بيت الطين ..عيديه للذكرى

القومه لي حضرة بيوت الطين
وللناس الزمان .. طيبين
وللعاشو العمر .. صابرين
متحابين
ومتألفين
ومتطايبين
ديل أهلك
وديل أهلي
الولدونا في بيوت الِمرق والطين
كيف ننساهو بيت الطين !
الواقف وسط حيشانا .. مبني سبيق
بنوك ناساً بُساط قانعين
بالطوريه .. والكوريق
متين ورصين
وبابك عمرو ما بنسد
بشهدو ليهو شباكين
وعاد كان غبنا
كان جينا
كتير تلقانا ليك فاقدين
رفيق الزكرى بيت الطين
... ... ...
ده بيت حبوبه
بيت يُمه
بيت الونسه واللمه
بيت الفرحه للناس البعاد غايبين

في الضُهريه
في عز الهجير والحر
نديك رشه بي كوزين
هبوبك بارده عز الصيف
بتدي الغمده رمشة عين
حليلك أنت بيت الطين

وفي العصريه
نمرق بره في ضُلك
ونقعد قعدة الرايقين
عناقريب السرور تمرق
مفرشه بي ملايات تيل
أصيل ومتين
وجمب العنقريب تربيزه
فيها الرادي اب موجتين
ولمبة أمي بي جازه
وسط العتبة ضوها زين
وساعة المطرة في ليل الضُلمّه تشيل
وبرق القبلي لينا يبين
نلم لحفاتنا نتسابق
نجيك داخلين
ونفتح لي شبابيكك
نشم ريحة الدعاش والطين
حليل زمنك
حليل ناساً حُنان طيبين
وزمناً كان جميل وحنين

*