موضوع اخر عن سودانيز اونلاين في الصحافة :

موضوع اخر عن سودانيز اونلاين في الصحافة :


23-11-2007, 01:59 PM


  » http://sudaneseonline.com/cgi-bin/sdb/2bb.cgi?seq=msg&board=370&msg=1198849239&rn=0


Post: #1
Title: موضوع اخر عن سودانيز اونلاين في الصحافة :
Author: baha eassa
Date: 23-11-2007, 01:59 PM

Quote:


الجمعة 23 نوفمبر 2007م، 14 ذو القعدة 1428هـ العدد 5185

الملف الساخر - ونسة
ويســـألونك عن سودانيزونلاين


د. عادل الصادق المكي

موقع سودانيزون لاين قامت قيامتو وناس تهرج وناس تجوط... قالو يقفلوهو عشان الناس ما تشوف الفيهو.... والفيهو في السهلة بالكوم....سودانيزونلاين ايها السادة هو المجتمع السوداني كلو واتحشر في النت...... سودانيزونلاين زيو زي السوق العربي...كل شي فيهو...فيهو ناس كويسين فيهو ناس ما كويسين لكن ما كعبين... فيهو ناس متفلهمين... وفاكنها في روحهم فيه دروايش..فيهو كراويش.. فيهو نشالين فيهو شحادين.... فيهو الزول الخايف الله عشان الله وفيهو الزول الما خايف الله وعامل فيها خايفو... فيهو حمير وفيهو قرود وفيهو قراد....فيهو ست الشاي. وفيهو ست الكسرة..وفيهو ست المررو.. وفيهو الفارش يبيع في عروق امبررو.... فيهو الزول الشايل هم وليداتو والنهار كلو يرعى في غنم ابليس...فيهو الزول المليان لود عينو من قراية الكتب وويجي يفضيها .... فيهو المزنوق وكايس للمستراح.....فيهو البينضم ليهو سنين ودنين ولي حسي ما ارتاح....فيهو غنماية وفيهو تمساح....فيهو النضمو تقيل وفيهو نباح ..ينبح ليلو نهارو. وفيهو اللايوق اليلصق فيك لا ايدك لا كراعك...فيهو الكضاب يكضب عليك وما يخاف الله فيك.....فيهو وسواس وفيهو خناس وفيهو القعد فيهو كيتن علي الناس ..فيهو الجاي يرقص ويعلم الناس الرقيص.. فيهو بوليص... فيهو زول الله وفيهو المطيميص.....فيهو ناس مدروّشة وفيهو دراويش....فيهو ناس دايشة وفيهو دياشة....فيهو شماشة..فيهو البيخجل من ضلو...وفيهو اب عينن قوية.. فيهو ظار فيهو لولية.... فيهو طار فيهو حوليه....فيهو التغيان ونفسو عجاباهو ويعاين للناس من فوق... فيهو ابو الدردوق...وفيهو اليدردق ويحرد بلا سبب...فيهو المادب وفيهو الماعندو ادب..فيهو العجب...فيهو صعلوق شايل عكازو ومحدّر طاقيتو...وسكينو في ضراعو فيهو اليشترو وفيهو الاتباعو.. وسودانيزونلاين زيو زي السوق العربي..... فيهو فوراوي فيهو تكروني فيهو دينكاوي فيهو حلبي....فيهو زنجي خجلان منها.. وفيهو زنجي شبعان وتريان من وراها... فيهو العربي... النضمو كُتُر ..وفيهو الزول زول النصيحة فيهو سترة فيهو فضيحة.....فيهو المدرس...فيهو المفلس... فيهو اليخليك تقبل ليغادي ويقعد يقرّص....فيهو النضمو كلو ملفق.. وفيهو المليان علم لامن دفق...فيهو الدلاهة اليباري الناس قدر مافي زول نضم فتح خشمو وصفق.....فيهو الكتب لامن فتر علا ما اتوفق....فيهو ناس تحوم وقت الهجعة ساعة الناس تنوم...فيهو ظالم وفيهو مظلوم.....فيهو الشمشار فيهو البوبار..فيهو الكوبار..فيهو الطبرة المطنبر وفيهو طنبار....فيهو زول فصيح يحيرك ان نضم فيهو زول لسانو فيهو لكنة عجم...فيهو البلد من جم......فيهو شايقية فيهو بقارة....فيهو طنبور فيهو نقارة....فيهو غنا فيهو مديح..فيهو بكا فيهو رديح....سودانيزونلاين فيهو كل البلد بشينا وبسمحا.... .......والداير يتوكد من نضمي اليختف كراعو لعند الموقع . اخر الكلام يا حبيبًا زُرتُ يومًاً أيكهُ طائرُ الشوقِ يغني ألمي لك ابطاءُ المُذلِ المُنعمِ وتجني القادرِ المحتكمِ



جميع الحقوق محفوظة لصحيفة الصحافة © 2006 - تصميم وبرمجة شركة سودان آي تي




Post: #2
Title: Re: موضوع اخر عن سودانيز اونلاين في الصحافة :
Author: ALGARADABI
Date: 23-11-2007, 02:07 PM
Parent: #1

Quote: د. عادل الصادق المكي

الشهير بسيجيمان

Post: #3
Title: Re: موضوع اخر عن سودانيز اونلاين في الصحافة :
Author: baha eassa
Date: 23-11-2007, 02:52 PM
Parent: #2

بارك الله فيك نورتنا .. هو سجيمان الواحد دة؟

وطبعا نحن نريد التاييد في الصحف الداخلية .. وساعود في الرد علي
المقال الاساسي لان فيه اشياء نختلف فيها مع الكاتب رغم ان الموضوع
في غاية الجمال والمنطقية ..

Post: #4
Title: Re: موضوع اخر عن سودانيز اونلاين في الصحافة :
Author: baha eassa
Date: 23-11-2007, 08:08 PM
Parent: #3

د. عادل الصادق المكي
التيحية لك وانت تشخص الموقف بهذه الدقة .. دون ان تقول كلمة واحدة
في من تعدي علي الموقع بالشتم وباقزع الالقاظ .. وصدقني ان الاوصاف
التي اتي بها الهندي لم اري اسوا منها في سودانيز اونلاين؟ فاذا تم
حجب للموقع فيجب حجب صحيفة اخر لحظة بسبب كلام الهندي؟
اما اخي الدكتور عادل فيجب ان تتحدث وفي الموقع - لافي الصحيفة -
عن تجاوزات بعض الاعضاء ولاتكتفي بتشبيه الموقع بالمستراح حتي لايلقي
البعض اقذر مالديهم في الموقع؟ ونحن ندعو لموقع اكثر نظافة؟؟

ولك الود ........... بهاء الدين//

Post: #5
Title: Re: موضوع اخر عن سودانيز اونلاين في الصحافة :
Author: Tragie Mustafa
Date: 23-11-2007, 08:14 PM
Parent: #4

سجيمان
قلت لي حكيت لهم عن الدردقه؟؟
مافضل الا تحكي ليهم عن انبراشتك في سوركتي
الله يجازي محنك يا سجيمان.

Post: #6
Title: Re: موضوع اخر عن سودانيز اونلاين في الصحافة :
Author: baha eassa
Date: 23-11-2007, 08:24 PM
Parent: #5

الاخت العزيزة تراجي .. تحية طيبة :

نطلب رايك في الالتزام الادبي والاخلاقي في الكتابة في موقعنا الجميل
سودانيز اونلاين؟ فمارايك ؟؟ ولك الود

Post: #7
Title: Re: موضوع اخر عن سودانيز اونلاين في الصحافة :
Author: سجيمان
Date: 24-11-2007, 12:11 PM
Parent: #5



حسي في ضمتك يا تراجي...نضمي دا فيهو اي دردقة؟؟؟؟؟

Post: #8
Title: Re: موضوع اخر عن سودانيز اونلاين في الصحافة :
Author: baha eassa
Date: 24-11-2007, 01:53 PM
Parent: #7

ياسجيمان .. انا وجهت ليك سؤال في منتهي الجدية ليه فطيتها
ومشيت لي تراجي؟ انا بعتبر دي حملة لتنظيف الموقع وياريتك
تكون معنا في الحملة دي انت وتراجي وبجدية حتي نكون في مكان
اكثر نظافة لا - مستراح - نلقي فيه باسوا مانحمل؟

Post: #9
Title: Re: موضوع اخر عن سودانيز اونلاين في الصحافة :
Author: انعام حيمورة
Date: 24-11-2007, 02:18 PM
Parent: #1

Quote: ونحن ندعو لموقع اكثر نظافة؟؟


انا بأيد الكلام دا بشدة ..

Post: #10
Title: Re: موضوع اخر عن سودانيز اونلاين في الصحافة :
Author: baha eassa
Date: 24-11-2007, 03:24 PM
Parent: #9

الاخت انعام .. لك التحية والاحترام:

النظافة .. والالتزام الشديد مطلوبة الايام دي اكثر من الماضي ..
فليت كل الاعضاء يقفوا هذا الموقف الجميل حتي نصل الي بر الامان
دون شوشرة ويواصل المنبر رسالته الاعلامية الجامعة ..