خطــاكـ تـاهـت ..

خطـاكـ تاهـت

شاذلى جعفر شقَّاق



خطاك تاهت

معاك توَّهتَ خطواتى

وراكـ جريت

حفيت من طَىْ مسافاتى

عليكـ اتوكَّا بالذكرى

واهُشْ قدَّامى خلواتى

وكم غنيت معاكـ غناكـ

وكم هدهدتَ غنواتى

منو الـ قال ليكـ

بحر ريدتنا فَدْ واحـد

وقافية شوقنا مسبيَّة؟

وحبنـا كان خيال شعراء

وفكرة ريدناأُحجيَّة ؟

وغيمة عطفنا الهيمانة صيفيَّة ؟

منـو الـ قال ليــكـ

مواعين المعانى قُدام

وفوق أطلالها مكفيَّة ؟

منو الـ قال ليك حلمنا سراب

نجدِّف فيهــو يومـاتى ؟

تعاتب فيـنا يا حنيِّن

تكفكف دمعك الدفَّــاق

علينا تخـاف من الكلمات

عليكـ نخاف من الأشواق

ولمَّـا العبرة تتحدَّاكـ

تلوذ بى صمتكـ الحرَّاق

تلوذ بي صدرنا الملهوف

على شهقة بكاك سبَّـاق

يذوب ملح العتـاب فى الحُـب

يقع بـاقى الكلام فى الجُـب

يهِب عزَّ المصيف شــاتى ..

ضراع النمَّة كان طربـان

ونيل الإلفة يفرِدْ للنسيم غربال

ضفاير الضفَّة تكشح للغروب شبَّال

وكل ما الموج يمِدْ ايديهـو

يشرب منَّهنْ مــوَّال

يفيض بحر الشِّعر شلاَّل

جمالاً كان محاهو الليل

وهوَّدْ فى الهزيع رحَّـال

طلاسم والضلام دجَّـال

معالم راكَّه فوق الظن

عوالم طار وراهـا خيـال

أنـا المتْحزِّم السكَّة

ومعبِّى الريــح

توكِّى الخسرة مخلاتى ..

إذا شرطى الضمير واقـف

على درب النجيع دقداق

منو الـ بِكْريهو شان يرجع

من الـ بِكْريهو ما بنضـاق؟

قبييل ضل النعاس وارف

صِبِحْ بعد المنام رقراق

وكلْ مايْمِدْ لسانوعلىَّ ؛أجْبِدْ سـاق

واقيف زىَّ القسم حـانث

أجِس مخلاتى واتلفَّت

واقُصْ درب الأسى السرَّاق

تزوزى خطاىَ فى المجهول

واردِّد:يـا زمن فـرَّاق

تحاكى الدنيـا فى عينَىْ

رقيص البخسه فى المُعلاق

وافوووت نحوالبحر مسروق

من الغابرات ..من الحاضرات

واتُفْ فى مُشـرع الآتى

وكُلْ ما الريح تجافى شراع

يصيـح جُوَّاىَ نـوَّاتى ..

.
ياسلااااااااام عليك ياالشادلي جنى جعفر

بس
منـو الـ قال ليــكـ

تغيب كده وطول الغياب

اين انت يارجل واين هي القرية وحكايتها ؟؟

حبابك حبابك عشرة وحباب الجابك صادي .


.