انبهلت للمغتربين ......

انبهلت للمغتربين ......


05-08-2014, 08:59 AM


  » http://sudaneseonline.com/cgi-bin/sdb/2bb.cgi?seq=msg&board=460&msg=1399535961&rn=39


Post: #1
Title: انبهلت للمغتربين ......
Author: ود الباوقة
Date: 05-08-2014, 08:59 AM
Parent: #0

كشف السفير حاج ماجد السوار ، الامين العام لجهاز تنظيم شؤون السودانيين بالخارج عن اتجاه لمعالجة متأخرات الضرائب المفروضة
على المغتربين حتى يتمكنوا من التواصل مع الوطن اضافة الى إكتمال الدراسة الاحصائية الخاصة بضرائب المغتربين والتى أكدت
على عدم جدوى عودة الضريبة على المغتربين،وقال انه سيتم تقديم الدراسة للمالية ليصدر القرار الخاص بالغائها، وابان ان هناك ثمانية
عشر حافزاً تشجيعياً للمغتربين تم الفراغ من صياغتها على ان تضاف اليها مقترحات عملية اخرى لتقدم لوزارة المالية حتى تصدر قرارات
لصالح المغتربين ..واوضح خلال مخاطبته لورشة عمل تحويلات المهاجرين الواقع والمأمول والتى نظمها مركز السودان لدراسات
الهجرة والتنمية والسكان بجهاز المغتربين ان نسبة الخاضعين للضريبة من المغتربين تقدر ب30% فقط من جملة السودانيين بالخارج
وابان ان نسبة الاعالة للمغتربين تقدر بحوالى 54% وان 70% هم مرافقون . وكشف سوار عن سعى الجهاز لتبسيط الاجراءات
ومعالجة الازدحام وتنظيم الصالات وتطبيق نظام الخدمة الالكترونية الذاتية ، ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل واوضح مساعى الجهاز لتطويراستثمارات المغتربين ومعالجة مشكلات
التعليم لابنائهم مشدداً على أهمية التنسيق مع وزارة الخارجية والسفارات لحل مشاكل المغتربين لتعزيز الثقة بين المغترب والدولة
، وقال ان ما جاء فى الورشة سيتم تصنيفه فى اربعة مصفوفات رئيسية تتمثل فى ماهية الاجراءات المطلوبة من الجهاز حتى يستطيع
معالجة الواقع الحالى وما يلى المغترب وما يعوقه فى تقديم مدخراته واستثماراته الخاصة بالقطاعات ذات الصلة التى تقدم خدمات
للمغترب وادماج اقتصاد الهجره فى الاقتصاد الكلى . داعياً الى استكشاف فرص جديده للهجره المنتجه وتعظيم العائد منها .
واشار الخبير الوطنى دكتور بابكر محمد توم خلال ورقته التى قدمها فى الورشة بعنوان تحويلات المهاجرين الواقع والمأمول
الى ان تحويلات المغتربين ترتكز على عنصرين هما مؤشرات الاستقرار الاقتصادى وسعر الصرف والتضخم ، بجانب الحوافز
الجمركية التى تمنح لاصحاب التحويلات والحوافز الاخرى مثل الاراضى والضرائب المفروضة ، ودعا للاستفادة من تجارب الدول
الاخرى التى تتشابه اوضاعها مع السودان ، مشدداً على أهمية وضع سياسة واقعية محفزة وجريئة فى ظل الوضع
الاقتصادى الحالى وعدم استقرار مؤشرات التضخم مطالباً بوضع حزمة متآزرة من الحوافز حتى يسهم المهاجر بموارده
لتصبح عائدات المغتربين فى المرتبة الاولى فى الدخل القومى مثل الزراعة والصناعة اضافة للبحث عن اسواق عمل للعمالة
السودانية من خلال التواصل مع الدول المستقبله لها ، داعياً الى ضرورة العمق المصرفى وتسهيل اجراءات منح التمويل وتعميم كافة
الحوافز واتاحة الفرص للمهاجرين للحصول على التصديقات الاستثمارية فى الولايات والريف من خلال النظرة الكلية للمهاجر
اضافة لتسهيل حصولهم على الاراضى السكنية والورش والمشروعات بالولايات مشدداً على ضرورة تحسين سعر الصرف الرسمى
لتقليل الفجوة والفارق الكبير بين السعر الرسمى والموازي اضافة الى التغييرات الاجرائية فى الحصول على المشروعات
الصغيرة والتمويل الاصغر ، واوصى التوم باهتمام الدولة بتدريب العمالة وتهيئة الراغبين فى الهجرة بجانب زيادة الاستثمار
المصرفى والاستمرار فى منح الحوافز والسعى من خلال السياسات الكلية والمحافظة على الاستقرار الاقتصادى الكلى
وخفض التضخم واستقرار سعر الصرف فى مستوى مجز وتقليل الفارق بين السعر الرسمى والموازى علاوة على ترويج
شهادة المشاركة الحكومية ( شهامة ) والصكوك المختلفة وسط تجمعات المهاجرين بجانب فتح فروع للبنوك السودانية بالسفارات
والقنصليات بالخارج وتشجيع شركات للمهاجرين فضلاً عن انشاء ملحقيات عمالية فى السفارات التى بها مهاجرين سودانيين
.من جهته اشار مدير عام مركز دراسات الهجرة والتنمية والسكان دكتور خالد على لورد من خلال ورقته الاطارية تذبذب تحويلات
المغتربين بالرغم من اعدادهم الكبيرة لافتاً الانتباه الى ان التحويلات فى كثير من الدول تفوق الاستثمارت داعياً الى ايجاد
سياسة استراتيجية لجذب تحويلات المغتربين . وعلى صعيد منفصل اكد السفير حاج ماجد سوار الامين العام لجهاز المغتربين
لدى لقائه بمكتبه مؤخراً الدكتور شوقار بشار رئيس الاتحاد الوطنى للشباب السودانى على اهمية استيعاب الشباب
السودانى بالخارج ضمن مشروعات الاتحاد عبر فتح فروع للاتحاد بالخارج ، مشيراً فى ذات الاتجاه الى المناشط الصيفية
السنوية التى درج الجهاز على اقامتها وتخصيص مناشط خاصة بالشباب تهدف الى تعزيز الهوية والانتماء الى الوطن .
من جانبه كشف بشار عن عزم الاتحاد على استيعاب الشباب السودانيين بالخارج واستهدافهم بالمشروعات المختلفة مشيراً
الى خطة الاتحاد الرامية الى فتح فروع له بالخارج لتحقيق هذا الهدف ، مشيراً الى اهمية التنسيق بين الجهاز والاتحاد لتحقيق الاهداف المشتركة

Post: #2
Title: Re: انبهلت للمغتربين ......
Author: ود الباوقة
Date: 05-08-2014, 09:01 AM
Parent: #1

إكتمال الدراسة الاحصائية الخاصة بضرائب المغتربين والتى أكدت
على عدم جدوى عودة الضريبة على المغتربين،وقال انه سيتم تقديم الدراسة للمالية ليصدر القرار الخاص بالغائها

Post: #3
Title: Re: انبهلت للمغتربين ......
Author: ود الباوقة
Date: 05-08-2014, 09:01 AM
Parent: #2

وتطبيق نظام الخدمة الالكترونية الذاتية

Post: #4
Title: Re: انبهلت للمغتربين ......
Author: ود الباوقة
Date: 05-08-2014, 09:02 AM
Parent: #3

ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل

Post: #5
Title: Re: انبهلت للمغتربين ......
Author: ود الباوقة
Date: 05-08-2014, 09:02 AM
Parent: #3

ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل

Post: #6
Title: Re: انبهلت للمغتربين ......
Author: ود الباوقة
Date: 05-08-2014, 09:04 AM
Parent: #5

واشار الخبير الوطنى دكتور بابكر محمد توم خلال ورقته التى قدمها فى الورشة بعنوان تحويلات المهاجرين الواقع والمأمول
الى ان تحويلات المغتربين ترتكز على عنصرين هما مؤشرات الاستقرار الاقتصادى وسعر الصرف والتضخم ، بجانب الحوافز
الجمركية التى تمنح لاصحاب التحويلات والحوافز الاخرى مثل الاراضى والضرائب المفروضة

Post: #8
Title: Re: انبهلت للمغتربين ......
Author: هشام المجمر
Date: 05-08-2014, 09:10 AM
Parent: #6

ارى جعجعة ولا ارى طحينا

و منو شوقار بشار ده؟

Post: #13
Title: Re: انبهلت للمغتربين ......
Author: ود الباوقة
Date: 05-08-2014, 09:14 AM
Parent: #8

الدكتور شوقار بشار رئيس الاتحاد الوطنى للشباب السودانى

Post: #28
Title: Re: انبهلت للمغتربين ......
Author: wadalzain
Date: 05-08-2014, 09:53 AM
Parent: #8

ودالباوقة ازيك

ياخى سوار دة

فى الجامعة وهو طالب تعدى على عميد كلية القانون وضربه بسوء ادب

فى الحكومة دخل جهاز الامن سىء الصيت

عند المفاصلة اختار الانحياز للترابى والشعبى قام ناس المؤتمر الوطنى درشوه لمن آمن ثم رجع طائعا صاغرا للمؤتمر الوطنى

عينوه وزير للشباب والرياضة فشل فشلا ذريعا وعمل مشاكل يعرفها ناس الرياضة ومشاكل مع الفيفا ثم ابعدوه من الوزارة

عينوه سفير فى ليبيا ، قام يتفولح وخالف سياسة وزارة الخارجية وتوجهات كرتى الخاصة بالعلاقة بمصر وثورتها قام كرتى جبوا راجع السودان

وها هو الآن يعينوه امين لجهاز المغتربين

تفتكر زول دى مواصفات سيرتو الذاتية حا ينجح مع المغتربين ويقدم حاجة مفيدة


من جرب المجرب عقله مخرب
من جرب المجرب حلت به الندامة
أسأل مجرب ولا تسأل طبيب

Post: #9
Title: Re: انبهلت للمغتربين ......
Author: محمد عبد الماجد الصايم
Date: 05-08-2014, 09:11 AM
Parent: #6

أحلق شنبي لو عمل حاجة من ديل ..

Post: #10
Title: Re: انبهلت للمغتربين ......
Author: محمد عبد الماجد الصايم
Date: 05-08-2014, 09:11 AM
Parent: #9

أها .. وريـال السفارة ح يعمل لينا فيهو شنو؟

Post: #11
Title: Re: انبهلت للمغتربين ......
Author: محمد عبد الماجد الصايم
Date: 05-08-2014, 09:13 AM
Parent: #10

يا زول خليهو يستمتع بي قروشنا دي ويركب الكروزر المظلل ..
يعني ح يكون أحسن من كرار التهامي الخارج من (رحم) الاغتراب!!

Post: #16
Title: Re: انبهلت للمغتربين ......
Author: ود الباوقة
Date: 05-08-2014, 09:18 AM
Parent: #9

Quote: أحلق شنبي لو عمل حاجة من ديل ..



قصدك دقنك

مش

شكرا يا عمك

Post: #17
Title: Re: انبهلت للمغتربين ......
Author: ود الباوقة
Date: 05-08-2014, 09:18 AM
Parent: #9

Quote: أحلق شنبي لو عمل حاجة من ديل ..



قصدك دقنك

مش

شكرا يا عمك

Post: #7
Title: Re: انبهلت للمغتربين ......
Author: صديق عيسى صالح
Date: 05-08-2014, 09:08 AM
Parent: #5

Quote: ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل

ما فى طريقه للتحويل عن طريق البنك مهما عملتو
التحويل الخارجى متوفر وبسعر مجزئ ما لنا ومال التلتله اها شن بسووو؟؟

Post: #12
Title: Re: انبهلت للمغتربين ......
Author: ismeil abbas
Date: 05-08-2014, 09:13 AM
Parent: #7

ودالباوقة السلام عليكم.......الثقة مفقودة بين الحكومة والمواطن...فكروا فى كيفية إعادتها أولاً........تقديرى وإحترامى...

Post: #15
Title: Re: انبهلت للمغتربين ......
Author: محمد عمر الفكي
Date: 05-08-2014, 09:17 AM
Parent: #12

والله يا شيخ عمر بقيت لمن اشوف بوستاتك من النوع دا بخت ايدي فوق قلبي واقول يا رب استر
ما عارف لشنو لكن كل ما اشوف نوعية البوستات دي بدعي ربنا ان كيفينا شر الزلزال والتسونامي

Post: #21
Title: Re: انبهلت للمغتربين ......
Author: Hassan Makkawi
Date: 05-08-2014, 09:22 AM
Parent: #12

Quote: الدكتور شوقار بشار رئيس الاتحاد الوطنى للشباب السودانى على اهمية استيعاب الشباب
السودانى بالخارج
ضمن مشروعات الاتحاد عبر فتح فروع للاتحاد بالخارج


الشباب دخلوا الصادر؟؟؟

(ريالات ود الصايم خط أحمرً)

Post: #18
Title: Re: انبهلت للمغتربين ......
Author: ود الباوقة
Date: 05-08-2014, 09:20 AM
Parent: #7

Quote: ما فى طريقه للتحويل عن طريق البنك مهما عملتو
التحويل الخارجى متوفر وبسعر مجزئ ما لنا ومال التلتله اها شن بسووو؟؟


صالح

راجع عقوبات تجار العملة التي صدرت حديثا

وشكرا

Post: #25
Title: Re: انبهلت للمغتربين ......
Author: Saifelyazal Elmaki
Date: 05-08-2014, 09:34 AM
Parent: #18

Quote: راجع عقوبات تجار العملة التي صدرت حديثا


هو في تاجر عملة غيرهم
زول بحول عن طريق البنك مافي

Post: #19
Title: Re: انبهلت للمغتربين ......
Author: almulaomar
Date: 05-08-2014, 09:21 AM
Parent: #7

إنهم قالوا وخير القول قول العارفينا
FOX.jpg Hosting at Sudaneseonline.com

Post: #20
Title: Re: انبهلت للمغتربين ......
Author: dardiri satti
Date: 05-08-2014, 09:21 AM
Parent: #7

Quote: أها .. وريـال السفارة ح يعمل لينا فيهو شنو؟


عفيت منك ياود الصايم!!
وأنا بقول ليهم :
تااااااااااااااااااااااااااااااااااااني؟؟
ألعبوا غيرها !
ما في تاني ، ولو عاوزين إلا بعد ما ترجعوا لينا
حقوقنا الأكلتوها علينا ،
بالتآمر مع بنك فيصل ألإسلامي
"إسلامي " قال !!!
عاوزين الحوافز مقابل التحويلات العملناها
وانتظرنا نستفيد منها
ترجع والحساب ولد .
بغير كدا ..... لأ لأ لأ لأ لأ !!

أها .. وريـال السفارة ح يعمل لينا فيهو شنو؟

Post: #14
Title: Re: انبهلت للمغتربين ......
Author: nazar hussien
Date: 05-08-2014, 09:16 AM
Parent: #5

يا ود الباوقة

دعا واعرب وحث...وافاد ووعد دي كلها افعال لا تقدم ولا تؤخر بل هي مجرد اماني
عايزين الرجل دا يقرن القول بالفعل...ويستصدر القرارات اللازمة من البشير شخصيا

عايزين يعفونا من الضرائب والجمارك والزكاة....
بنزكي برانا اكتر من الزكاة البدفعونا ليها
وبندفع ليهم ضرائب غير مباشرة اضعاف
ما يدفعونا ليه كرسوم...
وبنحول متدخراتنا ونحن مطمئنين
وبندور عرباتنا ونشتري بنزينهم وزيتهم واسبيراتهم...
وكل سنة بيدخلوا ليك 8 مليون مغترب بي شنطهم وجلاليبهم
وشفعهم....

العدد دا شوفو بيأكل كم رغيفة في اليوم...وببدل كم دولار....وبدفع كم رسوم خدمة وبركب كم تكسي الخ الخ

رسوم تأشيرة خروج ال 8 مليون دي براها كم؟؟؟

مخلين خلق الله تزازي بي بره لي السودان مشتهين قعدة شراب الشاي في ضل شدرة...\
مش اجدي ليكم تخففوا عليهم عشان يجوا السودان؟؟؟

Post: #22
Title: Re: انبهلت للمغتربين ......
Author: ود الباوقة
Date: 05-08-2014, 09:24 AM
Parent: #14

استأذن الاخوة حيث انه وبعد صلاة الظهر مباشرة ساخلد

الى ( قيلولتي ) الراتبة

نرجو الحرص على عدم الازعاج

وشكرا

Post: #23
Title: Re: انبهلت للمغتربين ......
Author: محمد عبد الماجد الصايم
Date: 05-08-2014, 09:27 AM
Parent: #22



لسه يا شيخنا .. باقي نص ساعة على الأذان!!

Post: #24
Title: Re: انبهلت للمغتربين ......
Author: Mohammed Abuzaid
Date: 05-08-2014, 09:28 AM
Parent: #14


والمقابل شنو ! ! !

ما يقول حُبّاً في سواد عيون المغتربين
ولا رفقاً بحال المغترب

تحياتي للجميع

Post: #26
Title: Re: انبهلت للمغتربين ......
Author: Saifelyazal Elmaki
Date: 05-08-2014, 09:35 AM
Parent: #24

Quote: ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل

كل الهيلمانه دي عشان الكلام الفوق ده

Post: #27
Title: Re: انبهلت للمغتربين ......
Author: هشام المجمر
Date: 05-08-2014, 09:37 AM
Parent: #24

Quote: الدكتور شوقار بشار رئيس الاتحاد الوطنى للشباب السودانى


يعنى رئيس اتحاد شباب تابع للمؤتمر الوطنى

طيب ده دخلو شنو وبعرف شنو عن الشباب المغترب و المهاجر؟

الناس اسمو ما سمعت بيهو!!!!!!

Post: #31
Title: Re: انبهلت للمغتربين ......
Author: إدريس البدري
Date: 05-08-2014, 10:02 AM
Parent: #27

يا باوقة
كدي خليهو قولو هو

بالله الذي خلقك انت الكلام ده واقع ليك ومصدقو؟

Post: #29
Title: Re: انبهلت للمغتربين ......
Author: Ibrahim Farah
Date: 05-08-2014, 09:55 AM
Parent: #1

متمني اسافر لبلدي الخميس وارجع السبت او الأحد زي كل العالم والله بحسد زملائي من الجنسيات الأخرى، أنا ما عارف جوازنا دا فايدتو شنو إذا أنا لازم اخد تأشيرة خروج من بلدي .. طالما الدولة وافقت منحتني جواز بالسفر المفروض اشيل شنطي وامشي المطار متى ما هفت لي اسافر وما على ضابط الجوازات الا يختم وبس. دولة لا تحترم جوازها ولا حامله عايزين الناس تحترمها..

صباح الأحلام الوردية

Post: #30
Title: Re: انبهلت للمغتربين ......
Author: محمد عمر الفكي
Date: 05-08-2014, 10:00 AM
Parent: #29

شوقار دا راجل سكر يا جماعة

Post: #32
Title: Re: انبهلت للمغتربين ......
Author: محمد عبد الماجد الصايم
Date: 05-08-2014, 10:04 AM
Parent: #30

غايتو أنا ـ كشاب سوداني ـ ما بعرف شوقار دا ولا بسمح ليهو يتكلم باسمي!!

Post: #33
Title: Re: انبهلت للمغتربين ......
Author: أمير محمد ادريس
Date: 05-08-2014, 10:38 AM
Parent: #30

شوقار دا راجل سكر يا جماعة
----------------------------

وضح يا محمد ( سكر ولا سكر ) وجه ضاحك يا حبيبنا .

Post: #34
Title: Re: انبهلت للمغتربين ......
Author: Elhussein Ahmed
Date: 05-08-2014, 10:44 AM
Parent: #33

يا ود الباوقة

نرجو غض الطرف عن المغتربين فهو افضل لهم واضمن


(الامان امان الله يا أخوى كلما جيبو سيرتنا ساى بنخااااااااف عديل )

Post: #35
Title: Re: انبهلت للمغتربين ......
Author: محمد عمر الفكي
Date: 05-08-2014, 11:00 AM
Parent: #34

يا امير انا قاصدة بتاعة اغنية الكابلي ههههههههههههههههه

Post: #36
Title: Re: انبهلت للمغتربين ......
Author: الهادي ابوبكر
Date: 05-08-2014, 11:02 AM
Parent: #34

Quote: كشف السفير حاج ماجد السوار ، الامين العام لجهاز تنظيم شؤون السودانيين بالخارج عن اتجاه لمعالجة متأخرات الضرائب المفروضة


ياخوي تعالجو ول ما تعالجو ...

ضريبة ................... مافي
زكاة .................. مافي
خدمات ................ مافي
تحويل ................. مافي

الا رسوم تجديد بس وتوابعها من دمغات.

تكترو تقللو ... تحويل شارع غبيرا زاتو بنوقفو ...


قال معالجات قال ...

كلام ده تقولو لي زول ما عندو حديده يا عمك،،،

Post: #37
Title: Re: انبهلت للمغتربين ......
Author: عبدالله احيمر
Date: 05-08-2014, 11:56 AM
Parent: #36

Quote: أنا ما عارف جوازنا دا فايدتو شنو إذا أنا لازم اخد تأشيرة خروج من بلدي





حكومة الكـيزان تمارس الفهـلوة , تأشــيرة الخروج دلعوها فسـموها ( إســتيفاء )
بدفــع و انـا ما عرف مسـتوفي شــنو ولا مرتي مسـتوفيه شــنو
الأولاد الرضـع و الأطفال بيدفعوا قروش الاســتيفاء

Post: #38
Title: Re: انبهلت للمغتربين ......
Author: جمال الباقر
Date: 05-08-2014, 12:07 PM
Parent: #37

Quote: ستأذن الاخوة حيث انه وبعد صلاة الظهر مباشرة ساخلد

الى ( قيلولتي ) الراتبة

نرجو الحرص على عدم الازعاج


كيف يعني ؟؟؟؟؟؟
ود الصايم انتو الزول ده بتزعجوهو وقت قيلولتو مالكم ماعندكم زوق كده

Post: #40
Title: Re: انبهلت للمغتربين ......
Author: عبد الوهاب المليك
Date: 05-08-2014, 12:23 PM
Parent: #38

أخوي عمر
والله دخلت هذا البوست كنت متوقع أجد خبر صدور قرار بالغاء جهاز المغتربين .. لكن يبدو أنني متفائل جداً كتفاؤل ناس قريعتي راحت .. ما بشيلوا هم لي بكرة .. وعلى قولهم :
الله فراج ..
الورش والمؤتمرات والتصريحات ملينا منها واتململنا منها . ودائماً حصيلتها ليست في صالح المغترب .. وبكره نشوف ..

ويا مثبت العقل والدين ..

Post: #39
Title: Re: انبهلت للمغتربين ......
Author: الحاج حمد الحاج
Date: 05-08-2014, 12:16 PM
Parent: #37

اول شئ قول للوزير دا في 100 ريال سعودي غيرقانونية و غير دستورية مفروض على أي سوداني يجدد جوازه في قنصلية السودان بجدة يلغيها لينا بعد داك نشوف باقي الكلام الكتير الما ح يعمل فيهو حاجة!

ود الباوقة أنا متوقع تكتب: اعتذار عن بوست: انبهلت للمغتربين ......

Post: #41
Title: Re: انبهلت للمغتربين ......
Author: عبد الوهاب المليك
Date: 05-08-2014, 12:33 PM

أخوي عمر

الأمين الجديد قرأ تصريحات من سبقوه وجاء ردده أمام وسائل الاعلام لوزم أنه في شيء جديد .. نفس الكلام سبق ترديده ونفس العشم سبق عشمونا به
ونحن ناس قريعتي راحت بنقول :
يا ترى ياهل ترى شالوا الأمين الأول ليه وجابوا داه ليه ولا بنوصل لخيط ونقعد نغني حادي بادي سيدي محمد البغدادي شالوا وحطو وحطوا وشالوا ولا بنرسى على الفولة ..

ويا مثبت العقل والدين ..

Post: #42
Title: Re: انبهلت للمغتربين ......
Author: عباس الدسيس
Date: 05-08-2014, 01:34 PM
Parent: #41

Quote: ودعا الى تفعيل منشور بنك السودان الخاص بتحويلات
المغتربين الخاص بالاستلام بنفس العملة التى يتم بها التحويل


باوقه سلام
علي هامان يا فرعون

Quote: فرعون الملك ادعى الألوهية ،

وزعم أن في استطاعته أن يحي الموتى ،

وكان وزيره هامان شاعرا بالخلط الذي يدعيه مولاه ،

فجاء أحد الناس ذات يوم وقرع باب فرعون

ففتح الوزير هامان وسأله عن حاجته

فقال : معي بقرة ميته أرجو احياءها

فقال له هامان : أنا آسف لأن الملك منهمك الآن بخلق البشر لا البقر .

فذهب الرجل من حيث أتى فأقفل هامان الباب ودخل تواَ غرفة مولاه وحدثه

عما كان من أمر الرجل فاستاء الملك ووبخه على فعله ،

وقال : عندنا وقت يزيد عن عمليات احياء البشر

فلم خيبت رجاء صاحب البقرة ؟

فضحك هامان وقال ( على هامان يافرعون ) --!!

Post: #43
Title: Re: انبهلت للمغتربين ......
Author: محمد الشيخ أرباب
Date: 05-08-2014, 01:44 PM
Parent: #42

Quote:
وتطبيق نظام الخدمة الالكترونية الذاتية



هههههه ود الباوقة احترم عقولنا ياخ.. هم ما عندهم نظام .. بيعتمدوا على كيس الايصالات بتاع المغترب.

Post: #44
Title: Re: انبهلت للمغتربين ......
Author: طارق ابراهيم ابوالفضل
Date: 05-08-2014, 03:08 PM
Parent: #43

كما اسلفنا سابقا

حاج ماجد سوار رجل ذو همة عالية

وما ان يكلف بمهام الا و ترك بصماته واضحة

واكبر دليل على ذلك ما هي الا ايام قلائل وكان عارف

بكل او معظم مشاكل الاغتراب و المغتربين

تلمست الصدق في كلماته و الثورية في افعاله

ومن المؤكد سوف يشهد الجهاز في عهده طفرة كبيرة

وليبدل ود الباوقه عنوانه الى ( عهد جديد للمغتربين )

Post: #46
Title: Re: انبهلت للمغتربين ......
Author: ولياب
Date: 05-08-2014, 03:17 PM
Parent: #43

يا ود الباوقة سلام

كم مؤتمر أقيم وكم من أوراق أجيزت وكم من قرارات صارت حبر على الورق ، ولكن لا ننكر توقف الضريبة (المساهمة) عن بعض الفئات في زمن (الانبهال) ثم عادت بأدراجها بمعدل أعلى لأقل الشرائح (150 دولار) في السنة ، يا خي الجهاز ده لو شركة وأعتبر المغتربين مساهمين حسع كنا في القمر ، بس يشيلوا ويشيلوا دون مقابل .

Post: #45
Title: Re: انبهلت للمغتربين ......
Author: محمد حيدر المشرف
Date: 05-08-2014, 03:15 PM
Parent: #1

مافي وقت الزول يقرأ هنا ..
سأتابع الموضوع في بوست الاعتذار ..

Post: #47
Title: Re: انبهلت للمغتربين ......
Author: ود الباوقة
Date: 05-08-2014, 05:55 PM
Parent: #45

اسف يا شباب من القيلولة دخلت في البرنامج الرياضي الاسبوعي

Post: #48
Title: Re: انبهلت للمغتربين ......
Author: ود الباوقة
Date: 05-08-2014, 06:09 PM
Parent: #47

اخي بكري لاهمية البوست ارجو رفعه .. مع الشكر

Post: #49
Title: Re: انبهلت للمغتربين ......
Author: Alshafea Ibrahim
Date: 05-08-2014, 06:40 PM
Parent: #48

غايتو دفعت 90 ريال ... وفي الإيصال (التجديد) عليكم أمان الله ذكروا أنها ضريبة 2013م
حدثني من تثق فيه كل جالية الشرقية وهو من أقدم واصدق موظفي مكاتب الخدمات بالدمام - بأن أي تجديد لأي مهنة لازم يدفع ضريبة 2013 م ؟؟؟
شوف ود الصائم شايفو مصنقر هنا من زمان ؟
تحياتي ياعمر
الشفيع