خيول اب شام جقلبن شايلات تقيل سافرن

هذا مقطع من مدحة المادح ود العجيل لابونا الشيخ الطيب علي المرين

والحديث عن الشيوخ يحلو ويطول .

كثيرا منا لا يعتقدفي كرامات الشيوخ رغم وجود الكثيرين من المريدين والمحبين

وشيوخنا سرهم باتع بعضهم يعطي ( الولد ) بامر الله وبعضهم يعالج مستعصي الامراض

وبعضهم مستجاب الدعوة في صلاة الاستسقاء وبعضهم يحوي لدغة الثعبان والعقرب

كثيرين منهم في اعماق السودانيين

ابوي الشيخ الكباشي رضي الله عنه ( بيعطي سر الله من بطن قللو)

ابوي ود المرين اداب الفيلة

ابوي تورمني الطيار راجل ام بشار

ابوي الشيخ العليش القلب القطن عيش

سيدي حسن ود حسونة راجل بقارة

ابوي الشيخ يوسف ابو شراء

ابوي الشيخ الجيلي راجل طابت

ابوي العابد الذاكر الشيخ عبد الرحيم البرعي

والشريف بركات وطه ابو التومات

هل تعتقدفي كرامات الشيوخ

الحقونا وافزعونا

Quote: الحقونا وافزعونا

سلام ياخلي
اذن هو حديث الطبقات
واولياء الله الذين لاخوف عليهم ولا هم يحزنون
انا شخصيا اومن تماما وليس من شاف كمن سمع...
وابداء ليك من اخر القصص الطازجة..
اثناء اجازتي الاخيرة في السودان وباحدي المدن حصلت قصة غريبة وعجيبة
وكنت شاهد عيان بل احدي اطرافها وبجيك يا خلي برواقة وبحكيها ليك هنا
وبعد داك نحكم..

Quote: واولياء الله الذين لاخوف عليهم ولا هم يحزنون انا شخصيا اومن تماما وليس من شاف كمن سمع

كيكى يالك من دجال
صحيح تربية ودالبدوى
بهناك بتشجع فى الفريق الحارسه دينق (سودان جديد)
وبهنا برضوا كمان داخل مع المريدين والدراويش
وكمان مع ناس اوزون وجكسايات بورداب البندر
غايتو ياكيكى مايتخاف عليك ابدا

ابوالقوق كيفنك
حصل شنو فى بوستك حق حب المراة المتزوجة؟

Quote: كيكى يالك من دجال صحيح تربية ودالبدوى بهناك بتشجع فى الفريق الحارسه دينق (سودان جديد) وبهنا برضوا كمان داخل مع المريدين والدراويش وكمان مع ناس اوزون وجكسايات بورداب البندر غايتو ياكيكى مايتخاف عليك ابدا

اولا وين محمد بدوي بانقا ده
انا لو مشتاق لزول من ناس هندسة الدجالين ديلك بكون مشتاق لود البدوي ده
فهو شيخي الذي علمني السحر (ياخ بالجد رسل لي تلفونه)...
وكلامك الفوق ده ممكن تضيف ليهو
اني امست دقيت نقارة للهلال ..ومعاهو اسيك كمان لو ما عجبك
وحسي قاعد اتكلم عن مشروع الكناف غمتوا الكيزان ولحقوا غنم زهرة
.....
خليل حاذق وبقي ملهم الزول ده يا احمد تجاني في اخر عمرو ده
ودائما قاعد يحلق لينا في مدارات موغلة في الدهشة (موغلة دي هدية ليك)...
وكدي خلينا في موضوع الشيوخ ما نقوم نتسخت ساكت

كيكى ود البدوى دة خليك من معرفة
دربه بوين الزول دة لو سمع بيك متجدع كدة
فى الدوحة دى بجيك بيخرتك وبرجعك السودان كدارى

احكى لينا عن السودان والزملاء ولاقيت منو
وبتوصينا نلاقى منو ونتجاوز منو
ح اكون فى السودان بعد اسبوعين

هلا احمد
لاقيت (طه النور اسحاق) بعد سنين طويلة
وكان لقاء سحاب
وطه حكاي ووناس ولسع ياهو (طه) ذااتو
واجمل الحكايات التي انصحك بان تسمعها هي
حكايته مع (صديق ) ابو اللكز لمن سافروا (تشاد والكاميرون)
تموت من الضحك وتكتشف انو طه بتكلم فرنساوي (دراب)
اول مرة اسمع لي فرنساوي (دراب) سمعتوا عند طه
لمن بحكي عن (حماموا) لصديق في احدي خيران (ياوندي)
طه لذيذ ياخي ومروق
وغير طه ده تاني يخربني لو لاقيت زول تاني عدا ابراهيم الحاج بتاع سفل

عارف ياخليل ..
ثقافة الرجل الصالح دي مدفونه في ترابنا ..
وربما تشير قصة سيدنا موسي في القرأن وتجربته مع الرجل الصالح لذلك ..
كتير فكرت في الحته دي ..
خاصة ما هو متداول بغزاره في بيئتنا السودانية عن نبي الله الخضر ، علي الرغم من
ضعف هذه الثقافة في بلاد المنبع كالسعودية ..

ياخليل ..

تحياتى .,..

موضوعك سمح بالحيل ...مع انو نحن مامتصوفه لكن
بنعتقد فى الكرامات دى ...والاعتقاد فى الكرامات
والخوارق جزء من المورث الثقافى السودانى ..ولو
رجعت لطبقات وضيف الله بتلقى انو الضرب دا مكون
اساسى للاعتقاد الدينى للمجتمع السودانى فى تلك الفترة
واتخايل القصة دى ليها علاقة بالموروث الكان سائد
قبل دخول الاسلام للسودان ..حيث ان السحر والكجور وغيرها
من الانماط الكانت سائدة قبل دخول الاسلام ..لذلك عندما
اسلم السودانيون ذهبوا يبحثون فى دينهم الجديدد عن
هذه الانماط ...مع الاختلاف طبعا فى المعنى بين الكرامة
والسحر ...والتصوف بايقاعاتو الحارة وطبوله اتى ايضا
كأمتداد ثقافى لما كان سائد ...فقد قيل ان المتصوفة
عندما دخلوا السودان وجدوا ان شعبه وكعادة الشعوب
الافريقية يحبون الطبل والايقاعات الصاخبة فلجاوا لاستخدام
الطبول والدفوف فى ذكر الله واستطاعوا ان يجذبوا اليهم
الناس بهذا الاسلوب

طبعا ياخليل الايام دى شيخى (ريكاردو) بالله فى كرامة اكتر من
العملا فى مباراة الترجى دى ..فقد هيثم مصطفى البانى عليهو
خطتو من اول المباراة ...دخل مساوى وغير طريقتو وحيرنا وحير
المعلقين ...تنجدنا ياريكاردو ...

ذكرت فى بوستك اعلاه الشريف بركات الشريف احمد طه ..اها ديل
ابواتنا ...وديل عينة فريدة من الشيوخ ..الشريف احمد طه كان
شيخ وامير مجاهد..باليل تسبيح وتهحد وقيام ..وبالنهار خيول
وحرب وجهاد ...ومن نسل الشريف احمد طه كان الشريف بركات
وكان الشريف عبدالله الشريف بركات (اب كريق ) وكان الشريف
احمد وكانت السيدة زينب وغيرهم ...كان لقيت زمن بجى بلحقك
بكراماتهم المتدوالة بين الناس ..

سلام ياخلى

Quote: خيول اب شام جقلبن شايلات تقيل سافرن

فوق الي حين حور خليل ابوشام الشايل تقيل
وجقلبن

هلا بكيكي واحمد التجاني ومحمدين

دروايش ولاقو مداح

في حضرة الشيخ الطيب علي المرين يحلو الحديث

اداب الفيل شيال التقيل

وقصة الفيل مشهورة جدا

حيث كانت لجدود الشيخ مزارع العيش في منظقة الاندرة وتم تحميل الجمال بالعيش لنقله لمنطة الهلالية لطلبة القران

وجات الافيال وخافت الجمال وهربت وسقط العيش من فوق ظهورها

فصدرت التعليمات واضحة للافيال بحمل العيش فوق ظهورها حتي منطقة الهلالية

فكان لقب ود اداب الفيلة

وقوم بالليل قول كب يا النيل زمنو قبيل قضبي ومانجل

يا سلام يا ياود اداب الفيلة يااخي...يمجدنا ويلحقنا..
والوكت خريف يا خليل وسيرة التماسيح التي افترست 3 من خيرة فتيان تلكم المدينة
المليئة بالعباد وساكني الخلاوي الغامضة وندر ان تراهم الا في مناسبات وجلسات خاصة
تتلو الذكر وسيرة المصطفي...
في اصيل ملبد بالغيوم سرت خبرية بان التماسيح قد هجمت علي الشاطي وبدات في الافتراس
وفي نو تايم وعلي شاطي ذلك النيل الازرق امتلات القيفة بهولا الدروايش الغامضييين
وعلت اصواتتهم...
مريييييييييومة لا
فطومممممممة لا...
اللاهووووووووووو اكبر...
فجاؤة اختفت التماسيح واختفي هولا الدرويش الي اوكارهم وخلواتهم العجيبة..
ونعود يا خليل اب شام

Quote: فجاؤة اختفت التماسيح واختفي هولا الدرويش الي اوكارهم وخلواتهم العجيبة.. ونعود يا خليل اب شام

نعم يا كرمة

للتماسيح حكايات مع شيوخنا في الشمالية وفي ولاية سنار

في انتظارك

الشيخ الطيب ود المرين

يعالج المجنون بمجرد نظرة وكانه يعطيه فاليوم او لارجكتيل او اي مضاد للكابة

وساحكي لكم قصة المريض الذي هرب وكسر القيد وسقط وغرق في النيل لاحقا

اصابت طيفور لوثة جنون واضطر اهله بالذهاب به للهلالية للشيخ الطيب للعلاج

واستمرت فترة علاج وكل المرضي يربطون بالقيد علي ايديهم وفجاة بدون مقدمات كسر طيفور

القيد وهرب من الخلوة وسقط في النيل الازرق وذهل خاله يونس الذي كان يمارضه

تجمع الحيران واخبروا الشيخ الطيب بان طيفور قد سقط في النيل


فقال لهم هذا الرجل امانة عندي وانا الامانة العندي ما بتضيع اذهبوا للنيل

وفجاة ظهر طيفور خارجا من النيل وقد ذكر بان الافيال اخرجته

نعم انهم ادابي الافيال

ركبوا خيول العزم وانا فوقهم بجرجر نظمي

ايام الاعياد تجتمع معظم القري في الهلالية عند الشيخ الطيب

واحتفالية جميلة ومديح وحلقة ذكر وجلاليب تثور وتدور ومكان الارجل الولهي طيور

كما يقول المجذوب .

وكل من في قلبه زيغ يسقطه الشيخ الطيب داخل الحلقة بدون ان يشعر يجري ويدور حول نفسه

ويسقط داخل حلقة الذكر وكما قال ود العجيل

عدوهو في الحلقة بكيدو