ودعمسيب احد شخصيات امدرمان

غفلنا من البورد يومين لقيناهو شكل اكتر من زمان. حتي الناس الوقفوهم رجعوا اعنف من زمان . و شئ جديد غير معروف بالنسبه لنا و هو مشاتمة الحروم . الحصل شنو؟ ديل اخواتنا و بناتنا مفروض ندافع عنهم و نحميهم . الرجال بشكروهم باخو البنات . يطرشني ما سمعته بزول شكروهو قالوا شتام البنات .
اتذكرته اخونا الفاضل اب احمد احد ظرفاء امدرمان و صاحب الفرن في حي الرباطاب . و في الشارع الموازي لشارع العرضه ، اب احمد خلي اتنين من الفرانيه في الفرن . و الفراني نسبه للسخانه بكون عريان و بلبس قرقاب بتاع خيش ببلوا بالمويه .
و تشاجر الفرانيه ( و تطالعا ) و ارتدوا ثيابهم لحسم المعركه خارج الفرن . فقابلهم ودعمسيب ( اب احمد ) علي الباب فاصلح بينهم و طيب خاطرهم و قال ضاحكا ( اخليكم عرايا و عاقلين ، اجي القاكم لابسين و مجانين ) .
اهو ده حال البورد الليله . مالكم يا جماعه ، ادوكم عين ؟ . المفروض لمن زول يكتب في البورد موضوع جميل و تكثر حواليه التعليقات ، انته تفرح لانه ده ودبوردك و زميلك ( ود كارك ) و مافي لزوم للحساده و محاولة تكسير الاخرين .و لنواصل عن ودعمسيب الذي ذكرته في كتاب حكاوي امدرمان و في مواضيع نشرها حسن الجزولي عندما كان يحرر جريدة الفجر في لندن .
الاخ اللواء سجون و ابن امدرمان الاصيل بشير مالك بشير صدم في بداية حكم الانقاذ عندما وجد اب احمد في السجن و بالسؤال ( مالك ؟ ) قال اب احمد ساخرا ( بتهمة تخريب الاقتصاد الوطني ) .
الفاضل كان يصنع خبز خاص بمواصفات خاصه ، المعروف بالشمسي و الذي تغطي الرده بطنه . و لا يتقيد بمواصفات الدوله لبعض الزبائن . محمد البدري عكاشه كان يحضر من اخر الثوره يوميا لان والده لا ياكل اي خبز سوي عيش ود احمد و كذلك كثير من اهل امدرمان .
اب احمد كان كما يقال سجارته حاره و عيشه حار و حلته حاره . و في فرنه يجتمع كل الناس . رجال مايو تحركوا الي خورعمر من فرن اب احمد و بعد مده من الانقلاب قال لهم معاتبا ( يعني تاكلوا حلتي و تمشوا تعملوا انقلاب اسمع بيه زي الغريب من الناس ؟ ) .
في المساء كان اب احمد يقود السياره الي منزله . و هو يحفظ الشارع و الطرق واحد من الفرن الي منزله شمال شرق جامعة الاحفاد . و في احد الايام كان العيار زائد فركز علي خطر العربيه التي امامه حتي لا يحيد عن الشارع . و فجأه تقف العربه و يصدم اب احمد العربه من الخلف و ينزل قائلا ( عالم قش ، تلف و ما تأشر و واقف فجأه ، واقف مالك ؟ ) فقال السائق ( ما اقيف كيف ؟ انا جوه قراشي ) .
كان لاب احمد مقدره عظيمه في مصالحة الناس و تطييب خاطرهم و يبدو اننا نحتاج له في هذا البورد . ففي احدي الامسيات و في منزل اب احمد نقص الصنف و تقرر ان اذهب مع قط لاحضار وزنه او تعريفه و تعرف بتعريفه لانها وزن التعريفه القديمه و تباع بخمسه و عشرين قرش و تعني سبعه سجارات و حرباشه . و الحرباشه اقل من سجاره او سجارة زول واحد او ( اصطباحيه ) .
قط كان قوي البنيه قصير القامه يعمل كحداد و مكانيكي له قبضه ضخمه لا تسمح له بان يلف السيجاره مما يجعله يعتمد علي و علي الاخرين و انا كنت الف و لا ادخن . و في الطريق بالقرب من زقاق المنفله غرب سوق الحداحيد ، القي قط التحيه علي ناس يقفون في الطريق . و بعد ان تعديناهم اغلظت له القول لان الانسان في الليل حسب شرع امدرمان لا يسلم علي الناس . و كاد الامر ان يصل الي معركه بيني و بينه .
عندما رجعنا الي منزل اب احمد لاحظ ( صرة الوش ) و افتي بان في الليل الزول ما بسلم . معناها خايف و بتمحلس للناس و طيب خاطر قط لان الغلط لا بد بانه مصطول او ما عارف . و لم اختلف مع قط بعدها .
علي ابن علي من اليمنيين الذين اتوا للسودان قديما مثل العم قايد في الهاشماب و العم ناصر الصياد صاحب المتجر و الفرن في مكي ود عروسه . و عندما استلم السلال السلطه في اليمن و الاطاحه بالامام البكر صار ناصر الصياد سفيرا لفتره .
لعي بن علي عدة متاجر احدهم جنوب قبة الشيخ دفع الله و اخر ضخم في الناصيه في حي الامراء و له منزل جنوب الدكان و كان متزوج من سودانيه اسمها حنان و له منها عدة اطفال . و هذا المتجر يديره احمد و يمني اخر نحيف عرفه اهالي الحي باسم زغلول لان احد مصاطيل العباسيه عندما لم يسلفه زغلول قال له ( امشي كده ، عامل زي سعد زغلول ) و صار اسمه .
في احد المرات عندما حضر اب احمد مارا بدراجته في سنة 1961 ناداه زغلول و عرض عليه رغيفه مقطوعه الي نصفين و دباره تربط النصفين فقال اب احمد بلا مبالاه ( شنو يعني ؟ رغيفه بي قرش عاوز شنو ، سلسل دهب ؟ ) .
يا جماعه فكروا في الناس الحلوين زي ناس اب احمد . انسان شخصيه في السلطه لينا الحق ننتقده لكن شخص عادي حياته الخاصه بتاعته هو .
شوقي

عبدالكريم بدري ...بيبقي ليك شنو... كان في السودان ساكن المقرن... وهسي من سكان الرياض... اها ودي الوقت بره السودان شغال في الرياض ... فهمته حاجه... قال امدرمان قال ... ولك مني مساحات من التقدير علي موضوعك اللطيف لزوم تلطيف الجو... ودمته امدرماني اصيل

الابن وليم
هنالك عبدالكريم محمد بدري و هذا ابن عمي وكان يسكن في المقرن . هنالك عبدالكريم اخر يعمل في السعوديه كذلك و هو عبدالكريم كمال بدري و هذا ابن اخي .و لك التحيه
شوقي