يعني شنو دومقراتية يا (Miss)

يعني شنو دومقراتية يا (Miss)


12-05-2006, 04:34 AM


  » http://sudaneseonline.com/cgi-bin/sdb/2bb.cgi?seq=msg&board=324&msg=1201116652&rn=0


Post: #1
Title: يعني شنو دومقراتية يا (Miss)
Author: ريهان الريح الشاذلي
Date: 12-05-2006, 04:34 AM

كنت في غمرة درس المربعات الفاضية في الجمع والطرح ( من صعوبة فهمه مشابه لمشكلة الشرق الاوسط ) والحصة شغالة والطباشير مالي يديني وهدومي واكاد اقطع شعري من عدم فهمهم للموضوع اعلاه فاذا باحدهم يرفع يده ويقول: يا مييييييييس (miss) انا برداااااااان ،، جدعت الطبشيرة وقلت ليهو حاضر حاقفل المكيف ولمن قربت للمكيف فاذا بواحد تاني يرفع يده ويقول يا مييييييييييييييييييس انا حراااااااااااااان .... ؟؟؟؟؟؟؟؟؟؟؟؟؟؟؟

اتحيرت وما عرفت اسوي شنو قلت خلاص نخلي المربعات ليوم تاني وقلت ليهم خلاص تعالو نعمل حاجة حلوة اسمها ديمقراطية ، قعدت زي 10 دقايق اقول الاسم ويرددوه وراي بصوت عالي (_دمقراتية –دومقراطية-دمراطية) حتي نطقوه سليما قلت ليهم الديمقراطية يعني لو ناس عاوزين يعملو حاجة وناس ما عاوزين يعملوها نسمع كلام الناس الكتار ونصفق للناس الشوية (طبعا شرحي اتقطع زي 13 مرة باسئلة من نوع الناس ديل منو يا مس ؟ والحاجة الدايرين يعملوها شنو يا مس ؟ ونصفق ليهم ليه ؟)

اها نحن حسة في موضوع المكيف ده حنعمل ديمقراطية يعني انا حاقسم السبورة لنصين نص للناس الدايرين يفتحو المكيف ونص تاني للدايرين يقفلوه ونشوف الاكتر منو ونعمل بكلامهم .

الجماعة صفقو وهاجو وعجبتهم اللعبة قلت ليهم خلاص نبداء اها الداير نفتح المكيف يرفع يدو فاذا بالفصل كلو يرفع يدو حتي البرداااااان داك فهمت ليك انو الجماعة قايلينها فلاحة قلت ليهم تعالو نبداء من جديد المرة دي قلت ليهم الداير نقفل المكيف يرفع يدو فاذا بالفصل مرة تانية كلو يرفع يدو اها قلت ليهم يا جماعة الحكاية كده غلط كل زول يكون عندو رأي واحد اها الداير المكيف يتفتح يرفع يدو رفع لي مجموعة عديتهم وكتبت عددهم في السبورة اها قلت ليهم الداير المكيف يتقفل يرفع يدو عديتهم وكتبت العدد (علي الرغم من وجودعدد رافع يدو في الحالتين وعلي الرغم من وجود واحدين نعسو وما شغالين بالحصة تماما) انتهت الديمقراطية بتحكيم رأي الاكتر والجماعة الخسرو حمبكو والعيون رقرقت وصفقنا ليهم وكده .

اها تاني يوم وانا شغالة الحصة اذا بواحد يرفع يدو يا ميييييس انا بردان نعمل ديمقراطية

Post: #2
Title: Re: يعني شنو دومقراتية يا (Miss)
Author: saif massad ali
Date: 12-05-2006, 04:41 AM
Parent: #1

انا فضلك انا فضلك


ممكن تشرحي لي المرجعيات يعني شتو

Post: #3
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-05-2006, 04:50 AM
Parent: #2

ازيك يا سيف

ياخي دي حكاية نقاء وطفولة بريئة واحلام وامال عظيمة لم تشوبها الطائفية وسيدي وسيدك فمالك علينا( بذكر المرجعيات التي بها تتخلع القلووب)

Post: #4
Title: Re: يعني شنو دومقراتية يا (Miss)
Author: عبد المنعم سليمان
Date: 12-05-2006, 05:02 AM
Parent: #1

الاستاذه ازييييك

ممكن ما تشرحي لي سيف المرجعيات !!

يا miss والله i miss you

تحياتي

منعم

Post: #5
Title: Re: يعني شنو دومقراتية يا (Miss)
Author: Emad Abdulla
Date: 12-05-2006, 05:13 AM
Parent: #4

Quote: علي الرغم من وجودعدد رافع يدو في الحالتين وعلي الرغم من وجود واحدين نعسو

Post: #6
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-05-2006, 05:24 AM
Parent: #5

الشقيق عبدالمنعم سليمان سلامات ياخي

يبدو انك مصر علي ارجاعنا لقصة المرجعيات .......

للضمان كده مرجعيات جاية من رجع ..يرجع فهو راجع للخلف شدييييييييييييييد...


الشقيق عماد عبدالله شكرا للمرور وعليك الله ما بالغو معانا الشفع ديل

Post: #7
Title: Re: يعني شنو دومقراتية يا (Miss)
Author: Kamal Mahjoob
Date: 12-05-2006, 05:29 AM
Parent: #1

ياااااااااامييييييييس ، عثمان ود الفكي (الله يرحمه) صاحب الدكان في حلتنا كان بصلي بالناس ،وكان أصغرهم سناً إذ يبلغ من العمر فقط بضع وستون سنة. آدم ود النعيم (الله يرحمه) كان من أول من يحضر للصلاة لزوم فرش البرش ... الضو ود أحمد (الله يرحمه) كان بجيب أخبار ناس الحلة من مغيب الشمس حتى مطلع الفجر... الجماعة كلهم قالوا الضو دة تاني ما يصلي معانا لأنو لسانو فالت .. اعترض بعضهم .. وتعالت الأصوات .. جاء شيخ ابراهيم (الله يرحمه) فسكت الناس جميعاً ... سأل أقربهم اليه ولما حكى له ذلك قال لهم : الضو يصلي وين ما يعجبو ... صمت الجميع وبعد برهة صاحو بصوت واحد: الضو يصلي بكان ما داير ... لقد كانت سلطة شيخ ابراهيم أطول من أطول عكاز لأي واحد فيهم...
علمي أولادك ديل الدبموقراطيةالهم عايزنها لأنهم فقدوا القدوة في ذلك
أنا شخصيا راح لي الدرب والله بقيت ما عارف ديمقراطية من بيروقراطية من بيزنطية من ارستقراطية ، ويا قسيم الريد تعال لي وتعال

Post: #8
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-05-2006, 05:54 AM
Parent: #7

الشقيق الاستاذ/كمال محجوب تحية طيبة
والله المراحيم ناسك ديل شكلو الضو ده جننهم عديل
Quote: علمي أولادك ديل الدبموقراطيةالهم عايزنها لأنهم فقدوا القدوة في ذلك
أنا شخصيا راح لي الدرب والله بقيت ما عارف ديمقراطية من بيروقراطية من بيزنطية من ارستقراطية ، ويا قسيم الريد تعال لي وتعال


اكيد قسيم الريد جاي حاملا ديمقراطية ..........

Post: #9
Title: Re: يعني شنو دومقراتية يا (Miss)
Author: عبد المنعم سليمان
Date: 12-05-2006, 06:09 AM
Parent: #1

ريهان ازيييك

انا غايتو مع ناس المكيف اصله الحر كتلني في البلد الجهنم دي !!


شوته :

ناس المكيف ديل معانا ولا مع الخيانه


تحياتي

منعم

Post: #10
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-05-2006, 06:40 AM
Parent: #9

والله يا عبدالمنعم الاكيد انو الرفعو مع البردانيين ديل واحدين بتكون الحر كاتلاهم لكن الواحد بعاين لاصحابو وبشوفهم رافعين وين

Post: #11
Title: Re: يعني شنو دومقراتية يا (Miss)
Author: أحمد الشايقي
Date: 12-05-2006, 09:04 AM
Parent: #1

Quote: انا فضلك انا فضلك


ممكن تشرحي لي المرجعيات يعني شتو




يا ميـس بيني وبين الشقيق سيف مفروض تعملي ديمقراتيـة , قبل ما تبدي تشرحي المرجعيات والرجوع للخلف وما شابه ذلك....

العايز نجاوب على سؤال سيف مين؟ وال ما عايز مين ......


حلوة مش كدا؟

تحياتي

أحمـد الشايقي,

Post: #12
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-06-2006, 02:46 AM
Parent: #11

الشقيق احمد الشايقي خالص التحايا والتجلة

Quote: حلوة مش كدا؟


حلوة شديد

لكن للضمان كده انا رافعة يدي مع ناس الاجابة علي السؤال

Post: #13
Title: Re: يعني شنو دومقراتية يا (Miss)
Author: Yassir Tayfour
Date: 12-06-2006, 03:40 AM
Parent: #12

الشقيقة من جناح الأربعة ريهان
والشقيق من جناح نفسو سيف

إزيكو يا متمردين
جيتكم داخل عسى ولعل نكسر حاجز الهاجس البينا وبينكم
الخلى ريهان وسيف يشدو من أزر كودى عشان يعرى شقيق
ما مهم كتير
المهم فى الحتة دى الأطفال الفهمتيهم الديمقراطية بمفهوم أجنحتكم
يا حر..
يا برد..
النتيجة ح تكون شنو؟؟؟
أكيد جناحين أقصد فصلين
فصل للناس البردانة
وفصل للناس الحرانة
however,
لو كانت الأفكار (مرجعاتية)،
كان أطفالنا عرفوا الديمقراطية بصورة أحسن
بوضع المكيف فى درجة حرارة وسطى ما بينهما


_____
أخشى عليكم من الضبع، يا أشقائى الشوارد

التوقيع:
شقيقكم(غصباًعنكم) ولكن فى درجة حرارة مُثْلى

Post: #14
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-06-2006, 04:04 AM
Parent: #13

ا
Quote: لتوقيع:
شقيقكم(غصباًعنكم) ولكن فى درجة حرارة مُثْلى

يا زول هووي والله شقيقنا بارادتنا عديييييييييييييييييييل لكن في درجة حرارة تحت الصفر....

الشقيق ياسر سلامات وعوافي وشكرا للمرورالساخر لكن طيب يا شقيق لو قلت ليك انو المكيف كان في low cool حتقول شنو؟؟؟؟؟؟

ببقي قدامي يا اوديهو high cool وبالتالي اكون كتلتهم كتل او اقفلو واكون كتلت الحرانين كتل ..

Quote: لو كانت الأفكار (مرجعاتية)،
كان أطفالنا عرفوا الديمقراطية بصورة أحسن
بوضع المكيف فى درجة حرارة وسطى ما بينهما


غايتو الله لا يوري الاطفال الافكار المرجعاتية والا حنكون حكمنا عليهم بالف عام من العزلة ثانية ...


ملحوظة:-
Quote: إزيكو يا متمردين
جيتكم داخل عسى ولعل نكسر حاجز الهاجس البينا وبينكم
الخلى ريهان وسيف يشدو من أزر كودى عشان يعرى شقيق


لا حولا ياربي هاجسكم تجاهي كان اني مالي؟ اكييييييييد ما قاصدين انو هاجس امني ........

Post: #15
Title: Re: يعني شنو دومقراتية يا (Miss)
Author: أحمد الشايقي
Date: 12-06-2006, 12:25 PM
Parent: #1

Quote: however,
لو كانت الأفكار (مرجعاتية)،
كان أطفالنا عرفوا الديمقراطية بصورة أحسن
بوضع المكيف فى درجة حرارة وسطى ما بينهما




أشقاء زي العسـل والله,

أكيد يا شقيق ياسـر أكيـد,

ربي ما تحرم بيت من المرجعيات.....



أحمــد

Post: #16
Title: Re: يعني شنو دومقراتية يا (Miss)
Author: عبدالعظيم عثمان
Date: 12-06-2006, 03:07 PM
Parent: #1

الشقيقه ريهان تحيات مركبه وكسر عشري
برلمانك شايفو عامر
تحياتي للاشقاء من عمادبانقا لاصغر هيئجي
ولو ممكن تلفون الرفيع وائل عمر بالمسنجر
عبد العظيم

Post: #17
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-07-2006, 04:00 AM
Parent: #16

Quote: ربي ما تحرم بيت من المرجعيات.....

الشقيق الرفيع احمد الشايقي

سلامات ياخي
لكن عليك الله مالك علي الاجيال البريئة دي ؟ والله عشمي كبير في انو السودان سيصبح اجمل بأيدي هؤلاء الجميلين لكن بدعواتكم دي حترجعونا لوراء شديد.

Post: #18
Title: Re: يعني شنو دومقراتية يا (Miss)
Author: عبدالكريم الامين احمد
Date: 12-07-2006, 04:13 AM
Parent: #17

انا ذاتي يا ابله ريهان بردان و داير ديمقراطية تلم الاشقاء
ممكن نحلم بنيفاشا الاشقاء ...طبعا اكيد سيف مساعد ح ينط لينا
ويعمل ليكم فيها (بونا ملوال)...
ياريت تكون هناك نيفاشا لكل الاجنحة في الاحزاب السودانية حتي
نستعد للتجربة الديمقراطية بقلب واحد....
تخريمة
مادام نيفاشا ديك باظت ليه ما نسوي نيفاشا الاحزاب

Post: #19
Title: Re: يعني شنو دومقراتية يا (Miss)
Author: gamal elsadig
Date: 12-07-2006, 04:30 AM
Parent: #17

.
..
Quote: قلت ليهم الديمقراطية يعني لو ناس عاوزين يعملو حاجة وناس ما عاوزين يعملوها نسمع كلام الناس الكتار ونصفق للناس الشوية
.


اها نحن سمعنا كلام الناس (الكتار) .....
والصفقة الشديدة ليكم ياشقيقة

........
لكم محبتي جميعا يا اشقائي



.

Post: #20
Title: Re: يعني شنو دومقراتية يا (Miss)
Author: أحمد الشايقي
Date: 12-07-2006, 05:02 AM
Parent: #1

Quote: اها نحن سمعنا كلام الناس (الكتار) .....



الشقيقة العزيزة ريهان,

ناس (المرجعيات) أكـيـد أكتـــر ,

ليه ما تسمعوا كلامهـــم ؟؟؟





أحمـد الشايقي

Post: #21
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-07-2006, 05:51 AM
Parent: #20

الشقيق عبدالعظيم سلامات ياخي وشايفاك ماري بالطريق الشاقي البرلمان ..
رسلت ليك النمرة ...

Post: #22
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-07-2006, 06:26 AM
Parent: #21

Quote: تخريمة
مادام نيفاشا ديك باظت ليه ما نسوي نيفاشا الاحزاب


اووووو الباشمهندس كريم عضو الجاليةالسودانية بقطر (التعريف لزوم المنجهة )

يا كريم لو المشكلة خلاف تنظيمي نعمل ديمقراطية الحر والبرد لكن الازمة في الخلاف الفكري وده داير ديمقراطية عواصف وسيول .........


الشقيق الرفيع جمال سلامات ياخي وتحايا الاحترام
Quote: اها نحن سمعنا كلام الناس (الكتار) .....
والصفقة الشديدة ليكم ياشقيقة


صفقة الديمقراطية صفقتين صفقة للفائز كتهنئة وصفقة للمهزوم كتعزية ...لذا شكرا جزيلا للتهنئة يا شقيق وعقبال ما يصفقو ليك معانا......

Quote: ناس (المرجعيات) أكـيـد أكتـــر

الشقيق احمد انت قايل الكترة لسة بتغلب الشجاعة ؟؟؟ صحي مرجعي.......
الغريبة ناس الهيئة العامةلمن قررو حسم جدلية المرغني والبراق كانو ربع عددهم الحسة وما خافو من القلة لادراكهم التام ان ادمان الجلوس داخل احزاب الناس الكتااار بدون وعي هو تأزيم للازمة الوطنية زيادة علي ازمتها ...
تخريمة قوية (متاصلة):
ما سمعت ب (كم من فئة قليلة...)

Post: #23
Title: Re: يعني شنو دومقراتية يا (Miss)
Author: ريهان الريح الشاذلي
Date: 12-07-2006, 06:47 AM
Parent: #22

اللذيذ يا جماعة في روضة تابعه للمدرسة الكنت شغالة فيها مرة حضرت الطابور معاهم (مدمنة طوابير) الجماعة واقفين الطابور شغال وواحدة من الشفع بتغني في غنية (انا بدري صحيت من نومي ) فجاة لقيت واحد بتمايل افتكرتو برقص مشيت جنبو لقيتو برة الشبكة تماما و
اتاريهو نايم (بدقس) ؟؟؟؟

طواالي اتذكرت الجماعة في الجمعية التاسيسية ........