البشيـــــــــــــــــــــــــــر عريســـــــا (اليوم)

العروس من برى المحس ....(ارملة) تخصص

والد العروس زميل البشير .من الشبارقة (ع)(ى) (ج) عميد معاش

...الليلة كان العقد ..فى مسجد فى برى المحس


اوع يجى زول يقزل ده امور شخصية وخاصة ......

Quote: يذكر أن زيارة الرئيس للمنطقة ذات دلالات اجتماعية لروابط جمعت البشير بالعميد (م) علي يوسف جميل من خلال زمالة الدفعة 28

يا طوربيد
ده منو الزميل الما مشى الدافنة ده وجاب ليك الخبر
البشير قال العالم مشغولة ببكا نقد نعملها من سكات


فعلا كما قلت تم عقد القران اليوم في بري المحس وانتقلت الافراح للمنشية حيث منزل اهل العروس

يعني يا محمد ابراهيم بتأكد مصدر من لا مصادر له

معاوية الصايم احسن الله عزاء هذا الوطن في العائدين الي دواخل الناس والارض
علي كل هي احزان الموت والحياة

البشير عمل تعديل طفيف في دراما ديك المسلمية

فديك المسلمية بكشنو في بصلو وهو بعوعي

ولكن البشير بكشنو في بصلو وهو بخمج في سوق العرس

والله البشير بالغ
في العقد بتاع الجامع
ما كان ياخده بوضع اليد
مما شفت العنوان اتخيلت عرس شهيد وكده

وبرضو مستغرب من الذين يُساككونك من بوست لآخر يا معاوية ؟

Quote: بتأكد مصدر من لا مصادر له

الصدفة البحتة فقط يا شقدي
دردشة تلفونية مع صديق ، (العروس تقرب لزوجته) واداني التفاصيل كاملة وانهم في حالة مباركات من العصر للاهل بالسودان
جيت داخل البيت قبل شوية وفي نيتي ارفع البوست بتاع الاخت نجاة لكن الطوربيد سريع وما بتلحق
ومصادرو يبدو انهم لا بينومو ولا بيحدو :)

Quote: البشيـــــــــــــــــــــــــــر عريســـــــا (اليوم)

المات منوووووووووو؟؟؟؟؟؟؟

Quote: المات منوووووووووو؟؟؟؟؟؟؟

قصدك (( الاستشهد منو ؟!! )) ...


(حسين الفكي)

ياناس المنبر عموم
تحياتي
معاويه عبيد مهدد بالقتل في هذا المنبر
شوفوا الرابط ادناه
قتل وقطع عيش




د. نجاة فدوة محمد فرح ودالباوقه ابوحسين ومعاويه عبيد

انتو ما عندكم شغل ولا شنو

يا اخ ما يعرس لو داير يعرس

يعني شنو ؟؟


الشرع محلل اربعة

شرع الله

الله يطوطحكم واحد ورا التاني

تمسكوا في الحاجة زي البزارين ..

وتحققت الامنيات وصرنا قرايب :)

Quote: وأبدى البشير سعادته بزيارة المنطقة ممثلة في ابنها اللواء علي يوسف جميل وقال: «تمنيت أن تكون الصداقة مع ابن المنطقة قرابة».

الاهرام اليوم

الزيارة للشبارقة كانت بمثابة الخطوبة :)

قبل فترة برضو سمعت انه في نص المعمعة والاغتيلات والترهيب من قبل نظام امن وشيبحة بشار الاسد انه هو وزوجته كانوا
بتبادلو رسائل تلفونية تتعلق بخصوص بعض الشوبينق الاشترتو ...... وهسي الناس والبلد والخلايق في السودان بمروا بذات
المحنة بس من غير تعاطي الاعلام لها كما ينبغي وبشيرنا عقد وعرس وافراح. انا والله قايل الناس ديل وفي ظروف بلدهم لا
يغمض لهم جفن ولو لدقيقة لكن الظاهر انه جلودهم تخنت واصبح لا يعنيهم من امر مواطنيهم شي..... منتهى السخف والله
وربنا يكون في عون الغلابة الذين لهم رب هو آخذ بيدهم ولو بعد حين.

Quote: ربنا آدِر .. يمكن يجعل فيها " جمال مبارك "

انشاله يقضى شهر العسل فى لاهاى

** حذفت بناء على الطلب المسنجرى**

قول رسول الله (ص): اني مكاثر بكم الأمم يوم القيامة، تدعو للزواج والتناسل، لكن البشير، وبحكم التجريب، لن يزد أمة محمّد إلا رجساً ورقصاً..
__
رئيسكم ده يبخرو فيهو وهو "يعرس" ؛)

,والله انا لو من الرئيس البشير بعد وداد ما كنت بعاين لاي واحدة
ياخي احنا حاسدين عليهو في وداد الحميلة الانيقة
الله قادر

Quote: الشرع محلل اربعة شرع الله

شرع الله دا كلللللوا ما عرفتوا
فيهو غير دي ؟؟؟
يا أخي الزول دا مُقرِف ومثير للغثيان.
الناس في شنو، والعبوب في شنو؟؟؟

منتهى الإستخفاف بالشعب السوداني، وظاهر الحاصل
اليومين ديل بيشير إلي أنّ العملية مقصودة في هذا
الوقت تحديداً...

Quote: شرع الله دا كلللللوا ما عرفتوا فيهو غير دي ؟؟؟ يا أخي الزول دا مُقرِف ومثير للغثيان.

ابو النسب الدغرى ود المدير سلام


شكرا ...دى حكمة البوست ..تسلم

حالتو ... أخير منها العرس,

أها ... نتوقع {بذلك} آخر رقصة.


جنس قرف غايتو

اتنين من الخالات واحدة قالت للتانية اجي الراجل المابخجل دا ماكان
يخلي نقد يتم التالتة الشعب السوداني كلو حزين ما يجامل شعبوا في الحزن شوية

التانية قالت ليها الرئيس يمكن كايس الجنا(الزرية)


الشعب السوداني في شنو والبشير في شنو!!!!!!!!!!!

قال الخالد حميد:

قول لابن ادم في بلد طالت معاناتو و تعب
سكانو دايشين بالشرق و حكامو طاشين بالغرب
نحن الفاقدين اى شى فى الدنيا مالكين كل شى
بالفينا بالصح وده الدرب
والتابع الصح ما ضهب
يا هرشة تفخة زيف كضب
نحى وتموت
عرشك خيوط العنكبوت
قبال ده هزينا ووقع الاعتى منو بنى وثبوت
لابوت شفع لا اجدى توت
لا شرق لا غرب نفع وشرع الله يبرأ من الشفوت
يا واقفة بين كهنوت وبوت

لا غرابة يا رهوة أم الطيور في العودة لعادتك (النسوانية) البحتة , فلان
عرس وفلانة طلقوها وعلانه دخنوها , شغل مشاطات على أصوله.

هنئياً للمريض الملفق البذئ صاحب المصير المنتظر بهذا الدور
الرخيص , فالشئ من معدنه لا يستغرب!!!


فعلاً رهو!!!!

رجال آخر الزمان.

سلام يا معاوية
اخبارك كراكة جبارة
كشهم يكشهم بلا
خبر اكيد لا ينكره الا مكابر بليد

قالو المتعافى بعد ما طلع من الطياره قام جارى جرى شديد خلاس الجماعه قعدو يكوركو ليو يااااااااااااا
مولانه اقيف قول بسم الله جارى وين ..قال ليهم لاحق المره ناسنا ديل بعقدو قبل الدفن


هسه ياقول الموج المات منو ..المتعافى وطلع منها

Quote: لا غرابة يا رهوة أم الطيور في العودة لعادتك (النسوانية) البحتة , فلان عرس وفلانة طلقوها وعلانه دخنوها , شغل مشاطات على أصوله. هنئياً للمريض الملفق البذئ صاحب المصير المنتظر بهذا الدور الرخيص , فالشئ من معدنه لا يستغرب!!! فعلاً رهو!!!! رجال آخر الزمان.

انت يا زول انت عرفت الزول الاسمو عمر حسن البشير الازوج بت زميلو ده هو منو وشغال شنو ول قلت كلامك ده لانك مكجن معاوية
يا زول اعرف اولا عمر ده هو منو وشغال شنو وشغلو كيفن بياثر في الشعب السوداني وعرسوا ذاتو وقعو واثروا على الشعب شنو وتعال قول لينا الزمن الانحن فيهو اول
الزمن ول اخر واحكي لينا عن رجال الازمان
عالم تخش ساكت وترمي ليها كلامين وتطلع وتفوت

المهم
الشكر للاستاذ معاوية على هذا البوست

الكلام البتعملوا فيهو دا عيب والله

عيب شديد

جُهَلا ليس إلا
ما عندك شغلة غير الاساءة والشتم والسباب والخوض في أعراض الناس

عاطف مكاوي في محاولات ترقيع معاوية

Quote: وبرضو مستغرب من الذين يُساككونك من بوست لآخر يا معاوية ؟

بنسكوا لانو قاعد يعمل حاجات ما كويسه وبطاردنا في المنتديات زي منتدى الهكر

مش حا نسكو ساي بعد دا ينكرب أحسن حاجة سوقوهو معاكم امريكا لانو بعد دا الشغلة دخل فيها الامر بالمعروف والنهي عن المنكر وحا نوديها المحاكم


هاك نحنا بنساكك معاوية في جنس دا


























معاوية كــضــاب بهات جـبان

تعال أنت أتشجع قول رايك في الكلام الفوق دا شنو ولو عاوز زيادة حاضـــرين

Quote: جيت داخل البيت قبل شوية وفي نيتي ارفع البوست بتاع الاخت نجاة لكن الطوربيد سريع وما بتلحق

والله المصدر (اللقمة) فى خشمو ..وقام بالواجب...

Quote: والله المصدر (اللقمة) فى خشمو ..وقام بالواجب...

بئس هذا المصدر ( البطيني )

يعني شنو

اكتشف يورانيوم ولا اسلحة دمار شامل

عادي جدا رجل تزوج على سنة الله ورسوله

فيها شنو

وبعدين انت يابربار طوالي تجي ماسكاك ام فريحانة ومنزل الخبر

يا لك من مبشتن بشتنة بائنة

................................

بالله الصايم الكبير عندو كم مرة على حبالو

الحبل اليكتفوه بيك في كدباس

الف مبروك وبيت مال وعيال ..

ومعناها في واحدة رابعة كمان ...

لكن السيدة الاولى ح تكون منو ..

الأخ معاوية الصائم

Quote: البشيـــــــــــــــــــــــــــر عريســـــــا

فى الوقت الذى لا يجد فيه الشباب والخريجين فرصةالعمل والكسب الشريف ناهيك عن شقة او مجرد غرفة للزواج وتكوين أسرة , يتزوج رئيسنا والذى من المفترض ان يكون قدوة للآخرين خاصة فى هذه الظروف الضاغطة يتزوج من الثالثة واحتمال الرابعة على الطريق , بعد ذلك يأتى من يقول وبكل بلاهة (ومالو؟ الراجل محللاتن ليه أربعة).
فليتزوج الريس ثلاثة او أربعة ويمكن ان يضم اليهن ملك اليمين ان أراد, لكن هذا التصرف لايشبه الرؤساء ولا الزعماء العظام.
بمناسبة الأربعة تهانينا موصولة لعلى كرتى فقد اكمل سيادته نصاب الأربعة قبل ايام. مبروك.

الأخ معاوية

تحياتي وألف مبروك للريس الذي ليس ككل شخص ويستحق التهنئة كمان .
اليومين ديل الرؤساء نصيبهم نار جوادة مولعة يعني أمس دبي واليوم ريسنا وبكرة ملس ولا أفورقي
وربنا يزيد ويبارك والعقبة لكل الشباب .

بحيراوي

ود الصايم والله ناس برى المحس ماسمعو بالعقد دا ولا كانت فى حاجة غريبة فى المنطقة اكون عملوو كتامى لكن عقد الجامع دا ابقى كتامى كيف؟

Quote: ياخي احنا حاسدين عليهو في وداد الحميلة الانيقة

يا زمراوي كيغنك

البشير ووداد ان شاء الله في الجنة

لان البشير اعطي فشكر , وهي ابتليت فصبرت . وما جزاء الشكر والصبر الا الجنة .

Quote: المات منوووووووووو؟؟؟؟؟؟؟

منو؟ ما عارف.
لكن قطع شك، شهيد، وصدٍيق، يا صدٍيق الموج.

Quote: بئس هذا المصدر ( البطيني ) يعني شنو اكتشف يورانيوم ولا اسلحة دمار شامل عادي جدا رجل تزوج على سنة الله ورسوله فيها شنو وبعدين انت يابربار طوالي تجي ماسكاك ام فريحانة ومنزل الخبر يا لك من مبشتن بشتنة بائنة ................................ بالله الصايم الكبير عندو كم مرة على حبالو الحبل اليكتفوه بيك في كدباس

كدي يا ود الباوقة انت تحديدا بتاكد الكلام دة ولا بتنفيهو ..عشان بعد داك نتاكد من الاشاعة ولا ننفيها ..

انا كنت متخيل

العروس دي من تشاد

زي ما بت هلال العرسها دبي


اها نحن الرابعة دايرنها من تشاد

ويبقى تكامل واتحاد

ويستمر النضال بقيادة كبير مشاطات المنبر ومن هم على شاكلته من الأغبياء!!!!!

Quote: تمسكوا في الحاجة زي البزارين ..

كتب مستر باوقيشن ..تلك المداخلة وواضح انو كان على
(عضة مندى)كاااااااااربة

(البزارين)جمع بذرة وتعنى الاطفال ...نشكر باوقيشن
(الحجازى)..

شكرا بق بق طبال العريس

Quote: ويستمر النضال بقيادة كبير مشاطات المنبر ومن هم على شاكلته من الأغبياء!!!!!

ومن الذي قال لك ان في هذا البوست نضال
هو في نضال بالضرب على الكي بورد يا رجل ؟؟؟؟؟؟؟؟؟؟؟؟؟؟
المناضلون هم الذين يقفون في وجه الحرامية الفاسدين القتلة ومن على شاكلتهم
يا رجل هنا في اخبار عن زواج مواطن سوداني من مواليد حوش بانقا اسمو عمر حسن احمد البشير
ولانه قيل لنا من قبل انه هدية السماء لنا نحن شعب السودان نناقش امر زواجه من باب انه هديتنا وان زواجه يؤثر في قفة ملاحي
والقفة فيها الخدر!!!!!!!!!!!
فتك بعافية والزعل ممنوع

ودمدني- صديق العاقب علقم
اكد المشير عمر حسن أحمد البشير رئيس الجمهورية المضي قدما في مسيرة التنمية والاعمار مجددا عزم الدولة للنهوض بمشروع الجزيرة والخروج به من كبوته باعتبار أنه دعامة اساسية للاقتصاد السوداني ويمثل سلة غذاء للعالمين الافريقي والعربي .
جاء ذلك خلال مخاطبته صباح أمس الجماهير بمدينة الشبارقة والقرى المجاورة بمحلية مدني الكبرى .وقال ان الشبارقة ذات الفضل على اهل السودان حيث انها قدمت الشهداء وناصر اهلها الامام المهدي .
وقال ان الزيارة لرد الدين للشبارقة مضيفا في هذا الصدد والى ولاية الجزيرة لتلبية هذه المطالب .
والى الجزيرة البروفيسور الزبير بشير طه تحدث في اللقاء مرحبا بالسيد رئيس الجمهورية بمدينة الشبارقة معلنا وقوف الجزيرة في خندق واحد مع السيد رئيس الجمهورية لحماية العقيدة والارواح والعرض مؤكدا تمسك اهل الجزيرة بالشريعة الاسلامية وقال ان تربص الاعداء بالوطن زاد الانقاذ قوة للتمسك بالمشروع الحضاري معلنا جاهزية الجزيرة لسد

احتياجات البلاد من الغذاء وهي مؤهلة لذلك حيث يوجد بها 75% من الاراضي الزراعية المروية بالبلاد .
الناظر عثمان يوسف جميل تحدث انابة عن مواطني الشبارقة معلنا دعم وتأييد مواطني المنطقة لمسيرة ثورة الإنقاذ وبرامجها المطروحة معددا احتياجات المنطقة في المجالات الخدمة ..هذا وقد رافقه خلال الزيارة الفريق الركن بكري حسن صالح ووزير الدفاع الفريق عبد الرحيم محمد حسين والسيد وزير الاوقاف.
من جانبها أوردت «سونا» التقرير التالي:
أكد المشير البشير رئيس الجمهورية أن مطالب الجماهير حقوق واجبة التنفيذ علي الحكومات مشيدا بالدور الذي اضطلع بها أهل الشبارقة بمحلية مدني الكبرى في البناء الوطني ومناصرة ثورة الإنقاذ الوطني والثورة المهدية ونشر الدين والعلم .
جاء ذلك لدى مخاطبته أمس اللقاء الجماهيري الحاشد الذي أقيم علي شرف زيارته لكن المنطقة الشبارقة يرافقه الفريق بكري حسن صالح وزير شئون الرئاسة والفريق عبد الرحيم محمد حسين وزير الدفاع الوطني والدكتور خليل عبد الله وزير الإرشاد والأوقاف وعدد من المسئولين بالمركز، وولاية الجزيرة برئاسة البروفيسور الزبير بشير طه والي الولاية .
وأوضح رئيس الجمهورية أن برنامج الدولة للجزيرة يتضمن الاهتمام بمشروع الجزيرة ورفع إنتاجيته والاستغلال الأمثل للموارد لاسيما مساحته التي تبلغ اثنين مليون فدان بامتداد المناقل حتى يسهم المشروع في تحقيق الاكتفاء الذاتي وتوفير الغذاء لأفريقيا والعالم .
وقال المشير البشير إن أهل الشبارقة أهل فضل علي أهل السودان وجاء الدور لرد بعض حقوقهم بالعمل علي النهوض سواء بالمشروع الزراعي أو المستشفى أو إنشاء كلية جامعية ا غيرها من الخدمات الأخرى ووجه حكومة ولاية الجزيرة بالسعي لإنفاذها وإيجاد الحلول لها .
وردا علي المتآمرين علي البلاد ذكر البشيران السودان سيرد عليهم بالمزيد من المشروعات التنموية والاقتصادية مؤكدا السعي لبناء سودان خالي من الأمراض والعصبيات والقبليات موحد تحت راية لا اله إلا الله .
من جانبه أكد والي الجزيرة من جانبه وقوف أهل ولايته مع السيد رئيس الجمهورية لتطبيق الشريعة الإسلامية وتحقيق النهضة الزراعية وان تصبح الجزيرة سلة غذاء إفريقيا والعالم وأعلن ان الجزيرة ستقف صفا واحدا مع القيادة للدفاع عن الأرض والعرض .
وأعرب السيد محمد الفاتح الكرونكي معتمد محلية مدني الكبرى عن إشادته بزيارة السيد الرئيس وتفقده لمنطقة الشبارقة والوقوف علي أحوال المواطنين بها مؤكدا الدعم لتوجيهات وتوجهات قيادة الدولة .
كما استعرض عثمان يوسف جميل ناظر عموم قبائل رفاعة الذي تحدث إنابة عن مواطني المنطقة هموم وقضايا إنسان منطقة الشبارقة وإنسانها في مختلف المجالات وعدد مطالبهم في دعم الزراعة والصحة والتعليم في مقدمتها إنشاء كلية للتمريض العالي .
وكان الرئيس قد أدى صلاة الجمعة بالشبارقة وزار منزل أسرة رفيق دربه وابن دفعته الدفعة (19) مظلات اللواء معاش علي يوسف جميل .

نقلا عن اخبار اليوم
قبل عدة اشهر

ماجابو العرس في (افراح افراح)؟؟

Quote: فعلا كما قلت تم عقد القران اليوم في بري المحس وانتقلت الافراح للمنشية حيث منزل اهل العروس

شكرا

انت واحد موهوم بس يا الصائم

اكبر نجّااار فى البورد

Quote: انت واحد موهوم بس يا الصائم اكبر نجّااار فى البورد

حضرة الافكاتو خليك دقيق في كلامك وانت المعرف روحك بالمحامي
من البوست :
يعني كيفن ود الصائم موهوم
وكيفن نجّاااار
يعنى هدتنا ما اتزوج
ول زواجو ما بيؤثر في قفة ملاحي
القفة الفيها خدرا