مضادات حيوية

مضادات حيوية


01-27-2013, 11:57 AM


  » http://sudaneseonline.com/cgi-bin/sdb/2bb.cgi?seq=msg&board=420&msg=1359284274&rn=0


Post: #1
Title: مضادات حيوية
Author: درديري كباشي
Date: 01-27-2013, 11:57 AM

الجزارة :

ياعم صالح يا عم صالح .. ادينا ربع كيلو

-شنو يا صالح يا اخوي ركبنا ديل ما ساحن

-ايوا ياحاجة عايزة شنو

- ماقلت ليك نص كيلوا ضان ..

- خير مالكم يا حاجة سكينة نعلوا ما في زول عيان نص كيلو كامل ..

-لا الحمد لله ياكلتوم بتي بس دا ولدي خالد قال عازملو واحد غدا اها قلنا نشد لينا حلتين بدل واحدة .

- لا الحمد لله وممكن نحن نبدل معاكم صحن عشان تكون صينيتكم فيها ثلاثة صحانة بدل اثنين .

-ما بتقصري يا بتي ..

- عم صالح يا خي ما تمشينا ....

- صالح يا اخوي عايزة لي ربع كيلو لحم بدون عضم ..

- وبدون عضم لييه ومال العضام دي حا يشتريها منو ..

-ياخوي بدور افرمها الراجل قال نفسه في محشي من عرس فاطنة اختوا ما ضاقلو محشي قبل ستة شهور ..

- وياختي راجلك بيتشهى مالوا بطنو دي ما يسكتها باي شئ زيو وزي رجالنا ..

- والله يا التومة ياختي حنني ليه زمن اكله كعب والملاريا هدت حيلو ..

- صالح يا اخوي عايز لي ربع كيلو كبدة ..

- يا اخوي الكبدة ما تتباع بالكيلو الكبدة يا تشتريها كلها بمائتين ولا تخليها ..

- ياخي ما تباصر لينا منها ربع ولا قطعة المرة قالوا عندها فقر دم ولازم تاكل كبدة ..

- مالا محاسن يا طاهر اخوي سلامتها ..

- تقولي شنو يا اختي كلتوم منها وليها بقت تجيها دوخة والدكتور قال عندها فقر دم ..

- صالح صالح ..

-ايوا يا عثمان ..

- عايز لي كيلو عضام تدينا ليه بكم ..

-والعضام بتدوربها شنو عندك كلاب ..؟؟

-كلاب شنوا نشاء الله خير الولد اتكسر في الكورة وقالوا الا شوربة العضام حاتخليهو يبرى بسرعة ..

- احسن تخلطها ليه مرة واحدة ..

- ها ها ها والله ياطاهر بقينا ما قادرين نضحك كمان من شدة التعب ..

المضاد :

في نفس المكان

-السلام عليكم .. يسبقها عطر فواح لفت نظر الجميع قبل السلام .

-اهلا اهلا بالناس الحلوة كيفك يا باشمهندس حسام ..

-صالح عايزك تدبر لي نص ومعاه واحد كبده انا اصل عفراء وارجع لك ...وينسحب

اصوات كثيرة ينغمة واحدة l نص كيلو ؟؟؟؟؟؟؟؟؟؟؟؟؟؟؟؟؟؟؟)

-نص كيلو شنو الراجل بيقول نص خروف ..

-نص خروف طيب ما كملت ..

- اصلها كملت ومال انتو عايزني اقعد احرسكم كدا تنتشو فيها ربع ربع وبالدين كمان .. يلا خارجونا خلاص شطبنا ما عندنا لحمة خلاص كملت ..

- كملت شنو يا صالح الربع حقي وينو ..

-والراجل القال نفسه في محشي..

-وحتة الكبدا يا صالح المرة عندها فقر دم ..

- و يا اخوي انت ما لقيت غير كبدتي دي ترجع بيها دمها يلا ياجماعة هوونا خلونا نقفل الدكان ما عندنا لحمة ..

- والمعلقة دي شنو ؟؟

- ما خلاص بعناها يلا يا جماعة يا ولد اطلع برة ..

-نحن عندنا كاش يا صالح ما عايزين بالدين ..

- ولا دين ولا كاش ..

وخرج الجميع تخنقهم العبرات على كل حال افضل مما يخنقهم عظم ..

Post: #2
Title: Re: مضادات حيوية
Author: درديري كباشي
Date: 01-27-2013, 12:03 PM
Parent: #1

البوتيــــــــــــــــــــــك


(1)


لو سمحت يا اونكل ممكن تورينا البلوزة دي ...

ياتا فيهن ..

اللونة فوشي على بيشي دي ايوا الله يخليك يا عمو ..

- يا سلاااام لكن زوقيك ما تقولي لي يا سحر بالله دي لقطيها كيف ؟؟

- انت ما عارفة زوقي كمان يا ريري ..

- يا عمو سعرها كم دي ؟؟

- دي حقها مائتين وخمسين بس ..

- ياي تستاهل لكن مافي منها الوان تانية ..؟؟

- في منها لون موف على سكري ..

- ممكن اشوفها ....

- جدا ....

- ياي ماتقول لي لكن ياعمو زوقك فات زوقي عديل وادينا ليها وهاك ديل تلتماية .... تخيليها يا ريري حتكون كيف مع بتطلون الجينز ..

- انتظري الباقي ؟؟

- خليه عشانك وعشان زوقك الراقي دا ..

- متشكرين ويبقى تعالوا زورونا كل مرة عندنا شحنة جاية جديدة من ابو ظبي يوم السبت الجايي



المضاد :

يالالخو اللخو ؟؟

- ايوا يا اخت .

- تعال ورنا البلوزة دي ..

- ياتها فيهن ..

- ما يها الصفرا على ليموني دي ؟؟... أي ياها زاتها ..

- اها دي حقها كم يالخو ..

- دي حقها مائتين وخمسين ..

- الكترابة مائتين وخمسين في حتة الدلقون دي .. ياجنى دي ما فيها ربع متر قولك كلام غير ..

- اقول شنو انتو عاوزنها بكم يعني ..

- شوف هنا عندنا خمسين جنيه بس ..

- خمسين جنيه ؟؟ حرام عليك انا اقول ليك مائتين وخمسين تقول خمسين ..

- تحرم عيشتك .. دا بيع وشرا يفتح الله ويستر الله الجاب الحرام شنو في البيع ؟؟

- تعرفي الاخت الطلعت قدامكم من شوية قلت ليها مائتين وخمسين دفعت تلاتمائة يعني بالزيادة ..

- ونحن مالنا ومالهن وانت عارف قروشن جا يباتنها كيف ؟؟

- خلاص خلاص ما عايزين كلام في الناس هاتي الخمسين بتاعتك خارجينا بس ..

- تعرفي ياسعاد ياختي الجنا دا باقي لي غاشنا في الخمسين جنيه دي الشي دي ما بتفوت التلاتين بس ندفع له لكن بنتسداهن فيه مرة تانية اسرعاك الباص لا يفوتنا .

Post: #3
Title: Re: مضادات حيوية
Author: هشام كمال عبادي
Date: 01-27-2013, 12:29 PM
Parent: #2

بوست فيه اكتر من رسالة ..
شكرا ليك درديري ..
وفي انتظار المزيد ..

Post: #4
Title: Re: مضادات حيوية
Author: درديري كباشي
Date: 01-27-2013, 12:32 PM
Parent: #3

مشكور يا ابو كمال


القصة طويلة

وما اظن تنتهي قريب

Post: #5
Title: Re: مضادات حيوية
Author: درديري كباشي
Date: 01-27-2013, 12:34 PM
Parent: #4

الفكهانــــــــــــــــــــــــــــــــــــــــــــــي

(3)

تقف سيارة فخمة مظللة امام محل بيع الفواكه الراقي وينزل الزجاج الخلفي لتظهر منه سيدة وتجلس قربها اخرى ويهرع الفكهاني لخدمتهن .

- لو سمحت ممكن تعمل لي أتثنين كيلو عنب لبناني وثلاثة كيلو تفاح ايراني .. وعندك تفاح امريكي سكري؟

- ايوا عندنا امريكي سكري وعندنا صيني اخضر سكري برضو.

- خلاص اعمل لي من كل نوع كيلو..

- ماتنسي يا سارة الكوميثرا والخوخ والمشمش والبرقوق ..

- ولو سمحت الحاجات دي عندك ..

- طبعا عندنا وكمان عندنا كاكا برازيلية وباباي من جنوب افريقا وكرز يوناني ..

- والله لكن شهيتنا الفواكه تعرفي يا سوسن دي حاتكون سلطة فواحة ما حصلت قبل كدا ماعندك كيوي ؟؟

- كيف عندي كيو من كولمبيا وفي نوع ارجنتيني ..

- اعمل لينا منهم ..

- ما عاوزين الفاكهة التقليدية ..؟؟

- زي شنو يعني ..؟

- يعني ناس موز وبرتقال وجوافة وقريب فروت وبطيخ وشمام .

- لا لا لا سيبك من الحاجات دي لكن الجوافة نكهتها ما بطالة اعمل لي منها اثنين كيلو ..

وبعد نصف ساعة تعبا كراتين وتفتح شنطة السيارة وتوضع بها ويستلم الفكهاني المبلغ كاملا بدون أي مساومة وطلب خصم بل بعد ما وضع عدة طواقي على الاسعار وطلع بالواحد ولم ينزل به وهو يحسب ..



المضاد :



في نفس المكان توجد حاجتان تنتظران الفكهاني يخلص وهن يسمعن وينظرن باندهاش ..

-هوي يا جنة هوي انت مالك ما شغال بينا ؟؟

- ما شايفني مشغول مع الزبائن ؟؟

- نان الزبائن ديل نحن ما جينا قبلهم .؟؟.

- لا لا لا ابدا هم ديل جو حجزوا في الاول ومشو وجو راجعين ..( محاولا تبرير الاهمال)

- حجزوا شنو هو انت عندك فرن ولا سينما .؟؟

- خلاص يالتومة خلينا نشتري موزنا وشمامنا ونتخارج الشمس بتحر علينا ..

- اصبري يا سعاد خلينا نتفرج شوية في الحاجات دي ..

- ياجنى الشي دا شنو العامل زي الدوم وعندو شعر دا ..

- دا اسمه الكيو ..

- شنو قلت اسمه شنو .

-قتلك اسمه الكيو فاكهة من امريكا الجنوبية ..

- نان قاطعالها المشوار دا كله من امريكا الجنوبية ما لاقيالا زول ياكلها غير في السودان ؟؟

- تقولي شنو ياحاجة قسمتها كدا ..

- هسع شوفي جنس الحريم الفاتن ديل لاقالن دايرين بطيخ ولا شمام ولا موز اشترن الحاجات المدردمة وملونة دي ودفعن حقهن وعارفاتنها بالاسم .. هسع الشي احمر وكبدي ويشبه البلي دا جنسه شنو .؟؟.

- باقي لي يكون عنب يا التومة .

- اجي ونحن العنب كمان ما بنعرفه ياهو دا العنب لكن الشي الكبدي دا ماهو عنب .

- دا اسمه كرز ..

- بالله هو ياهو الكرز كدا هو الكرز بيزرعوه ..؟؟

- ومال انت كنتي قايلاه شنو ..

-طول عمري كنت فاكراه يصنعوه زي الحلاوة لانه بشوفو معلب زمان كان اهلنا يجيبوه في المناسبات .

- والشي الاصفر ويشبه الطماطم داجنسو شنو ..؟؟

-اوففف يعني كمان حا افتح مدرسة تعليم الفواكه ..

- نان منو الجاي يقرا ليك في مدرستك دي .. الناس الاغنيا ما محتاجين يتعلموا منك لانهم عارفنها ويمكن هم ضايقنها وانت تلاقيك تبيع فيها وما عارف طعهما شنو .ونحن ما لازمانا فايدة التعليم شنو ما دام ما قادرين نشتريها ونضوقها .. اها خليك في دكانك دا نحن نشتري الموز والشمام والناس العندهم قروش يشترو منك الحاجات دي لكن لسع ما قلت لي الطاطم الصفرا دي شنو ؟

- دي اسمها كاكا ..

- يا راجل عيب عليك نحن قدر امك انت زهجت مننا ولا شنو ؟؟

- لي ياحاجة في شنو ؟؟

- تقول لينا اسمها كاكا ..

- واقسم بالله ياهو اسمها وفاكهة برازيلية كمان .

- صحي يا التومة عايني ليها تشبه لاعب البرازيل الاسمه كاكا سمحة وصفرا زيه .

- عيب يا سعاد فضحتينا قدام الولد .. اها والشي اليشبه الجوافة دا جنسه شنو ..

- دي اسمها كومثرى ..

- بالله هي ياها الكومثرى ..

- وانتي تعرفيها من وين يادي ..

- كيفن شفتها في المسلسلات المصرية بس بيكون معاها حاجات كثيرة ما عارفة ياتا فيهن الكومثرى .

واخيرن يشترن الحاجات الفاكهة التقليدية ويعتقوا الفكهاني ليلحقوا بص المواصلات

Post: #6
Title: Re: مضادات حيوية
Author: درديري كباشي
Date: 01-27-2013, 01:05 PM
Parent: #5

4

في الطريق الى المدرســــــــــــــــة


يا ولد يا سموري قوم خلاص السواق منتظرك مواعد المدرسة جات ..

- يا ماما انا لسع نعسان خليني انوم شوية ..

-يا ولد قوم عشان يكون في وقت تفطر او تاكل ليك لقمة مع شاي الصباح انشاء الله حتة تورطة او قطعة جاتوه ما تمشي جعان زي كل يوم .

- اااااااخ يا ماما اها صحيت صباح الخير ..

-صباح الخير يا حبيبي يلا على الحمام أتشطف وأتسوك على بال انا ما احضر ليك الملابس ..

-يا روزا حضري فطور سموري بليييييييييز

- هادر مدام ..

- خلاص طلعت يا حبيبي يلا في غرفتك تلاقي ملابسك جاهزة وانزل تحت افطر في المطبخ قبل ما تطلع

-ياماما انا ما عندي نفس للاكل ..

-يا ولدي حتة كيكة مع الشاي ما بتعمل ليك حاجة يلا يا حبيبي عشان خاطري انا كله بسبب السهر في البلي استيشن والنت عشان كدا ماعنك نفس للاكل..

- يا ماما انت جنك تاكلي الناس بالغصب خلاص بس حتة الجاتوه دي مع العصير كفاية .. والحليب يا حبيبي عشان صحتك عشان انا ما ازعل منك ..

-يلا باي يا ماما .

-باي يا حبيبي .



مضاد :

-ياولد هارون .. قوم تقوم قيامتك ..

-شنو يا يمه ياخي ما تخلينا ننوم شوية .

-تنوم شنو قوم وصل معاي عدة الشاي دي قبل ما تمشي المدرسة ..

- يمة البنطلون بتاعي مقدود خيطيه ولا لسع .

-اخيطو شنو هو انا فاضية ليك انا من صلاة الصبح اسوي في الزلابية .

- طيب يمه ما في حاجة تانية نمشي بيها المدرسة .

-لييه بنطلونك الاسود وينو .

-يمة البنطلون الاسود ما الاستاذ قال لي تاني ما تجي بيه .وبعدين هو زاتو سستته محلوجة ..

- امسكو بدبوس مشبك والبسه زي ما كنت تعمل .

- يمه طيب ما عندك حاجة نعضيها انا جعان ياخ ..

- امشي شيل باقي الكسرة بتاعة الغدا وكب فيها شاي لبن واكل ..

- يمه ياخي ما تبطلي الجلادة وتدينا حبة زلابية ..

-تاكل السم الزلابية دي ما انا بربيكم بها عايزين تاكلوها هي زاتها ..

- يمه ادينا خمسة حبات بس وربينا بالباقي ..

- يا ولد امشي انكشح من قدامي وهو انا من ابوك طفش خلاكم لي انا شغالة ام وابو .. يلا اكل سريع خلينا نحصل السوق وانت كمان تحصل مدرستك .

Post: #7
Title: Re: مضادات حيوية
Author: درديري كباشي
Date: 01-27-2013, 06:38 PM
Parent: #6

في المواصلات

بابا انا زهجت من الاتوس دي فاضحاني في الجامعة وصاحباتي كلهن سايقات كوريلات وسوني وانت قلت لي لامن تصلي ثانية بنغيرها ليك ... يا بت ما لسع ثانية ما خلصتيها وبعدين انا اوعدك تالته ما تمشيها لو ما استلمتي مفتاح كامري موديل السنة .. بس السنة دي عدي بيها ..
ربنا يخليك لينا يا احلى بابا ما تشوف انا بخجل منها كيف لامن اوقفها في الباركنق بحس كاني ماشة الجامعة بشبشب الحمام ..


مضاد :


ابوي ابوي .. شنو يا بت .. عاوزة حق المواصلات ماشة الجامعة ... وحق المواصلات ليييه .. ما عندكم حافلة مؤجرة بالشهر بتوديكم .. يا ابوي قال الليلة عندهم عرس اخوه ومن امس اعتذر قال ما بيقدر ... عرس اخوه ونحن مالنا ومال اخو .. المهم هاكي دي خمسين جنيه وزكريني اخصمها منو آخر الشهر .. النصاب دا .. قال عرس اخوه قال .. والله ياهو الفضل .

Post: #8
Title: Re: مضادات حيوية
Author: درديري كباشي
Date: 01-27-2013, 06:43 PM
Parent: #7

العيادة



- يا دكتور انا شاعرة بارتفاع في الادرينالين ما طبيعي عامل لي توتر بلا سبب وعصبية في البيت مع زوجي والاطفال .. وبعدين ينتابني شعور بالغثيان بعد كل وجبة كانه عندي خلل في انزيمات المعدة بيسبب لي عثر هضم مزمن ..

تتناولي مشروبات غازية كثير ..؟؟؟؟

طبعا انا ما بتناول أي وجبة او لقمة من غير ما اتبعها ببسي او سفن اب ..

تعرفي هو دا السبب الرئيسي .. عملتي تحليل لانزيمات الكبد قريب ؟؟ ..آخر مرة عملته قبل شهر في لندن وكانت الكبد طبيعية جدا ..

خلاص اول العلاج لازم توقفي المشروبات الغازي لانها هي بتعمل انتفاخ في المعده وهي بتسبب التوتر وارتفاع الادرنالين زي ما تفضلتي .. وعندك العلاجات حبة كل صباح وانشاء الله حتشفي ..

متشكرة يا دكتور وما قلت لي كوثر عاملة كيف ؟.. هي شديدة انتو زمن ما تلاقيتو .. نسوي شنو يا دكتور سفرنا كثير ..


مضاد :

تشعري بشنو يا خالة

يا دكتور عندي خمة نفس وشحتفة روح كدا تخليني عندي وتابة كدا طول اليوم اتوع ..

شنو ؟؟ يعني ما فهمت تحسي بطنك منفوخة مثلا ..

يعني هي ما منفوخة يعني وتابة كدا تخليني اتوع ..

وتابة دي تطلع شنو كمان وتخليك تتوعي كيف يعني ؟؟؟؟؟؟؟؟ ..

هي يا ولدي اقولها ليك كيفن لكن ما ياها الوتابة الواحدة دي

اقول ليك حاجة يا حاجة

اولا تمشي تعملي لي صورة ملونة وصورة مقطعية وموجات صوتية

يا اخ انت جاي مع الحاجة دي ؟؟

ايوا يا دكتور هي زوجتي ..

طيب تمشوا المعمل تعملوا التحليلات دي كلها ..

خير يا دكتور هي الحاجة حالتها خطرة للدرجة دي ..

ياخي هو انا لحقت عرفت خطرة ولا ما خطرة امشوا اعملوا الحاجات عشان نعرف وتابة دي شنو كمان ..

...........ماقلت ليكم يا الخير انا ممكونة وصابرة علا انتو ما بتصدقوني ....

Post: #9
Title: Re: مضادات حيوية
Author: أشرف الرحال
Date: 01-27-2013, 07:19 PM
Parent: #7

Quote: - يا ولد امشي انكشح من قدامي وهو انا من ابوك طفش خلاكم لي انا شغالة ام وابو .. يلا اكل سريع خلينا نحصل السوق وانت كمان تحصل مدرستك


الاخ / درديري ،،، تحياتي

وقفت كثيرا حول المقتبس اعلاه فقد كان بمثابة نقر على الذاكرة التي اختزنت واقع تمثل تماما في المقتبس اعلاه .. اعرف اسرة تنطبق عليها هذا المضاد الحيوي لمواجهة ظروف الحياة القاسية التي لم يستطيع رب العائلة الصمود امامها فلم يتحمل مسؤولية كيف يكون راعي ومسؤولا عن رعيته زوجة و خمسة اطفال اكبرهم طبيب بشري ناجح من اطباء السودان المشهورين في تخصصه واصغرهم بنت بنتها الكبيرة تزوجت حديثا يعني سوف تصير حبوبة عما قريب ... تعود تفاصيل القصة ونحن في المسجد عقب صلاة العصر في ذلك الزمان تقدم رجل افغاني من اهل الدعوة والجهاد خطب فينا حديثا طيبا مس عصب العاطفة الاسلامية وفي النهاية فتح الباب نحو الدعوة والخروج في سبيل لله فتطوع هذا الاب وخرج معهم ولم يعد حتى الان تاركا خمسة ارواح بجانب والدتهم ما بين طفل وصبي لم يبلغ الحلم بعد ، تركهم دون ان يبلغهم ربما لايمانه بأن هنالك رب يرعاهم او انه بلغ منه اليأس وعدم قدرته في توفير ضروريات الحياة وهو بينهم .. المهم خرج لله ونحسبه كذلك ان شاء الله ، فحملت الرابة هذه الوالدة التي سدت خانة الاب والام معا فربتهم واحسنت تربيتهم اجتهدت ليل نهار في مواجهة النيران ما بين الزلابية صباحا لناس الحارة وفطور المدرسة وبيع الكسرة ووالاطعمة الجاهزة للعزابة مع المشاط وعواسة الابري للبيوت في الرمضان بالاضافة لبيع فطرة رمضان .. تسلحت بمضادات حيوية من اجل ان تظل واقفة ولا تمد يدها في ذلك الزمان الذي كان رحيما وعطوفا وفيه الحنية مع ان الحياة كانت ابسط واسهل مما فيه نحن الان ونتيجة لذلك ولمقاوتها بشعار المضاد اكرمها الله بنجاح فلذات اكبادها بشهادات اكاديمية رفيعة المستوى ومن جامعة يطلق عليها في ذلك الزمان جميلة ومستحيلة فكان الطبيب والطبيبة والمهدنس العسكري والصيدلاني .. كان هذا النجاح متوقع لهؤلاء لانهم كانوا ايضا من ضمن منظومة الكفاح فلم يخجل واحد منهم وهم كبارا ولهم علاقاتهم الاجتماعية فكانوا مكملين مع والدتهم في رحلة الكفاح هذه حتى اثمرت شجرة نجاحهم فتذوقت والدتهم ثمارها وان كانت الفرحة لم تكتمل بسبب مصير الاب الذي لم يعرف مستقره حتى الان فكانت الامنية تراود هذه الام ان تلتقي بشريك عمرها وابو اولادها حتى تقدم له هذا النجاح وتؤكد له ان للظروف والقواسي مضاد يقهره وهو الارادة والعزيمة والصمودوفوق هذا وذاك انه جهاد اسمى ان تكابد الحياة وظروفها من اجل هؤلاء الصغار

مودتي

الرحـــال


Post: #10
Title: Re: مضادات حيوية
Author: درديري كباشي
Date: 01-28-2013, 10:06 AM
Parent: #9

سلام يا ابوالشوش


الشعب السوداني مدرسة ونماذج تعلم الشعوب

لكن يتخيل لي القصة دي كانت زمان قبل ما تتلغي مجانية التعليم


يمين هسع لو باعت شاي وزلابية في القصر الجمهوري ما تتقدر تقري واحد فيهم تمريض

Post: #11
Title: Re: مضادات حيوية
Author: درديري كباشي
Date: 02-04-2013, 02:27 PM
Parent: #10

وتستمتر العكسات

Post: #12
Title: Re: مضادات حيوية
Author: درديري كباشي
Date: 02-11-2013, 07:05 PM
Parent: #11

يا دكتور انا شاعرة بارتفاع في الادرينالين ما طبيعي عامل لي توتر بلا سبب وعصبية في البيت مع زوجي والاطفال .. وبعدين ينتابني شعور بالغثيان بعد كل وجبة كانه عندي خلل في انزيمات المعدة بيسبب لي عثر هضم مزمن ..
تتناولي مشروبات غازية كثير ..؟؟؟؟
طبعا انا ما بتناول أي وجبة او لقمة من غير ما اتبعها ببسي او سفن اب ..
تعرفي هو دا السبب الرئيسي .. عملتي تحليل لانزيمات الكبد قريب ؟؟ ..آخر مرة عملته قبل شهر في لندن وكانت الكبد طبيعية جدا ..
خلاص اول العلاج لازم توقفي المشروبات الغازي لانها هي بتعمل انتفاخ في المعده وهي بتسبب التوتر وارتفاع الادرنالين زي ما تفضلت .. وعندك العلاجات حبة كل صباح وانشاء الله حتشفي ..
متشكرة يا دكتور وما قلت لي كوثر عاملة كيف ؟.. هي شديدة انتو زمن ما تلاقيتو .. نسوي شنو يا دكتور سفرنا كثير ..
مضاد :
تشعري بشنو يا خالة
يا دكتور عندي خمة نفس وشحتفة روح كدا تخلينا عندي وتابة كدا طول اليوم اتوع ..
شنو ؟؟ يعني ما فهمت تحسي بطنك منفوخة مثلا ..
يعني هي ما منفوخة يعني وتابة كدا تخليني اتوع ..
وتابة دي شنو وتخليك تتوعي كيف يعني ؟؟؟؟؟؟؟؟ ..
هي يا ولدي اقولها ليك كيف ما ياها الوتابة الواحدة دي
اقول ليك حاجة يا حاجة
اولا تمشي تعملي لي صورة ملونة وصورة مقطعية وموجات صوتية
يا اخ انت جاي مع الحاجة دي ؟؟
ايوا يا دكتور هي زوجتي ..
طيب تمشوا المعمل تعملوا التحليلات دي كلها ..
خير يا دكتور هي الحاجة حالتها خطرة للدرجة دي ..
ياخي هو انا لحقت عرفت خطرة ولا ما خطرة امشوا اعملوا الحاجات عشان نعرف وتابة دي شنو كمان ..
ماقلت ليكم يا الخير انا ممكونة وصابرة علا انتو ما بتصدقوني

Post: #13
Title: Re: مضادات حيوية
Author: درديري كباشي
Date: 02-11-2013, 07:09 PM
Parent: #12

الو الو كيفك يا روحي
- طبعا انا بالاكتر
- الحمد لله بس فاقدكم شديد بالذات انتي
- يا شيخة حرام عليك انا لسع ما تميت شهر من فتكم
- كأنه سنة انتي كمان ما تبالغي ...
- ما هو لازم اهمس لان انا قاعد في مكان عام والناس حوالي كثير
- قاعد في واحد من فروع مقهى عالمية اسمها استار بوكس
- بشرب في كبتشينو اطلب ليك حاضر يا حبي طلبك حا يصلك برسالة ..
- انا دمي خفيف ولا انتي دمك زي العسل
- انت ركزي سمعك حاتسمعي ما بقدر ارفع صوتي اكثر من كدا .
- حتى لو همست بتسمعي ؟؟... الليلة كلامك كله رقة انا خايف بكرة اجيكم ناطي راجع وانا لسع حتى اقامتي ما استلمتها ..
- طبعا استلمت الشغل والمكتب ما شاء الله مؤسس كويس وادوني سيارة اقصد عربية جديدة..
- اول الاولاد ما يأجزوا حارسل ليكم ..
- ما بتقدروا تنتظروا خمسة شهور ..
- طيب انا خلال الستة شهور حا اطلب اجازة اضطرارية مرتين تلاتة العقد يسمح اكيد حاشوفكم ..
- مرتين ثلاثة في ستة شهور شوية يازولة حرام عليك ما تكوني طماعة كمان ..
- طيب باي يا عسل بوسي لي الاولاد وتصبحوا على خير .

عكسة :

- الو الو منو معاي
- ام الخير كيفك والاولاد شديدين ؟؟
- انا ؟؟ انا عمر يعني حايكون منو يطلبكم من السعودية ..
- القروش وصلتك ؟؟
- القروش القروش وصلتك رسلتهم ليكم مع ود سيد احمد هن ومعاهن لبسات العيد ... لبسات العيد ايا لبسات العيد للاولاد ..
- الاولد طهرتيهم ولا لسع ؟
- قتلك الاولاد الاولاد طهرتيهم .... طهرتيهم .... الطهورة الطهورة ....؟؟ ما بقدر ارفع صوتي مالا كدي ...لانه الورشة جايطة خليني اطلع الشارع عشان تسمعيني ..
- اها انا طلعت الشارع .. قلت ليك الاولاد طهرتيهم ؟؟
- ياولية طولت شنو انا يادوب تميت لي ثلاثة سنوات ... وين لناس عبد الجبار التمو عشرة ديلك ..
- قربت بس سنتين تلاته واجيكم صاد ..
- الطهورة اجلتوها للعيد .. قلتي شنو ا مي قالت ليك شنو ؟؟
- قلت خضر اخوي جايي في العيد من ليبيا .. عشان كدا اجلتوها .. كويس وامي هي كيف صحتها ..
- هي جمبك اديني السلم عليها ..
- يمة كيف أنا عمر .. عمر عمر ولدك .. كيف صحتك .. الحمد لله .. انا والله بالاكتر .. قربت بس سنتين تلاتة وبجي ..كيف الخالت .. خالتي حسنة صحتها تحسنت ,,, حسنة حسنة خالتي كيف عاملة ... حسنة قلت ليك حسنة عاملة كيف .. الحمد لله .. وانتي لسع وجع الركب ما خلاك ...
- قلتي شنو ما سامعك .. التمباك مالو ؟؟؟ خليتوه الحمد لله بس لعلو ما بسبب مرض .. يعني براك منك وليك الحمد لله ...اها يادوب صحتك حتتصلح وترجعي شابة .. ندورلك عرس بعد كدا ... عريس عريس بعد خليتي التمباك ندور لك عريس .. ها ها ها ها يا حليلك يا حاجة .. ابوي الله يرحمه ويحمعك بيه في الجنة بعد عمر طويل انشاء الله..
- اها ما اطول عليك ام الخير جمبك منو اختي سعاد عاوزة تسلم علي .. طيب اديني ياها ..
- -اهلا سعاد كيفك كيف اولادك
- ماشاء الله ياتو فيهم العاوز يعرس منو صلاح ؟؟ ماشاء الله بقى راجل
- منو عاوزاني ارسل شنو ؟؟ ما سامع شنو قلتي شنو الريحة ؟؟ ما سامع الجوال بطاريته ضعيفة
- اها الخط قطع

Post: #14
Title: Re: مضادات حيوية
Author: درديري كباشي
Date: 02-11-2013, 07:52 PM
Parent: #13

Quote: Hatim Bagoush · ‏‎President‎‏ في ‏‎Business‎‏
السلام عليكم اخ درديري اتابع كتاباتك باهتمام متزايد وفقكم الله بالمناسبه اين بقيه قصة عصيان الايادي



اشكرك حاتم من منصات الفيس بوك ونأمل الا نخزلك

Post: #15
Title: Re: مضادات حيوية
Author: درديري كباشي
Date: 02-12-2013, 11:21 AM
Parent: #14

ونعود للمضادات