(الزميل) معتز أحمد .. مبروك كبرت و جاك ولد ..!!

اي نعم انت شيوعي ..
لكن ما زعلان منك و الله ..
زمالتنا الطويلة بتخليني اتجاوز ليك غلطة زي دي.
لكن و الله فرحتا ليك بمقدم احمد.

و عشان اخوانا الشيوعيين ما يفتكروا تسميتك للولد هي لوثة يمينية فاحب اذكرم انو الزميل معتز اسمو مليان بالاحمدات ..
اسمو معتز احمد محمد احمد
بالذمة ده اسم شيوعي ده يا معتز ؟

صورة تعريفية نادرة للزميل معتز ..
الاحمراني ابو كرش العلى الشمال ده

اول مرة رأيت معتز احمد كان يلبس "الردا " الاخضر الزيتي في مدرسة كمبوني الخرطوم في المرحلة الثانوية العامة ..في اواخر الثمانينيات.
كان قد جاءنا محولا من مدرسة كمبوني بورتسودان ..
كان صبيا احمر اللون من النوع الذي يذكر السودانيين بالفشفاش ..
شعره ثائر كأنه هاري بوتر ..
و هو محتار في فجاجة اولاد الكمبوني و صراعاتهم ..
ربما كانت تلك اول مرة يصطدم معتز بفروقات الهامش و المركز ..
و بعد اسبوعين و لظروف لا داعي لذكرها هنا انتقل معتز من الكنبة الامامي التي كان يرافق فيها مايور الهندي الى جواري بديلا لخالد نور الدين ..
و اصبحنا اولاد كنبة واحدة ..
جمعت بيننا محبة القراءة ..
فبينما كان استاذ العندي يشرح لنا اللغة العربية و استاذ خالد بتاع الدين و كباشي استاذ الانجليزي و مس باربارا الامريكية الجميلة التي كنا نحبها و لا نحب مادة الادب الانجليزي الذي تدرسه لنا كانوا يحاولون تعليمنا شيئا جديدا كنت و معتز نقضي الحصص في قراءة مجلات ميكي و قصص ادهم صبري و تطورنا بعدها لقراءة احسان عبد القدوس سويا.
اما في فسحة الفطور فكنا نزجي وقتنا بلعب الشطرنج يوميا ..
و حين كان احد الطبلة يحاول كسر الثنائية ليلعب معنا كنا نتضجر فالصراع بيننا كان سرمديا لا نهتم فيه بغيرنا.

و معتز صاحب عقلية متقدمة حتى في ذلك الزمن ..
لا اظن ان معتز يحكي الان هذه القصة لكن بصفتي شاهدا عليها فساقولها بكل ضمير مرتاح ..
فحين شبت حرب الخليج و تحرير الكويت من الاحتلال العراقي كنا قد انقسمنا بين مؤيد للعراق و مؤيد لامريكا ..
اما معتز احمد فكان الوحيد الذي اهتم بتوثيق تلك الفترة في كراستين اسماهما " تاريخ الحرب الخاسرة ".
و سجل في الكراستين كل طلقة او طائرة سقطت في الحرب.
و سجل التكاليف و المصاريف بحرص من سيدفعها من جيبة.
و بعد نهاية الحرب اكرمني معتز بان اصمم له الغلاف.
طبعا حدث بيننا خلاف بعد ذلك حين شطب معتز بعض التعليقات التي كتبتها على الغلاف الخلفي فغضبت انا جدا و مزقت الغلافين و اعدت له الكراس عاريا.
معتز بكرم اخلاقه حزن على غضب صديقه و رفض ان يشكوني للاستاذ الذي اصر على معرفة ما يحدث تحت الكنبة.
و لقي كتاب معتز رواجا في المدرسة نافست مجلات الاطفال التي كنا نرسمها انا و الزميل محمد عادل ميرزا و ابراهيم اسماعيل.

الان ..
وبعد مرور اكثر من عشرين عاما على تلك الصداقة .. فاذا بزميل الكنبة الفتى المرهف الذي كنا نتقاسم اسرار المراهقة سويا و نحاول اكتشاف علاقات الرجال مع النساء بمراهقة خائبة .. هذا الفتى اصبح ابا.
يا للهول.
معتز افضل لاعب شطرنج لاعبته في حياتي سيكون عليه ان يحضر افضل انواع البامبرز و يسهر الليل لأن الطفل يسنن.
لا استطيع ان اتخيل معتز يذهب الى مصوراتي هندي في الامارات ليلتقط له صورة ليرسلها لزوجته هنا حتى تريها لابنه و تقول له : ده بابا يا احمد.
بابا شنو يا معتز ياخ ؟
متين نحن بقينا للكلام ده ؟
و الله يا اخوي دي قلة ادب منك ساي.

و للاخوة الشيوعيين اصرح اني املك تاريخا موثقا طويلا للعزيز معتز .. و بما اني اعرف انه شاب نشيط و شيوعي له مستقبل فان تاريخه المحفوظ عندي معروض للاستثمار.
من يدفع اكثر املكه هذا التاريخ.
فكشكشوا جيب حزب الطبقة العاملة و تعالوا ..
و لا مكان لضغوطات الاصدقاء كامجد فريد او غيره.

يا معتز ..
موعدنا السادس .. قالوا يمكن تخش اللجنة المركزية .. اها انت ذاتك حول الدراهم خليني اسكت يا ابو احمد.

نظام عايز تعمل (تربيعة) جديد يا معتز ولا شنو
قال أحمد معتز أحمد محمد أحمد
يالهذا الغلاط يا صديقي


حتي تاريخه قاعد إستعجب في اسم تربيعة أخوك
محمد احمد محمد احمد

وعلي العموم عمنا أحمد يستحق والله وربنا يديهو الصحة والعافية
والتهاني موصولة للاسرة الكبيرة ولاسرتك الصغيرة
يا شم يا صديقنا الغايب الحاضر


يتربي في عزكم وعز البرنامج الشايلوا في راسك دة يا معتز

والشكر موصول للزميل حمور والتحايا كذلك موصولة لصديق الايام
السمحة تربيعة !


الان آمنت أن أجمل الاطفال قادمون
ساعةً فساعة !

يا سلام يا حمور
اخبار عظيمة و ممتازة , اى نعم معتز احمد شيوعى لكن زول فيهو شوية خير ...
مبروك الوليد و اتمنى الأم برضو تكون بخير و ما حصلت مشاكل في الولادة
اها يا معتز الأبوة بالمراسلة ما بتنفع , ترجع اسه طوالى و تاخد كوتتك في العذاب .... سهر و بكا و تغيير بامبرز و جلبطة باللبن و البصاغ .... الخ .... و مرحب بيك في دنيتنا "الجميلة"

حمور انت عندك شفع و لا بس مبارى الشماتة على المتورطين؟

تهانينا للزميل معتز أحمد

ويتربى في عزهم


شكرا حمور

ممتع كالعادة يا حمور
معتز أعرفه صوت و كتابة بس .... الصورة الفي ذهنى انو عاتى و اخدرانى و خشن الملامح و شرانى كمان.... افاجأ الآن انه فشفاشي و مكرش و تبدو عليه الطيبة و الرهافة كمان
يا حمور انا مشترى منك تب .. لزوم السادس و كده عشان نساوم معتز بالوثائق على اصواتنا
عاش نضال الطبقة الفشفاشية
و مزيدآ من البامبرز

شـــــــــم ياخي
دس الحاجات و طليع البتاعات
و جـــــامعة الخرطوم و واولادها
شــــم يا اخوانا
انتو عوراء ولا شنو
سادس ميـــنياخي
ديــــل خبـــراء اجانب
حتى اسألو فلان و علان و صاحبنا البي هناك معاو في الامارات

(بتاعات يا حمـــور ياخي امشي استحما... الزول دا تاريخو مليان نقود ذاتية: نقود دي جمع نقد يا عصام والغريبة يا جبرالله ...بيرجعوها ليهو اتخيل)
عموماً كدا
مبروك مقدم الزميل أحمد المعتز (كافكا)
اهو سميناهو معاك يا عزو
و طبعاً لا يتربى في عزك ولا حاجتين
الود بنربيهو نحنا ديل برانا بي طريقتنا

حمور تحياتي

مبروك لابو احمد

معتز الذي اعرفه مع فارق السن

التقيته ببرنامج الmba وعرفناه ولد شاطر ولهلوبه

ومرة اخرى في احدى فعاليات الحزب وكبر في نظرنا

و اتلمت الشطاره والنبوغ مع سعة الافق والمعرفه

فهنيئا لنا بأحمد الذي اتى من صلب هذا الشم

خضر ..
حيدر ..
عصام مرتين ..
امجد ..
شاذلي ..
و الله يا شيوعيين الزول ده لقيتيهو ساااي ..
سبب واحد يشوعو مافي ..
ياخ الزول ده ابوهو كان عندو كريسيدا ياخ ( شفتو ده نوع من اغتيال الشخصية ) و اول ما جوا من بورتسودان كان مفروض يسكنوا في ( ...) لكن فضلوا انهم يسكنوا في ( .... ) .
و كان شاطر في التربية الاسلامية ..
اي نعم مرة الاستاذ قبضنا انا و هو بنقرا في رواية العذراء و الشعر الابيض بتاعة احسان عبد القدوس لكن برضو كان كويس في الامتحانات.
غايتو من مميزاتو انو يوم جانا استاذ كباشي بتاع الانجليزي و اصر يلعب معانا قيم شطرنج ..
انا خفت من النتيجة فدقست صاحبي ..
اتغلبت ليو عشان يلعب مع الاستاذ ..
فلعبوا مع بعض و معتز غلبو ..
الاستاذ قام و قال ليو عندك خمسة سيطان بعدين ..
ياخ معتز مسخ لينا الفسحة ..
يسأل فينا زول زول ..
انا عملت شنو عشان استاذ كباشي يدقني ؟
غايتو لو ما بيتم بعيد كان مشى جاب ولي امرو من الشفقة.
طبعا و عشان ما اظلم استاذ كباشي فالموضوع طلع هزار ساي و ما دقاهو.

يا جماعة هسه الزول ده بقى ابو ياخ.
يا معتز ياخ احمد طه علي البشير و محمد عادل ميرزا و طلال عفيفي و حسام حامد و شهاب البرير وشلة من ناسنا ديل لسه عزابة ..
في داعي تخوزق الدفعة يا معفن ؟
امشي ياخ انشاالله ولدك ده يطلع كوز.

ابو احمد معتز شم الشيوعي حولتتتتتتتتتتتتتتتتتتتتتتتان

الف ميروك احمد يو\تربى في عزك ويطلع ضلامي ذي حبوبته

الف حمدالله على ام سما
ومبروك لسما الاخ الجميل..

ويا سعدك يا حمور وياس سعد معتز بيك

بالجد خبر مفرح...

يا عصام الابوة بالمراسلة دي ياخي ضرورية شديد

الزول دا بقى محمول ياخي..

ازيك يا دكتورة ..
وشكرا نيابة عن معتز الما شايف قدامو اليومين دي.




ــــــــ
مداخلة امجد الفوق دي كتبا في اللابتوب بتاعي .. و كنت انا داخل بحسابي و هو لغا الحساب و سجل اسمو ..
انا كنت بكورك و خايف يكون غلط تطلع باسمي نبقى في اليثبت للناس تاني انو نحن ما نفس الزول.
خصوصا انو عزاز شامي اتلخبتت فينا قبل كده.
بل حتى معتز ده زاااااتو ضرب لي قبل كده و سألني قال لي يا امجد بترد على تلفون حمور ليه ؟
شفتي الناس دي حاقدة كيف ؟

عصام جبر الله ..
انا و الحمد لله سألت القبلي فقالوا لي ..
ما دقست دقسة شم دي.
بعدين طبعا انت عارف مسألة الادب و الكتابة دي بتحتاج تفرغ خصوصا عشان المعجبات و كده.
ناس معتز السياسة بتخليهم شفقانين ..
لكن نحن الادب مرقد قلبنا يا عمك.

قلت لي ما لاقيت الزول ده ؟
و ديني نص عمرك ضايع بدون مبالغة.
رغم انو شهادتي قد تكون مجروحة.
انا بحب معتز ده محبة شديدة جدا و اتمنى ربنا يجمعنا تحت ظل عرشو يوم لا ظل الا ظله.
معتز انسان لا مثيل له.
طبعا الكمال لله فعيبو ياهو القلتو ليكم ده .. لو كررتو تاني بتطردوني من بوستي يا شيوعيين.

حمور دا يا جماعة ما تشتغلو
بهضرب ساي
حاقد من بورتو الواقع فيها دي
لكن اسي لو دايرين نحكي عن شم
نحكي شنو ولا نخلي شنو

شم
نسيج وحده


(في زول بيسمو ليهو بتاع بتاعي باسمو ... اها معتز دا عندو بتاع مسمينو ليهو باسمو عديل
بيقول ليك بتاع معتز شم)


ياخي معقولة

شم دا من النوع البسحر عديل كدا شاب وسيم مكمل الوسامه
يا حمور وصفك لشم حقد يميني لووووووووووووول
الف مبروك بمقدم احمد يا معتز

Quote: وصفك لشم حقد يميني

شوفي النبي الصورة الجايبها لمعتز؟
بالجد حقد سندكالي...

غياتو نحنا لو معتز دا اترشح لرآسة الجمهورية بنديه اصواتنا يا حمور


بيان عن لجنة المسنات المعجبات بمعتز شم..

شايف بوستات الباسوردات كلها بتتسحب طوالى , قلنا نطمن الضباع و الحموراب و الفشفاشاب اننا عدنا

شكرا بكرى للرد السريع

و يا الهكر يدقشك قطر

Quote: والله في ناس كده عاوزين سبب يعملو مظاهرات خاصة الضباع و ناس احتسيت و "الخالة" دوما و من لف لفهم بكرى ما قصر .... يلا بلا حركات معاكم معآ لعودة الامنجى تمبس .... بس لى بعدين

تحالف نسوي غريب لصالح معتز ..
بعد تكاتف الخالة دوما و دكتورة بيان كمان سما بت معتز بتجيني بكل سغالة (موروثه من ابوها ) و تقول لي يا عمو نلعب فتحي يا وردة.
هسه في داعي للكلام ده يا معتز ؟

حمور
طب ما تحسس يا سقيـــــــــــــــــل

حمور دة خبر الموسم :)

العزيز معتز .. الف مبروووووووك .....ودة خبر جميل جدا :) ما قادرة اتخيلك ابو معقولة بس :)

حمووور شايفاك حاسد معتز في نعمتوووو دي ... وش مادي لسانو ( موت بغيظتك)