الخرطوم: الصيحة اعتبر زعيم حركة تحرير السودان مني مناوي الصراع بين قيادات الحركة الشعبية - قطاع الشمال شيئاً طبيعياً يمكن أن يحدث داخل كل القوى الثورية، بيد أنه وصف الأمين العام للحركة ياسر عرمان بالديكتاتور والمتعالي. وقال مناوي خلال تنوير لقيادات حركته عبر الإسكايب :"ما غريب الخلاف بين الثوار خاصة وإنو النظام يدو طويلة، لكن المستغرب إنو إنسان زي عرمان كان خامي الناس بأنو يدعو لسودان جديد وديموقراطي يكون يحمل نفس عقلية السودان القديم". وأضاف مناوي: "عرمان إنسان متعالٍ ومفترٍ، عايز يتحكم في مصيرنا زي ما اتعامل معانا في داخل الجبهة الثورية اللي كانت أنحج تجربة في العمل الثوري من حيث التنسيق العسكري والسياسي لكن النتيجة كانت إنو عرمان بتعاليهو وحبه للهيمنة عايزنا نبقى نمسك البقرة من قرونا وهو يحلب... دا اللي أهلنا النوبة فطنوا ليهو لكن بعد فوات الأوان". وواصل مناوي: "أعتقد أنو إزاحة عرمان فرصة لإحياء الجبهة الثورية خاصة وإنو تحالف نداء السودان لحم رأس وفيهو ناس كتار زي عرمان.... نحن كقوى ثورية يدنا ح تكون ممدودة لأبناء جبال النوبة الشرفاء في ثورتهم ضد التهميش".. وأضاف: "عرمان عايز يلتف عن العاصفة اللي قامت عليهو من أبناء النوبة عشان كدا بحاول يغازل القوى الثورية في دارفور بكلامو عن فتح جبهة جديدة هناك .. أنا بقول ليهو دي حقارة واستهتار.. في زول يخش بيتك من غير يقول ليك عن اذنك... دا زول موهوم لو بتقدر تعال هناك".