Post: #1
Title: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-25-2003, 00:02 AM
Parent: #0
يا جماعه آى حد عنده آى وصيه للأهل يجهزه ويجهز العنوان وبإذن الله ما بنقصر معاكم
لآن خيركم سابق منحتونا كل إحساس جميل ومنحتونا إحساس الأسره والأهل والوطن
والصداقه والمحبه والأخوه والتواصل
سنتوجه بإذن الله الإسبوع القادم لربوع الوطن الحبيب
وعلى قول المثل المفارق عينه قويه
ولاجيت رائح كتِّر الفضائح
الله يتوب علينا من الغربه ويردنا سالمين غانمين
يا أهلنا العفو والعافيه وسامحنونا لو غلطنا عليكم أو قصرنا فى حقكم..وبما أن البلد تعج بالكوفى نت وبأسعارفى متناول اليد
سأتواصل معكم بإذن الله أصلى بقيت خلاص
سيك سيك معلق فيك وريدى ليكم بقى جزءأصيل من دمى
ودعواتك يا طيبين
فتناكم بعافيه
ونتلاقى على خير بإذن الله
|
Post: #2
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: فتحي الصديق
Date: 06-25-2003, 05:23 AM
Parent: #1
وجن
بالسلامة انشاء الله وربنا يستر عليك في حلك وترحالك ويحفظك انشاء الله.
وقولي للنيل ضفة ضفة
والعـشـــيات لما تصفى
انو شــوقـي بفيض بحر
|
Post: #3
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: ايهاب
Date: 06-25-2003, 06:53 AM
Parent: #2
العزيزه وجن
الصباح الباهي لونك
وضاحه يا شمس المشارق
غابه الابنوس عيونك
عزانا انا سنلاقيك في الممشى العريض بازن الله
الممشى العريض دا حوشكم طبعا
loOoOoOOoooOoOoOoOOolz
بالسلامه انشاء الله وانتم السابقون ونحن اللاحقون
الاخ فتحي صديق
هزيتني حد الاغماء ياخي
فانا احمل شوق عقد عديل
بلغي النيل شوقو ياوجن
اما عني فقولي ليهو جاك بلا
بلا دا ا نا طبعا ما انتي
loOoOoOoOoOoOoOoOoOolz
لا اله الا الله
وفي امان الله
ووداعه الرحمن
|
Post: #23
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:27 AM
Parent: #3
العزيز إيهاب
والله معاك حق نحن السابقون وأنتم اللاحقون والله فى محله تمام
بتفهمنى بعد ما تمشى هناك وخسوساً أنك ماشى عريس وما حيكون نفض كيس سااى
حيكون نتيف عديل كده الله يعينك على البلد
أخاف تخزلنا ونحنا شايلين ليها شوق السنين لكن تقول شنو عزيزه ماف كلام
زمان لمن كنت بسافر أيام الدراسه أول ما أخت رجلى فى أول عتبه فى الطياره وبعد ما أجرلى نفس طويل من هوانا
طوالى بقول إستعنا على الشقاء بالله هههههههههههههههههههه
لكن هسه نفسى أقول إستعنا على الهناء بالله بس ربنا يوصلنا إن شاء
قلت لماما بتخلينى أمشى مدنى عندنا عرس زميلنا فى جامعه سودانيز أون لآين طبعاً دى مقتبسه من العزيز كوستا
قالت لى آى بنجى مارين بيها بنزلك هناك تستني السيره لمن تصل
ههههههههههههههههههههههههههههههههههههه
ربنا يسلمك إن شاء الله...وفى أنتظارك إن شاء الله فى ممشانا العريض
محمد رسول الله
|
Post: #22
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:26 AM
Parent: #2
الصديق الصدوق /فتحى
أولاً أسمح لى أرحب بيك وبصداقتك ياعزيزى
واللهم آمين ويخليك وينولك الفى بالك
يوصل سلامك للبلد
تعرف أنا نفسى فى شنو أول ما أصل بالسلامه
نفسى أتمدد على وشى فى تراب الوطن وأجر لى نفس طويييييييييييييييل من التراب داك لمن أقحقح وأشرق
والله ماتستبعد مجنونه وبعمله مجنونه ببلدى وأهله الطيبين ومشتاقه للنيل ضفه ضفه
أنا آسفه ما يقدر أبلغ النيل شوقك الا لامن أبل شوقى عشان كده بعتذر ليك مقدماً شوقين فى الرأس بمخولوولا ماكده
ورد الله غربتك كان عتَّته زينا كده وكان يادوب برلوم ربنا يحقق أمآلك وردك لآهلك سالم وغانم بإذنه وتعالى
|
Post: #4
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: بدرالدين شنا
Date: 06-25-2003, 07:51 AM
Parent: #1
بسم الله الرحمن الرحيم
الغالية جداً وجن
سلام وإحترام
أها يا بت أمي ربنا يوصلك بالعافية والسلامة ويجعل في كل خطوة حسنة
الرسول سلمي على أهلك كلهم وإن شاء الله تلقيهم طيبين وسالمين
وكان الظروف لمتك بي أم ربى سلمي عليها وعلى عيالي وأمي وأبي
عليك الله يا وجن يا السمحة وعجن ما تنقطعي وبعد تجي من الإجازة إنشا ءالله عايزين منك بوست فيهو كل التفاصيل
لك التحية وفي رعاية الله خليناك مع سلامة ودعناك
|
Post: #24
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:28 AM
Parent: #4
القريب الى نفسى جداً أستاذى بدر الدين
الله يسلمك ويخليك لوليداتك لكن حقيقى نفسى أوصل سلامك لآهلك وأقول ليهم الزول الظريف دا لميتو فيه وين
ماشاء الله تبارك الله وعينى بارده
عندنا جارتنا فى الخرطوم معروفه إنوعينه حاره لمن تجينا البيت ما بتلاقيها الا حبوبتى والغريبه التقول جايه بس عشان تسحر
أها تقول لحبوبتى من ماتدخل من باب البيت وبصوت عالى يسمع الجيران كمان (ماشاء الله تبارك الله عينى مليانه أحمد الله
وعندى البنات والأولاد
السمحين والسمحات الشبعانين والشبعانات علا ماقلت لى بناتك وينن النسلم عليهن )
والله عزيز وبلا خسيمه بكتل ما بنقطع ههههههههههههههه
طبعاً بدرب من هسه على كلام حبوبتى صاحباتى بقولوا لى أنت يا بت كان ما بتخجلى من كلام العجائز دا نحن بنخجل ليك
انت بلاى شهاده عربيه انت
مره قلت لخطيبى ميرسى قال لى لاحوله دى لقطيها من وين بجيب ليك تسمم
الله يسلمك يا أستاذى الغالى وتسلم للدعوات الكريمات
|
Post: #5
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: elsharief
Date: 06-25-2003, 08:42 AM
Parent: #1
الاخت وجن
العفو والعافيه
وسلامى للوطن
|
Post: #25
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:29 AM
Parent: #5
أخى الشريف
تسلم يا عزيزى وفى أنتظارك فى وطن مُعافى بإذن الله
فارد جناحاته لآبنائه الكرام البرره
|
Post: #6
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: bint_alahfad
Date: 06-25-2003, 09:01 AM
Parent: #1
يا خاينه يا غداره ما عايذه كلام معاك..لا ما تكلمينى أنا ذعلانه منك ):
ده أخرت تربيتى؟
الكلام العملتيهو ده صاح منك?
تعرفى أنا ماشه السودان الأسبوع الجاي أنشاء الله ولا تكلمينى؟ مع أنو أنتى عارفه أنك أكتر واحده مشتاقه أقابلها؟
كده يا وجن طيب أصبرى لى لما الاقيكى حاشدك من جضدومك ده 
يلا أرجعى لبوستى ( أنا فى السودان..سنه) وما تنسى ترسلى لى تلفونك فى السودان عشان أتصل بيكى ونشوفك
تحياتى يا غياظه
وتمشى وتجى بالسلامه
وفى أمان الله
لا اله الا الله
|
Post: #26
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:32 AM
Parent: #6
أختى وصديقتى وعزيزتى بت الأحفاد
أنا أيضاً فى شوق شديد لك وقرأت ذلك البوست من البدايه وأرسلت الرد ومنذ ذلك الحين وأنا فى إنتظار رسالتك
وتلفونك وعنوانك ومليون فى المئه لوربك كتب لينا العمر بنتشاوف
وليك على أكون المُرشده السياحيه بتاعتك بس على نطاق الخرطوم أها قصرت معاك حبيبتى
والله زياده على شوق الوطن شوق خاص جداً يدفعنى نحوك
وربنا يكتب السلامه لك ولآسرتك الكريمه
والله لاجاب زعل حبيبتى.معقوله تربيتك وتعبك كلهم يروحو هدر أبداً
وفى أمان الله
محمد رسول الله
|
Post: #7
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: rummana
Date: 06-25-2003, 09:11 AM
Parent: #1
الغالية الحبوبة وجن
اتمنى لك احلى الأوقات وان تستمتعي بكل شي حتى الكتاحات وقطع الكهرباء
وأبقي عشرة على روحك والعفو لله والرسول
|
Post: #28
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:35 AM
Parent: #7
حبيبه قلبى رمانه
صدقينى رغم تزمرى من قُطوعات الكهرباء الا أنى وغصباً عنى بعشق السودان
زكرتينى أيامى هناك نكون نايمين فى أمان الله طخ نسمع ليك الحاجات وقفت أقول لبنات خالتى بسم الله
بتاع الكهرباء دا متين صبحت ليهو الواطه عشان يقطعه لينا يقولوا لى لاهو ما أصلا بكون نائم وظابط المنبه
أها وكان قطعت وجأت فى ساعته يكون الريِّس بتاعه قال ليه لا الليله مايوم ناس برى الليله يوم ناس أمدرمان
عاد كتاحه الله دى ماعندنا فوقه قول هههههههههههههههههههههه
شكر من الأعماق على أمنياتك ووصاياك الغاليه وجيتك فى البوست دا بالدنيا والله
|
Post: #8
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: nasiradin
Date: 06-25-2003, 09:46 AM
Parent: #1
عفو الله و الرسول ...
تحياتى
|
Post: #9
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: اساسي
Date: 06-25-2003, 09:50 AM
Parent: #8
وجن تمشي وتجي بالسلامة
وسلامي الخاص
لكل حاجة
|
Post: #10
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: almohndis
Date: 06-25-2003, 12:03 PM
Parent: #9
مرحب بيك
وجن فى السودان
نحن هنا فى غربة الدار
يعنى جرى ورا العيشه
عشان كدى امكن تلقينا
فى فرن او طلمبة
ركشة
حمد على السلامة مقداما
|
Post: #27
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:34 AM
Parent: #10
الأخ الكريم المهندس
تسلم يا ملك والله يسلمك
ما بنتلاقى كان كدى الا فى ركشه
بالمناسبه دى نفسى أسال سؤال
أى بتاع ركشه ولا أمجاد ولا كمسارى يقول ليك أنا خريج جامعه لكن المعايش جباره
لآحظت للظاهره دى ولالا معقول البلد ماقادره تستوعب الخرجين للدرجه دى
دى طبعا مقدمه لسؤال تعسفى جاياك عليه مابلقى لى وظيفه عندكم يا بشمهندس أن شاء الله
دكتوره وبراتب مغرى وبدل سكن وبدل وجبه وحافز كل شهر وتذاكر أصلى داخله على طمع وناويه أكون نفسى
بريتك موش ولسه ما شفت حاجه
|
Post: #30
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:38 AM
Parent: #9
العزيز أساسى
نورت والله والله يسلمك وسلامك واصل لكل شبر فى بُرى
|
Post: #40
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:49 AM
Parent: #8
الأخ نصر الدين
تسلم يا سيدى
|
Post: #11
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: 3omda4
Date: 06-25-2003, 12:05 PM
Parent: #1
نتمني لكي كل التوفيق صديقتنا
وسلامنا لكل اهل السودان
|
Post: #33
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:43 AM
العزيز العمده
الله يسلمك يا صديقى العزيز وسلامك واصل بإذن الله
|
Post: #12
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: alfatih
Date: 06-25-2003, 12:10 PM
Parent: #1
يسعدنا انك تذكرينا
وعنا دائما تسألى
مع السلامة مع السلامة
|
Post: #13
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: قرشـــو
Date: 06-25-2003, 12:20 PM
Parent: #12
الغالية وجن
والله انتى يزوروا فوقك عديل كده ياخى
السودان مرة واحدة
منو الزيك يا ستنا
الله يوصلك بالسلامة وزى ما قلتى واصلينا من هناك والشبكة هناك احسن من هنا
الله يوصلك بالسلامة وتجينا سالمة وغانمة وشايلة الهدايا الما خمج من الدكوة للفسيخ للتركين وحتى الموليته والاخيرة دى اهم حاجة
ما تجينى حانفه وشيك وتقولى لى الموسم حقها ما جاء
ده ياهو موسمها
رافقتك السلامة عزيزتى
|
Post: #32
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:41 AM
Parent: #13
العزيز عمده قلوبنا قرشو
بقيتنى مزار عديل كده
عقبالكم والله
والحاجات القلتهم ما تشيل هم أكتبن فى ورقه وأنا أروح للصيدليه وأجبلك اللى أنت عايزه
إنت فى موسمه ولا فى إسمه زااااااااااااتو
ههههههههههههههههههههههه والله تكرم عينك وتستاهل لكن بس لمن نجيب ليك العايزه ماتكب الزوغه وتشرفنا
الله يسلمك ويخليك لينا يا غالى
حأسلم ليك على مشارف حنتوب ولا يهمك
كثيف الود لك عزيزى
|
Post: #34
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:44 AM
Parent: #12
العزيز الفاتح
صدقنى أنتومتربعين فى الدواخل
أساكم كيف هو أنتو بتتنسو
الله يسلمك
|
Post: #14
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: DKEEN
Date: 06-25-2003, 12:33 PM
Parent: #1
بت يا وجن
الله ده بسالك ..انتي هسع حتكوني فاضية للوصايا البتقوليها دي؟؟
ما بين بري وحي العرب والجامعة
واضات الراجيك بتصبح
قال بتذكر ناس البورد قال؟؟
سمعنا انو الكروت جاهزة
وفي رقم مميز..
بس البلحقواول منو؟؟؟
الماعندو جوال يشوف ليهو جوال من مكة
لحدي هنا ماقصرنا معاكم..
بالسلامة يا منقة اتذكرينا في سنكات
|
Post: #29
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:37 AM
Parent: #14
العزيز عزو
حى العرب ولا المظاهر ولا العمده واللا التلاته ديل واحد
ياود أنا أمدرمان دى ما بعرف فيها غير بيت المال ومنزل واحد بس
بركب ليهو من بُرى لغايه خشم بابه
عموماً الاَّ أبقى ضهب زيك حتين أمشى الجامعه ولا أشوف لى طريقه تحضير أطوطح بيه وأعمل لى موضوع من ماف
كروت شنو يا ود أنت فكت منك ولا شنو أوعى بس تكون كروت الكهرباء إشتريته من هسه ياولدى ما تخسر قروشك ساى
بجر ليك معاى سلك من الجيران سلك شنو هو بلاى بيتكم دا أنت بتشوفه متين الا ساعه تجيك الملاريا
قال إزكرينا فى سنكات قال
إشمعن مافى دُرديب يعنى ماله عيبه لى
فى أنتظارك بأرض الوطن الحبيب وربنا يكتب سلامتك إن شاء الله
|
Post: #15
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: AlRa7mabi
Date: 06-25-2003, 02:36 PM
Parent: #1
أختنا وجن
ارجو ان لا يكون الرحيل من دار غربة الي دار غربة اخري
ارجو ان تكون ديارنا .. رؤفة بأبنائها وأهلها
عموما نتمني لك اقامة سعيدة .. وعودة سعيدة كذلك
وكان لقيتي يدك من حين لا خر جادعي البورد بالكلام
والسلام
عبدالرحمن
|
Post: #16
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: wa7shny
Date: 06-25-2003, 05:13 PM
Parent: #15
تحياتي الاخت العزيزة وجن
بالسلامة انشاء الله وربنا يوصلكم بالسلامة وانشاء الله اجازة سعيدة يا وجن وسط اهلك واحبابك
تحيات.......................واحشني
|
Post: #17
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: BousH
Date: 06-25-2003, 07:44 PM
Parent: #16
الاخت وجن ... اجازة سعيدة انشاء الله .... تمشي وتجي بالسلامة
يا دكين وينك انت ياخي .... ما عازين منك حاجة بس سمعنا صوتك ....... ولا اقوم احرش ليك بت قضيم وشيري يفتحو فيك بوست هترشة
|
Post: #35
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:45 AM
Parent: #17
العزيز بوش
الله يسلمك ويخليك
|
Post: #31
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:39 AM
Parent: #16
الآخ الكريم واحشنى
الله يسلمك وميرسى على الدعوات والأمنيات
|
Post: #36
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:46 AM
Parent: #15
أخى وأستاذى العزيز عبدالرحمن
طبعاً ما أكذب عليك وأقول ليك ماشائله هم غربتنا الذاتيه لكن شوقى ليها أكبر من آى حاجه
وخصوصاً أنى أتعودت عليها وعلى أهلى الطيبين
دعواتك بس يا أصيل يا طيب
وإن شاء الله بتواصل
والله يسلمك
|
Post: #18
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: DKEEN
Date: 06-25-2003, 08:16 PM
Parent: #1
وجن عن اذنك اتكلم مع بشبوش ده شوية
بوش
ياخي انتا فاضي لينا
كلما اجيك القى شيوخ قبائل تاكلين في مكتبك
انتا الناس ديل بتستوردم من وين؟؟
عمم وجلاليب وعصي ووجاهات
يا خوي نظار الهبانية والبني هلبة وشيوخ الفاشر والزغاوة مرقو من البلد متين وجو عندك؟
طيب الاتمرد منو بي هناك
ابقي مارق لينا يا خوي
اخوك الاربعاء دي ما بتتكرر معاهو في الرياض تاني
..
اسبوع في جنيفا
واسبوع في ماربيا
والباقي في
حمرة الوز
الف عافية تغشاك
|
Post: #19
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: جدو
Date: 06-25-2003, 09:57 PM
Parent: #18
الاخت وجن
تجي وترجعي بالسلامة ان شاء الله
وان شاء الله البلد ترحب بيك
انا بقول تجي دي لاننا نحن ناس هنا
ناس الخرتوم
في امان الله
|
Post: #38
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:47 AM
Parent: #19
ناس الخرتوم سلام
أهلا بأول الغيث يا جدو الله يسلمك يا سيدى
|
Post: #20
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: Hozy
Date: 06-25-2003, 10:07 PM
Parent: #1
والله ياوجن
متمنية الاقي كتير من ناس البورد في السودان
انتي وبنت الاحفاد والكثيرين
من بورداب السودان
انا غايتو برضو الاسبوع الجاي خلاص
يلا نبقى على تواصل ونشوفك انشاء الله
|
Post: #37
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:47 AM
Parent: #20
العزيزه هوزى
سنلتقى بإذن الله يا غاليه
وربنا يكتب سلامتك وسلامه الآسره الكريمه
ونتواصل عزيزتى
|
Post: #21
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: SAdo7
Date: 06-25-2003, 11:00 PM
Parent: #1
اجمل امنيات مصحوبه باطيب الدعوات لك بسفرا سعيده
واقامه طيبه بين الاهل
|
|
Post: #39
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: وجن
Date: 06-26-2003, 02:48 AM
Parent: #21
الأخ العزيز صادوح
أشكرك على الدعوات والأمنيات
والله يسلمك
|
Post: #41
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: Dafi
Date: 06-26-2003, 07:55 AM
Parent: #1
وجن..
في كافتريا المتحف الطبيعي..جمب داخلية تهراقا..اول ما تخشي علي يدك الشمال ..خالص..في طربيزه...لبنيه..مصديه في النص
قولي ليها ..في زول بيسال منك..
وبيسال عن اولاد الجبهه الديمقراطيه الكان بيقعدوا في الطربيزه القدامك..ومعاهم عاطف خيري والصادق الرضي...والدنيا عصريااااااات..
بتاع الورنيش..لو جاء مارق من الداخليه..قولي ليهو في زول بيتذكرك..من يوم جيت شافع تتونس عن فردك القاطعين..لحدي ما بلغت..وبقيت تفت ليهو شمار اولاد الداخليه مع بنات الدراسات الاضافيه
ما تنسي ..علويه ست الشاي..ودار عزه الكانت بتسلف الكتب
سلمي لي علي الاكستنشن..وكافتريا قانون..وشارع النيل قدام دار الاطباء .شوفيهم لو بيتذكروا شباب مخستك..لما يقنع من الملح...كان بيعذب الجيتار النورمال..ويدقها كداري لي ما قبل القصر الجمهوري
سلمي لي علي اخواتي ..حبيباتي البنات
جروف ابو روف...وبيت المال
سلمي لي علي ود نوباوي..وسوق الشجره...واغشي الثوارت...شوفي لي ناس الرابعه...والتمنطاشر...وعبد الحميد سيد الباسطه..وميدان جاميسكا
ولما تقبلي شرق..ابقي زوري ضريح سيدي الحسن..
اخدي ليك قعده في الرمله....وما تنسي تشربي
اشربي من توتيل
وسلمي لي عليهم..كلهم
سلمي لي عليهم.. حتي اللسه ..قبل الخلق والتكوين
صناع الحياه اليوماتي
ملح الارض
نبض الشعر والموسيقي ...والتلوين
سلمي لي عليهم
|
Post: #42
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: DKEEN
Date: 06-26-2003, 12:32 PM
Parent: #1
بعدين
البيت اصلا في حي العرب
لكن لزوم الطرشة وفكة الروح بقولو حي المظاهر
شفتي كيف؟؟
الود الفالت امنيا كذلك طارش روحيا..
الظاهر انو ابن الذين ما قال ليك انو راح ليهو لطيف في سنكات قبل كده
المسكين في مشروع الجامعة ودوهم بورسودان من الجامعة ..وصل سنكات شاف ...تبر
دهب مجمر ببيع شاي ..
حلف دينو وايامنو يبيع الرحلة والمشروع لي المشروع الجديد..
نزل وساب البص ..وبنات مدنية ومعمار في الدهش ..
اول مرة يشوفوا ليهم زول بجن قدامم ..
فيما بعد جا واحد مليان ودك وهلاهيل ومركب وش حديد
وطلع اخو الدهباية
صاحبك انقلع ... جاتو حالة نفسية
وللحين ملازماهو..
ويشهد دافي ده..
|
Post: #43
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: HOPELESS
Date: 06-26-2003, 02:35 PM
Parent: #42
تصحبك السلامة اختي
مع تمنياتي لك باجازه سعيده
بين أهل والاصدقاء
ولك الود
|
Post: #44
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: دورنقاس
Date: 06-26-2003, 04:58 PM
Parent: #43
الاخت وجن
يرقبك السودان بالاشواق
يلتقيك الاهل بالاحضان
نودعك بالامانى العذبه
ونقول
نعم العاشق والمعشوق
|
Post: #45
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: OmDur
Date: 06-26-2003, 05:10 PM
Parent: #44
درب السلامة
واجازة سعيدة
|
Post: #46
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: ALZOLZATOO
Date: 06-26-2003, 06:45 PM
Parent: #1
العزيزة وجن
فووووت بلاد وسييييب بلاد وان جيت بلاد تلقى فيها النيل بيلمع في الظلام زي سيف مجوهر في النجوم من غير نظام تنزل هناك وتحي ياوجن باحترام ههههههههه يكه
ربنا يكتب ليك السلامة انشاء الله
وتحياتي لي ناس السودان فردا فردا
بعدين عليك الله السودان ده لو الواحد اشترى ليهو مسجل ومشى قعد عاطل وسمع بس اغنية وردي دي بتاعة الطير المهاجر كل يوم مرة مش احسن ليهو من الغربة ووجع القلب ههههههههه يكه
عندي شنطه داير اشحنة السودان بتوديها معاك ولا بتقولي اجي يابري هههههههههههههههههه يكه
العزيز دافي يازول ماقصرت الاغنية دي ريحة اعصابي والله
بعدين يازول ناس الطمنطاشر وميدان جاميسكا ديل انا ح اوصل ليك وصاياهم عشان طلعت ج ارنا عديل وكده ولو عندك زول جمب سوق امدفسو برضو ح يصلو لوووووووول يكه
زاتوووووووووو
|
Post: #47
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: bint_alahfad
Date: 06-27-2003, 03:47 PM
Parent: #1
الحبيبه وجن
تسلمى يا ستى وأبدا ما قصرتى معاى, بس أنشاء الله تكونى عارفه الشوارع وما تروحينا معاكى..أنا لسه ما شفتى من الدنيا حاجه
وأنا كمان مشتاقه أشوفك شديد والله يوصللك بالسلامه والأسره الكريمه, ومعليش يا أختىما شفت ردك فى البوست بتاعى أصل أختك بعيد عنك جاها حول أول ما عرفت أنها ماشه السودان وده من الفرحه طبعا معليش أيام وتعدى وبعدين أرجع لحالتى الطبيعيه, تسلمى يا حبيبه وتسمعى عنى قريب بأذن الله
الغاليه هوزى
تسلمى يا حبيبه وأنا كمان مشتاقه أشوفك شديد, الى اللقاء بأذن الله
وفى أمان الله
لا اله الا الله
|
Post: #48
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: DKEEN
Date: 06-27-2003, 06:23 PM
Parent: #1
وجن بلاي لامن تجي ماشة على الشباب اللطيف ده
قولي لينا عووك
حاعملك موضوع عشان اخش في البوردابيات ديل
ياهوووووووووووووووووو
شكلها اجازة كلها
لطائف
الله يكضب الشينة
|
Post: #49
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: الجندرية
Date: 06-27-2003, 08:36 PM
Parent: #48
وجن العسل
تصلي بالسلامة
عليك الله تمشي تجمبغي رجلينك في النيل الازرق وتتمتعي
وتمشي لي جنائن الموز التحت كبري النيل الازرق وراء الجامعة
وكان هناك في طلمبة تدق كنا بنسميها قلب الواطة
وتمشي كدي وتسرحي لمن تصلي البحر
بس اوعى تسوقي معاك ولد
اصلوا الاولاد ببوظوا المشوار بتاعة البحر دا ويقلبوا ليك حب ورومانسيات
ترجعي لينا كما بالسلامة
|
Post: #50
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: DKEEN
Date: 06-27-2003, 11:11 PM
Parent: #1
جندرية
ما تحرشي البنية علينا
بعدين
حلوة تمشي جناين الموز
وجن
تصدقي
الجندرية لم تذد على ان جعلتكي قردا
لووووووووووول
اتخيلي الواحد لو عمل فيها علي المك
وقام عصريات بعد صينية غدا في الداون تاون وساق ليهو قرد ومشي يتجول بين كوبري الانجليز وكوبري بري ..وريحة شجر طرف البحر المتعدد طاقة ليهو في جبهتو
ومعاها ريحة قرد بالجوار ..
قرد نقناق ..
وسمين وحركته تقيلة...
وجاي هسع دي من مكة
|
Post: #52
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: Elkhawad
Date: 06-28-2003, 03:21 AM
Parent: #50
وجن تمشي بالسلامه وترجعي بالاشواق ورويانه من النيل ومويتو
انا السنه الفاتت شربتي كفايتي لي خمسه سنين جايه
واتمليت شمس لي عشره سنين
والكتاحه دفنتني بتاع خمستاشر سنه
اها ان الله ادني عمر لي بعد الزمن ده امكن ارجع تاني
رحله سعيده
|
Post: #51
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: hala guta
Date: 06-28-2003, 03:14 AM
Parent: #1
يا اخوانى انا جاتنى نفسيات دة تالت بوست من دخلت اقول لزول الله يكتب سلامتك
الناس كلها ماشة السودان الا انا
كوستا وبت الاحفاد ووجن وهوزى
اللهم لا حسد لكن بغراااااااااااااااااانة
وجن
ابدى لى السلام من بتاع بص المطار
فطى بتاعين الجمارك اصلو عندى معاهم حساسية وواصلى
وكان قطعتى الكبرى لامدرمان سلمى لى عليهم جملة ناس امدرمان وشوارع
ادرمان وركشات امدرمان و
........
الله يكتب سلامتك واتمنى ليك اجازة سعيدة
دافى والزول زاتو
انت اولاد جيراننا وانا ما عارفة
|
Post: #53
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: shiry
Date: 06-28-2003, 09:47 AM
Parent: #51
سلام مربع
وجن حبيبة البي
تمشي وتجي بالسلامه
وبالله احبابنا هناك
قولي ليهم
شوقنا ليكم طال
|
Post: #54
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: tiger18
Date: 06-28-2003, 10:45 AM
Parent: #1
الصديقة الغالية وجن
قولي للنيل ضفة ضفة
والعشيات لما تصفي
والنسيمات البتاخد
من عفاف ريدتنا عفة
انو شوقي يفيض بحر
شوقي شوق انسان مضيع
ضيعو الليل والسفر
..........................
تحياتي واشواقي لكل اهلك حتي الحبوبة بلقيها تحياتنا
وقوليها هناك في ناس مشتاقين لي لمت الجبنة وشاي المغربية
ولي ونسة في ضل شجرة في الضحاوية
حقيقي تمنياتي ان تجمعنا الشوفة بكل من التقيناه في هذا البورد واصبح يخفف عنا هموم الرحيل
ربنا يكتب سلامتك وماتنقطعي
اها مافي خوف عليك لانك في رعاية المولي عز وجل
مع السلامة
|
Post: #55
Title: Re: إفتح فؤادك ضُمَّنى يا وطني أنى آتيه اليك بكل ما أوتيت من عشق
Author: زوربا
Date: 06-28-2003, 11:58 AM
Parent: #54
هاي نيلينك والابنوس والشوق الجاري عليك
كل البلد تردد نشيد القادمين صباحات عرسها الأبدي
أعملي حسابك من الباعوضة وقطعات الكهرباء وناس الخدمة الالزامية
وأجمل الامنيات بإجازة سعيدة
|
|