خروف واتْلَطَشْ ..!

خروف واتْلَطَشْ
شاذلى جعفر شقَّاق

خبارِك سارحه يا التّويه ؟

ودَّ البَرْقا ما لقيناهو

بين أُمَّاتو يا ابويا..

هيا ربِّى

تكون عايقاهو ساسويه ؟

وِحِل بى دربِك آ المويه ؟

وِكِر تلقيهو يا التويه !

هيا ابويا

فحلنا الرَّاسى مابْيَوْكَرْ

وماهو السَّاهى أردويه

دربو مسكتو ما بَغَبَا

دخل (سلك الكهارب) ديييك

خَتَرْتَ وراهو ما بَعَبا

دفرتَ الباب وصدّونى

ولاويتم ولاونى

وكنت برايا يابويا

وكِتْ كانت صفوفم عيييك

ولمَّا وقعت ضاع أتر الفحل

يابويا

ضاع فحل المُراح يا بويا

ضــاع

* * *


دقستَ وتُهتَ يا الأقرن

وجيتَ براك بى كرعين

قدُر يمْشِن أبَنْ يَغَشِن

أبَنْ يَغَشِن قدُر يمشِنْ

لقيت أخوانك السبقوك

على الكِتْشِنْ

ملاعق شوربه يطَّقْشِنْ

شُوَك فى الجوف بِيَتْشَكِّن

تقول الشَّطه لليمونه

ما شاء الله وتِتْمطَّق

يغيير المايونيز بغران

ويِتْحنطق ويِتْزنْدق

تبور القشطة والتونه

وتغور فى داهية زيتونه

ترابيز السَّجم راتعات

ويِنْدشِِّن

كلاب شبعانه تِتْلغْوس

معاهن صينى يِتْلحْوس

حداهو كدايس يتْعشِّن

وقع قلبك من اللوعة

جرت عينك شمال ويمين

واتْوهدبت يا مسكين

منو البِحَجاك يا مسكين

من السكين ؟

شرَف فجعة

وحرن خوفك

نفض جوفك

قلب بطنك

قمزت على الغرف مفزوع

تجيبك بالمكانس صــاد

مصيرك ليك بالمرصاد

جمرت على الورش مفجوع

يصدَّ الفوركِلِفت يسوع

شوية تدوخ يهدِّك جوع

فهل من تانى ليك رجوع ؟؟؟؟!!!

هداك باب المصلَّى دحين

كرفتَ الكوندِشن ياسمين

تبارك ماسكة فى يس

لقيت الزمرة منبطحين

منو القال الغُلاد بينين ؟

منو القال الطُوال لاحقين ؟

منو القال الضُعاف هينين ؟

منو القال النعيم شبعان ؟

منو القال الجحيم جيعان ؟

منو القال اليقين شرفان ؟

بشيشى يشيلك الشحمان

يراعى الرفقِ بالحيوان !!

يختَّك فى طرواة تسُرْ

يسوقك يمشى بيك (الحُرْ )

خَتَف أجلك طويل الباع

ضِحِك شاريك من الباع

جَعَرْ تمنك يكورك باع

دخل جيب الجِكِتْ بسراع !

دخل جيب الجِكِتْ بسراع !