منذ الاستقلال لم تتفق الحكومات علي شئ قدر اتفاقها علي ظلم اهلنا في الجنوب ، افقار و تهميش و قتل و تشريد ممنهج و منظم حتي صارت حكومة البلد عدو لمواطنيها في الجنوب ، و الكلام ده مدور ليه أكتر من خمسين سنه .
- نتيجه لكفاح و نضال حقيقي مكتوب بدم أكتر من اتنين مليون مواطن (اسياد بلد) مفروض يكون عندهم فيها زيهم و زي ساستنا سبب خيبتنا ، نتيجه للكفاح المستمر ده توصلو لاتفاقيه مع الحكومه السودانيه فيها إنتخابات و حق تقرير مصيرهم.
- شنو السبب اللي يخليهم يضحو بلانفصال - طالما هم شايفين مصلحتهم في الانفصال - شنو السبب اليخليهم يضحو عشان خاطر عيون نفس الحكومات و نفس الساسه و نفس الناس الوصلوهم لما هم فيه .
- الحركه الشعبيه مسؤليتها الوحيده و الأساسيه - في تقديري - تجاه مواطنيها في الجنوب و مواطنيها فقط .
- الانقاذ لا يهمها البلد تنفصل ، البلد تنحرق ما مهم ، المهم انهم يكونو حاكمين ، السؤال أين احزابنا من كل هذا ؟
- ليه الانسحاب من الانتخابات قبل موعدها باسبوعين ، و كانما الكيزان بقو ما نزيهين و مزورين قبل اسبوعين ، و كانهم فقط قبل اسبوعين اكتشفو إنهم بلانتخابات دي حا يدو الحكومه دي شرعيه ، و كانو الانقاذ محتاجه شرعيه و هم حاكمين ليهم واحد و عشرين سنه.
- يا الطريفي يا أخوي ما تلومو الحركه الشعبيه لومو احزابنا و طالبوهم بمراجعة مواقفهم و قراياتهم السياسيه الكلها غلط و اللي ختتنا في ما نحن فيه الأن .

ليه الجنوبين يفكرو في مصلحة السودان كدوله و وطن ، متي كان السودان وطن للجنوبيين ؟!!