Post: #1
Title: الفرق بين جهاز التكييف فى الرياض وشجرة النيم فى الحاج يوسف!!!!!
Author: ست البنات
Date: 02-22-2004, 02:19 AM
Parent: #0
حكى لى صديقى أنه قام بزيارة لى أهلآ ليهو فى حى الرياض وكانت الدنيا حر شديد , البيت كله تكييف والشغالات يرتبن فى الصالون والسفرجية يرصوا فى السمك المحمر والدجاج المشوى والسلطات والفواكه انواع .
وصديقى لاحظ انه سيد البيت ما موجود فسأل عنه , قالوا ليهو والله عندو صداع وراقد , قال دخلت لقيتو مكرفس جسمو ويتلولو زى الدودة من الألم ! سلمت عليهو ويا زول مالك ؟ والله وجع رأس مكرهنى الحياة من أمبارح ! بلعت بنادول وعملت مكمدات بثلج برضو ما نفع !
وجات زوجته تنادى فى بتها الصغيرة يا رنا حبيبتى أمشى لى مبرات تغديك !!!وانت يا محمود كان ماب تقدر تأكل خلاص نجيب ليك سلطة فواكه !!
صديقى قال لى اتغديت مع الوليدات بالطيبات دى ومشيت ومحتار فى الدنيا دى !!!
وصديقى نفسه مشى الأسبوع الجايى لى أهلآ ليهو تانين فى الحاج يوسف لكن من ناس قريعتى راحت , قال لى دقيت باب الصفيح جاتنى أم الحسين ودى ست البيت , ايديها مجلبطات بالخدرة ووشيها وشعرها مجلبطات بالعجين ! وقالت لى مرحبآ حبابك وهى تدعك فى وشها من العجين وتقول لى والله دابى نزلت الصاج دحين الليلى فركت الخدرة البتريدها , جيدآ جيت فحال تتغدى معانا بالقراصة ! وقبلت على الحوش تنادى فى بنتها الصغيرة والبنت مشغولة بالجرى مع أخوها : يابت قصفة طيرى تعالى هنى أمشى تورى أبوك قوليلو عتمان جاء , والبنت اسمها خدرة لكن وقت الزعل بيتحول لى قصفة !!!
ودخلت فى الحوش وشفت الراجل نائم فوق عنقريب ما فيه مرتبة وكرابو مقطع وفى سخيلة صغيرة تمارس فى لعبتها المفضلة , تدخل تحت العنقريب تحبا وتحك ضهرها بالكراب وتمرق وتانى ترجع واللعبة متواصلة.
والشفع يلعبوا بى علب صلصة ويكركبو ويكوركو وينجارو فى الحوش , وآخر دوشة وظيتا .
وسيد البيت نائم بالعراقى وعندو عوارة فى كراعو وفى سويسيوة طالعة فوق كراع العنقريب وتنقد فى العوارة , وهو يجبد فى العراقى ويحاول يغطى العوارة منها كر السوسيوة بالمرض , الشىء دى طيرت لى نومة سمحة خلاص والتفت شافنى : أهلآ ...أهلآ والله عارف نمت نومة حلوى فى الهمبريب دا من قبيل !!! دحين آ أم الحسن عامنول قلتيلى نقطع النيمة دى مضيقة علينا الحوش , أسع عليك الله ضل نيمتنا مو اخير من مكيفات الرياض ؟؟؟!
|
Post: #2
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: Abo Amna
Date: 02-22-2004, 07:38 AM
Parent: #1
ست البنات صباح الخير
حسب توقيتنا المحلي
في الحقيقة ما عارفك كتبتي شنو ولا تصنيفو كيف من وجهة نظرك ... لكن عموما يخيل لي انو اي واحد بيقرا الكلام ده بطلع بي حاجة مختلفة بتمثل جزء منه ...
عموما من البداية للنهاية احساسي تجاهة مختلف ومتداخل ... لكن اخر انطباع كنت بضحك ..
تحياتي
|
Post: #3
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: Habib_bldo
Date: 02-22-2004, 08:25 AM
Parent: #2
ست البنات عاملة كدي زي وردي أيام زمان بالخنفس
أولا ألف سلام وألف تحية
خواطر جميلة ومقارنة في محلها
بس مش كل الفي الرياض مقلقين ومصدعين ولا كل الفي الحاج يوسف بالهم مرتاح ونايمين في الهمبريب بينما مكيفات الرياض ما ساعدت صاحبنا في النوم
والمقارنة كذلك ربما سيتهمك البعض بالحقد الطبقي
المهم من كان ماله حلالاً فاليهنأ به ومن كان لا ماله حراماً فاليصبح وبالا عليه
أما الكادحين الغلابا فلهم ربهم
|
Post: #5
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: ست البنات
Date: 02-22-2004, 02:47 PM
Parent: #3
يا حبيب بلدو فيك الخير لأن وردى هامة وتشبيهك لى بيهو شرف , مع اختلاف النوع طبعآ , بس أوعى وردى يزعل منك !!!!, وبعدين الصورة دى جديدة والله وختيتها لسبب واحد عشان رقية وراق وعشة بت فاطنة يعرفونى ...وأنا قايلاها دى صلعة وما قايلاها خنفس !!!!
وكان انت موضوعى دا ضحكك برضو تكون فهمت المقصود وما مطلوب منك أكتر من كدا , ولأن الناس رؤيتهم مختلفة , أنا بكانى ....
|
Post: #4
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: maia
Date: 02-22-2004, 09:42 AM
Parent: #1
العزيزة ست البنات
حال السودان اتغير ، لا اللي في الرياض مرتاحين ولا اللي في الحاج يوسف مرتاحين ، الراحات بقت بتعتمد على كل بيت كحالة مستقلة ، يعني في نص شوارع الحاج يوسف الهلكانة بفعل عوامل التعرية الانقاذية والزمن ، ممكن تلقى ليك بيت اهله عايشين في عز مبالغ فيهو وعلى ذلك قيسي الاوضاع في كل احياء الخرطوم وفي نكتة اتقالت بسبب تغير تركيبة المجتمع في السودان / انه تلاقي البت طالعة من بيت جالوص وهي قمة في القيافة والحنكشة كانها طالعة من مجلة سيدتي مش بيت جالوص !! وعادي جدا تلاقي الدش مركب في سقف بيت يكون آيل للسقوط
لكن السودانيين معظمهم في الخرطوم حتى التعبانيين فيهم بقوا داخلين في دور حنكشة وعز انشالله بالدين
ولك تحياتي
|
Post: #6
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: ست البنات
Date: 02-22-2004, 05:05 PM
Parent: #4
الأخت Maia ,
والأخوة , تحياتى ,
الغريبة ان حال السودان مش اتغير وبس ! لكن الحال بيتغير وبسرعة عجيبة وللأسف التغيير دا للأسوأ !!!
وسوء بسرعة البرق !!
وأنا كنت فى السودان قبل ثلاثة سنوات وشفت العجب !
والخازوق لمان الغمة تنقشع ونقول نرجع نلقى اللغة ذاتها اتغيرت ونبدأ نتعلم لغة الأشارة والأيماء !!
وتبقى غربتنا غربات وغربان وبوم كمان !!!
بس ان شاء الله النيل ما يكون طفشوهو للزمن داك !
ويكونوا خلوا لينا شوية واطا , وتكون أسماؤنا لسة فى سجلات المواليد القدامى !!!
لأننا حنكون قدامى المحاربين وتكون ظهورنا انحنت وكنكشنا للشايفنو دا وكنكشتهم دى !!!
والله يكضب الشينة , وبرضو عندنا آمال وآمال مهما حصل ورغم اللى كان !!
|
Post: #7
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: ست البنات
Date: 02-22-2004, 05:07 PM
Parent: #4
الأخت Maia ,
والأخوة , تحياتى ,
الغريبة ان حال السودان مش اتغير وبس ! لكن الحال بيتغير وبسرعة عجيبة وللأسف التغيير دا للأسوأ !!!
وسوء بسرعة البرق !!
وأنا كنت فى السودان قبل ثلاثة سنوات وشفت العجب !
والخازوق لمان الغمة تنقشع ونقول نرجع نلقى اللغة ذاتها اتغيرت ونبدأ نتعلم لغة الأشارة والأيماء !!
وتبقى غربتنا غربات وغربان وبوم كمان !!!
بس ان شاء الله النيل ما يكون طفشوهو للزمن داك !
ويكونوا خلوا لينا شوية واطا , وتكون أسماؤنا لسة فى سجلات المواليد القدامى !!!
لأننا حنكون قدامى المحاربين وتكون ظهورنا انحنت وكنكشنا للشايفنو دا وكنكشتهم دى !!!
والله يكضب الشينة , وبرضو عندنا آمال وآمال مهما حصل ورغم اللى كان !!
|
Post: #8
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: الجندرية
Date: 02-22-2004, 05:13 PM
Parent: #1
ست البنات
سلام
دخلت قلت ارحب بي ستنهن لانه الاسم جديد
لقيت ليك تاريخ التسجيل من شهر عشرة 2002م
كنت وين ياختي انت ؟
بعدين تعال لي يا بت امي النسألك
الزول النايم دا والسوسيو ينقد في عوارته ما صحي
شديد ، يعني ما كان غمران ؟
|
Post: #9
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: عشة بت فاطنة
Date: 02-22-2004, 10:04 PM
Parent: #8
ست البنات السكرة سياحتك مو هينى بين عالم قصفة ورنا ، بس العوارة والسوسيوة دي براها كوم فاتت السخلة والمرقوت ،تحية لصورك النابضة ، بالحياة ...كان ما الواطة ليل كان صنقرت معاك في الهباب تحت نيمة ناس ست البنات ، وبالمناسبة دي وين ست البنات ست الاسم ، انشا عافية ، ووين الصورة ليه شلتيها ان احتج اوع تسمعي كلام بلدو صورة هيبة وقيافة
|
Post: #10
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: Alia awadelkareem
Date: 02-22-2004, 10:12 PM
Parent: #9
ازيك يا سكينة وعاش من قرا حرفك
واللة زي ما قال ابو امنة الضحك كتلني
واتخيل لي حافضل ما سكة ركبتي كم يوم كمان
خوف السواسيو
|
Post: #11
Title: Re: الفرق بين جهاز التكييف فى الرياض وشجرة النيم فى الحاج يوسف!!!!!
Author: ست البنات
Date: 02-23-2004, 04:06 AM
سلام هووووى يا عشة والجندرية وعلية !!!
وعاش كفاح المرأة العاملة !!!!!
والشوق سيول ما ليها حد يا عشة وتقلانة علينا مالك ؟ يوم الدنيا فجر ويوم عذر ؟؟؟؟ انا ما دايرة اتونس معاك يا أخيتى وواحشانى !!!
والصورة دى ختيتها عشانك انتى ورقية والحبايب المشتاقة ليهم فحال انا ضهبت واتضهبت زمون وزمون منكم وقلت تعرفونى , والحمد لله عرفتونى , ويا علية انتى ماك ( علووية ؟؟؟؟)
وشكرآ وخلوا بالكم من عواويركم من السواسيو وكراريبكم من السخيلات !!!!
وضرورى قعدة طويلة والكلام ماب يكمل لأنه دا وجع سنين وفرقة دهر !!!!
وبهديكم :
أوا تدرى من انا ؟
أنا ام اليوم
أسباب الهنا
أنا من دنياكمو
أحلى المنى
|
|