Post: #1
Title: محمود جنا ود طه: قصيدة الراحل الحردلو في الأستاذ محمود: كنشاسا 1975
Author: عبدالله عثمان
Date: 06-11-2012, 05:55 PM
قال عنه وعنه الأستاذ محمود
ستنفعه
فطوبى له وليغدق عليه الرب شآبيب الرحمة
فالى القصيدة
محمود جنا طه
للشاعر الأستاذ سيد احمد الحاردلو
-1-
محمود جنا طه
واحد من الاحياء
مع انوعمرى انا
لم امدح الاحياء
بس يا سلام .. سلم
زول .. يستحق القول
والحمد والتبجيل
-2-
عارف محمود دا
لو كان فى بلد
غير هاذها السودان
كان توجوه ملك
وكان عمدوه امام
-3-
شوف يازميل الزول
وكتين يكون مشغول
بالمولى .. صح بالصح
وكتين يشوف فى الدين
الجاى والجايين
من العديل والزين
وكتين يسوى الدين
شيتاً محبة .. ولين
كما زمان الرسول
عليه صلى الله
وجملة الصاحبين
ما فيه قسر وجبر
ما فيه زنديه
ما فيه شنق وجلد
ما فيه ايديه
ما فيه الا الحب
ما فيه غير الجمال
ما المولى حب وجمال
-4-
شوف ناس فلانين .. ديك
سوولنا كيف الدين؟!
شيتاً قطع يدين
شيتاً شنق وسحل
شيتاً رصاص وكتل
وشوف كمان دايرين
يجونا بى اللفة
استغفرك يا زين
-5-
تصور الدنيا
لو داك اصبح امام
حرم يهاجر النور
وسكن معانا الضلام
حرم يموت الكلام
فى ايها شافع
داير يسك الحمام
ويتاتى للعصفور
حرم نموت بالزور
والدنيا تبقى قبور
-6-
محمود جنا طه
ملك وملكه علم
وفقير وفقره علم
ويمين .. يمين الله
لو عندى ايد لاحقه
اديه تاج الرجال
وابنيلو فى الخرتوم
فوق البحر تمثال
لكين خسارتى انا ..
الما عندى ايها حال
-7-
هذا اخوى محمود
واحد من الاحياء
مع انو عمرى انا ..
لم امدح الاحياء
بس يا سلام .. سلم
زول يستحق القول
والحمد والتبجيل
كنشاسا 1975
http://www.alfikra.org/article_page_view_a.ph...cle_id=52&page_id=13
|
|