سودانيزأونلاين .. تحت الشجرة- بقلم : وائل فحل - الخرطوم Nov 26, 2007, 09:52
سودانيزاونلاين.كوم Sudaneseonline.com
ارسل الموضوع لصديق نسخة سهلة الطبع
سودانيزأونلاين .. تحت الشجرة
بقلم : وائل فحل - الخرطوم
منطقة فى وسط المدينة تزدحم بالناس أشكالا وألوانا , أصوات مرتفعة ومتباينة , باعة ينادون على بضائعهم , أغنيات مبثوثة من محلات الكافتريات القريبة , بعض المارة يمضون بسرعة , وآخرون يتوقفون هنا وهناك , وفى وسط كل هذا المشهد الصاخب تبدو للناظر حلقة من أشخاص يتناثرون حول ظل شجرة كبيرة يبدو أن لها من العمر أكثر كثيرا من الجالسين تحتها , بعضهم جلس على (بنبر) , وآخرون تخيروا (مصطبه) فى الجوار , بينما اكتفى الزاهدون منهم ب(علب) صغيرة فرشت عليها قطع من كرتون , وكانت النقطة المركزية لهذه الحلقة سيدة (تتوهط) على كرسي بلاستيكي وأمامها منضدة صغيرة صفت عليها مجموعة من الأدوات اللازمة لإعداد الشاى والقهوة , يجاورها موقد لا تكف ناره عن الاشتعال , وكأن له صلة قرابه بجهنم !.
"عليك الله شاي سكرو تقيل يا خاله" .. يأتى الصوت من شاب أتخذ له بنبراً فى نهاية الظل , فتأتي الاجابة التلقائية : "حاضر" .. بينما أحد الزبائن ممن تبدو عليهم سمات موظفى المصالح الحكومية ينظر بدهشة لا تخلو من الاعجاب الى (ست الشاي) هذه , وكيف توزع حواسها ما بين الاستماع الى طلبات الزبائن والرد عليها , ومحاورتهم فى كل المواضيع , بينما تظل يداها فى حالة من الحركة الدائمة : تصب شاياً هنا , وتحرك قهوة هناك , وترسل فى طلب البن من الدكان القريب , ومع هذا لا تغفل عيناها عن متابعة مشاهد الشارع والحياة اليومية فيه بفضول , دون أن تغفل من مشاهدة (ناس الكشه) قبل أن يأتوا !.
" بالله يا شاب لو سمحت كدي الجريدة دي لحظة " ... هتف أحد الجلوس بالمصطبه , وهو يشير الى زبون فى طرف الظل , فناوله هذا الأخير الجريدة بينما بدت عليه علامات امتعاض مخفى من هذا الفضولى الذى قطع عليه رغبته فى قراءة الجريدة (بمزاج) مع كوب الشاي ! وما لبث صوت (ست الشاي) ان جاء من بعيد : " الليله الجريده قالت البلد حاصل فيها شنو؟ " فتأتى الاجابة من زبون يبدو جليا انه ( زهجان) : " يعني حيكون حاصل شنو ؟ ما الحالة سجم فى سجم , حمى نزفيه , مشاكل فى الحكومة , مواصلات بقت صعبه , وفوق رده كمان المره قالت دايره ليها توب جديد ! " .. تتعالى الضحكات من الزبائن , فترد (ست الشاي) : " خلاص انت طلقها وأنا بعرسك , وما دايره لي منك تياب ..! " وهنا يرتفع صوت الزبون الممسك بالجريدة قائلاً : " دا شنو ؟ ديل خلّو كل حاجه بقو على سودانيز اونلاين ؟! " فيرد زبون اخر : " سودانيز اونلاين دى شنو ؟ " فتبادر ست الشاي بالإجابة : " (سودانير) دي ما الشركة حقت الطيارات السودانية , ما بتعرفها ؟ قالو دايرين يشلعوها ويبيعوها خلاص ! " وهنا يأتى صوت زبون آخر : " لا يا خاله , مش سودانير , دا سودانيزاونلاين , موقع سوداني " .. ثم تمر لحظة من السكون يتبعها صوت (ست الشاي) متسائلاً : " موقع ؟ يعني مالو ؟ برضو دايرين يكسروهو ويبنوهو عمارات ؟! " فترتفع ضحكة عالية من الزبون الممسك بالجريدة ويوضح :" لا ياخ .. دا موقع فى الانترنت " وهنا يتطوع زبون آخر فينزع نظارته ويخاطب (ست الشاي) قائلاً : " دا موقع بيكتبو فيهو الناس مقالات " فتبدو على ست الشاي علامات الإقتناع وتهمهم : " أيوااا , زي جريدة يعني " ويسير الحوار على وتيرة متنوعة :
- ايوا زي جريدة , لكن كمان فيهو حاجات متنوعة تانية , يعني اغاني , تعارف بين الناس , أخبار , مناقشات , معلومات , وبحل مشاكل كمان !
- طيب ومالهم معاهو ؟
- والله ما عارف , كدي خلى الاخ الشايل الجريدة دا يقرا لينا الحاصل شنو؟
- فى الجريدة هنا مكتوب انو فى صحفى طالب الحكومة انو توقف الموقع دا لأنو فيهو مقالات بتاعت ( نبز ) !
- نبز كيف يعنى ؟ نبّزو منو ؟
ولا يلبث الزبون الممسك بالجريدة ان يأخذ رشفة كبيرة من كوب الشاي , قائلاً :
- فى الجريدة دي قالو انو الصحفى ده قال انو الموقع دا قبل سنتين نشر مقال فيهو اساءة للدين !
- طيب, وحاجة حصلت قبال سنتين , ما يتذكرها الا هسع ؟
- لكن صحي هو الموقع دا كتب كلام زي دا ؟
- مكتوب هنا انو ناس الموقع قالو انهم عندهم قوانين تمنع الاساءة للدين فى الموقع , والكلام البقولوهو دا كتبتو بت , وفعلا البت دي فصلوها من الموقع زمان .
- أها وبعد فصلوها أدوها حقوقها وللا صالح عام ؟!
وهنا تعلق (ست الشاي) : " كمان البنات خلّن كل شي قبلن على الدين ؟ "
- لكن قول فعلا هم نشرو المقال دا , الزول دا يطالب انو يقفلو الموقع كلو ؟ هسع كان هو زاتو فى الجريدة نشر مقال بطّال , حيقفلو الجريدة كلها عشان مقال واحد ؟!
- ياخوي دا بكون عندو غرض , هو عليك الله المصايب البتكتب فيها الجرايد دي كل يوم لو فى زول بحاسبهم عليها كان فى جريدة بتبقى شغاله لسع؟ ما كل يوم شابكننا داك فعلتو , وديل قبضوهن وين , وديك اهلها متبرّين منها !
ويدخل الى الحلقة زبون جديد , شيخ كبير العمر , يخاطب (ست الشاي) صائحاً : " أديني جبنه ساده سكرها خفيف " .." حاضر يا حاج " وسرعان ما يعتدل الحاج فى جلسته مخاطبا الحضور : " بتتناقشو فى شنو يا اخوانا ؟ " فيرد عليه حامل الجريدة : " بنتكلم عن خبر هنا , قالو يطالبو انو يقفلو موقع سودانيزاونلاين " وكأن الحاج كان ينتظر الاجابة , فقد صاح فوراً : " بالله دا ياهو ال(سامسونايت) الأتكلم عنو الامام فى خطبة الجمعة الفاتت ؟ " وهنا يتوشح الحضور بحالة من الانتباه والتركيز , وتسأل (ست الشاي) : " أجي ! كمان جابوهو فى الجامع ؟ " ويرد الحاج : " أيوا , الامام قال انو ديل ناس فارغين وبنبزو الدين , وقال انو قرا الكلام دا فى الجريدة.. انا زاتي ما عارف ( سمسونايت ) البنبزو فيهو دا شنو , قمت سألت الزول القاعد جنبي فى الجامع , قال لى ( سامسونايت) دا شنطة بشيلو فيها المنشورات حقت النبز دي ! "
وهنا تتصاعد الضحكات من الحضور , بينما تجدها ست الشاي فرصة لاستعراض معارفها اما هذا الزبون فتقول : " شنطة شنو يا حاج , دا موقع فى سوق الانترنت ! " فيقول الحاج : " أيواا , تلقى ناس المحلية كلمو ناس الجريدة يهاجموهو عشان هم يجو يكسروهو ويبيعوهو للخليجيين يعملوهو استثمار ! " ويعود الزبائن للضحك من جديد , بينما (ست الشاي) تناول الحاج قهوته قائلة : " والله ما بعيد ! " وهنا يهتف احد الزبائن معلقاً : " ياخي الامام زاتو ما قرا الكلام المكتوب فى الموقع , وناس اذاعة لندن عملو معاهو لقاء سألوهو عن الموقع قال انا ما بعرف مكانو وين ! " فترد (ست الشاي) : " طيب وكت ما اتأكد بي نفسو , الشلاقه البيهو شنو ؟ ما كان يسأل اول حاجة ويتحقق بي رقبتو عشان ما يظلم الناس ساي " وهنا يعلق الزبون الممسك بالجريدة : " كمان اسمعى قالو شنو فى الجريدة , قالو الصحفى الهاجم الموقع دا قال انو الاعضاء بتاعين الموقع ديل كلهم سواويق تكاسي وزباين ستات شاي ! "
وفجأة تكهرب الجو فى حلقة (ست الشاي) وسقطت الملعقة من يدها وهى تقول بغضب : " كمان الصحفى دا بنبز فينا ؟ مالنا نحنا ؟ ومالهم الناس البقعدو معانا؟ بنسقيهم عرقى؟ ما بشربو شاي وجبنه , وبعدين هو الصحفى دا بيدفع ليهم حق الشاي من جيبو ؟ ونحنا مالنا ؟ بنسرق؟ بننهب؟ بنشحد الناس؟ بنشكّر الناس بالكضب فى الجرايد عشان يرضو علينا؟ بنسكت عن الظلم الشايفنو ؟ بالله شوف الزول العجيب دا ؟ هى القعدة مع ستات الشاي عيب وللا حرام ؟ " , وبدأ الزبائن يحاولون تهدئة ست الشاي من انفعالها , فإذا بزبون اخر يقذف بمفتاح سيارته امامه ويصيح : " كمان بنبز سواويق التكسي ؟ مالهم ؟ انا سواق تكسي.. كمان دي عيب ؟ هو قايل الفهم مقسوم لي ناس الجرايد براهم وللا شنو ؟ هو هسي لو صحي صحفي , كان يتكلم عن الظلم الظالمننا ليهو ناس المرور ديل , يشيلو يقطعونا فى الايصالات , والشوارع زي الزفت , وكلها حفر , طيب قروش الايصالات دي بتمش وين؟ " وهنا ارتفعت حرارة النقاش , ويعلق زبون : " والله الموقع البهاجمو فيهو دا مفيد جدا , يعنى هسي نحنا طلبه بنرجع ليهو كتير وبنستفيد , لو حجبوهو يكونو ضرّو الناس ساي " , فيعقب عليه زبون اخر : " ياخي يحجبو شنو ؟ انت نايم وين ؟ ما عارف انو المواقع المقفولة دي كلها الناس قاعدين يفتحوها بالطريق الساهلة الكل الناس عارفينها ؟ كدي انت امش اى محل انترنت شوف الطلبه والمراهقين ديل جنس المواقع الفاتحنها , كلها ممنوعة بس بتنفتح بسهولة وناس الاتصالات نايمين فى العسل ! " .. فتنسى (ست الشاي) قليلا من غضبها وتعلق ضاحكة : " والله كان كدي إلا يشوفو ليهم فكي ( يحجبو ) ليهم ! وناس الجرايد ديل فايقين , الناس بشترو الجريدة الصباح ,الضهر بجدعوها او بيلفّو بيها كيس الخضار ! "
وبينما النقاش مستمر , فجأة عمت المكان حالة من الفوضى , وبدأت (ست الشاي) تلملم اشياءها بسرعة وتوتر , بينما من بعيد يصيح احدهم : " الكشه جات " !.
ــــــــــ
مخرج : من أبيات لمحمد الحسن سالم حمّيد :
" ما يقبضو الباعوض .. ما يقبضو الضبّان .. إشمعنا نحنا وليش ؟
الأرزقي السمسار .. الما بيدور فـتــّـيش ..
نحنا الحراميين .. ولّلا البدسـّـو العيش ؟! "
وائل فحل - الخرطوم
Post: #16 Title: Re: سودانيزأونلاين .. تحت الشجرة Author: إيمان أحمد Date: 11-27-2007, 09:46 AM Parent: #3
Quote: " أيواا , تلقى ناس المحلية كلمو ناس الجريدة يهاجموهو عشان هم يجو يكسروهو ويبيعوهو للخليجيين يعملوهو استثمار !
والليلة يا بكري، شيل شيلتك
شكرا على نقل المقال، وشكرا للكاتب على المقال الذكي، والصورة الحية
تحياتي العميقة وكان معاك ستات الشاي ما بتضهب الله يكفينا وإياهن شر الكشة
العزيز بكري التحية لك و عبرك للعزيز وائل فحل اجاد الكاتب في تمكنه من وضع ما يمكن تسميته ببرلمان شعبي اجدي و اوعي من السلطة و اجهزتها و توابعها.. الخلاصة ان البسطاء بنقائهم و فطرتهم السليمة اكثر مقدرة علي رؤية الصاح والخطأ و علي ترتيب الاولويات..
Post: #5 Title: Re: سودانيزأونلاين .. تحت الشجرة Author: nada ali Date: 11-26-2007, 06:31 PM Parent: #1
Quote: الخلاصة ان البسطاء بنقائهم و فطرتهم السليمة اكثر مقدرة علي رؤية الصاح والخطأ و علي ترتيب الاولويات..
مقال جيد و مختلف
Post: #6 Title: Re: سودانيزأونلاين .. تحت الشجرة Author: عبدالله شمس الدين مصطفى Date: 11-26-2007, 07:03 PM Parent: #5
عفارم عليك يا وائل ، كتابة رشيقة وسلسة ، ومباشرة ، وتقول لى يوسف جبرا "شنو ليك" ؟؟؟.
وصدقنى يا بكرى هذا هو وجدان أهلنا البسطاء ، فهم يلتفون من حول "أشياءهم" التى تحاول السلطة حرمانهم منها ، بالحجب تارة ، وبالتغييب تاراتٍ أخر ، لكن هيهات أن يفعلوا ، وطبعاً لا وأبداً لا شفناهو شفناهو ، وما أكثر ما نشوف ، وترى أعيننا الدامعة ، والدامغة لهم فى كل ما يأثمون به فى حقنا .
الاخ بكري ... لك الود الاخ وائل نقل الصورة الشعبية الحقة .... والحقيقة الراسخة لما يكون عليه موقع أو أو صحيفة تتحدث عن البسطاء ...... تلك هي الحقيقة ... وليذهب الذبد هباء
Post: #10 Title: Re: سودانيزأونلاين .. تحت الشجرة Author: عبد المنعم سليمان Date: 11-26-2007, 09:07 PM Parent: #1
Quote: التحية للذين يبايعون سودانيز أون لاين تحت الشجرة
والتحية للمبدع وائل
بس بالله توريني ست الشاي وين عشان نقعد معاها ياااخ
Post: #11 Title: Re: سودانيزأونلاين .. تحت الشجرة Author: Abd Alla Elhabib Date: 11-26-2007, 09:27 PM Parent: #10
Quote: (سودانير)أونلاين دي ما الشركة حقت الطيارات السودانية , ما بتعرفها ؟
بكرى يا مفترى !! إنت المالك الجديد ونحنا ما جايبين خبر !!
Post: #12 Title: Re: سودانيزأونلاين .. تحت الشجرة Author: حسن الطيب يس Date: 11-27-2007, 03:21 AM Parent: #1
وائل تصوير جميل بكري مكن تدينا توكيل لهذة الشركة بندفع
Post: #13 Title: Re: سودانيزأونلاين .. تحت الشجرة Author: Mohamed Ahmaed Olyesh Date: 11-27-2007, 05:22 AM Parent: #12
لكم الف تحيه بكري ووائل وطالما نحن هنا فلن نبايع ولن نستسلم علي هؤلاء الصغار عليش
Post: #14 Title: Re: سودانيزأونلاين .. تحت الشجرة Author: Aymen Tabir Date: 11-27-2007, 08:11 AM Parent: #13
شكرا بكري شكرا وائل (خذوا الحكمه من افواه البسطاء) الا ليتهم يفهمون !!
Post: #15 Title: Re: سودانيزأونلاين .. تحت الشجرة Author: على محمد على بشير Date: 11-27-2007, 09:39 AM Parent: #14
Quote: التحية للذين يبايعون سودانيز أون لاين تحت الشجرة
Post: #17 Title: Re: سودانيزأونلاين .. تحت الشجرة Author: Elawad Eltayeb Date: 11-27-2007, 10:30 AM Parent: #15
Post: #18 Title: Re: سودانيزأونلاين .. تحت الشجرة Author: Nasruddin Al Basheer Date: 11-27-2007, 11:18 AM Parent: #17
مقال رائع وشيق وذكي وجدير بالقراءة.. استطاع الأخ وائل أن يلخص الضجة التي أثيرت حول هذا الموقع في مقال جميل، فند كذب ودعاوى الذين هاجموا هذا الموقع وطالبوا بإغلاقه.. أئمة السلطان الدجالين تركوا تناول ظواهر الفساد والنهب والانحلال ومشاكل البطالة والعنوسة والامراض المنتشرة والفقر ومشاكل التعليم والصحة وانتشار الاوبئة وازدياد حالات الطلاق غيرها ودعوا الناس أخيراً لإعلان الجهاد ضد سودانيز أونلاين.. إن كان هناك جهاد يراد له أن يعلن، فيجب أن يكون ضد هؤلاء الأئمة الساكتين عن قول الحق في وجه لصوص الجبهة الإسلامية سارقي قوت الشعب. ضحكت حتى البكاء عندما طالب أحدهم في موقع انترنت إعلان الجهاد ضد سوداينز أونلاين.. ده يقولوا عليهو شنو؟
يا قراء وأعضاء سودانيز أونلاين أعملوا حسابكم شديد، فجيوش الجهاد ضدكم قد اصطفت، وخيولها قد أسرجت وأعلفت، وإني لأشتم رائحة الدماء المهدورة قبل أن أعمل (كليك) لأضيف هذا الرد..
Post: #19 Title: Re: سودانيزأونلاين .. تحت الشجرة Author: محمد الطيب حسن Date: 11-27-2007, 11:40 AM Parent: #18
يا جماعة الحهاد كلمة عظيمة ومدلولها اعظم, وحقوق وجوبها واضحة وهناك اولويات , والحديث يطول
ولكني اري في استعمال كلمة الجهاد في هذه الايام كاستعمال الجوكر في مسابقات( تلي ماتش الالمانية), فيجوز لك ان تستعمله في اللعبة التي تروق لك او الممسك بفنونها. هناك الكثير يستدعي أن يُجاهد ضده ولكن ......
فعن اي جهاد يتحدثون , ضد كلمة ,رأي ,
و الاصح إن يري الجميع عوجة رقبتهم
قبل هدرالدماء و قتل الكلمة , واأد الرأي
والحق يقال الشعب السوداني كله جاهد, ويجاهد ,ومُجاهَد
