يا وليد: ممنوع الحداد لامن نعدل الصورة

يا وليد: ممنوع الحداد لامن نعدل الصورة


03-02-2005, 11:00 AM


  » http://sudaneseonline.com/cgi-bin/sdb/2bb.cgi?seq=msg&board=302&msg=1240549550&rn=43


Post: #1
Title: يا وليد: ممنوع الحداد لامن نعدل الصورة
Author: Balla Musa
Date: 03-02-2005, 11:00 AM
Parent: #0

الأخ وليد
سلام و أشواق و شكر على هذا النظم فى بوست الأخ منصور, مسادير.


Quote: جيتكم شايل اقلام الشعر مكسورة
شيف زي فجيعة بورسودان محضورة
كلاشنكوف بقابل وردة او عصفورة
حيكومةالبلد اللاعبه بيناالكورة

ممنوع الحداد

_____________________________

هل يعقل مجازات الحجر جبخانة
قرتيق المسيرات قنبلة رمانه
من اولاد البلد تتملي الشفخانة
منو الرفع البلد ومين الخانا

يتكال الرماد


وكانت فكره جميلة لإفراد هذه المساحة لتسجيل خواطر عن مذبحة بورتسودان
فأتمنى أن يكون هذا البوست ملكك تحرسه و ترفعه بما أشهده لك من نشاط فى المشاركة. و هذه مساهمتى و التى كتبت جزء منها فى مسادير:

حكومة البلد بى سوأتا المضمورة
قايلا الدنيا دايمه وبيها كم مغروره
إن طال الزمن دول الأيام, مكروره
يمهل ربى مابهمل نفوس مغروره

_________________________________

مابنعلن حدادنا و النفوس مقهوره
بورسودان بلد عزه واسودا هصوره
جيوش ادروب تقابل نارا كاشفا صدورا
ممنوع الحداد لامن نعدل الصوره

________________________________


مات ابو فاطنه شامخ فى كرامه وعزه
عوجات مافى من تحتو الارض تهتز
ادروب يحكى جرحو الغار ودمو النز
حكاية والى مرعوب من هديرن فز
____________________________

والى اليابا قالن ليهو أخوات عزه
دا الكاشف عروضن ولى قرينن جز
لامن جض برتين الحرابة و رز
ادروب حفلن شكره وعليهن هز

مع خالص تحياتى

Post: #2
Title: Re: يا وليد: ممنوع الحداد لامن نعدل الصورة
Author: khider
Date: 03-02-2005, 12:38 PM
Parent: #1

ليتني اعلم كيف يُقرض هذا الشعر ..

بله
انا عاجز عن التعبير الان
لم تستفزني كل البوستات السابقه للكتابه
لقناعتي بعجز اللغه التقريريه عن التعبير في حق الشهداء
الان اوان الشعر ..
مرحي
مرحي
لنؤبن شهداء الحريه





انا ابكي الان

Post: #3
Title: Re: يا وليد: ممنوع الحداد لامن نعدل الصورة
Author: Balla Musa
Date: 03-02-2005, 02:23 PM
Parent: #2

الحبيب خدر
لك التحية و الإحترام
أقرأ لك كثيرا وأعلم أن قلمك صادق يحيى ميت الشعور.
لست بشاعر و لكن يمكن أن أعبر عن نفسى شعرا عندما يكون الجرح نازفا.
أبك ياخدر واجعل قلمك يبكى فوالله من لم تبكيه حال وطننا الآن لا قلب له.

ليه ما نبكى ياخدر الظلم بطال
وفى الشرق الحبيب سال الدمع هطال
دارفور شافعة مكسوره وعلاجا محال
وارقين باكية ثكلى وحالا نفس الحال

Post: #4
Title: Re: يا وليد: ممنوع الحداد لامن نعدل الصورة
Author: Balla Musa
Date: 03-02-2005, 09:07 PM
Parent: #3

فوق
العندو بياض يرميهو

Post: #5
Title: Re: يا وليد: ممنوع الحداد لامن نعدل الصورة
Author: osly2
Date: 03-02-2005, 09:11 PM
Parent: #4

Quote: العندو بياض يرميهو


wo al ma 3endo ?

sallam Dr balla

Post: #6
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 06:13 AM
Parent: #5

أوسلى كيفك
ليك وحشة

Quote: wo al ma 3endo ?


الكهرباء قاطعة فى فرجينيا أم أخدتك الشيمة?

Post: #7
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 04-02-2005, 08:49 AM
Parent: #6

جيت يا بله ومن شعرك بقيت في رعشة
من حد اليراع خفافيش الظلام مرتعشة
اكتب مرابيعك تقوم كل الجثث منتعشة
فرحان الشهيد في الجنه مافيش وحشه

ومافي لبس سواد

يا خدر الولوف قلمك سنين سيافي
اكتب اي شي ما مهم تكتبه قوافي
اكتب وبين المدسوس وقول الخافي
لو غلبك سلم للشيهد قولو عوافي

وما يفوتك جواد

يا بورسودان الليلة ما يوم عرسك
ولي كل الخلوق ظاهر ومكتوب درسك
اولادك اسود ما اظن جبان حا يهرشك
ولو كملوا الرجال بنياتك تقيف وتحرسك

وظاهرات النهاد

Post: #8
Title: Re: يا وليد: ممنوع الحداد لامن نعدل الصورة
Author: Rawia
Date: 04-02-2005, 09:11 AM
Parent: #7

سلام لدكتور بله ووليد وكل ضيوف وزوار البوست






وتحيه لكل شهداء بلادي

Post: #9
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 04-02-2005, 09:30 AM
Parent: #8

رسالة من قلم الحراير قوية وداوية
تحي الشهداء وترث بلاد طريقا الهاوية
لو ما الغربه وايدينا القوية اللاوية
كان حديتي في المينا وبكيتي يا راوية

قراب لكن بعاد

Post: #10
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 09:34 AM
Parent: #7

بشر وقال دبايوا وتانى هش وبش
جوا الحاره تلب-ياوليد- دون رعشه
دم ابو فاطنه فى طرف المداين رش
سلم روحو بالدنيا ام قدود ماانغش
________________________________

بورسودان هيجى وفورى و اكرجى ضرسك
ادروب هب يوم الحاره جمل عرسك
الباغى اللعين يوم قاد جيوشو يفرسك,
ما قرا فى الصحف ود دقنه جمل غرسك?

Post: #11
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 10:02 AM
Parent: #10

فى يوم الكرامات اب صواقعا داويه
تشهد للفوارس فى المحافل راويه
نارن حيه توقد و بالنفايل ضاويه
تحرق رمة الوالى و كلابو العاويه



شكرا راوية على المرور الكريم

Post: #12
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 04-02-2005, 10:03 AM
Parent: #10

لو بقرا الصحف ما كان سوى فعايلو
ما كان بهبش الاسد المخدر قايلو
بعد خرب الغرب هبش الشرق بوسايلو
وين بعدين بفوت ناكراه حتى قبايلو

والدين ليو معاد

Post: #13
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 10:15 AM
Parent: #12

الدين لى معادو والحساب بى فايلو
وكل زولن يجيب قلمو ويورى فعايلو
تدور الدنيا كل مذنب تورى عمايلو
ساحرن الكبير بى الحسره يملا فتايلو

Post: #14
Title: Re: يا وليد: ممنوع الحداد لامن نعدل الصورة
Author: munswor almophtah
Date: 04-02-2005, 10:22 AM
Parent: #13

الانذار ضرب والناس تصيح فى لميناء
ويات من اقول الصاقعة وقعت فينا
يا جنيات سرور ختولنا كلمة ثمينة
فى حنك هناك الناس تخبر الفينا

Post: #15
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 11:11 AM
Parent: #14

مرحب منصور ونتمنى ما تفوت فراشنا دا


ما فى انذار يمين كانت غدر و غبينه
هوس الوالى قال خايف يحرقو المينا
ناس الجبهة حلبوها الضروعا لبينا
وادروب كان هميما ايدو ليها حنينه

Post: #16
Title: Re: يا وليد: ممنوع الحداد لامن نعدل الصورة
Author: osly2
Date: 04-02-2005, 11:35 AM
Parent: #15

الناس لو تموت يا بله ببقى عقابا
فوق درب الشهيد سايرين بكل مهابه
الجبهه اللعينه وكت وقف حسابا
تاهت فى اللجج مسكينه راجيه عقابا

Post: #17
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 12:42 PM
Parent: #16

مرحب أوسلى

الجبهة اللعينة جاتنا شايلا خرابا
من سوأة نواياها و لسان عرابا
فى سوح المهازل قادله ماليه جرابا
كل يوما جديد فى الدنيا يدنى عذابا

Post: #18
Title: Re: يا وليد: ممنوع الحداد لامن نعدل الصورة
Author: osly2
Date: 04-02-2005, 01:00 PM
Parent: #17

عرابا اللعين فى دينا يبرم يفتل
فوق كتف الزمن خاتى الفتاوى يعتل
يقتل فى الشرق ومرات بسيفه يغرب
ما عارف القدر يوم بكره ليهو يكبل

Post: #19
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 01:14 PM
Parent: #18

غرب و شرق العراب بدور لو شكيمه
هلوس , يحكى بى نضمن عديم القيمه
يا اوسلى الاسود فارولو زىةالشيمه
هدامن بياكل من جروفو عزيمه

Post: #20
Title: Re: يا وليد: ممنوع الحداد لامن نعدل الصورة
Author: osly2
Date: 04-02-2005, 01:41 PM
Parent: #19

تاجر فى العروض جاب لينا الف شتيمه
فوق الدين عرض بفتاوى فاقده القيمه
جزار للخلق والما معاهو بـهيمــــه
عند ساعة الحساب باكر بتطفش ريمــه

Post: #21
Title: Re: يا وليد: ممنوع الحداد لامن نعدل الصورة
Author: Balla Musa
Date: 04-02-2005, 02:26 PM
Parent: #20

تاجر فى العروض, الرمه لعبه قديمه
معروف بى عيوبو وفيهو الف شتيمه
خايف , منخلع يقتل على التهويمه
مسلوخ العرض يحكمنا? حاجه اليمه

Post: #22
Title: Re: يا وليد: ممنوع الحداد لامن نعدل الصورة
Author: khider
Date: 05-02-2005, 01:28 AM
Parent: #21

اوسلي
لم اكن اعلم انك ممن يتبعهم الغاؤون
بلال + وليد+الفارس اوسلي
واصلوا..
واصلوا.. ارجوكم







عن الغأؤون
مولانا خدر

Post: #23
Title: Re: يا وليد: ممنوع الحداد لامن نعدل الصورة
Author: khider
Date: 05-02-2005, 01:30 AM
Parent: #22

الشعر الليله مطر الدم
ورزاز يهدر في الفم
فالنشعل نار الدوبيت اذن
ولنوقد جمر النم
و لنعرض ببنادقنا وسط الاخوات




شعر الاستاذ
كمال الجزولي

Post: #24
Title: وليد
Author: mohmmed said ahmed
Date: 05-02-2005, 02:11 AM
Parent: #1

مفاجاءة من العيار الثقيل

شعر وليد
انت عندك شعر زى دا جميل
اها انا تانى حاتابع مداخلاتك برؤية جديدة

بله والشعراء هذا عطاء رائع
واصلوا كشف الزيف والظلم والعدوان

Post: #25
Title: Re: وليد
Author: الجندرية
Date: 05-02-2005, 02:34 AM
Parent: #24

واصلوا
________

غاوية ومحزونة

Post: #27
Title: Re: وليد
Author: وليد محمد المبارك
Date: 05-02-2005, 03:44 AM
Parent: #25

يا ساسة بلادي شكيتكم للعظيم الخالق
شكيتم شكيت زول مغبون حاقد وحانق
عشان كرسي السياسة علقتوا لينا مشانق
لا سلم العجور لا الصغير لا البالغ

ولا الفي المهاد

Post: #26
Title: Re: وليد
Author: وليد محمد المبارك
Date: 05-02-2005, 03:19 AM
Parent: #24

ده ياني انا وده العندي ما غيرتو
بحب بلدي وتراب بلدي ما ودرتو
بكره اي كضاب اعفصه وادوسها نخرتو
ولو دار الكوار بلاعبه وبرضو بخرتو

ما جف المداد

Post: #28
Title: Re: وليد
Author: Rawia
Date: 05-02-2005, 03:53 AM
Parent: #26

أبشروا








ماهنا.... هناك

Post: #29
Title: Re: وليد
Author: Sidig Rahama Elnour
Date: 05-02-2005, 04:16 AM
Parent: #28

*******************************
كان بالك علينا يا أدروب أدمدم نوم
خليهو النكد لبلدنا أنهض قوم
بكرة الصقير بي فوقكم يبقي يحوم
والدابي البيلسع سمو جاتو سموم

******************************
غلطانة الحيكومة وياها كوم اللوم
كرار يا عوافي وماتنوم مهموم
ويوسف في السجن قبالنا كان مظلوم
الحق ياهو ظاهر لابد أن يبين الزوم

*********************************

الشعب دابي ينتر حاشاهو تب مابخاف
ولو كتر العدو إن شاء الله كان ألآف
يقضاهم جميعا لا زول سمع لا شاف
والنيل بي حنانو يمسح التجفاف

Post: #30
Title: Re: وليد
Author: وليد محمد المبارك
Date: 05-02-2005, 05:31 AM
Parent: #29

النيل لونه احمر من فعايل احفادو
اندك جبل التاكا حين شاف ظلم اولادو
يدهشني زول بحكم كيف يخونا بلادو
بدل ضمة حنان يفشها فينا كل احقادو

ما يلقى المراد

Post: #31
Title: Re: وليد
Author: Balla Musa
Date: 05-02-2005, 08:43 AM
Parent: #30

الأخوة خدر ,وليد , محمد و صديق
و الأخوات الجندرية و راوية
تحياتى لكم/ن وواصلوا جاييكم


الجندرية و راوية ذكرتونى شغبة المرغمابية كانت لا تقل عن الفوارس بل تزيد.


بجيكم راجع

Post: #32
Title: Re: وليد
Author: وليد محمد المبارك
Date: 05-02-2005, 10:33 AM
Parent: #31

يا ود موسى امشي وعود البكان محروس
ما شفت البلد يقدل فيها الورل ويحوس
اللدر سيد الدميره في الشرك محبوس
وتسرح في البلد شلة كلاب ونجوس

رجالتها في العتاد

Post: #33
Title: Re: وليد
Author: Balla Musa
Date: 05-02-2005, 04:52 PM
Parent: #32

جاييك

Post: #34
Title: Re: وليد
Author: نادية عثمان
Date: 05-02-2005, 05:17 PM
Parent: #33

ياعم موسى شوف البلة ولدك جار

ظلمنى ظلم شديد وجعنى وجعا حار

قال لشخصى قولا اثرو زى النار

لكن برضو قلبى بيقبل الاعذار !

العزيز بلة موسى ارجع للردود وحاتلاقانى رديت وقلت ليك بنفس القافية ختاما :


البلد الحبيب مين البيعدل مايلو

صارى الحزن ابدا فى حشاهو وشايلو

الزول الظلوم حتما تظلمو فعايلو

فى يوما قريب بيبهدلنو عمايلو

Post: #35
Title: Re: وليد
Author: osly2
Date: 05-02-2005, 09:20 PM
Parent: #34

Quote: البلد الحبيب مين البيعدل مايلو

صارى الحزن ابدا فى حشاهو وشايلو

الزول الظلوم حتما تظلمو فعايلو

فى يوما قريب بيبهدلنو عمايلو


الزول الظلوم يا ناديه قرب يومو
لو عاس فى الشرق ولاهلنا اظهر لومو
باكر فى الحساب ياما بيصغر كومو
الزارع الشقى لابد يسود يومو

Post: #40
Title: Re: وليد
Author: نادية عثمان
Date: 06-02-2005, 10:30 AM
Parent: #35

الزول الظلوم يااوسلى بسالو الله

كتلو اولادنا ليه مسخت علينا الحلة

سودانا الحبيب فوق اصلو مابدّلى

ياود موسى قول سمح السماح يابلة

وعجبى شديد والله!!

Post: #36
Title: Re: وليد
Author: Balla Musa
Date: 05-02-2005, 09:37 PM
Parent: #34

Quote: ياعم موسى شوف البلة ولدك جار

ظلمنى ظلم شديد وجعنى وجعا حار

قال لشخصى قولا اثرو زى النار

لكن برضو قلبى بيقبل الاعذار !



ن نرجع تانى لى سطرى الكتبتو عتاب
ا الناس ليها بى المعلوم سلام و حباب
د دوبيتك قبيل حييتو دون اسباب
يه يهون لى ناس سلامك غيرى دون حجاب

Post: #37
Title: Re: وليد
Author: Balla Musa
Date: 06-02-2005, 09:20 AM
Parent: #36

الأخ أوسلى
سلام و تحية

شكرا للمرور العالى المعنى

Post: #38
Title: Re: وليد
Author: Sidig Rahama Elnour
Date: 06-02-2005, 09:43 AM
Parent: #37

Quote: نرجع تانى لى سطرى الكتبتو عتاب
ا الناس ليها بى المعلوم سلام و حباب
د دوبيتك قبيل حييتو دون اسباب
يه يهون لى ناس سلامك غيرى دون حجاب


الخبر الجائي من البور قالوا خراب
الناس في حزن زاد العليها عذاب
كتيل النفوس في دينا أصلو مهاب
الحق ما بروح كل شي بيومو عندو حساب

Post: #39
Title: Re: وليد
Author: Balla Musa
Date: 06-02-2005, 09:52 AM
Parent: #38

الأخ صديق رحمة

لك تحياتى وانحناءة إجلال وإهديك هذى:

هولب لبلبوا تيوس الضلال بى وضوح
وكم فى الخط صناحة فعلهن بتفوح
ركبوا ضهور نفاقن و عوسن المفضوح
ماراعوا العروض , ما حفظوا حرمة روح

Post: #41
Title: Re: وليد
Author: وليد محمد المبارك
Date: 06-02-2005, 10:48 AM
Parent: #39

يراعو العروض !! ديل فوق العروض بيعرضو
البهتك عروضو ما اظن بيحفظ ارضو
لابد يوم حساب كان يابو او كان يرضو
قرب يوم حسابهم وبي لفح السياط ينبرطو

ومشمر الجلاد

Post: #42
Title: Re: وليد
Author: osly2
Date: 06-02-2005, 01:05 PM
Parent: #41

Quote: يراعو العروض !! ديل فوق العروض بيعرضو
البهتك عروضو ما اظن بيحفظ ارضو
لابد يوم حساب كان يابو او كان يرضو
قرب يوم حسابهم وبي لفح السياط ينبرطو


الزول السجم تب ما براعى عروضو
فى ساعة النزال دايما مهلهل عودو
ادروب الشرق لو مات بتبقى وعودو
والروح مابتروح فى شعب صلده حدودو

Post: #43
Title: Re: وليد
Author: Balla Musa
Date: 06-02-2005, 02:59 PM
Parent: #42

up

Post: #44
Title: Re: وليد
Author: معتصم دفع الله
Date: 06-02-2005, 03:21 PM

الزول السجم ما براعي ضميرو
مالي كرشو بدم غيرو
ما بهمو كان مات أدروب في الشرق
ولا مات كل أهل السودان في الحرب

Post: #45
Title: Re: وليد
Author: Balla Musa
Date: 06-02-2005, 07:46 PM
Parent: #44

الأخ معتصم

تياتى لك بذرات مياه النيل و البر الأحمر

شكرا على الطلة البهية

Post: #46
Title: Re: يا وليد: ممنوع الحداد لامن نعدل الصورة
Author: محمد السر
Date: 06-02-2005, 09:20 PM
Parent: #1

بلة
بوستك جميل وضيوفك أجمل
والأجمل من دا كله اننا أكتشفنا موهبة وليد
بالله خليك من بوستات المشاكل وواصل الحاجات الجميلة دي يا وليد
تحية لكم جميعا
ويا خدر كومك بدأ يكبر
بقينا 2 غاووووون

Post: #47
Title: Re: يا وليد: ممنوع الحداد لامن نعدل الصورة
Author: khider
Date: 07-02-2005, 01:51 AM
Parent: #46




انا سوداني انا



Post: #50
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 07-02-2005, 09:06 AM
Parent: #47

ذكرتني ايام الكورة يا خدر
والفريق القومي السوداني تحت 17 سنة سنة 1990-1991
انا سوداني انا
دي الغنية الكنا بنغنيها ونحنا راجعين من التمرين الصباحي من الميدان الشرقي حتى قصر الصداقة

وبتخيل لي سجلنها في التلفذيون لبرنامج عالم الرياضة قبل السفر الى ايطاليا بي يومين وعرضت في نفس يوم السفر الكان جمعة برضو

ليت التلفذيون السوداني يعرضها ان كانت محفوظة

اتاسف على حال الكرة السودانية واحمل نفسي و دفعتي الاسباب
الفرصة كان مواتيه كيما نغير شكل الكره السودانية ولم نغتنمها

Post: #48
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 07-02-2005, 06:36 AM
Parent: #46

يا محمد السر
سلامات
وشكرا على الكلام الطيب

بس بقول
انا ما بتاع شربكه ولا بتاع مشاكل
كمان ما برضى انو اكون اضينة واسكت عن حاجات عارف اني قادر ارد عليها

فتش كل البورد لو لقتني بديت المشاكسة مع اي زول وكنت انا من ابتداءها وريني عشان اعتزر ليه

لكن كل مشاكساتي وردودي الشرسة
هي ردود افعال على افعال

اما الشعر
ياخ اديتني اكتر من حقي
الشعراء وين
والبكتبه انا وين

انا زول متشوعر ساكت

عموما شكرا على النصيحة وبنحاول نعمل بها
ـــــــــــــــــــــــــ

دجاجي يلقط الحبه
ويجري وهو فرحان
كان عيونه خرز
لها في الشمس الوان

مهداة الى التجمع الوطني بمناسبة السلام

Post: #49
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 07-02-2005, 08:55 AM
Parent: #48

دحين ادروب صبح مرضان هراه السل
نازح من مكانه بكوس للموية اوللضل
برتع في بحار الجهل يخوض ويقدل
بيقبل كل صنوف القهر الا الذل

شيك واجب السداد

Post: #51
Title: Re: يا وليد: ممنوع الحداد لامن نعدل الصورة
Author: Balla Musa
Date: 07-02-2005, 09:21 AM
Parent: #49

محمد السر وخدر ووليد

واصلوا البيت بيتكم الآن فى غاية المشغولية

بجيكم كما أرجو منكم عصر الفراش لامن أجى صاد

أحبكم جميعا

Post: #52
Title: Re: يا وليد: ممنوع الحداد لامن نعدل الصورة
Author: Balla Musa
Date: 07-02-2005, 06:29 PM
Parent: #51

الأخت راوية
تحياتى

أراكى قد عدلتى مداخلتك والتى كنت أعتبرها زغروده فى يوم الحارة لإسود الشرق
ما يضعك فى مصاف شغبة المرغمابية كما قلت آنفا. فهلا أعدتى تلك الزغرودة؟

شكرا

Post: #53
Title: Re: يا وليد: ممنوع الحداد لامن نعدل الصورة
Author: Sidig Rahama Elnour
Date: 08-02-2005, 00:51 AM
Parent: #52

متين ننظم بيتنا نبني أساسو
نلفظ للحرب نرجع للبلد بي ناسو
الدائر الصلح نضمنلو نحن معاشو
والدائر العدل نحكملو نحن قصاصو

Post: #54
Title: Re: يا وليد: ممنوع الحداد لامن نعدل الصورة
Author: يازولyazoalيازول
Date: 08-02-2005, 02:21 AM
Parent: #53

بالدمع الغزير نبكيكا ياادروب
لابد من نشاقق نسلك اقسى دروب
بكره نجيبو تارك وتكتر الحى ووب
والغدرك نعصرو لامن يقول الروب
ما كايسين كتل ، ديل البدوها حروب
وشتتوا شملنا وخلوها هم وكروب
قول ليهم ولادنا بترصوا رص الطوب
ساعة الحارة نبداه الكتل يادوب
وبالصبر الجميل فص الملح بيدوب
ويهنى شرقنا يا بله ويعيش ادروب

Post: #55
Title: Re: يا وليد: ممنوع الحداد لامن نعدل الصورة
Author: وليد محمد المبارك
Date: 08-02-2005, 05:36 AM
Parent: #54

بتين يحكم بلدنا رئيس يوزع في الشوارع حب
يَحَكِم في الامور عقله وما يلفاه صوت القلب
يعالج بي ضمير واعي ومهموم من سؤال الرب
يمسك سكة الاصلاح ونحنا وراه نسير في الدرب

متين نلقاه عاد

Post: #56
Title: Re: يا وليد: ممنوع الحداد لامن نعدل الصورة
Author: Balla Musa
Date: 08-02-2005, 07:37 AM
Parent: #55

الشامخه المأصلا فى المعانى فريده

ياطيف الخيال جيب ليا فيها قصيده
فى التاريخ جذورا عميقه حاجه اكيده
مانتكست يمين , خربان فكر مابصيدا
******************************
كم جار الزمن ايام عليها عديده
من ابناها.. كم عانت غباين وغيدا
العاق ان قدح نيرانو فيها يقيدا
تطفى اسبابا بى حكمه وسماحه شديده
*****************************
ولدت و ربت الأجيال عيالا زينه
عند النهمه يلحقوا زى سحاب العينه
إن حر الزمن كشر نوايبو الشينه
كروا وبرزوا قالولك حبابك جينا
**********************************
ولدت.. وربت الأزرق سليل الجنه
والهادى الوسيم ابيض عديم الهنه
جوك.. اتقابلوا فرحه وعناق و محنه
سالوا وفاضوا نيلا خيرو كفى أهلنا
***********************************
سيتيت انزلق من قممو مسرع بارع
والقاش ساعدو مفتوله وقوامو الفارع
سيدون والبطانه و كسلا فيها يضارع
بى مايا نضيف اسقاها احيا مزارع
***************************************
السوباط دلق ماهو البكفى نداهو
والابنوس شرف عزم الهشاب ناداهو
نهر الجور سرف القيف كسر هداهو
داك بحر العرب فات الكرم عداهو
*************************************
فيها الحاضره, فيها الباديه ناس وداب على و حسان
فيها سلام و فيها حباب وفيها عناق و فيا حنان
بالكرم الاصيل قدح المعانى ملان
وحرم فيها تقعد يا عشا الضيفان
****************************************
فيها امدرأمان والخاطر المسموح
وفيها العندليب شارك بلابل الدوح
فيها بنات جبينن ضوا عم السوح
يقابلوك بى نغيماتن ترد الروح
******************************************
فيها مريدى فيها التاكا فيها كريمه
فيها نيالا و الدامر وشندى القيمه
فى دفتر كرام الاصل حلفا قديمه
ود مدنى انبرت حوت المحافل ديمه
******************************************
فيها الساحه, فيها السمحه قلعة ريره
فيها عروس رمالا برا مارق خيرا
فيها سماحه فيها نداوه.. حلوة جيره
فيها شهامه كامله وديمه تنجد غيرا
*******************************************
جبل مره العظيم فيها, وجبل رجاف
فيها سهول وفيها المروى فيها الجاف
برق القبلى هبت لك نسايمو لطاف
والعبادى جاب ريحة الكليت والشاف
*****************************************
فيها العرضه,فيها الرقبه,فيها التله و المردوم
فيها ام كيكى والطنبور والدلوكه و التمتم
فيها المهدى,فيها الضال وفيها العابد القيوم
وفيها شيوخ طريق ياليلى جافوا النوم
*****************************************
فيها سواد و فيها بياض و فيها سمارا, احلى الوان
فيها نسيج فريد صنعة يد المنان
فيها خلاوى فيها اجراس كنايس وفيها صوت آذان
وفيها حلاوة الترحاب وفيها بشاشا فيها أمان
**********************************************
فيها نخيل وفيها حراز وفيها البفره
و السافنا فيها و الصحارى القفره
فيها الكرا فيها الصوله فيها النفره
فيها رجال عيونن حمرا خيلن دفره
********************************************
ما بتستعجل الشينه و طويلة بال
وزى شيخ الطريق فى الحضره صاحبة حال
إن جار الزمن و الحال صبح بطال
تهز الدنيا تتحطم رواسى جبال
*************************************************
كم ياعزه ليك ترخص دمانا تسال
وكم فى هواك صبح مزن العيون هطال
ملينا الرقاد ياعزه نحنا شمال
مديلنا اليمين بينا الفراق قد طال
*******************************************
ما تعابينا والله البنخسر نحنا
من فتناك جار بينا الزمن قمحنا
إن سبتينا خسرانين دلقنا سمحنا
ياغوث عزه ارح عايشين براك فى محنه
**********************************************
عليك ضمينا خلينا الندس عيبتنا
جار بينا الزمن صقر المحن خبتنا
ماحفظناك فيك قصرنا واخيبتنا
أمنا ديمه إنتى و ليك لومنا ثبتنا
**********************************************
يرعاك ربى دايمن فى نعيمك رافله
بالهنا و السلام يارب ايامك حافله
إن فاتك زمن ماتعيشى دهرك غافله
يادار عزه اصحى و قومى الفى القافله

_______________________________________________

بله موسى
فلادلفيا 12-7-2003

Post: #57
Title: Re: يا وليد: ممنوع الحداد لامن نعدل الصورة
Author: Balla Musa
Date: 08-02-2005, 10:18 AM
Parent: #56

شيطانن مسمى المظلمه التمكين
و فرعونن طغى وشوه علوم الدين
يارب العباد بى نارنا مدفين
راجين موسى يفلق مقرن النيلين

Post: #58
Title: Re: يا وليد: ممنوع الحداد لامن نعدل الصورة
Author: عبدالله وداعه الامين
Date: 08-02-2005, 05:01 PM
Parent: #57

يا بله الشعر هيلك وهيلو سنين
برّد همنا وادينا شعر رصين
ابواتك اسود يا ولدة الزينين
حراس للبلد من رفقة الظالمين

بي نار البلد يا بله متدفين
يوم العرضه تر ورينا لي التفنين
بتجاروا النجوس متل النعام جارين
زمان عندالمخادة الكوكة قلوا تبين

Post: #59
Title: Re: يا وليد: ممنوع الحداد لامن نعدل الصورة
Author: Balla Musa
Date: 10-02-2005, 06:35 AM
Parent: #58

شوقى مرحبتين حبابك و اليوم السعيد الليلة جابك.
فتحت البوست وجاتنى منو ريحة دعاشاتن ترد الروح فعرفت أن شوقى قد أمطر فأطفأ شوقى.
دخلت عليك كتير فى بوستاتك الشعرية الرائعة و لكن أظن قد كان بك لبس مابين سكوت البالتوك و بلة سودانيزأون لاين.
أحييك و أرجو أن تبرق وترعد و تمطر لتطفئ أشواقنا.

Post: #63
Title: Re: يا وليد: ممنوع الحداد لامن نعدل الصورة
Author: خدر
Date: 18-02-2005, 07:47 AM
Parent: #55

ياوليد

Post: #60
Title: Re: يا وليد: ممنوع الحداد لامن نعدل الصورة
Author: Balla Musa
Date: 10-02-2005, 09:59 AM
Parent: #54

الزول السمح هشام و مرحب بالطلة البتفرح خلايق الله.

Quote: ويهنى شرقنا يا بله ويعيش ادروب



شايل سيفو متقفى الأثر أدروب
سابل عرضو فايت فى الصبر أيوب
ثابت زى جبال التاكا مو مرعوب
كيف يتهنى ياهشام و البلد مخروب

Post: #61
Title: Re: يا وليد: ممنوع الحداد لامن نعدل الصورة
Author: osly2
Date: 10-02-2005, 12:14 PM
Parent: #60

Quote: شايل سيفو متقفى الأثر أدروب
سابل عرضو فايت فى الصبر أيوب
ثابت زى جبال التاكا مو مرعوب
كيف يتهنى ياهشام و البلد مخروب

يا ود موسى ما شفت الهلال الهله
روح ادروب تنادى وتسرى فى خلق الله
المر ما بفـــوت ومـن الحلق يـتدله
لازمكم صبر كان انت كان عبد اللــه

Post: #62
Title: Re: يا وليد: ممنوع الحداد لامن نعدل الصورة
Author: Balla Musa
Date: 10-02-2005, 02:04 PM
Parent: #61

Quote: يا ود موسى ما شفت الهلال الهله
روح ادروب تنادى وتسرى فى خلق الله
المر ما بفـــوت ومـن الحلق يـتدله
لازمكم صبر كان انت كان عبد اللــه



لايكين الصبر قاصعنو جره و غله
وقايمين ليلنا راجين الفرج من الله
فرعون افترى واستهزا بى دين الله
وين موسى الكليم ماحل وقتو و هل?

Post: #64
Title: Re: يا وليد: ممنوع الحداد لامن نعدل الصورة
Author: Balla Musa
Date: 18-02-2005, 09:23 AM
Parent: #62

أين وليد?

Post: #65
Title: Re: يا وليد: ممنوع الحداد لامن نعدل الصورة
Author: معتز تروتسكى
Date: 18-02-2005, 12:23 PM
Parent: #64

أين وليد?
وانت معاهو صديقى كفينك والحاله عموم...
Balla Musa

Post: #66
Title: Re: يا وليد: ممنوع الحداد لامن نعدل الصورة
Author: Balla Musa
Date: 18-02-2005, 12:34 PM
Parent: #65

مرحب بيك معتز

خلتك قد هجرتنا مع الطيور الما بتعرف ليها مرسى و لا فى إيدا جواز سفر.

رجوعك سبب فرحنا وبحرك أصوات طنابيرنا اللبت ياحبى فى غيبتك ترن*** تحلف يمين ماتقول نغم يسعد قلوبنا و يفرحن.

بركة الجيت تنادى معانا لى وليد

Post: #67
Title: Re: يا وليد: ممنوع الحداد لامن نعدل الصورة
Author: ود الشيخ
Date: 19-02-2005, 11:54 PM
Parent: #1



ولـــــــيد

Post: #68
Title: Re: يا وليد: ممنوع الحداد لامن نعدل الصورة
Author: saadeldin abdelrahman
Date: 20-02-2005, 11:49 PM
Parent: #1

Waleeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeed!












up