Post: #1
Title: عرض حال
Author: Napta king
Date: 05-25-2004, 02:55 AM
عرض حال
شعر: سميه هندوسة
قبل سنوات كان عبد الملك البرير محافظا لمدينة امدرمان وفي احدى المرات واثناء خروجه من مسجد امدرمان الكبير عقب صلاة الفجر اذا به يتعثر بـ(كانون) احدى ستات الشاي اللائي جعلهن الفقر وسوء الاحوال يحرصن على السعي وراء الرزق منذ (الدغش) ، فما كان من المحافظ الهمام المسؤول عن الرعية إلاَّ وان ركل (الكانون) ملقيا به في آخر الشارع وكال الشتائم لصاحبته بأقذع الألفاظ متوعدا ومهدداَ .
وفي الصباح كانت اكبر حملة ضد ستات الشاي شعارها (وا.. قدماه )!! فليس محافظنا الهمام بافضل من الخليفة المعتصم ويحرص كل الحرص على اقدامة التي يذهب بها الى صلاة الصبح!!.
لا ادري لمَ تذكرت هذه القصة وأنا اقرأ قصيده الشاعرة سمية اسماعيل هندوسه التي كتبتها قبل سنوات , ربما لان لي تعاطف بلا حدود مع ستات الشاي فهن يشبهن الوطن فهي توقد نار (المنقد) ونحن نتحلق حول جمر الصبر انتظارا للفرج
ناس حاكمانا بالاعدام
تبني فيلل قصور اطيان باسم الدين
وباسم عقيدة الإسلام
تعذب فينا بالجمله
وترفل في النعيم جمله
وما مهتمه بالايام
ناس تهتم بالمنصب
وشكل نظافة المكتب
وسخانه ضمير وقلب
تملأ جيوبا من عرق الفتر وتعب
ورافعة شعارها بالتزييف
(إنقاذ كل زول غلبان)
وبختك انت ياسودان
أفرح بي لواء الفرسان
الشهرو السلاح بالليل
وباعوا الدين باسم السلطة والصولجان
وجوَّعوا شعبك الغلبان
باسم الدين وبأسم حماية النسوان
عشان الجبهة تتعلَّى
تبيع بي أرخص الأتمان
في سوق للنخاسة جديد
جنود وعبيد وأيضاً ملحقات للبيع
كرامة .. شهامة.. نخوة .. رجولة
عِرض الناس صِبح للبيع
( والحرة تأكل من ثديها)
ومايفضل لبن لي رضيع
عشان النسل يتحدد
ومايطلع شجاع وعنيد
تفضل حواء عقرانة
سياسة قديمة مافي جديد
يتم تمجيدها في الإعلام
أخت نسيبه أم شهيد
وفي الواقع حواء تجوع
تشيل الليل هموم ودموع
ولمن تصبح الواطه
تشيل برادها والكانون
تبيع الشاي في سوق الله أكبر
وتُحارب بالنظام العام
باسم السلطة والقانون
وتترحل في عربة كبيره لي قسم النظام العام
وفي المقرن من البوليس تشوف إذلال
ومن جنيات في سن أحفادها تضرب بالحزام والبوت
حواء بكت بي كل مراره
تندب حظها العاثر
وتنعى حكومة السودان
سنيت وعقود
هَي حليلك انت ياعبود
زمانك شفنا فيهو رخاء
عيشة هنية لقمة طرية
واتبطرنا بالنعمة
جاتنا حكومة كالمعبود ومافي بِغم
نَهِب أموالنا.. جوع أطفالنا
موت صبيانا باسم الدين ومافي حدود
هَي حليلك انت ياعبود
وياللابس الحزام والبوت
أذكر دعوة المظلوم
والعن حظك المشؤوم
الجابك عبد للجبهة
تخدم انت في الحكام .. وما محكوم
تدوس بالبوت ضعاف الناس
وناسي الجبهة مابتدوم
وماتحميك يامغفل
وقت الحارة تخدم ناسا
ترفع ساسا .. مافي سياسة تنفع شعبك المظلوم
وافرح بالحزام والبوت
لما تعك ولما تجوط كل شوارع الخرطوم
وتنتفض الحشود تثأر
تاخد التار من (الكارنيه)
وصاحب كل بوت وحزام
وتصبح انت زول ميت (ومامرحوم)
وافرح بالحزام والبوت.
|
Post: #2
Title: Re: عرض حال
Author: حبيب نورة
Date: 05-25-2004, 04:15 AM
Parent: #1
Quote: وفي الواقع حواء تجوع
تشيل الليل هموم ودموع
ولمن تصبح الواطه
تشيل برادها والكانون
تبيع الشاي في سوق الله أكبر
وتُحارب بالنظام العام
باسم السلطة والقانون
|
دي الحالة يا ملك نبتة
|
Post: #3
Title: Re: عرض حال
Author: Napta king
Date: 05-26-2004, 05:26 AM
Parent: #2
دي الحالة ياحبيب نوره ولا بواكي عليهن ولا وجيع لشكايتهن
|
Post: #4
Title: Re: عرض حال
Author: Napta king
Date: 05-26-2004, 11:47 PM
Parent: #3
قبل فترة قرأت بوستا مشابها عن قصة ستات الشاي ولم اعثر عليه في البحث
التوثيق يجب ان يبدأ من هؤلاء
|
|