عنايات والنفايات

-يا بت بتتكلمي مع منو دا منو الفي الباب؟
-يا امي دا بتاع النفايات
-قولي ليه ما عندنا نفايات
-يا امي هو ما عايز نفايات
-اها عايز شنو؟
-عايز قروش النفايات
-اذا كان نحن ما عندنا نفايات حا يكون عندنا قروش نفايات ؟
-يا امي قال عايزك يتفاهم معاك .
-سمح جاياه .
-في شنو يا ولدي
-يا حاجة عايز رسوم النفايات ..
-يا ولدي عاين للبيت دا براك ..حوش كبير فيه تلاته غرف في الاركان والحمامات في الركن الرابع .دا شكل بيت فيه نفايات ؟
-يا حاجة معقولة ما بتقشروا بصل ما بتفتحوا اكياس زيت ما بتجيبو اكياس نايلون الحاجات دي قعد تودوها وين ؟ ومال قعد تعملو شنو
-انت مالك قعد نلعب ليدو ... نحفر حفرة في بطن الحوش وندفنها .
-طيب الارض دي ما حقت الدولة والنفايات دي ما بتحلل وتؤثر في البيئة ..
-طيب لامن تتحلل ما بتتحول لبترول ؟
-جائز ايوا صاح ممكن تتحول لبترول
-طيب نحن عايزين نصيبنا في البترول دا .. الدولة باعته كله ما ادتنا حاجة ..
-يا حاجة خلينا في موضوع النفايات ما تغيري الموضوع وتدخلينا في متاهات
-انت القلت النفايات تتحول لبترول .. وعايز تدفعنا تمنها مرتين ..
-يا امي قولي تلاته مرات .. لامن نشتريها ولامن نكنسها ولامن تتحول لبترول ..
-اقوليكم حاجة خلاص انا عفيتكم من النفايات خلونا نتخارج ..
-لا لا تمشي وين نحن عايزين حقنا في البترول .؟
- يا حاجة هوي السلام عليكم ..
-دقيقه اهو داك ابو العيال جا بعجلته يجي يتفاهم معاك ..
-ما انا خلاص فهمت ؟
-السلام عليكم مين دا يا عنايات ويا حاجة مالكم واقفين في الشارع ..
-وعليكم السلام يا عم انا بتاع النفايات .
-وعايز شنو يا بتاع النفايات؟

Quote: وعليكم السلام يا عم انا بتاع النفايات . -وعايز شنو يا بتاع النفايات؟

عيييييييييييييييييييييييييييك والله جنس عكلتة
كبسور فاميلي

واصل يا لذيذ

Quote: عيييييييييييييييييييييييييييك والله جنس عكلتة كبسور فاميلي واصل يا لذيذ

سلام يا ابو علوة

كن بخير

-يا عم انا عايز نفايات.
-طيب ما تدوه نفايات المشكلة وين ؟ بس انت افندي ونضيف كدا شكلك ما بتاع نفايات.
-لا لا لا يا عم انا قصدي عايز قروش النفايات .
- وقروش النفايات دي مقابل شنو ؟
- كيف يا عم نحن شركة النفايات القومية بنقوم بتصحيح البيئة حتى يكون الوطن سليم معافى وخالي من الامراض المستوطنة والاوبئة .
- دقيقه دقيقه ما تقعد تخمنا بكلام كبار كبار .. وين هي الشركة القومية لتصحيح البيئة دي انا ما شفت منها زول غيرك
-يا عم الشركة القومية لتصحيح البيئة دي صاحبة مجهود وافر في نظافة الشوارع وخلق مناظر خلابة ترتاح لها النفوس.
-هوي ها انت قاعد تقرا من كتاب ولا شنو .. شنو مناظر خلابة كدي عاين وراك .
- تفتكر منظر الغنم والكلاب في الكوشة دي من المناظر الخلابة .
-يا عم انا موظف بقوم بواجبي ..
-في ذمتك انت مقتنع أنك موظف بتقوم بواجبك ؟؟ وبتكسب رزقك بالحلال ؟
-يا جماعة في شنو نتو مالكم السلطكم علي شنو ؟؟
-أنت السلطك علينا منو ؟
-يا اخوان انا موظف تحصيل في شركة النفايات مهمتي اجمع الرسوم وبس ؟؟
-طيب لامن تجمع رسوم ما تتأكد في الاول انه الرسوم دي مقابل خدمة تقدم ؟
-ما في خدمة مقدمة ..
-شوف هنا يابني الشركة البتقول عليها دي ما في زول منها دق الباب دا غيرك ..وانت دقيت عشان تتحصل قروش مقابل شنو ما حد عارف .
- يا عم ما قلنا مقابل النفايات ..
-تاني حا نعيدو .؟
-

قدمت في مهرجان ناشئة امدرمان امس
فى مكب النفايات







______

لؤى حامد تاليف
هجو خليل مخرج

Quote: قدمت في مهرجان ناشئة امدرمان امس فى مكب النفايات ______ لؤى حامد تاليف هجو خليل مخرج

توارد خواطر فطري يشجع النشئ في مس عصب الحياة

- خلاص يا حاجة ادخلي جوة .. يلا يا بت يا عنايات ادخلي جوة مع أمك.
-يا عم نفهم من كدا ما عايزين تدفعوا لينا حق النفايات ؟
-يا بني انتو ما تسموا الامور بمسمياتها .
-تقصد شنو يا عم ؟
-يعني انتو لو عايزين تجمعوا جبايات ما تسموها لينا نفايات .
-كيف يعني جبايات .
-جبايات دي كان بيجمعوها المستعمرين والاتراك من اهلنا زمان ..
-مقابل شنو ؟
-ما عندها اي مقابل بس مقابل انهم سمحوا ليك تعيش في الدنبا دي .
-لكن نحن قعد نجمعها بمقابل .
-مقابل شنو ؟
-مقابل النفايات ..
-اللهم طولك يا روح ..ياخ اقول لك شئ امشي انت وتعال مع العربية الكبيرة بتاعة جمع النفايات وشيلوها وانا بدفع ..
-يا عمنا العربية اكيد بتجي بس لكن حيكم دا لسع ما جاه الدور .
-طيب نحن ندفع ليه ما دام ما جانا الدور ..
-ما تدفعوا مقابل جمع النفايات ..
-يا بني انت مبرمج على كدا ولا شنو.
-اسمع يا عم .. اسم الكريم لو سمحت ..
-عمك عثمان ..
-طيب يا عم عثمان ..هسع انا مدني خارطة وحي ورقم البيوت ..كل البيوت الحولكم دي دفعت انا اكتب شنو مقابل بيتكم ..
-ياخ اكتب عم عثمان قال لكم ما عندهم نفايات ..
-لكن كدا راح يقطعوا منكم الموية .
-والموية دخلها شنو بالنفايات ..
-كدا الامور مربوطة ببعض ما تدفع حق النفايات نقطع منكم المويات .
-طيب انتو ما كان تزيدوا قيمة النفايات دي لفاتورة الموية ..على الاقل الواحد يحس بانه بيدفع مقابل شئ .
-ما زدناها لفاتورة الموية قبل كدا ..
-طيب ليه جايين تطالبوا بيها تاني ..
-ناس الموية سلبطوا فيها وقالوا مادام المواطن قبل يدفعها مقابل الموية ورضى يبقى كلها تبع ناس الموية وناس النفايات ما عندهم معانا شئ ..
-يعني نحن اصلا دافعين حق النفايات مع الموية وانتوا عايزننا ندفعوا تاني ..
-ايو بالظبط يا عم ما ديك كلها بقت حقة الموية.. بالمناسبة دي انا عطشت ما تجيب ليبنا موية ..
-يا بت يا عنايات املي جك الموية لبتاع النفايات .. وانت يا بني وقفت كتير في الشمس ما تدخل تتفضل جوة تبرد.
-فيك الخير يا عم

-اها يا بني كدي قول لو ما دفعنا حق النفايات حا يحصل شنو ؟
-حا نقطع منكم الموية ..
-الا ما انت قلت ناس الموية علاقتهم انقطعت مع ناس النفايات ..
-ناس النفايات تخلوا عن المبلغ الاول الاتسلبطوا فيه ناس الموية .. لكن لازال ناس النفايات مستقلين القوة بتاعة ناس الموية .
-طيب نحن هسع زي ما انت قلت ما قعد ندفع حق الموية مضافا ليه حق النفايات ..
-يا عم ما قلت ليك دا كان زمان هسع حق الموية وحق النفايات بقوا واحد وكله تبع الموية ..
-يعني نحن المواطنين الغلابة ديل تبيعوا فينا وتشتروا ونحن ما جايبين خبر ..
-كيف يا عم عثمان نبيع فيكم .؟
-يعني كنا بندفع فاتورة الموية مضاف ليها النفايات..ونحن المواطنين الغلابة ديل ما عارفين اننا كنا بندفع النفايات والان .. عايزننا نتخلى عن المبلغ الدفعناه لناس الموية وتاني ندفع نفايات ؟؟
والكلام دا كله ما كان في زول جايب له خبر كان ما قلته لينا هسع ..
-الا يا عمنا انت عاوز تورطني ولا شنو ؟
-يا ولدي اورطك في شنو .... الشاي يا حاجة .. يا بت يا عنايات وين الموية ..
-يا عم انا كنت بشرح ليك بعفوية كدا ما قايلك تمسك في الكلام وتقول لي المواطن الغلبان والكلام الكبار بتاع الشويعيين داك ..
-يا ولدي هسع الشيوعيين الجابهم شنو ؟ انت العايز تورطنا الظاهر عليك وعاوز تحول مطالبنا لحقنا بثورات وحركات ..
-يا عم انا موظف غلبان مهمتي اجمع قروش واصرف راتب آخر الشهر احوم طول النهار في الشمس الحارة دي ..
-يا ولدي ما تقعد تتمسكن لي انت ما مجبور تشتغل شغل انت ما مقتنع بيه ..
-يا عم مين القال انا ما مقتنع بشغلي ..
-شغلك ياتو يا ولدي ياهو جمع القروش مقابل النفايات ؟
-ايوا يا عم ..
-طيب انت مقتنع انه شركتك البتتكلم عنها دي قعد تؤدي عمل تستحق عليه قروش ؟

- والله يا عم عثمان انا لو فكرت في الموضوع زي تفكيرك دا ما كنت اشتغلت في الشركة دي ..
-يعني انت لافي تشيل من الناس المساكين دي في قروش مقابل خدمه وهمية وما شاعر بانك قعد تعمل في شنو ؟؟
-يا عم انا لقيت اعلان في الجرايد شركة عايزة موظفين تحصيل قدمت اشتغلت معاهم قالوا لي وظيفتك انك تلف على البيوت وتحصل قروش النفايات ونديك راتب محترم ..
-كيف يكون الراتب محترم من عمل غير محترم ..
-يعني شنو عمل غير محترم يا عم عثمان كمان ..؟
-لامن تشيل قروش من الناس بدون ما تقدم ليهم خدمة وتهددهم انك حا تقطع منهم خدمة تانية هم دافعين ثمنها تفتكر دا عمل محترم تستحق عليه راتب محترم زي ما قلت ؟
المحصل بعد تنهيده طويلة
- طيب يا عم عثمان انا هسع اعمل شنو ؟
-تعمل شنو في شنو يعني ؟
- أقدم استقالتي من العمل ؟
-يابني دي حاجات تتبني على قناعاتك انت الشخصية
- يا عم والله انا قناعتي ابت الشغل دا عديل وكرهتوا
-طيب يا بني حا تعمل شنو عندك بديل ؟
-باب الرزق واسع يا عم .. انت ما في طريقة تلاقي لي شغل ..؟
-على قولك يابني باب الرزق واسع كدي انت اعمل الخطوة الاولى دي وربنا حا يبارك لك في التانية ..

Quote: Quote: قدمت في مهرجان ناشئة امدرمان امس فى مكب النفايات ______ لؤى حامد تاليف هجو خليل مخرج توارد خواطر فطري يشجع النشئ في مس عصب الحياة

غايتو يا درديري بالك طويل خلاص!

Quote: غايتو يا درديري بالك طويل خلاص!

طويل القصيرة دي ؟

وبعد شهر ذات جمعة يطرق الباب من جديد ..
-قومي يا بت شوفي منو الفي الباب ..
-يا امي دا بتاع النفايات ..
-تاني بتاع النفايات دا هو ما نسانا ؟
-قال عايز ابوي ..
-خليه اليتفضل في الصالون عند ابوكي .


- السلام عليكم يا عم عثمان ..
-الا يا بني اوعى تقول لي عاوز رسوم النفايات تاني ؟
-الحمد لله يا عم ربنا تاب علينا من الشغلة دي .
-الحمد لله اها اشتغلت وين .؟
-انا الحمد لله لقيت لي وظيفة كويسة تتناسب مع دراستي .
-وانت دراستك شنو اصلا ؟
-انا درست نظم المكتبات ..
-واشتغلت وين هسع .
-الحمد لله اشتغلت في مكتبة الجامعة .
-يا سلام يابني ..اهو انت الآن في احسن شغله ممكن يشتغلها ابن آدم ..
- نشكرك يا عم لانك وعيتني
-وهسع انا عايزاك في موضوع تاني ..
-خير يا ابني ..
-انا عاوز اطلب يد بنتك عنايات ..
-شنو انت فكيت النفايات ومسكت في عنايات ؟؟ ها ها ها .
-يا عمنا والله انا اعجبت بوعيكم رغم بساطتكم ..
والبت عنايات تعرفها من وين قابلتك في الجامعة ولا في الطريق .؟
-ابدا يا عم انا بس من زيارتي الاولى حسيت بارتباط غريب بيكم كلكم .
-يعني انت شايف المناسبة مناسبة ؟؟
-كيف يعني ياعم ..
-يعني يقولوا ليك البنت دي عرفتها كيف تقول جابتني ليهم النفايات ؟؟
-يا عم دي شكليات انا ما بتهمني كتير ؟؟
- ولا انا بتهمني كتير لكن تعرف انه البنات بيتحسسوا من الحاجات دي.
- المهم يا عم انت شاورها لو قالت خير خير ..
-خلاص يا ابني نرد ليك مرنا بعد يومين تلاته .
-طيب السلام عليكم
-ما شربت حاجة ..
-لا شكرا يا عم انشاء الله نشرب شربات الفرح مرة واحدة .
-

-أجي يا راجل بتاع النفايات ما لو مشى ما شرب الموية
-بتاع ا لنفايات بقى ما بتاع نفايات وجايي لحاجة تانية خالص .
-حاجة شنو كمان .
-بتاع النفايات قال عاوز عنايات .
-و عاوزها لشنو كمان ؟
-حيكون عاوزها لشنو يعني ما عاوز يخطبها .
-انا ادي بتي لبتاع نفايات ؟
-ما قلنا ليك هو خلى النفايات .
-وبقى بتاع شنو هسع .
-قال شغال في المكتبات .يعني من المكبات للمكتبات ..
-بسوي شنو في المكتبات .. يلقط الورق ؟
-لا يا حاجة الولد طلع دارس نظم مكتبات واشتغل في مكتبة الجامعة ..
-ودا بيآخد كم هسع .
-قال هناك بياخد نص راتبه بتاع النفايات لكن هناك ضميره مرتاح .
-طيب ما اخير له النفايات ..
-يا وليه خلاص عشان عرفتي عايز بتك عاوزه ترجعيه محل القروش ؟
-وهسع بتي انا وافقت ليه بيها ..؟
-كدي شاوري البت يمكن توافق .
-تعالي يا عنايات .
-ايوا يا امي
-قالوا بتاع النفايات دا طلب ايدك .
-شنو ؟
-

- انا اعرس بتاع نفايات ..؟
-يا بت ما خلاص قالوا خلاها ..
-يعني خلاها بقى بتاع شنو ؟
-بقى بتاع مكتبات ..
-ينضف مكتبات .؟
-يا بت ينضف مكتبات شنو الولد طلع معاه شهادة جامعية ومتخصص مكتبات ..
-طيب اشتغل شنو .
-اشتغل في مكتبة الجامعة ..
-في شهر واحد قرر يعرس؟ اصلوا اشتغل في مكتبة الكونقرس .
- لا اشتغل في مكتبة بنك السودان .
- طيب ما السؤال حا يقولوا عرفتي وين .. بعدين الحلة كلها عارفاه بتاع نفايات ..
-يا بت دا ولد اصله نضيف اتاثر بكلامنا قدم استقالته وغير مهنته .. مفروض نحن نتبناه وندعمه مش نتبرا منه ..
-لكن يا ابوي دا عايز ليه كم سنة عشان يكون نفسه ..
-يا بت نحن ما قلنا ليك عرسيه هسع ادرسوا بعض بعدين يحلها الحلال .
-يا بتي والله كلام ابوك دا صحي الولد اصله طيب شوفيه اتاثر بكلام ابوك وخلى النفايات ..
-عنايات خطبها بتاع النفايات .. والله دا فلم هندي ,
-ما خلاص شيلي حكاية النفايات دي من دماغك
-اشيلها كيف يا امي وانا كان شلتها ناس الحلة حا يشيلوها كيف ؟

جميلة جدا الاخ الدرديرى ..
بالامس كنت حضورا فى مهرجان الناشئة لمحلية امدرمان وقدمت فيها معالجة جميلة جدا فى نفس الموضوع
تم تجسيد الشخوص فى ( قشرة موز / كيس نايلون / ###### / ....)
وجاءت المعالجة فيها شبيهة بمعالجتك للقضية
وتم اختيار المسرحية لتقدم فى مهرجان الناشئة بولاية الخرطوم نهاية الشهر 30- 4

لدينا فرقة مسرحية فى مركز شباب الربيع ( امكانية تقديم هذا النص ) شنو
وكيفية التواصل بينك وبينهم ( تلفون / بريد / ...)
الشخص المقصود بالتواصل معه الاخ عمر الشايقي رئيس الفرقة


شكرا

Quote: جميلة جدا الاخ الدرديرى .. بالامس كنت حضورا فى مهرجان الناشئة لمحلية امدرمان وقدمت فيها معالجة جميلة جدا فى نفس الموضوع تم تجسيد الشخوص فى ( قشرة موز / كيس نايلون / ###### / ....) وجاءت المعالجة فيها شبيهة بمعالجتك للقضية وتم اختيار المسرحية لتقدم فى مهرجان الناشئة بولاية الخرطوم نهاية الشهر 30- 4 لدينا فرقة مسرحية فى مركز شباب الربيع ( امكانية تقديم هذا النص ) شنو وكيفية التواصل بينك وبينهم ( تلفون / بريد / ...) الشخص المقصود بالتواصل معه الاخ عمر الشايقي رئيس الفرقة شكرا

مشكور يا استاذ بدر الدين ..

حفيفة انا ما شاهدت العمل الانت ذكرته في الاول ولا حتى سمعت به لذلك قلت توراد خواطر وطبيعي يحدث عندما تتوحد الهموم


على كل حال ايميلي وتلفوني موجودات على البروفايل .. وتحت الخدمة ..

مع خالص التقدير

عم عثمان : يا بت من الآخر كد ود الناس دا نقول ليه شنو .. عنايات ما وافقت .
سكتت عنايات وبدأت تحسب في دماغها وقالت في نفسها : هو الولد ما فيه عيب كويس وقيافة وبدأت تتذكر لنظراتها لها كانت نظرات اعجاب مخلوطة بالنفايات

اختلطت بصراعهم معه في رسوم النفايات .. يابت ما تطيري العريس من يدك .. هو الزمن دا في عرسان زاتو .. هو في تين ..

-سرحتي وين يا بت ما تتكلمى ؟ بتاع النفايات دا عايزاه ولا نقول له أتخارج ..

-يا ابوي انتو مش قلتو بقى بتاع مكتبات ؟

-ايوا ما قلنا ليك نحن بقينا له سبب عشان يغير مهنته الظالمة ديك .. عشان الروح دي انا معجب بيه .

-خلاص يا ابوي ادوني فرصة افكر .. بس انتو ما قلتوا لي هو اسمه منو واهله من وين؟

-والله صحي يا حاجة اسمه انا ذاتي ما سالته من أسمه ..المهم يا بت نحن عايزين موافقه مبدئية كدا بعدين بنسأله من الحاجات الباقية دي .

- خلاص ادوني يوم يومين أفكر استخير واحسبها صاح .

-يا بت انتي عندك واحد تاني في راسك دا .؟

-يا امي واحد من وين كمان انتي ما بتعرفيني ؟

-بنات الزمن دا هو في زول بيعرفن بيعملن في شنو ؟

-بس حكاية النفايت دي ؟

-تاني يا بت ما قلنا ليك خلاها ..

- لكن الشهره يعملوا ليها شنو .

-يا بت شهرة شنو هو كان شغالات نفايات في المنتخب القومي ؟

- خلاص يومين أفكر .

- فكري خلاص .