سودانيز اون لاين .. أهمية الموضوع و اخطاء الكاتب

يتعلق بهذه المسألة أمر يعاني منه كثيرا اعضاء البورد الجدد ..
يكتبون – ما يحسبونه – موضوعات هامه لكنها لا تجد عندهم الردود و المشاهدات الكافية ..
ربما يكتب أحدهم الموضوع و هو يتوقع أن يتم رفعه الى المانشيتات و يتجاوز عدد قراءة الالاف الخمسة و يسرع الى ست او سبع صفحات في يوم او يومين.
لكنهم يرتدون أسفين حين يهوي موضوعهم بلا مداخلات تذكر الى قاع البورد.

بعد عدد من البوستات و ايام من الاحباط يكتشف الكتّاب الجدد أن مصيدة النقاش في البورد لا يلجها الناس الا عبر بوابة اسم الكاتب.
لكن هذا ليس موضوعنا هنا.

ما أود نقاشه – و قد لا أجد من يحفل بهذا النقاش معي – هو سؤال أهم بالنسبة لي.
هل تشفع أهمية الموضوع لاخطاء الكاتب ؟

هذا السؤال يحمل شقين.
الشق الأول هو خطأ الطرح او خطأ اللغة .. و قد يكون كليهما.

خطأ الطرح يتمثل في عنوان يجذب شريحة من اهل البورد للاتفاق مع كاتبه.
دعنا نقول أنه عنوان كروي يقول مثلا :
الهلال أحق و أجدر بالفوز بكأس السودان.
انا لا ادري ان كان هناك كأس بهذا الاسم حاليا أم لا .. فجاملني فيه لو سمحت.
سنفترض أن كاتبا كتب عنوانا كهذا، و اتبعه بمداخله ضحلة لا تؤكد هذا العنوان. لكنها تعتمد مثلا على قراءة سياسية لأن جمال الوالي هو صاحب قناة الشروق الكيزانية و أن المريخ برئيس كهذا لا يتسحق شرف الفوز بكأس السودان.

العنوان التقريري الذي يفترض أنه نتيجة توصل لها الكاتب تدفع مؤيدي النتيجة للوقوف معه و تأييده رغم خطأ طرحه الواضح. فتجد محاولات تبرير النتيجة الخطأ بمقدمات جديدة من المتداخلين.
و حيرتي هي هل هذا مقبول ؟
الكاتب اتخذ مقدامت خاصة خطأ و قرأ قراءة سيئة ليتوصل لنتيجة نتفق معه فيها .. فهل هذه النتيجة مبرره لتجاوز الخطأ ؟
ستلاحظ هذا المثال بصورة اوضح في بوستات السياسة.
لو كتب كاتب بوستا بعنوان : الانقاذ تواصل الانجازات.
ثم ذكر في البوست خبرا اثبت له المتداخلون انه خطأ او مجرد اشاعات حكومية مبنية على التقارير المفعمة بـ " كلو تمام سعادتك " ستجد المداخلات المؤيدة تحاول ان تتجاوز موضوع البوست لتقول " بغض النظر عن صحة هذا الخبر فإن الانقاذ يكفيها أنها فعلت و فعلت ".
في تجاوز صريح لخطأ الكاتب و رغبته و رؤيته. طبعا الرغبة تتحول سريعا للمواضيع الجديدة التي يطرحها المتداخلون و يذهب الخطأ الاساسي الى ركام الذكريات.فلو حاولت اثارته نظر لك المتداخلون في بلاهة و عدوك سمجا لا تقرأ الى أين سارت ركاب البوست متجاوزة هذا الخطأ الطفيف.

في أمثال هذه البوستات تحس جديا أن ليس المهم ما هو مطروح هنا .. المهم أن رؤيتي الكلية لأمر ما ( انحياز سياسي .. حزبي .. كروي .. صداقة ) لا يمكن أن تخرج مهزومة بغض النظر عن خطأ الكاتب في القضية.

و من نوعية هذا الخطأ الاخطاء اللغوية.
و يعتذر عنها الكتاب أو مؤيديهم بأمرين.
الأول هو أن المهم أن الفكرة وصلت. و الثاني هو أن الكاتب ليس عربيا. اما لانتمائه لاثنية غير عربية في نفسه أو بحجة أن السودان كله ليس بلدا عربيا.
أنا لست من أنصار فوبيااللغة و تقديسها على حساب النص. لكن هذا لا يعني أن نتعامل مع اللغة باعتبارها موصلا اضطراريا نتعامل معه فقط بأقل قدر ممكن من الحرص. لأن مهمة اللغة ليست أن توصل لنا الفكرة العامة. بل انها تضعنا داخل تفاصيل التفاصيل. لو كان الكاتب يريد ان يوصل لنا الفكرة العامة لاكتفى بثلاث او اربع كلمات يجمعها بلا افعال او ضمائر او حروف جر و عطف.

اما الحجة الثانية بعدم العروبة الخاصة او العامة فهي محزنة حين تقارنها بالسخرية بمن يكتب بالانجليزية و يخطئ. فعلى حين تجد اللغات الاجنبية منا اهتماما مرضيا لا تجد لغتنا الموحدة للتفاهم بين ابناء الوطن هذا الاعتناء. فبغض النظر عن عروبتنا او افريقيتنا الا ان اللغة العربية هي – حتى الان – اللغة الجامعة و الموحدة للعدد الاكبر من ابناء الوطن. و يعجبني جدا زميلنا دينق في جودة تواصله بها. فهو يكتب بها معبرا عن رأيه بجودة لا يمتلكها كثير منا ابناء العرق العربي المزعوم. لو كان دينق يكتب بلغة الدينكا و ولياب يكتب بالنوبية و احمد موسى يكتب بلغة البني عامر لما فهم احدنا الاخر. لكن العربية هي اللغة التي تجمعنا حتى لو كرهناها او كرهنا سبب معرفتنا بها. فلماذا لا نحترم هذا الوسيط الذي يوضحنا للاخرين و نحرص على جودة وسيط اخر ليس له ذات التأثير بيننا ؟
ان اظهار احترامنا لهذا الوسيط ( اللغة العربية ) هو جزء من احترامنا لمن نخاطب.
تماما كأن تعد زيارتي لك مرتديا عراقي و سفنجة نوعا من عدم احترامك اظن المنطق يجعلك تمتعض من مخاطبتي لك بلغة غير متماسكة و مليئة بالاخطاء.
لو عنّ لي أن أقول هنا أني لا احسن الانجليزية مثلا لنظر لي الناس نظرة الجاهل . بينما لا يجد اعترافي باني لا أجيد العربية أي مشكلة بل ربما وجد التشجيع.
أليس هذا غريبا ؟
تخيل لو كتبت عنوانا يقول
Togither aginest Kezan
ما هو حجم الانكار الذي سأجده مقارنة بلو كنت كتبت :
ساوياً ضد الكيزان
الخطأ العربي سيجد له المتداخلون ألف تبرير و عذر و يتواصل الحوار. بينما الخطأ الانجليزي سيعني صلبي على ايقونة الحضور أعلى المنبر.
فلماذا ؟
أليس تجويد اللغة التي نخاطب بها الاخر واحدة ؟ أم أن لغة الغرب مقدمة على لغة التواصل المحلي بيننا ؟

الشق الثاني هو اخطاء الكاتب خارج بوسته موضوع النقاش.
اكتب شاتما و ظالما لعضو في بوست اخر. و افترع بوستا اخر ابشع به فيه. فينزوي الاف الاعضاء خلف خاصية القراءة بدون رد.
ثم افتح موضوعا اخر مهما. فيتنادى الناس الىّ. يتداخلون مادحين جودة طرحي و أهمية موضوعي ، بل ربما اتحفني احدهم بانه يتابع مواضيعي بشغف و اني ازين الصفحة الاولى بحضوري البهي.
كأني لست ذلك الذي كنت اشاتم منذ قليل.
فاذا جائني الذي شاتمته يحمل غبينته هرع اليه جماعة يلومونه و يحملون عليه أنه يحاول ان يحرف البوست.
بل ربما لا يستطيع التداخل اساسا لأن كل كلمة مدح تقال لي يحسها هو كأنها موجهة ضده في هذه اللحظة.

عضو يشتم و معروف للجميع بقسوة الفاظه .. يفرون ان كتب عن عضو اخر و يتظاهرون بالعمى.
فاذا كتب في الكرة او الغناء تنادوا اليه !!
فان جاء احد مشتوميه يطلب ثأره وجد لازمة د. مصطفى محمود تنتظره انه يشخصن البوستات و يعمد لاهانة الكاتب ليحرف الموضوع.

تخيل معي أن يكتب عضو هنا ابشع العبارات في حق زميل او زميلة لنا هنا. ثم يفتح بوستا اخر عن الكرة او السياسة فنهرع نناقش و نتداخل. ثم بعد كل هذا نسأل في براءة أطفال الصف الثاني الابتدائي عن كثرة الشتائم في المنبر و لماذا لا يفصل بكري الاعضاء ؟
لو فصل بكري كل عضو شتّام لما وجدنا بوست فلان الذي نتداخل فيه. فان كانت رغبتنا في فصل العضو الشتّام حقيقية فإن ذلك يعني أننا على استعداد لفقد بوستاته. فلماذا اذن ندخل له بوستا اخر ؟
هل لأن أهمية الموضوع تشفع لاخطاء الكاتب ؟
هذا هو السؤال الذي لم أجد له اجابة.

ازيّك ياحمور :

متابعه معاك ..

أصلّي المغرب وأجيك بمزاج ..

تحياتي ,,

نتابع حبيبنا حمور

اهلين يا اماني ..
ربنا يتقبل ..
لو جيتي لقيتيني مافي البوست ده مفتوح للنقاش العام و ما احتكار مني .. الناس تتناقش زي ما عايزه و تطرح وجهة نظرها ..
البيت بيتكم.

حبابك عمو العوض.

طيب جيت راجعه ..
أول مرّه أتداخل في بوست بيقيّم أو ينتقد أو يناقش أمر متعلق بسودانيز ككل,
وحأحاول أحصر نفسي في نقاط طرحك ..
الأخطاء اللغويه وأخطاء تناول الموضوع,

بالنسبه للأخطاء اللغويه العاديه فلا ينبّه لها عادة الّا شخص متصيّد لأخطاء الكاتب عادة ..

كتّاب سودانيز فيهم المتخصصين لغويا وابداعيا وما الي ذلك,
لكن فيهم كتير زيّي غير متخصصين في اللغه,
وفي الضعيفين عديل في موضوع اللغه العربيه,
وليس من شروط العضويه أن يكون العضو مجيدا للغه العربيه بأي حال ..
المكان هنا بيسع الجميع باختلاف مجالاتهم وميولهم والمهم هو الفكره قطعا ..
ده خصوصا في مواضيع النقاش,

طيب خطأ الكاتب, لايراه الكاتب خطأ اطلاقا ..
يعني علي سبيل المثال,
أنا أرفض تسجيل الحضري للمريخ لسبب بعيد عن مهارات الحضري الكرويه,
ولأسباب تتعلق بأحداث سياسيه تتضمن عجرفة الحضري نفسه المعلومه..
وعليه أري انه أي نادي سوداني لايجب أن يسجّل الحضري مطلقا ..
لما حأطرّح فكرتي دي هنا أكيد لن تروق الفكره للمريخاب, خصوصا اذا أعلنت هلاليتي ..
وبالتالي فمنطقية طرحي بالنسبه لي, خطأ كاتب بالنسبه لغيري ..

مع اني أنظر للموضوع من زاويه مختلفه .. ومقتنعه برأيي والا لما كتبته ..

ممكن موضوع مهم ما يلاقي حظه من النقاش بسبب موقف الكاتب من قضيه أو موقف الأعضاء من الكاتب, (في دي صدقت)
خصوصا اذا كان ما عندو شلّه تدعم طرحه ..

وهنا هل خطأ الكاتب انه رايه لايوافق الجماعه؟



تحياتي,,

Quote: مصيدة النقاش في البورد لا يلجها الناس الا عبر بوابة اسم الكاتب.

و جنسه سواء كان ذكراً أم أنثي



* متابعكـ يا حمور و موضوعكـ جيد كالعادة ..

متابع معاك يا حمور...

الموضوع دا أنا أديتو "هبشة" قبل كدا....

يكون كويس لو أديتنا طلة على الخيط دا...

طبقات ود حطب الله -1-


مودتي..

ود حطب الله

Quote: هل لأن أهمية الموضوع تشفع لاخطاء الكاتب ؟ هذا هو السؤال الذي لم أجد له اجابة.

Quote: بعد عدد من البوستات و ايام من الاحباط يكتشف الكتّاب الجدد أن مصيدة النقاش في البورد لا يلجها الناس الا عبر بوابة اسم الكاتب

حمور احترماتى
يبدو لى ان وجدت الاجابة على هذا السؤال ضمن البوست نفسه
اسم الكاتب ياحمور هو مربط الفرس فى هذا المنبر وهو الذى
يشفع له فى كل اخطائه ليس فقط على صعيد السلوك الغير جميل
بل فى كل شى يعنى حتى ولو كان الموضوع باهت لايرتقى للنقاش
تجد الكثيرين يتدافعون الى البوست بدافع ذلك الاسم البراق
او على الاصح الذى جعلوه هم براق لاادرى كيف؟ ومتى؟ ولو دخلت
فى اى احتكاك مع اصحاب هذه الاسماء فسيكون مصيرك العزلة والنفى
الاجبارى ولن تجد بوستاتك مايشفع لها ،، اذا اهمية الموضوع لاتشفع
لاخطاء الكاتب بقدر ماتشفع الاسماء .......
متى تنتهى اسطورة هذه الاسماء فى المنبر حتى
نعطى كل ذى حق حقه فحرام ان تضيع بوستات فيها مجهودات ضخمه
لمجرد ان صاحب البوست ليس من ضمن هؤلاء ترى كم من الذين احبطوا
داخل المنبر وهم يعانون مزيدا من التجاهل الغير مبرر والغير منطقى؟!!
محبتى

الاخ حمور زيادة

السلام عليكم

الاخطاء في المعلومة اي كان نوعها في البوست او المداخلة لا شك انها عظيمة
ويجب علي صاحبها التريث قليلا قبل ان يدفع بها في هذا المنبر.

الاخطاء اللغوية مع صحة المعلومة قد يجد معظم الناس لصاحبها بعض العذر
لاسيما ان البعض هنا قد لا يكونوا ملميين بدرجة عالية بقواعد اللغة العربية
ولكنهم في نفس الوقت لهم افكارهم النيرة والمفيدة والمحترمة.

ودمت اخي

حمور ود أخت أمين ، سلام
ما عارف كلامي ده بيركب وين في موضوعك ده ، لكن العايز اقولو في موضوع الشتائم ده ببساطه شديده :
في تلاته أضلاع لمثلث الشتائم في المنبر ده :
- الاعضاء الذين لا يشتمون .
- الاعضاء الذين يشتمون .
- الإداره ممثله في بكري وحده لا شريك له .
(الاعضاء الذين لا يشتمون ) لا يستطيعون وقف (الاعضاء الذين يشتمون ) من الشتيمه ، لا بالتي هي أحسن و لا بالتي هي أسوأ ، غاية ما يستطيعون فعله هو مقاطعة بوستاتهم و ده حاصل لحد كبير ، المشكله إنو (الاعضاء الذين يشتمون ) بجوك في بوستاتك أو في بوستات ناس تانيه يفرغو ما في جوفهم من شتائم و إساءات ، و طالما القوانين الكفيله بردع (الاعضاء الذين يشتمون ) معلقه للزينه في الصفحه الرئيسيه ، تظل مشكلة إنحطاط اللغه الحاصله هنا من شتائم و إساءات و بهتان للناس بالباطل مسؤلية ( بكري وحده لا شريك له ) !

بالنسبه لده

Quote: ما أود نقاشه – و قد لا أجد من يحفل بهذا النقاش معي – هو سؤال أهم بالنسبة لي. هل تشفع أهمية الموضوع لاخطاء الكاتب ؟

ولا أهمية الموضوع و لا أخطاء الكاتب بيمثلو أي أهميه لمعظم الناس في هذا المكان ، القصه كلها الكاتب في عضمتو !

سلام يا مدثر

Quote: متى تنتهى اسطورة هذه الاسماء فى المنبر حتى نعطى كل ذى حق حقه فحرام ان تضيع بوستات فيها مجهودات ضخمه لمجرد ان صاحب البوست ليس من ضمن هؤلاء ترى كم من الذين احبطوا داخل المنبر وهم يعانون مزيدا من التجاهل الغير مبرر والغير منطقى؟!!

أظننا متفقين في إنو المساله كلها الكاتب ، لكن شايفك شايف المساله دي كانها محض سوء ، و في ظني أنها ليس كذلك .
الكاتب اللي الناس بتقرا ليهو وصل للمرحله دي بتجويد كتاباتو و مداخلاتو لحدي ما الناس بقت بتقرا ليه بغض النظر عن الموضوع أو الأخطاء الفيهو ، ليه ما الناس تكتب و تكتب و تجود كتابتها إذا هي عايزه يقرو ليها ؟
و صدقني يا مدثر - و أنا متابع المنبر ده من زمن بعيد - كان في أعضاء هنا لو كتبو بوست بلا عنوان تلقه حصل الصفحه التانيه في ساعه من كترت المداخلات ، هسي لو عملو تلاته بوستات في اليوم مافي زول بيقرا ليهم ، لانهم ما كانو بيكتبو فيما ينفع الناس ، كلها شتائم و إساءات و خوض في أعراض الناس بالحق و الباطل ، عشان كده في الأخر يذهب الزبد جفاء و يبقي ما ينفع الناس ، و لا حل لكل من يعاني من مشكلة تجاهل الناس لمواضيعهم غير المزيد من الكتابه و المزيد من التجويد و حتما سينتبه الناس لكتاباتهم .

أخونا عبدالرحمن ، سلام

Quote: الاخطاء في المعلومة اي كان نوعها في البوست او المداخلة لا شك انها عظيمة ويجب علي صاحبها التريث قليلا قبل ان يدفع بها في هذا المنبر. الاخطاء اللغوية مع صحة المعلومة قد يجد معظم الناس لصاحبها بعض العذر لاسيما ان البعض هنا قد لا يكونوا ملميين بدرجة عالية بقواعد اللغة العربية ولكنهم في نفس الوقت لهم افكارهم النيرة والمفيدة والمحترمة.

أنا مختلف معاك و مع حمور جدا في النقطه دي !
المنبر ده قدرات الناس بتاعت اللغه العربيه فيهو متفاويه بشكل كبير جدا لانو منبر مفتوح بمعني الكلمه ، فيهو ناس زي محمد زين الشفيع و محسن خالد قرو الابتدائي مع سيبويه و الخليل بن أحمد و ناس زيي و زي و ياسر طيفور عربيناأصلا ما شادي حيلو !
عشان كده أخطاء الناس الاملائيه و المعرفيه بتاعت العربي ما مفروض تكون مشكله أصلا ، عكس كتاب الجرائد و المجلات و ناس التلفزيون و الراديو و بقية الوسائط الإعلاميه بإعتبار انها منبر مغلقه لا يجب أن تدخلها إذا لم تكن لديك القدره أللازمه لتطويع لغة الضاد .

بالنسبه لإجابة سؤالك ده يا حمور :

Quote: تخيل لو كتبت عنوانا يقول Togither aginest Kezan ما هو حجم الانكار الذي سأجده مقارنة بلو كنت كتبت : ساوياً ضد الكيزان الخطأ العربي سيجد له المتداخلون ألف تبرير و عذر و يتواصل الحوار. بينما الخطأ الانجليزي سيعني صلبي على ايقونة الحضور أعلى المنبر. فلماذا ؟

لانو نحن بنكتب في منبر بالعربي ، الداير يتفلسف و يكتب بالإنجليزي أخير يكون عارف نفسو بقول في شنو ! إلا في حالة ما عندك كيبورد عربي مثلا و بقي الإنجليزي وسيلتك الوحيده لمخاطبة الناس الموضوع ببقي مختلف .

ياخي دي حاجه جميله جدا تورث ليك بوست و سيدو حي !!

Quote: أظننا متفقين في إنو المساله كلها الكاتب ، لكن شايفك شايف المساله دي كانها محض سوء ، و في ظني أنها ليس كذلك . الكاتب اللي الناس بتقرا ليهو وصل للمرحله دي بتجويد كتاباتو و مداخلاتو لحدي ما الناس بقت بتقرا ليه بغض النظر عن الموضوع أو الأخطاء الفيهو ، ليه ما الناس تكتب و تكتب و تجود كتابتها إذا هي عايزه يقرو ليها ؟ و صدقني يا مدثر - و أنا متابع المنبر ده من زمن بعيد - كان في أعضاء هنا لو كتبو بوست بلا عنوان تلقه حصل الصفحه التانيه في ساعه من كترت المداخلات ، هسي لو عملو تلاته بوستات في اليوم مافي زول بيقرا ليهم ، لانهم ما كانو بيكتبو فيما ينفع الناس ، كلها شتائم و إساءات و خوض في أعراض الناس بالحق و الباطل ، عشان كده في الأخر يذهب الزبد جفاء و يبقي ما ينفع الناس ، و لا حل لكل من يعاني من مشكلة تجاهل الناس لمواضيعهم غير المزيد من الكتابه و المزيد من التجويد و حتما سينتبه الناس لكتاباتهم

أمين
لك الود
انا متفق معك فى مسألة الكاتب بس المسأله عندها شقين
الشق الاول اتفق معك فى ان المواضيع الجيده متابعه من
كثير من الناس داخل وخارج المنبر ودون شك التجويد والمثابره
هى من استقطبت الناس لمتابعة الكاتب..
لكن بالنسبه للنقاش والمداخلات وهى جزئية ذهب اليها اخونا حمور
اعتقد واكاد اكون متيقن انها فى غالبيتها تعتمد على اسم الكاتب فقط
وهذا مايجعل الكثير من البوستات الجيده تسقط دون ان تجد نصيبها من النقاش
اتفق معك ان هناك صحوة حدثت مؤخرا لكنها بسيطه وبطيئة جدا اتمناها لو سارت
بعجله اكثر...
طبعا كلامك صاح ماعندنا حل غير التجويد والمثابره ثم الانتظار عسى ولعل ان ينصلح
حال المنبر ويبقى فى النهاية ماينفع الناس...
شكرا على كلماتك
محبتى

امين

سلام

Quote: عشان كده أخطاء الناس الاملائيه و المعرفيه بتاعت العربي ما مفروض تكون مشكله أصلا

انا معاك في النقطة دي 100%
طيب وين الاختلاف ؟

Quote: ياخي دي حاجه جميله جدا تورث ليك بوست و سيدو حي !!

هاهاها (وش ضاحك)
قوية

تسلم ياحبيب

عبد الرحمن يا حبيبنا

Quote: انا معاك في النقطة دي 100% طيب وين الاختلاف ؟

مشيت قريت مداخلتك تاني و لقيت فعلا كلامك صحيح ، أنا الما قريتو صاح !
إذا لا خلاف بيننا و خلينا نختلف مع (حمور ود أخت أمين ) الشايف إنو نحن مفروض نجضم العربي قبل ما نجي نكتب هنا !

حذف للتكرار











____________________
طبعاً سبب التعديل ممكن يكون نفسه موضوع قائم بذاته أو حتى تاريخ و زمن التعديل نفسه

سلام يا حمور

مداخلتي دي ممكن تعتبرا (نموذجن) من النماذج الممكن تضيفا للحالات الفوق دي

Quote: سلام يا حمور كيفك يا أمين ياخي مشتاقين بالله اسمع انتا حمور أداك التوكيل بتاع الرد نيابة عنو في البوست دا شايفك شغال ترد بالنياية عنو طوااالي كدا قالوا الولد بيطلع لي خالوا لكن الخال البيطلع لي ود اختو دا ما لاقانا

اضيف للمداخلة وش شمتان (الوشوش ما عرفتا بجيبوها من وين) - برلوم

و طبعاً حاكون ما قريت موضوعك يا حمور و لا هببت الردود و لا اشتغلتا بيها الشغلة

تحياتي للمتداخلين جميعا ( بما فيهم الخال امين ) ..
اخطاء اللغة ليس المقصود بها الضبط الكامل لكل حرف و تصريف .. بل الاخطاء البشعة التي تشوش المعاني ..
فجميع الذين تفضلوا بالمشاركة هنا ناعين على انفسهم جودة اللغة لم يرتكبوا ( في نظري ) اخطاء في مداخلاتهم هذه تفسد المعنى او تشوش على القارئ.


ما تستفزوني عشان اجيب ليكم امثلة.

سيد البوست الاخ حمور سلام

اتفق مع الاخ امين بان بعض الاسماء اكتسبت عدد كبير من القراء نتيجة لمجهودهم وتجويدهم لكتاباتهم لغة وموضوعا

واحسن حاجة في سودانيز اونلاين تكتر بيها عدد قرائك
تشوف ليك شلة كاربة
حزب
و...

ولكن ارجع تاني لرأي الاخ امين وانصح بها نفسي اولا
تجويد الكتابة لغة وموضوعا قطعا ستكن من الكتاب الذين يقرأ لهم الناس

Quote: ما تستفزوني عشان اجيب ليكم امثلة.

قول ممكن أستفزك كيف بس عشان أعملها وتدي بوستك ده شوية روح واقعية...

صاحبك عزام قال بيحب الشمام، لكن ما ممكن يصطاد بيهو سمك...وفعلاً كلامو صح، لأنو أسع أنتا سايقنا في السماء ساي يا حموّر
وممكن زول بيتداخل هنا عشان يثبت براءته من "أخطأ الكاتب"!

بالمثال يتضح المقال...ويمكن أن تبدأ بي فوراً ، فتحقيق الهدف مهم يا صديقي

تحياتي
أنور

سلامات يا حمور والضيوف

انا اكثر زول برتكب اخطاء طباعية في الدنيا دي
لسبب اني عندي مشكلة في نظارتي ابت تتحلى خالص لو في طبيب عيون يساعدني
بعداك اصلو ما عرفت للكيبورد دا نهائي خاصة محل الهمزات

والشهور الفاتت بتسقط حروف كثيرة عشان احافظ على السلام البيتي
حيث يشتكي زوجي الذي يبعد الكموبتر من سريرو اقل من نص متر
من طقطقة الكيبورد فاشتريت كيبورد بلاستيكي الى الان ما قادرة اسيطر على كل الحروف.

ما عندي شلة ولا كوم الحمدلله لكن عندي قراء كتار..

سلام يا حمور و كل المتداخلين\ــــات

طيب بالنسبة لمشكلة الاساءة و النبذ..وقصة بوست للنبذ و يفتح تاني بوست فيه موضوع جميل
طيب هل نحاكم العضو بكل بوستاته و الي الابد..؟؟؟؟؟؟؟؟؟
ام نحاكمه في بوست الاساءة و تفعيل اللوائح فيه..
مثلا ..............يا حمور لنفترض انو انا قمت فتحت بوست...وحصل خلاف و ادي الي التنابذ معاك انت ده..
وجات كل الناس و غلطتني .
وبعدها مثلا بكم يوم..فتحت بوستا جميل و مفيد...هل سوف احاسب علي البوست القديم بتاع النبذ ولا ح تجي الناس و تشارك عن موضوع البوست. الجديد....؟؟؟؟؟؟؟؟
الاخطـــــــــــــاء..
وبالذات العنوانين المضللة....هي من اسوأ الاشياء...
لان من يكتب البوست ...يعرف تماما ماذا يريد من البوست و الي أي مدي يمكن ان يحقق اهدافه...
ونجيكم تاني راجعين


____
الخال امين...وين صاحبك الطريفي ود الزين..
هههههه

Quote: مثلا ..............يا حمور لنفترض انو انا قمت فتحت بوست...وحصل خلاف و ادي الي التنابذ معاك انت ده.. وجات كل الناس و غلطتني . وبعدها مثلا بكم يوم..فتحت بوستا جميل و مفيد...هل سوف احاسب علي البوست القديم بتاع النبذ ولا ح تجي الناس و تشارك عن موضوع البوست. الجديد....؟؟؟؟؟؟؟؟

... وفي السياق ذاته... افترض أني دخلت في بوست هواري المفترض وشتمتك وشتمت هواري نمر وشتمت هواري بومدين بالمرة، وبعد شويّة ركّبت مكنة العضو الفاضلة إنسانة وفتحت بوست يعلن عن وظائف قد يستفيد منها قراء البورد، كيف تكون استجابة المتداخلين؟؟؟ يشكروني أم يحاسبوني وفقا لما بدر مني في بوست هواري؟؟؟
لك التحية ولقراء البوست مثلها.

Quote: ما أود نقاشه – و قد لا أجد من يحفل بهذا النقاش معي

حمور لك التحايا ودعنى ابدأمن هذا التساؤل واورد اجابته مما جئت به انت فى مدخل حديثك وهوالاتى

Quote: مصيدة النقاش في البورد لا يلجها الناس الا عبر بوابة اسم الكاتب.

يعنى من غير تفكير سوف تجد من يحفل ويحتفل وانا منهم

Quote: هذا السؤال يحمل شقين. الشق الأول هو خطأ الطرح او خطأ اللغة .. و قد يكون كليهما.

بالنسبة لى ....اهمية الموضوع لا يشفع خطأ الكتابة والا لفقد الموضوع اهميته لركاكة فى اللغة او اخطاء املائية كثيرة ولا اقصد هنا اخطاء الكيبورد المستدركة بفطنة القارى وانما الجهل به كما وانى ضد كل من يترصد فى ضمة او كسر ضاربين باهمية الموضوع عرض الحائط وهنا اؤيد الاخ امين ( خال حمور) فى كلامه.

وحديثى يمتد طالما نتحدث عن هذا المنبر والذى يعبر عن حال واقعنا كثيرا واؤيدك اهمية الكتابة واجادتها باللغة العربية وعلينا ان نتخيل ان لو كتب ابو امنة حامد بالهدندوية او خليل فرح بالنوبية كيف يكون وضعهم من( الاعراب)

كن بخير ونشوفك فى معرض الكتاب انشاء الله

Quote: ما أود نقاشه – و قد لا أجد من يحفل بهذا النقاش معي – هو سؤال أهم بالنسبة لي. هل تشفع أهمية الموضوع لاخطاء الكاتب ؟

متابعون يا حمور..في انتظار إكتمال "الحَلّة" لعملية الإنضاج الفكرية
سأمر إن شاء الله

Salam Hammoor
----------------------------
Anwar King Salam
I will give two examples where Hammoor Ziadah (himself)
deliberately and intentionally made insulting mistakes regarding Arabic.
He did it at least twice.
For the purpose of fooling his poor readers once ,
and to satisfy these poor readers the other time .
I think the main problem in this board is not writing.
The main challenging problem here is reading.
I don’t have an Arabic labeled keyboard now.

الأخت د. نجاة
الأخوان :
حاتم علي
حمور زياده
د . محمد حسن
هواري نمر
أنور كينج
محمد الأمين موسى
حامد محمد حامد
عماد موسى محمد
محمد سليمان
شكرا لمروركم و كان حمور ما جاء لحدي المساء بتوقيتنا ، حا أرد عليكم فردا فردا إن شئ الله ...

بوست وجدت نفسي فيه .
فلك الشكر حمور
اتفق مع امين في جانب لغة الكتابة
فالمهم توصيل المضمون والجوهر
برغم ان الاتقان افضل الا ان التمسك بكل القواعد اللغوية وغيرها
تدخل المتلقي احيانا في متاهات قراءة ما بين السطور
فالكلام حمال اوجه .
وساعود لجانب هام قد تناولته (قريبا )
اكرر شكري

تحياتي للجميع ..
مشيها نظري يا أنور .. خلينا نناقش الفكرة بدل نشخصن الحاجات.


ـــــــــ
محمد الحسن سليمان ..
ما متذكر دي المرة الكم أطلب منك ما تخش لي بوست.
اتمنى انك تحترم نفسك و تحترم رغبتي و تتفضل مطرودا الى بوستاتك التي تعشق الغمز فيها و اللمز سواء بكيبورد عربي او انجليزي.
رؤية اسمك في احد بوستاتي اثقل على قلبي من الكفر على قلب المؤمن.

Quote: ما متذكر دي المرة الكم أطلب منك ما تخش لي بوست. اتمنى انك تحترم نفسك و تحترم رغبتي و تتفضل مطرودا الى بوستاتك التي تعشق الغمز فيها و اللمز سواء بكيبورد عربي او انجليزي. رؤية اسمك في احد بوستاتي اثقل على قلبي من الكفر على قلب المؤمن.

الان بحديثك اعلاه قتلت الهدف الاساسى لموضوعك...
المنبر يكفل لكل شخص الرد والدخول لكل الموضوعات
المطروحه..وانتا تتمتع بكامل حقك فى عدم الرد لما يبغضك!!

تحياتي يا بوب ..
لا ادري كيف قتل حديثي اعلاه الهدف الاساسي من البوست ..
ما هو الهدف من البوست الذي ظهر لك ؟
بالنسبة لي تصرفي يوافق سؤالي اعلاه ..
فمحمد الحسن سليمان من اكثر الناس اثارة - عندي - للمشاكل و محب للغمز و و اللمز.. فانا لا ادخل بوستاته حتى لو كتب شيئا مفيدا مرة لأن أهمية الموضوع لا تغطي عندي على اخطاء الكاتب .. و التمازح و التحاور مع محمد الحسن في موضوع يعني تشجيع له - في نظري - للاستمرار في ما يفعله.

و أظن ان ذات المنبر الذي يكفل لكل شخص الرد و الدخول لاي موضوع اظنه ايضا يعطيني حق أن امتعض من دخول أحدهم و أن اقول له لا تدخل بوستاتي. بل يعطيني حق ان اتعجب لماذا يحرص محمد الحسن على قراءة ما اكتب و يصف من يقرأ لي بأنهم مساكين !!

انتظر مساهمتك اخ بوب في موضوع البوست. و شكرا.

مقطوع الطاري كيفنك ابوي
اتوسدتلي لقدابة واتكيت في رملة حوشك دة
ولي قدام

Quote: ادري كيف قتل حديثي اعلاه الهدف الاساسي من البوست .. ما هو الهدف من البوست الذي ظهر لك ؟ بالنسبة لي تصرفي يوافق سؤالي اعلاه .. فمحمد الحسن سليمان من اكثر الناس اثارة - عندي - للمشاكل و محب للغمز و و اللمز.. فانا لا ادخل بوستاته حتى لو كتب شيئا مفيدا مرة لأن أهمية الموضوع لا تغطي عندي على اخطاء الكاتب .. و التمازح و التحاور مع محمد الحسن في موضوع يعني تشجيع له - في نظري - للاستمرار في ما يفعله. و أظن ان ذات المنبر الذي يكفل لكل شخص الرد و الدخول لاي موضوع اظنه ايضا يعطيني حق أن امتعض من دخول أحدهم و أن اقول له لا تدخل بوستاتي. بل يعطيني حق ان اتعجب لماذا يحرص محمد الحسن على قراءة ما اكتب و يصف من يقرأ لي بأنهم مساكين !!

الاخ حمور

لا اظن بانك تنتظر شهادة كفاءه من الاخ محمد سليمان لكى يجيز ماتكتبه من عدمه..
والاخوة الاقراء لديهم من الفطنه ما يكفى ليحكموا عليك...
لا تنساق خلف تعليقات الصحابى الجليل!

ــــــــــــــــــــــــ
واصل فى طرحك حتى لايخرج البوست
عن مجراه!

تحياتي يا حمور زيادة

Quote: و أظن ان ذات المنبر الذي يكفل لكل شخص الرد و الدخول لاي موضوع اظنه ايضا يعطيني حق أن امتعض من دخول أحدهم و أن اقول له لا تدخل بوستاتي

لم أمنعك أن تمتعض من من كتابتي
لكن لا يحق لك أن تمنعني من التداخل معك مادمت تكتب في منبر عام

Quote: . بل يعطيني حق ان اتعجب لماذا يحرص محمد الحسن على قراءة ما اكتب و يصف من يقرأ لي بأنهم مساكين !!

كيف لا يكونون مساكين إذا كنت تقول لهم
إن مفردة "ولغ" مشتقة من "لغة"
ثم هم يسلمون بذلك

يا محمد الحسن سليمان ..
مازلت اكرر أن بوستاتي ليست مكانا تمارس فيه عقدك و امراضك النفسية ..
ارجو ان يكون عندك الاحترام الكافي لنفسك لتوجد في مكان يرحب بك و ان يكون عندك الاحترام الكافي لي أني لا اريد ضغائن نفسك و هواجس امراضك في بوستاتي .. ان في باندويث بكري متسع لتمارس عشق ذاتك و الحقد على الاخرين ..
فانصرف راشدا ان كان فيك رشد.

يا حمور ما من حقك تقول لزول ما تخش بوستاتي ، لو ما عايز تداخل معاهو ما ترد عليهو ...
و يا محمد سليمان إنت بتبوظ في البوست ده ، الناس هنا بتناقش في قضيه عامه ، لو عندك ماخذ علي كتابات حمور ، أفتح بوست و أكتب الدايرو عنو ...

و الله يا أمين طالما هو موقع حواري و يفترض انو اي دخول بيكون للحوار فمن حقي اطلب من الزول الانا ما عاوز احاورو و لا هو زول حوار بل زول مطاعنات و جرجرة و غمز و لمز من حقي اقول ليو اطل بالله و ما تخش لي.
و الكلام ده ما من الليلة و لا امبارح ..
من اول شهرين لي في المنبر ده كلمت هذا الكائن انو ما عندو شغله بي و ما يخش لي بوست .. لكن نفسو الصغيرة ما بتخليو ..
لو ما خش بوست يمشي يجيب في سيرتك طاعنا غامزا .. مباراه ما بباريو .. يمشي يكب قيحو و امراضو حيث شاء ..
لكن بوستاتي لن امل ان اكرر له انه غير مرغوب به فيها..
مره اكلمو بالواضح و مره اتجاهلو و مره ارد ليو بجفاء .. لكن هو كرامة ما عندو .. و لو ما اخرج خبيثة نفسو ما بيرتاح.
و بما اني لست طبيبا نفسيا فلا شئ يجبرني على احتمال المرضى.

تحياتي مجددا يا حمور

Quote: و من نوعية هذا الخطأ الاخطاء اللغوية. و يعتذر عنها الكتاب أو مؤيديهم بأمرين. الأول هو أن المهم أن الفكرة وصلت. و الثاني هو أن الكاتب ليس عربيا. اما لانتمائه لاثنية غير عربية في نفسه أو بحجة أن السودان كله ليس بلدا عربيا. أنا لست من أنصار فوبيااللغة و تقديسها على حساب النص. لكن هذا لا يعني أن نتعامل مع اللغة باعتبارها موصلا اضطراريا نتعامل معه فقط بأقل قدر ممكن من الحرص. لأن مهمة اللغة ليست أن توصل لنا الفكرة العامة. بل انها تضعنا داخل تفاصيل التفاصيل

إن كنت هنا منبها إلى الأخطاء اللغوية التي تقع عرضا دون قصد من الكاتب
فكيف بكاتب يتعمد تشويه اللغة ويلوي أعناق قواعدها ليدلس على قرائه ؟
بالمناسبة لست وحدك من يمارس هذا

واصل يا حمور وتجاهل مداخلاتي إن شئت
وإن شئت طالبني بدليل على ما أرميك به

يا أمين تحياتي

Quote: و يا محمد سليمان إنت بتبوظ في البوست ده ، الناس هنا بتناقش في قضيه عامه

أنا كمان قعد أناقش قضية عامة من صميم موضوع البوست
زول يلوي عنق اللغة بس عشان يمشي رأيه هو
جاي ينتقد الأخطاء العرضية ؟

Quote: و الكلام ده ما من الليلة و لا امبارح .. من اول شهرين لي في المنبر ده كلمت هذا الكائن انو ما عندو شغله بي و ما يخش لي بوست .. لكن نفسو الصغيرة ما بتخليو ..

كلامك غير صحيح يا حمور
تعال أثبته و دونك الإرشيف
أنت من بادر بالتداخل معي
راجع تأريخ اشتراكك وعدد بوستاتك حتى أول مداخلة لك معي

Quote: أنا كمان قعد أناقش قضية عامة من صميم موضوع البوست زول يلوي عنق اللغة بس عشان يمشي رأيه هو جاي ينتقد الأخطاء العرضية ؟

سلام يا محمد
أخطاء حمور اللغويه ما موضوع عام و الأهم من كده ما موضوع البوست ده و الأهم من الكلام ده كلو إنو ده ما غرضك من النقاش ، إنت عندك مشكله مع حمور حلها بما تراه مناسبا بس بدون ما تبوظ نقاش عام للناس البتتناقش في قضيه بتهمها و تصفهم بأوصاف من شاكله (مساكين) !
يا عزيزي لست بأعلم منك أو من حمور و لا في موضع نصح ليكم ، بس رجاء الموضوع ده ما تناقشو هنا عشان ما تحرف لينا نقاش جادي في موضوع بهمنا ، المانع شنو تفتح بوست باخطاء حمور اللغويه و تكتب فيهو الدايرو ؟

يا أمين تحياتي

Quote: و الأهم من الكلام ده كلو إنو ده ما غرضك من النقاش ، إنت عندك مشكله مع حمور

صدقني ما عندي أي مشكلة مع الأخ حمور
ما عارفك جبت الفرضية دي من وين ؟
مشكلتي مع حمور شنو ؟
حمور شتمني بلا سبب ورددت عليه شتمه
وندمت أني رددت عليه واعتذرت له في أحد بوستاته
هذا أمر تجاوزته
موضوعي الآن واضح جدا:
حمور تعمد لي عنق قواعد التصريف ليدلس على قرائه
هل ينكر ذلك ؟

Quote: موضوعي الآن واضح جدا: حمور تعمد لي عنق قواعد التصريف ليدلس على قرائه هل ينكر ذلك ؟

و أنا كل الطلبتو منك إنك تفتح بوست تاني ولا تناقش موضوعك ده في بوست تاني لانو البوست ده ما موضوعو ( تعمد حمور لي عنق قواعد التصريف ليدلس على قرائه )

يا أمين لك أن تعرف أني أحترم سعيك إلى ترقية الحوار

Quote: موضوعك ده في بوست تاني لانو البوست ده ما موضوعو ( تعمد حمور لي عنق قواعد التصريف ليدلس على قرائه )

بالمنطق دا بوست الأخ أبي الريش عن غرفة الأستاذ محمود
علاقته شنو بمداخلاتك ومداخلات حمور فيه ؟
يا أمين مشاركتي في هذا البوست من صميم موضوعه
هكذا أراها بعيدا عن أي تصور متوهم لمشكلة شخصية مع الأستاذ حمور

Quote: بالمنطق دا بوست الأخ أبي الريش عن غرفة الأستاذ محمود علاقته شنو بمداخلاتك ومداخلات حمور فيه ؟ يا أمين مشاركتي في هذا البوست من صميم موضوعه هكذا أراها بعيدا عن أي تصور متوهم لمشكلة شخصية مع الأستاذ حمور

بوست أبو الريش يا محمد انحرف فيه النقاش بموافقة و مشاركة صاحب البوست ، القصه هنا مختلفه : صاحب البوست مش ما داير النقاش ينحرف و بس ، طالبك عديل بإنك ما تشارك في بوستاتو ، لا ده ولا غيرو ، يعني ما عايز معاك نقاش أصلا ! قلنا ما حقو يقول ليك ما تكتب في بوستاتي ، لكن من حقو يقول ليك ما تناقشني !
لا أنا و لا غيري يا محمد عندهم كلمه عليك تكتب شنو ، بتين ولا وين ، خاطبنا فيك مكامن الخير و ترجيناك إنو لا تفسد علينا البوست ، و في الأخر إفعل ما بدا لك يا سيدي !

Quote: لماذا يحرص محمد الحسن على قراءة ما اكتب

تصدق كلامك دا غير صحيح
فأنا لا أقرأ معظم ما تكتبه
فلا تتوهم أني حريص على قراءة ما تكتب
حتى مداخلاتك القصيرة لا أكمل قراءتها
هل تصدق أني لم أكمل قراءة قصة ولاء

موضوع في غاية الاهمية لكنه ذاهب الى الهاوية نرجو الحفاظ على وجهة البوست .


تحياتي حمور زيادة والجميع .






...................................................................حجر.

Quote: صاحب البوست مش ما داير النقاش ينحرف و بس ، طالبك عديل بإنك ما تشارك في بوستاتو ، لا ده و لا غيرو

ترى كم يلزم العضوية الجديدة من وقت لتعلم – أو تتعلم –
أن لا حق لها في مثل هذه الطلبات الفطيرة

Quote: ترى كم يلزم العضوية الجديدة من وقت لتعلم – أو تتعلم – أن لا حق لها في مثل هذه الطلبات الفطيرة

الاخ حمور و خاله امين
و كل الاخوان المتداخلين
تحياتي

موضوع جيد و حقيقي يطرح وجه نظر جيدة
لكنه لن يسلم من آفات البورد
و سوف يضاف الي القائمة الطويلة من النماذج الجيدة للتحاور عبر السايبر
و ان كان لا اضمن آفة الآفات و هي انجراف البوست

___________________________________

في تقديري ان العلة الأساسية في نقاشتنا في السايبر
هي "التشخيص" او بالاحري التجسيد من "جسد"

بمعني

معظم منتديات النقاش السودانية بدات الكتابة بها باستخدام الالقاب
"النك نيم" و هي بداية صحيحة لان النقاش المفروض يدور حول الفكرة
و ليس بالضرورة ان اعرف الكاتب بل اناقش الفكرة
و ان عرفت الكاتب خير و بركة لكن ليس بالضرورة معرفته

لكن التجسيد خلانا نفك الفكرة و نمسك الكاتب مش كده وبس بل اصله و فصله
و ده هو الخلانا نواجه واحدة من اكثر المشاكل التي هددت منابر النقاش و هي الإساءة او "الشتيمة" و دي قمة التجسيد يعني لو داير تنبذ ليك فكرة ح تقول شنو ضحلة او فطيرة .....الخ الخ
لكن بالتأكيد ما ح تقول ماشه علي حل شعرها

و النهاية بقت وين او الابتذال بقي كيف
دلوقت لو ما جبت اصلك و فصلك و تذكية ما ح تشم منبر نقاش
و برضو الحكابة ما بتسلم


هل التجسيد ده كان ضرورة
افتكر انو ربطو بالمصداقية ح يدخلنا في حكاية البيضة و الدجاجة
و الكتابة السياسية ليست بريئة

هل التجسيد ده عندو مظهر ايجابي
ح اقول بالفم المليان لا و لا و لا (كان الله في عوني)
بالرغم من بوستات العزاء و التهاني و دعوات الرحلات



اخيرا
ايهما اكثر إيلاما
أخطاء الهجاء ام النحو (و لا أبرئ نفسي)

الاخ الفاضل حمور

لك التحية و كل سنة وانت طيب

Quote: و يعجبني جدا زميلنا دينق في جودة تواصله بها. فهو يكتب بها معبرا عن رأيه بجودة لا يمتلكها كثير منا ابناء العرق العربي المزعوم. لو كان دينق يكتب بلغة الدينكا و ولياب يكتب بالنوبية و احمد موسى يكتب بلغة البني عامر لما فهم احدنا الاخر. لكن العربية هي اللغة التي تجمعنا حتى لو كرهناها او كرهنا سبب معرفتنا بها. فلماذا لا نحترم هذا الوسيط الذي يوضحنا للاخرين و نحرص على جودة وسيط اخر ليس له ذات التأثير بيننا ؟

الاخ حمور اسمح لى ان أعلق على الاقتباس اعلاه.

لا أدرى سبب اخيتارك للاخ دينق باعتبار ان العربية ليست لغته الام ؟

من المعلوم بالضرورة ان الانسان ابن بيئته ...

قد يحمل الانسان فى السودان اسما يدل على انه من ناحية بعينها فى السودان

و لكن لولادته و تربيته و تشربه من تلك البيئة فيصير منها و لبس من البيئة

التى استقى منها اسمه و دعنى اعطيك امثلة لاناس جنوبيين بالدرجة الاولى

و اسماؤهم غير ذلك و العكس بالعكس , فمثلا الاخ الدكتور حسن محمد دوكة

الاذاعى المعروف و هو عضو فى هذا المنبر باسم "منوت" فهذا الرجل جنوبى بكل ما

تحمل هذه الكلمة من معنى و غيره كثر .

أنا لا أملك معلومات تفصيلية عن الاخ دينق و لكن اتعامل معه باعتباره

سودانى مثل غير من أعضاء البورد لا ينتقص شيئامن الناحية الغوية او غير ذلك .

شكرا ................. الطيب رحمه

تحياتي يا الطيب ..
انا متفق معاك ..
لكن ضربي لدينق مثلا كان ردا على من ينسبون الكتابة بالعربية للعرق و ليس للثقافة.
يعني لمن زميل حلفاوي مثلا يكتب غلط .. بيكون الاعتذار عنو انو هو ما عربي ..
رغم انو عامل الثقافة البتقولو ده متوفر ليو .. بل ممكن يكون متوفر ليو اكتر من زول جنوبي.
لأنو الحلفاوي ده يفترض انو درس مراحلو الدراسية كلها بالعربي وامتحن شهادة سودانية في البلاغة و الاستعارة المكنية و حفظ قفا نبكي من ذكرى حبيب و منزل ... ناهيك عن الجامعة و البيئة المحيطة بيو و الجرايد البيقراها ..
خليني اكون اكثر تحديدا و اضرب مثل بالصديقة الرائعة و الزميلة نجلاء سيد احمد النجمة المتألقة بلا منازع ..
حين بدأت الكتابة اشار جماعة الى اخطاء اللغة عندها .. فكان عذرها واعتذار اخرين لها انو نجلاء ما عربية ..
ما ذكرته من البيئة عن دينق ينطبق على نجلاء .. فلماذا الاعتذار ؟
انا لا اطالب بأن يكون الكاتب هنا سيبوية او الخليل بن احمد او اسماعيل الكاتب ..
و كلنا نرتكب الاخطاء اللغوية ..
لكن هناك حد أدنى من الاخطاء التي يتعارف عليها الناس .. و ما زاد عنها يحتاج الى مراجعة ..
و الاسوأ من عدم المراجعة الاعتذار بأننا لسنا عربا.
فحتى نجد لانفسنا بيئة ثقافية جديدة و لغة مشتركة غير العربية نظل في حاجة لتجويد هذه اللغة المسكينة.

ـــــــــــ
نجلاء انا ضربت بيك المثل عشان صاحبتي و عارفك ما بتزعلي .. اما بخاري لو زعل فانا ما شغال بيو.

أخى الفاضل حمور

لك التحية و أشكرك على التواصل و الرد الوافى

Quote: تحياتي يا الطيب .. انا متفق معاك .. لكن ضربي لدينق مثلا كان ردا على من ينسبون الكتابة بالعربية للعرق و ليس للثقافة. يعني لمن زميل حلفاوي مثلا يكتب غلط .. بيكون الاعتذار عنو انو هو ما عربي .. رغم انو عامل الثقافة البتقولو ده متوفر ليو .. بل ممكن يكون متوفر ليو اكتر من زول جنوبي. لأنو الحلفاوي ده يفترض انو درس مراحلو الدراسية كلها بالعربي وامتحن شهادة سودانية في البلاغة و الاستعارة المكنية و حفظ قفا نبكي من ذكرى حبيب و منزل ... ناهيك عن الجامعة و البيئة المحيطة بيو و الجرايد البيقراها .. خليني اكون اكثر تحديدا و اضرب مثل بالصديقة الرائعة و الزميلة نجلاء سيد احمد النجمة المتألقة بلا منازع .. حين بدأت الكتابة اشار جماعة الى اخطاء اللغة عندها .. فكان عذرها واعتذار اخرين لها انو نجلاء ما عربية .. ما ذكرته من البيئة عن دينق ينطبق على نجلاء .. فلماذا الاعتذار ؟ انا لا اطالب بأن يكون الكاتب هنا سيبوية او الخليل بن احمد او اسماعيل الكاتب .. و كلنا نرتكب الاخطاء اللغوية .. لكن هناك حد أدنى من الاخطاء التي يتعارف عليها الناس .. و ما زاد عنها يحتاج الى مراجعة .. و الاسوأ من عدم المراجعة الاعتذار بأننا لسنا عربا. فحتى نجد لانفسنا بيئة ثقافية جديدة و لغة مشتركة غير العربية نظل في حاجة لتجويد هذه اللغة المسكينة.]

Quote: انا لا اطالب بأن يكون الكاتب هنا سيبوية او الخليل بن احمد او اسماعيل الكاتب .. و كلنا نرتكب الاخطاء اللغوية .. لكن هناك حد أدنى من الاخطاء التي يتعارف عليها الناس .. و ما زاد عنها يحتاج الى مراجعة

أنت ترتكب الخطأ متعمدا يا حمور
تعال وقل لي كيف "ولغ من لغة"
وإلا فاعتذر

يا أخوانا (ما) تعملوا لينا المنبر محكمة عدل دولية أو محاكم تفتيش .. هناك قانون إلهى يقول: السن بالسن، والعين بالعين والجروح قصاص .. وعلى نفس المنوال الشتمة بالشتمة والركل بالركل والنبذه الفاحشة بمثلها - طبعاً فى حدود أعتدوا بمثل ما أعتدوا عليكم .. وهنا يعنى أن الفكرة الشاذه أو الغريبة يجب أن تواجه بجنسها .. فحينما طرح العلمانيون رفض فكرة تعدد الزوجات .. أتينا لهم بالمصرى النوبى الفحل الذى لا يكل ولا يمل ..
هنا أنموذج .. الزول فى الصورة التالية ظل يسب فينى بدون سبب منذ أن حضرت المنبر .. ولم أرد عليه ولا يوم .. ما الحل؟



قسماً لو لميت فيهو يوم إلا ريحته تبقى طير طير .. وهذا أنذار على الملأ ..

ما لفت إنتباهى هو موضوع اللغة العربية .. ظللت أكتب منذ فترة طويلة باللهجة البقارية التى تنتمى إلى لغة الأستنطاء العربية .. ما رأيك فى ذلك؟
وهنا أقتباس لمزيد من الأيضاح:

Quote: من شواهد الاستنطاء: ما روته أم سلمة - رضي الله عنها - عن رسول الله أنه قرأ "إنا أنطيناك الكوثر". كما قرأ ابن مسعود والأعمش: (وأنطاهم تقواهم) في قوله تعالى: {وَآتَاهُمْ تَقْوَاهُمْ}. ومن ذلك قوله : "لا مانع لما أنطيت، ولا منطي لما منعت"، وقوله: "اليد المنطية خير من اليد السفلى"، ومنه كتابه لوائل بن حُجْر: "وأنطوا الثَّبَجَة" وقوله لرجل آخر: "أنطه كذا". وفي كتابه - - لتميم الداري: "هذا ما أنطى محمد رسول الله لتميم الداري وإخوته …" قال الزَّبيدي: "ويسمون هذا الإنطاء الشريف، وهو محفوظ عند أولاده". وقال ابن الأعرابي: "شرّف النبي هذه اللغة وهي حميرية". ومن شواهدها في الشعر قول أعشى قيس: جيادك في القيظ في نعمة تُصان الجِلال وتنطى الشَّعيرا وأنشد ثعلب: من المنطيات المركب المعج بعدما يُرى في فروع المقلتين نُضوب قال الخليل: "الإنطاء لغة في الإعطاء" وقال الجوهري: "الإنطاء: الإعطاء بلغة اليمن".وعزاها ابن الأعرابي - في قوله المتقدم - وابن الجوزي إلى حمير. وقال التبريزي: "هي لغة العرب العاربة من أولي" وعزاها السيوطي والزَّبيدي إلى سعد بكر، وهذيل، والأزد، وقيس، والأنصار، وهم بطن من الأزد.

بريمة

سلام يا بريمة ..
جبت لينا المشاكل لحدي عندنا ؟
سمح ..
انا ما حصل شفت شتايم من اخونا خالد ليك ..
لكن خليني اجرك لحتتنا هنا في موضوع الشتايم ..
هل تعتبر من المنطقي لمن انا اقرا شتايم من خالد في حقك (بصورة متكررة ) و اعمل فيها ما شايف .. ثم بعد يومين خالد زاااتو يفتح ليو بوست عن اي موضوع ( خصوصا لو موضوع هزار ) اقوم اخش ليو و اقعد اقرقر و اضحك ..
و أول ما يفتحو كلام عن الشتايم في المنبر العام اقوم اجي اقول بكري ما بيطبق اللايحة و بكري بيبالغ و بكري ده حيضيع المنبر ..
هل تفتكر انو التصرف ده منطقي ؟
هذا هو السؤال الذي ابحث له عن اجابة ..
هل أهمية موضوع خالد يجعلني انسى انه شتمك ؟ ( شتمك دي حسب زعمك طبعا لانو زي ما قلت ليك ما شفتو شتمك و الله )

الأخ حمور
سلام
دعنا أولاً نشخٍّصوا العلة .. لماذا السباب فى المقام الأول؟ وكيف يستمر؟
تأتى فكرة السباب لعدة أسباب .. أولها صاحب السباب لا يستطع مجاراة الكاتب فى الحوار أو أن الفكرة المطروحة تبدو غريبة لا يستطع تقبلها .. وهنا نتيجة لعجز المحاور يسب صاحب الفكرة ..
السبب الثانى فى نظرى هو ضعف صاحب السباب من ناحية معرفية .. سواء أقل تعليماً أو أقل ثقافةً .. هناك لا يستطع مجاراة الكاتب .. ويحصل ما يحصل.
السبب الثالث: يعود إلى سبب سيكولوجى (غويص) هو شعور صاحب السباب بدونية مبطنه تجاه صاحب الفكرة ... حينما يقول شخص (نحن العرب نقوم ونعقد على كيفنا) .. هناك شخص أخر لا ينتمى لهذه الملة يشعر أن الحديث موجه له .. علماً أنه ممكن يقوم ويقعد على كيفه أيضاً ..
السبب الأخير هو السبب الأيديولوجى مثلاً الشيوعى مقابل الكوز، إنصارى السنة مقابل الصوفى ..

يستمر السباب بوجود مبرر: أن صاحب الفكرة تم سبه ومن حقه الرد بما يلائم السباب ..
والأسوء فى الأمر أن البورد شلليات .. وتستمر الشلة مدافعة عن فردتها .
الحل يكمن فى تقبل الأخر .. فكراً

حمور كده صححنى فى كلمة الأسوء .. لماذا لا أكتبها الأسوأ ..؟؟

بريمة

Quote: تحياتي يا الطيب .. انا متفق معاك .. لكن ضربي لدينق مثلا كان ردا على من ينسبون الكتابة بالعربية للعرق و ليس للثقافة. يعني لمن زميل حلفاوي مثلا يكتب غلط .. بيكون الاعتذار عنو انو هو ما عربي .. رغم انو عامل الثقافة البتقولو ده متوفر ليو .. بل ممكن يكون متوفر ليو اكتر من زول جنوبي. لأنو الحلفاوي ده يفترض انو درس مراحلو الدراسية كلها بالعربي وامتحن شهادة سودانية في البلاغة و الاستعارة المكنية و حفظ قفا نبكي من ذكرى حبيب و منزل ... ناهيك عن الجامعة و البيئة المحيطة بيو و الجرايد البيقراها .. خليني اكون اكثر تحديدا و اضرب مثل بالصديقة الرائعة و الزميلة نجلاء سيد احمد النجمة المتألقة بلا منازع .. حين بدأت الكتابة اشار جماعة الى اخطاء اللغة عندها .. فكان عذرها واعتذار اخرين لها انو نجلاء ما عربية .. ما ذكرته من البيئة عن دينق ينطبق على نجلاء .. فلماذا الاعتذار ؟ انا لا اطالب بأن يكون الكاتب هنا سيبوية او الخليل بن احمد او اسماعيل الكاتب .. و كلنا نرتكب الاخطاء اللغوية .. لكن هناك حد أدنى من الاخطاء التي يتعارف عليها الناس .. و ما زاد عنها يحتاج الى مراجعة .. و الاسوأ من عدم المراجعة الاعتذار بأننا لسنا عربا. فحتى نجد لانفسنا بيئة ثقافية جديدة و لغة مشتركة غير العربية نظل في حاجة لتجويد هذه اللغة المسكينة. ـــــــــــ نجلاء انا ضربت بيك المثل عشان صاحبتي و عارفك ما بتزعلي .. اما بخاري لو زعل فانا ما شغال بيو.

الاخ حمور والضيوف الاكارم

احترامي الاكيد

انا اكتب في منبر عام لذا من حقك وحق اي شخص تقديم النقد لي بدون مجاملة وعلي تقبل هذا النقد

والا فعلي الانزواء بعيداً وبخصوص الاخطاء الاملائية فانا أقر بها واتفق معك ليست نوبيتي مبررا لمثل

هكذا اخطاء ، والبوست الذي تعنيه للأسف كان أول بوست لي وكان مضمونه الدعوة لتقبل الاخر وتبادل

الاحترام بين الاعضاء وبسبب تبديل (ذ) ب ( ز ) انحرف البوست واتقطع لي في رأسي ( الفارغ ) الا من

هموم الوطن والمواطن .. انا اتعلم ولست كبيرة علي التعلم ولم يحدث قط ان شتمت احداً أو احرجت زميلاً

فانا احترم من اختلف معهم سياسيا وكروياً ... وافر شكري حمور

احترامي كل يوم يزيد اكتر يا نجلاء.

Quote: سودانيز اون لاين .. أهمية الموضوع و اخطاء الكاتب

صفحا جميلا و الله المستعان