حكايا شرقاوية ........ أو نجوع الملح

حكايا شرقاوية ........ أو نجوع الملح


12-01-2009, 05:07 PM


  » http://sudaneseonline.com/cgi-bin/sdb/2bb.cgi?seq=msg&board=299&msg=1259683624&rn=97


Post: #1
Title: حكايا شرقاوية ........ أو نجوع الملح
Author: أبوبكر حامد الأمين
Date: 12-01-2009, 05:07 PM
Parent: #0

لشد ماينتابنى الحنين لربوع الزقازيق ونجوعها - هيهيا والنكّارية والجامعة - أبوكبير وكفر صقر .

مايلى من سرد لايمكن إدراجه تحت مسمى مذكرات بقدر ماهو سرد قد لايتقيد بالأطر التاريخية أو أهمية الأحداث فى تتاليها وتواليها ، كلى أمل أن تسعفنى الذاكرة فى الرصد الدقيق للتفاصيل.

فى البدء ركبت البص فى طريقى للزقازيق ، شق البص طريقه الزراعى وكانت الخضرة خير أنيسٍ لى أن لم أبرح جزيرتنا الخضراء بوسط السودان ، توقف البص بقرية منيا القمح وتصورت حينها أن هاهنا الزقازيق ، إغتمّت النفس وانعقد العزم على العودة للسودان بخفّى حنين أو ببالطو ود البك وذلك أضعف الإيمان ، حمدت الله أن البص واصل مسيره ووصلناأخيراً للزقازيق ، ولم تكن لى قبلة سوى 100 شارع الجيش وقد زودنى بهذا العنوان صديقى مأمون التجانى الشقيق الأصغر للمدناوى الجميل صلاح التجانى ، وجدتُ هناك الرجل الصالح صلاح على صالح الذى أبهجتنى رؤيته للوهلة الأولى ، فهو يكتنز فيوضاً من المحبّة والبشاشة ولديه ومعه جالت بالخاطر صور شتّى لسنار ورواق السنارية ومحمد عبدالحى فى عودته إلى سنار وحكمة الشيخ فرح ودتكتوك وخزّان سنّار ومملكة الفونج ، وكانت بشاشته وترحابه خير معين لصبىٍ يخطو خطواته الأولى متغرباً عن مدينته ومعبده القدسى مدينة ودمدنى ، وكان يزامل صلاح فى سكنه محمد عثمان واحمد عبدالله وعادل عبدالمطلب على ما أذكر ، وقد وجدت لديهم جميعاً ذات البشر والترحاب الذى قابلنى به صلاح على صالح ، فقد حملونى فى اكف الراحة واحتفوا بى أيما إحتفاء ، فكان لى من أسرتهم أوثره ، ومن حبهم أصفاه وأنبله ، ولم يكن يغض مضجعى سوى أمرين ، صوت القطار وهو يهدر حتى يخيل إليك أنه يمر تحت السرير ، وسخّان الغاز الذى أجبرنى على الإستحمام وعيونى (مفنجلة) .

ونتواصل ...............

Post: #2
Title: Re: حكايا شرقاوية ........ أو نجوع الملح
Author: البادي النور
Date: 12-03-2009, 06:28 AM
Parent: #1

نحب إندياحك يا بكوري ... زدنا ألقا وحكاوي ...
إنت كنت وين يا بكوري ؟ غيابك طال وشغلت البال ...
أهلا بيك وأنت مليئا بالحماس والأشواق ... مشتاقين لي ضحكاتك المجلجلة
التي تملأ الأرجاء فرحا وسرورا ونشوة ... يا أخي إنت زول حلو جدا ...
تعال فرح ليالينا ... تعال قبل السنين تجري وتعال ...

Post: #3
Title: Re: حكايا شرقاوية ........ أو نجوع الملح
Author: الرشيد بابكر
Date: 12-03-2009, 10:59 AM
Parent: #2

ما زلت يا بكري و بعد أكثر من عشرين عاما استيقظ صباحا و أتخيل نفسي في غرفتي في شقتنا بالشبان المسلمين...و أقول في نفسي لماذا لم يوقظني منصور كعادته لأذهب الى الكلية...هل ما زال منصور نائما أيضا...صحيح أنا كنت سقد...لأنني كنت آخر من ينام و لكن منصور كان أول من يستيقظ...أفرك عيني لأجد نفسي في واقع آخر...فأحزن قليلا...ثم أبرمج نفسي من جديد...لم أستطيع التخلص من تلك الأحلام طوال العشرون عاما التي قضيتها متنقلا داخل و خارج السودان...أي كابوس جميل هذا الذي يطاردني طول العمر...ليته لا يذهب...
واصل اندياحك و ذكرياتك فهي في مكان قريب من مخزن الذاكرة...

Post: #5
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-03-2009, 02:44 PM
Parent: #3

http:// ما زلت يا بكري و بعد أكثر من عشرين عاما استيقظ ...مر...ليته لا يذهب...

ذكرت هذه الشقة فى ردى على منصور وقد علقت هذه الشقة دون سواها بالذاكرة ، وأضحى تذكرى لمنصور ومحمد المرتضى وصفوت مرتبطاً بشقة الشبان المسلمين ، وتلاقى جماعتك ملطوعين فى البلكونة زى الضاربم هيم ، طبعاً تلك المنطقة كاملة الدسم وهى المعبر من المساكن للسوق وفيها تجد بائع البطاطا المشوية وبائع العرقسوس وبعض تداول للحب لايرقى لدرجة البيع ولا يفارقه بإحسان ، وبعض الصبية يصطادون ببنادقهم زغب الطيور وماخفّ رأسه.

Post: #4
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-03-2009, 02:36 PM
Parent: #2

http://نحب إندياحك يا بكوري ... زدنا ألقا وحكاوي ...

الجميل فى كل حين ..... البادى النور

لما قريت عنوانك لقيتو - المجاهدين - كيلو 8 ضحكت بداخلى وقلت ( كلو زول الله بديهو قدر نيتو وجسمو) ، لك التحية يابادى والشوق لتلك الأيام الخوالى .

Post: #6
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-04-2009, 06:07 AM
Parent: #4

بعد أن قضيت أيامى بشقة 100 شارع الجيش كان يتحتم علىَّ أن ألتقى بعض سناير حقوق لإستكمال إجراءات التسجيل بالجامعة ، فأخذنى عاطف منصور على ما أذكر لشقة منتصر طه ، وعاطف منصور رجل رقيق الحال تتسابق بداخله الضحكة والفكرة فى ذات الوقت ، فتتزاحمان عند الخروج ، وكلما كانت الضحكة موفورة الصحة إنعكس ذلك سلباً على وضوح المفردة التى تخرج متقطعة وتتطلب منك التركيز لفهم مايرمى له عاطف إبن مدنى وقريب هيفاء التى قبلت لاحقاً بكلية الزراعة وبمعيتها رابعة العدوية بشير وأمل جابر وهدى محجوب وكلهن من بنات مدنى

إلتقينا منتصر طه بشقته بمنشية السادات ، رجل ممطوط القامة ناحل الجسم يشفط السيجارة وكأنى به يحرص على اقتضاء كل قرش أنفقه فى شراءها ، كان حين يرشف نفساً من السيجارة يشده للداخل وتنخفس معه ملامح وجههه ومايمكن أن نسميه الوجنات أو مايعادلها لدى منتصر بوجهه الخالى من الكوليسترول والدهون ، يركن منتصر كثيراً للإستلقاء على سريره ويشكو على الدوام من الإرهاق ربما مرد ذلك الإجهاد الدائم لنحول جسمه، لايحمل منتصر فى قلبه ضغينةً لأحد يضحك فيتخلخل منكبيه ، حتى عندما يغضب يزمجر كالأطفال بعبارات لاتبين ، أستبدل إسمه لاحقاً بإسم (منتشر) توصيفاً لظاهرة الكوكبة على قول أهل مدنى ، كنا حين نستقل قطار حلفا فى رحلة العودة فى الصيف وقبل وصول القطار لعطبرة وعند مروره أمام قرية خليوة موطن منتصر طه ، كنا نتغنى :

كُنّا قبلِك ياخليوة .............. فى دروب مافيها إلفة

ولعل صاحب هذه المؤامرة زهير الزناتى أو عادل الجعلى لا أذكر

Post: #7
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-04-2009, 08:58 AM
Parent: #6

أخذنى منتصر صبيحة اليوم التالى للكلية عبر تعرجات وحواشات وسلكنا دروب مافيها إلفة ، وعند المدخل الخلفى للجامعة يعض فلاحين وجاموسهم باسطٌ تلاليشه بالوصيد وعوالم إمتزجت فيها الفوضى بالبساطة ، عبرنا هذه المشاهد إلى مصطبة كلية حقوق أو ما اصطلح على تسميتها بركن السودان ، هناك وجدت نجاة ميرغنى وسامية اسماعيل وعفاف الشريف بثيابهن السودانية التى تنبى عن قوة مناعتهن ضد التمصير وتتوسط الجمع خديجة ابراهيم تلك الرائعة التى كانت دوماً تشتكى ازدحام سلم بيت الطالبات 21 اكتوبر بالقطط وبنات تربيةعلى حد قولها ، باغتنى يوسف محمد يوسف ( يابرلوم جيب سيجارة) ، عرفنا الشحدة الإساءة شنو ، كنت ابربش السجائر على حضور المصطبة من الذكور بالطبع وأعود للشقة وعلبة سجائرى فاقدة للذاكرة ، وعلمت فيما بعد أن الكواكب يخبئون السجائر داخل الجوارب ، وتطور الأمر لدى يوسف فتعدّلت النغمة إلى ( جيب سيجارة - سفّة - جنيه ) ، ويوسف هذا لديه مقدرة فائقة على إسقاط الحواجز واقتحامك دون أن تبدى ممانعة بسبب لطفه الشديد ومشاكساته مع عفاف الشريف ، وكان يرمى القول على عواهنه رضى من رضى وتضايرت من تضايرت.
أشير إلى أنه تم قبولى فى السنة السابقة لإلتحاقى بالكلية ، فجمدت السنة رغبةً فى إحراز نتيجة تؤهلنى للدراسة بالسودان ، ولم أوفق فى ذلك وكان هذا أول إحتفاء بالفشل ، وعليه قدمت للزقازيق فى شهر أكتوبر ، ولأننى كنت السودانى الوحيد آنذاك فقد رمقتنى أعين الفلاحين بنظرات إندهاش وكأننى من كوكب آخر ، وفى أول يوم دراسى وخلال جلوسى بالمدرج قبل بدء المحاضرة سمعت أحدهم يصدر صوت ( بيس - بيس ) إلتفت خلفى فإذا بأحدهم يشير عليه بسبابته ويردف ذلك بقوله ( تعالا أتعرف عليك) ، يبدو أن هذا الشخص كان مهاب الجانب لدى بعض الطلاب وكان يمارس سخفه على الكافة ، ومادرى المسكين أننا ننحدر من شعب كفوة لم يرتضى الضيم يوماً ولم نسب أحداً بأمه ، إندفعت نحوه وقد أحالنى الغضب لكائن كاسر ، فهرب الرعديد قفزاً على المدرجات وهو يردد ( ح اطلع دين أمك ) ، قلت له فقط اثبت مكانك ودعك من دين أمى وأبى ، فدينهم دين محبة وسلام لادين أوغادٍ لئام ، وقد حفظت لى هذه الحادثة فيما يلى من أيام تقديراً وحظوة لدى بعض زملاء الدراسة المصريين ، لدرجة أن أحدهم أصر علىَّ لزيارة أهله بقريتهم كفر صقر ففعلت ، وقد احتفوا بى أيما احتفاء .

Post: #8
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-04-2009, 04:46 PM
Parent: #7

ابوبكر حامد

كل سنة وانت طيب

والمنبر الزقازيقي نور 000

ومازلت اسمع صوت ضحكتك كلما كنت برفقة ناس حقوق

متابعة جدا وباستمتناع هذا السرد الجميل000

Post: #9
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-04-2009, 10:56 PM
Parent: #8

ياسلام عليك يافافى ياسلام أسعدنى مرورك فأرجو أن لاتبرحى المكان فبكم ومعكم تأتلق الجنّة أنهاراً وظلا ، معبق تحياتى للجميل حاج الركز ، فقد كان أحد سكان 100 شارع الجيش وعلى أيديهم خطوت أولى خطواتى فى مشاوير المحبة ، والدعوة لكم ولكل الزقازيقاب بدول الخليج لتشريفنا وزيارتنا بالبحرين لنتغنى مع البلابل:

بيتنا نوّر وكلّو زينة

Post: #10
Title: Re: حكايا شرقاوية ........ أو نجوع الملح
Author: زينب التجاني
Date: 12-05-2009, 00:43 AM
Parent: #9

ازيك يا بكرى
والله منور وكل سنة وانت طيب

زدت البوست القا

واصل اندياحك الجميل


يابن مدنى
واخو نجاة وعزة

Post: #11
Title: Re: حكايا شرقاوية ........ أو نجوع الملح
Author: محمد صديق
Date: 12-05-2009, 06:45 AM
Parent: #10

سلامات يا ناس

بكرى ...ازيك وكل سنة وانت طيب والاولاد والمدام بخير

اهم حاجة مصطبة الجاويش...ولكوظ

Post: #12
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-05-2009, 12:37 PM
Parent: #10

إزيك يازوبة وإزى عمر والعيال ، ياسلام يازوبة على الزقازيق وأيام الزقازيق ، وكيف أخبار شوش الصغيرة أرجو ان تبلغيها عميق تحياتى فلازالت أصداء ضحكتها تتردد داخلى ، فى يوم من الأيام وخلال ونسة لم تتذكر شوش إسم زميلنا الفنان وليد مبارك فقالت (وليد حقوق) ومن يوميها صرنا ننادى وليد مبارك بهذا الإسم، وكما أسلفت فى دعوتى لعفاف وكل ناس الزقازيق بدول الخليج أوجه لك الدعوة ولأسرتك الكريمة لزيارتنا وتشريفنا بالبحرين.

Post: #13
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-05-2009, 12:43 PM
Parent: #12

سلامات ياجورج ياجميل ، مسطبة جاويش وذكراها تستدعى بالضرورة ذكر شقيقة روحى هلا أيوب البنت الجدعة قوى ، ودى دايرة ليها روقة بال وسيكام .

لكن الشقلبة فى الحيطة ماعندكم ، قلتَ لى قالوا ليهم ( لواييق زى الباسطة ، حليل أهلنا كان بقيسوا اللياقة بى ويكة مكوار ، بينما الويكاب هو بمثابة مقياس رختر ).
تحايا لاتحد لخالدة والعيال.

Post: #14
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-06-2009, 01:07 PM
Parent: #13

حتى لا امر مرورا عابرا
فانا مستمتع بجد
مستمتع حقيقى
وحاجز كرسى قدام

Post: #15
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-06-2009, 08:20 PM
Parent: #14

ابوبكر مساءات سمممحة 00

كلما اتذكر ناس حقوق طوالي اتزكر صديقاتي الحنينات

سامية اسماعيل(سمسمي) زي ما بحب اناديها 000

والغالية جدا مثابة00

والبرلوم مجتبى 00

وسيد الحوش عصام 00

وسقراط000 وما ادراك ما سقراط00

ورحاب الخواض اللي كانت معانا في الرياض

وتجمعها وزوجها الراقي الاستاذ عصام عبد العزيز صلة قربى

بحاج الركز وقضينا اجمل ايام مع بعضنا 00 والحمد لله للان

التواصل ممتد بينا حتى بعد انتقالهم لدبي 00

حقيقي اسرة الخرطوم مركز00

Post: #16
Title: Re: حكايا شرقاوية ........ أو نجوع الملح
Author: nazar hussien
Date: 12-08-2009, 03:20 PM
Parent: #15

بلاي....

مخلننا لي ناس هشام هباني ...وناس هجم النمر...والمركب انقدت بي عرمان...
وغاتسين في منبر كلونيتو شبراويشي...

بلاهي ما حرام عليكم...

كان تدونا خبر...

كل سنة وانت طيب يا أبو ...ما اتلاقينا في العيد
مع انو بيناتنا خمسة خطوات...بلاهي شفت جنس
الحالة دي...

عليك امان الله انا شغال من تاني يوم العيد
وبالليل شغال حيح

Post: #17
Title: Re: حكايا شرقاوية ........ أو نجوع الملح
Author: ميسرة سيد أحمد
Date: 12-08-2009, 07:08 PM
Parent: #16

أبو بكر حامد حبيت ازورك

في بيتكم العامر ده وأقدل

بين سطوركم الجميلة وصورتكم

الغائبة حتى اليوم ،،،،،،،،

شكلكم قريبين مننا والبحرين ما بعيده

لكن رجولكم كان جابتكم لبيت الله ورسوله

ما تنسونا من الدعوات وزيارة الأحباب بجدة الخير.

Post: #18
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-08-2009, 08:33 PM
Parent: #17

يا ابوبكرمشيت وين 000

خليتنا لنجوع الملح000

Post: #23
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-08-2009, 10:11 PM
Parent: #18

Quote: يا ابوبكرمشيت وين 000

خليتنا لنجوع الملح000


والله يافافى كان عندى إجازة طويلة إبتدت قبل الوقوف بعرفة بى يوم وامتدت حتى الأحد الماضى ، يوم الأحد نزلت الشغل وباقى لى زى ما اكون راجع من إجازة سنوية ، زحمة شغل وتعب ونوم بى إهمال ، بس البركة فيكِ ما إنتِ ست بيت ، وأنا حوار لى حاج الركز شيخى فى الطريقة وعليه حفظت مقامات الأدب والمحبة.

Post: #21
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-08-2009, 10:01 PM
Parent: #17

Quote: أبو بكر حامد حبيت ازورك

في بيتكم العامر ده وأقدل

بين سطوركم الجميلة وصورتكم

الغائبة حتى اليوم ،،،،،،،،

شكلكم قريبين مننا والبحرين ما بعيده

لكن رجولكم كان جابتكم لبيت الله ورسوله

ما تنسونا من الدعوات وزيارة الأحباب بجدة الخير.


ياجماعة قيام ، نحن فى حضرة رئيس لحقبة ديمقراطية لإتحاد الطلاب السودانيين بجامعة الزقازيق ، نرحب بيك بالمصرى ياريس ونجيب ليك فرقة حسب الله ، وبى السودانى نتغنى مع البلابل:

كنّا فرشنا السكّة ورود
لو كلّمتنا كان بى الجيّة

والله ياريس الصور حلفت ماتنزل معاى ، حاول مارس صلاحياتك الدستورية وكلّف واحد من الناس العندها فكرة كويسة عشان أرسلها ليهو على الإيميل.

بالله عليك ياريس لو عندك أى إجازة تشرفونا فى البحرين إنت والأسرة الكريمة ، ودى إعتبرا مباراة رد فى أرض محايدة عشان نرد على إمطارك لشباك الحجاج بفيض من الكرم وحسن الإستقبال وفيوض روحانية حاولت الطبيعة محاكاتك فأغرقت جدة بفيضانات وسيول هى قطرة فى محيط كرمكم الفياض.

لك محبتى وعميق مودتى

Post: #19
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-08-2009, 08:35 PM
Parent: #16

Quote: بلاي....

مخلننا لي ناس هشام هباني ...وناس هجم النمر...والمركب انقدت بي عرمان...
وغاتسين في منبر كلونيتو شبراويشي...

بلاهي ما حرام عليكم...

كان تدونا خبر...

كل سنة وانت طيب يا أبو ...ما اتلاقينا في العيد
مع انو بيناتنا خمسة خطوات...بلاهي شفت جنس
الحالة دي...

عليك امان الله انا شغال من تاني يوم العيد
وبالليل شغال حيح


أوّل حاجة كدى يانزار نسالمك ، كل سنة وانت طيب ، أها ياناس الزقازيق نعرفكم بى الزول الجميل نزار عثمان حسين ، رجل شاعر وفنان ، يعزف العود بكل أحاسيسه فيضيف للعود أوتار إضافية مستمدة من روعتو ، حبابك يانزار فى منبر ناس الزقازيق ، حبابك جيتنا وفيك ملامحنا ، يازول الناس هنا يصنعون الحب وهو بيننا ملك مشاع ، فلا تبرح هذا المكان .

Post: #20
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-08-2009, 09:47 PM
Parent: #15

Quote: كلما اتذكر ناس حقوق طوالي اتزكر صديقاتي الحنينات

سامية اسماعيل(سمسمي) زي ما بحب اناديها 000

والغالية جدا مثابة00

والبرلوم مجتبى 00

وسيد الحوش عصام 00

وسقراط000 وما ادراك ما سقراط00

ورحاب الخواض اللي كانت معانا في الرياض

وتجمعها وزوجها الراقي الاستاذ عصام عبد العزيز صلة قربى

بحاج الركز وقضينا اجمل ايام مع بعضنا 00 والحمد لله للان

التواصل ممتد بينا حتى بعد انتقالهم لدبي 00


ياسلام عليك يافافى ، جبتى سيرة الناس السمحين ، سامية إسماعيل تشبه عادل الجعلى فى حبهم للطرفة وتضحك كما يضحك من قلبها ، لكنها لاترتضى الحال المايل ولاتجامل أو تتجمل فى نقده ، لها ولعادل ولأسرتهم الحب والسلام والتحية.
مثابة حاج حسن شقيقة مناضلة وصامدة وعقلها يكبر سنها بسنين ضوئية ، أظنها تبوأت موقعها المناسب بأمانة المرأة بالحزب الإتحادى الديمقراطى ، الدعوات لها بالتوفيق والسداد.
مجتبى فاروق برلومنا الشليق أرهق أحمد عمر الباقر فكان يشكو حزنه بالقول (أربعة وعشرين محافظة وحوالى ستين جامعة ، مالقوا ليهم جامعة منهم لى مجتبى غير الزقازيق ) ، وهذه المقولة تعبر عن حميمية الرابط بين أحمد عمر ومجتبى الذى امتهن الصحافة الرياضية وكفى الله المؤمنين شر النقّة والغلاط .
سقراط زول جميل من زمن أجمل تزاملنا بالكلية وباللجنة التنفيذية لأسرة الطلاب السودانيين بكلية الحقوق ، فيه قوة شكيمة عادل الجعلى مع بعض المرونة ومعالجة المآزق بطرفة عميقة فى دلالتها.
سيد الحوش عصام دهب برلوم ولد بأسنانه ، مشاكس ومناكف فى بداياته ، أذكر أنه فى الجمعية العمومية دونت إفادة له بإسم عصام دهب فقاطعهم قائلاً (عصام الدين دهب ) فهمهمت فى سرى ( شوف كمان حلفاويين الزمن ده حريصين على الدين كيف) ، تمازجت لدى عصام تميز الحلفاويين وروعة ناس الأبيض فكان نتاج ذلك عصام دهب نسيج وحده ، له التحية والتقدير.
رحاب الخواض نقية وواضحة ، لاتخفى انفعالاتها ولاتجامل فى قولة الحق ، تمت إستمالتها للإتجاه الإسلامى لكنها عادت لجادة الطريق لأنها تملك رصيد قيمى لايتناسب وكيدهم وتصنعهم ، أذكر اننا إحتفلنا بخطوبة رحاب لمولانا عصام بكازينو النيل الأزرق مع زميل الدراسة طارق عوض الكريم ، وزملاء المهنة عمر عبيد وآمال عمر وإيهاب شكوكو ، تغنى ليلتها جمال فرفور ولم يكن قد امتهن الغناء بعد فأطربنا بشدوه وتطريبه العالى ، لك التحية يافافى فقد فتحتِ كوّة أشواق لبعض صحبى .

Post: #22
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-08-2009, 10:04 PM
Parent: #14

Quote: حتى لا امر مرورا عابرا
فانا مستمتع بجد
مستمتع حقيقى
وحاجز كرسى قدام


يامنصور كرسى قدام لى شنو ، إنت أطلع المنصّة - موش إسمك منصور ولقبك منص - وتيِّب

Post: #24
Title: Re: حكايا شرقاوية ........ أو نجوع الملح
Author: nazar hussien
Date: 12-09-2009, 06:47 AM
Parent: #22

Quote: فلا تبرح هذا المكان .


ابرحو!!؟؟؟ عشان امشي لي ناس ابراحيم بقال؟؟؟

Post: #25
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-09-2009, 10:34 AM
Parent: #24

النبي يا نزار حسين كان مشيت 00

خليك في المكان الدافئ دا 00

والله انا كنت مستمتعة وحاج الركز ببوستك بتاع الكهرباء الفتحتو لمحمد فرح

واتكيفت منك جدا000

حتى يا بكري كان لينا شرف مهاتفته برفقة سنيرنا السنوسي في جدة 00 لو تتذكر يا نزار حسين

ليك مننا كل الود 00 وسيبك من ناس بقال 00 وخليك زقازيقي العمق معانا00



يا ابو بكر حامد 000 عليك الله واصل حكاويك الحقوقية 00

وسنين البرلمة الاولى 000

انا جهزت ليك قهوة كسلاوية مع العنبابة والكرملله00 (ودي يفسرها ابو الزوز)

Post: #26
Title: Re: حكايا شرقاوية ........ أو نجوع الملح
Author: محمد صديق
Date: 12-09-2009, 11:26 AM
Parent: #25

سلامات يا ناس

بكرى ..مادام عفاف عازماك جبنة كسلاوية

ايه رايك اعزمك شية فى المسيد؟؟؟؟

Post: #28
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-09-2009, 10:58 PM
Parent: #26

Quote:

بكرى ..مادام عفاف عازماك جبنة كسلاوية

ايه رايك اعزمك شية فى المسيد؟؟؟؟


شية المسيد بتاعت محمد عصام وقطيع البصل الأبيض Chack Chack Chack

ياخى ماتعزمنى فى شمبوب (من خلف خطوط النيران) وبعديها قهوة وجلسة مع ست الشاى وعمك آدم بتاع خرج الموية وتحسره على زواجهم أيام زمان حيث تزف العروسة للعريس (تسليم مصنع) بعد انقضاء إسبوع على الزواج وسط ظلمة تستوى فيها نانسى عجرم و ...... "تمّها خيال" ، وين الطيب بشير من هذه الذكرى الحلوة ، ذكرى زواجه واحتفاء إبراهيم سليمان ومصطفى محمد الحسن وشاويش وقريبه أبو شريعة الذى يعمل بمجلس بلدى شمبوب بزواجه ، فى تلك الليلة كانت العروسة سوما فى كامل بهاءها ، فداعبتها بالقول ( ناس شمبوب ديل أظنهم قايلنك هبطتى عليهم بى كبسولة الزمن من المستقبل - خيال علمى)

Post: #27
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-09-2009, 10:48 PM
Parent: #25

Quote: النبي يا نزار حسين كان مشيت 00

خليك في المكان الدافئ دا 00


عليك الله يانزار حنية برلومتنا فافى ديل وين تتلقى زيها ، فافى دميعاتا قراب والنقطتين البعد كلاما ديل دميعات حنينات ، فافى برلومة بنكهة معتقة من نكهات السناير

Quote:
انا جهزت ليك قهوة كسلاوية مع العنبابة والكرملله00 (ودي يفسرها ابو الزوز)


يافافى الكرملله أظنها نوع من أنواع الحلاوة مقبولة منك رغم داء السكرى اللعين الذى يمنعنى فى بعصض الأحيان حتى من التواصل مع الناس الحلوين ، بس العنبابة دى إطرشنى ماطقشت أضانى ، ومنتظر الزناتى بالمذكرة التفسيرية

Post: #29
Title: Re: حكايا شرقاوية ........ أو نجوع الملح
Author: زهير الزناتي
Date: 12-10-2009, 09:01 AM
Parent: #27

يا سلام علي الونسة الطاعمة ... والكلام الجميل ... والحكي المقعد ... ابو بكر حامد الأمين الشهير ببكري حامد ... لديه مخزن من الذكريات لسه ولد صغير وذاكرته كويسه ما زينا ... يمين بالله انا في حاجات كتيرة صفيتها في الزقازيق دي زي المافي حاجة ... بس أكيد في ذكريات كتيرة جميلة لا زالت في الذاكرة والقلب ... ويا جماعة جبنة عفاف دي بالكرمللة بس ... حاجة ما بتعرفوها ما بنجيبها ليكم ... دا أسرار كسلاوية .... واها دي قعدة في البوست الجميل ده كنت أتمني إنه يتخصص في أولي الذكريات في الزقازيق ... وأيام البرلمة الأولي اكيد في حكايات كتيرة مستخبية ....

Post: #39
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 08:27 PM
Parent: #29

Quote: يا سلام علي الونسة الطاعمة ... والكلام الجميل ... والحكي المقعد ... ابو بكر حامد الأمين الشهير ببكري حامد ... لديه مخزن من الذكريات لسه ولد صغير وذاكرته كويسه ما زينا ... يمين بالله انا في حاجات كتيرة صفيتها في الزقازيق دي زي المافي حاجة ... بس أكيد في ذكريات كتيرة جميلة لا زالت في الذاكرة والقلب ... ويا جماعة جبنة عفاف دي بالكرمللة بس ... حاجة ما بتعرفوها ما بنجيبها ليكم ... دا أسرار كسلاوية .... واها دي قعدة في البوست الجميل ده كنت أتمني إنه يتخصص في أولي الذكريات في الزقازيق ... وأيام البرلمة الأولي اكيد في حكايات كتيرة مستخبية ....


الزناتى اتقتل يا مينز ، إنت ياخى من أيام الزقازيق ذاكرتك خربانة ، زى أحمد عمر الباقر ساعات نكون ماشين الإتحاد نلاقى زول أحمد عمر مودّر إسمو ، إقوم إسألنى عشان أغششو سريع ، مرّات بكون الزول قرّب لينا شديد ومافى طريقة أغشش ، أقوم أتقدم قدّام أحمد واسالم الزول بى إسمو بى صوت عالى ويخرج أحمد عمر من الورطة ، مرّة أحمد عمر كان شغّال طواف فى الزقازيق ودخل شقة شباب دفعتو فى سنة تالتة وشبكم ليك ( كيف يابرالمة - كيف الزقازيق معاكم ) واحد منّهم قال ليهو يا أحمد عمر نحن دفعتك ياخى ، تقول لى مانسقط فى الإنتخابات.

طبعاً يازهير أنا ماعشت تجربة البرلمة لأنى كنت مجمد السنة القبليها وجيت قبل البرالمة وخشيت توش فى السناير ساعدتنى الجتة والكرش التى أغرت أحدهم بدعوتى لقعدة ، أشيل واحلف إنى مابشرب ، وزولك شابكنى ( يابرلوم إنتَ ماعادّى الحالة واحدة ولاشنو ) وأنا أحلف ليهو : والله أنا زول شربوت ساكت ، ومرة جا واحد زيارة للزقازيق وأقسم إنّى قعدتَ معاهو فى قعدة شراب سنة 1976 ، قلتَ ليهو ياخى الوقت داك كان عمرى عشرة سنين"ماتمشى على البروفايل يازهير" ، وقلتَ ليهو لو أنا من الوكت داك بسكر كنتَ هسّى بقين (كديس بارات) .
بجيك يازهير بى رواقة لى أدب القعدات ودورنا الإسعافى كطائرات إخلاء للضحايا"بدون أسماء".

Post: #30
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-10-2009, 09:17 AM
Parent: #27

Quote: مع العنبابة


العنبابة دي كلمة كسلاوية جدا وغير زهير وجلا ومحمد صديق بالانتساب

حتى حاج الركز لسه ما وصلته لانه غرقان في الحديد والنار 000

عارف يا ابوبكر 00

الحياة دي لو اتعمقنا فيها نلاقيها مرتبة بصورة عجيبة 00

لما امتحنت للجامعة كنت شهادة عربية كما يسمونها 00 وكان ممنوع علينا دخول جامعات السودان

الثلاث في ذلك الزمان(السودان 00 وجوبا والجزيرة)بالاضافة لمعهد الكليات التكنولوجيا 00

يعني الفرصة فقط الدراسة في خارج السودان 00

الوالد كان عنده اعتقاد متملكه انه افضل مكان للدراسة هو مصر 00 رغم نسبتي العالية وقتها واللي ممكن تدخلني في سوريا ودول شرق اوروبا والهند وتحقق الحلم البرجوازي الي بتغرسوا اغلبية الاسر السودانية داخل اولادها وهو(الطب)00


المهم قدمت للبعثات وكنت مصرة على الدراسة في المنصورة لوجود قريباتي هناك ويسبقنني بسنين
ودخلنا انا وعمي للقنصل باعتبار انه يتم التوصية بتسجيلي في المنصورة 00

الا ان القنصل اصر على تسجيلي في الزقازيق التي يعرفها جيدا ويعرف السودانين واصالتهم من خلالها 00

وقد كان00

جيت الزقازيق وكنت كثيرة السفر للمنصورة في البداية رغبة في التحويل ولكن 00

مااجمل مربع كاي 00 وما اجمل ضحكة جميلة من نجاة وما اجمل محاضرة لدكتور مصطفى نبوي

وما اجمل احساس خوف من دكتور احمد زكي 00

وما اجمل اصدقائي الزقازيقيين وما اجمل ان تنتمي للزقازيق

وها انا زقازيقية هوى وهوية وفخورة000





تخريمة 000
علي جيفارتي الكبير لما نتفق عليهم انا وحاج الركز يرفع يديه لربنا ويدعو (يا رب تدي القنصل الصحة والعافية عشان خلى ماما وبابا يتفقو علينا)


بكوري ليك حبل ود ممدود ولي عودة

Post: #31
Title: Re: حكايا شرقاوية ........ أو نجوع الملح
Author: nazar hussien
Date: 12-10-2009, 09:55 AM
Parent: #30

Quote: النبي يا نزار حسين كان مشيت 00

خليك في المكان الدافئ 00


مع بكري حامد وفافي...

وفنجان جبنة بي شمالي
وفي يميني قفافي
مليانات حكيا حرفو طاااااعم وصافي

دحين باقي ليك تاني بمشي من هنا!!!!

Post: #32
Title: Re: حكايا شرقاوية ........ أو نجوع الملح
Author: محمد صديق
Date: 12-11-2009, 12:45 PM
Parent: #31

سلامات يا ناس

Quote: وفنجان جبنة بي شمالي
وفي يميني قفافي
مليانات حكيا حرفو طاااااعم وصافي

دحين باقي ليك تاني بمشي من هنا!!!!


نزار ...سلام

مادام انت زول بكرى حامد معناها انت زولنا تب...

وكمان نمّام...والنم ده باقى بيعجبنا ...

لكن داير تشرب الجبنة حقة عفاف من غير ما تاكل شية

المسيد؟؟؟؟

Post: #33
Title: Re: حكايا شرقاوية ........ أو نجوع الملح
Author: nazar hussien
Date: 12-12-2009, 07:03 AM
Parent: #32

Quote: لكن داير تشرب الجبنة حقة عفاف من غير ما تاكل شية

المسيد؟؟؟؟


حياك الله يا رجل يا شهم...
شية المسيد البياباها
الا تكون قارصاه عقرب....

أو يكون من ذوي العشب

وتشكر علي هذه الدعوة الكريمة والمقبولة مقدما...

Post: #34
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-12-2009, 10:46 AM
Parent: #33

Quote: سقراط زول جميل من زمن أجمل تزاملنا بالكلية وباللجنة التنفيذية لأسرة الطلاب السودانيين بكلية الحقوق ، فيه قوة شكيمة عادل الجعلى مع بعض المرونة ومعالجة المآزق بطرفة عميقة فى دلالتها



ابو بكر سلام 000

مرة فريق حقوق او تربية فاز على فريق زراعة(بعد نجمه افل)وكنا زعلانين

قابلت سقراط قدام بيت الطالبات وبطريقته الساخرة اللطيفة قال (انتو زعلانين ليه

فريقكم عامل زي الناس الطلعوا يقولو كورال من غير بروفات ) طبعا ضحكت من كل قلبي

وانتهت الزعلة 00

ليك وحشة يا سقراط 000




نزار حسين 00 تحيات

امسك في محمد صديق شديد 00 فهو مطعم جدا بنكهتنا الكسلاوية

وبكدا ضمنت شية مسيدية 00 وفنجان جبنة في قمة التاكا 00


انت يا محمد صديق 00 المسيد دي وين ؟؟(سؤال حنكشة في بلد الحديد والنار)

Post: #35
Title: Re: حكايا شرقاوية ........ أو نجوع الملح
Author: محمد صديق
Date: 12-13-2009, 03:09 PM
Parent: #34

سلامات يا ناس

عفاف ...ازيك

Quote:


انت يا محمد صديق 00 المسيد دي وين ؟؟(سؤال حنكشة في بلد الحديد والنار


عليك الله ...اسالى بكرى حامد.

Post: #36
Title: Re: حكايا شرقاوية ........ أو نجوع الملح
Author: البادي النور
Date: 12-13-2009, 03:34 PM
Parent: #34

بكوري يا حلو ... والله العظيم مستمتع حتى الثمالة ...
والباصات البينية مع فافي قمة الروعة والطعامة ...
يا ناس والله إنتم حلوين وما في زيكم ...
يا بكوري ... قطعت مصاريني بالضحك لما هرشت الفلاح الفتوة ...
طبعا من يومها وإنت الفتوة الأكبر في الدفعة ...
لكن يا بكوري تفوقت على المصريين في خفة الدم والظرافه ...
يا أخي الله يديك العافية ...
أجدادنا القدماء ناس رشيد القوم ومن شاكلهم مستغربين للحكاوي دي
وهم فاكرين الطعامة والحلاوة خلصت بسفر الأجداد ...
والله الزقازيق لم تنقطع من الطعامة والحلاوة في كل الدفعات والسنوات الدراسية ...
يا أخي إنداح ... أحكي وتفنن ...

Post: #37
Title: Re: حكايا شرقاوية ........ أو نجوع الملح
Author: الرشيد بابكر
Date: 12-13-2009, 03:55 PM
Parent: #36

Quote: أجدادنا القدماء ناس رشيد القوم ومن شاكلهم مستغربين للحكاوي دي
وهم فاكرين الطعامة والحلاوة خلصت بسفر الأجداد ...
والله الزقازيق لم تنقطع من الطعامة والحلاوة في كل الدفعات والسنوات الدراسية ...


البادي يا حلو...انتو كان ما ناس مدني ديل ناس بكري ديل كان الزقازيق دي بعدنا بقت احاجة تانية...نحن أيامنا أيام رفاعة رافع الطهطاوي و زكي جمعة ما بترعف تمشي لي منو و تخلي منو...بالمساء الا تعمل قرعة...لأنك ما بتعرف تختار تمشي وين...المدينة مليانة بالظرفاء و لو ابتديت أعد ليك عدد الظرفاء لفاقوا كل ناس الزقازيق في زمنكم...كان زمن زين...مش زمنكم المبشتن ده...يا برلوم...

Post: #38
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-13-2009, 10:57 PM
Parent: #37

سلام يا أجدع ناس رشيد وفافى ونزار حسين وجورج وبادى ، عاوز أرد على كل واحد بس النعاس حصل والنت التقول غازّين سلكو فى بيت نمل بطىء بطء شديد ، بجيكم باكر بى رواقة ، بس يافافى المسيد دى بالغتى فيها ، جورج عاوز اشوف فيك يوم عشان كده قال ليك أسألى بكرى ، كدى إحتياطياً أذكرى لى أبعد منطقة شفتيها جنوب الخرطوم عشان نعرف نوصّف ليك ( كر على وكر عليك كان قلتى السجّانة )

Post: #40
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 08:36 PM
Parent: #38

Quote: حياك الله يا رجل يا شهم...

وتشكر علي هذه الدعوة الكريمة والمقبولة مقدما...


يانزار عشان أقرِّب ليك الصورة ، محمد صديق صاحب الطيب بشير إتزاملوا فى كلية الشرطة دفعة الجامعيين ، القواسم المشتركة بيناتم التهذيب ونظم الأشعار وحب الخير والمروّة ، وقس على ذلك.

تحضرنى طرفة أطلقها الطيب بشير على محمد صديق حين تزوج من كسلا ، ومحمد صدبق من أبناء رفاعة ويطلق أهل الجزيرة على رفاعة وماجاورها "الشرق" ، فقال الطيب بشير أن محمد صديق إنتقل من الشرق الأدنى للشرق الأقصى .

Post: #41
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 08:41 PM
Parent: #40

Quote: مرة فريق حقوق او تربية فاز على فريق زراعة(بعد نجمه افل)وكنا زعلانين

قابلت سقراط قدام بيت الطالبات وبطريقته الساخرة اللطيفة قال (انتو زعلانين ليه

فريقكم عامل زي الناس الطلعوا يقولو كورال من غير بروفات ) طبعا ضحكت من كل قلبي

وانتهت الزعلة 00


ماجد سقراط زول جميل الدواخل ، ولاشنو يازناتى .

Post: #42
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 08:57 PM
Parent: #41

Quote: عليك الله ...اسالى بكرى حامد.


فى طريق الليل
ضاع المشهد الثانى
وضاعت زهرة الصبّار

................

فيا فافى :
هل غادر الشعراء
أم عفتِ الديار
أم شهادة عربية
أم توحيد مسار
المسيد يافى
تشبه صحار
غير أن سخرية الأقدار
كستها بالذباب وبالغبار
................................................

مرّة يافافى فى شقتنا بلكوظ بنسأل فى حناكيش زراعة عن بعض المسميات الشعبية ، سألتهم عن "المشلعيب" ، إجتهد أحمد سيد وقال ( ده البيشبه النجف) ، ولاتعليق

Post: #43
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 09:10 PM
Parent: #42

Quote: بكوري يا حلو ... والله العظيم مستمتع حتى الثمالة ...


يا بادى إستمتع بى راحتك ، بس أبعد من حتّة الثمالة دى لأنو ناس النظام العام كان لموا فيك بيجلدوك عشرين جلدة على الثمالة دى ، وبعدين بيشموك ، يا ثبتت عليك وبتموها أربعين جلدة ، ياطلعت براءة .

من الظرفاء يا بادى محمّدو الحلو ، أوّل مرّة لاقيتو فى المدرسة العسكرية وكنتَ لابس بنطلون جينز وجاكيت جينز ، محمدو خشَّ فينى بى العرض قال لى ( إنت أنبوبة غاز).
ومرة حكى إنو شاف فى النوم واحدة سمحة من بنات الزقازيق ، قام سلَّم عليها ، ردت وقالت ليهو ( يامحمّدو ما تخلّى العوارة دى ) ، بالله فى النوم محمّدو سلام ساكت مالاقيهو.
كان يمازحنى بقوله (لما أشوفك إنت وسقراط بحس إنى وجيه جداً) ، ياخى بلغوا تحياتى أينما وجد فمحمدو زول حلو ( من جوّاهو بس )

Post: #45
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 09:27 PM
Parent: #43

Quote: ...انتو كان ما ناس مدني ديل ناس بكري ديل كان الزقازيق دي بعدنا بقت احاجة تانية


فرحانة بيك كل النجوم ياروش ، ياسلام على مدنى وناس مدنى بالله تضحك فى كل مكان حتى فى المقابر حيث كان رجل البر الراحل شيخ العرب ينثر الفرح بقصد التخفيف على اهل الميت ، فى إحدى المرّات فى مساء حالك السواد أحضر أهل المتوفى جنريتر لم يفلحوا فى تشغيله ، أشار عليهم أحد الحضور بحفر مجرى فى الأرض وسكب الوقود وإشعاله ، نظر شيخ العرب لجثمان المتوفى وخاطبه بقوله ( هلاّ هلاّ ... نارك ولّعت من هنا ).

الكابتن قاسم سنطة المدافع الفولاذى لأهلى مدنى أيام مجده يملك كشك بالسوق الجديد ، إستأجره أحدهم وباشر من خلاله بيع السمك ، درج سنطة على المرور يومياً على الكشك وأخذ حصة مجّانية من السمك ، الرجل المستأجر الكشك كان محرج بعض الشئ ، وذكر ذلك للراحل زرّاع وهو أحد ظرفاء مدنى ، فى إحدى المرات حضر سنطة كعادته لأخذ السمك فانبرى له زرّاع قائلاً : ( إنتَ ياسنطة الزول ده مأجر ليهو كشك ولا بحر ).

الصاروخ من ظرفاء مدنى أيضاً تعشّى مع بعض صحبه عند الحاجة زهراء التى يدير محلها إبنها صابر بمربع 11 ، الجماعة متعودين إدفعوا الحساب بعد العشا ، الصاروخ وقف إحاسب فى صابر وصابر مامتذكر الجماعة شالوا شنو وقعد إتذكر ( أها أربعة فول واتنين طعمية وتلاتة سلطة و سبعة بيض - هنا قاطعه الصاروخ بإنفعال ( يا صابر سبعة بيض كيف - نحن أكلنا ولا خبزنا هههه).
ولى عودة لظرفاء مدنى

Post: #44
Title: Re: حكايا شرقاوية ........ أو نجوع الملح
Author: الرشيد بابكر
Date: 12-15-2009, 09:17 PM
Parent: #42

Quote: مرّة يافافى فى شقتنا بلكوظ بنسأل فى حناكيش زراعة عن بعض المسميات الشعبية ، سألتهم عن "المشلعيب" ، إجتهد أحمد سيد وقال ( ده البيشبه النجف) ، ولاتعليق


هذه الحكاية أحكيها للمرة ال514 كما يقول صديقي أبو الزوز....

في جلسة سمر جمعت عدد من الأسر السودانية هنا في أبو ظبي..تجمع الأطفال في طرف يتنتافسون في مدى معرفتهم بببعض الأشياء السودانية..فسالت واحدة هل تعرفون العنقريب...فأجبت أخرى قليصة طبعا بنعرف العنقريب...العنقريب ده أكله شعبية...

لا تكثر من أكل العنقريب هذا المساء أخي بكري حتى لا تصاب بالتخمة...

Post: #46
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-15-2009, 09:32 PM
Parent: #44

Quote: لا تكثر من أكل العنقريب هذا المساء أخي بكري حتى لا تصاب بالتخمة...


لامناص من التخمة ، مادمت بمعيتى كامل الدسم والفهم ياروش ياجميل

Post: #47
Title: Re: حكايا شرقاوية ........ أو نجوع الملح
Author: الرشيد بابكر
Date: 12-15-2009, 09:53 PM
Parent: #46

Quote: ياسلام على مدنى وناس مدنى بالله تضحك فى كل مكان حتى فى المقابر


و الله معك الف حق...صحيح ان لمدني طعم و لون و رائحة خاصة بها...كنا نسكن بحي الدرجة..يجاورنا عمنا عبدالله محجوب رحمة الله علية وبعدهم عمنا عثمان عطا المنان (ناس ياسر لورد)...أمامنا عبدالرحمن أحمد بلة (بيطرة الزقازيق)...يجاورهم عمنا أحمد عباس المحامي...في الشارع الخلفي ناس جريس و في آخر الشارع عمنا محمد سيدأحمد...و هناك كثيرون عزاز علينا...كنا ندخل تلك البيوت و كأنها بيوتنا..تلقى أي زول يلاقيك بالترحاب..و كما قال حميد من غير يقول الزول منو و لا عل حتى الداعي خير...و البنيات من شوفتي تجري على هدم في محلها الشوق يترسم...تندهني حتان بالاسم...البيت ده بيتك يا الحبيب أقعد مخير و ماك غريب..
و الله يا بكري و ما طالبني حليفة زي ما بيقولو أهلنا...لقد حرمنا من مثل هذا التواصل الحميم يوم أن انتقلنا الى الخرطوم في العام 1984...و لكني تواصلت مع مدني بعد ذلك كثيرا...فان لمدني في نفسي مكانة خاصة...تصور ان معظم أصدقائي من أبناء مدني...

Post: #48
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-16-2009, 12:04 PM
Parent: #47

لك التحايا يا روش ولمدنى ولكل ربوع الوطن العزيز.

مادمنا فى حضرة مدنى أستسمحكم أحبتى أن نتعرض لرابطة أبناء مدنى بالزقازيق وعضويتها ، وقد إنفصلت الرابطة فى العام 1986 عن رابطة أبناء الجزيرة ، وكان فى طليعة المؤسسين :
حافظ أبوعاقلة وحسام شرف الدين - لغة عربية / عادل عبدالقادر إمام وأمير مالك أمين نابرى وصفاء محمد الحسن - حقوق / صلاح التجانى ومها الكارب وعلى دافورى وعادل ريكس ونادر حسين سعدابى وعاطف منصور وقند اليمن - زراعة / ياسر عثمان عطا المنان "لورد" وكمال يوسف رواج "زولوجى" - بيطره ، وتوالت الأجيال فكان :

كلية الزراعة : سامية يوسف ابراهيم - المغفور لها بإذن الله خالدة يوسف - نجاة حوفى - عزة التجانى - هيفاء - أمل جابر - رابعة العدوية بشير - هدى محجوب - معتصم محمد الياس - الفاتح على بشير - عادل وزيرى - هشام الفحل - محمد فاروق - جمال محمد عبدالحميد - مصطفى محمد على (تزوج شقيقة زوجة والده - صار عديلاً لوالده)

كلية البيطرة: أسماء وأروى محمود خالد - هندأحمد عباس - نادر الزبير

كلية الصيدلة : خالد حسن - طارق محمد خير

كلية الطب: زهير على عبدالمجيد

كلية الحقوق : أسامة جاد الله النعيم - نظام الدبن حسب الرسول - أبوبكر حامد - إدريس محمد إدريس "تراورى" - أميرة على - زكى صديق مساعد - الدندراوى محمد سليمان قبّانى "سميت محطة قبّانى بشارغ القبة على إسم جده"

كلية التجارة: بكرى على الشريف - أحمد السنى - طارق حسن عبيد - عمر محمد أحمد عباس - إقبال عبدالخالق "بلبل" - السهيلى مجذوب حمد - محاسن الخواض - مجدى حمد- عقيل - حسنى مامون حامد - خالد أبوسنون - عبدالهادى عدلان - هويدا محمود حافظ - طارق عمر - عبدالباقى النور

كلية العلوم : محيى الدين عبدالستار - يوسف محمد نور الجليل - رفعت - مراد ظريف منصور - يوسف محمد يوسف

كلية التربية: خالد دفع الله - مجيى الدين اسحق - إقبال على - عبدالله الزبير - أمين طه عوض الكريم الخواض



كلية الآداب: على حسن - راخية الحسن - سناء يعقوب - متوكل

معهد تجارى: مجدى الأمين عالم "بهلة" - عصمت قرشى عبدالقيوم- أنور حسن خالد - مالك محمد الأمين - إشراقة عبدالرحيم - إلهام حسن - تاج السر أب قرجة

سأعود مجدداً لإستحضار من سقط إسمه سهواً.

Post: #49
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-17-2009, 08:15 AM
Parent: #48

ازيكم 00

انا بقيت يا ابوبكر من سكان المكان دا

ومن غير ما استاذن بجي داخلة طوالي شايلة فناجين قهوتي لضيوفك

000
وما دام حكيتو عن ناس مدني في الزقازيق

انا ح احكي ليكم عن ناس كسلا في الزقازيق

بس اجيكم برواقة 00

عندي حوش شعر نقي وجميل مفتوح بهناك

حقيقي حبي للشعر ح يدخلني باب الغاوون

Post: #50
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-17-2009, 11:17 AM
Parent: #49

Quote: ومن غير ما استاذن بجي داخلة طوالي شايلة فناجين قهوتي لضيوفك


يافافى الزول جوه بيتو ماعايز إستئذان


Quote: انا ح احكي ليكم عن ناس كسلا في الزقازيق


كسلا أشرقت بها شمس وجدى
وهى بالحق جنة الإشراق

كسلا أهدتنا إبراهيم سليمان وعبدالرحمن شاويش ومصطفى محمد الحسن وخالدة قسم البارى وفافى وجلهم بروعة جبال التاكا وضريح سيدى الحسن ، كان لإبراهيم سليمان مخطط لزواجى من إحدى حسان كسلا ولم يحالفنا التوفيق ، وإلا لتغنينا :

والخزاين ذاتا رزن
وكان داير إقوم
سيدى الحسن لى آسيا
بابورك فى الأراك

Post: #51
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-17-2009, 01:06 PM
Parent: #50

Quote: كسلا أشرقت بها شمس وجدى
وهى بالحق جنة الإشرق

sudansudansudansudan129.jpg Hosting at Sudaneseonline.com



الله على الاحساس اللا محدود لناس كسلا وهم داخلين كسلا من بعيد ويظهر ليهم شكل الجبل كدا 00

طلسم احساس غريب سكان كسلا نفسهم ما قادرين يفكو شفرته000

يبهرني كل الفي الباص يشابو باعناقهم عشان يشوفو ابداع الله فيما وراء الجبل

انسانا وطبيعة وجمال وحياة متفردة

Post: #52
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-19-2009, 04:25 PM
Parent: #51

Quote: يبهرني كل الفي الباص يشابو باعناقهم عشان يشوفو ابداع الله فيما وراء الجبل

انسانا وطبيعة وجمال وحياة متفردة


نفس السلوك ظللت أمارسه منذ سنى الطفولة الباكرة وحتى يوم الناس هذا ، بمجرد مغادرة البص لسوبا أرقب الشارع من نافذة البص ، كم تزداد فرحتى عند رؤية تاكسى مدنى بلونه الأحمر ، وأستمر ألثم الطريق بمقلتى وكأنى بى أفرد لأشواقى بساطاً تسلكه عند الوصول على غرار بروتوكولات الأستقبال الرسمى لشخوص الزائرين ، هى ليست بزائرة ولكنها اكتسبت فخامة بحجم أشواقها وتلهفها ......... ونواصل

Post: #53
Title: Re: حكايا شرقاوية ........ أو نجوع الملح
Author: عصام دهب
Date: 12-21-2009, 09:32 AM
Parent: #52

يبدو أنك أفترعت هذا البوست لتبكينا يا بكور ..

و الله إني أقرأ و دموعي تنحدر لكني مستمتع ومبسوط ..

عليك دين أمك يا بكور كان توقف .. إن شاء الله أموت ذاتو ..

Post: #54
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-21-2009, 09:50 AM
Parent: #53

الدهب المجمّر سلاماً وتحية ............
والله ياعصام أعجز عن وصف شعورى تجاه ماقمتم به من إفراد لهذه المساحة لنتواصل عبرها ، ياخى دى عملية تجديد دم وتلميع قلب وإنعاش روح ، أبتهل للمولى عز وجل أن يثقل بها ميزان حسناتكم يوم لاينفع مال ولابنون.
والله ياعصام الجراب ملان حكاوى بس بحاول أتهيأ نفسياً حين الكتابة عن أهم مرحلة من مراحل حياتى وحياة الكثيرين ممن عاشوا نفس التجربة ، أى اننى أرقب الميقات الزمانى الذى ذكرته لمجتبى حين الكتابة عن هلا أيوب.
تحايا نواضر ياشقيق الروح ، اطال الله عمرك واعانك على فعل الطاعات ، تحايا لأسرتك الكريمة ونترقب زيارتكم للبحرين فى أقرب فرصة ممكنة.

Post: #55
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-23-2009, 08:54 PM
Parent: #54

هلا أيوب إنسانة إستثنائية فى زمن إستثنائى ، بحكم أننى جمّدت السنة التى قبلت فيها فقد قدمت للزقازيق مع بدء العام الدراسى ، على عكس البرالمة الذين بدأوا بالتوافد فى شهر يناير ، وعند حضور البرالمة نصحهم السناير بملاقاتى لآوضح لهم المقررات ومافاتهم من دروس ، كنت حينها معتكفاً بالشقة وطلب منّى الذهاب لبيت الطالبات الكائن بشارع متفرع من شارع الزقازيق وإسمه على ما أذكر (الزهراء) ، ذهبت واستقبلتنى هلا أيوب بطريقتها العفوية ، وقالت ( ده يا هو بكرى الفالقننا بيهو ) يبدو أنها كانت تتصورنى بملاحة حمدى الفضلى ، فكان ردّى ( أنا لما سمعتَ هلا إفتكرتَ عيونك خُدُر ) ضحكت حتى سالت مدامعها ، وكانت هذه البداية لعلاقة راسخة ، كانت هلا نعم الأخت والصديقة ، كنتَ أحياناً أقول لها ( بعد عشرة سنة من التخرج كان ما عرسوك بدق صدرى وسط البلد وأعرسك) كانت تضحك ضحكتها المميزة ، سكنت هلا مع الرائعة أميرة سيد أحمد عبد الهادى ، كنت أزورهم فى شقتهم وتسألنى أميرة : تشرب شاى ولا أوفلتين ، وأوفلتين هذه لم تطقش أضانى من قبل فكنت أرد : شاى ، بعد قريب السنة كنت مع هلا أيوب واعتزمت القيام بواجب الضيافة فسألتنى : تشرب شنو ، قلت لها عندكم شنو ، ذكرت لى شاى وأوفلتين ، فقلت لها أوفلتين ده شنو ، فقالت لى سأجهزه وسيعجبك ، شربتُ الأوفلتين وكدتُ أتغنى ( لو تعرف كيف يا أجمل طيف ... ضيّعنا سنين مابنتقابل ) الموضوع ما موضوع مابنتقابل الموضوع موضوع جهل من الأساس ، لم يدر بخلدى حينها أن قائمة المشاريب الساخنة يمكن أن تخرج عن ثنائية شاى وقهوة ، حتى تعرّفتُ على الأوفلتين وفى مرحلة لاحقة تعرفتُ على السحلب ، وكنت حين أزور القاهرة أحرص على الذهاب لمحل أبو حيدر بميدان روكسى ، ولى عودة عن روكسى وأحمد عمر حين ثقب طبلة أذنى وهو يردد (روكسى عشقى) ويبدو أنه عشق خيالى .............. ونواصل

Post: #56
Title: Re: حكايا شرقاوية ........ أو نجوع الملح
Author: الرشيد بابكر
Date: 12-23-2009, 09:01 PM
Parent: #55

بكري الحبيب..كتاباتك بطعم الأوفلتين و دسامة السحلب...واصل دون توقف ما استطعت الى ذلك سبيلا...

Post: #57
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-23-2009, 09:46 PM
Parent: #56

Quote: واصل دون توقف ما استطعت الى ذلك سبيلا...


عشانك يانيل
ياليل
ياسمح يازين

(يازهير إعتبرا محلبية وصندلية وسرتية ومجموع وضفرة - ويابنية جرّى الذكر لى الرشيد ودبابكر )

حكايتى مع روكسى أنّ الرائع أحمد عمر الباقر كان بردد دوماً (روكسى عشقى) بحكم انه وأسرتهم عاشوا بها حين كان والده د. عمر الباقر عليه رحمة الله يحضّر للدكتوراه بعين شمس ، فى إحدى المرّات أصر علىَّ أحمد لإصطحابه للقاهرة لزيارة بعض الأشقاء بروكسى ، نزلنا من البيجو بميدان أحمد حلمى وعبرنا محطة السكة الحديد وصولاً لمحطة كوبرى اللمون ( لأ أدرى أيعنون الليمون أم شئ آخر) بميدان رمسيس ، كانت هنالك ثلاثة قطارات مترو هى عبدالعزيز فهمى والنزهة والميرغنى (وهذا يصادف هوىً فى نفسى بحكم إنتمائى لبيت ختمى) ، وقد أسلمت قيادى لأحمد عمر بحكم معرفته بالمنطقة وعبارة روكسى عشقى التى شنّف بها آذاننا ، يبدو أن أحمد عمر تشابه عليه المترو ، وبدت المناظر غير مألوفة له ، فى المقعد المقابل جلس إثنين من الإخوة الصعايدة ويبدو أنهم يزورون القاهرة للمرة الأولى ، همّ أحدهما بسؤالنى فانتهره الآخر قائلاً ( دول صعايدة زيِّنا) فصدرت عنى همهمة لم أرغب فى كتمها أو إظهارها ، أمضينا زهاء الثلاث ساعات فى تمشيط المنطقة إلى أن اهتدينا للشقة المعنية ، تورمّت قدماى وتعبتُ تعب سيد الترمس لما غدت المسافة بين أذان المغرب والعشاء مقدارها ألف يومٍ من ماتعدّون ، وبائع الترمس هذا يمضى سحابة يومه متجوّلاً بجردلى (طلس) أحدهما ترمس والآخر كبكى أو كبكب كما يحلو لهم مناداته ، ولحرصهم على أداء صلاة العشاء بعد أوبتهم من مشاوير المحبّة فلا مناص من ترقب أذان العشاء ، وأغلب ظنّى أنهم من عناهم شاعرنا الغنائى (إنتَ نايم ولاصاحى ... ولا طرفك من طبعو نعسان) وهذه الأغنية كان يحتال بها السناير فى جلسات فنجان شاى حين يلزمون الحضور بترداد هذا المقطع الذى لم نعرف له تالى أو سابق حتى استمعت إليها بصوت بادى أحمد الطيب ، ويكون المقصد الإستماع لإحدى الحسان لإضافتها كحائط مبكى لرقاق الحال.

المكسب الذى نلته من روحة روكسى أن أحمد عمر لم يعد يجروء على ترديد عبارة (روكسى عشقى)

آخر القول:

أنا أعمل بالمنامة ، إذاً على أن أنام .............

تصبحو على خير يا الرشيد السقيد ، أقصد الرشيد بابكر

Post: #58
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-24-2009, 10:16 AM
Parent: #57

تتخيل يا بكرى
ان ما تكتبه انت ليلا , وانت فى (منامتك ) تستلقى
اتلقاه انا , بواكير الصباح الآتى
وانا فى (رياضى ) استلذ
احبك يا اخى
اذ جعلت صباحى بهذا الجمال
تعرف
لو كتب كلنا عن ذكرياته ومواقفه الزقازيقية بهذا التجلى
فانى ابشرك -ولو بعد حين
بسفر زقازيقى يباع ويشترى
بالنفائس الغاليات
اعجاب يتلوه اعجاب يتلوه اعجاب

Post: #59
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-24-2009, 11:23 AM
Parent: #58

Quote: احبك يا اخى
اذ جعلت صباحى بهذا الجمال


الصباح الباهى لونك يامنص يا حبيب ، والله يا منص رجعة الزقازيق عاوزنّها ، بس المشكلة هل نملك نفس الإحاسيس وفرائحيّة الدواخل ، تبدل الهم ومنظورنا للحياة مع الزواج والأطراف الصناعية التى لاحراك بدونها وحتى إجازاتك مرتبطة بإجازة مدارس هذه الأطراف الصناعية ، لله الحمد والشكر على هذه الأطراف الصناعية التى تضمن لنا ديمومة الحركة والسعى شان عيون أطفالنا ما تضوق الهزيمة ، غايتو الأطراف مسهلة حركتنا ورزقنا بس يعلم الله تزيد المرء محركةً على محركته التى يضيفها تقدم العمر ، لهفى على من تغنّى:

يا بنت عشرينَ والأيّامَ مقبلةٌ

ما ذا تريدين من موعود خمسينَ

( عشرين سنة فى كوبر ، دى كان تابعتَ مشيتا تجيب ليك غضروف وتشمط فيك عصبة تجعلك تنحنى كعود الثقاب بعد إشعاله)

منصور يا منصور ... بى زيارتك انا مسرور ، وكتين ماجيت خش طوّالى ما تستنا الدور.

Post: #60
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-25-2009, 11:02 PM
Parent: #59

من الثنائيات المميزة ثنائية إبنى كوستى على وشيخ الدين الذين درسا معهد تجارى وسكنا سوياً طوال أيام الدراسة ( مع إنها ماطويلة بإعتبار سنة برلوم وسنة دبلوم ) ، وعلى هذا هو ابن عم هارون مهدى هارون خريج معهد تجارى أيضاً ، ولتلازمية على وشيخ الدين أطلق عليهما عوض كدركة لقب البخارى ومسلم ، وكانت بين على وشيخ الدين الكثير من المناكفات ، ففى إحدى المرّات وفى سانحة نظافة نادرة الحدوث قام شيخ الدين بتنظيف الشقة وكان على فيما يبدو متكاسلاً عن مساعدة شيخ الدين الذى أحرجه بقيامه بنظافة غرفة على وقام بإزالة بغض خيوط العنكبوت التى نسجت على غرفة على هارون ، فما كان من على سوى الإعتراض وبحجة هى أوهى من بيت العنكبوت فخاطب شيخ الدين قائلاً : ياخى القال ليك نضّف خيوط العنكبوت دى منو؟ ياخى أنا خالّيها مخصوص عشان تقبض الباعوض ..... بالله على ده موش سريالى هههههه.

من نوادر على هارون أنه إلتقى زميلنا صدّيق إبراهيم عوض الكريم وهو أيضاً من أبناء كوستى ، حكى على لصدّيق فلسه وأنه لم يتذوق طعم الأكل طوال اليوم ، وكانت بحوزة صدّيق ثلاثة جنيهات أو أقل قليلاً ، فاصطحب على لمطعم حدّوتة وطلب خمسة سندوتشات بيرغر ، وفضّل الإنتظار ريثما يشبع على وكان يمنى النفس بسادويتش أو إثنين على أقل تقدير ، قام على بإلتهام السندوتشات الخمسة وحمد الله على ذلك وافترقا ، إلتقيت صدّيق بشارع القومية وقبل أن يلقى إلى بالسلام باغتنى بقوله : ياخى على ده بياكل البيرغر زى مابيكون بياكل فول ، والقصد أنه كان يتحتم على على هارون أن يأكل بتلذذ وبمعقولية وليس كما يأكل الفول رخيص الثمن .

وعلى ذكر صدّيق إبراهيم فقد اشتهر صدّيق بالنسيان ، يحكى أنه فى إحدى المرات وضع براد الشاى على البوتجاز وسرح بخياله أن هذا الشاى يستلزم سفّة تعقبه ، فتوجه على الفور لمحطة القطارات ومنها لميدان العتبة وقفل راجعاً للزقازيق فوجد البرّاد تحوّل لكتلة ألمنيوم ، ولو عرف الكلام لشكى إليه بعبرةٍ وتحمحم أن بالغت ياصدّيق وبالغ كمان خيالك.

بعد التخرّج زرت كوستى وبمعيتى أحمد عمر الباقر وقضينا ليلتنا مع صديق الذى قام بواجب الضيافة وجهّز العشاء وقبل أن نخلد للنوم ناولنى صديق جلابية ووقف بعد ذلك خارج الديوان بزاوية لايراه عبرها أحدٌ سواى ، ساورتنى الشكوك أن ثمّة مكروه قد حدث جعل صدّيق ينادينى بهذا الطرف الخفى ، حين وصلته بادرنى بالقول : هسّى أحمد عمر ده أجيب ليهو جلابية مقاسو من وين؟ والله ضحتُ ضحكةً لازالت تردداته بداخلى حتى يوم الناس هذا.

Post: #61
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-26-2009, 11:56 AM
Parent: #60

اما حالة النظافة التى انتابت عليا
ذات زهجة وقلة شغلة
فان كانت حالة ملازمة لأثنين من الزملاء المرافقين لى فى السكن
فى ذات الشقة , المطلة على ترعة الشبان المسلمين
حرى بى ان احكي عنهما واتذكرهما
وبالمرة كده نحاول نجاريك فى حكيك الجميل وكلامك الطاعم
اولهما
كان يعانى من فوبيا نظافة فظيعة
ليس هو رفعت نور الدين
الذى ورث منه فوبيا النظافة ولكن بعد ان قطعنا انا والرشيد وكيمو والفاتح محمد خير
شوطا بعيدا من التعود على هذه الحالة
واعنى فوبيا النظافة
تعرف يا بكرى
رغم ان البيت النظيف هو مطلب كل آدمى ولا شك
الا ان وسواس النظافة
وسواس قاتل
له مقدرة فظيعة على قتل كل استمتاع , ووأد احلام (الكسل اللذيذ المشروعة بعض الأحيان )
اخونا وسينيرنا المبجل له التحية والتجلة اينما كان وحل
طارق حيدر ابوبكر الحلاب
كان يعانى من فوبيا نظافة فظيعة
لدرجة تعقد
انا شخصيا دخلتنى خوفة من الطماطم
من ما شفت ليك طارق الحلاب بيهريها ليك بالموية والصابون
آى والله بالصابون انا لا غلطان ولا ببالغ
طبعا هو كان فى السنة النهائية زراعة قسم المحاصيل
اظنه عرف مما درس مشاكل الاثار المتبقية للمبيدات على الخضروات السوقية خاصة التى تؤكل طازجة
لكن المعلومة العلمية دى انا اظنها كانت مكنة اضافية منو ساكت للتشفى من صنف الطماطم الموجودة فى السوق
التقول عنده تار بايت معاها
طماطم الصلصة البيختوها فى الحلة
بيديها تلات وشوش غسيل موية وصابون ,
آل ايه , دى ما منها مشكلة عشان بتدخل النار
طماطم السلطة ديك
بس اسكت عد
غسيل لامن تآمن , ولونها الأحمر يبهت وحالتها تبقى حالة
قلت لى طارق الحلاب
من ما عرفتك ياطارق
اصبح شعارى
عيبوا لى الطماطم الوسخانة
شفتوها عليكم الله كتلت ليها زول ؟؟؟!!!!

Post: #62
Title: Re: حكايا شرقاوية ........ أو نجوع الملح
Author: مشاعر بدوي
Date: 12-26-2009, 05:39 PM
Parent: #61

بكورى سلامات


كل يوم انوى ادخل الحوش بتاعك وفى يدى هدية


لكن الظروف ما ساعدت


بجيك راجعه ومعاى الهدية بس انشاء الله تكون موجود وخلى الباب فاتح

Post: #63
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-26-2009, 06:55 PM
Parent: #62

Quote: رغم ان البيت النظيف هو مطلب كل آدمى ولا شك
الا ان وسواس النظافة
وسواس قاتل
له مقدرة فظيعة على قتل كل استمتاع , ووأد احلام (الكسل اللذيذ المشروعة بعض الأحيان )


والله يامنص زى ماقالوا أهلنا الشى كان فات حدّو بينقلب لى ضدّو ، الوسخ ما حبابو ، بس فوبيا النظافة مدمّرة وتقتل كل استمتاع كما تفضّلت ، فى تعاملى مع العيال بحاول تعويدهم على النظافة والنظام ، بس فى بعض الأحيان بشعر بى تأنيب ضمير وأقول جوّاى بلاش تقتل فيهم براءة الطفولة وعبثيتها ، بالله عليكم وانتوا أصحاب خبرة وباع فى هذا المجال ما العمل؟

Post: #64
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-26-2009, 07:07 PM
Parent: #63

Quote: كل يوم انوى ادخل الحوش بتاعك وفى يدى هدية


يا توتة جيتك فى حد ذاتا هدية ، ومازاد عن ذلك فهو من فيوض كرمك ، الباب كما القلب مشرع لك فى كل الأوقات

Post: #65
Title: Re: حكايا شرقاوية ........ أو نجوع الملح
Author: الرشيد بابكر
Date: 12-26-2009, 07:46 PM
Parent: #64

Quote: الباب كما القلب مشرع لك فى كل الأوقات


بكوري...و باب الروح كيف...بالله خليهو متاكى عشان ننسرب...

باب الروح متاكي إنسربي
صاحيات الحدائق أرعي
قبال منجنيق الخوف يعاود ضربي
قبل الطير وصعلوك النحل منكبي
هشي العافية من تمري المخمر وعبي

Post: #66
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-26-2009, 08:10 PM
Parent: #65

Quote: بكوري...و باب الروح كيف...بالله خليهو متاكى عشان ننسرب...


وكيف ينسرب من تخذ الحنايا سكنا
وأضاء الروح وهجاً وسنا

Post: #67
Title: Re: حكايا شرقاوية ........ أو نجوع الملح
Author: الرشيد بابكر
Date: 12-26-2009, 08:46 PM
Parent: #66

يضون أيامك ان شاء الله يا يابا...

هذا دعاء من بعض ما هو مخزون في ذاكرتي من حبوبتي حاجة أمونة رحمة الله عليها...و هي التي كانت تناديني برشيد القوم...كانت حبوبتي تخصني بمحبة شديدة تثير غيرة أندادي من أبناء و بنات أسرتي..ربما لأنني كنت و ما زلت صديق للأطفال و كبار السن...
و محبتي للأطفال هذه رسخت عند أفراد فهم أنني لن أنجب أطفالا حسب اعتقادات سائدة في مجتمعاتنا...و كان عندما تزوجنا نجاة و أنا أننا لم نرزق بأطفال لفترة طويلة...فلم ألحظ قلقا عند أحد لأنهم كانوا يؤمنون بأن هذا طبيعي...حتى أكرمنا الله بأمنية...فسقطت كل اعتقاداتهم...ذكرني هذا بسكان الأمريكتين الأوائل عندما أتي اليهم المكتشفون الأوائل أيضا...كان لديهم اعتقاد بأن الرب الأبيض سوف يأتي في منازل كبيرة...و كان عندما رست سفن المكتشفون أن تجمعوا لملاقاة الرب..أعتقد أنه كان كريستوفر كولمبوس...كان يلبس البدلة التي نسميها نحن بالبردلوبة و كان يدخن غليونا...عندما أدخل كولمبوس يدية في جيبة اندهشوا و لكنها عندما أخرج الدخان من فمة خروا راكعين...كان كولمبوس دكتاتورا و كان قاسيا جدا مع السكان الأصليين...فثاروا على الرب و تجرأ أحدهم و أطلق سهما على الرب فنزف فانكسر حاجز الخوف و عندما سقط...سقطت اعتقاداتهم و خوفهم ثم اجتمعوا علية و قتلوه...

أمنية كانت السهم الذي أسقط اعتقادات أهلي...كانت أمنية و هدية من الرب حفظها...كنت بين أن أسميها أمنية و هبة...و لكن غلب اسم أمنية...

Post: #68
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-26-2009, 09:19 PM
Parent: #67

Quote: أمنية كانت السهم الذي أسقط اعتقادات أهلي...


حفظ الله لك أمنية ومهند زحفظك ونجاة كنانةً تصوّب سهامهما ضد كل مظاهر القبح قولاً وفعلاً ومعتقداً .

يا رشيد ناس الزقازيق ديل مشوا وين خلّونا نتجادع زى أولاد حاج الماحى.
وعلى ذكر أولاد حاجى الماحى أعتقد أن سر تميزهم يكمن فى طلاقة لسان الشايقية وروعة توصيفهم وحنيّة المفردات فكان إجتماع كل ذلك إلى زهد وورع وصفاء رؤية المتصوفة سبباً فى تفضيلى لهم على غيرهم ، ذكر لى من لا أشك فى روايته أن حاجى الماحى جعلى سكن ديار الشايقية بينما على ابراهيم اللحو شايقى سكن دار جعل ، أتمنى أن تصدق هذه الرواية دون أدنى مسئولية عن مايلى من ردود.

Post: #69
Title: Re: حكايا شرقاوية ........ أو نجوع الملح
Author: الرشيد بابكر
Date: 12-26-2009, 09:36 PM
Parent: #68

بكوري...معظم ناس الليل أصبحوا نهاريين...ربما تغير عودة الزناتي شيئا من هذا...

Post: #70
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-27-2009, 11:55 AM
Parent: #69


عودة لى موضوع النظافة والأحساس بيها
والخوف كل الخوف من ان تتحول الى فوبيا ووسواس قهرى
اظن ان بكرى تساءل عن كيفية تعويد الأطفال على النظافة
دون تفريط , وكمان دون افراط
انا عموما من الميالين الى ان تكون العظة عملية
الحديث المباشر مهما يكون اقل اثرا من القدوة الفعلية
عندك مثلا المشكلة الكبيرة فى تعليم الأبناء طريقة الكل والجلوس للطعام
اكلنا مختلف عن اكل المجتمعات العربية الأخرى اختلاف كبير واساسى
التعود مثلا على استخدام ادوات الطعام المساعدة مثل الشوك واسكاكين
اكيد انها ماعندها اساس فى قاموسنا بتاع تناول الطعام
اكل الكسرة والقراصة باللواييق بتاعتنا , اكيد مستحيل بالشوكة والسكين
اكل الكبسة الخليجية بالملعقة جائز وممكن
ولكنه ليس اسلوبا اصيلا عندهم
نفس الشىء اكل اكلاتنا الشعبية
منظرنا ونحن بنأكلها , قد يكون غريبا على اولادنا اذا ما تعودوا على بيئات البلدان العايشين فيها
منظرنا يبدو للمتسرع فى حكمه وكأنه منظر غير حضارى وغير نظيف
هذه نقطة تماس اولى يجب افهامها لهم وايضاح ان النظافة (خشم بيوت ) زى ما بيقولوا
لمن تصل لى نقطة انك تعودهم على اكلنا وطريقته وتزيل عن اذهانهم الأفتراض المبدئى الخاطىء
بانها طريقة غير حضارية وغير نظيفة
تكون وصلت لى نقطة مهمة منها يفهموا المعنى الجوهرى والعميق لى كلمة (نظافة )
الأساس فى الموضوع
انو اى حاجة فى الصل نظيفة
ولكنها قد تتعرض لأتساخ بحكم عوامل متغيرة
عليك فقط التحكم فى هذه العوامل المتغيرة بمجهود يومى راتب ومعقول
وبعد داك , العوجة ما بتجيك

Post: #71
Title: Re: حكايا شرقاوية ........ أو نجوع الملح
Author: زهير الزناتي
Date: 12-27-2009, 04:30 PM
Parent: #70

اها يا ناس جينا نشوف المحلبية بتاعت ناس مدني ... لقينا معاها واحدة وارد الرياض .,....
متابعة وإستمتاع ... عارفين ليه ... الواحد ما قادر يكتب هنا ولا هنا ولا هناك المواضيع شيقة ... والشباب ما مقصرين .. مسألة النضافة والعيال ... زي ما قال منصور المسألة مسألة قدوة .... يعني الاولاد لازم يشوفوك نضيف وما إليه ... أي سلوك تربوي يجب أن يلتزم به الأباء قبل أن يلقن للأطفال ... عشان تكون المسألة متسقة ... يعني لو قلت لي الأولاد ابقوا نضاف وإنت ذاتك ما نضيف ... حا يبقوا كضابين ووسخانين ... عشان كده لو الزول وسخان أحسن يحترم نفسه وما يتكلم عن النضافة وهكذا دواليك في باقي الحاجات .... والسلام عليكم ورحمة الله تعالي وبركاته وسلامي للجميع بدون فرز ...

Post: #72
Title: Re: حكايا شرقاوية ........ أو نجوع الملح
Author: الرشيد بابكر
Date: 12-27-2009, 05:01 PM
Parent: #71

Quote: اكل الكسرة والقراصة باللواييق بتاعتنا , اكيد مستحيل بالشوكة والسكين


منو القال ليك يا منص...أمنية تأكل الكسرة و الملاح بالملعقة..حيث تقوم نجاة بعجن الكسرة و الملاح و بعد ذلك تتناوله الأستاذة أمنية...و الغريب ان أمنية و منذ أن كانت بعمر سنة كانت بمنتهى النظافة ونشأت هكذا لا تأكل بيدها أبدا بالرغم من اني أأكل بيدي...فكانت تسألني لماذا تأكل بيدك يا بابا أقول ليهم عشان أنا جاي من الكوة...فأصبحوا يقولون أنهم من أبوظبي و مهند من أبوظبي و ماما من أبوظبي و بابا من الكوة..
الجمعة الفاتت أكلت بيدي فقالوا ان بابا جاي الكوة..قلت لهم أنا أفخر باني جاي من الكوة...ثم أردت أن أقول لهم ان الرسول صلى الله علية و سلم كان يأكل بيده...و لكني امتنعت في آخر لحظة خشية أن يخرجوا عن النص...
في الاجازة الفاتت في السودان جلست أمنية مع بنات الأسرة و عندما وجدتهم يأكلون بأيديهم أضطرت لأن تأكل بيدها فصفق لها الجميع و كأنها أحرزت هدفا مثل هدف فابريجاس هذا المساء في استون فيلا...

Post: #73
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-27-2009, 10:19 PM
Parent: #72

Quote: ... يعني لو قلت لي الأولاد ابقوا نضاف وإنت ذاتك ما نضيف ... حا يبقوا كضابين ووسخانين ...


يعنى إنتَ قاصد ود البك ولاشنو ؟

سكنت فى سنتى الأولى بالزقازيق مع زميلنا محمد الفاتح كامل بشقة الكيمولاند قصاد شقة ميسرة وكمال الشادى ، كان عادل ود البك مندهش لنظافة محمد الفاتح كامل ويبادرنى دوماً بقوله: إنتوا ولدكم ده شايل ليهو دُش فى جيبو و لاشنو ؟ مالوا طوّالى نضيف ، وكنتُ أداعبه بالقول: محمد ده نضافتو عادية بس إنتَ متطرف شوية فى انحيازك للبوليتاريا ، ياسلام على العادلين (ود الجعلى - ود البك) فقد كانا بحق من ألطف ناس الزقازيق.

Post: #74
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-27-2009, 10:31 PM
Parent: #73

Quote: وايضاح ان النظافة (خشم بيوت ) زى ما بيقولوا


هذه العبارة إختزلت الكثير من الإيضاحات ، لك التحية يا منص على التفصيل الوافى لغرضه ، لدىَّ صديق حين يجد أن الأكل بالشوكة والسكين يعمل خلف دور حتى لو كانت المناسبة حفل زواجه ، شعبى خااااااااااااااااااااالص


Post: #75
Title: Re: حكايا شرقاوية ........ أو نجوع الملح
Author: جلال عثمان
Date: 12-28-2009, 07:34 AM
Parent: #74

Quote: ياسلام على العادلين (ود الجعلى - ود البك) فقد كانا بحق من ألطف ناس الزقازيق.

فعلا ... بس في ناس كانوا زيهم
لطافة وظرافة وقلب ابيض ....
ازيك ياخ

Post: #76
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-28-2009, 09:08 AM
Parent: #75

Quote: ...و لكني امتنعت في آخر لحظة خشية أن يخرجوا عن النص...


والله يا رشيد عيال الزمن ده إغيروا النص الأصلى ويبدلوه بنص من عندياتهم ، وعلى ذكر حناكيش أبوظبى لدى صديق مقيم بأبوظبى ومعه أسرته عدا الصغير الذى يدرس مرحلة الأساس بالسودان ويزورهم فى الإجازة ، فى إحدى إجازات هذا الصبى المقيم بالسودان وعقب إحضاره من المطار شاهد شقيقه الأصغر يتناول تفاحة من سلة الفواكه الموضوعة على الطاولة فنادى زول السودان أمه بإشفاق قائلاً: يا ماما ألحقى ولدك عاوز ياكل فواكه البلاستيك بتاع الزينة ، فأهفهمته أمه أن هذه فواكه حقيقية ويمكن أكلها ، بالله شفت زول السودان ده كيف مداركو مبتورة .... قاتل الله الفقر

Post: #77
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-28-2009, 09:13 AM
Parent: #76

Quote:
فعلا ... بس في ناس كانوا زيهم
لطافة وظرافة وقلب ابيض ....
ازيك ياخ


أهلين حبابك يا جلال عثمان ، أظنك جلال عثمان بتاع تربية ، أنا عندى كلام كتير عن الثنائيات والمجموعات ، ومنها المجموعة التى ضمت بجانبكم سامى عبدالوهاب ومحمد الهادى وعزام ، يضاف لكم عثمان جالية الذى عانى الأمرين حين خاطر بالسفر معنا للسودان بالباخرة ، وكذلك قصته مع الهيدفون الذى استلفه منه محمد الهادى واحترق بالشمعة ، جاييك بى مهلة وروقة بال.

Post: #78
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-28-2009, 10:44 AM
Parent: #77

موضوع النظافة لسه فيهو باقى
ده كمشاركة منى لحنكشة ناس مدنى كما قال زهير
وكمان بالمرة , نطعم حنكشتهم بمحلبية الرياض
محلبية الرياض , الما ضاقها ان شاء الله يضوقها , قولوا آميييين
لمن طارق الحلاب كان بيهرى الطماطم بالغسيل والصابون , كان ده مثار استغرابنا فى الأول , ثم امتعاضنا فى الثانى
ولكننا استسلمنا لهذا الهاجس فى الأخير
على الأقل , السلطة وتجهيزات الأكل , زول بيعملها غيرو مافى
ودى كانت فى مصلحتنا طبعا , فالناس كلهم عند طارق الحلاب متهمين بعدم النظافة حتى يثبت العكس
لكن طارق الحلاب ما لحقناهو للأسف الشديد الا فى السنة الأخيرة بس
بعد ما طارق مشى , استلم الراية زول تانى كرهنا النظافة ذاتو
مش كرهنا نحن بس , الناس كلهم بقوا لمن يجونا فى البيت اول شىء يتحسسو احذيتهم وفى الغالب يقلعوها عدييييييل
ولم يقتصر الأمر على الأحذية الوسخانة فى الزقازيق بطبيعة الحال
فبعض الشرابات كانت تستاهل يرموها فى الزبالة فورا
غسل بعض الشرابات او حتى محاولة غسلها , عمل فيه مضيعة وقت خرافية
اعرف الكثيرين الذين كانوا يشترون كم شراب مع الأعانة او مع الشيك بتاع المصاريف
ثم يرمونها فى الزبالة الأعانة الجاية او الشيك الذى يليه
وسخانة دى وصف كافى لجميع احذية الزقازيق فى السنة كلها
ولكنه غير كافى ايام المطر والشتاء
الزقازيق دى كان فيها حلاة دين طين (لكة )
اخير ليك تمشى حفبان عديل
رفعت نور الدين الله يذكره بالخير
كان يطارد ذرات الرمل والطين التى تهرب متخفية فى الشرابات والأحذية الى داخل الشقة
مطاردة لا هوادة فيها
لذا فان شقتنا كانت فى حالة لمعان دائم
وتوجس دائم من الداخلين اليها من الزملاء والزميلات
وترقب مستمر وستاند باى على طول الخط من قبلنا
راجع ليكم

Post: #79
Title: Re: حكايا شرقاوية ........ أو نجوع الملح
Author: ياسر نجيلة
Date: 12-28-2009, 11:07 AM
Parent: #78

بكوري .... سلام للمرة المليون

رحبت بيك في اليوميات وغيرها في كم موضع بالبوست العام


... وانت عامل طناش ....

سلامي ليك يا ود مدني .... يا ظريف

انا من ضمن المتابعين الكتاااااااااااااااار ...
بتاوق وارجع ... البيت الكبير


بالله يابكر ي اشرح لينا اولا:
" أو نجوع الملح " ... يعني شنو ؟؟؟

Post: #80
Title: Re: حكايا شرقاوية ........ أو نجوع الملح
Author: الرشيد بابكر
Date: 12-28-2009, 01:39 PM
Parent: #79

Quote: بالله يابكر ي اشرح لينا اولا:
" أو نجوع الملح " ... يعني شنو ؟؟؟


كدي يا ياسر أشرح لي انت و جلال...وكت الله جابكم لحدي عند جيرانا في المنبر..ما بتجونا مالكم؟؟؟ خايف رشا تقول ليك البوديك تمشي لي جكس زراعة ديل شنو؟؟؟تعال لينا في مربع كاي و كان خايف جيب معاك رشا زاتا...

Post: #81
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-28-2009, 08:28 PM
Parent: #80

Quote: لم يقتصر الأمر على الأحذية الوسخانة فى الزقازيق بطبيعة الحال
فبعض الشرابات كانت تستاهل يرموها فى الزبالة فورا


والله يا منص كان فى عفنة شرابات فى الزقازيق إجيرك الله من ريحتا ، والعجب العجاب لو فيهو خرمين تلاتة ، والحذر كل الحذر من السماح لأحد هؤلاء بحشر قدميه فى بطانيتك .

واصل يا منص

Post: #82
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-28-2009, 09:01 PM
Parent: #81

Quote: بكوري .... سلام للمرة المليون

رحبت بيك في اليوميات وغيرها في كم موضع بالبوست العام


... وانت عامل طناش ....


ماعاش الإطنِّشك يا أبو النسب ، والله ماشفت الترحيب لأنى متعود أدخل طوّالى على منتدى ناس الزقازيق ، وشعارى لأهل المبر العام ماتغنى به كابلى:

خذوا دنياكمُ هذى
فدنياواتنا كثرُ

أما مسمى نجوع الملح فهو توصيف نفسى أكثر من كونه توصيف ذو دلالة محددة ، وللجميع حق تفسيره وفقاً لمرئياتهم.

تقبل تحايا زوجتى الفاضلة/ منى سيد لطفى الخانجى والأبناء

Post: #83
Title: Re: حكايا شرقاوية ........ أو نجوع الملح
Author: ياسر نجيلة
Date: 12-29-2009, 06:01 AM
Parent: #82

ابو النسب ... الظريف بكوري
بالله شوف الدنيا دي صغيرونه كيف ...
بالامس القريب كل الاسرة تتحدث عن الاخ الشهم الذي احتضن اولاد اخوه ... بعد وفاته
بالله لم اربط الاسماء بانك هذا الشهم الذي درست معه بالزقازيق ...
ياحبيب جايك بالتلفون عديل كده ...
سلامي للأولاد وامهم مني ...

Post: #84
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-29-2009, 07:11 PM
Parent: #83

يا ياسر ماشاء الله عليك أخدتّ من حبوبتك حاجة زهرة عابدين سماحة الوصف ، سلامى للوالدة وأسرتك - منى سيد لطفى الخانجى

أبوبكر حامد
بأمر من الإدارة

Post: #85
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-30-2009, 10:54 AM
Parent: #84

وهنا نحن مضطرين نرحب ترحيب حار بالأدارة العامة لشئون اخونا بكور
نوقف كل حاجة , ونأجل كل تداعى , ونخلى كل الأشارات حمراء فى كل الأتجاهات
الا لون اخضر واحد
يسمح لأختنا وادارة اخونا بكور العامة
الأستاذة منى سيد لطفى
بالمرور , واختيار الغرفة التى ترغب
والكرسى الذى تريد
لتجلس وتتوهط
وتعمل فينا امرا ونهيا
ما شاء لها الأمر والنهى
ونصفق ونزغرد للم الشمل الأسفيرى الذى اما تحول فعلا
او فى طريقه للتحول
الى لم شمل اثيرى تلفونى
وفى انتظار ان يتحول الى لم شمل فعلى لا يخلو من عناق وسلام
بين بكور وود نجيلة
رشا ومنى
العيال والعيال
والفضل بعد الله تعال طبعل
لبكرى وبكرى
واللبيب بالأشارة يفهم
ولوضوع النظافة بقية تأتى
ما حان الوقت وسمح
تحياتى

Post: #86
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-30-2009, 12:49 PM
Parent: #85

Quote: لتجلس وتتوهط


منص يا حبيب

تجلس آه

تتوهط لاء

بتاع الديلفرى ح إقد جيبى

آه ... آه .... آه (وهذه الآهات الثلاث - على وزن اللاءات الثلاث - هى خشية الإملاق واحتراق الأكل مما يستدعى طلب وجبة سريعة وتبعاتها من مخالفة تعليمات التوفير الرشيدية وما إلى ذلك).

يا منصور عليك دينك تجيب العيال لزيارة البحرين ليقفوا على معالم الألفية الثالثة ، أطلعوا شوية من ألفية إبن مالك دى لعوالم أكثر رحابة.


Post: #87
Title: Re: حكايا شرقاوية ........ أو نجوع الملح
Author: عفاف علي ميرغني
Date: 12-30-2009, 01:11 PM
Parent: #86

يا بكوري والسمحين معاك000

والله منصور دا كتاب خلاااص!!!!!!!!

تحياتي ليكم 00 ولي عودة


تحية لمنى 00جدا 00

Post: #88
Title: Re: حكايا شرقاوية ........ أو نجوع الملح
Author: الرشيد بابكر
Date: 12-30-2009, 08:47 PM
Parent: #87

Quote: آه ... آه .... آه (وهذه الآهات الثلاث - على وزن اللاءات الثلاث - هى خشية الإملاق واحتراق الأكل مما يستدعى طلب وجبة سريعة وتبعاتها من مخالفة تعليمات التوفير الرشيدية وما إلى ذلك).


خالفت التعليمات يا شقي...أها جيت لي...بوستك ده من نجوع الملح حيبقى نجوع ساكت...و احتمال نتشرد...أنا ما قلت ليك التعليمات دي صارمة و اياك ثم اياك ان تخرقها...

الليلة مختفي شايفك...واحشنا..

تحياتي للعيال و أمهم...

Post: #89
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-30-2009, 09:43 PM
Parent: #88

Quote: والله منصور دا كتاب خلاااص!!!!!!!!


منصور ده كتّاب وقراى وحلو كمان .

وصلت تحياتك لمنى ، وهى الآن تجهز العشاء وترمقنى من زاوية تنفرج بها أساريرها وأساريرى ، كان الله مدّ فى العمر بتتلاقو فى البحرين ، إنشاء الله كانت (تجو مع العفش) على قول دعاية مفروشات المحاميد.

Post: #90
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-30-2009, 09:50 PM
Parent: #89

Quote: خالفت التعليمات يا شقي...أها جيت لي...بوستك ده من نجوع الملح حيبقى نجوع ساكت...و احتمال نتشرد...أنا ما قلت ليك التعليمات دي صارمة و اياك ثم اياك ان تخرقها...


يا فندم نحن متبعين التعليمات مية المية ، ولاتوجد خروقات لتعليماتكم وتعليم الأميرالاى الشريف عبدالله الهندى .

بكرة يا سعادتك دربك على أبو ظبى أخضر ، أنا ح أسد وردية ليل و لانامت أعين النهاريين .

Post: #91
Title: Re: حكايا شرقاوية ........ أو نجوع الملح
Author: منصور عبد الرازق
Date: 12-31-2009, 10:55 AM
Parent: #90

اذا بدأت العزيزة فافى بدلق القليل من المحلبية لى
فانا مضطر
مضطر دى شنو
اصلى منتظر فرصة زى دى
وعايز لى مناسبة
ادفقها ليها دفيق
اصلا المحلبية (بطبيعة حالها )
عايزة ليها مناسبة
واهى المناسبة جات
شالت فينى مكنتك الرائعة بتاعت انى انا منصور
كتاب
وخت بكور الجميل ختته مع الشيلة مضيفا
اننى انا منصور عبد الرازق
قراى كمان وحلو
فضلتو لى شنو
هسى عليك الله تمايمك دى
يا فافى
براها ما روح الكتابة
زى ما انا كنت زمان بحب الكاسترد
وكان بيقولوا لى
عاملين فيها روح (الموز او الفراولة )
فتمايمك يا عزيزة
روح موز وفراولة هذا البوست
الشحمان الدسم
وهذا المنبر
السمين (القيافة )
حتى اننى اتذوق (نجوع ملحه )
سكرا خالصا
خليطا من فركتوز حميميته
ولاكتوز حمى التلاقى اليومى
مش كل واحد على كيفه فى فى قراية الملح ونجوعه
زى ما قال سيد البوست براااااهو
اها لقيتوا نجوع ملحى كيف ؟؟؟
هاكم الحنة دى !!!!!!!!!!!!!!!!!!!!

Post: #92
Title: Re: حكايا شرقاوية ........ أو نجوع الملح
Author: محمد صديق
Date: 12-31-2009, 02:31 PM
Parent: #91

سلامات يا ناس

كل عام وانتو بخير

رسلوا لينا محلبية من محلبيتكم الحايمة دى

اصلو الدنيا قبايل عيد وكده...الحنة بنشتريها برانا.

Post: #93
Title: Re: حكايا شرقاوية ........ أو نجوع الملح
Author: زهير الزناتي
Date: 12-31-2009, 03:35 PM
Parent: #92

واللخ يا كوتش من قبيل عايز أعلق علي المحلبية الحايمة في المنبر دي ... لكن بيني وبينك روادها الرشيد بابكر ومنصور عبد الرازق ... وديل ليهم البريهمو فيها ... احب زراعة ذاتو ....

Post: #94
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-31-2009, 07:41 PM
Parent: #93

Quote: فتمايمك يا عزيزة
روح موز وفراولة هذا البوست
الشحمان الدسم
وهذا المنبر
السمين (القيافة )
حتى اننى اتذوق (نجوع ملحه )
سكرا خالصا
خليطا من فركتوز حميميته
ولاكتوز حمى التلاقى اليومى
مش كل واحد على كيفه فى فى قراية الملح ونجوعه
زى ما قال سيد البوست براااااهو


تقراهو على كيف كيفك
نتلاقى فى ساحلك وقيفك
نسعد بحضورك وبى مرور طيفك
نرشلك محلب ونجرتق ضيفك

Post: #95
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-31-2009, 07:50 PM
Parent: #94

Quote: رسلوا لينا محلبية من محلبيتكم الحايمة دى

.


تعال يا جورج شيل محلبيتك بى نفسك ، محلبيتنا كان ماشلتها الحِنّة ما بتشبل

Quote:

اصلو الدنيا قبايل عيد وكده...


تانى مافى عيد قريب إلا عيد الشرطة

Quote: ...الحنة بنشتريها برانا.


يعنى يا جورج جات على الحِنّة ، مالم يعنى ناس زراعة ديل ما بيعرفوا إزرعوا الحِنّة ، أها رايك شنو ندّيك حنة ومعاها (كُدُندار)

Post: #96
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-31-2009, 07:55 PM
Parent: #95

Quote: ... احب زراعة ذاتو ....


والشمعدان بيحبك كمان وكمان

Post: #97
Title: Re: حكايا شرقاوية ........ أو نجوع الملح
Author: Elsuhaili Magzoub
Date: 01-01-2010, 08:56 AM
Parent: #48

The one from hantoub is not considered. Elsuhaili Magzoub

Post: #98
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-01-2010, 11:53 AM

Quote: Elsuhaili Magzoub


السهيلى مجذوب حمد - كلية التجارة - من أبناء حنتوب الجميلة ، لك العتبى وحتماً سترضى .

Post: #99
Title: Re: حكايا شرقاوية ........ أو نجوع الملح
Author: مبارك جادين
Date: 01-02-2010, 05:09 PM
Parent: #98

انا يا ابوبكر حاقعد في البرش بتاع
اولاد الحلة او اولاد الفريق زي بتقولو في مدني
لاني شايف ناس منصور وفافي احتلوا كل الكراسي ومعاهم الرسيد ومحمد صديق وجلال عثمان
ومشاعر بدوي فتبقى لي انا برش اولاد الحلة
طبعا ناس الزناتي ووددهب ديل ناس البيت ذاتو
احبكم واحب نظافتكم كما قال الحاج جلة في الاعملا الكاملة

Post: #100
Title: Re: حكايا شرقاوية ........ أو نجوع الملح
Author: عبد الحفيظ عباس
Date: 01-03-2010, 03:04 PM
Parent: #99

بكور
شوق وسلام
وحلو كلام
وقت الناس زحموا الكارسي والمنصة فيها منصور
عليك الله خمس لي وزح شوية خليني النقعد جنبك
لأني مشتاق ليك شديد
فتحياتي لك والمدام بت ناس خانجي
والأولاد
ولنا عودة ولقاء
ومستمتع حقيقة

Post: #101
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-03-2010, 03:39 PM
Parent: #100

Quote: نا يا ابوبكر حاقعد في البرش بتاع
اولاد الحلة او اولاد الفريق زي بتقولو في مدني


مشتاقين يا زعيم لى ونستك وضحكاتك الحلوة وأغنية الذكريات ، مشتاقين حتى للإعتصامات ، بس يا زعيم تانى مرة ما ترسلوا محمد الهادى عشان إجيب خبز ، ودى بجى راجع ليها بى رواقة.

Post: #102
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-03-2010, 03:43 PM
Parent: #101

عبد الحفيظ عباس صديق ابن كوستى ، ياسلام على كوستى وناس كوستى ، على وشيخ الدين - محاسن أبو دقن - بدر الدين محمد أحمد حمزة - صديق إبراهيم عوض الكريم - إبراهيم فش - محمد على "شيطان الشر" - أمال الهادى - هارون مهدى هارون - الراحل المقيم مصطفى نقدالله .

Post: #103
Title: Re: حكايا شرقاوية ........ أو نجوع الملح
Author: الرشيد بابكر
Date: 01-03-2010, 04:29 PM
Parent: #102

يا بكري مشتاقين ياخي...شفقتنا عليك الحكاية شنو...

كنت عايز أضرب ليك لكن قلت الزول ده كل ما أضرب ليهو ألقاهو في الجمعية...

نخليهو لحدي ما مناسبة الاستقلال دي تؤثر فيهو شوية...

(الرشيد متنكر بفاتن حمامة زهير الزناتي)

Post: #104
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-03-2010, 06:20 PM
Parent: #103

Quote: (الرشيد متنكر بفاتن حمامة زهير الزناتي)


على قول والدتى : تبرا وتستبرا ياروش

عللتُ أسباب غيابى فى مربع كاى الذى أعوده قبل زيارة هذا البوست لشئٍ فى نفسى.

Post: #105
Title: Re: حكايا شرقاوية ........ أو نجوع الملح
Author: الرشيد بابكر
Date: 01-03-2010, 06:31 PM
Parent: #104

بكري...وجدتها وجدتها...

مرورك أسعدنا و يسعدنا دائما...

Post: #106
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-04-2010, 06:50 AM
Parent: #105

Quote: مرورك أسعدنا و يسعدنا دائما...


الله إسعد كل أيامك يا حبيب

Post: #107
Title: Re: حكايا شرقاوية ........ أو نجوع الملح
Author: مدثر أبا يزيد
Date: 01-06-2010, 08:50 AM
Parent: #106

سلامات العزيز ابو بكر

يا حليل الزمن الجميل

تكون والاسرة بعافية

Post: #108
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-06-2010, 10:50 AM
Parent: #107

Quote: سلامات العزيز ابو بكر

يا حليل الزمن الجميل

تكون والاسرة بعافية


حليل أيامك يا مدثر وأيام كمال عبدالحليم شلبى واسامة جاد الله النعيم والجيلى والمرحوم سيد أحمد وصديق عوض الكريم وشارع الحمّام ومنشية السادات وكفر الزند ، بجيك بى رواقة يا مدثر يا جميل.

Post: #109
Title: Re: حكايا شرقاوية ........ أو نجوع الملح
Author: كمال الشادي
Date: 01-08-2010, 00:32 AM
Parent: #108

على الطلاق يا ابوبكر انا مستمتع للسقف
كمل حكيك الحلو ده
ويا شباب خلو المقاطعات الجانبية
اها فضيت ليك الحتة والمايك معاك كمل يا بطل

Post: #110
Title: Re: حكايا شرقاوية ........ أو نجوع الملح
Author: كمال الشادي
Date: 01-08-2010, 08:44 AM
Parent: #109

اقسم بالله لقيت ليكم حاجة رائعة جدا
خشو هنا وإستمتعوا وقولو لي رأيك
أغتيال دكتورة احلام حسب الرسول .

Post: #111
Title: Re: حكايا شرقاوية ........ أو نجوع الملح
Author: كمال الشادي
Date: 01-08-2010, 09:55 PM
Parent: #110

يا أخوانا
الصغنونة
عفاف فافي
عاملة ليكم مفاجاة في حوشها
نصار الحاج 000 يضئ روح العشب وسيقان الشجر

اجمعوا بي هناك

بيقولو عازما

نصار الحاج شخصيا

Post: #112
Title: Re: حكايا شرقاوية ........ أو نجوع الملح
Author: الرشيد بابكر
Date: 01-09-2010, 07:00 PM
Parent: #111

بكوري أين أنت يا رجل...اختفيت و قلت عدولي...

لعلك و الأسرة بخير..

Post: #113
Title: Re: حكايا شرقاوية ........ أو نجوع الملح
Author: كمال الشادي
Date: 01-10-2010, 03:05 PM
Parent: #112

يا شباب اللنك الفوق ده شفتوهو ؟
مسئولين من الخير
بتاع الدكتورة احلام حسب الرسول !!!!!!

Post: #114
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-19-2010, 07:37 PM
Parent: #113

Quote: على الطلاق يا ابوبكر انا مستمتع للسقف
كمل حكيك الحلو ده
ويا شباب خلو المقاطعات الجانبية
اها فضيت ليك الحتة والمايك معاك كمل يا بطل


كيمو يا جميل ........... آسف على تأخرى فى الرد بسبب الإنقطاع لمشغوليات عدة ، يسعدنى استمتاعك مثلما تسعدنى رفقة الزقازيقاب أصحاب الفضل فى هذه الحكايا ، فلولا روعتهم لما كان للسرد قيمة يعتد بها ، وأكرر دعوتى لك والأسرة الكريمة لزيارة البحرين متى ما سنحت الفرصة.

Post: #115
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-19-2010, 07:39 PM
Parent: #114

Quote: بكوري أين أنت يا رجل...اختفيت و قلت عدولي...

لعلك و الأسرة بخير..


لك التحية يا روش على تفقدنا هنا أو عبر الهاتف ، الحمد لله الذى غيَّض لنا هذا الوصل والحميمية.

Post: #116
Title: Re: حكايا شرقاوية ........ أو نجوع الملح
Author: كمال الشادي
Date: 01-19-2010, 07:49 PM
Parent: #115

العزيز ابوبكر
Quote: وأكرر دعوتى لك والأسرة الكريمة لزيارة البحرين متى ما سنحت الفرصة.


انا فعلا مقرر ازور البحرين انا والاود
عشان نكون عمليين وننسق للموضوع ده
كلمني على
00966563785231

Post: #117
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-19-2010, 09:01 PM
Parent: #116

أها يا كيمو يا حبيب سجَّلت الرقم عندى ، لو مساهر قول عوك عشان هسى أشد ليك سلك ، ولو بتنوم بدرى إبقى بينا تلفون باكر ، يا خى أنا متكيف كيف ما طبيعى ، أكتر من كيفى من تخصصك فى طارق جبريل هههههه

Post: #118
Title: Re: حكايا شرقاوية ........ أو نجوع الملح
Author: الرشيد بابكر
Date: 01-19-2010, 09:12 PM
Parent: #117

بكوري..بكرة اجازة و لا شنو...شايفك متساقد الليلة...

Post: #119
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-19-2010, 10:09 PM
Parent: #118

Quote: بكوري..بكرة اجازة و لا شنو...شايفك متساقد الليلة...


بكرة شغالين يا روش ، رايك شنو هسى أنا ومنى جينا داخلين من بره بعد ما اشترينا لوازم فطور المدرسة والذى منو ، وبعد شوية ح أقوم أصلى العشا ، وبعديهو بقضى حوالى ساعة فى قراية الجرايد ، يعنى على الساعة واحدة واحدة ونص بنوم (نرجو مراعاة فروق التوقيت لأننا +3 وإنتوا +4 من توقيت غرينيتش .

Post: #120
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-20-2010, 07:41 PM
Parent: #119

Quote: كلمني على
00966563785231


يا كيمو اتصلت عليك ......... وناجيتك ...... وما ردِّيت

شكيت لى طيفك الأيّام

Post: #121
Title: Re: حكايا شرقاوية ........ أو نجوع الملح
Author: عبد الدائم سيد أحمد
Date: 01-21-2010, 10:14 AM
Parent: #120

بوست دسم وشحمان
كأنك يا بكورى بتحكى الجواي

عارف دائما" الواحد بيكون شديد الارتباط بابناء دفعتو من الكليات الاخرى
وانا كان لى اصدقاء من اعز اعز اصدقائى بحقوق
محمد الفاتح ، كمال ، ذكى ، صديق ، صفاء ، رحاب ، خديجة
هناء الزبير ، محمد عبدالباقى ، بشير على العبيد ، عادل عبدالقادر
امل جاد الرب واحلام حسين

اما مدنى فهم ناسى رغم المكواة الدايرة يوميا" بينى وبين احمد السنى
عن مدنى والخرطوم والسهر بالكووم


هاك دى صور تهمك

شايفك نسيت نوال دفع الله لذكرك لابناء مدنى فى الصفحة (1)


sudansudansudansudansudansudansudansudansudansudansudansudansudansudan10.jpg Hosting at Sudaneseonline.com


------------




sudansudansudansudansudansudansudansudansudansudansudansudansudan22.jpg Hosting at Sudaneseonline.com

Post: #122
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-22-2010, 05:39 PM
Parent: #121

يا سلام عليك يا ديدو وعلى هذه الذكريات الصادقة ونبيلة ، نوال دفع الله من أميز بنات مدنى ، لها التحية أينما كانت ، والسبب طبعاًفى عدم ذكرها يعود بالدرجة الأولى للذاكرة الخربة وسأعمل التعديل اللازم.

Post: #123
Title: Re: حكايا شرقاوية ........ أو نجوع الملح
Author: nazar hussien
Date: 01-23-2010, 10:20 AM
Parent: #100

بلاي دي حالة دي الناس قاعدين بين جدولين كان قالوا لي بعض عوك بسمعو
بعضهم!!!! ازيك يا أبو يا قول الهنود...وازاي حال الزقازيقاب اللذيذين...

Quote: بالله عليكم وانتوا أصحاب خبرة وباع فى هذا المجال ما العمل؟


أدعي بأنني صاحب خبرة وبااااااااع شديد..

مش قال المغني: الطبيعة حنت عليك وخلدت بصماتا فيك
فأنا دحين تاركهم كل زول يتعلم من الطبيعة...
يكسر كرسي...عشان يعرف انو كسر كرسي...
الناس بتعلموا كيف؟؟؟ مش من اخطائهم...وطيب!!!
الاقيهم مشرطين الجرايد في الصالون...ورامين
كم كتاب...اجي انا زاتي ازيدهم تشريطا ورمي...
كتب...لما الواحد فيهم يعتر ليه كتاب.,,وياخد
بكيتو ويعرف جريرة ما فعل...


خلوهم يوسخوا ويعركوا الملايات...ويشخبطوا في الحيط...
فدي مناظر بتزيد الادراك...والملاحظة عند الاطفال...

حبوبتنا الله يرحمها كانت بتقول للبنهرنا...خلوه يغرف لامن يعرف

Post: #124
Title: Re: حكايا شرقاوية ........ أو نجوع الملح
Author: محمد صديق
Date: 01-23-2010, 06:23 PM
Parent: #123

سلامات يا ناس

نزار ...سلام

تعرف الحبوبة دى كان ممكن تعمل نظرية

من نظريات التعلّم القاشرين بيها ناس

علم النفس التعليمى...هسة يغرف لامن يعرف

دى ما ياها ذاتا نظرية اسكنر ولّا اسمو منو

داك بتاع نظرية التعلّم بالمحاولة والخطأ..

....سلام يا بكرى ال ...

Post: #125
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-23-2010, 07:10 PM
Parent: #124

Quote: بلاي دي حالة دي الناس قاعدين بين جدولين كان قالوا لي بعض عوك بسمعو
بعضهم!!!! ازيك يا أبو يا قول الهنود...وازاي حال الزقازيقاب اللذيذين...


Quote: بالله عليكم وانتوا أصحاب خبرة وباع فى هذا المجال ما العمل؟



أدعي بأنني صاحب خبرة وبااااااااع شديد..

مش قال المغني: الطبيعة حنت عليك وخلدت بصماتا فيك
فأنا دحين تاركهم كل زول يتعلم من الطبيعة...
يكسر كرسي...عشان يعرف انو كسر كرسي...
الناس بتعلموا كيف؟؟؟ مش من اخطائهم...وطيب!!!
الاقيهم مشرطين الجرايد في الصالون...ورامين
كم كتاب...اجي انا زاتي ازيدهم تشريطا ورمي...
كتب...لما الواحد فيهم يعتر ليه كتاب.,,وياخد
بكيتو ويعرف جريرة ما فعل...


خلوهم يوسخوا ويعركوا الملايات...ويشخبطوا في الحيط...
فدي مناظر بتزيد الادراك...والملاحظة عند الاطفال...

حبوبتنا الله يرحمها كانت بتقول للبنهرنا...خلوه يغرف لامن يعرف


والله يا نزار حبوبتك دى زولا حكيمة والقالتوا زمان بقى نظريات حديثة الآن ، بالله شوف أهلنا مضيعين نفسهم كيف.

Post: #126
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-23-2010, 07:14 PM
Parent: #125

Quote: ....سلام يا بكرى ال ...


أوعك تكون عاوز تقول كلمة مصطفى محمد الحسن

سلامات يا جورج والبركة بى الشوفه

Post: #127
Title: Re: حكايا شرقاوية ........ أو نجوع الملح
Author: محمد صديق
Date: 01-25-2010, 08:55 AM
Parent: #126

سلامات يا ناس

Quote: أوعك تكون عاوز تقول كلمة مصطفى محمد الحسن

سلامات يا جورج والبركة بى الشوفه


سلام يا حبيب

مصطفى بسّلم عليك...

وكان عندو تعليق على حديثك بتاع كسلا داك وناس اكورد

وانت ذكرت ناس ابراهيم سليمان وما جبت سيرتو ..وقال

ليك يا.....

Post: #128
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-25-2010, 09:48 AM
Parent: #127

Quote: سلام يا حبيب

مصطفى بسّلم عليك...

وكان عندو تعليق على حديثك بتاع كسلا داك وناس اكورد

وانت ذكرت ناس ابراهيم سليمان وما جبت سيرتو ..وقال

ليك يا.....


والله يا جورج مصطفى لم يبرح خيالى على الإطلاق ، فعدم ذكرى له يحسب لى لا علىَّ ، وعلى رأى الست :

فكّرونى ازّاى

هو أنا نسيتك

تحياتى لأمير وقرشى وفخر الدين وابو الشوش

Post: #129
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 01-25-2010, 10:24 PM
Parent: #128

زميلنا العزيز بكلية الحقوق إدريس محمد إدريس (تراورى) رجل فائق الظرف وهو من أبناء مدنى حى 114 ، فى فترة الإمتحانات وبشقتنا بلكوظ درجنا على شراء سمك مشوى من مطعم الخطيب ، وكنّا فى غاية السعادة التى لم يكدر صفوها سوى حادثة إبتلاع إدريس لشوكة من أشواك السمك ، نقلناه على وجه السرعة لمركز نور الإسلام الطبى بتاع أحمد عنتر ، عاينه الطبيب وقرر أنه بإمكانه إخراج الشوكة عبر عملية بسيطة ستكلف خمسة جنيهات ، إدريس رغم ألمه رفع رأسه لى قائلاً:

يا أبَّا* كيلو السمك كامل بى جنيهين ونص ، الشوكة الواحدة إطلعوها بى خمسة جنيه؟

فقلتُ له مداعباً: أها يا تروارى عاوزنا نقول للدكتور إطلع ليك الشوكة ومعاها اتنين كيلو سمك ولا شنو؟



* كلمة يا أبَّا هى لازمة درج إدريس على استخدامها ، مثلما درج عبد الدائم الوسخان على استخدام لازمة ياتركى.

Post: #130
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 06-01-2010, 07:47 PM
Parent: #129

كدى يا حبيب القسا نرفعك لى فوق ، صحى البكا بحرروهو اهلو ، يا ود الصايم مبارة الرد بتاعة الكهرباء الأثيوبى بى جاى .

Post: #131
Title: Re: حكايا شرقاوية ........ أو نجوع الملح
Author: الرشيد بابكر
Date: 06-01-2010, 08:23 PM
Parent: #130

Quote: كدى يا حبيب القسا نرفعك لى فوق ، صحى البكا بحرروهو اهلو ، يا ود الصايم مبارة الرد بتاعة الكهرباء الأثيوبى بى جاى .


بكوري جيت من الجكة و قلت أجي آخد لي معاك سكليبة سكليبتين....
الليلة انت يا أخوي يا يكونو الأولاد خلصوا امتحاناتهم...
يا منى تكون حنت عليك و أدتك افراج مؤقت...
يا تكون مشتاق لينا...

ان شاء الله تكون قلت لي أفنان عمو قال ليك بطلي الثقالة...

Post: #132
Title: Re: حكايا شرقاوية ........ أو نجوع الملح
Author: محمد صديق
Date: 06-01-2010, 08:33 PM
Parent: #130

سلامات يا ناس

Quote: كدى يا حبيب القسا نرفعك لى فوق ، صحى البكا بحرروهو اهلو


ود المأذون يا لذيذ...حررو ونحن بنجيك

لابدين ليك يا اهلو

Post: #133
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 06-01-2010, 09:46 PM
Parent: #132

Quote: الليلة انت يا أخوي يا يكونو الأولاد خلصوا امتحاناتهم...
يا منى تكون حنت عليك و أدتك افراج مؤقت...


إجابة الأستاذة منى لا هذا و لاذاك ، بل أشتاقكم وأعلم أنّى أفقد عقلى إذ أشتاق ، بعدين يا رشيد الجكه دى فوق راى ولا الجكه دى لله .... كلو شى لله ..... كلّو شى لله ، غايتو يارشيد أنا حالياً لا أمارس أى نوع من انواع الرياضة سوى رياضة المشى لأنه أصابنى تمزق فى الرجل اليمنى وتبعه تمزّق فى الرجل اليسرى فلم يبق لى من كرة القدم سوى ضربة الرأس ورمية التماس.

Post: #134
Title: Re: حكايا شرقاوية ........ أو نجوع الملح
Author: مجتبي فاروق
Date: 06-02-2010, 02:04 PM
Parent: #133

ود الماذون بكرة بالعودة وين يا راجل
يا خى الريس ميسرة بفتش عليك شديد ما شفت مع ناس هلا وكدا

Post: #135
Title: Re: حكايا شرقاوية ........ أو نجوع الملح
Author: محمد صديق
Date: 06-05-2010, 07:28 PM
Parent: #134

سلامات يا ناس

Quote: فلم يبق لى من كرة القدم سوى ضربة الرأس ورمية التماس.


كضَّااااااااااب ...ديل ذاتن ما بتقدر عليهن..

الحاجة الوحيدة الباقية ليك ..لسانك.

Post: #136
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 07-10-2010, 10:27 PM
Parent: #135

Quote: ود الماذون بكرة بالعودة وين يا راجل
يا خى الريس ميسرة بفتش عليك شديد ما شفت مع ناس هلا وكدا


والله يا مجتبى أنا متلوم مع الريس ميسرة ومنى يونس لوم الجبال على قول أمى (نفسى أعرف الجبال إتلومت فى شنو)

Post: #137
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 07-10-2010, 10:34 PM
Parent: #136

Quote: الحاجة الوحيدة الباقية ليك ..لسانك.


يا كوتش أول بى التبادى آسف جداً لتأخر الرد بسبب أعطال متكررة فى الكمبيوتر وتزاحم عليه بسبب إجازة العيال ، وبسبب مشغوليات وتجهيز للإجازة ، سنصل السودان فى إجازة طويلة تمتد من 30 يوليو وحتى 24 سبتمبر شاملة رمضان والعيد.

بعدين ياخى موش الشاعر قال :

لسان الفتى نصفٌ ونصفٌ فؤاده

فلم يبقى إلا صورة اللحمِ والدّمِ

.......................
وعلى قول القائل :
أبيض وسمين

Post: #138
Title: Re: حكايا شرقاوية ........ أو نجوع الملح
Author: محمد صديق
Date: 07-11-2010, 07:04 AM
Parent: #137

سلامات يا ناس

Quote: وعلى قول القائل :
أبيض وسمين


بكرى عوداً حميداً...

ضحكتنى ورجعتنى لأيام جميلة بكسلا ...

صاحب العبارة استقر بالسعودية ليهو فترة طويلة ...

منتظرينك فى الإجازة ...ومن هسة اديناك الضو (الأبيض) زى ما بقولوا اهل الصادق على مجذوب.

Post: #139
Title: Re: حكايا شرقاوية ........ أو نجوع الملح
Author: البادي النور
Date: 07-11-2010, 10:53 AM
Parent: #138

يا بكوري أظهر وبان عليك الأمان ...

غيابك طال وشغلت البال ...

نحن في إنتظار عودتك للسودان الشقيق .. ومشتاقين ليك شديد ...

Post: #140
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 07-11-2010, 11:50 AM
Parent: #139

Quote: ومن هسة اديناك الضو (الأبيض) زى ما بقولوا اهل الصادق على مجذوب.


الضو حبابو يا جورج بس قول لى خالده شوفو لينا شارعاً بارد ، بيناتنا تلفون يا حبيب.

Post: #141
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 07-11-2010, 11:57 AM
Parent: #140

Quote: نحن في إنتظار عودتك للسودان الشقيق ..


ذكرتنى يا بادى أيام إحتفالية الخرطوم عاصمة الثقافة ، كان عندنا هنا فى البحرين برنامج موازى ، فى إحدى الإحتفاليات شاهدت بعض الشباب السودانيين الهائمين فى محبةأهل النجاشى ، بادرتهم بالقول (مرحباً بأشقائنا الإثيوبيين ) ، رد على أحدهم بالقول(أنا من قبيل أتاوق خايف من لسانك المتبرى منك ده)

يا بادى شوف لى رقم تلفون لى محمدو الحلو.

Post: #142
Title: Re: حكايا شرقاوية ........ أو نجوع الملح
Author: سامي عبد الوهاب إدريس
Date: 07-11-2010, 12:06 PM
Parent: #141

بكري يا حبيب

مرور... للتحية

ويييييين ياخ إنت ما بجمبنا هنا في الشرقية

كن بخير

Post: #143
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 07-11-2010, 12:16 PM
Parent: #142

Quote: ويييييين ياخ إنت ما بجمبنا هنا في الشرقية

كن بخير


يا سمسم القضارف ياخى أنا منتظر جيتك حسب كلامك آخر مرة معاى ، أها أنا فى رجاك من هسى لغاية 29 يوليو .

Post: #144
Title: Re: حكايا شرقاوية ........ أو نجوع الملح
Author: زينب التجاني
Date: 09-12-2010, 02:56 PM
Parent: #143

سلام يا بكرى وكل سنة وانت طيب
ياخ لا اسكت الله لك حسا
مشتاقين وطولتا ما لاقيتك لا فى حوشك ولا فى باقى الحيشان
اظهر وبان عليك الامان

Post: #145
Title: Re: حكايا شرقاوية ........ أو نجوع الملح
Author: عبد الحفيظ عباس
Date: 09-14-2010, 09:09 PM
Parent: #144

ناس الحكاوي
كل سنة وانتو طيبين

Post: #146
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 11-13-2010, 09:53 PM
Parent: #145

Quote: سلام يا بكرى وكل سنة وانت طيب
ياخ لا اسكت الله لك حسا
مشتاقين وطولتا ما لاقيتك لا فى حوشك ولا فى باقى الحيشان
اظهر وبان عليك الامان


والله يا زوبة قضيت قرابة الشهرين بالسودان قضيتها كلها بمدنى ، لم يسعفنى الوقت لزيارة الخرطوم ، عدنا للبحرين ودخلنا فى دوّامة المدارس ، لك الشكر يا زوبة على السؤال والتهنئة ، نهنيك ونبارك ليك سمح جنياتك

Post: #147
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 11-13-2010, 09:57 PM
Parent: #146

Quote: ناس الحكاوي
كل سنة وانتو طيبين


عبد الحفيظ ولد عبّاس ، كيفنك وكيفن جنياتك ، كل سنة وإنت طيب بمناسبة عيد الأضحى المبارك أعاده الله على الجميع بالخير والبركات ، وأسهم الشركات القابضات .

Post: #148
Title: Re: حكايا شرقاوية ........ أو نجوع الملح
Author: كمال الشادي
Date: 11-20-2010, 07:02 PM
Parent: #147

الراجل الراقي ابوبكر

حبيت اعيد عليك من خلال البوست الراقي بتاعك ده
واقول ليك انت والاخت منى والاولاد
كل سنة وانتم بالف خير وعافية ان شاء الله

ويخليكم لبعض في حب ووئام وسعادة يارب

عليكم الله طل وكتر طلاتك
عشان طلاتك بتسعد كل الناس يعلم الله

تحياتي

Post: #149
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 11-20-2010, 10:04 PM
Parent: #148

Quote: عليكم الله طل وكتر طلاتك
عشان طلاتك بتسعد كل الناس يعلم الله


لو أكون زول ليهو قيمة

أسعِد الناس بى وجودى

.......................

وانا سعادتى تكتمل يا كيمو حين أكون بجوار من أحب وهم قطعاً الزقازيقاب ، إرتحالى للزقازيق كان هو الأوّل فى حياتى ، فلم أفارق مدنى قبله ، إرتحلنا لها بالوجدان قبل الأجساد ، تقاسمنا فيها البهجة والفلس والإنتشار ، تعرف يا كيمو روعة الزقازيق أفسدت على معيار تقبل الآخرين فأنا أظلمهم وأظلم نفسى حين أضاهيهم بمعايير تواضعنا عليها تمثل أنقى الصفات والصلات وأنبلها، هى روح الزقازيق وبهاء الفطرة فى أروع صورها ، ألم تنشد نسوة المدينة لفلير دمّور المسّخ الأرياح ....

Post: #150
Title: Re: حكايا شرقاوية ........ أو نجوع الملح
Author: كمال الشادي
Date: 11-20-2010, 10:17 PM
Parent: #149

عارف ابوبكر
الناس اللصيقة بالمدن والقرى النشأت فيها وبتحبها شديد
انا بحترمهم جدا

اذكر لمن كنا في مصر كان في صديق عزيز لي وهو المذيع والاعلامي الحالي محمد جمال الدين
كان (صاري ) ليهو حزمة من تراب بورسودان
وكان كلما يشتاق ليها يشم التراب


انا احترم حبك لي مدني ولي جوها ولي ناسها
وبستمتع جدا لمن بلاقي مداخلاتكم انت وناس مدني وبستمتع بيها جدا
الله يخلي ليك منى والاولاد

تحياتي

Post: #151
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 11-21-2010, 06:06 PM
Parent: #150

Quote: انا احترم حبك لي مدني ولي جوها ولي ناسها
وبستمتع جدا لمن بلاقي مداخلاتكم انت وناس مدني وبستمتع بيها جدا


تعرف يا كيمو ناس مدنى لمّا إتلمو بيكون بيناتم تفاصيل كثيرة ومرد ذلك أن مدنى مدينة بملامح قرية ، المجتمع كان فيما مضى محصور وبسيط للغاية ، يمكنك ان تشاهد أغلب الناس فى الإستاد أو دار الرياضة على قول أهل مدنى ، ويمكنك أن تلتقيهم فى المقابر حين يتنادون للقيام بواجب دفن عزيز لديهم أو حين يعودون مريضاً بالمستشفى ويمكنك لقياهم فى السوق ، لذلك حين يلتقى أبناء مدنى تجد بينهم الكثير من الذكريات والحكاوى المشتركة ، والإسترسال فى سرد هذه التفاصيل يصيب البعض بالملل فيرمون أهل مدنى بالعنصرية وهم منها براء ، أستمتاعك بتفاصيل ناس مدنى مرده لكونك فنّان ترسل الألحان شلاّلاً رويّا.

Post: #152
Title: Re: حكايا شرقاوية ........ أو نجوع الملح
Author: كمال الشادي
Date: 11-21-2010, 07:31 PM
Parent: #151

العزيز ابوبكر
انا تتجاذبني قوتان غريبتان
نشأت في جزء من طفولتي في مروي ، وهي منطقة اهلها يتغنون بالارتباط بالارض في مناهم وصحوهم
عشت القسم الاكبر بعد ذلك في الخرطوم
لا ارتباط وجداني ما بينك وبين المكان
خصوصا اذا كان ايقاع الدليب يدق في مكامن الانتماء فيك في كل ثانية
لذا وجدتني شخص غريب النشأة
انتمي إلى مكان احبه لا ازوره الا مرة في كل عشر سنوات
واعيش في منطقة لا تعرف معنى الانتماء
الخرطوم ( في هذه الجزئية ) تعتبر قاحلة
الا ام درمان
لذا عندما كنت في الزقازيق كنت عضوا في رابطة ابناء ام درمان

كنت اعرف تقريبا كل ابناء الابيض في مصر من خلال صديقي عماد شريف
وكنت اعرف كل ابناء بورسودان في مصر تقريبا من صديقي محمد جمال الدين
وكنت اعرف كل ابناء مدني في مصر تقريبا من مجموعة كبيرة من الاصدقاء من بينهم عصام سنهوري
المقيم حاليا في الدوحة

لذا تشدني جدا اخي ابوبكر رابطة العلاقة مابين الانسان والارض
لك التحية ولك آهل مدني الحلوين

Post: #153
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 12-11-2010, 08:01 PM
Parent: #152

Quote: لك التحية ولكل أهل مدني الحلوين


ولك يا كيمو الحب والسلام والتحية

Post: #154
Title: Re: حكايا شرقاوية ........ أو نجوع الملح
Author: محمد صديق
Date: 12-12-2010, 11:44 AM
Parent: #153

سلامات يا ناس

بكرى حامد يا منقة

كلما اقرا عنوان البوست ده تجى ناطة لى منيا القمح

ويجينى الكمسارى المتشعلق بره الباب داك ويكورك للسواق:

اوِّلَك زراعة يَسْطَى ...وتجينى شيبا والنّكارية ...وهيهيا

وكفر صقر....

واخش البوست القى مدنى ...

والله مدنى ما بناباها لكن الفيك اتعرفت.

Post: #155
Title: Re: حكايا شرقاوية ........ أو نجوع الملح
Author: محمد صديق
Date: 05-05-2011, 09:52 AM
Parent: #154

سلامات يا ناس

محاولة لبعث الروح فى هذا

البوست الذى تحنّط بفعل الزمن

وفعل صاحبه....

ملحوظة : بعث الوح ايضاً يشمل صاحب البوست.

Post: #156
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 06-06-2011, 05:32 PM
Parent: #155

Quote: كلما اقرا عنوان البوست ده تجى ناطة لى منيا القمح


تعرف يا جورج منيا القمح دى عندى معاها حكاية ، أول سنة وأنا ماشى الزقازيق ركبت بص شرق الدلتا الذى سلك الطريق الزراعى ، وتوقف البص بمنيا القمح وسط السوق الذى يعج بالبشر والجواميس ، جال بخاطرى أن هذه هى الزقازيق ، وقلت فى نفسى (لو كانت هذه الزقازيق فلا مناص من العودة للسودان) ، وكم إنشرحت أساريرى حين غادر البص منيا القمح وتبددت مع مغادرته ريبى وظنونى.

لك الشكر يا جورج على بعث الروح فى البوست ، أما روح صاحب البوست فقد أحسن توصيفها الفيتورى حين انشد:

شحُبَت روحى صارت شفقا

Post: #157
Title: Re: حكايا شرقاوية ........ أو نجوع الملح
Author: محمد صديق
Date: 06-08-2011, 04:00 PM
Parent: #156

سلامات يا ناس

Quote: شحُبَت روحى صارت شفقا


يا رجل ...قول كلام غير ده.

Post: #158
Title: Re: حكايا شرقاوية ........ أو نجوع الملح
Author: محمد صديق
Date: 05-18-2013, 10:22 AM
Parent: #157

سلامات يا حلوين

ود المأذون السؤال عنك لا ينقطع...

علّكْ بخير؟

Post: #159
Title: Re: حكايا شرقاوية ........ أو نجوع الملح
Author: عمر نملة
Date: 05-18-2013, 07:28 PM
Parent: #158

سلام
بكري تواصل معي في الدوحه (كعادته يلازمني في سمحي وفي كربي ) مستفسرا عن صحة اخي الطيب
وخصمني بكل ايمانياتي ان ارجع عن طريق المنامه الا اني وعدته في المره القادمه جية وذهابا عن طريق
منامته. وبعد رجوعي الي بلجيكا تواصلت معه وطلبت منه الرجوع ومااحلى رجوع ماذؤنكو.
اتوقع رجوعه اذا كثفت الجهود والتحانبيس( بكوري بحب التحنيس والشكر والباسطه). ووعدا مني ان ارسل
كيلو شوكلاته له ولك جورج ولكل من يحنس بكوري.
بكوري والله وحدتنا بينا

Post: #160
Title: Re: حكايا شرقاوية ........ أو نجوع الملح
Author: محمد صديق
Date: 05-19-2013, 07:21 AM
Parent: #159

سلامات يا حلوين

Quote: اتوقع رجوعه اذا كثفت الجهود والتحانبيس( بكوري بحب التحنيس والشكر والباسطه).


يا نملوز إزيّك....

رسّل لى تيلفونو وخلى التحانيس علىّ والباسطة والشوكولاتة عليك.

Post: #161
Title: Re: حكايا شرقاوية ........ أو نجوع الملح
Author: عمر نملة
Date: 05-19-2013, 03:27 PM
Parent: #160

سلام

موبايل: 0097339029378
[email protected]
[email protected]

Quote: رسّل لى تيلفونو وخلى التحانيس علىّ والباسطة والشوكولاتة عليك.

باقي الشكر ارشح منصور

Post: #162
Title: Re: حكايا شرقاوية ........ أو نجوع الملح
Author: محمد صديق
Date: 05-23-2013, 07:27 AM
Parent: #161

سلامات يا ناس

شكراً يا نملوز ....

عملت ليهو واحد سلك ....

Post: #163
Title: Re: حكايا شرقاوية ........ أو نجوع الملح
Author: عمر نملة
Date: 05-23-2013, 03:33 PM
Parent: #162

سلام وفرح بعودة الروح بكوره
الصديق اوفى وبكوره عمرو ماكسر خاطر. وباقي العناوين عشان ارسل الشكولاته.
اعد هذه الايام في شكولاته الامتحانات ومتوقع اعمل شكولاته بطعم القونوليز( وين تبلدينا)
والعرديب( حسب اقتراح رشيد وليه برائة الاقتراح والاختراع) وايضا شوكلاته بجبنة الغنم.
بعودة بكوري نطمع في عودة السمؤال ابوسن( ليه محبه خاصه). سبحان الله ناس حقوق
جمعتني بيهم محبه في الله.

Post: #164
Title: Re: حكايا شرقاوية ........ أو نجوع الملح
Author: أبوبكر حامد الأمين
Date: 05-26-2013, 10:30 AM
Parent: #163

الجميلين جورج وعمر النملة

أشهد الله ان لكما فى الخاطر معزّة وتقدير لا يأتيه الجفاء لامن بين يديه ولا من خَلفه ، هى شواغل ومشاغل وبعض عدم إنسجام بين النفس ومحيطها بفعل الغربة ... ربما وبفعل العمر وبفعل تصاريف الأقدار .

عمر النملة صديق الطفولة وزميل الدراسة وتوام الروح رغم شغبه ومشاكساته ، وجورج هو الملاذ حين يعز الصديق وهو رفاعابى مليان غنا وشعر وتصوف ونفس إستوطنها الحب قبل تخلّق المضغة والعلقة .

Post: #165
Title: Re: حكايا شرقاوية ........ أو نجوع الملح
Author: محمد صديق
Date: 06-02-2013, 09:50 AM
Parent: #164

سلامات يا حلوين

فى انتظار الحكايا الشرقاوية.....