Post: #1
Title: عزاز علينا شالوا نوم عينينا
Author: Asma Abdel Halim
Date: 03-31-2007, 07:41 AM
وفى الخرطوم تتنوع المركبات والشوارع وسائقى المركبات كتنوع المشاة
ويبقى قاسم مشترك واحد بين هذه الأنواع –الموبايل- الله لا عاده
أمجاد زرقاء
سائق أمجاد أجلسنى فى الكرسى الأمامى (علمت فيما بعد أن إسمه كرسى الشهيد) لأنه ما مرخص وإذا ركبت ورا ستبدو على سيما المستأجر. توكلت على الحى الذى لا يموت وشددت الحزام وألصقت نفسى بالكرسى مما ركب على وجه السائق ابتسامة ساخرة وحدا به لسؤالى :
-الأخت جاية من وين؟
-جاية من بيتنا
وبيتكم وين يا عينى؟
استنكرت قوله يا عينى لكن هذه سالفة أخرى واستمريت فى ثقالتى
- بيتنا محل شلتنى ده
- وعندها علم أنى مستنكرة كل شى وسكت. بعد قليل رن صوت مغنى وإذا به الموبايل قاتله الله. ودنقر السائق (أى والله دنقر فى ا
)
وصحت فى هلع
- يا إبنى عاين للشارع!!!!!!
- يا خالة نحن الشارع حافظنو
- حتى الناس الماشين فيه حافظهم
- لا ديل هم الحافظننا
ابتسمت لخفة الدم ولكن قلبى طار
- يعنى كان لازم ترد على التلفون ده؟
- كيف يا أستاذة (ولا أدرى كيف تحولت من خالة إلى أستاذة) الضاربين ديل عزاز علينا شالوا نوم عينينا.
- طيب يا ابنى مش تحافظ على حياتك عشان العزاز عليكم؟
أمجاد بيضاء
امتطيناها ونحن أربع نساء ورجل من احد الشوارع الكبيرة فى قلب الخرطوم ركبتها باطمئنان شديد لأن أضواء الحركة تنظم الشوارع بطريقة ميكانيكية مذهلة.
وتبخر اطمئنانى عندما مخرت الأمجاد عباب الأسفلت ضاربة بالضؤ الأحمر عرض الأسفلت.
وطيرت عيونى حتى ذهب الأسود وبقى الأبيض
- يا أخى النور أحمر!!!!!!!!
- نحن عندنا عمى ألوان يا أستاذة (لماذا يصر القوم على إطلاق لقب أستاذة على؟ وأنا أجهل من دابة)
- نظرت فى فزع لبقية الركاب فرسموا على وجوههم ابتسامة شامتة وماكرة وعندما حمرت فيهم بغضب قال الرجل : إنت طولتى من البلد يا أستاذة. السواقة بقت رجالة ساكت.
- ومن اليوم داك وأنا امتطى صهوة سيارة أخى البيضا مكوية وأمارس الرجالة فى شوارع الخرطوم
- ومافيش حد أحسن من حد.
|
Post: #2
Title: Re: عزاز علينا شالوا نوم عينينا
Author: الجندرية
Date: 03-31-2007, 01:55 PM
Parent: #1
| Quote: ومن اليوم داك وأنا امتطى صهوة سيارة أخى البيضا مكوية وأمارس الرجالة فى شوارع الخرطوم |
رجالة ؟!!! يا استاذة 
مالك دايرة تخليهم يدورو فينا نقة الجندر ( المغلوط ) إياها ؟ 
اشواقي وامنياتي باجازة طيبة
|
Post: #3
Title: Re: عزاز علينا شالوا نوم عينينا
Author: abubakr
Date: 03-31-2007, 02:08 PM
Parent: #1
| Quote: وأمارس الرجالة فى شوارع الخرطوم |
ونحن راجيين رجالة دي تطيير بشان ما يجونا راكبيين دبابات بدل امجاد تجي انتي تحبطيني .. انتي ما سمعتي بثورة النساء القادمة وانا مترجييها من سنيين بشان "رجالة" دييل المسخو علينا الصناعة الحربية يفزو ويقعدو في البيت بشان الدنيا تحلي وتروق ..اقول لبناتي شنو دحين واناالقاعد سنين وسنين ابشرهم بثورتهم ؟ شوفي طريقتك مع " مها" ..؟
|
Post: #4
Title: Re: عزاز علينا شالوا نوم عينينا
Author: Asma Abdel Halim
Date: 03-31-2007, 04:00 PM
Parent: #3
Quote: رجالة ؟!!! يا استاذة
مالك دايرة تخليهم يدورو فينا نقة الجندر ( المغلوط ) إياها ؟ |
يدوروا شنو يا جندر يا أخى 
الله ماستر عليهم من الفحولة؟
|
Post: #5
Title: Re: عزاز علينا شالوا نوم عينينا
Author: Asma Abdel Halim
Date: 03-31-2007, 04:05 PM
Parent: #4
أبوبكر
يا اخوى الثورة مدورة "الفحول" راسهم فى مخلاية الحرب والتسابق على الحكم والبنيات فى يمينك ماسكات الثور من قرونه.
أنا دقة قديمة تعال شوف جيل ناس مها.
|
Post: #6
Title: Re: عزاز علينا شالوا نوم عينينا
Author: كمال علي الزين
Date: 03-31-2007, 04:44 PM
Parent: #5
أسماء عبدالحليم (كده حاف أحسن)
وضيوفها الكرام ..
ركبتي ركشة في شوارع الخرطوم ؟؟؟
منتظر الإجابة وبجيك راجع ..
إحترامي وتقديري
|
Post: #7
Title: Re: عزاز علينا شالوا نوم عينينا
Author: Asma Abdel Halim
Date: 03-31-2007, 07:42 PM
Parent: #6
| Quote: ركبتي ركشة في شوارع الخرطوم ؟؟؟ |
أهلا كمال
ركبتها مرات كثيرة وفى كل مرة أطلب وقف المسجل العالى
وفى كل مرة أظن أنها آ خر رحلة لى
لكن الحق لله الوليدات السايقنها مهذبين شديد
وبرضه السايقين أمجاد لا يقلون تهذيبا بس محتاجين حد يوضح ليهم قيمة ما يحملون داخل حديدتهم الخفيفة
تحياتى
|
Post: #8
Title: Re: عزاز علينا شالوا نوم عينينا
Author: bayan
Date: 03-31-2007, 07:47 PM
Parent: #7
Quote: لا ديل هم الحافظننا
ابتسمت لخفة الدم ولكن قلبى طار |
|
Post: #10
Title: Re: عزاز علينا شالوا نوم عينينا
Author: munswor almophtah
Date: 03-31-2007, 08:18 PM
Parent: #8
ومن اليوم داك وأنا امتطى صهوة سيارة أخى البيضا مكوية وأمارس الرجالة فى شوارع الخرطوم
- ومافيش حد أحسن من حد.
الليل فوقو درب الطير يا جنا
وبلقاك فى بكان يومداك ياجنا
هكذا صارت لغة الغناء لغة للخطاب بعفويه ويسألونك
بالليل دا ماشى وين
بالليل دا ماشى وين
ذى دا فتريته زراعى
وحس النكته صار عاليا وصار ميسورا
رحله سعيده وعودا حميد واوعك من كرسى الشهيد
والسلام
منصور
|
Post: #9
Title: Re: عزاز علينا شالوا نوم عينينا
Author: كمال علي الزين
Date: 03-31-2007, 08:07 PM
Parent: #7
Quote: أهلا كمال
ركبتها مرات كثيرة وفى كل مرة أطلب وقف المسجل العالى
وفى كل مرة أظن أنها آ خر رحلة لى
لكن الحق لله الوليدات السايقنها مهذبين شديد
وبرضه السايقين أمجاد لا يقلون تهذيبا بس محتاجين حد يوضح ليهم قيمة ما يحملون داخل حديدتهم الخفيفة
تحياتى |
أسماء عبدالحليم
تحياتي
المسجل العالي , وقيمة الشايلنوا داخل حديدتهم , والله كلام , كانك كنت راكبا معانا لماالشافع دفقنا في الخور وجرى ..
|
Post: #11
Title: Re: عزاز علينا شالوا نوم عينينا
Author: Asma Abdel Halim
Date: 03-31-2007, 10:46 PM
Parent: #9
منصور إزيك
الحياة تغيرت كما لم تتغير من قبل والناس على غير ما توقعت
والحس الفكاهى فى السماء
يوم مشيت من شارع الجمهورية للحرية وأنا محملة بشنطة يثقلها لاب توب وما إليه. استوقفنى شاب يبدو أنه طالب ثانوى وسألنى عن موقف بصات جبل أولياء.
- والله يا ولدى أنا عنقالية من الأقاليم ما بعرف المدينة دى
- فما كان منه إلا أن عبر عن خيبة أمله فى.
- بى شنطتك الكبيرة دى؟
كمال:
والله الركشة تقول مدربة على كب الناس فى الخور. العجب شارع الصحافة زلط (مبارك زروق حاليا).
|
Post: #12
Title: Re: عزاز علينا شالوا نوم عينينا
Author: محمد المرتضى حامد
Date: 03-31-2007, 11:06 PM
Parent: #11
أمتي يا أمة الأمجاد والماضي العريق.
د. أسماء ، حمدالله على السلامة.
|
Post: #13
Title: Re: عزاز علينا شالوا نوم عينينا
Author: أبو ساندرا
Date: 03-31-2007, 11:12 PM
Parent: #1
| Quote: العجب شارع الصحافة زلط (مبارك زروق حاليا). |
أنا ماعارف الحكمة بتاعت تسمية الشوارع الجايطة دي
نحترم ذكرى الراحل مبارك زروق
لكنه لم يسكن الخرطوم وما أظنو مر مرور الكرام بالشارع المعني
واللي كان إسمو شارع القصر جنوب فيما مضى قبل أن يسمى بشارع الصحافة زلط
في تجاوز للديم العتيق
على ضفة الشارع اليسرى عند منتصف الديم بيت أسرة الشهيد الدكتور علي فضل
مش كان أولى يسموا بيهو الشارع ؟
طيب ، نقول هم ماممكن يذكروا الناس فعلتهم الذميمة
مش كان أولى -برضو- يسمو الشارع بإسم المربي الجليل عبدون حماد
وبيته العامر على مرمى حجر من الشارع
صاح كلامك يا أستاذة
عجب .
|
Post: #14
Title: Re: عزاز علينا شالوا نوم عينينا
Author: Asma Abdel Halim
Date: 04-01-2007, 04:57 AM
Parent: #13
أبو ساندرا
معليش ما تزعل. نحن لى الليلة بنقول شارع الديم
لحدى الأن مافى شارع إسمه شبك. العمارات غيروا أرقامها لأسماء ولكن يتجاهلها الجميع إذا ما قلت الرقم مافى زول بعرفه . وعلى ذكر الأسماء وتناسبها مع المنطقة.
تذكرت شارع الحرية لما كان إسمه الرسمى شارع السيدعلى الميرغنى ولم يكن يعرف هذه الحقيقة سوى شرطة المرور
مرة فى محكمة الحركة قرأ الشرطى يومية التحرى وذكر أن الحادث وقع فى شارع السيد على فما كان من المتهم إلا أن صاح
على الطلاق ما كنت سايق فى شارع السيد على ولا مشيت الخرطوم بحرى اليوم داك .
وأهو فى النهاية الأسم المعروف للناس صار الإسم الرسمى.
ومقاومة الدينار ليست ببعيدة قدر ما الحكومة حاولت أن يتعامل الناس بالدينار رفضوا رفض بات .
|
Post: #15
Title: Re: عزاز علينا شالوا نوم عينينا
Author: Asma Abdel Halim
Date: 04-01-2007, 05:01 AM
Parent: #14
مرتضى العزيز
أهلا
عارف الامجاد دى وقودها غاز وما عندها شاسيه. بس ضريبه صغيرة وتولع والركاب يبقوا موضوع دية.
عليك الله ما بتشبه الأمة صحى صحى؟؟؟
|
Post: #16
Title: Re: عزاز علينا شالوا نوم عينينا
Author: Hussein Mallasi
Date: 04-01-2007, 08:28 AM
Parent: #15
Quote: عارف الامجاد دى وقودها غاز وما عندها شاسيه.
بس ضريبه صغيرة وتولع والركاب يبقوا موضوع دية. |
تولع .. و تولع اليتعرضلها !!
|
Post: #17
Title: Re: عزاز علينا شالوا نوم عينينا
Author: Asma Abdel Halim
Date: 04-01-2007, 08:54 AM
Parent: #16
بيان
والله كان شفتى خفة الدم فى السودان تتبسطى
ملاسى
البيان بالصور يفوق أى خيال
|
Post: #18
Title: Re: عزاز علينا شالوا نوم عينينا
Author: Tabaldina
Date: 04-05-2007, 07:46 AM
Parent: #1
..
.
بس يا أستاذة
ما كلت لينا مغامراتك وانت سايقه عربية اخوك البيضاء ..!!
_________________________
والله السواقه فى الخرطوم بقت نسوان ساااكت
الرجالة تطير ..
وعوداً حميداً للشوارع الضيقة والعربات الدشلومية والاسفلت المدخشم
|
|