الاسئلة التقليدية نفسها مكررة فى كل برنامج سابق تناول اغانى البنات المختلف فى البرنامج ده انها اتكررت داخل البرنامج نفسه!!!!!! حقيقى كنت اتمنى ان استطيع تنزيل الحلقه كاملة هنا عشان الواحد يقدر يجيب نمازج ونناقشها
سهام و طارق .. كل سنة و انتم طيبين .. بالجد السهرة كعبة شديد .. الحاجة الكويسة الوحيدة حديث الدكتورة عفاف الصادق .. ايمان لندن صوتها اقل من عندي و امكن اقول عديل شين شين .. كمية الدهب الفالصو ما تديك الدرب .. و العجب المغنية مونيكا لوينسكي دي .. قال شنو امها ايطالية و ابوها مصري .. و بتغني بالدلوكة .. هاك العولمة دي ياخي .. ما عارف ليه ادونا احساس انه كانوا ماشين لواحدة صاحبتهم قامت الحافلة باظت قالوا نخش الاستديو نعمل برنامج للعيد .. و نظام في نص التسجيل بتاع الحافلة دقا ليهم جرس .. و كلفت كلفت .. ودعناك الله يا مخرج .. !!
يعنى يا طارق بقت عليك مغسات ما عندها حد من بلابل المريخ لافطارات الخرطو مع مغسة المغاربه و اخيرا جاتك مغسة السهرة فى صمة خشمك الله فى :) بس عليك الله شفت الحوار كان ضعيف كيف؟؟؟ والتقديم اضعف لدرجة انو د. عفاف الصادق فى لجظه كانت المقدمة عديييل كده و حنان بلوبلو (وانا غير محايده فانا لا اعتقد انو لديها المؤهلات الصوتيه عشان تكون فنانه) عيل كده استلمت الغنا!!! توزيع الفرص على المغنيات كان عجيب ده غير اهمال ناس الصف الورا مع انهن ناس الشى ذاتو؟؟؟!!! السهره كانت فقيرة بمعنى كلمه لولا مداخله يتيمه من اروى الربيع فى الاجابه على السؤال المكوجن بتاع تسابيج عن توجيه الغنا عشان يكون ايجابى !!!!!
كل سنة و انتي طيبة يا سهام انا سمعت المذيعة بتقاطع دكتورة عفاف و بتقول ليها : "الدنيا عيد يا دكتورة! سمعونا اغنية سيرة!" دي كانت كافية بانها تمغصني و تفتف مصراني عديل وفي نهاية الحفلة ودعت المشاركات بـ: شكرا يا استاذة عفاف على المشاركة و شرفتينا يا حنان بلو بلو!!!
يا شباب كل سنة وانتو طيبيبن والله يا حميدة قلت العايز اقوله كله ومونيكا دي فاكرنها حاجة حا تزيد البرنامج رونق ياخي التقديم دة فن فيه علم عديل كدة الله يرحم ايام حسن عبد الوهاب ويديه الصحة مرارتي مفقوعة شديد وبكرة شغال كمان
Post: #7 Title: Re: سهرة الدلوكة تحمى النوم !!!!! Author: Ali Alhalawi Date: 09-22-2009, 00:03 AM Parent: #1
سلام يا سهام و عيدك مبارك أعتقد أنّ السهرة كانت جميلة (وجهة نظر غير إختصاصى) .. قدّمت نماذج لما يعرف بأغانى البنات بصوت بناتى .. إكتشفنا من خلالها أصواتا مطربة كصوت مونيكا ويليام .. حتّى إيمان لندن (التى كنت أعتقد أنّها متغوّلة على هذا الفن) قد أبدعت.
بلاهى المغسه ما تشقك كيف و السؤال بتعاد الف مره وبالضرورة الاجابات بعدين غنا البنات ده تطير عيشته ما يسألن المغنيات ديل عن حياتهن و اوضاعهن و مشاكلهن المرتبطه بالغنا يعنى غناية بى دلوكه فى السودان تعانى من الكتير ما يناقشوهم ... انا ما عارفه ليه مقدمين البرنامج بيجيبو الفنانين عشان يغنو بس ليه كأنو ما بفهمو؟؟!!! و بعدين والله يا عزاز و ما طالبانى حليفه المقدمات ديل كان سلمن المايك لناس الصف الورا الحلقه كانت ح تكون مفيده و كنا ح نسمع كلام جديد
بعدين دز عفاف الصادق ما ممكن تجى تعمم وتقول نحن شعب مثقف حقيقى الحلقه ما كان فيها شى يتلخص لكن تلخيص عفاف كان اوف بوينت وغير علمى بكل المقاييس يعنى يا عزاز يرضيك تطلع غناية تقطع غنيه تقول " هىىىىى مقدرة راجل المرة حلو حلا" نجى نقول ليها بلاهى شذبى الكلمات؟؟؟؟ طيب اروى الربيع دى ما قالت غنى البنات ده بطبيعته بيعبر عن الواقع اها نشذب الواقع والا كلمات الاغنيه
Post: #12 Title: Re: سهرة الدلوكة تحمى النوم !!!!! Author: انعام حيمورة Date: 09-22-2009, 00:17 AM Parent: #7
كل سنة وانتي طيبة وربنا يحقق الامنيات الحلوة
انا بحب اغاني الدلوكة شديد يا سهام .. وعندي مزاج خاص ليها ..
ولما مرة طلبت لي غناية بي دلوكة عرفت انو السعر بختلف من بتاعات الاورغن ..
المهم ..
السهرة .. اكتر شي غاظني فيها لفحي حنان بلو بلو لي اي اغنية لحدي ما سوتها ظاهرة وضحكوا عليها لانها كانت انانية في لفحي الاغاني .. ولما ثبتوها .. زعلت والشرر اطاير من عيونا .. انا عجبني ليها لانها تفاحة اللفاحة .. (اصلي من زمااان ما بحبها صراحة)
انصاف مدني كانت روعة وغنت بي احساسها وصوتها جميل وقوي ومتمكنة من الدلوكة شديد ..
نجاة دي قالوا نجاة غرزة ياربي صاح .. غايتو كان دي نجاة غرزة تاني بدخل ليها اي حفلة (ههههه) وينك يا عمرو كمال تفتيني ..
مونيكا ما عجبتني
وايمان لندن ..باروكتها شينة ..
دكتورة عفاف الصادق كان يخلوها تدير الحلقة ويستغنوا عن المذيعتين ..
يا امجد يا فريد ما فاهم معناها ما حاضر السهره اهااااااا المسهرك شنو؟؟؟؟؟؟!!!!! كلام يا عوض دكام صباحات الله بيض و بلقاك
انعام سلام الله عليك وكل سنه و انتى طيبه اها كلامك حول اسعار الغنايات ده ما كان ممكن يكون سؤال؟؟؟ لانو الفرق فى السعر ممكن ما يكون سببو حق الاورغن بس اها جيتى تتكلمى فى الدلوكه و دقها انقول ليك ياختى انصاف مدنى كان من الافضل صوتا
لكن ما ختيييييرة فى دق الدلوكه!!!!!
Quote: دكتورة عفاف الصادق كان يخلوها تدير الحلقة ويستغنوا عن المذيعتين ..
اروى الربيع ثقافة عالية ..
د. عفاف قامت بأدارة الحلقه تلاته مرات يا بت امى لما تسابيح قالت كدى نتكلم عن المناحه قال ليها لا لسه ما خلصنا العرس و انتهت الحلقه بنواحنا نحنا وتانى مره لما طلبت من انصاف تغنى قامت نطت حنان فى حلقها و افتكر برضو طلبت من ايمان
اما عن ثقافة اروى الربيع فلم نستفيد منها فى هذه الحلقه وبعدين تفاعلها مع "ادوات" الحلقه كان ضعيف :) :) طبعا ادوات دى تم استخدامها ذى الف مره وكل مره بحث بيها ما الكلمه الصاح
.....والله يا جماعه أنا مش حمتنى النوم...والله أنا طق لى عرق وحسستني انو التعامل بسطحيه\ وجهل مع التراث ومعانيه ومؤشراته الاجتماعيه داء لا يمكن ان نسلم منه بسهوله..... بعدين انتى يا سهام عايزاهم يعنى يعدوا للحلقه دى ويظبطوها ويبدعوا كيف...هن فاضيات من التنافس فى التياب والحنه؟؟والعنايه المفرطه بالجمال ...؟؟؟ياخ ديل اتعمقوا فى مفهوم تجميل أم تسليع المرأه للركب.... وجايبين ليهم موضوع وغرضهم الأساسي الهجيج والاستعراض ...وما عارفين يتناولوه من ياتو جانب؟؟؟ لكن ما بتفق معاك...د.عفاف حاولت تخلى الحوار يتجه لنقد الهبوط والتدنى فى أغانى البنات... ووضع معالجات وحلول قاموا قمعوها شر قمعه وقالوا ليها الدنيا عيد.... طيب انتى عامله ليك برنامج طويل عريض كم ساعه عشان توصلى شنو؟؟؟؟؟؟ غايتو جنس كوجين..... لكن يا انعام حيموره ...تعليقك قطع مصارينى بالليل ده... هى اصلها ما ناقصه!!....
Quote: انا عجبني ليها لانها تفاحة اللفاحة ..[/QUOTE ما تزعلى من المدعوه حنان بلو بلو دى...لأنها محسوبه غلط على الفن والفنانات السودانيات!!... .. قناة النيل الأزرق وهارمونى بقوا يتنافسوا فى ياتا قناة حتعرض أكبر عدد من "النسوان" اللابسات تياب حرير ...وجميلات ...وأمعنوا فى تصوير المرأه ككائن لا يهتم إلا بهذا الجانب من الحياة..........جاذبين بذلك أعداد هائله من المتفرجين.... ...فيزداد تسليع المرأه فى السودان...وتصبح "أداة" إعلام وإعلان ..لجذب المشاهدين...... ... حلقه مقززه يا سهام....دهب وحنه كتيييييره...ومكياج صارخ وزائد عن الحد... ولا يصلح إلا لبيت صبحيه....وبرضو حيكون شين.....
.....قنوات مخلقنه!!!
Post: #18 Title: Re: سهرة الدلوكة تحمى النوم !!!!! Author: mohmmed said ahmed Date: 09-22-2009, 07:22 AM Parent: #17
اجمل صوت انصاف صوت جميل واداء هادى
الموضوع مستهلك
اتذكرحلقات كتيرة عن الموضوع دا اروى الربيع الناطق الرسمى باسم اغانى البنات كترة الطلة بتمسخ حتى الناس السمحين
Quote: بعدين انتى يا سهام عايزاهم يعنى يعدوا للحلقه دى ويظبطوها ويبدعوا كيف...هن فاضيات من التنافس فى التياب والحنه؟؟والعنايه المفرطه بالجمال ...؟؟؟ياخ ديل اتعمقوا فى مفهوم تجميل أم تسليع المرأه للركب.... وجايبين ليهم موضوع وغرضهم الأساسي الهجيج والاستعراض ...وما عارفين يتناولوه من ياتو جانب؟؟؟ لكن ما بتفق معاك...د.عفاف حاولت تخلى الحوار يتجه لنقد الهبوط والتدنى فى أغانى البنات... ووضع معالجات وحلول قاموا قمعوها شر قمعه وقالوا ليها الدنيا عيد....
شيراز كدى نتفق على حاجة ممكن؟؟؟ هل ممكن ان نتفق ان الظهور فى الشاشات ده محتاج من الرجال و النسوان يتجملو ... يعنى لازم يظهروا لينا فى احلى رونق و كده!!!! انا ما كنت شايفه الافراط فى التجميل ده غريب !!! ليه؟؟ لانو دى طريقتهن البعرفنهن حنه وتياب ودهب و توب ختير نحن فى البلد دى الغالبيه مننا ما بعرفو لكل مكان جمال على وزن لكل مقام كلام يعنى يا شيراز نجيب ليكم قشره غير الشفتوها دى من وين؟؟؟
اها انا ما بتفق معاك فى قصة الهبوط والتدنى دى حتى د.عفاف لما جات تعبر عن الفكرة دى غلبها يا شيراز الكلام النجيض فى الحته دى قالتو اروى الربيع للرد على نفس السؤال المتكرر
نحن الغنا ده متفقين انو يا اما بيعبر واقع معاش او واقع نصبو اليه اها غنى البنات ده تحديد فى اغلبو قاعد يعبر عن الواقع العايشاتنو وال نحن برضو متفقين انو هو وسيلتن لتوصيل ردة فعلهن وافكارهم (بالمناسبه انا برضو بختلف مع اروى فى قولها "انو البنات بيغننا عشان ينبهن المجتمع") اعتقد دى نتيجه ما هدف!!!
اى حلول "لتشذيب" المفرده كما قلن ح تكون كلها حلول فوقيه و لن تنجح طالما الواقع الانتج الاغينة قاااااااعد و متوهط و سنظل نسمع راجل المره حلو حلا
فعلا ذى ما قالت شيراز هن كانن مركزات على التجميل اكتر من الموضوع... ودى ما مشكلة تسابيح براها وهنا يأتى التسليع بتاع شيراز ده بت سمحه بلا فهم!!!!
Post: #26 Title: Re: سهرة الدلوكة تحمى النوم !!!!! Author: بدر الدين الأمير Date: 09-22-2009, 12:05 PM Parent: #22
سهام كل الاعوام انت بخيرين وزيادة بالنسبة لى اغانى البنات هى وسيلة لإنتزاع حق التعبير عن خلجات النفس في مجتمع ذكورى قامع ومتناقض وهى علاج او تحايل لكشف انثوى خلاق وتنبيه عن الداء والدواء من خلال موسيقى الشعر والتغنى والملاحظ ان السيمة الاساسية فى اغانى البنات هي تمرير الرغبات من خلال المثل او القيم الذكورية اغنانى البنات مهما كان شكلها ونوعها وطريقة تقديمها هى عديدة ومتعددة ومتاحة والناقص هو تحليها ودوافع وجودها في تلك السهرة كانت اروى الربيع هى حادى الركب والوحيدة الملمة بتافصيل ماحدث وكيف حدث ... والأهم ننا محتاجين لسهرات وسهرات عن اغنانى البنات فى كل المجتمعات السودانية باختلافها وتنوعها يعنى بالنسبة لى برنامج اغانى واغانى لذى استمر لاربعة اعوام وهو عبارة عن ذكريات السر قدور وتلك الحقبة او الحقيبة التى حفظناها عن ظهر قلب واضحت جواز مرور تذوقنا وبعبع قمعنا ـ اغانى البنات كم نحن محتاجين للكشف عن اغانى واغانى للبنات
Quote: و العجب المغنية مونيكا لوينسكي دي .. قال شنو امها ايطالية و ابوها مصري .. و بتغني بالدلوكة .. هاك العولمة دي ياخي ..
عيدكم مبارك يا شباب و كل سنة و انتو طيبين تعرف يا حميدة الخلاني احضر السهرة شمار حار كدا ياهو اسم مونيكا دا ذاتو ! سامع الاسم يتردد و قدر ما كشفت شمال يمين ما لاقي لي مونيكتن كدي بقولوا عليها ؟ و لما شكروها في نهاية الحلقة و ركّزت الكميرا عليها وسع السؤال ! يكون هو اسم زي مين لندن و هولندا كدا ؟ قلت كويس يكون في تطور في المعاني و الاخيلة و الالفاظ و نقلة نوعية في التسميات البناتية للاسامي الاجنبية بدل الاسامي الحربية( ثقافة انقاذ ؤ كدا ) ناس كلتوم اباتشي و مريم ذخيرة . . . . شكرن يا حميدة على التفسير ، و اكتر ما عجبني في المقتبس شغلة العولمة دي . . . دي بشارة خير بنقل تراثنا لمصافي العالمية . .. و ليه لا الشغلة مش سوق و حرة كمان ؟ طيب ما ياهو دا مشهادنا ؟ يعني المصريين احسن مننا ؟ اسي الرقص الشرقي على الطريقة المصرية استايل عالمي ، في برنامج " سو يو ثينك يو كان دانص " قدموا تصميم رقصة هندية ، و شفنا لطيفةالتونسية غنت في احد المهرجانت الغنائية الدولية . . . ليه لا ؟
بتفق مع د. شيراز - كل سنة و انت طيبة - في انو د. عفاف الصادق حاولت انقاذ ما يمكن انقاذه و ا. اروى كانت في تمام التايم غير كدا كانت تعليمة عروس بدون عروس ترقص الا فلتات - جايك ليها يا سهام في الاخر
انسألكم سؤال هل في فرق بين " اغني الدلوكة " زي ما جاء في عنوان سهام و بين " اغاني البنات " زي ما هو شائع و انسألكم سؤال تاني حنان بلو بلو متين نالت درجة " بروف " ؟ دي الحالة الوحيدة النحن ملزمين نقول للزول يا " استاذ " غير كدا يكون جابا بإتقانو لشغلتو مش ؟ اوع تقلوا لي بس المذيعة ادتا ليها منحة تلفزيوني عيدية كدا من القناة ؟
--------- بالجمبة كدا يا سهام ------------ انا غايتو استمتعت بالحلقة - ما عارف - و امكن عدم عرفتي بالشئ ذاتا الخلاني استمتع ، وغالباً الجينات دوّرت فعلها - كنت قايل نفسي جعلي منزوع الدسم - اكتر ما عجبني الاصالة طبعاً ، ستات الشئ ذاتا، المرأة الكانت شمال الشاشة - ما عارف اسمها - و ستات البخس الكانن جمبها. ناس بلو بلو و مدني و لندن و بقية الاطلس وحصة الجغرافية ديل ما حركن فيني شي !
مشتاقين يا سهام وسوري على البرية " بقن عليك اتنين " لكنو الشوق
سومة والمتداخلين كل سنة وانتوا طيببن غايتو يا سهام من استعراض السهرة انتظرتها بفارق الصبر وخاصة لم شفت اروى ود عفاف قلت الليلة جوار خيكون جميل و يخلينا نعرف الاغانى دى البكتبها منو ولا شفاهة بتم التداول و لا المشاكل المواجه العنايات والقبول الاجتماعى وعوالم الفن ومحاذيرة جيت لقيت يا كافى اللاء ريسين وغرقوا المركب يعنى لو خلو اروى تحاور عفاف كانت القصة بقت اجمل و اللفاحة صاحبة انعام كرهتنا ههههههههه نجى لى كلام شيراز و التياب والدهب والمكياج يلخم ( اتنوا يا جماعة موضة البواريك دى شنو ؟؟؟؟
غايتو الله يسامحهم ساهروا بى كان يا ريتنى لو نمت .
حبيب افراح اخخخ اقصد حبيب نورا :) الدنيا عيد و كده و الشغله عجيبه معليش جيتك متأخره انت والشباب
والله كلام انعام على حسب ما فهمتو بيعبر عن الاحباط يعنى زى ما جات قالت تيسير الدعايات للحلقه خلتنا نتوقع حاجه جديده وممتعه لكنها جات .... اللهم لا اعتراض فى حكمك
Quote: والله لو سابو السهرة للخالة الكبيرة الغنت براها بالدلوكة كنا استمتعنا بغناء صاح ... انا لحدى الصباح صوتها ما فارق اضانى فى واحده من البنات البشيلو قاعدة فى النص غايتو كان مستمتعة استمتاع وناسية نفسها انها فى التلفزيون ... بالجد عجبتنى ( وش شمشار ) ذكرتنى بنات حلتنا .... ــــــــــــــ وفى الاخير ليه مقدمتين للبرنامج تسابيح و بسمات وكل سنة وانتم طيبين
سلام و عيد مبارك يا عبدالدائم اتفق معاك فى حق الخالة الغنت دى و كنت اتمنى ان يستفاد من حضورها ما فى الغنا بس كمان فى سماع رأيها و تجربتها
وجود المختصين مهم عشان التناول العلمى للموضوع (رغم غيابو) لكن الجانب العلمى لا يكون الا بالنمازج لكن تقول شنو؟؟؟
Quote: شيراز كدى نتفق على حاجة ممكن؟؟؟ هل ممكن ان نتفق ان الظهور فى الشاشات ده محتاج من الرجال و النسوان يتجملو ... يعنى لازم يظهروا لينا فى احلى رونق و كده!!!! انا ما كنت شايفه الافراط فى التجميل ده غريب !!! ليه؟؟ لانو دى طريقتهن البعرفنهن حنه وتياب ودهب و توب ختير نحن فى البلد دى الغالبيه مننا ما بعرفو لكل مكان جمال على وزن لكل مقام كلام يعنى يا شيراز نجيب ليكم قشره غير الشفتوها دى من وين؟؟؟
...سلام تانى يا سهام....أكيد متفقين على الجزئيه التجميليه دي... لكن يا سهام كمان أمرقي النصيحه...ديل بالغوا وافرطوا... والواحده وشها علبة ألوان...وما قادره تضحك وعضلات وشها وتعبيراتو راحت وبقت "ماسك فيس".... قناع....زى فتاة الجيشا الصينية.....ولا بسين تياب حقت عروسات عديل..... وفى خضم التحضير الجمالى والشكلى...ينسوا تماما التطور الفكري والثقافي الضروري لمسيرتهم الإعلاميه...وينسوا يجوا ويكونوا ملمين ومتمكنين تماما من موضوع الحلقه.... البرامج الحواريه تحتاج الى قدر عالى من الثقافه والنباهه وسرعة البديهه.... ....لكن احنا وين...ما فاضيين!!!! ضرورى يكونوا بقدر كافى من حسن المظهر والقبول الإعلامى والوجه المريح والتفاصيل الجسمانيه المقنعه والجاذبه.... ولا أقول أن يكونوا "جميلين وجميلات" لنسبية الجمال ..... لكن ما ضرورى يبقوا "طعم" لاصطياد المشاهدين بشكلهم...ده ما ياهو التسليع زاتو؟؟ يعنى زى دعاية العربيه الغايظانى فى واحده من القنوات الأوروبيه البجيبوا فيها سيقان جميله ..!! بعدين نقطه تانيه.. اختيار الأشخاص المناسبين.... يعنى تفاحه اللفاحه دى...ما كان يجيبوها غايتو!!... بس جابوها عشان لمن الناس تشوف فى الإستعراض حنان بلو بلو ...ومونيكا ام صوتا شين... أكيد حيزيد عدد المشاهدين ضعف الضعف... لكن الليله لو قالوا انصاف دى بس ومعاها ناس الصف الورا زى ما سميتيهم... كان المشاهدين بقوا النص.... أما لو كان قالوا ندى القلعه...أوووووك...كان لهسه الناس قاعده قدام التلفزيون... ثقافة جماليه تجاريه ليس إلا......... قنوات بترسخ لمفاهيم سطحيه جدا...وبتتناول مواضيع غريقه وواسعه تناول ضيق الأفق وطفولى.... وهدفها لا علاقه له بهدف الإعلام السامى فى ترقية المجتمع إنما الدخل المادى ونسبة المشاهدين... ولو على حساب ترسيخ مفاهيم جديده ومشوهه فى مجتمعنا............
Quote: سهام كل الاعوام انت بخيرين وزيادة بالنسبة لى اغانى البنات هى وسيلة لإنتزاع حق التعبير عن خلجات النفس في مجتمع ذكورى قامع ومتناقض وهى علاج او تحايل لكشف انثوى خلاق وتنبيه عن الداء والدواء من خلال موسيقى الشعر والتغنى والملاحظ ان السيمة الاساسية فى اغانى البنات هي تمرير الرغبات من خلال المثل او القيم الذكورية اغنانى البنات مهما كان شكلها ونوعها وطريقة تقديمها هى عديدة ومتعددة ومتاحة والناقص هو تحليها ودوافع وجودها في تلك السهرة كانت اروى الربيع هى حادى الركب والوحيدة الملمة بتافصيل ماحدث وكيف حدث ... والأهم ننا محتاجين لسهرات وسهرات عن اغنانى البنات فى كل المجتمعات السودانية باختلافها وتنوعها يعنى بالنسبة لى برنامج اغانى واغانى لذى استمر لاربعة اعوام وهو عبارة عن ذكريات السر قدور وتلك الحقبة او الحقيبة التى حفظناها عن ظهر قلب واضحت جواز مرور تذوقنا وبعبع قمعنا ـ اغانى البنات كم نحن محتاجين للكشف عن اغانى واغانى للبنات
سلامات يا بدرالدين السهرة كانت سيك كبييييير فى الكشف عن اغانى البنات اروى الربيع كانت مكبلة بالتكرار لا الومها فقد كانت الاسئله كما زكرت سابقا مكرره و كما زكرت قبيل برضو انو كان تفاعلها ضعيف و كزوله مختصه حقيقى كنت متوقعه منها اكتر منك المفارقه انها فى حته كده كانت بتتكلم انو اغانى البنات مرات كتيره بتكشف المسكوت عنه فى المجتمع وهى زاتها كبحت نفسها فى حته ضروريه (والله كنت حافظه ليها الحته دى لكنها غابت الان عن الذاكرة للاسف مع شغله العيد) وبعدين ياخ بدرالدين انا البعرفو انو الضيوف قبل البرنامج بيقعدو مع العدين و المذيعين عشان يعرفو محاور النقاش ويسهمو فى تعميقها و تطويرها واذا اقتراحاتهم لم تجد القبول اولى لهم يعتذرو اروى كان ممكن تسهم بأكتر من كده .. فى تحليل الاغانى و ربطها بالواقع غنى البنات ذى ما هى قالت بيعبر كتير جدا عن المسكوت عنه بالتالى كان النقاش ممكن يكون اعمق من كده بدل الكلام بعموميلت محفوظه مثلا النمازج الغنائيه لرقيص العروس دى براها كان ممكن تكون حلقه يعنى انا لو عاوزه اسمع غنا رقيص بس كان امشى لى صبحية على الاقل كنت اتونست لكن لما اصاقر التلفزيون عشان احضر برنامج ذى ده بتكون توقعاتى عاليه عن النقاش الذى سيدور
Quote: انسألكم سؤال هل في فرق بين " اغني الدلوكة " زي ما جاء في عنوان سهام و بين " اغاني البنات " زي ما هو شائع
سلام يا قيقا وانا معاك فى السؤال ده و نرجى ليهو العالمين بالامور :) بس لغاية الوقت داك اتخيل لى الدلوكة كأله ايقاع ارتبطت بأغانى البنات و بقت غايتو فى المحيط الانا فيهو مرتبطة بالبنات و ما بدقنها الا هن و غير محبذ اجتماعيا انو الراجل يدق الدلوكه !!!!! عليك الله ده ما كان ممكن يكون محور برضو ؟؟؟؟ يعنى السهرة نفسها اسمها اغانى الدلوكه ولا سؤال واحد عن الدلوكه ذكر؟؟؟!!!! و اضيف لسؤالك هل كل نساء السودان بغنن بالدلوكه؟؟؟؟ ما كمان فى الدنقر (و ده بهجة وعالم براهووو بس من يفيدنا)
Quote: مشتاقين يا سهام وسوري على البرية " بقن عليك اتنين " لكنو الشوق
يا قيقا جنس بريتكم دى ما بناباها ده اذا جازت التسميه وجودكم عندى خير و بركه و فايده عامه و خاصه و انت تعلم :) تسلم و العيد مبارك عليك تتسهل عليك شقيش ما تقبل قول امين
يا خلى سلام سنوات مقبلات طيبات كلامك صاح يا خلى حتى انو الغنا معظمه كان اغانى سنتر ساااااى لولا الاغنية اليتيمة من غرب السودان كان ظنينا الغنا ده حقر بنات المركز وبس لو لاحظت التهميش حتى طال شكل القعده و الاخراج و التصوير ناس الصف الورا ما عبروهم حتى فى ختام الحلقه و لا شكرو ليهم حضورهم و لا مشاركتهم اى والله يا خلى تهميش عجيب و تمييز سلبى ايضا اساسا مجمل غناية فى السودان مميز ضدها اجتماعيا!!!! وتعانى اللهمز واللمز اها دا ما كان ممكن يكون و جزء من النقاش؟؟؟!!!
Quote: عشان تآمنوا أنه لسه مدني هي الساس والراس السبب الأساسي لإضعاف السهرة هو المذيعات .
حاتم يوسف تحياتى يا لها من جهوية بغيضة و كده :) :):) بس بينى وبينك ه ناس وليد و من تمردن منهم و منهن قدونا قد :) :) ياخ كل حته فى البلد دى بجى منها الجميل انصاف فعلا كانت نوارة الحلقة تاتى بعدها نجاة
يا أنعام طلعت فعلا نجاة غرزة طبعا المضحك انو تسابيح كان جزء من اسئلتها عن الالقاب الفنيه و كده سألت حنات بلوبلو عن قصة بلوبلو وسألت ايمان لندن عن لندن ولما جات عند نجاة عملت رايحة قصص والله
Post: #40 Title: Re: سهرة الدلوكة تحمى النوم !!!!! Author: Ahmed Yousif Abu Harira Date: 09-23-2009, 10:34 AM Parent: #38
أهلين يا سهام فعلا الحلقة كانت دون المستوى من جميع النواحي.. حاجة محبطة جدا بالنظر للدعاية السبقت تقديم السهرة حنان بلوبلو كانت ضعيفة كالعادة باقي الفنانات ، عدا عن انصاف مدني ، شيلي وودي البحر
انصاف والفنانات الكبار الكانو في الخلف كانو الاشراقة الوحيدة في مجمل السهرة.. الاغنية دي من ابدع ما قدم كلمات ولحن واداء الواحد بتمنى لو كان سيروهوا بيها
الاخوان ود الجريفاوى و رأفت ميلاد اول شى كل سنه و انتو بألف خير و سلامه يا جماعة نحن لما اتحكرنا للحلقة على خلفية الدعايات كان قايلين البرنامج تحتو نقاش بناء و كلام جديد و حاجات يااااما يعنى القصة ما كانت غنا و بس والله اها جا البرنامج خااااالى من كلو كما ذكرت و المتداخلين/ات حتى الغنايات كانن دون المستوى ما عدا انصاف دى يا ابراهيم ياخ دى مفروض تكون تخصص سيرة و بعدين يا رأفت ما تخليك على رأيك كدى تقصا :) :) :)
Post: #43 Title: Re: سهرة الدلوكة تحمى النوم !!!!! Author: محمد الامين محمد Date: 09-23-2009, 11:09 AM Parent: #42
دة كلو كوم وايمان لندن دي كوم تاني
Post: #44 Title: Re: سهرة الدلوكة تحمى النوم !!!!! Author: بدر الدين الأمير Date: 09-23-2009, 12:13 PM Parent: #40
Quote: بالتالى كان النقاش ممكن يكون اعمق من كده بدل الكلام بعموميلت محفوظه
سهام اتفق معاك والما امكن هناك من خلال حلقة تلفزيونية واحدة ومزدحمة بالضيوف نعالجه من خلال هذه النافذة التى فتحتيها وفي تقديرى ان اى سودانى كائن من كان عشان يتعمق فى كونه (سودانى وبس) عليه المرور على علم (الانثربولجى) وفي تقديرى ان اتغنى البنات ذلك شىء عام في كل المجتمعات ولكن ان تكون هناك أغنانى خاصة للبنات لابد وان هناك علة وكبت والسؤال الذى يهمنى كثيرا هل المجتمعات السوادينة الناطقة بغير العربية عندها اغانى بنات.؟ والملاحظ ان اغنانى البنات في المجتمعات الاكثر ذكورية في ثقافتها الداخلية هي الاكثر اسقاطات وتحايل على الواقع يعنى مثلا إيقاع الدلوكة هو الايقاع السايد في اغنانى البنات وهو بالمقابل ايقاع العرضة عند الجعلين وما ادراك المراة في المجتمع الجعلى ولو مشينا غربا وتأملنا الحكامات هناك والتغنى بنقد وتفنيد مواقف الرجال ودوره في دورة الحياة نجد اي رجل كائن من كان بعمل ألف حساب للحكامة هل المراة في المجتمع الجعلى كمثال تغنى من واقع ودورها الهامشى الذى رسمه الرجل والعكس تماما في غرب السودان .
تنهدات: الكلام للدكتور يوسف ادريس : كل الكمية المعطاة من الحرية في الوطن العربى لاتكفي كاتبا واحدا.
سلامات ياسهام السهرة كانت جميلة واستمتعت بيها جدا وحاجة ذي اغاني البنات والدلوكة هي في داخلها مليئة بالاسئلة والاجابات ونحن كمشاهدين عاديين اتصور لدينا في ذاكرتنا ومشاهداتنا ومتاباعاتنا اليومية مايعيننا على سماع ومشاهدة هذه الأغنيات فهي تاريخ وراهن ثقافي واجتماعي وانساني ومهما كان مستوى التقديم والضيوف في موضوع ذي اغاني البنات والدلوكة وموضوعات اخرى كتيرة على المشاهد ان لايسجن نفسه في التقديم والضيوف بل من المهم التمرد على ذلك والتعاطي مع ذلك من داخله ، شخصيا منذ ان قررت مساهدة الحلقة لم أكن معنيا بالتقديم لانو عاوز اسمع واشوف واتأمل وخاصة انو في مغنيات كتار وفي غنا كتير . والمغنيات كلهم كانوا حلوين واداؤهم كافيا اما حنان بلوبلو صاح صوتها بقى ضعيف لكن مع دا كان كافي لتوصيل النماذج التي ادتها واضافة لذلك استمتعت بيها بذاكرة اخرى حولها وهي أننا في الثمانينات كان الناس يتدفقوا من كل جهات الخرطوم ليحضروا حنان بلوبلو تغني وترقص والمواصلات كانت صعبة بعد الحفلة نرجع كداري لساعة وساعتين للبعض وتاني نمشي ندخل. نصار الحاج
Quote: بدون زعل: وجه جميل مقبول دخلت عبر الاعلان ثم التمثيل والان في الغناء.... صوتها ماسمح ومافيهو تطريب... بس ممكن يغطي الشكل على كل ده.
كمال ادريس سلام يا خ ده اثبا ت عملى لكلام شيراز :):) كسر تلجك يا اخوى حد واخد منها حاجه:)
الاخ انور سلام و تحايا شكرا على الصور والله قربت الموضوع للناس الماحضرت السهرة انا شخصيا ما شفت نجاة غرزة قبل كده عشان كده ما بقدر اتأكد ليك انا بس فى زوله قالت لى دى ياها نجاة غرزه المهم لو طلعت ما هى يا انور نحن نسحب انتقادنا لتسابيح انها ما سألتها عن قصة اللقب كالاخريات :) لكن بينى و بينك كده هل تعتقد انها كان ممكن تسأل السؤال ده :) :) شكرا ليك
سلام يا شيراز صدقينى نحن مختلفين فى حته صغيرووونه شديد فى حتة التجميل يا شيراز شوفى انا وانتى و انعام ما هو المقياس هنا الكلام شوفن هن وهن كما ارى شايفات انهن فنانات والفنانات تجب عليهن القشرة الما خمج وياها دى عرفتن!!!!! وبس
Quote: ثقافة جماليه تجاريه ليس إلا......... قنوات بترسخ لمفاهيم سطحيه جدا...وبتتناول مواضيع غريقه وواسعه تناول ضيق الأفق وطفولى.... وهدفها لا علاقه له بهدف الإعلام السامى فى ترقية المجتمع إنما الدخل المادى ونسبة المشاهدين... ولو على حساب ترسيخ مفاهيم جديده ومشوهه فى مجتمعنا............
يا شيراز ده ما ياهو حال البيزنس تجارة و مكسب !!! والمستثميرين الجدد فى الاعلام بشوفو انو عشان ينافسو لازم مذيعات لقطة والمذيعات اللقطه شايفين انهن عمله نادرة و يكفى ظهورهن على الشاشات!!!! انا اتحدى اى واحدة فيهن انها تقول حضرت للحلقة !!! انشالله فتشت قرت ليها كتاب والا انشألله مشت على مكتبة الاذاعه القريبه منهن دى وسمعت ليها حلقات قديمه عن نفس الموضوع على االاقل عشان تتفادى التكرار!!!
يا شيراز يا بت امى سيظل الحال على ما هو عليه ما دام العقليه المسيطرة فى راس اى حاجة فى السودان كان شركه قطاع عام والاخاص كان منظمة والا كان حزب سياسى (انسى الدوله) هى غير ديمقراطية عشان كده ناس الاعلام نفسهم البينادو بالحريه فاشلين فى تطوير نفسهم لانهم غير قادرين على الاستفاده من النقد باعتباره صادر من الاخر ويجب تقديره و وضع اعتبار ليهو؟؟؟!!!! انت عارفه يا شيراز المدرسه الكان بقرو فيهو اولادى حصلت فيها بعض المشاكل لما اولياء الامور قدمو انتقادتهم صاحبة المدرسة قالت ليهم دى مدرستى وانا اعمل العاوزاهو!!!!! وياها دى العقليه السائدة ... السودان ده بلد فيهو غرايب يا خ انا ما شفت لى بيزنس عندو انفه؟؟؟؟؟؟؟؟؟؟؟؟؟!!!!!!
Quote: الما امكن هناك من خلال حلقة تلفزيونية واحدة ومزدحمة بالضيوف نعالجه من خلال هذه النافذة التى فتحتيها
سلام يا بدرالدين اتمنى والله انا ياتى الناس هنا و يتمو ما نقص!!!!
Quote: وفي تقديرى ان اتغنى البنات ذلك شىء عام في كل المجتمعات ولكن ان تكون هناك أغنانى خاصة للبنات لابد وان هناك علة وكبت
كبت شديد و ده ما بظهر بس فى الاغانى بل حتى فى الجلسات الخاصة كل ما احضر جلسة بنات خاصة ينتابنى احساس انو فى براكين قاعده تتنفس ولو قليلا كمية من التفكك و حاول للخروج من اطارات معيقه لهن فى التعبير عن احساسهن و ما بتصدق مساهمات الحضور فى تغيير بعض المقاطع للتعبير عن حالتهن الخاصة اعتقد اواحد من اسباب ظهور اغانى خاصة بالبنات فى السودان بشكلها ده ما هو الا تفريغ لشحنات من الكبت و فك لبعض من القيود انا اتخيل لى محتاجين نصنف يا بدرالدين المرأه غنت كتير سيره ..مناحه..عاطفى (هذا ما استحضرته) ياتو من ديل هسه المقصود بيهو غنى البنات لانو لو جيت عاينت لكلمات السيرة و المناحه مافى زول بيجى يبظر ويقول تشذيب مفرده!!! معناها الناس ديل قاصدين الاغانى العاطفيه صاح؟؟؟ يعنى دايرين يشذبو فضفضتن؟؟؟!!!! قيود جديده و جايه من فوق من الناس البتفتكر نفسها مثقفة و عالمه!!!!! الحريه فى التعبير وين... و المفردات دى لمن نشذبها هل بتكون هى حقتن مااااا اظن!!!!! وبيكون طعم كلامنهن راح
Quote: والسؤال الذى يهمنى كثيرا هل المجتمعات السوادينة الناطقة بغير العربية عندها اغانى بنات.؟
يا ريت نعرف اجابه وانا ادعو الاعضاء الغير ناطقين بالعربيه هنا يجو يفتونا لانو سؤال الاجابه عليهو بتفتح باب للمقاربة معاهو فتح كبير للبحث!!!! وجاياك تانى لباقى كلامك لانو حقيقى مفيد وانا هسه بفكر معاك بصوت عالى تسلم و خليك قريب
Quote: سلامات ياسهام السهرة كانت جميلة واستمتعت بيها جدا وحاجة ذي اغاني البنات والدلوكة هي في داخلها مليئة بالاسئلة والاجابات ونحن كمشاهدين عاديين اتصور لدينا في ذاكرتنا ومشاهداتنا ومتاباعاتنا اليومية مايعيننا على سماع ومشاهدة هذه الأغنيات فهي تاريخ وراهن ثقافي واجتماعي وانساني ومهما كان مستوى التقديم والضيوف في موضوع ذي اغاني البنات والدلوكة وموضوعات اخرى كتيرة على المشاهد ان لايسجن نفسه في التقديم والضيوف بل من المهم التمرد على ذلك والتعاطي مع ذلك من داخله ، شخصيا منذ ان قررت مساهدة الحلقة لم أكن معنيا بالتقديم لانو عاوز اسمع واشوف واتأمل وخاصة انو في مغنيات كتار وفي غنا كتير . والمغنيات كلهم كانوا حلوين واداؤهم كافيا اما حنان بلوبلو صاح صوتها بقى ضعيف لكن مع دا كان كافي لتوصيل النماذج التي ادتها واضافة لذلك استمتعت بيها بذاكرة اخرى حولها وهي أننا في الثمانينات كان الناس يتدفقوا من كل جهات الخرطوم ليحضروا حنان بلوبلو تغني وترقص والمواصلات كانت صعبة بعد الحفلة نرجع كداري لساعة وساعتين للبعض وتاني نمشي ندخل. نصار الحاج
سلامات يا نصار وكل سنه و انت طيب السهرة تم فيها استضافة مختصين فيها انا حسيت انى مفروض اتعامل مع نقاش اغانى البنات من الدواخل لانو هو نقاش الكلام ده ممكن يتقال عن الغنا لحد ما يعنى ممكن الاغانى الاتغنت باصوات اقل ما يقال عنها سيئه ممكن الواحد تمرد عليها و يسدعى النغم الاصيل السمعها بيهو قبل كده وينطرب لذلك لكن فى نقاش اغانى االبنات ماذا تستدعى الا تقصد تناقش مع رقبتك طيب و فايدة المختصين ديل شنو وماهو دور التقديم فى فتح منافذ النقاش وادارته اذا القصه سمع غنا بس يجيبو لينا الغنايات ديل فى اغنيات فقط ومافى داعى للايحاء بانه البرنامج عن اغانى الدلوكه ويتخللو تقديم نمازج اما عن حنان (او فى مقوله انعامية تفاحة اللفاحه) فهى من بدايتها راقصه فقط ولم تكن لها مؤهلات صوتيه لتغنى لكن لاننا فى السودان ما عندنا مهنه ذى دى با ستثناء فرقة الفنون الشعبية الله يرحمها وحتى فى تعليم رقيص العروس المغنية بجب ان تجمع بين الاتنين وقسمه لم تستعين ببنات للتعليم الا بعد ما كبرت (وحتى الان قسمه فقط من تفعل ذلك) يعنى الرقص هو حرفة حنان ولولا الواقع الاجتماعى و السياسى لما جمعته مع الغنا بالمناسبه اتفق معك هى راقصه اكثر من جيده
Post: #51 Title: Re: سهرة الدلوكة تحمى النوم !!!!! Author: Ali Alhalawi Date: 09-24-2009, 11:54 AM Parent: #49
و الله يا سهام شككتونى فى ذوقى و إضنيّ .. الواحد فكّر يمشى لى سمكرى إضنين ربما وجودى المتكرر ببغداد سبب لى عمى سمعى
Quote: غايتو أنا من رأى الحلاوي رغم إنه ما شفت حاجة
شكرا عزيزى رأفت .. رفعتا لى معنوياتى
Quote: السهرة كانت جميلة واستمتعت بيها جدا وحاجة ذي اغاني البنات والدلوكة هي في داخلها مليئة بالاسئلة والاجابات ونحن كمشاهدين عاديين اتصور لدينا في ذاكرتنا ومشاهداتنا ومتاباعاتنا اليومية مايعيننا على سماع ومشاهدة هذه الأغنيات فهي تاريخ وراهن ثقافي واجتماعي وانساني ومهما كان مستوى التقديم والضيوف
و إهو كمان أخونا نصار الحاج برّد لى قلبى
يا سهام .. واحدة إسمها مونيكا وليام و بتغنى غناء دلوكة .. دا مش إعجاز للحلقة .. و تقولوا لى "بتدوور العاواض"
Post: #53 Title: Re: سهرة الدلوكة تحمى النوم !!!!! Author: حافظ حسن ابراهيم Date: 09-24-2009, 12:21 PM Parent: #51
سهام المجمر و المتداخلين أولاً كل سنة و إنتو طيبين و السنة الجاية يا رب تخلو الشناف دا.... تانياً: عليكم الله عيبوا لي السهرة دي .... عليكم النبي و عليكم الرسول عيونكم دي ما بتشوف ... ما شفتوا لمذيعة لابسة توب سمح كيف و يا حلاة الدنيا فوقا و لو الواحد إتجرأ شوية يقول المذيعة وقعت هسي من معلقة عمر بن كلثوم و بس ناس الإذاعة لبسوها التوب سليم الذوق دا و جابوها لينا تالتاً: ما لا بلوبلو ما لابسه دهب زي العجب ,,, كمان دهب دبي ما دهب بني شنقول الوهم دا.... و العجب مين لندن دي و التانية الإيطالية
سؤال خارج النص: انتو وين قسمة ما شايفها؟
Post: #54 Title: Re: سهرة الدلوكة تحمى النوم !!!!! Author: بدر الدين الأمير Date: 09-24-2009, 01:43 PM Parent: #53
سهام ياخى شكرا تانى على هذه النافذة وارجو ان تكون منفذ وليس متنفس كما هو الحال في اغانى البنات شخصيا نشأت في مدينة هى من اعرق مدن السودان الناطق بالعربية أي (أربجي) وقبل ان يعيدها ابنها رمز التعليم في السودان اول وزير للمعارف سوادانى بعد الاستقلال لاسمها القديم كان إسمها عمارة الجعلين وثقافة الجعلين الداخلية تجاه المرأة جعلت المرأة أكثر ذكورية في تعبيرها عن نفسها من الرجل لكنه تعبير مصنوع او تعبير المقموع تعالى شوفى المرأة في بيت البكا او حين فقد عزيز وتأملى الغزل المشبوب بالانفعالات الداخلية بل والتعبير غير المراقب او محاسب عليه من قبل الرجل تجدى فيهى الانثى الحقيقية بل وتجد فيه الانثى فرصة حقيقية بوعى اوبدون وعى للتعبير الانثوى عن مكنون دواخلها اي المكبوت ولابد له ان يطلع وبجيك راجع لتحليل مصطفى سيد احمد لبنية العديل والزين (اللحن الحزين والنص المتفائل)
تنهدات: في تقديرى أن مقولة ( نشاء الله يوم شكرك ما يجى) هى مقولة جعلية محطمة للتعبير وقامعة للتفاعل والحياة ولو وضعناهاامام قول ربنا سبحانه وتعالى ( إن شكرتم لازيدنكم) هى كفر بانسانية الانسان وكيمياء تفاعلاته ...
Post: #55 Title: Re: سهرة الدلوكة تحمى النوم !!!!! Author: mohmmed said ahmed Date: 09-24-2009, 06:58 PM Parent: #54
الاخت سهام دا سؤال ذكى ومهم اغانى البنات فى الثقافات غير العربية فى السودانية نوع الاسئلة دى كانت حتفتح محاور جيدة للحوار بدل الكلام المكرر البتقول فيهو اروى كل مرة
اعتقد فى الاغانى النوبية مافى التصنيف دا وقد يرجع السبب لانو المجتمع ما فيهو القيود بنفس مستوى قيود ثقافة الوسط فى الاغانى النوبية ليس هناك حرج فى ذكر اسم الحبيبة سمعنا عن شادية وعديلة واخريات
السؤال محتاج لاضاءات من داخل الثقافات المختلفة الجنوب جبال النوبة الهدندوة النيل الازرق
Quote: يا سهام .. واحدة إسمها مونيكا وليام و بتغنى غناء دلوكة .. دا مش إعجاز للحلقة .. و تقولوا لى "بتدوور العاواض"
يا على يا حلاوى الاعجاز شنو فى مونيكا تغنى دلوكه؟؟؟ هسه دى ممكن تماضر شيخ الدين يكون عندها ولد بيغنى راب؟؟ :) :) مونيكا دمها ما سودانى لكن ثقافتها سودانيه وانا عندى واحده زميلتى غير سودانية الجنسية امها حبشية و ابوها ايطالى لو شفتها لابسه توبها و بتتكلم تحلف تقول ابوها مشلخ(من غير تحديد لنوع الشيوخ حتى لانتهم بما ليس فينا:) :)
"بتدوور العاواض"
دى ما فهمتها تكون بالعراقيه :):):)
يا حافظ كل سنه و انت طيب ياخ
Quote: سؤال خارج النص: انتو وين قسمة ما شايفها؟
مافاضية الدنيا عيد و العروسات الدايرات يرقصن كتيرات بالحيل اصلو الما رقصتها قسمة ما رقصت خلينى احكى ليك القصه دى يا حافظ فى واحدة شابة لم تعثر على ود الحلال لسه قالت لى عارفة انا لو ما عرست وقسمة دى ماتت ح امشى امرقها من قبرها و اقتلها تانى :)
Post: #59 Title: Re: سهرة الدلوكة تحمى النوم !!!!! Author: احمد التجانى احمد Date: 09-25-2009, 01:15 AM Parent: #58
سهام المجمر كل عام وانتم طيبين السهرة عجبت ام العيال وبالتالى انا طوالى باعترف بانها سهرة جيدة النيل الازرق قناة مجتهدة بتحاول تقدم ليكم افكار وبرامج جميلة الا انها بتفتقر للخبرات فى مجال الانتاج التلفزيونى لذلك ياتى الاعداد ضعيفا والحوار ساذجا ولا يحترم عقلية المشاهد واتمنى ان تجد هذه الاشارات والنقد الهادف الذى تكرمتم به طريقها للمسئولين عن القناة
عبد الدائم وقيقراوى ما بسالكم والله البوديكم تعاينوا لغنا البنات شنو
خليل فكنا يا اخ قديتونا تهميش ومركز ودليب حتى فى غنا البنات
Quote: شخصيا نشأت في مدينة هى من اعرق مدن السودان الناطق بالعربية أي (أربجي) وقبل ان يعيدها ابنها رمز التعليم في السودان اول وزير للمعارف سوادانى بعد الاستقلال لاسمها القديم كان إسمها عمارة الجعلين
يا بدرالدين اعتقد والله اعلم انت نسيب هشام كدى ابحث معاهو الموضوغ ده بس عمارة الجعليين اول مره اسمع بيهو؟؟؟؟ ده كان فى ياتو فترة لانو قبل ايام كنت عاوزة لى معلومه و كنت براجع فى الطبقات وود ضيف الله كاتب اسمها اربجى ؟؟؟!!!! كدى جية لى المعلومة دى تاريخيا اول رجعنى لمصادر..تكسب ثواب انا الايام دى عندى جن مناطق من يوم الولد حمور جاب لى سيرة كندى مر
Quote: وثقافة الجعلين الداخلية تجاه المرأة جعلت المرأة أكثر ذكورية في تعبيرها عن نفسها من الرجل لكنه تعبير مصنوع او تعبير المقموع
ما حافظ ليك نموزج للتوضيح؟؟! اعتقد انو تأطير المرأه لنفسها فى القالب الاجتماعى المقبول موجود فى كل منحى و حتى انت وانا ممكن نشوفو تعبير المقموع هن بكونن ما شايفات اى قمع..ويسيرن ليك رقبتن ما ياهو ديل نحن و دى سماحاتناوسماحة تقاليدنا وقيمنا!!! ولكن عدم شوفن للقمع ده ما معناهو القمع غير موجود انت عارف يا بدرالدين كتير من الجندريات بيتعرضن للسخرية فقط بسبب ان القمع الذكورى وقهر النساء مغلف بالقيم و التقاليد وببقى ذكره ومحاربته هو محاربه للقيم "السمحه " دى و يجى بعد داك الخلط ما بين التحرر و الانحلال قصص والله وفى اغانى البنات ده كلو قاعد يظهر وفى السلوك وفى التفكير اقول ليك حاجة يا بدر عشان تشوف المجتمع ده قادر انو "يحلج" العقول كيف.. فى واحده معرفة و بتحب ليها زول معذبها عذاب شديد و بتحشر فى اى حاجة تعملها وهى بتعمل حاجاتها كلهاااااا وبطريقتها ومن غير نقصان قمت سألتها ياخ الزول ده انتى مرتبطة بى مالك قالت لى : ما ياها فنجريتو دى القاصه قلبى انا شخصيتى قوية شديد عشان كده دايره لى زول يشكمنى عشان احس بأنى مره شويه كدى!!!!!!!!!!!!!!!! طبعا اللحظة ديك اصبت بهاء السكت تماما
Quote: الاخت سهام دا سؤال ذكى ومهم اغانى البنات فى الثقافات غير العربية فى السودانية نوع الاسئلة دى كانت حتفتح محاور جيدة للحوار بدل الكلام المكرر البتقول فيهو اروى كل مرة اعتقد فى الاغانى النوبية مافى التصنيف دا وقد يرجع السبب لانو المجتمع ما فيهو القيود بنفس مستوى قيود ثقافة الوسط فى الاغانى النوبية ليس هناك حرج فى ذكر اسم الحبيبة سمعنا عن شادية وعديلة واخريات السؤال محتاج لاضاءات من داخل الثقافات المختلفة الجنوب جبال النوبة الهدندوة النيل الازرق اعتقد ايضا ان اغانى البنات مرتبطة بالمدينة
الاخ محمد سعيد السؤال المهم ده اول من ذكره الاخ بدرالدين الامير وانا ثنيتو انا اتمنى شديد الناس تجى تفتى و تنورنا انا الموضوع ده بدرالدين دخلو فى رأسى شديد ح احاول ادعو بعض الاخوان/ت للمشاركة
اتخيل لى يا محمد انت قاصد ذكر اسم الحبيب موش المحبوبه فى الوسط برضو مافى مشكلة مع الاسم والاغانى مليانه بأسماء الاحبة واوصافهم..وفى بيوت الاعراس كل بت تجى تهمس للغنايه بأسم حبيبها عشان تجيبو ليها فى الاغنيه واول ما تسمعو تقوم تزغرد اهااا الغنايه كل مره تجيب نفس الوصفه باسم مختلف او بقبيلة مختلفه السؤال تانى يا محمد وواضح انك نوبى هل فى اغانى خاصة بالبنات (وكدى هنا عشان ما نتجهجه فى عدم وجود تعريف فى البوست ده لاغانى البنات) يعنى غنا بغننو البنات فقط الرجال ممنوع عليهن رغم انو فى الوسط "بعض من اغانى البنات بقى ارجال يتتغنوبيها فى الحفلات الخاصة
انا ايضا اعتقد انو اغانى البنات مرتبطه بالمدينه لانو فى البلد عندنا فى اعراسنا ما شفت لى بت ماسكه دلوكه تغنى غنى خاص بالبنات ..ياها بس السيرة دى و ياهو الدليب ولغاية ما لله يكرمنا بناس الاختصاص اهو قاعدين ننظر
Quote: انا غايتو الكل بالنسبه لى كان صوتو عادى و ما فيهو تجديد ما عدا حنان صوتها من يومها فى غاية السوء
كل سنه طيبين والله صاح مش عاديين وبس ديل ماعندهم اصوات اصلا وحنان بلبلو غايه فى السوء اتخيلو معاى السهرة كانت فيها سميرة دنيا الطقطاقه هاجر كباشى حرم النور + منار صديق(من الاجيال الواعده) اها كان بحصل شنو؟ مش كان احلى مودتى
Quote: ليك وليهم شوفى دق الدلوكة هنا كيف وحتى تغيير درجات الصوت اغنية من فريع البان بصوت زهريمان الزولة دى غناية شديد... ركزى مع مقدمة البرنامج بتذاكر لوووول
فادية كل سنة و انتى طيبة ياخ والله المذيعة دى كتر خيرها بتذاكر
اتخيل لى انو الضيوف دى ممثلات وجايبين زهريمان (اسمها زاتو لذيذ خلى صوتها) عشان تطربهن والا انا ماعارفة ناس الاعلام ديل متين ممكن يجونا بأفكار جديدة وعاينى يا فادية للقعده .. زهريمان هناك فووووق و بعييييييد تلقى البرنامج (انا ما حضرتو) كان استاذة فلانه ما بعرفو شنو داك و يا استاذة علانه شنو داك اها ناخد لينا شوية استراحة زهريمان بلاهى يلا غنى!!!!!!!!!!!!
Quote: السهرة عجبت ام العيال وبالتالى انا طوالى باعترف بانها سهرة جيدة
ايووووااااا خليك مؤدب كده طوالى :) طبعا السهرة عجبتها موش لانها جيدة لكن الظاهر عليها خرمانة شديد انا عندى زوجة اخوى لما تجى السودان لو مافى عرس لازم يجيبو ليها غناية بتكون زى الرامياها جبنة
كل سنة وانت طيب يا احمد طبعا مرة سألت مجتبى منك ووصف لى شكلك واتذكرتك طوالى اها جات صورة ولدك دى اكدت لى انا الشكل وقع لى تماما ..بس فضل الصلعة
مدثر سلام و كل عام وانت بخير يا خ فى واحد اسمها شادية و معاها فرقة من بنات جيرانها موبااااااااااالغه موشادية دى غناية شديد جدا بس من النوع الذى تخطئة اجهزة الاعلام والله الفرقه دى كان ح يقدمو احسن نمازج
هذا مع العلم لا اعتراض على من ذكرت
Post: #67 Title: Re: سهرة الدلوكة تحمى النوم !!!!! Author: بدر الدين الأمير Date: 09-25-2009, 10:55 AM Parent: #66
Quote: قبل ايام كنت عاوزة لى معلومه و كنت براجع فى الطبقات وود ضيف الله كاتب اسمها اربجى ؟؟؟!!!!
سهام ياسهام المعرفة والتحريض عليها الحديث عن (أربجى) ذوشجون تاريخية واربجي عبر تاريخها الطويل دمرت مرتين وهى اقدم من سنار بحوالى 40 سنة واغلب سكانها الحاليين ليس سكانها الاصليين بستثناء اسرة الشيخ حمد ود ابو زيد البصلابى صاحب الضريح المشهور المقسوم تجاه القبلة وهو جدى لابى وابنه عبدالرحمن كان قاضى القضا فى المملكة السنارية واربجي في تقديرى هى مدينة المفارقات يعنى من غير التقاء جيوش عمارة دنقس وعبدالله جماع كانت هناك حكياية الشيخ الهيم والقاضى دوشين قاضى العدالة وتلك الحكاية التى تفوق السريالية سريالية وثلث سكان اربجى الحاليين هم بطاحين وفي اربجى تحول البطاحين من رعاه لمزارعين بل وعمدة اربجي واشهر نظارها على طه حين كانت تسمى عمارة الجعليين فعلى طه ليست جعلى بل هو محسى صواردى لا اود الاسترسال هنا في شجون تاريخ اربجي واحرف مسار هذه النافذة عن الدلوكة واغانى البنات لكن احيلك لهذه الرابط لعل فيه شىء من حتى أربجي المدينة السريالية أو طائر الفينيق
Quote: يا ريت ترجع بتحليل مصطفى للبنية
حا ارجع ياسهام ومعى نص (لبنينة العديل والزين ) الذى كتبه وغناه مصطفى سيد احمد لزواج صديقنا المشترك ابن ود حامد الجعلى نوح عبدالواحد وهو لاول مرة انشره ومن ثم تحليل مصطفى للعديل والزين
سلام يا بدرالدين وشكرا للرابط ومن دربى ده ماشه اقراه وفى انتظار عودتك
Post: #69 Title: Re: سهرة الدلوكة تحمى النوم !!!!! Author: بدر الدين الأمير Date: 09-25-2009, 11:36 PM Parent: #68
سهام والاصفياء متداخلين ومطالعين لكم العديل والزين التى كتبها مصطفى سيد احمد بمناسبة زواج صديقنا نوح عبدالواحد الصادق ولعله من النادر جدا ان يكتب رجل العديل والزين ناهيك ان يغنيها رجل ومن هذا الرجل فنان بقامة مصطفى ولو قدر لكم وسمعتوها بصوت مصطفى لاقشعرت أبدانكم طرب وحزن وحميمية يقول فيها مصطفى: بسم الله إبتديت زولى السمح والزين من قومة الجهل معروف ولد ستره بالفال والسمح لى نوح اخو الأخوان مستور العروض نوارة الديوان لى الجار والبعيد قدحو دوام مليان ود جعل العزيز قيدومة الفرسان ياقسم(1) الكريم أبشر بشارة الخير فال نوح العيال والتانية رزقو كتير رقصن في الفرح ديسن طويل وغزير اخوات الرجال لابسات دروع وحرير مصطفى في الخليج نظم كلام موزون ذكر فيك وصف دررا خفي ومكنون عقبال يا محمد(2) كل صعيبة تهون ويجمعنا الفرح في ديارنا زى مايكون الشايقى الفصيح فرحان لود اعمو ركازة الصديق شرق العيال نمو بالزين والعديل يا اخواتو يا امو وأخوانو العزاز طعم الحلو وتمو.
1 قسم شقيق نوح الاكبر 2 محمد شقيق نوح الاصغر حين سجل مصطفى تلك البنينة وحملها نوح معه وهو يتم مراسيم زواجه بود حامد وحين سمعها الناس هناك قال لى نوح كان الناس بتبكى ولا ادرى هل كانو ببكو طربا لصوت مصطفى او لهول المفاجأة ام للمضامين ... والغريب ان مطصفى رحل قبل ان يعود نوح من رحلة زواجه ويحكى له تفاصيل ماحدث . جرجرتينى ياسهام لتفاصيل تبكينى كثيرا عذرا قد اختنقت وبعود مرة اخرى لتحليل مصطفى للعديل والزين. ونفعالا اقول لك : اوردتينى مورد كم هربت منه
Post: #70 Title: Re: سهرة الدلوكة تحمى النوم !!!!! Author: Deng Date: 09-26-2009, 01:23 AM Parent: #69
الاخت سهام المجمر.
أنا اليومين ديل في إجازة من الفضائيات السودانية وضغطي متوازن جدا. نشكر الله.
لكن بيني وبينك كده. سهرة الدلوكة وأغاني البنات دي برضه مش أرحم من خيمة قناة الشروق التي أستضافوا فيها ناس سبدرات وبدرية الزين ونافع؟
Quote: الذى يهمنى كثيرا هل المجتمعات السوادينة الناطقة بغير العربية عندها اغانى بنات.؟
دينق سلامة الحضور و شكرا للاستجابة الاقتباس ده سؤال طرحة الاخ بدرالدين وعشان نكون اكثر دقة فى طرح السؤال
نقول
هل المجتمعات السودانية الناطقة بغير العربيه عندها ما تسمية اغانى بنات
يعنى بيغنوها البنات بس و ماهى مضامينها؟؟ دى اضافات منى
يلا يا دينق اقيف على حيلك وجاوب
__________________________ الاخ بدرالين خلينى اقول ليك سر ..انا حتى اليوم لم ازرف دمعة على مصطفى فهنيئا لك بدمعاتك !!!!!! و نحن فى انتظارك
Post: #72 Title: Re: سهرة الدلوكة تحمى النوم !!!!! Author: انعام عبد الحفيظ Date: 09-26-2009, 12:29 PM Parent: #71
سهام المجمر سلامات وكل عام وأنتي بألف خير وشكراً لهذا الخيط الجميل شهدت جزء من هذه السهرة وللحق الدكتورة عفاف الصادق كان يجب ان تدير الحلقة وأكاد أجزم بأنها لو أدارتها لأخرجت لنا سهرة جميلة جداً ومميزة
بدر الدين الأمير سلامات وكل عام وانت بكل خير
Quote: ولعله من النادر جدا ان يكتب رجل العديل والزين ناهيك ان يغنيها رجل ومن هذا الرجل فنان بقامة مصطفى ولو قدر لكم وسمعتوها بصوت مصطفى لاقشعرت أبدانكم طرب وحزن وحميمية
نعم يا بدر الدين من النادر جداً ان يكتب رجل هذا النوع من النظم الشعري ولكنني أحسب ان هنالك ظروف موضوعية كثيرة جعلت فنانا مصطفى يكتبها ويغنيها ولعلك أدرى بها منا جميعاً لقربك الحميم منه فيا ليتك كتبت لنا ظروف كتابتها من وجهة نظرك بوصفك كنت قريباً من ميلاد هذه الكلمات المنظومة وكنت من المقربين جداً لأستاذنا مصطفى ولمحت فيك عندما قابلتك حبك العظيم له ولفنه بل ولمحت أثر ذلك الحب وعجبت له عندما قابلت الدكتورة موزة المالكي (القطرية) معك وحديثها عن السودان وحبها للسودانيين وحديثها أيضاً عن مصطفى الفنان والإنسان معاً حينها أدركت عظمة حبك لـ مصطفى فقد ظهر أثره فيمن هم حولك من الأصدقاء غير السودانيين أيضاً
Post: #73 Title: Re: سهرة الدلوكة تحمى النوم !!!!! Author: بدر الدين الأمير Date: 09-26-2009, 12:34 PM Parent: #71
كان مصطفى سيد احمد بقول لينا: (الملاحظ في العديل والزين ان النص متفائل واللحن حزين وذلك مرده الى ان الأخوات والخالات والعمات بقدر فرحهن للعريس هن حزينات لانه سوف يغادرهن وينشىء اسرته الخاصه به) لكن مش ملاحظة يا سهام ان العديل والزين التى تقولها النساء تتغنى بسجايا الرجل او العريس دون ذكر للمراة او العروس وبعدين شوفي التناقض الوجدانى فرحانات وحزينا في نفس الوقت ولنفس السبب يالها من كربلاوية.....
Post: #74 Title: Re: سهرة الدلوكة تحمى النوم !!!!! Author: حليمة محمد عبد الرحمن Date: 09-26-2009, 12:54 PM Parent: #73
بت المجمر كيفنك..كل سنة وانت طيبة.. ما داير اكرر القالوهو معظم الناس عن "شناة" السهرة.. لكن اداء َ الصحف الخلفي او الهامش جاء في في المقدمة بينما الصف الامامي "المَرَكَّز) رجع وراء واريتو كان مرق من الاستوديو عديل.. عندي تعليق كانت بتقولو حبوبتي عليها رحمة الله لما الشئ ما يعجبها كلو كلو.. كانت تقول: (شِنْ تشبه بلا الدفقوهو للحمير وَأبَنُو قالن خَمِير). معليش يا عفاف واروى الشين بيعم (على وزن الشر) حتى لو جاءت محاولة تجميله بوجه مونيكا.
---- البركة في الناس الكتار الفاقداهم الظهروا لي هنا.. بت المجمر الله بسالني فشيتي لي مغستي من وكتي الودرتو في دلوكة النيل الازرق.
Post: #75 Title: Re: سهرة الدلوكة تحمى النوم !!!!! Author: احمد التجانى احمد Date: 09-26-2009, 02:25 PM Parent: #74
Quote: طبعا مرة سألت مجتبى منك ووصف لى شكلك واتذكرتك طوالى اها جات صورة ولدك دى اكدت لى انا الشكل وقع لى تماما ..بس فضل الصلعة
ما شاء الله ياسهام على الذاكرة عينى باردة لكن اقول ليك حاجة هسة لو شافنى مجتبى ذاته ح يجلينى ... ياحليل لما كان بوصفونى بالصلعة بس
Quote: عندي تعليق كانت بتقولو حبوبتي عليها رحمة الله لما الشئ ما يعجبها كلو كلو.. كانت تقول: (شِنْ تشبه بلا الدفقوهو للحمير وَأبَنُو قالن خَمِير). معليش يا عفاف واروى الشين بيعم (على وزن الشر) حتى لو جاءت محاولة تجميله بوجه مونيكا.
سلام يا حليمة يا دفعة وكل سنه وانتى بالف خير والله ظهورك وانعام فشانى انا ذاتى
والله عفاف و اروى كان يرجى منهن اكثر من ذلك نحمد لعفاف محاولاتها فى انقاذ ما يمكن انقاذه الا ان الركاكه سادت و ذى ما قال بدرالدين حقو نفش مغستنا دى بالمناقشة هنا علنا نشفى غليلنا و كان على البريكات اليوتيوب ما بقصر الناس البعرفو ينقلو الفيديوهات ما يقصرو بين كل مداخلة واخرى
Quote: ان مصطفى سيد احمد بقول لينا: (الملاحظ في العديل والزين ان النص متفائل واللحن حزين وذلك مرده الى ان الأخوات والخالات والعمات بقدر فرحهن للعريس هن حزينات لانه سوف يغادرهن وينشىء اسرته الخاصه به) لكن مش ملاحظة يا سهام ان العديل والزين التى تقولها النساء تتغنى بسجايا الرجل او العريس دون ذكر للمراة او العروس وبعدين شوفي التناقض الوجدانى فرحانات وحزينا في نفس الوقت ولنفس السبب يالها من كربلاوية.....
تضاربت بعض الافكار فى رأسى بخصوص اللحن الحزين ده وحاسه بانى ما قادرة اعبر عنها!!!! شيل الصبر معاى يا بدر اللحن الحزين ده برضو بتسمعو وانا تشاهد ام تهدهد فى وليده استدعاء للنوم وبتسمعو مره تانيه وانت بتشاهد فى نفس الولد قاعد فى عنقريب الحنه تفتكر فى علاقه بين المشهدين وجدانيا عشان كده طلع اللحن حزين والا كيف؟؟؟؟ هتراشات غايتو
الفرح والحزن تيمان يا بدرالدين قبل يومين كان زواج ابن عمى (له وضع خاص عندنا .. فهو حتالتنا) و انا برقص معاهو وبزغرد فرحا كنت حزينة ايضا وكان نفسى اقالدو وابكى... القصة دى شكلها بقت دايره ناهد محمدالحسن بعد دا
اما عن غياب ذكر المرأة فى العديل والزين اعتقد ان لخصوصية المناسبه علاقة بالامر يعنى العديل والزين دى عندنا تغنى للعريس فى حنتو و بالتالى التركيز عليهو فى الاحتفاء لانو فى اغانى اخرى مخصصه للعريس تذكر فيها امو واخواتو و خالاتو وعماتو وعروسو !!! مشكلتى ما بحفظ اغانى كنت جبت ليك النمازج لكن برضو شكر المرأه فى الاغانى دى ذاتها مليانه بدلالات تشير لوضعها فى المجتمع و نظرتو ليها !!! غايتو جنس جوطه ادينى فرصه بجيك بالنمازج خلينى استعين بزول صاحبى غناااااااى
Quote: ح يجلينى ... ياحليل لما كان بوصفونى بالصلعة بس
ااااااخ يا ود التجانى الحال من بعضو بس حمدو فى بطنو
Post: #81 Title: Re: سهرة الدلوكة تحمى النوم !!!!! Author: بدر الدين الأمير Date: 09-26-2009, 07:10 PM Parent: #79
Quote: اللحن الحزين ده برضو بتسمعو وانا تشاهد ام تهدهد فى وليده استدعاء للنوم وبتسمعو مره تانيه وانت بتشاهد فى نفس الولد قاعد فى عنقريب الحنه
سهام خدى فرصتك وتعالى بس لاحظى في الاقتباس اعلاه انت ذكرتى الولد مرتين طيب هو في عنقريب الحنة عرفنا ان التغنى للرجل وفي الهدهدة هل لازم يكون هذا التغنى للولد وهل هناك اغانى هدهدة للبنات فقط ؟ ومن وين انت عبرتى عن وعيك بالاشياء بهذه الطريقة الذكورية وليه هذا الافتراض وين انت وين الانثى ؟!
Quote: بالنسبة لى اغانى البنات هى وسيلة لإنتزاع حق التعبير عن خلجات النفس في مجتمع ذكورى قامع ومتناقض وهى علاج او تحايل لكشف انثوى خلاق وتنبيه عن الداء والدواء من خلال موسيقى الشعر والتغنى والملاحظ ان السيمة الاساسية فى اغانى البنات هي تمرير الرغبات من خلال المثل او القيم الذكورية
ليس على الإطلاق ... هُناك دائِمًا إستثناء ... فالمرأة النوبِية تُغني أغانيها كَوسيلة لإظهار حنانِها وعطفِها وقُدرتِها على الحب وذلِك مُقابِل الصورة السائِدة في المُجتمع النوبي ... الذي يرى المرأة نِصف إله ... يراها حاكِمة لِلدَولة ... المرأة النوبِية كانت ترِث مِن أبيها وزَوجُها الأرض والحُكم ... وهي فأل عِند وِلادتِها ... واليوم كثير مِن الرِجال النوبِيون يُلقبون بِإسم أُمْهاتِهِم < أحمد جاره > < إبراهيم كريمة > < محمد حجره > إلخ تكريمًا لِلأُم وإعلاءً لها ... علِمنا أن الجنة تحت أقدامِهِن قبل البِعثة النبَوِية الشريفة ... علِمنا أن الجنة العاجِلة والآجِلة تحت أقدامِهِن ... فجاءت الرِسالة لِتَوقِف عادات أجادها العربي إجادة تامة .. كَوأد البنات وقتلِهِن مِن إملاق وإمساكِهِن ضِرارًا ولِتسريحهِن بِمعروف. أي أتت الرِسالة وإكتمل الدين ليصِل بِالعرب إلى ما نحن النوبِيين فيهِ مِن سُلوكِيات ، لِذا أستطيع أن أقول أن الدين الإسلامي لم يضيف لنا سُلوكِيًا ، شيئًا لم نكُن نفعلهُ.
لِذا تُغني المرأة النوبِية لإظهار أن في إمكانِها تحِب وتُحَب بِنفس الكفاءة التي تحكُم بِها شعبها ...
Quote: ليس على الإطلاق ... هُناك دائِمًا إستثناء ... فالمرأة النوبِية تُغني أغانيها كَوسيلة لإظهار حنانِها وعطفِها وقُدرتِها على الحب وذلِك مُقابِل الصورة السائِدة في المُجتمع النوبي ... الذي يرى المرأة نِصف إله ... يراها حاكِمة لِلدَولة ... المرأة النوبِية كانت ترِث مِن أبيها وزَوجُها الأرض والحُكم
سلام يا عزام وكل سنه وانت طيب سعيدة بمرورك و مساهمتك لكن عندى سؤال: هل ما تحدثت عنه هو الحال الان؟؟؟ يعنى الم تتأثر الثقافة النوبية بعد التهجير القسرى بثقافة الوسط؟؟ وهل تعتقد ان هناك تغيير حدث فى اغنية البنات النوبية على اثر هذا؟؟؟ واساسا قبل ده لاننا ما بنعرف "نوبى" بشكل عام ماهى مضامين اغنية البنت النوبية وشكل اللحن شنو؟؟؟
و ما بالضرورة انت مطالب بالاجابة على ده كلو انما هى اسئلة مفتوحة لمن هو ملم بشىء منها
Quote: ومن وين انت عبرتى عن وعيك بالاشياء بهذه الطريقة الذكورية وليه هذا الافتراض وين انت وين الانثى ؟!
يا بدرالدين انا جبت سيرة الراجل فى الهدهدة لانك قلت فى مداخلتك ان العديل والزين لحنها حزين لانو الامهات ممكن يكونن بودعن حياة وليداتن معاهن و كده... لاننا كلنا بننتكلم عن الرجل يا بدرالدين لم اتعمد نفس الانثى ولكن الحديث كان الرجل ا نا طفلتى البكر بنية هدهدتها لمن قلت بس.. وبنفس الكلمات هدهدتها اخوانها الذكور بس غيرت الضمير لو ده ممكن
طبعا زمان الام لمن تهدهد الولد بتكون امنيات الحياة المهنية ما تديك الدرب تبقى لى دكتور .. وتبقى لى مهندس ...الخ وللبنات بالسماحة والسترة وود الحلال...الخ لكن هسه ولد وبنت لهم نفس الامنيات
يا بدرالدين راجع مداخلتى بنفس بارد شوية ح يقع ليك كلامى
Post: #84 Title: Re: سهرة الدلوكة تحمى النوم !!!!! Author: بدر الدين الأمير Date: 09-26-2009, 07:55 PM Parent: #81
Quote: نعم يا بدر الدين من النادر جداً ان يكتب رجل هذا النوع من النظم الشعري ولكنني أحسب ان هنالك ظروف موضوعية كثيرة جعلت فنانا مصطفى يكتبها ويغنيها ولعلك أدرى بها منا جميعاً لقربك الحميم منه فيا ليتك كتبت لنا ظروف كتابتها من وجهة نظرك بوصفك كنت قريباً من ميلاد هذه الكلمات المنظومة وكنت من المقربين جداً لأستاذنا مصطفى ولمحت فيك عندما قابلتك حبك العظيم له ولفنه بل ولمحت أثر ذلك الحب وعجبت له عندما قابلت الدكتورة موزة المالكي (القطرية) معك وحديثها عن السودان وحبها للسودانيين وحديثها أيضاً عن مصطفى الفنان والإنسان معاً حينها أدركت عظمة حبك لـ مصطفى فقد ظهر أثره فيمن هم حولك من الأصدقاء غير السودانيين أيضاً
إنعام عبدالحفيظ النسمة التى مرت على هجير الدوحة ياخي انا ممنون ومشكر بل وفخور بتفاصيل حديثك وتحاورك مع الصديقة العزيزة جداالمعالجة النفسانية القطرية الدكتورة موزة المالكى وعلى طريقة القطرين في الممازحة ما حا قول ليك رأى موزة فيك عشان ما يكبر رأسك علينا... بس في حاجة مابقدر اسكت عليها في لقاء آخر علقت عنك موزة بقولها (هذه البنت في فكارها السياسية وتحليلاتها مرتبة جدا هى (شيوعية ) ضحكت وقلت (ربما تكون غواصة) وهنا انتقلنا لمحاور اخرى .... سهام المجمر صاحبة النافذة ياخى اسف لهذه التداعيات لكنه حديث الذكريات وحا اعود لزرزرة انعام وتفاصيل العديل والزين ومصطفنا بس ماداير اكون مكرور
Post: #86 Title: Re: سهرة الدلوكة تحمى النوم !!!!! Author: بدر الدين الأمير Date: 09-26-2009, 09:26 PM Parent: #84
Quote: لم اتعمد نفس الانثى ولكن الحديث كان الرجل
سهام انا شخصيا انثوى بضمائر لغوية او سلوك بشرى او مثال ربانى هز جزع النخلة شىء وتساقط الرطب اشياء اخرى اي تفاصيل مابعد وهل الفيصل هو الكلام ام المتكلم طيب لو كان المولود انثى ..
الصحيح لم اتعمد أنفى الانثى ولكن الحديث كان عن الرجل القصد من ده هو نفى الاتهام وكده
ذى ما قلت ليك يا بدرالدين ده تفكير بصوت عالى
لو اعدت النظر فى الفكرة دى ذاتها تلقاها غير صحيحة و متعجلة يعنى تركيزى على العديل والزين ومحاولة فهم اللحن الحزين مع الكلمة المتفائلة فى حالة العريس الرجل خلتنى اجلى شويه :) واكون فى حالة زوووم اوت لانو لو نظرت للحن الحزين ده تلقاهو برضو موجود فى بعض من اغانى العروس ذى مبروك عليك الليله يا نعومه وذى يا عينى اللول اللول اعتقد انها ذات اللحان حزينة ببقى السؤال الاحان الحزينة هل هى ذات علاقة مباشرة بنفسية المرأة و احساسهابالحدث المحدد الذى من اجله صيغت الاغنية (كلام مصطفى سيداحمد)؟؟ والا ليها علاقة باغانى البنات بشكل عام؟؟؟ والا القصه شنو؟؟؟ اتخيل لى دى كلام انا شخصيا ما عندى ليها رقبة اتمنى فعلا حضور من يكون اكثر فائدة!!!!
تسلم يا الامير
Post: #89 Title: Re: سهرة الدلوكة تحمى النوم !!!!! Author: عاطف عمر Date: 09-27-2009, 11:14 AM Parent: #1
نومتو ولا لسع سهرانين ؟؟؟؟
سهرات التلفزيون البتحمي النوم يا سهام كتيرة ومسيخة في سهرة ( تلميع ) الكاردينال السيد أشرف سيدأحمد بقناة هارموني تحدى سيادته رجال الأعمال أنه رجل الأعمال الوحيد الذي لم يعتمد على ميراث أسرته وأنه بنى نفسه بنفسه ( مع أن الإعتماد على الأسرة في كل مناحي الحياة ليس فيه ما يشين ) إلا أن سيادته عاد ليذكر بعد أقل من دقيقتين أن أول إنطلاقة له في عالم الأعمال كانت في عام 1987 عندما إشترى باخرة في مزاد علني بميناء بورتسودان بمبلغ ( أربعمائة ألف دولار ) ولم تستطع المذيعة سؤاله من أين أتى بكل هذا المبلغ وهو في ريعان الصبا وهو لم يعتمد على أسرته ؟؟
سلام يا عاطف وكل سنة انت واسرتك بالف خير و عافية ما حضرت السهرة وهى فعلا بتكون تلميع اصلو نحن عندنا نوع الكاردينال ده ذى الوزراء البعمل فضيحة بيترقى كمان الكاردينال الايام دى شايفة فى شوية هبوب جات على نار الفساد الموهطة تحت الرماد عشان كده قالو نذرها فوق العيون و مافى احسن من اجهزة الاعلام للقيام بالمطلوب صحى بلد عجيبة
___________________________ تخريمه لبدرالدين: البوست بتاع اربجى جميل لكن وقف ليه؟؟ بلاهى قول لمحمد عبدالرحمن تعال تم كلامك
Post: #91 Title: Re: سهرة الدلوكة تحمى النوم !!!!! Author: بدر الدين الأمير Date: 09-27-2009, 06:03 PM Parent: #90
Quote: لانو لو نظرت للحن الحزين ده تلقاهو برضو موجود فى بعض من اغانى العروس ذى مبروك عليك الليله يا نعومه وذى يا عينى اللول اللول اعتقد انها ذات اللحان حزينة
سهام قفا نبكى ياستى اللحن في العديل والزين ليس حزين فحسب بل هو جنائزى عديل ... هل لان فكرة العرس نفسها فكرة جنائزية ههههههههههههههههههه
Quote: أغاني البنات: ترمومتر المجتمع السوداني! الشرق الاوسط 3 مايو 2006 العدد 10018 ممنوعة في وسائل الإعلام ومنتشرة على كل لسان الخرطوم: شذى مصطفى «أغاني البنات»، هو الاسم الذي يطلق على الأغاني الشعبية الهابطة، ربما لأن البنات والنساء هن الأكثر غناء لها فى الأعراس والحفلات الخاصة، رغم أنها تتردد على لسان الفنانين الناشئين لـ«تسخين» الحفلات، لما تتميز به من إيقاع سريع. الاسم جاء مجندرا، وكأن الهبوط في الكلمات والتعابير لا يأتي إلا من النساء. هذه الأغاني محظورة في أجهزة الإعلام المرئية والمسموعة، ورغم ذلك فهي أغان متوفرة بكثرة على الكاسيت، وتلقى رواجا هائلا، ومحبوبة من مستمعيها، من كل الفئات تقريبا بسبب كلماتها الطريفة التى كما ذكرنا في حالة تطوّر وتبدل مستمرين، حسب تغيّر المجتمع. تلك الأغاني تقول إن اهتمام الفتيات بالدرجة الأولى في الحياة هو الزواج، دون لف أو دوران. وأشهر الأغنيات التي لم يأفل نجمها منذ خروجها قبل سنوات، هي أغنية «أب شرا» وأب شرا هذا، هو شيخ صوفي شهير، دعواته لا تخيب ولا مرد لها، وخصوصا فيما يتعلق بالعثور على زوج لمن جاءت تتوسل وتستنجد به ـ كما يبدو. وتبدأ الأغنية بأنها ـ أي الفتاة ـ آتية إليه حاملة كل آمالها وأحلامها، قاطعة بحرين ورافعة رايتي «استسلام»، لتشرح له كل ما يجول بخاطرها وتحكي آلامها وهواجسها، بل ويقينها أن هناك عملا معمولا لها يحول دون زواجها، وتسأله الى متى ستظل «بائرة؟» ثم تعلن الفتاة استعدادها للزواج سرا من رجل متزوج، وفي النهاية لا تتورع عن الاعتراف بقبولها بالزواج، ولو بزوج أختها، ملقية بذلك كل القوانين والتشريعات خلف ظهرها لتحقيق حلمها الذي تبدو وكأنها ستجن أو تموت دون تحقيقه! وهي أغنية تعكس الخوف من العنوسة، عند الكثيرات من الشابات، خوفا من نظرات المجتمع وتقييمه، لأن الزواج نهاية حتمية وسعيدة لحياة المرأة، وعليها تقديم التنازلات في سبيل الوصول اليه. في نهاية عقد السبعينات بدأ الشباب في الاغتراب والسفر إلى الدول العربية، وبالطبع صار وصف عريس «مغترب» هو محور معظم تلك الأغاني، وترددت أسماء المدن العربية مثل، جدة ودبي وقطر وليبيا والرياض وأبوظبي. ومع بداية التسعينات حيث تحولت وجهة سفر الشباب الى أميركا وأوروبا، دخلت أسماء المدن الأوروبية والكندية الولايات الأمريكية في تلك الأغاني. وهناك أغنية باسم «أوريزونا»، تلك الولاية الأمريكية، إلا أن موسوعة معاوية يس عن تاريخ الموسيقي بالسودان، أوضحت أن لقب «أوريزونا» كان يطلق على ملوك الجعليين في مدينة شندي، ولا ندري الى أي المعنيين ترمي الأغنية! أما فتى الأحلام الذي يرمز له عادة باسم «حمادة»، ففي الماضي كان موظف الحكومة يقع على رأس القائمة، والمدرسون، والعاملون في السلك الدبلوماسي، ثم أصبح الطبيب بسماعته والمهندس بالمسطرة على أولوية القائمة، ويليهما ضباط الشرطة والجيش ثم التجار، وتتحرك البوصلة العاطفية غالبا تجاه أكثر الشباب ثراء ودعة عيش، كما هناك رفض تام للمجتمع الريفي فى أغنية شهيرة بعنوان «أنا ما بدور المزارعية». وتأخذ تلك الأغنية بإسهاب في وصف الحياة القاسية في الحقول والمزارع وهموم المعيشة، ضاربة بحلم، أن يصبح السودان سلة غذاء العالم، عرض الحائط!، وكذلك هناك رفض تام لموظفي الحكومة، في الأغنيات الجديدة، وكأنما المقاييس انقلبت بقدرة قادر. ورغم اللهاث خلف عريس إلا أن هناك أغنيات ترفض الزواج التقليدي من ابن العم أو ابن الخال، وترفض أن يجبرها والدها على الزواج من شخص يختاره هو: كان حقو تسألني يا يابا في أمري تعرف كمان فكري في شريك عمري مش حية تدفني في بيت يكون قبري والله يابا حرام يبقى الزواج جبري.. ولا ننسى ماركات السيارات، حيث للفتاة السودانية قاموس جيد مواكب لكل السيارات، فتأخذ في مدح نوع السيارة التي يقودها العريس أو الحبيب عادة، بدءا فى الماضي من «سيهانبيرد» الكورية الى «المرسيدس» و«المازدا» و«التويوتا» و«البولو» و«الكريسيدا»، وحتى «الركشة» دخلت في الـ«توب تن»! ومن الطريف أن تقرأ في حلقات النقاش على الإنترنت، مطالبات المغتربين والمهاجرين من أصدقائهم المقيمين في البلد، بمدهم بأحدث «أغنيات البنات» التي خرجت الى النور للطرب، وللتعرف من خلالها الى أين وصل إيقاع الحياة! هناك من يصف هذه الأغاني بأنها هابطة، ليرد عليهم الكاتب الساخر د. فتح العليم عبد الله معلّقا «حقيقة الأمر أن الأغاني والسلوكيات والمعاملات والأخلاق كلها معلقة في حبل اسمه الاقتصاد، فإذا انقطع الحبل هوى كل الغسيل أرضا، فلماذا يتكلم الناس عن هبوط الأغاني ويغفلون باقي الغسيل؟!». وبعض آخر يرى أن تلك الأغنيات تعكس حقيقة مشاعر الفتيات وأحلامهن بيسر وسهولة، ودون تعقيد أو تنميق لفظي، ولها جمهور كبير لا يحق تجاهله، كما تقول الكاتبة أمل هباني التي تطالب بالسماح ببثها في الراديو والتلفزيون.
ما قدرت اعرف راى شذى مصطفى شنو؟؟؟ بدأت بتعريف غنى البنات بأنه اغانى شعبية هابطة (حكم) وانتهت بكلام فتح الرحمن و امل هبانى المقال ما معروف داير يقول شنو؟؟؟؟
بت المجمر عيدك مبارك مع ان العيد خلص بس ربنا يجعل كل ايامك اعياد . الغريبة انا شفت السهرة في اولها ونحن في زيارة ولم اتمكن من متابعتها للاخر استبشرت خير بعفاف الصادق ولانها دائما تثري مثل هذه الحوارات وكذلك الفلكلور والدنقر ولكن حديثك عنها يبدو انها جرت علي غير ما كنت اتوقع ؛ بس الفنانات شكلهم ما يطمن واكيد ما قصرن في الكوجان ويبدو ان التحضير ضاع بين اضابير حفرة الدخان وبيت الحنة والكبريت
Post: #97 Title: Re: سهرة الدلوكة تحمى النوم !!!!! Author: علاء الدين محمد بابكر Date: 10-03-2009, 11:22 AM Parent: #96
Quote: ما قدرت اعرف راى شذى مصطفى شنو؟؟؟ بدأت بتعريف غنى البنات بأنه اغانى شعبية هابطة (حكم) وانتهت بكلام فتح الرحمن و امل هبانى المقال ما معروف داير يقول شنو؟؟؟؟
سلامات يا سهام و تحايا لم و لضيوفك شكرا على جلبك للمادة ... و اعتقد ان شذى كتبت الـ feature بطريقة جيدة وهي كصحفية غير مطالبة بطرح رؤاها مالك تكن كاتبة عمود هي طرحت كل اللآراء و ختمتها بالايجابي، و هو ما يرجح موقفها هي ...
Quote: «أغاني البنات»، هو الاسم الذي يطلق على الأغاني الشعبية الهابطة، ربما لأن البنات والنساء هن الأكثر غناء لها فى الأعراس والحفلات الخاصة، رغم أنها تتردد على لسان الفنانين الناشئين لـ«تسخين» الحفلات، لما تتميز به من إيقاع سريع. الاسم جاء مجندرا، وكأن الهبوط في الكلمات والتعابير لا يأتي إلا من النساء. هذه الأغاني محظورة في أجهزة الإعلام المرئية والمسموعة، ورغم ذلك فهي أغان متوفرة بكثرة على الكاسيت، وتلقى رواجا هائلا، ومحبوبة من مستمعيها، من كل الفئات تقريبا بسبب كلماتها الطريفة التى كما ذكرنا في حالة تطوّر وتبدل مستمرين، حسب تغيّر المجتمع.
وين المهنية هنا ؟ دا كلام كاتبة المقال مش ؟ ما اتفضلت الاستاذة بتعريفنابـ " مِنُنْ " ديل البطلقوا الاسماء ساكت ديل ؟ ح تظل "اغاني البنات " هي اغاني البنات و " الاغاني الشعبية الهابطة " هي الاغاني الشعبية الهابطة ، لحدي ما نعرف " المطلقين " ديل منو : متخصصين ، ارهابيين ، ناس ساي ؟! . . قالوا كلامهم دا وين : في كتاب ، ورشة ،في كفر تحت عمود نور ، و لا في هامش حفلة او سهرة جلسة تلفزيونية بغناء البنات ؟ و منصة الاطلاق و معايير " الهبوط " كانت شنو ؟ بالنسبة لي طالما ( المقال ) ما افصح وعيّن تبقى الكاتبة صاحبة الفكرة و هي المطلق للاسم ، و يظل دا انشاء و كلام تقريري من غير اسناد او إحالة لمرجع موثوق
بمناسبة الاحالة دي ؟ . . الاحالة الفي " التى كما ذكرنا في حالة تطوّر . . . " هل في جزء من المقال ما تم ايراده هنا ؟ و ين الذِكر دا ؟
و شنو الجاب الجندرة هنا ؟ بالمنطق دا اذا ربطت الدلوكة بالجعليين او الطمبور بالشايقية ، او النقارة بقبائل جنوب كردفان . . الوازا بجنوب النيل الازرق . .. الخ ، ح تبقى دي عنصرية مش ؟
هي يا سهام البوست طلع عن سهرة التلفزيون؟ تصدقي ما حضرتها كنا مسافرين ومتلميين مع اهلن لينا والونسة هي الحمتنا النوم ما التلفزيون لكن شايفة شجرة البوست بتقت ليها كم فرعن اخدر وزين
Quote: استبشرت خير بعفاف الصادق ولانها دائما تثري مثل هذه الحوارات وكذلك الفلكلور والدنقر ولكن حديثك عنها يبدو انها جرت علي غير ما كنت اتوقع ؛ بس الفنانات شكلهم ما يطمن واكيد ما قصرن في الكوجان ويبدو ان التحضير ضاع بين اضابير حفرة الدخان وبيت الحنة والكبريت
عشة بت فاطنة سلامات و مرحب بهذا القدوم وقوع الغنايات المحددات ديل بين الاضابير مفهوم!!! لكن شناة اصوات بعضهن غير مفهوم ابدا و ما بتبلع :)
انا الوجعنى فى السهرة غير سوء الاصوات ضياع مقدمات البرنامج فى ما ذكرتى من اضابير ومساهمتهن الفاعلة فى تفشيل الحلقة!!!! سعيدة بمرورك
Quote: انا قت شنو ؟ فتح العليم . . فتح العليم . . قالوا ياخ ! الفتوحات كتيرة ياخ . . فتح مكة . . فتح خشم . . . الخ ------------------ النجيضة : لي بعدين كان مافي زول جاب كلام د. حيدر علي ابراهيم عن ندى القلعة بجيبو براي . . سمح ؟
والله يا قيقا جنس وهم عليك الله عاين جنس حالتى دى الاسم مكتوب قدامى يعنى ببخرتى !!!!! الله فى
لام يا عزاز و تحايا والله كتبت ليك رد طويل لكن راح وين انا ماعارفة المهم خلاصة الكلام انو المقال فى رائيى جايط افتتح المقال بتعريف اغانى البنات بأنها الاغانى الشعبية الهابطة من غير الاشارة من اين اتى هذا التعريف؟؟!!! اما عن سؤالى عن رأيى الكاتبة فلانو فيما ظهر لى فى بعض اجزاء المقال ان هناك بعض اراء خاصة بالكاتب مبعثرة هنا وهناك لمن خلتنى لايصة وتانى كتبت ليك شنو ؟؟؟ ايوااا قلت انى لم احكم على مهنية الكاتبة كصحفية وقلت اذا فعلت فهذا تجنى كبير ..ماااا من مقال واحد يا عزاز ولاحظى انا قلت : "المقال ما معروف داير يقول شنو" وتانى شنو؟؟ أيوااا اتفقت مع قيقراوى وقلت انو سبب ايرادى للمقال انى حسيت انو بيعكس واقع معرفتنا بأغانى البنات (لايصة)!!! عشان كدة الكلام مكرر : انعكاس للواقع و البوح بالمسكوت عنه و نقيف على كده
اتذكرت حاجة تانية انو المقال فوقى يا عزاز اذا نظرتى لتعريف اغانى البنات بالهابطه فى مكان وبالطريفة فى مكان اخر؟؟!!!
ألجندرية سلام والف سلام الكلام بداهو الغيظ من سهرة التلفزيون لكن بدرالدين الله يطراهو بالخير جاب النجيضة و قال نتم النقصت هنا اها عشان كدى قلنا ليكم تعالو ادلو يا بدلوكم يا بت امى بس البركة فى و نستكم
سلام يا ملاسى تصدق حتى الان لم استطيع قراءة المقال الذى اتى به مشكورا قيقراوى .. ولابد ان فى المقال ما حرضة على ذلك الدنيا اول اسبوع والدنيا ربكه... و حيدر داير المهلة
بس مناكفة منى كده ساى خلينى اعلق على كلامك ده
Quote: يظن حيدر إبراهيم أن حشو المقال بالتعبيرات الأكاديمية يجعل من المقال مقال أكاديمي. ______ استشهاده بمحمود درويش؛ شريفة زهور؛ الماغوط؛ و الصحافي المتميز استشهاد .. مضحك.
" مقال اكاديمي " دي ما ادونا ليها ! ممكن تتكرم علينا بالفكة ؟
و بالمرة كدا وكت ماشاء الله ما شاء الله قريت كل استشهادات د. حيدر ( المضحكة ) ممكن تورينا قالوا شنو الجماعة ديلاك حاكم نحن بتوع الاتوبيس ، الشغلة دي ما طقشت عيونا قبل دا ؟ بالمرة كد ازيل الغموض و ارفع حاجز السرية عن شخصية" الصحافي المميز الكتب عن نانسي عجرم " و اتحفظ عليهو المقال زي تحفظو على اسم القناة المشار اليها بـ ( . . . . ) ؟؟
ياعمك انت عفصت الرابط ؟
5 مارس 2008 م لووووووووول كنت وين الزمن دا كلو ؟
ياخ خليك عميق ياخ ! الموضوع هنا :
Quote: سهرة الدلوكة تحمى النوم !!!!!
بالمناسبة فيهو صفحة اولى بغادي و فيها حبر مراق و افكار و عييييييييك اها انا جبت المقال دا في اللول عشان خاطر هندسة احمد التجاني . . نظام نقول ليهو جات علينا انا و اخوي النضيف المساكين ديل ؟
Quote: عبد الدائم وقيقراوى ما بسالكم والله البوديكم تعاينوا لغنا البنات شنو
وحاجة تانية في الصفحة الاولى دار سؤال و حوجة لكلام متخصصين موسيقى ، اجتماع ، انثروبولوجي ، انثروبولوجيا ثقافية ، . . . الخ اها قنا نجيب رأي كان عديل رأي و كان عوج برضو رأي بيني و بينك زي ما بقول استاذنا عادل البدوي ، د. حيدر ابراهيم كتر هواء الدباغة في المقال
و في الآخر لارأي بزيد د. حيدر و لا نقدك و ( استشهادوالمضحك ) في نظرك بقلل من قامتو الاكاديمية السامقة
--------------- ياخ جبت لينا الكلام ياخ ! امسك في الموضوع الاساسي و سو مشهادك فيهو خليك من د. حيدر . . شفتا سهام لسة ما ادتنا الاوكي و اعتمدت المقال كوثيقة في البوست دا ! انت ما شفت استدراكي في المداخلة البعديها طوالي ؟!
يا سهام نعوض عليك بدعوات . . موافقة ؟
اللهم اعز البوست بأحد الاحمدين ( د. احمد طراوة او د. احمد القرشي ) او الاثنين و معاهم استاذ / محسن خالد
اها قصرت معاك ؟
ابقى طيب ابوي و للدكتور حيدر إبراهيم الاحترام و لك و لصاحبة الضيافة مثله
طبعاً مضحك .. فحتى سهام المجمر – كمثال - رغم ثقلها السياسي و النضالي؛ لم تلجأ لتبرير كتابتها عن سهرة الدلوكة بأن خير الله خير الله قد كتب عن بديعة مصابني أو عبد الوهاب بدر خان كتب عن ببا عز الدين.
لقيتك صاحي و الله . . طيب مالك شككتني انك بتضحك ليك سنة و نص في استشهادات د. حيدر ؟ دي مدة طويلة خلاس . . الضحك بشرطك بالطريقة دي اهتم باللياقة الاسفيرية نحن بنحبك ما تبقى زول مؤلم ياخ ؟
اللهم ثبت اجر اخونا حسين و اثيبه على خدماته الاسفيرية ، اللهم عظم اجره و لا تحرمنا سطره
----------------- ياخ تعال ما نخرب للزولة دي بوستها . . اتفقنا ؟ لكن ما تنسى ترفع البوست كل ما تلقى نفسك فاضي . . سمح ؟
Post: #117 Title: Re: سهرة الدلوكة تحمى النوم !!!!! Author: Adil Al Badawi Date: 10-05-2009, 12:50 PM Parent: #116
Quote: اللهم ثبت اجر اخونا حسين و اثيبه على خدماته الاسفيرية ، اللهم عظم اجره و لا تحرمنا سطره
يا قيقا ألحق سطيرك دا أسحبو* حسين دا كان جا لقاهو قاعد في حِتّتو ياهو المرق ليهو منّو، بي الميّت كِدا، بي خمسة حسنات نظير خدماته الاسفيرية والحالة التشكيل والترقيم ما محسوب! أوّل حسين ماسك في سطيرو دا عَبَط! الراجل راقدلو فوق راي.
يا سهام ويا عموم ستّات الغُنا كيفنّكن،
دحين عاشميق زول الغُنْية هو عاشميق الأَصَم (تُقرأ كما تقرأ الفصحى "يوم الأحَد") وألاّ عاشميق ألّصَم (تُقرأ كما تقرأ الدارجة "يوم اللّحد")! حتى غُنا الضهاري بنات المُدُن (لندن وروما واخواتها) لبّسنّو بواريك!...كان يخلّن الشغلة لي خالاتنا الفي الصفوف الخلفيّة ويبقن في الليلتِن.
________ * خطوة استباقية عشان ما نخرب للزولة دي بوستها . . اتفقنا ؟
وسلامات يا عادل و تحايا بشكل عام وانا أعتقد وكدة ان طبيعة اغانى البنات (موضوع وكلمة و لحن واداء) لا تسمح الا بالتخفيف والله اعلم
يا حسين يا خ عفا الله عنك و هداك لقد اصبتنى فى مقتل قد اعود فى بوست منفصل لنفى ما اوردته من صفات و اتداعى ليكم تداعى لمن تتحيرو
اما مقال حيدر يا جسين الله عالم ما لقيت فرقة لكن حرضنى ما دار بينك و قيقا لقراءة متعجلة وسريعة و بجيكم راجعة هسه دى
Post: #120 Title: Re: سهرة الدلوكة تحمى النوم !!!!! Author: أبو ساندرا Date: 10-06-2009, 09:46 AM Parent: #119
السهرة عجبتني واكتر حاجة عجبتني الخالة التي غنت كما يغني عوض الكريم عبدالله والبنت ام توب مورد الكانت مستمتعة بمزاج وماخدة راحتها ع الأخر وكمان عجبتني مونيكا وليم عشان لسانها كان اوضح واحلى من لسان كل الحاضرات من زنجيات ومن مدعيات عروبة
بس عن { بالتشديد} السؤال: سهرة الدلوكة واغاني البنات
أي بنات ؟ ---------- هل الأغنيات او مايسمى بغنا البنات عموما بيعبر عن كل البنات ؟ وفيه تستوي بنات الفصول مع بنات الحقول بنات لقيط القطن مع البنات حلاوة قطن
بنات الهامش الحقيقي في جبال النوبة والنقسنا والنيل الازرق واعالي النيل مع بنات المدن ب خرطومها وام درمانها ومدينة السني ود مدني ؟
بنات الرأسمالية الطفيلية وبنات المسحوقين تحت وطئتها وآلة السوق الطاحنة بنات الديم وما خلفه أم بنات المنشية وماجاورها
البنات المعتقلات في الوطن أم البنات الماسورات في الشتات سواء كان مهاجر ام غربة وليل ومطر ؟
ثم هل الدلوكة وايقاعاتها هي الوحيدة الصالحة لضبط ايقاع غنا البنات أم انه إستلاب جعلي الايقاع وعلى حساب ايقاعات اخرى في الهامش ؟
هل أغنية البنات بتعبر عن حال ام عن آمال ؟
بتكشف حال و أحوال ؟
ثم ماذا عن البنات البيشبهن الأولاد والأولاد العاملين فيها بنات وكلهم/ن برعو/ن في أغاني البنات
سلامات يا قيقا و ملاسى عليكم الله ادونى فرقة ادخل معاكم فى شكلة مقال حيدر دى (وش ضاحك)
بدأ د. حيدر مقالة بالتبرير لكتابتة عن ندى القلعة. اعتقد و فى ذهنه ما الثال السلبى لندى القلعة عند بعض من الاعلام و والمثقفاتية و بعض من رجرجة و دهماء (وش ضاحك) ...واتى بالامثلة التى اضحكتك يا ملاسى عشان يقول ما انا اول زول اكاديمى او مفكر او مثقف او شيخ اكتب عن "أمثال" ندى القلعة
Quote: (ولكن ترددت في البداية في الكتابة وان يحمل المقال عنواناً عن الفنانة المثيرة للجدل. فتصورت أن عدداً من القراء سيراها مجرد " سفاهة" أو " عدم الموضوع" كما يقول الشباب. وقد يضيف البعض ان سفاهة الشيخ لا حلم بعدها.)
و اعتقد- والله اعلم- ان تبريرة قد يربك قليلا بعض المتلقين للمقال فبعضهم قد يرى ان فى هذا تعالى الاكاديمى والمثقف و البعض الاخر ممكن يرى ان لا مشكلة فى هذا التبرير الذى اتى فى كلامى ادبى جميل و ذكر الامثلة هى من عمل الاكاديميين... اما فى يخص رائيى وهو ليس بقاطع الشكلة :) فأن هذة المقدمة حاملة التبرير لم تفسد التناول و التحليل العلمى لظاهرة ندى القلعة وان كانت سالبة لاخرين
ما لم بستطيع عقلى هضمة فهما وياريت انو الاتنين (واخرين) يساعدونى ما جاء فى هذا الاقتباس:
Quote: جلست الى التلفزيون فأطلت امرأة " في كامل مشمشها" – كما يقول محمود درويش أي شديدة الاعتناء بنفسها لكي تبدأ اغنيتها قبل ان يسمع صوتها وان تقدم اغنية بصرية للمتلقي لكي تمتلكه تدريجياً وفجاءة في نفس الوقت. وبعد هذه المقدمة و التهيؤ تستطيع ان تدمج اغنيات السمع و البصر او كل الحواس و العقل. معا
وخصوصا اذا تم ايجاد صلة بينها و بين ما جاء هنا
Quote: تقدم ندى القلعة ثقافة جماهيرية مختلفة بغض النظر عن تسميتها ثقافة هابطة او منحلة او غير محترمة
!!!! لماذا غض النظر عن هذه التسميات وقد جاء فيما فى اول الفقرة نفسها التعريف الاتى:
Quote: مثلت ندى القلعة ثقافة مضادة لثقافة الهيمنة الرسمية ورغم القمع و الاموال و الجهود من قبل الدولة و الاجهزة الرسمية لفرض ثقافة مهيمنة ذات طابع ديني لم تستطيع الدولة الغاء ظاهرة ندى القلعة وغيرها من الظواهر الثقافية و الفنية التي تحرج المشروع الحضاري. وهى تحاربه وتضعفه و تتحداه دون اللجوء الى الآيديولوجيات الضخمة و مؤامرات السياسة وحتى اللجوء الى الكفاح المسلح. فهذه الظواهر تستخدم دبابيس صغيرة في تنفيس هذا البالون الضخم. وتقدم ندى القلعة ثقافة مقاومة وممانعة لا تريد ان تكون جزءا من الثقافة الكبرى، وهى ثقافة فرعية (sub – culture) ولكنها شديدة التأثير وقادرة على جذب الناس بوعي او لا وعي. فندي القلعة قادرة على حشد الاف المشاهدين و المعجبين و الفضوليين، بينما تعجز الثقافة الرسمية عن حشد الناس رغم توقف العمل وملاحقة الموظفين و الموظفات، وتحضير الباصات ووجبة فطور. ويمكن لها ان تدخل في تحدي: من يستطيع حشد الناس طوعيا في ميدان عام او استاد مستخدما سلطة قائمة على الرضا و القبول و المحبة؟
!!!! ربما لفتت نظرى هذه الفقرة بما فيها من تناقض لكراهيتى للاستخدام اغانى هابطة و ربطها مع اغانى البنات.. اذا كنا سلمنا بأن اغنيات ندى يمكنها ان تتحدى حشود السلطة بالرضا و القبول و المحبة
Quote: وفي حالة ندى القلعة هى تقاوم الكآبة و الغناء، فهى و الانقاذ يمثلان نموذجين متناقضين
فكيف يستقيم ان نطلق عليها هابطة (ما يجونى المتقفين و يتكلمو لى عن وعى الجماهير و طبيعتها والا ح نخش فى تنظير شديد عن دور الفنون فى ترقية الذوق العام و ما بعرف شنو داك) ما اقصدة ببساطة انو هابطة دى فيها حكم جاى من فووووق و نازل على صحابات الشىء زاتو الجاى من واقع محدد و معاش (بنية تحتية) انتجت ما اطلق عليه من بعد "هابط" و هذا هو الظلم بعينه. ياخ عجبتنى الحتة دى كيف:
Quote: ومازلنا نعتبر العيب و العار مرتبط بسلوك المرأة، وقد اعتذر مظفر النواب لتلك التي تبيع الجسد الغاني بينما هناك من يبيعون ضمائرهم ومواقفهم
لانها عرضت نموزج واقع لمفارقة المجتمع الذكورى لدروب العدالة حتى فى القبح يعنى زى ما يقول ليك حقكم سميح و حق الناس قبيح (بكسر الفاء والباء) عشان ما تخربو القافية وكدى يعنى..
فى بوست لاشراقة وجدت هذا الكلام و رأيت انو ايضا مناسب هنا اها قلت اجيبو ليكم
Quote: ما ياها دي أيام الغُنا الهابط !! والتشجيع الهابط ..!! والفرح الهابط !! ما جبت حاجة من عندي ____________________________
اهو ده اللى بقصدوا ياعمران وقدرت عبرت انت عنو الغنا الهابط والتشجيع الهابط والسياسة الهابطة وال... يعنى ده كلو متسق مع حالات الهبوط الحاصلة ولا شنو؟
يعنى اذا كان اغانى البنات توصف بأنها هابطة و فى نفس الوقت قاعدين ينظرو لينا بأنها انعكاس للواقع بيكون الواقع زاتو هابط لابد فى حالة كهذه ان يكون الهبوط متسق
سلام يا سهام و ضيوفها الكرام و خصوصاً سيدي البدوي شريكي في الاتفاقيات النرجسية . . امسحا لي في وشي دا
بالتأكيد يا سهام ما جبت مقال د. حيدر صنم لنعبده . . كلامك عاجبني بالحيل بس عشان تستقيم قراية المقال اعتقد من العدالة انو مفروض يقرأ في سياقتو التاريخية . . قصة الشريف المبسوط منها و مشكلة بلوبلو - ندى القلعة . . الحملة عليها . . . الخ http://www.alwatansudan.com/index.php?type=3&id=9515 المقال دا بعد مقال د. حيدر لكن ممكن اديك صورة تاريخية ما علينا
ما عارف الصورة المرفقة بالمقال بسودانيز جات من وين ؟ حقو الريس بكري يراجع المسألة دي . .
ما اعتقد انو د. حيدر كان محتاج مبرر لقراية ظاهرة اجتماعية !! ( رأي شخصي ) و عشان كدا ما ركزت في تبريرو الشافو ملاسي ( مضحك ) - أكيد من حقو طبعاً - و مشيت لعبارة بعده اعتقد انها المهمة
Quote: فالاهتمام الجاد والرصين بهذه الظواهر الثقافية عادي وطبيعي.
و ليته كان شاف المسألة اكتر من " عادي و طبيعي " و رفعا لواجب عديل ! الظاهرة دي موغلة في القدم و متجذرة و ليها تأثيراتها . . . ليه ما لقت الاهتمام و السبر الكافي لاغوارها ؟ لحدي اسي قاعدين نسأل هل اغاني البنات هي اغاني الدلوكة ؟ و لا زي ما قالت استاذة / شذى هي الاغاني الشعبية الهابطة ؟ . . . و لا زي ما قال ترباس مرة انو لو غننها البنات عادي لكن كان غناها راجل بتبقى هابطة ؟!! اضيفي تسآؤلات بدر الدين الامير ، و كمان زيادة خير كدا اضيفي ليها اسئلة ابو ساندرا كلها ؟ مش في هوة كبيرة هنا ؟ جماعة الحداثة ساكين لي وافد القيم الجمالية من برة بس ! . . . و ما جايبين خبر تراثهم ولا قادرين يفرزوا قوانينو البتحكمو و البتطور بيها ؟ حداثة بتقطع مع التراث شن طعما بلا زيادة اغترب ؟ . . . يا زولة دي حداثة ما جايبة حقها و ما حبابا و الله . . النسألكم الشغلة دي هي ظاهرة ثقافية صافية ؟ و لا اقتصادية و اجتماعية و بعدين ثقافية ؟
نرجع لمقال د. حيدر ابراهيم احادية التحليل ما عجبتني ، و كنت ( بحلم) بقراية للظاهرة في تاريخانيتها و تحليل شامل اقتصادي / اجتماعي / ثقافي . . الشغلة بدت مع الانقاذ ؟ و لا بدت بندى القلعة ؟ . . . و اني لأراه هو القادر على ذلك بكل تأكيد بالمناسبة دي وين " قسمة و نصرة و مجروس . . . ؟ ديل زول سأل عنهن مافي ؟ و في كتير من الفقرات كنت بقرأ الكاتب و هو خرج من وقار و برودة المحلل لمنابزة السياسي و الهتاف الصاخب يا سيدي البدوي هواء الدباغة دخل بشباك المقال فخرجت احلامنا بالباب . . او كما قلت رضيانين عليك و عافين منك ليوم الدين . . . الا باقي فينا من عشم انو نصل
------------------ يا سهام ما تتواضعي ساكت ياخ ما دام قالوا عندك تاريخ سياسي و نضالي بعد ! . . يبقى عندك . . بهتوك الما بشبهوك ؟ في مقال سمح كدا قريتو زمان لكاتبة ، سحب الشغلة دي من الحكامات و دورهن في النضال الوطني و التحرر . . بس بدورلو فاتحة كاربة كدا اها آ بت الشيوخ انت و سيدي البدوي ادونا الفاتحة و انا بساعدكم بالجكة . . اتفقنا ؟
Quote: أي بنات ؟---------- هل الأغنيات او مايسمى بغنا البنات عموما بيعبر عن كل البنات ؟ وفيه تستوي بنات الفصول مع بنات الحقول بنات لقيط القطن مع البنات حلاوة قطن بنات الهامش الحقيقي في جبال النوبة والنقسنا والنيل الازرق واعالي النيل مع بنات المدن ب خرطومها وام درمانها ومدينة السني ود مدني ؟ بنات الرأسمالية الطفيلية وبنات المسحوقين تحت وطئتها وآلة السوق الطاحنة بنات الديم وما خلفه أم بنات المنشية وماجاورها البنات المعتقلات في الوطن أم البنات الماسورات في الشتات سواء كان مهاجر ام غربة وليل ومطر ؟
ياخ بمناسبة اسئلتك دى ممكن تدونى فرقة انظر شوية انا أعتقد انو اغانى البنات دى بشكل عام ممكن نقول انها الاغانى الشعبية التى تغنيها البنات (كنوع) (غض النظر عن الطبقية و الجهوية و العرقية) وهى اغانى مجهولة الشاعرة و يشترك فى اثرائها عدد كبير من المغنيات بعد انتشارها بينهن. يا ابوساندر غنية البنات لما تتغنى فى حى شعبى ولما تتغنى فى المنشية صداها واحد عند البنات يعنى تنال نفس القسط من الهجيج والربة حتى ولو كلمات الاغنية لا تخاطب الوضع الاجتماعى فى المنشية؟؟؟!! ودى ملاحظه خاصة (عليك الله مادايرين لينا باحث هنا؟؟!!) الله فى :) يعنى اذا فى غناية من واحده من المجموعات الانت ذكرتها نظمت ليها اغنية تعبر عن حالة معينة تجد هذه الاغنية طريقها للانتشار بين المجموعات التانية وتتعرض للزيادة و النقصان على حسب واقع كل مجموعة تقع فى ايدها... اما عن الجهوية فمن واقع المعايشة انو لمن الغنا يدور البنات بينطربن لكل اغانى الشمال..الوسط..والغرب (مافى غنا بنات من الجنوب قاعد يجينا و دى قصة طويلة) وبمعرفة انو الاغنية جاية من وين احتمال لانها بتعبر عن المشترك فى اشكاله المختلفه والمتضامن معه وده بيخلى الغنامحسوس لكل الشرائح
Quote: هل الدلوكة وايقاعاتها هي الوحيدة الصالحة لضبط ايقاع غنا البنات أم انه إستلاب جعلي الايقاع وعلى حساب ايقاعات اخرى في الهامش؟
والله استلاب دى كتيره :) فى واقعنا السودانى المتداخل و المتشابك ده نحن شعب واحد مهما قالو و قالو وهم شن قالو (اغنية) ممكن يكون السبب ارتباط الدلوكه باغانى البنات انها الغنيات الاوائل وجدو فيها الايقاع الحار البخش الراس والتوفر ورخص الاسعار و سهولة حملها و استخدامها -والله اعلم- اها كيف معاك؟؟؟
Post: #125 Title: Re: سهرة الدلوكة تحمى النوم !!!!! Author: Ishraga Mustafa Date: 10-07-2009, 08:52 AM Parent: #100
Quote: بالنسبة لى اغانى البنات هى وسيلة لإنتزاع حق التعبير عن خلجات النفس في مجتمع ذكورى قامع ومتناقض وهى علاج او تحايل لكشف انثوى خلاق وتنبيه عن الداء والدواء من خلال موسيقى الشعر والتغنى والملاحظ ان السيمة الاساسية فى اغانى البنات هي تمرير الرغبات من خلال المثل او القيم الذكورية اغنانى البنات مهما كان شكلها ونوعها وطريقة تقديمها هى عديدة ومتعددة ومتاحة والناقص هو تحليها ودوافع وجودها
تسلم يابدر
سهام كيفنك
انا ماشاهدت البرنامج لانى اصلا مقاطعة التلفزيون من فترة لكن الموضوع مهم وداير ليهو قراية متأنية
هل فى غناء اسمو غناء بنات؟ ياريت لو فى طريقه يساهم دكتور مجدى اسحق بما كتبه فى المجال ده رؤية واعية وبتفتح مسارب للتفكر
Quote: و ليته كان شاف المسألة اكتر من " عادي و طبيعي " و رفعا لواجب عديل !
موش كده؟؟؟ انت عارف التبرير ده بديك احساس انو فى حاجة غلط ... يعنى تخوف د.حيدر من رد فعل قرائه تحديدا ينبئك بالكثير عن رؤية هؤلاء وتعاملهم مع مثل هذه الظواهر الغنائية (ما بقول النسوية فقط لانو ممكن نلقى نفس التخوف لو كان عاوز يتناول ظاهرة حمادة بت مثلا) كدى نتخارج من دى :) ونرجع لمقال حيدر زى ما قلت لكن اولا خلينى اتفق معاك فى كلامك ده
Quote: الظاهرة دي موغلة في القدم و متجذرة و ليها تأثيراتها . . . ليه ما لقت الاهتمام و السبر الكافي لاغوارها ؟ لحدي اسي قاعدين نسأل هل اغاني البنات هي اغاني الدلوكة ؟ و لا زي ما قالت استاذة / شذى هي الاغاني الشعبية الهابطة ؟ . . . و لا زي ما قال ترباس مرة انو لو غننها البنات عادي لكن كان غناها راجل بتبقى هابطة ؟!! اضيفي تسآؤلات بدر الدين الامير ، و كمان زيادة خير كدا اضيفي ليها اسئلة ابو ساندرا كلها ؟ مش في هوة كبيرة هنا ؟ جماعة الحداثة ساكين لي وافد القيم الجمالية من برة بس ! . . . و ما جايبين خبر تراثهم ولا قادرين يفرزوا قوانينو البتحكمو و البتطور بيها ؟ حداثة بتقطع مع التراث شن طعما بلا زيادة اغترب ؟ . . . يا زولة دي حداثة ما جايبة حقها و ما حبابا و الله . . النسألكم الشغلة دي هي ظاهرة ثقافية صافية ؟ و لا اقتصادية و اجتماعية و بعدين ثقافية ؟
عشان كده قلنا يا ناس العلوم الاجتماعية هوووى تعالو افتونا
Quote: احادية التحليل ما عجبتني ، و كنت ( بحلم) بقراية للظاهرة في تاريخانيتها و تحليل شامل اقتصادي / اجتماعي / ثقافي . . الشغلة بدت مع الانقاذ ؟ و لا بدت بندى القلعة ؟ . . . و اني لأراه هو القادر على ذلك بكل تأكيد
لكن يا قيقا الزول ده قال انو عايز يتكلم عن ندى القلعة والعنوان "ندى القلعة و ثقافة الاختلاف و الممانعة" يعنى هو اختار كدة
واتفق معاك تماما انو نحن محتاجين لتحليل شامل وياريت د.حيدر يفيدنا
عارف يا قيقا لو نظرنا للمقال ده تانى فيهو الكتير الممكن يعمم خصوصا فى حتة ثقافة الاختلاف و الممانة دى وفى اغانى بنات كتيرة بتعبر عن التمرد على واقع القهر و التكبيل وانا كانت فى بعض الاحيان مغلفة بماهو مقبول من قيم المجتمع
يا قيقا ياخ فى حاجة انتبهت ليها هسة فى مقال حيدر ضحكتنى و غاظتنى فى نفس الوقت
Quote: تلك العجلة بره ماقصدي المضرة بس عايزة يطلق الضرة
بشجع (ارتقاشـة) يا سهام في واحد من الجماعة اياهم مستواهو (ليــق) خالص .. كلما يجي يرد لي .. يشجع لي فريق .. غايتو حسع انا متابعو لفى بي الدوري الممتاز كلو .. حسع في دوري الأولى .. قمت قلت اجي اقطع ليو الطريق بي هنـا .. احتمال يجي يقول ليك حسين ملاسي دا بشجع برشلونــة .. .. عايني ... احمد الله سيدي ما حضرت الحلقة دي .. أنا في زولة اسمها سلمى العسل يوم بالصدفة جابوهـا معاها زول اسمو القلع عبد الحفيظ .. الاتنين قالو قاعدين يغنو (كيف لا اعشق جمالك) من اليوم داك .. بقيت اخاف يجيبو اي زولة ويقولو دي فنانه .. عند شريط بتاع دلوكـة مبالغـة .. لكن ممنوع نم النشر بأمر الطبيب لكن ممكن نجازف ليكم منـو حقنتين تلاتة .. ملحوظـة: أنا أحب هاجـر كباشي
Quote: احمد الله سيدي ما حضرت الحلقة دي .. أنا في زولة اسمها سلمى العسل يوم بالصدفة جابوهـا معاها زول اسمو القلع عبد الحفيظ .. الاتنين قالو قاعدين يغنو (كيف لا اعشق جمالك) من اليوم داك .. بقيت اخاف يجيبو اي زولة ويقولو دي فنانه .. عند شريط بتاع دلوكـة مبالغـة .. لكن ممنوع نم النشر بأمر الطبيب لكن ممكن نجازف ليكم منـو حقنتين تلاتة .. ملحوظـة: أنا أحب هاجـر كباشي
اوووووو ولدنا تمبس والله بركة دى الجابتك استوحشنا لونستك ياخ اها يا تمبس النحكى ليك.. فى واحد من عرس اخوانى و نحن جايبين فرمالتنا الجيلى الشيخ (قبل الاعتزال)و نمنى النفس بهجيج مبالغة لقينا ليك العروس مصرة انو هذا القلع برضو يغنى .. قلنا مافى مشكلة و انا كنت ما سمعتو ..ما طالبنى حليفة يا تمبس لما بدأ يغنى انا دموعى قربت تنزل وقربت افرتق الحفلة..و اعمل فيها اهل عريس شكالين لولا الاجاويد.. اها قام جا ليك يوم الصبحية قسمة حضور و الهجيج الف و بين الفواصل طنبور اصلى تقوم تجى ناطه ليك منو ووو؟؟؟ تجى ناطة شروق ابوالناس وقال انا عاوزة اغنى بين فواصل الرقيص اهداء للعروس... طبعا العروس دى لولا انها من الخطوبة بقت فردة كان رميت عليها يمين الطلاق انى دى:):) لووووووووووووووووووووووول
Quote: تسلم يابدر سهام كيفنك انا ماشاهدت البرنامج لانى اصلا مقاطعة التلفزيون من فترة لكن الموضوع مهم وداير ليهو قراية متأنية هل فى غناء اسمو غناء بنات؟ ياريت لو فى طريقه يساهم دكتور مجدى اسحق بما كتبه فى المجال ده رؤية واعية وبتفتح مسارب للتفكر بتابع واتمنى يسعفنى الزمن واساهم
يسلم الاقتباس الجابك يا اشراقة :) والله البوست يفتقد بدرالدين عسى ان يعود واتمنى ايضا ان نرى اسهامات مجدى اسحق
