يا عزاب الحي

امين بعد ما لبس مستعدا للذهاب الى عمله خرج ينتظر حافلة البنك في الخارج وبالمرة غشى البقالة في الحي اشترى علبة الدخان وجلس في صندوق امام البقالة يدخن.
تحضر طفلة صغيرة في الثامنة من عمرها تدخل البقالة .. حب امين ان يكسر ملل الانتظار بمداعبة الطفلة فقال لها .
- اسمك منو يا حلوة ..
-البنت : هي ماتتكلم معاي انت مش عزابة ..
- ايوا نحن عزابة المشكلة شنو ..
-امي قالت لينا اوعى تتكلموا مع العزابة ولا تسلموا عليهم ولا تقيفوا جمبهم ..هو انتو عندكم شنو بتعادوا ؟؟
- نعادي شنو هو نحن عيانيين ؟ ليه نحن ناس عاديين ..
-انتوا ما ناس عاديين حتى ابوي قال لاخوي خالد يمين اشوفك واقف مع العزابة ديل تتونس معاهم ولا تدخل بيتهم الا اكسر كرعيك ..
بعد قليل تظهر بنت تانية من بعيد ..تنادي اختها ..
- يا بت يا سحر سجمك الليلة كان ما كلمت ليك امي البوقفك مع العزابة شنو ؟؟
وتجري الطفلة مرعوبة ..
امين يحس بالقلق ويستعين بصالح بتاع البقالة الذي لحظه واقف في باب الدكان ويضحك ..
-في شنو يا عم صالح الناس ديل مالهم .
-صالح حقيقة انتو مما سكنتو هنا في البيت دا كل يوم يدور نقاش ومشاكل مع صاحب البيت الاجر ليكم السكن .
-لييه في شنو .
-حقيقة اول مرة الحلة يسكن فيها عزابة وخاصة شيخ جبريل مما سكنتو هنا كلامه كله بعد الصلاة عن العزابه وشرهم خوف ناس الحلة منكم .
-ياخ نحن لينا شهر انتو شفتو مننا حاجة نحن ناس بنصلي وما فينا واحد بيسكر ولا بتاع بنات ..
-الكلام دا قلناه ليهم .. لكن قاله دا تمويه اتمسكن لامن تتمكن
يتبع ..

بعد ان وصلت الحافلة وتجمع شلة الاصدقاء العزاب ابتدر اميت الخديث .
-يا جماعة ملاحظين حاجة انه ناس الحلة دي كاشين مننا ويتعاملوا معانا بطريقة غريبة كاننا يهود ولا بيتنا دا سفارة اسرائيل .
حامد : صحي كلامك قبل يومين جيت ماري بجم عمك الشيخ امام الجامع سلمت عليه عاين لي كدا صر وشه وتمتم ..
خالد : وفي حاجة ثانية ملاحظين مما سكنا هنا لمدة شهر كامل مافي واحد جا سلم علينا من الجيران وقالينا البيت مبروك .
أمين انا لليلة مر بي موقف غريب بنت صغيرة لطيفة سألتها من اسمها قالت لي ما تتكلم معاي انت مش عزاية ؟
عمر يضحك اها حصل شنو .
امين مواصلا : قالت امها قالت ليهم اوعكم تتكلموا او تتونسوا مع العزابة .. وبعد شوية جات اختها نادتها وخوفتها قالت ليها بكلم ليك امي .
انا سألت صالح بتاع الدكان قال لي شيخ الجامع شاني حملة عليكم بعد الصلاة وقال لناس الحلة العزابة اشرار وخطر على الاسر .
خالد : طيب ما في حل نرحل ..
عمر : نرحل شنو هو البيت دا لمينا فيه بالساهل ؟
طارق : ما في حل غير انه نثبت ليهم عكس ظنهم انه نحن ناس كويسيين واولاد اسر زيهم ظروف العمل هي الجابتنا ليهم هنا .