أسباب العسل.. قصيدة لخطاب حسن أحمد

أسباب العسل.. قصيدة لخطاب حسن أحمد


03-17-2007, 04:59 PM


  » http://sudaneseonline.com/cgi-bin/sdb/2bb.cgi?seq=msg&board=386&msg=1199651732&rn=12


Post: #1
Title: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-17-2007, 04:59 PM
Parent: #0

أسباب العسل


]

نحله كانت
ذات ضُحى ...الظلال والضو
بيلعبو .. فى الطراوه
العصافير ، آخر خميل ،
..النقيشيش
..التهابيش..الشقاوه.!
..رغم شوفتك
..مُحتفله حولى بالرحيق
..راسمه أقواس بالترانيم..
..عارضه ،
فى نحاس الإغاره..
..ناسله من هِد م السِكون ،
خيط العواصف..،
..رغم شوفتك
وكنت ..عارف.! ما سأ لتِك ،
وإحتملت َ
لسعه مِنِك..وطد َت بيناتنا
أسباب العسل..
ورجعتنى للغُنا..
.....
ما أعسَلِك..
أشفاها جقمة بقتِك..
جبتى الرحيق من وين.!
والجدب طايح بالعباد.!
..كل من مشى ،..تلقاهو شايل صحرتُه..
..حَد ما وصل ،..آخر النهار
عن قدمُه طَلَع رملَتُه.!
جبتى الرحيق من وين..
والشجر غاد ر تباعا ً..
والثِمار..
..ما ألسَعِك..أمضاها ،
..ومضَة وخزتك..
فى دمى ساري المهرجان.. مرق القمر دورين..
طاب المقام للنَم..
فج َالكلام زولين..
رمادو والضَلمه..
صُحاهُو والحَلمه..
..الضَحَوه عَبَت بالنجوم
..جيب النهار
..شال النهار السوق
جاب للكنار مِزمار..
عَزف الكنار بَدَع ،.. نقر الكلام الحار،
عِمم الرِجال رَفن..
من الطَرَب جنحات ..من أسر
وإنفكن ..طبقوا الأ ُفق
صفقه..عرَاضَه ، مُندبكه..
..
..فراشات البنات
..إتقاودَن ..نزلَن
..من سافِل..صعيد
والغَرَبن ، شَرقن..
ما الليله الطريق
قدح الزناد ..فى الهَم
واتبخر صفق شجر الكِضب
مُعدَم..
..وهاك يا زميل..
..
..صعقات الجمال
..وأحوال الهوى
لو نطق الجِسِم..ونقاره
سوااا..
سوى..
..
هاك
يا زميل..

Post: #2
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-17-2007, 05:29 PM
Parent: #1

احيانا تخذلك اللغة تدخلك الى كهف بعيد لا تستطيع معه التركيز حول ما تود ان تكتب عنه ، احيانا ما تريد ان تكتب عنه فى اللحظة المحددة يجفل هو الآخر ، مما يسبب لك حزنا لانه ( طار ) تظل مع ذلك تتقلب على نار الموضوع الذى يجول بخاطرك ، لان المجامر داخلك اشتعلت ( وسبحان من يطفيها )راودنتى نفسى عن الكتابة لصديق ، احب ان اكتب عن اهلى ، اصدقائى ، فهم ( ناسى ) لكن اصدقائى لهم معزة داخلى لانهم يحملوننى كما احملهم فى القلب ، هو شاعر وفوق الشعر مسرحى ، روائى ، اذاعى يكتب للاذاعة ( على كيفو ) ويسعدنا ذلك ( الكيف )
لكنى عاشقة لشعره الذىتصدح فيه روح تلامس شغاف القلب ، قلبى على نحو خاص
حتجى البت الحديقة
أو لم تأت بعد ؟ كل مرة ابحث عنها ، اسأل عنها ، فهى وردة ، اتجول فى متنها ، ابحث عنى فيها ، اتجول فى ربوعها ، اقطف منها تلك الحديقة وردة للخلود ، اشمها ، اضمها ، ارانى فى مرآتها بريق تلمع به صفحتها المتوهجة بوهج اللون اللامع اتدثر بها ، اندس بين وريقاتها ، اتمناهاان تكون هى الوردة واكون الفراشة التى تمتص الرحيق
اخرج الآن عن تلك الوردة الحديقة البت ، وترانى اكون مؤملة ان اكون (صاحبة فى الزمن الصعب ) يا لذلك الفضاء الغنائى حين تتملاه عينك وروحك ، تجدك اسيرا لذلك الغناء ، تتمنى ان تكون هى صاحبتك اتمنى ان اكونها بلا وجل ، لتحملنى الى خطوط التماس ،التى رسمها خطاب حسن احمد ، ليتنى استطيع ان اتفجر كما فعل هو
فهو خطوط تماس ، والبت الحديقة ، وصاحبة فى الزمن الصعب ، مد من التفاؤل ، امل بلا حدود ،يحملك الى باكر متسامح ، ممتلئ بالخير ، باكر ترعاه خطى بشر متيقن ممتلئ بالامل لاجل حياة من الرخاء والامن ، منحنا اياه خطاب عسانا ان نقف الى جانبه مؤازرين لذلك الفيض الذى دلقه ناحيتنا
خطاب 0000كنت تراه كنحلة بين المكتب والاستديو ومكتبة الاذاعة محمولا على اجنحة ابداع لا تحسبه ينقطع ، يحلق بك عاليا ، عاليا
فى رمضان كنا نشربه فى عصريات الصوم الحارة ضحكا من خلال برنامجه ( ناس ) اولئك الناس الذين يرسمهم صحبة مجموعة من الممثلين والممثلات رسما كاريكاتوريا مثيرا للتعجب ، فهو لا يكتب تلك الحلقات مسبقا ، بل يجريها من خلال البروفات على ألسنة الممثلين والممثلات على نحو لم ار مخرجا يفعل 0000 تدخل المجموعة الى الاستديو ويكون فى انتظارها التحدى ، يوعز لهم بالفكرة التى تتنامى لتصبح جبلا من الضحك والكوميديا الراقية ،مشمولة بضحك من الذات عليها ( نضحك من الواقع سوا )كأنما يؤسس بذلك البيت الشعرى لذاك الفعل ، على رغم ما تبدو عليه ناس من عبثية لكنها دقيقة فى توجهها نحو المستمع ، تريك وجهك وتضعك فى محك حقيقى لتختبر مصداقيتك تجاه ذاتك والآخرين ، فالعمل مأخوذ بشكل نسبى من حياتك ، ليصب فى خانتك مرة اخرى بعد اعادة انتاجه
هو ذاك خطاب حسن احمد ، يصطادك كما العنكبوت الذى لا تستطيع عنه فكاكا وان استطعت فهو ملتصق بجوانياتك ، يتحداك وكثيرا ان تتجاوزه ايا كانت وسائط التحدى سواء فى الشعر ، المسرح ، الاذاعة ، لتمثيل المسرحى او التلفزيونى فهو شخص سمته التحدى
يغلب عليه وكثيرا الشعر ، ذاكم المفتون بالنيل ، حتى انه هدى النيل اول ديوان له ( شكرا يا نيل )
خطاب تراه فى هدوئه النهارى وصمته الكثيف فتظن انه غير ذاك الفتى المحتشد بالشاعرية ، يسكرك بها حين يحدثك عن الشعر حديث العارف ، وان حكى لك نكتة فهو يخرجها لك كما تخرج القصائد ، تتساوى لديه النكتة والقصيدة000
كنت اتساءل متى يكتب خطاب شعره ؟ وتلك المسلسلات التى تصل الى اكثر من خمسين حلقة فى عدد منها ؟ متى يبدأ اخراج برامجه ؟ ومسلسلاته؟ متى يفعل كل ذلك الابداع المثلث الاضلاع؟ متى يلبى كل تلك الندءات ؟ لكن تعجيى زال ، كنت اراه كل يوم بعد ان يمضى كل الناس الى بيوتهم ، تجده منكبا الى اوراقه فى ذلك الصمت يبدأ مشروعا ما ، يكتب ، يقرأ ، يعزل خطاب نفسه عن الآخرين ليكون هو مجموع (الخطابات )ينفرد بواحد منهم ويبدأ فى كتابة ما
خطاب حسن احمد سأظل احتفظ لك دائما بغرفة فى قلبى معلنة صداقة لن تنتهى نضرة ستكون كما بدأت واعدة كما ستظل ، حميمة كما ستظل رائعة كما روعتك 000
7/23/2003


Post: #4
Title: Re: أسباب العسل.. قصيدة لخطاب حسن أحمد
Author: Azhari Nurelhuda
Date: 03-17-2007, 08:37 PM
Parent: #2

بت..... الذين كتبوا فأبدعوا...
ياسلمى بت سلامه ومن سلامه...جاتنا السلامه
و سالمه ياسلامه و تسلمي يا أم عزه
فخطاب الجميل هو كل ذلك و أكثر
فالتوازي بين روعة القصيد... ونثرك يحير
ده من شنو يا ربي......
عجبي......

Post: #5
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-17-2007, 10:09 PM
Parent: #4

يا ابو الزوز ( ياما لى شخصك اغنى ، وازرع الدنيا ابتسامة، وضحكة فى لون التمنى ) او هكذا قال عميرى ، لكم احبكم جميعا، اولئك الذين عشت بينهم كما الحمامة وسط حماماتها الصغيرات ، حتى نما الزغب وصار ريشا لكنه لا يطير الا اليكم ، وبكم واليكم يحط ، احب اهلى من خريجى المعهد سواء كانوا خطاب او العميرى ، فهم سندى ودعامتى فى هذه الدنيا ، هم لحظة الشوق من تهاجر اليهم روحى طالبة ان تستجم على ضفافهم التى اعرف كم هى وديعة وحلوة ، نمشى على الشاطئ المخملى للذكريات فلا نود عودة ، لك حبى وعظيم امتنانى ايها الجميل

Post: #3
Title: Re: أسباب العسل.. قصيدة لخطاب حسن أحمد
Author: Mutwakil Mahmoud
Date: 03-17-2007, 07:25 PM
Parent: #1

قريبتي سلمي
السالمه من كل بلا
ياصاحبه في الزمن الصعب والحلو
لله دره
هذا العابث بالقلم والزمن
ود حلتي.... ويقيني يعرف ما أعني بهذه
ولكن
ليس لدي ما أقوله سوي أن أردد كلماتك هذه في حقه
هو ذاك خطاب حسن احمد ، يصطادك كما العنكبوت الذى لا تستطيع عنه فكاكا وان استطعت فهو ملتصق بجوانياتك ، يتحداك وكثيرا ان تتجاوزه ايا كانت وسائط التحدى سواء فى الشعر ، المسرح ، الاذاعة ، لتمثيل المسرحى او التلفزيونى فهو شخص سمته التحدى
يغلب عليه وكثيرا الشعر ، ذاكم المفتون بالنيل ، حتى انه هدى النيل اول ديوان له ( شكرا يا نيل )

خطاب حسن احمد سأظل احتفظ لك دائما بغرفة فى قلبى معلنة صداقة لن تنتهى نضرة ستكون كما بدأت واعدة كما ستظل ، حميمة كما ستظل رائعة كما روعتك
أوعدك وعدا علي لن يفكه صوم كما كانت تحلف حبوبتك وحبوبتي أم وهيبه
سوف أوقف وبكل صرامة ولين هذا العابث بالقلم والزمن
فمن غيره قادر علي أن
يمنح هذا الشعب
معني أن يعيش.... وينتصر
أشواقي حين تسعي إليكم تشتاق
أخوكم د.متوكل

Post: #6
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-17-2007, 10:21 PM
Parent: #1

ايها المتوكل على عصى الحب لها ان تظل الى يدك تخرج ملية حبا للناس كما عهدناها دائما سباقة للخير كما ينبغى للخير ان يكون ، نحب خطابا ونظل نحبه لانه الاشراق الشعرى فى ابهى التجليات وتمرد الكلمات التى لن تنضب، هو خطاب الذى ما نزال نحلم ان يفيض شعره على الناس شهدا ، يغطى ما سبق وما سيلحق ، فهو كاتب من طراز فريد خطابه الشعرى مدرسة خاصة (حتجى المن بدرى جات ناقشة فى الزول اغنيات ) او (الدواس ماهو الاساس ) او تجده (نضحك من الواقع سوا ، نحنا القدرنا على التعب ، حرقتنا السنه اللهب ، ولسه ماسكين الدرب ، يا صاحبه فى الزمن الصعب ) وما اصعب ان ( تبارى ) خطابه الشعرى ، صاحب العلامة المميزة ، العلامة التى نحتت دربا خاصا بها فى بحور الشعر ،والغناء عانى كثيرا كيما يجد له مقعدا فى افئدة الشعر او فلنقل فى فؤاد الشعر الغنائى واوجدها لنفسه ، متعب لكنه لا يمل التعب ، ينحت ما يزال فى دواخل البحور الشعرية كيما يجد ما يستحقه من وجود حقيقى متمثلا اليومى الحميم لكنه الصعب على المنال ، فهو شاعر السهل الممتنع ، لك ودى دكتور متوكل

Post: #7
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-18-2007, 01:05 AM
Parent: #1

ولخطاب كل الامانى ان يعود الالق الى الحياة التى نعرفها لدنه ان يكتب الشعر ويعيشه كما يفعل دائما

Post: #8
Title: Re: أسباب العسل.. قصيدة لخطاب حسن أحمد
Author: عبد المنعم ابراهيم الحاج
Date: 03-18-2007, 01:42 AM
Parent: #7

آه "يانحل النشوة ينقر في الوجدان" ...وياعسل التيه
سنوات والكون ناقص جواه وتر ..متمحرك ما بين شرشف زهرة
وتوج من خاطر عاصي ..خطاب ..مسكون بالشجن الواصل حد العزلة
شفاف زي غيمة ..ولسة بقاوم شجنو ..ياسلمي عصافير شوق لو
غنن ..سرك نبّه روح كلماتك..اصيلة عرفتك ..ومامجبورة لانها روحك.

Post: #10
Title: Re: أسباب العسل.. قصيدة لخطاب حسن أحمد
Author: shahto
Date: 03-18-2007, 02:10 AM
Parent: #8

بس ان اتواجد مع من احب
و مع من يحبني في الضو و العسل

سلام سلمي و بقة و انا ارسم و جوهكم في منامييييي

علي حجارة الرصيرص الملساء و الله موجود في قاع النهر يرعانا

و لكم الله و بابنجييي

Post: #11
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-18-2007, 02:25 AM
Parent: #10

يا ملك الجمال ، وانت تغرف من عسل الروصيرص، تلك المدينة التى احببتها من اول نظرة ، والنهر حزين يشكونى اليك لانى بارحت ضفته،لكنى ماسلوته ، لكنى ما اردت الى فراقه ، لكنه العسل يا صديقى واسبابه ، لكنه خطاب حسن احمد

Post: #9
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-18-2007, 02:10 AM
Parent: #1

( وما مجبورة لانها روحك ) يا لروحى التى تطلع حين افقد احدهم ، كنت يوم ان ازمعت مغادرة السودان فى الاذاعة ، فجاة ظهر خطاب قدامى ، وكنت طالعة ،ما قدرت اقول ليهو مع السلامة ، قلت ليهو :امشى يا خطاب ، قال لى :بت الشيخ بنتلاقى ، وكنت خايفة اننا ما نتلاقى ، يوم فى القاهرة رن التلفون فى البيت ، اسمع ليك الصوت الما بغبانى ، خطاب حسن احمد ، وبكيت ولا همانى شى ، ونزلت للقائه ولم نفترق الاحين سافر الى امريكا وما اتفارقنا كتير تانى اتلمينا وقبل شوية كان معاى فى التلفون ، يا لنا يا منعم من قبيلة لا تعرف الا حب الاخر

Post: #12
Title: Re: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-18-2007, 02:51 PM
Parent: #9

يا أخوانا أنا جاي
خلوها فوق القصيدة عشان أكمل ليكم

Post: #14
Title: Re: أسباب العسل.. قصيدة لخطاب حسن أحمد
Author: Yassir Tayfour
Date: 03-18-2007, 05:08 PM


وكنت ..عارف.! ما سألتِك ،
وإحتملت َ
لسعه مِنِك..وطدَت بيناتنا
أسباب العسل..
ورجعتنى للغُنا..

Post: #13
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-18-2007, 04:42 PM
Parent: #1

يا بقة عقود السم ما راجينك نحنا وراجينك الما من شعبنا ما منك

Post: #15
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-19-2007, 08:00 PM
Parent: #13

ما أعسلك . ياشقية
.. من أين تاتى بألرحيق؟
.. من أين؟
والجدب يطيح بألبلاد والعباد .
من أين تاتى بالرحيق؟
والكل رحل . حد ما وصل
ما اعسلك
_______________________
خطاب الشاعر الكبير . المسرحى .التربال المسكين.هو من رقق الشعر
هو من ادخل العسل والنحل وحدايق البنات فى مدرسة الشعر
خطاب مدرسة ( من الاساس و حتى العالى مدرسة كاملة الفصول شاهقة الاسوار
__________
نحلة كانت
ذات ضحى ..الظلال والضو
بيلعبو.. فى الطراوه ...
________
دعنى ياخطاب اذهب الى عملى . اردد فى طريقى لسه منك . وطدت بيناتنا
أسباب العسل..
_______
تحيات عثمان ( راجع تانى وتانى )

Post: #16
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-19-2007, 08:18 PM
Parent: #15

سلمى الشيخ .. أنتى احد البنات الحدايق سلام
حتجى البنت الحديقه
ياسلمى سوف تاتى الثورة الجميلة
ثورة شاملة مجلوة .. وهى فى قلوب الناس
لك الله ياخطاب ( وراجع تانى
عثمان

Post: #18
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-20-2007, 04:39 AM
Parent: #16

خطاب ود حاج حسن أحمد
.. خطاب غابة من الرؤى كثيفة متشابكة
________________
أنظر .. .ناسله من هدم السكون ،
خيط العواصف ..،
خطاب اكتسب من المسرح السودانى والعالمى الكثير من الأفكار
التى جعلته فى سفر دايم . وبحث لا ينتهى عن الحرف الرقيق
خطاب حسن أحمد يحدق بجرأة عجيبة فى كل أقاليم الجمال
27 سنة خطاب اعرفه شاعر نعم
27 سنة والقوافى تنداح وتندفع وتتدفق عذبة عذوبة واضحة
عثمان

Post: #17
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-20-2007, 04:27 AM
Parent: #1

وكيف ؟انى تاتى يا موسى ؟ كيف واسباب الغناء تقطعت اوصالها؟كنا رجاء الصحو فى جفن احلامى، لكن الجفن اسبل العين ونام، يا صديقى لا تحلموا بعالم جديد فخلف كل قيصر .... لست متشائمة ولا متفائلة لكنى حزينة ، مثلكم حاولت وما فتئت احاول لكن ضباب الاشياء بعوى بالصمت والخوف، خوف من نقطة لا تعرف من اين تبدا ؟ امنها؟ ام فيها؟ لا احلم ولكنى احاول

Post: #19
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-20-2007, 04:52 AM
Parent: #17

لا محال .. الثورة سوف تاتى
ثورة جميلة بلا سلاح
سوف تاتى بالقلم بالفكر
وكما قال خطاب
حتجى البنت الحديقة
ياسلام على المدنية وياسلام على الصبر الجميل
عثمان

Post: #20
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-20-2007, 05:08 AM
Parent: #1

يبدو انك لم تعش مؤخرا فى السودان ، كنت هناك يا صديقى ، ورايت ما لم اكن اتصوره رايت تماسيحا تترع فى الشوارع وتمد لسانها للناس ، رايت ان الشعر تجارة لم تعد تملك تلك العصى التى طالما ملكتها وان الناس لا يبالون بل انهم لا يسالون حتى عن ابسط الحقوق ، وادركت اننا سننتظر طويلا حتى يخرج علينا من ينقذ لون الحديقة من احتقار الشمس ، ومن ينقذ البستان من احتضاره ، المدن حزينة ومطفاة الوجنات من العطش والمسغبة ، الارض بوار يا صديقى لان المزارعين احجموا عن الزراعة، وجاء الخريف ليقصم ظهر ما كان وعدا ، لم تر الى الانسان يسالك ان تقدم له وجبه فى مقابل ان يغسل حذاؤك، لم تر النعاس يغالب طفل فى الشارع وامه تحمله متوسلة (حق الفطور )او حتى اجرة المواصلات ، خفتت اصوات الشعر يا صديقى ، والحياة انزوت بين فكى ظما لا ترحم ، لم تر الى شخص يمتلك بنكا فى بيته والناس يطويهم الجوع وهو يرصف امواله ويعدها (يغسلها)ويرتبها فى مصارف خاصة به وحده يشترى بها ذمما اتسعت حتى ابتلعت كل شئ

Post: #21
Title: Re: أسباب العسل.. قصيدة لخطاب حسن أحمد
Author: بكرى ابوبكر
Date: 03-20-2007, 08:23 AM
Parent: #20

بقة وسلمى ازيكم
يا اخوانا شاعرنا خطاب حسن احمد الم فيه كيف اصلو مجهز ليه باص ورد من 4 سنوات و حتى ما لامى فيه الاستاذة سلمى انت هنا ولا لسع فى السودان ولو هنا الواحد يلم فيك كيف عشان يسلم عليك

Post: #22
Title: Re: أسباب العسل.. قصيدة لخطاب حسن أحمد
Author: سلمى الشيخ سلامة
Date: 03-20-2007, 01:47 PM
Parent: #1

يا بكرى حبابك يا باشمهندس كبير ، كيف اولادك والحال هناك؟رجعت من يناير الفات وهسى مع عزة فى ايوا ، تلفونى 3193374077 اما فيما يتعلق بخطاب تلفونو مع عبد الباقى وسوميتا، لكين عليك الله يا بكرى دا كلام بين قوسين كان عندكم شغل فى اريزونا قول لينا عوووووك صباحك فل

Post: #23
Title: Re: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-20-2007, 04:50 PM
Parent: #22

Quote: بقة وسلمى ازيكم
يا اخوانا شاعرنا خطاب حسن احمد الم فيه كيف اصلو مجهز ليه باص ورد من 4 سنوات و حتى ما لامى فيه الاستاذة سلمى انت هنا ولا لسع فى السودان ولو هنا الواحد يلم فيك كيف عشان يسلم عليك

أيوه يا هندسة الشاعر خطاب حسن أحمد والكاتب يحي فضل الله العوض كمان

Post: #24
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-20-2007, 08:24 PM
Parent: #23

السيد بكرى ابو بكر تحية واحترام
فى ال4 سنوات دى خطاب كتب 40 قصيده ومسرحيه وحاجات ما تدى الدرب
ارجو ارسال الباص ورد الجديد
يعنى زى العملة السودانية الجديدة كما قال خطاب ها ها ها
تحياتى سيد ابو بكر
عثمان عبدالرحيم موس

Post: #25
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-20-2007, 09:02 PM
Parent: #24

سلام أستاذه سلمى
عارفه يا سلمى التماسيح هرمت . واسنانها ( وقعت )
ولسانها ينشل امام امثال خطاب والكتيابى . شفاء عاجل للكتيابى يارب
.. وعارفه يا اخت سلمى .. حتجى البنت الحديقه شايله . عاوك ....
تحياتى .. عثمان

Post: #26
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-21-2007, 05:38 PM
Parent: #25

* نخبة من حكماء الشعراء فى بلادى
يقودون رحلة الفنون والاداب .
يجب الآ لتفات اليهم جيدا والآ ضاعت علينا المسالك
عثمان

Post: #27
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-22-2007, 03:46 PM
Parent: #26

سمعت الناس تتحدث عن خطاب حسن أحمد الشاعر والمسرحى الشاب فى نهاية
السبعينات.
فى دار الاستاذ رضوان محمد أحمد بامدرمان. تلك الدار العامرة برجال
السياسة والفكر والأداب والصحافة والمسرح والفنون
رحم الله رضوان رحل فى شبابه . لقد كان جامعا للشمل محبا للسودان
حسن الظن بالمبدعين..
والتحية للشاعر والمسرحى خطاب .. خطاب 10 سنوات فى المهجر البعيد
وقلبه على ضفتى لنيل
الاف الاميال وخطاب ما برح يغنى للبطانة وللفرشات والحزن الذى طاح
بالبلاد والعباد
___
عثمان عبدالرحيم موس

Post: #28
Title: Re: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-24-2007, 03:25 PM
Parent: #27

إشارات ثقافية
================
يحيي فضل الله
==================
خطاب حسن احمد
شاعر عنوانه ناصية جراح الأزمنة
================================
(( مرقتي
من دربي المكندك بالغبار
هباني من جهيهتك دعاش
ضجن جيوبي من الفرح
ومنهن طار الفراش
من اول برق جهة الشرق
غرقني قاش
مرقتي
في دربي المكندك بالغبار
زفاني طار
و رغم اني ماشي
في خط مستقيم
الدرب دار
و النوبه تضرب في الخلايا
كرويات حبي ألإلاهي
إنفجرت اذكار و نار
وركضت
درويش يسابق جبتو
مجذوب بيغرق بالنهار
ترجمت
إنغرز الشعاع قعر اللهات
ترجمت بي كل اللغات
الحق يبين ما يندفن
كل الشوارع درب واحد
العمر يوم لكنو ممتد
و اللحظة نصل
تجهد تسنو العمر كلو
إفتح مسامك
و إدخلك
ترجمت
دورت
طرت
منطاد بيعرف سكتو
صوب الفلك
و علي الارض كان
صباع رجلي الكبير
في الحلقة برجل
رشيتيني
بي دمعك افيق
الوان الجبه كشحن
قوس قزح
شنق الاولاد طواقي
و البنات جدعن طرح
رشيتيني
بي همسك افيق
تأوق طريق
مغسول وضح
الحق يبين
ما يندفن
كل الشوارع درب واحد
والعمر يوم لكنو ممتد
و اللحظة نصل
تجهد تسنو العمر كلو
إفتح مسامك وإدخلك ))
إنه ، خطاب حسن احمد الذي يتحمل عبء ان تتحول اللحظة الي نصل مسنون بجهد العمر كي تفتح مسامات طاقته التعبيرية و تدخله ، إنها اللحظة تلك التي حذر الشاعر صلاح عبد الصبور من محاولة إفسادها في مسرحيته الشعرية - الاميرة تنتظر -
- ((إنها اللحظة ، لا تفسدها ))
القصيدة اعلاه يتقمص فيهاالشاعر خطاب حسن احمد لحظة ذلك الوجد الصوفي و يركض كدرويش يسابق جبته ، انا أقرأ هذه القصيدة و اكاد اسمع اصوات النوبه و الدفوف و اصوات المداح و اري و بذاكرة حميمة اجساد الذاكرين و هي تشف من خلال حركاتهم الراقصة المنفلتة في محاولتهم للسمو ، هذه القصيدة إحتشدت بالافعال الدرامية الصاخبة - ركضت ، ترجمت ، دورت ، طرت - من خلال هذه الافعال تتفجر الصور الشعرية ذات التكثيف العالي - نوبه تضرب في الخلايا ، زفاني طار ، الدرب دار ، ضجن جيوبي من الفرح ، درويش يسابق جبتو ، مجذوب بيغرق بالنهار ، إنغرز الشعاع قعر اللهات ، منطاد بيعرف سكتو صوب الفلك ، صباع رجلي الكبير في الحلقة برجل ، الوان الجبه كشحن قوس قزح، رشيتيني بي همسك افيق ، تأوق طريق مغسول وضح ، الحق يبين ما يندفن ، كل الشوارع درب واحد ، العمر يوم لكنو ممتد و اللحظة نصل -
إخترت هذه القصيدة المعنونة ب - درويش - كمدخل لاشارتي الثقافية عن الشاعر و الكاتب الدرامي و المخرج المسرحي خطاب حسن احمد و لا انسي ان الحق به صفة مهنته كمخرج إذاعي معتدي عليه بالصالح العام من قبل حكومة الانقاذ وكذلك بالاهمال المقصود من قبل إذاعة التجمع الوطني ، اسف هذه جملة اعتراضية قد تفصل في مقام اخر ، اقول إخترت هذه القصيدة لانها تعلن و بوضوح عن طاقة خطاب حسن احمدالدرامية و الاستفادة منها في بناء قصيدته ذات النفس الغنائي العميق ، صدرت المحموعة الشعرية للشاعر خطاب حسن احمد عن مركز الدراسات السودانية في العام 1996م بعنوان - شكرا يا نيل - و بإهداء - الي خليل فرح ، علي المك ، عبد العزيز العميري ، الذين أحبوا امدرمان كل علي طريقته -
(( وانا لافي
في شارع ما في
عاينت لقيتك
إنتي الفي
الشارع اصلا
مموه فيك و مخفي ))
تتناثر في هذه المجموعة الشعرية قصائد قصيرة جدا ، قصائد لها ذلك التكثيف المحرض علي المتعة ، متعة التأمل للوصول الي فكرة القصيدة و هي تجادل ذائقة المتلقي لها ، تامل معي هذه القصيدة القصيرة
(( تنقر
جوفي إيقاعات
حسيتك
كنت بتدوزن
دفوف شدوك
و تطربني
أتاريك
كنت بتنقر جدار سجنك
عشان يرهف
تشق صدري
وتطير مني ))
ان قصيدة خطاب حسن احمد تملك القدرة علي التحريض نحو التأمل ، قصيدة مفتوحة التأويل ، تشتبك فيها العلائق ، تتزاحم فيها الصور الشعرية و تحتشد هاربة من ذلك السائد المعروف ، قصيدة تتألف مع الاستثناء و تعلن عن إختلافها ، قصيدة لها بناء يحاول دائما الامساك بتلابيب الفكرة و المعاني ، قصيدة تلامس و بحميمية قضايا الوطن الملحة و الازلية ، تفضح و تعري و تستنهض قيم الحق و الخير و الجمال
(( خليني أخد نفسي اول
من اللي باعو للسماسره
و من خزانات البنوك
ارجع الصوت للحلق
خليني ادخل نيلنا اول
واستحم
و اجيك بي وش منطلق
أدوبي فوق ضهر المزارع
وافرك المحرات فرك
خليني احفر ساس جديد
واجهز القنا للمرق ))
إن صيغة التسأؤل في القصيدة صيغة لها حيوية الحراك في نسيج القصيدة ، ذلك الحراك الذي هو دائما بين التساؤل و الاجابة ، لذلك يحرص هذا الشاعر علي إستخدام هذه الصيغة ، يقول الشاعر في احدي قصائده هذه الجملة الشعرية التي توضح علاقته بإستثمار صيغة التساؤل
(( اسأل فيك
و اجاباتك
لي مرض السؤال عافية ))
إن تساؤلات خطاب حسن احمد الشعرية تتباهي بشفافية عالية لا نملك إزاءها الا ذلك الطرب ، تأمل معي هذه التساؤلات
(( مافي حد شايف
ابعد منو همومو
و ما هو داري بي العليه
دي جلدو ام هدوم ؟ ))
-----------------------------
(( منو العلم عصافير المدي سكة عيونك ؟ ))
-------------------------------------
(( منو العلم الروعة العناد
و علم الفكرة إرتياد سطح المنا ؟ ))
-------------------------------------
(( دبيب الصرخة فينا لمتين نجهجهو بالسكوت ؟ ))
--------------------------------------
(( صحي إتلاقيتو اصابع كف بتتناغم تجاه الضوء ؟ ))
--------------------------------------
(( دليب الشمس
يا مخرم ملاية الليل
و يا مقسم جريد نخلك
شعاع دافي
منو الوراك طرب فيني
و شوق محموم
منو الاداك اوصافي ؟ ))
-------------------------------------
(( لوتعرفي كيف زخم الموجات في بحر الاب ؟ ))
-------------------------------------
(( شن اسويلك ؟
كان رمشك مبرود بالصباح
اكان طرفك ممرود بالفتاكة
و عامله فينا الإجتياح ؟ ))
------------------------------------
تري من يملك الاجابات علي هذه التساؤلات الشفيفة ؟ ، علي كل ، إنها تساؤلات تثري ذلك الحراك الجمالي الفكري بين القصيدة و المتلقي و هاهي قصيدة كاملة تستند علي صيغة التساؤل
(( لوشفتي كيف
بنزف نزيف الورد
بالشوك إنطعن
وقتين عيونك ما يجن
و القي المواعيد إنتهن
و اصبح حليف الصحرا
والريح الحفيف ؟
كنت سابقت الزمن
و انتظرت علي الرصيف
او شفتي كيف
بترقص خطاي
لمن خطاك
ما تكون معاي
كل الدروب
وكانت تجوب
سكة رؤاي
و انت في ضراي
كل الطيوب
كنت إنسرقتي
من الزمن
وازدهرتي مع الغروب
لوشفتي كيف ؟
لو شفتي كيف ؟
لو شفتي كيف ؟ ))
هكذا يقف الشاعر خطاب حسن احمد كي يشكر النيل ، يقف علي ناصية جراح الازمنة كي يبصر بعيون الشعر تلك البصيرة بوصلات سكك الاغاني ، قري الليل القصية ، غبار الوعد الغش ، تضاريس المحن ، نزيف الورد ، إعتمال الاشعة بصدر الظلام ، ذلك الغناء الذي يدخل البيوت كاليوم ، غناء يجعل براري العمر تخضر ، يبحث عن مسدار القمر ، حبيبةتضحك في المسام و تقف فوق ضحوة فاتحة علي النيل و تحت هديل موجات مسافرة تعزفها الشواطيء ، بصيرته الشعرية تري إحتمالات الصهيل في وادي اخضر و حبيبة ترقص بين عيونه و عين الشمس ، شوارع تصن كبيت الحبس ، ضجة الضوء في المكان ، تري الدنيا تشبه يوم معاد ، جرائد النخيل الصباحي تحمل الحبيبة كالسبايط ، فراش الضحي المنتشيء ، حبيبة تلون بالجراحات السماء ، احلام تتاوق في الدواخل ، اغنية ترك علي حواف القلب ، صنة تتململ حيرانة فوق صاج السكون ، مغني يمتلك مفتاح سهلة النضمي الحميمة و الشجون ، مغني يفتل من الدوباي خيوط النار ،البصيرة الشعرية تري اول برق من جهة الشرق ، كرويات الحب الإلاهي ، سواحل الجزر الكئيبة ، بهجة تتاوق من تحت الرمش ، الندي المرشوش علي صدر الوهاد ، تاريخ يطلق الشذي ، ايام تتنفس عبق البراري المزهرة ، يري الشاعر روحه تسري في ليل الحبيبة و يخيط عتمة صمتها و يزرع صحاري الدنيا بالمشي ، ويدخل الشاعر زاوية الطلق الاخيرة ، يتحسس ببصيرته الشعرية الدعاش و هويشرح لصفق الشجر مجيء الحبيبة الوشيك ، يتحسس صليل الهمس ، يرانا نطلق الزرازير من طول الحبس ، يري فراشاتنا تختار اللون ، مدن تتنادي علي هاتف الصباح ، نهر الفرح المتجمد في الاعماق يهتز ، يري الهمس يضج في ظلامات السكات و ذلك الصخب الذي يسكن العروق ، ببصيرته الشعرية يتحسس الشاعر فكرة ملت شروط الذهاب و يعرف ان الرزاز سيبدأ العزف و ببصيرته الشعرية يرفض الشاعر ان لايرضع من أثداء الخيبة و الخذلان .
هذا تجول سريع في عوالم الشاعر خطاب حسن احمد و هي عوالم ثرة اكدت ان العامية السودانية لها حيوية ان تتحمل عبء ((المضامين العميقة
شفت فيك زمن مرايا
كل زاوية
وجع براهو
و كل درجة ضوء حكايه
و التناقض
كرت رابح في الشوارع
العمود المستقيم
اكتفي بي ظل اعوج
و الشجر العقيم
اصبح يحاول
و نوع غريب من النسيم
حظر العصافير
عن الغنا
يا عجايب
يا زمن
يا مرايا بتمتحنا
ياتو يوم سكت الصباح
عن الشدو ؟
ياتو يوم
ما نقرت فيهو العصافير
قشرة الظلم التخينه ؟
ياتو يوم
يا زمن
يا مرايا
يا ثواني بتتولد
اجسام صقيله
دقيقة يتشوف قبيله
وساعة بتفرج بلد
و ما في حد شايف
ابعد من همومو
و ما هو داري
بالعليهو
دي جلدو ام هدومو ؟
و مافي غد
إكفيهو بس
لو عد يوم
إتخيل
الكل قافز سوي
و القوت
معلق في الفراغ
بي خيط رفيع
و الخيط بيلعب بي
الهواء
إتخيل
الكل قافز سوي
و القوت معلق في الفراغ
بي خيط رفيع
والخيط بيلعب بي الهواء
إتخيل ))
وشكرا لخطاب حسن احمد و هو يشكر النيل و لانملك الا ان ننتظر مجيء - البت الحديقة - التي ستصف للناس الطريقة و للعصافير الجهات .

_________________

Post: #29
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-24-2007, 07:40 PM
Parent: #28

* ياخطاب انت دوبيت كتير فوق ضهر المزارع
وفركت المحاريت فرك الجن
( تيران المحرات قالت الروب )
وخجيت النيل بالسباحة
صوتك مالى الفجه
وحسك واصل بحرى وقبلى
خطاب الشاعر الطيب صاحب الشعر أ لملىء بالدفء والخالى من
التكلف .. انت ياخطاب لفته أنتباه الناس من اول وهلة
ببساطة وسماحة ورقة كلماتك ..
لم تجعل مسافة بينك وبين الناس
الان ياخطاب الناس تتابعك وانت فى ( صقط لقط )
ولها كامل الحق فى متابعة شاعر قصيدة الوعد الجميل (حتجى البنت
الحيقه

تحياتى أخى عبدالباقى
اخيك عثمان

Post: #30
Title: Re: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-25-2007, 09:00 AM
Parent: #29

Quote: تحياتى أخى عبدالباقى
اخيك عثمان

تحياتي ، أنا كنت بساسق بين سودان فور اول
و سودانيز أون لاين عشان أجيب كتابات خطاب او يحي فضل الله
لكن هسع جبنا خطاب ذاتو يدينا طلة

Post: #31
Title: Re: أسباب العسل.. قصيدة لخطاب حسن أحمد
Author: Abdulbagi Mohammed
Date: 03-26-2007, 11:03 PM
Parent: #30

ولنرفع الناس العسل
و لنرفع الناس العسل

Post: #32
Title: Re: أسباب العسل.. قصيدة لخطاب حسن أحمد
Author: خطاب حسن احمد
Date: 03-27-2007, 02:10 AM
Parent: #1

..
..
..عسل
......القصيده ولا الزمن الملامحه.!!
معكره !!
..يا كومريد إنت متفائل
..ولا القصيده عجبتك.!
..
سلام لى كل الشباب
..
أنا جاى راجع
..
كل الود
..

Post: #33
Title: Re: أسباب العسل.. قصيدة لخطاب حسن أحمد
Author: عبد المنعم ابراهيم الحاج
Date: 03-27-2007, 03:42 AM
Parent: #32

الاستاذ خطاب ..انا عارفك

قتا الروب وايديك..انخلخلن

من المقالدة ..بقيت زي الزول

الجاي من سفر..ومن حينو نزل

قريتو..اللخمة ..واللحمة

خروف العيد ..حرم تتعداه

قبل تطلع الخشبة ..حصل جربت

السلات بالعسل ..في ديم مدينة

ولّ شمبوب ..معتصم ود الجمام

"كلات" بقة..السني ..سلمي

تماضر ..هادية..يحي فضل الله

ياربي العيد دة مايجيبك..

مريم الطيب ..صباح ..

بيان ..موصلي ..طارق

سمية..عليش ..مجدي عوض صديق

منعمشوف..محمد سيد احمد..

وناس كتار ...كل سنة وانتم

بخير ..ودايرين العيد ده

نخليهو حدث ..نطلع فيهو

الخشبة من تشرق لحدي

اليوم التاني ..

وياخطاب ..حارسنك ..

تمسك المفتاح..وتفتح

البوست ..واقرب زول منك..

يستلم لحدي مايصل لي

آخر زول ..

Post: #34
Title: Re: أسباب العسل.. قصيدة لخطاب حسن أحمد
Author: نهال الطيب
Date: 03-27-2007, 09:55 PM
Parent: #33

يازهرة معبأة وملخصه كل البستان
يامدهشة للنسمة الهابه
وشاغلاها عن الهببان
وحتى اليد الممتده بالقطف الفوري
معطلة فيها القطفان
أهواك
اشعلتي غناي نيران
في الزمن القشة
صحيتي الظلمة غسلتيها
نفضتي غبار العد الغشن
أهواك
اهديتي الزغب الريش
والغنوة السالت شوفيها
اصطخبت بشويش
وانتظمت كل الألحان


الحديقة أستاذ خطاب حسن أحمد
الله عليك
ويا ألف سلام عليك
سلمت يا من جعلت في حياتناأسباب العسل متاحة بهكذا جمال

شكرا
استاذ عبدالباقي محمد

ست سلمى يا رائعة

Post: #35
Title: Re: أسباب العسل.. قصيدة لخطاب حسن أحمد
Author: خطاب حسن احمد
Date: 03-28-2007, 03:38 AM
Parent: #1

..
...سلام للجميع بدون فرز
..كلكم حلوين وكل واحد فيكم اعسل وألسع من التانى
..
...قال الشاعر الغريب ، مظفر النواب
..
...تدق الزهرة بالأخرى
..يشتعل البستان ..رنين
..
..اللسعه طبعاً أول ..لسعته حاره ..الجربها إرفع عسله.!
..لكن بعد داك بتعمل فى الزول عمايل بديعه..
..
وانا طبعا..متذكر أول وآخر نحله..
..وما داهمنى ..من مهرجان
..ودى كانت واحده منهم..
..أو السع واحده
..
..لكم العسل
..

Post: #36
Title: Re: أسباب العسل.. قصيدة لخطاب حسن أحمد
Author: خطاب حسن احمد
Date: 03-28-2007, 11:48 PM
Parent: #1

...
....
.....إذا تصادف فى دمك .. مرة ً
أربع وعشرون ..لسعة ً
..أختبر القلب..
...
...
شكرا عبد الباقى محمد مختار
..التحيه لك ..
..وأنت تمرق متخرجا ..كطالب نال ما طلب
علما و نضال
...كخريج لتلك المؤسسه العريقه
..
المعهد..العالى للموسيقى والمسرح
..
..إلى الغابه
..التمرد
..خلعت تمردالمسرحيين..ذلك المساء
..على الخشبه..متزامنا وتصفيق الجمهور
متواطئا ..وذلكم التواطؤ ..الخطر والجميل
..
لتنجز نصا..عرضاآخر..على أرض الواقع
..
وشكرا كثيرا
..يابقه
..وعبد المنعم رحمه
..يدير الان المسارح المتحركه
..لبث الوعى فى الناس ..حول الأمراض ..المحيقه
..بهم..من الإسهالات..حتى الإيدذ..
..والأمراض الناتجه ، عن تلوث المياه
..فهذا مسرح ..دكته الواقع
..وجمهوره يعانى ..الأمرين
..شكل الحكم..
..وغياب التخطيط
..الثقافى والتوعوى للدوله
التى سيطول بحثنا عنها..
..لكننى أوكد لكم..
..أنه قد آن أوانها..لا نقبع فقط
..على صالات الإنتظار.!
..
..كلنا هناك فى كل المحطات
نعمل فعل
الوعد..
..
..نحن فى انتظار
..دولتنا السودانيه
..والى التاريخ
..تنسحب معتزرة ً..عادة الحكومات
...
...

Post: #37
Title: Re: أسباب العسل.. قصيدة لخطاب حسن أحمد
Author: خطاب حسن احمد
Date: 03-29-2007, 02:47 AM
Parent: #1

...
....
..نحن فى إنتظار الدوله
....

Post: #38
Title: Re: أسباب العسل.. قصيدة لخطاب حسن أحمد
Author: Inaam Saad
Date: 03-29-2007, 07:25 PM
Parent: #37

ح تجي يا خطاب ح تجي
ما دام ناس بقه وعبد المنعم رحمه عملو من دكة الواقع خشبة
ومسرحهم مشى للناس في بيوتهم بالإستنارة وبالحب


تشكر يا بقة عل أسباب العسل
ويشكر كمان عركي




Post: #39
Title: Re: أسباب العسل.. قصيدة لخطاب حسن أحمد
Author: خطاب حسن احمد
Date: 03-30-2007, 00:15 AM
Parent: #1

..
...بت الشيخ سلامه ..هوى اليوم السعيد الليله ..وهكذا دواليب
...عارفه عندك طبعاًً، عندك كم غنيه ( مسربعه عندى ) كتار السربعات
بعدين الزول زاتو مساعد..ياي
والإسم ..لقيتيه ..مصلح جاهز..بمناسبة مصلح دى أحكى ليكم قصه ظريفه.!!
طيب كويس..مره كان زيما أى نكته بتبتدى فى زول ماشى فى شارع القصر..يعنى
..مُدى القصر ضهرو..و وشو جيهة السكه حديد ..الدنيا نوع ناس اتناشر ديك والخرطوم
سخانته تقول للطوه انتى مشدوده على كم فولت ..اسكتى بس ما تقولى ..فولتا العليا..بس
..قام النجاشى ..وزهجته ديك وهو ماشى فى التلتوار ..لا لا مش الطرف..التلتوار الفى النص
بين الأتجاهين..زهجان ومسهى ..إطل زول راكب طرف فى التكسى داك عشان الحركه البايخه ديك
والتكسى وحركة الشارع المتورطه فى البطئ ديك ..والنجاشى فى تلتوارو ماش ..والراكب المطرف
بعمل فى حركتو التمباكيه ديك .. والنجاشى كمان عليهو ماش..
..يا للكف ..طاااخ..قوم ياالنجاشى ..امعطو ليك ..داك ياالقلم الما لعب
والكافت ماش ..المكفوت يصيح والتكسى ..برضو ، ياخ مالك ..انت مجن..أسمع ..يا.!!
..فيرد الكافت الزهجان..ياخ أنا عملت شنو ما لقيتك مصلح.!!
....
..فسربعتى بأسمك ..ببديعة النعام آدم تظل أقربهاإلى
..بت الشيخ سلامه
وأنتظر هوى من عندك..
..لك الورد أيتها السيده النبيله وأنت تمجهريينى
تحت عدسة منظارك الفاحص ..
فلم يخطرنى اننى أضبط ..متلبسا بكل هذا الجمال الذى ذهبت
..
أسمحى بالهمس للشكر للحميمه إنعام عبدالله سعد
بالشكر النضير لجلبها .. أبوعركى البخيت
وصاحبه فى الزمن العجيب
..
لكم الجمال

Post: #40
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-30-2007, 02:25 AM
Parent: #39


كل الشوارع .. . درب واحد
والعمر يوم ... لكنو ممتد
أنظر الى خطاب وهو يتمعن الشوارع بذلك الأحساس المسرحى..
أنظر كيف تتدفق فجأة من مخيلته الصور فى تناسق عجيب ..
_
شنق الأولاد طواقى .
والبنات جدعن طرح
__
ذلك الحبور الطاقى أحسه فى كل شعر خطاب

تحياتى
عثمان


Post: #41
Title: Re: أسباب العسل.. قصيدة لخطاب حسن أحمد
Author: على عمر على
Date: 03-30-2007, 03:21 AM
Parent: #1

المنبر بعد دا ياشباب
بحضور هدا الوجيه الانيق
الخطاب
بقى (يزورو فوقو)
غايتو بخت بكرى ابو بكر
وناس حوشو

Post: #42
Title: Re: أسباب العسل.. قصيدة لخطاب حسن أحمد
Author: Osman Musa
Date: 03-30-2007, 04:08 AM
Parent: #41


قصايد حزم . حزم. حزم صنع لها عطر خاص من الأزهار (من برم الطلح
والسيال والطرفة والنال ) ياصاحبه فى الزمن الصعب....
تحيات بالجملة
عثمان