حكومة المؤتمر الوطنى المتضرر الاكبر من تهكير سودانيزاونلاين

حكومة المؤتمر الوطنى المتضرر الاكبر من تهكير سودانيزاونلاين


19-07-2011, 02:45 PM


  » http://sudaneseonline.com/cgi-bin/sdb/2bb.cgi?seq=msg&board=461&msg=1324507220&rn=0


Post: #1
Title: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 02:45 PM

معطياتى
+
معطيات كثير من المهتمين بالنشر الالكترونى فى المؤتمر الوطنى
+
رؤى اخرين لا ينتمون الى المؤتمر الوطنى


تمهيد ..

Post: #2
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 02:49 PM
Parent: #1

مساحة حرة دون ( رقابة قبلية ) تتيح لنا ان نواصل حراكنا السياسي والتعريفى والتثقيفى لعضويتنا وللمهتمين بالشأن العام من غير المنتمين .
مساحة لتسويق رؤى المؤتمر الوطنى ( الرسمية فى اطار غير رسمى ) للاخرين ( يبدأ الاخرون من العضوية مروراً بالمشاهدين وانتهاءاً بالدول الصديق منها والعدو )
معمل مجتمعى متاح يشتمل على كل العينات ( المنتقاة / العشوائية / الغير / الداخلية / الخارجية / ...)
+

اخرى

Post: #3
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 02:51 PM
Parent: #2

إعادة اكتشاف المعارضة الحزبية فى ثوبها المستقبلــى ...

Post: #4
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 02:54 PM
Parent: #3

اعادة قراءة المعطيات التى تشكل الحراك المجتمعى والسياسي فى سودان( بكره )

لانو بكره احلــى ..

Post: #5
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 02:59 PM
Parent: #4

( تكلس ) ورتابة الحراك السياسي اليومى الداخلــى اثر حتى على فااعلية المؤتمر الوطنى بإنعدام التحديات السياسية

الصحافة الورقية وانحصار تأثيرها وتوزيعها فى الخرطوم كولاية وكمركز قرار ...

الرأى الاخر الذى لا يضبطه سوى التزامــه برؤيته وفكرته ( تواجده هنــا ) وانعدامه الى درجة ( نسبى ) ما هناك فى الصحافة الورقية

Post: #6
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 03:01 PM
Parent: #5

يا ريس بكرى ابوبكر رسالتى الشخصية لك إننــا فى المؤتمر الوطنى متضررون من هذا التهكير
اعانك الله على اصلاح حوشك
ليعود لهذا البيت السودانى القــه وبريقه ودوره فى صناعة شى فى حراكنا الثقافى والسياسي والمجتمعى

اعانك الله والشباب خلف الكواليس ..

Post: #7
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 03:05 PM
Parent: #6

فى رأى كثير من اهل المؤتمر الوطنى ان ما يميز هذا المنبر هو :
* العدد المقدر من السودانيين غير المنتمين الذين يكتبون فى الشأن العام
* العدد المقدر من الصفوة والمثقفين فى دول المهجر الذين لا يباشرون التعاطى السياسي اليومى
* العدد المقدر من الكتابات المسئولة والناضجة التى تسطر على المنبر من قبل كثير من سوداني المهجر
* المساحة الكبيرة التى تمثل اغلب دول العالم من المشاركين
* الفرصة التى يتيحها هذا المنبر لقراءة اى موضوع باكثر من رؤية ( خارج سياج المعارضة والحكومة )



شكراً لجعل هذا ممكناً ..


Post: #11
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد حيدر المشرف
Date: 19-07-2011, 03:18 PM
Parent: #6

جبر الله كسركم يا بدرالدين ..
شكلكم اتعوقتم شديد ..
لكن والله القاكم استفدو من اى حرف كتبتو انا شخصيا .. الله قال بى قولكم !!

Post: #8
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد إبراهيم علي
Date: 19-07-2011, 03:06 PM
Parent: #5






كلامك بيكون صحيح في حالة واحدة وهي
السودان فاز بكاس العالم ثلاث مرات

Post: #9
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 03:12 PM
Parent: #8

هو كاس العالم دا الا فى كرة القدم ...

ما هو السودان الاول ( بكل مكوناته السياسية ) فى انتاج الازمات الحصل شنو يعنى ..





انت بالذات اكتب واكتب ان شاء الله بس تصلح وتعدل النيــة



ازيك يا زول ولعلك طيب ..

Post: #10
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 19-07-2011, 03:15 PM
Parent: #9

ثم هذا المنبر من اسهل الوسائط لايصال الرسائــل
انت بس اكتب
ان شاء الله بدون عنوان
برضو ستصل الرسالة
من عبرى الى الجنينة ومن كسلا الى ( جودة ) جوبا الجديدة حقتنا


وكمان من لانغلى حتى بكين ..

Post: #12
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد على حسن
Date: 19-07-2011, 03:29 PM
Parent: #10

وماذا عن رؤية شعبة الجهاد الالكتروني في المؤتمر الوطني ؟؟؟؟؟؟؟؟؟؟؟؟؟؟؟؟؟؟؟
المؤتمر الوطني شعوب وقبائل وتوزيع ادوار

Post: #13
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: الفاضل يسن عثمان
Date: 19-07-2011, 03:37 PM
Parent: #10




بدرالدين: ودحلتنا


Quote: بإنعدام التحديات السياسية


دي كيف انا، لم افهمها خالص

يعني، هل صار نقد، امين لاحد امانتكم، ام نصب مبارك الفاضل نائبا للرئيس
ام كفر دكتور العفيف بطروحاته، ام جعلت هالة وزيرة للرعاية الاجتماعية
وصار عرمان روبيضة للاسلامويين.
وعاد هشام هباني من غربته الاختيارية، وترك تاكسيه، وفتح كشك اسفل كبري الدويم.
تحديات الاسلامويين اخي بدر، في صراع السلطة الظاهرة بينهم، واخفاء ما يتم الاتفاق
عليه مع الخصوم< اتفاق الدوحة السري> مع السيسي
اذا كنت لاتعرف خيوط الهجمة والتهكير من شعبة الاعلام الاكتروني وهنوده، لاغضاضة
الجهل بالشي ليس بمعيب، بل العيب بدرالدين، محاولة الالتفاف والتهجين
سينفجر المعبد علي الساحر وحواريه، عندها يتأتي تقييم المؤتمرجية
لوعي شعبنا في محله.

مودتنا

Post: #14
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: فتحي الصديق
Date: 19-07-2011, 06:47 PM
Parent: #13

Quote: مساحة حرة دون ( رقابة قبلية )

انتو لما الحرية دي طاعمة وحلوة كدة مالكم مابين بيها على الناس ؟
بالله حتى انتو بتخافو من الرقابة القبلية ؟




--------------------------------------------------
آمنت بالحروف
تبتدي بلا
وتنتهي بلن

* أيمن أبو الشعر

Post: #15
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: MOHAMMED ELSHEIKH
Date: 19-07-2011, 06:55 PM
Parent: #14

والله يابدر الدين انا قاعد احترم كتاباتك جدا
لكن المرة دي:
"العوج راي والعديل رأي"

Post: #16
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Alshafea Ibrahim
Date: 19-07-2011, 07:09 PM
Parent: #15

تحياتي يافكي بدر
أي جناح متضرر أفرز أول ...
والأهم انت مع ناس منو ؟؟؟؟؟؟؟؟
وشوف كلام فتحي الصديق ده حار كيف ...
الشفيع

Post: #17
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Nasruddin Al Basheer
Date: 19-07-2011, 07:29 PM
Parent: #16

عليك الله يا بدر الدين إنت بنفسك الكلام القلتو ده مقتنع بيهو؟
طّيب الحكومة لو متضررة من تهكير المنبر، ليه عملت وحدة للجهاد الالكتروني؟
وليه استعانت بخبراء محليين وأجانب عشان يهكروا المنبر؟
احترم عقول الناس يا بدر الدين..

Post: #18
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: خدر
Date: 19-07-2011, 09:57 PM
Parent: #17

Quote: اعادة قراءة المعطيات التى تشكل الحراك المجتمعى والسياسي فى سودان( بكره )

لانو بكره احلــى ..

شان الحاجات تبقي كويسة!!

Post: #19
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمود الدقم
Date: 19-07-2011, 11:30 PM
Parent: #18

الاخ بدر سلام: قد اتفق معك لحد ما، في ما يتعلق باكتشاف لغة المعارضيين، من قبل أمنيين النظام، طريقة تفكير المعارضة، اماكن اقامتهم، ميولهم الفكرية، مساقطهم العرقية (جلابة او غرابه) مهنتهم، أطباء مهندسين، جنرالات متقاعدين، الخ، انصار حل سلمي ام دموي الخ، لكن أيضاً سودانيز دخل علي النظام بالساحق والماحق والبلي المتلاحق، فانصار قطاع الحركة بالشمال مثلا ما زالوا ينشرون جثث مصاريين النوبة وفديوهات المقتلة في الجبال، وهي مواد استفادة منها مكتبة الكنغرس الامريكي وقنوات التلفزة العالمية، وقضية حقوق الانسان، من لبني الي فتاة الفديو، ومحدلة صفية، والسلاح الكمياوي المزعوم المستخدم في ج كردفان، وصور تعذيب المعارضين ابازر مثالا، نشر خبر اي اعتقال، وغيرها من القضايا الأخري التي أربكت صفكم ككيزان وجعلت محمد حامد جمعة يكشف شخصيتك كعنصر امني في بوسته الملهلب ( يا جنابوا بلو واشرب مويتو) او شي من هذا القبيل، وجعلت الكثيرين من طباخي النظام وصناع القرار مثل دكتور نافع ينوه بضرورة التصدي لمعارضي الانترنت، إذن وجع الضرس قايم، قايم، احترامنا الذي تعرف.

Post: #20
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد حيدر المشرف
Date: 20-07-2011, 03:47 AM
Parent: #19

يا بدر ..

يفرق كتير رص الكلمات لصناعة فكره مافيشه, وتلك الكلمات التى تلهث وراء الفكره الواضحه فتدركها
وبالرجوع للادب القرآنى يا شيخنا ..
نجد هذا الفرق يتمثل فى كلمه واحده "الابانه" فى مقابل "عجمة" اللغه وهى غربتها
تدبر يا هداك الله فى قوله:
"لِّسَانُ الَّذِى يُلْحِدُونَ إِلَيْهِ أَعْجَمِىٌّ وَهَـذَا لِسَانٌ عَرَبِىٌّ مُّبِينٌ"
ولا أعنى بالتدبر قراءة تفاسير ابن كثير

تدبر براك


Post: #21
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: أمير فتحي
Date: 20-07-2011, 06:35 AM
Parent: #20

Quote: لكن والله القاكم استفدو من اى حرف كتبتو انا شخصيا .. الله قال بى قولكم !!


مشرف

كان ماإستفادو من كتابتك العاقلة الرزينه دي يبقى العيب فيهم

Post: #22
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد حيدر المشرف
Date: 20-07-2011, 01:51 PM
Parent: #21



أمير فتحى ..
تسلم يا ملك على اتساع حسن الظن ..
وهسع بدرالدين ده اجتهد اجتهاد لا أجر فيه أبدا ..
هذا الم يؤثم عليه ..

Quote: حكومة المؤتمر الوطنى المتضرر الاكبر من تهكير سودانيزاونلاين


Post: #23
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 10:21 AM
Parent: #22

Quote: تحديات الاسلامويين اخي بدر، في صراع السلطة الظاهرة بينهم،



هنا وهنا فقط تصل الى حقيقة انعدام التحديات السياسية من قوى المعارضة التى يواجهها المؤتمر الوطنى

التحديات الامنيــة ( ذاك امر غير )
الفاضل سلام يا زول

Post: #24
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 11:18 AM
Parent: #14

Quote: انتو لما الحرية دي طاعمة وحلوة كدة مالكم مابين بيها على الناس ؟
بالله حتى انتو بتخافو من الرقابة القبلية ؟



اها دا بعض من نقاط اختلافــى مع اهل فكرتـــى ..
حتى نحن نخاف منها
واصعب اشكالها الرقابة القبلية التى يكون فيها الرقيب انت شخصياً ( ككاتب )

Post: #25
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 12:06 PM
Parent: #24

Quote: "العوج راي والعديل رأي"


صحيح ...
لكن دا برضو رأى ولا شنو

Post: #26
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 21-07-2011, 12:22 PM
Parent: #25

الاخ بدر الدين \نهارك سعيد

تعرف مرات كدة قدر ما احاول ابلع كلامك ما اقدر .... لانك بصراحة بتلخبط الكيمان سواء بقصد او من غير قصد لا ادري ؟

طيب الفرق عندكم انتو كحكومة بين التحدي الامني والتحدي السياسي شنو؟ والانترنت عندكم شنو تحدي امني ولا سياسي ؟

Post: #27
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 02:07 PM
Parent: #26

Quote: أي جناح متضرر أفرز أول ...
والأهم انت مع ناس منو ؟؟؟؟؟؟؟؟


كان كدا انا تعبان ساكت طيلة سنواتى فى هذا الافير

معقول بس يا الشفيع يا اخوى




ولا خلينى اقول ليك كلام الحبشى الله يطراهو بالخير
البينات مذولة فى المنبر فقط ( Search)

Post: #28
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد حيدر المشرف
Date: 21-07-2011, 02:24 PM
Parent: #27

اردمو الكوز ال .. البدأ فى الشعبى وانتهى فى الوطنى ..
ولا غضاضه فى ذلك .. فللاحتراف قوانينه !!



..
بدرالدين !!
ياخى انت بتمر بى من غير كلام ليه !!
ولا حتى بس قولة سلام ..
كلمنى ياخ ..
الواحد جاتو نفسيات من هذا التجاهل !!!

Post: #29
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 03:09 PM
Parent: #28

Quote: جبر الله كسركم يا بدرالدين ..
شكلكم اتعوقتم شديد ..



شدة وتزول ..
علا اتعوقت انا ..


بعدين يا همام انا ياخى قلت امر على الذين يقفون فى الضفة الاخرى من النهر ( فى هذا البوست )
وانت بسم الله ما شاء الله تقف معى فى نفس الضفة حتى هذه المداخلة

من يهمش من يا زول


نرجو مجرد رجاء حال حضورك السودان ادينا فرقــة نشوفك ( ســاى ) كدا *





* بعدين ( ســاى ) دا مفردة مترعــة بالمعانى وحق ادبى للطبيب امجد ود فريد ..

Post: #30
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمد حيدر المشرف
Date: 21-07-2011, 04:30 PM
Parent: #29

"ساى" دى تهديد ولا شنو يا بدرالدين !!
شبكت أمجد ما عندو تاريخ نضالى يحدى ما وراك حاضرو النضالى ..
أوعك تفكر تصنع لى حاضر نضالى آ بدر !!..

Post: #31
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 07:09 PM
Parent: #30

Quote: طّيب الحكومة لو متضررة من تهكير المنبر، ليه عملت وحدة للجهاد الالكتروني؟


شكلك استعصت عليك مفردة استفراغ الوسع البشرى فى اداء الاعمال مع التجديد الدائم للنيــة ان يكون العمل لله

استفراغ الوسع دا مكانو ( الدنيــا ) فى كل مجالات العمران البشــرى
الاعلام
السياسة
التربية
الثقافة
التعليم
الصحة
كلها تستدعى ان يكون فيها فعل جهادى يعبر عن بذل كل الوسع البشرى لتحقيق الغايات فى كل مجال

دا الجهاد يا رجــل ...
اما باقى الخبراء المستوردين للتخريب الالكترونى الا تعتقد انهم يمكن ان يباشرو عملهم من شقة احدهما فى شبه الجزيرة الهندية او شبه الجزيرة الكورية
دون ان يتكبد عناء السفـر ...

Post: #32
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: عبد الصمد محمد
Date: 21-07-2011, 07:16 PM
Parent: #31

بدر الدين الدين سؤال أتعشم إنك ما تخذلني وتجاوبه بصراحتك المعهودة

هل حقيقي إنه هناك شعبة تسمي شعبة الجهاد الإلكتروني في السودان؟
هل هي حكومية ولا تطوعية وماهي إهتماماتها

تسلم يا وجيه

Post: #33
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 07:32 PM
Parent: #32

Quote: قد اتفق معك لحد ما، في ما يتعلق باكتشاف لغة المعارضيين، من قبل أمنيين النظام، طريقة تفكير المعارضة، اماكن اقامتهم، ميولهم الفكرية، مساقطهم العرقية (جلابة او غرابه) مهنتهم، أطباء مهندسين، جنرالات متقاعدين، الخ، انصار حل سلمي ام دموي الخ،
.


محمود سلام ..
كل هذا واكثر .. السؤال الذى يبرز لماذا نريد ان نفقد كل هذا ؟
ولمصلحة من ؟
وتأثير سودانيزاونلاين على الحراك السياسي الداخلى والخارجى للسودان شنو ؟

Quote: ...
لكن أيضاً سودانيز دخل علي النظام بالساحق والماحق والبلي المتلاحق، فانصار قطاع الحركة بالشمال مثلا ما زالوا ينشرون جثث مصاريين النوبة وفديوهات المقتلة في الجبال، وهي مواد استفادة منها مكتبة الكنغرس الامريكي وقنوات التلفزة العالمية، وقضية حقوق الانسان، من لبني الي فتاة الفديو، ومحدلة صفية، والسلاح الكمياوي المزعوم المستخدم في ج كردفان، وصور تعذيب المعارضين ابازر مثالا، نشر خبر اي اعتقال، وغيرها من القضايا الأخري التي أربكت صفكم ككيزان وجعلت محمد حامد جمعة يكشف شخصيتك كعنصر امني في بوسته الملهلب ( يا جنابوا بلو واشرب مويتو) او شي من هذا القبيل، وجعلت الكثيرين من طباخي النظام وصناع القرار مثل دكتور نافع ينوه بضرورة التصدي لمعارضي الانترنت، إذن وجع الضرس قايم، قايم، احترامنا الذي تعرف.

الباقى دا جزء من الحراك السياسي والثقافى والامنى ايضاً ...
فتغيير صورة السودان يبدأ من هنــا
فلماذا ندع ذلك للاخــر
مكان لا تبذل جهداً لجلوس الاخر للاستماع اليك ..

Post: #34
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: محمود الدقم
Date: 21-07-2011, 07:37 PM
Parent: #33

بدُرنا شكرا علي الاجابة الكافية ويعجبني الوضوح عندك.

Post: #35
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 08:00 PM
Parent: #33

Quote: تكلس ) ورتابة الحراك السياسي اليومى الداخلــى اثر حتى على فااعلية المؤتمر الوطنى بإنعدام التحديات السياسية


يا اسامة محمد ..ازيك

كدا عاين للعنوان مافيهو اسم حكومة
انا اتكلم عن المؤتمر الوطنى
انعدام وقلة التحديات السياسية اثرت على فاعلية عضوية حزبنــا
فالاحزاب السياسية لاجديد عندها لتطرحه فى الساحة السياسية


بعدين نحن كحزب ما عندنــا تحديات امنية
التحديات الامنية دا بتاعت الحكومة
الحرب فى جنوب كردفان لا تمثل تحدى سياسي للمؤتمر الوطنى بل تمثل مهدد امنى للقوات المسلحة والاجهزة الامنية
لذلك يجــئ التعامل معها فى اطار لجنة امن الولاية
نضج وقوة المعارضة فيها احياء ونضج لحزب المؤتمر الوطنى

Post: #36
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 08:11 PM
Parent: #35

Quote: تدبر براك


شكراً على النصيحــة
غفلتنا فقط لم تجعلنا نرجع دوما للقران لنتدبر
ما يسره الله لنا من اى الذكر الحكيم
فهل نكون من المدكرين فى ليلتنا هذه !!!!

Post: #37
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 08:41 PM
Parent: #36

Quote: بدر الدين الدين سؤال أتعشم إنك ما تخذلني وتجاوبه بصراحتك المعهودة

هل حقيقي إنه هناك شعبة تسمي شعبة الجهاد الإلكتروني في السودان؟
هل هي حكومية ولا تطوعية وماهي إهتماماتها



الوجيه عبد الصمد ازيك يا رجل

2004 م حتى الان 2011 م حوالى 7سنوات
كل سنة فيها 12 شهر
بتبقى الحسبة 12 شهر X 7 سنين = 84 شهر
حضرتك لكم 126 مداخلة فى 84 شهر
اى بمعدل 1.5 مداخلة فى الشهر
الا تعتقد ان هذا الامـر مع الاسئلة التى طرحتها تجعل شخص مثلى
لديه قليل اهتمام بالعمل البحثى يمكن ان يجعلنى اتوقف امام اسئلتك
طارحاً على نفسى كمية من الاسئلة والتساؤلات عن ما حقيقة هذا الشى
الذى يبحث عنه صاحب الــ 126 مداخلة فى 84 شهراً


اما ان كان سؤالك عن الفعل والممارسة فإنى احسب اننى امارس جهاداً الكترونياً
اما اذا كان سؤالك عن المؤسسة فلا علم لى بها
ولكننى اتمنى ان يكون لحزبنا ادارة معنية بالنشر والحراك والعراك الاسفيرى
اها قصرت معاك

Post: #38
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 08:52 PM
Parent: #37

خدر صاحب الربابــة
علمت بمدادك المدلوق فى هذا الاسفير
وشاهدت وشوشك
ومتعت نظرى ببريق سنانهم
ومن قبل ذلك علمـت بمرورك الكريــم
بــس تانى ما تنســى الربابــة
فهى اجمل من الوشوش الضاحكة

Post: #39
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 21-07-2011, 09:07 PM
Parent: #38

Quote: شبكت أمجد ما عندو تاريخ نضالى يحدى ما وراك حاضرو النضالى ..


يحمد لبدر الدين
سعيه لاحداث اتساق بين الكتابة الثورية والفعل الثورى للطبيب امج
والحمد لله اصبح اليوم يرتهن على ارث نضالى موثق به من حكومة الانقاذ

Post: #40
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين احمد موسى
Date: 22-07-2011, 06:35 PM
Parent: #39

ود اسحق

تحيات و سلام

طيب عملتو شنو يا بدرالدين لايقاف ظاهرة تهكير سودانيز و المواقع التانية?

ما تقول لي ما عندكم شعبة امن الكتروني?

يعني اتخيل الزول او الجماعة ديل هكروا بنك السودان مثلا, و اوقفوا كل المعاملات الالكترونية دي ممكن تكون كارثة مش?

و تيب!

اما اذا هكر مواقع حكومية او مؤسسات اقتصادية او اخرى مؤثرة لدول بتحمر ليكم في الضلام عارفين النهاية بتكون شنو?

تتذكروا ما جرته القاعدة على افغانستان?

يللا ورورنا ان الهكر ما منكم و اقبضوا عليه!

Post: #41
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 22-07-2011, 08:11 PM
Parent: #40

طيب يا بدر الدين عشان نوريك لخبيت الكيمان


Quote: بعدين نحن كحزب ما عندنــا تحديات امنية
التحديات الامنية دا بتاعت الحكومة

كلامك الفوق ده وعلى لخبطتو مستفز لان الكل يعلم بان الحكومة هي الامن والامن هو الحكومة ... كمان تعال قول كلامي ما صاح

وما جاوبت على اسئلتي .

Post: #42
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 22-07-2011, 08:47 PM
Parent: #41

Quote: طيب عملتو شنو يا بدرالدين لايقاف ظاهرة تهكير سودانيز و المواقع التانية?

ما تقول لي ما عندكم شعبة امن الكتروني?

يعني اتخيل الزول او الجماعة ديل هكروا بنك السودان مثلا, و اوقفوا كل المعاملات الالكترونية دي ممكن تكون كارثة مش?


يا بدر ازيك ياخ ..
كحزب مؤتمر وطنى ما عندنــا شعبة امن الكترونى
لكن عندنا ادارة / وحدة / اعلام الكترونى تتبع لامانة الاعلام

_____________

شعبة / ادارة الامن الالكترونى والتقانة لو ناس الامن والمخابرات / وزارة الاتصالات ما عندهم .. القاعدين ليها شنو ..
تهكير بنك السودان / ... الخ .. مسئولية الامن / وزارة الاتصالات / المالية
ثم ان ذلك يعتبر جريمة وفقاً لكل قوانين الدنيا ويناط بوزارة الداخلية ان تنشئ وحدة / ادارة معنية بالجرائم الالكترونية

ولا شنو ..

Post: #43
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 22-07-2011, 08:53 PM
Parent: #42

Quote: لان الكل يعلم بان الحكومة هي الامن والامن هو الحكومة


واين حزب المؤتمر الوطنى فى معادلتك ( المحكمة دا )

Post: #44
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 22-07-2011, 09:23 PM
Parent: #43

بدر الدين بصراحة جرجرة العساكر دي انا ما بدورها
شنو الامن والحكومة والمؤتمر بتاعكم ده ؟
ما كلو واحد ولو داير تحنكنا يا بدر الدين تكون بالغت يعني دايرني اصدق انو التلاتة منفصلين وما ( بتقاطعوا) في مصحة واحدة ؟

الحمد لله على اي حال...

اسامة

Post: #45
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 22-07-2011, 10:32 PM
Parent: #44

Quote: شنو الامن والحكومة والمؤتمر بتاعكم ده ؟
ما كلو واحد



واحد عندك انت ...
ثلاث عند غير المنتمى وهو جزء من الحكومة
ثلاث عندى انا
ثلاث عند ضباط الحركة الشعبية السابقين فى جهاز الامن

Post: #46
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 22-07-2011, 10:52 PM
Parent: #45

يعني بس ما تحترم عقلنا ده شوية يا بدر الدين

لا يمكنك خداع كل الناس كل الوقت

حكمة سمحة والله

Post: #47
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Frankly
Date: 22-07-2011, 11:04 PM
Parent: #45

Quote: واحد عندك انت ...
ثلاث عند غير المنتمى وهو جزء من الحكومة
ثلاث عندى انا
ثلاث عند ضباط الحركة الشعبية السابقين فى جهاز الامن


رد حكيم محكم

لن تجد من يفنده مباشرة

ابناء أكبر حزب سياسي معارض يعملون في الجيش والأمن القومي

فهل من مدكر؟؟

Post: #48
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 22-07-2011, 11:11 PM
Parent: #47

Quote: ابناء أكبر حزب سياسي معارض يعملون في الجيش والأمن القومي


ابناء كل الشعب السوداني يعلمون ان الحكومة هي الجيش والامن والمؤتمر الوطني وبطلو استهبال ولعب بالدقون
المابستحي بعمل اي شيئ ... مثل معروف لحسن الحلاق ...

Post: #49
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Frankly
Date: 22-07-2011, 11:21 PM
Parent: #48

يا جنا ها أأزول اسامة

البتعمل فيه دا مجرّد هرجلة شفع ولا يتسحق الرد

المعارضة لو كدا الموطن سف التراب

أعقل وأكبر وتهذّب

فما تفعله مضحكة وأنت تظن بنفسك الظنون وكلها أوهام خاوية كرأسك من كل ما هو جدير بالمناقشة والحوار

كل مدالخلاتك عبارة عن مهاترة وكلمات لا تفقه حتى أدنى معانيها


واسمع كلام الببكيك ما تسمع كلام البضحكك ويضحك عليك ويصوّرك معارض

وهذا ومني لك سلام

Post: #50
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: الامين عباس احمد
Date: 22-07-2011, 11:26 PM
Parent: #48

السلام عليكم جميعا
الفهمتو من كلام بدر الدين انو يا اخوانا اتهام المؤتمر الوطني بالتهكير اتهام خاطئ لأنو المؤتمر الوطني مستفيد من المنبر دا ...
طيب يا بدر الدين انا بتفق معاك لو فهمت حاجات معينة ... يعني مثلا المنبر دا بجيب مثلا مقالات تم حجبها ومنعها... والمنبر دا نشيط جدا في عكس اخبار اي نشاط جماهيري او تحرك للشارع ضد حكومة المؤتمر الوطني وكمان مرات كتيرة معاها صور وتوثيق ... دا غير الحديث عن الفساد والتعذيب ...الخ
بي رواقة كدا فهمني المؤتمر الوطني يكون مستفيد من الحاجتين ديل بس ( نشر المحجوب وتغطية المظاهرات ) كيف ؟؟؟

Post: #51
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 23-07-2011, 00:45 AM
Parent: #50

دي المرة التانية يا فرانكلي تسبني ولا املك الا ان اقول حسبي الله ونعم الوكيل .
انت شخص غريب بالجد ...

Post: #54
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Frankly
Date: 23-07-2011, 01:16 PM
Parent: #51

يا جنا اسبو ليك شنو ولشنو

نحن نحاول أن نرشّد الحوار في هذا المنبر بدل الهتافية الصبيانية التي تمارس

اسمع كلامي وناقش بعقلانية واترك الشعارات التي تطلقها ولا تفقه كنهها

اضحد فنّد انتقد برؤية فما تمارسه لا يعدو مهاترة صبيان

وصدقني أنا أخر من يسب وانت أخر من يستحق السب

تحياتي وتقديري

كمال

Post: #56
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 23-07-2011, 03:39 PM
Parent: #54

فرانكلي
طيب مافي مشكلة بس كلامك الاخير ده برضو فيهو تجريح وانت بالحق لا تعرفني ولا ادعي العظمة ولكن تخيير الفاظك فوالله لا يعصمني منك الا ادبي وحسن تربيتي وكوني في الاصل مربيا اُعلِّم تلاميذي قبل العلم ان تأدبوا فهو نصف العلم ولا اريد ان ارد لك السباب لانني لا اعلم فربما تكون اكبر مني في السن فاغلط عليك او اصغر مني فتعتبرني اغلظلك القول او اقسُ عليك ... ان كنت ترى ما اكتبه مهاترة فلا ترد عليه بقبيح القول وان كنت ترى انني اطلق شعارات ولا افقه عنها شيئاً فليس من شيمي ولا من طبعي فعل ذلك ولست بافضل منك بشيئ فكلنا من ادم وادم خُلق من تراب ولكني اعف ان انزلق الى ما تحسبه (ذكاء وشيطنة) وتجرني الى وحل السباب والشتم . واراك تكثر من قول لاتفقه شيئا وتقول ما لاتفهمه حقيقة انت لا تعرفني وما كنا نتجادل فيه هو شأن عام جادلني فيه او قل خيرا او أصمت . الحمد لله لست مممن يتفاخرون بما يعرفون او ما حققوه في ميدان العلم والمعرفة ولست بطارق هذا الطريق ولكن وبصراحة لو وريتك ( ما افقهه ) حا تتعب معاي.
نعود الى حديثك عن فند اضحد انتقد وانت ايه دخلك في المؤتمر الوطني واذا كان بدر الدين والذي هو مؤتمر وطني وعضو فيه لم يرد علي بمستوى ردك الغير لائق فما دخلك انت في المؤتمر والانقاذ والكيزان ؟ موش قلت قبل كده انك ما عندك علاقة بالحكومة دي؟ اذا كنت تفتكر بانني لانني دوما احاول ان اتجنب السباب والشتم فهذا يعني بانني لا استطع او لا اقدر عليه او ضعيف فانت مخطئ يمكنني فعل ذلك لكنها الاخلاق والمبادئ التي تعيد الي عقلي قبل ان اخط حرفا هنا ولعلمك لست اكتب هنا محبا للمكان ولا طالبا للشهرة قالكتابة مارسناها من قبل وبشكل احترافي وقرفنا منها ويمكنك ان ترجع لارشيف الصحافة السودانية والملاحق الثقافية بعدد من الصحف السودانية لتعلم من تخاطب .
ارجو منك ان تلتزم بحسن الحوار وتخاطب الناس باسلوب طيب وان استمريت في اذيتك لي فاني لا املك الا ان اقول دعاءٌ قاله المسلمون يوم أُحد{ فَانْقَلَبُوا بِنِعْمَةٍ مِنَ اللَّهِ وَفَضْلٍ لَمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ } و ثبتهم الله رغم الجِراح وهو ( حسبي الله ونعم الوكيل ).
اما الاخ بدر الدين فاشكر لك حسن ردك وتقبلك رأيي رغم تباينه مع رايك ولكن كما اسلفت لك لا يفرق الكثيرون بين المؤتمر والجيش والامن فلكهم اتت بهم حكومة الانقاذ وزي ما بقولو اهلنا كلو عند العرب صابون .
لكم الشكر
اسامة ( جنا فرانكلي)

Post: #52
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Elmuiz Haggaz
Date: 23-07-2011, 01:40 AM
Parent: #37

Quote: اما ان كان سؤالك عن الفعل والممارسة فإنى احسب اننى امارس جهاداً الكترونياً


دى رهيبة عديل والله!!!! . أها يا فكى بدر الدين ثوابك كيف بعدين؟ إن شاء الله سبعين إسفيرية كدا.

يعنى ما كفتكم دماء الاف السودانيين وتشريد الملايين من بلادهم بإسم الدين وانتم منه براء لاحقننا فى الاسافير الواسعة دى برضو تجاهدوا فينا؟.

حسبى الله ونعم الوكيل فيكم.

Post: #53
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 23-07-2011, 12:52 PM
Parent: #52

Quote: رد حكيم محكم

لن تجد من يفنده مباشرة

ابناء أكبر حزب سياسي معارض يعملون في الجيش والأمن القومي

فهل من مدكر؟؟


شكراً فرانكلى
فهل من مدكــر

Post: #55
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: نصر الدين عثمان
Date: 23-07-2011, 01:32 PM
Parent: #53

أخي الفاضل بدر الدين .. سلام،
كتبت:

Quote: مساحة حرة دون ( رقابة قبلية ) تتيح لنا ان نواصل حراكنا السياسي والتعريفى والتثقيفى لعضويتنا وللمهتمين بالشأن العام من غير المنتمين .
مساحة لتسويق رؤى المؤتمر الوطنى ( الرسمية فى اطار غير رسمى ) للاخرين ( يبدأ الاخرون من العضوية مروراً بالمشاهدين وانتهاءاً بالدول الصديق منها والعدو )
معمل مجتمعى متاح يشتمل على كل العينات ( المنتقاة / العشوائية / الغير / الداخلية / الخارجية / ...)
+

اخرى

ثم أضفت:
Quote: إعادة اكتشاف المعارضة الحزبية فى ثوبها المستقبلــى ...

إزاء هذه المعطيات الكثيرة التي سقتها كحيثيات لاستخلاص تلك النتيجة العظيمة..
وكيف أن تهكير (سودانيزأونلاين ) يلحق تلك الخسائر الكبيرة بالمؤتمر الوطني ..
طفقت بخيالي سارحاً وراء تلك الفكرة .. ممعناً فيها بالنظر – وهي جديرة بذلك وزيادة - قلت لنفسي لو كنت محل المؤتمر الوطني ماذا عساي فاعلاً تجاه (سودانيزأونلاين) وهو يحقق لي تلك الأهداف (الإستراتيجية) الجبارة .. هل اكتفي بتحقق تلك النتائج المجانية وهي عرضة للانقطاع بسبب هجمات الهكر المتتالية؟ أكون غشيماً وغراً إن فعلت ذلك!! إذاً لأوليه اهتماماً أكبر .. إذاً فإنني لن أتركه بعد اليوم تحت رحمة (الهكر) .. سأخصص إدارة خاصة للإبقاء على دوران عجلته دون انقطاع .. وسأسخر كل إمكانياتي الكبيرة حتى لو استدعى الأمر التعاقد مع كبريات الشركات المتخصصة لإسباغ حماية أكبر عليه – بالطبع كل ذلك سوف يكون من وراء ستار حتى لا أثير الريبة - صحيح أن ذلك سيكلفني نفقات ولكني أنا الرابح الأكبر بما أجنيه من مكاسب عظيمة..

Post: #57
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Osama Mohammed
Date: 23-07-2011, 03:40 PM
Parent: #55

فرانكلي
طيب مافي مشكلة بس كلامك الاخير ده برضو فيهو تجريح وانت بالحق لا تعرفني ولا ادعي العظمة ولكن تخيير الفاظك فوالله لا يعصمني منك الا ادبي وحسن تربيتي وكوني في الاصل مربيا اُعلِّم تلاميذي قبل العلم ان تأدبوا فهو نصف العلم ولا اريد ان ارد لك السباب لانني لا اعلم فربما تكون اكبر مني في السن فاغلط عليك او اصغر مني فتعتبرني اغلظلك القول او اقسُ عليك ... ان كنت ترى ما اكتبه مهاترة فلا ترد عليه بقبيح القول وان كنت ترى انني اطلق شعارات ولا افقه عنها شيئاً فليس من شيمي ولا من طبعي فعل ذلك ولست بافضل منك بشيئ فكلنا من ادم وادم خُلق من تراب ولكني اعف ان انزلق الى ما تحسبه (ذكاء وشيطنة) وتجرني الى وحل السباب والشتم . واراك تكثر من قول لاتفقه شيئا وتقول ما لاتفهمه حقيقة انت لا تعرفني وما كنا نتجادل فيه هو شأن عام جادلني فيه او قل خيرا او أصمت . الحمد لله لست مممن يتفاخرون بما يعرفون او ما حققوه في ميدان العلم والمعرفة ولست بطارق هذا الطريق ولكن وبصراحة لو وريتك ( ما افقهه ) حا تتعب معاي.
نعود الى حديثك عن فند اضحد انتقد وانت ايه دخلك في المؤتمر الوطني واذا كان بدر الدين والذي هو مؤتمر وطني وعضو فيه لم يرد علي بمستوى ردك الغير لائق فما دخلك انت في المؤتمر والانقاذ والكيزان ؟ موش قلت قبل كده انك ما عندك علاقة بالحكومة دي؟ اذا كنت تفتكر بانني لانني دوما احاول ان اتجنب السباب والشتم فهذا يعني بانني لا استطع او لا اقدر عليه او ضعيف فانت مخطئ يمكنني فعل ذلك لكنها الاخلاق والمبادئ التي تعيد الي عقلي قبل ان اخط حرفا هنا ولعلمك لست اكتب هنا محبا للمكان ولا طالبا للشهرة قالكتابة مارسناها من قبل وبشكل احترافي وقرفنا منها ويمكنك ان ترجع لارشيف الصحافة السودانية والملاحق الثقافية بعدد من الصحف السودانية لتعلم من تخاطب .
ارجو منك ان تلتزم بحسن الحوار وتخاطب الناس باسلوب طيب وان استمريت في اذيتك لي فاني لا املك الا ان اقول دعاءٌ قاله المسلمون يوم أُحد{ فَانْقَلَبُوا بِنِعْمَةٍ مِنَ اللَّهِ وَفَضْلٍ لَمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ } و ثبتهم الله رغم الجِراح وهو ( حسبي الله ونعم الوكيل ).
اما الاخ بدر الدين فاشكر لك حسن ردك وتقبلك رأيي رغم تباينه مع رايك ولكن كما اسلفت لك لا يفرق الكثيرون بين المؤتمر والجيش والامن فلكهم اتت بهم حكومة الانقاذ وزي ما بقولو اهلنا كلو عند العرب صابون .
لكم الشكر
اسامة ( جنا فرانكلي)

Post: #58
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 23-07-2011, 08:37 PM
Parent: #57

Quote: ولكن كما اسلفت لك لا يفرق الكثيرون بين المؤتمر والجيش والامن فلكهم اتت بهم حكومة الانقاذ وزي ما بقولو اهلنا كلو عند العرب صابون .


الكثيرون لا يفرقون بين المؤتمر الوطنى والجيش والامن ( لانهم لا يعلمون )
لكننى اريد من اسامـة صاحب القلم والوعــى ان لا يكون من ضمن هولاء الكثيرون
وانت صاحب التجربة الصحفية ينتظر منك ان تبث الوعــى للقراء من ابناء بلادنــا
لنتواضع على ان هناك مسميات لا تجد حظها من الوعى بها وبدورها ..
الدولة
الحكومة
الشعب

الفضاء الذى يجمعنا طوعاً وكرهاً هو وطننــا .. ونبحث عن وعى لنتعايش على هديــه
الحكومة اليوم حكومة الحزب الحاكم ( تتفق / تختلف ) معها لا ضير
الشعب هو انا / انت / هم / احزابنا / تكويناتنا الاجتماعية / الدينية / ...


الكورة واطــه يا اسامة فأنت وفرانكلى تحتاجكم بلادنا وشعبنا وقطعاً حكومتنا

Post: #59
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: Frankly
Date: 23-07-2011, 09:30 PM
Parent: #57

أسامة

إن كنت ترى في كلماتي تجريح فهذا شيء يعود إليك ولا داعي لأعرفك بالحق أو غيره فأنا هنا اعلّق على كلمات يوزرنيم ولا يهمني إطلاقاً من يخف خلفها

تعليقاتك عندي مجرّد مهاترات وكلمات جوفاء شئت ذلك أم أبيت ولا تعدو ذلك قيد انملة ولا تقود لنقاشات عميقة أو حتى سطحية

أنا ارد عليك لتعليقك على كلماتي أنا وليس لتعليقك على كلمات زيد أو عبيد من الناس وأراك أتيت بشعارات جوفاء وخاوية المعنى ومجافية للسياق

شنو الشعب السوداني وبطيخ

من هو الشعب السوداني أم لم يكن الكيزان والأنصار والشيوعيون والبعثيون وكل مواطن سوداني

أنا تداخلت بمداخلة أراها تعضد فكرة صاحب البوست وهو أنّ هناك قطاعات كثيرة ترى أنّ الحكومة لا تساوي المؤتمر الوطني وأن جهاز الأمن لا يساوي المؤتمر الوطني وأنّ المؤتمر الوطني لا يساوي الجيش السوداني

وأتيت على ذلك بمثال وجئت أنت بمداخلتك المهاترة وشبكتنا شعب سوداني وزلوط

هنا لا أدافع عن حكومة أو معارضة حزب مؤتمر وطني أن شوايعة

عايز تناقش بأدب أهلاً وسهلاً عايز تتداخل على كلماتي بمثل ما أتيت فلتتجرّع مرارة الرد وطعم علقمه ولك أن ترى فيها ما ترى تجريح أوة غيره ولا يعنيني أبداً ما تجده من كلماتي ويعنيني فقط رأيي أن أقوله بصراحة

هذا ولك مني سلام

كمال

Post: #60
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: نصر الدين عثمان
Date: 24-07-2011, 07:13 PM
Parent: #59

*

Post: #61
Title: Re: حكومة المؤتمر الوطنى المتضرر الاكبر من تهكير سودانيزاونلاين
Author: بدر الدين اسحاق احمد
Date: 24-07-2011, 08:02 PM
Parent: #60

طفقت بخيالي سارحاً وراء تلك الفكرة .. ممعناً فيها بالنظر – وهي جديرة بذلك وزيادة - قلت لنفسي لو كنت محل المؤتمر الوطني ماذا عساي فاعلاً تجاه (سودانيزأونلاين) وهو يحقق لي تلك الأهداف (الإستراتيجية) الجبارة .. هل اكتفي بتحقق تلك النتائج المجانية وهي عرضة للانقطاع بسبب هجمات الهكر المتتالية؟ أكون غشيماً وغراً إن فعلت ذلك!! إذاً لأوليه اهتماماً أكبر .. إذاً فإنني لن أتركه بعد اليوم تحت رحمة (الهكر) .. سأخصص إدارة خاصة للإبقاء على دوران عجلته دون انقطاع .. وسأسخر كل إمكانياتي الكبيرة حتى لو استدعى الأمر التعاقد مع كبريات الشركات المتخصصة لإسباغ حماية أكبر عليه – بالطبع كل ذلك سوف يكون من وراء ستار حتى لا أثير الريبة - صحيح أن ذلك سيكلفني نفقات ولكني أنا الرابح الأكبر بما أجنيه من مكاسب عظيمة.. طفقت بخيالي سارحاً وراء تلك الفكرة .. ممعناً فيها بالنظر – وهي جديرة بذلك وزيادة - قلت لنفسي لو كنت محل المؤتمر الوطني ماذا عساي فاعلاً تجاه (سودانيزأونلاين) وهو يحقق لي تلك الأهداف (الإستراتيجية) الجبارة .. هل اكتفي بتحقق تلك النتائج المجانية وهي عرضة للانقطاع بسبب هجمات الهكر المتتالية؟ أكون غشيماً وغراً إن فعلت ذلك!! إذاً لأوليه اهتماماً أكبر .. إذاً فإنني لن أتركه بعد اليوم تحت رحمة (الهكر) .. سأخصص إدارة خاصة للإبقاء على دوران عجلته دون انقطاع .. وسأسخر كل إمكانياتي الكبيرة حتى لو استدعى الأمر التعاقد مع كبريات الشركات المتخصصة لإسباغ حماية أكبر عليه – بالطبع كل ذلك سوف يكون من وراء ستار حتى لا أثير الريبة - صحيح أن ذلك سيكلفني نفقات ولكني أنا الرابح الأكبر بما أجنيه من مكاسب عظيمة..

-------------------------------------------------------------

يا حبيب بجيك علا العدة ما جاهزة