اخلاقنا بقت فضيحة!!!! مشاهدة شخصية :ممنوع دخول النساء

هذه القصص الاتية ليس من نسج الخيال وهي قصص واقعية وشخصية وشهودها موجودين توضح مدي التردي الاخلاقي الذي وصلنا اليه.
الخميس 31/3 ذهبت وثلاثة من الاصدقاء الي مطعم بالخرطوم لتناول الغداء ثم الذهاب الي مباراة المريخ والموردة دخلنا الي المطعم واخترنا الجلوس في مكان الجلسة العربية بدلا من الكراسي لاننا حنطول شوية في القعدة انتظارا لقرب موعد المباراة فوجدنا في في الغرفة معنا ستة من الشباب تلاتة اولاد وتلاتة بنات في عمر الزهور والبنات الثلاثة لابسات Coats وبناطلين جينز ولا ادري هل هو دلالة علي الارتباط بجامعة معينة او كلية معينة.
المهم البنات وفي مكان عام كن يجلسن في الاوضاع التالية، الاولي كانت شبه واضعة لراسها علي فخذ رفيقها بينما الثانية كانت تستند الي الحائط "متشتحة" وكانت رجيلها منفرجتين بزاوية مقدار 60 درجة في الاتجاهين وهي تتبادل حديثا ضاحكا مع زميلها، اما الثالثة فكانت تضع راسها علي كتف الشاب وهما يتطلعان الي تلفون N70 ولا ندري ما كانا يشاهدانه حيث انه لا صوت صادر من الجهاز بل فقط ابتسامات صادرة عن الشباب.
جاء بعض الشباب العرب واظنهم سوريين ورغم وجود بعض الترابيز الخالية الا انهم ارادوا ان يضايقونا ويجلسوا حيث الحور العين"نسيت اقول لكم انه البنات كل واحدة اجمل من الاخري" فحمرنا لهم واخبرتهم بان المكان مليان واقسم بالله العلي العظيم ان هدفي كان هو حصر هذه الفضيحة في اضيق نطاق ممكن.
ثم جاء الغداء وعينك ما تشوف الا النور البنت تشيل الملعقة وتوكل سعادته بالملعقة ونص ياكله هو والنص التاني ليها ولما واحد من الجماعة شبع ورفض ان "يعلفوه" التفت البنتين التانيتين حوله وحرام عليك تكسفها وفعلا طلع راجل شهم وود ناس وبلع الملعقة الملانة رز. هذا عن الضحكات التي تخلع وتسيل الماء من وجه من لا ماء في وجهه ولقد ذهبنا الي المباراة وتركنا المباراة دائرة ولا ندري نتيجتها ومن عنده علم فليخبرنا.

بعد وصولنا الي الاستاد يوجد دكان ذهبت وعي واحد من الاصدقاء الثلاثة لنشرب حاجة باردة وفجاءة
- السلام عليكم "لا لا استغفر الله" مساء الخير
- مساء النور والتفت لاري من القي بالتحية فاذا هو رجل في الخمسينات من العمر امرد املس صلعته كانها طريق صحراوي.
- الليلة مريخنا منتصر
- انشاء الله
- انا فلان
- انا محمد
- انا ساكن ------- انتوا اوعي يكون جاى من حتة بعيدة
- من بعيد والله ------- ولكنه المريخ نسوي شنو
- يا اخي انتوا في طريقي بعدين وصلوني معاكم وعليك الله اديني تلفونك عشان اضربك ليك بعد نهاية الكورة وتلفوني هو 0 "كدي خلوهوا التلفون حقه هسي.
- تلفوني كده
بعد ما اخونا شال نمرة التلفون والي الان الامور تجري طبيعية وبعد ما ختاني في بطنه اذا ياللهجة تتغير الي اسلوب اين منه غنج نانسي عجرم ودلع روبي وطوالي تلفون البيت وانا شايفك قبل كده وانا عايز اشوف بلدكم ديك ولم ينس ان يهمزني بضربة بسيطة فوق البطن عند الوداع علي امل التلفون بعد المباراة.
تريدون ان تعر فوا ماذا حدث بعد ذلك؟ لم يتصل بعد المباراة ولكن لحظة وصولي الي البيت ضرب التلفون رددت عليه وقلت ليه يا اخو العنوان غلط وامش شوف ليك "ص--" وقفلت الخط. والله العظيم كرهني التلفون وتلفوني بقي مقفول الا افتحه عشان اتصل ولما افتحه طوالي بتجيني مكالمته طايرة.
صاحبة الرقم _______ اتصلت علي قبل ايام
السلام عليكم
وعليكم السلام
منو معاي
انت ضاربة وين يا بت الناس
موش هاني
لا ما هاني
طيب منو
عايزة شنو
انت طبعك حار كدا مالك؟ فرضا ضاربة بالغلط تقابلني المقابلة الجافة دي؟
ازغرد ليك؟
القطامة شنو؟
التلفون دا لقيته وين؟
والله العظيم ضاربة لهاني لكن لميت فيك وناس الخطوط ديل ناس مبسوطين وما عندهم مشاكل رصيد زينا
عايزة شنو
دايراك انت ولا هاني ترسلوا لي رصيد
انعل ابوك انت وهاني
كرهتني بالمس كول فضريت لها وقلت لها
"يا شر ---- والله انا من هنا لموبيتل للقسم اذا بالغلط شفت رقمك دا علي شاشة تلفوني ومن يومها ارتحت.
قد يقول لي البعض انت لو ما بتاع مصائب الحاجات دي ما تجي لناس تانيين؟ قد يمكن ان تكون قد مرت علي غيري ولم يتكلم عنها.
يا ربي اولادنا نربيهم وين؟

____

كدي قول لي المطعم ده وين يا ود الفكي

والبت المشتحة والود البتصل بيك لسه مواصل

كدي تعال بالماسنجر وقول لي عن المطعم لاني ما مصدق قصة ال 60 درجة دي

يمكن 180 .. ايد ع ايد والقياس بكون مظبوط



اااخ

ده كلو من وائل .. ووائل قفل الموبايل

يا أخوانا خلوها مستورة
وقولو بس
"حسبنا الله ونعم الوكيل"
KINDLY ERASE

يا منعم
انا قصدت انه كل رجل عاملة زاوية منفرجة مقدارها 60 درجة بس قاعدة المثلث وين عليك الله ما تسألني.
المطعم في الخرطوم شارع 15 اسمه-------
"والتفت لاري من القي بالتحية فاذا هو رجل في الخمسينات من العمر امرد املس صلعته كانها طريق صحراوي"
بالله يا منعم ولد دي جبتها من وين؟ داير تجيب لي الهواء مالك.

الحقوني يا ريت لو طريت خزنة البت ادتني مس كول قبل عشرة دقائق يا جماعة حلوني من هاني دا

الله يكون في عونك يا أخي
بس انصحك تاني ما تمشي في الحتات ديك

اعمل حظر لرقمها
كسرة
ود الفكي انت خايف من المرة واللة شنو ادي الرقم منعم اصلوا فاضي

يا سمؤال

لا ما مسالة خوف بس ود الفكي ما تشوف الصياعة دي والله 60% مولانا والباقي صياعة سياسة وكورة وغناء وبس.
خايف ادي منعم التلفون يبقي ذنب.

ياحبيب
انا مشيت وين؟ مشيت مطعم وشربت بيبسي في دكان، انشاء الله لا "كبستك" ولا "بيبيسك". يعني يا حبيب لو مشينا المحلات ديك يحصل شنو؟

اخونا محمد
سلامات
والله باين "أبالو" بالغ مع الصفوة جوه وبراه
ربنا يصلح الأحوال، وياحليل المشروع الحضاري!

ود الفكي انت مريخابي والله موردابي؟
ما تكون ر0اشاشة
انت هيثم طمبج ده جايبنو فزع والله وجع
معليش خرجت برة البوست
تسلم

يا راكوبة
ابراهيم عمر "اخونا الاصغر" معاكم في منتديات المريخ كتب قبل اسبوعين تقريبا مقال في صحيفة قوون انتقد فيه الاعلام المريخي واللاعبين والادارة فرد عليه الاستاذ اسماعيل حسن في الصدي " ما عارف قريت المقال بتاعه ولا لا"
الخلاصة
المريخ كفاكم فيه ابراهيم ونحن نمتنع حتي الاصلاح.

سمؤال
والله مريخابي والايام دي حردان وما تجيبوا لي سيرة السمك

اخوي ود الفكي ...

صباحاتك مباركه ...

انت يا خوي مشيت تاكل ليك حاجه في المطعم او مشيت تصور المطعم ...

تخريمه ... اخر مره انا مشيت فيها السودان .... الناس بقت تكون قاعده في الاماكن العامه .. والرقبة زي مروحة التربيزه تدور يمين وشمال ..

سمير
اسعد الله اوقاتك
يا حليلك انت من زمن الناس رقبتها زي مروحة التربيزة!!!! الزمن دا وقف راسك وهم براهم بلفوا قدامك.
نسيت اقول لك مشيت اغسل يدي الولد السوري يلا اتخيل معاي
الولد هو والجماعة المعاه قعدوا في تربيزة قصاد باب الغرفة الفيها البنات بس الباب "منحرف" عن مستوي الرؤية بتاعهم فالقاعدين ووجهم لباب الغرفة اخدوا شمال لمن خفت تخش فيهم عربية جاية من الشارع التاني، اما الولد الضهره للباب فوالله العظيم نزل رقبتوا علي حافة الكرسي "صدام بس" ثم كسر رقبته يمين ثم ارسل النظر "شفت توم وجيري، مش مرات الكديس بتلقاه واقف ولما يشوف حاجة تخلعه برسل عيونه يمشن يشوفن ويجن راجعات" اها زولنا دا بقي زيه.
غسلت ايدي وجيت راجع بقي الولد في وشي، لما شافني رجع رقبته لقواعدها سالمة ثم اداني عين والله التقول كاتل ابوه" جعت الغرفة لقيت فيها دبيب واقف في الباب قعدت قلت الدبيب دا يحترم نفسه ويتخارج بس زولك مما شاف البنات لما في الجزمة غضب الله وجاها كل واحدة في حتة والشراب لحقه الجزمة بعد ما اتحكر وقعد.
نسيت يا سمير والله الجرسونات المساكين ديلاك بيكون فيهم واحد مات اليوم داك.
دمت

Quote: يا منعم انا قصدت انه كل رجل عاملة زاوية منفرجة مقدارها 60 درجة بس قاعدة المثلث وين عليك الله ما تسألني. المطعم في الخرطوم شارع 15 اسمه-------

ود الفكي ....

هوّ في إيه ؟؟؟؟؟؟؟

إنت بتكون شفت الحاجات دي في بتايا !!!!

ومتخيلها الخرطوم ... موش ؟؟؟؟

أو تكون اشتغلت مخرج وده سكريبت لفيلم "بورنو"

وبعدين أوع يكون مقص الرقيب حذف بعض المشاهد !!

مع خالص محبتي لك ... وباعتباري خالك أحذرك إنه

تدي رقمك لزول أكبر أو أصغر منك سنا خاصة في

خرطوم المشروع الحضاري !!!!!!!!!!!!!!!!!!!!!!

الخال العزيز فاروق
يا حليللك وعاش من شافك اسمع اقرا القصة دي
الساعة 4:16 دقيقة التلفون رن مشينا انا ومعاي خالي نزور مريضة في المستشفي، التلفون ضرب شوفت رقم اخونا ما رديت، خالي قال لي بقيت جوكي ولا شنو في زول طالبك قمت حكيت ليه القصة بعد ما طلعنا"يا جماعة والله العظيم الكلام دا صحيح 100%" وركبنا في العربية التلفون ضرب تاني قمت قول للخال شوف زولك وفتحت الاسبيكر
- حمااااااااااااااااااااادة
- اهلا
- وينك
- قاعد
- جاي الكورة الليلة
- ايوة "يا جماعة قلت عمك دا الليلة اعمل فيه عملية" ايوة يا فلان جاي بس عربيتي سايقها زول وما عارف ارجع بعدين كيف؟ ممكن ابيت معاكم في البيت
- والله يا ريت يا حمادة، انت عارف انا مما شفتك قلبي انشرح لك و"حبيتك"
- شعور متبادل
- لا والله من دون مجاملات
- يا اخونا خليك صريح عايز شنو
- معقولة ما فهمتني
- يا اخي فاهمك وما عندك مشكلة بس انشاء الله جيبك كويس
- شنو؟ "بخلعة"
- والله انا زول موظف وماهيتي ما مكفياني ونحن الشغل دا في البيت يا الله يا الله خلي نشتغله برا
"اقول هذا الكلام وخالي يموت من الضحك/ عشان ما تمشوا بعيد"
- طيب خلاص ادفع ليك كم
- كلك نظر
- ما مشكلة تعال محل ما اتقابلنا قدام الدكان الساعة سبعة انا ماشي استحم هسي
- يلا
عزيزي القاري اذا ساقتك الاقدار اليوم الساعة سبعة مساء الي الدكان الواقع غرب البوابة الرئيسية لاستاد المريخ ووجدت شخصا يشبه الجاسوس الاسرائيلي عزام عزام "الخالق الناطق" ومستحمي ولابس فانيلة صفراء فاعلم انك تقف وجها لوجه امام الل.... الشاريه محمد عمر.
عاش المشروع عاش عاش

واهههههههههههههههههههه
لكن حكاوي غريبه الله قادر دا في السودان الكلام دا ????????????
قال أولادنا نربيهم وين والله إلا نعلبهم الله يقدرنا علي نفسنا دي

ود الفكي
أخلاقنا بقت فضيحة معناها كلنا لي حدنا ، وكان من الواجب القول أن أخلاق البعض منا بقت فضيحة ولتكن فالكمال لله وحده ، فإنا منا الصالحون ومنا دون ذلك. فاللغة ربما تصل للسامع بأكثر من معني إذا لم يتم ضبطها وترتيبها ، وهذا الأمر سبق للأخ يا زول يا زول أن جعله تعميماً على جميع بنات المغتربين لسماعه بحادثة واحدة.
الموضوع قطعاً لا يسر وتردي الأخلاق في أى مجتمع أمر جد خطير ، ومما لاشك فيه أن جميع الأديان السماوية وعلى رأسها الدين الإسلامي الحنيف إهتمت وحرصت حرصيا كبيرا لموضوع الأخلاق بالقدر الذي جعلها نبينا ورسولنا محمد بن عبد الله صلوات الله وسلامه عليه هدفاً وغاية من بعثته "إنما بعثت لأتمم مكارم الأخلاق"
وأيضاً يمكن لكل الأمراض والفتن التي تصيب الأمم أن يتم تلافيها وعلاجها عدا مشكلة فساد الأخلاق وتفسخها
وإذا أصيب القوم في أخلاقهم فأقم عليهم مأتما وعويلا
وهناك الكثير من الأحاديث والحكم التي تمجد حسن الخلق وتذم تفسخه وفساده. فنظرتك أخي للحادثة في هذا الوضع المستنكر إقتضته تقاليد خاصة جعلتك تستنكر الحدث وتقبله على مضض فتعايشه وتعيش معه وكان يمكن للأمر أن يكون على ما هو عليه لكن لوجود أجانب ومحاولتك حصر الفضيحة في أضيق نطاق زاد ضيقك وجعلك تري الأمر بهذا الحجم. فلا نظرتك ولا تقاليد المجتمع هي التي تشكم وتهذب الأخلاق ما لم تتصف بالقصد والإعتدال وأصالة المبدأ وسمو الغاية بالإضافة إلى اللطف والحكمة في التوجيه والنصح وكل هذا لا يتوفر أو يتأتي إلا من خلال منهج رباني لا قوانين وضعيه.
بلا شك أننا نتلقي من العولمة قشورها وشرورها ربما شأننا في ذلك شأن كافة المجتمعات الإستهلاكية فإزعاج الإتصالات ما كان يمكن أن يكون إلا بفضل التوسع في الإتصالات وسوء إستغلالنا لها بالقدر الذي أصبح معه الما عندو موبايل ما عندو أى حاجه ناهيك عن الوقت الكبير الذي لا نحسن منه إلا سويعات نقضيها في النوم يومياً.

ترقب معى اعترافات فتاة فى مقتبل العمر


هشام امين

الاخ الملا عمر
طيعا لا يفوت علي ذكائك ان العنوان هو فقط للتنبيه وليس للتعميم وان كانت اخي فعلا الاخلاق انحدرت انحدارا لا تخطئه العين واليك بعض الامثلة
لدي ابن يدرس في الروضة وفي يوم من الايام خرجت من المنزل بدري ولما رجعت البيت سالت الولد ادوكم شنو في الروضة فقال لي الاستاذة رجعتني لاني ما دفعت قروش الشهر، قلت ليه لشنو ما كلمتني قال لي صحيت ما لقيتك، فهذه المربية تقدم المال علي تعليم الحرف، ثم تذهب الي المواصلات فتسمع من الالفاظ ما يندي له الجبين وخصوصا عند الغلاط بين الكمساري والراكب وصدقني لا يغشك عمر الراكب فلا فرق بين الشاب والشايب في غلاظة اللفظ وانحداره ثم تذهب الي السوق فياتوك بالبضاعة وهي من افسد ما يكون فيحلفوا لك بالله انها اجود ما اوجده الله علي الارض وبعد شرائك لها لو عرضتها علي البائع والسماسرة بخسارة التلتين ما ياخدوها منك ثم المستشفيات فحدث ولا حرج فيمكن ان تموت في خشم باب المستشفي اذا ما عندك حق العلاج ثم لف علي الحدائق العامة لتري العجب العجاب.
واحد عندنا مسطول وبتاع بنقو لمن البنقو فططه سطرين بيحكي عن النفاق قال لي مرة في بيت بكا جاء حاج فلان "مبسوط" قال الفاتحة في خشم الباب قال لي والله اكان فضلت الميتة الما قامت تشيل معاه الفاتحة بعده بدقيقة جاء واحد مفلس قال الفاتحة قال لي والله اكان شلتها معاه انا"المسطول"!!!!!!!
اخي الملا
الاخلاق اصبحت عملة نادرة والغش والكذب والنفاق والحسد والرياء صفات لم نكن نعرفها ولم نعايشها الا في هذا الزمن.
اما اذا تحدثت لك عن الفساد الخلقي والاخلاقي فربنا هو الساتر
لك شكري علي المساهمة ودمت

هشام امين
ما تحكي لينا فيلم مذكرات مراهقة، يا زول بهزر معاك حبابك وحباب مساهمتك ويا ريت نقدر نسلط الضوء علي قليل مما يحدث.

ألاخ/محمد عمر الفكي,

سلام من الله ورحمة الله ,
اولا اشكرك على الموضوع حقيقة انت ابرزت جزء بسيط مما يحدث ,
بالامس كنا مجتمعين مجموعة اصدقاء وفى جماعة من السودان فى زيارة عمل وتطرقنا الى موضوع الانحلال الاخلاقى الموجود فى البلد ? اعمال يندى لها الجبين وطبعا البتحكى هنا او بوست الزميل كمال الزين ( الخرطوم نهارات حمراء ) او بوست الزميل هشام شيخ الدين جبريل ( عندما تتهور بنات المغتربين فى الجامعات وتصل مرحلة الحمل الحرام ) وغيرها من الكتابات لهى خير دليل على مايحدث.

الجميع مستاء ومستهجن ومصعوق ومذهول لمايحدث ...فقط نحن نتحدث عن الظاهرة وربما نتلذذ بالحكاوى ولكن لا أحد بيننا يتحدث عن الحلول? من هم الذين يلعبون بمستقبل فتياتنا وبشرفهن وبحيثياتهن اليس هم ابناء السودان اخواننا او ابناء عمومتنا او ابناء الحى او القرية و المدينة?

فى أحدى الايام كنت مودع لصديقى المسافر على الطائرة المتجهة الى الخرطوم وكانت مجموعة من العمال الاتراك متوجهة الى هناك تبادلت الحديث مع أحدهم سألته هل هو سعيد بالعمل فى بلدى فأجابنى مستهزئا بأنهم يعملون جيدا هناك فهت من كلامه انهم مبسوطون هناك يرتعون كما يريدون وهناك بدئنا مشكلة بعد استشط غيظا من حديثه الذى جعله خنجرا وطعننى به .هل هذة سمعتنا التى اكرمتنا نسائنا بها الى هذا الحد وصلنا.

انا فى اعتقادى بان الاسر تلعب دور كبير فى مسأله التربية ,يجب علينا مراجعة مواقفنا تجاه انفسنا اولا وتجاه ابنائنا و بناتنا ثانيا فلا يعقل بان تكون طالبة وتمارس الدعارة لان الدعارة مهنه وإن كانت وضيعة ففى كل بلدان العالم توجد منازل لبائعات الهوى بطريقة قانونية تسمح للدوله بمراقبتها وفحصهن طبيا حتى لاينتقل الى بقية شرائح المجتمع ( انا ليس مؤيدا لها ولكنها حل يمكن اللجوء اليه ).

العلاقات العاطفية بين الجنسين لايمكن الوقوف فى طريقها لانها فطرة طبيعية ولكن لايمكن ممارستها بتلك الطريقة الشاذة فى مجتمعنا الذى من المفترض ان يكون محافظا ,لا يمكن لشاب او شابة تبادل القبلات او احتضان بعضهم البعض فى مكان عام فى السودان فليس لتلك التصرفات الغير مسؤله مكان فى قاموسنا .والساكت على الحق شيطانا اخرس فلماذا لانقوم بأسداء النصح لهم او لهن هم جميعا يحتاجوننا لنشملهم برعايتنا.


ولى عودة
دمتم

Quote: وكانت مجموعة من العمال الاتراك

والله يا حسن الجيلي تجي السودان اقعدك بس 10 دقايق

في مركز عفراء تشوف محن

اي تركي ماشي ليهو مع واحده شي سوداء وشي خضراء وشي زرقاء وشي حمراء

ودي نتيجة طبيعية لمحاولة الانقاذ قاتلها الله في تشكيل الانسان وما يسمي

بالمشروع الحضاري سئ الذكر والاعجب سنراه قريبا في عودة التركية بعيون

احفادنا الخضراء


والله يحفظ البلد


منعم

ألاخ/عبد المنعم,
انا شفت وسمعت وشبعت صدقنى انا ليس بعنصرى حتى اتهم اخواننا الاتراك حصريا ففى كل جنس الصالح والطالح فيهم الردئ وفيهم الشهم ...ممكن برضوا تفسر لى صداقات بناتنا ببقية الاجانب ضمن هذا الاطار.
اخى عبد المنعم لايمكن حصر الظاهرة فى الانقاذ فقط ولو ان بعض الظواهر أنتشرت فى عهدها اتذكر عندما كانت هناك ازمة مواصلات طاحنة فى الخرطوم اقترح المسؤولين أنذاك مشروع فضل الظهر فى الماضى لاتتجرأ اى فتاة بالركوب او اى رجل بالوقوف بسيارته لحمل اى أمرأه لاتربطه علاقة بها باركابها ولكن بقانون من كان له فضل ظهر انتشرت ظاهرة ركوب الفتيات من غير حرج سيارات اغراب لتتسع الظاهرة وتصبح ظاهرة دعارة من غير تجميل...
صدقنى يا عبد المنعم لو كنا حريصون على بناتنا لما تجرأ الاجنبى على مداعباتهن عارف فى ناس بتقول ليك أكل وقش خشمك......وما عليك من الباقيين
حفظ الله بلادنا ونسلنا

محمد عمــر

بس أظن دي حاجات شوية من البنسمعو


نسأل الله السلامة




قلت لي بشبه عزام عزام

حسن الجيلي

السبب الرئيسي هو الفقــــر


رسوم علاج

رسوم تعليم


غذاء .. دواء .. كساء .وووووووووالخ



الدولة تخلت عن واجبها فخرجت البنات لياكلن من اثدائهن

رحم الله محمد طه محمد احمد فهو الاسلامي الوحيد الذي قالها وبصراحة




محبتي

منعم

عزيزى/عبد المنعم
طالبه ودعارة المعادله ماراكبه ,إذا كانت فقيرة فلا يمكن ان تدرس بثديها فتلك كارثة اكبر.....ياعنى لمن تتخرج حاتكون لدينا طبيبات ومهندسات وضباط ومحاميات ومدرسات قمة فى الاحترام ولا أنا غلطان...

بعدين لا توجد حكومة تضبط أخلاق الناس داخل اسوارهم ,الدولة لديها خطط معينة توفير التعليم المجانى ,فتح المراكز الشبابية للجنسين ,تحسين وتوفير السكن الداخلى الجيد والجيد جدا للشباب والشابات ...
اما التربية الاسرية هذة وظيفة الوالدين والمجتمع برمته .

خلينا نكون واضحين أكثر نحن كشباب سودانى او رجال سودانيين هل نحن مساهمين فى تلك الظواهر اكثر من النساء ولا لا ,يعنى الناس البتطارد البنات فى الشوارع المدارس الجامعات البيوت المطاعم موش نحن ولاغيرنا..الناس البستغلو ضعف بناتنا موش ياهم التجار والضباط والمغتربين وتجار الحروب وقضايانا الوطنية والقومية..

يعنى لايغير الله مابقوم حتى يغيروا ما بأنفسهم

Quote: الدولة تخلت عن واجبها فخرجت البنات لياكلن من اثدائهن رحم الله محمد طه محمد احمد فهو الاسلامي الوحيد الذي قالها وبصراحة

رحمه الله وأسكنه فسيح جناته وجعل الله مثواه مع الشهداء والصدقين
اللهم آمين

Quote: [خلينا نكون واضحين أكثر نحن كشباب سودانى او رجال سودانيين هل نحن مساهمين فى تلك الظواهر اكثر من النساء ولا لا ,يعنى الناس البتطارد البنات فى الشوارع المدارس الجامعات البيوت المطاعم موش نحن ولاغيرنا..الناس البستغلو ضعف بناتنا موش ياهم التجار والضباط والمغتربين وتجار الحروب وقضايانا الوطنية والقومية..

صدقت

ود الفكى:

إت مصقرت وزمنك تافه

خلّى الناس تتونس!

الاخوة والاخوات المتداخلين
اسف جدا لانشغالي هذه الايام وسوف ارد عليكم قريبا انشاء الله
تبارك
ود الفكى:

إت مصقرت وزمنك تافه

خلّى الناس تتونس!

كتر خيرك

اكتر ليك خيرى واديك شوية من كلام ود الجيلى (باقى عندو بال للزيك)

Quote: انا فى اعتقادى بان الاسر تلعب دور كبير فى مسأله التربية ,يجب علينا مراجعة مواقفنا تجاه انفسنا اولا وتجاه ابنائنا و بناتنا ثانيا فلا يعقل بان تكون طالبة وتمارس الدعارة لان الدعارة مهنه وإن كانت وضيعة ففى كل بلدان العالم توجد منازل لبائعات الهوى بطريقة قانونية تسمح للدوله بمراقبتها وفحصهن طبيا حتى لاينتقل الى بقية شرائح المجتمع ( انا ليس مؤيدا لها ولكنها حل يمكن اللجوء اليه ).

أول قطاع خدمى فى تاريخ البزنس بائعات الهوى، أوجدتم ظروف موضوعية اسمها: وجود الحيوان الناطق على سطح الكوكب!

يعنى لو الترسيخ لمكارم الأخلاق مسؤوليتك وانت بى صلف ورثة الأنبياء بتاعك دة؟

المهم...

خلى الناس تتونس!

والله جد يا تبارك احترت ما عرفتك قصدك شنو

يعنى لو لقيت ليك اتنين منسجمين مع بعض، انساهم!

خلى الناس تتونس