معقولة بس يا بكوري اكون بقيت عضو في البورد ما ناس سجيمان وعادل عبد العاطي ورجاء العباسي وردوا وكل البورداب داخل الكرة الارضية ..؟ دي حكاية تدوش الرأس.
اسمعو يا ناس تورس والفاشاشوية وام دغينة والزاكياب والرياض وكضيبات والشكينيبة والحماداب والثورة بالنص وجبل طورية وجبيل الطينة وكرنوي وتوشكي والمحمية وشندي وكوستي والدمازين والرماش وآكال الفشاش وأم درقسي وعفينة ومدني السني والدباغة والكربة والكريدة وصقع الجمل والحلة الجديدة ومسمار وهيا وأروما والمايقوما والعبطة والسرير وودأغيبش والعقدة وطابت المحمود والنية والكدرو والسلمة شمال والباقير الوراني وبالطبع التي والقضيضيم وكمان البرسي والحواتة وباسوندا والقدمبلية وحلفا الجديدة وسنار القديمة ومقاصر وام بكول والعيش الرقد في تمبول.
ويا ناس برة الفي الكسمبر وتكساس وكاليفورنيا ولندن وتورتنو واوتاوا وواشنطون دي سي وبرقو والشبارقة والدوحة الفيك البليك ودبي الشغال فيك أمير وعد الغنم وكمان يا كل المتابعين والمراقبين والوسطاء ويا دانفورث ويا بوتين ويا صدام الفي سجنك ويا عرفات تغشاك رحمة ربي
وايضا يا البتقرو الجرايد ويا متابعين القنوات الخبر دا قطع شك عليكم ما فات .. وللجميع ..إعلمو:
1- نالت شركة كنارتل رخصة المشغل الثاني للهاتف الثابت في السودان ونلت انا عضوية البورد..!
2- تجري حالياً مفاوضات بين الحكومة والحركة في نيفاشا لاكمال عملية السلام بينما مفاوضاتي مع بكري لم تستغرق 24 ساعة نلت بعدها عضوية البورد ..(على الحركة ان تبحث عن بكري اخر يدفع لها مرتبات جيوشها في الفترة الانتقالية).
3- وكمان الليلة الفرح فرحين ..فرح بعقد قران الزميلة الاستاذة لبنى يوسف - المأذون السيد الصادق المهدي- اما الفرح التاني ما بوريكم ليهو عشان (غير كاملي الاهلية للتسجيل في البورد ما يزعلو..)
4- ولو البوست دا ظهر حادفع للصاوي حق المواصلات من الخرطوم شرق والى حي الملازمين حيث عقد القران - المواصلات غالباً تكون تاكسي!!!
5- والاهم والمهم سلاااااااااااااااااممي كتير للجميع
العشطان وقدامو كوز موية بارد وبيفكر بأي طريقة يشرب

اهــــــــــلا يا عــادل


شرفتنا كتير والله

وأول رد يكون من سجيمان
دي شرف كبير
لك خالص شكري
وان شاء الله نكون قدر البورد

عادل
والله بحاول اهش الغبار حق الكتاحة و اقول ليك الف مرحب
امانتن فى الذمة
قول لى لبنى
ان شا الله[ماقادرة اقول ما ينفعك يا لبنى]ان شا الله ينفعكم كان خليتونى اسافر بى جاي و عملتو العقد بي جاى!!
طبعا ما متخيلاها خالا المساسقة بين جامع ود نوباوى وصلاة الجمعة فيهو و المركز العام لحزب الامة و دار هيئة شئون الانصار و متوهطة فى الواطة عروس
وبما انك يا عادل ح تحضرو
فرجاء تفاصيل التفاصيل
اتفقنا؟؟
والف مبروك و باقة ورد واطنان عطر للبنى
وكمان زيها
لى ناس القضارف

ياLana Mahdi
تحية بي حلاوة العقد وخبيزو
يا دوب جاي من هناك وعلى طول على الجهاز رغم الصداع بتاع المشوار وقروش التاكسي المرقن بي دم الجيب.
والله لو شفت الفرح كان قدر شنو ما بتصدقي جنس خلق وجنس بسطة والسيد الصادق المهدي حنة دقنو جديدة التقول فكاها وجاء الصيوان والمزازيك ضاربة البحر وناس شمبات والشعبية لامن قفلوا الشبابيك من صوت الفنانة الشاقي البحر..وشارع الأزهري جابو ناس الحركة كلهم عشان ينظموا العربات
وكان على الانصار التقول رجعوا الحكومة ..جنس تكبير وجنس تهليل والحرس بتاع الصادق ما يخليك تعاين حتى في دقنو سيبك من تسلم عليه ..غايتو انا تحت تحت شفت طرف الدقن لامن الصادق مشى يبارك لى ناس البيت عشان كنت واقف برة الخيمة ..وهسي العروس بتكون جات من المشاطة(اقصد الكوافير) ويكون الحابل اختلط بالنابل والجزيرة تكون اتحررت ولحقت همشكوريب!!
ما بنقدر نقول غير مليار مبروك وان شاء الله بيت مال وعيال
لك خالص تحياتي وألف شكر على الترحيب

الأخ عادل فضل المولي
يا أخي قطعت نفسي وأنا الكنت قايل نفسي بطل في سباقات الماراثون أتحرك مع القطار من وادي حلفا وأدخل محطة بحري والقطار لسه في النمر ، يا أخي إنت عضو منبر حر ولا نشرة جوية والبلاد دي كلها بتجيها من وين ، ده في زمان سابق أخونا أبو جهينة عمل بوست بأمهات المناطق وأبهاتها وأولادها ناس ودمدني وود درو وأم بكول وأم مغد وأبو ضلوع وأب روف وبصراحة البوست ده كان محتاج ليك شديد.
نيست ما أرحب بيك وإنت أديت واحد فرصة يحرب بيك لا وفي واحد يرحب بي واحد في بيتو ما إنت مننا وفينا ونحن سعداء بوجود معنا وأتمنى ليك التوفيق والسداد

أخي الـ almulaomar
تحية أعذب من نسيم النيل وان شاء الله نفسك ما ينقطع
دا من حبي للمنبر عشان ما قدرت اتحمل الفرحة قامت كتاتيح الاشواق انفجرت في لحظة واحدة واقول ليك سر الاسماء التي ظهرت في البوست دا ما تجي ربع الاسماء التي نزلت في البوست الاول (لكنو ابى يسافر) واخوك حاول يتذكر بقية القائمة لكن ابت تجئ
ألف شكر لك يا أصيل والشكر لابي جهينة وياريت الواحد يلم في البوست داك عشان ينشط الذاكرة
وتحية خالصة لي ناس ام بجيغة والبعاشيم وأم بصلة وابو رويشد والفخاخير والكبير وسيب ناس كمبو ابو الحسن وان شاء الله نتلاقى في العزازي يوم السوق او في الفسحة الوراء معتوق..!!

الكترابل
هازول كدي اتوهط في واطات الله دي

انا برحبيك رغم انني جديد من الورقه
ورغم انك ماذكرتا حلتنا التي هي بك تأكيد
اشهر من لندن وباريس

شكراً على الترحيب , والبكا ما بحرروه الا اهلو.. يعني برلوم يرحب بي برلوم
ورغم ان لقبك زول ساكت الا انو صورتك بتقول غير كدا
عشان كدا اسم حلتكم راح علي .
وليك علي - بس انت وريني اسم الحلة وانا اخصص ليها بوست كامل
ويمكن الواحد يطلع بعرف فيها زول أو زولين
اخوك
عادل

الحجاجاب ياعادل

اولاد عبدالملك

صدقني إنت يا كنت شغال بترسم في اطلس السودان يا كنت شغال مساعدي في هوستن
معقولة لكن الزول جا خاشي سمع أسماء خمسة وستين قرية في الساعة ؟ يا زول ما نسحرك , بس خايفك بالشكل ده في تلاتة بوستات تسمع اسماء القرى والمدن والقرى والأقاليم والولايات وما نلاقي ليك شي تقولو في رابع بوست ف نضطر نعمل ليك تقسيم جديد وكونفدرالية ونقسم الولايات لي حاجة تانية
نسيت ام روابة , ام دوم , ام دم , ام مغت , ام سريحة , ام عضام , ام بادر , أم ضبان , وأم ضببيبينة ست الحجوة , وأم بلينا السنوسي زاتا
وكمان أب روف , وأبو حبل , أبو عنجة , أبو كدوك , وبابا نوسة وأمها وصاحبتها الحلوة ديك .
وعشان ما ننسى
ناس عد ( الغنم ) , وساق ( النعام ) , وأضان ( الحمار ) , و( غزالة ) جاوزت .

يا زول نحنا يا دوب في صفحة تلتاشر , أشرب لي شاي واجيك

مرحب بي كتاحتك كدة

أقعد اكل لي الكوكتيل واشرب شاي وتعال منتشي وناسي حق التاكسي ح يطلع خصم من بند البوش في الشغل , ما سمعت بي الغنا بشيلو الهواء , اها هسع صاحبك دفعك حق التاكسي وغناكم شالو الهواء والهواء خلى جيبك يرفرف زي بيرق عربية سيدي زمان .



أبنوسي

الاعزاء
تبلدي (ابنوسي) وزول ساكت – رغم انو ما مقتنع باللقب لانو ما لافق فيه
تحية مفروكة
حليل ركوب الهواستن .. تلك متعة صدقني لا تعادلها متعة ركوب الايرباص !
– خصوصاً اذا كان في حمولة عيش او قمح – وقايم من الحاجاب او الطالباب أو الكباجاب أو حتى السروراب ..واه لو كانت شحنة موز من الصابوناب وقايمين وقت المغربية وفي جيبك علبة برنجية ...أي ترف هذا!!؟
ذلك زمن ولى واصبحت البناطلين مقددة من ركوب الحافلات (اسكراب الخليج) ..ليت الزمان يعود يوماً لاخبره بما فعل الخليج !
تبلدي
ردك احلى من القنقليز بي روح الموز
وما تخاف علي من العين لانو انا ماخد (حجاب) من الحاجاب عشان كدا اي عين ما بدق حتى في العراضة
لك وللوجيه -ساكت - مودتي

مـــــرحــــــيـــا بعادل معنا في المنبر الوطن..