من أقـوال شاعر الشعب.................. ( محجوب شريف )

من أقـوال شاعر الشعب.................. ( محجوب شريف )


10-31-2010, 09:37 PM


  » http://sudaneseonline.com/cgi-bin/sdb/2bb.cgi?seq=msg&board=331&msg=1291495966&rn=36


Post: #1
Title: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:37 PM
Parent: #0


في هذا البوست سأرفق كل أشعار و أقوال شاعر الشعب محجوب شريف, وله منا كل التحية.

تقديم/ صلاح شعيب.

توثب شخصية محجوب شريف على جنح إنساني دافق يميزه بين شعراء السودان. فهو قد آمن أن الشعب حبيبه، وشريانه. وكذا هو الذي منحه بطاقته الشخصية، وليس هناك تعريف أكثر دلالة من هذه البساطة العميقة، والتي هي مرجع الشاعر في حياته، وقريضه السلس. ولعل شاعر الشعب المتقاعس عن كسب حياة الرغد، كما نشدها أقران له وحققوها، قصد أن يعيش قانعاً، مكرماً، طوال حياته، وأن يرضى بالبقاء في أرض الوطن برغم توافر كل الفرص أمامه للاغتراب الذي يعفيه عن الملاحقات الأمنية، وشظف الحياة، ويحقق بالمقابل بعض رغباته الحياتية.

سمسماً وبفرة
تترا سايكلين
جاي وجاي وجاي
مافي حاجة ساي
كلو عندو دين
كلو عندو راي.


نواصل
وهذه محاولة لإنشاء مكتبة لأشعار محجوب شريف بالمنبر.

Post: #2
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:42 PM
Parent: #1




حنبنيهو أشعار /محجوب شريف.
البنحلم بيهو يوماتى
وطن شامخ وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى

نجومو تلالى فى العالى
إراده سياده حريّه
مكان الفرد تتقدم..
قيادتنا الجماعيّه
مكان السجنِ مستشفى
مكان المنفى كليّه
مكان الأسري ورديّه
مكان الحسره أغنيّه
مكان الطلقه عصفوره
تحلق حول نافوره
تمازج شُفّع الروضه
حنبنيهو

البنحلم بيهو يوماتى
وطن للسلم أجنحتو
ضدّ الحرب أسلحتو
عدد مافوق ما تحتو
مدد للأرضو محتله
سند للإيدو ملويّه
حنبنيهو..

البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
ولا الخطب الحماسيّه
وطن بالفيهو نتساوى
نحلم نقرا نتداوى
مساكن كهربا ومويه
تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
إراده وحده شعبيّه

Post: #3
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:46 PM
Parent: #2



أم اليتامى
شعر: محجوب شريف

بين العمل والبيت
فصّد جبينها عرق..
أم اليتامى بكت
لمن حسابها فرق
ماهية تمشي السوق
مركب مصيرها غرق
حق اللبن والزيت
الكسرة والكراس
هم في عيونها برق
الما بحس ما بهم
والخان همومو سرق
هذا المرتب تب
ما بسدها الفرقة..
القعدة في المكتب
والإمضا في الورقة
العبرة في الخبرة
الأيدي لو تعمل
جرح الزمن ببرا
اتباصرت مكنة
ماكوكها يتقدّل
بين خيطها والإبرة
زي ما القلب ساساق
الخطوة ساساقة
وعيونها منتبهة
تباري زقزاقها
لا شك ولا شبهة
والسترة أشواقها
والشفع القصر
والدمعة رقراقة
يا حليل شريك العمر
الدنيا فراقة
اتيقنت أحسن
من تبقى نقناقة
شقشق مقص في ليل
نامت خلايق الله
طاير سُقد حلّق
في بيتها واتدلّى
تدّي الولاد بصة
وتجرب القصة
وتقلّب الحلة
جاهز عمل بكرة
أسأل تقاريرها
السرية والسمعة
هل ركلست يوماً
حتى ولو جمعة
مشكورة في المكتب
مستورة في الحِلة
رغم الشجن هبت
لم تعرف الذلة
ما فارقت سرباً
تتفهم الموقف
تستدرك العلة
ولم تعد أماً
مسكينة بتشفِّق
تفرتق وترتق
قُصاصة في إيدها
كالوردة بتبتِّق
ريانة منشرحة
هدِم قدِم يصبح
في لمحة كم طرحة
لا بد من تكية
لا بد من بكية
لا بد من غمدة
لا بد من سرحة
أنعم بها أماً
بين العمل والبيت
يا مرحىَ يا مرحىَ

Post: #4
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:50 PM
Parent: #3


pm
يا والدة يا مريم


يا والدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم



يا والدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

Post: #5
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:51 PM
Parent: #3


مساجينك.

مساجينك مساجينك
نغرد فى زنازينك
عصافيرا مجرحه بى سكاكينك
نغني ونحن في أسرك
وترجف وأنت في قصرك
سماواتك دخاخينك

برغمك نحن ما زلنا
بنعشق فى سلاسلنا
بنسخر من زنازنا
وبنسخر من زنازينك

للسودان مواقفنا
وللسودان عواطفنا
ولما تهب عواصفنا
فما حيلة قوانينك

Post: #6
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:52 PM
Parent: #3



( **** )

غطى الجبال الليل
لكن هدير السيل
لكن صهيل الخيل
نار الغضب والجوع
تحت الجبل مسموع
يضووا عز الليل

( 2 )

والموج شديد الظلام
غطى الشهيد الهمام
لكن دماهو بتقيد
لكن طريقو المجيد
ابداً شديد الزحام
رايات ترفرف غمام
ينزل رزاز النشيد
والنجمة تلمع هناك
رغم المكان البعيد

( 3 )

والنهر عبر السنين
يزحف بعنف وبلين
في الليل بيلمع يبين
فارس بسيفو السنين
يحمينا حضنو الامين
نطلع بكتفوا الشمال
ننزل بكتفوا اليمين
لكنو مين يقدر يقول
أنا سيدو مين

( 4 )

في منحنى الدرب الطويل
الحبة تفلت من جراب
عابر سبيل مسكين هزيل
عطشان يموت في السكة
ما يتم الرحيل
تكبر تشيل تلبس جميل
تصبح مقيل عابر سبيل

( 5 )

عصفورة من أخر بلاد
في رحلة لي أخر بلاد
تعرف مواعيد الحصاد
وكل دورات الفصول
وأنضر ايام الحقول
وتعادي أسراب الجراد
وتنادي لوكركب زناد
صياد على العش والولاد

( 6 )

أنسانة ابسط ما يقال
لو صاح
اعز من النساوين الرجال
أنثى ولا دستة رجال
تمشي وما بتطأطي
ما بين بير وشاطي
تطلع عالي واطي
نهارها مع السواقي
وليلها مع الطواقي
وعمرها للجهال

( 7 )

والنملة في الصف العجيب
وعلى انفراد
نفس النشاط والأنضباط
نفس الحماس
تسعى وتجيب ولا من رقيب
ولا حتي في الأمر التباس
ولا في اختلاس
أحسن كتير من بعض ناس
ولا في اختلاس
وهيلا .. وهيلا هيلا .. هيلا
تلقى تفسها في سفينة
وهيلا .. وهيلا هيلا .. هيلا
تاني في شارع مدينة
والحكمة بنفس الحماس
تلقاها في الصف العجيب
كم مرة تهرب من مداس
من طفل عابث ومن لهيب
بالحبة تمسك في عناد
الحبة ملك الاتحاد

( 8 )

والحكمة في مر السحاب
والعلاقة البينو ما بين الجذور
واللسة في الباطن بذور
وغنا الطيور
والمعركة الدارت تصلصل
بسيوفها وبالحراب
والعلاقة البينو بين الغابة والهبابة
والربابة والمنديل
ومجرى النيل وضلفة باب
وبكية طفلة في الكتّاب
تفتش عن قلم رصاص
وقع في الباص
وحس رصاص هدر في ناحية
فيها العيش حكر للجيش
بتاكل من زمن مافيش
وتشرب من زمن مافيش
وكان اضراب

( 9 )

والشمس تطلع يبين
ادق ما في الجبال
تبدأ الموانئ العظيمة الهدور
وتصحى المصانه بيهمة وتدور
ووتملأ الشوارع وكل الجسور
وتشفى الصدور
جموع الشغيله خطاها ثقيلة
تخلى القصور تحس بالفتور
وحمى الزوال

( 10 )

تصحى المدينة
تقوم تستحم وتولع سيجارة
تدخن تسخن بشاى الصباح
وحق الملاح وسيد الجزارة
وتقعد تدندن تخيط زرارة
ترتق هدوما وتفتق هموما
وتسب الحكومة وتفن الريال
وتنفض سريعاً غبار النعال
وتنزل تواجه مشاكل عويصه
تشرّط قميصا وتدق العيال
ليه العيال يعيش النضال
يخلى الحكومة تدخن تسخن
بنار الكفاح
وتقعد تطنطن لحدي الصباح
بتطلع بتطلع حزينة وكتومة
تشرّط هدوما وتحش المصحة
يعيش الأصح يعيش النضال
وضروري النضال

Post: #7
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:53 PM
Parent: #3



باكر تعرف تقراء وتكتب.


باكر تعرف تقرا وتكتب
وياما ترتب
نحنا بنحلم وكم نتمني
هل تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقي مصب
اي حمامة بتلقي الحب
تلقي الورده الندي في الكم
تلقي حداها جناها الام
يرضع صافي حليب الحب
نقدل نحن الجد والعم
تملا عيونا كهارب سد
بابا جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لا تسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب

Post: #8
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:54 PM
Parent: #3



قصيدة كجبار..

الدم شلال ..... السد ارواح
الموج اترنح في الحلال اتراح اتراح
شهداء حياتم يا لله تلال .. وظلال
ومعيشة حلال..... وضمير مرتاح
تاح... تاح .... تاح.... تاح

بينم وبين الحبة محبة
وبينم وبين الضفة صراح
جنا يا حليلو سبيط اتدلي... مرصص راح
كم الورد صباهو .. عيونو لسع فيهن باقي مزاح
اسال عنو حفيف العشب لم يكسر في عمرو جناح
غني معاهو القمري زمانك حسع راح

بابا جاب الهم والذم والسد ينسد وحسع ينزاح
بابا جاب الهم والذم والسد ينسد يوما ينزاح
نحن كذلك برضو كفاية ....
كفاية كفاية كفاية جراح
اي زيادة حنبقي نفاية
ويبقي الطمي في العين سفاية
وكل وطنا بيوت اشباح
اهي دارفور الصمت رماها جياع وحفايا
وآ اسفايا وآ اسفايا كاني بايدي طعنت قفايا
كفاية كفاية كفاية كفاية حريق وصياح
ويا ادروب سامحنا سكتنا
عرق اتصبب .. ودمك ساح
سلك.. وزلك..راحل ضلك..منهك كلك ليل وصباح
ويوم فتحتو وراكم.. تاح ترراح... تاح ترراح
السودان الوطن الواحد شبرا شبرا بقي نتاح
يا اشعار العار العار اذا ما الحنضل بقي تفاح
وتم تررم.... مع تاح ترراح
كم سفاح ارتاح واتقدل.... والكاتلنا انحنا سماح
اعتي دروع وجذوع تتهاوي.. وشتلة تقاوم اعتي رياح

Post: #9
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:54 PM
Parent: #3



المؤذن

صحيت بالمؤذن وحالتك تحزن
مرقت وسرقت الوبال
معكز ملكز بسيخة ونعال
مكتف ملتف بأغلظ حبال
وغيرك بخزن جميع الغلال
يسرق ويهرب جمال
باسمه اللواري تهد الكباري تباري الجبال
سيادته يتدبر شئونه الأماسي
يرش الحديقة ويرص الكراسي
ما بين الغواني ورنين الخماسي
تعاين تشوفه تقول دبلوماسي
يمضي ويرضي ويهدي المحال
كمان لو تلاحظ صديقه المحافظ
وقالوا الملاحظ عيونه الجواحظ تباري الريال
حليلك بتسرق سفنجة وملاية
وغيرك بيسرق خروف السماية
وفى واحد لو تصدق بيسرق ولاية
ودا أصل الحكاية وضروري النضال
ضروري النضال

Post: #10
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:56 PM
Parent: #3



الحزن المطير.. يابا مع السلامة.

يابا مع السلامة يا سكة سلامة
في الحزن المطير
يا كالنخلة هامة
قامة واستقامة
هيبة مع البساطة
اصدق ما يكون
راحة ايديك تماماً متل الضفتين
ضلك كم ترامى حضناً لليتامى
خبزاً للذين هم لا يملكون
بنفس البساطة والهمس الحنون
ترحل يا حبيبي
من باب الحياة لباب المنون
روحك كالحمامة بترفرف هناك
كم سيرة وسريرا من حولك ضراك
والناس الذين خليتم وراك
وعيونم حزينة بتبلل ثراك
ابواب المدينة بتسلم عليك
والشارع يتاوق يتنفس هواك
يا حليلك حليلك يا حليل الحكاوي
تتونس كانك يوم ما كنت ناوي
تجمع لم تفرق بين الناس تساوي
نارك ما بتحرق ما بتشد تلاوي
ما بتحب تفرق من جيبك تداوي
الحلم الجماعي والعدل اجتماعي
والروح السماوي والحب الكبير
في الزمن المكندك والحزن الاضافي
جينا نقول نفرق نجي نلقاه مافي
لا سافر مشرق لافتران وغافي
وين عمي البطرق جواي القوافي
يا كرسيه وسريرو هل ما زلت دافي

يا مرتبتو امكن في مكتبتو
قاعد يقرا وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة
المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة ام سكر خفيف
ينده للبنية يديها الحلاوة
والخاطر يطيب
يدخل جنو منو محبوب الشقاوة
يستنى النصيب
الدفو والنداوة السنا والعبير
كالغزلان هناك في الوادي الخصيب
حيث الموية عذبة والغصن الرطيب
كم تحت المخدة اكتر من مودة
للجنا والغريب
عش وعشب اخضر جدول من حليب
يابا ابوي يا يابا
الشمس البتطلع بلت منو ريقا
والنجمة البتسطع فيه تشوف بريقا
الندى في حركتو يطفيها الحريقة
ننهل من بركتو زي شيخ الطريقة
شاييهو وطرقتو والايدي الصديقة
يلا نسد فرقتو حب الناس درقتو
يا موت لو تركتو مننا قد سرقتو
كنا نقول ده وقتو لكنك حقيقة
النفاجو فاتح ما بين دين ودين
نفحة محمدية دفئاً كالضريح
ميضنة كم تلالي جيداً في اليالي
مجداً في الاعالي
مريم والمسيح
قلباً نبضو واصل ما بين جيل جيل
ما بين كان وحاصل او ما قد يكون
ما بتشوف فواصل الا الذكريات
وآلام المفاصل بعضاً من شجون
يابا مع السلامة يا سكة سلامة
في الحزن المطير

Post: #11
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 09:59 PM
Parent: #10



رابطة أصدقاء محجوب شريف(قطـــر - الدوحة )
تدوزن ليلة تكريمه وتبهر الحاضرين
الموسيقار محمد آدم المنصور أبدع في تقديم كورال آسيا عوض


كلمات الكورال



إلي صوت مي محجوب شريف
هذا الشجن.. من ذاك الرهيف
محجوب شريف..
يا كم لطيف..
يامي أبوك..
كمين ظريف..
وسعت مواعينو الكلام..
الفين سلام..
يا ذا الهمام..
يا من تخلل في المسام..
يا من تواتر في النزيف..
نغما شفيف..
وطنا مقام..
فوق النجوم..
وسط القلب..
جوة العضام..
فارس صدام..
يا مي ابوك.. ما هو الضعيف
أو المضام..
بس هو الرهيف..
لامن يغازل..
من شوارع أم در رصيف
كالضو عنيف..
ما بين جهالات الضلام
كالضل خفيف..
لما يزحف في المسام
فكر واضح..
والتزام..
من قام عفيف..
كالحب نضيف..
كالحب نضيف..
محجوب شريف

.. (محمد حيدر المشرف)
عضو منبر سودانيزاونلاين.

Post: #12
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:02 PM
Parent: #11


دم قـــزازة


القبلي شال شبال لمع برق المهيرة واحلالي
قيرة قيرة يا مطيره
يا رزاز الدم حبابك
لما يبقى الجرح عرضة ولما نمشي الحزن سيرة
من دمانا الأرض شربت موية عزبة
كل ذرة رملة شربت حبة حبة
موية أحمر لونها قاني
فتقت ورد الأغاني
تهدي لى اسمك رمزاً للوطن كنز المحبة
قيرة قيرة يا مطيرة يا شهيد الشعب أهلاً
مش بتطلع كل يوم الشمس أجمل
وكل يوم النخل أطول زيدو قامة
وياما شفتك ياما ياما
لما شفت البدر طالع فى سما الوطن ابتسامة
إنتّ فى النهر البسافر جاري طول العمر صاحي
طبعو منك يا الملامحك من ضفافي
واللي شافك مرة شافو
واسمك الختيتو فرهد عشب أخضر فى الجناين
فى الشوارع نيمة نيمة فى مصابيح المدينة
فى فوانيس الضواحي
تملا نادي الحلة سيرتك
اسمك الخلانا نقدر فى ظلام الليل نعاين
والبتسأل عنو ده الخليتو شافع
لسه دابو
يا ما حيعجبك ، شنابو
صوتو رقان فيهو بحة
ود فلان اصرار وصحة
عندو قصة حب جميلة
جرب آلام الحراسة وحرض أولاد الدراسة
وهدّو حيل العسكرية
البنية أم طرحة كبرت
يا سلام الفنجرية
ليها راية وبى كلامها وبى اهتماماتها الجديدة
دقت أجراس القصيدة وشدت أوتار الصلابة
الكتوف اتلاحقت فى السكة يابا
واحلالي القبلي شال شبال لمع برق المهيرة
قيرة قيرة يا مطيرة يارزاز الدم حبابك
لما يبقى الجرح عرضة
ولما نمشي الحزن سيرة
*****

Post: #13
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:02 PM
Parent: #11


السودان الوطن الواحد


مارس حارس ليس يخون
الألف
اللام
السين
الواو
الدال
الألف
النون السودان الوطن الواحد
ما قد كان وما سيكون

*
مارس ماسك كتف ابريل
أعظم شعب...
وأعظم جيل
نعمَ بنادق لا ترتد
لصدر الشعب..
الغدر دخيل

*
شعباً صمم فرداً فرد
هبّ وهدّم حكم الفرد
وجاهو عديل
إعصار إعصار
خطوه بخطوه..
وايد على ايد
وسِلّم سِلّم
ما بنسلم
وشعب معلم..
قال اصرار:
عصينا عصينا
على الحريه منو بوصينا؟
نحن الشعب المابحتار..
اختار اختار
ديمقراطيه
بلا أميّه
بأيدى قويه
نحفر أعمق..
نرمى الساس
للسودان الوطن الحر
مرفوع الراس
للحريه بلا دوريّه
ولا تفتيش
ولا حق ينداس

*
ديمقراطيه عمود النور
ولما تغطى حقول القمح..
الأرض البور
والمكنه تدور
وترفع صوتك يا مقهور
وبينا وبين العالم سد
ينهدّ..
وسور

*
مارس حارس ليس يخون
الألف
اللام
السين
الواو
الدال
الألف
النون
السودان الوطن الواحد
ما قد كان وما سيكون

Post: #14
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:03 PM
Parent: #11


طـــــريق ....الشعب

طريق الشعب أوسع من زحام الضيق
وقلب الشعب أرحب من رحاب الضو
ونبض الشعب كل حلم براه يتم
شجر متشابك الهامات
جيلاً جاي حلو الشم
صبايا وفتية يمرحوا فى صباح الغد
عيونهم برقهن لماح
سوالم رد
وتطلع من شقوق الأرض
آلاف المدن قامات
يطلعوا من قلب الحجر الصم
خفاف ولطاف
ثعابيناً أوان الجد
دفاعاً عن حياض السلم والإفصاح
سلموا ليَّ عليهن جملة
حتى اللسة قبل الخلق والتكوين
صناع الحياة اليوماتي
ملح الأرض
نبض الشعر والموسيقى والتكوين
هدامين قلاع الخوف
كانت هذه الدراجة يوماً ما.. كلاشنكوف
وما بين منارات السمّع والشوف
نقاشين جدار الصمت
نساجين خيوط الشمس
كهربجية الظلمات
وأجمل ما تكون الدنيا
رسامين وحفارين مجاري العصر
نصراً نصر
مقدامين زمانهم فيه ضبط الوقت بالتقدير
شروق الشمس بالإنجاز
حروفهم وا حلالي
تشمهم ترتاح
حا.. حرية
تا.. تغيير
جـ.. جدار
ك.. كتاب
س.. سمار وسكة حديد تهز وترز
با.. بحارة بحراً عبَّ وثار
واو.. وطن مدرار
جرت تتلاحق الأنهار كما تتلاحق الأعراف
كما تتصافح الأديان
كما تتمازج الألوان
هجيناً من سلالات الفخار والعز
مرور النسمة وأيضاً هزة الإعصار
علم فى نشرة الأخبار
وهيبة على امتداد الكون
وعلماً فى حماه الورد
حتى الزهرة والمريخ
شبح حرب النجوم ينزاح
أيادي القهر خلف الظهر مكتوفين
أفاعي السمت حيث مزابل التاريخ

Post: #15
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:05 PM
Parent: #11


نقطة ضو.. لحظة الميلاد.

في اللحظة ديك والتو
لحظة الميلاد كنت نقطة ضؤ
فرهدت بيك فرهيد ....
وانتشيت بالريد
وطرت بيك الجو
قالو ايضا بت .....
قلت مالو ولو
بختي بختي
انت بتي ..
امي واختي..
همي شيلي ..
شيلي مني..
مني ختي
........................
بتي
بشوفها عز التبتبة
بتي البريدة مرتبة
دولابا داك والمرتبا
جات من قبيل من مكتبا
ادت ابوها مرتبا
سددنا دين دكان حسين
كستني توب نجدنا كم.. كم مرتبه
جيهت بيتنا القديم
السقف داك والمسطبة
...............................
قيرا قيرا يا مهيرة
ياشتلاية جاتا مطيرة
تكبري انت تشيلي حملنا
وتزيدينا ترانا كملنا
نسمع عنك ما يفرحنا
الاستاذة دي كتر خيرا
يوم تلقانا هي ...بتوصلنا
وتحصلنا ...تفك الحيرة
ما بتتصنت و ما بتتعنت
ما بتاوق في حق غيرا

Post: #16
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:07 PM
Parent: #11


مليون سلام يا شعبنا

ومليون حباب
الإغتراب يا ابونا..
ما طول الغياب
الاغتراب
فال البخونك ويزدريك
ونحن بين سُونكيهو..
والزنزانه
والسجن السميك
منك قُراب
أحرار...
وحريتنا فى ايمانا بيك
ثوار بنفتح لى الشمس
فى ليلنا باب..
لى يوم جديد
ابداً جذورك فينا تمتدّ..
وتجيك
وبنفتديك وحا نفتديك
ما بنرمى اسمك في التراب
وعيونا تتوجه إليك
انت المعلم والكتاب
حا نغني ليك ونغني ليك
واليزدريك..
يا ويلو من غضبك عليهو..
ومن مشيك
يا ويلو من أجَلُو الوشيك
يوم ينكسر قيد الحديد
السونكى..
والزنزانه
والسجن السميك
وخطى الشهيد
من حولو تهدر والنشيد
وانت الشمس من بين ايديك
تطلع عليك
من كل باب
مليون سلام يا شعبنا
ومليون حباب

Post: #17
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:08 PM
Parent: #11



وتر مشدود

سلمت
خايف كنت ما يسلم قلب مفصود
حلمت
قبلك كنت لا بحلم ولا موجود
معاك بحلم كأني على فرس طاير بغني على وتر مشدود
واطير عبر السما المدود
سما الوطن اللي مالو حدود
حمامة جناها لا خايف ولا مفقود

واشر الغيمة خيمة على النجم وارتاح
أصادف أجمل الغابات واصادق غصنك الفواح
واشرب من زوايا القلب جنبك اخر الأشباح
وتفتح كلمة من عينيك لي مجرى الغنى المسدود

واخط اسمك على باب الزمان اكليل
وردة صبية تلمع فوق صديري النيل
وباسمك أغني لي عالم بسيط وجميل

وانادي عليك ملاذا في شتا الأيام
وبردا في الحياة وسلام
وفي شدة هجير وزحام

جزيرة حنينة بين نهرين حنان القاك عليك اتلم
وهودج في صحاري الهم
وعالي النخيل عليك اتلم
وفي السكة اللي ما بتعود معاك
لآخر المشوار نغني على وتر مشدود

Post: #18
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:08 PM
Parent: #11



احبك احبك

أحلى فصول العمر حنانك
حتة لقيتَ مكانك اجمل
أجمل سكة مشيتَ عيونك
أحبك أحبك أنا مجنونك
ساكن فيني هواك وبريدك
جوا القلب النبض يصونك

معاك معاني حياتي تبدا
وافتح باباً ياما انسدَّ
أشوف العالم ربوة جميلة
عليها نسيم الصبح مخدّة
وبيني وبين النهر عشانك
عشرة بتبدا
وبين عينية وخد الوردة
تبقى مودة
أصالح روحي
تبرا جروحي
ابشر باسمك اهلل أغني
أقيف اتحدى

أديتيني مشاعر حية
عوضتيني الزمن الماضي
زمن الجرح الأكبر مني
وقاسي علية
وبيك صادفني ولقى عنواني
رزاز الفرح الخلَّى الجية
أريت صادفني حنانك بدري
لو لاقيتك بدري شوية

Post: #19
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:09 PM
Parent: #11


جميلة ومستحيلة

يا جميله .. ومستحيله
انت دايما زى سحابه
الريح تعجّل بى رحيلها
عيونى فى الدمعات وحيله
اسمحيلا تشوف عيونك..
اسمحيلا
أنا لا الصبر قادر عليّ..
ولا عندى حيله
يامراسى الشوق تعالى
لا اليالى تمر بدونك هى الليالى
من ضواحى الدنيا جيت..
وعليْ رحالى
لمداين فوق عيونك يا محالى
ريّحينى..
أسُتْرى حالى
فرحينى
عيونى فى الدمعات وحيله
أنا لا الصبر قادر عَلَىْ..
ولا عندى حيله
حدّثت عنك نجمة جارة
وزرعت اسمك..
حارة حارة
فى مناديل العذارى
فى مشاوير الحيارى
فى لحى الأشجار كتبتو..
نحتو فى صم الحجارة
وبحت للشمس البتقدل..
فى مدارها
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر عَلَىْ
ولا عندى حيلة
وانتِ منك لا بداية..
عرفت لسّه ولا نهاية
مرة أسرح..
ومرة أفرح..
ومرة تغلبنى القراية
ولّمن أكتبلك وداعاً..
قلبى ينزف فى الدواية
يا صبيّة..
الريح ورايا
خلي من حضنك ضرايا
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر علىْ..
ولا عندى حيلة

Post: #20
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:10 PM
Parent: #11



ياشعبا تسامي
يا شعبا تسامي
ياهذا الهمام
تفج الدنيا ياما
وتطلع من زحاما
زي بدر التمام

تدي النخله طولها
والغابات طبولها
والايام فصولها
والبذره الغمام

قدرك عالي قدرك
ياسامي المقام
ياملهم رماحك
سناهاالصدام
ام در والطوابي
في صدرك وسام
ملامح كم
تسامح
تغضب لا تلام
همه وعبقريه
ذمه وفنجريه
ضد العنصريه
وتحلم السلام

فداك وفي حواك
يامدد الكلام عفوك
انت ورضاك
وبرنا ليك تام
وبحلم بهواك بي حسن الختام
دينك كم علينا
منك والدينا
واجمل مالدينا
من يوم السمايه
من قبل الفطام

منك كل حته
في الخاطر
صبابه
جنبك نبته نبته
نكبر نحن ياما
نسألك انت
وانت ورينا الاجابه
علمنا الرمايه
والحجا والقرايه
والمشي بي مهابه
في الضحي والظلام

Post: #21
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:11 PM
Parent: #11


وطنا البإسمك كتبنا ورطنا
أحبك ..

أحبك مكانك صميم الفؤاد

وباسمك أغنى
تغنى السواقى
خيوط الطواقى
سلام التلاقى
ودموع الفراق

واحبك ملاذ
وناسك عزاز

أحبك حقيقه
وأحبك مجاز

وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس

أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى

أحبك بتضحك
واحبك عبوس
صحى بتملا عينى
وتشّرف غناى

بحضرة جلالك
يطيب الجلوس
مهذب أمامك يكون الكلام
لأنك محنك
عميق الدروس
مجيد المهابة
مديد القوام
شبابك تشابك
شديد الزحام
أراهم وراهم غبار الحياه
مداين تعاين
كأمّ العروس
تهلل تكلل جبين الإمام
رزازاً يبلل أغانى الخليل

أصدق كلامك حقيقه وبخاف
أخاف الطريق اللى ما بودى ليك
وأعاف الصديق اللى ما بهم بيك
معاك انتظارى ولو بالكفاف
وعنك بعيداً أبيت الرحيل
وبيك اعتزاز الصباح الجميل
جميع الأغانى اتكالن عليك

Post: #22
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:15 PM
Parent: #11



عشة كلمينا ميري ذكرينا

عَشّه .. كلّمينا
ميرى.. ذكّرينا
كل سنكى أحسن
يبقى ..مسطرينا
*
نحن شعب أسطى
يلا ..جيبو مونا
نبنى ..نبنى نبنى
مسرحاً..ونــــادى
مصنعــاً ..وبوسته
حرب لا لا لا لا
كبرى..استبــاليه
صالــه للثقــافــه
تســرح الغزاله
جنبها ...الزرافه
ركَ قمرى طار
قيره قيره قيره
نطَط الصغار
صفّق الترولى
طمّن ..القطار
حلقت ..وحلقت
حمامة المطار
كلّ طلقه..بينا
نحن تبقى وفر
سمسماً ..وبفره
سكراً وشاى
تترا سايكلين..
جاى وجاى وجاى
مافى حاجه ساى
كلّو عندو دِين
كلّو عندو راى
بور..وبورسودان
بارا.. والجنينه
عبرى ..ولاّ واو
حاجه مش كويسه
كلّ زول براو
هى سودانا بكره
من سودانا ناو
تكتب انت تقرا
تعرف السياسه
فى محل حراسه
حجرة الدراسه
تمشى انت تلقى
فى الضلمه..لمبه
ألف ضحكه حلوه
تسندك بجنبه
بى تمن طبنجه
حسن الكمنجه
أحلى شتل منقه
أحسن الحليب
إيد .. وإيد وإيد
نزرع الجديد
غابة النشيد
إيد..وإيد وإيد
مافى بينا سيد
إيد..وإيد وإيد
نلحق البعيد
نحنه مش مرقنا
حته واحده جينا
جينا لى السرقنا
حقّنا..وعصينا
دمّنا..وعرقنا
ولّعوا الرتينا
*

عَشّه..كلّمينا
ميرى ..ذكّرينا
كلّ سنكى أحسن
يبقى ..مسطرينا

Post: #23
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:16 PM
Parent: #11



حلم

مرة شفتك فى المنام
وانتِ بين سربين حمام
نازله سكّه وادى أخضر
شايله سلّة ورد أحمر
وحزمتين أحلى الكلام
يتبعوك طفلين حلاوه
طاروا عصفورين علىَّ
ركّوا فى اسود عينىّ
ورحت في غمرة ندواه
كنتَ مُجْهد
قلبي فَرْهد
ورشّ أيامى الغمام
صحيت وقفت
مشيت أعاين
القى بينى وبين عيونك
كم ضواحى
وكم مداين
وانطوت كل الجناين
فى غيابك
وفى الظلام

Post: #24
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:17 PM
Parent: #11


ليلة الميلاد

يا مشتل فرحنا الشال
ويا مرسى الشراع الضال
ويا واحة قليباً كان زمان رحال
يفتش عن عيون إنسانة
ينسى لديها حزناً طال
ولما لقاك فرهد ياما
بالفرح اللي عندو محال
ولما لقاك رسلو القمر منديل
وركت نجمه ...
ضوت في الدرب قنديل
وهشت زهرة ..
كانت تبكي طول الليل
وجات من بعد دول الهجرة ..
غنوات الحروف
وكانت ليلة الميلاد...

Post: #25
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:19 PM
Parent: #11


في رثاء عبد الخالق محجوب

أهلا مرحب .. ايوه اتفضل" نادانى
مشيتلو..
مصدق وما مصدق
سلمت بقلبي واحضانى
وشعرت كأنه بيعرفنى
شعرت كأنه بيقرانى
راجل نكته عميق ومهذب
رائع جدا وانسانى
ولما جمعنى وشجعنى

سألتو بدهشة عن الحاصل
قاطعنى .. "بتعنى الاعدام؟
اعدامنا .. بتقصد اعدام؟
الموت لو شنقا حتى الموت
الموت .. لو رميا بالرصاص
ما هو الموت"

"الشعب يقرر من الحى والميت مين
الشعب يقرر مين الحى والميت مين

Post: #26
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:20 PM
Parent: #11



البطاقة الشخصية

الاسم الكامل
انسان
الشعب الطيب والدي
الشعب حبيبي وشرياني
اداني بطاقة شخصية
من غيرو الدنيا وقبالو
قدامي جزائر وهمية
لا لون
لا طعم
لا ريحة
وايام مطفية مصابيحها
زي نجمة بعيدة ومنسية
المهنة :
بناضل وبتعلم...
تلميذ في مدرسة الشعب
المدرسة..
فاتحة علي الشارع
والشارع فاتح علي القلب
والقلب مساكن شعبية

Post: #27
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:20 PM
Parent: #11


في انتظارِك .. في انتظارِك .. في انتظارِك

وفي شراييني بيدمدم حِس قطارِك
لو أطير من سجني وانزل في جوارِك
وعنِك أمسح بي رموش العين غبارِك
وأملأ عيني من نهارِك
انتِ يا صحو المدارِك
كل نجمة جميلة تلمع في مدارِك
واي نسمة حنينة دارِك
وكل نخلة ظليلة عندها من ثمارِك
وباختياري وباختيارِك
كم نشارك في المعارك
وما بنخلي فرسنا بارِك
وما بنقيف نستنا في الآخر نبارِك
شدي ايدي وتبقي زادي
نظرة من عينيك تنادي
يا بلادي .. يا بلادي .. يا بلادي
وكلمة منك جمرة للفداء في فؤادي
يوم اجيك وعلي جبيني وسم عنادي
ولا مُتّ وراي يجيك يعتب جوادي
ولا خُفت وفتَّ منك غادي غادي
انتي ما الحضن البلِّم من ساحة هارب
ولا البِّنكِّس راسو من الذلة شارب
ولا البِّدس الراية في قش المغارب
انتي ساحل لما عصف الموج يضارب
وانتي صافي النبع في سكة محارب
وانا وانتي حدين سيف سنين وسوا بنحارب
سلميلي علي البحسو بكل نبض الارض ديه
وسليميلي علي مهيريات شهيدن نارو حية
وسلميلي علي رفاقي وعن حياتهم قولي ليَّ
وسليميلي علي حبايب في زوايا المغربية
وقولي ليهم حبو غنو الدنيا ما زالت ندية
وما حنقبل في وطنا الغالي دية
وما بنخلي وطن سبية
ولا وطن زوجين وحارس وبندقية

Post: #28
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:23 PM
Parent: #11


ست البنات

ست البنات اتمالكت اعصابا
احلامها اتكت
بكت الشبابيك
التي نورا انطفا
فقدت حنان الهمبريب
والالفة والشمس البتضحك
وانسياب الدردشة
نار الكوانين انطفت
إلا البتوقد في الحشا
حق الفطور
يمه العشا
ما باباليكم يا جناي
اصبر كفى
أدت رضيع الأشهر الأولى .. القفا

ثم انكفت
غرقت غرق في دمعتا
عشم العشم نقطة حليبا تسكتو
ولا حتى كسرة تسند
من ما مشى
ما اشرف الدمع الجسور
إذا جرى
من عين والدة سعت
وبكل ما ملكت يداها وصحتا
داست هموما الداستا
مرقت تفتش في الشغل
كم مهنة حامت كاستا
نكتت شهادات الزمن
ما كان تخلى دراستا

رمت اللقيمات الدغش
والكسرة قامت عاستا
كم حاجة عندها باعتا
دبلة زوجا وساعتا
ترخص حياتا .. وكل شئ
بس سمعتا
ياالله ما اطول خميسا وجمعتا
احد أحد.. احد احد
جر السبت حبل الأحد
احد احد
واليوم يجر الثاني والثالث
كما ود الأحد
احد احد
احد احد
احد احد حيلا انتهى
يا منتهى الصبر البخلي السترة
قاب قوسين وادنى
من الذي ما يشبها
يا منتهى الصبر البخلي السترة
ترخص حياتا .. وكل شئ
بس سمعتا
بس سمعتا
بس سمعتا

Post: #29
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:24 PM
Parent: #11



عمّـــا قريـب

عمّا قريب..
الهمبريب
يفتح شبابيك الحبيب
والحال يطيب
يا محمد أحمد تستجِمْ
والبيت يتمْ
تتلم تلمْ
تفرح فرح
تحلم حِلِم
كم تطمئن
حقك يجيك لافيهو شك..
يمكن واظن
ويفوتو همْ
والعدل يعمْ
وتغني أمْ
كادت تجن
كبر الولد جُوّا السجن
فاقداهو هى
دا كلو كلو ينتهى
دا كلو كلو ينبهى
زولاً تريدو وتَشْتهِى
تلقاهو فى
لا فى السِّجِن..
لا مختفى
لا يقولو ليك ما تمشي لى
دا كلّو كلّو ينتهى
دا كلّو كلّو ينتهى
دا كلّو كلّو ينتهى

Post: #30
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:25 PM
Parent: #11


فديتك

بقيت يا وطنى زى منفاى
مطارد ومستباحة دماى
عساكر من دروب تايهات
حداى، قدام خطاى
ووراى
وذنوبى هواى
يا موطنى وغناى
وذنبى ولاى
وإنك سيدى ومولاى
تعيش يا ذنبى طول ما عشت
عشت معاى
لا عنك بحيد لا جاى بفوت
لا جاى
فديتك يا مديد القامة
يا شعبا، سديد الراى
وقلبى عليك يا حجرا
حنين دفاى
أقبل وين أفوتك
وفي حماك حماى
أسيب عزاى سبية
وكيفن ألقى عزاى
عزاى في وحشتى وسلواى
عيونا وبحة الغناى
نخيلك تمره منه صباى
ونيلك في قواى
هادر هميم جراى
وقبضة إيدى مسكة رمحك
الرماى
أطالع في صحارى الليل
مطالع صبحك الضواى
فديتك لو بقيت منفاى
فديتك لو بقيت مرساى

Post: #31
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:26 PM
Parent: #11



بلا وانجلى


بلا وانجلى
بلا وانجلى
حمد الله الف على السلامه
انهّ كتف المقصله
والسجن ..
ترباسو انخلع
تحت انفجار الزلزله
والشعب ..
بى أسرو اندلع
حرر مساجينو اندلع
قرّر ختام المهزله
يا شارعاً ..
سوّا البدع
اذهلت أسماع الملا
كالبحر ..
دواى الجلجه
فتحت شبابيكا المدن
للشمسِ
واتشابا الخلا

شفت البنادق فى السما
الظبط والربط انتمى
للشعب..
شعب الملحمه
الصرخه كانت همهمه
والهبه كانت ململه

سداً منيعاً يا وطن
يا شعب وهّاج الفطن
للظلم يوماً ما ركع
مهما جرى
تباً لعهد السمسره
والنهب..
ثمّ السمسره
سداً منيعاً يا وطن
صه يا طنين البلبله
أبدا ً لحكم الفرد..
لا
بالدم لحكم الفرد..
لا
تحيا الديمقراطيه
كم نفديك يا مستقبلا
بلا وانجلى
بلا وانجلى
حمد الله الف علي السلامه
انهدّ كتف المقصله

Post: #32
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 10-31-2010, 10:27 PM
Parent: #11



يا اللي بتسمع والما بتسمع


لازم تفتح اضانك وتسمع
صوت الشارع لمن يدوي
كل قلاع الخونة بتهوي
وكل جباه الكهنة بتركع
وشمس الحق السرقو شعاعها
بكرة بامر الشعب بتطلع
ياللي بتسمع
والما بتسمع
نحن اسودا ما بتدجن
ونحن سدودا ما بتهدن
ونحن جبلا ما بتصدع
لملم ناسك ولحمة راسك
وارفع ايدك عننا ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
*****
والتاريخ يا جاهل بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
اسأل كل العسكر قبلك
وكل الحاول فكر متلك
الاستأسد والاتنمر
مهما استعلا ومهما استكبر
برضو في يوم الغضبة بيهلك
وبيلقى مصيرو نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى وارقى واسمى وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا وشفنا صفينا
وما بنهاب لا سيخ لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية وخلابة
والاصلاح ما جربندية
الاصلاح ما بالزندية
الاصلاح عدل وحرية
الاصلاح موضوع وقضية
الاصلاح عزقة وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد وشعبنا واحد
وحبنا واحد ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة ونارها
ونحن منية الباغي سهامها
الا ارادة المولى ارادت
حكمت فينا وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع

Post: #33
Title: Re: من أقـوال شاعر الشعب.................. ( محجوب شريف )
Author: Amani Al Ajab
Date: 11-01-2010, 02:43 PM
Parent: #32


أرضاً سلاح..
لو نتحد ضد الجراح..
نبني الديمقراطية صاح..
نبنيه صاح وطن البراح..
وطناً مجير لا مستجير
لا مستبد لا مستباح..

Post: #34
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 05:38 PM
Parent: #33


شكرا اماني العجب ... و أهديك قصيدة عشة كلمينا ميري زكرينا..
كلمات محجوب شريف... ألحان الأخ طـارق الأمين .. أداء/ الهيلاهوب.

أسمحو لي أن اعيد نـص القصيدة مرّة أخري..
القصيدة كما قيل في إحدي التعليقات تشبه
الراحل مصطفي سيد احمد و العملاق وردي
و أبدعت الهيلاهوب بقيادة طارق الأمين
في إخراجها في شكل منلوجات وفكاهة
وستظل هذة القصيدة تردد عبر الأجيال.





النــــص..
(عشة كلمينا ميري ذكرينا)

عَشّه .. كلّمينا
ميرى.. ذكّرينا
كل سنكى أحسن
يبقى ..مسطرينا
*
نحن شعب أسطى
يلا ..جيبو مونا
نبنى ..نبنى نبنى
مسرحاً..ونــــادى
مصنعــاً ..وبوسته
حرب لا لا لا لا
كبرى..استبــاليه
صالــه للثقــافــه
تســرح الغزاله
جنبها ...الزرافه
ركَ قمرى طار
قيره قيره قيره
نطَط الصغار
صفّق الترولى
طمّن ..القطار
حلقت ..وحلقت
حمامة المطار
كلّ طلقه..بينا
نحن تبقى وفر
سمسماً ..وبفره
سكراً وشاى
تترا سايكلين..
جاى وجاى وجاى
مافى حاجه ساى
كلّو عندو دِين
كلّو عندو راى
بور..وبورسودان
بارا.. والجنينه
عبرى ..ولاّ واو
حاجه مش كويسه
كلّ زول براو
هى سودانا بكره
من سودانا ناو
تكتب انت تقرا
تعرف السياسه
فى محل حراسه
حجرة الدراسه
تمشى انت تلقى
فى الضلمه..لمبه
ألف ضحكه حلوه
تسندك بجنبه
بى تمن طبنجه
حسن الكمنجه
أحلى شتل منقه
أحسن الحليب
إيد .. وإيد وإيد
نزرع الجديد
غابة النشيد
إيد..وإيد وإيد
مافى بينا سيد
إيد..وإيد وإيد
نلحق البعيد
نحنه مش مرقنا
حته واحده جينا
جينا لى السرقنا
حقّنا..وعصينا
دمّنا..وعرقنا
ولّعوا الرتينا
*

عَشّه..كلّمينا
ميرى ..ذكّرينا
كلّ سنكى أحسن
يبقى ..مسطرينا

Post: #35
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:09 PM
Parent: #34

قيل عن محجوب شريف, بأقلام عربية شقيقة.
الشاعر السوداني الكبير محجوب شريف يكتب كي يوقظ الضمير الإنساني !

بقلم/ يحيى غازي الأميري

(نغني ونحن في أسرك وترجف وأنت في قصرك)
من أشعار محجوب شريف

رب صدفة خير من ألف ميعاد ، أحد الأمثال التراثية المتداوله في عموم منطقتنا العربية نتداوله فيما بيننا بشكل تلقائي عندما يكون لقاءك وعن طريق الصدفة جميل ومثمر ولطيف وناجح عندما يكون بدون مواعيد مسبقة ومعدة لهذا اللقاء ،هكذا جاء لقاء الشاعر السوداني الكبير محجوب شريف بإخوانه العراقيين في مقر الجمعية الثقافية في مالمو ، مساء الجمعة 21/9 / 2007.



الأستاذ هادي المالكي أثناء تقديمه الشاعر الكبير محجوب شريف

حيث أتحفنا الشاعر المعلم القدير محجوب شريف بحديث شيق نقل خلاله ما يحمله من حب وطيبة وصدق وتضحية لشعبه و أبناء بلده والى الإنسانية في كل مكان، مطرزا ً حديثه بقصائد شعبية غنائية جميلة نابضة بالحب والحياة والعزيمة لمواصلة الدرب مسلطا ً الضوء على مأساة شعبه ومعاناة أهل بلده أنها بحق أشعار تتحدث عن الهموم الكبيرة والمعاناة المستمرة المريرة التي يعيشها شعب السودان .

لم تكن الجمعية الثقافية العراقية في مالمو على موعد مسبق مع الشاعر !

هكذا عرفت أنها الصدفة التي جاءت به إلى السويد ومالمو ، إذ ألمت بالشاعر الأستاذ محجوب شريف وعكة صحية تطلبت منه أجراء فحوصات وعلاج خارج السودان فساهم أصحاب المروءة والشهامة بتوفير فرصة لعلاجه في لندن .. وبعد إتمامه مشوار العلاج جاء لزيارة السويد وعندما سمع الأستاذ هادي المالكي رئيس الجمعية الثقافية العراقية في مالمو، بوجود الشاعر الكبير في مدينة (مالمو ) بذل جهود كبيرة أثمرت بترتيب لقاء مع الشاعر ليحقق لنا أمسية رمضانية جميلة شرفنا وأسعدنا و أطربنا الأستاذ محجوب وكريمته( مي ) بها !

وقد شكر الشاعر المناضل محجوب شريف اخوته العراقيين الذين بعثوا له رسائل لغرض المساهمة والمشاركة بدفع مبالغ مالية بتكلفة علاجه معلل رفضه للمساعدة بقوله لهم بعد شكرهم أن إخوانكم و أهلكم في العراق أكثر حاجة ً للمساعدة مني في هذا الوقت الصعب والعصيب الذي يمر به الشعب العراقي .

في بداية الأمسية قدم الأستاذ هادي المالكي ضيفة للحضور مرحبا ُ ومعرفا ً به بكلمة قيمة أشار و أشاد فيها إلى المسيرة الطويلة الطيبة والحافلة بالعطاء والنضال التي خاضها دون كلل أو ملل الشاعر الكبير محجوب شريف من اجل الخير و الأخوة والمحبة والسلام لشعب السودان و من أجل القيم والمبادئ الإنسانية النبيلة !

سنين طويلة حرم العراقيون من التعرف بآلاف من أدباء وكتاب وشعراء وعلماء ومناضلين ووووو إخوانهم في اللغة و(الوطن الكبير)كما يسمونه أو كما يقال عنه ! وذلك لاسباب عديدة كثيرة لست بصدد تعدادها ، وفي الحقيقة ليس العراقيون هم فقط الذين حرموا من التعرف على مبدعين وطنهم الكبير بل عموم شعب هذا الوطن الكبير،حرمهم من ذلك جور الحكام والسلاطين وظلمهم واستبدادهم !

لقد حرم العراقيين من مبدعييهم وعلمائهم ومناضليهم فكيف بمدعين الوطن العربي الكبير ولكن وللحق كانت الشعارات والأناشيد التي وصلتنا عن الوطن العربي كثيرة وأهمها بلاد العرب أوطاني ! وأمة عربية واحدة ! ونفط العرب للعرب! وغيرها العديد من الشعارات والهتافات فحفظناها والحمد لله على ظهر قلب!؟

سنين عديدة وطويلة محملة بالظلم والضيم والجور والخراب ضربت العراق أبعدتنا مجبرين عن مواكبة الفنون والآداب والعلوم وما تنشره الطليعة المثقفة في العالم والتي سارت بخطوات سريعة وكبيرة بينما كنا نصيبنا الحروب والموت والخراب والحصار الذي تعددت أشكاله وكثرت غاياته وأهدافه!

رغم قصائده التي تتحدث عن الويلات والمآسي التي تضرب السودان بشكل متواصل و بغير رحمة لكن الجو المرح والفرح ساد القاعة ومن فيها !

فقد كان الشاعر محجوب شريف كثير النكتة ظريفا ً بشوشا ً ، رغم ما تحمله قصائده من الأدب الثوري والتنويري المشبع بالمثل الإنسانية النبيلة التي تحاكي الوجدان والضمير، كانت أحاديثه وقصائده تدخل القلب بلا استئذان أجل فهو يكتب عن الهموم الحقيقة للشعب وينسج من مشاهداته اليومية صورا ً فنية أدبية رائعة حقيقية دون تكلف وتزويق ،فهو يكتب للناس التي أحبها وعمل ويعمل بكل قواه وطاقته من اجلها .

كان من ضمن حديث الشاعر محجوب شريف انه تلقى عدة دعوات للحضور إلى مهرجانات العراق الشعرية أيام مهرجانات المربد السنوية لكنه رفض المشاركة لقناعته بان سبب المأساة والأسى العراقي يكمن في رأس سلطتها وقيادتها التي ترعى هذه المهرجانات وأن دوافعها وأغراضها لغايات وأهداف بعيدة عن أهدافه ومبادئه .

ببساطة الكبار وبتواضع غاية في الأدب وحسن المنطق أحيا الشاعر والمناضل سهرة امتدت إلى أكثر من ساعتين وسط انبهار و انشداد الحضور لقصائده وحلاوة حديثه ولصوت ساحر خلاب رافقه في أمسيته صوت أبنته الشابة الجميلة السمراء ( مي ) وهي تغني بصوت عذب قوي يداعب الأحاسيس ويلامس شغاف القلب، شد الحضور له وسحر بسماعه وقاطعه لمرات عديدة بحرارة التصفيق !

نواصل.

Post: #36
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:13 PM
Parent: #35


الفنانة ( مي محجوب ) تنشد بصوتها الساحر وهي تقف جنب والدها الشاعر الكبير محجوب شريف

بلغة شعبية سودانية وعلى إيقاع موسيقي وبلحن غنائي نسج ونظم الشاعر السوداني القدير قصائده ، كل قصيدة منها تحكي حكاية من الواقع ، وتسلط الضوء عليها وعن آثارها و أسبابها ، وأنا أستمع وأستمتع أحسست ان الشاعر المناضل قريب جدا ً من أسلوب الشاعر المصري الكبير عبد الرحمن الأبنودي و كذلك الشاعر الكبير أحمد فؤاد نجم ، فكما يتحفنا الشاعر الكبير عبد الرحمن الابنودي بقصائده الرائعة جاءت قصائد شاعر السودان محجوب شريف .

أنه ابنودي السودان أنه ينقل صوره من الواقع بكلمات رشيقة منتقاة يطوع فيها اللغة الدارجة ، والتي تنم عن خيال واسع و مقدرة وتجربة كبيرة وغنية يتمتع بها الشاعر ، صانعا ً منها قلائده الرائعة الجمال الثمينة القيمة !

لقد جعلني الشاعر محجوب اسرح بخيالي على مدى اكثر من ساعتين بين سهول السودان وسنابل حقولها وفيضان نيلها سارحا ً في مدنها وأشعارها وجوع أهلها وصراع جنوبها ومآسيهم ، بعدها رجعت إلى البيت و رحت استرجع صور عن السودان طبعت بذاكرتي !

معظم أهلنا في العراق ومن جيلي يعرفون ويحفظون أسماء من السودان قد كثر ترددها في وسائل الأعلام العراقية المتاحة وابرز هذه الأسماء سواء كان من المطربين أو الكتاب أو الشعراء أو المناضلين الأشداء التي ترسخت بذاكرتي ... كيف ننسى المطرب الكبير سيد خليفة الذي أتحفنا بصوته المتميز الجميل والحان أغانيه المرحة الخفيفة بإيقاعها الموسيقى السريع وحركاته الرشيقة التي يؤديها مع أغانيه ومن أشهر أغانيه التي لم تغادر ذاكرتي أغنية ( الممبو سوداني ) وأغنية ( ازيكم أنا لي زمان ما شفتكم ... ازيكم ).

والكاتب الروائي الكبير الطيب صالح صاحب العديد من الروايات الشهيرة التي رسم فيها صورة معبرة حية عن الواقع السوداني ومن أبرزها وأكثرها شهرة رواياته

1ـ عرس الزين
2ـ موسم الهجرة إلى الشمال
3ـ مريود
4ـ دوامة ود حامد
5ـ ضو البيت

لقد قرأت الرواية الأولى والثانية خلال سبعينات القرن الماضي وسنحت لي فرصة إعادة قراءتهما مرة ثانية و كذلك قراءة الروايتين الأخيرتين ( دوامة ود حامد وضو البيت ) في عمان عام 2002 .

ولن يغيب عن ذاكرتي اسم الشاعر السوداني الكبير محمد الفيتوري رغم مساندته السلطة الغاشمة ومشاركته و حضوره المستمر لمهرجاناتها ، سامحه الله وهداه .... فهو شاعر كبير مشهور وقامة شعرية عالية وله مكان مرموق في مجال الشعر الحر وأحد رواده .

لقد انشد وكتب الجميل والرائع من الأشعار للشعب الافريقي والسوداني والوطن العربي والمثل الإنسانية وحارب بدون هوادة الظلم والاستبداد ، لقد أثارت قصائده بحق الشهيد عبد الخالق محجوب ورفاقه غضب وغيظ بعض الطغاة !

وأدناه مقاطع صغيرة من أشعاره :
في حضرة من اهوي عصفت بي الأشواق
فحدقت بلا عين ورقصت بلا ساق

عشقي يفني عشقي وفنائي اســــــــــــتغراق
مملوكك لكني ســــــــلطان العشاق
..............
أمس قد مر طاغية من هنا
نافخا بوقه تحت أقواسها
وانتهى حيث مر............

نواصل
لتوثيق لتلك الليلة الشعرية الغنائية.

Post: #37
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:16 PM


محجوب يقرأ احدى قصائده, و إنته مي و الحضور يستعمون.

قرأت في مقالة أو دراسة نقدية منشورة على صفحات الانترنيت كتبت كمقدمة لديوان الشاعر محجوب شريف ( الأطفال والعساكر ) المقدمة بقلم الأستاذ المرحوم الدكتور جيلي عبد الرحمن وهي شهادة رائعة بحق الشاعر المناضل محجوب فيقول فيها ( يعتبر الديوان وأشعاره بعض من أشعار صاحبه وأنه قمة للفن الثوري الأصيل !

ويستشهد بالعديد من المقاطع الشعرية موضحا ً أبعادها والمناسبات التي كتبت فيها ! واخترت بعض المقاطع الشعرية من قصائد الشاعر محجوب شريف التي وردت في مقالة الدكتور الأديب المرحوم جيلي عبد الرحمن مع تعقيباته عليه

** فينشد هذه القصيدة وهو يعاهد قمر ليلة !

وحياة أمنا الخرطوم
أشيل شيلي وأشد حيلي
و أموت واقف على حيلي
وأقولك يا أعز الناس
على الوعد القديم جايين
وبين الثورة والسكين
شيوعيين
حتى الموت شيوعيين ))

وفي مقطع أخر من مقالة المرحوم د. جيلي عبد الرحمن يقول (( ويغوص الشاعر في عواطف إنسانية خالصة ... تكشف فجأة عن بطولة الصمود ... ليس صمودا ً بلا ثمن أو رحلة في الخلاء ، ليس بطولة زائفة ... وإنما آلام حتى النخاع ... دون أن يستسلم أو تخور قواه ... ما يمنحه لمريم هو ذلك القلب الكبير الذي أفعم بأحزان شعبه وأشواقه .

طوال النهار و الليل
في عيني شايلك شيل
لكني شادى الحيل
والخوف علي داهم
هاك قلبي ليك منديل
الدمعة لما تسيل
قشيها يا مريم

ويتداخل تحدي السجان مع رفض الموت فيصيران تحديا ً واحداً مزلزلاً
ولسه ولسة عبد الخالق المغوار
يقود الصف
ونحن وراه كف فوق كف
وهاشم قاطع الحدين
لسه و لسه يملا العين )).

نواصل ............ توثيق تلك الليلة.

Post: #38
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:19 PM


محجوب وهو يحي شعب العراق وبيده باقة الورد التي اهدتها اليه الجمعية الثقافية العراقية

لقد كانت القصائد الجميلة التي قرأها الشاعر محجوب في أمسيته في مالمو قد قربت للحضور كثيرا ً صورة التشابه الكبير في المحنة والمعاناة والفواجع والحروب التي تضرب الشعبيين السوداني والعراقي كان و كأنه يقرأ قصائده ويتحدث عن هموم الشعب العراقي ومعاناته !...... وعندما ذكر بحديثه الهوس الديني و التعصب الديني والتطرف والاستبداد والاستعباد ومروجين أفكارها قال ( هؤلاء خصومي وأني عدوهم اللدود ), ليقرا لنا قصيدة من قصائده الكثير ة التي كتبها عن مريم و بالمناسبة فأسم مريم أسم أمه وأسم أبنته الكبرى وكذلك يعتبرها رمز إلى الأم بكل معانيها الرائعة !

وأدناه مقاطع من قصيدة يا والدة يا مريم والتي يقول فيها :

يا والدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية

يا والدة يا مريم

ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم

يا والدة يا مريم

عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم والعسكري الفراق
بين قلبك الساساق
وبيني هو البندم ... والدايرو ما بنتم

يا والدة يا مريم

طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم

لتكمل جمالية القصيدة وتزيدها تقربا ً للقلب والأحاسيس من بعده أبنته ( مي ) بغنائها للقصيدة بصوت ساحر عذب ،

كان صوت (مي ) ينقلني إلى (الأم العراقية ) وكم من الفواجع التي ألمت بها وكم من أنهار الدموع سالت على وجناتهن ! لقد سالت دموعي مع نغمات صوتها وأمتلئ صدري بالعبرات ،حيث نقلني صوتها إلى صوت بكاء أمي كلما خابرتها من غربتي فهي تعيش الآن بوطنها العراق غريبة هي الأخرى مهمومة حزينة تحيط بها الأهوال والمصائب وفوق كل هذا لا كهرباء و شحة في الماء والدواء كذلك فر عنها من الهلع ورعب البلاء الأبناء والأصدقاء ؟

Post: #39
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:21 PM


يحيى غازي الأميري كاتب سطور هذه المقالة مع الشاعر الكبير محجوب شريف


من الذكريات المؤلمة التي لم تبرح ذاكرتي الصورة المأساوية التي انتهى بها قادة انتفاضة تموز 1971 في السودان وما حل بالسودان بعدها من تدهور كبير متسارع, لقد كتب الشاعر محجوب شريف قصائد عديدة لرفاقه والى انتفاضتهم الباسلة التي حدثت في تموز عام 1971 بقيادة هاشم عطا التي تكالبت عليها قوى الشر والحقد والعمالة لتحبط ثورتهم بالمهد بعد ثلاثة أيام إذ شهدت في وقتها تلك الأيام تطورات دراماتيكية كبيرة من دول عديدة شاركت بإخماد الانتفاضة ورجوع النميري للسلطة مرة ثانية وما أن تسلم جعفر نميري السلطة حتى نصب المشانق وملء السجون بالشيوعيين وبحكم دكتاتوري سار بالبلد بخطى متسارعة إلى الوراء، ومن أبرز من طالهم الإعدام الشهداء عبد الخالق محجوب ، الشفيع أحمد الشيخ ، هاشم العطا ، بابكر النور،

وهذا مقطع من إحدى قصائده يصف به الشهيد عبد الخالق محجوب فيقول فيها :

إسمو عبد الخالق
ختاي المزالق
أب قلبا حجر
يا أرض الوطن
يا أمو العزيزة
ختالك ركيزة
دائما باقية ليك
في الحزب الشيوعي
طيري يا يمامة
وغني يا حمامة
وبلغي اليتامى
والخائفين ظلاما
عبد الخالق حي
وبالسلامة


نواصل, لتوثيق تلك الليلة..

Post: #40
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:24 PM


محجوب يسحر الحضور بقصائده

وفي مقطع من قصيدة أخرى يصف الشهيد عبد الخالق محجوب فيقول :

رجل نكتة .. عميق مهذب
...
قاطعني ..... يعني الإعدام
الشعب يقرر من الحي ومين الميت

أعود إلى جو الأمسية فالحديث عن السودان يثير الشجون ... لقد قرأ لنا الأستاذ محجوب قصيدة أعتقد ان اسمها كان ( السنبلة )وفيها تحدث عن العلاقة الاجتماعية المفعمة بالحب والإنسانية التي تسود الزوجين !

وتبعها بقصيدة ( الحرامي ) وهي تحكي حكاية شخص حرامي ألتقى به في السجن الذي كان معتقل به الشاعر محجوب شريف . وتبعها بقصيدة تصف حدث مر به ليخلد ذكراه بقصيدة تصور السلطة التي تدعي حراسة الشعب وتحافظ على ممتلكاته كيف سرقت ( الغويشه ) ــ الغويشة سوار من الذهب ـ الخاصة بابنتيه ( مي و مريم ) المخبأة بعناية وسرية في البيت( مضمومة لأيام الحاجة والعوز كما نقول بلغتنا العراقية ) عندما داهمه العسكر وهو في بيته بأمر استدعاء و تحري وتفتش البيت وكيف امتدت أيديهم لتسرق الغويشه من مخبئها ! وقد كانت قصيدة مؤثرة بديعة خلدت الحدث و أدانت الجناة !

يقص قصة الغويشة وهو فرح مبتسم يعرفها ( الغويشة ... الغويشاية )

ويبدأ قراءة قصيدته بتعريف لها والقصيدة طويلة فهي تحكي قصة كاملة الفصول ،اخترت المقطع أدناه من القصيدة :

هجين الدبله و الخاتم
سلالة كم وكم حاجه
متل الستره وهاجه
بحتم الدوله لا حوله
باوراقا الثبوتيه
صبحت في خبر كان
للي كانت ليها محتاجه
المسيكينه
ما تسألني كم تمن الغويشايه
بل جاوبني كم تمن الطمأنينة
غويشة مي و مريومه
تماما زي حمامايه

وقد نقلنا إلى الصراع الدائر في السودان في دار فور المنكوبة التي يعيش شعبها أقسى أنواع الظلم والإبادة والتعسف والفاقة والحرمان ، طلب الشاعر محجوب من أحد الشباب الجالسين في القاعة ان يتفضل بالجلوس بجانيه وطلب منه ان يقدم نفسه فجلس على جانبه شاب وسيم أسمر البشرة وبلغة عربية سليمة عرف نفسه :

أنا جبرائيل ابن أدم من السودان من دار فور أهلي يتعرضون بشكل مستمر للإبادة الجماعية ! و أضاف يقولون لنا ان الصراع عندكم بين الرعاع و الزراع ! و شرح للحضور جزء مختصر من مأساتهم الكبيرة !, ليكمل بعده الشاعر محجوب بكلام جميل ماذا يختلف عنا هذا الشاب فلغته تشبه لغتنا وشكله كذلك وأسمه أسم الملاك جبرائيل و اسم والده أسم أول أنبياء البشر !, ليحلق بنا الشاعر محجوب بقصيدة غنائية راقصة فيبادر إلى الرقص مع رفيقة الشاب الأسمر وبحركات عن رقصة فلكلورية خاصة راح يدور بين الحضور !


نواصل لتوثيق تلك الليلة.

Post: #41
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:26 PM


جانب من الحضور



لقد أتحفنا بعدها بقصيدة غنائية أخرى راحت بعده الجميلة ( مي ) تغنيها بلحن جميل ،تبدأ مقدمة القصيدة

تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم و ياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب

وقد قرا قصيدة رائعة سريعة الإيقاع تقول مقدمتها :

هم هم .. هم هم ..
غم غم آخرتها دمدم
..هم..غم..دم

عتمة وكتمة وزنقة وذم

وكم كنت أتمنى أن يصل الشاعر محجوب إلى مقطع من إحدى قصائده (( قصيدة مساجينك )التي يقول فيها :

مساجينك مساجينك
نغرد فى زنازينك
عصافيرا مجرحه بى سكاكينك

نغني ونحن في أسرك
وترجف وأنت في قصرك
سماواتك دخاخينك

برغمك نحن ما زلنا
بنعشق فى سلاسلنا
بنسخر من زنازنا
وبنسخر من زنازينك

للسودان مواقفنا
وللسودان عواطفنا
ولما تهب عواصفنا
فما حيلة قوانينك

لكنه للأسف لم ينشد هذا المقطع، نعم أيها الشاعر الكبير محجوب نعم كل الطغاة ترتجف في قصورها وتعيش الفزع وهي تسمع صوت أنين معذبيها وأسراها وضحاياها !!, لقد كانت من الاماسي الرائعة التي سوف يبقى لذكرها طعم ومذاق جميل فالشاعر الكبير محجوب شريف دون صفحات مشرقة خالدة عطرة لمسيرة ونضال وكفاح ومعاناة الشعب السوداني .


نواصل لتوثيق تلك الليلة.

Post: #42
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 06:29 PM


يجلس الشاعر السوداني محجوب شريف وتحيط به مجموعة من المثقفات العراقيات
وكذلك من السودانيات كل من زوجة الشاعر وكريمته مي والأستاذة ثريا

لقد كانت أمسية رائعة وجميلة جمعت فيها العديد من الكتاب والأدباء والمثقفين العراقيين والسودانيين وكان ضمن الحضور زوجة الشاعر الكبير مححوب شريف وزوج أبنته ( مي ) وهو فنان أشاد الشاعر محجوب بإعماله الفنية ودماثة أخلاقه وقد أخبرنا الشاعر أن مهر (مي ) كان خمسة لوحات رسمتها ريشة زوجها الفنان قدمت كمهر لها ، وقد كان من ضمن الحضور من الوجوه النسائية السودانية المعروفة في مدينة مالمو الأستاذة العزيزة ( ثريا ) ذات الحضور المتميز في المحافل السياسية والثقافية والاجتماعية في مدينة مالمو، بعد انتهاء الأمسية كانت فرصة جميلة لالتقاط الصور بين الجميع احتفاء بالشاعر وضيوف الجمعية الثقافية العراقية في مالمو !

ملاحظة : اعتمدت المقاطع الشعرية من مواقع صحفية إلكترونية عديدة على شبكة الانترنيت والتي تتحدث عن نضال وأدب وشعر الشاعر السوداني الكبير محجوب شريف .

يحيى غازي الأميري

إنتهي... http://www.alnoor.se/article.asp?id=11587

Post: #43
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 09:47 PM
Parent: #1



** حـــب للخــرطـوم **
محجوب شريف.

غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبَّ
وعبَّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
ياما فرهد فى عيونك غصن أخضر
وفرحة أكبر من شجونك
والسلاسل يا جميلة
يوم ما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلَّ قيدك
فى غضبنا الحر ولافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة

Post: #44
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 09:54 PM
Parent: #43


الغــــــــــــائب : سافر زمان
إهداء لكل الأحباب
أعضاء المنبر و القراء
من لا وطن لهم


** الغــــــــــــائب : سافر زمان

سافر زمان
قُبال سنين
لا جاب جواب
لا جاب خبر
أمُّو تسأل كل طاير
وكل عائد من سفر
خيالو ما فارق عيونها
وطيفو ما غاب
ليهو
*
وما زال هناك..
فى الركن داك
صوتو وغناهو وضحكتو
وصور المعلّقه فى الجدار
وجرايدو
والكتب الزمان
الليله كاسيهم غبار
مصباحو فى الركن الحزين
ومكانو ما زال فى انتظار
اصحابو انداد الطريق
قدّام عيونها مشو اخضرار
*
يا ماشى لى بلداً بعيد
قول للمخاصم أُسرتو
قول للطالت هجرتو
أمك هناك مادقّ باب
ماعاد قطار
ووصل جواب
اسمك تهزّها ذكرتو
والبيت وراك لو شفتو كيف
ضاعت مواسمو وخضرتو
*
يا حليلو لّمن كان صغير
تلميذ بيمشى المدرسه
تشفق عليهو من الطريق
وتخاف عليهو من المسا
كيف ينسى عِيديّه وحنان
وكفاح سنين كيفن نسا؟
*
سافر زمان
قبال سنين
لا جاب جواب
لا جاب خبر

Post: #45
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 10:14 PM
Parent: #44



الحلــــــــم

يمة شفتك فى المنام
وانتِ بين سربين حمام
نازله سكّه وادى أخضر
شايله سلّة ورد أحمر
وحزمتين أحلى الكلام
يتبعوك طفلين حلاوه
طاروا عصفورين علىَّ
ركّوا فى اسود عينىّ
ورحت في غمرة ندواه
كنتَ مُجْهد
قلبي فَرْهد
ورشّ أيامى الغمام
صحيت وقفت
مشيت أعاين
القى بينى وبين عيونك
كم ضواحى
وكم مداين
وانطوت كل الجناين
فى غيابك
وفى الظلام

Post: #46
Title: Re: من أقـوال شاعر الشعب.................. ( محجوب شريف )
Author: ناصر المحسى
Date: 11-01-2010, 10:21 PM
Parent: #45

محجوب شريف انسان بقامة وطن

Post: #47
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-01-2010, 10:22 PM
Parent: #45



الشــــهيد
اشعار/ محجوب شريف


صدقنى أنا لا قيتو امبارح
لا بحلم كنت ولا سارح
كان باسم وشامخ كالعادة
نفس الخطوات البمشيها
نفس الكلمات الوقادة كان فاتح قلبه على الشارع
صحيح أنا قبلك صدقت
جريت وبكيت لما سمعت
يوم نفذوا حكم الاعدام
لكنه بكل تفاصيلو
جسمو .. لونو .. ضحكو .. صوتو
مشيهو وطولو
لاقانى وبحلف نتأكد
لا طيف لا واحد من جيلو
فوجئت حقيقة وبصراحة
لو مش أبعادو الشخصية
والسوق .. الحركة هدير الكارو
حديث المارة مع الباعة
والناس ، الداخل للبوسته
الطالع منها ، والساعة
زى سبعة صباحا ، والشارع
مليان عمال وأفندية
وفى طول الوقت وكنت بفكر
امكن بحلم
امكن كل الحاص اشاعة
بس لكنى جرية قريت أيام المحنة
سمعت اذاعة
وكل الزملا الشهدا ، شرفنا
صانو شرفنا بكل شجاعة
واستبسالم كان فى الدنيا
حديث الساعة
وشفت بعينى
فتشو بيتنا وبيت جيرانا
رفعت ايدى
مرة الدبشك ، ومرة السنكى
ومرة زناد ما بين عينى
دا كلو تمام انا وعشتو
لحظة بلحظة مشاهد حيه
بس لكنو هداك قدامى
كمان شايفنى بعاين لى
وفطول الوقت .. كنت بفكر
امكن بحلم
امكن امانى
امكن بشبهو واحد تانى
وفجأة الصوت اياه .. عرفتو
عرفتو الما بغبانى
"يااخينا ازيك"
اهلا مرحب .. ايوه اتفضل" نادانى
مشيتلو.. مصدق وما مصدق
سلمت بقلبى واحضانى
وشعرت كأنه بيعرفنى
شعرت كأنه بيقرانى
راجل نكته عميق ومهذب
رائع جدا وانسانى
ولما جمعنى وشجعنى
سألتو بدهشة عن الحاصل
قاطعنى .. "بتعنى الاعدام؟
اعدامنا .. بتقصد اعدام؟
الموت لو شنقا حتى الموت
الموت .. لو رميا بالرصاص
ما هو الموت"
"الشعب يقرر من الحى والميت مين
الشعب يقرر مين الحى والميت مين
ونحن عمرنا القدام
الحزب .. اليقظة .. الاقدام
الحزب .. اليقظة .. الاقدام
الحزب .. اليقظة .. الاقدام"
وبسرعة انكسر الميدان بالناس
عشرات العشرات
أطفال .. عمال .. وطليعيين
وبنات طيبات
ومنشورات

Post: #48
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-05-2010, 09:43 PM
Parent: #47


=========
محجوب شريف
تلفـــــــــــون العـــــــــــالم حول

تلفون العالم حوِّل
إتنين وتلات أصفار
البرق هناك
مستني
والشمس على
استنفار
فلنزحف نحو
النور
لو ننحت بالأظفار
من حقنا نحلم
بي عالم
بي عالم
يتسالم
ضدَ التسليح
الخبز .. الحريات
المكننة
والتلقيح
لن نقبَل بالمعتاد
العكننة والتبريح
العدل بلا تمييز
الحظر على
البمبان
العطر مهب الريح
دوران الأرض
مراجيح
والشفع لؤلؤ منثور
سادين السكَّة
أناشيد
ما دين الدنيا
بساتين
ورداً..قمصان
وفساتين
والنهر بيعمل زقزاق
من خضرة وحفلة
ياسمين
ناساً جينا تم زيناتم
جنياتم خِلقة

وأخلاق
شبت حبت من لسَّعَ
في الخاطر شوق
وحنين في عيون
العُشاق...
كم مُدُناً طيَّ
الأشواق
حاراتا حتملا
الأسواق
وشوارع تجري
ملايين
لِسَّع في سنَن
الأقلام
أنفاس الناس القِدام
وخُطى الأقدام
في القرن الواحد
وعشرين
من خير الأرض
الممتد
تنعم أفواه
ومناقير
والحبّه ظلال
وعصافير
والخطوة بتبقى
جماهير
والهمسة بتبقى
هتافات
تتفكك لعب
أطفال
وأسرّة وإسعافات
آفات
فتكت بالسلم
جنازير
وتقرب بينَّا
مسافات
كنا بنمشيها
محاذير
وتفرهد ياما
ثقافات
تتنفس حق
التعبير
لا رجعة لظلمٍ
قد فات
تلقوه هناكَ
ملفات
فى ركن القرن

العشرين
إلقاء القبض على
الخوف
الخلا النسمة
أعاصير
والشجر الأخضر
أوتاد..
من حَقنا إننا نحلم
لن نقبل بالمعتاد
نتماسك أيدي
ونرتاد
القرن الواحد
وعشرين
شُبَّاكاً جنب
الشُباك
آفاقاً ذاتَ مصابيح
تلفون العالم حول

لا شك االرقم

!! صحيح

-------------------
شكرا ناصر المحسي علي مرورك الكريم.

Post: #49
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-11-2010, 01:00 AM
Parent: #48



لقطة تجمع محجوب شريف و فنان الملايين العملاق وردي.

Post: #50
Title: Re: من أقـوال شاعر الشعب.................. ( محجوب شريف )
Author: بكرى ابوبكر
Date: 11-11-2010, 01:14 AM
Parent: #49

زمام المبادرة - محجوب شريف

Post: #51
Title: Re: من أقـوال شاعر الشعب.................. ( محجوب شريف )
Author: بكرى ابوبكر
Date: 11-11-2010, 01:22 AM
Parent: #50

ميري زكرينا عشة كليمينا
امسية شعرية في ضيافة
محجوب شريف


Post: #52
Title: Re: من أقـوال شاعر الشعب.................. ( محجوب شريف )
Author: بكرى ابوبكر
Date: 11-11-2010, 01:24 AM
Parent: #51

محجوب شريف "ارضا سلاح


Post: #53
Title: Re: من أقـوال شاعر الشعب.................. ( محجوب شريف )
Author: بكرى ابوبكر
Date: 11-11-2010, 01:25 AM
Parent: #52


Post: #54
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 11-11-2010, 01:47 AM
Parent: #44



محجوب شريف في رثاء صديقه المرحوم/ (عبد الجليل كرار).

لاقــيته ناير مــبتسم

ترى الرجل النحيل عود الذرة
قد تزدريه وما ازدرى
كل القناديل المشتتة في مساحات القرى
منُّو بتشيل يا مقدرة
هذا الجميل عبد الجليل
الهيبة في هندامو نور
ومنار ونار
بتدفي ما بتعمل حريق
بتضوِّي بتسوِّي الضرا
شمس المعارف والبذور
قرب الثريا من الثرى
رفرف كما العلم البهيج
فوق الذرى
ماسك زمام المستحيل
أحلامه خطوة إلى الأمام
مع التفاتة إلى الورى
علَّم قرأ
سنَّ وبرأ
ثم انبرى
قلمه المكَنْدكْ بالصهيل
لاقيته ناير مبتسم
قط ما أحتكرت اللحظة ديك
واقف هناك ومنتظر مهر الرحيل
زي وردة في كُم الصباح
ونجمة في الصمت الكحيل
هي تكية بس يا محترم
زيك بعيش في كل جيل

Post: #55
Title: Re: من أقـوال شاعر الشعب.................. ( محجوب شريف )
Author: تبارك شيخ الدين جبريل
Date: 12-26-2010, 04:49 AM
Parent: #54

البوست دا اتعمل اثناء وجودى فى السودان ...

وهو كلاكيت تانى مرّة لى بوست انا كتبت فيهو "تاجر الشعب" بدلاً عن "شاعر الشعب" ... وحصلت "دغمسة" شديدة بى سبب التعليق ...








... المهم ...

Post: #56
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 01-31-2011, 10:31 PM
Parent: #1

(مرت الأشجار) قصيده جديدة
لمحجوب شريف

مرت الأشجار
كالخيال أحلام
ناس لطاف وظراف
مابين غزال وزراف
مابين ظلال وغمام
مرت الأشجار

طابق طبق طابقين
في ضلهن كرتون
حر والسقط أولاد
تحت المطر ياجون
لاعندكم عداد
ولابوهيتك كم لون
ما احتجت لي حداد
يوما ولا نجار
وكنت ألطف جار
ومرت الاشجار
الباقي تحت العين
حيث الرماد أحجار

من يوما داك فاقداك
كل الدروب فوق راي
ياخيت وهيت ياكيت
حس المقص بكاي
سكسك سنون براق
نار الفراق جواي
أمونه ست الشاي
صمت الكبابي عويل
برادا ساكت ساي
ياحليل تريزا قريب
كانونا كان بي جاي
ياحليل جناها جناي
هم يسألون وعيون
تحزن تقول باي باي
يامنتهي الأشواق
اتمحن الكنتين
والنيمه ذات الساق
القدره كم تشتاق
كم كمشه مويه فول
سمسم عمل زقزاق
وين الملامح ديك
يازحمه البصات واللفه والدقداق
ليل القهاوي حزين
عدد الكراسي فراق
جفت عروق السوق
ريق الطريق العام
واتحتت الأوراق
--------
وين ياسواد العين
مشهد علي صعبان
شبان وهم حبان
تحت النجوم الفوق
في عتمة الميدان
الشوق بلا بيبان
من وين ذهاب واياب
وكلاهما تعبان
ابنوسة اللاوو
ياحليلا غصن البان
جمر الحصي الوقاد
علا الكتف أركان
ميري الفراق بي طال
وسال سيل الدمع هطال
لكنو مهما كان
لو بالوسم سكان
لو بالرسم جيران
متين بقيت يانيل
عددا من الخيران
نتدفي بس أو قول
نعزم بعض يوم داك
بنولع النيران

29 يناير 2011




---------------------------
الاخ تبارك شاكر لك مرورك.

Post: #57
Title: Re: من أقـوال شاعر الشعب.................. ( محجوب شريف )
Author: احمد محمد بشير
Date: 04-11-2012, 02:31 PM
Parent: #1


الاقتباس ادناه كتبه الطيب مصطفى, خال عمر البشير!




رّد محجوب شريف:-

تنبش حي وميت
سكاكينك تسنها بالكراهية
معلم تنتج الكربة
وتدي الفتنة ماهية
تدس في إيدا كبريتة
بخيت وسعيد عليك إنك
مكانك من ذوي القربى
وعندك من كراسي السلطة
مسند للرفاهية
مالك ومال قريبك ساكن التربة؟؟

منو البسرق عشم ميت
أمام الله والحكمة الإلهية؟؟

يمين الله
كاتب حر

نسيج وحده
ومن طبعو الفروسية
وأصدق من ملامح طفلة
وسط اللمة منسية
عصافير الكلام ركت
تحت شهقة غنا الفواح
مع الموجة الصباحية

أدى الود
وشال الود

وجمّل للحزن ممشى
لا كذّب ولا غشّ
وما منو الضمير طشّ
وما شنّق
بريق الشهرة من فوق راسو طاقية
أبسط من حرف كسرة
ومن بذرة
ومن نقاع سبيل يوماتي
تشرب منو تحت النيمة قمرية
كذلك لم يكن يوماً
هوين قابلاً للكسر والذلة

أما العبد لله
إذا ما عارف أعرفني
من غير الله ما خايف
ولا شايف هنالك
من يهد حيل الثبات فيني ويخوفني
فما خجلان ولا نادم
وما متوجس الإحساس من القادم
لا طعّان ولا لعّان
ولا فاحش ولاني بذئ
ولا نسناس
وما بجرح مشاعر الناس
وأنبل من حليب السترة
ما عبّت مشارب كاس
أدوسا محاكم التفتيش
بأعلى الصوت علانية
تخربش في مسام الروح
وتتجسس علي النية

بسوء الظن والمكرِ
ضميري لم يكن يوماً
من الأيام ولد مكري
شبر والله في البكري
ولا الفلل الرئاسية

وطن حدادي مدادي
ما بنبنيهو فرادي
ولا بالضجة في الرادي
ولا الخطب الحماسية
وطن حدادي مدادي
قد شفناهو يتقسم
ذبائح وإنت تتبسم
لديك الخضرة تتفحم
وتصبح في الأيادي عصي
وأوتاداً بلا خيمة
وصحراءً بلا غيمة
سلاماً يا وطن بحلم
أشوفك يا وطن آمن
حر وسعيد ومتفتح
محل ما يمشي إنسانك
عزيز النفس مطامن
ومتضامن
والخير الظاهر والكامن
في الأيدي جميعاً قدامن
تعيش إنت ونموت نحن
لكي يا غالي ما يكبر جنانا
تحت شرا المحنة
جرحنا إذا بفرهد فيك
ح نمشي علي البجرحنا
وحزننا لو يضوي سماكا
هو الحزن البفرحنا
ودمنا لما يسقي ثراكا
ينزل من جوانحنا
وإن راحتنا ما ترتاح
نقول إنشاءالله ما ارتحنا
تضيع أيامنا بس ما تضيع
ملامحك من ملامحنا
بنرجع ليك توصينا
ونسمع ليك تحدثنا
ولو علّينا صوتنا عليك
يا والدنا سامحنا

تنبش حي وميت
سكاكينك تسنها بالكراهية
معلم تنتج الكربة
وتدي الفتنة ماهية
تدس في إيدا كبريتة
بخيت وسعيد عليك إنك
مكانك من ذوي القربى
وعندك من كراسي السلطة
مسند للرفاهية
مالك ومال قريبك ساكن التربة؟؟
منو البسرق عشم ميت
أمام الله والحكمة الإلهية؟؟
يمين الله
كاتب حر
نسيج وحده
ومن طبعو الفروسية
وأصدق من ملامح طفلة
وسط اللمة منسية
عصافير الكلام ركت
تحت شهقة غنا الفواح
مع الموجة الصباحية
أدى الود
وشال الود
وجمّل للحزن ممشى
لا كذّب ولا غشّ
وما منو الضمير طشّ
وما شنّق
بريق الشهرة من فوق راسو طاقية
أبسط من حرف كسرة
ومن بذرة
ومن نقاع سبيل يوماتي
تشرب منو تحت النيمة قمرية
كذلك لم يكن يوماً
هوين قابلاً للكسر والذلة