السودان (الشغيغ) مقال ساخر لكاتب عربي.

السودان (الشغيغ) مقال ساخر لكاتب عربي.


29-08-2007, 02:49 PM


  » http://sudaneseonline.com/cgi-bin/sdb/2bb.cgi?seq=msg&board=336&msg=1199331342&rn=22


Post: #1
Title: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 02:49 PM
Parent: #0

اطلعت على مقال بعنوان (السودان الشغيغ) لكاتب عربي اسمه محمد العلي عنوان المقال من باب السخرية والتندر من قاف السودانيين التي تنطق غينا أما متن المقال فقد عبر فيه الكاتب عن قرفه من بعض مشاهداته أثناء زيارته اليتيمة للسودان وقد عبر الكاتب عن استيائه من ترديد السوانيين لعبارات بعينها بطريقة غبية كما لم يخفى قرفه من(السفه) السودانية وكيف انه اضطر لمجالسة أشخاص مقرفين يختلط لعابهم بالصعوك عندما يتحدثون.
على كل لست زعلانا من كاتب المقال الذي لم يجد في زيارته للسودان ما يستحق الكتابة عنه غير الصعوط فقط أود هنا أن أقدم نصائح لمن يود منكم زيارة منطقة الإحساء التي ينتمي إليها الكاتب حتى أوفر عليكم دهشة مثل التي أصابت الكاتب من بعض المشاهدات التي قد تبدو لكم غريبة.
الزى الشائع في هذه المنطقة يتميز بالبساطة الشديدة فهو عبارة عن فوطة تلفها حول وسطك وتربطها من الأمام وتتجول بها بحرية شديدة وأثناء تجوالك يجب أن تظل منتبها للفوطة فربما يصادفك مسمار أو طفل عابث يجردك من الفوطة فتجد نفسك انفكو.
يدين أهل المنطقة بالمذهب الشيعي ولديهم اهتمام مبالغ فيه بالطهارة فلا يجوز لدى بعض غلاتهم دخول المسجد بالسروال بل يتعين عليك أن (تملص) سروالك قبل دخول المسجد وتضعه في مكان مخصص للسراويل في مدخل المسجد وهي نظرية لا غبار عليها فلا احد هذه الأيام يستطيع أن يضمن سرواله.
كثير من هؤلاء القوم يأخذون الأمر من قصيره فيتركون (انكستهم) في البيت بدلا من البهدلة في الملص عند الدخول ثم المكابسة عند الخروج في فرز اللباسات .ونسبة لتشابه اللباسات فربنا تلبس بالخطأ سروال شخص آخر وتنطلق إلى اهلك .
قد تكون حويطا وتضع علامة مميزة على سروالك حتى لا تتشابه عليك الانكسه فتميزه بسهولة عند الخروج ولكن افرض يا حويط إن احدهم خرج قبلك وفي غمرة استعجاله لبس سروالك وانصرف!! إذا وجدت نفسك في مثل هذا الموقف أنصحك أن لا تصاب بالذعر والاتلباجة فليس من اللائق أن تزعج الناس أثناء لبس سراويلهم بالبحث عن سروالك المفقود, وليس من اللائق أيضا أن ترفع عقيرتك مناديا : يا أخوانا فيكم حد لبس سروال ما حقو!!.وليس من المستحب أيضا أن يذيع المرء نشرة بأوصاف سرواله في جمهرة من الناس.
في هذه الحالة ما عليك إلا أن تنتظر إلى أن يلبس ربع كاتبنا العلي سراويلهم وينصرفوا سيبقي سروال واحد مؤكد انه تبع الشخص الذي لبس سروالك بالخطأ. ما عليك إلا أن تلبسه وتنصرف.صدقني إذا ساقتك قدماك يوما إلى ديره الكاتب المذكور فان أفضل حل هو أن تترك سروالك في البيت.

Post: #2
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 02:54 PM
Parent: #1

المقال اورده الزميل محمد عبد الرحمن في منتديات الراكوبة.

http://66.102.9.104/search?q=cache:BVpJ3v46WA4J:alrakob...r&ct=clnk&cd=1&gl=sa

كلمات مائية (محمد العلي)

في السودان (الشغيغ) هناك حيث يمكنك أن تشاهد الماء والجفاف معاً، أن تلمس الخصب والجدب معاً، أن تنظر إلى النيلين وإلى جانبهما الفقر والمرض معاً.. هناك كنت يوماً في سالف العصر والأوان.

في الخرطوم دخلت ومجموعة من الأخوان السودانيين تضم أستاذاً جامعياً، وموظفاً كبيراً، وصحفياً، وأديباً، دخلنا نحن الخمسة إلى أحد النوادي، وأظنه إذا كنت أذكره نادي ذوي المهن الطبية، هناك بدأ الأخوان الأربعة عملية (التخزين) وهي تختلف عن عملية (التخزين) في اليمن، إنها باختصار: حشو نصف الفم بنوع من التبغ، وعليك بعد ذلك أن تستمع إلى محدثك وأنت مغمض العينين حتى تتجنب رؤية البصاق علانية على الأرض.
ماذا تأكلون؟
هكذا قال مضيفنا (وهو من بشرة أب) كما يقول الحطيئة. وبعد المداولات الضاحكة استقر الاختيار على (الكوارع)، أنا من الناس الذين يفقدون عقولهم أمام الكوارع، واتضح أن الباقين جميعاً مثلي، فما أن مدت الصحاف حتى شمر كل منا عن ذراعيه، وحتى كدنا نسمع الثغاء من الكوارع نفسها، وفي حالة السلب والنهب هذه جرى الحوار التالي:

الأول: جنان، الكوارع جنان، وهذا إن دل على شيء فإنما ...
الثاني: دا احنا اللي جعانين، وهذا إن دل على شيء فإنما ...
الثالث: لا نحن جياع، ولا الكوارع جيدة، ولكن الجو جميل بحيث يضفي على كل شيء جمالاً، وهذا إن دل على شيء فإنما يدل ..
الرابع: يا زول المسألة دي فلسفية، فشوق الإنسان إلى عالمه الأول، عالم الغابة، عالم الافتراس، وطموحه إلى إثبات الذات، واتصافه بالنسيان المؤقت هو الذي جعل هجومه على الكوارع لذيذاً ومغرياً إلى هذا الحد، وهذا إن دل على شيء فإنما يدل على ...
الخامس: يا جماعة .. لا ذي، ولا ذي، كلها عادات، لقد تعودنا على الوجبات الدسمة، ولا شيء أدسم من الكوارع، وهذا إن دل على شيء فإنما يدل على أن (لكل امرئ من دهره ما تعودا ..) كما يقول المتنبي.
وحين وصلنا إلى هذا سألنا جميعاً هذا السؤال:
ما معنى تعبير (وهذا إن دل على شيء فإنما يدل على؟).

Post: #3
Title: Re: السودان (الشغيغ) مقال ساخر لكاتب عربي.
Author: Abubaker Ahmed
Date: 29-08-2007, 02:56 PM
Parent: #1

اسي حا يجوك ناس كدة ممكن اسميهم ليك ، مشهورين بالدفاع عن العرب ضد السودانين (معليش قصدي ضد العرب لانواحنا عرب برضوو)

ويقولو ليك اي كلاموصاح مية المية
عيش تشووووووووووووووف

Post: #6
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 03:22 PM
Parent: #3

Quote: اسي حا يجوك ناس كدة ممكن اسميهم ليك ، مشهورين بالدفاع عن العرب ضد السودانين

أبو بكر
غايتو القاف دي كرهتنا العربي ((ذاتو))
كدا امشي قوقل اكتب - السودان الشغيغ- شوف جنس العجب
وبعد دا كمان في ناس بدافعو
دي عينة بس

http://www.m7tajk.com/vb/showthread.php?t=3840

Post: #4
Title: Re: السودان (الشغيغ) مقال ساخر لكاتب عربي.
Author: Marouf Sanad
Date: 29-08-2007, 02:57 PM
Parent: #1

looooooooooooooooooooooooooooooooool

Post: #7
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 03:50 PM
Parent: #4

معروف وينك مختفي
شكرا على المرور
اليومين دي اخوك داخل في دور بشاشوي.

Post: #5
Title: Re: السودان (الشغيغ) مقال ساخر لكاتب عربي.
Author: Samau'al Abusin
Date: 29-08-2007, 02:57 PM
Parent: #1

Quote: اطلعت على مقال بعنوان (السودان الشغيغ) لكاتب عربي اسمه محمد العلي عنوان المقال من باب السخرية والتندر من قاف السودانيين التي تنطق غينا



الأخ معاذ
تحية طيبة
الرجاء تزويدنا برابط المقال أو مصدره.

Post: #9
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 04:58 PM
Parent: #5

السموؤل
لك التحية
شكرا على المرور السريع جدا.
الرابط اعلاه. وكان داير الكاتب ذاتو بجرو ليك من كراعو
بس كتر من زياراتك.

Post: #8
Title: Re: السودان (الشغيغ) مقال ساخر لكاتب عربي.
Author: jini
Date: 29-08-2007, 04:41 PM
Parent: #1

Quote: اطلعت على مقال بعنوان (السودان الشغيغ) لكاتب عربي اسمه محمد العلي عنوان المقال من باب السخرية والتندر من قاف السودانيين التي تنطق غينا أما متن المقال فقد عبر فيه الكاتب عن قرفه من بعض مشاهداته أثناء زيارته اليتيمة للسودان وقد عبر الكاتب عن استيائه من ترديد السوانيين لعبارات بعينها بطريقة غبية كما لم يخفى قرفه من(السفه) السودانية وكيف انه اضطر لمجالسة أشخاص مقرفين يختلط لعابهم بالصعوك عندما يتحدثون.
على كل لست زعلانا من كاتب المقال الذي لم يجد في زيارته للسودان ما يستحق الكتابة عنه غير الصعوط فقط أود هنا أن أقدم نصائح لمن يود منكم زيارة منطقة الإحساء التي ينتمي إليها الكاتب حتى أوفر عليكم دهشة مثل التي أصابت الكاتب من بعض المشاهدات التي قد تبدو لكم غريبة.
الزى الشائع في هذه المنطقة يتميز بالبساطة الشديدة فهو عبارة عن فوطة تلفها حول وسطك وتربطها من الأمام وتتجول بها بحرية شديدة وأثناء تجوالك يجب أن تظل منتبها للفوطة فربما يصادفك مسمار أو طفل عابث يجردك من الفوطة فتجد نفسك انفكو.
يدين أهل المنطقة بالمذهب الشيعي ولديهم اهتمام مبالغ فيه بالطهارة فلا يجوز لدى بعض غلاتهم دخول المسجد بالسروال بل يتعين عليك أن (تملص) سروالك قبل دخول المسجد وتضعه في مكان مخصص للسراويل في مدخل المسجد وهي نظرية لا غبار عليها فلا احد هذه الأيام يستطيع أن يضمن سرواله.
كثير من هؤلاء القوم يأخذون الأمر من قصيره فيتركون (انكستهم) في البيت بدلا من البهدلة في الملص عند الدخول ثم المكابسة عند الخروج في فرز اللباسات .ونسبة لتشابه اللباسات فربنا تلبس بالخطأ سروال شخص آخر وتنطلق إلى اهلك .
قد تكون حويطا وتضع علامة مميزة على سروالك حتى لا تتشابه عليك الانكسه فتميزه بسهولة عند الخروج ولكن افرض يا حويط إن احدهم خرج قبلك وفي غمرة استعجاله لبس سروالك وانصرف!! إذا وجدت نفسك في مثل هذا الموقف أنصحك أن لا تصاب بالذعر والاتلباجة فليس من اللائق أن تزعج الناس أثناء لبس سراويلهم بالبحث عن سروالك المفقود, وليس من اللائق أيضا أن ترفع عقيرتك مناديا : يا أخوانا فيكم حد لبس سروال ما حقو!!.وليس من المستحب أيضا أن يذيع المرء نشرة بأوصاف سرواله في جمهرة من الناس.
في هذه الحالة ما عليك إلا أن تنتظر إلى أن يلبس ربع كاتبنا العلي سراويلهم وينصرفوا سيبقي سروال واحد مؤكد انه تبع الشخص الذي لبس سروالك بالخطأ. ما عليك إلا أن تلبسه وتنصرف.صدقني إذا ساقتك قدماك يوما إلى ديره الكاتب المذكور فان أفضل حل هو أن تترك سروالك في البيت.



يا خى الراجل يديك كف تقوم تكتلو عديل!
انت ما والد الجنا!
عفارم عليك يا معاذ!
جنى

Post: #10
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 05:29 PM
Parent: #8

انت ما والد الجنا!

جني
انت ما والد مالك مع الزومة!
ياخي في ناس بتكتب سم عديل.

Post: #11
Title: Re: السودان (الشغيغ) مقال ساخر لكاتب عربي.
Author: عبده عبدا لحميد جاد الله
Date: 29-08-2007, 05:54 PM
Parent: #10

العزيز معاذ
تحية طيبة
مختفي وين الفترة الفاتت انشاء الله المانع خير


Quote: منطقة الإحساء

والله كنت مفتكرك موضف في الرياظ

Post: #13
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 06:38 PM
Parent: #11

والله كنت مفتكرك موضف في الرياظ

يا عبده
أنت في الرياظ
والا دا تظليل منك.
غايتو نحن القاف لما نجي للكتابة بنكتبها صاح انما..

Post: #12
Title: Re: السودان (الشغيغ) مقال ساخر لكاتب عربي.
Author: عبدالبارى العجيل
Date: 29-08-2007, 06:24 PM
Parent: #1


الاخ معاذ:

والله حاجة مؤلمة لما تلقى زول يتكلم عن بلدك بالطريقة دي
لكين بالله يا أخي بعيداً عن العواطف كان ممكن يكتب شنو عن بلدنا
ياخي نحنا بي ذمتك عندنا حاجة بتعجب؟
ولا عندنا مكان بفتح النفس؟
حقو إنتقاد الآخرين يكون دافع لينا عشان نغير الصورة المشوهة للسودان
ويخلينا نعاين ببصيرة مفتوحة لعيوبنا بدل ما نتضارى ورا الكابشنات
الجاهزة من شاكلة:
أنحنا الدنيا جبناها وبنيناها
بويت في بويت
تقول لي شنو
وتقول لي منو؟
..
.

Post: #14
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 29-08-2007, 07:18 PM
Parent: #12

والله حاجة مؤلمة لما تلقى زول يتكلم عن بلدك بالطريقة دي
لكين بالله يا أخي بعيداً عن العواطف كان ممكن يكتب شنو عن بلدنا
ياخي نحنا بي ذمتك عندنا حاجة بتعجب؟

عبد الباري ود العجيل
فعلا كلام ما جميل وبلدنا فيها حاجات كتيرة ما تمام.
بس ما تنسى اي بلد في الدنيا فيها الصورة الجميلة وفيها الحاجات الما جميلة
مافي بلد كاملة مكملة بس العالم ديل طولة لسان منهم
وزي ما قال المثل الجمل ما بشوف رقبلو المكعوجة!!والا شنو كدا ما عارف.
لك التحية والود
كلما المح اسمك اتذكر الشيخ ود العجيل الصوت الفلته في تاريخ المدائح .

Post: #15
Title: Re: السودان (الشغيغ) مقال ساخر لكاتب عربي.
Author: عاطف عمر
Date: 29-08-2007, 08:19 PM
Parent: #1

تحياتي أخي معاذ

يبدو أن حرف القاف فيهو مشكلة .
نعم قطاع كبير من الشعب السوداني ينطق القاف ( غين ) ، وحرف الغين لفظاً هو الأقرب لحرف القاف .
دون أن يكون كلامي مبرراً للإستمرار في هذا الخطأ الشائع أقول أننا لسنا الشعب الوحيد ( المتميز ) بهذه الخاصية فـ ( إخواننا ) المصريين لم يستطيعوا ( مع كل فصاحتهم ) من نطق حرف القاف فهم قد قلبوا القاف في الكلمة التي تحتوي عليه إلى ( أ ) إلا في كلمة القاهرة .
أداني بـ ( الألم ) ويقصدون ( بالقلم )
نروح بأاا ويقصدون( بقى )
أانون ويقصدون ( قانون )
حئيئى ويقصدون ( حقيقي )
فلم نسمع أن أحداً يعيب عليهم قولهم هذا بل يحاول الكثيرون تقليدهم في طريقة نطقهم ( المعوج ) هذا .
لكن يبدو أن هذا زمان المهازل

Post: #21
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 30-08-2007, 07:29 AM
Parent: #15

Quote: دون أن يكون كلامي مبرراً للإستمرار في هذا الخطأ الشائع أقول أننا لسنا الشعب الوحيد ( المتميز ) بهذه الخاصية فـ ( إخواننا ) المصريين لم يستطيعوا ( مع كل فصاحتهم ) من نطق حرف القاف فهم قد قلبوا القاف في الكلمة التي تحتوي عليه إلى ( أ ) إلا في كلمة القاهرة .
أداني بـ ( الألم ) ويقصدون ( بالقلم )


الصاديق عاطف
يبدو ان طيبتنا تغري هؤلاء بالسخرية منا
القاف والجيم مشكلة لدى المصرين وعموم اهل الشام
والجيم عصية على الكويتين وبعض العراقييين (صدج) لول
واحد سوري بسالني عن رقم جوالي تصور قال شنو:

أد ايش رئم الموبايل تبعك؟
يعني بالسوداني رقم موبايلك قدر شنو؟

Post: #16
Title: Re: السودان (الشغيغ) مقال ساخر لكاتب عربي.
Author: محمد عثمان ابراهيم
Date: 30-08-2007, 00:07 AM
Parent: #1

الأخ معاذ
شكراً علي طرحك هذا الموضوع و أنا أعتقد إن بعض العيب فينا.
مثال واحد يكتب مقالآ عنوانه ( مبارك الفاضل يتغيا دماً) و هو يقصد بالطبع يتقيأ.
واحد آخر يكتب يا ( فلان ألم يأن موعد عودتك) و هو إما يقصد يحن أو يقصد أن يحور كلمة أوان فيستخرج منها يئن التي قد تختلط مع تلك التي من أنين فيحدث العي.
واحد يكتب (عزراً لهذا البوح ) و هو يقصد عذراً بالطبع.
واحد يكتب وجوه وزكريات من مدينة نيالا) و هو يقصد بالقطع ذكريات.
و واحد يكتب إسمه باللغة العربية خطأ (منزر و هي بالتأكيد منذر حتي لو أخطأ كاتب الشهادة و رجال شرطة الجوازات.
شيْ آخر إستخدام بعض الكلمات بشكل مكرر و عجيب ( إندياح ،الوريف فلان- يعني إيه؟- ، الشفيف علان)
مع تحيتي لك و تقديري
محمد عثمان

Post: #17
Title: Re: السودان (الشغيغ) مقال ساخر لكاتب عربي.
Author: Nasser Mousa
Date: 30-08-2007, 00:36 AM
Parent: #16

الاخ / معاذ

لك منا الق التوهج

وشكرا للدفاع للطيش عننا
وتسلم يازول...

تحياتي

ناصر موسى

Post: #32
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 30-08-2007, 04:33 PM
Parent: #17

ناصر موسى
شكرا على مرورك
للطيش ذاتو
غايتو (ذاتو) دي عاجبه الجماعة بشكل!!

Post: #18
Title: Re: السودان (الشغيغ) مقال ساخر لكاتب عربي.
Author: محمد عثمان ابراهيم
Date: 30-08-2007, 01:10 AM
Parent: #16


Post: #20
Title: Re: السودان (الشغيغ) مقال ساخر لكاتب عربي.
Author: نيازي مصطفى
Date: 30-08-2007, 01:28 AM
Parent: #18

شكرا لك اخي معاذ على هذا البوست وطبعا ناس (الرياظ) بيحبوا السودان (العضيم )

اسه بالله البخليهم يقلبوا ال ظ ض وال ض ظ ما (مفروظ) يخلى قافنا جيم هم بس فالحين
للسودانيين الغريبه العراقيين والكوايته كلامهم كله شنو وبرضو ماسكينها للسودانيين والمصرين
بشتنوا اللغه العربيه فجعلوا من القاف آ في كثير من الكلمات وما سمعنا ترتار قال ليهم بقم
واحد مصري معانا قال والله الناس دول لو ما خلعوا دبل الزيرو اللي لابسينو على ادمغتهم ديه ما اظن يتطوروا .
تحياتي

Post: #34
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 30-08-2007, 05:56 PM
Parent: #20

والله الناس دول لو ما خلعوا دبل الزيرو
اللي لابسينو على ادمغتهم ديه ما اظن يتطوروا .

نيازي
تصدق بعد نص ساعة تفكير
يا دوووووب عرفت دبل الزيرو
هههههههههه

Post: #33
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 30-08-2007, 05:48 PM
Parent: #18

محمد عثمان ..تحياتي
عارف حمزه عوض الله جارنا في الصحافة واعرفه جيدا
اجتماعيا الرجل ظريف جدا ومحبوب في الحي
اتذكر انو جاهم حرامي في البيت قبل سبعة سنة الحرامي ما سرق الا الكتب بتاعة حمزة!!
أها الكتب دي ياها ذاتا البقتبس منها حمزة ختام البرامج البقدمها
تتذكر كان عندو حركة يقول ليك: وكما يقول الفيلسوف المكسيكي بانديراس الحياة رحلة قمينة.
وحاجات زي دي.
الظاهر الحرامي داك كان مشاهد ممغوس بس

Post: #36
Title: Re: السودان (الشغيغ) مقال ساخر لكاتب عربي.
Author: محمد عثمان ابراهيم
Date: 31-08-2007, 01:13 AM
Parent: #33


Post: #23
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 30-08-2007, 09:47 AM
Parent: #16

Quote: شكراً علي طرحك هذا الموضوع و أنا أعتقد إن بعض العيب فينا


محمد عثمان
ماشاء الله مسجل أخطاء الكتابة في المنبر كلها في دفتر (عتمان)
اتوقع ان معظم الاخطاء هنا بسبب الاستجال ولعلك تعلم استحالة تعديل عنوان البوست بعد انزاله. ارجو ان يتداركنا بكري بحل لهذه المشكلة.
لكن شريط التلفزيون البشوفو كل العالم دا يعملو فيهو شنو؟
شكرا على مرورك الكريم

Post: #25
Title: Re: السودان (الشغيغ) مقال ساخر لكاتب عربي.
Author: محمد عثمان ابراهيم
Date: 30-08-2007, 11:14 AM
Parent: #23

عزيزي معاذ
بعد التحية

Quote: ماشاء الله مسجل أخطاء الكتابة في المنبر كلها في دفتر (عتمان)

لا و الله فأنا لم أسجل كل الأخطاء فأنا أيضاً أخطيء و لا يمكن أن أمنح نفسي سلطة رهيبة مثل هذه .
إضافة لهذا أنا أحتفي بإجتهادات الناس و لا أقلل منها لكن الموضوع الذي تفضلت بطرحه مفيد حقيقة و يستحق مزيداً من الحوار، ما رأيك؟
Quote: اتوقع ان معظم الاخطاء هنا بسبب الاستجال ولعلك تعلم استحالة تعديل عنوان البوست بعد انزاله.

بالنسبة لكلمة الاستجال الواردة أعلاه و اضح إنها خطأ طباعي و لكن ما رأيك في الأمسلةالأخري التي زكرتها؟.
مع الشكر
محمد عثمان

Post: #19
Title: Re: السودان (الشغيغ) مقال ساخر لكاتب عربي.
Author: محمد البشرى الخضر
Date: 30-08-2007, 01:20 AM
Parent: #1

معاذ سلام
بالجد كدة قصة السراويل دي صحي؟

Post: #37
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 01-09-2007, 09:45 AM
Parent: #19

Quote: معاذ سلام
بالجد كدة قصة السراويل دي صحي؟


ود البشرى
وحات المنبر دا حقيقية وحاصلة بالجد
ولو ما مصدق الاجازة الجاية اركب الخطوط اليمنية بعملو كونكشن في اليمن عندك كم ساعة تتجول في المدينة اسال من مساجد الجماعة اياهم عندهم فرع في اليمن.وكان عايز المركز الرئيسي تراه قريب.
وجهز السروال الاصفر عشان ما تتوهق.

Post: #22
Title: Re: السودان (الشغيغ) مقال ساخر لكاتب عربي.
Author: هجو الأقرع
Date: 30-08-2007, 08:39 AM
Parent: #1

الاخ الكريم معاذ ، لا شلت يمينك يا رجل ، للاسف بعض ضعاف العقول لا يعرفون الكثير عن السودانيين ، اذكر اخى الكريم ان شابا سوريا ذهب الى السودان لبعض الاعمال التجاريه فكان يقابل الناس فى الصباح بالقميص والبنطلون ، إلا انه قال لى فى المساء تواجهنى مشكلة كبيره فى التعرف عليهم عندما ياتون بالجلابية والعمة والشالات ، وقال ان الاحذيه تختلف (المراكيب ) فيقع فى حيص بس ويقول فى سره يا ربى ده منو فيهم. اخى الكريم للاسف نحن نعانى فعلا من مشكلة النطق فى حروف الثاء والقاف ، وذلك للتدريس الخطاء وعدم حرص بعض المدرسين ومحفظى القران للصغار على التدريب للنطق الصحيح . على العموم ان معظم الدول العربية لديها مشاكل مع الكثير من الحروف ، اما اذا جاز لنا ان نشير الى عرب شمال افريقيا غايتو كلامهم كلو مشكله . مثلا كلمة( كدير) تعنى عندهم هل انت بخير، شفت الزمن واللغه برضو . اما موضوع السروال ده براه كوم ويوجد ايضا فى بعض مناطق اليمن. (ايش بلاك يا ريال انت طاعم سمج) وان شاء الله تكون سمعت بى الجدر والملاس وغيره .

Post: #38
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 01-09-2007, 09:56 AM

Quote: للاسف نحن نعانى فعلا من مشكلة النطق فى حروف الثاء والقاف ، وذلك للتدريس الخطاء وعدم حرص بعض المدرسين ومحفظى القران للصغار على التدريب للنطق الصحيح


الاخ الكريم هجو
تحية ود
عارف اكتر حاجة محرجة مذيعي التلفزيون الايام دي
عندك واحد بقدم النشرة الرياضية مستحيل ينطق ليهو قاف واحد صاح
دي عينة من قرايتو نطمم ليك بطنك شوية:

((تقلب فريغ الهلال بملعبه مساء اليوم على فريغ الاهلي المصري الشغيغ بسلاسة اهداف في اللغاء الذي جري باستاد الهلال)).

Post: #24
Title: Re: السودان (الشغيغ) مقال ساخر لكاتب عربي.
Author: سامى عبد الوهاب مكى
Date: 30-08-2007, 10:52 AM
Parent: #1

يا هلا فيجش يا هلا فيجش

غولتا شنو!!

Post: #26
Title: Re: السودان (الشغيغ) مقال ساخر لكاتب عربي.
Author: عامر تيتاوى
Date: 30-08-2007, 11:29 AM
Parent: #24

اخى معاذ
اللهجات المحليةفى كل البلاد العربية فيها بعض النواقص والعيوب
ولسنا وحدنا طبعا لدينا عيوبنا من اقصى الشرغ الى القرب ولكن لهم
ايضا عيوبهم فالعربية لغة الضاد وهم يقلبونها ظ يعنى من العنوان
المغاربة يسمون علبة الصلصة ( حق ديال مطيشة ) وديال تعنى بتاع
والمطيشة طبعا اكيد هى الصلصة او الطماطم التى يسميها الخليجيون
طماط ويسخرون منا فى كلمة ااااى هكذا يجرجرونها لتصبح هذلية وهم
يقولون ايييه
نتلاا يوم التنين
تنتين ولا ثلاث ولا يوم اليمعة ولا اقوللك شسمو
الموضوع طويل
تئبرنى

Post: #39
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 02-09-2007, 06:12 AM
Parent: #26

Quote: طبعا لدينا عيوبنا من اقصى الشرغ الى القرب


تيتاوي
اتفغ معك فيما زهبت اليه
غراءتنا فيها عيوب كسيرة
وهي بالمغارنة مع غراءة اشغائنا العرب احيانا تكون الاسوأ
اديك مسال: عرض التلفزيون قبل فترة مسلسل تاريخي باللغة العربية الفصحي
كشف لي هذا المسلسل عيوب لهجتنا الحغيغية حيس لا تكاد تفهم ما يغوله الممسلون.لو غارنت طريقة نطقنا على الاقل في المسلسلات التارخية بالاعمال السورية تلاحظ الفرق الكبير في النطق.

Post: #27
Title: Re: السودان (الشغيغ) مقال ساخر لكاتب عربي.
Author: عامر تيتاوى
Date: 30-08-2007, 11:31 AM
Parent: #24



عذرا .. التعديل بسبب التكرار
لكن عايز اضيف
منطقة الإحساء.. ينطقونها الحسا


شوربة

Post: #28
Title: Re: السودان (الشغيغ) مقال ساخر لكاتب عربي.
Author: سامى عبد الوهاب مكى
Date: 30-08-2007, 11:44 AM
Parent: #1

تخيل زول يقول ليك يا رياااال

او يجي واحد يلاقي مجموعة يقول ليهم يا رياييل!!

في قرف اكتر من كده!!

Post: #40
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 02-09-2007, 06:47 AM
Parent: #28

Quote: تخيل زول يقول ليك يا رياااال

او يجي واحد يلاقي مجموعة يقول ليهم يا رياييل!!



سامي
رياييل جمع ريالة!!والا ريالات!!
تخيل بعد دا كان قلت كلمة(راجل) يضحكو عليك.
واحدة من مشاكلنافي النطق تخفيف الراء فيما لا يتطلب التخفيف
الراء الخفيفة مرات بتكون بايخة وبتدي المتلقى احساس انك عجمي.
مبروك فروز المريخ بالراء الخفيفة.

Post: #29
Title: Re: السودان (الشغيغ) مقال ساخر لكاتب عربي.
Author: Mannan
Date: 30-08-2007, 12:30 PM
Parent: #1

وهل نحن عرب؟؟؟

هذا انسان "مريظ" يا " ريال" بتشديد الياء
انصحه بعدم اكل "الدياى" و"الأسمجة" ويبطل "السوالف هاذى" ويروح المغرب ويتعلم" الهدرة ديال المغرب" و"كيفاش" وعلاش "يتقلق" من السودان .. وقبحه.. اليس لديهم الربع الخالى "جنة العرب"؟؟؟ الشغيغ قال!!! اخير يتخارجوا من حاجة اسمها "اللقة" العربية..

نورالدين منان

Post: #30
Title: Re: السودان (الشغيغ) مقال ساخر لكاتب عربي.
Author: jini
Date: 30-08-2007, 12:48 PM
Parent: #29

Quote: ذكر اخى الكريم ان شابا سوريا ذهب الى السودان لبعض الاعمال التجاريه فكان يقابل الناس فى الصباح بالقميص والبنطلون ، إلا انه قال لى فى المساء تواجهنى مشكلة كبيره فى التعرف عليهم عندما ياتون بالجلابية والعمة والشالات ، وقال ان الاحذيه تختلف (المراكيب ) فيقع فى حيص بس ويقول فى سره يا ربى ده منو فيهم.

غايتو فى دى صدق !!!
والعجب لو لقى واحد فينا لا بس خروج وعودة(جناح أم جكو) كان فك البيرق والشراع!
جنى

Post: #41
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 02-09-2007, 06:53 AM
Parent: #29

Quote: انصحه بعدم اكل "الدياى" و"الأسمجة" ويبطل "السوالف هاذى" ويروح المغرب ويتعلم" الهدرة ديال المغرب" و"كيفاش" وعلاش "يتقلق" من السودان


نور الدين
متأكد انو كلامك دا عربي ههههههههههه
حيرتنا((ذاتو)) نمش نفتش الغاموس المحيط

Post: #31
Title: Re: السودان (الشغيغ) مقال ساخر لكاتب عربي.
Author: عبدالله الشقليني
Date: 30-08-2007, 01:47 PM
Parent: #1



الأحباء هُنا تحية واحتراماً
والتحية للجميع .
وقد أوفوا الحديث ما يستحق .

رأيت أن أدلي بما أراه يفيد :
لكل أمة ألسنة ناطقة ، تختلف باختلاف المُجتمعات وتنوعها ،
وفي السودان الكثير من اللغات ،ويبدو أن الحديث عن لُغة ( قُريش ) أو ما تسمى باللغة الفصحى تناوله المقال .
سأترك الحديث عن رأي كاتب المقال الذي استهجن مسلكاً ونتناول اللغة :
ورد حديث عن إعرابي يسأل عن من يُضحي بظبي ،
فسأل النبي الكريم : ( وما ترى في من ظحى بضبي ؟)
يقصد : وما ترى في من ضحى بظبي ؟
وقيل إنها لُغة يتحدث بها أهل اللغة العربية في بواديهم باختلاف قبائلهم ،
وفيهم العرب العاربة وفيهم العرب المُستعربة ،ومن المستعربة النبي الكريم ،
دعونا نستشهد من النصوص :
في الحديث عن النبي : ( أنا ابن الذبيحين )
ويقصد سيدنا إسماعيل : أمه حسب الرواية الدينية هاجر غير العربية وأبوه سيدنا إبراهيم غير العربي .
نعود للغة الفصيحة في مزامير الحُنجُرة البشرية :
عند قراءة اللغة العربية دون تجويد ودون انتباه ، تغلب على القُراء طبائع مكتسبة في النطق وهي موجودة في كل لغات العالم ولا يختص بها أهل السودان ، لكن عند موازين تجويد اللغة فنحن أمام اختلافات قُراء حتى في طرائق القراءات العربية المُعتمدة في تجويد الذكر الحكيم ، فما بالك باللغة الفصحى غير المُجودة ؟ .
وكما تفضل الكثيرون بالتوضيح :
منها : نحن عامة ننطق الـ ( ذ) = ( ز ) مثل ( ذلك )ننطقها عامة ( زلكَ )
ومنها : نحن عامة ننطق الـ ( ق ) = ( غ ) مثل ( يقول ) ننطقها ( يغول )
ومنها : نحن عامة ننطق الـ ( ث) = ( س ) مثل ( ثواني ) ننطقها ( سواني )
وعيوب النطق ليس مرد ذلك ( الأكسنة ) ولكن طرائق التدريس المنهجي للغة العربية من الذين لا يتقنون نُطقها الصحيح .يعرفون القواعد من صرف ونحو ويحفظون الأشعار ولا يدرسون مخارج الحروف كما يدرسها المُجودون للغة القُرآنية .
ومثل تلك العيوب هي مُفتقدة في طلاب المهجر الذين يدرسون اللغة العربية بمنهاج كامل يتعلم فيه الطفل النُطق الصحيح وأمثلة ذلك في نطق أبناء المهاجرين في الدول العربية كالسعودية و الإمارات مثلاً .

أما المقال المنقول عن محمد العلي فهو سُبة لمن كتبه .
شكري للأخ معاذ فقد أوفى وكذلك اللاحقون .
شكري لجميع المشاركين والقُراء الكرام .

Post: #35
Title: Re: السودان (الشغيغ) مقال ساخر لكاتب عربي.
Author: soma
Date: 30-08-2007, 08:45 PM
Parent: #31

سلام معاذ كيفنك يابا
بركة الرجعت للطلة من تانى
امس شايفاك جاى بى توب قردة لوووول
قلت يا ربى معاذ ده كان فى اجازه ومشا الدندر؟
باقى قالوا الدندر كل الحيوانات الفيها فكن البيرق
قلت بكون لاقاك حليم ولا حليمة فى الشارع
..
شكرا لردك السخرى البرد الجوف كتير للناس المابتشوف عوجة قدومها
العالم اللسانها مكعوج على قولك مالهم ما بشوفو روحهم ؟

معاذ عجبنى تعليقك على حرامى اخونا حمزة عوض الله
Quote: الظاهر الحرامي داك كان مشاهد ممغوس بس


متاوقة
سلام جنى .. دى بالغت فيها عديل
والله ضحكت بصوت رغم انه الدنيا نص ليل
قلت لى فى جلابيه اسمها خروج وعودة لووووووووووووول
دى الانصارية مش كده ؟؟
اظرف تشبيه القاه للجلابيه دى والل واول مره اسمع بيه

برضو حاجاتنا عاجبانا يا ناس ..خلو الخلق لى خالقها
تسلم يا معاذ وواصل ابداعك وما تختفى رجاء

Post: #43
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 02-09-2007, 07:09 AM
Parent: #35

Quote: برضو حاجاتنا عاجبانا يا ناس ..خلو الخلق لى خالقها


الشاعرة سوما
عارفه العالم دي ما عندهم شغلة غير (يتطمزو) علينا
منتديات العرب تعج بالمقرف من السخرية من لهجة السودانيين
والغريبة زي ما قلتي كلهم عيوب
عندك كلمة (شنو) متداولة لدى بعض بوادي المملكة ومعروفة لدى الكويتين والعراقيين
لم يستهجن عليهم احد استخدامها اما نحن كرهونا بيها
حتى الاطفال قاموا علي كدا.
لويخلو الخلق للخالق البطن باردة لكن نقول شنو!

Post: #42
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 02-09-2007, 07:00 AM
Parent: #31

Quote: نعود للغة الفصيحة في مزامير الحُنجُرة البشرية :
عند قراءة اللغة العربية دون تجويد ودون انتباه ، تغلب على القُراء طبائع مكتسبة في النطق وهي موجودة في كل لغات العالم ولا يختص بها أهل السودان ، لكن عند موازين تجويد اللغة فنحن أمام اختلافات قُراء حتى في طرائق القراءات العربية المُعتمدة في تجويد الذكر الحكيم ، فما بالك باللغة الفصحى غير المُجودة ؟ .
وكما تفضل الكثيرون بالتوضيح :
منها : نحن عامة ننطق الـ ( ذ) = ( ز ) مثل ( ذلك )ننطقها عامة ( زلكَ )
ومنها : نحن عامة ننطق الـ ( ق ) = ( غ ) مثل ( يقول ) ننطقها ( يغول )
ومنها : نحن عامة ننطق الـ ( ث) = ( س ) مثل ( ثواني ) ننطقها ( سواني )
وعيوب النطق ليس مرد ذلك ( الأكسنة ) ولكن طرائق التدريس المنهجي للغة العربية من الذين لا يتقنون نُطقها الصحيح .يعرفون القواعد من صرف ونحو ويحفظون الأشعار ولا يدرسون مخارج الحروف كما يدرسها المُجودون للغة القُرآنية .
ومثل تلك العيوب هي مُفتقدة في طلاب المهجر الذين يدرسون اللغة العربية بمنهاج كامل يتعلم فيه الطفل النُطق الصحيح وأمثلة ذلك في نطق أبناء المهاجرين في الدول العربية كالسعودية و الإمارات مثلاً .


المحترم عبد الله الشقليني
أشكرك على هذه المداخلة الثرة والمفيدة لنا جميعا
شخصت المشكل والحل بمهنية ومنهجية ويبدو ان لديك الكثير لتقوله في هذا الشان
أشكرك سيدي

Post: #44
Title: Re: السودان (الشغيغ) مقال ساخر لكاتب عربي.
Author: قرشـــو
Date: 02-09-2007, 07:53 AM
Parent: #1




الأخ معاذ حسن

لك التحية

اولا ان تكون مؤنة كاتب صحفى مثل هذه المقالة فهو يقينا مفلسا وخير له ان يبحث عن مهنة اخرى تليق به وان تشارك صحيفة تحترم نفسها فى نشر مقال كهذا فهى يقينا تفتقد للاحترام وتبحث عن الاثارة فى غير موضعها ...

أما ان "يتغشمر" كاتب من شعب كامل وطريقة نطقه فهذا هو العجب وقد اوفى الأخ الحبيب الشقلينى فى كيفية اختلاف اللهجات منذ ما قبل الرسالة مما يعنى جهل ذلك الكاتب حتى باللغة العربية ودليلنا القراءات المختلفة للقرآن الكريم فهى خير شاهد على اختلاف الالسنة ....

ومع ذلك لا نبرىء انفسنا من الخطأ فى النطق وكما تفضل الاحباب لعل ذلك راجع لموروثنا اضافة الى طريقة تدريسنا التى لا تشدد على صحة مخارج الحروف واكتمال الالفاظ ....

من وجهة نظرى يجب تجاهل مثل هذا الناعق وسيظل السودان يحتفى بكل ضيوفه مهما انكروا للجميل ومهما تناسوا المعروف الذى قدمه لهم حين استضافتهم وتبقى الحكاية قلة أصل ....

مع مودتى

Post: #45
Title: Re: السودان (الشغيغ) مقال ساخر لكاتب عربي.
Author: jini
Date: 02-09-2007, 10:01 AM
Parent: #44

Quote: انت ما والد الجنا!

جني
انت ما والد مالك مع الزومة!
ياخي في ناس بتكتب سم عديل.


والله ود الزومة انا كان اتسمم ما أخليهو!
والله ود الزومة انا التقول بجيب ليهو العيش من القضارف فوق ضهرى من حرة ما مكجنو!
جنى

Post: #48
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 06-09-2007, 08:55 AM
Parent: #44

أما ان "يتغشمر" كاتب من شعب كامل وطريقة نطقه فهذا هو العجب وقد اوفى الأخ الحبيب الشقلينى فى كيفية اختلاف اللهجات منذ ما قبل الرسالة مما يعنى جهل ذلك الكاتب حتى باللغة العربية ودليلنا القراءات المختلفة للقرآن الكريم فهى خير شاهد على اختلاف الالسنة ....))


((من وجهة نظرى يجب تجاهل مثل هذا الناعق وسيظل السودان يحتفى بكل ضيوفه مهما انكروا للجميل ومهما تناسوا المعروف الذى قدمه لهم حين استضافتهم وتبقى الحكاية قلة أصل ))

الحبيب قرشو
لا فظ فوك.
((بالظاء))
اشكرك
كلما جنحت بنا الحمية والجاهلية اعادتنا كلماتك العاقلة الموزونة .

Post: #46
Title: Re: السودان (الشغيغ) مقال ساخر لكاتب عربي.
Author: jini
Date: 05-09-2007, 06:43 AM
Parent: #1

Quote: سيبقي سروال واحد مؤكد انه تبع الشخص الذي لبس سروالك بالخطأ. ما عليك إلا أن تلبسه وتنصرف.صدقني إذا ساقتك قدماك يوما إلى ديره الكاتب المذكور فان أفضل حل هو أن تترك سروالك في البيت.



وهؤلاء الرجال جبلوا على الاستجال فهم دائما فى عجلة من امرهم فهم لا يجدون وقتا لغسل انكستهم فيتركونها حتى تهترئ مثل كيس الرتينة ليشترون سروالا جديد عند حلول هلال شوال وحتى عند ذهابهم الى مختبرات التحليل ل لفحص الاستول (الفسحة ) والبول والدم فهم يتركون سراويلهم للفنى باعتبار ان العينات يمكن اخذها منها فريش ولا داعى لعينات جديدة!
جنى

Post: #47
Title: Re: السودان (الشغيغ) مقال ساخر لكاتب عربي.
Author: welyab
Date: 05-09-2007, 06:24 PM
Parent: #46


للجميع خالص المودة

كنت ليلية امس اتابع في قناة دريم الثانية موضوع مقارب بعض الشيء . حيث تراشق عبر الصحافة ( الجرايد ) اخوتنا الكوايته والمصريين. وكتب الكثيرون (من
الطرفين) مقالات خرجت عن حد المألوف.. وبدأ فيه التجريح واضخا .. والبرنامج كان لـ..لم الموضوع..
الحمدلله احنا مازلنا في اول الطريق.. ولم يبلغ بنا الفجور الاعلامي والتراشق ذاك الحد ..
على كل حال لو هنالك سلبيات قد يلاحظها( الاجانب ) وبغض النظر عنما اتبعوه من اسلوب في ايصاله .. لنا ان ندرك . ونتدارك الامر .
وكنت قبل فترة ليست بالفصيرة اضفت في هذا المنبر عن الاستبدال المنطوق استهبال ملفوظ وتناوت فيه حرفي القاف والغين وقلت
Quote: الحرفين منطوقين بلسان سوداني- بمعني ليست العلة في صعوبة النطق- ولكن باستبدال غير مبرر!. وذاك الإبدال جعل الاستقلال/استغلالا.!! وليلة القدر/ ليلة غـدر.! والقريب صار غريبـاًً !!
[/ [/B

Post: #49
Title: Re: السودان (الشغيغ) مقال ساخر لكاتب عربي.
Author: nazar hussien
Date: 06-09-2007, 09:21 AM
Parent: #47

يا معاذ: هوّن عليك...وما تشيلك الحمية السودانية...فالسودان الشغيغ
بخير طالما ظل موضوعا لا يمكن تجاوز الكتابة عنه...وأجزم ان الكاتب
قد رأي وهو بكامل سرواله بلادا اخري لم يفتح الله عليه عنها بحرف..


قال يخزّن قال: الله بسعلني قبال دحين جاني سعودي خرمان واديتو سفة
وبعرفوا الصعوط زي ما بعرفوا الكوارع...

وسألتو انت خرمان قال لي (الا) ديل بعرفو السويكة والقات...

Post: #53
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 06-09-2007, 09:44 AM
Parent: #49

وأجزم ان الكاتب
قد رأي وهو بكامل سرواله بلادا اخري لم يفتح الله عليه عنها بحرف

نزار ود الشاعر

ما اشرت اليه هو مربط الحمار
وكما (غال) الشاعر
من يهن يسهل الهوان عليه

Post: #52
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 06-09-2007, 09:39 AM
Parent: #47

كنت ليلية امس اتابع في قناة دريم الثانية موضوع مقارب بعض الشيء . حيث تراشق عبر الصحافة ( الجرايد ) اخوتنا الكوايته والمصريين. وكتب الكثيرون (من
الطرفين) مقالات خرجت عن حد المألوف.. وبدأ فيه التجريح واضخا .. والبرنامج كان لـ..لم الموضوع..
الحمدلله احنا مازلنا في اول الطريق.. ولم يبلغ بنا الفجور الاعلامي والتراشق ذاك الحد ..

المحترم ولياب
امر مؤسف مثل هذه التراشقات
حدثت من قبل بين السعودية ومصر
وايضا بين الكويت ومصر
بالتاكيد لا تعبر عن علاقات الشعوب
ولكنها عندما تندلع فلا صوت يعلو فوق صوت المعركة.
وانهما لعمري لمعارك بائسة.
اما ليلة القدر التي صارت غدر والاستقلال الذي اصبح استغلال فحديث ذو شجون

Post: #50
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 06-09-2007, 09:24 AM
Parent: #46

فيتركونها حتى تهترئ مثل كيس الرتينة ليشترون سروالا جديد عند حلول هلال شوال وحتى عند ذهابهم الى مختبرات التحليل ل لفحص الاستول (الفسحة ) والبول والدم فهم يتركون سراويلهم للفنى باعتبار ان العينات يمكن اخذها منها فريش ولا داعى لعينات جديدة!

دا شنو يا جنو
بالغت!!

Post: #51
Title: Re: السودان (الشغيغ) مقال ساخر لكاتب عربي.
Author: jini
Date: 06-09-2007, 09:38 AM
Parent: #50

Quote: دا شنو يا جنو
بالغت!!

بالغت فى شنو!
والله ديل سراويلهم الا تشيله بى قناية وتقفل مناخيرك!
جنى

Post: #54
Title: Re: السودان (الشغيغ) مقال ساخر لكاتب عربي.
Author: بشير حسـن بشـير
Date: 06-09-2007, 09:47 AM
Parent: #1

الأخ / معاذ

قابلتنى بعض هذه الصور من تهكم إخواننا الخليجيين علينا وإن كانت بسيطه جدا جدا وعباره عن مداعبات لأنها من أناس أعرفهم ويعرفونى جيدا ، يقولون لى الشغيغ مثلا ودسعه ( تسعه ) أرد عليهم وبكل بساطه الرياظ ( الرياض ) كيف تنطقونها بالظا مع أن لغتكم إسمها لغة الضاد ، كثيرون منهم يسكتون والذى يرد يرد قائلا فعلا نحن بنخطىء كثيرا ولستم أنتم فقط !!!!

Post: #55
Title: Re: السودان (الشغيغ) مقال ساخر لكاتب عربي.
Author: معاذ حسن
Date: 06-09-2007, 06:27 PM
Parent: #54

قابلتنى بعض هذه الصور من تهكم إخواننا الخليجيين علينا وإن كانت بسيطه جدا جدا وعباره عن مداعبات لأنها من أناس أعرفهم ويعرفونى جيدا

اخوي بشير حسن
تحية ود
البداعبنا بنداعبو
والبلاعبنا بنلاعبو
والبكاعبنا بنكابعو

جاهيزين تب
لك الشكر