Post: #1
Title: المكاجرة
Author: عبدالحفيظ ابوسن
Date: 12-23-2013, 08:23 AM
ده بوست علي سبيل الملاحظة العامة , إن حصل تطابق فهو ليس مقصود
ولكنها طاقية ,,, لو بقت قدر راسك ألبسا
|
Post: #2
Title: Re: المكاجرة
Author: عبدالحفيظ ابوسن
Date: 12-23-2013, 08:31 AM
Parent: #1
وهي ليست من كجر بالفتح
كجر يعني قج يعني نصب
كجر الناموسية قجاها ونصبها
قال الشاعر
ما كجر الحوايا وفي ضراهن بات
كيف إبكن عليه دغس العيون إن مات
والكجرة هي السترة او الحجاب
والكجرة ستر كان يصنع للعروس في دار والدها
|
Post: #3
Title: Re: المكاجرة
Author: عبدالحفيظ ابوسن
Date: 12-23-2013, 08:41 AM
Parent: #2
وكجر بمعني حجر اي حجز ومنع
قال الغناي
حجر شراب سيتيت
وسيتيت مورد ماء
وكجر برضو من الكجور ,, والكجور سحر شعبي ,, والكجوري هو الساحر
والكجر هو البوليس بلغة ما بعرفا أظنها رندوك
قال المادح واظنو حاج الماحي
ياربي حل قيدي الكجر
|
Post: #4
Title: Re: المكاجرة
Author: عبدالحفيظ ابوسن
Date: 12-23-2013, 08:45 AM
Parent: #3
والمكاجرة
هي المخالفة والعكاس دون مسوغ او سبب موضوعي او سبب زاتو ,, موضوعي ولا غير
فهي مخالفة لأجل المخالفة
والذكر مكاجر
والانثي
مكاجرة
|
Post: #5
Title: Re: المكاجرة
Author: عبدالحفيظ ابوسن
Date: 12-23-2013, 09:05 AM
Parent: #4
امكن الناس كلها متفقة علي قيم انسانية محددة
كل الناس ,,, كل ناس العالم
ضد الظلم والقهر والفساد والسرقة والمخدرات والسكر والعنف
اها تلقا ليك موضوع عن واحد من الثوابت دي ,, فجأة تلقا ليك زول مفندر وبكاجر ,, كجار يحرق الروح
لا يمكن اقناع مكاجر
|
Post: #6
Title: Re: المكاجرة
Author: عبدالحفيظ ابوسن
Date: 12-23-2013, 09:39 AM
Parent: #5
لا يمكنك اقناع مكاجر ,, فحجتك سوف يكون ضدها قبل ان يسمعها
والمكاجر لا ينطلق من ارضية ثابتة للمفاهيم لذا هو عرضة للتناقض ,, فيمكن ان يناقض نفسه في ذات الحوار ,,فيسهل خداعه لإكتشاف تناقضه لكل محاور ذكي
|
Post: #7
Title: Re: المكاجرة
Author: بله محمد الفاضل
Date: 12-23-2013, 09:47 AM
Parent: #6
المكاجرة من باب آخر
-إن فهمت مراميك-
هي محاولة لوضع وجهة نظر
تضيف إلى
أو تفتح دروباً أخرى موازية أو مخالفة
اللهم لا تجعلنا مكاجرين دونما معنى أو هدف
|
Post: #8
Title: Re: المكاجرة
Author: عبدالحفيظ ابوسن
Date: 12-23-2013, 09:57 AM
Parent: #7
حبابك بلة يا صاحب
اللهم أكفنا شر الكجار
المكاجر ده يا خوي بعكاسك لامن يطلع زيتك ,, لأنو بغالط في ماهو متفق عليه انسانيا في ذات اللحظة التاريخية
يغالطك لامن يجيب كثافتك ويخليك تنزل الدقداق
فتح محاور جديدة للنقاش ,, والمحاققة { حقوق الطبع محفوظة أظنو ود البشري } لتثبيت المفاهيم دي براها
شفت المكاجرة دي زي
لو طار عتود
ولا
نقول تيس يقول احلبوهو
خالص الود
|
Post: #9
Title: Re: المكاجرة
Author: بله محمد الفاضل
Date: 12-23-2013, 10:00 AM
Parent: #8
يا لطيف
أها أكاجرك ولا أخليك
ههههههههههههه
|
Post: #10
Title: Re: المكاجرة
Author: عبدالحفيظ ابوسن
Date: 12-23-2013, 10:08 AM
Parent: #9
هههههه
ما { ضنيتك} مكاجر
عندي مرة جدي جنها كجار
مرة بت جيرانهم جات البيت , وجدي سأل مرتو
دحين دي ما بت فلانة المشلخة ديك
مرة جدي قالت ليهو
آي بتها لكن امها مشلخة
وقالوا كده اتغالتو
مشلخه ما مشلخه
جدي سأل البت بعد مرتو حرقت روحو
يا بت امك مشلخه ولا ما مشلخه
قالت ليهو مشلخه
نطت مره
امشي انتي زاتك ما بتعرفيها
هههههه
آي والله
ده ياهو الكجار والمكاجره المن امها
|
Post: #11
Title: Re: المكاجرة
Author: Kabar
Date: 12-23-2013, 10:20 AM
Parent: #9
حفيظ يا صديقي... قلها لو مرة.. هل انت من ناس كوستي؟..
اها الأمثلة و الغنا ، معانا ولا لأ؟..
شخصي ، بقاري ، عريبي ، فقير ، منتظر البنطون في حوافي كوستي ، عشان يقطع ، يعدي يمرقها في طيبة ، ثم البيارة ، ثم الجزيرة ابا ، قل يصلي العصر في مسجد الكون ، ثم يمرقها في التمرين ومرابيع ود اللبيح، ساكت محبة للجمال و الأناشيد التي تملأ الذات ضجيجا و عنفوانا و شنو كده ما عارف...!!
تقاطعت مع المكاجرة مرات كتيرات في هذا المنتدى الفاضل .. سبيت و سبوا لي.. قسيت و قسوا علي.. و ناس بسببي ( ليهم كل المحبة ، ما احتملوا المكاجرة و فاتوا بي وشيهم ن وسابوا المنتدى)..لكن اقسى مكاجرة.. كانت من ناس كنت بتظنهم معاك.. في صفك.. في مداك بتاع شليل داك..و يقوموا يتغبوا فيك العرفة دنيا و اخرة..و عشان اهلنا قالوا الواضح ما فاضح.. اديك بيان بالعمل.. فتحت لي بوست بعنوان (محسن خالد ثروة قومية) و انا عارف ، و محسن خالد عارف أنو الموضوع لا ثروة ولا الذي منو..و انما ألأمر يتصل بقضية شعوب ا مسودان محتاجة تعاين ليها و تاني تعاين ليها.. و هي قضية اجراءات دخول المصحة أو العيادة النفسية في السودان ..!!... اها لا ايدك لا كراعك تلم فيك المكاجرة.. ككيف يعني ثروة قومية؟..و المثقف ككيف يبيع لينا الوهم؟.. اها جنس مكاجرة ز ي دي تواجهها ككيف؟.. لو قعدت تغالط في التفاصيل ، الفكرة الأساسية ح تروح ليك شمار في مرقة..و لو سكت و قطعتها في حشاك برضك الفكرة الأساسية ح تروح ليك في حشاك..!!!
مكاجرة ز ي دي ، يا حفيظ ، بدون ما ترجع تلقى روحك مشيت سمعت نجيب سرور في الكسميات ، لكن عشان تبقي سوداني ، و ما تثير حفيظة سوداني غشيم متلك.. بتقوم تسمع ناس صه يا كنار..و تتم الباقي خيال..!!!
كيف ، يا حفيظ ، كانت نهاية الصاغ عوض ابوبكر صاحب صه يا كنار ، و كم حاجة لحضرة الليجند خضر بشير ( عسس الليل و ناما ،) ، ككيف كانت نهاية محمود سراج صاحب ( ليه بتسأل عني تاني) و كم حاجة غناها الفنان الذري ابراهيم عوض؟.. هل جربت الإستهبال يا عبد الحفيظ لمن تلقى روحك في نص مشاجرة بين ست شاي في الثورة الحارة التاسعة و عشرين ، و معاها مواطن ، و بعد شوية تكتشف انو المواطن ده فنان اسمو ابوعبيدة حسن ، و من غير ماهو يدري ، تعقد حلف مع ست الشاي ، و تقول ليها متى ما حضر اديهو شاي ، ان شاء الله عشرين كباية في اليوم ، و الحساب علي ، ثم تهرب في المنافي ، و ست الشاي اياها ، تضحك على حق الجرورة الغير مدفوع؟؟؟؟؟؟؟؟..
عرفت ليه بهنس مات في شوارع القاهرة؟!!!.. يا ربي اهي مكاجرة برضك؟.. بهنس لو كان وديناهو الدلنج ، هل ممكن كان يكون وقع في المكاجرة السودة دي؟...!!
المكاجرة ، لأنو نحن شعب خلاق ، ووصل مرحلة أنو كل واحد فينا ابو العريف ، و مافي داعي يسمع لناس تانيين.. عشان كده ضعنا...و ح نضيع اكتر...!!!!
ياخي الشعب السوداني المثقف بيضيروا شنو لو جرب خصلة الإستماع الإيجابي الفعال؟!!!
صلاح كوستي من اجمل ألأصوات التي شكلت وجداني ، و عمر خليل عميق ، واذكر اني كنت في واحد من بيوت ناس السكة حديد في كوستي ، استرق السمع لحفلة لعمر خليل في حي المرابيع في كوستي ، و انا اشهد أني حضرت أول حفل لعمر خليل في مدينة ألأبيض في حي كريمة ، التي صارت فيما بعد تعرف بحي المهدية.. و سمعت كثر يغنون لمصطفى سيد احمد ، و لكن اقربهم صوتا ورحا اليه ، فنان عسكري من مدينة الأبيض اسمه عبود ، و حضرت له حفل في مدينة الدلنج..و سالته لماذا لا تغني لمصطفي ؟ ..فقال لي باريحية تواصع سودانية نادرة : مصطفى واحد ، وحاجة ما بتتكرر!!!..
ياربي مثل الحكي ده برضك داخل في حساب المكاجرة؟؟؟؟؟؟
كبر
|
Post: #12
Title: Re: المكاجرة
Author: عبدالعزيز عثمان
Date: 12-23-2013, 10:35 AM
Parent: #11
ياعبدالحفيظ ، ياخي الصبر سمح...
والصاح بظل صاح.
حتي لو تكجر المتكجرون وتلولو المتلولون
الذين يريدون هزيمة الامل والحلم..
اننا نستحق احسن من هذا القبح.
|
Post: #13
Title: Re: المكاجرة
Author: معاوية المدير
Date: 12-23-2013, 11:01 AM
Parent: #12
يا عبد الحفيض،
أسعلني منها انا دا، وحات الله وقفوا
رقبتي عصا لا إيدي لا كراعي...
|
Post: #14
Title: Re: المكاجرة
Author: عبدالحفيظ ابوسن
Date: 12-23-2013, 11:09 AM
Parent: #12
حبابك كبر
ياصاحب
انا من كوستي ياصديقي ومن قلبها النابض ,, وعلي مرمي نشاب من البنطون والمشرع ,, الآن انا بكوستي ,,, ليه لكن ?
تعرف خلقي ضيق للغولات والمكاجرة فبختاها لأنها مهلكة لطاقتك العصبية
وموضوع النت ده والكتابة ماخدنها جد ,, اتعكر هنا معناتو شقيتها علي المعاي كلهم حتي وليداتي
هههههه
آي صاح ,,, تكتب بوست بي فهم يلم فيك مكاجر عااااك ,,, عوووك يمرقك في الخط البتقول ليهو
انعل ابوك وابو اللعور الجمبك زاتو
ف كتت شورت ,,, خليك كالاسفنج وامتص الكجار واعمل رايح
مرات كتير بعمل رايح ومسطح وما فاهم حاجة إستكني ما قاعد زاتو
ابوالعريف دي مشكلتنا كلنا ,,, بننحشر في المكان لو ضيق ولا واسع وننضب في النص لامن نقول يا ابومروة ,, ونحمد الله هنا زول بقيلك مافي إلا تقيل روحك براك ,,, حتي لو ضربت الروراي زاتو بكيلوك
شفت بوستات اعتذار تحولت لي شكلة جديدة تستوجب بوست اعتذار آخر
ارقد ضرا لكن دربك ما تفكو
|
Post: #15
Title: Re: المكاجرة
Author: عبدالحفيظ ابوسن
Date: 12-23-2013, 11:19 AM
Parent: #14
عب عزيز يا صاحب
صدق الكضبون ما ببقا صاح
ولكن لا تستهن بالمكاجرين لو كترو
اها ببقا الرك علي الناس البتحمل الفهم الانساني الراقي انها تفرض رؤيتها للامور , تفرض صرامتها الفكرية ولاتحيد ,, ولا تنزل للدرك الاسفل من الكجار
فيا صديقي لولا اؤمن بحركة التاريخ الصاعدة وان وراء الافق نور لما شددت راحلتي في صهد الصيف حافي حالق
كثير ود
|
Post: #16
Title: Re: المكاجرة
Author: عبدالحفيظ ابوسن
Date: 12-23-2013, 11:36 AM
Parent: #15
حباب ودالمدير
هههههه
تاوقت ليكم بي راس الحيطة ,,, خفت تجيني طوبة ,,بقيت اعاين بي قد الباب
زنقوك زنقة محترمة ووكت الكوع حما ,, شلت كرعي في راسي وقلت يا فكيك
ياخوي جنس البوستات دي زي شوال الدقيق لو دخلت يدك فيهو ,, مهما تنفضا تلقا فيها دقيق
كامل الود
|
Post: #17
Title: Re: المكاجرة
Author: عبدالحفيظ ابوسن
Date: 12-23-2013, 12:12 PM
Parent: #16
من النفاج
استاذتي سلمي
حضورك لحدي عندي يصيييني بالغرور
ولحميد سلام
و
وينك ياخيه
|
Post: #18
Title: Re: المكاجرة
Author: عبدالحفيظ ابوسن
Date: 12-23-2013, 02:12 PM
Parent: #17
تكون بتحكي في نكتة , والنكتة لا تخضع لمنطق ,, وهي كلها مفارقة ,, تحكيها وراجي المكاجر يضحك ليك ,, يقوم يقول ليك
لكن النملة ما بتتكلم
ويكجر فيك
|
Post: #19
Title: Re: المكاجرة
Author: محمد محمود محمد
Date: 12-23-2013, 06:23 PM
Parent: #18
سلام ود ابوسن ....
اخونا العزيز كبر ..كتب الصاغ (عوض ابوبكر) والصحيح الصاغ (محمود ابوبكر)
وكتب الشاعر (محمود سراج) والصحيح الشاعر (محجوب سراج )/...
------------
الظاهر باقي (الفلّيق) بتاع بوست محسن خالد لسة مؤثّر معاهو..
|
Post: #20
Title: Re: المكاجرة
Author: عبدالحفيظ ابوسن
Date: 12-24-2013, 05:41 AM
Parent: #19
مرحبا محمد محمود
هههههه
الفليق بدوش الراس فعلا ,,, وبخليك لايص
وينزل الحوار من العقل لعضلة اللسان
|
Post: #21
Title: Re: المكاجرة
Author: AMNA MUKHTAR
Date: 12-24-2013, 06:49 AM
Parent: #20
سلام يا ود أبوسن .
غايتو حوش بكري دا كان ما علمك المكاجرة ..
تاني مافي حتة حا تعلمك ليها ..ههههههه
______
هسه أنا بقيت نادرا ما بدخل هنا ..
لكن غالبا البجيبني بقى ..لزوم سدة مكاجراية هنا ولا هناك بس ..
أصلي من النوع العكليت وما بخلي حقي ..
دا شئ فى الجينات ..أعمل شنو ؟!
|
Post: #22
Title: Re: المكاجرة
Author: Kabar
Date: 12-24-2013, 07:04 AM
Parent: #20
اي و الله يا محمد محمود.. فليق ساكت...!!!
لكن الأجمل يا صديقي ، انو يكون في الدنيا الدنية دي ناس يدوك راسك و النصيحة كمان...!!!
كتر خيرك... ياهم ذاتم ناسنا ، محمود و محجوب....!!!
انا من معجبي الليجند خضر بشير ، و في اعتقادي افضل من يغني غنا خضر بشير على وجه الأرض هو الليجند الحصيف النور الجيلاني...
وجه القمر ، ياخي بصوت ترباس ساكت ماها متوفرة في النت... الصورة الوحيدة ياها نسخة شكر الله ... اهلنا بيقولوا في غياب الماء يجوز التيمم..!!!!
عساها تنفع معاك يا محمد.. و صدقني فرح غاية الفرح بالتصحيح...!!!
حفيظ يا عمك ، المكاجرة الإيجابية مرات بتكون تفاعل ماشي لي قدام ، و ياريت اقرب جمعة قدامك تمشي المشرع اياه و تضرب ليك سمك طازة...و الحساب علي يا عم..!!!!
شكرا على فسحة الونسة اللذيذة دي ، و انا و الله بشجع الرابطة كوستى و عشة عبد الله موسى ( و ديني يا حفيظ اديها يومين ، كن ما جاتك شعوب ام سودان تقول ليك عشه عبد الله موسي دي منو؟ اما الراقصة جداوية عبد الله موسى فدي يا اخوي اسكت ساكت..!!!)
عفوا على المشاترة... وونسة اخر الليل ... البتشبها ونسة ناس يا ليلى ليلك جن...!!!!!!
كبر
|
Post: #23
Title: Re: المكاجرة
Author: Kabar
Date: 12-24-2013, 07:28 AM
Parent: #22
هههههههههههههههههههههه...!!!!
معليش يا محمد و عبد الحفيظ ، بعد اضافة وجه القمر ، الفيرشن بتاع شكر الله ، طلع موجود فيرشن بصوت حسين ابو عرب...!!!
المهم في الموضوع ، وجه القمر يا شباب...!!!
تحية لأستاذنا ابو عرب...!!
كبر
|
Post: #24
Title: Re: المكاجرة
Author: حمد عبد الغفار عمر
Date: 12-24-2013, 07:36 AM
Parent: #23
سلام ود أب سن
Quote: اها ببقا الرك علي الناس البتحمل الفهم الانساني الراقي انها تفرض رؤيتها للامور , تفرض صرامتها الفكرية ولاتحيد ,, ولا تنزل للدرك الاسفل من الكجار
فيا صديقي لولا اؤمن بحركة التاريخ الصاعدة وان وراء الافق نور لما شددت راحلتي في صهد الصيف حافي حالق |
وهذا بالضبط حصل عكسه تماما في المنبر دا حيث ذهب من تعنيهم في انهزامية غير مبررة بدعوى وجود الرجرجة
مهما كانت المكاجرة لكن المكاجر نفسه لا بد أن يأخذ شيئا من صاحب الفكر الرصين ورويدا رويدا سوف يتصدع جدار الجهل وتبرز الفكرة كاملة التوهج
ليتهم يقرأون ما كتبته
|
Post: #25
Title: Re: المكاجرة
Author: عبدالحفيظ ابوسن
Date: 12-24-2013, 10:20 AM
Parent: #24
الاعزاء
من الداخل
والاعزاء
من النفاج
امهلوني
جايكم فردن فردن وفردتن فردتن
وسونبهار كدة
شاكر كتير لأهل النفاج صدق تآزرهم ومحبتهم
وما بولع لي نارا إنتو تقعو فيها
داخرنكم
|
Post: #26
Title: Re: المكاجرة
Author: عبدالحفيظ ابوسن
Date: 12-24-2013, 02:26 PM
Parent: #25
حبابك آمنة مختار
يا خية الكجار والمكاجرة ما حبابن
حوش بكري بتكسو ليك الناس ,, ويتقنطرو ليك شان تشوت ,,, آي صاح يدك بتاكلك وروحك تتشحتف ولو ما نضمت بتطق ,,, وحات خوتك لامن تتلبسني حالة الرد علي الكجار بكجار اظرط منو بعمل خروج
هي عليك الله الدنيا دي شن فيها ,,, آخرها ذكريات في نفوس الناس
رجعت لي بوستات الراحل بهنس النزل روابطها بكري ,, فأحببته ولو كان حيا لصرنا اصحاب اسافير
خالص الود
|
Post: #27
Title: Re: المكاجرة
Author: محمد محمود محمد
Date: 12-24-2013, 10:34 PM
Parent: #26
اخونا كبر ...
شكراً على الهدية...
وياهم الناس (السمّيعة) ..هم ال بيطربوا لخضر بشير ...
لو كنت ب اعرف تنزيل الفيديو ...
كنت ردّيت ليك الهدية ب:
(الناحِل فؤادي و مُولِعْ جوفي حَرْ أضْرَمْ نار وجْدي نسّامْ السَحَرْ)
|
Post: #28
Title: Re: المكاجرة
Author: Sidig Rahama Elnour
Date: 12-24-2013, 11:37 PM
Parent: #3
| Quote: والكجر هو البوليس بلغة ما بعرفا أظنها رندوك |
الكجر هو البوليس باللغة البجاوية (التبداوبت) وهي لغة (ليست رندوك) ، بل لغة حية (خليط) من اللغة المروية القديمة واللغة الأكسومية والجئزية وقيل أنها لغة مكتوبة بالحرف الجئزي .... وأعتقد أن جأت من هذه الصفة (كجر) تصريف أسم الشاعر الكبير (كجراي) ...
وهذا الأسم منتشر في شرق السودان بذات المعنى الذي أشرنا له بأعلاه
و ورد الإستشهاد بهذا الأسم من قبل الشاعر الراحل المقيم (حميد) رحمه الله في قصيدة عم عبدالرحيم
Quote: عربية الكجر ..دورية الكجر
جفلت الحمار..وطوح زي حجر
وعم عبد الرحيم..إتلافا القدر |
شكراُ أخي عبدالحفيظ وحمانا الله وأياكم من (الكجر) والكجار والمكاجرة
|
Post: #29
Title: Re: المكاجرة
Author: عبدالحفيظ ابوسن
Date: 12-27-2013, 03:23 PM
Parent: #28
آسف يا صحاب فقد غبت لمرضي ولا أزال
ساعود
|
Post: #30
Title: Re: المكاجرة
Author: عبدالعزيز عثمان
Date: 12-27-2013, 05:58 PM
Parent: #29
ود اب سن ، كفارة ياحبيب.
نتمني لك سرعة الاياب وتمام العافية,
|
|